HMINGHLUI By Havali Adam (Part I)

HMINGHLUI

(Mizo Arranged Marriage Short Story)

By 

Havali Adam

Part I

Dâr a rik rál ral hnu chuan biak in chhunga lo lut mipui pawh an pung zel a, ka vei lam lênah ka nupui tur chhung leh khat te an ṭhu a, hmeichhe lam aṭanga kan inneih min hriatpui tura lo kal hrim hrim chu an ṭhu vek zawk a ni. Ka ding lam lênah erawh kan chhung te leh ka ṭhian te, ka hnathawhpui chênin an ṭhu kim vek a, biak in a lian bawk nen mipui kan leng hnem rem rem hle. Minute 10 vel a liam ang tihah mo leh a ṭhiannu an lo lut a, ka nupui ni tawh mai tur chu ka en vang vang a, zep lovah chuan a lang ṭha tak zet, chuti anga ṭha chuan a hmel ka la hmu ngai miah lo bawk. 

Ṭan hun a rawn ni a, Pastor chu a ding a, Pathian thu chhiarin a ṭawngṭai a, dan khatnaa innei kan nih vang nge ni mipui chu an tam ngei mai. Ka hriatah an la tam ber hial ang, biak inah kan khat vek a nia, tam hem hem tak kan ni. Ka nupui ni ṭep tawh, thu chham tur kan la neih avanga ka nupui la ni lo ve mai chu ka en leh zauh ṭhin a, a lang ṭha tih chu hai rual a ni lo, mahse keimahah engmah a thawk lo thung. En reng duh lovin ka hawi ṭha ve leh mai a, Pastor chuan min ko chhuak a, thu chham tur eng eng emaw ni chhamin inneih zungbun ngei mai chu kan inbuntir a, tunah chuan nupui ka nei ta, ka duh leh ka hriat chian em em pawh ni lo nen nupa kan ni tawh a nih chu! 

Biak in bulah thlalakna kan nei zui nghal a, nui ve teh mah ila ka va han hlim lem lo tak. Ka nupui ni ta Hminghlui pawh a hlim tak tak bik chuang lo tih ka hria, thlalak chu ning ru tak ka ni. A zo mai dawn emaw ka ti a, min lakpui duh an tam em em thung a, kan inneih nî chu ka hlim lem lo khawp mai. Thla kan la zo va, inneih ruai te chu kan ṭheh ve mai nghal bawk a, ka ei tui hlei thei chuang lo. Ka u chiah Lucy-i chuan engkim a buaipui titih a, thlalak bawk a rawt leh a, ning em emin inneih thlalak chu hmun dangah ka tlingtla thei ve leh hram a, ka châk ber chu mut hahdam vang vang a ni. 

Zanah chuan ka room, keimah chauha ka awm ṭhinnaah chuan ka nupui thar Hminghlui nen kan awm dun ta ran mai, after party te pawh kan nei zo vek tawh a, a tlai tawh phian bawk. Dar zat ka en a, dar 12 a pel vel chiah a, Hminghlui pawh bathroom aṭangin a lo la chhuak lo va, a lo chhuah hûn huna luh ve nghal ka tum a, a bak chu mut a ni tawh mai. Chau ru viau e ti lo chuan ka mut erawh a chhuak leh ta lawk lo va, a mak khawp mai. Ka intifai zo va, Hminghlui chu a lo mu fel thlap tawh a, kei pawh thawmhnaw pangngai ha ṭha sawt sawtin ka inthawlh ve nghal a, mahse engmah tih ka tum hauh lo.

Ka lam rawn hawiin min en kiau a, chiang zetin ka lo en run bawk nen a inlet ṭha leh a, a kut chu a hum ruh em em a, a zâm hle a ni mahna. Zâmna chhan tur erawh engmah a neiin ka hre lo, a chhan chu engtin mah ka che dawn lo tlat. Ka kut pahnih chuan ka tukhum dawmin ka mu zangthal duai a, ka en ngai ka en reng a, ka chhungte ruahmanna chu a fuh em em paw'n ka hre lo. Darkar chuang ka men reng tâkah chuan muthilh ka tum ta ringawt a, ka zung hmasa leh tê tê phawt a, ka mu leh tur chiah chu Hminghlui chuan muhil reng chung hian ka lukham chu a pawm bet a, ka mutna lam a hawi tlat a, a mut tui tawh hmel em em zui.

Sik hlau zetin khumah chuan ka mu a, chiang zetin a hmel chu ka en a, kan inkarah induhna tak ngial pawh awm hmasa hauh lovin ka nupui a ni ta mai chu a ni si a, a mak ve ngawt mai. Ka hmuh hmasak ber kha chu ka pate nen a ṭhianpate ina kan va lén ní kha a ni a, chhuat a lo nawt a, ka pa ṭhianpa lah chuan ka pa laka a bâ chu a la pek theih loh thu a sawi a, ka pa'n a ram neihsak ang zawng a sawiin a phal leh bawk si lo. Chutah ka u chiah Lucy-i chuan Hminghlui chu a be peih phian a, khami ní kha chuan mak kan ti vek a nih kha! 

Hminghlui chu nu leh pa nei tawh lo a nih bakah thingtlangmi a ni tih kan hre chho va, a awmna chu a patea tih vel a nih hmel, ka ngaihtuah thui buai vak peih lo. Thla thum hnuah ka pa ṭhianpa chuan ram hralh aiin an awmpui Hminghlui, mihring dam lai ngei mai chu ka pa laka a bâ nen inthleng ang zawngin rawtna a siam a nih chu! Ka hriat tirh chuan sawi tur pawh ka hre mai lo, ka pa zawhna pawh ka chhang thei lawk lo va, a mak êm asin! Lucy-i chuan a khawngaih em em a, kei paw'n ka khawngaih ve reng, mahse ka pa thutlukna erawh ka thil duh loh ber te zinga mi a ni thung. 

Ka pa chuan ka upat tak tak hmaa nupui nei turin min ti a, a chhan pakhat chu ka bialnu hlui nena kan inngaihzawn leh emaw kan inneih a hlauh vang tih chiang takin ka hria. Kum eng emaw zah chuang ka bialnu lo ni tawh ṭhin Grace-i kha ka pa hian a ngaina hlawl lo va, a chhan tak pawh ka hre lo. Anni lah kha a pa hna avangin Delhi-ah an awm ta daih a, kan inṭhen bawk nen ka ngaihtuah zawm zel lo va, mahse ka ngai ṭhin em em thung. Ka hmangaih leh hmangaih loh chu ka hre lo, ka duh tak zet tih erawh ka hria, ka ngaihzawng hmasa ber a nih vang a ni maithei.

Zing khua a vâr a, tukṭhuan ei laiin ka pa chuan Honeymoon hmang turin min ti a, Lucy-i leh ka nu chuan phur em em hian an sawi zawm nghal mawlh mawlh a, kan pawisa ba ṭhinte awmpui ve mai mai Hminghlui an ngaina tlat chu mak ka ti a, Hminghlui ni se va tihuam huam chi hmeichhia a ni der bawk si lo. Ka pa thu chu hnial hreh deuh si hian ka 'aw' ve leh tawp a, ka pa hi chu ka zah a, ka ngaisang a, ka naupan têt aṭang tawh a thusawi leh titura min tih reng reng dik lo a awm ngai lo. Chu vangin kum 30 ral ka kai tawh hnuah pawh a thu ka la hnial lo tluang zel a, ka hnial hreh a ni ber e.

Kâr khat hnuah Honeymoon hmang tur chuan kan inbuatsaih a, thlawhnaah te chuan Hminghlui chu a hawi hû hû a, mi che hlek se a en zel a, a chuang ngai lo tih hi a hriat ngawih ngawih. Zep lovah chuan ka lo zak zawk, mi dangin min rawn en duh si, mahse ṭhenkhatah chuan hriatthiamna chen ka nei ve tho va, thingtlangmi a ni miau a, thlawhnaa a chuang ngai lo pawh chu áwm ka ti viau tho bawk. Hotel changkang ve tak pakhatah kan thleng a, a chang chuan ka pawt kal deuh tawp zel. A kum a la upa miah lo tih ka hria, mahse chuti ang em ema a hawkdak ka ring lo, ring lo tak ka ni.

Zanah Lucy-i hnen aṭang phone call kan dawng a, kan thlen thlak dan leh kan awm dan vel min zawt a, ka hrilh lo chiang teh e! Ka pa hnen aṭang phone call ka dawng leh a, ani nen erawh sumdawnna lam kan sawi tam zawk thung. Ka pa hian ram changkang zawk te angin Company deuh reuh a nei ve a, kan naupan lai aṭang tawha nei a ni a, tun thleng hian a la enkawl a, Company ka ti tak ná a, sumdawnna a ni ber. Plastic aia hman tur paper lampang leh lehkhakhawng hmanga thil chi hrang hrang siamna company a ni mai a, a ṭha thawkhat bawk a ni ang a lúnin order an dawng hnem thei êm mai. 

Kei erawh ka pa ang lo takin sawrkar hna pangngai ka thawk daih a, mahse ka pa chuan a ro ka khawm tur thu chiang takin min hrilh tawh thung. Ka pa nen hian mize inanna nei mah ila inan lohna pawh kan nei ṭeuh tho va, a tuina ang zawng kha ka va tuipui pha ve kher tawh lo va, chumi kawngah chuan amah paw'n min hrethiam zau khawp mai. A tirah chuan doctor nih tum kha ka ni a, mahse engtin tin emaw nih ka châk lo leh thut a, exam neuh neuh neiin sawrkar hna lamah ka inziak tling ta zawk a ni. 

"Hminghlui kha ngaihven la aw, a la kal ngai pawh ka ring lo, in inbo palh reu reu ang e" nui hawk hawk chungin ka pa chuan a ti a, chu chu kan inbiak tawp kharna a ni zui nghal bawk.

Lucy-i hnen aṭang bawk phone call ka dawng leh a, Hminghlui ngaihsak turin min ti chhên a, ninawm lamah a kal tawh. Ka u chiah mah ni se kan nuapan lai aṭang tawh ka u lo char char a, amah paw'n pawi tihna a nei chuang lo. Lucy-i chauh ka be dawn emaw tih laiin ka nu'n min rawn biak zawm leh a, hmeichhe ṭawng tam hi chu ka ngaina lo ve thlawt a ni. Ka chhungte an ni zawk a, chuti ni lo se chu ka biak lohna a rei tawh ang. Kan inbiakna kan titawp thei ve ta hram a, ngaihsak tura min tih ber Hminghlui lam ka hawi chuan kan thawmhnawho zawng zawng khumah a lo phawr vek a, a thlep thlap a, mak ka ti ang reng. 

