SUMO DRIVER By Havali Adam (CHAPTER 42)

SUMO DRIVER

By 

Havali Adam

Chapter 42

Darkar 1 an zu thâng hnu chuan an rawn chho ve leh mai a, kan fate pathum leh pu Kawla chu thlam chhungah an lut zui nghal a, Mazara erawh ka bulah a rawn ṭhu thung. Ka nghen theih turin a ṭhu a, ka ngheng ta reng bawk a, Radio-a zai mêk chuan nun hlui min tingai zual a ni. Kum 1997 daih tawha an tlangzarh Bryan Adams hla 'When you love someone' ngei mai chu mawi takin a zai a, hla thlangtu chuan thlan hun a hria ka ti hle. Kan nupa ngaihthlak tur takin a thlang emaw ka ti rum rum a, mahse chu zawng thil awihawm loh tak a ni lawi si.

Ka BA lo zir ve tawhna te chu chhawr ṭangkaiin a hla thu chu ka ngaihtuah vang vang a, a va'n dik si êm. Hmangaih ka tawng a, pasalah ka nei ngei bawk a, amah avanga thil atthlak tak tak tih chang pawh ka ngah mai, mahse engkim chu hmangaihna vang vek a ni. Dawt pawh sawi se a thusawi ka awih tho ang tih theih tur khawpin ka hmangaih a, khang kan inngaihzawng chhung khan ka sawifiah thiam si loh thil mawlmang tak tak tih leh sawi ka va'n ngah phah tak. Ka hmangaih tan tuithlar ka tâwk a, hrehawm tih a hnékin ka hlim letling zawk em em a, ka hmangaih ka pasal tan chuan ka inpumpek tawp a ni ber.

"Eng nge i lo ngaihtuah veng veng?" ka pasal aw thum hniam ruih chuan min tinui seih a, thingtlangpa kut tih hriat taka hrawl leh hlai em em chu ka zu chelh a, la kângin ka fawp vang vang a, a hnathawk hah rim te hi tui ka ti tlat ṭhin.

"Hmangaihna" ti sepin a darah ka bek ka va nghat a, a zak kauvin a âwma bei hle hlê turin min kuah zawm zat a, kei pawh ka bang chuang lo, ka kut pakhatin a dul zawnah ka kuah ve ran a, thla êng zawng zawng nen kan awm dan chu a nuam tak zet.

"Heti hian kan tlaivar daih mai dawn em ni ang?" tih supin ka chhip sam chu a hnim vang vang a, a fawp zui nghal zeuh bawk a, tum chu ni ila kan tlaivar thei tak tak ang ka ring, kan awm danin a zir êm mai.

"Thang chu in zu kam thei maw? Kan fate hi i hruai ve zel ṭhin bawk si a, an dip mai mai che hian ka ring ṭhin" thu dangah pakai pui ka tum ta zawk a, pitei thu min hrilh kha ka ngaihtuah chhuak bawk nen Mazara nena nupa inkawpchawi tak kan ni chu ka hlim thar a ni.

"Dip hran lo ve, kei pawh hian nuam ka ti zawk alawm, pu Kawla rual khan an lut ve mai bawk a, an lo chhuak leh ṭep tawh ang" a thusawi avang chuan hahdam zetin ka nui zui hak a, ani paw'n ka dul a rawn chul zawm nghal zat bawk.

"Dar engzat nge ni tawh reng reng?" ka tih chuan a la tlai lutuk loh thu a sawi mai a, a âwm aṭanga min nam hla deuhin a iptê pui ah chu a sirah a dah thla a, a ngaite bawkin min rawn kuah ṭha leh a, a hma ai chuan min kuah nghetin ka hria. 

"Ka lo kal ve ringawt hi ka inthlahrung hnuhnawh leh deuh, kal lamah khan min paw nasa bawk si, i chau viau lo maw? Zep lovah chuan mahni chauha mut kha ka peih lo êm alawm, kan fate hruai tum si khan ka kal i phal nghal mai bawk si lo" kan ngawih dun vang vang hnu chuan a ṭawng hmasa zawkah ka ṭang leh a, a bulah hi chuan thil ka zep rei theih loh bakah ka ngawi thei ṭhin lo a ni ber e.

"Ka ngaihtuah tawi hrim hrim, riahpui tur chea pu Kawla lo haw tir mai ka tum maw le. Inah awm la chuan ka rawn haw leh tho vang, ka mut theih ka ring bik chuang lo" dam zet hian a ti sup a, a aw hriat ringawt pawh hi a hahdam thlak ṭhin.

