SUMO DRIVER By Havali Adam (CHAPTER 47)

SUMO DRIVER

By

Havali Adam

Chapter 47

"Ka pa chu eng pawh ni se a kalsan ngam rihin ka hria, u Vli bulah min hruai zawk teh ka nu, ka hmuh ngei a ngai a ni" Mazara chu a lo hawi zawk a, ka nu erawh a ngawi reng a, a hmelah chuan lungchhiatna bawk ka hmu leh ta. 

"Hmu lo law law zawk mai rawh Numam, a hmu duh chuang lo ang che. Keini a nu leh pa tak ngial pawh min hmu duh tawh lo, hmuh ai che chuan kal bo vang vang a duh zawk ngei ang" ka nu chuan a rawn ti a, a mittui a hru pah zeuh bawk. 

"Ni lo, a nun a hloh hlen tak tak hma hian kawng dik zawk a zawh theih nân puih ka duh alawm, ka pui ngei bawk tur a ni. Min hmuh hunah chuan a ṭhawng viau maithei, mahse ka hmu dawn hi a ni hrim hrim" luhlul tak chuan ka tilui ve tlat a, ka nu chu ipik hmel zet hian a thaw hluai ringawt.

"A ṭha e, a in luahna thleng ka hruai che ang a, ka hawsan leh nghal che, a chhan chu a hmel hmu tlâk pawh ka ni tawh lo. A lakah ka inthiam lo lutuk êm mai, i pa bulah hian ka lo awm zawk mai ang" a tih chuan ka bu nghat a, Mazara chu ka melh chho leh zeuh a, ani pawh hian min kalpui rawh se. 

Damdawi in aṭanga kan chhuah dawn chuan kan fate'n min ngen deuh a, mahse an kal ve kan phal ta lo law law. Duatpuia leh a naute chu ka pa bulah an awm a, Duhsaki erawh kan hruai thung a, Mazaran a paw tawh a, ka dar a kham ve ta deuh bawk nen ka phal ta mai. Ka nu chuan kan tlanna lam tur a sawi zel a, motor lian tlan luh theih lohna chin kan thlen chuan kan chhuk a, chu lai hmun chu u Vli awmna veng a nih thu a sawi mawlh mawlh bawk. A veng chu Aizawl khawpui chhung si ah chuan a ṭawp hnawk ru em em a, in ding ho reng reng chu a Aizawl in lo hlawm khawp mai. Kawng kawi thum vel kan kal hnu chuan ka nu'n u Vli in luah lai chu min kawhhmuh a, ani erawh a haw zui nghal. 

In awmna lam chu kan pan zel a, rangva in a ni nghe nghe a, a chung rangva te chu a tui êk nasa tawh hle. A in hrim hrim chu a hlui tawh a, a mawih hmel em em bawk a, luah tlâkah pawh ka ngai chiah lo. In kawt kan thleng a, kawngka pakhat chu a inkhar a, pakhat erawh a inhawng thung a, mahse thawm a reh ṭhiap tho. Mazara ni lovin keimah zawk chu ka kal hmasa a, kawngka bula ka din hnuah pawh ka hmu mai lo va, in chhung chu a lo ruak huai a, a reh diak bawk a, an awm lo ti dawn ila kawngka a inhawng lawi si a, in chhungah chuan kawngka kik lovin ka lut ta nge nge a, mahse ka thil hmuh chuan min va ṭhawng chiang êm.

U Vli ngei mai chu min hnung chhawn zawngin a lo ṭhu a, a bulah kuhva bag a let phung a, ka khawngaih lutuk chu ka hmui ka hup tawp ringawt. Mazara pawh ka bulah a ding ngawi reng a, thawm engmah kan la chhuah bawk si lo nen u Vli chuan kan lut tih pakhat mah a hre lo a nih hmel. Kuhva chu bag ṭawp hnawk zet aṭang chuan a la chhuak a, kuhva khehna hmanrua ni ngei tur chuan a kheh per sawk sawk a, kan dinna aṭang paw'n a uih rim kan hre thei a nia, engtin nge a kheh theih zawk reng reng ni! Ten miah lovin a kheh mial mial a, a lo danglam ta lutuk chuan ka lai a chhun a ni. 

