𝐓𝐇𝐀𝐌 𝐑𝐀𝐋 𝐋𝐎 𝐇𝐌𝐀𝐍𝐆𝐀𝐈𝐇𝐍𝐀 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐏𝐚𝐫𝐭 𝐈𝐈)

THÂM RAL LO HMANGAIHNA

By 

Havali Adam

Part II

"Kan lo haw har a rinawm loh, Nguri te nufa ko phei la, hetah chaw kan ei khawm titih mai dawn nia" iptêpui keu pahin ka pa chuan a ti dap dap a, Zawma nen luiah kal an tum a, sangha pawh an rawn hawn nûal ka ring.

"Aw le" tih chauhin ka chhang a, rei awm tawh lovin an chhuak zui nghal a, kei pawh ka thil tih lai chu ka tih zawm leh ta mial mial a, rilru nâtnain a tlâkbuak; ṭawng tlêm sawt em em Rpi kha ka la ni reng a, hun te chu liam duak duak mah se ka chhungril nâtna erawh a liam ve thei lo a ni e. 

Keimahin dawrah chuan ka awm a, ka zia a danglam hlawk ná chu dawrtu erawh ka la nei reng tho va, kan dawr piah maia dawr kâi thar te chuan min er em em bawk. Ka thêngthâwngah a thawk lem lo va, an duh tâwkin min er se, min el bawk se, pawi tihna pakhat mah ka nei lo. Bungrua a rawn thlen apiangte hian ka lâk ang apiang an la ve zel a, kar hnih thum liam ta aṭang chauha dawr siam ṭan si khan min rel nghal vel a nih chu! Keini ai chuan an hausa zawk ngei a, chu vanga dawr siam nghal thei mai pawh chu an ni a, min er em em te chu ka lawm letling daih zawk. 

Chawhma lamah chuan ruah a sur a, chawhnu lamah erawh a hân ta deuh a, khaw chhe tur hmel a awm leh tawh miah lo thung. Chhun chawlhah Dinpuia pawh a rawn thleng thla leh ngei a, mahse a hma ang em emin ka ngawi tlat duh ta bik lo. Pangngai takin ka ṭawng a, a hmaa ṭawng siam siam ṭhin kha ka ṭawng tawi ta hmuk hmuk a, min duh thu pawh vawi khat mai ni lo a sâwi a sawi ta. Kei erawh min duh thu a sawi apiangin ka ngawi tawp a, ka rilru dik tak hrilh tlang nghal pawp tum ṭhin khan ka sawi ngam leh si lo a ni ber. 

Ka duh loh thu leh hnar ka duh thu chu ka hrilh tlawng thei lo, a chhan chu nula leh tlangval inngaihzawnna kara rilru nât theihzia ka hre fiah zo chiah a, Dinpuia chuan tuar ve lo se ka duh a ni. Ṭawngkâ ni lovin chetzia zawkin hnar ka tum ta ringawt a, ka awm dan aṭangin ka duh ve lo tih hrethiam hram se ka ti hle bawk. Ni lo, ani chauh a ni tawp lo, Johan-a ka hmangaih em avangin tu mipa mah ka thinlunga lut turin ka duh tawh lo va, luh theih a ni tawh lo bawk. Johan-a tana ka hmangaihna zawng zawng ka lo hlan fel thlap tawh te chu lâk kir leh theih se ka ti a, a chang chuan ka inchhir rum rum ṭhin. 

Amaherawhchu ka inchhir rei ngai lo, inchhir rei ngai lo tak ka ni. Minute eng zat emaw ni chhung lêk a lakah ka vui a, ka thin a rim a, a tawpah hmangaihna avang bawkin ka haw phal lo leh ṭhin. Hma lam pana ke pen zel ka tum ta zawk a, ani chu ka chan phak ni tawh lo mah se ka mipa hmangaih awm chhun leh a tawp ber tur a ni nghal a ni. Kum 15 chhung zet ka lo nghahna chu engmah lo maiah a chang a, a tir kha chuan nâ tak ka ni, mahse hmangaihna chu a lungawi loh thlak zawng ringawta thlir ka tum ta bik lo, a thianghlimin a chak êm a tin ni!

"Rp, vawi engzat nge ka sawi ngai dawn? Ka laka i rilru puthmang dik tak ka hriat theih nân hian vawi engzat chiah nge ka duh thu che ka sawi dawn?" ka thil tih lai ka tawp chat a, Dinpuia lam ka hawi chu a lo thutak hle .

"Ka upa tawh êm mai, min duh tawh suh Dinpui" chu bak sawi tur ka hre lo, ka hre lo tak zet, a ruh lang rawta sawi lah thil mawi a ni si lo, sawi ka tum lo bur bawk.

