EPHRAIM MALSAWMZELA (LUKAWLHA) By Havali Adam (PART II)

EPHRAIM MALSAWMZELA (LUKAWLHA)

By 

Havali Adam

Part II

Nîtin school lamah ka kal ziah a, ka hna a ni a, naupang zirtir te hi nuam ka ti ṭhin hrim hrim a, ka hna chu ka ning ngai lo. Thil mak em em pakhat chu kha pa kha, Jacob-a patea khan ka rilru a luah ta tlat mai a, a mak ve êm asin, ka mitthlâa a hmel a awm ngun ta riau chu thil mak tak zawng a ni chiang a ni. An ina ka kal zan tih loh kha chu hmaichhana inhmuh àwm kan neih leh tawh pawh ka hre lo, thla erawh a kal leh duai tawh thung a, ka rilru leh ngaihtuahnaa ani daih daih a rawn awm ṭhin chu ka hrethiam tawh lo, paih chhuah lah a la harsa phian leh nghal.

A hming chu ka hre ngei a, a hming pum thlengin ka hria alawm, mahse a hmingin ka ko ngam hauh lo thung. Ko tur paw'n kan inhmu khât ang reng a, ni lo, kan la inhmu leh miah lo zawk maw le. Kum tam tak hnua ka hmuh leh hmasak ber khan chanchinbuah a ni a, chu pawh Taekwondo a thiam avanga lang a ni. North East inelna bikah Mizoram a lo Champion pui reng chu niin, a mimal chanchin ṭhenkhat an ziah lan dan kha chuan Korea ram leh ram hrang hrangah pawh a lo zir zak zak tawh a ni awm e. India ram aiawhin Asian Games hial a lo khel tawh nghe nghe a, a chanchin ka chhiar tirh khan mak ka va'n ti mai mai tak, chutah a lu a lo kawlh titih vek tawh zui. 

Ka ngaihtuah chiang a, a tan chuan North East huang chhung bika Mizoram Champion pui chu a harsa hran lo vang ka ring. Chanchinbuah khan an tarlang dik lo te a nih ngawt loh chuan Taekwondo bikah Mizoram Chief Instructor a ni mêk a, higher kan kal ho aṭang tawh insual a thiam hrim hrim a, Taekwondo lam thiam àwm réng pawh a ni e. Kan venga an rawn insawn tâk daih chhan erawh ka hre der lo, kan venga an lo awm hmain khawi vengah nge an awm ka hre chuang bawk lo va, ka ngaihven thui duh lo law law a ni e. A chanchin ngaihven zui duh lo e ti lo chuan ka ngaihtuahnaah a awm tlat roh bawk si a, engtia han paih chhuah tur nge tih lah chu ka hre lo nasa mai si. 

"Nizana mi kha tu maw a nih a!?" ka zawhna avangin Chali chu a hawi kual zawk zawk a, kan thawhpui mipaho hriat a hlauh hmel hle.

"Nakinah ka hrilh ang che" a tih chuan ka lo ner nang a, nizan khan a status a update a, mipa pakhat nen an thlalak dunna a ni nghe nghe a, mahse a delete rang leh hle thung. 

"Nang hian bialpa i nei vel chiang lutuk, ka hre tlang vek Chalthansawm. Min hrilh ṭha ve mai rawh, ka sawi chhuak dawn pawh ni hlei lo" ka ti leh nghal zawt zawt a, mipa hovin beng an rawn chhit rualin

"Ka kal dawn, class ka nei tlat" a ti hmak a, ka ngenna pawh ngaihsak ṭha duh lovin a tho va, class va la tur chuan a chhuak zui nghal daih bawk.

Chawhmaa ka class lak tur ka la zo dim diam tawh a, ka awl der der a, chawhnu lamah vawi hnih ka nei leh ang a, vawiin atan chuan chu zawng chu a ni mai. Phone ka khawih mial mial laiin kan office chhunga bell chu a rawn ri zeuh a, dar zat ka en chuan chhun chawlh hun a lo ni reng tawh a, hun chu a kal chak ka ti ang reng. Lunch break kan nei a, vawiin chu Chali zawkin kan school bul lawka restaurant-ah thil ei a rawt a, kan ei ta ngei a, kan thil ei laia a thusawi chuan min tinui var var chiang hle. Ka rin ang ngeiin bialpa thar a lo nei ve ngei a, a taka ka hmuh duh thu ka sawi nghal pawp pawp a, amah pawh a nui nasa mai.

A sawi dan chuan kum lamah an inrual chiah a, Chali chuan ngaihzawng nei leh turin min hrilh nghal ringawt bawk a, kei erawh ngaihzawng neih buai vel ka peih tawh lo thung. Chu bakah a nei ve dek dek a, thu rawn ka pe e a ti nghal mai chu a nuihzat thlak letling zawk a ni. Ka hriat sual loh chuan a vawi khat ngaihzawng neihna a ni maithei, kum tam kan lo inkawm ve tawh a, ngaihzawng a neih àwm ka la hre lo hrim hrim. Kei erawh pathum lai ka nei tawh a, kan inṭhen leh vek tawh bawk a, ngaihzawng lamah ka tluang lo ni berin ka hre ta. 

