EPHRAIM MALSAWMZELA (LUKAWLHA) By Havali Adam (PART IV)

EPHRAIM MALSAWMZELA (LUKAWLHA)

By

Havali Adam

Last Part IV

Rei ṭap lovin ka dinna ngaiah ka ding reng a, Ephraim-a pawh ka hlat deuh takah a ding ngawi run a, Jacob-a chu a thi ang tih mawlh ka hlau a ni. Mittui vanga ka biang huh deuh pur chu ka nuai tawk a, ka phone ka phawrh tur te chu ka tha a khur vek thei hial. Ka nute biak ka tum laiin Chali leh ka thawhpuite an lo thleng a, kan tlan chak bawk a ni ang kan thleng rual lo nasa hle. Ka nu chu phawsawlh deuhin thil thlen dan ka hrilh thuak thuak a, ka mangang hlauthawng lutuk chu ka aw a khur vek a, Chali min ṭawng thlamuanna te chu ka tan engmah a ni lo, ka hlauthawnna pakhat mah a kiam lo bawk. 

Ephraim-a chuan a chhungte lam a hrilh ve nghal mawlh mawlh a, chuti ang em ema a buai hmel chu ka la hmu lo. Rei pawh rial lovin a nu leh pate an rawn thleng vat a, a nu zawk chu a ṭap titih nghal a, a tua te mah chu kan awm a nuam lo a ni. Kan principal thlengin kan awm kim ṭhap a, minute 15 hnu velah ka nu leh pa an lo thleng ve bawk a, Doctor lo chhuah hun kan ngaichang ṭhap a ni ber. Thil thlen dan min zawt leh zauh ṭhin a, ka sawi thei lo, ka sawi thei thlawt lo. Ka kâ a chilh a, Ephraim-a zawk an zawh lahin a ngawi run bawk si. Chali chuan a hmuh ang ang a sawi a, a sawi kim thawkhat viauin ka hria. 

Darkar chuang kan din hnu chuan Doctor hmel kan hmu ta, mahse a thusawi erawhin min va tinâ si êm. Doctor chuan Jacob-a an chhan hman ngâng loh thu a sawi a nih chu! Ephraim-a chu vawi leh khatah a rawn au vak a, kawngka tlawh hawng pawpin room chhungah a kal lut zui nghal a, mi dangin kan zui zawm zat bawk a, Jacob-a hmel ka hmu leh chiah chu ka ṭap leh ta nge nge. Ephraim-an a auh mawlh mawlh paw'n a rawn harh thei tawh lo va, che lovin a ngawi reng a, a mit a chhing nghet tlat bawk a, mitthi a ni tawh tih chu hai rûal a ni lo. Ephraim-a chuan thinrim zeta min en chung hian

"ROLUAHPUI!" a rawn ti vin hrawk a, a mitmengah chuan min mawhpuh tih chiang takin ka hria, mawhpuh awm reng pawh ka ni e, ka hmanrua la tur khan lo tir lo ila zawng a che sual lo ang a, a thi lo bawk ang, mahse tunah chuan keimah avangin, keimah vang ngeiin a thi tawh a ni. 

Jacob-a an zalhna room aṭang chuan ka tlan chhuak thuai a, ka awm reina chi niin ka hre ta lo. Ka awm reng a nih chuan Ephraim-a khan min that nghal duh mai ang. Hospital kawt ka thlen rualin Taxi-ah ka chuang lut thuai thuai a, kan veng lamah ka tlan tir nghal a, ka room ka lut chiah chu ka ṭap chhuak ta hawm hawm. Room kawngka chu ka nu'n a rawn chum dawt dawt a, hawng turin min ti bawk a, mahse ka hawng dawn teuh lo, tualthattu ka ni tih ka inhriatna chuan min tinâ ngawih ngawih. Ka pa aw ka hre leh a, mahse hawn ka tum ka chuang lo, hun kal tawha kir leh ka châk tak zet.

Tualthattu! Chu thu ka bengah a ri mawlh mawlh a, eng ang paw'n inthiam lo mah ila keimah avangin a thi miau a, thlak danglam theih a ni tawh lo. Ka mangang leh rilru buai lutuk chu awm ngaihna ka hre lo va, ka rilru leh mitthlaah Jacob-a che sual lai a lang zut zut bawk a, ngaihtuah loh ka tum paw'n awmzia a awm chuang lo.Thawm chu a reh tlawk tlawk a, chu zan chuan ka tlaivar chiang hle. Zing lamah mahni inthiam loh lutuk avangin ka ṭap leh hram a, ka ṭap nasa bawk a ni ang ka mit a bui vek a, zing lamah erawh zan ang em emin ka awm ta lo. 

Inthiam lohna hlirin ka khat a, tukṭhuan ei laiin ka pa'n awm dan thiam turin min hrilh a, Jacob-a vuinaa kan kal ngei tur thu a sawi bawk. Ka nu pawh chuti tho, min hnem a, ka thiam loh a nih loh thu leh vanduai palh vang liau liaua thihna thleng a ni tih min hrilh mawlh mawlh a, ka nu thusawite chu hre ve teh mah ila ka hre rei thei thlawt lo. Ka ṭap tawh êm lo va, ka rilru lam a buaiin ka inchhir em em thung. Jacob-a vuina hunserh kan hman lai te chuan ka kun ngul a, tum loh deuhin Ephraim-a chu ka va hmu fuh a, min lo en chiang khawp mai. 

