𝐓𝐇𝐀𝐌 𝐑𝐀𝐋 𝐋𝐎 𝐇𝐌𝐀𝐍𝐆𝐀𝐈𝐇𝐍𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐏𝐚𝐫𝐭 𝐈𝐈𝐈)

THÂM RAL LO HMANGAIHNA 

By

Havali Adam

Part III

Motor-a kan chuan luh hnu chuan dawr lam ka hawi phei a, Muankimi chuan min lo en reng a, dawr khar pawh a kutah ka dah ta tawp mai. High School tlâng lamah kan tlan chho zel a, kum 15 liam taa kan ṭhut dun ṭhinna ngei bulah chuan kan ding ta. Motor aṭanga a chhuah hnu rei lovah min kai chhuak nghal a, hmanhmawh lo ang takin lang mah se a hmanhmawh ru phian tho. Phula kan ṭhut hnu chuan kan ngawi dun vang vang phawt a, kei phei chu a ṭawng hmasa te a nih ngawt loh chuan sawi tur ka hre lo hrim hrim. Ka kut chu a la vuan reng a, a kut lum nuam tak te chu hmân ang chiah chiah vek kha a la ni.

"Min ngaidam thei ang em Rp? Engmah hre chiang lova nupui ka neihsan leh si che avang hian min ngaidam thei ang em?" chu zawhna chu a thusawi hmasa ber a ni a, chhang lovin ka ngawi deuh rén ràwn a, chhan loh tawp erawh a dikin ka hre chuang lo. 

"Ngaidam thei tehreng e, ka ngaidam daih tawh zawk che alawm, inthiam lo lutuk duh suh, thil thlen dan leh awm dan hi kan pawm thiam a ngai a ni mai" ka tih chuan ka kut chu a la káng a, a fawp vawng vawng a, ka mur deuh ûaih uaih avangin ka phu zuk nghe nghe.

"Ka khawngaih tak zet che, keimah vang vek a ni" a awah chuan inthiam lohna leh inchhirna hlir a khat a, min en reng tih ka hria, kei erawh kan hma zawn lam thlirin ka en ngai ka en ngawt ngawt thung. 

"Ka ngai em em bawk che" a rawn ti leh chiah chu ka chhoh melh thuai a, lungngaih hmel fê hian min lo en tlawk tlawk a, kan awm dan leh kan thusawi chu a dik lo chho tial tial tih ka hria, mahse ka hmangaih mitmeng leh thusawi chuan ka thinlung chhungril a dek pha tlat si.

"Zanin chiah inhmu tawh ang aw Johan, i sawi tur zawng zawng sawi vek la, i inthiam lo a nih paw'n i inthiam lohna te chu phawrh chhuak la, keini pahnih hi zawng khuanu samsuih kan ni ve lo tih kan hriatthiam a ngai tawh zawk a ni" awkâ dam raih chuan ka ti a, a âwmah min kuah bet tawp ringawt. 

"Dawra ka hmuh tirh che khan ka thin a rim asin, pasal min neihsan ang char charah ka ngai che a, ka nupui kha intihtheih nân hman khum che ka tum bawk a, mahse i nâ hmel leh i hrilhhai hmel khan chawp leh chilhin min tidanglam thung si" tiin ka hnung chu a chul hliau hliau a, ka mittui bawk chu chhuah a rawn tum leh ta.

"Kum tam inhmu tawh lovin nupui neihsan tawh che mah ila ka thinlungah hian thih nî i nei ngai lo, âw ka lo va'n mawl tak êm, engati nge ka thinrim avang mai khan nupui neih te kha ka lo duh thawt thawt ni!" amah leh amah chu a indem mawlh mawlh a, ka mit ka khap rualin ka mittui chu a baw ta zawih. 

"Kum 15 lâi ka nupui ni ta Rebec-i hi ka hmangaih lo Rp, remchanna avanga innei mai chauh kan ni; chu pawh ka nu leh pa thuin. Ka hmangaih chu, ka hmeichhe hmangaih dik tak chu" a ṭawng laklawh laiin ka awm sawn thuai a, a thusawi tur chu sawi chhunzawm turin ka duh lo a ni ber. 

"Duh tâwk ang, sawi tawh suh Johan, sawi chhunzawm tawh suh. Rilru i tinâ thar mai mai, engmah awmzia a awm tawh lo" ka ti mawlh mawlh a, ka mittui chu ka hru tawk a, kan ṭhutna aṭanga thawh ka tum chu min pawt ṭhu chiang hle. 

"Nang hi ka hmeichhe hmangaih awm chhun i ni Rp, hman aṭanga tun thlengin; i laka ka rilru puthmang hi a danglam thei lo a ni. Ka haw em em che a, mahse hmangaihna avangin ka haw rei thei lo che, ka haw phal lo che a, ka ngai em em ṭhin zawk che a ni" a tih chuan insum karna nei lêk lovin

"Sawi tawh suh RAMDINMAWI, sawi tawh lûl suh!" ka ti vin ṭhawt a, a kawr hnung ṭham tawn tawnin ka ṭap khur tlawk tlawk a, ani'n nghet zetin a âwmah min kuah bet ran bawk a, ka vanduai bik lutuk chu hrehawm ka ti ngawih ngawih. 