Pindan lam aṭang thawm a rawn awm thut a, chu veleh u Vli chu a tho tharh a, a kut a silfai zung zung a, thawm awmna lam ngaihven tura a inher chiah chu chiang zetin kan inhmu ta, a hmelah chuan a hamhaihzia a hriat ngawih ngawih. Rei min en lovin pindan lamah a tlan lut thuai thuai a, a fanu pawm chungin a rawn chhuak leh a, chutah zet zawng min en chiang ta khawp mai. Mittui tling pamin ka kuah tawp a, ani erawh a ṭawng lo va, a che lo va, min kuah lêt pawh a tum chuang lo. Inla hranga a hmel ka en chiah chu a biangah mittui a lo luang zawih zawih a, a fanu vang chauha ṭap ri lo a nih ka ring. 

Ka kuahna aṭanga awm sawnin tukverh bulah a va ding daih a, a nun chu a khawhar hmel tak zet. Mittui tla reng chung chuan a fanu chu pawm reng a, min rawn en lehin a nui tawi tak a, mahse a chhungril lam a hlim hlawl lo tih ka hre chiang em em thung. Kei chauh ni lovin Mazara te pafa lam pawh a hawi zawm zat a, kan fanu chu a en tih thlengin a mit chet dan aṭang ka hre thei. Pawn lam a hawi leh daih a, sawi tur ka ngah viau a, mahse sawi hmasak ber tur ka hre hlawl lo. A hmel en chuan hmâna u Vli kha a ang tawh lo, ruih theih thil ti nasa ṭhin a ang mah tawh zawk. A fanu lah chuan min en tawn zak zak reuh a, kum 2 emaw kum 3 emaw vel lêka upa a nih hmel. 

"I in dik takah lo lêt leh tawh rawh u Vli, ka pa chanchin te kha i hre tawh em? Tunah hian damdawi inah a awm mêk asin, u Duhawmi te nupa pawh an lo chho dawn" ka ti ta ringawt a, ka ṭawng hre lo ang maiin a awm a, ka va kal hnaih ta nge nge. 

"U Vli" ka ti leh chiah chu zawitê hian a rawn ṭap chhuak a, kei pawh ka bang chuang lo, ka ṭap ve leh tawp a, min ngaihven miah lova kum 10 chuang an awm thei te chu demna pakhat mah ka nei tawh lo, khang kum chhung khan an hun tawn a khirh ve êm mai. 

"I nun i hloh zo dawn, ka pa bulah lêt leh rawh. Kei paw'n ka ngaidam fel tawh asin, Mazara min duhpui loh avanga a fanu min tuithlartu ka pa kha tunah chuan ka ngaidam tawh, a chhan chu ka pa a ni tlat a ni" ka ṭap tawh lo va, ani pawh a ṭap tawh lem lo. 

"Tetei a nia, kumin hian kum 3-na a pûm ve tawh dawn, ka awt ngawt mai che u" nui lui tih hriat tak hian a ti sêp a, a hawina lam ka hawi chuan Mazara leh u Vli fanu duhawm zet Tetei chu an lo ding dun reng tawh a, mak ka ti ru ang reng. 

"Fanu hmelṭha tak i nei a nih saw le" ka tih chuan a bu zeuh a, ṭawng chuang miah lova Mazaran Tetei Sweet a pe lai chu kan thlir dun reng a, Tetei zawk lah chuan nautê chu a en châk hmel em em leh nghal. 

"Ka pa a dam loh vang em ni in lo chhuka i ngaihdam tâk?" amah chu ka en nghal thuai a, pawn lam a lo hawi leh daih tawh a, Mazara te pahnih nautê inpawm tir tum pawh chu en zui ta lovin u Vli nena thil sawi dun a hun rih zawkin ka hria. 

"Ni lo ve, chuti mai chuan ka ngaidam bik reng reng lo. A harsa ka ti ve lutuk, mahse maw u Vl, ka pa hi ka lo la hmangaih êm a ni. Min tuithlar avang khan ka haw em em a, kan ina a lo kal tirh te khan thinrim takin ka ṭawngkhum a, mahse tunah chuan ka ngaidam vek tawh, a chhan chu ka hmangaih mai bakah Mazara vang a ni" ka pasal chhuang ru tak chuan ka ti a, ka ngaisangin ka chhuang rèng bawk. 