"Engati nge khatia i thleh vek kher? Khaina tur a awm reng alawm, a awmna i hre lo leh pek em ni?" ka biak dan chu a dawngsawngtu tan chuan hriat nuam a nih ka ring bik lo, mahse Hminghlui chu rilru ná hmel pawh a pu chuang lo.

"Nia, ka hre chiah lo, i room nen khan a inang bawk si lo va, ka tih awmzia chu kan room" min rawn en zawk a, a hawi sawn leh nghal a, be tawh lovin thawmhnaw chu ka khai ta vek a, ani chuan min lo en reng ringawt. 

"U Jimmy, eng lo, ka ril a ṭam, ei tur kawl sa i nei mial ém? Lei dawnin kan awmna nen a inhlat ka ring si a, i neih hlauh chuan ka lo ei mai" inthlahrung aw zeta a tih chuan ka che tawp chat a, thil ka hre chhuak nghal. 

"Min lo zui rawh, thil ei ang" tih leh kawngka lam pan ka rual a, min lo zui ve mai a, mahse lift-a chuan a hlau leh tlat tawh a nih chu! A va buaithlak ṭhin tak! 

"I ril a ṭam a ni lo'm ni?" ti hluaiin a banah ka chelh a, step-ah chhuk a tum tawh zawk maw le, pawt ding lo ila chuan a chhuk hman ngei ang. 

"Kan chhoh lamah pawh khan chuán i châk lo tih ka hria, hlau tawh suh, a hlauhawm loh" ka aw chu a khauh hmuk a, ṭi zetin min en ta kar mai.

A ban ka hmerna chu a sen deuh rám a, duh aiin ka lo hmer nâ mah mah a ni maithei. Min hlauh vang nge ni ngawi rengin lift-ah chuan a chuang a, bang chu nghengin a inném deuh ṭai tho va, chuang ṭhang se a hlauh loh ve mai ka ring ta ringawt. Ei tur kan ei lai te chuan a ei mawlh mawlh a, a ṭam tawngkhawng tawh bawk a ni ang, a chungah ka inthiam lo lek lek zawk a ni. Kan room-ah kan chho leh a, thawmhnaw chu a khai ṭha mial mial a, kei erawhin phone ka khawih thung. Phone ka lo khawih tui deuh nge ni ka hawi chhuah chuan ṭhutthlengah a lo muhil leh daih tawh a, a zia hi chu a mak a ni.

Ka mut a chhuak ve tawh tho bawk si, a mipa zawk khuma mut lah tih chî ah ka ngai si lo, mahse khawiah nge ka mut chuang ang nì! A mutna lamah chuan ka phei a, a mut tui hmel khawp mai. A bân bulah ka nam a, a harh mai ka rin tehreng nen a harh lo nasa mai. Mipa ka ni alawm le ti rilru chungin ka pawm kang a, ka pawm kán dawn leh dawn loh chu vawi tam ka ngaihtuah hman thung. Khuma ka mut tir hnuah pawh a la harh eih lo va, keia tak pawh chu ṭhutthlenga mut tum si kha khumah bawk ka mu leh lawi a, mahse kan inmut hlat dun hle.

A tukah chuan thawm dang avangin ka harh hlawl a, ka mit ka men ruala ka zawn ruk hmasak ber chu Hminghlui a ni a, mahse ka hmu nghal mai lo thung. Hnathawk pakhat hian Hminghlui chu a lo hau titih deuh a, ka thin chu a sa nghal phat! Vai ṭawngin ka hau lêt a, kan room aṭanga chhuak nghal turin ka ti zui nghal bawk. Hminghlui bulah chuan ei tur a baw nuaih a, an insun palh vel a nih ngei ka ring. Hminghlui tê lah chu a kal sawn daih a, bathroom-ah a lut a, rei ni lo mah se Vainu vang mai mai khan a hlauthawng hman hle tih ka hmu hman vek tho.

"U Jimmy, vawiinah eng nge kan tih dawn?" bathroom aṭanga a lo chhuah hnu lawkah a ti sep a, pangngai takin ṭawng tum mah se a pangngai lo tih ka hai hauh lo.

"Chu lam ai chuan nichin khan eng thil chiah nge thleng?" ka zawhna avang chuan min rawn en chho chiang ngei mai. 

"Eng lo, ka hawi lêt chiah kha kan insu palh a, a ṭawng ka hrethiam ve bawk si lo" a rawn ti niah niah a, ka rin tâwk vel chiah a ni.

"Chuan kawngka saw ka hawng thiam miah lo, hawn ka tum a, a inkalh tlat, a mak lutuk" a tih zawm leh nghal zat a, nu leh pate neiin lehkha zir chho zel se chu college kal rual vel áwm lêk a la ni a, a che nuapangchhia viau ṭhin chu en liam theih ka zir mai a ngai dawnin ka hria. 

"A harsa lo" ti supin kawngka hawn dan chu ka inhrilh ṭha ve leh mai bawk a, dik tak chuan dawhthei zawk zawk ka ni miah lo, mah se Hminghlui erawh ka dawhthei phian thung.

Chhunah chuan kan chhuak dun ve ngei a, ka rin phak bakin a ṭawng duh ta. Min nêl zet ang hian ka lakah chuan a awm a, a ṭawng mawlh mawlh a, Taj Mahal te kan tlawh nghe nghe a, nuam a ti viau chuan ka hria. Zanah ve thung chuan a mu hma khawp a, ka nuih a tiza ru ang reng. A mut tawh hi chuan a mu nghet phian zel bawk si, mahse a ṭha letling phian zawk. Khawngaih vanga nei kha ka ni a, ka duh vang pawh a ni lo, ka pa thu ka hnial hreh vang leh ka khawngaih vanga neih duh ka ni ti ila a sual tam lo vang. 

Ni e, ka khawngaih chiang alawm, a awmna te lah khan an chhawr rim thei si, chutah an pawisa bâ aiah kan awmpui atan min pek tawp kha an tum a, mihring dam lai an hralh hi a ni ringawt. Kristian ram kan inti hlawm tak ná a, Kristian zia hian kan va nung si lo ém. Ka pa khan ka nupui atana a ṭhat a rin thu a sawi mauh mai bawk si a, keiin ka lo khawngaih ve tho bawk nen nupuia neih kha ka rem ti ta mai a ni. Kan inneih nía rawn ṭawiawmtute zingah pawh a chhungte an tel ve miah lo, a putea te chhungte vek an ni a, mihring rilru tak phei chuan a putea te chu ka ngainep em em bawk.

Kâr khat chauh châm tum kha kâr hnih kan châm a, chu pawh Lucy-i vang a ni a, duh aiin min rawn control a tum mah mah ṭhin. Kâr hnih hnuah kan haw a, kan mu dun zantin ve ziah ná a, kan insi eih ngai lo thung. Hna ka bán apiang hian ka inbualna tur a lo siam fel sa dîam zel a, nupui te an awm ve tâkah chuan chet vel a awlsam phah khawp mai. Nupa nun erawh kan la hmang lo tluang zel a, hman ngaiah pawh ka ruat lo, ka it lo ve êm a ni. Thla a'n ral a, ka chhungte chuan nautê lam an beisei nghal ringawt a, keini pahnih lah chuan nautê neih kan ngaihven lo dun nasa mai si.

Ka rin aiin Hminghlui chu a che peih phian a, in chhung chetah ngat phei chuan Lucy-i a awl hneh khawp mai. Ka chhungte lung a dum em em a, ka nu leh pa'n an ngaina si, Lucy-i nen an inkawm thei bawk si, keimah ber ka buaithlak ta a ni. Nupa te chu kan ni ve ngei alawm, mahse duhna emaw itna pakhatmah ka nei lo va, hmeichhe hmelchhe zawk zawk a ni hran lo, hausain han inchei deuh phei se chu mipa tam tak duh tur chi a ni a, keimahah erawh a tla nâ ve tlat lo a ni. Nupa kan nih angin room khatah kan cheng dun ve náw naw a, harsatna ka insiam lo tawn ve ve bawk a, inhauh kan nei ngai lo a ni ber e.

Tlai khat ka hna bâng ka haw chu kan room-a kal nghal mai lovin ka ding deuh dat a, choka aṭanga chawhmeh rim vang a ni pakhat. Choka ka lut chu Hminghlui ka hmu nghal a, zawi têa zai rât rat chung hian ei rawng a bawl malh malh reuh a, hmeichhe ṭawng tlem lutuk lo mah ni se mize harh tak a ni lem lo va, chu chu ka chhungte ngainatna chhan a nih pawh ka ring. Min hmu thut chu a zai tawp nghal chat a, a phu nasa lutuk chu a khawngaihthlak letling zawk.

"I inbualna tur ka la siam miah lo, ka theihnghilh daih" tih leh choka aṭanga tlan chhuah a rual nghal thuai thuai a, a chawhmeh siam lai réng a ngaihtuah tawh lo.

"Nang tê hi chu!" ti deuh supin gas chu ka off a, kan room-a ka va luh chuan bathroom aṭangin a lo chhuak chiah a, a intihuh deuh phúng bawk. 

"Gas ka off a nia, on leh mai rawh" a chhuah dawnah ka ti a, min buk khum zeuhin a chhuak zui mai a, kei pawh ka inthlak zawm nghal mawlh mawlh.

Zanriah kan ei lai chuan chawhmeh chu tui an tih thu hlir ka chhungte chuan an sawi a, kei paw'n tui ka ti chiang alawm, ka sawi ve duh lo mai zawk a ni. Thingtlangmi tih takah Hminghlui chawhmeh siam reng reng chu a zo raih ka ti mai, tui lo pawh a awm lo, a siam fuh phei chuan chaw ka kham lo ru hial ṭhin. A hmuha ei tam vak ka hlau ve tho bawk si, chaw heh lutukah min ngaih ka hlau a, ka awm dan chu ka hrethiam tawh bik lo, nupui ka neih aṭangin ka mizia leh ka awm dan a mak tawlh tawlhin ka hria. 