Ka duh tâwka ka ṭah hnu chuan ka ngawi ta hle hle a, chu zan chauh chu kan inhmuh hmel tawh si tiin ka awm sawn nghal mai duh ta bik lo va, hmangaih berte ṭânga bei zawng a hahdam thlakin a nuam em a tin ni! A awm dan siam remin a hmui nêm leh lum vung vung chuan ka chalah a rawn fawp a, engati nge maw min tawh dan engkim chu hmân ang chiah kha a nih vek mai le? A âwm aṭang chuan min nam hla deuh hret a, a hmel chu chiang takin ka en a, a va'n hmelṭha chiang êm, ka thinlung zawng zawnga ka hmangaih em em Johan-a dik tak kha a la ni reng. 

"Ka tihpalh tak zet Rp, mahse ka la hmangaih reng che asin" tiin ka hmuiah chuan a rawn fawp ta, a mi fawhna dawnsawn nuam lutuk avang chuan awihawm loh khawpa nasain ka mur chhuak vek a, a mal chunga min ṭhut tir lai te chu ka hre ruai ruai a, mumal taka thil hriat engmah ka nei lo a ni ber.

Ka awmna hmun chu a nuam em em ringawt a, khawi lai hmun nge a nih tih lah ka hre thei bawk si lo, ka mumang ni mai te'n ka hre leh a, mahse engkim chu a tak tak a ni vek bawk si. Ka hmui mai ni lo ka biang leh ka ir bawr fawp kual mial mialtu chu Johan-a a ni tih chiang takin ka hria a, amah chauh chu ka thil hriat theih awm chhun a ni. Ka hmui a rawn sik apiang chuan ka thiam ang tâwkin ka lo chhang lêt ve tawn tawn a, khawizu thlum tui tak ang mai a ni. Thawm dang rawn awm chuan min tiharh zawk a, ka harhfim tâkah chuan phone ring thawm ka hre zawm zat a, kan awm dan chu ka ngaihtuah lêt a, ka va han zahpui awm mai mai tak êm.

"Eng nge?" Johan-a aw chu a bul hmuk a, rawn phone tu erawh tu dang ni lovin a nupui Rebec-i ngei a lo ni a, mahni insit zetin ka ding thuai a, mi pasal ka lo fawp te chu ka indem rilru mawlh mawlh bawk.

"Ka buai rih, office-ah ka riak dawn a, zanin ka lo haw lo ang" tiin Johan-a chuan phone chu a hmet tawp zui nghal a, mak ti zetin ka lo en hâw a, awlsam taka a nupui dawt a hrilh thei chu mak ka ti, mak ka ti tak zet. 

"Lo hnai teh Rp" tia min rawn ban a tum chuan ka tawlh hla tial tial thung a, Johan-a chu hmâna Johan-a, ka mipa hmangaih kha ni pawhin ka hre tawh lo, ka awm dan chuan a ṭhawng a ni mahna, mak tih hmel deuhin min en ta ringawt. 

"Engtin nge i theih záwk? Engtin nge i nupui kha hniak phawi miah lovin dawt muhlum i hrilh theih zawk?" aw khur dat dat chuan ka ti a, a ṭhutna aṭanga dingin min hma chhawn a, min rawn pan hnaih a tum chuan ka la tawlh hnung zel tho.

"I hrethiam lo a nih hmel Rp, ka nupui hi ka hmangaih lo. Tun hnaiah phei hi chuan inpawh lo zual tak kan ni, a chhan erawh ka sawi rih lo ang" tih leh ka bana rawn man thut chu a rual nghal a, tum viau mah ila ka awm sawn hman lo nasa hle. 

"Keini pahnih hi chu a rem tawh lo ka tih khâ Johan, tun maia kan awm dan avang khan ngaihdam ka dil e. A thleng leh tawh lo ang, i nupui lakah pawh ka inthlahrung khawp mai" ka tih chuan a lamah min pawt hnai a, kan inen chiang leh ta viau. 

"A nih engtin nge nang i awm ang? Min hmangaih avangin min lo nghak char char a, mahse bumna avangin ka phatsan ta si che a, dawra kut ka thlak pa nen khan in inngaizawng dawn tihna em ni?" a zawhna avang chuan ka ngawi reng a, chhan dan tur ka hre rih mai lo. 

"Sawi teh Rp, i duh ang chuan awm ta ila, nang hmu tawh miah lo che hian reh leh ta vang vang ila engtin nge i awm ang? Kei min hmangaih reng chu siin pasal i nei ve mai dawn em ni? Ni lo, chuti ang ti miah suh, a tawpah inchhirna bak i hmu lo ang" a tih nghet charh charh chuan ka hawi sawn a, ka ngaihtuahna ka sêng zui nghal bawk.