Tualthattu ah min puh se, police min man tir ta pawh ni se pawi tihna pakhat mah ka nei lo. A awm hliah hliah zawk, keimah avanga thi a ni a,  tualthat tluk ka ni! Zanah Ephraim-a nu leh pa an lo lêng a, keimah chu a rawn lên chhan ber a ni. Sitting room-ah kan ṭhu ṭhap a, thil chi hrang hrang min sawipui a, inthiam lohna nei lo tur te'n min hrilh nghe nghe. Jacob-a chu an fapa naupang zawk sipai ni ṭhin, vanduaina avanga thi ta fa a nih thu te, a pian tirh deuh thaw aṭanga Ephraim-an a enkawl seilen thu te, Jacob-a nu thih dan thlengin engkim an sawi chhuak vek a, ka chungah thinrim tawp khawk mah se Ephraim-a chu dem thei ka ni lo hrim hrim. 

Kâr a ral a, ka hna lamah ka kal chhunzawm tawh lo va, kan principal paw'n thla khat chhung chawlh min pe ta tawp. Hahdama ngaihṭhat a hnékin ka awm a nuam lo zual tulh tulh a, mut theih loh châng pawh ka ngah ta mai. Kâr mai ni lo thla a'n vei leh meuh chuan ka hnathawh lai bànsan turin thu tlukna ka siam ta tawp, school-a ka thawk reng a nih chuan naupang dangin nunna an chân leh mai ka hlauh vang a ni. Ni e, ka hlau tak zet, keimah leh keimah chu vanduainaah ka inngai lo thei lo. Ka bâng tak ná a, kan principal erawh kan inah te a rawn kal phah a, vawi tam thawk leh tura min tih paw'n ka ngaihdan chu sawh sawn ka tum tawh chuang lo. 

Ephraim-a pate'n ka bâng tih an hre chiah chu an rawn lêng nghal a, anmahni zawk an inthiam lo va, thawk leh tur te'n min ti bawk a, mahse kei chuan thawh ka tum tawh lo bur thung. Chali meuh pawh vawi tam kan inah a rawn kal a, school-a thawk leh turin min ti reng a, a tawpah erawh ka ṭhian ṭha ber pawh a beidawng ta ringawt. High school naupang awm rual vel ka hmuh te hian Jacob-a ka hre chhuak zel a, ka rilru chu a nâ thar vawng vawng ṭhin. Tlai khat ka beidawng lutuk leh Jacob-a thihna avanga ka inthiam lo lutuk chu u Mama ka be tawp a, ka ṭap a, an bula awm ka dil zui nghe nghe a, ka dil nî chuan

"I awm peih tak tak ang maw? Aizawl nen a inang lo teh asin, mahse i duh phawt chuan i lo awm thei ang" a rawn ti dam dap a, an awmna chu thingtlang khua a ni tih ka hria alawm, boruak thlengin a danglam dawn tih ka hria, kei chuan awm bo vang vang ka duh tlat si a ni. 

School-ah ka thawk tawh lo bawk nen ka nu leh pa paw'n u Mama te chhungkaw bula hun hman chu an phal ve mai a, Sumo-a kal ka tum viau ná a, u Mama zawkin min rawn lam thlap a, kan inhmuh tirh chuan insum viau mah ila ka ṭap leh ta hawm hawm. Ka nâ ve êm asin, ka inzahpui bawk. Khaw chhung kan thleng a, thingtlang khua mah ni se pastor quarter erawh a changtlung phian a, u Mama chu pastor a ni bawk nen khaw chhung mite'n an ngaisang hle. Room pahnih a awm ve lêm loh avangin ṭhutthlengah ka mu mai zel a, nuam lo pawh ka ti em em chuang lo.

Zantin Pathian thu hmangin u Mama chuan min fuih ṭhin a, ka rilru puthmang thlaka inthiam lohna nei tawh lo tur te'n min hrilh bawk a, a nupui u Châmi paw'n min khawngaih thei hle. Rilru lama hma ka sawn theih nân min pui nasa dun em em a, an fate pawh an bang chuang lo. Ka ngaina a, ka duat a, anni paw'n min ngaina hle. Kohhran school-ah an kal ve a, loh theih lovin Jacob-a bawk ka hre chhuak leh ṭhin. Ani kha chu a fel reuh asin le, mi te kha a nêl em em a, kei tak paw'n ka nêl thuai a nih kha! 

U Mama te chhungkaw bula thla eng emaw zah ka awm hnu chuan zawi zawiin ka rilru pawh a pangngai chho ṭan a, min fuih nasa nupa ve êm bawk a ni. Ka ṭhat loh hlauvin, hma ka sawn loh hlauvin, engkimah min buaipui a, thu ṭha tinreng min hrilh a, ka pangngai har ngâwt zawk alawm le. Nitin u Châmi nen kan inkawm a, in kan tifel dun bawk a, u Mâma erawh kohhran committee leh eng eng emaw ni ah a chhuak zauh zauh a, a chang leh zû ruite a buaipui thùl, a hna chu tlin ka ti zawk hle.

