SUMO DRIVER By Havali Adam (CHAPTER 43)

SUMO DRIVER 

By

Havali Adam

Chapter 43

Rilru kaptu awm lo ang maia lan tumin chhang chu ka khawih zawm a, ka ngawi reng a, Duatpuia leh a pi inbiakna chu ka ngaithla deuh tawp a, ka rilru leh ngaihtuahnaah erawh thil dang daih a awm thung. Dawra Mazara a lo luh lai chuan ka en zawk a, hawi sawn leh nghal mai ka tum chu ka va hawi sawn lo chiang êm. Duatpuia te Miss Zonun nen an lo inzui lut a, Zonuni lah chuan nel tih hriat tak hian a nâwk deuh reng bawk a, ka chhung lam a sa pup pup a, ka thaw chu a chham mai dawnin ka hria. Zonuni chuan Mazara mai bakah Duatpuia chu a be siam siam a, an innêl tawn hle bawk.

"Pite, ka hawsan mai dawn che aw, dawr hi chu lo buaipui vek tawh mai rawh" tiin nautê puakpuan chu ka siam ṭha a, ka chhuak tur chu Mazara ka en leh hram a, min en miah lovin a fapa leh Zonuni inbe lai chu a en char char a, ka awm reng a nih chuan ka buai vek dawnin ka hria.

In chhung ka luh rualin nautê chu khumah ka mut ṭha a, ei rawng bawl nân a la hma deuh hret a, Duatpuia te unau khumah ṭhuin ka indawm kun ngul a, ka pasal ka hmangaih em em chuan ngaihzawng min neihsan ang tih ka hlau tak zet. Pá a ni tawh a, mahse a hmel a chhe lo va, amah duhtu tan chuan vei ngawih ngawih theih khawpin zun a nei bawk si a, chu lai tak chu a ni ka buaina chu! Ngaihzawng min neisan turin ka phal lo va, ka ring lo ngei bawk alawm, mahse ka thil hmuh zawh chiah chuan ka rilru a tibuai lo thei lo.

Ka chhuk hnu rei lovah Duatpuia leh a pa an rawn haw a, Mazara zawk chu Awmawma leh Hlutea School ban nghak turin a chhuak leh nghal daih a, ka ngaihbel vang nge pawh ka hre lo, Mazara chuan min pehhel ṭan deuh tlatin ka hria. Ei rawng ka bawl ta nge nge a, Duatpuia erawh a inbual fai hnu khan lehkha a zir malh malh leh tawh a, zan lama TV en an duh ṭhin avang hian tlaiah ka zirtir daih zel a, a ṭha letling phian bawk. Chaw ka chhum laiin Awmawma leh Hlute chu an lo haw a, an hnungah Mazaran a lo zui lut a, keimah chu ka dik thei thlawt lo a ni. 

Mazara chuan Awmawma leh Hlutea a inbualpui a, an bengchheng leh hle tawh a, tlai dang ang chu ni se ka hau leh tawh ngei ang. Tun ṭum erawh thil dang ka ngaihtuah nasat lutuk avangin hauh nachang pawh ka hre lo hial a, hauh ka tum lo a ni tawp. An inbual zo va, Awmawma leh Hlutea chu Mazaran a hru hul mawlh mawlh a, thawmhnaw a hak tir thlap bawk a, an pafa che vel chu tap chhak aṭang ka lo en ngawt ngawt a, Mazara mawlh chuan lem a chang ang tih ka hlau a ni. Mit khap miah lovin ka en ngai ka en char char a, chutia ka ngawih reng lai chuan Duatpuian

"Nu, i chaw chhum a útin ka hria, a ût rim a nâm lutuk" a rawn ti a, chu veleh Mazara mit leh ka mit chu a intawng chat a, har chhuak thutin Gas ka off thuai thuai a, Mazara tak chuan mak a ti khawp ang le, a chhan chu chaw ka chhum ût ngai lo tlat.

"I ṭha em?" rawn ti suptu chu ka en lo va, ṭawngkâin ka chhang lo va, ka bul lawkah a lo ding reng tawh chu niin, ka dar ding lamah a kut a nghat a, dawra ka awm lai ang chiahin ka chhungril a sa leh pup pup tawh a, ka va insum nasa tehreng êm. 

"I ṭha miah lo" ti bul deuh hmukin a lam hawi zawng chuan min kuai her a, chik zet hian min en chhuk run a, a kut chu la thlain chaw bel ka buaipui chhunzawm ta zawk a, chaw chhum ṭhat tuma ka chet lai chuan min lo en chík hle bawk. 

"Numam" tih leh ka kut rawn chelh a rual nghal a, bel chhung aṭanga chaw kàng ka paih chhuah lai pawh ka tawp chat a, a ngaite bawkin amah hma chhawn zawngin min kuai her leh a, ka ngawi reng a nih chuan a ngaih a ṭha lo zual tulh tulh dawnin ka hre ta zawk. 

"Ka nuam chiah lo va, min lo hrethiam mai teh, ka va mu lawk mai" tiin ka kut chu ka thing thla a, ka kuta chaw mal kâi chu ka sil fai a, pindan lama ka phei lai chuan min en reng tih ka hria, mahse engah mah ka ngai lo lui tlat thung. 

