EPHRAIM MALSAWMZELA (LUKAWLHA) By Havali Adam (PART III)

EPHRAIM MALSAWMZELA (LUKAWLHA)

By 

Havali Adam

Part III

Zep nei hauh lovin ka pa bulah ka thil tawn zawng zawng chu ka hrilh a, a thinrim khawp mai. A bikin Ngaihsaka chungah a lungawi lo zual a, an inah a va kal nghal nghe nghe a, Ngaihsaka te ṭhian pathum chu Police-in an man ta thuai bawk. A thinrim viau e ti lo chuan lukawlha bulah lawmthu a sawi mawlh mawlh a, ka nu pawh a ngawi mai mai thei bik lo. Ephriam-a lah ka bul hnaiah a ṭhu deuh chawt a, zawhna chi hrang hrang an zawh avangin kan kawm thlanga an awm thu te, an veng dik tak chu Luangmual lam daih a nih thu leh Jacob-a school kalna sawn an duh avanga rawn insawn an nih thute chu tawi fel takin a sawi a, kan venga an lo awm chhan erawh ho ka ti ang reng.

Ngaihsaka te chu chanchintharah hial an lang a, a hna aṭang ban a ni bawk a, a chhungte paw'n ngaihdam min rawn dil nasa hle. An fapa berin a thil tih sual man dan ang taka a hmuh tawh miau avangin kan lo ngaidam ve mai a, a chhungte hi chu an sual hran miah lo maw le. Ka lakah ngat phei chuan an fel em em a, ka lên chângte hian kan titi thei fû zel. Ngaihsaka erawh tunah chuan a ṭhiante nen Jail-ah an awm daih tawh a, ka rin aiin an hremna chu a nâ. Kum 7 aṭanga kum 10 inkar vel tâng tura hrem an ni a, min pawngsual hman chiah lo mag se min pawngsual an tumna hrim hrim hremna chu ka rin phak bakin a serious a, a nâ bawk. 

Chalthansawmin ka chanchin a'n hre chiah chu ka bulah a âng tawn tawn a, ka ning lutuk chuan ka vin lêt hrep ringawt. Ka bulah lo ânna tur a nei der bawk si lo va, mahse ka ning ve êm alawm, duh leh Jail-ah kalin Ngaihsaka zu ân khum vak se a ṭha daih zawk. Kan han invin ve chiam tak nà a, minute rei lovah kan nui dun leh hak hak thei tho. Ka thil tawn chuan keimahah chiang takin nghawng a nei tih ka hria, a nazawngin mipa ka nel thei ta miah lo va, ka mi hriat chian loh ngat phei chu nel lo sâwt tak ka ni. Ephraim-a erawh a danglam zar mai, he pa pui roh hi chu mak tak maiin hlauhna emaw han nelh loh em emna ka nei thei miah lo. 

Amaherawhchu ka va nel huam huam tihna a ni hran lo va, mitthlaa a hmel a châm rei thei lutuk chu thil mak a tling a ni. Zan khat phei chu ka mumangah ka hmu vel a, a tuk ni lêngin ka ngaihtuahna a luah a, ka tum ngial paw'n ka paih chhuak thei der lo leh nghal. Chali bulah ngat phei chuan ka sawi chhuak ngam lo hial a, keimah tak pawh chu ka inzahpui a ni. Ka laka a awm dan erawh ka hrethiam lo tulh tulh a, veng khatah awmin inhlat lutuk lo mah ila a lo kal tam lo va, a rawn kal chhunah erawh ngaihtuah zui veng veng theih ang chi hian a awm ve ziah.

Ka nu leh pate lah hian an nêl em em mai chu a ni si a, tlem chuan a intithei ve deuhin ka hre ṭhin. Kha zan khan min chhan kher bawk si a, Taekwondo lampang thlengin ka chhungte chuan a chanchin an hre tawh a, a bula inven dan tal zir turin min tih phah nghe nghe. Kei ve thung chuan a them paw'n ka tum lo, tum lo nasa tak ka ni. A ṭha lo chu ka ti miah lo, mahse school-ah thawkin ka buai ve em em a, hun ka neih loh bakah a ṭul ber lo ve chiang ê. Zir man te kha a awm emaw a ni ngei ang a, pawisa a uiawm awm mai mai.

Kâr hnih a ral a, Jacob-a chuan min nêl sâwt ta viau bawk. Class room chhung a nih loh chuan min be hmasa ziah reuh a, kan zirlai naupang ṭhenkhatte paw'n mak an tih hmel thei hle. Kei tak paw'n ka nêl ve rèng a, a ṭawng duh siam siam si a, nêl loh chu har tak a ni. Chali chuan a patea nen kan inkawp a ring hial a, kan inkawp lo nasa mai si. Kha mi ni, kan infawh zingah khan hre chiang ber awm ang ziazângin ka duh ruk thu a sawi vel a, keimah ber paw'n ka duh leh duh loh ka hre lo a nia, awihawm loh leh lutuk. Zep lovah chuan ngaihtuah loh a harsa ka ti a, mahse ka duh e tihna lam a ni chuang lo.