"Jimmy, ka be duh che aw" ka pa chu an room-ah a lut zui nghal a, kei pawh ka kal ve nghal a, ka pa hi chuan pawimawh fê lovah chuan thu pe aw tak hian min be ngai lo va, tun ṭum pawh thil pawimawh ni turah ka ngai hmiah. 

"Kâr leh chu phaiah zu zin lawk mai ta che, ka châk lo ém mai, ka nuam lo hrim hrim bawk" ka pa chuan a ti dam dap a, mit tizim sùnin ka en a, ka hman pawh ka ring lo. 

"Tun lai chu kan hna lam kan buai phian asin, kâr dangah emaw thla dangah tal a theih lo em ni?" ka tih chuan

"Kâr leh a nih loh chuan order kan pe chhuak zo hman lo vang, tun laiah puipun khawmna leh eng eng emaw ni lawmna a tam tawh ém hi Jimmy, order kan pek theih zel chuan hlawkna hlir a ni mai" a tih zawm nghal a, ka ngawi ta reng. 

"Kâr leh chu i thei turah ka ngai a nia, a reng reng thuah sawrkar hna hi thawk tawh lo ka duh ṭan viau a nia, kan buai mah mah dawn tlat" ka kuta beng zeuh pahin a tih zawm leh zat a, ka buk khum nghat a, ka pa berin min mamawh a nih chuan chawlh láin ka zinsak mai a ni ang chu! 

Kum tin hian Company bungrua tur leiin ka zinsak ṭhin a, mahse a châng zeuh zeuhin a ni thung. Ani phei chu thla khatah vawi khat tal a zin ziah a, an buai ve ém bawk a ni. Hnathawk a chhawr tlem pawh a ni lo, order a tam ṭhin ém a, ka hna aṭanga bâng tura min ti pawh chu kawng leh lam zawng tak chuan a àwm viau tho. Kâr khat chu mit khap kar lekah kan hmang ral thuai a, Hminghlui chu a hmingte chuan ka hrilh ve tak ná a, engah mah a ngai lovin ka hria. Thawhṭanni zing a ni a, zin turin ka insiam fel vek tawh a, ka kal dawn ṭep tawh tihah Lucy-i chu kan room-ah a rawn lut ta hlawl mai.

"En teh Jimmy, Hminghlui hi thawmhnaw lo hawn rawh aw? I lo chík ve em? Kawr hi 10 aia tam a neih ka ring miah lo, lo hawn ngei ngei rawh" Lucy-i chu ka en deuh hû a, Hminghlui a hmuh hniam vanga sawi ni lovin a ngaihtuah vang zawk a ni tih ka hria, a sawi tâkah chuan Hminghlui hian kawr a nei tam lem lo khawp.

"Ka lei thiam ringawt nâng, ka thiam lohzia chu i hriat vek tawh kha!" ka tih chuan ka banah a rawn chum nghal zat a, Hminghlui thawmhnaw tur chu lei dawn pawh ni ila hmeichhe thawmhnaw ka lei thiam lo tlat a ni.

"Chuti ang a ho mai mai, chu bakah i zinna turah ka ṭhiannu dawr a awm alawm, khu lamah chuan a tlawm zawk a, lo lei haw ṭeuh ang che. Lei thiam leh thiam loh lamah kha chuan buai a ngai lo, ka lo be mai ang che" tih leh min chhuahsan a rual a, zin tur chuan ka chhuak zui ve mai bawk.

Darkar 2 leh a chanve vel thlawhnaa ka chuan hnu chuan bungraw leina tur pawh ka thleng thla a, ka tih hmasak ber erawh bungrua lam ni lovin Hminghlui thawmhnaw leina tur zawk a ni. Lucy-i ka bia a, ani'n a ṭhiannu phone number min pe a, rei rial lovin kan inzawng hmu mai a, mahse ka thlenna Hotel aṭang chuan a va hla hret a ni. Ka pa'n min rawn be bawk a, bungrua lam min zawt chiah chu ka chhang lo chiang teh e. Ka thil tih mêk min zawt leh a, Hminghlui thawmhnaw tur lei tuma ka chhuah thu a hre chiah chu a nui hawk hawk a, a hlim viau chhan ka hre der lo. 

Ni thum ka châm a, Hminghlui thawmhnaw tur pawh ka lei fel vek tawh a, duh ai ka lei hnem mah mah maithei a ni. Bungrua lam ve thung chu tam tak hawn tur a awm lo va, mahse buai lohna tur vel ka hawn tho. Chu bakah hawn tak hi a buaithlak a, transportation lam a to zual a, dil tlawm pawh hian a tlawm hlei thei lo ṭhin. Aizawl ka thlen nî chuan Hminghlui pawh a lo nui sâng a, ka hmuh tirh leh hriat tirha a hmel ang ngawt chu a pu tawh bik hauh lo. A vun a nung sâwt em em a, a thau deuh tawh bawk a, a thau dan chu a tâwk ang reng phian a, nupa kan nih hmaa a hmel nen chuan inthlau tak a ni.

"Bungraw lei turin ka tir emaw ka tia, Hminghlui thawmhnaw hlir a lo hawn a, a pawi lo ve, a ṭha hrim hrim e, nupui te hi duat thiam em em tur a ni reng a ni" ka pa chuan ka nu bulah a ti deuh chhên ta mai a, a nui put put a, ka nuih a za ve lo hle thung. 

"Hminghlu, a duat lo deuh che a nih chuan min hrilh zel dawn nia" a la ti deuh deuh leh nghal a, Hminghlui tak paw'n awm dan a thiam bik chiah lo, ka duat vang pawh a ni lo hrim hrim, a mamawha ka hriat vang mai chauha hawnsak alawm ka nih. 

"Ka lawm e u Jimmy, hei phei hi chu a mawi lutuk, hak a nawm hmel si" kan nupa room-a kan awm hnuah Hminghlui hnen aṭangin lawmthu sawina ka dawng a, engtin emaw ni ka awm a nuam huai a, ka hahdam ni berin ka hria.

Chhang lét lém hlei lovin ka mu ṭha a, ani pawh a rawn mu ve mai a, kan mang a chhe hran lo dun bawk nen zing thlengin kan insi lo tluan leh parh dawn tih ka hre chiang hle. Ka muhil lai chu chawp leh chilhin ka harh thut a, ka harh chiang em em leh nghal. Dar zat ka en a, dar 4 a ri hnai viau tawh a, ka bula mu chuan rizai a lo sin tawh reng reng lo. Ka lamah ka lo pawt tawm vek chu niin, rizai chu ka sin ṭhat tir a, a mut ang âng chuan ka thlek vung vung a, nupa kan nih dan teh tawp chu ka thil hriat tawhah a la lem ber ang. Ka pa min nawr luihna a nih rualin ka khawngaih tlat si a, nupuia ka neih châk vang em em pawh a ni lo.

Hun te chu hun an nih angin a liam zel a, chelh din theih a nih loh ang bawkin kan nupa nun dan pawh tlêm tlem chuan a danglam ve tial tial a, tunah chuan thla eng emaw zah nupa kan ni ve ta reng mai. Kan inneih tirh ang bawkin kan nupa inkarah buaina emaw harsatna a awm ngai meuh lo va, ngaihsak erawh kan inngaihsak tawn viau tawh thung. Amah zawk hian min be hmasa tlangpui a, sawi tur ka hre lo ṭhin bawk nen ka be hmasa ngai lo tluk a ni. Hna avanga ka haw tlai dawn te hian ka hrilh thlap zel a, hrilh loh tawp zawng a dik bik si lo a ni.

"Tú hmel hi kan va hmu har ve Jimmy" titu ka pa chu ka en vat a, kan inneih aṭang kum khat deuh thaw a liam tawh a, chuti ang rilru a pu pawh chu a áwm viau mai. 

"Mipa zawk i ni a, ṭan han la deuh teh. Lucy-i ni se pasal neih a tum loh hmel bawk si, tú ka duh tawh a nia" a rawn ti leh a, chhang lovin ka ngawi tawp a, dawt sawi ka duh loh vang a ni ber.

Ka nu paw'n tú hmel hmuh a châk tawh thu a sawi fô va, kan nupa inkar tak an rawn hre ve der tawh bawk si lo. Ka pa sawi ang khan Lucy-i lah hi a aia naupang deuh deuh ngaihzawng a nei a, ṭha ka ti vak lo. Hmeichhia hi chuan mahni aia upa mipa ngei, hmangaihtu leh dawm thiama thunun thiam tak mipa nei se a fuh berin ka hria. Hminghlui nen kan kum a inthlau pawh hi a ṭha phian zawk, min zah a, min u thlap te hi hriat nuam ka ti ṭhin a, nupa mah ni ila ṭhian inkawm ang mai kan ni. Ka duh lo va, ani paw'n min duh lo bawk a, kan mamawhna lamah kan inpui tawn ve ve a, a hahdam thlak viau bawk.

Ni khat chu office lama kan thawhpui pakhat nu a thi hlauh mai a, kan chawl vek nghe nghe a, an inah te kan va kal ve a, mahse kan awm rei lem lo. Bazarpuia restaurant dawr pakhatah kan chawl khawm a, mi dang chawl an lo tam khawp mai. Kan thawhpuinu pakhat nen kan ṭhu dun a, ka ṭhiante pawh hmeichhia nen an inṭhut pawlh nuaih a, kan ṭhutna chu a zim deuh avanga pahnih chiah ṭhu bik kan ni bawk. Ei tur kan chah a, tu emaw hmuh ka nei ta tlat mai. Tu dang ni lovin ka nupui Hminghlui ngei a ni a, ani paw'n min hmu chiah a ni ang min en chiang hle. Hawi sawnin a tho daih a, a ei man a pek hnu chuan anṭam leh thlai hnah khaiin a chhuak ta nal nal.

"I nupui kha a ni ém? Awi kei chu min ngai dik lo ang tih ka hlau ê, lo hrilhfiah mai rawh, a va'n nuam lo tak!" ka thawhpuinu chuan a ti zung zung a, a lo hmu ve vek a nih hmel.

"A ho lutuk" ka'n ti ve tak ná a, Hminghlui tan chuan ngaih kawih kan awl khawp ang. 

"Office lamah lét leh a ngai tawh chuang lo, ka va haw leh si ang e. Ka thil chah kha rawn dah a ngai lo vang, min lo pack sak zawk mai" tiin ei siamtute chu ka biak zawm a, ka chhuah dawn chuan Hminghlui ṭhutna lam ka hawi leh a, a ei tur chah engmah a lo ei reng reng lo chu niin.

