SUMO DRIVER By Havali Adam (LAST CHAPTER)

SUMO DRIVER

By

Havali Adam

Last Chapter 48

Kâr khat chhung Aizawlah kan châm a, Awmawma hliam neih vang a ni pakhat. Kan khaw lama kan hawn dawn tûk chuan ka chhungte'n an phal lo hle a, u Duhawmi te chhungkua erawh u Rinawma hna avangin an chhuk leh tawh thung a, chu vanga keini chhungkua min ui em em pawh chu an nih ka ring. U Vlite nufa ni se kan khuaa lo zin chhoh ve an duh tlat a, a fanu leh kan fate an inkawm ngeih em em bawk a, tunah chuan ka duhthusam ang ngeiin kan chhungkuaah hlimna a rawn awm ve leh ṭan ta.

Kan khua kan thlen zanah putea te inah kan lêng chho nghal a, u Vlite nufa an hmu chiah chu an hamhaih ve hle. Rei erawh a ni lo va, u Vli zawk chu a lung a chhe leh a, kan haw thlak hnuah pawh pasal nei fuh lovin ṭhen tawh mah se a hma lawkah hlimna tam takin a hmuah thu ka hrilh mawlh mawlh a, a pasal theihnghilha hlim erawh a la harsat khawp mai. Chutih rual chuan hlim te chu a tum ve tho va, keini chhungkua min awt bawk nen thinlung taka nuih chu a la harsat mai chauh zawk a ni. A fanu tan hlim se, a fanu tan nun thar nei se, a fanu tan leh ama tan pawh hlim takin khawvel hmachhawn tawh se ka duh a ni. 

Kan bula thla khat chuang an awm hnu chuan Mazara service rualin Aizawlah an chhuk a, ka pate bulah a awm zui nghal a, Aizawla kan awm ho lai khan ngaihdam indilin kan inngaidam fel vek tawh nghe nghe. Awmawma chu Term exam a la hla ang reng tho bawk a, a pa'n school chawl rih turin a ti a, kei paw'n pawi ka ti lem lo. A lu hi dam viau tawh angin lang mah se a la dam chiang tak tak lo tlat a, a tauh palh ang tih te hi ka hlau ṭhin. A pa leh a unaute pawh hian an fimkhurpui hle a, an infiam changte hian an dim thei viau.

Kum tin ka pate chu an lo zin chho ta ziah a, hmân anga a hmel nung leh vun ṭha sârh ka hmu leh ta chu ka lawm a ni. Ka nu puihna ni pah fawmin zû a nghei hmak a, a thil ṭha lo tih zawng zawng a bansan vek bawk a, ka nu chu ka fak ve thlawt. Hun kal tawh avanga ka pa inchhir lutuk chuan ṭhingṭhi râwpin ngaihdam a dil a, a sual laia ngaihzawng a neihsan ṭhin thu thlengin a sawi chhuak a, a duh chuan a ṭhen theih thu a sawi hial a, mahse ka nu chuan ṭhen aiin hmangaih taka ngaihdam a thlang ta zawk a ni.

A hnuaah phei chuan ka pa'n ngaihzawng a nei ṭhin tih zawng zawng a ruka a hriat vek thu a sawi chhuak a, chuta ka pa inchhirzia chu pui tak a ni. Kan awm lai leh lai lo pawh sawi lovin ka nu chu a kuah thlawp a, ka nu ni se a ṭap bawk a, kei thlengin ka mittui a tla hial maw le. Ka nu ngaihdamna chu a ropui ka ti a, a hnen aṭang chuan zir tur tam tak ka nei tih ka inhre chhuak bawk. Ka pate an rawn zin chhoh apiangin putea te an tlawh ziah a, hmân ang bawkin ṭhian inkawm ngeih tak an ni leh tawh a, an hlim nui hmel te chuan min tihlim veng veng thei ṭhin. 

U Vli pawh ka pate bula a kir leh aṭanga kum 2 hnuah hna a hmu ve hlauh mai a, ka lawmpui tak tak a ni. Sawrkar hna neiin hlawh nei tawh mah se in êm chu a luah hrang ta lo va, kan inah chuan a tlangnel em em zawk a, ka pate tak paw'n in luah hran tih vel an phal lo hrim hrim. Ka pate ruala an lo zin chhoh apiangin kan fate thil a rawn hawn ziah a, kan fate chuan nêl tak an ni. Amaherawhchu thil an chahin lei an ngen vak ngai lo thung a, a chhan chu Mazara berin a phal lo tlat a, sum hmanga inngainat tir ai chuan hmangaihna hmanga inngainat tir hlut zawk zia a sawi dap dap nî te khan ka va'n hmangaih zual phah tak. 

Kum te chu hriat sen lovin a'n vei dûak duak a, tunah chuan kan fanu paw'n kum 5 lai a tling ve ta. Hmeichhia tih takah a ṭawng theiin a ute ho thik a ching em em a, Hlutea naupan lai ang chiah a ni. Unau inkarah hi chuan thikna a awm ve châwk ṭhin a, mahse thikna emaw thinrimna an neih paw'n rei a ni ngai lo. Fate enkawl kawgah hi chuan ka pasal hi ka chhuang tak zet, tu mipa mah hian an tluk ka ring tawh lo. Kei chu hmeichhia ka ni a, fa enkawl kawngah mawhphurhna sang zawk leh hautak zawk chang tura ngaih ka ni a, mahse ka pasal Mazaran kan fate thu ṭha a hrilh dan leh a kaihhruaih dan chu entawn chang ka ngah mai. 

Kan fate hian an ngaiin an hmangaih em em hlawm a, Duatpuia ngat phei chuan chet kawngah leh rit lâk kawngah a awl ve ta fô. Ani hi chu kan fa hmasa ber kha a ni miau a, a naupan lai paw'n thiktu a nei hman vak lo bawk nen a pa'n a awm tam ber hrim hrim a, a pa nen an inkawm ngeih em em lutuk hi chu a naute ngei paw'n an awt ṭhinin ka hria. School-ah a hmei a pain ṭhiante a ngah a, a lehkha thiam theih avanga ṭhian ngah a ni tih amah ngei paw'n ka hnenah a sawi tawh, mahse maw a mak letling zawk, a ṭhiante aia a ngaih pawimawh zawk leh a ṭhian ṭha ber chu a pa a ni tho tho. 

Duatpuia chang a ni lo, Awmawma te, Hlutea te, Duhsaki te pawh an bang chuang lo nasa mai. Fate hi chuan pate ai nute an ngaina zawk ṭhin an ti a, keini chhungkuaah chuan nu leh pa an ngainat dan a inang reng. A chang phei chuan kei ai an ngaina mah zawk em âw te ka ti rum rum a, chuti ang taka kan fate'n an ngaih chhan chu eng dang vang a ni lo, ama'n a zir miau a ni. Mazara hi chu mi mak tak zawng a ni chiang e, lehkha zir sang lo e ti lo hian a thusawi reng reng hi lehkha zir sang tak tak te thusawi ai paw'n a ril a, a dik a, hriatthiam a awlin zawm a awl em em ṭhin.

