SUMO DRIVER By Havali Adam (CHAPTER 45)

SUMO DRIVER 

By

Havali Adam

Chapter 45

Thawm ri deuh nawk nawkah chuan ka harh a, ka mit erawh ka la chhing tlat thung a, ka rilru leh ngaihtuahnain ngai a awh hnu chuan hmeichhe ṭawng melh melh chu pitei aw a ni tih ka hre fiah thei ta. Ka kut chet zeuhin ka meng diar diar a, ka kut vuan rengtu ka pasal hmel ka hmu hmasa ber a, ani paw'n min ngaihtuah hmel khawp mai. A ṭawng lo va, hmangaihna mitmengin min en reng a, kan thil tawn zawh chiah ka ngaihtuah chhuak bawk nen ka mittui a rawn hnâm nghal a, ṭah hawm hawma ka rilru nâtna leh hrehawmna zawng zawng chu vawi leh khatah bo duak thei se ka ti ngawih ngawih. 

Mazara ngawr ngawr en lovin hmun dang ka hawi ta daih a, ka en reng a nih chuan ka ṭap chhuak thei tak ngial dawn a ni. Ka pa chu a lo la awm ve reng a, chu vang pawh chu a ni ṭah ka tum tawh lo. A hmuh laiin hmeichhe chak lo tak angin ka ṭap ang maw!? Ni lo, ka ṭap tur a ni lo, ka ṭap hauh lo ang. Kum kha leh chen kha an tel lo paw'n ka nung thei alawm le, engah nge tuna taka rilru nâa ka awm ringawt ang ni!? Tu nu leh pain nge kum 10 chuang an fanu thlahthlamin ngaihsak lo thei ang? Tûma'n an theih ka ring lo, mahse ka nu leh pa chuan an thei tlat si. A bik takin rilru chhe em em ka pa phei chu inchhirin ngaihdam min dil mah se ngaihdam ka tum teuh lo. 

Ni tak e, kei min hmu tura lo kal a ni lo tak alawm, Mazara zawk alawm a lo kal chhan, engati nge ani pawh hian a lo puih leh reng reng le? Khati ang khawp khan an hmusit a, an iai a, a rethei tih amah ngei paw'n a hriat chian tehreng nen a thinlung khei zawng takin an hriat nawn tir leh ngat duh kha a ni a, chuti chung chuan huatna nei lo ang maiin a lo ṭanpui duh leh a, tunah rih chuan amah ka ngaihsanna aiin a laka ka thinrimnain ka rilruah hmun an chang hnem tawh zawk. A duh chuan pui se, pui zel se, an thû thuin awm kual vel rawh se, mahse kei erawh min tuithlartu te thû thua awm tur chuan ka danglam nasa lutuk tawh tlat. 

"Numam!" khum aṭanga chhuk ka tum rualin pitei chuan a rawn ti hluai a, a bulah putea a awm bawk a, ka pa hmel mawlh chuan ka thinrimna a va han kai tho chiang êm, a thu hrimah engati nge pitei leh putea te leh zel paw'n thinrim hmel an put miah lo, nge anni pawh hian engkim an lo hre vek zawk?

"Min thlah rawh, ka duh dûh danin ka awm dawn, i mi ngaihsakna ka mamawh tawh lo" ti vin hlarin Mazara kut chu ka phih thla sawk a, min rawn vawn leh a tum rualin a kut ka lo beng sawn a, a ri deuh sawk nghe nghe.

"Ngaihtuahna fim put tum teh Numam" ka pasal chu thinrim takin ka melh hrawk a, zaidam hmel zeta min en te chu ka haw hluah hluah, lem chang thiam leh lutuk mai, min bum tih ka hriat chhuahna chuan min tinâ thar leh ta hle bawk.

"Ka hmangaih em em ka pasal kha i ni paw'n ka hre tawh lo Mazar, ani kha chuan ka lakah thuruk a nei ngai lo asin, nge ani pawh khan min lo bum char char zawk em ni?" ka aw chu a dul ta raih a, khum aṭang chuan kal sawn ta nge nge a, min rawn zui zel thung. 

"Engmah ka hrilh lo che hi ka ti dik lo tih ka hria, mahse ka bum che tihna a ni lo" min kuai her sawkin a ti nghet charh charh a, insum hman lovin a âwmah ka nam leh pawp a, ka thinrimna sô sàn zia chu pui tak a ni. 

"A ṭha e, min bum lo ni rawh se" ti lêt salhin ka inher a, ṭhutthleng têa dingin thleng ka la a, khua a thim vek tawh avangin zanriah ei hun a pel vek tawh tih ka hria, engmah hre lova ka awm chhung khan mi dang chuan an lo inei puar vek tawh ngei ang. 