Thawhlehni a ni a, zing lamah ka nu'n damdawi lei haw tura min hrilh lâwk tawh avangin Chali rualin ka haw ta lo va, zanah tih tur nei dawn lo se chu kan inhruai tir thlap tho ang. Pharmacy dawrah chuan ka lut a, ka nu damdawi min chah chu ka lei a, Bus changa ka din lai chuan ka hma takah Bike nalh zet hi a rawn ding ringawt a, full face-in helmet a khum tlat a, min en deuhin ka la hre zui. A tlan sawn mai lo va, ngawi reng hian ka lam a rawn hawi a, a rim aṭang chuan Ephraim-a a ang ka ti ru ngei mai. A bik ke lian leh body lian zet chu ka en daih a, Ninja tih emaw ni hi a lo inziak a, a awm dan leh a bike rawng vel aṭang chuan lukawlha a ang ka ti tawlh tawlh.

"Ephraim" tiin ka phun sep a, hawi sawn mai lovin ka en ta ngar ngar a, helmet en tlang tum ang maiin ka en char char a, a hmai chin a rawn tilang chiah chu ka hawi sawn rang khawp mai. 

"Min hre har ka ti reng a ni!" a lam chu ka hawi leh nghal a, a lo kiai suk a, kei erawh ei lo zetin ka lo ner sak thung. 

"Lo chuang rawh" a rawn ti leh tawp a, a thû thua min dah theih a ring ringawt emaw ni le!

"Ka peih vel lo" ka ti deuh hmak a, ka dinna hnaih takah a rawn tlan phei a, kan bula mite chuan min en hrek hrek tawh bawk.

"Keima'n ka peih vel alawm" tih leh ka ban rêka rawn chelh a rual a, a lamah min pawt phei zawm zat a, ka lo ding nghet bawk si lo nen ka va bawh ta rawk.

"Min thlah nghal rawh lukawlh, ka au vak a ni mai" ṭawng rin hlau taka ka tih chuan a nui suk duh lék chauh a, ka laka a huangtau ta sâwt lutuk chu ka hrethiam der lo. 

"Lukawlh bawk maw? Ephraim tiin min ko rawh ka tih tawh kha maw le Roluahpui, ka lukawlh erawh inhmeh min ti viau lawi bawk si" inthlahrung lo zet hian a ti leh a, a hmaia ben sawk chu châk tak ka ni.

"Ka hmingpumin min ko ziah suh Malsawmzel, lukawlh, min chhan avang mai khan ka engmah i nih phah lo. Hetah pawh hian ding reng suh, bike stand ni lovin bus stand zawk a nih hi!" tiin ka kut chu pawh thlak ka tum a, a thlah duh ṭhak lo zui. 

"Bus stand ni lovin Bus stop tih tur zawk alawm, lo chuang phawt mai teh" zahna a nei map lo chu ka en haw ringawt. 

"Bus a lo thleng dawn a nia, lo chuang thuai rawh, ka thlah ang che" a tih leh pawh chuan ka ngawi reng a, kan inmelh hnai bawk a, a thaw rim chu ka hre pha chiang khawp mai. 

A sawi ang ngeiin Bus chu a rawn thleng a, ka banah a chelh tlat bawk si nen chuang lo thei ka ni ta lo. A kawr nghawng pawt ri ṭhawtin a hnungah chuan ka chuang chho ve ta nge nge a, ka tum pawh a ni em em bik lo. Ka tla ṭepin ka pawt vak kha a ni a, a kawr nghawng chu a ṭet dawn tih ka chiang. Intithu zet hian ka kut chu a kawng zawnah a dah hmak a, ka pawt thla rang teh e. A tlan chhuah hnu chuan sik lo ka tum nasa hle a, sik loh dan hram ka zawng a, mahse tih ngaihna a awm lo. Hall lian zet bulah min dinpui daih a, min thlah dawn emaw ka ti a, kan kal chhan chu ka hre leh ta hauh lo. 

"I pa khan zirtir tur chein min tiin ka hria" a thusawi chu a mual bovin ka la bo map a, eng tak sawi tum ni ang maw! 

"Min thlah dawn emaw ka tia" ka ti hap a, kan kalna daih daih chu a mak teh dâwrh ve êm asin, kan veng nen a inhlat ropui mai bawk si. 

"Thlah dawn chiang e" tiin ka kut a rawn chelh a, engtin emaw ni hian ka awm deuh zawk ziah leh nghal a, chungte chu a lo hre reu reu ang tih ka hlau ru hle. 

Step-ah kan chho a, ka kut a la vuan reng a, kawngka pakhat a hawng a, kan lut chiah chu kan kal chhan ka hre ve chiah. Naupang aṭanga puitling thlengin kawr inang an lo ha vek a, an kawngah eng emaw ni hi an hreng ṭheuh bawk a, an ṭhen phei chu an lo invawrh pawp pawp nghe nghe. Dressing room-ah min hruai lut a, ka hmaah a inphelh mai a nih chu! Awm ve miah lo angin min ngai ni berin ka hria, a zak hauh lo leh nghal. Keimah zawk ka zak a, ka zam a, hlauh vang pawh ni lovin ka chhung lam a khur der der a, a inthlak chhung zawng chuan ka thaw a chham thei dawn hialin ka hria.

"Ka rei lo ang" ti supin Dressing room aṭang chuan a chhuak a, mi dang chu a va zirtir zui nghal a, mak tak maiin a che vel chu hmuhnawm ka ti leh tlat tawh. 