Kan fanu muhil tui em em bulah chuan ka mu thla a, amah hnaih takin ka mu nghe nghe a, pindan kawngka a rawn inhawng chuan ka maimitchhing rang hle. A thawm aṭang leh a rim aṭang Mazara ngei a ni tih ka hria, ka pang a rawn tawk a, ka dam lo emaw a ti a ni ngei ang. A kal sawn mai dawn emaw ka tih laiin khumah a rawn mu ve ringawt a, ka meng lo thei ta lo. Ka kawng zawna a ban a rawn kham chuan fanu a kuah dawn emaw ka tih hman a, mahse keimah zawk chu a lamah min pawt hnai salh a, ngawi reng hian min kuah hle hle a, ka meng tih erawh a la hre lo a ni maithei. 

Chaw vawi thum a sit zawh rualin khum aṭang a tho va, choka lamah a phei nghal a, Gas a va off a nih ka ring. A ngaite bawkin pindanah a lo lut leh a, ka meng tih chu a hre tawh ngei a, mahse zawhna emaw eng mah a sawi chuang lo. Ka hnung lam aṭang min kuah leh hle hle a, min kuah nghet sâwt phian leh nghal. Ka ngaihtuah kual vak vak hnu chuan ka rin dan a dik lo ve thei tho tih ka hre chhuak a, mahse hmeichhe dang nen innêl taka an ding dun ka hmu chiah kha chu ka thik ve êm a ni. Thawk ka la deuh hawk a, a ban vei lama inbèng kângin min rawn en nghal thuai a, kei paw'n a mitah ka melh ve ta ran mai.

"Sawi rawh le, eng nge i rilru kaptu chu? I taksa lam ni lovin i rilru lam a dam lo tih ka hria, ka lakah hian zep neih i tum em ni?" ti hniam supin a kut leh lam zawk chuan ka biang a rawn dawm a, ka sawi hman ṭep a, ka ngawi leh rih ta zawk. 

"Ka awm i tinuam lo a nia, i rilru nât chhan min hrilh rawh Numam. Chuti lo zawng ka tan tih theih a tlém dawn tlat, i pasal lakah hian zep neih i duh ka ring lo" a tih leh chuan thawk ka la hmasa té tê a, ani'n min en run thung a, a mitmengah chuan min ngaihtuah tih a hriat tak zet.

"Nang paw'n ka laka zep i neih duh ka ring bik lo" ka ti ve ta nge nge a, mit tizim sun hian min en a, ka thusawi chu hrethiam lo ang maiin a awm a, mahse a hriatthiam ka ring deuh tho.

"I sawi tum tak sawi chiang la" tiin a hma aia chîk leh uluk zawk chuan min en a, in chung en tlawk tlawkin ka ngawi leh ta reng a, ka ring dik lo vang tih ka hlau ru ve tho bawk si a, mahse ka sawi chhuak lo a nih chuan ka rilru a nuam thei dawn chuang lo tih ka chiang em em.

"Ngaihzawng i nei em?" pehhel lem lo takin ka ti thâwr a, sitting room lamah thawm dang a rawn awm a, mahse Mazara chuan chet pawh che eih lovin min en reng a, a awm dan chuan ka awm a tinuam lo zual, min han chhang nghal tal chu ni se a zia deuh ang maw le.

"Ka neih i ring em?" ka zawhna chhang lovin zawhna min rawn zawt lêt ta zawk a, khum aṭanga thawh ka tum chuan min kuai mu leh nghal a, nghet zet hian ka ban a chelh bawk a, ka tan chuan thawh theih loh tluk a ni.

"Nupui nei lai ka nih hi Numam, chu ka nupui nen chuan kum 10 chuang innei tawhin fa palî lai ka nei tawh bawk, chuti chung chuan ngaihzawng ka neih i ring maw?" a aw chu a khauh lo va, a vin lo hrim hrim a, a damin a zahawm awm ru em em zawk.

"Engati nge kha nu nen khan inpawh taka in inbiak vel si? Ka rilru i tinâ hman asin, ka ngaihtuahna zawng zawng i tibuai vek a ni. Min chhang teh Mazar, ngaihzawng i neih loh thu sawi mawlh teh, chu chu a ni ka buaina ber" a âwmah ka bei nghal zat a, a thin phu ri dup dup chu ka hre chiang hle.

"Min en teh" tiin ka dar tawn tawnah a nam a, lo ṭang ve teh mah ila awmzia a awm lo khawp mai, chiang zet hian min en run a, ka rilruah ngaihzawng a neih rinna ai rin lohna a tam leh tawh zawk lawi a, a lakah chuan ka inthiam ru lo nghal em em bawk.

"Engtikah mah; engtikah mah ka nupui, fa duhawm tak tak min petu hi ka phatsan ngai lo ang che, a chiang em?" nghet charh hian a ti leh a, hriat nuam lovin a ṭawng miah lo va, a thusawi chu awih loh chi ziazâng a ni tawh lo hrim hrim. 

"Pa, zo artui chu ka lo hawn tawh aw, khawiah nge ka dah dawn?" pindan kawngka hawn pahin Duatpuia chuan a lo ti a, Mazara chuan a âwma min kuah bei hle hle chung hian dawhkana dah turin a hrilh a, zo artui an lei chhan chu ka hre lo nasa.

"Anu hian zo artui a mamawh tawh lo ve, a mamawh chu ka hre chiang khawp mai" Mazara chuan a ti thum bul bul a, Duatpuia pawh a kal sawn ve leh mai a, ka awm dan chu ka ngaihtuah lêt a, ka zak hnuhnawh ang reng. 