Ka che reng reng chu a ring em em a, kan fate tak ngial paw'n mak ti zetin min en ṭhap a, Mazaran chawhmeh min suahsak a tum chuan ka lo duh awzâwng lo. Ka chaw ei chhung zawngin ka bulah a ṭhu ngawi reng a, a ngawi reng leh a ṭawngmawh lutuk chu ka hne hluah hluah a, ṭawng ta pawh ni se ka haw leh em em tho ang. Tunah rih chuan khawvel hran daiha awm ka châk, tûma tihbuai theih lohna hmunah leh rilru hah awm tawh lohna hmunah awm ka châk tak zet. Ka chaw khawrh chu ka ei bang ṭeuh a, ka tum ngial paw'n ka ei lui thei lo, ka chaw ei a tui lo ve bawk êm a ni.

Ka eina ka seng fel mawlh mawlh a, mi dang chu an lo ngawi ṭhap thung. Ka thinrim a ni tih ka hmelah leh ka chet danah a lang vek a, kan fate pawh ka ngaihtuah hman meuh lo. Thleng ka sil zo va, pindanah ka lut leh tawp a, Mazara tih loh mi dang erawh an sitting room-ah an ṭhu tlang ta thung. Mazara chuan min en reng tih ka hria, mahse melh khat paw'n ka melh duh rih lo. A awm lai reng chuan ka thawmhnaw ka la chhuak a, towel lain bathroom-ah ka luhsan daih a, ka inbual zawh hnuah pawh ani chu pindanah a lo la awm reng.

"I kawr kha thlak la, va inbual rawh" ka ti vin hlar a, chuti ang em ema vin chuan ka ṭawng chhuah ka ring bik lo, ka thinrimna a la kal tluang si a, ṭawng nêm tum viau paw'n ka thei rih lo a ni ber e. 

"Dam loh i duh em ni ZARZOKIM? I kawr huh kha thlak la, va inbual rawh ka ti chû" men pur chuan ka ti vin leh hlawk hlawk a, ka lama rawn pen hnai zeuhin a ding leh chawt a, thawk a la ri hawk bawk a, a hnuah erawh ka sawi ang chuan a chhuak ve thei ta hram. 

A inbual chhung zawngin pindanah ka tawm chawt a, mi dang chu sitting room-ah an ṭhu ṭhap a, putea leh pitei te'n kan fate an bia tih loh ṭawng thawm dang a awm lo. Zan a ni tawh tak nâ a, ruah erawh a la tla ri cher cher a, kan in hi a chung rangva leh Assam Type a ni a, ruah mal tla ri chu hriat a awl hle. Ngawi renga pindan chhunga lo lut mék chu ka en tlawk tlawk a, min be lo va, min en tawh lem lo bawk. A thawmhnaw hak tur ka lo phawrh chhuahsak sa chu a inthawlh mawlh mawlh a, rin ai tak chuan a inbual zo hma ang reng. 

Duhsaki a rawn ṭap a, harh chhuak thutin pindan aṭang chuan ka chhuak a, pitei pawm lai chu ka pawm vat a, hnutê a duh tawh a nih ka ring. Ka taksa a sik rualin a ṭap uar em em a, ka rilru lam a dik lo rih bawk nen ka ṭap ve leh thei mai dawnin ka hria. Hnutê chu ka pe a, mahse a lo hne rei peih teuh lo. A ṭap uar tawlh tawlh a, a ke te chu a leng vak vak a, ka mang a tiang zual tak zet. Puakpuan lâin ka paw ta ringawt a, ka hma thlak zawm zat a, ri lovin ka ṭap ve leh ta nge nge. Ka ṭap tih a hriat rualin Mazara chuan min rawn kuah thuai a, khumah kan nufa chuan min mutpui ta ringawt bawk. 

"Zanin chu riak mai rawh, khua hi a chêng em mai" titu chu putea a ni a, a mi biak pawh ka hre chiang khawp mai, khum aṭangin ka lo ngaithla kar a, kan fanu a ṭap tawh lo bawk nen thawm chu a reh ta hle.

"Ni e Sanga, zanin tut tutah chuan haw thlak tum lo zawk mai la a ṭha ang" pitei aw kan hriat chhunzawm nghal zat a, anni nupa leh ka pa inkar chu ka hrethiam ta hauh lo mai, keimah avangin an haw viau a ni lo'm ni? 

"Zah pawh dâwn lovin ka lo riah mai a ngaih ka ring, naktuk lama ka chhuk a fuh hmel zawk tlat" ka pa aw chu hmâna ka pa aw chiah chiah kha a la ni a, min ben lai te, min tuithlar lai te, min hrawk vak vak lai te chu ka ngaihtuah chhuak lo thei lo. 