Duhsaki kum 5 a nih cham kan lawm zan te kha ka la hre reng, hriatna ka hloh te a nih ngawt loh chuan engtikah mah ka theihnghilh tawh lo ang, pasal ka neih hnua ka nuih nasat ber a ni bawk. Duhsaki tê zit zet chuan Tape-ah hla a play a, sap hla ri buan buan chi a play reuh a nih chu! Kan fate hi chuan hla an ngaithla hnem hlawm em em a, a bikin Duhsaki hian a ngaithla kual nasa a, kan kum a inthlauh tehreng nen kan hun lai hla te chu lâmrem pui nuam a ti tlat lawi a, sakpui erawh a la thei chiah lo. A piancham kan lawm zan chuan a pa lâm turin a ti ta alawm, Mazara chu a lâm lo chiang teh asin!

Duhsaki lah a ṭap leh ta nghal a, Mazara chuan a koki chhuan tawp a, a pa kokia su nghauh nghauhin a lâm leh lawi a, a nui leh vak vak reuh a, a pa hnar leh beng vel a pawt sawi kual vel tak chuan ka nuih a tiza ta a ni. Duhsaki hi chu a danglamin a mak ve hrim hrim, ṭawngtheih lamah ni se a u Hlutea a chhun em em a, a pa muthilh tui laia a hmai lo ziah rán sak te hi a ching thei reuh hle. A ute zawng zawng paw'n an tih ngam loh tih a nei ta fô mai a, hmeichhia a nih bik vang pawh a ni maithei, Mazara hian a dawhthei miah miah khawp mai. 

Zan khat chu Mazara a dam lo va, chutah chiah chuan ka fate lo felzia ka hre thar mawlh mawlh a ni ber. Hlutea leh Awmawman zo artui lei tur an zawng nghal a, Duatpuian ka chet ve ngai miah lovin a pa chu a buaipui char char a, damdawi a ei tir bawk a, duat thiam tak an ni. Keiin duhsaki ka paw mu thung a, chumi zan ber kher chu a ṭehiar zual a, a ute hovin pawm an tum paw'n ka puak mut chiah a duh a, a pa dam loh vangah ka puh ta ringawt. Ka fate awm danin ka thinlung chhungril a tihlim lutuk chu ka mittui a hnâm hial thei a, a tukah chuan ka pasal bulah

"Keini hi khawvela nu leh pa vannei ber ka ni Mazara, heti ang em ema kan fate'n an nu leh pate min hmangaih hi ka ring pha ngai lo, an kum rualpui angah ngat phei chuan; kan fate hi an fel tak zet" ka ti nghe nghe bawk. 

Kum 3 kal ta aṭang khan Mazara chu kan khawtlang YMA President-ah an la thlang tling char char a, a mak ve ngawt mai. Amah tak pawh inthlan zanah a kal chuang lo, an lo thlang tling ve tawp a, chu chuan mi ṭha a nihzia a tichiang hle bawkin ka hria. Khaw khat YMA President hial ni ve ta chu zan lama chhuah a nei ta fô va, khawtlang tana thil rel te a ngaih chang a awm a, Duatpuia leh a naute pawh an rilru a danglam ve deuh tawh a ni mahna Mazara kalna apianga kal ve zel an tum ta lem lo, mahse Duhsaki erawh Mazaran a la hruai ziah tho va, a ninhlei ngai lo a nih hmel.

Khuangchawi thla kan chuangkâi leh tawh bawk a, boruak chu a thlasik nghal em em a, tun ṭum chu thlasik a nâ deuh dawnin ka hria. Ka nu nen pawh kan inbe khât lem lo va, kâr khatah vawi thum hi a tlem berah kan inbe ngei ngei zel. Krismas leh kum thar chu kan khuaa rawn hman chhoh an tum a, keini paw'n kan lo hnial hran lo. Kan fate tan Mazara service haw hi ei tur eng eng emaw ni an lo thawn ṭhin a, nun pangngaiin ka nung leh tawh hlawm bawk nen an túte chu ral khat aṭang paw'n a rawn duat thei hle. 

Thla hnih leh a chanve a ral a, Krismas nî chu kan thleng thûak tawh a, kan phal lo chung ka pate lam aṭang naupang Krismas thawmhnaw kan dawng ṭeuh mai a, han thawn lêt dawnin an lo thawn vek tawh bawk si. Mazara chuan an thawmhnaw rawn thawn pakhat ṭheuh lâin a dang zawng chu khaw chhunga rethei zawk te a pe ta hlawm a, a thil tih ka pa'n a hre chiah chu sawi tur hre lovin a ngawi reng a, a thu rawn sawi chhuah hmasak ber chu Mazara a tluk loh thu leh a ngaihsan thu a ni. A sawi duh tâwk mai dawn emaw kan tih laiin 

"Keini chuan sum kan ngah ngei e, mahse keini aia dinhmun hniam zawk te ṭanpui nachang kan hre si lo. Khawpuimi nih leh mi hausa nih hi a lo nuam tawp lo ve, thingtlang aṭang hian nun bul ṭan ṭha leh dawn pawh ni ila ka hnial miah lo ang" a tih zawm ta duah a, Mazara a ngaihsanzia a thup lo va, Mazara erawh ka pa thusawi avang chuan a inthlahrun phah viau thung.

Krismas nî hma chiahin ka nu leh pa leh u Vlite nufa an rawn thleng a, putea te chhungkua kan ko thla bawk a, chaw kan ei khawm nghal ringawt. Zanah Duhsakin hla a play leh reuh a, a pu chu lâm puiah a sawm a, Mazara ang lo takin a lo lâm pui ve mai bawk. Ka pa mai ni lo pute thlengin lâm puiah a sawm a, kan Duhsaki hi zawng lâm mai bakah zai thlengin nuam a ti a, kum 5 mi lêk mah ni se fiah vak lovin a hla phuah chawp a sa rât rat thei tawh a, chu chuan min tihlim hlawm phian bawk si. Krismas nî a rawn ni a, kan zavaiin kan inkhawm a, Tetei leh Duhsaki inkai vel chuan min tinui nasa khawp mai.

Thingpui leh chhang an lâk dawn paw'n an la inkai tlat a, mahse an buai phah ta a ni. Inkai tawh lo tura kan tih chuan an inkai lo ve mai bawk a, kan khuaa thla la ṭhin kovin thla lakna hun te kan nei a, kan chhungkua bik chuan vawi hnih kan la nghe nghe. Thla latu chu ka pa'n pawisa a pe nghal a, ṭul ka ti vak lo va, mahse a pe tawh miau bawk si a, ka sawi zui duh ta lem lo. Tlai lamah ruai kan ṭheh a, fate nen kan ni luai luai a, ṭhenkhat tan chuan kan hnawksak khawp ang le. Chaw leh sa lah chu ka la ei tui em em zui a, Mazara ṭhianpa Thansiama fatu a lo ni bawk nen sa chêk ka hawn deuh ṭeuh a, a tih chi tak tak. 

