I CHÂM RENG SI By Havali Adam

I CHÂM RENG SI

(Mizo Romantic Short Story)

By 

Havali Adam

Ka thil tih mêk avang chuan ka va zâm nasa tehreng êm, a vawi khatna atan Scooty ka khalh ve chu a nia, ka accident ang tih mawlh ka hlau. Ka khalh chhung zawng chuan ka thin phu a rang em em a, ka hnunga chuang; ka chhang chiah lah chu a la hlauh loh hmel em em zui. Ni lo, a hlau miah lo hrim hrim zawk, hlau lo tak a ni. Kei aiin naupang mah se Scooty khalh a thiam hmasa zawk thung a, Aizawla awm a ni bawk a, a khalh chhuak ngun khawp ang ka ring. Kei erawh phaiah lehkha zirin ka awm bo char char a, graduate hlim hlawl ka ni a, Master chu ka pa'n Mizoram University lama zir zawm turin min ti thung a, chu vanga haw mai chauh ka ni, ni lo se chu phaiah ka la awm ngei ang.

"Hetah hian lo ding rih lawk mai rawh, ka rei lo vang" ka hnunga mi'n a tih chuan ka ding ve mai a, accident miah lova ka khalh thei chu ka thaw a veng huai mai. 

"Rei miah suh" scooty aṭanga a chhuk rualin ka ti nghal a, inrinni a nih avangin mipui an tam mai bakah motor pawh a tam hle. 

"Kha laia mi kha engati nge khatah khan i din? Tlan sawn thuai rawh, Bus Stand a ni tih i hre lo em ni?" mipa aw thum chhah ṭha lutuk ka hre chiah chu ka phu dâwrh a, ka tha te chu khur nasa tak a ni. 

"Ka ṭawng i hria em?" a tir ang êm emin thum hlauhawm tawh lo mah se ka hnaih takah a rawn ding tawh thung a, en pawh ka en ṭha ngam lo. 

"Ka tihpalh" ti sepin Scooty chu ka herh nung a, ka nau lah rin aiin a lo lêt har phian bawk si, ka rilru a buai nuaih nuaih tawh a ni ber. 

"A chhak deuhah khian han park mai rawh" min be reng lo se ka ti ngawih ngawih, a chhan chu a aw chuan min tizam zual a, ka kalh chhuak tur te chu ka tlu mai dawnin ka hria.

Thui pawh ka tlan hman lo ang tihah ka tlu ta ringawt mai, ka va han zak tehreng êm. Tho vatin Scooty chu tun din ka tum a, whistle a rawn ri tuar tuar bawk a, chutah ka la tung ding thei lo zui. Ka tih ngaihna hre lo chu ka maimitchhing tawp a, ka ṭah a chhuak ru em em a, theih se chu khuk ral daih ka duh hle. Ka men rualin ka hma zawna traffic police lo chhuk thla mêk ka hmu nghal a, pa tawh hmel deuh hi a ni a, a zaidam hmel teh chiam lo leh nghal. A lo chhuk thla zel a, ka bul a rawn thlen thlak hmain Scooty chu awlsam zeta min tun din sak tu an awm ta tlat mai. A hmel ka en chuan ka zâm tulh tulh a, hrehawm ka ti tulh tulh bawk.

"I vawi khat khalhna a ni maw?" min biak dan chu ka hrethiam lo, a hmaa min biak dan nen chuan inang lo tak a ni. 

"I tlu nâ em?" amah bawk chuan a rawn ti leh a, lu thing pahin ka hmui ka pet fan fan a, a hnuah phei chuan ka ṭap ta nge nge. 

"I va nervous awm ve le, khawlai a nih hi, ṭap ringawt suh, ka hau che emaw an ti mai dawn asin" a hmel rum deuh úl chu ka en chho va, a hmel tak run mah se a aw erawh a dam phian lawi thung.

"Khaw maw i license?" ka lehhawi nghal thuai a, chu traffic police pa chuan min en chîk khawp mai. 

"Ka lo buaipui mai ang pu Zir" ka bul chêta ding zawkin a tih chuan ka hmaa mi Traffic police pa chu a bu nghat a, ka scooty a en leh kher bawk. 

"A nih chuan ka chho mai dawn, i hmel hriat em ni?" tiin ka hnunga mi chu a melh chho hâ a, ka hnunga mi lah chuan

"Ka nau a nia" a lo ti awlsam mai a, ka ṭah pawh a chhuak tawh lo, awm dan tur ka hrethiam lo hle tawh zawk.

"Hmachhuana zarah i him dawn a nih hmel mami, pawisa chawi tur lam kha chu i kutah awm rawh se" tih leh chu pa chu kal sawn a rual a, kei chu sawi tur ka la hre lo tluang zel. 

"License chu i nei em?" ka hmaa mipa; pa lian leh a bula awm hrehawm em em chu ka en chho rál a, insan hleih tak kan ni. 

"Nei lo" ka tih chuan scooty-ah chahbi a rawlh lut a, a herh nung zawm zat bawk a, scooty khalh turin min mitmei a, mahse kei chuan khalh ka tum tawh teuh lo.

"Ka khalh ngam tawh lo, ka tlu leh palh ang" zawhna mitmenga min en chhuk run avangin ka ti leh tawp a, ka tha a khur nasa bawk si, ka khalh chuan ka tlu dawn tih ka chiang. 

"Khawi vengah nge in awm?" buaithlak tih hmel fê hian min en a, Republic venga kan awm thu ka sawi hnu chuan scooty-ah a chuang a, a chet dan chu mak ka ti ang reng. 

"Eng nge i tih dawn? Min man dawn em ni?" hlauthawng zet hian ka ti thuai a, ka lam a rawn hawi a, a hmel chu a va han nelawm loh chiang êm. 

"Lo chuang rawh" a tih chuan naupang thu awih tak ang maiin ka chuang nghal a, a tlan chhuak te chu a khawmuang lo hle.

"Khawiah nge min hruai dawn?" nghet zeta scooty hnung vuan pahin ka ti a, a tlan muang lo bawk a, Sikulpuikawn chu kan thleng chho a ni der. 

"I khalh ngam miau si lo va, ka thlah ringawt dawn che a nih hi!" a aw chu hriat nuam a ni leh ta hauh lo, a bul lam mah mah zawk a ni. 

Republic pêng lamah kan kual lut a, a zawh ngai lovin biak in thlang lawka kan awm thu ka sawi a, a khalh chak viau e ti lo chuan a khalh dam phian leh nghal. Kawipui chhuk thla vel te chu hnehsawh tak a ni, kei ni ila chuan ka tlu chiang khawp ang. A chhuk ûn si, kal lamah te khan harsa ka ti hle a nih kha! Ni lo, thil ka theihnghilh chiang lutuk! Ka nau, ka nau kha engtin nge a awm tàk ang? Thakthinga Bazarah a la awm ngei ang, ni lo, min zawng nasa viau tawh zawk ang, kei lah chu ka haw daih bawk si. Kan in kawt kan thlen chuan rang zetin ka chhuk a, ka phone ka phawrh a, ka nau chu ka call nghal bawk.

"Tum loh deuhin ka haw daih a nia, lo haw ve tawp mai rawh" phone call a lâk rualin ka ti nghal zung zung a, ka ṭawng dan chu ka bula ding run pa chuan mak a tih hmel hle.

"I va ti ho tak!" tiin phone chu a off zawm zat a, ka lakah thinrim pawh ni se a awm hliah hliah, a u hi ka tlaw êm a ni. 

"Ka lawm e ka pu" ka hmaa mi pa tê lo tak chu ka melh chho ral a, a hmel awm dan aṭangin a pawi ka sawi emaw ka ti hman hial.

"Fimkhur tawh ang che naupang" a ṭawng dan teh hmuk chu ka va han ngaina lo chiang tak, ka pu tia ka ko chu a lungawi lo a ni ngei ang.

"Khawiah nge i kal dawn?" a kal sawn tur chu ka be leh a, eng vanga be chhen nge ka nih ka hre bik hauh lo leh nghal.

"Ka duty-na hmun turah ka lêt ang chú, i lo kal ve duh em ni?" zawhna ka lo zawt kher kher chu inchhir tak ka ni. 

"Ni lo, khati ang lam ka sawi tum a ni lo, engtin nge i chhoh dawn tih hre ka duh mai mai maw le" ka tih chuan a dar tikang zeuhin min hnung chhawn zawm zat a, a chet dan chu ka en reng ringawt. 

"A harsa hleinem" ti supin scooty tlan lai pakhat hi a phar ding a, ka zawhna chhang mah se min la hnung chhawn reng thung a, a awm dan chu mak ka tih zawk tak. 

An tlan liam thlengin ka en zui vawng vawng a, lawm thu pakhat mah ka hrilh hman lo chu mawl ka inti hnuhnawh leh a, awm lo se chuan pawisa ka chawi mai bakah buaina ka tâwk chiang khawp ang. Kan in kawtah scooty chu ka hung ṭha a, in chhunga ka luh rualin ka nu'n ka nau awmna min lo zawt nghal a, ka thil tawn ka sawi chiah chu a chek tlawk tlawk ringawt. Ka nau hruai turin ka pa a hrilh zawm zat bawk a, kei chuan scooty khalh leh ka tum tawh lo hrim hrim. Ka nau hmel ka hmu chiah chu min hau nghal tawn tâwn a, thiam thu sawi tur ka nei lo bawk nen ka ngaithla liam mai mai thung.

Zanriah ei khamah min chhuah pui a tum phêt a, chutah Folkland lamah a la ni zui. A nau zawk mah ni se kei aia rilru puitlin zawk chang a nei ṭhin a, scooty lamah ngat phei hi chuan ka u a ni ringawt. Kan inphur chhuak leh ta nge nge a, ama'n a khalh a, thui kan tlan hmain a ding a, ka rin lâwk ang ngeiin khalh turin min ti leh ta. Ka peih loh thu ka sawi ve tak ná a, min tih luih tlat avangin ka khalh ve leh mai a, mahse tlai lam ang em emin ka zâm tawh miah lo, vawi tam khalh chhuak tawh ang mai ka ni. Ka hnunga chuang nu lah chuan ka khalh thiam reng thu te, ka tluk chhan leh ka thil tawn te chu min zawt a, a mak lutuk, khalh buai chuang miah lovin ka hrilh thei a nih chu! 