Tlai khaw hnua BD zir leh kha a ni a, awlsam takin a tling nghal mai a, Pathian remruat a ni ngei ang. Pastor nih tumin a'n bei chho zel a, a kawng chu mi dang ang lo takin a tlang zung zung a, pro pastor a nih laiin Pathianin nupui ṭha tak a pe hial a, ngaihzawng pawh nei ngai mang lovin nupui a'n nei thut kha chu a ṭhiante ngei paw'n mak an ti teh e. U Châmi nen hian thla 5 an inzui tlin ka ring lo, mahse an inhmangaih hman em em tho va, a ṭhiante phei chuan ngaihzawng a nei tih an inneih dawn thla khat la awmah an hre ve chauh nghe nghe.

Thla 5 lai chu u Mama te bulah ka awm ve ta reng mai, nuam ka ti phian a, u Mama paw'n mak a ti viau. Aizawla kan in nen chuan inthlau tak a ni a, a boruak leh a mi chenga te pawh inthlau tak an ni a, Aizawlah awm lo vang vang mah ila ka nute nen erawh phone-in kan inbe ziah tho. Inkhawm zan apiangin ka inkhawm ziah a, a tirah kha chuan u Maman min hruai lui ṭhin a, khang hun lai kha chuan pawnah pawh ka chhuak ngai lo. Khaw chhung mite'n u Mama nau ka ni tih an hre thuai a, kohhran upa thlengin an rawn lêng lut fô va, mi thar an lawm thiam hle a nih kha le. 

Kawng leh lam zawng tak chuan a hahdam thlak ang reng ka ti, u Châmi paw'n pastor nupui nih chu kawng ṭhenkhata a hahdam thlak thu te, thau a awl thute min hrilh a, a sawi dik chiah. Synod inkaihhruaina aṭang pastor nupuiin hna a neih a thiang bawk si lo, chu bakah khaw nghet nei lo tluk an ni a, ram emaw te han nei dawn se term dangah an insawn leh daih emaw te kha a ni ang a, a pawimawh ber leh an awm chhan ber chu Pathian thu hrila awm a ni tawp mai. Heti ang lam kawngah chuan u Mama hi chu ka fak ve thlawt, kei chang ni lovin khawtlang mipui pawh hian an fak hlawm khawp mai.

Vawi khat phei chu zan rei tak thleng kan titi a, thil chi hrang hrang kan sawi dun a, a hna thawh lai mêk Pastor lam kaihhnawih thlengin a sawi a, sawi dik loh pakhat mah a neiin ka hre lo. A sawi dan chuan mi ṭhenkhatin pastor hna; Pathian rawngbawlna leh hna zahawm a nih piah lama hna namai lo tak chu eizawnna emaw an ti tawh a nih hmel a, a bikin khawpui ṭhalaite zingah a la ni zui. A ṭha lo lam a sawi ṭeuh rualin mi fel tam tak an awm tho thute, missionary hlawh leh pastor hlawh khaikhin ching an awm thute a sawi zel a, ka rin aiin u Mama chuan a hre zau daih. 

Pastor a nihna khua hi thingtlang kil khawr bet ve lutuk tak mai hi a ni a, a thingtlang viau e ti lo chuan engkim a changtlungin khawtlang mipuite an intodelh hlawm em em thung. Tin, thing leh mau a la awm thluah a, ramngaw tia sawi tur hmun a tam hle bawk. Khaw bul lawka tlâng karah te chuan tui khawh thla a awm ṭhin a, ruah a sur changte hian a ri thla hawk hawk zel. Chu mai a ni lo, khawpui ang lo takin tlangte chu a la ngaw ṭha em em a, thli a thawt nât deuh te hian mau ho chu an thle ri suau suau ṭhin a, in chhung tukverh aṭang ka thlir dauh dauh zel. 

Thingtlang tih takah current erawh a awm ṭha mawh khawp a, a bikin zan lama awm loh a ching a, u Mama hian chhuna phone charge full lâwk vek turin min hrilh ziah bawk. U Mama te chhungkaw bula ka awm chu an fate paw'n an ṭangkaipui phian a, mathematics leh subject dang ka zirtir thei vek a, a kuma kum school-a lo thawk ve tawh ka nih avangin naupang zirtir chu nuam ka ti leh ta viau a, ka unaupa fate an nih vang te pawh a ni maithei. Mi ṭhenkhat phei chuan kohhran school-a thawk daih turin min lo duh a ni awm a, u Maman min hrilh leh vek a, mahse kei chuan engtikah mah zirtirtu hna thawh leh ka tum tawh lo a ni. 

Krismas thla kan thleng a, ka pate'n min ngaih tawh thu leh an bula hun hmang leh tawh turin min rawn chah a, ka chhuk ve mai bawk. Ka chhuk nî chuan ka lung a lêng nghal em em a, kum lai hawl vela chhoh leh chu ka tum ruh khawp mai. Aizawl ka thleng thla chiah chu boruak a dang zar a, thla eng emaw zah ka lo awm sil tawhna thingtlang nen chuan inang lo tak a ni. Kum dang ang lo takin Krismas boruak vel chu ka thêngtháwngah a thawk lo hle a, Chali pawh a rawn lêng a rawn lêng leh tawh bawk a, mahse chhuahpuia min sawm paw'n ka peih lo zel ṭhin. 

Kum tawp kan hnaih tial tial a, kum thar hman thlen ka châk telh telh a, u Mama te bula awm leh daih ka châk vang a ni pakhat. Zan khat chu Chalin lêng turin min sawm ngawrh zual em em a, ka nu leh pa lah chuan an lo phal nasa mai si a, peih lo ru zetin ka chhuak ve ta tawp. A scooty-in khaw chhung chei mawi hrang hrang chu kan fang kual a, mi chhuak pawh an lo tam khawp mai. Chutah le, ka tum loh lutukin Ephraim-a ka hmu ta, mahse amah maiin a ni hauh lo. A bulah chuan hmeichhe pakhat a ṭawng siam siam a, an inngainat tawn hmel hle bawk.