"I hun kal tawh ka hria, kum tam hmang rala i mipa nghahin nupui a neihsan tawh che tih thlengin ka hria, mahse maw ka iai lo che asin, ka iai phal lo che. I hahdamna nih ka duh, phal hram teh, chu chu ka duhthusam a ni" ka kut chu a rawn vuan a, kei erawh rilru ipik ru zetin ka thaw halh thung. 

"I laka ka awm dan aṭang pawh hian ka rilru tur chu i hrethiam mai lo em ni?" ka tih ngaihna hre lo lutuk chuan ka ti ve ta nge nge a, a ngawi deuh vang vang a, ka kut chu hum nghet sauhin min ṭhut hnaih zual a, eng nge a tih tum ka hre hauh lo. 

"Ka hria alawm, ka hre lutuk, mahse chu vang maia bansan che ka tum lo. Ka ngaina em em che a, ka ngaizawng em em bawk che a, eng tak hi nge min duh loh chhan? Nang aia ka naupan zawk vang em ni? Nge nupui neihsan daih tawhtu che chu i la nghak fán zawk? Theihnghilh ve tawh rawh, nupui a neihsan theih che chuan ngaihzawng i neihsan thei ve dawn lo'm ni?" a ṭawng zo chiah chu ka nam sawn dâwrh nghal. 

"Ka thei ringawt lo, ka theihnghilh phal lo bawk. A chhan chu ka hmangaih alawm, ka hmangaih lutuk, ka thinlung zawng zawngin ka hmangaih a, ka tan beisei ngam ni tawh lo mah se ka hmangaih reng tho" ka ti tawn tawn a, ṭah chhuak lutukin ka men pur a, ka rilru chhungril ipik zet chu a puak keh a ni ber. 

Ka dawr nghah lai pawh ngaihtuah tawh lovin pindanah ka tlan lut a, kawngka chu ka kalh nghal a, ṭah loh tum paw'n a va'n harsa si êm. Thawm a reh vang vang a, ṭap mah ila thawm ka chhuah lo va, ṭah reng pawh chu a dik ber chuang lo. Pindan aṭang chuan ka chhuak a, Dinpuia chu a lo la ṭhu reng a, mak ka ti hman hle. Thawk la hmasa tê têin ka ṭhutna ngaiah ka ṭhu phei a, ani chu a ngawi reng a, a thil en ngai a en reng bawk a, a rilrua awm tur awm ang pakhat mah ka hre lo chiang hle. Min huat ka ring bur thung a, min hua pawh ni se a àwm hliah hliah. 

"Beidawnsan mai che ka tum lo Rp, ka duh lûatah che ka lo hmanhmawh mah mah a ni maithei. Kan hmangaih emaw kan tih te pawh hi kan lo hmangaih tak tak miah lo ve thei tho a nia, i rilru tihnât tuma sawi ka ni lo tih erawh hria la ka duh" ti nghet charhin thawh a rual nghal a, ngawi rengin dawr aṭang chuan a kal chhuak ta nal nal.

Ka en zui vawng vawng a, thil a tiharsa zo vek dawnin ka hria. Johan-a ka hmangaih tak tak loh a ring máw? A hre sual a ni; ka hmangaihna a nasa lutuk zawk, chuti maia theihnghilh theih leh hmangaih loh theih ang chi kha a ni ve lo. Ka hmangaihna chu amahah chauh a awm a, khang kum 15 chhung zawng leh tun thleng hian a la ngai reng a, nupui a nei tawh tih ka hriat hnuah pawh a la danglam chuang lo va, chuti chung chuan ka hmangaih tak tak lo ang maw!? Ni lo, ka hmangaih chiang a ni. Ka hmangaih lutuk tak zet, mahse khuanu'n lêng dun turin min duan mawlh si lo a ni.

Tlai dar 4 leh a chanve velah ka pa leh Zawma an lo haw a, ka rin ang ngeiin sangha an rawn hawn hnem a, chakai pawh a tlem lo hle. Dawr chu Muankimi nghah tirin ei rawng ka bawl ta zawk a, nghakhing te, ngharul chénin an hawn tam phian a, ka'n chhum chiah chu rimtui tak a ni. Anthur hnah ka thlak tel bawk a, ril a ṭam nghal rawih rawih thei dawn alawm le. Dawrah ka chhuk lo ta law law a, Ngurin a nghah pui tho bawk nen inpuiah ka awm tlang ta zawk a ni. Ka pa chuan u Ringa te chhungkua sawm phei turin min ti a, anni pawh an lo intilungawi leh diam tawh a, an rawn thlen te chuan an hlim leh tawh hle. 