"Nang chu i vannei ngawt mai, u Mazara i la nei tal alawm, kei chu...kei ve mai hi chu...ka.." sawi zawm thei lovin a ngawi ta vang vang a, ka thisen zawmpui ka unaunu hun tawn tawh leh a hun tawn mêk chuan min tinâ ve tak zet. 

Pindanah ka hruai lut a, khumah ṭhuin Mazara nena kan chanchin te, chhungkua kan din chhoh dan te ka sawi a, mahse ka tana pasal ṭha tawp khawp a nih zia erawh ka sawi vak duh lo thung. A vanduai a, a pasal neih a fuh lo va, Mazara ṭhatzia ka sawi a nih chuan a rilru a nâ thar mai mai dawnin ka hre tlat a ni. Fa pali lai kan neih ve tawh thu te ka sawi ta zawk a, thinlung takin min lawmpui a, min awt tih erawh hai theih a ni mawlh lo. Ka pate bula lêt leh lam chu ka sawi ta miah lo thung a, tunah rih chuan lêt a tum lo ni berin ka hria, mahse chu chu thil ṭha ber a ni chuang lo. 

Mazara te pathum erawh titina hun thawl min pe ang hrimin an chhuak daih a, an vawi khat inhmuhnaa Tetein a nêl nghal mai chu mak ka ti ang reng, u Vli meuh paw'n mak a ti tho. Ka zawh fô tâkah chuan hrehawm tih hmel zetin a pasal neih dan te, an pasal te hausa mah se an tluan lohzia leh an nupa nun a nawm lohzia te, a pasalin kut a thlak ṭhin thu leh ngaihzawng a neihsan ṭhin thute chu a sawi ta mawlh mawlh a, a ṭap leh zauh ṭhin bawk. Kan inkuah a, kan ṭap dun a, u Duhawmi nen an inbiak ṭhin thu erawh sawi mah se khang kum liam ta chhung zawng khan insawi thawlna hmun tur a nei dawn lo tih ka chiang. 

Kan haw dawn chuan a in dik taka lêt leh tawh turin ka sawm a, mahse ani chu a ngawi tlat thung. Ni danga sawmah ka ti ta zawk a, zan lama kan fate nen lên kan tum thu ka hrilh a, in chhuahsan miah lo turin ka ti bawk. A lo bu ve mai a, ngaihngam takin kan inthlah liam ta phawt chu a ni a, Mazara nen pawh kan awm chhung khan an inbe hman lo hrim hrim, zan lamah a ni tawh mai. Hospital kan thlen chuan ka nu leh pa leh kan fate chu an hlim dar dar hle a, mahse ka pa erawh hlim hmel viau mah se kei leh Mazara chu min en ṭha ngam tlat ṭhin lo, ka nupa lakah a zakin a inthlahrung tih kan hria, chuti anga awm tur chuan kan duh si lo a ni. 

Beisei ai takin ka pa chu a ṭha ta viau a, khaw thim hmain Hospital aṭang kan chhuak a, Doctor te phalna thlapa chhuak kan ni bawk. Kan in kawt kan thleng te, in chhung ka lut chiah te chu ka hnim ruih a, loh theih lovin hun kal tawh ka ngaihtuah chhuak leh ta nge nge a, han ngaihtuah chhuah loh tawp chu a harsa va êm bawk a ni. Ka nu nen ei rawng kan bawl a, Mazara leh ka pa erawh in kawta naupang infiam thlir pahin an ṭhu dun a, an inbe chuang hlei lo va, Mazara chuan kan fanu a pawm pah reng bawk. Ka nu tak pawh chu ka lakah a inthlahrung tih ka hria, zawi zawia a reh ve mai ka ring ta ringawt.

