SUMO DRIVER By Havali Adam (CHAPTER 44)

SUMO DRIVER

By 

Havali Adam

Chapter 44

Ka dinna ngaia ding ngawi rengin thil ka ngaihtuah ngut ngut a, Hlutea ball lo petu chu ka pa a ni thei tih chiang takin ka hria, mahse ka awih lo, ni lo, ka phal lo zawk a ni. Min rawn hmu leh tur paw'n ka duh tawh lo va, ka fate ngat phei chu a them paw'n ngaihven suh se, mi rilru chhe em em ka pa chu ka haw thar hluah hluah. Rin loh ka tum a, mahse kan khuaa a awm mêk rinna lian tak ka nei tlat bawk si. A chhan chu Hlutea school bâng nen an inhmu ngei a nih ka ring a, a la kal hla tawp lo vang. Bathroom lamah ka kal phei pawk pawk a, kawngka hawngin 

"Khawiah nge i pu bik chu a awm Hlute? Khawiah nge in inhmuh?" ka ti nghal zung zung a, chawhtawlhah a lo ṭhu a, chu chu a inbual apianga a tih ṭhin dan a ni hrim hrim a, tui heh deuh hlek mah se hauh nachang pawh ka hre tawh lo a ni ber.

"Kan school kawngah, a fel lutuk nu" ngaihtuah thui lo tih hriat deuh hian a rawn ti ve mai a, kal sawn ta mai lo chuan ka ṭhut hnaih a, an inhmuh dan leh an inbiak dan zawng zawng hriat vek ka duh, a chhan chu ka pa bak a nih ka ring tawh lo.

"I pu bik chu a hmâin i hmu tawh em Hlute? Min han hrilh thuai thuai teh, amah chauhin em ni i hmuh? A bulah mi an awm em?" ka aw chu a pangngai thei thlawt lo, ka hlauthawng satliah lo va, namên lovin ka hlauthawng zawk a ni. 

"Ka vawi khat hmuhna, amah chauhin ka hmu, ka inbual duh a nia nu" a tih chuan ka ding zui nghal a, ka bual te a nih loh chuan a inbual laia tihbuai a duh lo ṭhin reuh a, chung thleng chuan ka theihnghilh vek tawh. 

Rei tak thâng pawh tum lovin in aṭang chuan ka tlan chhuak titih a, ka hmanhmawh hle a, Hlutea pu bik chu ka hmuh ngei a ngai a ni. Kawngpui ka thleng a, school lamah ka tlan chho dawn chiah tihah ka ding chawt a, ka hawi kân tawhna lam chu ka hawi phei leh ngat a, motor thleng chuan hmâna ka pa motor ngei kha a ni. Ka kal hnaih rualin a tlan chhuak riai riai a, motor awmna lam pan chuan ka phei chak tial tial a, min hnung chhawn tlat avangin motor khalhtu erawh chuan min hmu lo thung. Motor pawh a tlan chak tial tial a, a sir zawnga ka va hmu chiah chu ka ang phuau ringawt. 

"Ni lo, amah a ni lo" tiin ka phun sep a, mahse ka pa ngei a ni tih keimah ka inhriat chian tlukin ka hre chiang thung a, chuti ang em ema a hmel a lo danglam ta chu mak ka ti a, min tihamhaih tak zet bawk.

Ni e, chiang takin a hmel ka hmu hman miah lo, mahse a sir lam aṭang paw'n a cherzia tilang tura a hmai kî em em tawh te kha ka hmu hman vek a, ka pa ngei chu a ni si a, hmâna ka pa ni ṭhin; Mazara min duhpui loh avanga min tuithlar hialtu ka pa kha a va ang tawh lo si êm. Eng vanga lo kal a nih tih lam ka ngaihtuah chhunzawm nghal a, tun hnua a hmel a rawn lang leh ta mai chu ka hrethiam lo a ni. Kum tam a liam tawh a, ka thisen zawmpuite aṭang ngaihvenna pakhat mah ka dawng ngai lo, mahse engati nge tunah a rawn lan leh thut? 

Dik tak chuan Mazara nen kan inneih aṭanga kum tin khan ka chhungte ka hre chhuak ziah a, min huain min tuithlar tawh mah se ngaihsakna tlem tal ka dawn ka ring ve ṭhin, mahse kum 10 chuang zet chu an pil bo hmak thung. Ka hriat chhuah chang hi chuan ka nâ a, ka ṭah te a chhuak a, mahse min hmangaihtu ka pasal leh kan fate avangin hrehawm tihna ka nei rei ngai lo ṭhin. Ka ute pahnih hrim hrim pawh an reh tlawk tlawk a, ka nu thlengin kum tam ka hmu tawh lo hlawm a, an chanchin kawi khat pawh ka hre ngai lo va, ka hmeichhiatpui an ni a, kum hei leh chen an tel lovin nung tawh mah ila min rawn ngaihtuah ka ring ve ṭhin tho.