"Duatpuia te miss Zonuni kha ka thik êm alawm Mazar, ka thik tak zet a ni. Nang lah khan ngaina lutuk ang hrimin a che vel leh a ṭawng siam siam lai kha i en reng bawk si a, ka tan chuan thik loh rual a ni lo a ni. Ngaihzawng lo nei ta la ka chan tur ka ngaihtuah thleng hman vek nghe nghe asin, chu vang alawm" ka tih laklawh lai chuan ka hmui rawn hupin

"Ka hria e, ka thiam lohna chen a lo awm a nih dawn chu! I rilru tih nât erawh ka tum lo, hmeichhe dang i thik hi ka lawm viau bawk" a lo tih zawm nghal a, hmeichhe dang ka thik avanga a lo lawm daih chu mak ti tak ka ni.

"Dik tak chuan maw Mazar, nangmah vei tawh tu che chuan an thlah mai mai lo vang che tih ka chiang, a chhan chu hriat reng i awl lutuk tak zet. Kan inngaihzawn lai leh tun hnu thleng pawh hian ngaihtuah loh lai che ka nei lo, chuti ang khawp chuan i zunin min chenchilh ṭhin. I rilru dik tak ka hre tawh a, mahse Zonuni zawk khan a thlah thei lo ang che tih ka hlau a ni" ka ti ta duah a, ka ṭah chhuak zawng zawng pawh a bo vek tawh.

"Ka fimkhur a ngai a ni mai" ti supin min kuai dâk a, ka lai ril zawng zawng fan chhuak vek khawpa nuam leh dangdai hian min fawp vawng vawng a, a tukhum sama ṭham tawn tawnin ka chhang lêt a, ka rilru chuan ngaihdamna thu ka sawi mawlh mawlh bawk. 

Khuma awm reng lovin ei rawng ka va bawl leh ta zawk a, Mazara chuan min ngaihtuah deuh hian min zui zel a, kal sawn turin ka ti hran lêm lo. Ei rawng kan bawl dun a ni ta ber a, pindana kan va lêt leh chuan Duhsaki pawh a lo har tawh a, a thawhhlima a ṭap ngai miah lo hi a ute ho zawng zawng a chhunna pakhat a ni a, kan fate hi chu an nausen lai paw'n an fel em em vek a ni. Fiamthu deuh reuh hian Mazara chuan zo artui min ei tir ta tho va, ka dam lo emaw tiin Duatpuia a lo han lei tir hman chu niin, a lawmawm ka ti tho va, mahse ka nuih a za letling hnuhnawh viau zawk. 

Zanriah ei lai chuan kan hlim tlâng leh hle tawh a, naupang hovin chhun lama an hun hman dan an sawi malh malh a, a tê ber dawttu ni ta Hlutea bawk chuan sawi tur a ngah leh ber e. A ute rual ni tawh phei se chu sawi tur a va'n tlachham dawn lo rûa ém, a naupan lai paw'n a ute pahnih aiin sawi tur a hre zel a nia, mipa pathum zingah chuan a pa a chhun lo berin ka hria. Pu Kawla nen ngat phei chuan an innêl em em a, chu pawh a ute a ân lohna bawk a ni. A ute chuan an nausen laiin pu Kawla an ngaina nghal lo ve ve a, Hlutea erawh chuan a sên lai aṭang paw'n a ngaina nghal thung.

Zanriah ei kham hnu lawkah Mazara chu a chhuak a, dar 7 bawr velah a lo haw leh a, Waiwai a rawn hawn ṭeuh a, naupangho chu an lawm teh e. Duatpuia pakhatna nih lawmin kan ri nak nak a, pitei te chhung kan ko thla bawk a, kan hlim tlâng tak zet. Duatpuia leh Awmawma chu lehkhapuan hmang hian an infiam a, lehkhapuan chu pen-in an chhun pawp zawt zawt a, a tlâng ve ve ah goal ang reng deuh hi an ziak chawp leh a, chuti ang infiamna chu ka vawi khat hmuhna leh hriatna a ni. An ṭhutna bulah ṭhu hnaiin an tih dan vel chu ka en ru reng a, nuam an la ti em em zui. 

Lehkhapuan chu an pawt mar ve ve a, hnuai lam aṭang pen hmawr hmangin an an chhun pawp lohna laiah an kal zet zet a, goal thlen hma a kuaa an rawn chhuah palh chuan an chak lo tihna a ni a, an han thai kawi dan vel chu a nawm hmel reuh tawp. Duhsaki hnutê tui pek pahin ka en reng a, thil dangah ka mit a awm thei lo chu a ni ber e. Rei lovah Hlutea a rawn thleng phei a, a ute tel lovin a tla fâl rei tawh ka ti reng a ni. Ani leh zel paw'n a lo thiam reuh a, engtik laiin nge chuti ang infiamna chu an lo hriat ka hre reng reng lo.

"Engtin nge khati ang kha in thiam?" tiin ka zawh phah hial a, nu ber chu min tihawihai lo chauh zawk a lawm le, Mazaran a lo zirtir vek chu niin, a hnuah erawh áwm lo ka ti hran lo, a chhan chu ka pasal hi chuan infiamna a hre hnem dawn êm mai.

Duatpuia pakhatna nih lawm nân Waiwai kan chhum ṭeuh a, tui ti takin kan ei hlawm a, tun hnu hian putea nupa chuan Hlutea an láwm ta berin ka hria. A lawmawm ve rèng bawk a, a ṭawng duh em em hi a lawmawmna pakhat a ni ve tlat. Putea te chhungkua an haw meuh chuan a lo tlai duai tawh a, mu turin pindan lamah kan phei zui nghal sap sap a, ke chet ngai lovin Mazara chuan kan fate khum a siamsak thlap a, keiin kan khum ka lo siam thung. Hlutea ber chuan a pa mutpuiah a sawm leh ta tlat a, zan rei tawh mah se mut chhuak lo tih hriat zet hian a ṭawng char char reuh a, a pa lah chuan a hau duh der lo zui. 