"Hei pawh hi min lo pack sak nghal law law" ka ti leh nghal a, ka ṭhiante chuan min chelh an tum viau a, awm khawmuang tawh lovin ka haw lui ta tho.

In ka thlen chuan a lo insu leh daih tawh a, mi dang tumah an awm lo va, ei tur chu plate-ah bun chhuakin ka ko zawm zat a, ka hmel a hmu chu mak a tih hmel teh e. A insuk laklawh thu a sawi a, ṭha takin ka lo nghak ve mai a, a insu zo har phian leh nghal. Ei tur a dai mai dawna ka hriat avangin ka ko nawn leh a, dawhkana ka thil chhawp a hmu chu a hamhaih viau a, a áwm lo hran lo. A thil chah kha a ni miau a, kei pawh ni ila mak ka tih tho ka ring. Ka ṭhut rualin a ṭhu ve mai a, a ei nghal mawlh mawlh a, ṭawng tumin ka kâ ka áng zuau a, mahse insawifiah dan tur ka hre leh ta hauh lo.

"I hmuh ang kha a ni lo a nia, ka thawhpuinu a nih kha" kan ngawih dun vang vang lai chuan ka ti a, a thil ei lai a tawp chatin min rawn en a, a nui sen sen a, min tihamhaih lek lek zawk.

"A nih ka ring" ti sepin a ei zawm leh mial mial a, tam pawh ka ei hmain a ei zo thuai a, insu turin a kal leh ta daih. 

Kan thil eina vel chu keimah ang lo takin ka sil ve thlap a, ka vawi khat silna a ni nghe nghe. Eng nge ka sil chhan tak pawh ka hre lo, ka rilruah a lang ve tawp a, ka sil ta ringawt bawk. Tih tur vak ka neih loh avangin kan nupa room-ah ka awm char char a, Hminghlui erawh thil vel a tifai a, ka haw hma thut chhan min zawt ve thlap a, ka hrilh ṭha ve mai bawk. Ei rawng bawl hun áwm velah room aṭangin ka chhuak a, ka rin ang ngeiin ei rawng a lo bawl leh malh malh tawh a, amah chauh paw'n a tlei viauin ka hria. Engmah ti lovin chokaah chuan ka ṭhu ve leh tawp a, thil thuhruk nei ang maia min rawn en thut chu mak ka ti hle.

"Eng nge i hnungah khan i dah ṭhat?" pangngai takin ka ti a, ka zawhna chhang lovin min melh chho kiau a, a thil thuruk chu ka hre châk tulh tulh thung. 

"Hminghlu" tia kawih her ka tum chu a tawlh hnung thuai a, ka en deuh hâw a, ni dang ang lo takin ani pawh chuan min en rei khawp mai. 

"Eng nge maw i hriat reuh le!?" ti hmukin a darah ka man bet a, ka kawih her rualin a kut lam ka en nghal a, ka thil hmuh chuan min va ṭhawng mai mai tak!

"Sawi mai ta che, heti ang te chu thuhruk chi pawh a ni hleinem" ka aw chu a vin hle a, a kut thi zawih zawih chu ka hup tawp a, a zai kak thuk thawkhat a nih hmel.

Ka tih ngaihna hre lo chuan a kut chu ka fawhsak tawp a, ten miah lovin a thisen chu ka taksa chhungah ka luh tir a nih chu! Mak tih hmel zet hian min en phah hial a, kei paw'n ka chet dan chu mak ka ti hnuhnawh tho, mahse awmzia a awm tawh lo. A âwm chungah phar tirin ka kalsan a, First Aid Box ka zawng nghal a, ka tuam lai te chuan a lo ṭhen sawk sawk a, nâ a ti viau a nih ka ring. Ngaihdam lah chu min dil ringawt leh nghal a, engtin mah ka chhang lo va, ani paw'n vawi khat bak min dil chuang lo. Kan nupa room-ah ka hruai lut a, ei rawng bawl lo turin ka ti bawk a, ka nute lo haw thlengin a rawn chhuak ta lo hrim hrim bawk. 

Lucy-i leh ka nu chuan an bawl zawm a, Hminghlui an ngaihtuah hle a, mahse eng thamah ka ngai lo. Nât chu a nâ ngei ang, an buaipui chûk erawh ka mit a kham ru khawp. Tlai lamah han vin deuh hrep mah ila zanah erawh a pangngai leh vek tawh a, chu chu a zia dik tak a ni. A thinrim rei ngai lo va, a hlim lo rei ngai lo va, hmeichhe titau bawng bawng chi ni se chu kan inhau zing ngawt zawk ang. Engtin pawh awm ila min en liam thei a, mahse a pasal ka nih angin ka chungah a ṭha em em vek tho. Ka thawmhnaw a su a, ka kawr tur a nawt mar thlap zel bawk a, ka inbualna tur siam leh ka thawmhnaw hak tur chénin a che fel a, ka tan chuan huat ngawt a harsa a ni.

Kâr tawpah ka inthiam lo ru deuh bawk nen ka lén chhuahpui a, Hmuifangah te kan lêng a, ho têa ka ngaihah a hlim thei zel te chu min tihlim letling phian. A khaw hawi zau lovin thil hre tam ni lo mah se ka nupui a ni ve miau a, a lakah mawhphurhna tam tak ka nei a, hlen zel ka tum bawk. A thil mamawh ka hnenah a sawi ngai lo va, mi dang hnenah pawh a sawi ngai chuang lo. Chu vang tak chuan ngaihtuah pawh ka ngaihtuah ru viau ṭhin réng a, a rilru tinâ zawnga awm ka tum lo bur bawk. A hming chauhin nupa kan ni a, a hming tak tak a ni a, kum khat lai cheng dun tawh mah ila nupa nun tak ngial pawh kan la hmang lo. 

"Jim" min kotu aw chu ka hai lo chiang ngei mai, mak ti zetin ka melh tlawk tlawk a, nui sâng hian ka lam a lo pan a, min kuah lai te chuan kuah lêt nachang pawh ka hre lo, mak ka ti êm a ni.

"I dam maw? Nupui i nei tawh tih te ka lo hria a, ka lawmpui che ni nghal rawh se" a ṭawng lai chuan a hmel chu ka en reng a, hun kal tawh ka hre chhuak a, hmân ai khan ka hmu hmelṭha zual zawk bawk. 

"Thil ei dun i hman mial em? Kum 6 chuang chu kan inhmu tawh lo bawk si a, i ngaihawm ve alawm le" a tih leh chuan ka bu zeuh a, kan piah lawka dawrah kan lut zui nghal a, ka la pangngai thei der lo zui. 

"Pasal i nei tawh em?" ka ti deuh tawl a, a thil ei lai tawp chuang miah lo hian min rawn en a, kei erawh engmah ka la ei lo thung. 

"Nei nâng, keini te chuan kan hmu zo ve tak tak hleinem" ti siam siamin a nui sen sen a, ka zep lo vang, a hmelṭhain a duhawm tak zet.

Thil chi hrang hrang a sawi a, a nui sen sen reng a, a hmel hmuh nuam lutuk chu en nin a har a ni. Chawhnu lam pawh office-ah ka lêt loh phah ṭhak a, a ṭhiannu nen chauha lo chho an nih avangin an in luah thleng ka thlah a, ka kuah tawp nghe nghe. Ka ngai ém asin, ka hmeichhe duh ber leh ka duh hmasak ber nen kan intawng leh a, awlsam taka kaltir mai chu ka thei rih lo a ni. Ani paw'n ka awm dan a hai lo va, hmân ang chiahin min be siam siam a, a nui leh tawp zel. Chaw ei ve nghal turin min sawm a, mahse chung êm em chu ka duh ta bik lo.

Haw kawng tluan chuan ka hlim em em a, ka nui leh suk ṭhin. In chhung ka lut chiah erawh ka hlimnate chu vawm bo ang maiin a reh duak a, Hminghlui ka hmu chiah phei chu ka inthiam lo ru ngei mai. Ka inbualna tur a lo siam sa leh thlap tawh a, ka rilru chu a nuam thei ta reng reng lo. Zanriah kan ei lai paw'n ka kham hmasa ber a, Hminghlui chuan min ngaihtuah hmel hle bawk. Ka rilruah Grace-i chu a awm deuh ngar ngar a, mahse nupui nei tawh ka ni tih ka hria, uirena lam kawng zawh ka tum lo hrim hrim a, Grace-i laka ka rilru puthmang la ngai reng erawh paih chhuah emaw tihdanglam ka tum chuang lo thung a, ka phal rih lo a ni ber.

Aizawlah Grace-i a awm tih ka hriat nî aṭang chuan ka rilru a inkawkalh nuaih a, office bân apiangin ka peng kawi ta ziah bawk a, zep lovah chuan ka la ngaihven chiang a ni. Amah lahin nupui ka nei tawh tih hre reng mah se min hnar ngai chuang lo va, ka huangtau phah hle. In ka thlenin Hminghlui ka khawngaih leh lawi a, ka dik hlawl lo. Grace-i nen ni khatah vawi khat tal inhmuh loh kan nei ngai lo a tih theih a, a phone number erawh ka la duh lo thung. An in luahna ka hria, ka hmuh châk chuan ka lêng mai ṭhin. 

Ka ngaihven viau e ti lo chuan ngaihzawng nei anga awm ka duh leh chuang der lo va, ka nupui rinhlelh theiha awm pawh ka tum teuh lo. Hmelṭha ka la ti ngei alawm, lén pawh ka lêng ṭhin ngei, mahse kan inngaizawng tihna a ni kher lo. Hminghlui pawh kâr tawpah ka chhuahpui ziah a, a bula awm a hahdam thlak reuh ka ti ṭhin. A chhan chu a nui reng thei a, a hlim reng thei a, vuina engmah a nei ngai bawk si lo. Hmeichhe ṭhenkhat chu ni se kan inṭhen leh daih tawh ka ring, ka bula awm an peih teuh lo vang, nupa ve si infawh tak ngial pawh kan la infawp lo chu a nia, ka chhungte'n hre phei se chu engtin tak ngai ang maw!