In ka thlen thlak leh meuh chuan Duatpuia leh Awmawma pawh an lo haw tawh a, Hlutea ni se a lo inbual fai vek tawh bawk a, kei erawh ka rilru a la khingbai nasa khawp mai. Ei rawng ka bawl lai te chuan ka pa hmel cher lutuk mawlh chuan ka rilru leh ngaihtuahna a luah a, ka mitthlaah a châm reng bawk a, ka thin pawh rim ru tak a ni. Mazara hrilh leh hrilh lovah ka rilru a buai nghal hle a, hria se chu a thin a rim ve dawn tih ka chiang. Khati ang khawp khan ka pa'n a hmusit a, a eizawnna nen lam a hmuhniam a, Mazara tan chuan ngaihdam mai mai theih a ni dawn lo chiang lutuk. 

Maipawl ka chhum a, ṭawktê thlak theihnghilh khawpin ka rilru chu a kal ding a, a hmin vek tawh hnuah ka thlak a, ka chhuan ṭhat leh phah nghe nghe. Ka ei rawng bawl reng rengte chu a dik hlei thei lo, thil ka tisual nûal a, ka ngaihtuahna a fim hlawl lo a ni. Pindan lamah Duatpuia te unau pathumin an naupang ber an awmpui a, an chhaih vel a, an thawm chu hre reng mah ila ka ngaihtuahna erawh hmun hla takah a awm daih thung. Ka chhungte lam ngaihtuah zui duh tawh lovin ka lute chu ka thing nawk nawk vel a, awmzia a awm tam lo hle.

Zanriah kan ei lai te chuan ei tuina pakhat mah ka nei lo va, tlaia ka thil hmuh mawlh chuan ka awm a tinuam lo tluang zel a ni. Chaw kan ei laiin Mazara a rawn haw a, a fanu pawmin chaw a ei ve nghal a, min lo en changte chuan ka lo nui lui vel mai mai a, a mitmengah ka awm dan dik lo a hria tih ka hmu thiam nghal a, a hnuah phei chuan ka nui lui hram hram vel duh ta lo law law. Chaw kan ei kham a, eina dawhkan chu Duatpuian a tifai a, keiin thleng ka sil a, ka hman ve meuh chuan inbiakna hun awm lo khawpin Mazara chu kan faten an lo bawr leh laih laih tawh. 

Pindanah lutin tih tur tak phei chu ka nei lem lo va, kan nupa khum leh Duatpuia te khum ka siam lâwk ta ringawt a, ka pasal leh kan fate inbe thawm chu ka ngaithla deuh tawp a ni mai. A inbual hlanin naupang hovin TV an en a, a inbual zawh veleh an bawr leh nghal laih laih a, a mak hi ka ti leh thut ṭhin. Mipa hlang an ni bawk si a, an inngai em em mai chu hmuh nuam viau ṭhin mah se mak ka ti leh thut zel. Mazara chu a fate tan pa ṭha tak a ni tih erawh ka chiang em em thung a, chuti taka a fate'n an ngai a nih chuan sawisel bo khawpin pa nih a tlin tihna a ni mai. 

A tlin rèng bawk a, a fate tan kawm theihin a awm zel a, a tlangval laia a ṭhian kawm ve ṭhinte ai paw'n a fate bula awm a thlang zawk zel a, a nu leh pa thihna khan a thlak danglam niin ka hre ber. Thansiama tak ngial paw'n lêng turin a sawm chhuak hlawhtling hlei thei ngai lo ṭhin, sawm chhuak ve ta pawh ni se a fate a hruai zel mai bawk si a, a fate lah hnial emaw peih loh a hnêkin an lo phur em em thung ziah leh nghal a, anni pafaho hi chu pawh hran theih loh tluk an ni. Vawi khat phei chu a service-na ah Duatpuia a hruai ve tawh nghe nghe a, ka ngaihtuah tehreng nen him dam takin an lo haw ve leh mai bawk. 

Kan fate chu an khumah a mutpui leh dial a, zan dang ang bawkin Mizo thawnthu ngaihnawm tak liandova te unau chanchin chu a sawi a, an mutna inang hlawm lo mah se kan fate chuan an kuah ṭhap tho va, an pa taksa si lovin an awm thei lo a ni ber. Duhsaki tak ngial pawh a pa âwmah a bei hle hle a, tui takin a muhil a, a chang chuan ka nui leh ṭep zel. Thawnthu sawi e ti lo chuan Mazara chu a ṭawng tawi thei em em a, ziak dawn ta ila chuan full stop emaw comma a tam khawp ang, mahse chu tak chu kan fate leh kei ngei paw'n a ngaihnawmna niin kan hre tlat si, mak ve mai mai tak chu a ni. 

"Kan titi thei ta e" ka sira kan fanu mut pahin a rawn ti sup a, ka hnung lama a mut thlak rualin a lam hawi zawng chuan ka inlet nghal a, ka fanu pawh ka hnung chhawn hmak a, eng dang vang a ni lo, ka pasal chu ka ngai ve alawm le. 

"Motor i khalh chau awm ṭhin si a, i lo haw veleh naupangho i buaipui leh a ngai a, kei tal hian lo chhawk zângkai thei ve deuh che ila ka ti ngawt mai" ti sêp sepin a ṭhi chu ka khâl niap niap a, hmangaih ber te ṭânga bei zawng thla a va muang hliah hliah tak êm. 

