KA HAHDAMNA I NI By Havali Adam

KA HAHDAMNA I NI 

(Mizo Romantic Short Story)

By

Havali Adam

Hmanhmawh viau mah ila tih ngaihna a awm lo, Traffic Jam mawlh chu a ni ka nín ni! Kan bul lawka Scooty tleng zut zut chu Taxi aṭang ka thlir zui vawng vawng a, khalh ngam nâ ila chuan ka lei chiang khawp ang, mahse scooty emaw motor reng reng chu a hlauhin ka hlau thung. Scooty chauh pawh a ni lo, Cycle thlengin ka khalh ngam lo a nia, a buaithlak zawk. Chawhnu dar kar 1 leh a chanve a ni tawh a, kei lah chu dawr aṭang school lam panin ka la kal mêk chu a ni si a, tih theih ka va nei tlem êm, ka thlen hunah ka fanuin engtin tak min lo ngai ang maw! Min lo nghak váng tawh zawk maithei, a chhan chu dar 1 leh a chanveah an bâng ṭhin tlat.

Taxi Driver chu ka'n tur leh deuh a, ani pawh a muangchâng hran lo, kan Mizoram kawng zim lutuk zawk chu a ni. Minute 5 vel kan ding tâk reng hnu chuan Traffic Police tlan turin min rawn hui a, kan tlan chhuak nghal vat a, mahse ka thaw a la veng thei chuang lo. Hrilhhai lutukin ka fanu chu a lo awm palh ang tih ka hlau ta ber, ka ngaihtuah lutukna lamah keimah leh keimah chu ka indem mawlh mawlh bawk. Dawrah khan lo awm rei lo hret ila, kan customer te kha ka mi chhawr te'n lo be mai se chuan chuti ang em emin ka tlai hauh lo vang, ka ngaihtuah tawi vang vek a ni. 

School kawt kan thlen rual chuan hmanhmawh takin ka chhuk a, pawisa ka pe te reng reng chu khawmuang lo tak ka ni. School-ah ka lut zawm zat a, mahse ka fanu hmel reng ka hmu ta hauh lo mai. Ni danga min lo nghahna ṭhinah te chuan ka kal a, ka zawng a, a awm theihna awm ang tur zawng zawng chu ka en chhuak vek a, mahse ka hmu chuang lo. Hlauhthawnnain ka khat nghal thuai a, a chhan pawh chuti ang teh tawp chuan ni dangah a awm lo ngai si lo a ni. Zirtirtute office-ah lutin ka fanu ka hmuh loh thu ka sawi zung zung a, a awmna ka zawt bawk a, an miss pakhat chuan

"A pa'n a lo hruai tawh alawm, an bân tirh khan a lo hruai nghal, hlauthawng duh suh" a rawn ti a, chawp leh chilhin ka hlauhthawnna zawng zawng a reh nghal dûak a, mahse a hnuah mak tihna ka nei zui nghal thung. 

Ni danga ka fanu school bâng ka lo nghah ṭhinna ṭhutthlengah chuan ka ṭhu a, thli chu dawn nuam tawk chiah hian a thaw heuh heuh a, khua lum mah se chu chuan a tizia viau mai. Ka ngaihtuahna erawh ka fanu leh a pa chauhin an luah thung a, engtia lo inhruai daih thei nge a nih tih chu ka hrethiam ta lo a ni. Ka bag hawngin ka zen rawk rawk a, ka phone ka hmuh rualin ka la chhuak nghal a, thla tam tak liam hnuah a vawi khat nân ka pasal lo ni tawh; inṭhenna hial ka neih pui tâk phone number chu ka hmet chhuak a, ka call zui nghal bawk a, kan inṭhen aṭang khan phone-in kan inbe leh tawh ngai miah lo va, ka call a hmuh hunah chuan mak a ti ve ngawt ang. 

"Hello" rei pawh a ring hmain a pick-up a, a aw chu hmân ang bawkin a thum hniam ṭial ruih a, a tak aiin phone-ah hian a thum lo hret a, hmaichhana kan inbiak te hi chuan a thum mah mah ṭhin. 

"Eng lo...Sangsangi i hruai em ni?" a hruai tih ka hre vek tawh tho ná a, ka'n zawt leh kher chu a nia, ka sawi tum pawh a ni em em lo, chutah engtin emaw ni tak hian ka la zâm ru deuh zui, phone kaltanga kan vawi khat inbiak lehna a nih vangte pawh a ni maithei. 

"A hlim khawp mai" a rawn ti deuh hmuk a, a aw aṭang chuan min dem deuhin ka hria, mahse dem tur ka niin ka hre bik chiah lo, duh vanga tlai pawh ka ni hleinem le.

"Traffic a Jam khanglang alawm maw le, i bula a awm chuan a ṭhat chu! Vawiin lam engati nge? Office in chawl em ni?" pangngai tak chuan ka ti ṭha ve leh mai a, ka fanu ṭawng thawm chu ka hre pha reng bawk. 

"Hna ka kal lo tih i hriatthiam mai ka ring" ka ngawi zui vang vang a, a ṭawng tam peih lo a nih hmel.

"Tun lai chu dawrah kan lún ve thei lutuk a, a bikin vawiin chu a bân hunah ka thleng hman ngâng lo a ni" mahni inthiam chawp deuh reuh leh phâ deuh reuh chuan ka ti a, ani erawh a ngawi reng a, phone a off bawk si lo va, sawi tur ka vân ta viau. 

"In inah em ni i kalpui?" kan ngawih dun vang vang hnu chuan ka ti leh ta nge nge a, ka rilrua lo lang hmasa ber a ni a, kalpui pawh ni se pawi ka ti hran lo, a pi leh pute'n an ngai ve ṭhin êm mai.

"Aw" tih chiahin min rawn chhang a, engmah lah chu a sawi zawm duh ṭhak lo leh nghal, Sangsangin a lo ko deuh chhen tih loh chu thawm dang a awm leh ta lo.

"Ka dah mai aw, nakinah ka lo lam ang" tiin kan inbiakna chu ka titawp a, kan inbe zo chiah chu ka thaw chhuak ham ham a, kan inbiak chhung zawnga ka awm dan mak zia kha keimah leh keimah pawh ka inhrethiam lo lek lêk. 

Dawr lamah ka lêt leh a, ka va thlen chuan ka chhuahsan dawn ang chiah an lo buai hle a, Pathian malsawmna ka dawng ka ti dawn nge, min dawrtu te hi an ṭhahnem ve thei khawp mai. Ka pasal nen kan inneih lai khan dawr min siam sak a, kan inṭhen hnu thlengin neitu nihna ka la chang chu a ni a, mahse a chhungte erawh an lung a ni chiah lovin ka hria. A bikin ka pasal nu, kum 6 chuang ka nu tia ka koh ṭhin chu a lung a awi vak lo, ka pasal ni se a tih tawh lam chu sût duh ngai der lo a ni bawk si. Amaherawhchu a ngaihtuah hmasa lâwk vek phawt zel a, a tawpah a ṭha ber a ngaihtuah chhuak nge nge ṭhin.

Kum 6 leh a chanve vel nupa niin kan hlim dun thei hle a, palai hmel kan hmuh nî te khan hlim tak ka ni. Ka pasal Remruata nen hian kum 1 vel chiah chiah kan inngaizawng a, inhauh pawh kan nei ngai lo. Inhmangaiha innel tawn na nâ ná chu inneih zai kan rel ta kha a ni a, mahse kan buaina a inṭan dawn chauh tih kan hre lâwk bik der si lo. Mo fel tak nih tumin theih tâwp ka chhuah a, mo leh nupui ka nih hnuah phei chuan inthlak danglam nasa tak ka ni. Ka nulat laia ka thil tih ṭhin ti tawh lovin ka zia zawng zawng deuh thaw ka paih a, mahse ka pasal nu mitah chuan ka tlung zo chuang lo a nih hmel. 

Kan inneih aṭanga thla tam pawh a la ral lo vang tihah ka ruak lo nghal a, ka lawm em em a, Remruata pawh lawm ve tak a ni. Hrisel takin ka rai ang a, nautê duhawm tak ka hring chhuak ang chu tih nâk a laiin ka beisei ang chuan ka awm lo nasa hle. Ka pasal nu chuan in chhungkhur chetah min awl tir ngai lo va, mak ka va'n ti ṭhin tak! Remruata nen hlim taka kan nuih dun te, kan titi dun te, kan awm dun hrim hrim te kha a phal lo ni berin ka hria. Remruatan dawr min siam sak dawn te khan a phal lo hmasa ber a, Remruata pa zawkin a phal thung a, khata ṭang daih tawh khan a mo atan min duh khawp lo tih ka lo hrethiam der si lo.

Vanduai thlak takin nau ka chhiat palh hlauh mai a, ka chhiat chhan ka hre chiang si a, ka rilru a nâ ve tak zet. Remruata chuan ka thlavang hauh takin a nu chu a ṭawngkhum a, an intithiam lo nghe nghe a, mahse chuti ang thil a thlen chu ka duh leh bawk si lo. Remruata chu ka khap dai thei ta hram a, a thin erawh la rim nasa tak a ni. A thinrim chu áwm ka ti hliah hliah, a nupui ka ni a, min hmangaih em em a, nautê ka chhiat chhan tak hre ve lo mah se a nu a ṭawngkhum chu pawi ka ti miah lo, a sual ve êm a ni. 

Thla 5 hnu velah nau ka keng leh nghal a, ka fimkhur dan chu pui tawh tak a ni. Kei cháng ka ni lo, Remruata phei chuan hna ka thawh a phal lo nghal bur a, office kal lova min awmpui chângte kha a ngah phah ṭhin. A awm dan leh min duat dan te chu ka nu'n a lo ngaithei lo leh pek a, office kal turin a ti chhên a, sawi duh ngat ila chuan ka laka a awm dan chu tu tan pawh thinrim thlak tak a ni. Ka nu leh pate ngei pawh ka hrilh ngai lo, a chhan chu pasal nei tawh ka ni a, ka pasal chuan hre hmasa ber se ka ti a, mahse ani zawng ka hrilh a nih chuan in chhungkhur a nawm loh phah leh emaw a ni ang a, ka hrilh duh lo ta law law. 

Pathian zarah fanu ka nei ve ta nge nge a, ka rai chhung chuan thil chi hrang hrang ka tâwk nasa hle a; a bikin ka pasal nu hnen aṭang. Nautê chhiat thei zawnga min chet tir a tum ṭhin a, mahse luhlul ka chhuah ve tlat tawh thung. Min ṭawngkhum hmarh hmarh te hian ka ngawi reng zel a, nautê chu kan chân leh ang tih mawlh ka hlau a ni. Vawi khat erawh ka che sual ṭep a, chu pawh ka nu vang bawk. Ka kalna tur chhuat chu a lo nawt huh vak a, ka vawn turin dawhkan lo awm lo se chu ka tlu ang a, nautê lam thlengin a pawi thui phah maithei, mahse ka tlu lo hlauh. 

Kum 2 chuang ka mo hnu chuan mi vau a ching chho ṭan ta, chu pawh vawi khat chiah ka pasal hnena vuiváina thu ka thlen avangin a ni leh nghal. Remruatan thinrim zetin a ṭawngkhum leh a, a nu chuan a ben phah hial a, nuam lo ka tih dan chu pui tak a ni. Chumi hnu chuan vawi khat mah ka laka ka nu awm dan avanga vuina thu ka kâ aṭang a chhuak leh tawh ngai lo va, ka tuarzuau deuh mah mah ni te'n ka inhria a, in chhungkhur a buaia Remruata leh a nu an inhmuh thiam loh ai chuan ngawih chu a finthlak zawkin ka hre ta a ni. Ka nu erawh a awm dan a ngai reng a, changkangin hmelṭha viau mah se ka hmu ṭha thei tawh lo. 

Kum a liam ve zel a, ka beisei loh lutukin ka pasal Remruata chuan hmeichhe kawp lai deuh reuh hi a nei a, a laka ka thin a rim tehreng nen ka chungah a thinrim lêt zawk daih a, a chhan ka hre chiah chu hrilhhai tak ka ni. Ngaihzawng nei angin min lo ngai chu niin, engmah ka hrethiam bik lo. Kan fanu paw'n kum 5 lai a tling ve tawh a, a dawr min siam saka ka kal ṭhin tih loh chu chhuahna mumal ka nei ngai lo, inah ka fanu ka awmpui deuh chawt a ni mai. Chuti chung chuan ngaihzawng nei angin min la ngai tlat bawk si, kan customer pakhat nen kan inbe lai thlalak thlengin min hmuh a, ka ngaihzawng a nih a ring bur a, eng ang paw'n insawifiah tum mah ila awmzia a awm si lo, ka tan chuan ngawih tawp a ni mai. 

Chumi ni aṭang chuan kan nupa inkar a chhe ta em em a, kan fanu Sangsangi hmuhah erawh kan inhau ngai lo thung. Engkim chu ruahman lâwkna a ang ka ti dawn a, rinhlelh deuh pawh ka nei a, mahse ka hre sual ang tih ka hlau bawk si. Ni e, zep lovah chuan ka pasal nu chu ka ringhlel ber, ani ni lo kan nupa inkar tichhe duh tur ka hre mai lo tlat. Chutah Remruata chuan ngaihzawng a nei tak tak zui a, nei lo tur ka tih lahin min runluih zual zel si a, a pawi ber chu ngaihzawng ka nei emaw a ti tlat a, chu vanga ngaihzawng nei ve ta chu niin ka hria.