"I ṭawng duh ve sâwt tawh ê Mazar, mahse i ṭawngmawh viau ṭhin hi nangmah ti nangmahtu che a ni ka ti ve tlat. Kan inhriat tirh phei kha chuan awi, ka sawi peih lo zawk" ka tih chuan a rawn nui nghawr dat a, chutah nuih insum aw deuh hian

"Ka ṭawngmawh àwm ka lo hre hleinem, nangmah alawm ṭawng duh" a rawn ti a, chek tlak tlakin ka melh chho nghal a, ka meng rum lui ve tak nà a, rawn che thutin min fawp vawng vawng a, ka tuiral leh nghal vek ringawt. 

"Ka ṭawngmawh reng reng lo, kan inngaihzawn lai te khan ka ṭawng hnem theihzia kha! Nang ve chu a chang phei chuan lungtum ang velin i awm ṭhin, biak ṭawng kha i hara sia e, mahse Hruaikimi laka min chhan dan kha chu i pà thlawt" harh chhuak thutin ka ti leh tawn tâwn a, ka chalah a rawn nam ringawt a nih chu! 

"Ṭawngmawh ka sawi lo, ṭawng duh alawm ka sawi, ka thusawi kha ngaihtuah chiang ta che" nui ruh ruh paha a tih chuan ka ngaihtuah let nghal a, a sawi dik chiah, ani te chuan ṭawng duh lam alawm a sawi, ka va han mawl mai mai tak.

"Nang tê reuh hi tun ṭum i nau pai chu i danglam zualin ka hria, i lawmawm thar tlat, zanin pawh kan" a ṭawng laklawh laiin a âwmah ka chum pawp pawp a, nâ tih loh hmel zet hian a lo dawh mai mai thung a, a sawi chhunzawm êm ta bik lo. 

"Tê reuh min ti ziah suh, ka ning. Min thlah thuai teh, ka lut duh tawh" tiin a ban chu ka kuai sawn a, ani erawh a nui hawk hawk a, ka awm dan chuan a tihlim ve tak tak a nih ka ring, tun ṭum chu a nui nasa ve êm mai.

"Chu bakah i lian ve hrim hrim a, ka lang tê mai mai a ni. Hmeichhe dang aia ka têt vak pawh ka hre lo, chuan i thil ngaihtuah lai kha paih bo nghal ang che. Ramah leh nghal, a chi loh em em lutuk" ka ti leh tawn tawn a, mei nei deuh hian

"Eng nge ka ngaihtuah?" a rawn ti a, hriatthiam loh hmel deuhin min en vel kher a, keiin a rilrua awm ka hre chiang nasa mai si a, nâ zetin ka kawng zawna a kut inkham rûah chu ka dah thla a, an'n rang zetin a rawn dah chho ve leh nghal thung. 

"Ka chhang peih kher lo che, i hre vek. Chu bakah a hun leh a hmun hre rawh, i rilrua awm ang ang kha a dik vek bik lo. Keimah pawh min ngaihtuah ve la, ka rilru tur te dawn ve la, nau pai hi a awlai teuh lo, hrin chhuah ngat phei chu harsa tak a ni" ka tih hmawk hmawk lai chuan

"A tâwk e, ka fiamthu a nih kha!" a lo ti dam dap a, chiang lutuk tak mai hian ka ngawi nghal hmak a, ka dar zut heuh heuh pahin min kuah hle hlé a, thinrimna nei ang maia ka ṭawng vak vak chhan chu ka rai vangah ka puh leh ta tawp. 

"Min hrethiam teh Mazar, min dawhtheih hi a ngai awm ṭhin. Tun ṭuma mi hi chuan maw ka tum loh deuh deuhin min awmtir mai, Duatpuia ka pai lai ai khan ka rilru hi a nâ hma a, chhan awm lovin ka thinrim hma em em bawk a, ka vin hlawk hlawk te hian min lo hrethiam hram hram ṭhin dawn nia, Pathian zarah nautê kan nei ang a, a reh ve leh mai ang" a laka inthiam lo ru zet chuan ka ti sêp sep a, min hrethiam dawn tih erawh ka chiang viau lawi si.

"Lut ang le, naupangho paw'n mut an duh tawh ang" tih leh min kuahna chu phelh a rual a, kei pawh awm sawnin ka ding nghal a, Radio ka la chiah tihah min rawn pawm kang lâwp a, ka au ṭhawt hman ṭep leh nghal. 

"Keimah paw'n ka kal ve thei reng a nia, kan tlu zawk ang e aw" ka tih chuan ngawi reng hian a kal ngaiin a kal a, a nghawngah ka kut pahnihin ka kuah bet ran a, ani paw'n min pawm nghet viau bawk. 

Thlâm chhung kan luh hnu rei lovah Duatpuia chuan a pa hnenah tui chawinaa inbual a dil a, a nau te pahnihin an lo dil ve nghal bawk a, mahse Mazara chuan a zu kalpui ta zawk. Rei tak an inbual lo va, an rawn chhoh hnu lawkah an mut an chhuak nghal mai bawk nen kan mu tlar dûl a, ka bul hnaih berah Hlutea a mu a, a dawtah Awmawma a mu leh a, a sir ber; a pa hnaih berah Duatpuia a mu thung a, pu Kawla chu Mazara piah lawkah a mu bawk. Ka muhil thei nghal mai lo va, mi dang erawh an muttui suk suk hlawm tawh hle a, an chau tlâng a ni maithei.