Zanriah kan ei kham a, kan chhungkua chuan u Vli in luah awmna lama len phei tumin kan insiam malh malh hlawm a, naupangho pawh an phur ang reng. An nute Vli hmuh chu an châk deuhin ka hria, chu ai mah chuan a fanu chu an hmu châk ta ber a, Mazaran a sawi duhawm nasa mai si a, Duatpuia thlengin nau atan hmeichhia an awh zia chu ka hriat thar phah hial. An naupang ber lah kum pawh a la tling lo va, duat viau dawn pawh ni se an thiam tak tak lo bawk a, kum tling sa leh ṭawng ve thei sawih sawih tawh sa an hmu tur chu an phur tlâng a ni ber e. 

A hming tak meuhin ka nu leh pa chu kan ruala lo kal ve turin ka sawm a, ka rin ang ngeiin an duh lo ve ve a, u Vli an hmuh duh loh vang leh an pawh duh loh vang ni lovin a laka an inthlahrun lutuk vang zawk a ni. Kan veng aṭang chuan kan tlan chhuak a, Hlutea leh Awmawma chuan Aizawl nuam an tihzia hlir an sawi a, chu mai a ni lo, ka pa, an pu bula awm a nawmzia leh an hlim thu hlir chu an sawi a, ka lo hlim ve veng veng. Chu tak chu ka duh dan a ni tawh, a hmate kha chuan inhre lo law law se ka ti a, ka thinrimna avang khan ka ngaihtuahna a kal sual a, mahse tunah chuan an pûtùin inngeih tlâng takin awm se ka duh a ni.

"Chhuak nghal rawh, lo kal tawh suh ka ti che a ni lo'm ni? Kan mamawh lo che, ka thin a rim tak tak hma hian chhuak nghal rawh" kawngka hawn ka tum chu ka tawp chat a, thinrim taka ṭawng chu u Vli ngei a ni a, ka thin a phu rang nghal dawt dawt hle mai. 

"A hmeichhia zawkin ka vin e te chu i ti maw? I va han zak lo ngai em?" mipa aw ri fiak ṭhak ṭhak thawm a awm rualin thil ri sawk ri a awm zui nghal a, ka dinna ngaia ding mai mai thei lovin ka tlan lut ta vat.

"Hre rawh, ka duh hûn hunah ka lo kal ang a, ka mamawh hunah ka mutpui mai ang che. Min hnar tawh suh ang che, min hnar leh a nih vaih chuan he in aṭang hian in chhuak nghal ang, in luah man ni se thla eng zat chiah nge i bât tawh tih pawh i hre tawh kher nâng" zak map lova ka u ṭawngkhumtu chu ka ngaithei ta hauh lo.

"Hei! Nang kha! Khati ang teh hrepa ka u ṭawngkhum tur khan tu chu nge i nih bik a? Chhuak rawh a tih che chuan chhuak mai ta che, i va zak lo zawk ve" ka ti vin ve ta phiar phiar a, u Vli chuan hmai dawm chungin min rawn en phawk hle. 

"A ve mai mai che chuan le! He nu hian chhungte a nei teuh lo, ka nihna i hre duh maw!? A pasal paw'n in aṭanga a hnawh chhuah theih khawpa hmeichhe ṭha lo leh a fanu lo khawngaiha in luah tir tu ka nih hi, in aṭang hian chhuak vat rawh u" a rawn ti vin lêt hrawk a, ka zâm duh bik lo hrim hrim. 

"Lo kal rawh u Vl, he in aṭang hian chhuak ang" tiin u Vli ban chu ka va vuan a, mahse a bula mipa zawk chuan a lo pawt phelh vat a, min nam deuh sawk bawk a, ka ke chhep sual deuhin ka tlu ṭep nghe nghe. 

"Nangmahni alawm chhuak tura ka tih, anni nufa ni lovin, chhuak phiang sen nghal rawh u" chu pa zet chu a va han ṭawng malsawm lo tehreng êm, u Vli te nufa chhuah a phal lo ringawt chu ka ngaihdan a ni teuh lo mai.

"Ṭawng fimkhur rawh, i inchhir hlauh ang e" khauh fiah taka rawn ti thum ram hmuk tu lam chu a hawi nghal a, kei chuan lehhawi kher lo paw'n Mazara ngei a ni tih ka hre mai a, u Vli ber chuan a ni mak ti chu! 