"Lo han chhohpui la, Numami biak ka va tum lawk ang e. Nihliap khan inzáwn chho mai rawh u, keiin pakhat hi chu ka lo khum chho mai ang" pitei chuan a ti leh a, rei lovah kawngkapui inhawng thawm a awm a, putea te chhuah hnu lawkah kan fate leh pitei chu pindanah an lo lut zui ve nghal.

"Duatpui, i naute kha mutpui nghal mai rawh" ka nghen chhanpa chuan thum dam dap hian a ti a, Duatpuia paw'n an khum lamah a hruai thla ve nghal mai bawk a, pitei erawh kan khumah a rawn ṭhu chat thung. 

"Kum 3 emaw kum 2 chu a liam tawh ang, i pa hi i pute Rintluanga hnena ngaihdam dil turin a lo kal vang vang a, a inchhir lutuk te, an inṭhian ṭhatna a tichhiat avanga nun nuam a hman loh thute a sawi a, i pa hi a khawngaih thlak asin Numam" tiin pitei chuan bul a rawn ṭan a, engtin mah chhan ka tum lo, ngaihthlak tawp a ni mai.

"I putea chuan a lo ngaidam ta ngei a, khata a hlimzia mawlh khan ka hnuk hial a tiulh thei. Nang hmuh che a duh leh a, mahse a ngam tawh si lo. A insum thei lovin tun hnai hian a rawn thlithlai leh che a, in fate pawh a hre vek, an school kalna chênin, mahse Duhsaki tak hi chu a la hre chiang lo, a piang tlai hret a tin ni!" Mazara kut chu nâ zetin ka hum a, ka insum rei thei lo vang tih ka hlau. 

"I chunga a chet dan engkim kan hriatpui vek che a, ani pawh a inchhir em em a, tunah chuan ngaihdam mai hi a finthlak tawh zawk a ni Numam. I ngaihdam loh chuan nang paw'n nuam i ti tak tak bik lo, mi rilru chhia i ni lo tih ka hria, i pa hian i ngaihdamna" a tih laklawh lai chuan

"A teuh lo, a teuh lo mai. Ka ngaidam mai mai dawn lo, a hmel khawngaih thlak avang hian in rilru a nêm mai a nih kha! Kei chu ka ni ve lo, min tui thlar tawh a, ama'n kan inzawmna a chhu chat tawh a ni. Kan fate pawh hi rawn hmu tawh suh se, lo hrilh rawh" ka lo ti hmawk hmawk a, pitei chuan sawi tur a vân hmel ta hle.

"I rilru a la kal dik lo nasa êm mai, ni dangah kan sawi ṭha dawn nia" tih leh thawh a rual nghal a, min mangṭhana thu a sawi te chuan ka chhang lo hrim hrim a, Mazara zawkin a chhang a, pitei chhuak thawm chu a hla tial tial a, a reh ta vawng vawng.

"Ka tihpalh Bawihte, ka fanu, anu hi ka vin tawh miah lo ang, i hriat laiin ka vin tawh miah lo ang" ka fanuin chiang zeta min lo en ka hmuh rual chuan ka ti mawlh mawlh a, a biang leh chalah ka fawp zawm zat a, insum harsa viau mah se ka insum a ngai bawk si a ni. 

"Ka lo timu lawk ang" ti supin Mazara chuan kan fanu ka pawm lai chu a rawn la a, lo dan pawh ka tum lo va, khumah chuan anmahni hnung chhawn zawngin ka mu kawm ngul a, ngaihtuahna a va kal ding duh tak êm.

Minute tam pawh a awih hmain kan fanu chu a muhil nghal mai a, choka lamah a va chhuak zawk kha a ni mai a, awi muhil hma ka ti ang reng. Zan dang ang lo takin ka bulah a rawn mut lo va, a awmna lamah a mut ta zawk a, mahse amah chuan ka hnung lam aṭang min rawn kuah khawm vek thung. Ka ngaihtuahna a kal kual nasa em em a, ngaihtuah loh tur tûr ngaihtuah thlen pawh ka nei maithei. Ka pasal chuan ka chhip samah a fawp vang vang a, a chang leh ka sam rim hmin ang mai te hian a awm a, kei erawh ka rilru lam harh vek mah se mi lem tih chet chawp ngai ang vel chuah ka ni thung. 

"Ka tihpalh, ka bum lo che, i tana ṭha tur vek zawk a ni ka tih" chu chu kan ngawih dun vang vang hnua ka pasal thusawi hmasak ber a ni a, min kuah nghet sauh a, ka rilrua awm a hre chiang thawkhat bawk a, pehhel lovin a sawi tlang nghal tawp a nih hmel. 