School kan bâng a, haw kawngah chuan hnung lam aṭang ka ṭawng mawlh mawlh a, KFC discount nî a ni a, Chali chu kalpuiah ka sawm a, a phur teh chiam lo em em zui. A tawpah erawh Chanmari lamah kan inphur phei ta nge nge a, KFC dawr kawtah chuan mi dang pawh an lo tam khawp mai. Dawr neitute chu an hlawk awm ṭhin hi ka tia, mi fate hi chuan sum lak luh dan chi hrang hrang an lo hria a nih dawn hi! Kei ve chu private school pakhatah ka thawk tawp a, thawk lo phei ila chuan tih tur dang hre lovin ka hawihil nasa khawp ang le. 

"Saw pa saw i hmel hriat pa kha a ni lo'm ni?" Chali hawina lam chu ka hawi phei nghal a, Jacob-a patea ngei mai hi kan hma hmâ lehah chuan a lo intlar ve a, chu lai hmun daih daiha ka hmu chu mak ka ti leh ta viau. 

Ka ṭhiannu zawhna pawh chhang ta lem lo chuan ka ngawi reng a, kan hmaa mi chu ka va en leh zeuh zeuh ṭhin a, thla tam ral hnuah kan inhmu leh a, eng vanga zam ru tlat nge ka nih pawh ka hre lo. Chali chuan mi dang a dip mai mai a hlauh thu sawiin a scooty hunna lamah min pheisan daih a, ka rin aiin kan ding rei tawh. Ka hmaa mi pa pakhat chu a ning ta deuh a ni ang phun sup hian a kal sawn ta nal nal a, ka tan Jacob-a patea hnung chiaha din loh theih a ni ta lo. Ṭi dêkin a hnungah chuan ka ding a, ka zam ru tlat bawk si a, a ṭit loh theih loh a ni.

Feet khat velin kan indin hlat a, a rimtui inkah rim chuan hnar a verh zar mai. Nam nasa lutuk a ni miah lo, din hnaih thawkhat hle lo ila chuan ka hre lo vang tih theih khawpin a nâm chêk chek a, mahse chu rim nâm chêk chek chuan ka hnar a verh tlat a nih chu! A pa tê lo mai bawk si a, min hliah hneh em em a, a taksa hnung lam thlir tawp loh chu tih theih a awm tam lo hle. A kamis var hán hakah chuan a tawnzau hak thlâ a lang deuh rûl a, a kamis hak chu body fit deuh reuh hi a ni a, a pian a ṭhain a dar a hlai ṭha deng deng hle. School khata kan kal ho lai kha chuan a lian hran miah lo maw le, tunah erawh a taksa a lianin a pa lian tawh tak zet. 

Darkar chanve dâwn kan din hnu chuan kan hun pawh a rawn inher chhuak ve ta, Jacob-a patea chuan a lei tam ang reng hle a, ka hriat miah lovin ka lo chîk vel thlap a nih chu! An pack sak laiin phone call a dawng a, a kekawr iptê aṭanga a phawrh lai chuan ka lo en kar a, caller ID-ah chuan 'Jacob' tih a inziak kûlh a, an inbiak chhung zawng chuan a la hmanhmawh hmel em em zui. An pack zo chiah tihah a thil lei chu làin a kal nghal daih a, dawr nghaktu kohna pawh a hre tawh lo. Pawisa kir tur kengtunu chuan

"Ṭhiannu, khawngaihin min lo pek sak thei mai ang em? I order chu kan lo pack fel thlap ang, ka awmna hi chhuah mai a harsa si a, i theih chuan ka lawm ngawt ang" tiin min rawn en a, bu zeuhin pawisa chu ka la a, ka lei duh zat ka sawi hnu chuan ka kal ve nghal mai bawk.

Jacob-a patea kalna lamah chuan ka kal phei a, a kal chak ang reng viau zui a, koh mai ka tum lah chuan ka thei der lo leh nghal. A hminga koh ka tum ṭhin a, mahse ka chhung lamah min hnawhtu eng emaw ni a awm tlat si. A hming chu Ephraim-a a ni ngei a, a Mizo hming pawh Malsawmzela a ni a, mahse engati nge ka koh theih si loh? A hnungah chuan a tlanin ka tlan titih a, hlawk zet hian a pen pâwk pawk a, ka ko miau lo bawk nen ani chuan ka zui tih pakhat mah a hre lo. A bike hunna lam chu a thleng ta, muangchang lo fê hian a ṭhu zui nghal a, eng pawh ni se a tlan liam tak tak hma ka koh ngei a ngai a ni. 