"A tu chu nge maw in nih chai hlawm hle, ka in aṭang hian chhuak nghal vat rawh u. Nangni nufa erawh in awm ang, ka duh dûh huna nuam ka tawlpui theih turin in awm tlat ang tih hre rawh u" a ṭawng zawh rualin chu pa chu a leng dâwrh a, mahse nâ erawh a tuar chuang lo.

"A thawmhnaw va siampui rawh" Mazara chuan ram hmuk hian a ti a, u Vli erawh a dinna ngaiah a la ding reng a, sawm buai vel lovin pindanah ka lut a, a thawmhnaw zawng zawng chu a tam lêm lo, rucksack bag awm remchangah chuan ka khung ta vek. 

"Zawnga le!" thawm chu a ri nghal buan buan a, pindan aṭanga ka chhuah chuan u Vli in luah mêk neitupa chuan tiang sei vak lo hi a lo lêk a, Mazara chu vuak a tum a, Mazara erawhin a lo bum zel thung a, mahse a bumna lamah Awmawman a tuar palh ta, ka va han tlan chhuak rang mai mai tak em. 

"Awmawm!" hlauthawng fê in ka fapa bulah chuan ka ṭhingṭhi nghal thuai a, nâ ti zetin a rawn ṭap hawm hawm a, a lu thi nasa lutuk chu ka hup chung paw'n a reh thei mai lo, u Vli thlengin kan buai vek tawh.

"Nang!" chuti ang em ema Mazara aw vin leh hlauhawm chu ka la hre lo, rilru hlauthawng zetin ka pasal awmna lam chu ka hawi phei a, in neitupa vuakna te chu engah mah a ngai tawh lo, chu pa chu a that duh mai dawnin ka hre hial. 

"Ka fapa thisen i chhuah ngam vela maw!?" chu thu chu thinrim taka a sawi hnuhnun ber a ni a, a bak zawng erawh tha thawh lamin a che thung a, Tile bang deng keh rawp rawp khawpin a phìn a, a hnek a, vawi tam kut a thlak hmain chu pa chu ni khaw hre lovin a awm ta der. 

"Mazar, hmanhmawh ang, a thi chhuak hi a tawp thei lo a nia" hlauthawng aw taka ka tih phawlh phawlh chuan a rawn hawi vat a, Awmawma lah chu a rawn ṭap uar zual sauh a, Mazara pawh a ding mai mai lo chiang khawp. 

Awmawma lu chu hupin a pawm kâng nawlh a, pawnah a tlan chhuahpui vat a, keini ho chuan kan zui nghal thuai bawk. Hospital lam kan tlan chhung zawng chuan Awmawma a ṭap char char a, a u Duatpuian a lu thi chu a dawm sak a, Mazaran a kawr hak laiin tuam sak tawh mah se thi chu a la chhuak reng tho. Chung te hlei hlei chuan ka awm a tinuam lo zual a, kan fanu Duhsaki a ṭap bawk a, a u a ṭah avangin Hlutea a ṭap ve ringawt bawk a, kan buaiin motor chhung chu a bengchheng chuah chuah hle. U Vli fanu Tetei erawh a ngawi kar a, hlauh hmel zetin a nu a kuah tlat a, tum loh deuhin thil a kal ta si a, a unaute nen pawh inhmel hriatna an nei hman ta lo.

Hospital kan thlen hnu rei lovah Mazara chu lêt leh a tum a, a thil tih tum ka hriat chian êm avangin ka dang a, ka theih tawp tak meuhin ka dang a, mahse ka hlawhchham ṭhak. Zui ringawt dawn ila kan fate an awm bawk si, rilru a va han buai duh tak êm. Ka rilruin ka ṭawngṭai ta tawp a, Mazara chuan thil pawi tak a ti ang tih ka hlau ngawih ngawih. A thin a rim nasa mai si a, a kal tur ka dan lai te khan a nupui chu ni lo ngat ila zawng min phín lêng lawp ang ka ring, mahse kei ka ni tlat a, nâ engmah ka tuar lo hlauh. U Vlin a fanu Tetei a kuah chawt a, keiin kan fanu ka pawm a, Duatpuia ka bulah a ṭhu a, Hlutean min kuah thung a, chu bak tih theih kan nei rih lo a ni. 