Khua a var a, ka lo mu rei phian chu niin, pu Kawla ei rawng bawl ri ah ka harh a, zan lamah khan ka muhil har pawh a ni lo, ka tho tlai ve hrim hrim a ni. Pu Kawla chu naupangho awmna ka zawt a, Mazara hova vai thang kam an en thu min hrilh ve mai a, a chang chuan nuam lo ka ti ve ṭhin reng. A hmeichhia ber hi ka mu rei leh nûlh zel a, min hrethiam em em zel lo se chu anmahni tan tak pawh ninawm min tih chang a tam khawp ang. Sawisel leh nin a hnêkin min dawhthei tlâng em em zawk a, ka chhungkua te hi ka hlimna leh ka hahdamna bulpui ber chu an va ni chiang êm. 

Mai ka kán laiin ka pasal leh kan fate chu an rawn haw a, phur zet hian naupang an ṭawng mawlh mawlh a, ka rin ai tak chuan an âwk hnem phian mai. Mazaran tukṭhuan chawhmeha ei hman turin a siam nghal zung zung a, a siam chhung zawngin a bulah ka awm a, chawheh siam chu a hnehsawh leh pek hle. A tirhah kha chuan ka ten a, ka ei duh chiah lo va, mahse ram sazu sa hi chu a dang daih. In lama sazu nen a inang lo hrim hrim bawk a, tunah chuan ka duh ve tawh hle. Tun ṭum erawh ei vak ka tum lem lo, nau pai lai hi chuan ei inah fimkhur a ngai zual em em a, a bikin sa phei chu ei vak loh a ṭhat rih zawk ka ring. 

Ka pum a puar lian lutuk hran lo bawk nen muangchanga hna thawh ka tum a, mahse Mazaran a lo phal awzawng lo. Thlâmah emaw a chheh velah engmah ti lova awm tawp turin min ti a, ka theih ka inring lo nasa mai. In lama hawn tur thlai rah tal lawh ka tum chu a phal leh ta chuang lo va, zan hnih emaw zan khat kan riah leh tur thu a sawi nghe nghe. A sawi lai chuan a fate an lo phur hlawm khawp a, a tawpah erawh kei pawh luhlul chhuah phêt tum lovin a sawi anga awm tawp chu ka tum ta mai. 

Chhunah chuan zing lama Mazara pangbal chawh sa chu an ei turin ka chhum a, a hmin hnuah ka ei chhin a, a thar lâm mai bawk si a, a tui ngawih ngawih hi a ni tawp. Thingpui chu ka siam leh nghal a, ní a rawn kang sâng a, chhun pachang lai tak a liam hnu chuan Mazara leh pu Kawla pawh thlâm lamah an rawn chho va, kan fate erawh thing daihlim hnuaiah an awm thung. Hauh ngaiin an awm lo va, han inhlei zeuh changte hi chu an nei ve ṭhin, mahse nasa lutukin an inhlei ngai chuang lo. Mazaran Awmawma leh Duatpuia tui chawi turin a tir a, ka phal vak lo va, mahse an pa thu zawmin an kal ta tho.

Pangbal chu kan ei zo vek a, ka chhum hnem tehreng nen a tui kan ti hlawm viau a ni mahna. A ṭha hrim hrim e, tui ti taka kan ei thei te chu a lawmawm a ni. Kan chhak lawkah pangbal kung a awm thluah a, kan duh leh a nih paw'n kan cho leh mai a ni ang chu! Mazara nen kan inhriat tirh tak tak laia putea te lô nen khan kan lô chu a inang deuh reuh te'n ka hria a, mahse a inang lo tih leh hmun dang ve vea awm a ni tih erawh ka hre chiang hle thung. Pangbal chhumba bel ka sil laiin Mazara chuan a fate nen an bula chhuk turin min sawm a, kan hnial lo chiang hlawm teh e! 

"Ka besei aiin kan buh hi chil hma a ngai dawn tlat, kan riak ta rau rau i chil zo vek law law teh ang. Nang erawh min lo thlir tawp la, mahni chauha awm hrehawm i tih ka hlauh vanga hruai thla che ka ni" a ṭawng zawh rualin Mazara chu buh dah khawmna lamah a kal nghal a, pu Kawla chuan a lo chil a mawlh mawlh tawh thung.