"Nuam ka ti alawm, i ṭha em?" a tih chuan a mal leh mal inkarah ka ke ka va rawlh a, ani pawh awm mai mai lovin a rawn che ve nghal a, a hmel ka hmuh theih turin a mu saisir a, a ke lian leh sei zet chuan min kham run bawk. 

"Ka ṭha e, mahse ka ngaihtuahna erawh vawiin chu a vak kual nasa khawp mai, tun thleng hian" hahdam zet chuan ka lo ti ve mai a, a mitmengah ka rilrua awm chu sawi nghal mai tura min tihna ni awm tak ka hmu thuai a, sawi chhunzawm nghal chu ka tum hrim hrim. 

"Vawiinah ka pa ka hmu thut a, Hlutea ball a lo leisak bawk a, mahse ka hmu chiang hman lo. Dik tak chuan maw Mazar, ka hlauthawng a ni. Kum tam tak liam hnuah a rawn inlan a, kan chhungkaw pawt ṭhen zawngin chet a la duh lo vang tih lah kan hre bawk si lo" ka tih chuan a âwmah min kuai bei hle hle a, ka mit ka chhing vang vang a, ka pa hmel cher lutuk bawk chu ka mitthlaah a rawn lang leh ta.

"A hmu ve che em?" a zawhna avang chuan ka meng zui nghal a, tlai lama kan awm dan chu ka ngaihtuah lêt a, ka pa khan min hmuh áwm ka hre miah lo, motor-ah min hnung chhawn zawngin a chuang tlat a, hmuh chian tumin va tlan lo phei ila chuan ka pa ngei a ni tih ka finfiah hman lo zawk maithei. 

"Min hmu lovin ka hria, min hmuh pawh ka ring chiah lo. Hlutean ball a rawn hawn tirh chuan putea leisak emaw ka ti hman a, mahse Hlutea khan a nih loh thu a sawi si a, rinhlelhna nasa tak nei chungin ka pa hmuh ka tum a, ka hmu ta ngei a, mahse ka thin a rimin mak ka ti hnuhnawh hle" ka ti mawlh mawlh a, ani erawh a ngawi ta reng. 

"Mak i ti ve em Mazar? Ka pa hi i la haw reng ti raw? Pawi ka ti lo, kei pawh hian ka la haw reng, ka haw tak zet a ni. Thingtlang tlangval i nih avangin ka tan a iai che a, khang zawng zawng kha a hmel ka hmuh rualin ka hre chhuak leh vek" ka ti leh pawh chuan a ngawi reng tho va, ka pa chu a lo la haw ve reng tih ka hrethiam mai. 

"Hei hi engati nge? Engtik laia awm nge?" tiin a ban puam khauh ruh ṭung chu ka khawih a, a ser lai chu ka zut vel a, ka vawi khat hmuhna a nih piah lamah chuti angin ser a nei tih ka lo hre lo hrim hrim a, mahse ser rei tawh tak ai chuan tun hnai maia mi a ang mah mah zawk. 

"Aizawla zan khat ka châm lai kha i la hria em?" a rawn ti thum chhal a, ka lo bu nghat a, ka la hre chiang khawp mai, thil ṭul leh thil hmanhmawh thlak a awm avanga châm a ni nghe nghe a, khami zan kha chuan tûmah kan mu thei lo, naupangho nen lam kan tlaivar vek tawp ringawt. 

"Khatah khan ka hmel hriat pakhat damdawi inah a awm mêk a, a thisen mamawh kha a chhungte'n an nei si lo va, ka thisen nen a lo inmil chiah bawk nen ka pe ta a ni" a tih chuan mak ka ti ang reng, mi dang ṭanpuiin ṭhil ṭha tak a ti a, chuti angte chu zep kher ngaiah pawh ka ruat lo.

"Nang hi chu âw, i va'n famkim bik tak! Pasalah ka nei lo ang che tih ka hlau ṭhin, i chhungkua enkawl i thiam si, i nupui erawh i fate ai duat zual ka ngai maithei" nui sen sen chuan ka ti a, ka pa lam réngin ka rilru a luah thei tawh lo, ka pasal nun ngil lutuk chuan min tihlim ngawih ngawih tawh zawk a ni. 

"I duhawmin i hmeṭha tulh tulh mai zawng a nih hi!" ti ril ruihin min fawp vawng vawng a, ka thiam ang tawkin ka lo chhang lêt ve tawn tawn a, kan inngaihzawn lai aṭang tawh a mi fawhna dawnsawn nuam zet chu ngaiah ka la nei thei lo tluang zel a, ngaia neih ka duh reng reng lo bawk. 

A tukah chuan dawrah ka awm leh chawt a, Mazara ni se a service leh daih tawh a, pitei ṭawng malh malh chu ka ngaithla a ni deuh ber. Ka pa hmel mawlh khan min chenchilh tlat a, ka mitthlaah a châm reng a, ngaihtuah loh ka tum paw'n ka thei der lo. Chu vang pawh chu a ni ang ka ngawihchawih em em, pitei chuan ni dang ka án loh thu a sawi nghe nghe a, mahse ka rilrua awm erawh ka sawi chhuak duh ta chuang lo. Anni leh zel hriattir chu ṭul ka ti lem lo ve hrim hrim bawk a, a hre tur ber ka pasalin a hre tawh a, chu chu a tâwk chiah. 