Kum hlui thlah zan mawlh chu a va nuam tehreng êm, hlim lutuk avangin hnuk a ulh thei tih ka hre ta fô mai. Tlantean a ngawihzawng a rawn hruai ve bawk a, pitei leh putea paw'n an hrethiam tawhin ka hria. Ni e, hrethiam rawh se, hmangaihna hi zawng a mak êm a, Tlante pawh hian a hmangaih ve tak zetin ka hria. Amah Tlantea ber chuan Card den a rawt a, putea leh pitei chenin an tel deuh vek a, an hlim hlawm khawp mai. Kei leh Mazara erawh tap chhakah kan ṭhu dun a, a kap karah ka ṭhu awn dûai a, indawl chuh tih vel chu an infiamna a ni deuh a, mi dang hlim thawm vang ai mahin ka bula mi avang zawk chuan ka hlim a ni. 

A hmel en tumin ka hawi chho a, a hmelṭha tulh tulh ni berin ka hria. A pá tawlh tawlh bawk a, kum thara YMA hruaitu atan inthlan an nei zo chiah a, President êm ni tawh lo mah se zû rui ṭhenkhat an lo vui a ni awm e. Insual buaina a chhuak hial a, amah paw'n a ṭhelh nghe nghe a, zep lovah chuan engah mah an thlang tling lo chu pawi ka ti miah lo. An rawn haw tirh khan Tlante pawh a rawn lungawi vak lo kha a nia, Mazara chuan ka rilru ang chiah a lo pu thung. An thlang tling tawh lo chu a lawm a, a lawm chhan erawh hun danga min hrilh a tum a, ka hre châk zek zek tawh hle. 

Ka awm dan naupangchhia zet avang chuan min raw en chhuk run a, a kiai zui nghal suk a, a va han pá chiang tak êm. Kum lamah upa telh telh mah se a hmel erawh a ṭha tulh tulh a, kum dang zawng aiin ka la hmu hmelṭha ber bawk. A tlangval lai ang lo takin fa palî lai kan neih ve tâkah chuan a taksa a thau mawi tâwk em em a, nula tam tak tan pawh iai awm loh tak a ni. Chu erawh ka phal lo nasa hle a, melh khat paw'n melh lo se, duh pawh duh lo se, hmelchhia ti hliah hliah zawk se ka ti ṭhin. Tlantea ngaihzawng ṭhianu'n Mazara a lo duh tih ka hriat zan te khan ka awm mai mai thei lo va, Mazara erawh a nui tawp ringawt. 

"Kum thar chibai, lehkha khera ka ziah i duh leh em?" ti supin ka hmuiah chuan a rawn fawp vawng vawng a, nam sawnin banga sana intar chu ka en thuai a, minute 1 velin dar 12 a lo pel tawh chu niin, ka awm dan siam remin ka tho ta vat. 

"Dah r'u dah r'u, kum thar a ni tawh a nia, nang pawh lo chhuk thuai rawh Mazar" card an denna bula zu dingin ka ti zung zung a, naupang thlengin kan la meng ṭhap a, ka ṭawng dan sawk sawk chu mak an tih hmel hlawm hle bawk.

Ka sawi ang chuan ṭhutthlengah an ṭhu ta ṭhap a, Bible keuin Pathian thu tawi tê ka chhiar a, ka ṭawngṭai zui nghal a, kum tin lawmthu sawiin hun kan hmang ziah ṭhin a, mi dangte angin thlarau pawl tak ni ve lem lo mah ila hun hi chu kan hmang ve ziah zel. Kum dangah chuan Mazara hlirin a hmang ṭhin a, kumin erawh keima'n hman ka duh ta zawk a ni. Rei tak hun ka hmang lo va, kawng ṭhenkhatah hi chuan naupangte pawh hi hriatthiam an ngaiin ka hria. Nin chang te, mut chhuah chang te an nei ṭhin a, chumi hre reng chung chuan hun kan hmang rei ngai lo a ni. 

"Ka zawhna khâ?" khuma kan mut hnu chuan a rawn ti sup a, Duhsaki a muhil fel chiah bawk nen ka tho va, ani'n dim zetin kan fanu chu a sir berah a sawn phei a, kan chet dan naupangchhia zet avang chuan ka khi ver ver ringawt. 

"Kumin aṭang chuan a ngai tawh lo ang, puitlin ka'n zir ve tawh ang e, kan la inngaizawng emaw ka ti thut zel" a âwma bei hle hle pahin ka ti sêp sep a, kum dangah chuan kum thar inchibai nân lehkha min thawn ṭhin ang kher khan ka duh ṭhin a, a ti ziah bawk a, mahse kumin chu ka danglam ve ta deuh a ni ang. 

"Inngaizawng reng ang" thum dam ruiha a rawn tih chuan ka nui sak a, ka chhoh melh ral zawm zat a, ani'n min lo fawp vawng vawng a, a awm sawn hnuah pawh min fawp leh tawk a, chuti ang chuan vawi thum lai chu a ti nghe nghe.

"Engtik lai pawhin ka ngai che a, ka hmuh mai loh che chuan ka zawng ruai che a, engtik lai pawhin ka ngaizawng reng che tihna a nih chu!" ka ti chiah chu ei loh hmel zet hian a hmui a tisawi a, a chal a tichuar nâng bawk a, a hmel chu hmelṭha lo titu tan pawh hmel pá tak a nih ka ring tho. 

"Dawt ka sawi lo" nui ver vera ka tih leh chuan nâ lo tê tê hian ka biangah te, ka hnarah te a rawn piai kual den den a, a hmel pawh inthlak danglam tial tialin hmangaihnaa khat mitmeng chuan min en a, ka tuiral lo chauh zawk maw le.

"Ṭawngkam inti thiam vel reuh lutuk mai, Duhsaki tê hian a chhun chiang che a ni" bul lam mah maha a tih chuan ka nui nghawr dat a, amah hnung chhawn zawngin ka inher a, a ke a lo tawm sa bawk nen a ke lian leh lum nuam takah chuan ka ke ka rawlh zui nghal a, khumah rau rau hi chuan kan fanu a mut hma chu awm dunna hun kan nei lutuk lo ṭhin.