Kei leh Hlutea leh Awmawma te chuan an che vel kan lo thlir tawp a, Duatpuia erawh a pa'n tih dan vel zirtir a duh avangin an bulah a hruai thla a, mahse eng vak mah a tih tir chuang lo. A chet pahin a hrilh a, Duatpuia pawh a bu nghat nghat a, kum 10 mi lêk la ni mah se thil tih dan a man chakin a hrethiam hma em em a, chu vang pawh chu a ni ang a hruai thlak bik kher. Khua chu a hniam tial tial a, ei rawng bawl a hun titih a ni mai a, mahse thlâm lamah ka la chho duh lawk bik chuang lo.

Duatpuian buh pâwla chen a pa a dil a, tam tham a la ni lo va, a pa paw'n a lo phal ve mai a, kei chuan an mê ang tih ka hlau viau thung. Chhoh tum vek tawh si kha ka fate buh pâwl cheng avang chuan ka awm leh ta ren rawn a, mahse ka awm rei thei chuang lo, ei rawng ka bawl a ngai tlat a ni. Zan riah kan ei kham chuan Mazaran hmazil a zai phel a, kan hmazil thar chu a thlum tui em em leh nghal. Thla êng lawmin pawnah kan ei ṭhap a, pu Kawla awm dan chuan ka mit a la ang reng hle.

Kawng siam chawp bulah dingin kan piah lawka tlâng; thla êngin a chhun avanga pâwl duk ruih chu a thlir vawng vawng a, a lung a leng ve hle a nih ka ring. Mizo ṭawng a thiam bel ve deuh hnu khan chhungte a neih leh neih loh kan zawt tawh a, ani paw'n unaupa pakhat a neih thu leh a chhungte dang an thih vek tawh thu min hrilh ve mai a, a unaupa chu zawn chhuah a tum ruh viau bawk. Engtik ni ah emaw chuan a thisen zawmpui zawnga min kalsan hun a la nei ngei dawn a, America rama a awm a rin thute a sawi a, mahse duh angin pawisa a la inkhawl hnem tlat lo va, tunah rih chuan Sap rama kal a harsa maithei a ni.

Rama zan thum kan riah hnu chuan kan khaw lamah kan haw a, Mazara leh pu Kawla paw'n kan buh thar an chil zo hman vek a, kei leh kan fate erawh kan ṭangkai lem lo khawp mai. Kan haw tukah Mazara a service nghal a, a tuk leh chu a awl nî a ni a, ni khat chhungin kan buh thar ho zawng zawng an rawn thiar haw vek a, Tlantea leh putea paw'n an pui nghe nghe. Tlante ka hmuh tirh chuan ka ko hrang vat a, a nu rilru buaina te chu ka hrilh mawlh mawlh a, a ngaihzawngnu nen an inkarah inrawlh ka tum lo va, mahse thil dik tak ti tur leh kawng dik tak zawh turin ka chah mawlh mawlh thung. 

Ram lamah kan ṭul em em tawh lo bawk a, Mazara pawh pangngai takin a service leh thei tawh a, kei pawh dawr lamah ka chho nitin ve leh ta. Buaipui ngai bera kan rin Hlutea chu amahin school banah pawh a rawn haw thlap zel a, kal lam erawh a pa'n a hruai ziah a, haw lam hi chu a intipá ve khanglang a, amah tê ngatin a rawn haw ṭhin. Awmawma nen an school kalna a inang a, a û ban hun nghak mai tur te'n ka ti ṭhin a, a duh ngai der lo zui. Awmawma pawh ka hrilh tho va, mahse an páwl a inang lo bawk nen a ban hun a innang fuh thei lo a ni e.

"Hmannî chu in pa nen kan inbia a, a hrilh tawh che ém?" Rampana lam chu ka hawi phei nghal a, nui sun sun hian chhang a keih a, thingpui a in zawm nghal zat a, Mazara nen ber khera an inbiak chhan tur ka hre lo hrim hrim. 

"Hrilh nâng, eng nge in sawi a? A hria che em ni? In inhmuh ngai pawh ka hre si lo va, eng lampang nge in sawi?" ka ti deuh zung zung a, pangngai taka lan tum mah ila ka chhungril erawh engtin emaw ni a awm a, ka awm dan leh ka aw aṭang a lo hrethiam ang tih ka hlau ru viau bawk. 

"Thu tam a sawi lo, kan inbe rei lem lo khawp mai. Engmah a la hrilh miah lo tak tak che em ni?" a rawn ti hmasa leh tê tê phawt a, ṭawngkâa chhang tawh lovin ka lo buk khum ringawt a, a sawi lawk duh loh danah thil eng emaw tak chu a thlen ka ring nghal bur. 

"Hnaih vak lo tur chein min ti alawm, ka cho lo nasa mai bawk si a, ka inrin hmain kut min thlak thut ang tih kha ka hlau hman asin, dawrah pawh hian ka rawn chawl tam vak tawh lo maithei a ni" a tih chuan ka meng nghal kâwk ringawt.