Chali paw'n a hmu thut a, min ngaihtuah tih hriat takin haw a rawt nghal a, mahse Ephraim-a zawk chuan min rawn hmu hman ta hlauh mai. Kan lam pana a lo kal lai chuan kan tlan chhuak nghal vat a, min umzui ta lêm lo. Ka rilru chu a nâ em em a, zep lovah chuan hmeichhe dang nen an awm dun chiah kha chu ka thik lutuk, ka thinlung aṭanga ka vawm bo tawh emaw ka tih ka hmangaihna te chuan thar an rawn thawh leh a, ka lêng chhuak kher kher chu ka inchhir tak zet. U Mama te bula ka awm lai khan Ephraim-a chu ka lo hmangaih hman tih ka inhre chhuak a, mahse theihnghilh tumin ka bei ngar ngar thung. 

Kum thar nî chuan kan chhûngin kan inkhawm a, loh theih lovin Ephraim-a bawk chu ka hmu leh ta. An ṭhutna aṭang min rawn en reng tih ka hria, ka zat mer mer danah ka hre chiang lutuk tlat. Vawi khat mah a lam ka hawi lo va, ka nu erawh Ephraim-a te ṭhutna lên lamah a hawi phei zauh zauh a, kei chuan ka mit ka chhing vang vang tawp. Chu bak tih theih ka nei lo alawm, ka hmangaih chuan min hua a, keimah avanga a tupa a thih avangin min haw ngawih ngawih a, hmân ang bawk khan ka dem lo e. Ni lo, dem thei ka ni lo zawk maw le, hmangaih duh lo teh mah ila ka lo hmangaih hman miau tawh bawk si a, a hnaiha awm loh law law chu ka tan a ṭha zawk a ni.

Kâr te chu a liam a, kum thar pawh kan hmang zo leh ta. Inah awmin thawmhnaw suk ngai ho chu ka su a, khawpuiah hi chuan insuk a awlsam bik khawp mai. Washing Machine kan hmang mai a, u Mama te bula ka awm lai kha chuan kut ngeiin tuikhurah kan insu ṭhin a nih kha! Ding zeta thil ngaihtuahin washing machine bulah chuan ka ding a, spin chiah a ngai tawh a, ka hmanhmawh lem lo. Rei lovah thawmhnaw te chu phawrh theihin a awm ta rèng a, la chhuakin pawna zar tur chuan ka kal zui nghal a, mahse kawngka bula lo ding reng hmel chuan min va ṭhawng chiang êm. 

"Puii" a aw chu a thum ṭial deuh ruih a, aw kî sâng lam ai mahin aw kî hniam lam a páwl zawk mah a, kei erawh amah en tlawk tlawkin ka ding ngawi reng a, chawp leh chilha har chhuak thutin ka hawi sawn leh vat thung. 

"Puii" insuk pho tura chhuah ka tum lai chuan a rawn ti leh a, din loh theih lovin ka ban rêkah a rawn chelh a, ka thin a rim viau dawn a, thinrim thei ka ni lo tih ka inhre chhuak hman hram. 

"Min thlah rawh le" ka ti dam diai a, a hmel en tawh lovin ka kut a chelhna chu ka en kar a, muangchang hian a thlah riai riai a, thawm aṭang leh a rim aṭang min zui zel tih ka hria, mahse ani leh kei chu inhnaih thei kan ni tawh lo.

"Ka tihpalh" ka insuk pho lai ka tawp chat a, lungngaih hmel zet hian min lo en reng a, a hmelah inchhir hmel awm ang tak ka hmu bawk a, mahse chu zawng ka hmu sual a nih ka ring. 

"Ka tihpalh Puii, ka tihpalh tak zet" a tih leh chuan a lam hawi zawngin ka inher a, intihuaisen chawpin ka chhoh melh râl a, a lungngai hmel mawlh chuan ka lai a chhun chiang hle.

"Keimah zawk hi ngaihdamna thu leh tihpalh thu sawi tur ka ni alawm, ka ngaihtuahna ka hmang lo leh ṭhin a, min hrethiam rawh. Jacob-a thihna avang khan ka tihpalh, min ngaidam thei lo a nih paw'n ka dem lo che a nia, police hnenah min report pawh ni la ka pawm vek aw" ka sawi zo chiah chu ka hmui ka pet fan fan a, ka va'n ṭap chhuak teuh em. 

"Ni lo Puii, ka tihpalh tak zet a ni. Police hnena report maw!? Chuti ang lam engmah ka ngaihtuah lo, a chhan chu tihsual i nei lo alawm, nangmah inthiam loh reng rengin hun hmang tawh suh" ka kal sawn tur chu ka hnung lam aṭangin min rawn kuah a, ka sa chhuak vekin ka hria. 