"Kei chuan i chhungte hi ka ngaidam tawh, ka ngaihdamna a rei tawh, a chhan chu nangmah vang hian. Ni lo, ka puzawn leh ka pizawn te ngaidam tur hian dikna ka nei bik reng reng lo" a rawn tih leh chuan a kut lak sawn ka tum a, a harsa khawp mai.

"Engtik aṭang khan nge heng thil zawng zawng hi a thlen? Min hrilh ve thei mai lo em ni? I nupui ka nih ve hî Mazar, a ruka i ruk chhuah ngei i nupui, engati nge i zep tlat?" ka ṭawng chhuak ve ta nge nge a, ka ṭang ru ang reng hle.

"A chhan chu ka intiam tawh alawm, ka pa thih hnu lawk khan ka intiam khâ; i hnena i chhungte chanchin sawi lang tawh lo turin" aw hriat nuam zetin a ṭawng zel bawk si a, ka thinrimna sosâng lutuk pawh a tidai thei mai dawnin ka hria. 

"Heti ang em em chu min hrilh ve ta che, engah mah hian min ring lo zawk em ni? Nang ni ta la i lungawi bik ang em? I pa'n tuithlar ta che se la, keiin i hriat loh laiin lo pui bawk ila, i lawm ang em? Tuithlartu che ka puihna chuan i tihlim dawn bik che em ni?" tiin ka insut zui feih a, ṭah loh ka tum tehreng nen ka thei leh ta ngâng lo.

"Engmah ka hrilh lo che hi ka thiam loh a ni chiang e, mahse hrilh ta che ila chuan tun lêt hian ka inthiam lo ang. Ka pa nen khan kan thinlung i suih zawm leh hman asin Numam, kei pawh hian i rilru ṭha tak inphum tawh kha hai chhuahsak leh che ka duh" min kuah hle hle a, min thlem mah se ka ṭap bâng nghal mai dawn lo tih a hre chiang khawp a ni mahna.

"Ka pa hi ka ngaihdam theih i ring maw!?" ka hmui ka pet ngar ngar zawm zat a, ka mithlaah min ruk zana ka pa'n min tuithlar lai vel chu a rawn lang zut zut a, ka men paw'n ka mitthlaah a lang tho va, ka maimitchhing paw'n chuti tho chu! 

"Ring tehreng e maw le, a chhan chu nangmah i ni tlat. Fa ṭha tak tak min petu, pasalte zah thiama hmangaih em em tu leh a thinlung chhungril taka a pa la hmangaih rengtu ka nupui hian i ngaidam thei ngei dawn tih ka chiang, mahse ka rinna hi i tum leh tum lovah a innghat thung" 

"A hrehawm ém mai Mazar, engati nge kan hlim reng theih loh? Engati nge harsatna kan tawh zel bik?" ṭap chhuak hak pahin ka kuah zui nghal a, nghet em em hian min kuah lêt vat a, ka hnung chu a chul mawlh mawlh bawk. 

"Harsatna chi hrang hrang hmachhawn tura duan alawm kan nih, hlimna erawh keimahni azirin awm châng a nei ang a, awm loh châng pawh a nei ang" a ti thum chhal a, ka chal leh ka chhip sam chu a fawp tawn chhen a, ka ṭah chhuak lutuk pawh a zia ve tial tial e.

"Engtik aṭang khan nge tih tal chu min han hrilh teh Mazar, min hrilh mawlh teh" ka ṭap tawh lova, ka lung erawh a la chhe ru reng a, theih tawp chhuah tak meuhin ṭah loh chu ka tum a, a taksa ka sikna chuan ka ṭah chhuak zualpui kiam tawh chu a rawn thar thawh tir leh ni berin ka hria. 

"I pa'n pa Rintluanga ngaihdam a dil hma aṭang tawhin" tih chiah chu a rawn sawi a, ring lem lo tak chuan ka ṭap chhuak leh ta nge nge a, sawi belh leh ka duh tawh lo, awm tawp ila, thil a nih dan tur angin ni tawp se ka ti ta ber mai. 

Chhin khat pawh chhing lovin ka tlaivar ṭhak a, Mazara pawh a bang chuang lo. A tlaivar ve ringawt a, hauh emaw biak emaw ka tum rih tawh lo hrim hrim. Zing kar thlengin ka ngaihtuahna chu a la insual buai nuaih nuaih a, ka pa ngaihdam leh ngaihdam lovah ka rilru a buai a ni. Mazara chuan ngaidam turin min duh ngei tih ka hria, pasal te duh anga awm loh tawp chu hrehawm ka tiin nuam lo ka ti ve tho alawm, mahse a harsa êm si a ni. Hun kal tawh ka ngaihtuah chhuak lo thei si lo va, ka ngaidam dawn a nih paw'n tunah mai chuan ka ngaidam thei rih thlawt lo.