Zingah chuan kan nupain kan tho hmasa ber a, ei rawng kan bawl dun thlap bawk a, mi dang chu kan kai tho duh ta lo law law. In hnuai lamah ka nu leh pa an mu a, sitting room chhuatah kan fate pathum an mu a, an mut ṭhinna khumah u Vli te nufa an mu bawk. Dar 7 velah ka nute an rawn chho a, thlasik a nih avangin mut a tui duh em em a, a tho hma peih ka ti ang reng. Mazaran bawngsa a siam a, ka pa chuan a pui nghal bawk a, ka pa ṭawng deuh siam siam mah se Mazara erawh a ngawi leh reng tawh, zing karah ngat phei hi chuan ṭawng tlem ve tak a ni. 

Kum thar chu hlim tlang takin kan hmang a, chaw ei khawm kan nei deuh reng a, Mazara patea te lam nen an rawn zin phei fô va, a nu unaunu te pawh an lo lêng an lo leng thla ve ta mai. A pu erawh a reh hmak thung a, cheng khat man thil kan fate a lei pawh ka la hre lo. A túte an ni ve a, lawm a hnêkin vawi khat mah kan inah a lo la lut lo va, kan fate phei chuan tun thlengin pu dang an nei tih an la hre lo. Mazara berin a sawi ri lo tlat a, inti fel tak ang ziazânga lo hrilh thawt thawt kha ka duh lo, Mazara rilru ka tinâ mai mai ang tih ka hlau. 

Kâr hnih dâwn an châm hnu chuan ka pate pawh Aizawl lamah an chhuk a, Mazaran thlai rah a hawn thlak tir ṭeuh a, an lawmzia chu ṭawngkâin an sawi chhuak thiam lo ni berin ka hria. Thla kan hmang ral a, naupangte pawh school an kal ve leh tawh bawk a, zan lamah Mazara a meng rei thei thung hle. Vei nei hmel hi a pu reng zel a, a duh hunah min hrilh mai rawh se ti rilruin eng zawhna mah ka zawt duh lo va, zan khat erawh chaw kan ei laiin thil min sawipui tur a neih thu a sawi chhuak ta nge nge a, ka hriat châk rualin thil ṭha lo lam a ni ang tih erawh ka hlau ru ang reng. 

"Aizawl lama insawn thlak i duh ang em?" a zawhna avang chuan ka en nghal vat a, ka pa'n vawi tam a sawm tawh a, sawrkar hna pek thlengin a tiam hial a, mahse kei chu inrawlh ka tum lo, a thu tlukna chu ka thu tlukna a ni mai. 

"Ka hre lo le, ka pa sawmna che kha i pawm ta em ni?" ka tih chuan a lu a thing leh lawi a, a rilrua awm áwm ka hre ta hauh lo, eng tak chu ngaihtuah ang maw!

"I duh nge duh lo sawi teh Numam" a rawn tih leh tâkah chuan thil ṭha lo lam a nih ka ring thei tawh lo, a nupui ka nihzia lantirin min rawn thlap a, ka hriatpuina leh ka remtihpuina thlap a duh a nih chuan kan chhungkaw tana ṭha lo tur a ni lûl lo ang. 

"I thu tlukna ang âng ka pawm tawp aw Mazar, Aizawla awm i tih leh awm a ni mai, mahse eng nge awm thlak i duhna chhan? Ka pa sawmna che i pawm bawk si lo va, eng emaw tak chu a awm ti raw?" ka ti ta zawk a, a buk nghat chuan a sawi tum ka hre leh chuang der lo.

"Dam chuan kan la upa ve ngei ang a, Sumo hi ka khalh reng thei dawn lo. Dawr siam ka duh, Aizawlah motor siamna dawr emaw a khawl hrang hrang zawrhna dawr siam ka duh a ni" a thusawi chu ka rin loh lam a va ni chiang ém. 

"A va ṭha ve, ka hausa thûr thur dawn a ni maw?" fiamthu tak chuan ka ti nghal siam siam a, ka nui zui hak hak bawk a, mahse ani erawh a nui ve hauh lo, a thutak hmel em em zawk.

"Hausak lam ka rilruah a lang lo, ka chhungkua ka chawm theihna tur hna thianghlim tak neih ka duh mai a ni" dam dap hian a ti a, ka nui tawp riai riai a, fiamthuin sawi mah ila ka inthiam lo hnuhnawh leh ta tho. 

"A bikin nangmah" a tih zawm leh nghal zat a, ani hi chuan kawng engkimah min dah pawimawh hmasa ber ziah a, kan fanu Duhsaki phei chuan ka hmui leh ka biang vela a fawh te hian a lo thik nasa ṭhin.

"Ka hmangaih che" tih chauh chu chhungril hlimnaa khatin ka sawi a, chu thu chuan a huam zau êm asin, a duh ang ka duhpui ve a ni tih leh a kipa kawia ka thlawpzia pawh a hriat nghal vek ka ring.

"YMA President-a min thlang tling lo ka lawm chhan kha hei hi a ni a, lo tling leh ta ila chuan a buaithlak zo vek ang" hriat nuam zet hian a ti thum dap dap a, a kut chu lâ kangin ka fawp vawng vawng ta ringawt. 

A tukah chuan kan fate hnenah Aizawla awm an duh leh duh loh a zawt a, kan fate chuan an lo duh hlawm hle a, kei paw'n khawpuiah kan awm ngei dawn tih ka chiang ta. Ni e, awm thlak a ṭha zawk a ni mahna le. Kan fate tan tak pawh zirna lamah hma an sawn phah ka ring a, kan khaw school-te a ṭha lo ka tihna lam ni lovin, khawpui hi chu khawpui nge nge a ni ṭhin. Mazara tan ni se hnathawh a awlsam phah ang a, ka tan tak pawh ka nu leh pate nen kan inpawh lehzual phah bawk ang a, inpawh tawh viau mah ila khaw hrana awm reng chuan duh angin a inpawh tak tak theih loh ṭhin. 

Thla tawp lamah ka pa a rawn zin leh a, a lo kal chhan pawh kum dang ang bawk a ni. Kum 5 chhung zet kha chu sawrkar hna pek tumin thla tin Mazara a titipui ziah a, sawm ngawrh thei viau mah se khang kum kal ta chhung zawng khan Mazara chuan a pawm duh ngai lo. Chungte chu a zahawmna pakhat niin ka hria, ka pa thuneihna hmanga sawrkar hna thawh nghal ringawt kha a duh lo bur ni berin ka hria. Tun ṭum erawh Mazaran a thil tum a sawi chiah chu ka pa pawh a meng phawk nasa teh e! 

Motor siamna dawr vel aiin Motor changkang tak tak zawrhna tur dawr siam a kawhhmuh a, mahse Mazara chuan a duh ṭhak lo. Ka pa paw'n luhlul a ti ve ngâng a ni ang vawi tam a sawipui hnuah a duh anga tihpui chu a tum ta zawk a, chutah chiah chuan mi dang laka Mazara luhlul zia leh khirh zia ka hre ve chiah. Ka pa puihna tel lova dawr siam chu a lo tum reng niin, ka pa ngaihdan pawh a pel ve ta deuh a ni ang e. Duh lo eng ang mah se puih a tum ruh hle a, kei paw'n ka pa puihna chu duh mai se ka ti a, ka sawi pui bawk a, ani erawh a ngawi ngul ringawt.