"I hre dik lo, tihsual ka nei chiang a ni. Jacob-a kha! Ani kha! Ka hmanrua la turin tir lo ila chuan a thi lo vang, chu chu nang paw'n i hria, min haw em em bawk. A pawi lo, min haw rawh, min haw mawlh mawlh rawh, ka phu tâwk chiah a ni" ṭah chhuak em ema ka tih zuah zuah chuan

"Engtikah mah ka haw ngai lo ang che, haw tur chein dikna ka nei lo bawk" a lo ti nghal vat a, min kuahna a ban chu ka nawr tawlh a, ka kal sawn tur min kawih her rualin lu ka thing niah niah a, insuk pawh zar chhunzawm lovin in chhungah ka lut ta daih. 

"Puii, min luh tir teh. Ka tihpalh, khang hun lai kha chuan ka inthun hman ngâng lo a ni. Kawngka hi lo hawng la, inbia ang, ṭha takin thil sawi dun ang" ka room kawngka chum ri dawt dawt pahin a rawn ti mawlh mawlh a, ka lo hmangaih hman kher kher chu a pawi ka tihnuhnawh tak zet. 

"Inhmu tawh lo ang, haw zawk rawh, kan inah hian lo kal tawh suh, i hmuha i biak reng tlâk pawh ka nih loh hi!" ka ṭawng zo chiah chu ka ṭap chhuak ta nge nge. 

"Khati ang zawng kha chuan ngai lûl lo teh Puii, i awm dan hian ka thinlung a tinâ a, keimah leh keimah ka indem bawk a, engkim hi ka thiam loh vek zawk a ni" a ṭawng ri chu ka hre reng a, ka ṭap thawm a hriat loh nân lukhamah ka ṭap ngawt ngawt bawk. 

Thawm chu a reh ta vang vang a, kawngka chum dawt dawt ri leh ṭawng ri pawh a awm tawh lo va, zalen takin ka ṭap chhuak ta hawm hawm. Ka ṭah chhan chu a inpawlh nûaih a, keimah ni lo hmeichhe dang a lo neih leh hman tawh vang te, Jacob-a thihnaa ka inhnamhnawih vang te leh indemna hlira ka khah avang te'n ka ṭap a ni ber a, ka âwm chu a tawt em em bawk. Duh tâwka ka ṭah hnu chuan ka inphih fai a, insuk pho chhunzawm tura ka chhuak chiah chu kan sitting room-ah a lo la ṭhu reng tih ka hmu nghal a, mak ti tak ka ni. 

Awm lo ang maia ngaiin pawnah ka chhuak a, insuk te chu ka pho mial mial a, ani erawh ka bulah a rawn kal ve zel thung. A ṭawng tawh lo va, a rilrua awm ka hre lo bawk a, a hmel te phei chu ka en tawh lo hrim hrim. Ṭah tawh lo ka tum bur a, a puitlin loh thlak ka ti hnuhnawh ziah leh nghal a, mahse ka ṭah a chhuah tak tak hi chuan ka insum thei ngai chuang lo. In chhunga ka luhin a lo lut ve zel a, pawna ka chhuahin a lo chhuak ve leh zel bawk a, a tawpa tawpah chuan ka ning ve ta. 

"Engati nge heti ang hian i awm? Haw ta che, min rawn hmuh tum tawh suh. I tan engmah ka ni lo va, ka tan engmah i ni bawk lo. Keini pahnih hian inzawmna kan nei tawh lo, chu chu thil nih dan dik tak a ni" ka ti hlawk hlawk tak ná a, keimah leh keimah ka inhau rilru zui nghal mawlh mawlh a, dawt ka sawi chiang ve ém a ni.

"Aw le" tih chauh sawiin a chhuak vut a, Ephraim-a chu ka khawngaihin ka hmangaih tak zet, a hmelah khan tlawm inti hmel chiang takin ka hmu a, ka ṭawngkam ni se hriat a nuam mawlh si lo, ani ang mipa thu duh tan chuan thinrim loh a har ngawt ang. 

Ka nâ lo bik lo, ka nâ em em zawk, mahse ka hnar a ngai tlat si a ni. Keimah avangin Jacob-an thihna hial a tâwk a, engtin nge chuti chung chuan ka hmangaih anga min hmangaih theih ang nì, ni lo, ani chuan engtikah mah min hmangaih ve ngai dawn lo tih ka chiang a ni. A mi huat em em leh thah châk em em kha ka ni miau a, thi daih mah ila pawi a ti tawp nâng. Ka lo hmangaih em em hman tawh chu a pawi ta ber mai, hmangaihna hi zawng hriatthiam a va'n har teh lûl êm. Kan duh hûn hunah kan hmangaihna kan pawt danglamin kan tikiam thei bawk si lo, Ephraim-a ka hmangaihna chu a hmasa ber leh a tawp ber ni se, hmangaih nei leh ngai tawh lo turin thu tlukna ka siam fel ta. 

Nitin zantin inah ka awm ngawt ngawt a, hna ka nei tawh bawk si lo nen in chhung khur sekrek tih loh chu chetna tur a vâng thei hle. Han tei harh chang chu ka nei tho va, mahse kan in hlatah ka kal thui ngai lém chuang lo. Ka rilru leh ngaihtuahna aṭang Ephraim-a chu paih chhuah ka tum ngar ngar a, ka va'n bei nasa tehreng êm, mahse ka hlawhchham ta ṭhak. Zirtirtu hna thawhna tur school ka hmu nual a, duh chuan ka thawk nghal thei bawk a, ka rilru erawh a la pangngai reng thung. Ka hna hmuh te chu ka hnar zel a, ka dil pawh a ni chiah hlawm lo, Chali leh ka nu min dilsak a ni hlawm tlangpui.