Ka nute chu engmah ka la hrilh lo va, a chhan pawh an phone number ka neih tlat loh vang a ni. Awmawm chanchin hre ve ta se chu an hlauthawngin an buai phili ve khawp ang, an tupa kha a ni miau a, an tan pawh awm mai mai chu thil har tak tur a ni. Darkar chanve hnu velah Doctor a rawn chhuak a, Awmawma chu kah mutnaa an kah mut mêk thu leh a hliam an ṭhui pin vek tawh thu a sawi a, a ngaihtuahawm tawh loh thu a sawi bawk. Kah mutnaa an kah mut tawp loh chuan ṭhui a harsa khawp ang, nâ a tiin a ṭap nasa êm mai. 

Room chhunga kan ṭhut ṭhap laiin Mazara a lo lut hlawl a, a tawnzau var hakah chuan thisen a kaina nasa hle a, chu erawh Awmawm thisen a ni lo tih ka hre chiang khawp. Biak ka tum lai takin Hlutean a lo ko a, a pa lamah a tlan phei nghal a, a ṭap ve leh ringawt tawh, a u awm dan chuan a tihlauthawng ve viau a ni ang. Mazara chuan u Vli te nufa chu insawn chhuak nghal turin leh lêt leh miah tawh lo turin a hrilh a, u Vli pawh ngawi rengin a bu nghauh ringawt a, kum tam a liam hnua an inbiak lehna hmasa ber mah ni se Mazara aw chu a nelawm teh chiam lo chiang hle.

"Engtin nge i va tih? Thil pawi i ti miah lo ti raw?" room aṭanga ka kaih chhuah dawr dâwr hnu chuan ka ti nghal mawlh mawlh a, a hmel chu chîk zetin ka en chho ran a, ka zawhna chhan tum lo ang maiin a la awm leh nghal. 

"Mazar!" ka tih deuh hrawk chuan van va dakin thawk a la hawk a, min rawn en chhuk run zawm zat a, kan awm laia a sawisak pawh kha a tâwk viau tawh a, Hospital kan thlen hnua a va lêt leh ngat kha thil ṭul tak zawng a ni lo chiang a ni. 

"Ka insum zo lo teuh lutuk, insum zo lo teuh tak ka ni" harsa tih hmel zet hian a rawn ti ve ta hram a, a kut a la hum ruh danah a thinrimna chu chhetê paw'n a la kiam eih lo tih ka hre thei, mahse eng thil pawi mah a ti lo chu ka lawm tak zet. 

"Thinrim tawh suh, Awmawma pawh a rawn harh ṭep tawh ang. Darkar 3 vel a muthilh beisei a ni a, i fate paw'n an hlau mai ang che, thinrim tawh suh aw Mazar?" kuah pah chuan ka ti a, a tawnzau vara thisen kai ro tawh te chu ka ten buai duh ta lo law law. 

Min chhang ta lem lo va, room chhunga ka luhpui hnuah erawh a thinrimna pawh a reh ve tial tialin ka hria. Dar 10 leh a chanve velah Awmawma a rawn harh a, a bul chêta ṭhu run a pa hmel a hmu chiah chu a ṭap hlawp hlawp nghal a, Mazara chuan thlem dan tur hre lo zetin a kuah hle hle ringawt. A fapa chalah chuan a fawp a, a biangah a fawp bawk a, a ṭap nasa bawk a, Awmawma chu a mit a bui vek thei. Damdawi lei tur Doctor-in min pek hnu chuan in lamah kan haw a, Awmawma dinhmun ka nute'n an hre chiah chu an mangangin an thinrim hle a, chutah thinrim viau e ti lo chuan u Vli leh an tûnu Tetei hmel an hmuh zawm zat avangin an ṭap leh a, ka pa phei chu a kun ngawt ngawt tawp. 