"Dawt ka sawi lo a nia, in pa hian nupui hauh chu a pe nâ ve khawp mai. Keimah tak pawh hi ka dik lo hrim hrim, zep lovah chuan ka hmu tái leh thut ṭhin che a, nang ni lovin in pa zawkin a lo hrethiam vat a, min zilh hlak lo se chu ka tlangnel viau maithei a ni" amah bawk chuan a rawn ti leh a, mak ka va'n ti kher ém.

"Min lo hmu tâi tak tak ṭhin maw!? I fiamthu mai mai emaw ka ti asin Rampan, nu ka ni tawh hi maw le. Pitei awm loh vang em ni hetia i sawi tlâwng?" ka tih chuan nui vur vur hian a bu nghauh a, pitei an rama feh a duh avangin a lo kal lo hlauh zawk a, awm se chu a sawi chhuak tawp lo vang.

"Hlauthawng lo la, inngaihtuah hah vak duh bawk suh Numam. In pa nen kan inbiak tlai khan i laka ka rilru puthmang zawng zawng kha a danglam nghal vek, chu bakah in pa hi ka hlau ve hrim hrim. Amah lah hi a chak hmel mai bawk sia maw, a ṭawng tam lo ve hle chuan ka hria, a dik em?" a rawn tih chuan

"Ṭawng tam vak lem nâng, kan pa nena in lo inbe daih chu mak ka la ti reng. Nang lah chu i ngaih a samin enghelh i neih hmel tawh bawk si lo va, ngaihtuahna sen dan tur pawh min tihamhaih zo vek" ka ti ve nghal a, nui vur vur hian chhang chu a keih leh a, kei pawh ka nui ve leh tawp ringawt. 

Tlaiah chuan Mazara Sumo service ní a nih avangin inah ka haw thla hma a, chu bakah pitei a lo kal lo kher bawk nen dawr khar hma a ngai ngei ngei zawk. A naute inbual laiin Duatpuia a rawn haw a, Middle School a kal ve tawh bawk a, Primary School ang mai mai chuan a rawn bang hma thei ta bik lo a ni. Lehkha a thiam thei em em a, a hawrawp ni se chhiar a nuamin a ṭha em em bawk a, Term exam-ah te hian mark a hmu sâng fal nalh zel. Vawiin tlai a rawn haw chu tlai dang a ang thei der lo, hlauh nei ang mai hian a awm a, ka biak te chuan min chhang mumal thei lo. 

A naute an inbual zo va, inbual ve nghal turin ka hrilh a, a inbual ve mai bawk a, mahse ka fapa awm dan chu a dik hlawl lo, a pangngai lo chiang a ni. Bathroom a luh hnu fê ah pawh a inbual thawm pakhat mah ka hre lo va, kawngka beng ria ka koh hnuah a inleih ri ka hre chauh. A inbual zawh rualin pindanah a lut tlang nghal a, a naute TV enna bula a ṭhut lai te chuan ka lo chîk ru reng a, eng emaw tak thil dik lo chu a awm chiang a ni. Zawh chian ka tum lai takin vengthlanga mi nu Thanpuii a rawn lut hlawl a, Duatpuian an fanu chal a vawm thi sak thu a rawn sawi mai a nih chu! 

Nu Thanpuii chu insum karna nei mâp lovin a ṭawng hlawk hlawk a, ka fapa chu chhe tinrengin a pu mawlh mawlh a, a nu ka awm ve reng lai chuan zahna pakhat mah a nei lo hrim hrim. A thawte chu zû rim a nâm ham ham leh ta nghal a, nasa ka va ti tehreng êm. Duatpuia chu nu Thanpuii awm laiin zawhna ka zawt ta nge nge a, a thiam loh a nih chuan chhan ka tum hauh lo, mahse thiam lohna emaw tih sual a nei lo a nih vaih chuan ka nasa ve khawp ang. Rai lai ka ni leh nghal a, ka thin te chu a rim tet tet tawh a, Duatpuia lah chuan engmah a la sawi duh lo zui.

Nu Thanpuii chu a haw ve thei ta hram a, a awm chhung chuan insum nasa tak ka ni. Duatpuia ni se a ngawi tlat bawk si a, ka ei rawng bawl lai paw'n rilru nuamin ka awm thei tawh lo. Zanriah kan ei a, chaw eina ah chhun lama thil thleng ka zawt leh a, mahse a ngaite bawkin chhanna mumal ka dawng chuang lo. Ṭawngkâin ka hau titih a, mahseka khawngaih leh tlat bawk si. Thil a tisual ti dawn ila ka ring ngam chiah si lo va, han hauha han thinrim khum vak theih pawh a ni lo. Dar 8 leh a chanve velah daih Mazara a rawn haw a, a tlai dawn thu min hrilh hrim hrim bawk. Duatpuia awm dan leh tlaia thil thleng zawng zawng chu ka hrilh a, Mazara tal chuan thil thlen dan zawt chhuak thei se ka ti khawp.