"Jacob-a pate" ka ti deuh vak a, ani'n a bike man to hmel zet chu a tirum vut vut a, ka kohna chu a hre lo a ni maithei.

"La kal lo teh, hei.....lukawlh, thil theihnghilh i nei a nia, la kal suh ka tih chû" ka tih leh vak chuan a helmet khum tum pawh a tawp chat a, ka ṭawng ring thawkhat bawk a ni ang footpath-a kal mêk te chuan min en duh hlawm hle. 

"Eng lo....pawisa kir i la lo va, kha la rawh" a bul ka thlen phei rual chuan ka ti nghal zung zung a, ngawi reng hian a lo la ve mai a, chutah tlan chhuak ta mai lo chuan

"Engtin maw min koh a!?" a ti bul deuh hmuk a, a wallet-ah chuan pawisa chu a khung pah bawk a, ka zep lo vang, a wallet chhunga pawisa awm chu tam ka ti ru ngei mai.

"lukawlh ka ti che" ngaihtuah chiang hlei lo chuan ka ti vei râwk a, min melh no leh teh asin, kei paw'n ka ṭawng sual tih ka inhre chhuak nghal.

"Ka sawi awmzia chu eng lo....ka...ka koh tum dan che pawh a ni chiah lo" ka ṭawng han bah nasatzia mai chu ka duh dan a ni bik reng reng lo, chutah zam namên lovin ka la zam zui.

"Ka hming i hria a ni lo'm ni?" mit tizim suna min en chung hian a ti chhumbung deuh hmuk a, a ṭawng dan chu hriat a va han nuam lo ber kher chiang em, a sawi dik lo pawh a ni chuang lo, ka thin a rim hle ringawt. 

"Ka hriat leh hriat loh i hriat a ṭulna ka hre lo, i pawisa kir i lak theihnghilh a, ka lo pe mai che a ni. Lawmthu sawi a hnêkin ka koh danah che ka lungawi lo e te chu i la ti leh nghal a, i hmanhmawh hmel bawk si a, kal thuai thuai rawh" ka ti hmawk hmawk zo chiah chu

"I lo ṭawngthei sâwt hle mai maw ROLUAHPUI?" a rawn ti a nih chu! Zahna nei miah lo hmel hi a la pu leh ta nghal a, ka insum hman ta bik lo. 

"Thu dik sawi apiangte hi ṭawngthei an ni vek kher lo MALSAWMZEL" ka tivin ve deuh hrawk a, za lo tih hriat lutuk hian a kiai suk a, chu ringawt pawh chuan ka thin a tirim thei dawn alawm le. 

"Min be duh a nih chuan ka Sap hming i hriat kha, kha khan min koh tawh ngei ka lo beisei ang" zam hauh lo hian a rawn ti a, a helmet chu khumin a tlan chhuak nghal vut a, a chapo vang hrim hrim pawh chuan tlu reuh se ka ti khawp mai. 

Mood chhe zetin dawr lamah ka lêt leh a, ka eng tih mah a tuitang thei tawh lo. Kan haw lam te chuan Ephraim-a bawk chu ka ngaihtuahnaah a awm leh ngut ngut tawh a, thei ngat ila chuan maw paih chhuah vang vang ka duh, ka duh lutuk tak zet. Khati ang mihring chapo hmel kha ka mitthlaa awm reng turin ka duh lo, lawmthu tak ngial pawh a them paw'n a sawi lo a nih kha le, a chapo thawkhat viau ang tih chu a hriat a ni. Scooty-a ka chuangte chu ka va ngawichawi chiang ém, Chali zawk a ṭawng zeuh zeuh a, kei chu ka thil tawn zawh chiah avangin ka ṭawng châk hlawl lo a ni. 

Lukawlha, ni e, lukawlha ti bakin ka ko dawn reng reng lo. Ka ngaina lo e te chu a ti kual vel a, ka hmingpum ngatin a ni lo'm ni min koh kha!? Ka hming te lah chu a hre rei zêk leh ta nghal a, hre rei pawh ni se a awm tho, lehkha thiam thei leh mi thil hre zau tak kha a ni ve hrim hrim alawm, a duh tâwkin ka hming chu lo hre kumhlun teh se, ka tan hlawkna leh heuna a awm chuang lo êm mai. In ka luh thlengin ka mood a fuh lo tluang zel a, KFC ka ei châkna te pawh tlaia ka thil tawn avang chuan a bo zo vek. 

Zanah erawh ka thinrimna te chu a reh titih a, thil ka ngaihtuah chian hnu chuan ka dik bik lo tih ka hre chhuak bawk a, ka lo ṭawng nasa mah mah deuh chuan ka hria. KFC chu ka room-ah Sprite nen ka ei a, tuverh aṭang thli a rawn thaw lut heuh heuh a, ngaihtuahna a kal ding duh phian. Kan kawm thlang thing din khawn ṭeuhna bul chiaha in ding pakhat chu ka thlir reng a, chu in lian zet chu Ephraim-a te in a ni tih chiang takin ka hria, ka kal tawh tlat. Kan kawm thlang lawka awm angin a lang tak ná a, zu kal dawn erawh chuan kawng a kual thui ang reng viau thung. 