Kan tawpna chu inṭhen a ni ta hial a, ka tuar nâ khawp mai, mahse tih lan ka tum lem lo. Kan fanu erawh a nu ka nihna angin ka bula awmtir ka tum tlat a, Remruatan phal mah se a nu zawk chuan Sangsangi awmpui a phal lo tlat thung a, a thu angin ka awm tawh lo chiang teh e. Inṭhenin awm hrang tawh mah ila ka fanu leh a pa erawh an inhmuh ziah thung a, School thlengin an inthlah a, hruai lam hi chu an ti ngai lo tluk a ni. Kum 1 chuang chu inṭhen si, kan fanu enkawl dun tho siin kan awm a, nupa kan nih lai ang khan ngaihzawng a neih ka hre leh tawh miah lo bawk. 

A changin kan fanu chu a pate inah a riak phei a, thla khatah vawi hnih te a riak phei ve ṭhin. Ka tel lova a riah tawh hi chuan muttui a har thei khawp a, a pa a ngai viau bawk si, kan awm dan nei nuaih chu felfai ang deuhin lang mah se a hnawk ru zekin ka hre thung. Zep lovah chuan kan inṭhen chu nuam ka ti nge ti lo pawh ka hre lo, ka thawven phah paw'n ka hre lo bawk a, ka awm âwmin ka awm ve tawp a ni. A chang hi chuan nupa hlim tak kan nih lai te, kan inngaihzawn lai chênin ka ngaihtuah chhuak ṭhin a, a tak ni lovin mitthla leh suangtuahna mai mai vek a ni tawh tih erawh ka hre chiang hle. 

Sunday a ni a, chawhma inkhawmin chawhnu erawh ka inkhawm ta lo va, naupang chawhnu inkhawm a awm lo ve leh zel bawk nen Sangsangi pawh a inkhawm bik lo. Kan nufain room-ah kan awm a, thil a ziak mial mial reuh a, kan awm dun tawh hi chuan number te, ABC te leh eng eng emaw ni hi kan inzirtir ṭhin a, tun ṭum erawh a duh dûh a ziak vel mai mai thung. Ka thaw a sat deuh avangin ka inbual a, rei pawh ka inbual lo. Sangsangi chuan khuma ka phone dah chu a la a, games a khel duh a nih ka ring deuh tawp. Ka thu lovin phone hi a khawih ngai lo va, a lâk dawn pawh chuan min dil thlap a, ka lo phal ve mai. 

"Apa, lo lêng la, ka ngai che ê" ka fanu ṭawng dan avang chuan ka inha lai pawh ka tawp deuh chat a, engtin nge a pa a call thiam ka hre miah lo, ka puihna tel lova a pa a call thiam chu mak ti tak ka ni. 

"Yes!" ka fanu chu ka en tlawk tlawk a, hlim zetin phone a hmet tawp a, a che vel reng reng chu ka mak tih a tling ngawih ngawih. 

"Sangsang, engtin nge i pa kha i call thiam a?" ka ti ta nge nge a, a bulah ka ṭhu thla zui nghal bawk. 

"Apa'n min zirtir vek alawm, nu apa a lo kal dawn asin, a bulah ka riak phei châk ê" min dil titih hian a ṭawng zet zet reuh a, ka nuih tawp ringawt. 

"Nang chu riah phei i ti reng a, kâr hmasa paw'n i riah tawh khâ, naktukah School i kal dawn bawk si. Kâr leh khi i riah hun alawm, kâr lehah i riak law law zawk dawn nia" ka tih chuan min dil nawn leh tawh chuang lo va, a lungawi loh phah lovin ka hria. 

Minute tam a ral hmain Remruata chu a lo thleng a, kan fanu chu a bulah a tâl leh chat tawh. Eng eng emaw ni hi a sawi neuh neuh reuh a, a pa chu a lo ngai viau tak tak a nih ka ring. Remruata nen chuan kan inbe lem lo va, ka pate nen an inbe zawk. Thingpui ka siamsak a, inhmu ṭhin mah ila kan inbe khât thei khawp mai. Sawi tur a vâng ve ṭhin êm bawk a, mi ṭawng duh zawk zawk a ni lo leh zel a, nupa kan nih lai nen chuan inthlau tawh tak a ni. Sangsangi chuan kan pathuma lên chhuah a rawt leh ta tlat mai, Remruata nen chuan kan inen nghal a, kan hawi sawn leh vat thung. Ka fanu duh ang chuan kan lêng chhuak ta ngei a, khawiah nge kan kal dawn pawh ka hre lo. 

Hlimen lamah kan tlan zel a, Lalsavunga Park-ah Remruata chuan min hruai a, mi dang lêng pawh an lo tam khawp mai. Inngaizawng te, chhungkua te, ṭhianzaho te an ni hlawm a, thla an la mawlh mawlh a, keini pathum erawh thlalak lam a lang lo a ni mahna. Ka fanu leh a pa chu an inbe char char a, keiin an hnungah ka zui ve zel a, ka fanu a hlim phawt chuan ka hlim ang ka ti ve tak ná a, ka hlim chuang miah lo. Ka awm a nuam lo tulh tulh a, remchang laiah chuan ka ṭhu ta ringawt. Ka mit ka chhing vang vang a, ka lu a hai deuh riai riai bawk a, chuti ang chuan ni dangah ka awm ngai miah lo, ka lu hai chhhan te lah chu ka hre lo nasa si.

Inthing harhin ka tho a, ka fanu te awmna lamah chuan ka kal a, min rawn ngaihtuah miah lo tih a hriat khawp mai. An bulah chuan awmpui satliah ang mai ka ni, rilru tih nât ka tum loh tehreng nen ka rilru a nâ tlat bawk si. Ka tawt deuh pup pup a, ka taksa lam a nuam lo bawk nen hrilh buai lovin motor awmna lamah ka kal ta daih a, motor kawngka hawn mai ka tum chu a lo in-lock tlat zui. A ngaite bawkin ka lu chu a rawn hai leh riai riai a, motor bula lung chungah chuan ka ṭhu ta tawp a, motor ka ngheng bawk a, ka nuam lo tak zet a ni.

"Zonun!" min sawi dat dat chunga min kotu aw ka hriat rualin ka meng thuai a, thawh nghal phat ka tum chu ka la tlu ṭep zui, ka dar leh ka bana min chelhtu awm lo se chu ka tluk ngei ka ring. 

"Kan haw tawh mai dawn em ni ang? Ka mut a chhuak deuh a, tum loh deuhin ka lo muhil palh a nih dawn hi!" a bân chu nu ka nam sawn a, min en reng tih ka hria, mahse ka en lêt duh lo thung. 

"I nuamsam chiah lovin ka hria" ka bânah bawk a rawn vuan leh a, a bulah kan fanu a awm tawh miah lo leh nghal a, khawiah tak awm ang maw!

"Ka ṭha e, pawi i tih loh chuan haw thuai ka duh, khawiah nge Sangsangi hi a awm reng reng?" tiin zawhna ka zawh zawm nghal zat a, ka bân a vawnna chu a la thlah duh chuang lo.

"Motor chhungah ka mut tawh, engati nge he lai daih daihah i lo awm?" a tih chuan ka hawi kual a, kan chuanna motor emaw tia ka lo nghen chu mi dang motor zawk a lo ni a, hawn ka tum pawha a theih miah loh kha a mak hran ta lo e! 

"Enteh, ka ṭawng peih vak lo a nia, haw ka duh tawh" ti deuh hmarhin a bân bawk chu ka thing thla a, kal nghal mai tuma ka inher chu ka àwn riai riai a, mahse vawi leh khatah ka kâng ta thut. 

"I ṭha tawp lo, i mut chhuah vang pawh a ni lo tih ka hria" min pawm reng chunga ṭawng thum bul bul chu ka en ṭha peih tawh lo, a hmel hmu lo mah ila Remruata a ni tih ka chiang a ni. 

Motor chhunga min pawm luh hnu chuan ka meng ve leh ta hram a, ka chau tak zet a ni. Ani pawh khawmuang lo zet hian a tlan chhuak nghal a, ka mit ka men leh meuh chuan khumah ka lo mu fel diam tawh. Ka bulah ka fanu a muhil bam bawk a, ka awm dan chu mawi lo ka ti hnuhnawh hle. Room-ah ka nu a rawn lut a, muhil ang chiahin ka lo awm a, a chhuah hnu lawkah ka pa a rawn lut ve leh a, chutah pawh chuan a ngaite bawkin ka muhil der leh ta tho. Kei leh ka fanu chiah kan awm dun tâkah chuan ka tho chhuak a, ka luhai lutuk pawh a zia ta deuh e. 

Kan lên chhuah laia ka kawr hak ang âng kha ka la inbel a, awmhmun kawr mai mai hak ka châk tawh avangin kawr thlak chu ka duh a ni. Almirah hawngin hak nuam tur chi chu ka phawrh chhuak a, kan lên laia ka awm dan ka ngaihtuah lêt rauh rauh bawk. Remruata lakah chuan ka inthlahrung thar ngei mai, a hmel ka hmu bawk si lo va, a haw daih tawh a nih ka ring. Kan inhak hma chuan ka inphih dai leh tê tê phawt a, Fan erawh ka on duh ta lo, ka fanu a hritlan phah ang tih ka hlau a ni. Ka thawmhnaw hak lai chu bal bawmah ka vawm lut a, engmah inbel lova ka awm lai chuan kawngka lamah thawm a rawn awm ta mai. 

"Chhuak thuai rawh" ka ti nghal vat a, ka kawr ken lai chuan ka inkhuh a, mahse ka taksa a khuh kim zo thawt lo, kawr ringawtin engtin ka inkhuh zawh reng reng ang ni! 

"Ka thusawi i hre lo em ni?" ṭawng rin ka hlau bawk si, ani lah chuan min en reng thung a, a haw daih tawh emaw ka ti a, a lo la haw teuh lo a nih hmel. 

"A enga chu nge i zah chhan ber?" rum zetin ka melh hrawk a, a zawhna min zawh chu a hun lo lulai lutuk, chutah room aṭanga chhuah a hnêkin ka lamah a la rawn pen phei zui. 

"Khawngaihin chhuak rawh Remruat" ka ti ta thlawt a, ṭawng rin hlau lo ila chuan ṭawngkam ṭha ka chhah chhuah ka ring tawh lo, ka âng tawn tâwn tawh zawk ngei ang. 

"Ka hmuha ka sik kual vek tawh hnu a ni tih i theihnghilh em ni?" a ṭawngkam aṭang chuan min hmusit zia leh min ngaihnep zia hai theih rual a ni lo, rilru nâ zetin ka en tlawk tlawk ta ringawt.

"I ṭha tawh em?" ka melh chho ral a, min biak dan chu a hmasa zawk nen inang lo tak a ni. 

"I dam ṭha lo a nih chuan dawrah pawh kal tawh rih lo ang che" ti lehin ka chal chu a rawn tawk a, saruak deuh thawin awm mah ila engah teh vak mah a ngai lo ni berin a lang. 

"Kawr ka ha duh tawh" ka tih chuan ka mitah tak a rawn en a, a meng nûr nang zawm zat bawk a, eng vanga chhuah mai tum lo nge a nih ka hre lo tak zet. 

"I ha thei reng alawm"

"Nupa kan ni tawh lo tih i theihnghilh a nih ka ring" ka ti ve ta salh a, a meng pangngai zui nghal a, ka hmel ni lova ka taksa a en lai te chuan ka lo mur er er thei vel a nih chu! Awihawm loh tak a ni! 

"Ka theihnghilh chiang e" ti supin a inher a, kawngka lamah a kal phei lai chuan ka en reng a, a chhuah fel hma chu inhak ka tum lo bur.

"Ka pi leh ka pute'n zanriah ei ve nghal turin min sawm a, ka hnar ta lo mai" lo hawi lêt leh hramin kawngka bul aṭang chuan a rawn ti fiah thum fak a, chhan pawh ka tum lo, ka nu leh pate zawkin ka rilru an luah ta daih. 

A thusawi ngaihtuah hnuhnawh rauh rauhin thawmhnaw ka ha sawk sawk a, a lo lut leh thut ang tih a hlauhawm tlat. Room kawngka chu hawngin sitting room lam ka en a, ka pa chiah a lo ṭhu a, ka nu leh Remruata erawh choka lamah an awm tih an ṭawng ri aṭang ka hre thei thung. Khumah ka ṭhu leh tawp a, ka fanu eng reng chung chuan thil dang daih ka ngaihtuah a, kan inṭhen tawh hnu pawha ka chhungte nen an la inpawh em em chu mak tih tham a ni. Kei erawh a nu leh pate nen kan inhmu tawh ngai mang lo va, a chang zeuh zeuhin Sangsangi ka va hruai ṭhin a, chu bak chu lên luh ka nei ngai lo. A pa zawk hi chuan a mo ang maiin min la en tih ka hria, ka nu nen erawh inhre ngai lo ang hmak kan ni.

Chutih rual chuan Sangsangi a duat hlum lo chauh thung a, a va riah phei chang te hian ei tur leh thil thar a rawn nei haw ziah ṭhin. Keimah tak hi chuan ka phal lutuk hran lo, a chhan chu a nu ka ni a, ka fanu chawmna tur leh mamawh leina tur te chu ka thawk chhuak ve alawm, ka leisak thei lo ang hrima thil a lo leisak ṭeuh zel chu ka duh lo a ni ber. Remruata erawh thil inleisak tih velah hi chuan a mi sa vak lém lo, a fanu bulah a awm tawp a, chu chu Sangsangi paw'n a mamawh ber a ni. Kâr tawpah inhmu ziah mah se a ngai em em zel a, phone te hian ka call sak tawp ṭhin. Keimah nen tak hi chuan ka be ngai lo va, phone kaltlanga kan inbiak awm chhun chu Sangsangi a lo hruai avanga ka call kha a ni mai.

"Nu" ka fanu mutna lam chu ka hawi nghal a, mu tho hlim tih hriat takin a mit chu a bui deuh a, a harhna a la rei lo tih chu hrilh hranpa ka ngai tawh lo. 