Zan tira chhuak peih lo em em kha ka haw lamah te chuan a thui thei ang berin ka tlan kual a, khalh thiam ka inti tawh hle bawk. In kan thleng a, ka nui lut ver ver a, ka nu'n zawhna min zawh phah nghe nghe. Street food kan lei haw chu ka nau room-ah kan ei dun a, kan ti pah melh melh a, unau inchhangbung tih takah kan thil sawi duh zawng a inmil thei hle. A chang leh a ṭhiante chanchin a sawi a, a chang leh movie lam kan sawi leh daih a, kan meng rei dun phian bawk. Ka khuma ka mut meuh chuan a tlai duai tawh a, meng rei mi ka ni lo va, khum thlen ruala muhil vat ṭhin ka ni zawk a, mahse ka muhil thei lawk lo chu mak ka ti ang reng.

A tukah chuan pangngai deuhin ka tho ve leh mai bawk a, kan result a chhuak hlim hlawl bawk nen Admission lam kan buaipui nilêng a, ka pa'n min tihpui vek bawk. MZU-ah kan kal a, Master zir zawm turin min duh miau a, ka zir zawm zel mai a ni ang chu! Kei tak pawh hian ka duh ve tho, mahse a ruk chuan competitive lam exam ve chhin ka châk, ka hma hun tur hre lo mah ila sawrkar hna sang tak thawk thei khawpa inziah tlin ka châk a ni ber e. Admission tih hmain entrance exam a awm a, ka paltlang harsa hran lo. Pathian zarah ka tling ve mai a, mi 500 chuangah mi 35 chauh kan la tling zui.

Entrance exam leh Admission vel kan tih fel hnu aṭanga kâr tam a liam hmain class kan kal ṭan nghal a, nuam ka ti rih viau bawk. Kan venga mi te pawh ka hmu nual a, kal lam leh haw lamah Bus-in kan kal mai zel a, chuan chhung erawh a rei duh ngat ngat hle thung. MZU hi chu kan veng aṭang a hla ve chiang alawm, nitin kan zu zin hi a ni mai. Mipa ṭhenkhat phei chu ka khawngaih ṭhin, chuan chhung zawnga din tluan ṭhak te an awm a, an ke a kham thei ngawt ang. Mimal lirtheia kal tam tho mah se Bus-a kal leh haw an tam zawk tlat a, Bus chu a tawt lo thei lo a ni. Hmeichhia erawh tawt viau mah se hmeichhia kan ni a, kan ṭhut theih nâna an ṭhutna min kiantu mipa an tam thei hle. 

Ni khat chu Ramrikawn kan thlen thlak laiin thla tam ka hmuh tawh loh Traffic Police pa kha ka hmu leh thut a, Ramrikawnah a duty tih ka hrethiam mai a, mahse engtin emaw ni tak hian ka awm tlat a nih chu! Kan tlan liam dawn te chuan ka thlek zui vawng vawng a, lawmthu sawi ka la bâ bawk nen ka rilru a nuam thei lo a ni ber. Class room chhunga kan awm chhung zawngin zirlai lam pawh ka ngaihsak ṭha mumal lo va, Traffic Police ngawr ngawr ka rilruah leh ka mitthlaah a awm a, zing lamah hmu lo ila chuan ka ngaihtuah reng bik miah lo vang. Lunch Break laiin haw huna hmuh ngei tumna rilru ka pu ta a, a hnena lawmthu sawi chu ka tum bur a ni. 

Zirtirtute an kal kim lo hlauh a, ka rin aiin kan bâng hma ta phian a, ka ṭhiannu Irene-i scooty-ah ka bet a, Mission venga mi a ni tho bawk nen kan inphur thui thei viau dawnin ka hria. Ka hmanhmawh ru viau ná a, Irene-i chuan 6 Miles-a chawlh a ti deuh tlat a, ka chawlh pui ta ringawt a, ei tur engmah ka chah lo thung. A ruk tak chuan che muang ka ti khawp a, Traffic police pa kha ka hmu leh si lo vang tih ka hlau a ni. A hman ta maw tihah kan inphur chhuak a, Ramrikawn kan va thlen chuan Traffic police àwm reng ka hmu ta hauh lo mai. ATM Booth bulah kan ding a, Irene-i chuan a hrethiam lo teh e.

"La kal lo lawk" ka ṭhiannu tlan chhuak tawh tur chu ka tiding a, scooty aṭanga chhukin ka mi hmuh pa awmna lamah ka kal phei nghal pâwk pawk zui bawk.

"Min lo hrethiam lawk ka pu" ka aw a hriat rualin ka lam a rawn hawi a, ka hmu tawh dawn lo emaw ka ti hman kha a nia, amah ngei ka hmu leh chu ka lawm ru hle. 

"Min la hria êm? Hmâna mi kha ka nia, min hre tawh lo maithei bawk" ka insawi dan teh tlawng chu a va han hawihawm lo tak, min en deuh run pawh chu àwm ka ti viau.

"Ka hming chu" ka tih laklawh laiin a kut a vai zeuh a, sawi chhunzawm lo turin min duh tih hrethiam takin ka ngawi zui ve leh mai. 

"Ka hria che" tih chauh hi a rawn sawi a, mak tak maiin a hmaa ka zâm rukna ṭhin zawng zawng kha a bo duak a, min en chiah phei chu ka kâ a chilh vek thei. 

"I sawi tur awm ang pawh ka hre deuh reuh" ti leh supin min melh chhuk run a, a lû a met a ni ngei ang a bek chu a kawng mawi em em a, ka zep lo vang, hmelṭha vûk ni lo mahse a pá thlawt a ni. 

"Eng lo" tih ringawt chu ka sawi a, ani'n a kawr bân a thlep mial mial a, mipa ṭawng duh zawk zawk chu a ni lo chiang khawp. 

"Ka lawm e, khami nîa kan in thleng min thlah avang khan ka lawm e, a hun laia lawmthu sawi nachang ka hre lo erawh min hrethiam dawn nia" aw ka then kharh kharh hnuah ka ti ve thei ta chauh a, ka hmuh tirh khan a hmel a ngainatawm loh tehreng nen tun ṭum chu a ngainatawm thlawt a ni.

Engtin mah min chhan lêt loh avangin ka inher a, Irene-i min lo nghakna lamah ka kal phei nghal a, ka vawi hnih hmuhna chauh mah ni se Traffic police pa chu ka duh nghal ringawt ni maiin ka hria, chutih rual chuan ka hre dik lo ve thei tho bawk. Scooty-a Irene-i nen kan inphur hnu chuan Traffic Police pa chu an venga awm a nih thu te, a hming thlengin a sawi a, kan inhriat dan min zawt a, sawi tur hre lo tak ka ni. Zep lovah chuan nuam ka ti veng veng a, 'Love At First Sight' an tih ang mai hian ka awm a, mahse ka vawi khat hmuhna a ni bawk si lo. Ka room-a ka luh hnu thleng chuan ka mitthlaah a chet dan leh a hmel pá tak te, a lu meh inhmeh zet te chu a châm reng a, ka awm a nuam sawng sawng thei maw le.

Irene-i khan a hming chu Zohmachhuana a nih thu a sawi a, a hmel nen ka hmehbel vel a, a inhmeh ka ti em em bawk. A tukah chuan a hmel hmu châkin ka mit ka lén leh a, mahse Ramrikawnah a lo duty tawh reng reng lo. Irene-i han zawh ngawt lah ka duh si lo va, an veng a inang tih leh an inhre hnaivai tih hre chhuak thutin ka phone ka phawrh a, Irene-i FB Friends ka check ru hial a, ka awm dan chu keimah leh keimah pawh ka inawih lo zawk. Ka zawn fê hnuah pawh ka hmu thei lo va, ka zawng buai duh ta lo va, mahse ka vei ru em em tho. 

Nula; vawi khat pawh bialpa emaw ngaihzawng emaw pawh la nei lo ka ni a, kei ve teh lûlin chuti taka mipa vei ruk ka nei chu a mak a ni. Ka chhungte'n hre phei se chu engtin tak min ti ang maw, mak an tih ve viau chu ka ring. Chumi ni aṭang chuan FB lamah a rukin ka zawng zantin ta ziah a, beidawn châng pawh ka ngah mai, mahse ka zawn loh phah chuang lo. A hming mawlh chu a mawi ka ti thar em em a, ka ngaihah chuan a mipa hming ngawih ngawih. Amah nen ka'n suangtuah vel ṭhin, a pa lian si, a pá bawk si, a bula awm kha a hahdam thlak leh zel a, kan awm dun lai khan min be lem lo mah se kan inhmuh loh vang vang hnu thlengin a zún chuan min phuar zawm zel thung niin ka hre ta ber.

Bazara ka chhuah te hian hmuh tumin ka mit ka lên ruai zel a, a hmel hmuh tur a vâng ta lutuk chu a awihawm loh zawk. Aizawl khawpui chhunga Traffic police zawng zawng ka hmu kim vek tawh maithei, chuti chung chuan ka mi hmuh duh ber hmel erawh ka la hmu thei lo thung. Irene-i chu ka zawt tawp dawn ṭhin a, a hrethiam nghal vek ang tih ka hlau tho bawk si, ka zawt lo leh nge nge ṭhin. Zan khat erawh beisei loh deuhin phone-ah a thlalak ka hmu hlawl a, chumi zan aṭang chuan a FB profile ka check ziah a, a thlalak te chu ka en ning thei lo a ni mahna. Thlalak a dah tam lo va, an chhungkaw thlalak pahnih khat a ni mai a, Social Media lam a khawih vak lo a nih ka ring ve hmiah. 