Zanriah chu tui ti takin kan ei tlâng a, chaw bel pawh a lian chi pahnih lâi kan hmang a, chaw ei khawm pangngai tak tak kan nei a ni ringawt. Ka chhungte hlimin an thawm ṭha viau mah se kei erawh ka rilru kaptu a awm tlat a, ka hlim ve tak tak thei tawh lo. Ka rilru kaptu pakhat zawk chu Dinpuia a ni a, pakhat leh chu Johan-a a ni thung. Dinpuia chu ngaihtuah zui vak dan pawh ka thiam lo, a ruh langin sawi tlang pawp pawh ni ila beidawn a tum hmel chuang si lo va, ka sawi leh sawi loh a inang reng ang. Johan-a zawk chuan ka rilru a tibuai, engati nge pasal nei daih tawh tur ang khan min ngaih ringawt? Engati nge thinrim hmel te kha a put? Keimah zawk a ni lo'm ni thinrim tur chu!?

Zan rei tak thleng mengin ka ngaihtuah char char a, pasal nei daih tawh tura min lo ngai mawlh chu ka rilru luahtu a ni. Engmah hrethiam lo ang khan a awm a, kha hmel kha ka hai lo, hmân ang chiah kha a ni. Thil a hriatthiam loh zawng a nih chuan khati ang hmel kha a pu ziah alawm, ka hre chiang lutuk tlat. Thil inthup a awmin ka hre deuh reuh a, mahse buaipui chhunzawm ai chuan ngawihsan mai ṭhain ka hre zawk a, a khawhnu tawh êm bawk a ni. Thil inthup lo awm ta pawh ni se emaw lo hmu chhuak ta pawh ni ila engmah a danglam thei tawh chuang lo, a nih tur ang a ni zo vek tawh.

Pangngai taka nun hman ka tum a, zawi zawiin ka thei chho ṭan chuan ka hria. Hmangaihna avangin nâ em em mah ila dam chhan ka la nei alawm, chu chu ka pa leh Muankimi enkawl a ni. Ni e, anni pahnih hi tunah chuan ka dam chhan an ni tawh, a bak thil dang a awm tawh lo. Mi hlawhtling tak a nih theih nân Muankimi chu ka pui ang a, pawisa a mamawh a nih chuan ka pe ang a, lehkha ṭha taka a zir phawt chuan ka duhthu a sam em em zawk tawh a ni. Ka pa pawh hrisel taka a awm theih nân ka pui zel ang a, a tar kun thlengin ka awmpui reng ang. Kei chu, kei ve hi chu heti mai hi ka ni ta. Ka hmangaih ka chan a, nupui min neihsan tawh a, ka thih hma zawng ka nula tluan zak mai a ni ang chu! 

Chawlh kâr kan hmang ral a, nilaini chu nî a va'n sa ṭha leh pek êm. Bâ ziahna lehkhabu chuan ka inzâp chhen a, ni dang ai a lum zualin ka hria. Zing lama ka pân hnah cheh sa ho chu ka roll a, polythene têah ka khung nghal zel a, pân hnah tak hi chu cheh sa a pawi miah lo, kuhva rah zawk hi a buaithlak ta a ni. A kawrpui kheh lâwk te hi chu tih dan a la awm mai a, thel lâwk erawh a chi loh bur tluk a ni. Thel lâwk chuan a lang hlui vek zel a, thel tawh sa pawh thel thar leh a ngaih phah ṭhin. Pân hnah ka roll zawh hnu chuan kuhva ka thel zawm zat a, ka phel zui nghal a, chu chu ka nitin tih dan a ni. 

Dawr kawtah chuan motor pakhat a rawn ding a, ka en zawk a, ka en rei lem lo. Kan khaw High School principal motor ni maiin ka hria, ani pawh khan motor vâr te chu a nei tak alawm, amah a ni hrim hrim. Stapler-in kuhva leh pân hnah dahna polythene chu ka chilh ri chawrh chawrh a, khawvel a changkang zel a, a hma kha chuan Bati kan hmang mai ṭhin a, Stapler a awm ta chu a awlsam phah viau tho. Keimah chu ka za deuh mer mer a, ka sawi thiam chiah lo, ka awm dan chu a mak hle. A chhan lah ka hre bawk si lo, mi hmuh theih tura kuhva ka khai pah chuan hmun dang ka hawi zauh a, ka mi hmuh avang chuan ka va che tawp chiang tehreng êm.

Thin phu dawt dawtin ka hawi sawn leh vat a, ka taksa chhung lam leh pawn lam chu a dik lo nghal vek bawk a, ka che reng reng chu awihawm loh khawpin a buai a ni. Rim dang ka hria a, ka bul hnaiah a rawn kal tih ka hre thei nghal. Engati nge a lo kal leh reng reng? Nupui a nei tawh a, min hmu turin lo kal tawh lo se a ṭha daih zawk. Ni lo, a rawn kal chhan ka ni kher bik nâng, thil dang a ni hrim hrim ang. Kei te chu kum tam liam ta khan min theihnghilh daih tawh alawm, ani chuan eng atan mah min ti lo, kei thingtlang nula senior hi a lo kal chhan a ni lûl lo ang e!