"Apa a haw tawh em?" a rawn ti leh nghal a, tho ṭaih ṭaih hian ka nghawngah min rawn kuah zawm zat a, kei paw'n lo pawm chatin ka mal chungah ka ṭhut tir ve nghal bawk

"Apa chuan chaw a lo ei dawn alawm, api nen ei rawng an bawl mêk" nui sâng chuan ka ti a, a sam phir deuh nûaih chu hui mam sakin lukham bula a sam ṭawnna chu ka la a, a sam ka ṭawn ṭhat sak lai te chuan min kuah ran a, a mut a la chhuak a ni maithei. 

"Room aṭang hian chhuak daih ang aw" ka tih chuan a lo bu nghauh nghauh a, din puiin room aṭang chuan ka pawm chhuak a, room kan chhuahsan hnuah erawh pawm duh tawh lovin a tawlh thla a, choka lamah a kal zui ta nal nal. 

"Hetah lo ṭhu teh Zonun, eng emaw sawi pui duh che ka nei" choka lama kal ka tum laiin ka pa chuan min lo ko a, a ṭhutna bulah chuan ka ṭhu ve nghal mai bawk a, eng tak min sawipui duh ang maw! 

"Nu, apa ka hmu miah lo. Apu, apa kha khawiah nge?" Sangsangi lo ṭawng avang chuan ṭawng tuma a áng zuau pawh a ngawi leh rih a, ka pa chu a thutak hmel viauin ka hria, nge ka hmu sual zawk. 

"A lo thleng ṭep tawh ang, an ina mi ui sa a va la lawk a, chaw a lo ei dawn alawm ka tunu" tiin ka pa chuan a chhang ve leh mai bawk a, kawngkapui lamah thawm a rawn awm a, Remruata hmel chu ka hmu ta ngei e. 

"Apa, chaw i lo ei dawn tak tak ti raw?" tih leh Sangsangi chuan a pa lam pan phei a rual nghal a, a tlanin a tlan phei zawk maw le.

"Ei dawn e, tui deuhin ui sa hi ka siam ang a, chaw i ei ṭeuh dawn nia aw ka Duattê" a bianga piai sak zeuh pah hian Remruata chuan choka lamah a kal pui nghal daih a, sa hi chu a siam thiam ve thlawt a, sa a va lâk hnuhnawh danah ka nu'n siam turin a ti leh tawh a ni ngei ang. 

"Zonun" ka pa lam chu ka hawi a, a hma aia thutak hmel zawk hian min lo en reng a, a rilrua awm tur awm ang pakhat mah ka hre lo chiang hle. 

"Ngai leh lo, zanriah ei hunah zawk le" a ti leh ang lawi a, ka pa awm dan chu a mak tawp, tlai dang a ang lo, eng emaw tak thil vei chu a nei a ni.

Sangsangi leh a pa chu ei rawng bawl pahin an inchhaih nui uarh uarh a, ka nu pawh a tel ve zeuh zeuh a, kei erawh an hmuh loh laiin ka lo nui ve var var thung. Ka pa tih loh chu chokaah kan awm vek a, ei rawng kan bawl sap sap a, zan inkhawm kan duh dawn bawk si a, chaw ei hma a ngai hrim hrim. Purun vâr kheh paha ka nuih sen sen lai chuan ka lamah Remruata a rawn hawi thut a, rang lutuk tak mai hian ka nui tawp chat a, an mahni ka enna aṭang ka mit ka la sawn thuai bawk. Purun vâr leh bahkhawr chu rawt chipin samṭawk leh bawkbawn baiah ka thlak a, ka zâm ruk danah Remruata chuan min la en reng a nih ka ring.

Ka purun vâr khehna chemtê lak ka tum lai tak chuan chemtê bula phuihnam awmna polythene chu a rawn la, ka kut ka la lêt rang ngei mai. Anmahni hnungchhawn zawngin ka awm ta reng a, bai chhuan laiah chuan pardi leh hmarcha sen tam vak lo ka thlak leh bawk a, a rim chu a tui nghal viau mai. Hmarcha rim chuan ka hnar a rawn verh a, awm sawn vatin ka hahchhiau a, vawi khat mai ni lo ka la hahchhiau zui. Ka bula mite lam chu ka hawi zeuh a, kan fanuin be melh melh mah se Remruata chuan min en char char a, nuam lo ti tak ka ni. Ka hmai ka'n phih ringawt a, ka nu lah a awm loh lai tak a ni bawk si, gas bula ka din leh hnu rei lovah kut lum vung vung hian ka dar a rawn khawih ta. 

"Damdawi i ei lo em ni?" inher lo mah ila Remruata ngei a ni tih ka hria, ka chhang lêm chuang hlei lo va, a ngaihtuah tur taka ka awm chu nuam ka ti lo ru ngei mai. 

"Zonun" tih leh a lam hawi zawnga min kawih her a rual nghal a, ka chhoh melh ral a, ani paw'n min ngaihtuah hmel deuh hian min chhuk melh run bawk.

"Ka ṭha e, hmarcha rim khan ka hnar a tiza alawm maw le" ka tih chuan awih loh hmel zetin min en a, min en dan aṭang chuan ka awm dan a chik ngawih ngawih hi a ni tawp.

"Ka Duattê, anu hi hritlang damdawi va laksak rawh le, a awmna i hre lo a nih chuan api emaw apu emaw kha i zawt mai dawn nia" tiin a fanu chu a tir a, kei chuan ṭul ka lo ti lo khawp.

"Min en teh" ka khabe chu a rawn chawi a, ka mit mai ni lo ka biang leh ka nghawng chin chung lam chu ngunthluk fê hian a en kual dân dan a, engtin emaw ni hian ka awm ziah zui. 

"Ka ṭha ka tih khá, min ngaihtuah ang deuhin awm suh" a kut chu ka phih thla deuh sawk a, hnung chhawn zawngin ka inher a, bai chhuan lai chu ka chawk ta daih bawk. 

"Ka ngaihtuah lo che i tihna em ni?" a zawhna chu ka chhang buai vel peih lo, kum khat lâi kan inṭhen tawh a, kâr tawpa kan fanu a rawn hmu ziah te, chaw hial a rawn ei ngam leh si te chu ka tha a nâ deuh tlat. 

"Thla tawpah hian inhmu ziah tawh zawk ula a ṭha ang, kâr tawp hi chu a zing mah mah a ni" ka aw chu a nêm hran lo, a haw duh tan chuan a huat thla la viau zawk maithei a ni.

"Chu zawng i thu a ni lo e" a rawn ti ram ta hmuk réng a, ka ṭawng dan chu a láwm zawng a ni lo tih ka hria, Sangsangi lo thleng hman lo se chu thil dang pawh a sawi hial ang ka ring.

Remruata bawk chuan damdawi leh noa thlit chhuah sa tui chu ka bulah a rawn hûng a, ka nu a lo lut ve chiah bawk nen hnial buai lovin ka ei ve mai a, Remruata chu ka en leh zeuh kher a, inchhir tak ka ni. Lungawi lo hmel zet hian min en char char a, ka awm rèng a nuam thei ta bik lo. A thu hrimah a huat turin ka sawi pawh a ni lo, mahse ka ṭawng dan kha kei ngei paw'n ka huat ka ring thung. Kâr tawpa inhmu ziah ṭhin kha thla tawpa inhmu tur angin ka ti deuh tawp kha a nia, ka pasal la ni reng ang maia min ngaihtuah ka hlauh luatah a huat zawng tak ka sawi chhuak a ni ber. Bai chhuan a hmin tawh tho bawk nen rei pawh awm tawh lovin ka chhuak ta daih a, a mizia ka hre chiang ve thawkhat a, a thinrim hmel hmuh reng ka peih teuh lo mai. 

"Hetia awm reng hi in ning lo em ni?" zanriah ei laiin ka pa chuan a rawn ti deuh thut a, ka nu leh Sangsangi erawh an kham daih tawh thung a, Remruata nen chuan kan inmelh rang hle bawk. 

"In inṭhen tawh tih chu hriat sa a ni a, in pahnih hníh hian inenfiah rawh u. Remruata pawh i fanuin a ngai em em che a, nang paw'n i ngai tho. Mipa i ni a, hetia awm reng ringawt zawng a dik lo" ka pa bawk chuan a ti leh charh charh a, ka ṭawng lo thei ta lo.

"Ka pa, i ngaihtuahnaa awm ka hre miah lo, mahse lêt leh ka tum tawh lo bur tih erawh hria la ka duh. Kan inṭhen chhan kha ka la hre reng a, ka theihnghilh mai mai lo tawp ang" ti salh salhin ka tho va, Remruata erawh a ngawi reng thung.

"Kal rih lo teh, engtin emaw talin in inkar hi siam ṭha zawk rawh u. Sangsangi te hi in ngaihtuah ve ngai em? Sum in thawk chhuak a, in fanu erawh a tua mah hian in ngaihsak tak tak lo" ka pa chu ka en kar a, min dem tel tlata hriatna ka nei. 

"Ka pa, ka theih tawpa ṭhain ka fanu hi ka enkawl ve asin, i hre lo nge i hre lo der zawk?" ka aw chu a nem hran lo, Remruata pawh nuam a ti vak lo a ni ang chaw a ei tawh lo hrim hrim. 

"I enkawl lo ka ti lo, in fanu mamawh hi in pe lo ve ve zawk a ni" ti deuh hmukin a tho a, a kham ta daih a, Remruata nen chuan kan inen zawk a, ngawi renga a ṭhu ringawt te chu ka thin a tirim tet tetin ka hria. 

Chaw kan ei kham fel hnu chuan Sangsangin a pa chu inkhawm puiah a sawm leh ta tlat mai, a va'n buaithlak ṭhin tak. Thil dang sawi pui ka'n tum ve tak ná a, a pa ngawr ngawr chu a ngaihtuah bawk si. A tawpah erawh Remruata chuan kan fanu inkhawm pui chu a rem ti ta nge nge a, inah hawin a thawmhnaw a va thlak a, Sangsangi chu hauh chi niin ka hre bawk si lo. Insiam tura a pa a haw dawn te chuan a'n ngen leh ta zel a, chu em em erawh kan phal ta lo a ni. Kan inkhawm ho ta ngei a, inkhawm lai chuan kan fanu chu a muhil a, a pa'n a pawm a, kei erawh Remruata hlat deuh takin ka ṭhu thung.

Inkhawm kan bâng a, Remruata chu haw nghal mai lovin a ṭhu khawmuang leh ang lawi a, ka nu leh pate nen chuan thil eng eng emaw ni hi an sawi a, Sangsangi erawh khumah a muhil daih tawh thung. An pathuma in tur thingpui ka siamsak a, ka pa awm dan ber chu mak ka ti a ni. Chaw ei lai te kha chuan kan pahnih hníh khan min zilh kha a nia, tunah lêm Remruata chu a ngei hmel vak leh ta lo. Thingpui ka pek hnu chuan room-ah ka lut daih a, an bulah ṭhu ve pawh ni ila sawi tur ka hre ve tak tak chuang lo ang. Ka fanu muhil bam chu ka en reng a, chaw ei laia ka pa thusawi te chu ka hre chhuak bawk a, ngaihtuahna a kal thui leh ta khawp mai. 

Naupang ṭap thawmah chuan ka harh vat a, Sangsangi chu uar zet hian a ṭap hliam hliam a, dar zat ka en chuan dar 1 a lo pel daih tawh. Mumang ṭha lo a neih leh neih loh ka zawt a, min chhang lo va, mang ṭha lo a neih ka ring ve tawp. Ka âwma kuah betin ka awi hliau hliau a, ṭap chunga a thumal rawn sawi chhuah hmasa ber chu a pa bawk a ni leh ta. A mumang ka zawh chuan a thiam ang tâwk hian a pa a hmuh thu te, a pa'n a kal bosan daih thu te a sawi zuah zuah a, a la ṭap pah reng bawk. A ṭap bâng hlei thei lo chu ka buaina a ni leh ta, ka nu leh pa pawh an rawn lut nghe nghe a, mahse anni paw'n an thlem bâng thei mai bik lo.

"Hello" a aw aṭang chuan a mu tawh tih a hriat hle a, chuti ang huna kaih thawh a ngai chu nuam lo ka ti tak zet, Sangsangi lahin a hmu duh tlat bawk si a ni.

"Eng lo a nia....aaa...a ngai leh lo mai" ti bah deuh nawk nawkin phone chu ka hmet tawp daih a, ka nu leh pa chuan ka chet dan vel chu min lo en reng a, Remruata chu tihbuai loh law law la duh zawk, mahse phone call ka dawng leh rang ngei mai. 

"Min lo biak chhan kha ṭha tak a awm ka ring" phone ka lâk rual chuan chu thu chu a rawn sawi hmasa ber a, a aw chu tho phang aw pawh a ni tawh lo, a pangngai vek tawhin ka hria.

"Sawi la" amah bawk chu a ṭawng leh a, ka la ngawi deuh ren ráwn a, thawk ka la hawk bawk a, phone aṭang chuan Sangsangi ṭap thawm chu a hriat phak reng ka ring.

"I peih chuan lo phei leh lawk mai teh, mahse i peih loh chuan a ngai chuang lo" ka sawi zo hman ṭawk ang tihah amah zawkin a hmet tawp hmak a, Sangsangi lah a ṭap uar phian bawk si, ka rilru a hah ru tak zet. 

"A lo kal dawn em?" ka nu chuan a lo ti a, ka hriat loh thuin ka chhang nghal a, ka hre lo miau alawm, phone min off khum hmak a nih kha! 