A fapa tih mut nân thawnthu pakhat a sawi a, chu thawnthu hming chu Rairahtea tih a ni a, ka vawi khat hriatna bawk a ni leh ta. Rairahtea chu fahrah a nih thu te, nuhrawn a hrawn thu te a sawi thum dap dap a, kan khum aṭang chuan ka lo ngaithla ve kar a, a ngaihnawm ka ti tak zet. Raihrahtea hringnun khawngaih thlak tak chanchin a sawi zawh chuan Hlutea chu a muhil diam tawh a, kei tak pawh ka mut a chhuak hman hle a, ka bul chêtah muin min hrilh ve ta ni se chuan ka muhil daih tawh ang ka ring. Ka pasal chu khumah a rawn lawn a, ka hnung lama mu thlanin a inbeng kâng a, a bianga ka biang a rawn nâwk chiah chu a nuam ngawih ngawih hi a ni tawp. 

Zingah chuan thawh kan hai chiang hlawm mai mai khawp a, Hlutea tih loh a ute pahnih chu chaw ei lovin an kal phah nge nghe a, rilru a nuam duh vak lo. Hlutea erawh a pawl a la hniam deuh tho va, a pa'n kal lo law law mai turin a ti a, ani pawh hi a service ní mah ni se thawh kan hai avangin a service lo ringawt bawk. Pu Kawla nen bawk ram lamah an inzui chhuak a, an inzui tam ve tawh viau a, eng nge an sawi dun ṭhin ang le ka ti rilru neuh neuh zel. Pakhat lah a ṭawng tam lo ve mai bawk si a, pu Kawla ni se a zah leh em em a, ama thu ngawt chuan a be hmasa dawn lo hrim hrim. 

Thla a ral a, kan fanu Duhsaki paw'n hma a sawn chho ve zel a, a duhawm zual tawlh tawlh bawk. Hmeichhia a nih vang nge pawh ka hre lo, min âng sâwt em em a, ani talin min chhun chu pawi ka ti lo hle. Duatpuia hian a pa a chhun bik hle a, Awmawman a nu leh pa min ang kawp a, Hlutea erawh a dang hlak thung. Zep lovah chuan ka pa a áng thlawt, mahse Mazara bulah leh mi dang bulah ka sawi duh lo hrim hrim. Mazara tak pawh hian áng chu a ti ve ṭhin tho ang ka ring, ani hi zawng a ngawi thei a, thil dik leh a chhungkaw tana ṭha chu a pawnga taka sawi reng lovin a ti mai ṭhin.

"Ka pi ka pu, ka hre tawh, ka unaupa awmna ka hre tawh" pu Kawla chu kan en hâw a, tukṭhuan ei laia a bo daih chhan zawh ka tum tehreng nen a thusawi chuan min ngawih tir chiang hle mai, a hnungah chuan an hnampui ni awm tak mi pakhat hi a rawn lut zui nghal bawk.

"Khawiah chuan nge a lo awm a?" Mazara zawkin a ti a, ṭawng ka tum lai tak ni mah se ka ngawi tlang ta zawk a, naupangho erawh chaw an ei mial mial hlawm a, kan thusawi chu an rawn bengkhawn teh chiam lo a ni.

"America-ah a awm, tunah hian kal nghal ka duh ka pu. Hei hi ka ṭhianpa a ni a, ani pawh America-a awm tawh leh kal tum leh a ni a, kal dan tur zawng zawng pawh a hre vek" tiin pu Kawla chuan a hnunga mi chu min hmel hriattir nghal a, Mazara chu a ṭhutna aṭang a tho va, chaw ei chunga biak reng theih ni hek lo le.

"A nih chu maw le, America-a kal chu a hlauhthawnawm loh ang maw? Engtin nge in kal dawn reng reng? Ngaih a va ngam chiah lo ve pu Kawl, kan bulah hian awm rih la chu a ṭha asin" Mazara chuan a ti dap dap a, chu veleh pu Kawla chuan

"Bungraw bag chhungah kan awm dawn, bungrua angin kan awm dawn a ni. Khawngaihin phal hram rawh ka pu, ka unaupa chu ka hmu duh tak zet tawh a ni. Kum tam kan inhmu tawh lo va, ani hmuh leh theih nân chuan eng pawh tih ka huam" a ti phawlh phawlh a, a rilru a buai hmel ang reng.

"Keia lo phal loh ngawt chi pawh a ni hleinem, chuti anga hun remchang i hmu a nih si chuan ka rualin Aizawlah chhuk thla ve nghal rawh u" tiin Mazara chu pindan lamah a phei a, pu Kawla pawh inhnuaiah a thawmhnawte la turin a chhuk zui nghal bawk a, thil chu a thleng rum rum ni maiin ka hria. 

"Numam" ka pasal aw ka hriat rualin pindanah ka phei ve nghal a, khumah chuan kan pawisa khawl sa zawng zawng a lo phawrh vek a, a lam ka hnaih zel a, a thil tih tum tak hre chiah lo mah ila pu Kawla pawisa pek a tum a nih ka ring ve tawp. 

"Keini nupa chuan nakin lawkah kan la thawk chhuak leh mai ang, pu Kawla erawh kan hmu zui tawh lo maithei thung. A bak zawng hi chu pu Kawla pek a ṭhat ka ring, eng nge i ngaihdan?" cheng sang khat tih loh chu a keng khawm vek a, ka pasal thu tlukna chu hnial ka tum teuh lo mai.