Kum 10 chuang teh meuh mai min rawn ngaihven lo va, ni lo, kum hnih thum kalta aṭang khan pitei'n min lo thlithlai ṭhin thu a sawi tawh tak e. Min hmuh ngam loh thu te kha a sawi a, min hmu ngam lo áwm reng pawh a ni e. Mazara nen nupa rethei ve tak kan nih lai te chu ka ngaihtuah chhuak a, ka pa kha sual lo se chu kan harsa bik miah lo ang. Khawpuiah kan awm lo vang tih pawh a sawi theih loh, thingtlang tlangval a nihna kha an hmu hniam em em nghal ringawt a, a enga mah hmain min duhpui lo nghal ringawt bawk a, kan buaina bul ber ngaihtuah chuan vawi leh khata ngaihdam mai a harsa ve êm asin, mi dang pawh ni se an thei nghal ngawt bik kher lo ang. 

Mazara chuan min thlem lêm lo va, min ṭawng thlamuan bawk hek lo va, mahse ka bulah a awm reng thung. A fate a ngaihtuah zual changa a tih fô ṭhin angin a service lo leh ta ngei a, dawra ka kal tur erawh a phal lo thung. In chhung hnawk leh tihfai ngai ka tifel mial mial a, pasal ka neih tirh ata ka la ṭawng tlem ber a ni hial ang. Tih tur ka ti zo tawh bawk nen in hnuaiah chhukin theitê kung bul daihlimah chuan ka ṭhu ngawi reng a, dawn nuam tâwk chiahin thli a thaw a, báwng sava nupa chu kan phuihnam kungah an fuh a, a rah an tlàn melh melh bawk. 

Ka bul lawkah thawm a rawn awm a, ka hawi phei vel buai duh lo law law a, tu nge a nih ka hre chiang ve ém bawk a ni. Ka kalsan lai kha chuan nautê ek a thian a, tui lûmin a bualfai nghal bawk a nih kha! Ka bula a lo kal danah a timu leh tawh a ni maithei, a lakah chuan ka inthlahrung rilru tak viau ná a, ka hun tawnin a zir lo bawk nen duh ang paw'n ka awm thei leh ta chuang lo. A âwmah min kuai bet a, kei erawh a sir zawng titihin ka la ṭhu reng a, kan ṭawng tam lo dun khawp mai. Sava hram ri ngaihthlak te, ngawi renga thli thaw dawn dun te chu kan tih theih tâwk a ni rih a nih hmel.

Minute tam kan awm dun hnu chuan ngawi reng bawkin ka tho a, ani pawh a rawn tho ve nghal a, kawnga ka kal reng reng chu uluk takin min veng ran bawk. Ei rawng bawl hun a lo thlen chuan keimah ni lovin ama'n a bawl ta vek a, ka chawhmeh duh ber te zinga mi hruizik chhung nô lai chu buh nen a siam pawlh a, ṭawngkâin sawi duah lo mah se min tihhlima min tihlungawi a tum tih chu a hriat ngawih ngawih. Rei lovah naupang pathum an rawn haw a, Duatpuia ber chuan inthlak nghal mai lovin min rawn kuah deuh tawp a, ka rilru nâ tidama min thlem turin ṭawngkam a la thiam tâwk lo tih ka hria, mahe min kuahna ringawt pawh chuan min tihahdam ru reuh hle. 

A u tih ang chiahin Awmawman min rawn kuah ve leh a, Hlute paw'n awm hle hle thei lovin min lo kuah leh ta nge nge a, a tawpa tawpah chuan thinlung takin ka nui ve leh thei ta. Kan fate chu ṭhenawm khawveng naupangte nen kan in kawtah an in-marble bâwt a, savun ṭhutthlenga ṭhuin ka en reng a, ka bula lawkah Mazaran chhawhchhi a deng tlauh tlauh bawk. Chawhmeh dang erawh a siam vek tawh a, chaw ei dawn téa hmarcha rawt leh a ni mai. In chhungah kan fanu chiah a awm a, mi dang zawng chu veranda-ah leh tual zawlah kan awm a, Duhsaki chu a muhil rih miau a, ngaihtuah àwm em em a ni hran lo. 