Kan inbiak aṭang minute 10 pawh a ral lo vang tihah Remruata hmel chu kan hmu ta ngei a, zep lovah chuan a lo phei ring deuh si, ring chiah si lovin ka awm a, a pa hmel a hmuh rualin Sangsangi lah chu a la ṭap uar sauh zui. Remruata chuan pawm vatin ṭap tawh lo tur chuan a thlem mawlh mawlh a, kan fanu pawh zawi zawiin a ṭap bang ve leh mai bawk. Rei lovah a pa dara beiin a muhil zui nghal a, a ṭap muhil a ni ber. Khuma mut mai lovin a awi leh deuh a, tih ve tur reng ka hre lo. Ka kut ka sik neuh neuh a, an pafa inpawm muhil chu ka thlir deuh tawp a, chu chu ka tih theih awm chhun a ni rih tlat. 

"Engati nge ka fanu hi a ṭah?" khuma a mut fel hnu chuan a rawn ti thum hniam ruih a, ka nu leh pa an phei tawh bawk a, a aw chu hniam viau mah se a fiah ṭha khawp mai. 

"A mumangah a hmu che a, i lo kal bosan daih a ni awm e. A ṭap nghal vak vak a, mang chhe tak a mang a ni ngei ang. A zia lo ngawt mai, i mu tui lai kan rawn kai tho ringawt che chu a nia, min hrethiam dawn nia" ka tih chuan

"Ka fanu alawm a nih, eng vangin nge min mamawh a nih chuan ka lo kal loh ngawt ang?" a rawn ti nghal a, a lam ka hawi thuai a, kan inen chiang ang reng.

"Nia, i fanu alawm a nih" ti sepin ka hawi sawn a, kan ngawih vang vang hnu chuan ka mal chunga ka kut che sêk chu a rawn hum a, ka va han phu nasa tehreng êm. 

"En teh Zonun, i pa thusawi kha ka lo ngaihtuah" a tih laklawh lai chuan ka ṭhutna aṭang ka tho vat a, ka kut chu la sawnin ka din hlat nghal thuai a, a sawi tum chu ka hre chiang lutuk tlat.

"Haw tawh la a ṭhain ka hria, Sangsangi pawh a mut leh tawh hi!" en miah lo chuan ka ti a, ka aw chu thunun ka tum nen a khur deuh ta tho va, ka awm dan chu a hrethiam ang tih ka hlau ru hle. 

"Khawngaihin haw tawh rawh, chaw ei laia ka pa thusawi kha chu engah mah ngai suh. Kan inṭhen chhan te kha ngaihtuah la, eng vanga inṭhen nge kan nih tih te kha i rilruah awm reng rawh se" ka ti leh mawlh mawlh a, che thutin ka hnung lam aṭang min rawn kuah a nih chu! 

"Ka ngai ṭhin che Zonun, ka ngai em em che" tal chhuah tumin ka che nghal phat a, mahse ka tal chhuak thei lo nasa mai, min kuah ngheh dan chu pui tak a ni. 

"Nang pawh hi i la danglam miah lo, ka laka i rilru puthmang hi a la danglam lo hrim hrim" ti hniam leh ruihin min kuai her a, ka mittui te lah chu awlsam takin an lo la hnam ṭiam ṭiam zui. 

"Kan inṭhen chhan kha i hre tawh lo em ni?" mittui tling pamin ka ti thawp raih a, min khawngaih hmel zet hian min en ngawt ngawt a, ka tawlh sawn lo a nih chuan ka mittui a tla thei tak ngial dawnin ka hria. 

"Awm sawn tum rih lo teh, ka hria alawm, ka hre chiang lutuk" ti supin ka tawlh hla tur chu a âwmah min kuah bet a, hun kal tawh ngaihtuahin ka mittui chu a dir zawih zawih a, mahse thawm pakhat mah ka chhuah lo thung. 

"Va haw tawh rawh le" ka aw chhuak reng reng chu a dik hlei thei tawh lo, haw turin ka ti ve tak ná a, a tua mah kan che sawn lo hrim hrim a, eng vanga awm sawn tum miah lo chu nge ka nih ka hre tawh bik lo. 

"Ka riah i duh nge ka haw zawk dawn?" a zawhna chu ka chhang thei ta hauh lo mai, zep lovah chuan a taksa nghenga ka awm chu a hahdam thlak tak zet, ka awm dan chu a hriatthiam vek tawh ka ring. 

"Ka riak ve mai dawn asin" ka khabe chawia a rawn ti leh chiah chu ka harh chhuak chiang khawp mai, a taksa aṭang ka awm sawn vat a, ka chet dan teh thut chuan a ṭhawn hmel hle bawk. 

"Haw tawh rawh, i zuam theih tura ka awm avangin min hrethiam dawn nia, a thlen nawn tawh loh ka beisei" ti deuh hmarh hmarhin room aṭang chuan ka chhuak a, ani paw'n min lo zui tih ka hre thei. 

"Inenkawl ṭha la, i hriselna ngai pawimawh ang che. Damdawi ei theihnghilh tawh bawk suh, tun lai chu i hmel a dâng" kan in a chhuahsan hma chuan a ti ram hmuk hmuk a, chu thu a sawi zawhah erawh a chhuak ta vang vang.

Chumi zan aṭang chuan kan inbe lo leh ta char char a, phone kaltlang paw'n kan inbe leh tawh lo hrim hrim. Sangsangi nen hi chuan an be ziah a, an inchhaih hlim a, kár tawpah pawh ka tel lovin an lêng chhuak ta ziah bawk. An bula lêng ve turin min sawm ve ziah tho ná a, chhuanlam eng eng emaw ni siamin ka pehhel zel tawh thung. Dawr lamah ka buai em em pawh a ni chuang lo, Remruata hnaih zawnga awm chu ka duh lo vang zawk a ni. Dik taka sawi chuan ka thinlung leh tih tak zetin ka la hmangaih reng alawm, ka fanu pa a ni bawk a, awlsam takin ka theihnghilh thei lo a ni.

Amaherawhchu a bula lêt leh duhna rilru ka pu tawh lo hrim hrim a, amah paw'n ka lêt leh a duh tawh lo nasa ang. Ngaihzawng a nei kha a nia, mahse kum khat chuang chu kan inṭhen tawh, chuti chung chuan kha nu a ngaihzawngnu hmel kha ka hmu leh tawh lo reng reng. Ngaihzawng nei ang paw'n a awm tawh ngai lo leh zel a, kan inṭhen hnua a awm dan chu mak ka ti ru ṭhin, mahse ka sawi chhuak ngai lo thung. A awm âwmin awm rawh se, a pawimawh ber chu kan fanu alawm a nih. Kan fanu a hlim phawt chuan keini pahnih te chu kan hlim chawp ve thei mai ang, mahse a len hun erawh ka huphurh ru ve reng. 

A zawhna min zawh tur thlengin ka hre lâwk vek a, chu chu ka huphurh lâwk a ni ber. Eng pawh ni se kan hun tawn mêk chu hmang ṭha em em phawt ila, hun lo la awm tur te chu nakina lo thleng tur tho alawm a nih le. Zan khat erawh ka muhil thei lo va, Remruata nen nupa kan nih ve lai te, ka laka ka nu chet dan zawng zawng te, ka hun kal tawh engkim chu ka ngaihtuah chhuak a, a chang leh ka lung a lêng a, a chang leh ka thin a rim bawk a, ka men rei phah khawp mai. A tuka ka awm dan thlengin a dik lo vek a, ka taksa chak loh lai a ni bawk nen damdawi ka ei deuh reng ringawt. 

Ka taksa awm dan a dik loh phut phut ṭhin avangin Doctor hnenah ka inentir ta tawp kha a nia, Doctor sawi dan chuan zan ka meng rei a, hna ka thawk rim leh bawk si a, chu vanga taksa chak lo chu ka lo ni ngei e. Thawhlehni a ni a, ka fanu hruai turin an school-ah ka kal a, an bân hnu chuan ina haw pui lovin dawr lamah ka lêt pui ta zawk a, thil tih laklawh lai ka neih vang a ni pakhat. Dawrah chuan ka fanu chu ka bulah a awm ve zel a, mi láwm a hlawh khawp mai. A biang a puarin a chum reuh bawk si, ngo reuh bawk si, ka fanu ni lo ta pawh ni se a duhawm thlawt a ni. 

Kan haw tur dawr aṭanga kan chhuak chu dawr kawta motor lo ding chhunga chuangte pahnih chuan ka mit a va la chiang êm, tu dang ni lovin Remruata leh hmeichhe pakhat an ni a, Traffic Jam avanga ding an ni bawk. A hmeichhia zawk chuan a be siam siam a, ka thinlung chhung a nâ vawng vawng thei. Ka fanuin a hmuh palh ka hlauh avangin ka din hliah thuai a, muangchang lo fê hian Taxi Stand lamah ka kalpui a, mahse traffic a jam nasa ang reng phian a, in kan thlen hma vak ka ring lo. Chutah motor an la insu zui, chu chuan a ti jam rei zual khawp mai. 

Ka mitthlaah Remruata leh hmeichhe pakhat hmel chu a châm reng a, paih chhuah ka tum paw'n ka thei der lo leh nghal. Haw kawng tluanin ka ngaihtuahna an luah char char a, Sangsangi erawh a muhil daih thung. Tlai school bânah hian mut a ching a, zanriah ei hmain a tho ve leh mai zel a, naupang a ni bawk nen a mu ṭha khawp mai. In kan thleng a, khuma ka fanu ka mut hnu chuan ka nu ei rawng bawl ka pui a, thil kan sawi melh melh a, chaw pawh kan ei har lo. Chaw ei khamah Sangsangi chu tui lumin ka tleuh thuak thuak a, zan a nih tawh avangin inbual pangngai ang em em chuan ka bual duh ta lo.

Dar 7 leh a chanve velah Remruata hnen aṭang phone call ka dawng a, Sangsangi bak a biak duh ka ring chuang lo va, ka fanu chu ka ko va, a pa'n a biak duh thu ka sawi te chuan a phur nghal khawp mai. Ka fanu leh a pa an inbiak chhungin ka inbual daih a, bathroom aṭang an ṭawng ka hre pha vek a, Remruata zawk chu mak ka ti leh thut ṭhin. Nuapang biak vel thiam lo deuh turah ka ngai a, mahse a ni lo, kan fanu lawm zawng leh ngaihthlak duh zawng sawi thiam tak a ni. Sangsangi tê zawk chu a nui leh hek hek reuh ṭhin a, ka inbual zawh thlengin an la inbia a, an pafa chuan hlim dun tak an ni. 

"Ka Duattê, anu kha ka lo be lawk ang chù?" ka thil tih lai ka tawp chat a, Remruata chuan eng vanga min be duh nge a nih ka hre miah lo, Sangsangi ni se phone min rawn pe rang em em zui. 

"Hello" ka tih chuan thu pe aw deuh hian

"Kan fanu kha tih mut hma dan ngaihtuah la, zanin chu khawiah emaw i kal lawk teh ang" a rawn ti thum chhal a, kan nufa lakah chuan a ngampa sâwt viauin ka hria.

"Kal dun chhan tur kan neih àwm ka hre lo ve" ka aw chu a nem lém lo, a huat tâwk a tling leh maithei a ni. 

"Kan nei alawm, ka lo kal dawn, kan fanu kha chu keima'n ka timu leh si mai ang" tiin phone a off nghal daih a, kan inṭhen tawh hnu pawha a duh dûha min tih kual a tum chu ka tha a nâ ve thlawt.

Kan in rawn thlen nân hun a hmang rei lo hle a, a sawi lâwk ang ngeiin Sangsangi chu khumah a mut pui a, thawnthu emaw ni hi a hrilh a, a timuhil rang khawp mai. Kan fanu a muhil fel ta maw tihah ka kut chu a rawn vuan chat a, ka rilru tur dâwn miah lovin min kai dawr dâwr a nih chu! Tal chhuah ka tum ve tak ná a, awmzia awm lo tluk a ni. Ka nu leh pa chu min chhuah pui lawk tur thu a hrilh a, anni pahnih lah chuan hnialna emaw phal lohna engmah an la sawi lo zui. Motor-ah min ṭhut luh tir a, kan tlan chhuak nghal thuai a, a che reng reng chu a hmanhmawh phian bawk si, ka en deuh hâw ringawt. 

"Ka bulah lo lêt leh rawh u, ka fanu nen hian lo lêt leh rawh u" kan din hnu chuan a rawn ti ta, nâ zetin ka kut ka hum a, thinrim takin a hmel chu ka en ran bawk.

"Ka ngai che u, ka ngai tak zet che u" chu thu chu engtin nge a sawi ngam zawk, tlaiah hmeichhe pakhat nen an inphur haw vel kha  a nia, kha nu kha a ngaihzawng a ni dawn tih ka chiang. 

"Kan thei tawh lo tih i hriat chian viau ka ring, kan inṭhen chhan bawk kha i rilruah awm reng se chu heti ang thu hi i sawi tawp lo ang" thinrim ru ṭûnin ka ti khauh ve ta fak fak a, ani lah chu a lungngaih hmel em em zui. 

"Ka hre reng alawm, chu vanga inchhir chu ka ni" thuk raiha a rawn ti chiah chu

"I inchhir ve ta maw, ni e, inchhir tur reng pawh i ni. A hun lai khan i chapo em em a, ka thusawi pakhat mah i ring duh lo va, ngaihzawngte min neihsan vel bawk a, engkim hi i thiam loh vek a ni" ka lo ti tawn tawn a, ka mittui bawk chu an hnâm leh ta ṭiam ṭiam mai. 

"Engtia rei nge ka nghah ngai ang? Ka bula in lo lêt leh theih nân engtia rei nge ka nghah ang che u? Ka laka i lungawi lohna hi engtikah nge a reh ang?" zawhna hlir a chhak chhuak a, ka melh nâ hle.