Zan khat chu tlaia ka lo intiam tawh angin Grace-i te inah ka lêng a, zan lamah hian ka lêng khât hle a, a chhan pawh rinhleh theiha awm ka duh loh vang a ni. Min khan chial hian a ṭhu áwn dûai a, ka kutzungṭang chu a khâl niap niap a, tui zetin a ṭawng siam siam bawk. Darkar tam pawh ka awm hmain ka pa hnen aṭang phone call ka dawng a, ina haw nghal turin min rawn hrilh a, min vin hrep a ni mah zawk. Rei awm ta lo chuan kei pawh ka haw ve mai a, mahse ka thil hmuh leh hriat chuan min ṭhawng hle. Hminghlui chu khum betin a lo dam lo va, tlaiah te kha chuan a dam ṭha vek si a, chu chu mak ka tih chhan pawh a ni. 

"Khawiah nge i kal?" ka pa aw khauh dan chu pui tak a ni. 

"Ka ṭhiante inah" ka tih chuan

"Dawt sawi hlek suh Jimmy, i kalna hmun chu ka hre chiang khawp mai" a rawn ti nghal a, a lam ka hawi rang teh e! 

"Kha nu, i ngaihzawng hlui kha i hmu ṭhin a ni lo'm ni? Nupui nei tawh i ni tih hre reng rawh, Grace-i kha vawi khat mah hmu tawh suh ang che" a ti leh hmawk hmawk a, ka thin chu a rim ve ta thut.

"Zan dangah kan sawi thei em? Hminghlui dam loh chhanah hian Grace-i a tel ka hre hauh lo bawk" ka tih chuan min melh rum hle a, kei pawh ka hawi sawn duh der bik lo.

"Tel chiang e, i nupui hi lên chhuahsan lo la chu a dam lo tih i hre thuai ang a, heti ang em em a ni lo vang" a ti ram hmuk a, ka chhang tawh lo va, mi dang pawh an lo ngawi ṭhap ringawt. 

"Ka sawi leh ang Jimmy, i ngaihzawng hlui kha hmu tawh suh ang che" a ti zawh rualin

"Engtin nge i hriat ka hre lo, mahse ka awm dan chhui kílh kelh tawh suh ka pa, puitling ka nih ve tawh hi!" ka ti ve nghal a, ka nu chuan min lo khap vat bawk. 

"Kawng dik lo i zawh hmaa kawng dik zawh tir tumtu pa min nei hi lawm hle zawk rawh, ka chhang lêt e te chu i leh nghal a, i hmel pawh hi ka hmu reng peih lo" tih leh ka pa chu chhuah a rual nghal a, kawngka chu a khar nâ khawp mai.

"Engati nge Grace-i chu i lo va hmuh leh kher kher? I pa kha a lungawi mai mai dawn lo a nia, a lo haw tirh aṭang tawh a mood a off tehreng nen, ṭha taka i biak a ngai ngei ang" ka nu chuan a ti a, Lucy-i erawh a la ṭawng miah lo thung. 

"Min chhuahsan rih teh u" ka tih hnu rei lovah an chhuak ve mai a, khuma mu mêk ka en chuan a lo meng reng tawh a, a men lai ka hre lo hrim hrim.

"Ka ṭha mai ang" a rizai sin ka siamṭhat sak lai chuan a ti thawp raih a, a chauh hmel hle a, ka pa sawi vang ni lovin ka inthiam lo em em bawk.

"Hminghlu" a hminga ka koh rualin min hnung chhawn zawngin a inlét a, thawk ka la huai a, a hawina lamah chuan kalin a hma takah ka ṭhu hniam a, a maimitchhing rang hle. 

"Ka tihpalh, tlaiah khan i ṭha bawk si a, i dam loh thut ka ring miah lo" ka ti sup a, ani chuan la meng chuang lo hian

"A pawi lo, insawifiah a ngai lo" a rawn ti sep a, a bulah chuan ṭhu thluang duaiin ka ngawi ta reng a, ka nupui laka ka awm dan chu a dik lo chiang a, insawifiah dan tur pawh ka hre lo hle.

Ka mit ka men leh chuan khua a lo vâr vek tawh a, ka ṭhut dan ngaiin ka lo la ṭhu reng a, mahse rizai ka sin tawh thung. Hminghlui hmel hmuh tumin ka hawi kual a, ka hmu mai lo va, a tho daih tawh a nih hmel. Chokaa ka luh chuan ka rin ang ngeiin ei rawng a lo bawl a, zing dang ang bawkin a che reng reng chu a zângkhai vah a, a dam ṭha hle tawh a ni ang. Min hmuh rualin min be nghal a, ṭha takin ka chhang ve mai a, chokaah chuan ka awm ve ta reng a, amah zawk hlir a ṭawng a, kei erawh ka ṭawng tam lo hle thung. 

Tukṭhuan ei lai chuan kan ngawi deuh ṭhap a, ka pa chu ka lakah a la lungawi lo tih ka hria, mahse Grace-i ka hnaih a phal loh chhan chu ka hriat a hun ve tawh a ni. Min biak hma chu ka be lo char char a, hmân aṭang tawh Grace-i a ngaina lo bur a, a chhan tak a sawi bawk si lo. Hna kal dawn thlengin kan inbe lo va, dik tak chuan nuam ka ti bik miah lo, mahni pate nena han inhmuh thiam loh chu thil nuam lo tak a ni. Office bânah erawh Grace-i te inah bawk ka pêng kawi leh a, rei ka awm lo va, tlai dang zawng aiin ka awm rei lo hial ang.

"Ngaihzawng ka nei lo a nia" ka nupui bulah chuan ka ti deuh tawp a, min ringhlel tlatin ka hria a ni. 

"Hminghlu" ka tih leh chuan ka lam a rawn hawi a, nui sak chung hian

"A pawi lo ka tih tawh khá, a ho lutuk" a rawn ti a, a awm dan leh a ṭawng dan chuan ka awm a tinuam lo zual. 

"En teh ngaihzawng ka nei lo tak tak, nupui ka nei tawh a, ngaihzawng neih ka tum lo bur tih hria ang che. Ka pa thusawi kha chu a dikna chen a awm tho va, mahse ngaihbel theih zawng hlirin a sawi" ka ti leh a, ka nupui hnena insawifiah chu ka bâ ve hrim hrim.

"Ka pa thusawi kha ka ring a, i thusawi pawh hi ka ring tho" ti leh room aṭanga chhuah a rual nghal daih a, chumi nî aṭang chuan insawifiah vel ka tum tawh lo zui nghal bawk.

Kâr tawp a rawn ni a, kâr danga kan tih ṭhin ang bawkin kan nupa chuan kan lêng kual a, lêng kual tih lémah hun kan hmang dun a ni ber. Kalna tur tak pawh kan nei lem lo, a chang leh Hmuifangah kan kal leh tawp a, a chang leh hmun dangah, mahse nupaa hun hman dun hrim hrim chu a ṭha phianin ka hria. Tlai khat chu ka nu'n Bazarpuia bazar dun turin min ti a, hnialna nei lovin kan kal dun ve mai bawk a, mahse Grace-i leh a ṭhiannu kan hmu ta tlat mai. Grace-i ṭhiannu zawk chuan

"Hei i bialpa pawh a nau nen an bazar ve a nih dawn hi!" a ti lang lâng a, Grace-i chuan a khap vat a, Hminghlui ber chu ka khawngaih ta a ni.

Grace-i nen chuan pangngai takin an inchibai a, lem an chang ve ve ni berin ka hria. Chumi tlai aṭang chuan biak ka hlawh lo sâwt em em a, ka chhungte erawh a be ṭha em em thung lawi a, ka pa thlengin ka lakah a lungawi lo tluang zel bawk. Ṭum khat Hmuifanga kan kal dun phei chu Grace-i'n min rawn call a, engtin nge ka phone number a neih ka hre miah lo. Ka pe lo va, ani paw'n min dil lo va, a phone number thlengin ka la nei lo hrim hrim. Kan inbiak lai chuan ka bulah Hminghlui a awm ve reng a, a biang a tuai zeuh ka hmuh rualin phone chu ka off zui nghal hmak.

Chak zetin a kal pawk pawk a, a thinrim viau dawn emaw ka ti a, naupangho nen ball an pet hnuah erawh a hlim leh em em tawh thung. Kan haw lam thlengin a mood a on tluan zak a, in chhung kan lut te chu hlim zetin ei rawng a bawl nghal a, a bula awm zawng a hahdam thlak chiang a ni. Mood off-na pakhat mah nei lovin zan hun chu kan hmang ral a, a tuk thlengin kan inkarah buaina a awm ta lo. Grace-i pawh phone call-a min be tawh lo turin ka ti a, hmai chhana inhmuh mai a ṭha zawk tlat a ni. Ani paw'n min rawn call ta lo vang vang a, mahse nitin deuh thaw chu kan inhmu ziah tho.

Ka pa erawh ka chungah a la lungawi lo tluang zel a, tih vak ngaihna ka hre bik lo. Ngaihdam dil ringawt pawh ni ila chuti mai chuan a lungawi lohna a reh mai lo vang, a mizia ka hre chiang thawkhat a ni. Hminghlui nen kan inkar chu a chhe hran lo va, ṭha tak pawh a ni chuang lo. Ngaihzawng nei anga min ngaihbel tur chu ka duh lo va, ka insawifiah tawh nghe nghe kha a nia, kha bak kha chu insawifiahna thu ka chhak chhuak leh lo hrim hrim. Ka nu leh Lucy-i paw'n ngaihzawng ka nei emaw an ti a, min zilh deuh reng nghe nghe. 

Inrinni a ni a, chu ní chu ka nupui Hminghlui piancham a ni a, mahse mi dang hrilh lovin keimah chauh min hrilh thung. Zanriah ei chhuahpui ka tiam a, a lawm hle a, kei pawh ka hlim lo hran lo. Dar 6 a ri hnai a, Hotel Regency-ah kan ṭhu dun ta ran a, a ei duh zawng ka chah tir a, nuam a ti lutuk chu ka nuih suk suk mai. Number lawng aṭangin phone call ka dawng a, ka pick up rualin hmeichhe pakhat hian Grace-i scooty-a a accident thu min rawn hrilh a, ka ṭhutna aṭangin ka tho vat a, an awmna Hospital a sawiah chuan kal ka tum nghal a, Hminghlui chu en zeuhin

"Grace-i'n accident a tâwk a, ka kal lawk a ngai, min lo nghak mai rawh" ka ti a, ka chhuak zui nghal a, ka hlauthawngin ka hmanhmawh em em bawk.