"Kei maw!?" ti sepin arsi dê sep sep leh a bula thla êng tak chu ka thlir dauh dauh a, hun kal tawh lam ni lovin ka hma hun lam zawk chu ka ngaihtuah a, ngaihtuah thui a va har si êm. 

"Pasal ka nei dawn hleinem Johan, heti hian ka lêng tar tawh mai ang. Ka pa leh ka nau ka enkawl ang a, chu chu ka dam chhan ber a ni tawh mai" ka tih zawm leh nghal zat a, a lam hawi zawngin min kuai her a, a mittui a lo tling a nih chu! 

"Min hmangaih a ni lo'm ni?" harsa tih hmel zet hian a thaw chhuak hawk zawm zat a, mittui nen phe ruaia a hmel en chhovin ka nui lui ver ver a, amah ka hmangaihzia lantir nân ka lu ka bu nghat nghat bawk. 

"Kan piang nawn leh te a ni ngawt loh chuan keini pahnih hi chu kan awm dun thei tawh dawn si lo va, a nih loh paw'n thih hnuah a ni tawh mai. Ka lo thi hmasa zawk a nih chuan ka lo nghak leh fan fán che ang a, nang i thi hmasa zawk a nih leh min lo nghak thung ang a, chu chu, chu chauh chu i laka ka beiseina awm chhun a ni tawh Johan" ka tih chuan

"A theih loh, chuti ang ringawtin thil a ni thei lo. Min hmangaih a, ka la hmangaih reng bawk che a, keini pahnih hi kan awm dun leh ngei tur a ni" a ti vin ṭhawt ṭhawt a, nghet zet hian min kuah thuai a, ka hnung chu a chûl ngun mawlh mawlh hle. 

"Kan awm dun thei tawh lo tih chu kan hre ve ve alawm Johan, keini chu engti kawng mahin awm dun thei kan ni tawh lo. I nupui chauh ngaihtuah la, i nupui mai ni lo in fate thlengin ngaihtuah rawh. Ni lo, keimah zawk hi ka dik lo a ni. Nupui i nei tawh tih hre reng chungin hmun fâlah ka awmpui che a, i lak aṭanga inthiarfihlim zel hi ka tih tur a ni" 

"Kan inhmangaih phawt chuan kan awm dun thei, kan thei chiang a ni. Nupui maw! Ka ṭhen mai ang, tuna ka nupui hi ka hmangaih lo, ka ngaina lo bawk, nang nena kan awm dun theihna tur a nih phawt chuan ka ṭhen mai ang, ka ṭhen hreh reng reng lo" a tih mawlh mawlh lai chuan a hmai a ri nghal sawk a, mahse ka benna chu nâ ti awm pawhin a awm lo hrim hrim. 

"Kum 15 chhung kan innei tawh, fa erawh kan la nei lo tluang zel a, Pathianin keini pahnih hi intawng leha awm dun kumkhua turin min duh a ni" rilru fim pu lo tih hriat zet hian a ṭawng leh phawlh phawlh a, ka insum thei leh ta bik lo. 

"I â zo ta em ni RAMDINMAWI!? Mi pasal i nih hi i hria em? Nangmah chiah inngaihtuah lovin i nupui chan tur dâwn thleng ve ta che, a rilru nât dan tur te ngaihtuah ta che, thil ngaihtuah kim vek ṭhin i ni lo'm ni?" ka ti vin phiar phiar a, chutah kei aia vin zawk mah hian

"Ka nupui hi ka hmangaih reng reng lo ka tih tawh khâ, ka hmangaih awm chhun chu nangmah chiah i ni, i ni kumkhua bawk ang. Hre reng rawh, eng pawh tih ngai dawn se nang nena kan awm dun theihna a nih phawt chuan ka ti khawp ang, ka ti chiang khawp ang" a rawn ti hrâwk a, a aw hlauhawm leh khauh lutuk chu ka kimkî chawih thei hial.

"Ka hmangaih che a, i ṭhiannu min bumna avanga nei thei lo mai che ka ni a, lo ngai tak rawh, ka nupui i la ni dawn khawp" amah bawk chuan a rawn tih zawm leh hmawk hmawk a, a hma ai chuan a awkâ vin lutuk pawh a zia ta deuh.

"Khawngaihin thil âtthlak ti miah suh Johan, ka ngen a che. I nupui chu i hmangaih lo a nih paw'n hmangaih tum la, hlim taka in awm dun theih nân ṭan la zawk rawh, kei paw'n ka lo ṭawngṭaipui ṭhin ang che u" beidawng aw zeta ka tih chuan mittui tling pamin min en a, a biangah a luang zui nghal a, a ṭap hmel ka vawi khat hmuhna a ni. 

"Khati ang thu kha vawi khat mah sawi tawh suh LALRINPUI, i sawi leh a nih chuan zanin la lâ hian ka nupui ni turin ka ru nghal ang che. I hria em!? Pathianin kawng min sut kian sak em em ang, min sut kian sak ang, ka hria a ni" a ṭawng tawp lam chu a zuai raih a, vân lam hawiin a mit a chhing vang vang a, hrehawm kan va ti dun tehreng êm.