"Rp" a aw ka hre chiah chu ka tawt et et a, ka sa pup pup bawk a, tih tur zawngin ka hawi kual ruai a, mahse tih tur mai ka hmu si lo, ka hnung lam aṭang min rawn kuah chiah chu ka mittui a hnam leh ta ṭiam ṭiam.

"I dam ṭhin em?" a zawhna chu ka chhang thei lo, ka ṭah chhuah hawk loh nân ka hmui ka pet fan fan a, mi pasal ni tawh mah se a taksa nghenga ka awm chiah chu ka hahdam ngawih ngawih, mahse keini pahnih chu a rem tawh mawlh si lo.

"Aw" ṭah chhuak lutuk aw chuan ka ti deuh tawp a, a lam hawi zawngin min kuai her a, hmân ai khan a thau tawh zawk a, ka hmangaih êm vangte pawh a ni mahna, a hmel chu ṭha zual tak a ni.

"Thil zawh tur che ka nei" a rawn tih chuan a hmuh laia ṭah loh ka tum vei nen ka mittui chu ka biangah a luang thla leh ta nge nge a, khawngaih hmel zetin min en ngawt ngawt a, tunah chuan a khawngaihna chauh chu ka dawn phak leh ka chan phak a ni tawh. 

"Pasal i la nei lo tak tak em? Kum 15 chhung zawng khan min lo nghak ṭang ṭâng tihna em ni?" a hmel pawh en tawh lovin ka kun a, ka ṭap nghawr dat a, rang zet hian a âwmah min kuah bei thuai a, thawm hial ka chhuah ta.

"Engati nge ka hriat si loh? Engati nge min lo nghak tih ka hriat miah loh? Lehkha tal lo thawn ta che? Ni lo, lehkhathawn kha! I lehkhathawn hnuhnung berah kha chuan pasal i nei dawn tih i sawi ngei alawm, thil kal dan hi a dik miah lo" tiin min nam hla deuh a, chiang zetin min en a, a thusawi awmzia chu pakhat mah ka hre lo.

"Ka hriat ngai pawh ni lo Ramthana nen chuan engati nge in inneih leh si loh? Min hrilh chiang teh Rp, dawra kan inhmuh hnu khan rawn chho leh vat ka tum a, mahse hna thila ka zin avangin ka rawn lang hma thei ta lo a ni" a tih leh pawh chuan ka bo tulh tulh a, Ramthana tih hmingpu ka hriat mi an awm lo hrim hrim. 

"Tu nge Ramthana chu?" ka ti ve ta sep a, ka mak ti lutuk chu ka ṭah chhuak zualpui a reh titih vek a, lehkhathawn thlengin a dawng a, mahse Aizawla a chhuk hnu khan lehkha ka thawn ngai tawh tawp si lo, ani lah chuan ka hnen aṭang lehkhathawn a dawng miau bawk si.

"I hre zawk ang chû, i pasal tura i rawn sawi kha a ni lo'm ni?" ka awm sawn thuai a, kum 15 chhung inhmu lova kan awm chhanah chuan thil dik lo a awm tih ka hrethiam nghal a, mahse ka buai rei lem lo, eng ang paw'n siam ṭhat tum mah ila a sâwt tawh lo tlat. 

"Thil ṭul lo a ni e, min hmu turin lo kal tawh suh. Nupui i nei tawh a, ka pa'n i hmel a hmu palh zawk hlauh ang e" ka aw chu ka ti khauh lui a, ngunthluk fê hian min en a, kei chu ka zam ru em em thung. 

"Hriat ka duh, hriat chian ka duh Rp. Engati nge min lo nghah char char si chuan pasal nei tur anga lehkha min rawn thawn kher? Sawi teh, zep nei miah lovin sawi teh, ka hriat chhuah vek a ngai a ni" thinrim aw lek lek hian a rawn ti a, kei erawh ka ngawi reng ringawt. 

"Sawi ta che LALRINPUI!" vin mangkhenga a tih leh chuan thinrim zetin ka melh chho kar a, ka dawhtheihnain a tlin ta bik ngâng lo. 

"I thusawi awmzia hi pakhat mah ka hre bik lo, ka hriat i ring a maw!? Kei ang mi mawl hian ka hriat i ring a màw? Kum 15 chhung zet a mipa hmangaih em em lo nghaktu, phatsan tâwk leh si hian ka hriat i ring maw? Engmah ka hre lo ve, a chhan hriat chhuah pawh a ngai tawh lo, thutiam hlen zo lo mipa ka lo nghak ṭang ṭâng che hi ka inchhir tak zet" ka ti hlawk hlawk a, ani chuan ṭawng lovin min rawn kuah ta thlawp. 