Hospital ka va thleng a, Grace-i chu a lo hliam nâ ang reng a, pem a nei nual a, mahse thihna ém a chungah a thleng lo va, ka thaw huai thei. Doctor chuan a pem kak zau zualpui chu a ṭhui nghal a, Grace-i erawh a nât an rin avangin kah mutna hmanga muthilh tir rih a ni thung. A ṭhiannu chu thil thlen dan ka zawt a, an inbiak laia accident a nih hmel. Dar 10 thleng Hospital-a ka awm hnu chuan in lamah ka haw a, Grace a muthilh tlang daih vang a ni pakhat. A ṭhiannu'n a riahpui dawn hrim hrim a, ngaituahawm tak a ni tawh lo.

Kan nupa room ka lut chiah chu Hminghlui a lo la ṭhu meng reng a, min hnung chhawn zawngin a ṭhu a, ka phu deuh zuk nghe nghe. Min hmuh rualin inbiak a duh thu a sawi a, a thinrim a nih ka ring. Thinrim pawh ni se ka dem lo, a pianchamah thu ka tiam a, mahse tum loh deuhin keimah zawk ka awm leh a, ka kalsan hial a, ani tan chuan thinrim lohna chí a ni lo. A tlawm thlak bakah a inngaih pawimawh loh thlak bawk a, Grace-i'n accident tâwk kher lo se chu boruak nuam tak kan hmang dun ang maw le. 

"Grace-i chu i la duh reng ti raw?" rilru nât hmel fê hian min en a, chuti ang hmel a pu chu ka vawi khat hmuhna.

"Heti ang lam chu sawi lo zawk ang, naktuk zanah zanriah ei turin kan chhuak leh mai dawn nia, zanin ang kha chuan ka awm tawh lo vang tih ka tiam e" thupha chawi titih chuan ka ti zung zung a, min rin loh hmel hle. 

"Ka pui thei che asin, i bialnu hlui Grace-i bula lêt leh i duh chuan ka pui ang che. Keimah lam min ngaihtuah suh, nupa tak tak pawh kan ni chuang hleinem" a thusawi chuan min ṭhawng chiang kher mai. 

"Sawi tawh lo vang, i rilru a kal dik lo tlat. Zanin avang khan ngaihdam ka dil e, a thleng nawn tawh lo vang" tih leh inthlak ka rual a, a sawi zawm tawh lo va, mut hnu thleng chuan a tua mah kan ṭawng tawh lo hrim hrim. 

Ni hnih a liam a, Grace-i pawh a zia chho tial tial a, mahse duh aiin a ngampa sâwt hle thung. Min kuah hi chuan ka hrethiam a, min fawh a tum leh zel erawh ka dang tlat ṭhin. Ka ngaihvenin hmelṭha ka la ti ngei e, ka pha lo, mahse nupui nei lai ka ni tawh a, uirena lam hawi zawng emaw ngaihzawng neih lam ka rilruah pakhat mah a lang lo va, Hminghlui ka ngaihtuah vang a ni pakhat. Ṭum khat office ka bâng Grace-i te ina ka pêng chu Hminghlui a lo ṭhu ve hlawl a, Grace-i nen chuan innêl hmel tak hian an inbia a, hamhaih tak ka ni. A kal chhan ka zawh lahin

"Puih che ka duh alawm, i hmangaih tih ka hria, ka pasal hian a hmangaih ngei nupuiah a nei zawk tur a ni" a ti tlat reuh a, a nui hmel phena a rilru nâ hmel te chu ka hmu hmaih der si lo. 

A piancham kan lawm dawn zana ka awm dan avang khan a zia a dang tawlh tawlh a, Grace-i nen kan inkawp theih nân ṭan a khawh char char a, vawi khat phei chu ka vin hrep nghe nghe. Ka ning alawm, a hmeichhia zawkin ngaihzawng neih tir phet min tum a, a rinhlelh theih turin ka awm tih ka hria, mahse nupui nei tawh ka ni a, pakhat chiah neih ka tum bawk; nupui ṭhena nupui dang neih leh lam ni lovin. Dik tak chuan Grace-i chu ka hmu danglam tulh tulh a, Hminghlui'n nupa kan nih theih nân ṭan a khawh char char vang a ni maithei.

Zan khat chu insût feih feih thawmah ka harh a, Hminghlui ngei a lo ni e. Bathroom-ah leh nghal, kawngka hawng tura ka tih rualin a ṭap tawp hmak a, ṭap lo ang deuhin a rawn chhuak a, mahse min bum lo chiang lutuk. A kal thui hma chuan ka kuah bet thut a, ka tum em em pawh a ni lo. Chutah ka thinphu chu a la rang em em zui, ka taksa awm dan chu ka hrethiam lo tak zet. Ka âwmah beiin a insut feih feih a, a ṭap muhil ta nge nge. A hun tawn mêk leh a laka ka awm dan chu ka ngaihtuah rauh rauh a, khawngaih thlak tak a ni. Chu zan la lâ chuan Grace-i hmu tawh lo turin rilru ka siam fel a, nupui nei lai ka ni a, kohhran mipui tam tak hmaa thu ka tiampui chu ṭhen tumna reng ka nei lo.

Nitin mai chuan ka danglam tial tial a, Grace-i paw'n mak a ti ṭan ta. Kan office thleng thlenga mi rawn kal chilh a uar a, a bul  chu keimah vek a ni. Office-a lo kal tawh lo tur chuan mawihnai takin ka hrilh ngei alawm, awmzia a awm lo hle. A hmel te, a vun leh a pian te chu a mawiin a la ṭha reng, mahse hmâna ka hriat ṭhin Grace-i kha a ni tawh lo. Duh aiin a nasa mah mah tawh, zah a hre lo sâwt si, a chang phei chuan min tizak lek lek ṭhin. Zû hial a in ṭhin a, vawi eng zah chiah nge in lo turin ka hrilh tawh ang, ka zilhna chuan awmzia pakhat mah a nei lo a ni ber e.

Zan khat chu zanriah ei kham aṭang Hminghlui hmel ka hmu ta reng reng lo mai a, ka va han mangang ru mai mai tak. Ka ko ṭhin, chhanna pakhat mah ka dawng si lo. Ka call a, phone lah chu room-ah a dah daih bawk si. A thawmhnaw inkhaina ka en a, engkim a la awm kim ṭhap a, a lo kal bo daih ang tih ka hlau a ni. Ka chhungte zawt chuang lovin ka zawng mawl tawp a, hmuh a va har si ém. Ka chhungte hmuh hlau ru zetin in kawtah ka kal kual a, dak paha thawk ka la chiah chu in chunga Hminghlui lo ṭhu ngawi reng ka han hmu ta. Ka hlauthawng bawk nen

"Hminghlu!" ka ti ṭhawt a, zuan thlak a tum ni berin ka hria.

 

Hmanhmawh takin inah ka lut a, in chung ber chhohna step-ah chuan chak zetin ka tlan chho va, a ding emaw ka tih kha a lo ṭhu zawk a, a ṭhutna aṭang chuan ka pawt thla chiang hle. A dara hmer vak pahin

"I mawl em ni? Min tihhlauhthawnzia hi i hria em?" ka ti vin ṭhawt thawt a, ka thing titih bawk a, chutah ka huat tur tâwk chiahin a mittui a la tling pam zui. 

"Ṭah tum ringawt zel suh LALHMINGHLU! Chhuk nghal ang, vawi khat mah in chungah hian chho tawh suh ang che" ka ti khauh hmuk a, a rawn ṭap chhuak ta nge nge. 

"Ṭap lo teh Hminghlu, a hun lo êm mai. Ka hlauthawng alawm, i zuang thla dawn emaw ka ti a, ka hlauthawng tak zet bawk" ka ti ve leh tawp a, a rawn ṭap uar sauh thung. 

"Engati nge in chung ber kherah hian i chhoh reng reng?" aw dam deuh zawk chuan ka ti a, insût feih feih chung hian

"Ka nu leh pa ka ngai" a rawn ti tham ṭiak a, a aw chu a ṭial lam lek lek hi a ni a, ka âwmah ka kuah bet tawp ringawt.

Kan nupa room-a kan luh hnuah erawh pangngai takin a awm a, ngaihdam min dil bawk a, Grace-i nen kan chanchin min zawt daih a, a awm dan chu ka mak tih a tling leh ta. Kan inkar a ṭhat loh thu leh nupui pakhat chiah neih reng ka tum thu ka sawi lai chuan min melh chho rál a, a hmel lah chu ka hmu ṭha viau leh nghal. A inbual tur thu sawiin bathroom-ah a luh zawm zat a, kei erawh bathroom kawngka nghengin ka ding ngawi reng a, Hminghlui chu ka ngaina ṭan tawhin ka hria. Ni e, a dik ang, a rilru nât ka hlau a, Grace-i nen kan awm dun lai paw'n ka ngaihtuahna aṭangin ka paih chhuak thei lo ṭhin a nih kha! 

Tui taka muhil thaw ri sék sek ka nupui chu ka thlir ngawt ngawt a, eng vanga hmu hmelṭha zual em em nge ka nih ka hre lo. A hmai tái têk te, a vun man hán te chuan min hip ru tlat a, a meng thut ang tih ka hlau hle bawk. A lamah tih harh hlau zetin ka tawlh hnai riai riai a, ka hmuia a chal ka si chiah chu ka danglam vek thei maw le. A chalah chuan ka fawp nawn leh a, a ngaite bawkin ka thinphu a rang em em a, ka mur deih ûaih a, mak tak a ni. Ka rin phak bakin a mak, ka hmeichhe fawh tawhah chuan ka thinphu la tirang bertu a ni ngei ang, chutah a chal chauh ka la fawp zui. 

Nitin chuan kan hun hman dan a pangngai chho leh ṭan tawh a, ka pa nen pawh kan inkar a chhe lutuk hran tawh lo. A duh hunah min bia a, keiin ka duh hunah ka be bawk a, a hma chu la pha zân lo mah ila kan ṭha sâwt viau e. Hminghlui pawh hmeichhe hlim thei tak a ni leh tawh a, a ṭawng siam siam zel a, ka nupui chu ka ngainain ka duh thar em em tawh bawk. A hriat erawh ka hlau hle thung a, tlawm thlak ka ti deuh tlat a nih chu! A muthilh laia a chal ka fawp tih loh chu a ngaihbel theih zawngin ka awm lo leh ta char char a, kuah tak ngial pawh ka kuah leh tawh lo.