Ka kutah rawn kaiin motor dinna lamah min kalpui a, nula senior ûaih tawh si chu tleirawl ṭahbelh tak ang maiin ka mittui ka hru zung zung a, eng dang vang a ni lo, hmangaihna vang bawk a ni. Kan veng lam pana kan tlan lai te chuan ka nui sak a, Johan-a chu ka en vang vang a, a lak ata ka mit chu a awm sawn thei thlawt lo. Tun thlengin min lo la hmangaih ve reng te chu ka lawm tak zet a, ka thinlung takin ka lawm a ni. Mi pasal, nupui nei tawh a ni tih hrilh nawn kher ka ngai lo, chuti chung pawh chuan ka la hmangaih em em si a, ani paw'n min hmangaih bawk a, daltu awm miah lova run hmun lên dun leh hlim dun chu ka châk ve ngawih ngawih. 

Kan in kawt kan thlen chuan dawr pawh a lo inkhar fel vek tawh a, rin ai takin zan chu a rei tawh fû bawk. Motor chhung aṭang chhuak ta mai lo chuan kan ṭhu ngawi dun vang vang a, ka chhuah nghal mai loh chhan chu ka kut a vawn tlat vang a ni pakhat. A ṭhut dan siam remin a âwmah min kuah bei a, mi pasal a ni tawh a ni tih hre reng chungin ka lo hnar thei leh miah loh a nih chu! Ka khabe chu chawi zeuhin min fawp vawng vawng a, zanin chauh kan inhmu tawh dawn tho alawm tiin keimah leh keimah chu ka inthiam chawp ta vel a, chu zan lungngaih thlak, hlimawm leh uiawm bawk si ah chuan ka hmangaih bula awm reng ka châk luatah tlaivar ṭhak pawh ka huam chiang khawp mai. 

Motor aṭanga ka chhuak tur chu phal lovin ngawi reng hian min chelh bet tlat a, kan in kawta kan din hnu aṭang vawi khat mah kan ṭawng leh tawh lo va, kan thinlung kan inhre chiang tawn bawk nen rilruin kan inbia a ni ber e. Hmangaih tak hian min fawp leh ṭhin a, kei paw'n awm mai mai lovin ka lo chhang lêt ve zel a, mahse thui erawh kan kal chuang lo. Ka indem a, zahpuiawm ka inti a, mi pasal nena tawm dun te chu thil tih chî ah ka ngai lo hrim hrim, mahse ka inthun thei ṭhin bawk si lo a ni. A chhan bulpui ber chu hmangaihna, hmangaihna vang vek, kan inhmuh leh a rem tawh lo tih hre reng chungin chu zan chu ka ui tak zet. 

Dar 1 rik dâwnah chuan a phal lo chung ka chhuak lui ta a, a ni em em tawh lo ve bawk alawm, min hmutu an lo awm palh tih ka hlau ru hle nghe nghe. In chunga chhoh ka tum tawh ka hawi lêt leh chu lungngaih hmel zet hian min en ngawt ngawt a, motor steering a bawh reng bawk a, nui lui sakin in chung lamah ka chho ta a, mahni intur chawpa ka chho lo a nih chuan ka ding tlaivar ṭhak thei mai ang. Ka ui ve tak zet asin, mahse ka hmangaih chu a liam a ngai tlat si a ni. Kawngka ka hawng chiah chu chair-ah ka pa a lo la ṭhu reng a, ka va han phu mai mai tak.

"La kal lo teh" tiin pindana luh nghal mai ka tum chu min ko ding a, kei pawh ngawi reng hian a ṭhutna bulah ka ṭhu phei ve leh mai bawk a, zep leh chuan tur a awm tawh lo bawk nen eng pawh min zawt se sawi tawp ka tum a ni. 

"Nupui nei tawh a ni tih i hria em?" a zawhna chu keimah ka inhriat chian tluk zêtin ka hre chiang a, ṭawngkâa chhang ta lo chuan ka buk khum nghat a, min en reng erawh nuam ka ti chiah lo thung. 

"A nih si chuan engati nge a zuam tura i awm si?" chhan nghal mai tumin âng zuau tawh mah ila ka ngawi vang vang ta zawk a, a sawi dik chiahin ka hria, Johan-a tan chuan zuam turin ka awm chiang alawm, mahse kan inhmuh tawh loh ka rinna chuan ka rilru a tinuam deuh.

"Zanin chiah kan inhmu tawh dawn alawm, Azawl lamah a chhuk ang a, kei paw'n awm dan ka thiam chho ve tial tial mai ang" ti sepin ka ṭhutna aṭang chuan ka ding a, pindan lam ka pan lai chuan min ko ding ta lém lo va, mahse min en zui erawh ka ring tho. 