Mi dang a zirtir e ti lo chuan amah pawh a awm mai mai bik chuang lo va, in-fit tak a ni. A invawrh vir zak zak a, a zuang sâng em em bawk. Darkar chanve dâwn chu ka thlir tlawk tlawk a, mi dang che vel chuan ka mit an la ve thei thlawt lo. Zep lovah chuan a pian a dik a, a mawi a, invawrh vir thei àwm tak pawh a ni chiang. Ka lam a rawn hawi thut a, rang lutuk tak mai hian ka hawi sawn vat thung a, ka thinphu te chu a rang zawt zawt hle bawk. Rei lovah ka bul a rawn thleng phei a, a ngai te bawkin a inthlak leh a, kei erawh tukverh lam ka hawi char char a, sawi tur tak ngial pawh ka hre rih lo chu a ni ber e.

"Haw ang le" tiin ka kut a rawn vuan leh nghal chat ringawt a, ka laka a awm dan maksak zêt zet chuan min tihamhaih ngawih ngawih hi a ni tawp. 

"Khawiah mah pen kawi ka duh tawh lo a nia, min hruai haw tak tak tawh dawn em?" a Bike hunna bul kan thlen rualin ka ti nghal a, khua a hniam ṭan bawk si a, haw loh a hun tawh lo, ka nu phei chuan min lo ngaihtuah leh khawp ang.

"Tak tak tawh dawn e" a rawn ti ṭha ve mai a, bike a tih rum rualin a hnungah ka lawn kâi nghal thuai a, a thu bawkin min awm tir leh a tum ta. 

Ka kut chu a rawn la a, a kawng min kuah tir kher a nih chu! Rang zet hian ka la sawn a, min tilui phêt bik ta lo va, min tilui nà se chu kut ka thlak maithei a ni. Min chhan tawh pawh a ni mahna, mahse min ngaihnep phah tur a ni lo hrim hrim. A tlan chak ta lutuk chu a hnungah ka bei lo thei ta lo, a tilui tih ka hre vek, ṭawng ngam loh khawpin a tlan chak a, keiin ka hlau si a, a tawpah chuan ka kuah ta nge nge. A kawr hak chhanah ka hmer vak a, tlan chak lo turin ka hrilh nghe nghe a, engah mah a la ngai duh lo zui. Rei pawh tlan lovin kan in kawt kan thleng thuai a, mangṭhana thu emaw min thlah avanga lawmthu sawina thu ka kâ aṭangin a chhuak lo chiang hle.

A tuk aṭang chuan kan inhmu lo leh char char a, eng nge a tih ṭhin ka hre miah lo, mahse hriat ka châk ru thei em em thung. Jacob-a han zawh ngawt lah tlawm thlak ka ti ve deuh tho bawk si, kâr tam a liam hnuah pawh kan inhmuh leh tawh lo tluang zel a, a reh ta hmak chu engtin emaw ni hian ka awm tlat a nih chu! Zan khaw tai rêk thlêng thleng amah avangin ka men phah ṭan a, a chhan pawh eng dang a ni lo, min fawp ringawt kha ka hrethiam lo a ni. Ka zep lo ang, ka rin phak bakin infawh kha a zei daih, zei tak a ni. Kei phei chuan ka hnar lo hrim hrim a nih kha le, a awm dan vel hi mipa dang ang lo takin a dangdai a, hriat reng loh a harsa lam hret chu a ni.

Thlah hnih thum a ral a, Matric exam leh Board exam pawh kan zo fel ta. Kan Principal berin thla khat chawlh a rawt a, kan hnial lo chiang hlawm hle. Sik leh sa awm danin a zir bawk nen zirtirtute bik Picnic kan tum a, chu pawh kan Principal rawt leh bawk a ni. Kan chhungte kan duh zât zat kan hruai thei a, mahse kei chuan tûmah ka hruai ve ta lem lo. Ka nu leh pa chu a hmingin ka sawm ve ngei a, an peih lo chiang ngei mai. Ka u ni se khaw dangah Pastor-in a awm daih bawk a, keimah tlawnga kal tawp loh chu tih theih a awm lo. 

Chali erawh a cousin te pahnih leh a bialpa thar nen an lo kal ve ngei a, Principal-in a nupui fanau te a hruai mai bakah kan thawhpuite chuan an kawppui te ṭheuh an hruai bawk. Mahni lirthei kan keng mai a, a ruk tak chuan nuam lo ka ti ang reng. Tow wheeler ka nei ve der bawk si lo, an fel viau hlawm tho va, Chali ber chuan inthlahrun a tinâ zual a ni. A bialpain bike a keng a, phur a duh tih ka hre reng mai si a, Chali lah min phur phet a tum thung a, kal lam aṭang ringawt pawh kan buai deuh nuaih a, Picnic chu ka phur lo hnuhnawh ta hle. A cousin te pahnih chu an inphur thei mai a, keimah ka bâng ta a ni. Scooty erawh a awm reng a, khalh thiam ila chuan buaina a awm lo ang maw le. 

"Miss" min kotu awmna lam chu ka hawi phei nghal a, Jacob-a lêk chu lo niin, mahse amah maiin a ni hauh lo, a pate lukawlha pawh ka hmu chiang e.

Chhan lêt tumin ka âng zuau a, mahse Ephraim-a chu a tlan tlang daih a, ka ṭawng leh ta lo. An tliam liam hnu rei vak lovah keini pawh kan tlan chhuak zui nghal a, rilru nuam lo deuhin Chali hnungah ka chuang a, Picnic spot kan thlen te chuan nuam tihna pakhat mah ka nei lo. Mi dang chu hlim em em hian tui an cheng a, kei erawh tuiah ni lovin ei rawng bawlna lamah ka awm thung a, tlem chuan ka nuam lo ti lutuk pawh a zia phah. Zanriah ei hma hret velah kan haw a, lawm tak ka ni. In kan thlen hmate chuan thlen thuai thuai ka duh a, mut hmak baka châk ka nei rih lo a ni.