Thawhṭanni a ni a, mi hlawhtling ṭhenkhatte pualin kan University-ah programme kan hmang a, chutah chuan ka hmuh duh em em ṭhin; a ruka ka lo zawn char char pa chu ka hmu ta alawm, hmuh loh kâra mi hlawhtling tak a lo ni hman daih chu mak ka ti em em bawk. A kawmtunu chuan zawhna chi hrang hrang a zawt kual a, Traffic Police hna thawk pahin sawkar hna sâng takah a inziak tling hi a lo ni a, hausa tho mah se a pa'n thawk tura a tih avangin Traffic Police hna a thawh thu te a sawi tel bawk a, ka va han ngaisang zual êm. Kei chang ka ni lo, hmeichhe ṭhenkhat chuan pá an ti ve tho, Mizo mipaah chuan ani tluka 'perfect' an awm lo maithei a tih theih hial ang. 

Programme a zo va, Auditorium chhungah ka la ṭhu reng a, thla an lâk pui sup sup a, chawp leh chilhin ka awm dan chu a âtthlak tih ka hre chhuak thuai bawk. Pawna Scooty in-park tlar ṭhupna bulah ka ding a, ka haw pui ber tur Irene-i a zung mêk a, chutih lai chuan a ruka ka duh em em pa chu a rawn chhuak ta, an la be deuh luaih luaih a, mi lar hi a ni ringawt. Car dum fai tliang hán bulah a ding a, eng emaw ni hmet ri zeuhin Car chhungah chuan a chuang lut nghal a, ka lo ral thlir ngawt ngawt tawp a, ani lahin min hmu lém chuang si lo. Ka dinna a tlan pelh hnu chuan a khalh muang deuh sawt a, a rawn tawlh hnung leh nghe nghe a, theihnghilh a nei a ni maithei. 

"Mi nghah i nei nge Scooty i khalh haw ngam lo leh tawh?" glass a down rualin min rawn be hlawl a, min biak dan kher kher chu hun kal tawh ka hriat chhuah phah a, mei nei takin ṭawng mah se ka haw miah lo thung. 

"Lo lut la, ka lo thlah ang che" ṭawng tumin ka âng zuau tawh a, amah zawk ṭawng leh lo se chu a zawhna ka chhang ngei ang. 

"U Hmachhuan, i la haw bik na nge? Nang chu i lár tawh sia, min induh khum kher lo la" ngampa zeta rawn betu Irene-i lam chu ka hawi nghal thuai a, a ngaite bawkin ka ṭawng hman leh ta lo.

"I u eng nge a tih ṭhin? Phaiah a la awm em?" a biakna mil lo zet hian a tih zawm daih thung a, Irene-i lah chuan ṭha takin a chhang ve mai bawk a, kei erawh ka ngawi tawp ringawt. 

"Lo lut rawh le" ti supin ka lam a rawn hawi a, a ṭhutna bul hawi zeuhin Car kawngka chu a nam hawng a, ka tan chuan luh lohna chí a ni tawh lo hrim hrim. 

"Veni" ka ṭhiannu lam chu ka hawi zeuh a, ka kal ngaiin ka kal reng a, a mak lutuk, control ang maiin ka kal a, Irene-i chuan mak a tih hmel viau bawk.

"Nangni pahnih hi eng nge in awmzia? In lo inhre sa reng zawk nge?" Irene-i chu ka chhang lo va, kei ang bawkin ka bula ṭhu pa chuan a chhang bik lêm hlei lo va, kan tlan chhuak ta daih. 

"I hmingpum kha LALVENHIMI a niin ka hria, a dik em?" hma lam hawi reng pah hian a rawn ti thum bul a, ṭawngkáa chhang lovin ka bu zeuh a, min en bawk si lo va, ka chhang lo emaw min ti ngei ang.

"Lian tak i ni si lo va, Vte tiin ka ko mai ang che" a tih leh chuan a lam ka hawi nghal vat a, chuti ang chuan tûma'n min la ko ngai lo.

"Engtin nge ka hming i hriat?" ka ti deuh tawl a, hma lam la en reng chung hian a nui suk a, dik tak chuan a hmelṭhain a pá thlawt a ni. 

"A harsa hleinem, ka hriat duh zawng chu ka hre mai zel" ti supin ka lam a rawn hawi zeuh a, a ṭawng duh dan lah chu ka rin loh lam hlir a ni leh nghal.

"Engtin nge min koh ve dawn le?" kan ngawih dun vang vang hnu chuan amah zawk a ṭawng leh a, Vaivakawn chho Traffic Jam-a kan tân lai a ni nghe nghe.

"I hming ka hre lo" ka ti ve tak ná a, a ruka ka zawn nasat zia hria se chu min ngaihnep phah ngawt ang. 

"I hriar ka ring, i ṭhiannu pawh khan min koh tawh kha maw le" a aw chu a thum hniam ruih a, kan inhmuh hmasak ber ang lo takin a dam phian bawk. 

"Eng lo, u Hmachhuan ka ti ve mai ang che" ka ti ta nge nge a, a hmingte chu ka hming a hriat hmain ka hre daih tawh zawk ang, mahse engtin nge ka hming a hriat, ka hrilh pawh a ni tawp si lo. 

"Ka hmingpum kha engtin nge i hriat?" tiin ka ṭawng zawm leh zat a, a ngawi reng a, mi chhan a tum loh hmel khawp. 

Traffic Jam karah kan inhnawh chho ve zel a, kan inbe leh tawh lo hrim hrim bawk. A reh lutuk a ti te pawh a ni mahna, ring vak lo hian hla a play a, mak deuh chu zâm ngawih ngawihna emaw hrehawm tihna ka nei tawh miah lo. A hma kha chuan ka tlu kher bawk nen ka zâm chhe vek kha a nia, tunah erawh Car chhungah kan chuang dun a, a bula ka chuang thei ringawt te chu nuam ka ti ru hle. Sikulpuikawn kan thlen chuan kan veng lamah kan tlan zel a, ka ṭhut dan siam remin ka bula ṭhu ngawi run pa chu ka en zeuh a, a motor khalh chiah a ngaihtuah a nih hmel.

"Zanin eng nge i tih ang?" kan in awmna kan thleng thla ṭep tawh tihah min rawn be thut a, ka hawi hái teuh hle bawk. 

"Ka inkhawm ka ring" ka ti ṭha ve mai a, a chhan chu KṬP inkhawm zan a ni tlat.

"Inkhawm banah eng nge i tih ang?" bul deuh hmuk hian a ti leh a, ka ngaihtuah vang vang a, tih tur ka neih áwm ka hre hauh lo.

"Tih tur i neih lém loh chuan ka lo kal ang" ka ngawi rei hret a ni mahna, amah bawk a ṭawng leh a, mahse eng thu nge a sawi zawh chiah kha!

"Engati?" ka aw chhuak chu a dik lo nghal vek a, ka rin loh lam daih a sawi chu mak ka ti a ni ber. 

"Lo kal ka duh a ni mai alawm, a theih loh em ni?" zawhna hmangin min chhang lêt a, a awm dan chu hriatthiam a har ka ti. 

"Ka hre lo...ka...ka sawi awmzia chu...theih tho e, i duh leh duh loh a ni mai" ka ti bah nawk nawk a, Master lâi zir ve tawh si ka va han ṭawng chhuak dik lo nasa tehreng ém. 

Kan in kawtah a ding chat a, a hriatna a ṭha viau a ni ang kan in chu a hai lo reng reng. Hawihhawm takin lawmthu ka sawi a, min chhang lo hrim hrim a, a tlan liam zui nghal vang vang bawk. Zanriah kan ei lai te chuan awm dan ka thiam chiah lo, inkhawm bana a lo kal tur thu ka hre bawk si, mak ka tih rualin ka phur ru ni berin ka hria. Inkhawm chhung zawngin u Hmachhuana chu ka rilruah a awm reng a, a lo kal chhan tur tal sawi se chu awm dan ka thiam deuh mahna, sawi a hnékin a duh hun têah bak a ṭawng lo a nih kha! Inkhawm kan bâng a, kan in thlang deuhah hian Car pakhat a lo inhûng ran a, chu Car neitu chu ka hre deuh reuhin ka hria. 

"Vte" mipa aw thum bul ka hriat rualin ka ding chawt a, ka bula kal ka nau pawh chuti tho, min koh dan lah chu ka duh lo hran miah lo leh nghal. 

"I lo kal tak tak maw? Min lo nghak em ni?" pangngai takin ka be ve mai a, a lo kal ring tho mah ila mak ti ang deuhin ka awm lui tawp, a chhan chu ka nau chuan min en chîk lutuk tlat.

"Nghak chu a ni mai, mahse a la rei hran lo" a rawn ti a, tlai lam ai ngawt chuan a ṭawng pawh hriat a nuam deuh zawkin ka hria.

"Tu nge a u?" ka nau chuan ka beng bulah a ti ser ser a, ṭawng ka tum lai takin u Hmachhuana chu kan bul a lo thleng phei a, ka ngawi leh ta zawk. 

"Lut ila" ti sepin ka en a, min buk khum zeuh a, ka nau lut hmasa berin kan zui lut ve nghal bawk. 

"Kha, khawi lam mi nge Mami?" kan hmel a hmuh rualin ka nu chuan a lo ti siam siam a, mak a tih hmel ang reng. 

"U Hmachhuana a nih hi" ka ti ṭha ve mai a, chu bak sawi tur ka hre rih lo.

"Min u kher suh" ka hriat phak tawk lêk awm vel hian ka bula mi chuan a ti deuh hmuk a, ka nau erawhin a hriat phak tho ka ring. 

"A nih chú, lo ṭhu rawh Hmachhuan, khawi veng nge i nih reng reng a?" ka nu hi chu inlêng te chhawnchhaih lamah a ṭha thlawt, kei ngei pawh hian ka awt ṭhin. 