"Ṭha i tih ang kha ṭha ka ti vek, i sawi dik chiah alawm, keini chuan rei lo tê ah pawisa kan thawk chhuak leh thei zawk. Pek a ṭha ka ti e, min ngaihtuah suh" ka tih chuan a bu nghat a, pawisa tam tham ve tak mai chu polythene dumah a khung a, pindang aṭang chuan kan chhuak ve leh mai bawk. 

Tam pawh ei tawh lovin Mazara chu a kham ta daih a, pu Kawla erawh ei tura ka tih luih tlat avangin a ei lui hram a, a ṭhianpa chu ka'n be ve ngawt pek a, Mizo ṭawng a lo thiam der lo zui. Pu Kawla chuan an inhmuh fuh thu te, an rama an awm laia an inkawm ṭhin thute min hrilh a, chaw chu a ei chak khawp mai. Mazara a insiam zo va, pawna a chhuah dawn chuan pawisa min pe pah zeuh a, pu Kawla pawh a ei kham chu a ni mai. Kan fate erawh Duatpuian a hruai chhuak a, thil hmanhmawh thlak tak tawng lo ila chuan Mazaran a hruai leh thlap ang maw le.

Kan fate an kal liam hnu rei lovah Mazara te pawh an chhuak nghal a, a hma lamah pu Kawla te ṭhian dun an chuang a, a hnung lamah erawh passenger dangte an chuang thung. An tlan liam chiah chu an kal hmaa pu Kawla min kuah lai te, lawmthu min hrilh mawlh mawlh lai te ka mitthla chhunzawm nghal a, kum kha leh chen kha kan lo awm ho ve tawh a, ngaihtuah loh theih a ni lo. Mazara khan pawisa a pe nghal mai lo va, kan pawisa pek tum pawh min puih tawhna zawng zawng ngaihtuah chuan a tlem tham em em a, mahse kan neihchhun a ni rih miau si.

Aizawl khawpui an thlen rualin Mazaran min lo bia a, Lengpui Airport lama an tlan mêk thu te, pu Kawla ṭhianpa'n hmel hriat ṭha tak a neih thute chu min hrilh a, pu Kawla hmel chu rilru leh mitthlaah a châm reng mai. Dawrah chuan pu Kawla awm tawh loh thu ka sawi a, pitei tak paw'n a ngaihtuah ve hle a, kei phei chuan ka hre reng tawh ang. Kan dinhmun hniam lai tak taka min pui nasa em emtu a ni a, awm lo phei se chu Mazara a hah dawn lutuk tlat. Mazara nena an thawhrimna rah liau liauin Sumo kan lei thei a, in kan sa thei hial bawk a, kan chhungkaw tan chuan mi pawimawh ber te zinga mi a ni.

Zan lamah erawh Hlutea a buaithlak hle a, pu Kawla ngaiin a ṭap deuh reng a, kei tak ngial paw'n ka thlem hlei thei lo. Mazara kutah ka dah tawp a, a lo haw tlai tur thu tlai lamah min hrilh vek tawh a, a rawn tlai lutuk ang tih ka hlau ru viau bawk. Dar 8 leh a chanve rik dâwnah a lo thleng ve thei ta hram a, a pa a hmuh rualin Hlutea chu a ṭap uar zual sauh a, a ṭap rei ngat ngat tawh hle. A ute pahnih erawh chuan kan zinga pu Kawla awm ta lo chu an pawm thiam mai a, Hlutea ber chuan a ngai a ni. A awm ve tho bawk, a têt lai aṭang tawh khati khawp khan an inawm nasa a, a ngai lo thei nâng, pu Kawla tak paw'n a ngai ru ve khawp ang. 

Mut hmunah Mazara nen chuan kan titi a, pawisa pek a tum laia a duh loh nasatzia leh pu Kawlan ṭap chunga a kuah tawp thute chu a sawi a, an awm dan tur pawh ka ngaihruat thiam nghal vek bawk. Ka mumangah pu Kawla chu ka hmu nghe nghe a, a unaupa nen chuan an intawng ngei a, hlim zeta an inkuah lai te chu mumang mai mah ni se a tuk ni lêngin ka mitthlaah a châm reng a, pu Kawla chu ka ngai ve tak zet a ni. Mazara erawh a service leh a, thla hmasa lawk aṭang khan nitin Aizawl lama zin duh an awm pheuh pheuh ṭan a, nitina a service tâk chhan chu mí ṭhenkhat ngenna vang a ni pakhat.

Kum lai hawl kan chuangkâi thuai a, YMA day hmang turin mipuite chu kan inbuatsaih sup sup a, chuti ang em ema inbuatsaihna kan la neih ka hre lo. Ka pasal khua, kan khua ni ve ta bawkah hian kum 10 chuang ka awm ve tawh a, mahse kum dangah heti ang tak hian kan ûr lâwk ngai lo a ni. A tlangval lai aṭang tawha Mazara ṭhianpa Thansiama chu a rawn lêng lut zan tin ṭhin a, a chhan pawh Mazara an volleyball team-a tel tir a duh vang a ni. A nupui lah chuan ball a beng thiam tih ka lo la hre miah lo leh pek a, amah talin min hrilh ve ṭhin se chu thu hran, ka zawt te a nih ngawt loh chuan min hrilh ngai lo reng reng.