"Eng nge vawiinah thleng sawi rawh le" dam zet hian Mazara chuan a ti a, chu veleh Duatpuia chu a pa âwmah a bei nghal thlawp a, ring lutuk lo hian a ṭap feih feih bawk a, a naute pahnih paw'n an hrethiam bik lo, mak tih hmel zetin an en tawp ringawt.

"Ka tum a ni lo pa, a awm tih pawh ka hre lo. Sunhlu vawm tlâk ka tum a, mahse Nghaki lu ah tak a fuh palh a, a lua vawm kha ka tum lo. Headmaster-in a office-ah min ko lut a, min hau a, chuan tlaiah khan Nghaki nu'n min hau bawk" ṭap chung chuan a ti zuah zuah a, a pa bulah meuh zawng a ngawi reng thei ta bik lo a ni ang e.

"Chungte mai mai ṭahna tham a ni hleinem Duatpui, i thiam loh pawh a nih loh tawp chu! Engati nge i nu i hrilh mai loh? I nu hian a ngaihtuah viau che asin" a fapa mittui hruk hul pahin Mazara chuan a ti dam leh dap a, a fapa tan chuan a va'n thlamuan thlak dawn tak êm.

"Kan nau tur a pai alawm, nang paw'n min hrilh vek tawh khâ, ka sawi chuan a rilru a buai vek ang tih ka hlau" Duatpuia chu ka en vawng vawng a, ka fapa chuan ka rilru a hah a hlauh avangin min lo hrilh duh lo va, ka lo hau hmanhmawh chu ka inchhir hnuhnawh kher mai. 

"Apa eng nge min lo hawn?" Hlutea tê reuh chuan a rawn ti a, a pa iptê a va dap ruk ruk a, Mama lian bawm thum leh Maha Lacto Sweet polythene-a fun tam tham zet chu a rawn phawrh chhuak nawlh a, Aawmawma pawh a phei ve ta vat. 

"Au Duatpuia ta tur kha dah ṭha ula aw" tiin Mazara chuan a fapa chu pindan lamah a kuah lut a, Awmawma leh Hlutean a pa thil rawn haw an khawih rik rawk rawk laiin Duatpuia erawh a pa ṭawng thum bul bul chu a ngaithla kar a, a pa chuan eng nge a sawipui ka hre ve chiah lo va, mahse thu ṭha bak a hrilh dawn lo tih ka chiang.

Chawhmeh chhuan lum pahin tui lum ka chhuang a, chhuan so sa tawh a ni a, a so har ka ring hran lo. Rei lo tê hnuah Awmawman TV a off a, an unauin pindanah an lut zui nghal a, an luh hmaa an zun thlap danah an mu duh tawh a ni ngei ang. Thawm chu a reh tlawk tlawk a, sana ban inkhawng ri te chu a hriat hle. Zan a rei ve tawh ang reng a, ka pasal leh kan fate awm dan thlithlai tuma pindan ka va lut chu an lo mu khawm dul a, Duatpuia chuan a pa a kuah tlat a, a thil tawn ka ngaihtuah chhuak a, ka khawngaih ang reng. 

A fate tih harh hlauh zetin Mazara chu a rawn tho ṭhem ṭhem a, khum aṭanga a chhuk rualin Hlutea mutna lam ka lo kawk thuai a, ani tê hi chu a mang a chhe thei khawp a, Mazara paw'n a ute pahnih inkarah a mut ṭhat tir ve mai bawk. A rawn kal mai dawn emaw ka tih laiin a ding reng leh lawi a, kut kuangkuah meuhin a fate muhil chu a thlir a, lungawi hmel zet hian a nui zui suk bawk. Rizai sin ṭhat tirin thosi lén chu a zar sak leh thlap a, zar sak satliah mai ni lovin a delh kilh sak nghal vek bawk a, a duh ang taka a chet hnuah a kalsan thei ta chauh.

"I inbual hmasa dawn nge chaw i ei hmasa zawk ang?" ka tih chuan a inbual tur thu a sawi a, ketli-a tui lum chu bucket thirah a chhung chhuak a, buaipui han tum ve viau pawh ni ila amah hian min ngaihtuah leh lutuk ṭhin a, chu pawh ka rai vang a ni pakhat.

"En teh Mazar, thil dang daih, vawiin khan Rampanan in inbiak thu a sawi a, engati nge engmah min hrilh ve loh?" a chaw ei lai chuan ka ti a, a bulah ka ṭhu reng a, min rawn chhang lawk lo va, bai a hawp laklawh ve êm bawk a ni.