"Mission vengah kan awm e" Hmachhuana chuan a ti ve mai a, u kha a duh lo bawk si nen u kher chu ka tum ta lo mai. 

"Tu nge kan inlêng pa saw? Mipa ṭhian i neih àwm ka hre si lo, nge nang hian bialpa i lo nei ru reng zawk?" ka inthlak laiin ka nau a lo lut a, zawhna a ngah nghal hle. 

"I ngaih ang kha a ni ringawt lo, kan inhriatna pawh a la rei hleinem, ni lo, kan inhriatna tak chu a rei ve tawh tho. Kha, hmâna kan bazar dun ni khan amah sawn alawm kan in thleng min phur haw" ka tih chuan awih loh hmel fê hian min en a, ka inthlaksan leh ta mawlh mawlh.

Hmachhuana chu rei tak a lêng lo va, inlêng a nih angin thingpui te ka lumsak a, a haw dawn chuan kan in kawt thleng ka thlah ve thlap a, ka mood chu fuh cher cher tak a ni. In chhung ka lut leh chiah chu zawhna ka dawng nghal a, chu pawh ka nau hnen aṭang bawk a ni. Ka nu chuan thil tam min zawt lém lo, ka pa ni se a lên chhuah lai a ni a, mahse ka nau chu a ruka Hmachhuana ka duh thu leh ka vei thu ka hrilh duh der lo. Kei aiin a naupang zawk a, ngaihzawng erawh Higher a kal laiin a nei daih tawh thung. Kei ve chu Master ka zir kumah mipa duh leh vei ka nei ve ṭan chiah chu a nia, unau inchhangbung mah ni ila kan inang lo teh e. 

Ka mut a tui bawk a, zing pawh ka thawh nawm phah hle. Hmachhuana chu a rawn lêng ta ziah a, zantin erawh a ni lo thung. A mak ka tih rualin a nuam ka ti tho bawk si, ka chhungte chuan min ringhlel rang khawp a, ka ngaihzawng emaw te an ti a, ni se ka tih nen nen, a ni lo nasa a ni. Kár khatah vawi thum te a rawn lêng ṭhin a, ka duh tawlh tawlh a, a hmelṭha ka ti tawlh tawlh a, belhchian a dawl ka ti em em bawk. Dik tak chuan ka zirlai pawh ka ngaihtuah ṭha mumal thei lo ṭhin, a chhan chu Hmachhuana vang vek. Mipa ṭawng tam lo tak a ni a, a mizia chu ṭhenkhat tan chuan a ngainatawm miah lo, mahse ka ngaina em em thung a, ka thlah apianga min be sup sup ṭhin te, ka zirlai lam min zawt zauh ṭhin te chu ngaia neih a har ka ti, chhan lêt a nuamin a khamawm hlawl loh a ni.

Thla hnih zén záwn kan ina a lo lên fô tâkah chuan a laka ka rilru puthmang a danglam nasa zual a, ka duh satliah mai a ni lo, ka duhin ka vêi ru ngawih ngawih tawh zawk a ni. Fiamthu deuh reuha mi chhaih a hrât ṭan a, scooty ka tluk pui hmangin min fiam leh zauh ṭhin a,  ka nui ringawt zel. Ka haw hran lo va, ka haw phal lo a ni ber. Ka pate nen pawh an inbe tlângnêl viau tawh a, zawhna ka la dawng awl lo reng bawk. Ka nau hnen aṭang mai bakah ka ṭhiannu Irene-i hnen aṭang zawhna ka dawng reng zel a, chhan dan thiam har ka ti ṭhin. 

Zirtawpni zan a ni a, a haw tur ka thlah dawn lai chuan haw mai lovin a ding khawmuang a, a thu rawn sawi chu ka awih lo lek lek zawk, Hmachhuana chuan hmaichhanah ngei min duh thu a sawi a nih chu! Ka hamhaih lutuk chu ngawi rengin ka melh chho ngawt ngawt a, nui suk hian a lamah min kuai a, tu mipa ma'n an la fawh ngai loh ka hmuiah tak a rawn fawp a, ka meng buai nasa hle. Chutah min nam sawn deuh hlek hian

"I laka ka rilru puthmang ang chiah hi ka lakah i pu ve tih ka hria Vte" a ti thum chhal a, a vawi hnihna atan min fawp leh a, chu zet zawng fawh lêt loh harsa khawpa dawnsawn nuam a ni. 

"Harsatna dang a awm a nih loh chuan nupuiah ka nei ngei ang che" a haw dawn tak taka a thusawi chu mut hmun thlengin ka ngaihtuah nawn char char a, ka hlim lutuk chu mahniin ka nui reng ringawt. 

Chumi zan aṭang chuan kan inngaizawng chho ṭan a, ka duh ru ve tho bawk nen ka hnar phal lo a ni. Kâr khat hnuah Hmachhuana nena kan inngaihzawn thu chu ka chhungte'n an hre ta nge nge a, pawi ka ti hran lo. Ka nau ber chuan min lawmpui leh ang lawi a, a hriat tirah mak ti viau mah se Hmachhuana chu min duhpui ve em em a ni. An innél phian a, ka nau ni se a ṭawng duh zawt zawt bawk si, a ngam mah mah ka ti ṭhin. Hmachhuana lah a zaidamin a dawhthei em em zel a, kei ngei pawh min dawhthei ṭhin khawp mai.

MZU ka kal tur te hi min thlah a tum fô va, mahse ka hnial zel a, a chhan pawh an office nen a inhlat ve êm vang a ni. Chu bakah MZU te zawng a awmna a thlang leh lutuk a, inthlah mai mai chi a niin ka hre lo. A hman a nih chuan thuhran, office kal a ngai ziah a, ka tibuai mai mai dawnin ka hria a ni. Kâr tawpah kan lêng chhuak ṭhin a, hmun changkang tak takah kan kal ngai lo va, mahse a bula awm chu nuam ka ti em em zel tho. Ka bulah hi chuan eng eng emaw ni hi a sawi ve lûam zel a, a ṭawng tam lo tih erawh ka hre chiang tawh khawp mai. A ṭhiante'n an han chhaih vel te hian ṭul a tih chin tê lovah chuan a chhang lêt ngai lo va, a nuih liam pui mai a, a ṭhiante paw'n a mizia chu an hre chiang ve thovin ka hria. 

Vawi khat chu hna thilah a zin dawn a, min hruai ve phêt a tum a, luhlul turu tak a ni. Semester Exam kan zo deuh chiah bawk nen a rem phian ang lawi a, ani lahin ka nu leh pa a dil thlap zui a, ka nau phei chuan thil a chah ham ham nghe nghe. A tawpah erawh a bula kal chu ka titlu ta a, a hlim khawp mai. Thlawhnaa kan chuang te chu ka kut a hum ran a, kan inngaihzawn dan chu a nuam thlawt a ni. Delhi kan thleng a, zan lamah a hna thil a khawih a, kei erawh ka lo awm mai mai thung. Ka chhungte nen kan inbe leh zauh ṭhin a, chumi tih loh chu tih tur ka nei lo hle a ni. A changin Irene-i nen kan inbe bawk a, ani pawh Hmachhuana nen kan inngaizawng tih a hre tawh a, a hriat tirh hun lai ang em emin min fiam reng ta lo e.

Kan thlen thlak zan tih lovah chuan chhun lamah hlir hna a khawih a, zanah min lên chhuah pui ṭhin thung a, nuam ka va'n ti tak ém. Hmun hrang hrang kan tlawh kual a, min dawm thiamin min ngaihtuah thiam si, a bulah chuan ka thla a muang ngawih ngawih hi a ni tawp. Kan thlenna Hotel-ah chuan khum pahnih a awm ve tak ná a, khum khatah kan mu ta tho va, mahse eng thil pawi mah kan ti lo hrim hrim. A chang hi chuan kan kal thui hman ṭep zel a, infawh leh inkuah ringawt zawng kan duh khawp lo deuh ṭhin a ni. Inthunun tih hriat tak hian thawk a la ham ham ṭhin a, kei pawh ka bang chuang lo, dan ka tum loh vang ni miah lovin duh ngat se chu kan chesual tawh ngei ang.

Ni 4 kan chám hnuah kan haw a, kan haw nî chuan an in lamah min tlang phei pui nghal a, ka lakah a chhungte an fel hlawm em em bawk nen ka hreh hran lo. Hmachhuana nena kan inngaihzawnna ah chuan harsatna a awm lo tluk a ni a, ka chhungte lam aṭangin a awm lo va, a chhungte lam aṭangin a awm lo bawk a, kan inkarah hmeichhe dang emaw mipa dang an awm lo hrim hrim a ni. Ka ring tâwk a, ani paw'n min ring tâwk a, chu chu kan inkara buaina awm loh chhan niin ka hria. Ka zirlai lam thlengin min pui hreh ngai lo va, a ṭul chuan zan rei tak min men pui ṭhin. Nula leh tlangval inngai zawng ni mah ila a chang chuan ka pa ang mai a ni a, ka zirnaa ka tih chhiat palh a hlau thei hle bawk. 

Ṭum khat chu an ṭhianho chaw ei khawmnaah ka kal ve a, zep lovah chuan ka kal châk miah lo. Ka zui zel te, a kalna apianga ka kal ve zel te chu mi mit ka tikham ang tih ka hlau, a bikin a chhungte. Chu bakah zahawmna ka nei ve a, min ngaihnep phah thei tlat a ni. Chaw ei khawmnaah chuan a ṭhiante chu an phusa hlawm hle a, a ṭhiannu pakhat erawh ka mit a tikham ang reng. Nula senior deuh tawh mai hi a ni a, Hmachhuana tak chuan a en liam mai mai a, a biakna te ṭha takin a chhang a, a duh tâwk der, mahse keimah zawkin Hmachhuana a biak dan huam huam chu ka hmu ning ta a ni. Ka awm dan a hrethiam thuai a, rei awm lovin chaw ei khamah min haw pui daih a, pawi ka ti lo nasa.