"Ka hre chhuak dawn khawp mai, engkim hi ka hre chhuak dawn, ka hriat chhuah hmâ chu ka awm a nuam thei tawh lo. Khawiah nge Thanmawii? Ani khan i lehkhathawn min rawn pe alawm, engkim kha dawt a nih vaih chuan" sawi zawm lovin a ngawi daih a, kei mi mawl hian chuti ang engmah ka hre leh ta pek lo e.

"Tunah hian sawi rawh, sawi nghal rawh Rp, i ṭhiannu Thanmawii kha ka hmuh ngei a ngai, lehkhathawn zawng zawng kha ka zawt chiang dawn a ni" a aw chu vin lam lek lek a ni a, Thanmawii hming daih daih a rawn sawi ri chu mak ti tak ka ni. 

"Khaw dangah pasal a nei daih tawh" hamhaih aw zeta ka tih chuan

"Khawi khuaah nge? A phone number i nei em? I neih chuan be nghal rawh, i biak nghal ngei a ngai" a rawn ti leh zung zung a, mahse kei chuan a ṭulin ka hre tawh lo, thil thleng tawh leh liam vek tawh a ni a, a nih dan tur angin a ni vek tawh bawk.

"Engmah hi buaipui emaw chhui chhuah a ngai tawh lo Johan, ngaihngam takin min kalsan zawk rawh" ka tih chuan ram hmuk hian

"A teuh lo mai, chuti mai chuan ka ngaihven zui lo tawp lo ang. Khawi khuaah nge Thanmawii chuan pasal a neih? Chu tal chu min hrilh rawh, a bak chu ka ti vek ang" a ti mawlh mawlh a, ka dar tawn tawnah chelhin min sâwi titih a, ṭul ka va'n ti tawh lo tak êm.

"Rp!" rawn ti hluai tu lam chu kan hawi rual ṭhawt a, Dinpuia lek chu niin, thinrim hmel deuh hian a rawn kal phei a, Johan-a ban chu a nam thla ta sawk mai. 

"Hmeichhe awm nêm zawk a nih hi maw le, i hmer nâ mah mah tih i hre lo em ni?" Dinpuia aw chu a khauh chang fâk a, ka rin loh lutukin vawi leh khatah Johan-a chuan a hnek tlu tawp a, ka ṭe nghal ṭhawt bawk.

"A ve mai mai che chuan, tu nge i nih ka hre hrep lo che, kan buainaa rawn inrawlh tur i ni lo tih erawh hre chiang hle la a ṭhat ka ring" tia khawih chhunzawm leh a tum chiah chu

"Duh tâwk rawh RAMDINMAWI, i zak miah lo em ni? Kan dawrah hian buaina rawn siam ngam tur pawh i ni lo, chhuak nghal rawh" ka ti vin phiar phiar a, kawnga mi kal ṭhenkhat chuan min en duh phah hle.

"Thanmawii pasal neihna khua chu sawi mai ta che, sawi a harsa viau em ni?" kei aia vinin a rawn ti lêt hrawk a, kei paw'n ka aw ka thunun hman leh ta bik chuang lo. 

"Khawzawlah, a tâwk em? I hriat duh i hre ta bawk a, haw vang vang rawh, ka hmaah i hmel rawn lan tawh reng reng suh" thinrim taka ka tih pawng pâwng chuan kal mai a tum a, mahse a ding leh rih ta zâwk. 

"Ka lo lêt leh ang, engkim hre fiaha ching fel turin. Nang pa kha, LALRINPUII hnaihah hian awm tam suh, ka kut i tuar zing palh ang e" ti hmukin Dinpuia chu a melh run a, dawr aṭang chuan a chhuak zui nghal a, a tlan liam hnu thleng chuan zak lo ti zetin ka en zui vawng vawng ringawt. 

"Kha pa kha em ni kum tam i lo nghah tawh mipa chu!?" Dinpuia lam chu ka hawi thuai a, a ṭawngkam chhuak pawh a nêm fahran bik lo, a hmui thi chu a tuai zeuh zeuh a, keimah avanga kut a tuar chu nuam ti lo tak ka ni. 

"A zia lo hle mai, lapua ka'n la ang e" tih leh chet ka rual zawm zat a, a zawhna chu chhan loh law law ka duh zawk, mi â ni léng lo tan chuan hriatthiam loh chi pawh va ni suh, ka hmingpum ngata min ko theitu chu ka hmel hriat hnaih tak a ni dawn tih hriat reng reng. 