Tlai lamah erawh ka zia ta deuh a, nautê awi hliai hliau pahin kan fate infiam chu ka en a, kan inbul vel hi infiam nân êm chuan a zau hran lo va, mahse tun hnu hian naupang infiam an ṭhahnem ve thei ta khawp mai. Naupangho chu an inbawlvawm a, Hlutea leh a ṭhiante erawh kan in hnuai leh a kâwm kâr velah an inṭhingkah thung a, an au lauh lauh a, khumah nautê ka la mut chuang lo bawk nen ka khap duh lêm lo. Kan fanu Duhsaki chu ka la paw reng a, ei rawng ka bawl pah bawk a, rilruah thil dang kaptu awm ru reng mahse pangngai taka awm chu ka tum lui hram hram a ni. 

Dar 4 bawr velah Mazara nen kan inbia a, a lo haw hma dawn thu leh zanriah ei hun vela a lo thlen a rin thu a sawi a, ka lawm ang reng. Tin, chawhmeh atan chhawhchhi deng turin min ti bawk a, ka chhawhchhi den kher loh hi chu a ei duh lo tlat ṭhin a, kan fate pawh chuti bawk. Thingtlangnu han nih meuh chuan chhawhchhi ringawtah pawh chhi tak leh chhi bung a awm tih kan hre ve ta zel a, den hmain kán a ngai hmasa phawt ṭhin tih thlengin ka hre tawh a, engkim chu Mazara min hrilh leh zirtir vek a ni. Chhawhchhi ngat phei chu a kung aṭanga lâk dawn hian a ṭil duh ṭhin si a, a tir lamah phei chuan ka buaithlak thei khawp mai. 

Ka pasal duh ang ngeiin chhawhchhi chu sum leh sukah ka deng tlauh tlauh a, mahse ka deng rei lo. An infiam laklawh lai kalsan meuhin Duatpuia a rawn haw a, ka chet ai zawng zawng a che ta vek a, a nau Awmawma pawh a rawn thleng phei har lo hle. Fapa fel leh hmelṭha tak tak ka nei a, nu ber si hi min dawm thiamin min ngaihtuah em em ṭhin a, Mazara zirtirna rah vek niin ka hria. Nu leh pa chawimawi an thiam a, an nun a ngil a, Duatpuia ngat phei chu a ṭhiante'n meizial zuk ruk an ching ṭan a, mahse a pa'n zuk a phal miau lo va, a ṭhiante angin a zu ru ve dawn lo tih ka chiang. 

Hun leh nî te chu ding reng lovin a liam zel a, kan fanu paw hma a sawn zual em em a, a pian tirhah tê ang reng viau mah se a lian chho ta viau bawk. A pa lah hian a duat nasa mai si a, a ute ho hian an thik lek lek ṭhin. Hlutea phei chu a titau tawh nghe nghe a, rei lo tê hnuah a pangngai ve leh mai bawk a, Mazara erawh chuan inang veka a duat hlawm thu a sawi dap dap thung. Hlutea ber hi kan buaina a ni ṭhin a, a nau chiah a lo ni kher bawk nen a pa'n Duhsaki a pawm chuan pawm a ngen ve nghal a ni mai. A pa ni se hnial a hnêkin an fate pahnih chu a pawm mai zel a, Mazara bulah hi chuan a tua te mah kan titauin kan thinrim rei tak tak thei lo a ni ber e.

"Ka hrilhfiah tawh alawm, ka pa paw'n engmah a sawi tawh lo. Ka nu erawh a la hlauthawng lutuk a, chu chu ka buaina pakhat a ni" Tlantea chuan a ti nghet charh charh a, kum tam a liam tawh bawk a, a aw pawh a thumin a puitling ve tawh hle.

"A loh theih nâng, pitei ngat phei chu fate ngaihtuah a pe nâ si" ka lo tih zawm ve nghal mai a, a ngaihzawngnu nen an la inzui reng a, zu zuar fanu mah ni se kei chuan sual ka ti miah lo, a naupan ngaihtuahin a puitling ka ti ru hle tawh zawk.

"Kal ila" rawn titu Mazara lam chu kan hawi phei a, a bulah Duatpuia a ding ve ran bawk a, chakai meichher chhit an tum a, kei tak chuan Duatpuia hruai ve kher ngaiin ka hre hran lo, Mazara zawkin a bula kal turin a hrilh miau bawk si.

"Kan la sawi ṭha dawn nia" tiin Tlantea chu a tho va, Mazara te awmna lamah a phei zui nghal a, Hlutea leh Awmawma erawh pindanah an awm a, an thawm a reh hmak thung, a pa'n a zilh ve ve a ni ngei ang.