Chawlh kan hmang zo va, nitin school-ah kan kal leh ta ziah a, mahse keimah chu ka buai ru tulh tulh thung. Ka rilru aṭang Ephraim-a hmel leh a ṭawngkam a bo thei lo va, a châm reng zawk a, ka vei ni berin ka hre ta. Kan inhmu khât tawh bawk si, veng thuhmunah awm e ti lo chuan inkhawmnaah pawh ka hmu ngai mang tawh lo va, Jacob-a erawh a inkhawm ka hmu ziah thung. Zan khat phei chu tum loh deuhin a thlalak ka hmu fuh a, instagram lamah a ni nghe nghe a, hmeichhe hmelṭha tak nena an ding dun chu ka hmu chiah chu ka sa chhuak vekin ka hria. Ka thin lah a phu dawt dawt a, ka rilru dik tak chu ka hre chiang ta khawp. 

Ni e, Ephraim Malsawmzela; lukawlha hi ka duh, phat rual lovin ka duh chiang a ni. Ka duh chhan ka ngaihtuah a, ka hre bau lo. A hmel ka ngaihtuah leh a, hmelṭha vur ni si lovin a hmel chuan min hip tlat lawi a, hmelṭha lam ai chuan hmel pà tak a ni zawkin ka hria. Eng thawmhnaw pawh inbel se a inhmeh em em vek zel a, amah a tê lovin a hang chhe lo bawk nen kawr rawng lar lam phei chu inhmeh tak a ni. A huhâng ni se a nâ phian leh nghal a, mahse a pawi ber chu bialnu a nei tlat. Ka duh chiang alawm, ka duh tih ani pawh khan a hre vek, mahse ani leh kei chu kan inkawp a rem lo hulhûal. 

Sunday zan a ni a, biak in gallery-ah ka pate nen kan ṭhu tlar ṭhap a, ní tam tak liam hnuah Ephraim-a ngei mai chu ka hmu ve leh ta. Kan ṭhutna gallery sir lamah Jacob-a nen an ṭhu a, ka kut chu hum ruh tak ka ni. A bul chiahah senior department zirtirtu pakhat hi a ṭhu a, a awm dan leh a biak dan vel aṭang chuan a duh tih ka hre chiang mai si a, ral khat aṭang ka lo thik ve em em ringawt. A bula ṭhuin a be deuh reng tak ná a, amah ber chuan a chhang tam vak lo va, ka lo lawm ru viau. Chu nu lah chu senior department zirtirtu ni mah se biak in chhungah a ṭawng reng a, mi mit pawh a tikham khawp ang. Kei tak pawh ka bang chuang lo, thusawi ngaihthlak aiin lukawlha te bawk ka ngaihven ru reng a, ka awm dan chu a mawi lo ve thlawt. 

Tleirawl leh nula ṭhenkhat phei chuan thla an lak ruk sak hial a, ka dem hran lo. An hausak chu thuhran ni ta se, a hmel a pá ve êm a ni. A kawr hak lah a inhmeh bawk si, kamis bilh luh te chu a inhmeh ngawih ngawih hi a ni tawp. Inkhawm kan bang a, ka la thlithlai ru reng a, mahse ani chuan min rawn ngaihsak lo hrim hrim. Jacob-a nen an inphur haw nghal daih a, kei erawh kohhran zaipawl hla zir a awm avangin ka haw nghal mai lo va, hla zir zawhah ka haw ve ta chauh. Haw kawngah te chuan Ephraim-a bawkin min chen chilh leh a, ka hriat loh laiin zawlaidi min tât emaw ka ti ta hial.

Vawi tam thil ngai ngaihtuah nawnin dar 2 dâwn ka meng thleng a, a tawpah chuan ngaihven zui loh tumin thu tlukna ka siam fel ta. A pawi ka ring chiah lo, ka tihsual loh ka ring zawk a ni. Ka duh ngei a, ka vei ngei bawk, mahse hnaih buai loh law lawa theihnghilh tum chu a finthlak berin ka hre tawh. A mi fawhna erawh mipa dang ka fawh tawh te aiin a hriat hran hlak theih a, chu ber kher chu theihnghilh mai a harsa ve khawp ang. Ka mipa nel pawh ni lo leh ka ngaihzawng pawh ni lovin min fawp a, ka lo chhang lêt vel kha a nia, hmeichhe lamah a zei ve thawkhat dawn tih a chiang reng reng.

A tuk aṭang chuan ka hnaah ngawr ngawr rilru sên ka tum ṭan ta a, mahse vawi leh khata han theihnghilh nghal ngawt chu thil namai a ni lo. Keimah leh keimah chu ka inzahpui letling zawk, min duhtu pawh ni hlei lo leh ka Classmate hlui ka duh ru em em chu a ni si a, hmeichhe dang nena an awm dun lahin ka thik bawk, nêp tak inti tak ka ni. Zia erawh ka zia chho ṭan viau thung a, ngaihven zui loh ka tum hranpa ve hrim hrim. Zawi zawiin ka duhna te chu a kiam ka ti dawn nge a bo ka ti dawn zawk pawh ka hre lo, thla khat hnuah phei chuan inthunun thei tawh tak ka ni. Lo vei bur te, lo duh ve em em ringawt te kha a ṭul ber lo tih ka hre chiang tawh tlat a, ngaihzawng ka nei leh a nih paw'n Pathian min pek hun ka nghak ta tawp.