Mut hmunah ka mu meng leh ta kar a, kan in kawtah motor a ding tawh lo bawk nen Johan-a chu a haw thlak ka ring ve tawp. Tluang taka Aizawl a thlen theih nân te ka ṭawngṭai a, keima tân tak pawh ka ṭawngṭai bawk a ni. Ni e, Pathian chauh lo chuan engtin mah min thlak danglam thei lo vang. Johan-a ka hmangaihna tireh turin ka dil lo va, lungawi taka hringnun ka hman chhoh zel theih nân ka dil ta zawk a ni. Ka lungawi phawt a hnù, hmangaihna avangin thinlungah hliam tuar tawh mah ila ka hlim leh em em ang. A hma ang chiahin dawr ka nghak leh ang a, ka nau zirna senso ka tum sak zel bawk ang a, chu mai a ni lo, ka pa pawh ka ngaihthah tawp lo ang. 

A tuk aṭang chuan ka tum lui tak meuh meuh a, thil awiai zawk zawk erawh a ni lo a ni. Kan thlalak dunna chu hal ral mai te ka tum ut ut a, mahse ka phal leh ta lo. Ka mipa hmangaih hmasa ber a ni a, ka dam zel a nih chuan a hnuhnung ber pawh a nih ngei ka ring. Lunghnur chânga ka hlimna siamtu awm chhun chu Johan-an kum tam a liam hnu pawha min lo hmangaih ve rêngna chu a ni. Ṭah aiin hlim ka thlang zawk a, a tir lamah phei chuan ka inbual lai te'n ka ṭap leh ringawt ṭhin a, mahse hlim luih ka tum hram hram ṭhin. Lungawi ka zir a, ka tum pôh leh a harsa tulh tulh ni berin ka hria.

Kâr tam a liam hnuah erawh awm dan ka thiam chho ve tawlh tawlh a, a hma ang em em chu la pha rih lo mah ila min dawrtu te lo chhawnchhaih danah pawh hma ka sawn viau e. Johan-a te lam chu ngaihtuah loh tawp ka tum a, ngaihtuah lova thil dang ngaihtuah châng ka ngah ta, mahse Dinpuia chu a buaithlak leh ta ber a ni. Min rim awl lo va, i ti mai teh ang. Chhun chawlh apiangin a rawn chhuk ziah a, chuti ang em ema min ngaizawng chu ka khawngaih letling zawk. Kei lah ka rilruin sawh sawn lam a àwn tawh si lo, a ruh lang râwt rawta han sawi tawp pawh ka nei tawh nghe nghe a, mahse min bansan duh chuang der lo. 

Thla a ral a, Johan-a pawh a reh ta vang vang a, min hmangaih thu hriat tluka rimawi kha ka la hre ngai lo. Ka hmangaih chu ka chân angah ka inngai ta miah lo va, min hmangaih ve miau a, kan inkar chu a rem lo kual laklawh vek tawhah ka ngai zawk a ni. A nupui neih chhan te chu ka ngaihtuah chhuak leh hnuhnawh a, ngaihtuah loh ka tum paw'n ka thei leh ta tlat lo. Remchanna avanga nei a nih thu kha a sawi a, mak tak maiin rinhlelhna pakhat mah ka nei miah lo. A chhungte reng reng pawh khan min duh lo hrim hrim a, keini ang thingtlangnu te zawng khawpuimi nupui êm ni tur chuan min iai a nih kha le. 

Kan inngaizawn ve lai te khan a chhungte kha ka chungah nelawm emaw ṭhat an tum der lo, vawi khat chiah an inah ka kal a, kal nawn lehna chî ah ka ngai tawh lo, ka duh tawh lo hrim hrim bawk. Chutah kan inah meuh a nuteho kha an la rawn kal zui a, khang hun lai aṭang daih tawh khan kan awm dun a rem ve hlawl lo a ni e. A nupui ni ta Rebec-i chu ka lawmpui a, ka thik phakah ka ngai lo va, thik buai ka tum ta lo bawk. A vannei ka ti letling zawk, a chhan chu Johan-a te ang mipa rilru ṭha lutuk pasalah a nei thei bik a, amah Johan-a ngeiin a hmangaih loh thu min hrilh tawh mah se kum a'n vei zel ang a, fate an nei dun ang a, a hmangaih theih ka ring, ka lawmpui tak zet a ni.

Inrinni zing a ni a, Vai puan phoa kan huan pakhatah feh tumin kan insiam malh malh hlawm a, kâr tin dawr ka kâi ṭhin bawk nen intih thawven hunah ka ngai hmiah. U Ringate chhungkua leh Ngurite chhungkua an rawn thleng phei a, Zawman a ṭhianpa ta Pick-up a hawh sak a, ama'n a khalh thiam nghal bawk nen bike-a kal tum ngawt ai chuan a ngaihṭhat thlak viau e. Naupangho chenin feh tur chuan kan insiam vek a, ka pa pawh a phur khawp mai. U Ringa fapa naupang zawk kawngka ah a lo intuah palh a, kal nghal mai lovin kan han inthlem lungawi leh tê tê a, kal hma aṭang paw'n kan ni nuaih nuaih dawn tih chu ka hre lâwk nghal thei. 