A rawn hawi chhuah leh paw'n mittui nen a meng a, u Vli chu inthiam loh hmel deuhin a en tlawk tlawk a, u Vli erawhin a en ngam lo ve thung. U Vli zawk chu ka kai a, ka pa bulah chuan ka ṭhut tir a, chutah zet zawng ka pa chu a awm mai mai thei ta lo. Mittui tling pamin a fanu retheih hmel tak leh ei hmu ṭha lo tih hriat  ngaqih ngawih chu a en reng a, a biangte chu a khawih mawlh mawlh a, u Vli pawh a insum zo ta ngâng bik lo a ni ang. Ka pa âwmah bei thlawpin a ṭap hawm hawm a, ṭah zawih pawh a tum lo va, mi dang mitmei ven nachang thlengin a theihnghilh zo tawh a ni mahna. Ka pa ni se rilru nât hmel em emin a ṭap khur ngawt ngawt bawk a, kei erawh ka nui thei thung. 

Ni e, ka nui chiang a ni. A chhan chu ka hlim a, ka lawm a, inpumkhat takin chhungkua kan awm leh dawn tih ka hre chiang tawh em em a ni. Ka nu bulah chuan zep nei hauh lovin kan thil hmuh leh tawn zawng zawng chu ka sawi a, ka nu pawh a rilru a nât hmel khawp mai. Mazara bulah kalin chhuahpuiah a va sawm a, u Vli te nufa in luah man leh an lo bât tawh zawng zawng chu an va pe tla ta vek. Tin, a kuhva kheh hlawhna zawng zawng nen lam a kheh tawh dawn loh avangin a kheh bang man an pe vek bawk a, u Vli erawh a la lungngaih hmel viau. 

Kan ngaihtuah tlâng lo hlawm bawk a, mahni thisen zawmpui te nen ngei phone number te kan inpe hnuhnawh leh vel a, u Vli leh ka pa phei chu an ṭah nuih ṭhaw ringawt. Putea hnen aṭang phone call ka dawng a, ka pa chanchin te min rawn zawt a, pite pawh a rawn ṭawng lang chhen a, a ṭhat tawh thu leh Hospital aṭanga kan chhuah tawh thu ka sawi chuan an lawm khawp mai. Kan fate chanchin min zawh bakah an ngaih thu an sawi bawk a, Awmawma dinhmun chu ka sawi lang lo thei ta lo. An hre chiah chu ralkhat aṭang paw'n an rawn lungni lo em em a, Tlantea phei chu a thin a rim khawp mai. 

Tlantea hian kan fate zingah chuan Awmawm hi a duat ber a, a ngaina ber bawk a, Awmawma paw'n a bula awm nuam a ti thei hle. Hlutea leh Duatpuia paw'n a duat bik ṭhin tih chu an hre ve vek tho va, an thik ngai chuang lo. Mazara berin inang khat vekin a duat hlawm miau a, kan fate chu an vui lo hrim hrim a ni. Mazaran duat fal deuh bik te chu nei ngat se zawng an thik chiang khawp ang, Awmawma paw'n a hma khan a u Duatpuia a thik ṭhin chu a nih kha le. Mazara duat nih ṭheuh an duh rualin kei tih loh mi dang duat erawh engah teh vak mah an ngai lo hlawm leh lawi a, mak ve tak chu an ni. 

Zanah chuan a pute bulah Hlutea a mu nghal hmak a, a pu hi a nêl zual a, hmelah nen a inang em em bik bawk. Mi dang zawng chu kan bulah an mu a, Duhsaki ka hnaih berah a mu a, a laiah Duatpuia a mu a, a sir berah a pa kuah ranin Awmawma a muhil bam bawk a, kan fate muhil vek tawh mah se kei leh Mazara erawh kan la meng kar thung. Mazara chuan a fapa lu chu a fawp leh zauh ṭhin a, duat leh tihnât belh hlau zetin a kuah bet run a, an awm dan chuan ka lung a tiawi hliah hliah a ni. Ka ke chu ka en a, ka nui sak a, a chhan pawh Mazara ke lian leh lum nuam zet inkarah a awm a, harsa chung chunga ka va rawlh lui kha a ni a, ani pawh a ni tho, kan taksa eng emaw tal a insik loh chuan mu tui thei hek lo le! 