"Fimkhur ula aw, lo haw hma hram in tum dawn nia, a tam loh phei chuan lo haw leh daih rawh u" an chhuah dawn chuan ka ti leh hram hram a, inrinni zan a ni a, ni lo se chu Mazara pawh chakai a khawrh hman kherin ka ring lo. 

Mazara te an kal liam hnu chuan pindanah ka lut a, Hlutea chu pangngai deuh hian a lo awm a, a nau a chhaih hlim har har bawk a, Awmawma zawk chu a awm dan a dik ta tlat lo. Ani hi chu a ngawichawi em em a, Hlutea hian chhun se chu a ṭha khawp mai. A mut kawm ngûlna khumah chuan ka ṭhu thla a, ka sik rualin rizaiin a inkhuh daih a, a rizai chawpin ka kuah a, ka mutpui a, a pa ang êm chuan uap lum ve dawn lo mah ila a mamawh tlatin ka hria. A hnu rei lo tê ah a rawn ṭap chhuak a, a rizai chu hlimin a hmel en ka tum a, ani erawh chuan min rawn kuah vat thung. 

Awmawma hi chu a ṭap khât asin maw le, a ngawihchawih ang âng hian a hlim tâwk em em a, a u leh nau te ai pawh hian ṭhian a kawm tam lo deuh bawk. A u ṭhiante hi a lo kawm ve thei zel mai a, a u Duatpuia bulah a tal tam a ni ber. A u tak paw'n a duat a, a dawm thiam a, a kalna ah leh ball an pet dawn te hian a hruai ve mai ṭhin. Chuti ang khawpa fapa fel chu ka nei hlawm a, ka hlim ṭhin, mahse tun ṭum Awmawma ṭah dan chu a dang tlat a ni. A ṭap muhil ta nge nge a, a hmel ka hmu chiang chiah chu khawngaih tak ka ni, a mit a chhing chung paw'n a mit buizia a hriat theih vek.

Dar 1 dâwnah Mazara te pawh an lo thleng a, an hlawhtling phian leh nghal. Keimah chiah ka meng tawh a, Duatpuia tih loh kan fate erawh an muhil vek tawh thung a, Awmawma awm dan chu ka sawi duh ta lo law law. Chakai chu ṭinah kan dah khawm ruih a, Duatpuia a inbual nghal a, Mazaran an chawhmeh tur chakai tlem a siam mawlh mawlh bawk a, rilru a hahdam ta huai e. Chaw an ei lai chuan an bulah ka ṭhu ve reng a, a hnuah phei chuan thleng ka la ri rawk rawk a, chaw ka ei ve leh ringawt. Duatpuian an kal dan chanchin a sawi melh melh reuh a, nuam a tihzia chu a hmelah a hriat hle. 

"Ka duh lo!" naupang aw rî ah chuan ka harh zawk a, thawhphan nei miah lovin thosilen kar aṭang kan fate khum lam chu ka en thla nghal a, ka hlauthawng hman êm asin, mahse ka thil hmuh avang chuan ka thaw huai mai.

"Keima'n ka duh alawm, i ṭah reng chuan au Duatpuia leh Hlutea hian an nuih mai ang che" Mazara aw chu a dam thum raih a, Duatpuia leh Hlutea chu che sawt sawtin kan khum lamah an rawn insawn chho daih bawk a, Mazaran chho tura a hrilh lai ka hre lo hrim hrim, anmahni duh thua lo chho an ni maithei.

"Min duat lo bik êm mai pa, ka hming paw'n min ko ve ngai lo. Au Duatpuia chu i kalnaah i hruai ziah a, Hlutea pawh i pawm ziah bawk a, kei chu engtin mah min ti ve ngai lo" tiin Awmawma chu a ṭap zui nghal hlawp hlawp a, ka rilru a lo nâ ve vawng vawng thei.

"Ka duat lo bik lo che asin, u leh naute thik miah loh tur ka tih kha i hre tawh lo em ni? I u Duatpuia kum rual i nih hunah chuan ka hruai ve dawn tho che alawm, Hlutea thlengin a hun takah thil ka zirtir vek che u ang a, ka hruai vek dawn bawk che u" an pafa inbe thawm chu kan lo ngaithla kar hlawm a, Pathianni mah ni se ruah a sur duh ang reng hle.

"Nizanah khan min hruai ve mai ta che, ka kal ve châk alawm" ṭap hawm hawm chung hian Awmawma chuan a rawn ti leh a, a rilru a nâ ve tak zet a ni ang, a piana hnu lamah chuti ang renga ṭah nasat chu a la nei lo. 

"Ṭap tawh lo teh Awmawm, ka rilru i tinuam lo zual a nia, ka fapa i nih hi maw le. Aw le, ka duat em em ang che, a ṭha em? Ṭap tawh suh le, i ṭap reng a nih chuan ka thin a rim dawn a nia" ṭap thawm chu a reh nghal deuh dûak a, mahse insut feih feih thawm erawh a la awm tho. 

"Mazar, khati ang zawng kha chuan i fapa kha thlemin vau lo la" mut hmun aṭang chuan ka ti ve ta nge nge a, tun ṭum chu a thlem thiam vak bik lo a ni ang, chu bakah vui vaina nei ngai lo leh ngawichawi ber Awmawma a ni kher bawk si a, thlem dan dang a hre lawk bik lo a ni mahna.