Hun a'n kal leh deuh a, MZU Virthli te kan nei chho va, tih tur neuh neuh a tam khawp mai. Kei pawh Essay Writting Competition-ah leh Short Story Writing Competition-ah ka tel ve a, English Section lamah a ni nghe nghe. Vanneih thlak takin lawmman ka lá ve hlauh a, ka pawisa dawn te chu hlut tak ka ni. Certifiacte ni se ka dah ṭha hmak bawk a, Hmachhuana paw'n min lawmpui thiam khawp. Virthli a zo va, class pangngai kan kal leh mawp mawp a, a tir ang émin MZU kal chu nuam ka ti ta hauh lo mai, ngaihzawng ka neih vang te pawh a ni maithei. Ni e, a dik chiah, Hmachhuana ka ngai veng veng ṭhin alawm, ka awm ang chuan hmeichhe dang an awm ve ang em le tih te ka ngaihtuah ṭhin a, awm mah se ka dem miah lo, kan thinlung luah tlattu te chu ngaih loh an har ém a ni. 

"Naktuk chu tlaiah chaw lo ei rawh aw, ka pa'n lo sawm rawh a tia, ka nu khan chawhmeh te a lei lâwk velin ka hria" a Car-a kan chuan dun laiin ka ti a, a bu nghat a, a duh tâwk der. 

"Vawiin hi i dik miah lo, thinrimna i nei em ni?" ka tih chuan a ngawi reng a, min chhan a tum miah lo a nih hmel. 

"Hmachhuan?" ngenngawl aw zet hian ka ti thluk awn leh duai a, ka lam rawn hawi zeuhin hma lam a hawi zawm zat a, lungngawi lohna eng emaw tak a nei a nih ka ring. 

"Tukin chu ka tho nuam lo deuh a" a rawn ti ve ta nge nge a, mahse a awm dan aṭang chuan thu zep a nei tlatin ka hria. 

"Min hrilh tur i nei em? I lungawi loh chhan hi ka hre duh, heti ang hian ka lakah i awm ngai miah lo" a lam hawi ranin ka ti a, kawng sirah motor a tiding a, a lungawi loh chhan chu sawi mawlh teh se.

"Ka nî nen tukin chu ka thawh hlim phat aṭangin kan inhnial a, nizan aṭang tawh zawk maw le. Kan hausakna leh ka hnathawh avanga min ngaizawngah a puh che a, a ni lo tih ka hre chiang si, ka la thinrim ru reng a nih hi!" a ti hmuk hmuk a, kei erawh ka ngawi chiang ta hle. 

"Ka hmuh dan che a pawimawh ber, ani ngaihdan leh hmuh dan mai mai ni lovin; i rilru kal dik loh phah lo se ka duh, kei pawh pangngai taka awm ka tum mêk" a aw chu a hniam thum chhal a, a nghet charh bawk. 

"Chuti angin ka awm lo, ka ṭha alawm, i bulah ka tal hnem ang reng sia, an mit a kham a ni mahna" ka ti sep sep a, dik tak chuan ka rilru a nâ ve reng. 

"Dawt sawi tum suh Vte, ka hre chiang thawkhat tawh che. Min hlat sawt i tum tih ka hria, chhuah puia ka sawm leh dawn che paw'n min hnial i tum tih thlengin ka hre tlang vek. Ka nî chu ka nî a ni a, i tan ṭangkaina a nei vak lo. Kei erawh ka tana i pawimawh tluk zetin i tan ka pawimawh a, ka nu leh pa ber paw'n an ngaina che a, ka nî ngaihdan mai mai engah mah ngai suh" a ti ta duah a, ka hriat tirh ata a ṭawng thui ber a la ni hial ang.

"Min ngaihtuah a, ka lawm, keimah avangin buaina neuh neuh i tâwk ang tih ka hlau alawm, mahse ka ring che a, ka ring ber bawk ang che. Min ngaihtuah tih ka hriat hian nuan ka ti, min ngaihtuah em em reng rawh" nui deuh seiha ka tih chuan a khi suk a, ka kut la kangin a fawp vang vang a, kei chu hlim leh tawh tak ka ni. 

"Naktuk tlai chu aw, chaw lo ei tur angin ka sawi dawn che a nia" kan in kawt kan thlen chuan ka ti a, chhuak nghal mai lovin a chhanna ka nghak a, a duh hun têa a ṭawng ṭhin hi hmeichhe ṭhenkhat chuan an dawh peih miah lo ang.

"Ka bulah i ṭhu ang a, kan ina chaw i ei tlai ang khan" a ṭawng laklawh laiin a ban bul chhah ṭha takah chuan ka chum pawp a, a rawn sawi chhuak leh kher kher chu ka la zak chem chem thei.

"Sawi tawh suh, ka chhungte bulah i sawi palh hlauh ang e. A zahthlak si, tun thlengin ka la hrilh ngam lo. Chuan, khati ang khan chet tum tawh miah bawk suh, kan in a ni tawh tih hre reng la, nangmah zawk i zak a ni mai" ka ti tawn tawn a, ner sâwng hian min en a, a insiam chhe vel te a hmelṭhat phah hlei hleiin ka hria.

"Kan hre mai dawn alawm, in inah hian ka zak ve châk deuh tlat" a nghal a chhuak ṭan tih ka hria, chhan zel ai chuan chhang lova ngawihsan tawp a fuh zawk, chuti lo chu a hnial hneh lo zawkah ka ṭang ve ziah. 

"Kal tawh rawh" ka ti deuh hmarh a, ka thin a rim pawh a ni hran lo. 

"Kan inah ka phur haw dawn che tihna em ni?" a nuih insum hmel avangin ka la chuang reng tih ka hre chhuak a, a banah ka chum leh ringawt. 

"Nghala" tiin ka chhuak ngháwng nghawng a, a nui ri hawk chu ka hre pha vek, ka nuih a za ve rih hlawl lo thung.

Ka room ka luh hnuah erawh ka awm dan chu naupangchhia ka ti hnuhnawh leh lawi a, a laka pangchan vel chu a nuam ve êm bawk a ni. A nî min ngaihdan erawh ka hre reng tho va, mahse a sawi ang khan engah mah ngaih ka duh lo. Hmachhuana leh a nu leh pa berin min ngaina a, a nau thlengin kan innêl em em zawk a, a nî thusawi vang mai maia rilru tih nât kual vel ka tum lo bur a ni. Zanah a lo lêng a, zan dang ang bawkin ka chhungte chuan min mutsan a, nula leh tlangval awm dun e ti lo chuan lehkha min zirpui a, a sawi awmzia ka hre tho ná chu thiam chak har ka va'n ti tak. Tlai lama tau nghâwng nghawng vel si kha ka hlim leh tawh em em zawk a, a bulah hi chuan ka thinrim tak tak thei miah lo, a mak ve ngawt mai.

A tuk chu zing aṭang boruak a nuam nghal em em a, tlaiah Hmachhuanan chaw a lo ei dawn bawk a, chu chu ka mood fuh chhan ber a ni. Nitina ka tih ṭhin ang bawkin MZU lamah class ka kal leh a, Lunch Break-ah kan inbia a, a hman der tawh thu a sawi chuan haw mai ka duh nghal rum rum. Kan ina ei rawng bawl dun te, awm dun hrim hrim chu ka châk a ni. Ka phur lutuk vang nge ni kan bâng har ka ti em em a, kan ban rualin Irene-i ka inphur haw tir nghal thuai thuai a, Irene-i paw'n a chhan min zawt tawp. Hmachhuanan chaw a rawn ei dawn thu ka sawi chuan min zawh zawm tawh lo va, an veng mi a ni a, kan inngaihzawn tirh lai pawh khan a ṭawng tam loh thu leh a felzia hlir a sawi ṭhin.

Chaw einaah Hmachhuana chu ka bulah a ṭhu ta ngei a, an ina chaw ka ei ṭum khan ka bulah a ṭhu a, dawhkan hnuaiah a nghal hle kha a nia, a awm leh ang tih mawlh ka hlau. Khami ṭum kha chuan ka zak ve chiang alawm, ka tum loh deuh deuhin ka kâ aṭang thawm a chhuak a, a chhungte pawh kha an nui tawp ringawt. A pa lah khan ka awm dan leh dawhkan hnuaia thil thleng kha a hriatthiam hmel si, zak tak ka ni; tun thleng hian ka la zak. Chaw ei chhung zawng chuan a nghal ta lem lo va, ka thaw a veng huai thei. Ka nauin zawhna chi hrang hrang a zawt zet zet a, Quiz hi a ni ringawt. A ngaisang laklawh bawk si, a ngaihsanawm tho ná a, zawh áwm leh áwm loh a hre lo mah mah ṭhinin ka hria.

Thla kan hmang ral a, a nî nen pawh kan inhmu zeuh zeuh a, mahse ka chungah engtin mah sualna a nei hran chuang lo. Hmachhuana te ina kan pen kawi chang paw'n ṭha deuh deuh hian min be zawk a, Hmachhuana bula min lo sawi dan chu engah mah ka ngai duh lo ta law law. Hmachhuana nena kan inkar erawh a ṭha mar pât a, kan inngaihzawn dan leh kan inngaihzawnna chu a hrisel thlawt a ni. Zan lamah a rawn lêng a, kâr tawpah kan chhuak dun ziah bawk a, duh mai ni lovin ka hmangaih hial tawh zawk a ni.

Ni e, ka hmangaih tawh, ka thinlung leh tih tak zetin ka hmangaih chiang a ni. Amah phei chuan a la hre lo, hrilh hun erawh a remchan veleh a ni mai. Ka hmangaih vang nge ni ka ngai zual a, zan khat a rawn lêng lo hlek te hi ka vui phah a, mahse phone-in kan inthlem lungawi ve leh mai zel. Zan khat chu a lu meh thar nen a rawn lêng a, a va han ṭha chiang kuang tak. Kei chang ka ni lo, hmeichhe dangte pawh hian hmelṭha an ti tih ka hrethiam vek. A haw dawn chuan pawn thleng ka thlah a, a ding ngawi vang vang a, vana arsi dê sep sep chu a thlir ran bawk. Ka lam rawn hawiin min kuah a, ka kut chu lá lehin a Leather Jacket iptê chhhungah min zen luh tir a, lum nuam tak a ni. 