Ni 3 a ral a, Mazara pawh service tura ka tih luih tlat avangin a service leh tawh a, amah tak phei chuan min la ngaihtuah khawp mai. Ka pa ngaihdam leh ngaihdam loh bawk chuan ka rilru a tibuai a, ngaidam ta ila ka hlim phah ang nge ka inchhir ang tih te ka ngaihtuah a, Aizawla a chhuk hnu khan a rawn chhoh leh tawh miah lo va, dawra ka kal lahin pitei hnen aṭang a khawngaih thlak thu ringawt ka hre bawk si a, ka khawngaih ru ve tho, mahse mi dang hriata ka khawngaihna lan chhuahtir chu ka rilru chapona in a la phal ngâng rih lo. Ka rilru erawh a tir ang em em a ni tawh lo tih ka hria, thu tlukna siam dan turah ka buai tak zet.

"Numam" hmeichhe aw lo chhuahna lam chu ka hawi phei nghal a, min kotu hmel ka hmuh rualin ka hmui ka hup tawp a, ka bel nawh lai pawh ka tawp chat a, engati nge ani pawh hi tun hnuah chauh a lo kal reng reng? A hma zawng khan engati nge a lo kal ngai loh? 

"Ka fanu, min hrethiam lûl teh" ti lehin khawvel êng hmu tura min hringtu ngei ka nu chu ka lamah a rawn pen phei hlawk hlawk a, min kuah chiah chu ka insum theihna zawng zawng a puak darh leh ta vek. 

"Nu" ti ṭuauvin ka ṭap chhuak hawm hawm a, ka theih tawpa ringin ka ṭap a, nutling ni ve tawh mah ni ila nute bulah ngat zawng nautê ang maiin kan ṭap a, kan rilru nâtna zawng zawngte chu min tihkiam sak turin kan duh ṭhin. 

"Ka thil hriat hian min ṭhawng lutuk a, ka lo kal lo thei lo a ni Bawihte. Ka fanu, âw, engtin nge kan tel lo khan hun i lo hman ṭhin? Nu sual tak chu ka va ni chiang êm, ka huaisen tâwk loh aleiah hrehawm i tawrh phah si" ka nu chuan a ti mawlh mawlh a, chhun lai tak a ni a, dawra ka kal loh nî tak a ni bawk. 

"Khawiah nge Mazara hi a awm? Ani pawh hian ka thusawi tur hi a hriat ngei a ngai, kei zawng ka zak êm mai. I pa phei chuan a hmuh ngam tawh loh thu a sawi nghe nghe asin, eng ang nu leh pa nge maw kan lo nih reng reng le" ṭhutthlenga kan ṭhut dun hnu chuan a rawn ti leh a, kan ṭap tawh lem lo va, mahse kan inkuah chhung khan kan ṭap dun nasa hle thung. 

"I pa min hrilh dan chuan Mazara Sumo khalh lai Truck-in a sut chhiat tâk kha a ruahmanna vek a lo ni a, accident zawng zawng kha ruahman lâwkna vek a ni asin; chu pawh Mazara i ṭhen theih nâna ti a ni. Insawi fihlim ka tum miah lo, mahse hei kher hi chu ka hriatna a la rei bik lo, kum tam liam hnuah ka hre ve chauh a nih hi! I hriat tho chu ka ring a, kum 5 liam ta aṭang khan Mazara hi kan inah a lo kal ṭhin asin" a thusawi tawp ber chu ka hrethiam lo chiang kher mai. 

"Eng nge i sawi awmzia nu? Eng nge Mazara chuan a rawn tih ṭhin? Min hrilh thuai teh, eng thil fakau nge in hmusitna zawng zawng a tawrh hnuah a rawn ti leh?" ka ti phawlh phawlh a, ṭawng nêm pawh ka tum hran lo, ka thunun hman loh ang ângin a ri chhuak deuh tawp.

"Nun awhawm, nun ngil, rilru ṭha leh nghet, pawisa tam tak pawhin a hén zawh loh Mazara ah hian engkim a awm vek a ni. Keini ai i hmu fiah hmasa zawk a, khawvela hmeichhe vannei ber i ni Bawihte. Thlai rah leh thlai hnah chi hrang hrang, a tuihnai ṭha ṭha min rawn pe ṭhin. Min tlawn a ni lo, min tlawn a tum lo bawk. Kan makpa a ni miau a, a tih tur a nih thu a sawi mai a, khati khawpa kan hmusit chung pawh khan keini nupa chu a puzawn leh pizawn dik tak kan nih thu a sawi zawk asin" ka nu thusawi chuan min va han tihamhaih tehreng êm.