"I thleng thla vat teh ang u, thlai rah ho pawh a lo ṭha phian tawh maithei a ni" ka pa'n a tih chuan kan chhuak sap sap a, motor-ah kan lâwn zui nghal a, a hnungah naupangho Nguri nen kan chuanpui a, a hmaah páho an chuang thung a, a hnunga chuan kan duh vang maw le, anmahni tak chuan a hmaa chuang zawk turin min ti nghe nghe.

"Kan kal khât zia hî, Zawma hian a sam fai chang hian huan awm dan min hrilh ṭhin a, mahse ngaihruatna bakin ka hmu ve thei si lo" Nguri chuan a ti siam siam a, thli thaw ka dawng nasa mah mah bawk nen lukhum hma thlâwk chu ka khum ta daih.

"Nu, rul emaw pangngang tih vel a awm ang e aw, ka hlau teh mai a nia" Adintei chuan a rawn ti ve a, a awm erawh ka ring lem lo, Zawman a zu sam fai ṭhin bawk a, a awm a nih vaih chuan kei pawh hian hlau tak ka ni. 

"Awm êm lo vang, i pa'n a tifai vek ṭhin alawm" Nguri chuan a lo ti ve mai a, motor hnungah chuang e ti lo chuan Muankimi leh naupangho chu an inchhaih vak vak a, kawng avangin han insawh leh dawt ṭhin mah se an hlau lo a nih hmel. 

Lui kam kan zu thleng a, ni sat dan leh boruak awm dan chu a nuam tâwk viau mai. Motor chuan lui kam tlan theihna chinah kan tlan zel a, motor vékin lui chu kan kân a, kan kalna tur a hnai fahran lo bawk a, kan haw har phian ka ring. Dar 10 rik hma hretin huan chu kan thleng ve ta hram a, huan chu fai nuam tak a ni. Thlâm chhaka mau ding ṭhup chu a sâng hlawm hle a, a hlima awm pawh a nuam viau ang. U Ringan chhun chaw fâk huna hmeh tur mautuai khawrh a tum a, ka zui chho ve nghal ringawt. Mautuai a khawrh chhung zawng chuan a hmun hma vel ka lo thlithlai mai mai a, thosi a tam deuh tih mai loh chu nuam lo tihna em em ka nei lo.

Hatkora kung bulah dingin thlâm lam chu ka hawi thla a, behhlawi zam te, thlai hnah leh thlai rah chi hrang hrang chu a ṭha hlawm em em a, Zawman a enkawl hneh hle a ni ang. Zawma hi chu thil a mir ve hrim hrim a, u Ringa pawh hian lo vah dawn te hian a sawm ziah zel. Makpa kan neih fuh viau chuan ka hria, a taimain tu te lung pawh a tiawi zo êm mai. U Ringan mautuai a khawrh zo va, ka zui thla ve leh nghal mai a, kei leh Nguri chu mipaho lui kal hlana ei rawng bawl tur tawpa kal kan ni deuh ber. Thlâm piah deuh lawkah chuan kawr tê hi a awm a, Muankimi leh a naute ho an tlâ a, tui thuk tak tih vel a awm lo bawk nen kan hlauthawng em em hran lo.

Darkar tam lui lamah an zu thang hnu chuan ka pate pawh an rawn haw a, U Ringa leh Zawman kawr têa mi chakai an rawn khawrh pah bawk a, chawhmeh chu a tui hlawm khawp mai. Thlâmah chhuatah kan ei mai a, naupang hovin chakai bawppui ei an inchuh laih laih a, kan boruak chu a nuam teh e. Chawhnu lamah chuan huanah pá hovin hna an thawk a, keini erawh engmah ti lovin kan awm leh ta. Thlâm bul vel kan tifai ve tak ná a, ka pate ho thawh lakah chuan kan thawh chu nêp te a ni mai. Thlâm chhunga ka lut chu iptêpui chhunga ka phone dah a lo ri tawp chiah a, min lo call tu ka en chuan kan ṭhenawmnu Bawihbawihi a lo ni a, ka call lêt zui nghal bawk.

"Aw u Rp, hmeichhe pakhatin a hmu duh che a, in kalna tak ka hre si lo va, ka lo call tawp che a nih hi!" a lâk rualin a rawn ti zung zung a, min hmu duhtu awm ang chu ka ngaihruat thiam mai lo. 

"A nih chu maw le, hei Vai puan phoah kan kal daih a, tu nge min hmu duhtu chu ni reng reng a, dawr lampang em ni?" ka ti ve nghal mai a, thlâm aṭanga chhuak ta mai lovin ka ṭhu hahchawl ta zawk a, u Nguri pawh puih a ngai hran lovin ka hria. 

"Ka hre bik lo, amah tak chu kan inah hian a la awm reng a, mahse kan ṭawng a hriat ka hlauh avangin pawn aṭang ka rawn be daih che. I ṭhian a nih ka ring ve tawp a, khawpuimi a nih ka ring, a ngo êm mai" a rawn ti leh a, hmai chhana ka hmu te a ni ngawt loh chuan tu nge a nih hriat a harsa lam hret a ni. 