"Phone hmanga inbiak ka duh lo a ni lo'm ni?" Phone call ka pick up rualin ka ti khauh hmuk a, Grace-i chuan vawi engzat fakau nge a rawn call tawh ka hre seng lo, ka la duh lo zel a, a tawpah erawh ka la ta nge nge. 

"Inhmu lawk ang, nichin mai khan Hminghlui nen kan inhmu a, thil hrilh tur che ka nei" ka nupui hming a sawi tel vang nge ni ka awm dan a danglam nghal a, a awmna hmun a sawi a, chet chhuah ka rual nghal bawk.

"Lo kal rawh" an in luaha ka luh chuan a lo ti a, hahdam hmel deuh hi a pu a, thingpuite a siam khawmuang a, ka dawhtheihnain a tlin lo ṭep tawh. 

"Hminghlui nen chuan eng nge in sawi?" pangngai thei ang berin ka ti sup a, nui var var hian ka bulah a rawn ṭhu a, zû rim a la nam hak zui. 

"Kan pahniha kan awm dun theih tawh thu maw le, thu lawmawm tak a ni. Hminghlui hi ka rin ang a ni lo, hmeichhe fel a nih bakah a ngainatawm ka ti" tia a ṭawng mawlh mawlh lai chuan

"Eng nge i sawi awmzia?" tiin ka lo pawt chat a, chik zetin a hmel ka en a, ani pawh a bangbo hmel ang reng. 

"In inṭhen a ni lo'm ni? In inṭhen thu a sawi vek alawm, dawt a sawi ka ring lo" a tih chuan

"A teuh lo mai, kan inṭhen reng reng hleinem" ka ti nghal hmuk a, che phutin in aṭang chuan ka chhuak thuai a, in lam pana ka tlan lai te chuan khalh chak tak ka ni. 

In ka va thlen chuan pawn lamah a lo inkalh a, chahbi dah ṭhinna chu keuin ka hawng sawk sawk a, kan nupa room-ah ka lut hmasa ber a, a thawmhnaw erawh a ngai ngaiin a lo la awm a, mahse khuma lehkha inthlep chuan ka mit a la ta zar mai.

"I nupui ka ni thei hrim hrim hi ka lawm a, rei tak a ni lo tih pawh ka hria, mahse ka lawm em em tho. Kum 2 chhung teh meuh hahdamna hun ka nei ve a, ka lawm e u Jimmy" tih hi a lo inziak a, kan inneih zungbun ngei mai chu a hnut chhiah bawk a, chet nachang pawh ka hre lo. 

Harh chhuak thutin a patea te in lamah ka tlan chhuak nghal a, ka va thlen chuan Hminghlui hmel reng ka hmu hauh lo mai. A awmna ka zawt a, kei aiin thil thlen dan an hrethiam lo zawk a, a awm loh thut thu ka sawi chuan ngaihsam hmel fê hian an khuaa a haw an rin thu an sawi a, an khua chu ka hre leh ta chuang lo. Ka va han ṭawp mai mai tak, ka nupui pian leh murna khua dik tak pawh ka hre lo a nia, mahse dem ringawt theih ka ni bik lo. Kan inneih nîah leh a dawnah pawh a patea te kaltlang vekin alawm kan inneih, ka tan chuan hriat ngawt kha thil har tak a ni ve tho. 

An khaw awmna leh a kawng ka zawt a, min hrilh ṭha ve mai a, ka chhuahsan rang khawp mai. An khaw lama kal nghal mai chu ka tum deuh ûk a, mahse ka ṭhulh leh ta zawk. A chhan chu thlamuang takin awm rih phawt se ka duh, ka bul zawng a thlamuan thlak loh ém mai. Pasal ka nih angin ka tihtur ka hlen viau emaw ka lo inti ṭhin a, ka hlen lohzia ka hre chhuak ta zut zut mai. Inah ka haw a, ka pa a lo haw hmasa ber a, Hminghlui an khuaa a haw thu ka sawi chiah chu min beng ri sawk a, thinrim tak a ni. 

"Ka hlauh ruk ang ngeiin i mawl man i hmu ta, i ngaihzawng hlui erawh kan in chhungah hian lo hruai luh tum hlek suh" a tih chuan

"Ka pa!" ka ti vak a, Hminghlui haw thu hre chauh mah ila Grace-i a huat em em chhan chu ka hriat a hun tawh tak zet. 

"I pa hi min vin lêt ngam a maw!?" tiin min rawn hnek a, ka inring hman lo bawk nen ka pai deuh chhawn chhawn a, ka tluk hmain amah zawkin ka kawr âwmah a rawn ṭham leh nghal chat. 

"Khati ang hmeichhia, i fa titla duhtu kha ka pawm ring ngai suh. Hminghlui ka neih tir chhan che pawh hi hmeichhe fel tak a ni tih ka hriat vang a ni a, mahse nang chuan thil i tipawi zo ta a ni. I harh chhuah tlai luatah i inchhir ngei ang, i inchhir ngei dawn" a ṭawng zawh rualin min hnek leh a, ka ṭhu ta hnawk.

"I ngaihzawng hluiin i fa a titla tih kha sawi chhuah ka hreh ve tho, pangngai taka i nuna Hminghlui nen nupa inhmangaih tak in nih mai ka ring a, mahse ka ring sual che, ka ring leh tawh mai mai lo bawk ang che. Ka ṭhian pakhat doctor hnen aṭangin i ngaihzawng hlui chanchin ka hria a, a duh thu ngeiin i fa a titla tih ka hriatna phei chu a rei tawh" ka pa chu en lovin ka tho a, Grace-i te in luah awmna lam panin ka chhuak ta nal nal.

Ka va thlen chuan thawm dim bak sak lo hian zawhna ka zawt a, hun kal tawha a chet dan zawng zawng chu ka zawt a, ka vin hrawk hrawk a, ṭap pur chungin ka pa thusawi zawng zawng chu a dik vek thu a sawi a nih chu! Ka rilru a nâ a, mahse a nât chhan ber erawh Grace-i leh nautê tih tlâk lam a ni tawh lo, Hminghlui vang zawk a ni. Kan in chhung ka luh rualin ka nu leh Lucy-i hauh rawn ka tâwk nghal a, ka pa'n a lo hrilh tawh a ni ngei ang. Ka nute chu engtin mah ka chhang lo va, Lucy-i phei chuan min beng nghe nghe.

A tuk khua a rawn vâr a, Hminghluite khaw lama kal lovin Office ka kal daih a, ka ni hman chu nuam lo tak a ni. Ka ngaihtuahnaah Hminghlui char char a awm a, office ka bâng kan nupa room-a ka lut te chu ka ngai tak zet. A awm lai kha chuan ka inbualna tur a lo siam sa thlap zel a, khumah ka thawmhnaw hak tur a lo thlep fel diam ṭhin bawk a, a awm lo chiah zawng room chhung chu a ruak huai thei. Zanah chuan muhil lovin zing thleng ka tlaivar ta zak a, ka mitthlaah Hminghlui hmel hlir a lang a, tu dang dem lovin keimah leh keimah chu ka indem ta ber.

Duh leh Grace-i chu lo lang leh ang hmiang, engati nge ka lo va hnaih leh kher ni! Nupui ka nei tawh ti reng siin ka nupui chu hmeichhe dang ka pansan tlat lawi a, ka nep tak zet, mipa nep tak ka ni. Ni thum a ral a, Hminghlui chu ka ngai zual tulh tulh a, a tel lova awm harsa ka ti thlawt a ni. A tirhah kha chuan thla khat vel awm bo lawk se ka hruai leh mai ang kha ka ti a, mahse a teuh lo, a tel lo chuan kâr khat pawh ka awm thei lo maithei zawk a ni. A phone te, a thawmhnaw zawng zawng chu a hnut chhiah vek a, a rilru ka tinâ tawngkhawng tawh a ni mahna.

Harsa ti takin kâr khat chu ka tlingtla thei hram a, kâr thar tirah erawh an khaw lam panin ka tlan a, hruai haw ka tum bur bawk. An khua chu a hla ang reng a, Champhai a thleng ṭep a, motor khalh nân hun ka hmang rei hle. Khaw tawn tirha mite chu Hminghluite in awmna ka zawt a, ṭha takin min hrilh a, min hrilhna lamah ka tlan zel a, mi ṭhenkhat chuan min en duh viau bawk. An ṭhenawmte in kawt zawl zau laiah chuan ka ding a, motor aṭangin ka chhuk nghal a, an in ka luh dawn lai mêk chuan ka piah lawkah Hminghlui ngei chu ka hmu ta. Paikawng emaw ni hian changel a lo phur a, min hmu chiah chu inher rang tak a ni. 

"Hminghlu" ka ti hman ṭawk ang tihah thil phur chung chuan a tlan nal nal a, ka um thuai a, a tlan thui tak tak hmain ka man bet hman bawk. 

"LALHMINGHLU! Thatchhenu, vawk chaw tur mai mai pawh ka kal chakpui peih lo ve tiin mipa i lo chhai vel a maw!?" mi pakhat hian a rawn ti vin fiah fak a, ka awm lai rengin Hminghlui samah a rawn kek a nih chu!

"U Ram, i ngaih ang kha a ni lo" Hminghlui chuan a ti lawm lâwm a, ka nupui; ka ngaiha ka thlakhlelh em em kek mêk tu mipa chu ka hnek thlu tawp a, leia a mut zangthal hnuah pawh ka khawih zawm mawlh mawlh a, ka that thei mai dawnin ka hria.

"U Jimmy!" Hminghlui hlauthawng aw hre lo ngat ila zawng thinrim luatah ka that thei tak tak ang ka ring. 

"Haw ang, min hnial tum hlek suh!" ti khuah hmukin ka kai dâwr dawr a, motor awmna kan thlen chuan nu pakhat hian

"LALHMINGHLU, khawiah nge i kal dawn? Kan hriat loh bawkin pasal i um leh dawn em ni? A pawi lo ve, kal rawh, kal bo vang vang rawh, kan chawm reng peih lo che" a rawn ti zawt zawt a, ka thin a sa leh ta phat. 

"I ṭawng tam palh ang e ka pi, mipa ni la chuan ka kut i tuar tawh ngei ang" ti vin hrawkin ka ṭawngkhum a, kei aiin upa mah se ka zah buai chhe tê tawh lo.