"Chu, a la rawn hnimhnai hram che a ni maw?" min chhan dan chuan an lo inbe ngei tih a tichiang thawkhat viau e, mahse ka zawhna a la chhang miah lo, kan boruakin zir vak lo mah se sawi ka duh miau si.

"Hnimhnai lam pawh ni lo, amah tak paw'n nuam a tih loh hmel lutuk. A hlau bawk che si a, kut i thlak a hlauh thu thlengin min hrilh vek. I nupui ka nih angin ka lakah zep nei suh, chuan kan dawra a lo lên luh paw'n engtin mah ti lo bawk ang che, a hlau teh mai che a nia" ka tih chuan

"A ṭhat hlauh chu!" a rawn ti duh lêk chauh a, ngawi rengin rei lovah chaw a ei kham thuai a, thinrim hmel emaw lungni lo hmel a pu hran lo va, ngaihṭhat lohna em em ka nei ta bik lo, a tirah kha chuan a lo thik viau ang tih ka hlau a nih kha le.

Zan rei lam ni tawh mah se chaw a ei kham deuh chiah avangin tap chhakah kan ṭhu dun a, Duatpuia chanchin chu ka sawipui melh melh a, nu Thanpuii ṭawng nasatzia thlengin ka sawi kai a, ani erawh a ṭawng leh vak tawh lo, ka thusawi a ngaithla deuh tawp a ni mai. Dar 11 rik dawnah kan mu phei a, a tuk lam a service nî a ni lo bawk a, mu rei deuh mah se pawi ka ti lo. Zing lamah erawh ka rin ai a tho hma a, kan tho rual reng a, a thil tih hmasak ber chu Duatpuia ngaihsak a ni. A ṭhat tawh leh tawh loh te, school kal a hreh leh hreh loh thlengin zawhna a zawt a, Duatpuia ve thung chu a lo pangngai ve leh viau tawh zawk.

Ka pasal chuan a fate school kal tur a thlah thlap a, a rualin an pathum chuan school thleng a hruai nghe nghein ka hria. Kan fate a thlah zawh hnu chuan dawrah a rawn lut kawi a, ina zu mu hahdam mai mai turin ka hrilh a, a mut a chhuah loh thu leh a chauh loh thu a sawi thung. Pu Kawla erawh ram lamah a chhuak leh daih tawh a, Mazaran haw hma turin a hrilh nghe nghe a, vawiin chu feh a tum lo ve teh mial a ni ang. In lama haw thla mai lo chuan a awm ve ta reng a, chhang te min nawrpui a, mipa tha na nà ná chu a hriat bik khawp mai. A nawr zo zung zung a, kawng leh lam zawng tak chuan ka hahdam phah hle.

Chhunah inei puar turin Rampana a rawn lêng lut a, Mazara a hmu thut chu a phu deuh uih a, ka nuih a za ang reng. Mazara ni se chhang nawrin a ṭhu ngawi run mai bawk si a, pitei erawh engmah a la hrethiam ve lo thung. Mazara tak phei chuan Rampana a ni tih a hre lo hrim hrimin ka hria, a hnung chhawn zawngin a ṭhu tlat a, a tan hawi chhuah phawt loh chuan hmuh nghal theih mai ni hek lo le. A inei puar chhung zawngin Rampana chu a ṭawng lo va, ka nuih tet tet nghe nghe a, ri lova nui vur vurin ani pawh a chhuak ve leh mai bawk.

Hriat loh karin hun te a kal zung zung a, kan hun hman dan leh kan chhungkaw boruak a ṭha em em a, mahse ka nau pai chu a hma ang a ni thei ta tlat lo. Thla thum kan hman ral hnu chuan nau ka vêi ṭan ta, ka hlauthawng em em a, ka chhiat ang tih ka hlau ber. Doctor te chuan a hlauhthawnawm loh thu leh thla kim lova nautê nei mi tam tak an awm thu min hrilh a, min ṭawng thlamuan an tum a ni mah zawk. Thla kim lova ka hrin dawn vang nge pawh ka hre lo, ka vêi rei ang reng a, darkar tam hun kan hman hnu chuan hmeichhia ngei ka hring chhuak ta.

Kan fanu chu Mazaran a pawm hmasa ber a, nui sukin a hmuiah a zu fawp zeuh a, min rawn pawm tir zui ve nghal bawk. Mazara chuan kan fanu hming chu 'LALDUHSAKI' tiin a phuah a, a duhawm tak reng a, a pian tirh phat aṭang min chhun nghal em em a, nu tan chuan lawm lohna chi a ni lo reng reng. Kum danga kan tih ṭhin ang bawkin damdawi inah zan khat kan riak a, min buaipuitu doctor leh nurse te paw'n min lawmpui em em a, nautê ka nei ngun ve tawh bawk nen min hretu leh ka hmel hriat an awm ve nual mai. Mazara tak pawh an hre ṭhûm hlawm tawh a, a ṭhen phei chuan fa kan nei thei zawt zawt lutuk chu an fiam nghe nghe. 