A tukah chuan a ngaite bawkin School-ah ka kal a, period ka la zâwn ngun mawlh mawlh hle a, mahse ka ning chuang lo. Naupangin an ning ang tih ka hlau zawk a, ka class lak dan pawh ni danga lehkha zirtir ang ngawr ngawrin ka kalpui lo va, an thil vei zawng leh nih châk zawngte ka sawipui daih a, Group Discussion ka neihpui a ni deuh ber. Zirlai erawh ka zirtir tho va, an nin thuai loh nân tih tur eng emaw ni ka tihpui leh zauh ṭhin bawk. Jacob-a pawh hma a sawnin a tlangnêl ve tawh em em a, a ruk tak chuan exam hmachhawn ka huphurhpui khawp mai, zir tur a ngah bik dawn bawk si. 

School ban hun a rawn thleng a, naupangho chu an chhuak dam dam a, kan hmanhmawh a nih lem loh chuan zirtirtu te chu naupangte kal liam dûak hnuah chauh kan haw ṭhin a, chu chu kan tlai tin tih dan phung pakhat ve reng a ni. Naupangho an haw kim ta maw tihah kan inzui chhuak ve sap sap a, a ngai te bawkin Chali scooty-ah ka chuang leh a, School gate kan tlan pel chiah chu mi pakhat hian min lo phar ding a, chu pa hmel chu ka hai lo chiang asin, tlan laklawh laia min lo phar ding chu ṭul lo ka ti ru ngei mai.

"Nimin avang khan ka lawm ni rawh se" lawm hmel der chuang si lo hian a rawn ti ringawt a, keimah char char min la en leh ta nghal a, Chali pawh chuan mak a tih hmel kher mai, tlan chhuah nachang a hre lo hial a, ka kheuh vak hnuah a tlan chhuak ve ta chauh.

"Nimin khan in lo inbia a ni maw? In in-classamate ṭhin thu i sawi tawh tak e! Mizoramah a lar bawk si a, ni daih ula ṭhiani" School hlat taka kan tlan hnuah Chali chuan a rawn tifiamthu nghal a, a zakah ka kawm vak a, kan tluk ṭep phah.

"Ka khalh laklawh lai hian min dek ziah suh Roluahpui, kan accident mai tur asin, nâ tawrh i duh zawk em ni?" a rawn ti vin ṭhawt ṭhawt a, kan hnungah mi dang an tlan reng a, a ṭawng ring bawk si nen ṭawng tir loh dan ka ngaihtuah a ni ber.

"Ṭawng tawh suh Chalthansawm, kan hnungah lukawlha te an lo tlan mêk a nia, min lehpel duh der lo leh nghal, min tizak mai dawn" a beng bul cheta ka tih chuan

"Tu lukawlha maw?" a rawn ti lawng lâwng a, ka tih ngaihna hre lo leh zak lutuk chu ka maimitchhing tawp a, Chalthansawmi biak loh law law chu a finthlak zawkin ka hria.

Ephraim-a lah chu kan scooty ke hnung lam zawn velah a tlan char char a, a chang phei chuan kan bul chêtah a rawn tlan ṭhin nghe nghe a, ka zam em em danah min en a ni hrim hrim. A hnungah Jacob-a a phur bawk si, a va han nuam lo duh mai mai tak. Chutah kan veng awmna lam a la inang zel zui a, kan hnungah chuan an tlan reng a, kan in kawt zawnah min lehpel ve chauh. Chali chu a chala nam sawkin ka luhsan hmak a, a lung ni lo leh teh ang chu! Mood off ṭûnin room-ah ka lut a, tukverh hawngin thlang lam ka hawi a, Ephraim-a bawk chu ka zu hmu leh ta, engtin em em nge an zu tlan thlen hman zawk ni! 

Chumi nî tih loh chu kan inhmu lo leh char char a, a hmel ka hmuh châk pawh a ni lo, mahse ka ngaihven ru tlat lawi si chu thil mak ka ti lo thei lo. Thla khatah vawi hnih khat vel bak kan inhmu ngai lo va, a hming paw'n ka ko leh tawh lo hrim hrim. Ni lo, kan inhmu ngai lo ni lovin min hmu ngai lo zawk a ni. Kei chuan ka hmu nitin deuh thaw ziah zawk alawm, khawiah nge a chhuah ve ṭhin ka hre chiah lo va, mahse Jacob-a hruai tur ngawr ngawr chu a nih ka ring lo, a inchei smart zaih zaih thei êm mai. Ka rilru chu nasa takin kawih her ka tum a, awmzia pakhat mah a awm lo thung. 