Lapua chuan a hmui thi ser ser chu dim têin ka hru a, tih nât hlau takin ka tawk dên den a ni mah zawk. Ani erawh a ngawi reng a, chiang zetin min en a, mahse zâmna chhe tê mah ka nei lo, Johan-a min enna leh min hnaih chilhna ang lo takin ka thin phu pawh a rang dawt dawt ve miah lo. Kan awm hran hnu chuan thupha ka chawi mawlh mawlh a, nuam lo ka ti ve tak tak. Johan-a lah khan kut a thlak nâ ang reng si a, chini pack sa ho pawh a delh ṭeh phah vek alawm le, RAMDINMAWIA chet dan chu mawi lo ka ti tak zet. A thu hrimah engati nge thil thleng tawh leh hriat chhuah ṭul tawh lo chu hriat a tum phêt? Hria pawh ni se awmzia a awm tawh lo, a awm tawh lo hulhûal.

Chawhnu lama ka dawr nghak chu rilru a buai duh hle mai, hliam nei zawk Dinpuia ai Johan-a bawkin rilru a luah leh ta, lo hmangaih lutuk lo law law ila ka tan a ṭha zawk ang maw le. Hmangaihna satliah mai mai ni se, thâm ral thei hmangaihna ni zawk se ka ti, mahse chuti ang ngawt a ni bawk si lo. Ka hmangaih dan a thuk em em a, mipa dang rêngin ka thinlung an luah thei tawh lo va, nupui min neihsan daih tawh mah se kei chuan ka la hmangaih reng thung. Lo lêt leh a tum thu a sawi a, engkim zawn chhuaha hriat fiah a tum bawk a, lo lêt tawh miah lo se ka duh daih zawk, mi pasal a ni tawh tih theihnghilhin amah ka thlakhlelhna leh ka hmangaihna chuan min hneh palh ang tih ka hlau a ni.

Zanah chuan u Ringate chhungkua leh Ngurite chhungkua an rawn lêng phei teh mial a, naupang nen kan ni nûaih nûaih a, chaw ei khawm kan nei te a nih ngawt loh chuan chuti angin an rawn lêng phei zen zen ngai lo. Paho chu an titi mial mial a, Nguri nen dawrah kan awm a, Muankimi hovin naupangte chuan in chungah Korean Serial an en ṭhap thung. Zan dan ang bawkin inlêng kan nei leh a, tun ṭum chu ṭhalai rual hlang an ni a, kan dawr hi titi ho nân a rem viau pawh a ni mahna kohhran upa thlengin an rawn chuangkai fô ṭhin. Fiamthu te an thawh hlawm a, an nui ho dar dar a, kei erawh a ngaite bawkin ka nuih dan a lem leh hle.

Dar 10 leh a chanve rik dawn velah u Ringate chhungkua leh Ngurite chhungkua chuan haw phei an rawt a, dawr kawt thleng ka thlah a, mahse chhun lama ka hmuh motor vâr bawk chu dawr kawtah a rawn ding leh ta. Tu ta nge tih leh a khalhtu ka hre chiang ropui si a, ka u leh naute ber chu kal liam thuai thuai se ka ti hle. Motor aṭang Johan-a ngei chu a rawn chhuak a, u Ringan a hmel a hmu chiah chu mak a ti teh e! Johan-a pawh a bang chuang lo, hamhaih hmel takin a en ve reng a, chutah u Ringa chuan che chhuak thutin a va hnek ta buan buan mai, kei leh Nguri kan ṭe ṭhawt a, kan thawm ri nuaih nuaih avang chuan ṭhenawm khawveng thlengin an rawn chhuak a, muhil tawha ka rin ka pa pawh a rawn chhuk phah nghe nghe.

"Nang mi lawi lo pa hian eng nge hetah i rawn tih? Engtin ngei i rawn inlán ngam leh zawk?" ti vin phiar phiarin u Ringa chuan a hnek siah siah a, lian zawk fê mah se Johan-a erawh a indawh mawl tawp a, mi dangin pawh sawn an tum paw'n u Ringa chu thinrim tak a ni. 

"Vawi khat mah kan khuaah hian lo kal tawh suh ang che, ka farnu hmuha i hmel i rawn lan leh a nih vaih chuan tun lêt hian i chungah ka che ang. Nupui neihsan tawh khan rawn hmuh leh i tum vel a maw!? Zahna chhe tê mah i nei lo em ni?" u Ringa thinrim ṭawng nasa lutuk chu a ring ngei mai.

"Duh tâwk rawh Ringa" ka pa'n a tih hnu chuan a insum ve thei ta hram a, ka pa chu ngawi rengin Johan-a lamah a kal phei a, Johan-a chuan a en zeuh a, mahse a en rei lo, a en ṭha ngam lo ni berin ka hria.