"Tho ang aw, kan pahniha ei rawng bawl dun i duh em? Ka chawhmeh siam laiin min pui ang a, ei rawng bawl ka zirtir nghal che a ni mai" Mazara aw chu a hma ang bawkin a dam leh ruih a, Awmawma erawh a thawm ka hre tawh lo va, a ṭawng tawh lo hrim hrim bawk. 

"Awmawm?" Mazara bawk chuan a ti leh sup a, innem kângin an mutna lam chu ka zu en a, kan fapa chuan a pa chu ngheh hmel zet hian a lo kuah ran a, a mit a chhing tlat bawk a, a ṭap muhil a ni ngei ang. 

Khum aṭanga thovin choka lamah ka chhuak phei a, kan fate erawh an muhil leh vek tawh a, dar zat ka en chuan a tlai tawh ang reng hle. Chawhmeh ka siam zung zung a, dar 9 rik dawnah ka inbawl peih hman ta hram a, inkhawm kan ngaih avangin kan fate chu ka va kai tho ta vek bawk. Tukṭhuan kan ei a, Awmawma chu a pa bulah a ṭhu a, a unau dangte paw'n engtin mah an ti chuang lo. A mit lah chu a bui em em leh nghal a, a ṭap nasa thawkhat tih a hriat hle. Chaw kan ei kham a, inkhawm a duh lo ta tlat a, Sande sikul a la kal kim a, an unaua Pi Zaii Medal lâk an tum thute chu ka hrilh nawn leh mawlh mawlh a, a tawpah erawh kan thu a hnial reng ngam ta bik lo.

Inkhawm ban aṭang ni lêng deuh thaw chuan a pa nen an awm dun chawt a, chawhma lamah a nui hmel hmu lo mah ila chawhnu lam aṭang erawh a nui ve leh thei tawh a, a ngawichawi viau tak ná a, rilru ngheh lamah a pa a chhun ber dawnin ka hre ta. Zan inkhawm banah putea te inah kan lêng chho vek a, kan lêng rei phian a, pitei chuan riak turin min ti nghe nghe. Riah êm chu kan ti ta lo va, in kan thlen thlak hnuah pawh Mazara chuan Awmawma chu a la awmpui deuh chawt a, khumah a mutpui leh thlap bawk a, chuti anga pa ber a awm miau chuan fate tan lungawi loh reng a har khawp ang, Awmawma pawh a pangngai vek tawhin ka hria. 

"Naupang mai a ni tih ka lo theihnghilh a ni mahna le, mi dang aiin a rilru a puitling ru riau a, ka tlaw ve hrim hrim" kan nupaa kan mut hnu chuan Mazara chu a ṭawng thum bul bul a, a inthiam lo ve deuh tak tak a ni ang ka ṭawng hmasak a ngai lo reng reng. 

"A sawi dik chiah, Awmawma bik hi a hmingin ka ko khât asin" amah bawk chuan a rawn ti leh a, in chung chu a en reng a, nu leh pa chân tawh a ni a, a fate tana pa ṭha ber nih chu a duh dawn tih ka chiang a ni. 

"I hmangaih dan erawh ang khat vek alawm a nih, a hminga i koh khât avang khan i en hrangin i hmangaih lo tihna a ni lo" ka tih chuan nui lui tih hriat zet hian a hmui a chet zeuh a, a lamah tawlh hnaiin ka va kuah ta ringawt. 

Min rawn kuah lêt ve mai bawk a, hmangaihna mitmenga min enin min fawp zeuh a, a nui leh suk bawk a, tun ṭum a nui chu nui lui ni lovin nui tak tak a ni ve ta. A âwmah ka bei hle hle a, ani paw'n duat takin min kuah a, ka awm a nuam ta veng veng mai. Zingah chuan kan nupain kan tho rual a, ei rawng ka bawl laiin tap chhakah a ṭhu a, zing kar aṭang khua chu a ṭha hle bawk. Naupangho pawh an rawn tho sap sap a, rei lovah chaw kan ei nghal a, Awmawma pawh tûk dang ang chiahin a pangngei leh vek tawh a, school an kal dawn tak tak chuan

"Tipalh pa, ka titau tawh lo ang" tiin a pa hnenah ngaihdam a dil thlap a, a pa lah chuan a lo ngaidam nasa mai si a, mipa pathum chu thil ṭha tak hawn a tum thute a sawi nghe nghe a, hlim takin an inzui chhuak a, an awm lo chiah chu a reh duak thei.

A sawi ang ngeiin Mazara chuan a fate thil a rawn ta ngei a, Hlutea phei chuan a mutpui hial a, ani tê hi chuan a nu leh pa min tihlim ve chiang alawm, a ṭawngtheih mai bakah hian a lawmawm tel tlat a ni. Mazara pawh nitin service-in hun a hmang ṭhin a, a hahthlak ve thei ngawt ang ka ring. A kuma kum chu a khalh ve tawh ngei a, amah hian nuam a ti hrim hrim bawkin ka hria. Bungraw hlan thlak te, motor khalh hrim hrim chu a hahthlak thawkhat ve viau ang, kan khua leh Aizawl inkarah kawng chhia a tam bawk si nen a namai dawn lo tih ka chiang a ni. Amah lah hian engmah a sawi ngai lo va, mahse a chau hmel hi chu ka hre chiang ve tawh lutuk tlat.