Hminghlui chu motor-ah ka nawr lut a, khua kan tlan pel fel chiah tihah a rawn ṭap chhuak ta feih feih mai. A ṭah ṭahin ka ṭah tir tawp a, thlem dan tur pawh ka thiam lo. Ka thinrim laklawh bawk nen ka khalh chak hle a, ṭap lo se chu a hlau khawp ang. An khua aṭanga hla fê kan tlan hnu chuan ka ding a, ani chu ṭap tawh lovin a en ngai a en tlawk tlawk a, biak ka tum deuh a, mahse biak rih loh law law chu a fuh zawkin ka hria. Kawng tluanin kan inbe lo va, kan in kan thlen chuan zan dar 11 a ri tawh a, ka nute chu an lo la meng ṭhap a, an biakna erawh Hminghlui chuan pakhatmah a chhang lo thung. 

"Mu ang aw" aw dam zeta ka tih chuan mittui tling pam hian min en a, a hmui a pet fan fan a, a ṭah chhuak hmel chu ka en rei thei lo chiang khawp mai.

"I duh tawkin i ṭap thei e, ṭap bawrh bawrh rawh, ka lo mawl êm a ni ti raw?" a bianga mittui luang ngiai ngiai te chu ka hruk sak a, ṭah chhuak aw zet hian

"U Jimmy" a rawn ti ṭiau a, ka âwmah a hmai nawr tawkin a ṭap ri hawm hawm zui nghal a, ka nâ ve vekin ka hria. 

"I u Jimmy-a, i pasal ngei kha ka ni e, min ngaidam lûl teh Hminghlu" tiin a hnung chu ka chul hliau hliau a, nghet zetin min kuah a, a ṭap duh tawk har hle bawk. 

"Le! Han sawi teh le! Engati nge min râwn hmasa lova i kal bo daih? Zanin hian sawi fel law law ila, ni dangah erawh kan sawi chhuak leh tawh tur a ni lo" dam zeta ka tih chuan ka biang a rawn chûl a, a mittui a hnâm leh ṭiam ṭiam tawh a, mahse ṭap turin ka duh tawh rih lo.

"Ka vanduai bik êm mai u Jimmy, thih daih ka duh" thawp raiha a tih chuan a biang tawn tawnah ka chelh a, a mittui chu a rawn luang leh ta nge nge. 

"Ka hrethiam e, Grace-i nena kan awm dun i duh vang tih ka hria alawm, i kâ aṭang ngei hriat ka duh a, mahse sawi leh lo zawk mai rawh, a pawi lo" ti supin a chalah ka fawp vang vang a, engkim chu ka thiam loh vek a ni.

"In khuaa mite kha i chhungte dik tak an ni lo em ni?" kan ngawih dun vang vang hnu chuan ka ti a, zan pawh a rei tawh khawp mai. 

"Kum 10 ka nih lai aṭangin chhungte ka nei tawh hleinem, nupuia min neih hma zawng kha chu chhiahhlawh leh sal ang ka ni a, mahse kan inneih hnuah erawh ka nun chu vanram ang a ni thung a, ka hlim reng dawn emaw ka tih laiin ka hlim reng si lo. Mi zawng zawng hmuhsit, mi zawng zawng en hniam leh tiduhdah rawn tan chuan i nupui nih kha hahdam thlak ka ti em em a, min hmangaih miah lo tih hre mah ila pawi tihna ka nei lo. Amaherawhchu kei ve mai hian ka ngaina che a, bâ thleng nâna an hman hmeichhia ve mai hian ka duh che a, ka hmangaih bawk che a, a pawi zo ta a ni. Hmeichhe dang i hmuhin ka thik lo thei si lo, a tawpah chuan thu tlukna ka siam a, hrehawm tuar tur bawkin ka chhungte dik tak pawh ni lo bulah ka lêt leh a, ka duhthusam awm chhun chu thih daiha ka nu leh pate bula kal a ni tawh mai. Kei ang hi an awm ve ang em le u Jimmy, an awm ve chuan thih daih an châk ve tho ang ka ring" a mittui chu a baw zawih zawih a, a ṭap ri miah lo thung.

"Ka tiam a che, i rilru tinâ zawngin ka awm leh tawh ngai lo ang a, i hlimna tur hlirin ka awm tawh thung ang" khawngaih aw zeta ka tih chuan

"Ka ring thei che ang em u Jimmy? A hma khan i thutiamah i ding tawh bawk si lo va, i thutiama i din dawn loh chuan rin che ka duh tawh lo" a rawn ti sep a, a piancham kan lawm dawn zan kha a sawi chhan tih ka hria, ka va han zak ru ngawih ngawih tak!

"Min ring rawh, min ring thei ang. A hma kha chuan pasal nep tak, a ngaihzawng hlui vanga buai ṭhin leh a nupui pawh ngaihsak ṭha hman lo ka ni tih chu phat rual a ni lo, mahse tunah chuan a nupui hmangaih em emtu, kawng engkima a nupui dah pawimawh hmasa ber tu Jimmy-a ka ni tawh" ka sawi zawh rualin a rawn ṭap chhuak hak a, mittui tling pama min en chung hian

"Ka awih lo u Jimmy, kei ve mai hi min hmangaih ka ring lo" a ti khur dar dar a, a vawi khatna atan a hmuiah ka fawp vawng vawng a, nuam danglam tak a ni. 

"Ka hmangaih che Hminghlu, ka hmangaih lutuk che. A tirah kha chuan ka khawngaih ngei che a, mahse khawngaihna chu hmangaihnaah a inthlak ta a ni" dam dapa ka tih chuan min kuah leh thuai a, lungchhe takin a ṭap feih feih bawk. 

A tuk zingah chuan ka thawh hmain min thawh khalh a, ka thawh tirhah a hmel ka hmu lo bawk nen ka va hna hlauthawng mai mai tak. Ka chhungte chu a mal tê têin ngaihdam a dil vek a, a tawpah keimah min dil bawk a, ka hmangaih lutuk chu ka fawp ngawng ngawng ringawt. Chumi nî aṭang chuan duat namen lovin ka duat a, office kal ṭhin mah ila phone-in ka be awl lo va, ka nupui chu ka ngaiin ka hmangaih ém a tin ni! Grace-i pawh a reh ta hmak a, Delhi lamah a chhuk leh daih nghe nghein ka hria.

Ka nupui nen nupa nun kan hman hmasak ber zan chu a awihawm loh letling zawk, ka zauthau em em a, ka nupui chu ka mamawh ngawih ngawih a, amahah chuan ka duh engkim a awm vek ti ila a sual lo vang. Kan sosâng dun em em a, inhmangaih tawn takin nupa nun kan hmang a, chu chuan kan inhmangaihna leh nupa kan nihna a nemnghet zualin ka hria. Office ka bâng ina ka haw te hi ka zawng nghal ruai zel a, ka awm dan chu ka thunun theih piah lam thil daih a ni. Awm hrang hlek ila ka ngai nghal em em zel a, thup tumna pawh ka nei chuang lo. Ka tilang hmiah hmiah a, hmangaih neih zawng a nuam ém alawm, ka pa phei chuan min nuih tawp ringawt.

Kâr tawp a ni a, ka nupui nen chuan Sialsuk tlang lama leng turin kan inkhalh chhuak a, phul mawi lai tak a ni a, ka nupui chuan nuam a ti leh khawp ang. A hmun kan thleng a, chawhnu lama thleng kan ni bawk a, phul chu a mawi zualin ka hria. Pipuah te chuan kan uai dun a, a naupangchhiatna te chu hmangaihna avangin ka láwm zawng a ni vek tawh a, patling pui e ti lo chuan kei pawh ka uai ve lawp lawp a, a nuam phian leh nghal. Kan inbuk leh a, min va han khan lo mai mai tak. A tawpah erawh inkuah rialin kan ṭhu dun a, ka awm a ngheng a, keiin a hnung lam aṭang ka kuah thung a, a nuam chiang a ni. Tlai dar 4 leh a chanve velah in kan thleng a, zan riah pawh kan ei har lo. Kan ei ṭan chiah tihah Lucy-i chuan

"Hmuh tawh la Hminghlu" a ti a, ka nupui leh Lucy-i tih loh chu kan bo hû mai. 

"Nia, ka'n hmuh tawh mai ang che u. Ka nu ka pa, ka rai a, u Jimmy, ka pum chhungah hian kan fa tur a awm mêk" tiin Hminghlui chuan Pregnancy Test Kit a rawn phawrh a, ka pa'n a endik hmasak ber a, a nui nghal vur vur. 

"Dawt i sawi em? Engati nge kan pahniha kan chhuah dun lai khan min hrilh loh?" ka tih chuan

"Kal lamah kha chuan ka hre ve reng, mahse a hmun kan thleng a, ka theihnghilh daih alawm" a rawn ti niah niah a, a chalah nâ vak lova namin

"Haihawt reuh lutuk" ka ti a, a nui sen sen a, ka insum thei leh ta pek lo, a biangah ka fawp zeuh a, a zak hmel te chu a ṭha hliah hliah.

"Awi awm ṭha teh u, khatia va tih kher kha a ngai lo Jimmy" Lucy-i chu a lo âng nghal hlak hlak a, chaw ei lai chuan kan nui deuh reng a, kan hlim hlawm êm bawk a ni.

Ṭawng siam siam paha chaw a ei lai chu ka en leh zauh ṭhin a, a hmelṭha thlawt a ni. Chaw kan ei kham a, sitting room-ah TV kan en ṭhap a, Hminghlui chu ka kuah run a, kan inlen hleih bawk a, ka taksa chhungah kuah luh vek mai ka duh. Ka bula awm chu vanram ang maiin a ngai kha a ni a, ka phu lo tak zet a ni. A nun hmasa lam lo hrehawm dan turzia ka ngaihtuah chhuah phei chuan ka khawngaih ngawih ngawih, hmeichhe dang ka pasan ṭhin tih hre reng chung khan ka bula awm a hahdam thlak a la ti hram a, ka indem leh ṭhin. Ka thinlung leh tih tak zetin ka hmangaih a, ka ngaihzawng hmasa ber ni lo mah se ka hmeichhe hmangaih hmasa ber leh tawp ber a ni thung ang, a chhan chu ka hmangaih em em ka nupui a ni tlat.