"Awi!" hlauthawng zet chuan ka ti hluai a, ka bula lo ṭhu thut hmel chu phawk zetin ka en reng bawk a, mahse ka insiam ṭha ta vat.

"Khawiah nge i kal dawn?" thawh ka tum rualin ka banah a rawn chelh chat a, tal chhuah ka tum chuan a hma ang bawkin a chelh nghet leh sáwt hle.

"Ka lut tawh ang chu ka ti, mut tui mai le" tiin thawh ka tum leh ngat a, vawi leh khatah min pawt thut a, a âwmah chuan nghet zet hian min kuah bet a, ka thinrim dan chu pui tak a ni.

"Min thlah nghal rawh MALSAWMZEL" ti vin hlarin tal chhuah ka tum a, ngawi rengin min pawm bet tlat thung a, theih tawp ka chhuah chung paw'n awmzia pakhat mah a awm lo.

"Mumbai aṭangin ka lo haw chiah" tih zawng hi a rawn sawi a, a thusawi chu ka thêngthâwngah pakhat mah a thawk lo, a duh duh sawi vel mai mai teh se. 

"I sawi lohna hmun turah i sawiin ka hria" ti vin hlarin a âwmah chuan ka nâm leh vak a, zawimuang hian a zak a kau a, ka va han inmelh chiang ber kher em.

"Awm ṭha mai mai teh Puii" chauh hmel zet hian min en a, a âwmah a ngaite bawkin min kuah bet zawm leh nghal a, tun ṭum chu a kuah duh lovin ka lo ṭang ṭung thei ta hauh lo mai. 

"Theihnghilh i har zêk leh nghal" ti hniam sup hian min kuah nghet sauh a, mak ti fêin a lam ka hawi chho nghal a, mahse ani chu a lo maimitching daih thung. 

"Min thlah tawh teh, pawna awm hi nuam ka ti ta vak lo" ka tih chuan a ngawi reng a, a hmel chu ka en leh ṭhin a, a chauh hmel tak zet.

"Lukawlh, ka tih awmzia chu Ephraim" ti sepin a kut chu ka chawi kâng riai riai a, a rawn meng ta ngei a, min en dan mawlh chuan min tizam leh tawh ngei mai.

Ka en reng lai chuan a rawn che deuh thut a, a vawi hnihna atan min fawp leh ta. Ka nam sawn nghal vat a, rei erawh a awm sawn lo chiang hle. Min rawn fawp leh chiah chu ka inhrethiam tawh bik lo, ka dawh hle hle a, a hnuah phei chuan chhan lêt loh harsa khawpin min fawp a, ka hmui ka chet zeuh rual chuan sakeiin a sapelh lai ṭhelh a tum lo ang mai hian a rawn che zawm zat nghal bawk. Ka rilru leh taksa zawng zawng chu a thunun vek a, kan awmna hmun chu khawi lai nge a nih tih tak ngial pawh ka hre thei tawh lo. A mi fawhna chu a thlum ni mai te'n ka hre hial a, chuti ang em ema hmui fawh nuam chu an awm theih ka ring ngai lo, mahse an lo awm ngei e!

"Ngaihtuah loh lai che pawh ka nei lo" kan thaw dun hlawi hlawi a, kan chal a insi ran bawk a, kei phei chu ka thawk dan a la dik lo nasa em em a, thaw chham dawn ang maiin ka awm titihin ka hria.

"Ka..ka lut duh" ti bah nawkin ka thaw chhuak ham ham a, chu thu chu ka sawi ve tak ná a, chet sawn emaw kal sawn nghal erawh ka tum chuang miah lo, thil mak tak zawng a ni.

"Va lut rawh le, naktuk zing chu in school-ah ka thlah dawn che a nia, Jacob-a thlah pahin" a tih chuan rang zetin ka tho a, engmah sawi tawh lovin ka lut ta nal nal.

Engtin nge ka theih zawk? Engtin nge awlsam tak khan ka infawh tir leh theih zawk? A thlaa thla meuh ngaihven tawh loh tumin ṭan ka khawh a, tunah lêm kan infawh tir leh vela maw!? ROLUAHPUI, i va han nêp chiang êm, nêp tak i ni. Room chhunga ka luh hnu thleng chuan keimah leh keimah ka inhau mawlh mawlh a, ka ṭang rei thei lo lutuk kha a mak zawk. Khati ang khan mipa dang bulah ka awm ngai lo asin, min fawh te khan engati nge ka lo fawh lêt ve leh kher kher? Rilru nuam lo zetin khumah ka mu a, ka meng kar a, ngaihtuah loh ka tum paw'n ka thei leh ta tlat lo. 

Zingah chuan kan in kawtah a rawn ding ta ngei a, min sawm turin Chali a lo kal bawk nen thil a tibuaithlak zo vek. Chali scooty zawkah ka ṭhu hmak a, an bula chuan chu huphurh tak têin ka huphurh daih zawk. School kan thleng a, chawhma chhung zawng Chalin zawhna min zawt a, pakhat mah ka chhang lo thung. Chawhnu lamah pawh a ngaitê bawkin zawhna ka dawng leh a, ka thinrim ṭep nghe nghe. School kan bâng a, school gate bula lo ding chu pehhel ka va'n duh tehreng êm. Ka thawhpuite awm laiin ka banah a rawn chelh leh chawt a, a motor chhungah min ṭhut luh tir a, ka hawi lêt ngam lo law law, Chali phei chuan mak a tizual khawp ang. 