"Aw le, kan lo haw huna a lo la awm tâk leh kan inhre chawp ve tawh mai a ni ang chu! Kan lo haw har tawh lo ang ka ring, min nghah duh leh lo hrilh mai rawh" ka tih hnu chuan eng vak sawi tawh lovin kan inbiakna kan titawp a, rilru erawh a kap ru duh phian leh nghal.

Dar 4 rik hmain kan haw a, a thlasik boruak chho ṭan tawh bawk nen a vawt deuh sûk mai. Kawng ṭhenkhat phei chu dai tla tih hriat zetin a huh dup a, ka rilruah chuan min hmu duhtu; tu nge a nih ka hriat si loh a awm reng thung. In kawta motor a din hnu chuan kan chhuk sap sap a, kan ina lut lovin kan ṭhenawmte inah ka lut ta zawk a, Bawihbawihi thil zawh chian ka duh vang a ni ber. TV bul ṭhutthlenga lo ṭhu ngawi reng hmel ka hmu chiah chu mak ti tak ka ni, min hmuh rualin a ding nghal a, ka lam a rawn pan nghal bawk. Johan-a nupui Rebec-i nen chuan kan inhma chhawn ta ran mai, sawi mai tur pawh ka hre lo, chuti anga a hmel ka hmuh thut chu ka ring lo nasa hle bawk. 

"Inbe lawk teh ang" tiin min kal pel a, a rimtui hman rim te chu a khawpuinu ngawih ngawih a, amah khawpuimi a ni hrim hrim a, a awm lo hran lo e. 

"Johan-a hi lo hmuh phet tum tawh lo la a ṭha viau ang, amah tak hi chuan hmuh che a tum miah lo tih ka hria, nangmah zawkin i lo thlem ṭhin tih ka hre vek, nangmah avangin kan nupa inkar pawh a chhiat phah" kan pahnih chauha kan awm hnu chuan a rawn ti ta hmawk hmawk mai. 

"Mi â tak i nih ka ring lo, chu vangin ka pasal hi lo hmu tawh lo ang che. Nang chu kei nen kan intawn hmaa a ngaihzawng pakhat ve mai chauh kha i ni a, i la hmangaih tih ka hria, mahse hmangaih tawh lova theihnghilh tum ve mai rawh" amah bawk chuan a ti leh hmarh hmarh a, kei erawh ka ngawi reng ringawt.

"Ka kal ang e" tiin min kalsan a, ka en zui vawng vawng a, mi pakhat lo chuanna motor-ah a luh zawm zat a, tlan liam daih tawh mah se ka ngaihtuahna chu a kal thui leh ta hle.

Zanriah ei lai thlengin ka rilru chu a nuam thei ta lo va, engah mah ngaih loh ka tum tehreng nen ka thei der lo. Zanriah ei lai mai ni nâng, mut hmun thlengin min ṭawngkhum dan chuan ka rilru a luah a, a hmel leh a ṭawngkam aṭang khan a lungawi lohzia ka hria, demna tur pakhat mah a awm lo, a chhan chu ka dik lo tlat a ni. Ka lo tawm fal pui vel te kha hria se chu min hmusit zual ngawt ang, hmuhsit tlâk ka ni reng bawk. Amaherawhchu hmuh tum phet anga min sawi erawh a hre sual niin ka hria, hmuh ka châk a, ka ngai a, a bula awm ka châk a, kumkhuaa chen dun pui turin ka pasal ni se ka ti ngawih ngawih, mahse nupui nei lai a nih avangin hmuh tumna ka nei ngai miah lo, chu lamah chuan inthunun nasa ve tak ka ni. 

Lungawi takin ka nung chho tawh ang chu tih laiin Dinpuia lah min brih tlut tlut a, kan khuaa riah chang pawh a ngah ta mai. Nitin dawrah kan inhmu a, zanah a rawn chuangkâi zauh zauh bawk a, ka chhungte phei chuan inngaizawng emaw min ti ta hial. Vawi khat chu thinrim takin kan inngaihzawn theih loh thu leh Johan-a ka hmangaihna a reh theih ngai dawn loh thu ka sawi a, mahse Dinpuia chuan engah mah a ngai lo thung. A rawn lêng awl chuang lo va, chhun lamah hi chuan kan inhmu ngun thei mawlh mawlh khawp mai. Hrîlh hrilh pawha awmzia a awm chuang loh avangin ka en liam ta tawp a, ka rilru engkim a hre vek tawh a, a duh dûhin awm rawh se ka ti ta mai.

Kâr tam a ral hnu chuan Johan-a hmel ka hmu leh ta hlawl mai, mak ka va'n ti tehreng êm. Kei chauh ka ni lo, ka pa paw'n mak a ti hle a, kan inah min rawn kal chilh miau hek. A hmel chu ka en chiang a, a tlâ dâwkin ka hria, mahse a hmelṭhatna te, a zun te, a engkim chu ka mitah chuan a ṭha em em vek bawk si. A rilru a buai tih a hmelah chuan a hriat hle a, a thu hrimah engati nge zanah hian a lo kal ziah le, ngaihtuah a nâ duh si. Ka pa chuan ṭawngkam paw'n a be lo va, kei pawh ka ṭawng lo hrim hrim a, ani erawh ṭawng tumin a âng zuau a, mahse a ngawi leh daih zel. Kan in chhungah lo lut lovin kawngka bulah chuan a ding tlat bawk a, eng tak hria ni maw!