Kâr hnih a ral tihah ka pa chuan phone kaltlangin dawr tur a lei tawh thu leh a zau ṭhat thu a rawn sawi a, Mazara chuan engmah a la sawi duh lo thung. Ka pa chu a lo zin chho leh ta nge nge a, ka nu pawh a rualin a rawn tel ve hial a, an makpa a nihna angin Mazara chu an han titipui tak tak alawm, putea leh pitei phei chu an nui tawp ringawt. Ka pa chuan kan awmna in tur nen lam a rem vek tawh thu a sawi a, a sawi dan chuan pasal ka neih hmaa kan in pakhat, luah loh a lo awm a nih hmel a, thil a kaw duak duak leh lutuk chu ka hlauthawng dawn hial a, mahse remchang ka ti viau lawi bawk si. 

"Ka nunna i chhan a, i puzawn ka ni bawk a, ka tih theih zawng a nih phawt chuan eng pawh min dil rawh, tih hlawhtlin loh ka nei lo ang, ka tiam a che. Ka thu awih la ka duh ngawt mai, eng ang pawhin pui che mah ila kan tana i ṭhatna hên zo tur engmah a awm thei ngai chuang lo ang" ka pa chuan a ti charh charh a, thinrim deuh si, Mazara laka inthlahrung deuh bawk si nen a ṭawng dan a thunun hman lo ni maiin ka hria. 

"Tam lua chu a ni rih lo, mahse bul ṭanna tur ka nei tho asin" Mazara chuan a la ti hram a, a hmel aṭang ka pa puihna dawn chu a pawm tih ka hrethiam vek tawh thung a, ka pa a zah rualin inthlahrunna chen a nei tih thlengin ka hre vek bawk. 

Thla hnih a ral a, Duatpuia te unau pawh First Term exam an nei zo chiah a, Aizawla chhuk hun tak a niin ka hria. Ka pate chu ka nu nen an rawn chho leh a, Aizawla kan chhuk nî chuan kan fate chu hlim tak an ni. Duhsaki thlengin a u bik hliah hliah Tetei nen inkawm a châk tawh thu hlir a pi leh pu bulah a sawi char char a, mipaho lah bengchheng bawk, kan ri thla nuaih nuaih mai. Ka pate'n motor an rawn ken loh avangin Sumo-ah kan chuang ṭhap a, Mazaran a khalh a, kei a bulah ka ṭhu a, khalh chak si lo leh dam deuh si hian min thlen pui zung zung a, chu tak chu mi dang paw'n a motor khalha chuan nawmna an sawi ṭhin chu a ni.

Tlai lamah Aizawl kan thleng thla a, u Vli te nufain min lo hmuak a, inpuiah kan innghat phawt a, kan khua chu ka ngai nghal ringawt a nih chu! Zanah pitei te nen kan inbia a, pitei hi ka ṭhian neih chhun a ni ve chiang em asin; kan kum inthlauin kan inlaichin dan dang daih mah se. Kum 15 chuang zet thingtlanga ka awm hnuah khawpuiah ka awm thla leh dawn chu a ni si a, ka huphurh nge ka phur pawh ka hre lo. Thla lah chu a êng em em leh nghal a, Duatpuia hovin in kawtah naupangho an infiam a, chaw ei kham daih ni tawh mah se pawnto hla chi hrang hrang sain an intihlim a, nuam an ti bawk a ni ang an thlan a tla nasa hlawm hle.

A tukah chuan kan in turah kan va kal a, kan awmna tur chu ka hre chiang lutuk, pasal ka neih hma daih aṭang tawh quarter ang deuh reuha mi luah ṭhin kha a ni a, kan in ni mah se sawrkar lamin quarter atan ka pa an dil a, chu vanga enkawl chhunzawm lutuk lo chu kan ni nghe nghe. Quarter a nih lohna erawh a lo rei thawkhat ve tawh viau zawk hi a ni a, mi dang paw'n luah enah an en lo a ni ang, a chhungte chu a hluiin a bal tawh hle. Ka nu'n hnaa kal lovin min tihfai pui a, u Vli a hna a chawl hmiah bawk a, ni khat chhungin in tihfai chu kan tlingtla thei hram. 

Vawi leh khata bungrua zawng zawng ken thlak nghal vek theih a nih loh avangin Mazara chu kan khaw lamah a han lâng zak zak a, zing karah chhuakin tlai lam dar 1 velah a lo thleng thla leh ṭhin a, ni 3 lai chu in chhung bungrua thiarin hun a hmang nghe nghe. Kâr khat hnuah chuan kan in thar pawh a changtlungin a hmel hmuh a nuam ta hle a, ka pa'n rawng hnawih thiam nen lam a chhawr vek a, Mistiri ṭhenkhat a chhawr bawk a, kan luah luh nî chuan putea te pawh an tel ve a, kan hlim dar dar hlawm hle. Mazara rilru ṭhatna avangin kan chhungkua keh chhe tawh kan inzawm khawm leh chu a ni si a, tû tan pawh ka pasal ka hmangaih em em Mazara chu a hlu a ni.

Kan fate paw'n second term exam hmain school an lut hman vek a, school chu nuam an tih rualin nuam an la ti lutuk lo niin a lang. Duatpuia thlengin school-a ṭhian thar siam chu an harsat hlawm em em a, a ṭawngthei ber Hlutea paw'n nuam a ti vak rih lo chu a ni e. Duhsaki erawh school kal chiah tih takah nuam a ti em em thung a, ṭhian pawh a nei nghal der. Kar hnih thum a ral leh meuh chuan a tir ang em em an ni ta bik lo va, ṭhian an nei chho ṭan a, nuam an ti chho zel turah ka ngai tawp. School an rawn ban te hian an awm dan leh an thil tawn zawng zawng min hrilh vek zel a, an ban rual chang phei chuan a indawta sawi tir an ngai hial zel. 

Mazara erawh a buai mawp mawp thei hle a, mak tak maiin thla 5 a ral dêk dek a, ka pa puihna zawng zawng rul lêt thei khawpin sum a hmu chhuak nghal a nih chu! A vei ngâng a ni ang, ka pa chu pawisa a pe kir leh vek a, ka pa lahin a lo la duh awzawng si lo va, u Vli zawk a pe ta ringawt. U Vlin ka pa a lo pe ve leh a, ka pa chuan a túte ro atan tiin bank lamah a dah ṭha ta a ni. Kan innei rei telh telh a, Mazara rilru nghehzia leh mipa dik tak a nihzia ka hmu chiang tawlh tawlh a, a rinchhan tlâkin chhungkaw pa ber nih chu a tlin ngawih ngawih hi a ni tawp. Khaw khata awm ta na nà ná chu ka pate pawh an lo lêng phei deuh reng a, chawlhnîah keini kan lêng phei thung a, chhungkaw hlutzia ka hre thar leh ṭhin. 