Nilaini a ni a, zan lam aṭang tawh ruah a sur nasa em em a, chanchinthara an puan dan chuan tui a lian nasa hle a ni awm e. Zingah pawh zan lam ang chiahin ruah a la tla reng a, Mazara chuan service loh law law a ti tlu ta a ni. Inah kan awm ṭhap a, ruah sur apianga an tih fô ṭhin angin Awmawma leh Hlutea chu chaw ei dawhkan hnuaiah an inkhualtêlem leh a, Duatpuia erawh thil a ziak mial mial thung. Ruah chu a hân deuh a, mahse a la tla reng tho va, khaw school zawng zawng khar a ni a, kan fate pawh school an chawl vek nghe nghe.

"Lo lut rawh" kawngka kik thawm ka hriat rualin ka ti lang lâng a, tun ang ruah sur laia lo lêng lut duh tur chu putea te chhungkua emaw Thansiama a ni ngei ang, mahse kan in kawngkapui hawnga lo lut mêk hmel chuan min va ṭhawng chiang em.

"Eng nge i lo tih dawn? Tu nge i nih? Chhuak nghal rawh, kan inah hian lo kal reng reng suh" ding meuhin ka tivin nghal hlawk hlawk a, kan fate inkhualtêlem lai leh thil ziak lai pawh an tawp chat a, ka insum hman lo a ni ber e.

"Numam" Mazara zawk chuan min khap daih tum ang mai hian a rawn ti a, ka kut chu a chelh zui nghal bawk a, ka thinrim lutuk leh ka hmaa ding ngawi reng hmel ka haw lutuk chu ka sa chhuak vekin ka hria. 

"Chhuak rawh ka ti a ni lo'm ni?" ka ti vin leh hrawk a, ka hmaa ding chuan ka mitah tak min en a, rei pawh min en lovin Mazara zawk chu a en leh a, chhuah tum lo ang maia a ding reng ringawt chu ka haw tak zet. 

"Nangmah hmuh tum chea lo kal ka ni lo" a rawn ṭawng chhuah ve chhunah pawh ka thin khei zak tur ṭawngkam bawk a chhak chhuak a, hmân ang tho khan a rilru a la chhe reng dawn a nih hi! 

"Kan ina lo kal ngam tur pawh hi i ni lo, kan zingah hian chhungte emaw thisen zawmpui pakhat mah i nei tawh lo tih hre rawh, ni lo, i hre chiang khawp zawk ang" nem fahran lova ka tih chuan kan awmna lamah a rawn kal phei a, Mazara khup vuan meuha a ṭhingṭhi thut chu ka hrethiam ta huah lo. 

"Ka nunna min chhanhim sak avangin ka lawm e Mazar, ka lawm tak zet a ni. Ka nupuiin min hrilh ngam lawk lo va, min hrilh rual rualin nang hmu tur che hian ka lo kal tawp a ni" ka pa chuan a ti ta mai, mak ti zetin Mazara zawk chu ka en thuai a, min lo en miah lo leh nghal. 

"Ka hmaah kher chuan ṭhingṭhi lo teh ka pu" tiin Mazara chu a ṭhutna aṭang a ding a, a hmusita ngainep em emtu ka pa chu a kai tho vel a nih chu maw le, engtin nge a theih zawk? Nge Mazara hi a â zawk em ni?

"Duatpui, i naute hi in hnuaiah lo zu chhuk pui rih rawh le, nihliap keng bawk ula" Mazara bawk chu a ṭawng zawm leh nghal a, kan fate pawh ngawi rengin an chhuak a, kan in chhunga thil thleng mêk chu ka va hrethiam lo nasa tak êm. 

"Mazara hian kei thi mai tawh tur hi min chhanhim asin Numam, khami zan khan ani hi awm lo se chu ka thi ngei ang" ka pa aw ka hriat rual chuan vin em em hian

"Ka hming khan min ko reng reng suh, i fanu ka ni tawh lo tih i theihnghilh ta em ni? Kei chuan ka la theihnghilh teuh lo, ka theihnghilh lo chiang khawp mai" ka ti hmawk hmawk a, a mitah ka en kar a, ka pa mittui chu a biangah a rawn luang zui nghal bawk. 

"Nang pawh eng nge ka lakah hian zep i neih? Engati nge in thusawi awmzia hi engmah ka hriat ve loh? Sawi rawh Mazar, nupa kan ni a ni lo'm ni? Engati nge thil zep ṭhen i neih reng a?" ka ṭawng tawp lam chu a ṭah chhuak aw lek lek a, ka rilru chu a buai nuaih nuaih tawhin ka hria.