"Ka nupuiin engtin nge a tih che? Engtin nge a lo ṭawngkhum che? Min hrilh teh Rp, i rilru a tinâ em?" a tawpa tawpah chuan a rawn ṭawng chhuak ve ta nge nge e.

"Lo lut phawt rawh" kei ni lovin ka pa zawk chuan a lo ti hlawl a, a lam ka hawi phei thuai a, Johan-a ngawr ngawr chu a lo en daih bawk a, min tihrilhhai ang reng viau. 

"Min hrilh tawh rawh le Rp, eng thu chiah nge a sawi?" a ngaite bawkin Johan-a chuan a ti leh ta, engtin nge a nupui nen kan inhmu tih a hriat reng reng le, nge a nupuiin a hrilh leh vek zawk, kei lahin ka hrilh der bawk si lo. 

"Hmu tawh lo tur chein min ti, mahse ka rilru a nât phah lo. A sawi dik vek alawm, kei pawh ni ila, hmeichhe nikhua lo takin ka pasal lo hmangaih tlat si se, kalh chilhin ka ṭawngkhum hrep ve tho ka ring" ka tih chuan a thaw chhuak ham ham a, pawi tih hmel zeta min en chung hian

"Hmeichhe nikhua lo ang chuan in sawi lo teh Rp, i mizia, i engkim ka hre chiang lutuk" a rawn ti ve nghal zat a, ka pa lam chu hawiin a pen phei nghal pâwk pawk a, chutah ka pa hmaah tak chuan a va ṭhingṭhi a nih chu! 

"Ka pu, hun kal tawha ka thil tih sual avang khan min ngaidam hram ang che. Ka hun hman mêkah erawh tih sual ka duh tawh lo, i fanu hi ka thinlung zawng zawngin ka hmangaih a, nupui nei tawh mah ila ka thinlung a uire tlat bawk si. Ka thutiam ka hlen loh avang khan pawi ka ti tak zet, kei tlukin i fanu rilru i hre chiang a, kawng awm hlauh ta se Rpi hi nupui atan ka neih i phal ang em?" chuti ang thu a sawi ka ring lo lutuk chu ka âng phuau ringawt. 

"Haw phawt rawh Johan" ka pa chu mak ka ti tulh tulh a, a thutiam a hlen loh avang leh nula senior lâi ka nih phah avangin a haw em em ṭhin kha a ni a, tunah lém hmân ang chiahin a hming te'n a ko leh ta hial a, a awah thinrimna emaw lungnih lohna a lang tawh miah lo zui.

"Engti ang paw'n harsa dawn mah se kawng ka dap em em ang, min lo nghak leh lawk rawh aw Rp, ka hmangaih che tih hre reng bawk rawh" tiin Johan-a chuan min kuah thuak a, kan in aṭang a kal chhuak ta vang vang a, han thlah êm chu ka la ngam rih chiah lo bawk. 

"I la hmangaih reng em ni?" min en miah lovin ka pa chu a rawn ṭawng chhuak a, TV en ve teh mah se a rilru erawh hmun dang daihah a awm dawn tih ka chiang, ka hre sual te a nih ngawt loh chuan Johan-a nena kan chungchang a ngaihtuah a ni ngei ang.

"A ni lo mipa dang hmangaih ka nei thei tawh lo tih chu i hria alawm, mahse chumi avang chuan kan awm dun thei tihna a ni lo, kei chuan lungawi thiam ka zir tawh zawk a ni" ka ti ve ta sêp sep a, thu dang sawi tawh lovin pindanah ka lut zui nghal a, engtin emaw ni taka hahdam ruk riauna ka neiin ka hria. 

Ka mut hnu thlengin Johan-a chu rilruah a châm leh ta reng mai, ngaihtuah loh theih pawh hi a ni ṭhin lo. Ka pa hmaah ṭhingṭhi meuhin ngaihdam a dil a, min hmangaih thu zak miah lovin a sawi bawk a, chuti ang taka min lo hmangaihna chuan ka rilru a tihahdam ni berin ka hre ta. Ka ṭawngṭainaah chuan Johan-a leh a nupui tan ka dil a, an inkar a ṭhat theih nân te ka dil a, a vawi khatna atan kei leh Johan-a tan ngei pawh ka dil tel ve nghe nghe. Pathianin rem a tiha kawng min siam sak phawt chuan pasala neih ka hnial teuh lo, mi pasal ni tawhin pathlawi ni tawh dawn mah se hmangaihna avangin ka hmu famkim em em dawn tih ka chiang a ni. Amaherawhchu beiseina ka nei nghal lûa tihna a ni lo va, chhe tê te chuan ka nei ve a ni mahna.

(End of Part III)