Motor siamna tur bungrua leh zawrh tur bungrua lei a ngaih avangin Mazara chu Mizoram pawnah a zin a, ni 4 emaw ni 5 vel châm tura kal a ni a, a mi chhawr te'n hria se chu a kal a ngai miah lo ang. Chutah chuan zan khat lêk pawh inriahsana mu thei lo ṭhin chhungkua kan nih tih a lang leh ta alawm, Mazara chenin a mu thei bik lo. Kan inah ni lovin inpui lamah kan insawn phei rih a, ka nu leh pate chuan kan fate awm dan chu mak ti tak an ni. Mazaran phone kaltlangin Duhsaki a be muhil hmasa ber a, a dawtah Hlutea, an indawt chho zel a, Duatpuia pawh thup tum viau mah se a pa a ngaihzia chu a thup thei ngang lo a ni. 

Kei nena kan inbiak ve meuh chuan zing dar 2 leh a chanve a pel daih tawh zel a, chuti ang chuan zan 4 ngawt hun kan hmang a, zirtawpnía lo haw tur a ni a, kei leh kan fate chu kan phur hlawm hle. Kan inah ka lo nghak a, kan fate school an kal vek a, Aizawl khaw chhung a rawn thlen tawh thu a sawi te chuan ka za cheng thei. Kan in chhung ngeia a rawn lut ka hmu chiah chu insum buai lovin a lamah ka tlan phei nghal a, min pawm kang lawp a, kan infawp zui mawlh mawlh a, ka ngai ve êm asin, ka ngai lutuk tak zet. A nazawnga zin a tum tawh loh thu a chhak chhuak mawlh mawlh a, duhthaw fê hian min fawp leh tawn tawn ṭhin bawk.

"Kan fate school-ah i kal teh ang" a tih chuan hnial lovin ka bu nghat nghat a, muangchang lo takin kan chhuak zui nghal a, a rawn haw dawn tih hre vek tawh mah ila rin loh deuhin kan hmu vek thut dawn a nih hmel. 

Duhsaki leh Tetei te kalna school-ah kan kal hmasa ber a, Mazara an hmu chiah chu an pahnih hníhin an rawn tlan phei nghal a, an hlimin Mazara chu zawhna an zawt nasa hle. Tetei chenin an ṭawng mawlh mawlh reuh a, Tetei pawh hi Mazaran a duat em em a, an inngaina tawn hle bawk. Hlutea te school-ah kan kal leh a, keini min hmuh rualin a pa chu a rawn kuah thlawp a, zak miah lovin a ṭap a, a pa a ngai tih hriat zetin a insut feih feih a, Mazara nui hmel mawlh chuan a fapa chu a va thlamuan chiang tak êm. Duatpuia leh Awmawma te erawh High school an rap ve ve tawh a, an Principal berin

"Lunch break ni law law se, in hrua haw nghal mai dawn nia" a lo ti mai a, kan fate ṭhawn thut kan duh thute kan sawi a, rin ai takin a lo phal awlsam a, rei tak erawh kan nghak hran lo. 

Thingtlang angin khawpui school-ah chuan mid-day meal a awm ve tawh lo va, zirlai naupangin Tiffin box an phawrh sap sap laiin Mazara chu room chhungah a lut a, Awmawman a pa hmel a hmu chiah chu rawn tlan chak tak a ni. Zuang titih hian a pa chu a kuah thlawp a, a kein a kawngah a kher bet chial bawk a, Mazara lahin a lo pawm bet hneh nasa mai si a, Awmawma ṭap thawm chuan Lunch room chhung chu a luah hneh hle. Mazara chuan a din ṭhat tir a, a chalah fawp vang vangin a mittui tla te chu a hruk sak leh mawlh mawlh a, ṭah insum nasa tak ka ni. Ban bula lo ding kun ngul Duatpuia hmel ka hmu chiah phei chu ka hmui ka pet fan fân a, rei lo tê hnuah ka hmui ka hup ta tawp. 

Mazara chuan a fapa; kun ngul chunga ṭap chu a kuah a, a lian ve tawh a, ṭah rik chu a zak ve deuh tawh a ni ang. Hnung lam aṭangin Awmawman a va kuah leh hram bawk a, kawngka bulah Principal chu lo dingin kut a rawn beng a, room chhunga mi zirlai naupang zawng zawng chuan an beng ve nghal vek a, school kan chhuahsan meuh chuan motor chhungah kan ṭah nuih hawk hawk hlawm mai. An rualpui te tan kan fate chu ṭahbelh angin an lang mathei, mahse an pa an hmangaihzia leh an ngaihzia hmu thiama hrethiamtu tan chuan ṭahbelh tih theih chí a ni lo.

In kan thlengte chu a pa bulah an tal chawt a, sawi tur an ngah hlawm em em a, Mazara pawh a nui tawp ringawt. Ngaihthlak ber tur hre lovin a hawi kual sêk a, Tetei paw'n a lo pá ve mawlh mawlh a, Mazara a koh hmasak ber khan 'pa' tiin a ko nghal a, keini chuan pawi kan ti teuh lo. U Vli zawk chu a lung a chhe leh ṭhin, a fanuin pa a nei reng chunga ngaihsak a hlawh leh si lo te, Mazara kan fate ang maia a duat em em te chu a hlimna leh a lungchhiatna a ni a, tun ṭum chu Tetei pa dik tak pawh ka dem ve ta. A hma kha chuan a rawn ngaihsak ngai loh avangin engah mah ka ngai lo va, ka thêngthawngah a thawk zui lo hrim hrim a, mahse tunah chuan mi pangngai tih chîah ka ngai thei ta lo e.

"Lo kal r'u le, thei tui siam ang u" ka tih chuan naupangho chu choka lamah an rawn tlan phei nghal sap sap a, an school ban hian thei tui ka siamsak ziah a, min siampui ziah bawk a, a pui a pangin nuam kan ti thei hle. 

Zanah chuan Tetein chaw a ei ve nghal a, a riak nghal bawk a, u Vli pawh a rawn riah phah nghe nghe. U Vli tak hi ka lawmpui, khati khawp khan a dinhmun a chhe ve a, sawrkar hna a hmu tawh te hi thinlung takin ka lawmpui a ni. U Duhawmite nen pawh kan inbe fô va, anni chu u Rinawma hna avangin rawn zin chhoh an harsat ṭhin a, an hman hun pawh kum tawp lam daih a nih hmel. Kan fate chu chhuatah an riak khawm dial a, Mazara chu thawnthu sawi turin an ngen tlat a, a sawi ve mai bawk a, mut dawna thawnthu inhrilh hi chu an bansan thei dawn lo a nih ber hi!