"Lo lêt kan tum tawh lo, i ngaihzawngnu nen khan hlim takin awm zawk rawh u. Keini chu min rawn ngaihtuah vak duh suh, nupui nei leh la, i hlim zawk bawk ang" ka ti hmawk hmawk a, ka ṭawng zawi lem lo khawp.

"Zaninah hi chuan inbiak a fuh lovin ka hria, zan dangah emaw ni dangah pangngai takin kan sawi dun zawk dawn a nia" ti supin motor chu a tinung a, inher riai riain kan tlan zui nghal a, eng ang paw'n a bula lêt leh turin min sawm mah se lêt ka tum tawh hauh lo. 

Kan in kan thleng a, haw tlang nghal lovin kan room-ah a lo lut ve zel a, biak erawh kan inbe leh tawh lo hrim hrim. Sangsangi mutna bul chêtah bawk muin phone a khawih mual mual a, kei pawh thil dang ka ti ta daih. Zan zanah ka insu ta vel ringawt a, tih tur ka hre vak lo a ni ber. Machine erawh ka hmang lo va, kutin ka su mai a, Sangsangi a mu tui tawh bawk si nen tih harh ka hlau ve tho. Remruata ber chuan ka rilru a tibuai, haw turin vawi khat chu ka hrilh tawh ngei a, mahse hrilh loh ang vel a ni. A awm ngaiin a awm reng a, ka insuk zawh phei chuan phone pawh a khawih tawh lo, a bawk mu run a, zan lah a tlai tulh tulh mai bawk si.

"Remruat" tiin a darah ka sawi det det a, kan khuma a muhil ringawt chu a dik lo, a mawi loh mai bakah a chhungte'n hre phei se chu engtin nge an ngaih ang ni! 

"Remruat, a tlai tawh a nia, tho teh" ka ti leh chuan a zi mar ṭuah ṭuah a, tho lovin min en reng a, kei paw'n ka en chiang khawp mai. 

"Khi dar 1 a ri dawn, va haw tawh rawh, ka pate pawh an mu vek tawh" sawi tur dang ka hre tawh lo, haw thuai se ka duh a, ani lah chu haw a tum loh hmel nasa a ni.

"Remruat!" ka ṭawng zo hman ṭawk ang tihah ka banah a rawn pawt thut a, ka bawh deuh rawk a, ka kâ ka án rualin ka hmuiah a fawp nghal buan buan a, min la kuah nghet em em zui. 

Ka kut chuan a samah ka kêk bawrh bawrh a, engah mah a ngai lo tih hriat zet hian a chet ngaiin a che reng a, che leh thutin a chung lamah a ṭang zawm nghal zat a, min fawh zel dan erawh a danglam sâwt ta khawp mai. Min fawh dan aṭang chuan min la hmangaih ve reng emaw ka ti hman hial a, hnar ka tum nasat tehreng nen ka thei ta ngâng lo. Ka kut te chu mumal lo zetin a che a, rei lo tê hnuah phei chuan ka kêk tawh lo hrim hrim bawk. Ani lah a chet zawm zel mai si a, ka mamawh dan chu nasa tawh tak a ni. Ka thawmhnaw a phelh lai te chu ka hre vek alawm, mahse hnar tumna réng ka nei lo. Kan tawpna chuan ka rilru a tinâ hnuhnawh leh lawi a, mahse a hun lai khan ka dang thei bik der si lo chu a nih kha!

A haw dawn chuan ka be lo va, thlah pawh ka thlah lo, ṭawng châkna reng ka nei lo a ni ber. A tuk thleng chuan inchhirna hlirin ka khat a, beisei loh deuhin ani pawh a reh sawtin ka hria. Zan lamah erawh Sangsangi nen an inbe ziah tho a, mahse kâr tawpah pawh kan inah a rawn chuangkai vak ta lo. An in lamah kan fanu a hruai phei mai zel a, a lo thlah leh thlap zel bawk a, kan inṭhen hnua nupa nun kan hmang dun leh kher chu engah mah ngaih loh ka tum nasat pôh loh ka thei lo tulh tulh zawk. Ka pa paw'n Remruata nen kan inkar chu a sawi leh tawh chuang lo va, a sawi leh sawi loh a inang rengin ka hria. 

Nî te a'n ral zel a, zep lovah chuan ka pasal hlui ni ta Remruata chu ka ngai ngawih ngawih, ngai tak ka ni. A chhan ka hre bik lo, nupa nun kan lo hmang leh kher kher bawk nen ngai viau mah ila min zuam sawt ang tih ka hlau leh ang lawi a, ka rilru chu a inkawkalh nuaih mai. Ka la hmangaih reng tih chu ka pha lo, mahse ka hmangaih avangin a bulah ka lêt leh dawn tihna a ni lo va, kan fanu chu enkawl dun char char ila ka duh ber ta zawk. Ani te chuan kei ni lovin kan fanu bak a ngaihtuah tawp lo vang, kei ve zawng ngaihzawngte min neihsan mai mai kha a nia, min lo hmangaih ve tak tak miah lo tih ka hriat chhuah te hian ka nâ thar leh ṭhin. 

Chawlhnî tlai a ni a, Remruata chu kan inah a rawn lêng a, ka nu leh pa paw'n a lo be ṭha leh khawp mai. Kan fanu lah a pa bulah chuan a tal leh chawt a, keiin ei rawng ka bawl daih thung. Ka nu chuan chaw eiah a sawm a, Remruata erawh chhang nghal mai lovin min lo en daih thung a, ka hawi sawn rang khawp mai. Remruatan chaw a ei tur thu a sawi ri te chu ka hre pha vek a, ṭul lo ka va'n ti tak. Kan ina chaw a rawn ei nî aṭang khan kâr tam chu a liam tawh ngei e, mahse engati nge chaw eia an sawm hian a hnial ngai miah loh? Ka nu leh pa reng reng pawh hi sawm miah loh tur a ni asin le, a chhan chu Sangsangi pa ni mah se kan inṭhen tawh tlat. 

"Puih i ngai em?" min rawn betu chu tu nge a nih hrilh hranpa ka ngai lo, ka chhang lo hrim hrim a, ka chet chetin ka che tawp a, chokaah lo kal miah lo mah se pawi tihna ka nei hauh lo.

"Duattêi chu a pi'n a hruai chhuak ta a nih kha!" kan ngawih dun vang vang hnu chuan a rawn ti leh a, chhang chuang lovin ka che mial mial a, ka nu kha kohhran hmeichhe thilah chhuah a ngaiin ka hre deuh rèng a ni.

"Khawi ka lo pui ang che" tih leh ka thil khawih lai lâk chu a rual nghal a, lâk lêt ka tum viau ná chu ka insum leh ta zawk a, chawhmeh dang ka siamsan daih bawk. 

Choka ah chuan kan pahnih tlawngin kan awm a, ka pa ni se a thawm pakhat mah ka hre si lo, ṭhenawmah a lêng a ni maithei. Tlai dang ang lo takin ka awm dan a dik lo va, ka pum a nâ ti dawn ila a nâ chiah bawk si lo, ka taksa awm dan chu ka hrethiam lo tak zet. Ka lu chu a hai deuh a, ka taksa chak loh vangah ka puh leh ta tawp. Chet pawh che zawm peih lovin ka ding ngawi reng a, ka zawi ngawih ngawih ni berin ka hria. Arsa kana thlak tur Remruatan purun vâr leh sawhthing a rawt pawlh a, a kanna tur thir bel te chu chhuang ve teh mah ila ka che chang pei tawh lo, ka awm dan teh thut chu mak tak a ni. Vawi leh khatah ka pum lam chu a inlumlet thut a, ka hmui ka hup vat a, bathroom ka pan nghal thuai bawk. 

"I ṭha em?" min lo zui ka ring kha a nia, min lo zui ta ngei e. 

"I ṭha miah lo Zonun, damdawi i ei ṭha lo leh tawh em ni?" a aw ah chuan a hlauthawng ve ni mai ka hria, mahse hlauhthawn chhan tur a nei reng reng lo.

"Ka ṭha e" ti sepin ka hmai chu ka phih a, ka luak chhuak thut pawh a reh leh ta deuh a, ka taksa chak loh vang a ni paw'n ka hre lo, ka awm nghulh bawk si. 

"Ei rawng bawl hi chu ka pi kutah dah tawh mai ang" tiin min pawm kâng lawp a, tal tur tak ngial paw'n tha ka nei tawh lo a nih chu! 

Khumah min mut a, ka pang leh ka chal vel chu a tawk den dên a, ka mut a chhuah áwm pawh ka hre lo. Chhuak ta mai lo chuan min awm pui reng zawk a, chutah ka bulah a la mu zui. Ka ṭawng lo va, dan pawh ka tum lo, ka awm mawl tawp a ni mai. Sitting room lamah thawm a rawn awm a, Remruata chu thovin room aṭang a chhuak a, thawm aṭang chuan ka nu leh Sangsangi te an niin ka hria. Kei pawh mu reng lovin ka tho chhuak ve leh a, mut ringawt zawng a dik lo a ni. Rei lo tê ka mut hahdamna erawh chuan min pui viau thung a, ka taksa zawi lutuk pawh a reh ṭanin ka hria. Choka ka lut chiah chu ka inrin hma hauhin ka pum a dik lo leh nghal a, chuti anga awm chu ka tum bik miah lo asin maw le.

"Zonun, nang hi i va dik loh hmel ve?" ka nu chuan chiang deuh hian min en ran a, awlsam taka ka luak a chhuah chhan chu ka hre lo tak zet a ni. 

"I ruak lo a ni lo maw? Ngaihzawng i nei em? I awm dan hi rai i ang tlat, ngaihzawng i neih leh neih loh chu sawi teh" ka nu chu phawk zetin ka en nghal thuai a, ka ngaihtuah chiang a, ka ruak lo thei tlat mai. 

"Ka rai thei lo" ti sepin ka che vut a, kan room-ah ka lut a, Remruata nen khan nupa nun chu kan hmang ngei a, mahse ka rai chu ka la ring thei chuang lo.

"Zonun" ka lehhawi vat a, Remruata chu ka lam panin a lo pen phei pâwk pawk a, mahni pawh buai ruk tehreng nen a thinrim hmel em em zui.

"Ngaihzawng i lo nei reng em ni?" chu zawhna bawk chu maw, chhan pawh ka chhang peih lo, ka ngawi reng ringawt. 

"Ka pi khan i ruak lo a nih a ring a, rai ta la, i ngaihzawngpa fa chu i pai nge ka fa i pai zawk?" aw nêm lo fêa a tih leh chuan a hmaiah ka beng ri sawk a, rilru leh taksa nawm loh nen ngaihzawng nei anga min puh chu ka hne hluah hluah. 

"Haw rawh, vawi khat mah lo kal tawh suh" ka thusawi chu eng nge a nih pawh ka hre lo, tunah tak chuan hahdam taka awm ka châk ngawih ngawih.

"A teuh lo, lo kal rawh" tih leh ka bâna kaih a rual nghal a, ka tlu tur chu min dawm thuai a, min pawm kâng zawm zat bawk. 

In aṭanga min pawm chhuah a tum lai chuan Sangsangin kan bula lo kal ve a tum a, ka nu'n a lo dang thung. Motor-ah min ṭhut luh tir a, kan tlan chhuah te chuan muangchang lo tak kan ni. Hospital hnai berah min kal pui a, chawlhni ni mah se Hospital-ah hi chuan hnathawk an awm reng a, kan kalna hmunah pawh chuan hnathawk an tam khawp mai. Nurse pakhat biain min pawm kual zel a, mi paw'n min en duh phah viau. Doctor pakhat room-ah kan lut a, ka awm dan vel chu a sawi zung zung a, doctor chuan Pregnancy Test Kit min pe a, ka rilru a la buai em em tho. Minute 5 chuang bathroom-a ka awm hnu chuan Sangsangi ka pai laia Test Kit ang chiah chu ka hmu ta, ka hlim nge ka lungngai pawh ka hre rih lo.

"A rai ngei e" Test Kit a hmuh rualin doctor chuan a ti a, Remruata chuan lawmthu sawiin min pawm chhuak leh a, motor chhunga kan awm hnu chuan ka ṭap tawp ringawt. 

"Sawi teh le Zonun, i pum chhunga mi hi i ngaihzawngpa fa nge ka fa? Kha zana thil thleng avang khan ka fa a nih theihna chance chu a awm ngei a, mahse kei pawh hian ka awih ngam rih bawk si lo" a aw chu a dam dap a, ngaihzawng ka nei anga a ngai tlat chu ka thin khei bertu a ni.

"Ngaihzawng hi pakhat chauh ka la nei asin" ka ti thawp raih a, mittui tling pamin ka hmui ka pet fan fan a, ka pum chhunga mi chu a fa a nihzia a hre tawh ngei ang. 

"I sawi awmzia chu!" tiin a ngawi zui vang vang a, thu dang sawi tawh lovin chak zet hian a tlan chhuak zui nghal a, kan in kawt pawh kan thleng har lo teh e!

"Ka pu, ka pi, thil sawi ho ngei ngei kan ngai, khawngaihin inbe lawk teh ang u" in chhung kan luh rualin Remruata bawk chuan a ti a, Sangsangi erawh ka hmu miah lo va, a muhil a nih ka ring. 

"Eng lam nge ni?" ka pa chuan a lo ti ve mai a, sitting room-ah chuan kan ṭhu ṭhap a, ka kut ka hum ruh hle bawk. 

"Zonuni hian ka fa a pai mêk" pehhel miah lovin a ti nghal tlawng a, ka nu leh pa chuan min rawn en vat a, kei erawh ka hawi sawn daih. 

"Ka bulah lo lêt tawh se ka ti bawk, ka fa a pai vang ni lovin an pahnih hian ka ngai tawh zawk a ni" amah bawk chuan a ti nghet leh charh charh a, chutah zet zawng ka insum thei ta bik lo.