A tukah chuan u Duhawmite chhungkua an lo thleng a, fa pahnih lai an lo nei tawh a, vanduai thlak takin nau a lo chhiat tawh nghe nghe. Kan inhmuh tirh phei chuan hmeichhia tih takah kan hnuk a ulh a, kan ṭap leh ta nge nge. U Duhawmi chuan ngaihdam min dil mawlh mawlh a, min rawn tlawh pawh lova ram danga a awm daih chu a inthiam lo va, mahse kei chuan rilru nâtna ka nei tawh lo hrim hrim. Mazara leh u Rinawma pawh an inchibai a, an ṭawng tam lo dun ang reng hle a, anni pahnih hi chu ṭawng lamah kher chuan an inang khawp mai. An duh tê hi an sawi a, mahse chu tê lêk pawh chuan an nupuite min tihlim pha em em tho zel. 

U Duhawmi fate chu mipa leh hmeichhia an ni a, a upa zawk chu Awmawma nen an inrual chiah a, a nau hmeichhia erawh u Vli fanu Tetei ai a upa hret thung a, mahse hmel lamah erawh kan fate an tluk lo deuhin ka hria. Nu mit aṭang chuan fate hmel chu a ṭha na meuh mai, mahse ka ên ka en paw'n an hmai awm dan te, an mitmeng nen lam kan fate chu an ṭha ka ti zawk tho tho. Ka nu lah chuan ka rilrua awm hria ang maiin hmel lamah kan fate an ṭhat ber thu min hrilh deuh tawp leh nghal a, chhan dan tur hre lo zetin ka nui ringawt. 

U Vli ber chu a buaithlak ta, a inthlahrung lutuk chu a buaithlak lai ber a ni. A pasal neih fuh loh pawizia chu a sawi mawlh mawlh a, ka pa ni se a inthiam lo em em bawk a, u Vli chu a thinrim thar leh thut a ni ber. U Duhawmi chuan a fanu pa hnen aṭang ngaihsakna a dawn leh dawn loh te a zawt a, mahse u Vli chuan an inṭhen aṭang engmah a dawng tawh lo a nih hmel. A sawi dan chuan an hausa ngei a, a pasal nu erawh a sual hle thung a, a thil tawn zawng zawng zep nei miah lova a sawi chhuak chiah chu ka nu meuh paw'n a hmui a hup tawp.

"Engati nge kan lo lên ṭhin lai khan i sawi ngai loh? Engati nge engmah i sawi loh? Sawi ta che, chuti ang em em chuan a ni maw kan lo tih hrehawm che Vl?" a ti ta hial a, kei leh u Duhawmi erawh sawi tur reng kan hre lo. 

"In thuin alawm pasal ka neih; ka thu ni lovin. Ka mipa duhzawng a ni lo leh zel bawk a, mahse kan inneih hnu kha chuan theih tawp ka chhuah a, a tawpa ka chan erawh tih sual engmah nei lova hnawh chhuah a ni" u Vli chu a ṭap zui nghal a, ka va han khawngaih tehreng êm. 

"Khawngaihin sawi tawh lo ang" u Duhawmi chuan a rawn ti ta tawp a, kan sawi zel chuan ni lêng zankhua paw'n kan ṭap char char thei mai ang, tunah chuan lungai lova hlim kan phu ve em em tawh a ni.

Kan hnena u Vli sawi chhuah zawng zawng chu ka pa leh kan pasal te'n an hre ve ta lem lo va, u Vli berin sawi ṭul a tih tawh loh vang a ni. Kan fate chu an inkawm ngeih hlawm em em a, in kawtah an awm ṭhap a, Awmawma erawh a pa bulah a la awm chawt a, a unaute bula infiam chu a châk ve reng ang maw le. A lu a la nâ tlat a, infiam thei chi ziazâng a la ni si lo. U Rinawma nen pawh kan inbe ve melh melh a, Mazara ai tak chuan a ṭawng duh ve deuh, mahse a ṭawng tam lo thawkhat a ni. Hnaa a kai san tawh thu te, Delhi-a in hmun nghet a lei diam tawh thu te leh kan zin thlak duh pawha inthlahrung miah lo tur te chuan min hrilh a, a fel dap dap khawp mai. 

(End of Chapter 47)