Chhungkawpa berin in a luah lum leh tawh a, kei ngei pawh ka thla a muang a, a chang chuan dawrah ka kal ve ṭhin a, mahse ka awm rei ngai chuang lo. Kan fate zingah chuan Duhsaki hi hruai ngai awm chhun a ni tawh a, Hlutea leh a ute chuan hruai an duh tawh lo hrim hrim. City Bus-in school an kal mai zel a, a changin a pa'n motor-in a thlah leh zauh ṭhin bawk. Duatpuia leh Awmawma kalna school hi kan in aṭang a hla ber a, nuam erawh an ti chho ṭan viauin ka hria. Class-ah a thiam thei pawl an ni zel a, Duatpuia chu second term exam-ah pakhatna a rawn ni nghe nghe a, a luh hun tlai mah se zirlai naupang dangin an tluk chuang lo a nih hmel. 

"Eng nge!?" ring vak lo chuan ka ti a, Mazara lah mi en run chungin ka ke a rawh tlawh sêk a, a laiah Duhsaki a mu tlat bawk si a, kan fanu fing zet chu kan tiharh palh ang tih ka hlau hle.

"Zan dangah a ni mai, zanin chu a chî rih loh" ka ti leh ta nge nge a, lungawi loh hmel zet hian min en a, Duhsakin a laia mut a ngen zan ber khera a ni a, ni lo se chu nupa nun hman pawh pawi ka ti hran lo, mahse a rem lo ve bawk êm a ni.

A tuk zanah erawh Duhsaki chu kan bulah a mu lo chiang khawp mai, chu pawh Mazara vang vek. A ute bulah mutin thawnthu a hrilh daih a, a tum ang ngeiin a muhil tlang nghal a, zan hmasa aṭanga lo insum tawh a ni bawk nen nupa nun ka hmang chiah chu duhthaw zawt zawt tak a ni. Thawm han chhuah chang ka nei leh zauh ṭhin a, ka tum pawh a ni em em bik lo, mahse ka thawm chhuah chu hriat nuam a lo ti leh tlat pek a nih chu! Thla eng emaw zah chhung chu kan awl tawh bawk nen vawi khat mai ni lo kan hmang nghe nghe a, hmâna Mazara chiah chiah kha a la ni chiang e. A chet dan, a zei dan leh a ṭuan thlengin ka pasal dik tak kha a la ni reng a, kum sang chuang dam dun pawh ni ila ka hmangaih reng tho ang. 

Ni khat chu Duatpuia hian cerficate leh pawisa a rawn hawn hlawl a, ka en chiang chu Mizo ṭawnga thu inziahsiakah pakhatna a lo ni reng chu niin, mak ti tak ka ni. Cheng 2000 lai a dawng bawk a, certificate mawlh chuan ka mit a la zawk. An school chhung chauh a ni dawn emaw ka ti a, mahse a lo ni teuh lo. Aizawl khaw chhung High School zirlai zawng zawng intihsiakna a lo ni reng a, ka fapa thuziak chu ka chhiar ta alawm, ka hlim si, lawm bawk si chu ka mittui a hnai leh ta kûarh mai. Ka chhiar zo chu ka thaw huai a, Mazara ka phone nghal a, lo haw tura ka tih chuan a lo haw ve mai bawk a, Duatpuia thu inziaksiaka pakhatna a ni tih a hre chiah chu a lawm ve hle.

"SUMO DRIVER" Duatpuia thuziah thupui a hmuh rualin Mazara chuan a ti sup a, nui sukin a chhiar zawm nghal a, Duatpuian a pa a ngaihsanzia leh khawvela pa ṭha ber a nih tih a ziahna te chu a chhiar zel a, a tawp khar nân thu mawi tak hmangin Duatpuia chuan a pa a hmangaihzia a ziak lang bawk a, pakhatna a ni pawh chu àwm ka ti hliah hliah. 

"Lo hnai teh" tiin a fapa chu a kuah vawng vawng a, Mazara hmel chu chiang takin ka lo en a, rilru nâ hmel a pu tlatin ka hria.

"Kei min chawimawi ang hian ka pa kha chawimawi ve hman ila ka ti ngawt mai" amah bawk chuan a rawn ti leh nghal a, a fapa chu nghet zetin a kuah vawng vawng a, chutah Duatpuia chuan thlamuan tum deuh hian

"Ka hmangaih che pa, chuan maw apu chu i tan pa ṭha ber a ni ve tho alawm" a lo ti ve lûam a, Mazara pawh a fapa thusawi avang chuan a ṭhen ta suk a, a fapa chu nam hla deuhin a chalah a fawp vang vang a, nu leh pa chawimawi thiam em em fapa kan nei chu ka lawm tak zet.

Duatpuia pakhatna nih chu lawm ngei ṭhain ka hria a, ka pa ka bia a, ka nu leh u Vli ka be leh a, u Duhawmite leh putea te lam ka be nghal bawk a, mak tak maiin a lo rem vek a nih chu! Ka huphurh ber u Duhawmite chu Vai ho Holiday a nih avangin kâr khat chawlh an nei dawn a, lo zin chhoh an tum hrim hrim a, putea te lah ṭul lai a ni lo leh zel a, engkim chu a rem vel vek a ni. Mazara pawh a phur ru khawp mai, kâr thar hun remchang hmasa berah chaw ei khawm kan titlu ta a, a tua te pawh chuan kan nghaknghel a ni. Ka pa chu chawlh hmiah a tum a, ka nu leh u Vli paw'n chawlh hmiah an tum bawk a, sa leh chawhmeh thlengin ka pa chuan lei lâwk a tum a, hmeichhia hovin kan phal lo thung. 

Chawlhnî kan hmang zo va, a tuk thawhṭannîah chuan Mazara chu kan khaw lamah a kal a, naupang hovin an zui chho dual a, putea te chhungkua lam tura kal a ni bawk. Kan fate chu school an kal lo hlawm ná a, school chawlh erawh a ni chuang lo, Mazara berin chawl turin a ti miau a, zirtirtute thusawi ai paw'n an pa thusawi an awih zawk tlat a, chu vanga chawl ta chu an ni. U Duhawmite chhungkua pawh chawhnu lama lo thleng turah kan ngai a, thawhṭannî chu a remchang ta berin ka hria. Ka pa leh mi dang hnaah an kal lo bawk si a, ei rawng te kan bawl lâwk hial a, Duatpuia pakhatna nih lawm tum pawh kan la ni chiah lo, mahse chumi ni chu a remchang ber bawk nen kan tum tlang ta ringawt. 

U Duhawmi te chhungkua leh Mazarate chu an rawn thleng rual titih a, kan in kawtah motor a inhung deuh ṭhap a, quarter ṭhin a ni bawk a, kan in kawt hi chu a zau ṭha ve ang reng. Nu hovin ei rawng kan bawl mial mial a, pa hovin sa an siam a, an siam zawh chuan u Rinawma motor an siam ho leh lâwp lawp a, lung fing chin ṭhah an ni tawh bawk nen an titi chu hmeichhe titi nen a inang lo hle. Chawhmeh chu ka'n tem kual den den a, tui hlawm tak a ni. Fa palî lai neiin nu ni tawh mah ila nu ho zingah chuan ka naupang ber tlat a, ka che naupangchhia leh tlat tawh.