"I ute pahnih ni se an nun kan tichhe titih a, Duhawmi zawk phei chu Mizoramah a awm tawh lo. Mazara nen in inruk hnu rei lovah Rinawma nen an innei a, i pa nen pawh inhmuh thiam lohna an ngah mai. Delhi-ah Rinawma hna avangin an pèm ta réng a, phone-in inbe ṭhin mah ila an rawn haw tawh ngai lo" a tih zawm leh chuan

"Engtin nge u Vli a awm ve?" ka lo ti nghal vat a, u Duhawmi chanchin rawn sawi chhuak lo se chu zawh pawh ka tum kher lo, a sawi lang kher a, hriat châkna hlirin ka khat ta a ni.

"Ani phei chu sawi a hrehawm zawk, Mizoramah chuan a awm ngei a, amahin in a luah hrang a, fa pakhat neiin kum naupang têah nuthlawi a ni der tawh. A zirna lam a zawh rualin i pa'n pasal a neih tir nghal a, a pasal lah kha zû in mi niin a lo ṭha vak bawk si lo nen an inṭhen leh thuai a, inhmuh nikhua pawh hian min be duh tawh ngai lo, hmel hriat loh kan ni mai" a rawn ti ve leh a, u Vli zawk chu ka khawngaih thar hle.

"Engati nge a duh zawng tak in neih tir mai loh? A pawi thui tawh ṭhin asin, hmangaihte baka hlu hi an awm lo nu, kan hmangaihte leh min hmangaihtute hi alawm pasalah chuan ṭha; an hausak leh retheih lam ni lovin" ka ti hlawk hlawk a, u Vli thil tawn chuan min tithinrim leh hnuhnawh a ni ber. 

"I pa nen hian inngaihzawnna pawh awm hmasa lova innei tawp kan ni a, kan innei fuh em em a, kan inhmangaih tawn hle bawk. Kan nu leh pate ve ve khan rem an ruat tawp a, chu vang chu a ni mahna kan fateho pawh kan duh zawng tak neih tir phet che u kan tum ni!" inchhir hmel pu taka a tih chuan sawi tur haihchham zetin ka thaw hluai ringawt. 

"I unau dangte an awm bo chiah chu i pa sual a zual a, zu a in nasa em em a, kei ngei pawh kut min thlak ṭhin. Rawn tlawh che ka tum lahin a phal ngai bawk si lo, keiin amah ka hlau si a, ka nun kha a chêp ve asin, lo huaisen deuh hlek ila chuan ka rawn hmu ṭhin ngei ang che u" a tih zawm nghal zat a, ka nu chu ka en reng a, a hun laiin ka pa lamah ṭang tlat ṭhin mah se khawngaihna chen ka nei ve tho. 

"Thil a pawi thui vek tawh hnua sawi leh hi awmzia a awm tam lo asin, Mazara ka hmangaihna pawh in hmu lo der tlat a nih kha le. Ka ute pahnih pawh ka dem viau dawn a, mahse a bul chu nangmahni bawk in ni ka nu. In fate nun tichhe zawngin in awm tlat a, a pawi zo ta a ni" ka ti ve charh charh a, ka aw chhuak pawh a pangngai ta phian. 

"Ni ngawt mai, engkim hi keini in nu leh pate thiam loh vek a ni. Khang hun lai vêk khan zawi zawiin i pa a danglam a, a chhan erawh eng dang a ni lo, Mazara vang bawk a ni. Kar khatah vawi thum te a lo kal ṭhin a, kan biak loh chuan min be ngai lo va, in buhfai thar thleng khan kan lo ei ve a, a ṭhatna chuan i pa pawh a hneh pumhlum zo ta a ni" tih leh thawh a rual nghal a, ka chhungte laka Mazara awm dan mawlh chuan ka rilru a luah leh ta.

"Haw thlak leh nghal ka duh si a, Mazara chu kan ngaihdam dilna hi min lo hrilhsak mai ta che Numam. Tun ṭum chu a hmel ka hmu ngam rih thlawt lo, a chunga ka pasal chet dan avang khan ka zak êm mai" a ṭawng zawh rualin ka nu chu a chhuak nghal a, koh din emaw chelh pawh ka tum chuang lo.

Ka bel nawh lai chu nawh chhunzawm lovin ka rem ṭha ta ringawt a, ka rilruah zawhna tam tak a awm a, chung zawhna zawng zawng chhang theitu chu Mazara chiah a ni. Sumo Counter a thlen hun àwm velah ka bia a, a theih hram chuan lo haw hma turin ka ti a, a phur khawp mai. Ka biak hmasak lohna ni thum emaw vel lai chu a ni ve tawh a, kei tak paw'n hrehawm ka ti ru ve tho. Fimkhur tur te chuan ka chah hnuhnawh leh hram a, ani thinrim khum reng zawng a dik lo hulhûal a ni. Ka pasal a ni a, ka hmangaih a, eng pawh tâwk ila ka hmangaih kumkhua bawk ang. 