"Zanin dar 7-ah ka lo lam ang che, thil sawi dun tur kan nei. Chhuak nghal thei turin lo insiam la, i lo insiam lâwk lo emaw ka bula kal i duh lo a nih leh i chhungte hriat laia ka sawi i duh zawk a ni mai a ni ang chu!" kan in kawt kan thlen chuan a ti a, a sawi zawh rualin door lock chu a open ve ta chauh.

Zanriah ei chhung zawng chuan ka inngaihtuah ngut ngut a, ka chaw ei pawh ka ngaihthah lek lêk hial a, Ephraim-a chu ka zui ang nge ka zui lo ang tihah ka buai a ni. Chaw kan ei kham a, tihfel tur ka tifel nghal a, room-a ka luh hnuah erawh ka rilru a insual ta nawk nawk. A tawpa tawpah chuan a thu anga awm tawp chu ka tum ta a, ka chhungte hriat lai pawha a sawi hreh loh chu ka zahna tur a nih ka ring nghet bur a, chu vanga zui tum ta pawh chu ka ni. A thu a duh hmel bawk si a, a tih tawh lamah chuan ka tana zahthlak tur pawh ni se a tih hreh miah loh ka ring. Dar 7-ah chiah chiah in chhung a rawn lut a, hun chu a vawng dik vel khawp mai. 

Ka pa bulah chuan min chhuahpui lawk a dil a, ka pa'n keimah min râwn thung a, ka lo bu nghat a, chhuak turin ka insiam peih fel vek tawh zawk maw le. Ka pa chuan a phal thu a sawi a, kan chhuak zui nghal chu a ni mai. Motor-a kan chuan dun lai chuan kan ngawi reng a, polythene dum aṭang hian lehkhabu a rawn phawrh a, thil hriat chhuah ka nei nghal. Nizan khan lehkhabu chhiarin kan in kawtah ka ṭhu a, ka ken luh theihnghilh tih ka hre ve chiah. Nizan mai ni lo zan dangah pawh ka chhiar ṭhin a, boruak a nawm mai bakah light a êng ṭha a, mahse nizan kha chu ka lehkhabu chhiar lai lâk luh theihnghilh khawpin ka awm a nih kha! 

In lian ang reng tak pakhat hmaah hian kan ding a, a awmna hmun a fal hran lo va, street light te chu awm ve mah se ka ṭih deuh reuh tlat tho. In bul tak lah chu a dai ruih leh nghal a, ramhuai emaw thlahrang an awm duh hmel ka ti hle. A iptê aṭang chahbi phawrhin in kawngka chu a hawng a, a chhung light a on chiah chu hmuh nuam tak a ni. An ṭhutthleng rem dan te, an frame tar dan te, an light vuah dan zawng zawng leh Kitchen Cabinet thleng chuan sawisel ngaihna awm lo khawpin a mawi a, a thianghlim bawk. Min kaih ang âng chuan ka kal mawl tawp a, in chhung nalh lutuk chu kal pahin ka thlek kual dû du phah.

"Zanin aṭang chuan ka infiah tawh lo ang a, nang leh kei hi kan inzui tawh bawk ang" a rawn ti deuh tawp a, kei chuan sawi tur pakhat mah ka hre nghal lawk lo. 

"Khang thla tam liam ta chhung khan keimah leh keimah ka infiah asin Puii, i awih kher lo maithei, mahse thu dik a ni. Zanin aṭang chuan kan inngaizawng tawh tih hria la, school-a thlah ka tum che paw'n duh tawh la, bân huna thlah ka tum leh che paw'n min hnar tawh suh" a tih leh chiah chu ka ding ta vat. 

"Heti ang thu ho lutuk sawipui tur mai mai chea ka lo zui che hi thil âtthlak tak a ni" tih leh kawngka lam pan chu ka rual a, ka kal thui hmain min pawt her sawk a, ka dar tawn tawnah chelhin min en chiang ta hle.

"Thu ho mai mai ang chuan sawi suh, a ho lo, a chhan chu kan pahnih bul ṭanna a ni tlat" ka nui lui hak a, a thusawi hrethiam lo turin naupangchhe zawk zawk ka ni tawh bik hleinem le. 

"En teh Ephraim, vawi hnih khat min fawh theih avang khan kan inkawp dawn tihna a ni ringawt lo. In hausa tih ka hria, mi hriat hlawh tak pawh i ni e, mahse bum hmang mipa hi ka huat zawng tak an ni a, chung zinga chuan i tel ve tih hre rawh" thinrim ru zetin ka ti ve ta salh salh a, min va han pawt hnai chiang mai mai tak. 

"Bum hmang ka ni hrep lo, bum hmang anga min sawitu chu han sawi teh" a ti zo chiah tihah

"Tûma'n an sawi lo, ka mit ngeiin ka hmu zawk. Kawp lai nei reng chungin inngaihzawn te i sawi maw!? Kei leh nang hi kan ngaizawng tawp lo ang tih hre rawh, lerh kawh pa" ka ti vin phiar phiar a, instagram-ah hial thlalak an post a, caption-ah pawh love sen ngat a awm a, min bum hmaa ka hlat a ngai. 