"U Mazara hi i la û chuang miah na nge?" u Duhawmi chu ka ṭhen khum ṭhaw ringawt a, Mazara berin a duh loh mai bakah keimah tak paw'n ka thiam lo, ka û chuan ka buai vek a nih kha le.

"Ni dawn tak! Mazara hi i û miah lo a ni maw? Awi, nang hi chu âw...ama'n a sawisel lo che em ni Numam?" ka nu chuan a rawn ti ve nghal a, bai tui zet hawp pahin ka bu nghauh nghauh a, u Vli pawh a lo nui ver ver tawp.

"Mazara te chuan a dawhthei ve chiang êm mai a! A hming puma a koh lâwl lawl paw'n engtin mah a ti ngai lo, a rai lai te khan dawhthei ka va'n ti ṭhin tak!" pitei chu ka melh vat a, sawi chhunzawm tawh lo turin ka mitmei a, ani lah chuan min nuih duh lêk chauh leh nghal.

"A nih vel ka ring reng a ni! I sawi tâkah chuan kan feh ṭuma maian bai saktu pawh kha u Mazara hi a ni hrim hrim, a ni chiang lutuk, khang hun lai khan Numami hian a bai thiam awzâwng lo" u Vlin a rawn ti ve leh ta, ka nu'n min rawn zawh chuan

"Ni e" ka lo ti ve mai a, ka nui var var a, mak an tih rualin an nuih a za bawk si a, u Duhawmi chu an chanchin ka zawh zawm daih a, ka chet ṭawp lai sawi chhuah reng ka duh bik teuh lo mai.

Ni a tlâk fel hnu chuan Duatpuia leh a naute an inbual nghal sap sap a, in kawtah an infiam nasa bawk a, an thaw a sa hlawm hle. Chaw ei hmain hunserh ka pa'n a hmang a, mi dang chu kan ṭhu ngawi ṭhap a, ka pa chu a hnuk a rawn ulh leh ta. Mazara en chungin ngaihdam a dil mai bakah lawmthu a sawi mawlh mawlh a, u Vli chungah pawh ngaihdam a dil nawn leh bawk a, ka nu pawh a ṭhu hle hle thei lo. Ka pa'n hun a hman zawh chuan a ding zui nghal a, ṭah chhuak zetin lawmthu leh ngaihdam dilna bawk chu a sawi a, Mazara chungah mai ni lo u Rinawma chungah pawh lawmthu a sawi nasa hle a, darkar chanve dâwn hun kan hman hnu chuan chaw ei turin kan tho ta sap sap.

Zanriah kan ei kham a, kan fate chu hlim zetin in kawtah an infiam a, pawnto hla bawk chu an sa leh a, puitling hovin veranda aṭang kan thlir ṭhap a, ka va'n hlim tehreng êm. Thla êng viau mah se veranda light kan tiêng tho va, dar 7 a pelh hnuah pawh naupangho chu an la infiam nasa hle. Ka kut vuantu chu ka melh chho zeuh a, lungawi hmel zetin kan fate a lo thlir dauh dauh a, a dara ka lu ka nghah chuan ka chhip samah a rawn fawp zeuh a, hlim loh chu har tak a ni. Dar 8 dâwnah chuan naupangho pawh an duh tâwk ve ta, an inbual ṭha leh vek a, an mu hma hlawm khawp mai. Mazara nen khum khatah ka mu dun thei ve teh mial a, Tetei awm lo se chu kan Duhsaki tê chuan kan inkara mut a ngen leh ngei ang. 

"Tun lai hi i ṭha zual" deuh tawp ṭhin hian a!

"Nang pawh i ṭha tulh tulh" ka ti ve nghal a, a meng no lo leh teh e! 

"Ka uang lo" a rawn tih bul hmuk chuan

"Ka uang bik lo" ka ti ve leh zat a, ka inrin hmain min rawn fawp tawk a, ka hnung chhawn theih tur zawngin min mut ṭhat tir a, mi chawi zo lâwp lawp tak a ni.

"Nautê lam hi?" a tih chuan ka nuih a za ang reng, sawi tum nei hmel a pu khan ka hre hrim hrim a, mahse nautê lam a ni dawn tih erawh ka hre bik chuang lo. 

"I duh phawt a hnu, mahse zaninah ni lo, zanin chu hetia mut vang vang hi ka duh" ka tih chuan min kuah nghet sauh a, kan inneih tirh aṭang tawh fa neih tam kha a duh thu a sawi kha a nia, ka hriselna leh ka taksain a tlin a nih phawt chuan kan nei zel mai a ni ang chu! 

Ka mit ka chhing vang vang a, kan intawn dan te, kan inngaihzawn lai leh kan inhmangaih chhoh zel dan te, kan inneih nî thlengin ka mitthlaah a rawn lang zut zut a, engtikah mah chung chu ka theihnghilh mai mai tawh lo ang. Thintlanga ka awm tirh lai te, ei rawng ka bawl sual nasat em em lai te, chung zawng zawng chu hun kal tawh leh liam tawh; pawh kir theih loh vek an ni a, a engah mah chuan inchhirna ka nei lo va, ka pa min tuithlarna te chu Pathian remruatna vekah ka ngai tawh a ni. Ni e, Pathian hian khang hun lai khan kan inhmangaih tak tak nge tak tak lo min fiah a nih ka ring ta ber a, kan inhmangaihna chuan engkim a siam ṭha ta a ni. 

A tukah chuan dawrah kal lovin Mazara chu inah a awm a, kan fate erawh school an kal vek thung a, a bâng hmasa ber hnen aṭang an hun hman dan chanchin kan ngaithla leh ngei ang. Mazara chu a awm ve mai mai dawn emaw ka tih laiin bungbel dahna chhuar hawnna kawngka tê siam chuan a che mial mial a, min be hran lo mah se ka awm a nuam em em tho. A bulah dingin a mamawh tur awm anga ka hriat chu ka lo pe ve zel a, thingpui hâng ka siamsak bawk a, kan inhriat tirh aṭang tawh ṭawng hi chu a ṭawngmawh ve chiang a ni. Chhuar kawngka tê chu a kawpzà nen lam a siam ṭha vek a, chawhma chhungin a zo vek bawk. Inhnawh puarna tur chhang ka kàng a, ka pek chuan a lo la ve mai a, ṭawng lém chuang lovin lungawi hmel zet hian a hmui a tiche zeuh a, tawi têa a nui suk ṭhin te chu amah ti Mazara hliah hliah tu a ni.

(The End)