Ni hnih thum a liam a, YMA Day chu kan thleng ta. YMA Day a nih ang ngeiin khua a ṭha lo hle a, mak ve tak chu kum dangah pawh YMA day-ah hi chuan khua a chhe ve ziah. Khaw chhung school zawng zawg khar a ni a, Community Hall-ah darkar khat vel hun kan hman hnu chuan YMA day puala infiamna hrang hrang neih chhunzawm nghal a ni bawk. Infiam tak tak hma chuan Duatpuia te school pawh an lâm a, sârlam kai lamin an lam a, school aiawha fate lam en chu a hmuhnawm dan a dang hle. Kei leh kan fate'n kan nawr nasa bawk a, Mazara paw'n volleyball a beng ta ngei a, awihawm loh khawpin a thiam daih mai.

Amah a lian ṭha si a, an tumpui te zinga pakhat chu a vuak per nghe nghe a, nâ a tih hmel em em leh nghal. A vuak tura ball an vawrh apiangin a vaw tla deuh zel a, a chang leh a block tla zel bawk a, ka vawi khat hmuhna leh hriatna mah ni se thiam ka ti tak zet. YMA day a nih miau avangin a service lo va, a service loh man a awm viauin ka hria. Final an thleng nghe nghe a, ruah sur laiin an inkhel a, kan fate nen nihliapa inzàwnin ka en ṭhap a, naupangho pawh a pa khel hmuhnawm zet chuan a tiṭang hlawm hle. Thil ngaitheih loh deuh pakhat erawh ka nei a, chu chu Zonuni bawk a ni. 

Ṭang em em hian a au tawn tawn a, mi dang hmai zah hauh lovin Mazara chu a ko vel a, inkhelh chawlh laia tui in tur thlengin a lo pe zel a, ka mit a tikham tawh tak zet. Pitei paw'n a hmu kham ta deuh a ni ang min rawn hrilh ru su sû a, mi â tan lo chuan Mazara laka Zonuni awm dan leh chet dan vel chu hriatthiam loh theih a ni lo. Rilru tipaukhauhin tui bottle nen Mazara te awmna lamah ka phei a, nautê ka la paw reng bawk a, Zonuni chu Mazara nupui ka nihzia hmuh ka tum a ni ber. Inkhelh chawlh a rawn ni a, Mazara tui pek ka tum lai takin Zonuni bawk chuan min nek deuh sawk a, chutah Mazara chuan ka tui bottle ni lovin Zonuni tui bottle zawk chu ka awm lai rengin a la a nih chu! 

Hrawk bawk che ralh ralh khawpa tui in khawlh khawlh mêk ka pasal chu ka en reng ringawt a, a hmaah ka ding reng a ni tih a hmu chiah chu a in tawh lo chiang teh e. Ka thil ken lai enin a tui bottle in zawh chiah chu a en leh a, hmeichhe dang thik avang leh rilru nât avanga ka mittui tling pam chu a hmu chiang khawp ang. Ngawi rengin tui bottle keng chung chuan ka lêt a, kawngte chu ka hmu phe vek a, ka pasal inkhel pawh en châkna reng ka nei tawh lo. Pitei bulah chuan ka haw tlang tur thu ka sawi zeuh a, naupangho erawh inkhel enin pitei bulah an la ding ṭhap thung. 

In ka thleng thla chiah chu pindan lamah ka lut tlang nghal a, khumah Duhsaki chu ka mutpui a, ka mittui chu ka dang séng ta ngâng lo. Minute tam pawh a liam hmain kawngkapui a rawn inhawng ri pawp a, pindan lo hawng leh tu chu tu dang ni lovin Mazara ngei a ni. Thawm dang a rawn awm zawm nghal a, Mazara chuan Duatpuia chu a naute pahnih pu Kawla mutna ni ṭhin in hnuaia chhukpui turin a hrilh a, kan fate pawh an kal ve nghal mai bawk a, an lo haw vek danah inkhelh a zo tawh a ni maithei. 

"Va inbual rawh" ka kut a rawn sik rualin ka lo tivin nghal hlar a, chuti anga vina ka ṭawng chu a ring lo a ni ngei ang a meng phawk hman hle a, rei lovah a awm dan a siam ṭha leh vat thung. 

"Ka fiamthu emaw i ti em ni ZARZOKIM? I mi sik pawh ka duh tawh lo, i duh leh kha nu kha va si rawh, in inhmeh dun har har tak alawm, mi dang mitmei pawh zah zo lovin in inchhai vel chu a nih kha le" min sik a tum leh rualin ka lo ti hlawk hlawk a, sawi tur hre lo zetin a thaw deuh hawk ringawt.

"Ka inbual lawk ang a, chumi zawhah kan sawi ṭha ang" tih leh pindan aṭanga chhuah a rual nghal a, a inbual hlanin a thawmhnaw hak tur ka la chhuak a, choka dawhkanah ka dah sak daih a, pindan kawngka chu chhung lam aṭang ka kalh hmak bawk. 

"Hawng rawh le Numam" a inbual zawh aṭanga rei vak lovah a rawn ti thum bul a, pindan kawngka chu a chik leh rar rat ṭhin a, hawn a tum a ni ngei ang, kei lah chuan hawnsak ka tum teuh lo, ka luhlulna a chhuak laklawh tawh tlat. 

"Ka hmu peih rih lo che, mei chhem la, ei rawng kha bawl vek rawh" nem fahran lo chuan ka ti leh tawn tawn a, ka rilru nâ lutuk chu ka ṭap zui nghal feih feih a, ngaihzawng nei lo inti si khan a nupui pawh ngaihsak lovin hmeichhe dang a ngaihsak zawk tlat si a, tu hmeichhia nge nâ lo bik ang ni!