"I bulah kan rawn lêt mai mai tawh dawn lo, nangmah a ni lo'm ni inṭhen rawt kha!? Ka thusawi awih turin ka ti che a, i awih duh lo va, ngaihzawngte min neihsan bawk a, tihpalh thil thu tak meuha i fa ka pai leh avang mai hian lo lêt kan tum teuh lo" ka ti hmawk hmawk a, an pathum chuan min en ṭhap ringawt. 

"Nakinah in pahnihin sawi ṭha rawh u, keini hi chuan in fanu tan tal pawh ngaihtuahna sêng ula kan duh a, nupa nih leh lam kha chu in thu a ni e" thawm a reh ṭhiap hnuah ka pa a rawn ṭawng hmasa ber a, ka ṭawng châk zek zek leh ta.

"Engati nge ka nu ka pa LALREMRUATA bula lêt leh tur hian min duh em em a? Ka rilru tur in ngaihtuah ve miah lo em ni?" ṭah chhuak ru zet chuan ka ti ta thlawt a, ka mittui a tling pam bawk. 

"Zonun" ka nu lam chu ka hawi a, ṭawng insum turin min mitmei tih ka hria, mahse insum pawh ni ila eng nge awmzia awm chuang ang nì.

"Kan fa hmasa zawk ka chhiat chhan dik tak te kha in hria em? In hre lo chiang khawp ang, khang hun lai aṭang daih tawh khan hrehawm ka tuar tawh asin, engati nge ka rilru tur hi in hriatthiam miah loh?" ka tih leh chuan ka pa zawkin

"Hetia awm hi i hlim phah chuang em ni?" a rawn ti ram deuh hmuk a, thinrim ang taka min ṭawngkhum chu la nâ tak ka ni. 

"Hlim phah chuang teuh lo, mahse ka hlimna aiin ka fanu hlimna ka ngai pawimawh tawh zawk, ka hlimna tih vel chu engah mah ka ngai lo" ka ti lêt leh hmarh hmarh a, chutah Remruata chu a rawn ṭawng chhuak ve ta.

"Eng vangin maw kan fa hmasa kha i chhiat?" min en ran chung hian a ti a, kan inmelh no lo dun chiang hle. 

"I nu duh tak vangin maw le, amah vang bawkin Sangsangi hi ka chhiat ṭep asin, nang cháng a ni lo, ka tluk theih nâna chhuat nawt huh vek duhtu awmna hmunah lêt leh ka tum tawh lo hrim hrim" ka aw chu a zawi lo ngei mai. 

"I laka ka nu chet dan zawng zawng chu eng vanga min hrilh miah lo nge i nih? Min hrilh mai ta che, i pasalah min ngai lo em ni?" Remruata aw pawh chu a chang ve ta fak e. 

"Hrilh che ila eng nge sâwt chuang ang, i nu kha ka lakah a ṭuan leh zel dawn asin, phone-a hmeichhe pakhat nen in thlalak ka dawn ṭhin zawng zawngte kha i nu thil tih vek a nih ka ring a, nuam lo ti deuha sawi pui che pawh ka tum, mahse nang chuan ka thusawi i awih lo va, ngaihzawng nei angah min ngai tlat thung a nih kha! Kei ni lovin nangmah zawkin ngaihzawng i nei leh ta zel a, Sangsangi pawh hi i ngaihtuah tak tak lo" ka ti ta ṭeuh mai. 

Tho vutin Remruata chu a chhuak nghal nal nal a, pawi tihna pakhat mah ka nei lo. Chaw pawh lo ei suh se, a fa ka lo pai hman leh thawt thawt te chu inchhir tak ka ni. Ka nu leh pa chuan zawhna min zawh zawm mawlh mawlh a, kum eng emaw zah ka lo zep tawh te chu zep reng ka tum tawh lo hrim hrim. Ka ṭap a, ka thin a rim a, ka inchhir em em bawk. Chaw ei dawn hnaihah Sangsangi a rawn harh a, a pa a zawng titih nghal bawk a, chu ringawt te chuan min tithinrim zual. Ka nu zawkin a hrilhfiah mawlh mawlh a, mak tak maiin Sangsangi chuan a ngen zawm ta lo va, chaw pawh kan ei har hran lo. Chaw ei lai chuan kan ngawi deuh ṭhap a, ka chaw ei tui loh dan chu pui tak a ni. 

Zan thlengin Remruat hmel kan hmu ta lo va, a pawi lo daih zawk. Kan room-ah ka fanu nen kan awm a, ka pum dawm pahin thil chi hrang hrang ka ngaihtuah kual a, eng dang a ni lo, ka lo rai hman thawt thawt chu a pawi ber mai. Mut pawh ka mu tui lo hle a, thil rim ngainat loh ka ngah phian zui leh nghal. Ka nu leh pa chuan kan fanu ngaihtuah tel zel turin min ti a, ka pum chhunga nautê thlengin ngaihtuah turin min ti bawk a, rilru a buai duh khawp mai. An sawi dik chu ka ti ve tho, mahse nâ tura let leh zawng thil tih chi a ni si lo. A chiang reng, ani te chuan min hmangaih ve tawh teuh hleinem, ka tan chuan lêt lehna chi a ni tawh lo hrim hrim.

Nitin dawrah ka kal a, Remruata chu a reh ta vang vang a, a tih ṭhin dan ang bawkin kâr tawp tih lovah chuan kan inhmu tawh ngai lo va, kan ina chaw ei te chu a tum tawh lo hrim hrim ni maiin ka hria. Kan inbe ngai lo va, mahse a mitmeng aṭang min ngaihtuah tih erawh ka hre vek tho. Ka pum chhunga nautê pawh zawh khat mah min zawt lo va, a bula lêt tum lo khan nautê chungchang min zawh ka phut ru deuh tlat tho a nih chu! Thla kan hmang ral a, ka ṭawngkhum nâ mah mah tih leh thil sawi ṭul tawh lo ka sawi chhuak tih ka hria, mahse a hun lai kha chuan ka taksa a nuam lovin ka thin a rim bawk nen ka insum thei ngang lo a ni e. 

"Nu, apa hi a lo kal dawn lo a ni ang a, a lo thleng har ê" ka fanu chu ngawi rengin ka en a, vawi engzah chiah nge chu thu chu a sawi tawh, kâr tawp a nih angin Remruata a lo kal ngei ka ring a, mahse tun ṭum chu a tlai mah mah tawh. 

Sangsangi chu thil dang ka tih pui ṭhin, nuam erawh a ti lo viau thung. Number te, ABC te, an zirlai te pawh ka zir pui ve ngei a, ani chu kawngka lam a hawi chhen ringawt. Tlai dar 4 a pel var var tawh a, kei paw'n mak ka ti ve deuh, ni dangah te chuan chawlhni chawhnu inkhawm ban àwm velah a lo kal mai ṭhin a, Sangsangi nen an lêng daih zel. Ka fanu chu a mut a chhuak tawh tih ka hria, a pa hmel a hmuh hma chu mut a tum loh ka ring bawk si, ka khawngaih ru khawp mai. Ka phone chu ka phawrh a, ka fanu tan call mai chu pawi tihna ka nei lo a ni ber. A phone number ka hmeh chhuah rualin room kawngka a rawn inhawng a, Remruata ngei chu niin, mahse eng nge ka hmuh tak hi! 

"Pa, i va'n lo kal har em em, engati nge i chal i tuam a? I ban pawh?" a pa hmel a hmuh rualin kan fanu chuan a ti zet zet a, a mut chhuak pawh a reh nghal vek a ni maithei. 

"Apa hi maw ka tlu palh a, vawiin chu lêng lo mai ang aw Duattê, heti hian inah awm ila, a nuam daih zawk" Remruata chu mit la lêk lovin ka en char char a, a accident a nih ka ring hmiah. 

"Pa, thil min lo ziah pui?" kan fanu chuan lehkhapuan leh pencil phawrh a rual nghal a, dawhkantê ah a pa ban vuanin a kal phei pui a, kei chuan an che vel chu ka lo en ngawt ngawt ringawt.

"Pa, engati nge i haw zel a? Haw zel tawh lo la, anu nen kan bulah i awm char char tawh la pa" ka fanu chu tlai dang a ang hlawl lo, Remruata chuan min rawn en zeuh a, kei paw'n ka lo en reng bawk. 

"Apa hi ka buai ṭhin alawm Duattê" tih chauhin a chhang a, an lam hawi reng lovin ka che chhuak a, mahse tih tur em em ka nei chuang lo. 

Rei pawh thil ziak lovin khumah an mu dun ta daih a, Sangsangi chu a muhil hma khawp mai. Kan fanu ang bawkin Remruata chuan a mit a chhing tlat a, a muhil ve ni maiin ka hria. Thawm dim zetin khum lamah ka kal a, a ban intuam bûr leh a chal intuam chu chík lehzual zawkin ka en a, ka hriat sual loh chuan a hliam neihna a la rei tawp lo vang. Si si lovin a bul chêtah ka ṭhu ngawi reng a, a changin a muhil hmel ka en leh zauh zauh a, ka rilrua awm chu a inpawlh nawk nawk bawk. Tukverh lam hawiin thil chi hrang hrang ka ngaihtuah a, Remruata mai bakah a chhungte thlengin ka ngaihtuah a, hun kal tawh te chu ka mitthlaah an rawn lang zut zut a, tih theih ka nei tam lo hle.

"I accident em ni?" Remruata lam ka hawi rual chuan ka ti deuh tawp a, a lam ka hawi kha a lo meng reng tawh bawk si a, ka phu zuk nghe nghe.

"Aw" tih chauhin min chhang a, ka dul chu a en zawm zat a, kei erawh ka lo zam ru er er leh tawh a, chuti anga ka awm ve ziah chu mak ka ti ṭhin. 

"I ṭha em?" kan ngawih dun vang vang hnu chuan a rawn ti leh a, a lam hawi lovin hmun dang ka hawi daih thung. 

"Ṭha lo" ka chhan dan teh tawp chu a hriatthiam lawk ka ring lo, kei pawh ni ila ka hrethiam chuang kher lo vang. 

"I rilru a buai hmelin ka hria" a lam chu ka hawi leh ta nge nge, engtin nge ka rilru a rawn hriat chat theih zawk!

"Buai e, a buai khawp mai" tih chauhin ka chhang a, ka pum chhungah nautê a awm mêk bawk nen ka rilru a buai ru tak zet. 

"Keimah vanga buai a nih chuan ngaihdam ka dil e, keimah kaihhnawih reng reng chu ngaihtuah duh tawh suh, awm lo angah min ngai hmiah rawh" a kâ aṭanga ngaihdamna thu a chhuak chu a va mak ngai êm. 

"Thla khatah ka fanu hmu turin vawi khat chiah ka lo kal tawh ang, Duattêi hi i lo hrilhfiah mai dawn nia" ti leh supin zawimuang hian a tho va, chet chu harsa a tih hmel hle bawk. 

"Eng vanga hetia awm thut nge i nih?" ka ti tawp ringawt a, a chet dan leh a ṭawng dan hrim hrim chu amah kha a ni ta lo emaw ka ti hial.

"Inenkawl ṭha la, hrisel tak leh tûma tih buai lovin nautê kha i hring dawn nia, duhsakna ka hlan a che" tiin kawngka lam chu a pan a, ka zawhna pawh a chhang ta chuang lo. 

"Remruat" a ke pen lai chu a tawp chat a, muangchang hian a rawn lehhawi a, a awm dan teh thut chuan min ṭhawng êm a ni.

"Ka hria alawm Zonun, ka bula lo lêt duh tawh lo mah la ka dem lo che, ka dem ngai lo bawk ang che" chu thu a sawi zawh hnu chuan a kal chhuak nghal a, kei erawh ka ṭhu ngawi reng ringawt.

Zanriah ei lai te chuan ka chaw ei a tui leh tui loh pawh ka hre lo, ka nu leh pa'n Sangsangi an be char char a, ka fanu hlim hmel te chu ka hlimpui ve tak tak thei tawh lo a ni ber. Mut hmun thlengin ka ngaihtuahna a kal thui em em a, Remruata laka ka awm dan chu a dik lo ti dawn ila a ni bawk si lo, a dik ti dawn ila a dik angin ka hre thei bawk si lo nen ka rilru a buai khawp mai. A tukah chuan dawrah ka kal leh a, chawhnu lamah ka fanu ka hruai leh bawk a, chu chu ka nitin tih dan a ni chho ta. Remruata pawh thla tawpah hlir a lo kal tawh a, kan fanu ber chuan awm dan a thiam lo a ni. 

Ka fanuin a pa ngai lutuk chu hrehawm ka tih phah a, ka fanu hlimna aia ka hlimna ka lo dah sánzia ka hre chhuak nghe nghe. Phone kaltlangin inbe reng tho mah se Sangsangi chuan a pa a ngai em em a, kei paw'n Remruata chu kâr tawpa lo kal ṭhin turin ka hrilh leh tawp a, mahse ani erawh hrilh loh ang hmak a ni thung. A haw dawn te hian a fanu paw'n a ngen nasa ṭhin, kei phei chuan vawi khat mai ni lo kâr tawpa lo kal leh tawh turin ka hrilh fô va, a ruk tak chuan ka inthiam lo em em bawk. Ka pum ni se a ṭhang lian telh telh a, a chhungte an lo lan loh danah engmah a la hrilh lo a nih ka ring. A nu chu ka beisei lo va, a pa zawkin Remruata fa ka pai thu hre ngat se chu min rawn hmu chiang khawp ang. 