"Ka lerh kher lo, kawp lai emaw ngaihzawng emaw pawh ka nei leh tawh lo hrim hrim. Ka ngaihzawng neih lohna chin hi kum hial a vei tawh, tunah erawh nangmahah hian ka bur chat tawh dawn" 

"I zak lo ve hle mai maw, ka lo duh hman thawt thawt che kha ka tisual chiang e" ka tum loh deuhin ka duh thu ka sawi chhuak palh ta, chutah ka kal sawn tur chu min kuai lêt lehin ka bek tawn tawnah a vuan a, nâ zet hian min rawn fawp a nih chu! 

Ka theih tawpin awm sawn ka tum a, ka thei bawk si lo, ka mittui a baw ta zawih mai. Ka mittui a tlak hnu rei lovah min thlah a, min ngainep lutuk chu ka rilru a nâ ngawih ngawih. Min ngaihtuah hmel zet hian min en leh lawi a, mittui nen ka nih pur tawh avangin a hmel pawh ka hmu chiang thei lo. Ka ṭap tak ná a, ka ṭap ri lo va, ṭah rik hlauin ka hmui ka pet fan fan zawk a ni. Min pawm kâng lawp a, ṭhutthlengah min ṭhutpui hle hle a, ka lu chu a âwmah nawr betin ka chhip sam a fawp zeuh zeuh a, inthiam lo ang maia a awm te chu ka haw lutuk, ka haw tak zet.

"Min hrethiam teh, ka ta chauh ni la ka duh vang a ni. Ngaihzawng ka nei lo va, ngaihzawng ka nei a nih chuan nangmah ngei hi i ni ang, ka inringhlel rei tawh mah mah a ni e" hriat nuam zet hian a ti sup a, kei erawh ka ngawi reng thung.

"Ka hria asin, i laka ka rilru puthmang ang chiah hi i pu ve tih ka hria, ka lawm bawk. I rilru mai ni lo i taksa thlengin ka tawh che hian i danglam ṭhin tih ka hriat loh ring suh, i taksa ka sik hian nang lêtin ka danglam tih hria ang che" a tih leh chuan

"Ka rilru ang i pu a nih si chuan engati nge i reh vang vang kher? Min ngaina ang takin i awm a, i bo leh daih a, tu hmeichhia mahin nang ang mipa hi an ngaina ngai lo ang che" ka ti ve ta mawlh mawlh.

"Nangin min ngainata min duh chuan a tâwk, hmeichhe dang ngainat leh duh nih ka châk lo ni rawh se. Ngaithla teh Puii, kum tam liam hnua ka hmuh leh hmasak ber nî aṭang che khan ka rilrua awm loh lai pawh i nei lo, paih chhuah che tum mah ila i awm reng ṭhin" 

"Ka awih bawk lo, social media-ah pawh hmeichhe pakhat nen thla in la dun alawm, in induh tawn hmel êm kha le" ṭah chhuah lam ai chuan ka thin a rim thar leh ta zawk. 

"Chu min lo vei ngawih ngawih a, min lo zawng vel ṭhin tihna em ni?" a hmel ka en chu a lo nui suk a, zak lo ham ham ti tak ka ni, mahse a sawi dik miau bawk si.

"A teuh lo mai, ka zawng ngai reng reng lo che" ka ti vin hlar a, ani erawh a nui hawk hawk a, a nui hmel mawlh chuan ka thinrimna zawng zawng a su kiang vekin ka hria. 

"Biak inah pawh khan thik i nei deuhin ka hria, nge ka hre sual zawk âw" Lalpa le! He pa hian min lo hmu ru vek tihna em ni!? 

"Ngaihzawng neih leh ka duh tawh bawk lo, chu bakah ka rualpui phei chu ka nei duh tawh lo hrim hrim, tlangval senior lam emaw hmeichhe hrethiam tak chauh ka nei tawh ang" thu danga pakai pui mai loh chuan min puan vek mai dawnin ka hria. 

"Mipa dang nena in awm dun ka phal ring reng reng suh, i hriat miah loh pakhat chu nang aiin ka upa. Nang ai kum 3-in ka upa zawk, i ngaihzawng ni turin ka tling tâwk viau bawk, tlangval senior tih mai mai chuan ka nê pawh an pha lo ang" tiin min rawn fawp ngawng ngawng a, ka chhang lêt lo a nih chuan nunna nei lo ka ni ang; chuti ang khawp chuan chhan lêt loh a harsa a ni. 

Haw ka rawt tlat avangin kan haw ta ngei a, kan haw kawng tluanin ka vin a, ka hrawk a, inngaihzawn ka duh loh thute ka sawi bawk a, mahse awmzia pakhat mah a awm lo. Kan inngaihzawn tawh thu chiahin min chhang zel a, a kumah ka ṭuan leh a, dawt a sawi erawh ka ring ngam tawh chiah lo a ni. A sawi dan chuan school a lut tlai a, kan hun lai pawha kan senior te a sual ngam hrim hrim kha mak ka ti ta lo e. Kan senior te nen inrual khat an lo ni hlawm awm reng si a, class-a lehkha a thiamthei fal bik ṭhin te pawh kha eng dang vang a ni hauh lo ang. A tawpah erawh a hmeichhe thlalak puiah kan pakai leh a, mahse maw a mak lutuk, chawp leh chilhin a thusawi engkim ka awih vek a nih chu! 