Thla eng emaw zah hnu chuan hmaichhanah ngei kan inhmu leh hlawl a, parent's teacher's meet-ah a ni nghe nghe a, chumi nîa a thawmhnaw inbel mawlh chu a va inhmeh chungchuang tak em. Mit ṭha lo ang maiin tarmit dum a vuah deuh reng zel a, mahse maw a lukawlh zawng zawng nen chuan a inhmeh lutuk tlat. Kan inhmuh paw'n kan inbe ngai lo va, min buk khum zeuh a, min kal pel mai ṭhin. Hmân aṭang tawh ṭawng tam lo ve tak kha a ni a, mahse a chang hi chuan ka hlau deuh ṭhin, a chhan chu insual a thiam nasa mai si a, awlsam têin min ru bo daih ang tih ka hlau. Chuti ang thil a tih duh rin lohna ka nei leh lawi a, ka rilru chu a inkawkalh nasa thei khawp mai. 

Zan khat chu biak inah kan ṭhu dun alawm le, a mi uap nâ em em lutuk avang chuan ka thaw a chham mai dawnin ka hre hial a, ka zam em em bawk. Jacob-a te department chu biak inah hla remin an zai a, Senior department an ni a, Ephraim-a chu tlai deuhah a rawn lut nghe nghe. Kan venga an rawn awm aṭang thla tam a liam tawh a, mahse khang thla kal ta chhung zawng khan a inkhawm ngai ka hre lo hrim hrim. Ka bula a rawn ṭhutna chhan tak pawh usher khan ka sir ṭhutna ruak ber kher a kawhhmuh a, kei lah amah a ni dawn tih hre lovin ka lo ṭhu ṭha vel a, kan han ṭhu dun chiah chu sawifiah thiam phak bakin ka zam a ni. 

Ka piantirh ata Ephraim-a bul ang em ema ka zam ka neih ka hre lo va, Ngaihsaka nen kan inngaihzawn ṭan chhoh lai vel leh kan inngaihzawn lai vek pawh khan kan infawh paw'n zamna chhe tê ka nei ngai lo, lukawlha erawh hi chu a dan a dang thlawt a ni. Hriat zui vawng vawng theih tur rimtui lah hi a nam chêk chek reuh ziah leh nghal a, amah hi a mak a ni tawp. Ka laka sual a chhuah àwm ka la hre lo va, mahse a chapo ve dawn tih ka chiang, a chhan chu ka hminga min koh hmasak ber paw'n ka hmingpum ngatin a nia min koh ni! 

"Ka ning, min lo call tawh suh, ka number hi delete rang ang che" phone ka pick-up rualin ka ti nghal hmawk hmawk a, tun lai chu Ngaihsaka hnen aṭang phone call ka dawng zing em em a, ka ning hluah hlauh hi a ni tawp. 

"A tawp nân vawi khat chiah inhmu leh ang, a tawp nân tak tak. Khawngaihin rem ti hram rawh, hmangaih viau che mah ila ka kalsan tawh ang che" ka dah hman hlau zet hian a rawn ti thuai thuai a, kha leh chen kha kan lo inzui ve tawh a, min phatsan tih chu hre tho mah ila khawngaihna erawh ka nei lo thei lo. 

"Ni lo Ngaihsak, keini pahnih hian engmah sawi dun tur kan nei tawh lo. Min lo call reng a nih chuan ka pa ka hrilh tawh tak tak ang, ka pa thil tih tum chu i hriat tlang vek ka ring"

"Khawngaihin la dah suh, ka tiam a che. Engkim ka sawi ang, thil nih dan engkim ka hrilh ang che. Chu bak duh ka nei tawh lo, engkim hriat i phu ve a ni" ka ngawi vang vang a, chutah amah bawk chuan 

"Ka lo hruai ang che aw, ka lo kal nghal a ni mai. In in kawtah khan lo awm la, a tawp nân tak tak thil engkim hrilh che ka duh a ni. Ka nu leh pate paw'n hmeichhe dang laka sâwn ka thlak thu leh nautê pian hmaa ka thah thu an hre vek tawh, i bulah inbun ruah ka duh a ni" a rawn tih zawm leh nghal a, khawngaihna chuan min hneh ta nge nge.

"Aw le, lo kal rawh, mahse rei erawh ka chhuak thei lo tih hria ang che" ka tih hnu rei lovah kan inbiakna kan titawp a, chhuak tur chuan ka insiam ve mai a, kan in kawtah a lo thlen hun nghak turin ka chhuak zui nghal bawk. 