Ka rai tih kan hriat aṭangin thla 3 a ral ta, Remruata chu a danglam tawlh tawlh a, ka pa nen pawh an titi hlei thei tawh lo. Ka nu lah a lo kal chuan chaw eiah a sawm ziah a, mahse a hlawhchham ziah thung. Min hmangaih ve tawh lo tak takah ka ngai hmiah a, Remruata ka hriat tirh ang chiah khan a ṭawng duh lo sâwt em em bawk a, ka biak te hian kam khat paw'n min chhang ngai lo reng reng. A fanu biakna erawh a ngaihven vat zel a, chhan loh pawh a nei ngai lo. Naupai lai e ti lo chuan mut mu ka tuah ṭha ngai lo va, ka dawra thawkte phei chuan ka rai tih an la hre lo hrim hrim, Remruata leh ka chhungte'n an hria a ni mai. 

"Hello" phone ka pick up rual chuan ka ti sep a, Remruata pa hnen aṭanga phone call ka dawng nawlh chu mak ka ti hle a, a number ka lo la save reng tih ka hre chhuak chiah bawk. 

"In dam maw Zonun? Kan inbe khât hle mai a, kan tunu pawh a ṭha zel maw?" aw dam dap hian a rawn ti a, ka thil tih lai pawh ka tih zawm ta lo.

"Aw dam e, nangni zawk eng nge in án ka pa?" pangngai takin ka ti ve mai a, min rawn be teh hlawl chu mak ka la ti reng tho.

"Kan ṭha e, thu danga lai chuan Remruata nen hian inṭhen hlen tak tak in tum em ni?" ka pa zawhna chu ka chhang lo chiang hle.

"In fanu tal hi ngaihtuah ula ka ti ngawt mai" a rawn ti leh a, ka la ngawi reng a, rei pawh inbe lovin kan inmangṭha ta daih bawk.

Chawhnu lamah ka fanu hruaiin kan haw tlang nghal a, zanriah kan ei lai chuan ka nu'n Hospital-a Remruata a awm thu a sawi a, ka va han hlauthawng mai mai tak em. Chaw pawh ka ei ṭha thei tawh lo, ka nu chuan a pa a hmuh fuh thu te a sawi zel a, Remruata pa khan min lo biak chhan a neih ka ring reng a, mahse engati nge engmah a sawi leh si loh? Chaw kan ei kham a, ka nu chu Remruata awmna ka zawt nghal a, ani paw'n ṭha takin min hrilh ve mai bawk. Ka chhuah dawn chuan Sangsangin ka bula kal a ngen a, ka phal ta lo law law. A pa hmel a hmu a nih chuan a bula awm reng a tum leh emaw te kha a ni ang a, a pa bula awm ka phal lo lam ni lovin thil a tibuaithlak vek ang tih ka hlauh vang zawk a ni. 

Hospital ka thlen chuan intlawh hun a ni tawh lo tih min lo hrilh a, mahse ngen tak têa ka ngen hnuah ka luh an phal ve ta hram. Remruata awmna Cabin ka luh chuan a nu hmel ka hmu nghal a, min melh no lo hle a, kei erawh ka zak duh bik tawh lo. Remruata zawk chu ka en daih a, a muhilin ka hria. Cabin-ah lâi a awm a, a hliam a nâ thawkhat viau a ni ang. Zanriah ei lai khan ka nu'n a accident thu a sawi a, mahse a tak ngeia a awm dan ka hmu chiang chiah chu ka hlauthawng zual sauh. Inthlahrung zetin a kutzungtê chu ka vuan a, chu veleh Remruata chu a rawn meng ta mai, ka kut ka lak sawn ran phah hle. 

"Min chhuahsan rih teh" kei ni lovin a nu zawk chu a en daih a, a ṭawng chhuak reng reng chu a dam lo tih a hriat ngawih ngawih. 

"Engati nge i lo kal? Duattêi a lo kal ve em?" a nu chhuah fel hnu chuan a rawn ti leh a, a hmel aṭang chuan a fanu hmuh a hlau deuhin ka hria. 

"Engati nge i fimkhur loh em em? A hma paw'n i accident tawh a, fimkhur phah sawt ta che. Inenkawl ṭha turin min ti a, nangmah a nih hi inenkawl ṭha lo" ka ti mawlh mawlh a, ka ngaihtuah bawk nen ka aw chu a vin deuh mah mâh maithei. 

"Tlaiah khan i pa nen kan inbia a, mahse damdawi ina i awm thu erawh min hrilh chuang lo. Keini pahnih hi inṭhen hlen kan tum leh tum loh min zawt a, Sangsangi ngaihtuah turin min ti bawk" ka tih zawm leh nghal zat a, ani chuan min en renng ringawt thung. 

"En teh Remruat, motor i khalh a nih paw'n fimkhur tawh hram rawh" keimah bawk chuan ka ti leh ta nge nge a, ṭawng lovin ka awm thei rih lo a ni ber. 

"Min ngaihtuah a, ka lawm hrim hrim e. Duattêi erawh ka dinhmun hi hrilh lo la, tun thla tawp pawh ka rawn lang lo maithei" dam dap hian a ti thum bul a, ka rin tâwk chiah. 

"I fanu hriat i hlau hle si, fimkhur tawh ang che" tih leh thawh ka rual a, a hmel chu ka en nawn leh ṭhin, a dam lo thlawt a ni. 

"Mut tui aw" kawngka lam pan ka tum lai takin a rawn ti ṭial ruih a, kal ta mai lo chuan ka en reng a, ka insum thei leh ta ngâng lo. 

"Ka tihpalh, ka ṭawngkhum vak che avang khan ka tihpalh, thil ṭul lo leh hun kal tawh thil ka sawi chhuak avang khan ka tihpalh bawk" a kutah ka vuan ran a, dam lo mah se hmân ang thovin a kut chu a lum nuam em em tho. 

"Inthiam lo duh suh, ka hrethiam che. Ngaihngam takin min hawsan la, min theihnghilh hlen daih tum la, kan fanu pa ang chiahin min hre tawh zawk dawn nia" a lungngai hmel chuan ka ṭah a ti chhuak leh tet tet tawh. 

"A nih nangin min theihnghilh hlen dawn tihna em ni?" thawp raiha ka tih chuan

"Dawn lo ve, ka hre reng zawk ang che" ti supin a nui tawi tak a, a nuih a za lo tih erawh ka hre chiang khawp mai. 

"Remruat" a kut ka vawnna chu a kut leh lamin a rawn beng thek thek a, muangchanga a nawr sawn tâkah chuan ka thlah ta riai riai bawk.

"Haw tawh rawh le" a aw dam lutuk chuan ka lung a tichhe tulh tulh zawk.

Rilru nuam lo zetin ka chhuak a, a nu nen erawh inhmu reng mah ila kan inbe lo chiang khawp mai. In ka thlen chuan ka nu leh pa'n Remruata chanchin min lo zawt nghal a, chhanna mumal pawh ka pe thei lo, a chhan chu ka awm chhung khan a ṭhat leh ṭhat loh pakhat mah ka zawt lo tlat a tin ni! Ka rilru leh ngaihtuahnaah awm loh lai a nei lo va, dawra ka kal paw'n ka awm a nuam thei tak tak tawh lo. Ka ta ni miah lo ka ta ang maia dawr ka la enkawl reng te chu ka zak a, Remruata lakah ka inthlahrung thar ngawih ngawih bawk. Ani ni se thla tawp tih lovah a hmel ka hmu tawh ngai bawk si lo, ka fanu hma hun mai ni lo ka hma hun thlengin a buai chho zel dawnin ka hre ta hial.

Kâr khat hnuah va tlawh leh ka tum a, mahse in lamah an lo insawn chhuak daih tawh thung. Dawr pawh ka chingfel titih tawh a, Remruata hnena lehkha pawimawh pek a ni mai. Dawr min siamsak tirh khan document nen thlap a ni a, tunah erawh ka ta ni lovin a ta ni pumhlum se ka duh zawk tawh a ni. Dawra hnathawkte pawh thla thara dawr ka khar dawn thu ka hrilh lâwk diam a, mak an ti hlawm ang reng. Remruata hnena dawr ka pek lêt tur thu chu ka nu leh pa ka hrilh tawh a, ṭul an ti vak paw'n ka hre lo. Thla thar kan kâi a, dawr chu ka khar ta ngei a, documents pawimawh pe tura ka kal thu erawh Remruata ka la hrilh lo va, hre lâwk lovin hre chawp se a ṭhat zawk ka ring. 

"Eng nge i lo tih dawn?" Remruata nu nen chuan kan inhmachhawn ta ran a, a mo ka nih lai ang bawkin ka lakah rilru chhe tak a la pu reng a nih hmel. 

"Remruata thil pek tur ka nei a, ka rei lo vang" amah pawh en lem lovin ka ti ve mai a, office bân hun chu a ni tawh, mahse ka mi hmuh tum ber chu a lo la haw hauh lo. 

"Pasal ṭhen chu i ngeih hle mai, i thau kûng kung alawm le" a ṭawng dan chuan ka rilru khei viau mah se ka chhang lo va, a fapa fa ka pai mêk tih a la hre lo a nih ka ring hmiah. 

"Eng vang chuan maw i lo kal teh thut a!?" amah bawk chu a ṭawng leh a, chutih lai tak chuan Remruata leh a pa an lo inzui lut a, ka ṭhutna aṭang ka tho rang hle. 

"Pawnah inbe lawk ang hmiang?" ka tih chuan min en chhuk run a, an ina kan inhmu thut chu mak a ti deuhin ka hria.

"Zanriah ei ve nghal rawh aw Zonun" a pa chu ka nuih lui var var a, a zawhna chhang lovin pawn lamah ka chhuak tlang ta tho. 

"Kha le" in kawta kan din rualin file chhunga lehkha pawimawh ho chu ka phawrh a, ka thilpek chu a bih zui nghal a, rei pawh a chhiar lo, min melh rum ṭha khawp mai. 

"Eng vanga ti nge i nih?" a aw khauh dan chu pui tak a ni. 

"A chhan chu theihnghilh tur chein min ti miau a, ka theihnghilh dawn che a nih chuan dawr hi ka pek lêt che a ngai. Chu bakah ka ta dik tak pawh a ni hleinem, nangma'n min siamsak alawm a nih" ka nui lui sak a, nuih erawh a va za lo chiang êm. 

"Engtin nge min theihnghilh theih i rin zawk? I fanu pa ka ni a, i pum chhunga awm mêk nautê pa ka ni bawk a, chuti chung chuan min theihnghilh thei ang maw!?" a ti ram hmuk a, damdawi inah khan theihnghilh turin min ti a, tuna taka theihnghilh duh lo ang zia zânga a awm leh daih chu ka hrethiam lo.

"Ka hre lo le" tih chauhin ka chhang a, ka kal sawn ta vang vang a, min chelh loh danah min lo hmangaih ve tak tak miah lo tih chu ka hre chiang tawlh tawlh bawk.

Zanah chuan ka fanu lehkha ka zir pui a, ka rilruah erawh thil dang daih a awm thung. Dawr ka neih tawh loh avangin hna ka zawn a ngai tih ka hria, harsa deuh dawn mah se ka tilui zel mai a ni ang chu! Remruata min ngaihdan tur ka ngaihtuah neuh neuh a, chapo emaw min ti mathei, mahse chapo avanga dawr pe lêt ka ni lo va, a laka ka inthlahrun avanga pe lêt mai chauh ka ni. Keini pahnih inṭhen hlen tawh tak tak dawn mah ila a fanu erawh a thlahthlam dawn lo tih ka chiang em em a, ka pum chhunga nautê thlengin a ngaihven ru reng tih ka hria, mahse kan inkar chu a buai kual vek tawh a ni. Dar 8 leh a chanve velah a rawn lang thut a, min ṭhawng ngei mai. Kan room-ah ngawi rengin a ṭhu a, a fanu muhil enin a thaw leh hawk ṭhin a, kei erawh sawi tur leh tih tur ka hre miah lo thung. 

"Eng nge ka tih hmasak ber ang?" ka en deuh hâw a, a zawhna chu hrethiam lo nasa tak ka ni. 

"Ka bula in lo lêt leh theih nân eng nge ka tih hmasak ber ang?" a tih nawn leh tâkah chuan ka ngawi ran a, a zawhna pawh ka hrethiam ta viau.

"Sawi teh Zonun" ka awmna lama lo kal a rual nghal a, ṭawng ring hran lo mah se a thusawi chu ka hre chiang em em tho. 

"Ka chapo mah mah a ni ti raw?" ka dar tawn tawn dawm pah chuan a ti leh a, chawp leh chilhin ka mittui a rawn hnâm ṭiam ṭiam a, ani paw'n ka ṭah a chhuak tih a hriat nghal ka ring. 

"Aw" ka ti chiah chu a âwmah min kuah vawng vawng a, ka ṭah chhuak ru ṭun mah se ṭah nghal ngawt erawh ka tum lo lui ve tlat. 

"Ka tihpalh Zonun, ka chapo luatah ka chân teuh zia che hi i hria em? Zanin hian lo kal lo ila chuan kan inṭhen hlen ngei ang, mahse kan dam dun chhung chuan ka inṭhen nawn tawh lo ang" ti mawlh mawlhin min la kuah reng a, a awm dan leh a chet dan aṭang chuan a inchhir ve tak takin ka hria. 

"Inṭhen ka duh bik reng reng lo asin, engkim hi i thiam loh vek a ni. Ka thusawi kha i awih lo va, ngaihzawng min neihsan a, kei chu min ngaihtuah lo hrim hrim. Damdawi inah khan i bula lo lêt leh pawi ka tih loh thu hrilh che ka tum a, kan fanu hlimna ka duh ber vang a ni a, mahse nang chuan theihnghilh tur chein min la ti ṭalh a nih kha!" ka tih chuan

"Ka tihpalh, ka tihpalh tih chauh lo chu sawi tur ka hre rih lo" ti leh min pawm a rual nghal a, kan fanu mutna sirah chuan min mut pui a, kei tak pawh chu sawi tur ka tlachham rih khawp mai.