Chumi zan aṭang chuan inngaizawng angin kan awm chho ṭan ta, lukawlha nen kan inkar chu Chali ka hrilh hmasa ber a, mak a ti viau dawn emaw ka ti a, kan inkawp a lo ring sa daih tawh. Pangngai takin min lawmpui ta zawk a, dik tak chuan kan inngaihzawnna a la rei lo va, ka hlauthawng ru ang reng. Amaherawhchu ka ngaihzawng neih tawh te aiin a danglam hlak a, a mizia ni se ngawichawi ang deuha lang si hian mi hnial khan a hre em em a, ka hnial hneh meuh lo ṭhin. Zantin deuh thaw chu a rawn lêng ta ziah a, ka nu leh pa chuan an hrethiam deuh tawhin ka hria. Sawi tur lah hi a hre zêk ṭhin leh nghal a, ka nu leh pate nen pawh an titi ho thei fû zel.

Hun a kal beuh beuh emaw tih laiin thla 3 lai chu kan inzui ve leh ta reng mai, khang thla 3 chhung khan sawiselna tur pakhat mah ka hre lo, mak tak a ni. Sawisel tumin a chet sual hun ka chang ran zel a, hmeichhe duhtu a ngahin a tla nâ hle a, mahse ka rinhlelh tur leh ka rilru tinâ zawngin pakhat mah a awm ngai lo thung. Min tihhlim tumin a ṭawng ngai lo va, thil pawh min lei ngai lo va, ka bula a awm phawt chuan ka hlim em em ṭhin zawk. Hmân aṭang tawha ka hriat châk a hnathawh chu ka zawt ta nge nge a, ka rin loh lutukin sawrkar hna sâng tak a lo thawk reng chu niin, department pakhata thu ber a lo daih tawh a, mi ṭhawn hi chu a hrat ve hrim hrim. A zin dawn thu pawh a sawi ngai lo va, a lo haw hun tur pawh a sawi ngai lo va, a zin fel vek tawh hnuah a zin tih ka hre chauh ṭhin.

Ni khat chu kan school-in school compound tihfai hnatlang kan nei a, zirlai naupangte chuan uniform ha lovin awm hmun kawr an rawn ha vek a, zirtirtu ho pawh hnathawh kawr kan inbel ṭhap bawk. Chawhma lama zawh theih mai kan inring a, chawhnu lamah kan zo ta zawk a, nuam kan ti tlâng hlawm hle. Jacob-a pawh a fel leh siam siam hle a, a patea nen kan inngaizawng tih a hriat hnu phei chuan min nêl leh zualin ka hria. Ephraim-a chu Jacob-a lam turin a lo lang hma hle a, kan inzui tawh tak ná a, lukawlh tia koh chang ka nei leh zauh ṭhin a, ani paw'n huat enah a en tawh lovin ka hria. 

"Awi, ka hmanrua ka theihnghilh daih mai, min va lâk lawk mai teh a Jacob" tiin Jacob-a chu ka hmanraw awmna lam ka kawhhmuh nghal a, zirlai naupang ṭhenkhat chu an haw rém titih tawh bawk. 

"Ka va la ang" Jacob-a chuan a ti ve mai a, fimkhur tur te chuan ka chah zui nghal lawm lâwm a, kan hnatlân lai khan leihlawn nen kan chet avangin kal harsa a ni lo va, kan bul hnaiah mipa ṭhenkhat an thawk bawk nen kei phei chuan ka hlau lo hrim hrim. 

Hla lutuk lo aṭang Ephraim-a nen Jacob-a che vel chu kan lo thlir reng a, kan hnung lam aṭang Chalin min rawn fiam zeuh a, kan hawi lêt ve ve a, chutih lai tak chuan Jacob-a ṭe ṭhawt thawm a rawn awm a, kan hawi phei rang hle. Ka thil hmuh avang chuan phawk zetin ka meng a, Ephraim-a chu chak mangkheng hian a tlan phei nghal a, ka hlauthawng em em bawk. Hmanhmawh takin ka tlan thuai a, chuta ka thil hmuh chuan min va râp tak ém, Jacob-a chu kan school bul khamah a lo lum a nih chu! Ephraim-a chu hlauh nei lo ang mai hian a zuang thla pawp pawp a, a lum thla zel tur a zu man meuh chuan Jacob-a chu ni khaw hre lovin a lo awm daih tawh. 

Kham ni mah se Ephraim-a chuan a rawn paw chho sawk sawk a, a dara thisen baw nuaih te chuan ka thauah min man a, ka tih ngaihna hre lo chu ka hmui ka hup tawp ringawt. Kawng zawl chin a rawn thlenpui rualin motor lamah a tlan phei nghal a, principal leh kan thawhpuite pawh an lo la haw lo hlawm a, Ephraim-a leh Jacob-a an hmu chiah chu an hlauthawng ve hlawm hle. Motor-a a chuan luh rualin ka chuang lut ve nghal thuai a, chak zet hian kan tlan chhuak a, mi dangin kan hnungah min lo zui bawk. Hospital awm hmasa berah kan tlan lut nghal a, doctor te kuta hlan a tum lai chuan ṭah chhuak zetin ka kal hnaih a, Jacob-a hmel en chian ka tum lai tak chuan Ephraim-a zawkin

"Hnaih hlek suh, thlawk bo rang rawh!" a rawn ti vin hrawk a, ka phu dawrh nghe nghe a, hamhaih leh hlauthawng zeta ka en lai tak chuan

"Ka thusawi i hre lo em ni ROLUAHPUI? Pen khat paw'n hnaih tawh suh, awm sawn nghal vat rawh" a ti leh phiar a, a auvin a au hi a ni ber a, a khawk rum rum a, ka hlauthawng leh hrilhhai lutuk chu ka ṭap tawp ringawt. 

(End of Part IV)