Thla a liam a, Ephraim-a pawh a reh ta vang vang a, hmangaih viau mah ila a pawi lo zawk, ngaina lutuk ang maiin min vehthlem reng se chu thil a ti harsa zual mai mai. Hun te chuan kei pawh min tidanglam a, ka thil thlir dan te, ka ngaihtuah dan leh ka nunphung hrim hrim chu zawi zâwiin a pangngai chho tial tial a, chuti anga ka awm chhanah chuan u Mama te nupa an tel chiang a ni. Aizawlah awm leh tawh mah ila phone kaltlangin kan inbe fô va, hmasawn taka ka nun theih nân min fuih awl lo bawk a, tunah chuan a tir ang em emin Jacob-a thihna avang chuan inthiam lohna ka nei tawh bik lo. Ka thaw a veng sawt phah chuang hlei lo va, ka hringnun chu rilru hrisel tak pu chunga hman ka duh tawh zawk a ni. 

"Awi! Hei! Min thlah rawh, min thlah nghal rawh" ka ti vin tuar tuar a, a banah ka chum sawk sawk a, mahse awmzia pakhat mah a awm lo. 

"In in lamah lêtsan rawh, ka thlah thei" kei ni lovin Chali zawk en chhuk run chuan a ti ram hmuk a, nghet taka ka ban vuantu EPHRAIM MALSAWMZELA ka huat dan chu pui tak a ni.

"Min thlah nghal rawh MALSAWMZEL!" ka ti vin hlar a, engah mah ngai lovin motor-ah min nawr lut a, thla tam liam hnuaah a rawn lang thut a, chutah a uitê chawm lai ang maiin a duh dûha min tih kual a tum leh ta nghal a, ka ngaihdan erawh a ni lo nasa. 

"Ka chhuk duh" ka tih pawh chuan ngawi reng hian a khalh mial mial a, a tlan chak phian a, kan chet sual ka hlau hnuhnawh bawk nen ka ṭawng rei ngam lo hrim hrim. 

Kan din chuan kan awmna hmun chu ka hre der lo, motor light-in kan hma a én lang rût a, chu chauh chu êng awm chhun a ni mai. Ka hmuh thiam dan ber chuan kan hma lawk chu kawng tawp a ang ka ti, metal road a ni tawh bawk si lo, thil hram ri te chu ka hlau ru lek lêk a ni. Motor aṭang chuan a chhuak hmasa a, ka ṭhutna bul kawngka chu a rawn hawng a, min pawt chhuak sawk sawk a, a chet danin min tihamhaih lutuk chu ka ngawi tawp a, amah ka en chho kar ringawt. Êng awmna laiah chuan dingin kan inhmachhawn ta ran a, eng pawh sawi rawh se, ka tan thil ṭangkai a nih ka ring hlawl lo.

"Thil sawi duh ka nei" a tih rualin a hmai a ri thlawrh a, hmeichhia ka nih vang maia min tham lo chu ka la nâ a, a duh dûha tih kual theih ka ni tawh lo tih hre bawk se ka duh hle. 

"Min hruai haw nghal lo a nih chuan ka pa ka phone dawn a nia" inring tâwk tak anga lan ka tum a, a ruka ka khurh nasatzia erawh hmuh hmaih hram se ka ti, chuti lo zawng min zuam leh sawt dawn tih ka chiang. 

"Hrep tak che hian! Min vau khanglang suh ROLUAHPUI! I duh leh i pa chu vawi tam pawh phone rawh, kei leh nang hi kan awm hrang leh tawh lo ang. Engtikah mah kan awm hrang tawh tur a ni lo, he thilah kher hi chuan i pa paw'n min dan zawh ka ring lo" a ṭawng tir lam vinin thinrim hle mah se a tawp lam erawh a dam daih thung. 

"Min hrethiam teh Puii, ka insum hman lo ṭhin a ni e. Nang chân leh che hi ka hlau em em a, Jacob-a thihnain min ṭhawn lutuk avanga i chunga ka chet danah khan min ngaidam mawlh teh, min ngaidam thei a ni ngat chuan hma hun êng tak kan neih ngei ka ring" amah bawkin a rawn tih leh chuan a thusawi awmzia nei nuaih chu ka hrethiam leh ta hauh lo mai.

"Keini pahnih hian eng hma hun êng mah kan nei lo, min hruai haw nghal rawh" ka ti vin hlawk hlawk a, inchhir hmel fêa min en te chu ka haw vek tawh, Chali birthday lawmnaa ka lo kal ve kher kher chu pawi ka ti hnuhnawh hle bawk. 

"Ka hmangaih che" chu thu a rawn sawi chiah chu thawm dang zawng zawng a reh vekin ka hria, har chhuakin ka lu ka thing nawk nawk a, dawt bak a sawi tawp lo ang a, ani hian min hmangaih lûl lo ang e.

"Ka hmangaih che Puii, awm hrang tawh lo ang, a hrehawm ém mai. Ka chapo tih ka hria, ka rawn ngaihven duh lo lui tlat che a, mahse tunah chuan ka thei tawh lo. Ka chapona zawng zawng hneh thei tur khawpin ka hmangaihna che a chak tâwk a, thup reng ka tum tawh lo bawk" a tih leh chuan

"MALSAWMZEL!" ka ti vin tûarh a, min rawn hnaih chilh nghal thuai a, ka inrin hma hauhin a lamah min pawt a, min fawp ngawng ngawng a, a hmui a tih chet dan leh min fawh dan chu hmân ang bawk khan a nghawng a la nâ em em a, nam sawn mai bakah ka rilru leh taksa thunun ka tum paw'n awmzia a awm lo chiang hle.