"Sangsangi hi ka khawngaih ṭhin, naupang mai a la ni bawk si" kan ngawih dun vang vang hnu chuan ka ti sep a, nghet lehzual hian min kuah a, ka fanu ka khawngaih luatah ka mittui a tla thei mai dawnin ka hria.

"Kan inah ka hruai haw che u ang a, in luah tur ka hmuh veleh kan in dang nghal dawn nia, kan hmu lo a nih leh in hmun chawpin ka lei mai ang" a rawn ti sup a, a nu bula awm ka thlahlel lo tih a hre chiang ve tawh a ni mahna le.

"Ka ngai che Zonun, a bik takin ka ngai em em che a ni" a lam chu ka hawi chho thuai a, ka sam ka benga zepin ka biang a chul zawm zat a, a mitmengah dawt a sawi lo tih a hriat hle bawk. 

"Kan inṭhen khan hrehawm ka ti, mahse inṭhen kha keima rawt zawk a ni miau a, hrehawm ti lo anga awm kha ka tum nasa ṭhin" a ti leh chuan a âwmah ka bei a, mipa thu duh leh a tih tawh lama ti tlat chi a ni a, a sawi ang chuan a awm tak tak ka ring. 

"I kâ aṭang ngei kan nupa inkar chhiatna bulpui ber ka hria a, ka nu ka zawt fiah nghal bawk a, lo pha eng ang mah se a thusawi ai chuan i thusawi rin ka duh tawh zawk a ni. I tan pasal nêp tak ka ni tih ka hai lo, ka fanu tan pawh pa ṭha ka ni lo, chu vanga inchhir em em chu ka ni"  ka khabe chawi kan pahin a tithum bul bul a, kan inmelh ta ran.

"Remruat" ring lo tak chuan ka ti sep a, ka khabe la chawi reng chung hian a rawn kun hniam riai riai a, ka hmui leh a hmui a inbawhthuah chiah chu ka mur chhuak vek thei.

"Ka la hmangaih reng che Zonun, ka bulah lo lêt leh ta che u? I tan leh ka fanu tan pasal leh pa ṭha tak ka ni tawh ngei ang, ka tiam a che u. Ka dik lo miau a, i lakah hi chuan ka tlawm ngawih ngawih a ni" ti supin min fawp leh a, chutah zet zawng ka dawh mawl tawp thei ta bik lo.

Duhthaw zet hian min fawp a, kei pawh ka bang bik chuang lo. Ka biang tawn tawna a chelh loh leh ka taksaah a kut lum nuam leh hrawl zet chu a vah kual tir riak riak a, kan awmna hmun kan ngaihtuah tawh lo a ni ber. Ka chung lamah bawkin min fawp mawlh mawlh a, kan duh tâwk hnuah meuh chuan kan thaw dun hlawi hlawi a, kan inawm hlat lo teh e. Min rawn fawp leh vawng vawng ṭhin a, min hmangaih thu mawlh chuan ka thinlung sak tak pawh a tizawp ral vek a, ka lawm em em bawk. Inkuah riala kan awm dun lai chuan kan fanu a rawn ṭap thut a, mang chhia a mang leh tawh a ni maithei. Kan awm dan siam ṭha vatin kan fanu chu kan buaipui zawm nghal a, a pa'n a kuah tâkah chuan Sangsangi pawh a muhil ve leh mai bawk.

"Apa, kan bulah awm char char tawh la" ka fanu ṭawng thawmah ka harh a, mahse meng nghal mai lovin ka mit ka la chhing reng thung. 

"Ka awm tawh dawn alawm Duattê, tun aṭang chuan ka hlatah in awm leh tawh ngai lo vang" Remruatan thum bul bula a tih tâkah chuan ka inlet a, an lam hawi zawngin ka mu a, ka meng ta nge nge. 

"Anu, apa kan bulah a awm tawh dawn asin" hlim aw zet hian Sangsangi chuan a rawn ti a, nuih sen senin ka lo buk khum a, ka fanu hlim lutuk chuan ka hnuk a tiulh mai dawnin ka hria.

Zing kâr hma tak a la ni a, ka muhil thei tawh lo bawk nen ka tho ta ringawt a, rei lo tê hnuah ka nu leh pa an rawn tho chhuak ve a, Sangsangi leh a pa inbe thawm an hre chiah chu mak an ti dun teh e. Zawhna min zawh nghal ta ngei a, zep awm hauh lovin ka hrilh vek a, a bula kan lêt leh tur thu ka sawi lai chuan ka pa a lo thaw huai a, ka nu pawh a hahdam hmel hle. Ni e, an hahdam ang, ka luhlul luatah ka fanu hlimna tur ka tichhe zel a, kan inṭhen chhanah Remruata thiam loh awm tho mah se ka dik lo ve tho tih chu ka hre chhuak har viau ang tih ka hlau hnuhnawh hle zawk. 

Tukṭhuan ei ve nghal turin ka pa'n Remruata chu a sawm a, mahse a lo hnar thung. Dawr ka nei tawh lo bawk nen inah ka awm tawp a, kan fanu chu ka hruaia ka thlah ngai lovin a pa'n min awl vek a, office a kal loh phah nghe nghe. Tlai lamah Remruata pa nen kan inbia a, kan lêt dawn thu a hre tawh a ni maithei, ka nu ni leh tur Remruata nu erawh a reh hmak thung. Khaw ên laia inhruai haw ai chuan tiin zan lama chet kan tum ta zawk a, zep lovah chuan ka huphurh ru ve reng. Remruata nu ni se nautê ka chhiat theih nân chet a la leh duh mai ang tih ka hlau si, rilru chu nuam famkim lo tak a ni. 

Zanah chuan kan nufain min rawn hruai ta ngei a, bungrua ṭhenkhat erawh a tla chawp tê têin kan inthiar phei thung. Ka nu leh pa'n min phei pui bawk a, Remruata pate'n nautê ka pai leh mêk tih an hre chiah chu mak an va ti tehreng êm. Sangsangi pi ber chu ka en chik a, ka hmel ni lovin ka pum ngawr ngawr a en a, kan lêt leh chu a lawm hmel hlawl lo. Kum eng emaw zah chhung nupa kan lo nih ve tawhna room-ah ngei chuan kan lut a, nuam a ti bawk a ni ang Sangsangi chu a ṭawng char char a, zan a rei tak tak hmain a muhil thuai bawk. Remruata chuan file bâwm aṭang lehkha pawimawh hmel deuh deuh hi a rawn phawrh a, nuai chuang fê man in leh a hmun a lo lei fel diam tawh chu niin, a che rang leh lutuk chu ka awih lo lek lêk hial.

"Kâr khat vel chu hetah kan awm rih ang a, kan insawn chhuak thuai dawn nia, min ring tawp rawh" nghet charh hian a ti a, ka rilruah erawh thil dang daih a awm thung. 

"Remruat, i thil buaipui hi a tlai hmain sut leh la ka duh. Fa mal i ni a, min ín dan pui chuan i nu leh pa ngaihdan a ni lo lutuk palh ang. Min ngaihtuah tih ka hria, mahse harsatna ka tâwk tawh kher bik nâng, a lo harsa deuh a ni leh ka tawrhchhel a ngai a ni mai" ka tih chuan

"Ni lo ve, kan nautê lo piang mai tur tan pawh he ina awm hi a him tâwk lo a ni. Eng vanga heti ang thu hi sawi thut nge i nih? Ka nu'n a lo ṭawngkhum leh hman tawh zawk che em ni?" a ti nghal a, lu thing nâng nangin a biangah ka dawm zawm zat bawk.

"A chhan chu ka hmangaih che alawm, i nu leh pate nena in inkar tichhetu nih ka duh lo. In dang ta ila, inhmu thiam lo leh ta si ula, ka hlim thei tak tak chuang lo vang. Chu vangin ka nu hi chu engtin pawh awm se ngaia neih mai a fuh zawkin ka hria, in hmun i lei fel vek tawh hnuah heti ang thu ka sawi hnuhnawh leh hi a pawi ka ti, min hrethiam teh" ka ti sep sep a, ani chu a ngawi reng ringawt. 

"Kan inhmangaih phawt a hnu, eng ang paw'n kan nupa inkarah buaina awm leh dawn mah se awmzia a awm tawh lo ang. A hma kha chuan kan inhmangaih tak tak lo a ni mahna, kan inring ngam lo dun êm mai" kemah bawk chuan ka ti leh a, a âwmah min kuah bei ta hle hle. 

"Ka lo sual ngawt mai, i thusawi kha ring ila chuan kan inṭhen miah lo ang. Ka hlimna in ni a, Duattêi leh i pum chhunga nautê thleng hian ka hmangaih a, ka thinlunga a ber dinhmun luahtu erawh nang chauh i ni; nang chauh" ti ril ruihin min fawp vawng vawng a, ka va hmangaih zual tak êm.

A tukah chuan a in hmun lei fel tawh chu a buaipui ṭha leh a, rin aiin an lo khirh zêk leh nghal. Keimah avanga a buai viau chu nuam lo ka ti ve reng, mahse ka rin aia hmain in hmun a lei miau a, titi puina hun pawh a awm lo a nih kha! Ka pa chuan min duat hle a, ka nu erawh min la be ṭha lo hle. Ni e, mo tuarzuau tak nih ka duh bik reng reng lo, ka nu rilru sual avanga pasal ṭhen chu ka tum tawh lo bur bawk. Ka pum pawh a puar lian ve tial tial a, mak tak maiin ka nu chu ka lakah engtin mah a awm lo va, zep lovah chuan ka inveng ru reng ṭhin, nautê ka chhiat ang tih mawlh ka hlau a ni. 

Nitina awm dun ṭhin kan nih avangin a be hmasa zawkah ka ṭang ziah a, ka hlimna ai ka pasal leh kan fanu hlimna ka ngaih pawimawh zawk vang a ni pakhat. Be duh lovin ngawi tlat ila, thinrim khum vel ta ila, kei ngei pawh ka hlim dawn chuang lo tih ka chiang a ni. Chu vangin ka tuar mai ang, in chhungkhura innghirnghona a awm loh nân dawhtheia tawrhchhel mai chu ka tum ta zawk a ni. Ka pum chhunga nautêin thla 7 a tlin hnu phei chuan ka nu chu mak ka ti tawlh tawlh a, ngawi reng hian ka chetna turah min chet khalh zel a, Remruata pawh ka hrilh tawh, ani paw'n kei ang bawkin mak a ti ve tho.

Thla kima paiin nautê chu ka hring ta ngei a, mipa a ni nghe nghe a, ka pa chu lawm tak a ni. Nautê kan neih ni chuan ka nu rilru kan hrethiam ve chiah, ka khawngaih letling zawk. Ka laka a lo chet tawh dan avangin a inchhir em em a, a túpa thar pawh pawm tlak lovah a inngai a, Remruatan a pawm luih tir tawp ringawt. Rilru nât hmel fê hian ngaihdam min dil a, ka ngaidam chiang asin, ka lawm em em bawk. Thisenin inzawm lo mah ila ka thih hma zawng ka nu pakhat zawk a ni kumkhua tawh dawn tih ka chiang em em a, a chhan chu ka pasal nen kan inṭhen tawh dawn loh vang a ni.

Kan fapain thla 3 a tlin hnuah phei chuan kan chhungkuaah harsatna a awm tawh lo a tih theih hial a, kan lo in dang thawt thawt ang tih ka hlau hnuhnawh hle bawk. Dawr lam erawh neih ka duh tawh lo va, Remruata tak chuan min siamsak a tum nasa ṭhin, ka dawr lo neih tawh sa chu enkawl chhunzawm turin min ti a, ka duh loh tlat avangin min siamsak ta lo a ni. Ka thatchhiat vang pawh a ni lo, kan fate tan nu ṭha tak nih ka duh vang zawk a ni. Ṭhenkhat hi chuan hna nei chunga fate a enkawl theih thu an sawi ṭhin a, a dik réng, mahse kei chuan ka pasal leh kan fate bula hun hman hnem ka duh ta ber zawk a ni.

Hna nei leh ta ila, dawr nei leh ta ila chuan ka buai leh ang a, inah pawh ka awm tam lo ang a, chu chu ka duh lo zawk a ni. Mihring hi chu kan inang lo va, a bik takin hmeichhiate hi kan danglam chak em em a, hmeichhia kan nih ang hian mipa min be hlek tu awm se sawi sep kan kai hma em em ṭhin bawk. Chung thleng chuan ka ngaihtuah a, Remruata min rinhlelh theih zawnga awm ka duh tawh lo a ni. Tin, ani pawh ngaihzawng a nei emaw ka tih kha a lo nei bik reng reng lo va, a sawi tirh chuan ka awih bik lo, mahse tih tak zeta ngaihzawng min la neihsan miah loh thu a sawi kha chuan ka awih ta a ni.

Ka phone message tone chu a ri a, rawn thawntu ka en chuan ka khi sak a, dar 1 bawr velah hian ka pasal hnen aṭang message ka dawng ve ziah a, ngaiah ka nei tawp tawh. Ni dang ang bawkin

"Ka chau ngei mai, mahse ka lo haw ang a, ka hahdam suai suai mai ang, a chhan chu ka hahdamna i ni tlat" tih hi a rawn thawn a, mi â ang maiin ka nui ver ver ringawt. 

"Ka hahdamna i ni Zonun" tih bawk chu a rawn thawn nawn leh a, ka call ta zawk a, ka inbe rei ang reng.

"Ka lo haw hunah min bual rawh aw" chu thu a sawi chiah chu ka nui ri hak hak a, ani pawh a nui tho, kan va han hlim dun tak êm.

(A tawp ta)