"Ka hmangaih che Vte" rang zetin a lam ka hawi chho thuai a, min lo en reng chu niin, mak ka va ti tehreng êm. 

"Maw?" ka ti deuh hâw a, kan inhma chhawn theih tur zawngin a ding ngil a, a thusawi zawh chiah chu ka hre lo pawh a ni lo, mak ka ti bawk nen ka thin phu thlengin a rang vek thei. 

"Nangnu tê hi ka hmangaih che a nih chu!" tiin a nui suk a, ka hlim lutuk chu ka nui tawp a, awm dan tur ka thiam hlawl lo. 

"Min nei ta che Vte? Ka nupui ni la, nang nena chhungkaw din ka duh" a tih leh chuan ka kuah nghal thuai a, ani'n min lo pawm kang lâwp zawm zat a, chu zan chu zan chhinchhiah tlak tak a ni. 

"Kei paw'n ka hmangaih che Hmachhuan, chuan ka nei ang che. Ka dam chhung zawng i nupui nih ka duh, ka hmangaih che" ka ti mawlh mawlh a, zah reng ka hre tawh lo a ni ber.

Lungchim takin kan infawp vawng vawng a, ka thlah phal lawk lo va, ani pawh chuti tho. Car chhungah kan ṭhu dun a, kan inkuah a, kan infawp leh ṭhin. Inneih lam thlengin kan sawi chhunzawm nghal char char a, mahse Post Graduate ka zawh hma chu inneih kan tum lo thung. Dar 11 dâwn Car chhungah kan awm a, ka chhungte paw'n min rawn ngaihven lém lo. Amah zawkin in chhung ka luh fel hmâ min thlir a, ka luh fel hnuah a tlan chhuak ve ta chauh a, ka hlimna chuan a vawrtawp a thleng ni maiin ka hria. Tui takin ka mu siai siai a, zingah pawh ka tho nuam leh hle. Zing karah class kal lo turin min rawn hrilh a, min chhuahpui a duh thu a sawi bawk a, ka chawl ve hmiah.

Hmun fianrialah min kal pui a, ka ṭawng siam siam a, ka kutah inhualna zungbun a rawn rawlh a, ka hamhaih hman teh e. A nupui ka nih ngei tur thu sawi supin ka kut a fawp a, ka hmuiah a fawp leh bawk a, kan ei tur ken te chu ei nachang ka hre tawh lo reng reng. Tlai dar 2 velah kan haw a, kan haw lamah te chuan ka ṭawng char char a, kan va'n hlim dun tak ém. Kan pahnih inkar chu hmangaihna hlirin a luah khat a, a nui suk suk a, kei ka nui reng bawk a, ka zirlai zawh fel thuai thuaia a nupui nih chu ka châk tawh tak zet. Zanriah ei laiin ka chhungte ka hrilh ve tawp a, insum thei tawh hek lo. 

"MZU kal hi ka ning leh thut zel, nuam pawh ka ti tawh lo e a!" Hmachhuana bulah ka ti deuh chhen a, a nui ringawt zel a, zantin rawn lêng ṭhin mah se ka ngai ṭhin êm a ni.

Hun chu ka rin phak bakin a kal chak a, a àwm tho, Pathian hnenah ka dil nasa thei ém alawm, ka ṭawngṭai apiangin hun kal chak turin ka dil ziah tak tak. Kum thar kan chuan kai hnu rei lovah class kan kal leh nghal char char a, kum lai hawl pawh kan thleng har lo. Hmachhuana chuan ka zirnaah kawng tam takin min pui a, Test ka chhan ṭhat te hian a hnenah lawmthu ka sawi fô ṭhin. Ani erawh a lawm hmel chuang hlei lo va, a hunah min pui a, a duh tâwk mai zel. October thla tawpah Semester Exam kan nei leh a, chu chu Final-na a ni tawh bawk. Ṭha takin ka chhang a, ka hriat sual loh chuan ka pass ngei ang.

Kan exam zo ta maw tihah Hmachhuana te lam aṭang palai hmel kan hmu nghal a, ka lawm tho rualin a rang mah mah ka ti a ni. Result te kan hre phawt ang a, chumi zawhah inneih lam kan áwn chauh dawn emaw ka ti kha a nia, mahse palai ber an rawn tirh tâkah chuan hnialna emaw hrehawm tihna ka nei chuang lo. A nupui nih chu ka duhthusam ber a ni bawk a, zirna chhunzawm lam te zawng khawi lamah a ni mai. Ka chhungte leh a chhungte an inbel fel thuai thuai a, kâr tam pawh a liam hman lo vang tihah kan innei ta nge nge. 

Kan inneih tûk phat aṭangin ka pasal ni ta Hmachhuana chhungte chu ka nêl zual em em a, a nau nen kan inkawm nghal bawrh bawrh a, kan inrual tâwk vel viau a, kan thil sawi duh zawng a inang hle. Mumbai-ah Honeymoon kan hmang a, Beach-ah te kan kal a, a nuam tak zet. A hun lai a ni bawk a, zan lamah chuan kan duhthaw dun thei hle. Kâr hnih chuang kan châm hnuah kan haw a, ka nau pawh thil ka hawn nghe nghe. Ka chhungkaw thar te chu an fel em em vek a, Hmachhuana nî thlengin min duat a, min be peih a, kei pawh ka ṭawng duh thei khawp.

Thla 3 a liam a, nau ka keng nghal mai a, ka lawm ang reng. Kan result pawh a chhuak tawh a, First-ah ka pass a, ka lawm leh lawm loh pawh ka hre lo, a chhan chu ka hlimna ber Hmachhuana nen nupa kan ni tawh tlat a, chu baka hlimna kulhpui nghet ka nei lo a ni. Ka pass chu kan làwm hial vel a, kan lawm zan chuan ka chhungte an rawn phei a, ka ṭhiante ka sawm bawk a, Hmachhuana erawh a ṭhiante pakhat mah a sawm lo, ṭul a ti lo a ni ang. Pathian zarah ka pum chu a ṭhang chak phian a, ka chhungte ni se min duat hlum lo chauh a, an mo ni mah ila thisen zawmpui tak tak angin min en ni berin ka hria, ka hriat sual ka ring lo bawk. 

Buaina leh harsatna tâwk miah lova thla kaw chhung ka pai hnuah nautê ka hring a, mipa a ni a, Hmachhuana hmel hlim leh lawm hmel chuan ka taksa nâ zawng zawng min theihnghilh tir vek thei. Thla a pum hma aṭang hawtin a pawm deuh reng a, hmeichhia angin hnutê nei phei se chu a pe duh hial ang ka ring. Kan fapa bula a tâl tam mai bakah a duat leh lutuk chu ka vui der fô va, han pangchan kual vel chu nuam ka ti ṭhin. Ka beisei ang ngeiin min duat sawt zel a, ṭawng zawt zawt mi ni lo mah se a âwma min kuah beh tawh hi chuan ka thla a muang ngawih ngawih ṭhin. 

Pathian zarah tluang takin kan fapa pawh a ṭhang lian chho ve zel a, a kum 1 tlin kan lawm nî te chu nuam ti ve tak a ni. Kum 2 a'n tling chho leh a, a pa ang maiin a ngawichawi chi a ni reuh a, an induat thei khawp mai. A pa hna kal tur hi ṭha taka an inthlah phawt loh chuan a ṭap ngei ngei a, a mu thovin a pa hmel a hmuh loh te hian a ṭap leh ringawt ṭhin a, a pa pawh eng dang a ni chuang lo. A ṭhiante bula awm aiin a fapa bula awm tam a thlang zawk zel a, a ṭhian ṭhenkhat te phei chuan an ngei phah ṭhinin ka hria. Kal turin ka nawr lui ngai lo va, ka sawi ve deuh paw'n

"A ho mai mai, in bul baka nuam a awm hleinem" a ti mai zel a, ka hlimna turin ṭawngkam thlum tak a chhak chhuak ngai miah lo, mahse a nupui fanau tana a rinawmna te, chhungkaw uap lum zawnga awm a duh zawkna te chu ka hlimna a va tling si êm.

Zirtawpni a ni a, Hmachhuana zin lo haw nî a ni a, zing lamah khan kan inbe tawh a, dar 8 vela an lo chhuah a rin thu a sawi nghe nghe. Hna thila zin hi tun lai hian a ngah ta riau a, mahse Mizoram chhungah zel a ni thung. Tun ṭum pawh Champhaiah daih a han zin a, an lo thlen hma vak a rinawm loh. Zai rât rat pahin chhun thil ei tur ka siam melh melh a, ka fapa chu a têt deuh laia a Baby Walker khalhin a tla ve mual mual reuh a, a bulah ka nu a awm reng bawk. Ka nî erawh a chhuak mêk a, ani pawh hi ka nî ve ta tawp mai. Ka pasal nî a ni a, ka nî ve hmiah a, amah tak chuan pawi a ti lo nasa. 

"Aw Hello, khawi lai nge in lo thlen tawh?" ka pasal hnen aṭanga phone call ka dawn rualin ka pick up nghal a, a lo haw nî a ni bawk a, ka nui deuh reng mai. 

"A chanve vel chu kan lo tlan thleng tawh ang, ka fapa duat chuan eng nge a tih a?" a rawn ti ve dap dap a, kan fapa awmna lam hawi phei pahin

"Saw a Walker kha a nawr kual a, a tlei reuh khawp" ka ti ve leh mai a, kan fapa chu a  tlei tak tak a ni; ni dang ang chu ni se a mut a hun daih tawh. 