Minute tam pawh a ral hmain Ngaihsaka hmel ka hmu thuai a, a rawn thlen hma danah a awm hla vak lo a ni ang. A bike hnung ṭhutnaah chuan lawnin ka ṭhu zui nghal a, kan tlanna lam chu Hlimen lam a ni a, mahse Hlimen penga tlan lut lovin kan tlang tlang ta zawk a, kan inngaihzawn laia kan awm dun ṭhinna hmunah min kalpui dawn a nih ka ring ve hmiah. Kan tlan zel a, kan lo awm dun tawhna ṭhin ngeiah chuan kan ding ta a, bike aṭanga chhukin Ngaihsak chu ka en zeuh zeuh a, a cher ve deuhin ka hria, zû a in nasa a ni maithei. 

"Ka tihpalh" a rawn tih rualin a lam chu ka hawi lêt vat a, bike head light chu a la éng reng a, chu chuan a hmel lungngaih hmel zet chu a tilang chiang hle. 

"Tih palh sawi ngai lovin kan inkawp char char thei reng asin Ngaihsak, mahse engkim i ti chhe vek a ni" tih leh thawk halh chu ka rual nghal a, a ngaite bawk hian

"Ka tihpalh" a rawn ti nawn leh a, ka lama lo kal pheiin min din hnaih ta hle a, chutih lai mêk chuan bike pahnih hi an lo tlan a, Ngaihsaka bike hunna bulah chuan an ding a, an chalah rawmawl sen an la hreng ve ve zui a, ka ngaih a ṭha ta hauh lo mai. 

"Eng vangin nge hemi te pahnih hi an lo kal ve ringawt?" ka ṭawng zo chiah chu ka hmai a ri sawk a, metal road loh chin phulah chuan ka let tûal a, a rang lutuk leh a nâ lutuk chu ṭah nachang pawh ka hre thei lo zawk. 

"Ka tihpalh" ti lehin Ngaihsaka bawk chuan min ṭhut chilh a, ka kawr âwmah ṭhamin min pawt tho va, ka hmaiah tak chuan a rawn hnek ri leh chawrh a, ka hmaia ruh awm zawng zawng chu a tliak vek ni maiin ka hria.

"Min ngaidam rawh, mi dang tan chuan ka phal ngâng lo che, chu vangin zanin hian ser reh thei tawh lo ka hnutchhiah dawn che a ni" a tih chuan ka mittui a baw zawih a, ka ban ka chet theih loh nân ka dar khuar lai chu nâ zetin a hnek leh a, ka ṭe dawn veleh ka hmui a rawn hup nghal vat bawk.

Engkim hre siin engmah ka ti thei lo va, ka rilru chu a va'n nâ ngawih ngawih tak êm. Ngaihsaka chuan ka kawr hak lai leh ka kawr hnuai chu a pawt thler hrâwk a, a hnunga ding mipa pahnih te pawh chuan an kawnghren an lo phelh mawlh mawlh a, thil thleng tur leh thleng mêk chu hre chiang em em mah ila tih theih ka va nei tlem si êm. Ka kekawr lam phelh nghal mai lovin ka âwm bawr chu min tih zauthau tum ni awm fahran hian a sawngbawl a, zauthauna ni lovin hlauhna hlirin min luah khat tawh a, Ngaihsaka thusawi ka lo awih kher kher chu ka inchhir ngawih ngawih a, inchhirin awmzia a nei tawh si lo.

"Bike head light kha off vat r'u" Ngaihsaka ṭawng ri ah chuan ka meng zawk a, thim kara êng de vâ va chu ka hmu zawm zat a, motor ni ngeiin ka hria, a lo tlan hnai tial tial a, mahse vanduai thlak takin a tlan tlang ta daih mai. 

"Khawngaih takin lo let leh rawh" ka rilru chuan ka ti mawlh mawlh a, au chhuak thei ngat ila zawng puihna dilin ka au nasa khawp ang, ka dinhmun erawh a chhe ber a ni tlat bawk si a, ka tan chuan tih theih awm lo tluk a ni ta. 

Ngaihsakan ka kekawr phelh a tum ṭan a, ka Jean kekawr kilhna chu a phelh hman tawh nghe nghe a, mahse kan awmna lama motor lo tlan thawm chuan a chet tawp tir chat thung. Motor chuan chiang lutuk tak mai hian min rawn ên a, min bawhbeh dan zawng zawng leh ka chunga Ngaihsaka te thil tih tum zawng zawng chu a lang ta vek mai. Chak zeta rawn tlanin motor chuan bike pahnih ding lai chu a su per lâwp a, Ngaihsaka ṭhiante pahnih chu tlanchhe lo se chuan a su chiang khawp ang. 

"Mi tlâk tlai lo ho" chu aw chu ka hriat hnu ngei a ni a, mahse tu aw nge ka hre tawh lo, mipa inhrosa thawm a rik zawm nghal a, Ngaihsaka meuh paw'n min delh bet reng thei ta lo e. 