"I hawn duh loh chuan ka tichhe mai dawn asin, siam leh a har hleinem" a tih pawh chuan ka ngawi kar a, va hawnsak pawh ka tum chuang lo, kawngka chu a ri deuh ṭhawt ṭhawt a, a kawpza nen lam a thlawn hlawk chu niin, a va han tichhe hnehsawh mai mai tak.

"Min rawn hnaih miah suh" khuma lo lawn a tum rualin ka lo tih khum hmuk a, rawn mu ta lo chuan kan fanu zawk chu a pawm a, ngawi reng hian Duatpuiate khumah a zu mut daih a, chu ringawt pawh chuan ka thin a tirim theiin ka hria.

"Khawngaihin Mazar, min si lo law law teh" khum bul a rawn thlen chhoh rual chuan ka lo ti ṭuau a, mittui tling pamin ka en ngai ka en tlawk tlawk a, ani erawh khumah a rawn lawn ta tho va, a sik duh rih lo teh mah ila thaah ka hneh ngang lo a tin ni! 

"I mittui tla khawpa i rilru ka tih nât ka ring ngai lo, ka lo hmu lo palh che kha ka thiam loh a ni. I tana a tha nât thlak turzia leh zahthlak turzia ka hria, i pasal hi ka thiam lo a ni e" dam zet hian a ti dap dap a, ṭah loh a va harsa si êm. 

"Nu ka ni tawh tlat a, nula angin ka taksa a mawi thei tawh lo tih ka hria. Zonuni kha chu a hmelṭha a, a pian a nalh a, hna zahawm tak a thawk bawk a, ka tui ni lova a tui i in pawh kha a áwm viau e. Áwm ka ti lutuk, fate neiin ka taksa a no nalh thei tawh si lo va, Zonuni kha chu ka tluk phak rual loh hmeichhia a ni" mittui baw zawih zawihin ka ti a, min kuai her chiang hle. 

"Nang chu ka nupui i ni a, ani kha chu hmel hriat satliah hmeichhia mai a ni" a tih laklawh lai chuan lu thing nâng nangin ka inlet a, a ngaite bawkin min kuai her leh a, a hma ai chuan min vuan nghet ta sawt bawk. 

"A ruk tak chuan inṭhen i duh hial tawh ang ka ring, kei lah Zonuni te angin hna nei lo leh chawmhlawm ve mai ka ni si a, i thu thu a ni e. Mi rilru nghet tak i ni a, keiin duh lo eng ang mah ila nangin i tih miau chuan ka hnial lo ang che" ka ti zo chiah chu thinrim zet hian

"HMINGTHANPUI!" a rawn ti vin hrawk a, phu zawkin ka ṭah zawm nghal a, a âwma min kuah beh rualin ka ṭap chhuak hawm hawm a, pasal ka neih hnuah chuti ang renga rilru nât leh ṭah nasat chu ka la nei lo.

"A pa tuithlar huam meuha min hmangaihtu, retheih huama ka hnen lo pan tu, a thinlung zawng zawnga kei thingtlangpa ve mai min hmangaihtu hi ka ṭhen ang che maw? Âtthlak lutuk, thihna chauh lo chuan min ṭhen hrang lûl lo vang" a taksa chhunga min pawm luh vek tum ang maia min kuah nawn mawlh mawlh pah chuan a ti deuh hrawk a, kei erawh ka ṭap nasa tawlh tawlh thung.

"Ngaithla teh, ngaithla mawlh teh Numam. Ka nupui i ni a, i ni kumkhua bawk ang tih hre reng rawh" ka chala fawp vang vangin a ti hniam ruih a, ka ṭah chhuak lutuk pawh a reh ṭan a, ka mittui chu a la tla reng tho. 

"I nupui nih ka duh lo, i engkim nih ka duh; i engkim. Ka tan chuan ka engkim i ni a, a hmasa ber i ni zel a, ka nunna i ni asin, ka rilru hi a nâ lutuk tak zet" ka sawi zo chiah chu ka hmui ka pet ngar ngar a, insum a va'n harsa ngawih ngawih tak êm.

"I ni e, i ni chiang khawp mai. Ka fate ai pawha ka ngaih zawk, ka thlakhlelh zawk, ka mamawh zawk, engtik lai pawha ka thinlung luahtu awmchhun leh ka engkim chu nangmah chauh a ni" tiin ka hmuiah dam zet hian min rawn fawp a, a kâ chhungah chuan ka thaw lut ham ham a, awlsam tê in ka taksa leh rilru zawng zawng chu a hmui hmangin a thunun leh ta vek mai.

"Khawiah nge i kal dawn?" ngawi renga kan mut ṭhat hle hle hnu chuan min thawhsan a tum deuh thut a, ka ṭah a chhuak tawh lo va, ka mittui pawh a tla tawh lo bawk a, ka rilru a hahdam leh em em tawh zawk a ni. 

"Ei rawng bawl vek tur khan min tiin ka hria" nui chung hian a ti sup a, duh ai ka lo ṭawng nasa hman mah mah tih ka hre chhuak a, inṭhen lam te kha ka lo sawi chhuak vel a, inṭhen dawn tak tak ila chuan a tel lova awm thei lo tur chu keimah ka ni tih chiang takin ka hria. 