Zanriah kan ei laiin a rawn thleng ta ngei a, ka chet ngai lovin Awmawman a pa thleng tur a lo la nghal a, a kham chiah bawk nen a tan chuan lâk a harsa hran lo. Chaw kan ei chhung zawngin kan fate nen an titi char char a, hun harsa zawng zawng a paltlang hnu pawha a la hlim thei chu mak ka ti a ni. Ka thil sawipui tum erawh a hlim loh phah ngei ang ka ring, a chhan chu a eizawnna kha a ni miau a, chutah ka pa'n ruahman lâwkna vekin a la sut chhiat tir zui. Amah pawh damdawi inah a awm phah nghe nghe a, tun ṭum chu Mazara pawh a ngawih mai mai theih ka ring tawh bik lo, thinrim ta pawh ni se a áwm lutuk tlat. 

"Vawiin khan ka nu a lo kal a" ka tih chuan ngawi reng hian ka hmai zawnah a thaw lum ham ham a, vawi leh khatah che thutin a zangthal a, a chungah a bawkkhup zawngin min pawm bet a, a ti ka tiza thut leh tawh a ni maithei, a ti ka tihzat chang hian a chungah min bawh tir ve ziah.

"Kan inngaihzawn laia i accident chhan kha ka pa ruahmanna vek a lo ni asin, vawiin khan ka nu'n engkim a sawi chhuak vek. Kan thlai thar leh kan buh thar i pek ṭhin thu thlengin min hrilh a, ka chhungte laka i lo tlawm dan tur zia ka ngaihtuah hian ka nâ a ni" ka tih leh pawh chuan a la ngawi reng a, eng thil tak ngaihtuah ang maw!

"Ka sawi tum ber chu i eizawnna ber Sumo chhiat chhan te, accident i tawh chhan te kha a ni. Tunah hian i hre ve chiah ti raw? I thin a rim em? A pawi miah lo, i thih ṭep phah hial a, zuang chhuak hman lo la chuan i thi ngei ang" ka ṭawng zo chiah tihah

"I pa ruahmanna a ni tih chu ka hre daih tawh alawm, khami ni vek khan ka hria, i nitei pasal Zothana kha ka hmu bawk" a rawn ti ve nghal a, chiang zetin a hmel chu ka en thuai a, ani erawh chung lam a lo en tlawk tlawk thung.

"Engati nge i hriat vek si chuan police hnenah i report mai loh? Dik lo takin an puh che a, kan mu dun emaw an tih avangin police-in an mah phah hial che a, khang thilah te khan accident  i tawh dan kha hre chhuak ta che" ka aw chu ka thunun hman leh ta lo. 

"Khawvela ka thil hlauh ber chu nang chan che kha a ni a, nang nei tur che khan ka theih tawp tak meuh ka chhuah a, chu vangin i pa kha ka khing lêt thei lo a ni" a tih chuan ka ṭap leh tawp ringawt.

"Ka zak lutuk Mazar, ka zak tak zet. Nang chuan engkim i lo hre vek a, min neih theih nân harsatna tam tak i tâwk bawk a, i laka ka pa lo chet tawh dan avang khan ka zak thar ngawih ngawih a ni" tiin a âwmah ka bei ran a, ani ve thung chuan aw dam em em hian

"Pasalte bulah an zak ngai hleinem, thil liam tawh avangin ṭah reng tum loh tur. Ka tan chuan khawvel mihring piang tawh zingah i hlu ber a, i hlu ber zel bawk ang" a ti dap dap a, ka ṭah chhan tak chu lungchhiat vang em em a ni paw'n ka hre tawh lo, a inpawlh nuaihin ka hria. 

"Hmangaih loh harsa pa, ka thinrim khum tawh miah lo ang che, ka tihpalh Mazar" ka tih nawn mawlh mawlh chuan a rawn nui nghawr dat a, a âwmah leng em emin ka la bawk mu reng a, duat zet hian ka hnung chu a chul pah reng bawk. 

"Kha thu tê kha ka mamawh tak zawk chu a ni; zahna te, inchhirna te leh thinrimna te au chhuah puina lam ni lovin" tih leh mut ṭhat a rual a, a saisir zawngin a mu a, keiin ka lo khan nghal chial a, kan fanu pawh ka ngaihsak leh tawh lo.

"Mut tui le ka duatnu" ti thum chhalin ka beng vun nem lai chu rawn a pet zeuh a, maimitchhing reng chung chuan ka nui ta seih a, a kut lâin ka kawngah ka kuah tir zawm zat bawk a, amah ngei hian ngaihdamna thinlung ka neih theih nân bul min ṭanpui rawh se. 

(End of Chapter 45)