Min delh bet tu an awm tawh lo tak ná a, ka tho ta lem chuang lo va, vana arsi de sep sep chu ka thlir ngawt ngawt a, ka mittui a dir char char bawk. Thawh tum dawn mah ila ka dar nâ lutuk chu ka tho thei dawn chuang lo tih ka hre reng a, ka tum buai duh lo law law a ni. Ka bul lawka thawm chu a bengchheng em em a, pawr taka mipa inhrosa thawm leh an ṭawng ri te, thil ri chawr chawrh ri te, awp hnawk ri te thlengin a inpawlh nuaih a, ka taksa ruak lai khuh tur tak ngial paw'n tha ka hmang thei lo va, ka ban bul leh ka dar inkar chu a nât hian a nâ ngawih ngawih a ni ber. 

"Nang maw!? I ṭha em ROLUAHPUI? Engtin nge a nih theih? Engtin nge hetah daih daih i awm theih?" ka hmingpum ngeia min kotu aw chu nichin lawka aw ri kha a ni tih ka hria, motor light-in a hmel a rawn chhun chiah chu Ephraim-a a lo ni reng a, a hmel ka hmuh chian hnu chuan ka ṭah a chhuak zual sauh bawk.

"Min chhang teh ROLUAHPUI, engtin nge heng mi lâk tlâk loh ho bulah hian i awm ngam zawk?" vin zeta a rawn tih leh chuan chhang lovin ka ṭap ta ringawt a, ka ban ka chet thei bawk si lo nen a va'n hrehawm tak êm. 

"Hrep tak hian!" nêm fahran lova ti leh hrawkin min pawm kang lâwp a, khawiah nge min kalpui dawn ka hre hauh lo, mahse mak tak maiin ka thla erawh a muang em em thung a, min tihnât tumtu te zinga mi a ni lo a ni mahna.

Ka mit chu ka meng diar diar a, ka thil hmuh hmasak ber chu in chung var hân leh ceilling-a light changkang tak a ni a, ka ban bul leh ka dar chu a nâ hle bawk. Thawh mai ka tum chu ka rawl ṭhûm a, ka mutna khum pawh ka khum a ni hauh lo mai. Harsa zetin ka tho chhuak lui ta nge nge a, khum lu lam nghengin ka ṭhu awn zawm zat a, ka vei lama mipa muhil hmel ka hmu thut chu mak ti tak ka ni. Ephraim-a ngei a ni a, khumah ni lovin ṭhutthlengah a ṭhu muhil a, zan lama thil thlengte chu ka ngaihtuah lêt bawk a, min rawn chhantu kha amah a ni tih ka hre chhhuak zui nghal a, ka ṭah chu a chhuak thar em em leh nghal.

"I lo harh tawh a?" min hmuh rualin a rawn ti thuai a, khum bula dawhkan tê chu tauh ri kher lo ila chuan a harh miah lo vang, a ṭhutna aṭanga thovin khum lamah a rawn phei nghal a, min ngaihtuah hmel khawp mai. 

"Thil zawh tur che ka nei, engtin nge nizanah khan kha lai hmun daih daihah i lo awm theih? Mipa pathum bulah leh nghal, min chhang thuai teh" a aw chu min biak hmasak dan nen a inang lo hle.

"Ṭawng ta che ROLUAHPUI, engtin nge khati ang mipa bulah khan i awm ngam zawk? Lo lêt leh lo phei ila chuan pawngsual che an tum a nih kha maw le, i hmel hriat te an ni hrim hrim em?" a rawn ti leh a, thawhhlima hriat atan chuan a va han nuam lo chiang tak. 

"Min pawngsual tumtu ber kha ka bialpa hlui a ni a, a tawp nân thil min hrilh a duh avangin chhuahpuiah min sawm a, khati ang khan a che duh ang tih rin ngaihna ka hre lo a ni" ka ti ve ta nge nge a, ka aw chu a zawi ṭha hle bawk. 

"I bialpa hlui leh nghal, engtin nge i rin leh ngawt theih zawk? Hmeichhia chu fimkhur hle tur asin, nge nang hian khati ang mipa lâk tlâk loh lutuk kha i lo la duh reng zawk?" 

"Min vin reng suh MALSAWMZEL, LUKAWLH, nizana min chhan avang khan ka lawm, mahse min vin char char thei ringawt bik lo. Ka duh dan a nih i ring bik em ni? Pawngsual ka duh ang maw!?" ka ti vin ve ta hrawk a, ka insum thei tawh lo a ni.

"Ngaithla teh, ka thin a rim a ni tih hrethiam lo rual pawh i ni tawh lo ROLUAHPUI" khauh zeta a tih chuan

"Engati nge i lo thinrim ve em em ringawt? Thil ṭul lovah buai suh, buai rual pawh i ni tawh bik lo, kan inah min hruai haw rawh" ka ti lêt nghal tawn tawn a, che phutin min rawn bawh titih a, ka hamhaih lutuk chu ka meng phawk hrâ ringawt.