"Ka hmangaih che Puii, kei leh nang inkarah hian thil hriatthiam loh awm tawh lo se, Jacob-a thihna avangin nangmah leh nangmah indem tawh suh, indem tawh ngai suh. A bul chu keimah ka ni, keima thiam loh vek zawk a ni" ka hmai zawna thaw lum ham ham hian a ti a, ka mittui te chu ka biangah a luang ngiai ngiai a, min rawn fawp leh chiah chu ka nâ zawng zawng a dam chhuak vek hialin ka hria.

"Ni lo, keini hi inkawp tawh lo zawk ang, engkim a buai leh a ni mai. Inhmu tawh lo vang vang ila, kan intheihnghilh ve mai ang, chu chu kan pahnih tana thil ṭha ber a ni" ka ti sêp sep a, leiah kan ṭhu dun tlawng a, a kap kara ka ṭhut bakah ka hnung lam aṭang min kuah run bawk. 

"I duh dûh sawi la, i duh tâwkin min hau la, min án khum bawrh bawrh rawh, mahse nang ka hmangaihna che hi chu a kiam tawh lo ang. A chhan chu ka hmangaihna che hi a satliah lo, satliah lo tak a ni" thum dam dap hian a ti hniam bûl bul a, a lam hawi zawngin ka hawi chho ta nge nge. 

"Ephraim" ti sepin a mitah tak ka en ran a, a biang leh hmui hmul te chu ka kutin ka khawih niap niap a, khang kan inhmuh loh chhung zawng khan a lo inenkawl uluk bik lo a ni mahna. 

"I mitmenga ka thil hmuh hi dawt nge thutak Puii? Sawi mawlh teh, ka hmu sual em? Ka hmu sual lo ti raw?" hamhaih hmel tak chuan a ti mawlh mawlh a, a hma zawnga inringtâwk em em ṭhin kha tun ṭum zet chu inrintâwkna tlachham ang mai a ni. 

"Ka hmangaih che, mahse" ka hmui chu a hmui lum leh nêm zet chuan a rawn khar nghal thuai a, ka sawi zawm tum pawh ka sawi zawm thei ta lo, ka tih theih awm chhun chu hmangaih taka a mi fawhna chhan lêt a ni mai. 

"Sawi leh teh Puii, sawi nawn leh rawh, ka hre sual lo a ni tih fiah nân han sawi nawn leh teh" kan inthlah rualin a ti leh phawlh phawlh a, mittui tling pamin ka nuih lui sak a, ani erawh a rilru a la mumal loh hmel em em thung. 

"EPHRAIM MALSAWMZEL, LUKAWLH pa, ka hmangaih che, ka hmangaih che hi ka inchhir hman asin, engati nge vawi khat pawh min rawn ngaihven ngai loh? Ka nâ a, ka nâ ngawih ngawih a, Jacob-a lakah ka inthiam lo em em bawk. Nang erawh i reh hmak a, min hua a, thi daih mah ila pawi ti lo hmel min hmuh a, khata ka nâtzia kha i hrethiam pha lo ang" 

"Ka hria e, ka lo sual êm a ni. Min hmangaihtu ka lo hnaisai reng che chu a ni si a, ka ti nâ leh tawh ngai lo ang che Puii. Min hmangaih hi ka lawm a, ka lawm zel bawk ang" tiin min kuah hle hle a, rei erawh min kuah lo.

Kan ṭhutna aṭang chuan min thawhpui a, motor-a ka lut tur te chu kawngka min hawn sak thlap a, thil thleng tawh leh liam tawh avanga nât reng ringawt chu ka duh tawh bik lo a ni. Ka chakna leh ka hliam tidam awlsam em emtu ka bulah a awm a, kei ang hmeichhe naran ve mai mai min hmangaih te chu ka lawm tak zet, ka awih nghal mai lo hial zawk. Vawi khat mai ni lo a sawi tâkah erawh chuan ka awih nghet bur thung a, ka awih lo phal tawh lo va, amah ka hmangaih êm avangin engkim chu a êng zawnga thlir ka duh tawh zawk bawk a ni. 

Kan in lamah kan haw tlang nghal a, kan in kawt kan thlen chuan lut nghal mai lovin kan ṭhu khawmuang a, a ruk taka ka lo thik em em chu ka sawi chhuak leh ta nge nge. Káwn chei mawi kan fán zana a hmeichhe awmpui chu a hnuaia thawk a nih thu leh hnimhnaih a duh vak lo chung pawha a ngaihzawn tlat thu te min hrilh a, ka inhmuh loh chhunga min ngaihzia leh ka laka a inthlahrun thu thlengin a sawi a, keiin ka lo ngaithla tawp a, a thusawi reng reng chu awih loh pakhat mah ka nei lo hrim hrim. A hmelah a thutak zia leh dawt a sawi loh zia ka hmu miau a, ka mipa hmangaih chuan dawt a sawi dawn lo tih ka chiang em em bawk.