"Kum 15 liam taa ka fanu nupuia neih tuma thu tiamtu Johan-a kha i nih chuan haw ang che, i ni lo a nih erawh chuan kan inah i lo thleng thei ang" ka pa aw chu a dam dap a, Johan-a tan chuan chhan dan tur a vâng ngawt ang, hmâna Johan-a ngei kha a ni bawk si. 

"Buaina a awm tawh lo ve, mahni in ṭheuhah i lut tawh teh ang u khai. Keini pawh lut ang u, zan a rei tak tak mai dawn" ka pa bawk chuan a ti leh a, kan ṭhenawmte chu anmahni inah an lut sap sap a, u Ringate leh Ngurite an kal sawn rualin kei pawh ka pa'n kan in lamah min kai lut zui nghal.

Khuma ka mut hnu thlengin ka meng kar a, ka pa pawh a la muhil bik lo a ni ang a hnâr ri pawh ka hre lo. Ka insum thei lo chuan tukverh parda chu ka keu a, dawr kawt lam ka en a, Johan-a chu kan kalsan ang ângin a lo la awm  reng a, ka thinlung chhung chu a nâ vawng vawng thei; chu pawh hmangaihna vang bawkin. Mu lovin ka ṭhu ta nge nge a, rilru buai ru zetin ka kut ka insual tir nawk nawk a, ka pa ni se a hnâr ri ka la hre bawk si lo. Zep lovah chuan dawr kawta kal chu ka duh lutuk, Johan-a chu ka khawngaih tak zet a ni. Parda chu keuin ka en leh ta nge nge a, motor nghengin a ṭhu ngawi reng a, a hmai hliam te chuan ka inthunun ve ṭang ṭangna chu a tichhe leh ta vek.

Damdawi bâwm kengin kawngka ka hawng ri rawk râwk a, pindan aṭang ka pa chu a rawn chhuak tih pawh ka hria, mahse ka insum zo tawh ngâng lo a ni. Dawr kawt ka thleng thla chu Johan-a chuan min lo en reng a, min en tlawk tlawk ni ber hian ka hria. Damdawi bâwm aṭang lapua la chhuakin a kámsir pem leh a bianga hliam awm te chu ka hru mawlh mawlh a, a mitah en duh lovin a hliam ngawr ngawr chu ka en char char a, a mit zawng ka en ngam thlawt lo a ni. A kawr bal em em te chu ka ben fai sak zung zung a, biak ai biak loh law law chu ka thlang ta zawk. Ka bia a nih chuan keimah tak paw'n a lakah beiseina ka neih leh phah mai ang tih a hlauhawm, ani chu ka tan a rem ve tawh si lo.

"Rp" ka kal sawn tur chu ka banah a chelh chat a, loh theih lovin kan inen ta, a hmela inchhirna leh lungngaihna lang chuan ka thinlung chhung kilkhawr ber pawh a tinâ vawng vawng thei, a vit hian a vit zawk zawk a ni ber.

"Kei hi bum ka ni Rp" a rawn ti leh a, eng ang paw'n thil liam tawh chu sawi chhuak mah se awmzia a awm tawh mawlh si lo, ka ṭhiannu Thanmawiin lehkhathawn hmangin a lo bum tih chu ka hrethiam nghal mai a, mahse eng nge sâwt tawh chuang ang nì.

"Lo kal tawh suh aw Johan, lo kal buai duh tawh suh. I nupui ngaihtuah la, i lo kal tih te hi hria se chu buaina in neih phah lo vang tih pawh hriat a ni hleinem, chu vangin i hna thil lam te a nih ngawt loh chuan kan khuaah hian lo kal tawh suh" ka ti sêp sep a, kal sawn ka tum chu min la chelh ta tlat mai. 

"Min ngaidam lûl teh, kei mi mawl hian engati nge lekhathawna inziak kha ka lo awih hma em em? Engati nge zawh fiah nachang che kha ka hriat loh?" ti zuai raihin a âwmah min kuah bei thlawp a, a taksa ka nghen ruala ka hahdam lutuk chu ka ṭah a chhuak zawk hial a, ka tan ani chu a la danglam si lo a tin ni!

"Engkim a thleng vek tawh a, a nih tur ang a ni zo vek tawh bawk a, i duh ang ngeiin i chhui chhuak a, keini hi zawng kan rem lo a ni ang e" ka awm sawn hnu chuan ka ti a, a mitmenga inchhir tih hriat lutuk chu ka va'n khawngaih tak êm. 