"I hre miah lo maw!? Mazara hian a hrilh lo che em ni? Khami ni khan accident ka tâwk a, thisen ka hloh nasa hle a, ka thisen milpui a vâng bawk si a, i nu phei chu a mangang hle. Mazara a rawn lang thut a, ka mamawh tâwk a thisen min pe a, chung zawng zawng chu nimin khan ka hre ve chiah. A chhan chu i nu hnen aṭang engmah ka hre lo, chu pawh ka suahsual lutuk avangin" ka pa a ṭawng zo chiah chu ka hmui ka hup tawp ringawt. 

"Ka pu thusawi zawng zawng hi a dik e" min en reng chunga Mazaran a tih chuan ka mittui a baw nghal zawih a, ka dinna aṭangin ka tawlh sawn tial tial a, min khawngaih hmel taka min enna te chuan ka thinlung chhung a tina ngawih ngawih. 

"Mazar, ka pasal i ni lo em ni? Engati nge i nupui lakah hian thuruk leh thil zep i neih reng le? Ni lo, i nupui ka ni tak tak lo a ni ang. Fa ka pe che a, chutah chuan i duh tâwk ta a ni mahna le" tiin ka inher a, kawngkapui chu hawngin ka kal chhuak zui nghal a, min kohna chu hre reng mah ila din ka tum lo hrim hrim, khawiah nge ka kal dawn pawh ka hre chuang lo. 

Ruah dovin veng chhak lamah ka tlan chho va, putea te inah kal ka tum ta ber a ni. Ka mittui leh ruah chu a inpawlh nuaih a, phatsan ni ang maiin ka inngai a, kum tam tak min ngaihven miah lova awm thei ka pa ka huat em em rualin Mazara chu ka haw tak zet bawk. A nupui ka ni a, ka lakah thil zep a nei a, a thil zep chu a namai lo hle leh nghal. Ni e, namai lo tak a ni. Engtin nge thisen a pek theih zawk? Ni lo, kha zan, a ban puama ser a neih chhan ka zawh zan khan a sawi tawh ngei alawm, mahse engati nge ka pa a ni tih a sawi loh? Ka â thei tak ngial dawn, ka hriat miah lovin Aizawlah an lo inhmu ṭhin tihna em ni ang? 

"Ding teh!" tia min pawt her sawktu chu chiang zetin ka en a, ka theih tawpa nâin a âwmah ka nam sawk sawk a, ka ṭap pah reng bawk. 

"Bum hmang, bum hmang pasalah ka lo nei che tih ka hre chhuak ve chiah ZARZOKIM, mi sual tak i ni" ka ti hlawk hlawk a, ruah do te mai mai chu ka pawisa tawh lo nasa mai.

"Sawi nghal rawh, engati nge min bum? Engati nge ka pa nunna i lo chhan kual leh vel? Engati nge thisen i lo pek kher? Thih tir ta che, a hmuhsita a ngaihnep ṭhinzia che kha i hre tawh lo em ni? Mi â pa, i bul hnaiah pawh hian awm ka duh tawh lo, thlawk bo rawh" ka ti mawlh mawlh a, ani erawh a âwma ka chumna leh ka namna te chu a dawh mai mai thung. 

"Engati nge heti ang hian i awm? Min tuithlartu ka pa kha engati nge i puih leh kher? Maw!? Engati nge i ât em em? I eizawnna zawng zawng nen a hmusit ṭhin che a, a ngainep che a, ṭawngkam chhe tinrengin a ṭawngkhum ṭhin bawk che a, sual ve ta che. I chunga an awm dan kha hre reng la, eng ang paw'n dinhmun chhia se en liam mai mai ta che" ka tih vin hlawk hlawk chuan

"Ka thei lo Numam" tih chauhin min chhang a, a theih loh thu a sawi chiah chu ka tlawm vawng vawng a, a nupuiin ti tura a duh ang a tih theih loh thu a sawi a, ka nâ lutuk chu ka ṭhu sawp hnawk ringawt.

"Eng vangin nge i theih loh? Thei tur i ni asin, i nupui thusawi hi i tan chuan engmah lo mai a ni zawk em ni?" ṭap khur beuh beuh chuan ka ti leh a, rawn ṭhu hniam ka dar tawn tawnah a chelh nghal a, min en chiang khawp mai.

"A chhan chu ka hmangaih che, ka thinlung zawng zawnga ka hmangaih vang che a ni" tih leh min kuah a rual nghal a, zah pawh hre chang tawh lovin ka ṭap ri hawm hawm a, a kawr hnung chu ka ṭham tawn tawn bawk.

"I pa a ni a, nu leh pa chân nâtzia ka hre tawh a, i tawrh ve ka phal lo Numam. Pum khat kan ni a, i nât chuan ka nâ ve zel a, keimah anga inchhir turin ka duh lo che a ni ka hmangaih" tiin min pawm tho va, ka thawk dan chu a sak tawlh tawlh a, ka ṭap ṭha thei lo thut a, ka hnang ni berin ka hria.

"Numam, i ṭha em? Numam!" Mazara aw chu ka hre hla tial tial a, ka khaw hmuh a thim mup bawk a, rei lovah thawm reng hriat ka nei ta lo.

(End of Chapter 44)