"Ka thinrim chhan maw!?" ti hniam supin ka hmuiah tak a fawp zui nghal a, a tirah chuan ka meng phawk hle a, mahse ka inhrethiam lo tak zet, min fawh aṭanga rei lovah maimitchhing meuhin ka lo chhang lêt vel a nih chu! 

"Ka hria asin, min hnar dawn lo tih hi ka hria a ni" ka hmui zawna thaw lum ham ham chuan a ti thuk leh raih a, ka meng dawn chiah tihah zei lutuk tak mai hian min fawp zawm nghal a, chuti ang em em chuan infawh a nuam tih pawh ka hre lo. 

"Nang hian min duh chiang a ni, a dik em?" ka sira a mut thlak hnu chuan inring tâwk zet hian a rawn ti a, a laka ka awm dan avang chuan ka inzahpui ngawih ngawih. 

"I hre sual a nih ka ring, mipa duh leh ka tum tawh lo hrim hrim" ka tih laklawh lai chuan

"A rukin min duh hle chu a nih kha le, ka thinrim chhan pawh i hriatthiam tawh ngei ka ring" a lo ti nghal a, duh angin ka ban chet thei ngat ila chuan ka va han beng dawn chiang tak.

"I thinrim chhan chu ka hre lo ni rawh se, ka ban leh ka hmai hi a nâ ang reng viau a, min haw pui theih chuan ka lawm khawp ang" tiin thu dang sawipui ka tum ta zawk a, thil ni lo lô sawi reng chu a ṭul ber lo a ni. 

"Lawmthu pawh min hrilh i tum miah na nge?" a rawn ti daih thung a, ka sawi tawh khan ka hre reng sia, nge a lo hre lo leh pek zawk!

"Nizan avang khan ka lawm e, a tâwk em? Min hruai haw tawh rawh le, ka nu leh pa'n min ngaihtuah tawh khawp ang" 

"Nizana mite kha engtia tih nge i duh? Police hnena report i duh nge awlsam taka chhuah zalen?" a tih chuan ka ṭah a chhuak deuh tet tet nghal a, ka chunga thil rapthlak tak tih tumtute chu chhuah zalen mai ka tum hauh lo. 

"Police hnenah report ka duh, dan ang takin hremna hmu rawh se" ti ṭuauin ka ṭah zawm zat a, a ban tha chak zet chuan a âwmah min pawm bei hle hle a, chungte chuan ka ṭah an tichhuak zual.

"A ṭha e, i duh ang ngei chuan hremna an hmu khawp ang. Ṭap lo teh Puii, ka bula i awm phawt chuan i him ang, engtik lai paw'n i him ang" a ti nghet charh charh a, thlamuang takin ka mit ka chhing vang vang a, engati nge ka ngainat tâk em em ka hre lo a ni. 

Room aṭang chuan min pawm chhuak a, kei pawh ka ṭap tawh lo va, chhuk ka tum pôh leh min pawm nghet ting a ni mai. Jacob-a hmel ka hmu chiah chu zah namên lovin ka zak nghal a, melh pawh ka melh ṭha ngam lo. Pawn kan thlen rualin leiah min nghat a, ka kut erawh a la kai reng thung a, eng thu mah a sawi leh tawh lo bawk. In hnuaia kawngka tê pakhat chu a hawng a, a chhungah chuan Ngaihsaka leh a ṭhiante pahnih ngei mai chu hruiin a lo ṭawn a, min pawngsual tumtu te hmel ka hmu leh chiah chu ka mittui a hnai leh nghal. 

"Ka hmu duh tawh lo" tiin chhuah ka tum a, lukawlha chuan min chhuahpui ve nghal mai bawk a, a kut leh lamin phone a phawrh a, a hmel hriat ni ngei tur hi a be mawlh mawlh a, an inbiak dan aṭang a mi biak mêk chu police a nih ka ring. 

"Kan kal thei e" ti leh motor inhunna lama min kaih phei a rual nghal a, min tih dan leh min biak dan vel chu ka hrethiam chiah lo, min ngaihzawng chei nghal em em ringawt a, mahse kei chuan ngaihzawng han nei leh ka ngam tawh lo nasa mai bawk si.

Inring tâwk tak khan amah ka duh angah a ngai hmiah a, a thusawi chu dik chiah lo mah se ka haw thei chuang miah lo. Ka ṭah laia min koh dan mawlh kha mak ka la ti reng, ka chhungte zawng zawng paw'n 'Puii' min ti ngai lo, mahse lukawlha ve thung chuan min ko tlat a, a dangdai ka ti ang reng hle. Kan in lam pana kan tlan chhung zawngin kan inbe lo va, ka kut pawh a rawn chelh tawh lo bawk. Ka ngaihtuahna ka kawm melh melh a, engkim chu a mak vel vek a ni. Enga mah hmaa inzuam tir nghal ka tum lo va, min fawh avang leh a fawhna ka chhan lêt khanglang avang khan a zuam theiha awm ka tum lo bur.

(End of Part II)