"I zan tlan dawn avangin tlan chak lo la, fimkhur deuhin tlan la, himdam takin Aizawl i thleng thla dawn nia, mangṭha le" ti lehin ka ding zui nghal a, ka hnung chhawn rual chuan mangang aw zet hian

"Rp" a rawn ti thâm ṭiak a, ka ṭah chhuah mai loh nân ka hmui ka hup tawp a, in chung lam panin ka kal lui zel a, a aw chu ka hre reng a nih chuan ka lêt leh mai ang tih ka hlau. 

"Khawngaihin Rp" tia min koh din a tumna te chu ka hre hla tial tial a, hre reng mah ila ka hawi kir thei tawh lo, a chhan chu ani chuan nupui a nei tawh tlat alawm, keimah ni lo hmeichhe dang nupuiah a nei tawh. 

In chhung ka lut chu ka pa'n min lo en reng a, ka hmu lo lui der tawp a, ka awm dan chu a hriat thiam vek ka ring. Khuma ka mut rualin kan pahniha kan thlalak chu ka en a, nui ve teh mah ila mittui avangin ka hmu phe vek a, ka nui rei thei ta ngâng lo. Ri lovin ka ṭap khur ngawt ngawt a, ka nâ êm asin, ka hmangaih chu ka hmuh phakah leh ka khawih phakah awm reng mah se mi dang ta a ni tlat tawh si a ni. Zing ka tho chu tûk dang ang lo takin ka mit a bui deuh lûk a, ka pa paw'n a hmu vek a, zawhna erawh min zawt ta lo. Johan-a ka hmangaihzia a hria a, ka nâtzia pawh a hria, a lungngaih thlak zawngin engmah min sawi pui lo va, ka nâ tih a hmuh reng vang pawh a ni ang min be tam lo hrim hrim. 

U Ringan Johan-a a hnek avangin khaw chhungah chuan ka lâr leh ta hak mai, mahse engah mah ka ngai duh lo tlat thung. Ka pa paw'n min khawngaih tih ka hria, a thisen, a fanu ka ni si a, min khawngaih chu a àwm hliah hliah. Johan-a chu a reh ta vang vang a, ka pa ṭawngkam kha zawm loh chi rêng a ni lo. Nâ takin a ṭawngkhum miah lo va, mahse a rilru a nâ dawn tih ka chiang. Min rawn hmu tawh lo turin ka hrilh ṭhin tak ná a, a reh leh tâk vang vang si ah chuan ka ngai leh em em lawi si. Ka va'n nêp tak êm, mi pasal ka la hmangaih reng chu a nia, hmeichhe nikhua lo tak zawng ka ni. Hmangaihna chu ka rin phak bakin a chak a, a nghet a, ka u leh naute paw'n ngaihzawng dang neih turin min ti ṭhin mah se ka thei lo. Ka pa meuh paw'n ngaihzawng nei turin min tí min ti ta mai, Johan-an nupui a nei tawh tih kan hriat hma kha chuan min tur ngai miah lo va, tunah erawh pasal nei lovin ka awm mai ang tih a hlauthawng ve ta te pawh a ni mahna le.

Kâr hnih hnuah Thanmawii ka hmu hlawl a, amah avanga Johan-a nen kan inkar a chhiat avangin ka thin a rim viau a, mahse kut thlak zawngin emaw ka ṭawngkum ta lo thung. Engkim a thleng vek tawh a, thinrimin awmzia a nei tawh chuang em ni? Ka kut vuan meuhin ngaihdam min dil a, Johan-a nen kan inngaihzawn laia min thik theihzia te, Johan-a a duh ṭhin zia te, lehkhathawn thlengin a sawi chhuak vek a, ka biangah mittui a luang a, mahse engtin mah ngaihdamna thu emaw thinrimna thu ka chhak chhuak ta chuang lo. A sâwt tawh lo êm alawm, Thanmawii lakah chuan ka thinrim rei lo hrim hrim bawk a, ka tum ber leh ka tih theih awm chhun chu dam chhunga nulat emaw pasal neih loh tluan a ni ta.

"Rp" thim zing aṭanga min kotu aw chu tu nge a nih ka va hre chiang si êm, zan zanah leh nghal eng nge a rawn tih leh dawn tâk!?

"Khawngaihin inbia ang" dawr chu ka khar chhunzawm mawlh mawlh a, ka hmu sual nge ni a hmel chu mutmu tuah ṭha lo hmel a pu a, thla a liam hnuah kan inhmu leh ta chu a ni a, mahse amahah chuan beiseina neih ka tum tawh lo bur. 

"Khawngaihin" tih leh ka bana rawn chelh a rual nghal a, min pawt kal dawr dâwr a, dan ka tum miah lo te chu a mak ka ti lo rêng reng, ka hmangaih tlat si alawm, chu vang tak pawh chuan keimah leh keimah ka inten hluah hluah.

(End of Part II)