"A ṭhat chu, ka be lo mai ang, a ṭah a hlauhawm" a tih hnu chuan thu tam sawi tawh lovin phone kan off a, a sawi dan chuan tlai dar 4 dâwn vela an lo thlen a ring a, lo thleng thuai thuai se ka ti hle.

Chawhnu her a rawn ni a, ni ên dan te chuan ka lung a tilêng ang reng. Ka fapa lian ve tawh em em chu ka awi mu a, a pa lo haw hunah a harh vel chiah chiah ka ring. A ṭha zawk, a ṭap rei lo sawt ang a, phone kaltlanga inbiak pawh a ngaih loh phah dawn a ni. Ní chu a hniam tial tial a, rei lo tê hnuah dar 3 kan thleng ta der mai, ei rawng bawl pahin ka phone chu ka keng kual zel a, a chhan pawh Hmachhuanan min rawn biak ka rin vang a ni. A zin haw lam hi an lo thlen hnaih tawh apiangin min be ziah a, kei paw'n a inbualna tur leh a mamawh tur awm ang ka lo buaipui sak zung zung ṭhin. Dar 3 leh a chanve ah a hnen aṭang phone call ka dawng a, ka nui nghal ta ver ver. 

"Hello, in lo thleng ṭep tawh a ni chiang" ka lo tih khalh a, leh lama mi erawh ka pasal aw a ni hauh lo mai. 

"Ka pi, hemi phone neitu hian tawhsual a tâwk hlauh mai a, tunah Hualngoah kan awm mêk a, Falkawn lamah kan phur phei dawn chiah e. Khawngaihin lo kal mai ta che u, kan chet hmanhmawh loh chuan thil pawi a thleng thei tlat" ka mi biak pa thu rawn sawi chuan min ti mang vekin ka hria.

"Ka dah mai, kan kal a hun" tih chu a ṭawng ka hriat hnuhnun ber a ni a, ka mittui far khat pawh a far lo va, ka hamhaih lutuk chu eng tih ber tur ka hre lo.

"I ṭha meuh maw Vte?" ka nu aw ka hriat rualin ka harh chhuak thut a, ka che nghal phat phat a, mak a tih hmel hle bawk. 

"Ka nu, tunah Falkawnah kan kal nghal a ngai. Hmachhuana...Hmachhuana dinhmun a ṭha lo, kal vat ang" ka ti phawlh phawlh a, ka ṭawngkam chhuak chu a pangngai thei tawh lo hrim hrim hi a ni tawp.

"Ka nî, ka fapa min lo ngaihven sak rawh aw" ti lehin ka tlan chhuak thuai a, thawmhnaw tak ngial pawh ka thlak lo va, ka nu'n min rawn um zui vat lo se chu Taxi fare tur pawh ka nei lo va, Taxi driver chu ka tur sek a, chu chu ka tih awm chhun a ni rih tlat. 

Falkawn Referal Hospital chu darkar chanve hnu velah kan thleng phei a, ka nu chuan phone-in ka pa a be mawlh mawlh a, ani pawh a lo thlen phei har ka ring lo. Ka hmangaih em em ka pasal Hmachhuana chu hmuh tumin theih tawp ka chhuah a, mahse ka thei lo. Operation room lamah an zai mêk a, ṭap miah lo mah ila ka chiai vek tawh thung. Ka nu erawh a ṭap a, a mittui a dang seng lo va, Hmachhuana awm dan teh thut chuan min tihrilhhai tak zet. Darkar 2 chuang kan nghah hnuah ka pa leh mi dang pathum hmel kan hmu a, ka fapa chu a puin a pawm a, tunah tak chuan ka pawm theih pawh ka ring lo. 

Khua a thim ṭan tihah ka pate lam an lo thleng ve leh a, an lo inhrilh darh hman a ni ngei ang. Ka nu leh ka nî an ṭah feih feih laiin kei chu ka meng fiah kâk a, Hmachhuana chu a tak ngeia ka hmu a nih loh chuan ka la awih hlei thei lo a ni. Ka fapa pawh ka pawm thei thuai a, ṭum dang ang lo takin a ṭap miah lo leh nghal. Operation room aṭang doctor pakhat a rawn chhuak a, a hliam a serious thu bakah a driver nunna an chhan hman loh thu a sawi a, a hma ai zawngin ka rilru a buai a, mahse ka la ṭap thei chuang lo. Ka pasal hmuh ka dil a, zai lai mêk a nih avangin doctor chuan a phal lo va, amah tak pawh chu Operation room lamah a lut leh nghal daih bawk. 

Darkar 2 leh a chanve hnu velah bawk doctor pakhat a lo chhuak leh a, an thiam ang tâwka an zai zawh thu a sawi a, mahse a dinhmun a ṭhat thu engmah a sawi tel lo thung. Hmuh ka dil leh a, a ngaite bawkin a phal lo va, zai zawh hlim a nih avangin khawla enkawl mêk a nih thu a sawi zawm mawlh mawlh a, a taksa chhunga thler a awm nasat zia a sawi lai te chuan ka nu leh ka pasal nau chu an ṭap feih feih a, ka nî pawh a bang chuang lo. A lung a la phut thu erawh chuan beiseina min pe a, a hun lovah min hnukchahsan mai ang tih chu ka hlau ngawih ngawih.

Ṭhutthleng awmah kan ṭhu tlar ṭhap a, ka pasal driver chhungte an lo thleng a, an ṭap zui nghal hawm hawm a, ka lainat tak zet. Ka pasal a la dam ṭawk ṭawk te chu lawmna ka neih phah a, ka tih theih awm chhun chu Pathian hnena ṭawngṭai mawlh mawlh a ni mai. Ka pasal pa zawk ka pa chuan driver ruang chu a zui haw a, a zan lá lâin lumen nghal a ngai dawn a, chuti ang chu Hmachhuana chungah a thleng ve ang tih ka va'n hlau tehreng êm. Room kawngka darthlalang aṭangin thi ang dera mu ka pasal chu ka thlir tlawk tlawk a, a chal a intuam vâr lûk a, ka ṭah chu a rawn chhuak ve ṭan ta.

Room hrana dah tumin Doctor leh nurse te chuan an nawr sawn a, mahse an nawr luhna lam chu khawvela ka room ngainat loh ber a ni. ICU room-ah ngei an nawr lut a, min chhang lêt dawn lo tih hre tho mah ila a hmingin ka ko lawm lâwm a, tumah zahpah ka nei tawh lo. Zui luh zel ka tum chu ka naunin min kuah bet a, a rawn ṭap chhuak hak hak a, kei erawh ka la ṭap leh ta chuang lo. Ka mittui a hnai kuarh kuarh a, ka ṭap hlau a ni ber. Ka ṭap a nih chuan min thihsan dawn tlata hriatna ka nei a, chu vanga ṭah tum lo bur chu ka ni. 

Ka fapa chu a pi'n a pawm muhil a, a pa dinhmun manganthlak zet avangin ka ngaihsak ṭha hman thlawt lo. ICU room bula ṭhutna awmah chuan kan ṭhu ṭhap a, tumah kan ṭap tawh lo va, kan inbe bawk lo va, a reh ṭhuap ringawt. Zan dar 8 velah ka nî'n ei tur a zu lei a, kei pawh min lo lei kep nghe nghe a, mahse ka ei lo chiang hle. Engtin nge ei tura min ngaih theih zawk? Ka pasal thi ṭepin a awm a, ka pasal a rawn harh hma chu engmah ei ka tum teuh lo. Min tih luih ngial hnuah pawh ka ei duh tlat lo va, an beidawng tawp ringawt. 

Dar 11 velah a zual an ti a, doctor leh nurse an tlan lut thuai a, ka va han mangang phili buai tak ém. Luh ve mai ka châk em em a, mahse kawngka bula lo awm chauh lo chu tih theih ka nei rih si lo. A zia deuha an hriat hnuah doctor te chu an rawn chhuak a, min kalsan thut thei dinhmuna ding ni mah se a la dam thu ringawt pawh chuan ka thla a timuang em em a ni. A tuk thlengin buaina a awm lo va, ICU-ah erawh an la dah reng thung a, kei pawh chhin khat mah ka la chhing lo tluang zel bawk. Ka ril a ṭam lo va, ineipuar tih vel chu ka tum lo bur.

Ka ei tura min leisak te chu ka fapa ka ei tir loh leh ka paih zel a, min lei kêp tawh lo turin ka ti nghe nghe. Khua a rawn thim a, ka hlauhthawn ruk ang ngeiin ka pasal dinhmun chu a zual leh ta. A ngaite bawkin doctor leh nurse ṭhenkhat an tlan lut a, mahse a hma ai an rawn chhuak har ta tlat mai. Doctor pakhat mai ni lo an luh belh bawk a, kei phei chu ka awm mai mai thei tawh lo chiang hle. Ka che sêk a, khawl eng eng emaw ni an hmang thawm te chu pawn lam aṭangin kan hre pha hial a, kei tih loh hmeichhe dang chu an ṭap leh ta nge nge.

"Engtin nge ka pasal saw a awm?" room aṭanga nurse pakhat lo chhuak chu ka pawt ding vat a, sawi a hreh hmel kher leh nghal. 

"Ka hre lo ka pi" tiin ka kut a phih thla sawk a, a tlanin a tlan thuai thuai a, a hmanhmawh tak zet bawk. 

Darkar chanve hnuah doctor pakhat hi a rawn chhuak a, ka pasal nunna an chhan theih ngâng loh thu a sawi a nih chu! Ngawi rengin kawngka chu ka nam hawng pawp a, nurse ṭhenkhat ka pasal lo buaipui tute chu ka nam lêng dâwr a, ka pasal hmai chu beng thek thekin

"Harh rawh Hmachhuan, harh hram teh. Heng doctor ho sawi hi ka awih lo, ka awih duh bawk lo. Dawt an sawi a ni tih finfiah nân meng rawh le, min en teh Hmachhuan" ka ti mawlh mawlh a, ka pasal erawh a che hauh lo va, men pawh a meng eih lo.