In chhungah kan lut a, Chali nen ni lova kan lut chu ka nu leh pa chuan mak an tih hmel hle a, min en deuh hâw a, hun liam tawha a awm dan avangin Ephraim-a chuan ka pate bulah ngaihdam a dil a, zahpah nei miah lovin nupuia min neih a duh thu a sawi tlang nghal tlawng a nih chu! Ka zak ru viau a, han awm châwih chawih lah chu ka thiam der bawk si lo, ka kum paw'n a àwm tawh lo hrim hrim. Tleirawl mai mai ni lovin nula pangngai dik tak kan ni ve tawh a, zak tho mah ila ka zahna te chu ka thup a ni ber. Ka thup séng meuh lo va, ka nu phei chuan min fiam zui phah nghe nghe. 

Chumi zan aṭang chuan zantin deuh thaw kan inah a lo léng a, ka tan a inpe pumhlum tawp a tih theih. Chhun lamah erawh hnaah a kal ziah thung a, tlaiah Teakwondo lam a zirtir leh ziah bawk a, a buai mawp mawp thei khawp mai. Tlai khat phei chu min hruai chhuak a, kan pahnih chauhin kan ni dawn emaw ka tih laiin hmeichhe pakhat min hmuh pui a, chu nu chu ka thik em em hman nu kha a ni tih ka hre bawk. Chu nu bulah chuan zep nei miah lovin min hmangaih thu a sawi tlawng ringawt a, ka hamhaih bawk si, zak deuh bawk si awm dan tur hriat a har hle. 

A hnua min hrilh leh dan chuan hnathawhna lamah a lo zar buai deuh ṭhin a ni àwm a, kei tih loh hmeichhe dang a hnimhnai ngai lo tih chiang takin a finfiah ta bawk nen a chet dan chu ka lawm hnuhawh khawp mai. Kei erawh mipa dangin min rawn ngaihven lo hrim hrim a, ka luck vak lo a ni ang. Ngaihzawngte chu ka lo nei ve duah hman kha a ni a, mahse a bialnu neih tawh zat a'n sawi tak tak chu luck ti hem hem tak a ni. High School aṭang daih tawh ngaihzawng a lo nei fel thlap tawh a, chuti ang khawpa mipa luck-in kei min han hmangaih chu e lawm lohna chi a ni lo hrim hrim.

Kan intawn hmaa a lerh ang bawkin a la lerh reng leh reng loh te ka zawt a, ani chuan kan intawn hnuah kei tih chauh lo chu hmeichhe dang a ngaihven tawh loh thu a sawi thung. Ka fimkhur ve êm alawm, chu bakah fimkhur a ngai tlat. Ka hmangaih a, ani paw'n min hmangaih a, tunah kan inṭhen hran leh theih ka ring tawh lo. An ina chaw ka ei zan te khan ka va'n hlim tak, a nu leh pa an fel bawk si, rei lo têah kan innêl nghal thuai thei maw le. Kan veng lamah erawh an awm tawh lo va, Jacob-a berin mual min liamsan tawh si a, Luangmual lamah hlir an awm ta a ni. In erawh a din ngaiin a la ding reng a, Ephraim-a chuan eng emaw atana hman daih a duh thu min hrilh nghe nghe.

Chawlhnî a ni a, lên chhuahpuiah min sawm a, ka pate a dil thlap bawk a, ka chhungte chu an ngaih a ngam ta viau. Hmâna a bike ang kha nei tawh lovin Bullet bike fai zet mai a lo nei leh tawh a, chuan pawh a nuam ang reng hle. Amah pui roh lah hi ngainatawm tâwk chiaha chet te, ṭawng te, awm te a thiam phian a, kei tak pawh hian ka vei zui vawng vawng thei ṭhin. Zanah lo lêng pawh ni se in a thlen hnuah phone kaltlangin kan inbe leh ziah a, zan lamah na nâ ná hi chuan hun kan hmang dun nasa ve khawp mai. Zing chhun tlaiah erawh amah zawk a buai êm a, inhmuhna hun mai ni lo inbiakna hun tak ngial pawh kan nei lo lêk lek ṭhin. 

"Puii" a lam chu ka hawi a, rei pawh en lovin a kuta thil awm zawk chuan ka mit a la nghal vat a, chuti anga a tih ka ring lo lutuk chu ka âng phuau ringawt. 

"Min nei ta che? I duh em? I pasal nih ka duh tawh, ka nupui ni tawh la ka duh bawk" a mitah tak ka en kar a, fiamthu miah lova min sawmna chuan ka thinlung a ti tuiral zo leh ta vek mai.

"Ka hmangaih che" nui sen sena ka tih chuan a nui ve suk a, ka kut chu la kângin zungbun a rawlh lut nghal a, thu thlum tak tak sawi aiin chu inhualna zungbun chuan ka thinlungah thu tam tak a sawi daih zawk. 

"Kan inneih zan chu phir i pai nghal ṭhawt theih tur khawpin ka che nasa ang" a va han ṭawng duham nghal mai mai tak.

"Pathian thu thu" ka tih chuan

"Chet kan lak loh te chuan awmzia a awm chuang nâng" a lo la ti hram a, chhan lêt ka tum ûk hman tawh, ka ṭhulh leh ta zawk a, chhan lêt dan tur pawh ka hre chuang lo. 

"Sawi tawh lo ang" tiin a âwm chu ka ngheng ṭha sawt sawt a, chawlhnî tlai ni tla tur sen siar chuan ngaihtuahna thui tak min put tir a; ka tana lukawlha ngei mai, Ephraim Malsawmzela nen kan inneih hun tur thlengin. 

(The End)