Pindan aṭanga a chhuak tur chu ka dang hran lo va, pasal te ei rawng bawl laia mut reng erawh ka tum bik chuang lo. Hmeichhia ka ni a, chhungkawnu ka ni bawk a, ka dam lo te a nih ngawt loh chuan ei rawng bawl leh in chhungkhur chet chu ka tih ngei ngei tur a ni. Choka lamah ka chhuak phei a, savun ṭhutthlenga dingin ka pasal che mawlh mawlh chu a hnung lam aṭang ka kuah a, ka awm dan puitling lo zet avangin ngaihdam ka dil hnuhnawh nghe nghe a, Zonuni ka thik tawh loh tur thlengin ka sawi a, ka pasal chu rinhlelh leh ka duh tawh loh vang a ni ber. Ka tan a rinawm tih ka chiang tawh a, kei tih loh hmeichhe dang hmangaih a nei dawn lo tih ka chiang em em tawh bawk. 

Ei rawng chu kan bawl dun a, reh lutuk dalah an inkhelh chanchin ka zawt a, an lo Champion ngei chu niin, mahse kei chuan ka hmu hman lo a nih kha! Ei rawng kan bawl laiin kan fate an rawn chho va, Mazara bawk chu an bawr nghal laih a, Hlutea phei chuan volleyball ben thiam ve a duh thu a sawi leh reuh a, ei rawng bawl lova a fate kawm tur chuan ka ti ta ringawt. Maian hih pahin ka pasal leh kan fate inkawm chu ka en zauh zauh a, an hmuhnawm chiang a ni. Mipa vek an ni a, mahse an inngai hlawm em em thung a, sawisel theih loh khawpin an inhmangaih a, chu baka duhthusam chu ka nei chuang lo.

Zanah chuan Thansiama leh a ṭhiante an lo lêng lut a, Mazara chu leng chhuak turin an sawm a, an Champion avangin a lawmna an tum a nih hmel a, mahse vawi tam an sawm paw'n Mazara chuan a hnial fithla vek thung. A kal theih loh chhuanlamah kan nautê leh nautê lian chi awm a ngaih thu a sawi chuan ka lo melh kar a, a nuatê lian chi sawi chu ka hre chiang khawp mai. Thansiama leh a ṭhiante chu an beidawng ta nge nge a, Mazara hi chu a rilru a nghet ve hrim hrim a, a thu tlukna pawh mipa dik tak a nihzia tifiah turin a sawh sawn ve mai mai ngai lo. Mipa dik tak va nih kher kha a tum hran lo va, amah tawp hi mipa dik tak chu a ni mai. 

A tukah chuan service tura ka tih paw'n a service duh leh ta hauh lo va, chaw ei kham aṭang a che vek a, thleng sil mai ni lo insuk thlengin ama'n a ti vek a, ka tan chuan inthlahrunawm duh tak a ni. Ṭawngkâin min thlem lo va, a chetzia hmangin min hmangaihzia leh a tana ka hlutzia te chu min hriattir mawlh mawlh zawk a, ka lung tiawi tur hi chuan thil tam a tih a ngai lo ṭhin. Dawrah pawh ka rualin a chho va, chhang hmetin ama'n a kâng vek a, thingpui a siam vek bawk a, pitei paw'n mak a ti hle. Hmeichhe pahnih kan awm ve reng a, a mipa ber a che tlat chu nuam kan ti bik teuh lo, mahse Mazara chuan kan chet a phal tlat si lo a ni. 

A ṭawng lém chuang hlei lo va, nimin thil thleng avanga a inthiam lo lutuk chu hmuh hrehawm ka ti letling zawk. Ni lêngin ka bulah a awm chawt a, zanah ni se a fate bulah ni lovin ka bulah bawk a awm leh a, kan fate nen khum khatah kan mut ho vêk phah nghe nghe. Pa ber thawnthu sawi kan ngaithla ṭhap a, Mizo thawnthu ngaihnawm deuh deuh sawi tur a hre mai si a, chhumbung deuha a ṭawng thum bul bul ṭhin chu a tih ngaihnawm zualtu a ni ka ti ve tlat. Zingah ka harh hmasa ber a, mahse ka tho chhuak peih der lo. A fate'n Mazara chu an khan deuh ṭhap a, a kutin ka kut a chelh thung a, ka va'n hmangaih hliah hliah tak tak ém.

"Khawia mi nge Hlute? I ṭhiante'n an pe che em ni?" ka fapa ball rawn hawn chu ka en zeuh a, a ṭhiante nen tlaia an pet tur a lo hawn a nih ka ring a, mahse ka fapa chuan

"Pe lo e, a pu min pek a nih hi!" a rawn ti reuh a, putea leisak bak a nih ka ring ta lo, ani té hi putea te inah a lo peng kawi leh reuh emaw ni le, a naupang ang hû hian a vak zau reuh a, putea te ina kal a ching leh thut ṭhin.

"A nih chu, i va'n vannei ve, putea chu lawmthu i hrilh em?" ka lo ti ṭha ve leh mai a, Duhsaki chu khumah ka mut zui nghal a, ani pawh hi a ute ho ang chiah a ni; muthilh a awlsam khawp mai. 

"Apu chu apa Tlantea pa apu a ni hleinem nu, amah chu keima pu bik a nia" tiin a ball chu ṭhutthleng hnuaiah a pet lut a, bathroom-ah inbual turin a tlan lut nghal daih a, kei erawh ka ngaihtuahna a va kal danglam chiang tak! 

"Putea a ni lo maw!" ti sepin ka rilru leh ngaihtuahna a vak kual a, putea a nih loh chuan pu dang a nei hleinem, a pu dik tak Mazara pa ni se Duatpuia pian hnu lawkah a thi daih tawh bawk si.

Lalpa le! Ni lo, a ni lûl lo vang, ani chu a ni thei lo hrim hrim, thil theih a ni lo.

(End of Chapter 43)