"Hmachhuan....min thihsan ringawt suh aw, khawngaihin min thihsan miah suh" ṭah chhuak zet hian ka ti ṭiau a, ka mittui te chu a tling pam tawh bawk. 

"Meng tawh teh Hmachhuan, i lo haw hun ka nghakhlel ve em em a, intih derna chi a nih loh hi aw" ka taksa ang bawkin ka rilru a mumal lo va, a chungah chuan ka lawn ta ringawt.

"Zinga i thawh peih loh châng khan heti ang hian min kuah bet ziah ṭhin a, a hnuah i tho ve leh mai zel a, tunah chuan thawh a hun tawh e, tho ang aw" tiin ka pasal chungah chuan ka bawk mu a, ani lah chu a che duh der bawk si lo, ka mang a ang ru tak zet tawh. 

"I thi thei lo!" vin lutuk tak mai hian ka ti tûarh a, nghet zetin ka kuah vawng vawng a, ka mittui te chu baw duh zawih zawih tak a ni. 

"Harh rawh, meng rawh ZOHMACHHUAN, min thihsan tum hlek suh, i thi thei lo, min hrilh hmasa lovin i thi thei ringawt lo" mi â ang maiin ka ṭawng hlawk hlawk a, mi dang lo ṭap thawm te chuan ka ṭah an tichhuak zual sauh.

"Khawngaihin Hmachhuan....khawngaih takin min thihsan suh, heti ringawt chuan min kalsan suh, i tel lo chuan kei leh i fapa hi kan awm thei lo ang" ka ti thawp ta raih a, inbéng kangin a hmel dâng tak chu ka en vawng vawng a, a hmai te chu ka chul vel a, mitthi a ni tih chu hai rual a ni lo. 

"Engati nge i zin kher kher" ka pasal ruang chunga bawkin ka ṭap khur ngawt ngawt a, ka ngaihtuahna te chu a thim mup a, ka chhung lam a nâ em em bawk.

"Hmachhuan.....khawngaihin.....khawngaih takin min thihsan suh, i thi dawn lo ti raw...." ti zuai raihin ka ṭap ri ta hawm hawm a, ka thin thip zet chu ka chum a, a thi tawh tih ka hriatna te chuan min ti nâ vawng vawng. 

"Hmachhuan....." ti leh sepin ka kawr âwm chu ka ṭham tawn tâwn a, rawn harh thut se, min kuah se, min hmangaih thu sawiin min fawp vawng vawng se ka ti ngawih ngawih.

"A hnang a nih kha, buaipui vat rawh u, kan chân ve ringawt ang e, hmanhmawh ta che u" hmeichhe aw vin tak ri chu ka hre ruai ruai a, a bak engmah ka hre zawm ta lo. 

Thli thaw heuh heuhin min chhem a, chu chu ka thil hriat leh hmasa ber a ni. Meng nghal mai lovin ka awmna chu ka ngaihtuah a, thil hriat chhuah nei zawkin ka meng chiang hle. Ka mutna khum aṭang chuan ka tho vat a, room chhungah ka nau a lo lut chiah bawk a, room chu chhuahsan rang tak ka ni. Ka awmna chu kan in a ni tih ka hre mai a, sitting room bang zawng zawng chu a kaw huau a, YMA ṭhutthleng a tam em em bawk. Dar zat ka en vat a, chawhnu a lo ni tawh a, chuti ang taka rei engmah hre lova ka awm thei chu mak ka tih rualin ka indem hle.

Ka theih tawpa chakin kan veng thlan mual lamah ka tlan thuai thuai a, mahse ka va thlen chuan ka pasal, ka hmangaih em em chu lei hnuaiah phum fel vek a lo ni tawh a, mipui chuan min lo en duh hle. Ka pa'n min lo dang a, mahse ka nam sawn vak a, ka pasal an phumna lei chu ka hai sawk sawk a, ka ṭap nasa hle bawk. Ka nu chuan ka hnung lam aṭang min rawn kuah a, a ṭap ri hawm hawm a, ka thil hai lah chuan awmzia a nei tak tak bawk si lo, ka theih tawpa ringin ka ṭap vak vak ringawt. Ka pasal hming chu ka lam a, lam satliah mai ni lovin ka au tuarh tuarh a, ka va han nâ tak êm. 

Vuina hunserh an hman lai leh an phum laia ka awm lo te chu ka inhaw ngawih ngawih a, thih ve daih ka chak tak zet. Thi ve ta ila ka hlim zawk ngei ang, a chhan chu ka hmangaih awmna a ni dawn a, ka pasal thi ta chuan ka nun pumpui a luah khat tlat si a ni. Ka pa'n in lamah min pawm haw a, ka ṭap feih feih reng a, ka mit te chu a bui vek a, hmuh pawh ka hmu ṭha thei tawh lo. Zan a rawn ni a, khuang vaw ri leh zai ri te chuan Hmachhuana min ngaih zual tir em em a, mahse naupang ṭap thawmah ka harh chhuak zawk a, ka fapa reng ka lo ngaihtuah tawh lo tih chu ka hre chhuak a, chu chuan ṭahna bawk min thlen leh ta. 

Ka fapa chu a pa ngaiin a ṭap uar em em a, a ṭah dan aṭang a pa a zawng tih ka hre thei, mahse a pa chu mi nung ramah a awm ve tawh si lo a ni. Dam lohna tal nei lâwk se emaw enkawl fê hnua min kalsan te chu ni se tawrh dan ka thiam deuh mahna, mahse a ni si lo. A thleng thut a, a thleng zung zung a, a tawpah thihnain ro a rel a, thihna ka huat dan chu pui tak a ni. Engati nge Hmachhuana nunna ber kher a lâk? Kei leh a fapa hian kan la mamawh em em zawk asin, a tel lovin engtin nge kan awm theih ang? Âw thihna, ka hua che, ka haw lutuk che.

Kâr kan hmang ral a, ka la dik hlei thei lo va, chet pawh ka che ngai lo. Khumah ka awm loh leh ka fapa ka paw tawp a, ka ṭap reng ringawt bawk. A changin phone-a kan thlalak ka en ṭhin a, engkim chu lungngaihna tur vek a ni. Thla kan lâk dun dawna a peih lo hmel te, awm dan tur ka hrilh lai te, camera ka en laia hmun dang a lo en daih lai te, engkim chu ka ṭah pui a, chuti ang bak chuan ka nât leh theih pawh ka ring tawh lo. Kan inngaihzawn laia kan zin dunna video te chu nitin ka en nawn tluk tluk a, Hmachhuana chu ka ngai tak zet.

Ka fapa lah a thawh hlim apiangin a ṭap ziah a, a pa a ngai em em a, a pa kha la dam ngat se zawng a fapa ṭah chu a phal hauh lo vang. En liam mai lovin a pawm ang a, a fawp ang a, hmangaihna nen a fapa chu a thlem hlim leh zawk ngei ang. Tunah erawh pa tih tur a nei tawh lo va, kei lahin pasal tih tur ka nei tawh lo bawk a, nufa khawngaih thlak tak kan ni chiang a ni. Amaherawhchu mak tak maiin thla khat hnuah ka fapa chu a tlei em em a, a pa thlarauin a awmpui ṭhin ni mai te'n ka hria. Ka rilru ka siam fel a, ka theih tawpa ṭhain ka fapa chu enkawl seilen ka tum ta a ni. 

Harsa tih chang ka ngah a, a chhan pawh ka fapa chuan a pa a chhun êm vang a ni pakhat. A mitah, a hnarah, a hmai thleng zawng zawngah nen lam a pa hmel hlir ka hmu a, ka ngaih a bâng thei thlawt lo. Ka ṭap leh nge nge zel a, insum te chu ka tum ve ṭhin alawm, mahse ka tan chuan a theih loh tluk a ni. Ka pasalin min thihsan aṭanga thla khat ral hmain kan in lamah kan insawn phei ta daih kha a nia, ka pasal chhungte chuan min ui der thiam viau bawk. Ka pasal ber a thi tawh miau a, ka tan chuan awm reng kha a fuh lohna chen a awm ve a, a mawi chiah lo bawk. 

Thla tin ka fapa nen a pa thlan chu kan tlawh ziah a, a bul leh a chheh vel fai takin kan dah ṭhin a, thla tam ral tawh mah se ka ngaihna chu a kiam thei lo va, a kiam tawh dawn lo tih ka hre chiang ta hle bawk. Thlan lung chu amah ang maiin ka be mai zel a, ka kuah a, ka duh duh ka sawi ṭhin. Ka rilru a hah chang paw'n ka kal mai a, ka ngaih changin ka kal bawk a, chu thlan lung; mi dangte tana lung satliah ve mai chu ka tan chuan ka hahdamna a ni a, ka engkima engkim a ni. Thlan lung mah ni se a pawisawi ka hlau em em a, a chhan pawh Hmachhuana ang hlira ka ngaih ṭhin vang a ni. 

"Mipa dang ka belhsan dawn miah lo che a nia, hlauthawng suh aw" te ka ti mai zel a, mihring ang tak takin ka be ṭhin a, ṭhenkhat chuan â min ti thei ngawt ang. 

A thinlung leh ka thinlung; chatuana a inzawm dawn thu chu ka sawi tam ber a ni a, ka tan chuan ani tluka mipa ṭha leh famkim an awm thei tawh lo va, ani chu ka thinlung nei tu leh ka hmangaihna zawng zawng kawltu a ni tlat a ni. A thi tawh ngei alawm, mahse keimahah a châm reng thung a, ka chhungrilah a cheng reng a, engtikah mah kal bo tir emaw chhuahtir ka phal ngai lo vang. Kum khua leh chatuanin châm hlen se ka duh zawk a, kei mai ni lo amah nena kan fapa nunah pawh châm hlen se ka duh ngawih ngawih. 

(A tawp ta)