Fanu thar duhawm tak kan nei thar chiah e ti lo chuan Krismas boruakin min nangching nghal a, nautê pawh kan tuam lum deuh reng a, Mazara lah chuan mi pawh rawn hmasa eih lo hian nautê kawr tur leh puan chi hrang hrang a rawn hawn ziah leh nghal a, a mak hi ka ti ṭhin. Hmeichhia chu a dan a dang deuh te pawh a ni ang a pawm tam hle a, Duatpuia kan neih tirh ang velin tun ṭum chu naute a pawm tam leh tlat tawh a, mahse a fapa te a ngaihthah phah chuang lo. Duatpuia chuan a nau chu a'n duat nghal khawp a, a chhaih chhên a, puak te chu a tum deuh reng mai. Awmawma leh Hlutea pawh an awm mai mai thei chuang lo, nautê an pawm dawn erawh chuan a pa an dil hmasa thlap zel a, Mazara hian thil eng emaw hrilh a lo nei leh tawh zawk nge ni! 

Kum dang ang bawkin thleng dawh zanah chuan kan meng rei nupa hle a, dawr pawh an inhawng rei hlawm khawp. Khaw chhung dawr thil mai bakah Mazaran a fate dawh thlak tur Aizawl lam aṭang a rawn hawn lâwk ṭeuh a, kei phei chuan ṭul ka ti em em lo. Chawi eina dawhkanah thleng pali a dah a, mak ka ti ang reng. A chhan ka zawh chuan kan fanu pianghlim deuh chauh tan thleng a dawh ve thu a sawi mai a, zan rei tawh mah ni se ka va han nui nasa mai mai tak. Nausen tê tak tê a nih lai aṭang ringawt pawh duat a tum nghal em em chu a ni mai si a, dah lêt tura ka hrilh fê hnuah a dah lêt ve thei hram.

"Kei chu Krismas putarin thil min pe bik au Awmawm" zing kar aṭang Hlutêa chu a rak bengchheng nghal hle a, mut hmunah a pa nen kan lo nui a, kan naupan lai kha chuan kei paw'n Krismas putar an awm tak tak emaw ka ti ṭhin a, mahse nu nih hnu hi chuan a lo chiang thawkhat viau e.

Krismas boruak a zo va, kum thar kan chuangkâi nghal a, kan fanu pawh a hriselna a ṭha rih viau a, thla kim lova piang a nih avangin ka hlauthawng leh ṭhin. Ka taksa aṭang a awm hla thei lo tih theih khawpin ka pawm nasa a, ka paw deuh reng bawk a, Mazara chuan min thik ṭhin tlatin ka la hre zui. A pawm laia hnutê tui pek ka tum te hian a phal lo tlat zel a, mahse a fanu chu a pawm châk thu leh min thik deuh reuh tih erawh a sawi chhuak duh ngai der chuang lo. Engmah sawi lovin a ngawi tawp a, a duh hunah a pawm leh tawp a, Duhsakin thla 2 a tlin hnu phei chuan sawi lo mah se min thik tih haih theih a ni mawlh lo. 

Sik leh sa inthlak danglamin boruak chu a rawn inlumlet chho va, kan fate paw'n school an kal leh ṭhap ṭhap tawh a, an unaua an chhuak ho ṭhin chu hmuhnawm ka lo ti thei tawp. Fanu kan neih belh ta bawk nen Duatpuian a pa ai awhin a nau te pahnih an school-ah a hruai hmasa thlap zel tawh a, fapa innghahna tlâk tak kan nei dawnin ka hria. A pa lah a buaithlak lek lêk ṭhin, ei rawng bawl lai pawh ni se Duhsaki chu a paw zel mai bawk si. A puak loh leh a pawm chawt a, pu Kawla pawh Mazara awm dan avanga nuih vur vur chang a ngah ta hle. Eng dang a ni lo ve, a fanu chu a duat hi a ni tawp mai. Vawi khat phei chu a service-naa hruai a tum a, ka va han phal lo nasa mai mai tak.

"Nu, naktuk chu nangmah emaw apa emaw zawk zawk kan school-ah in kal a ngai aw, kan fisrt term exam result a chhuak tawh a ni ang, mahse engmah progress report card kan la dawng lo" Duatpuia chuan zanriah ei laiin a rawn ti a, a pa service nî a ni a, a pa kal zawk se a ṭha ang.

"I pa ka lo hrilh dawn nia, kei chu ka hman ka ring lo Duatpui. I nau hi ka lo awm mai ang, dawrah pawh kal ka duh tawh viau a, mahse kan la zângkhai lo rih êm mai" ka tih chuan a lo bu ve mai a, kan sawi zawm tawh lem lo bawk. 

Dar 7 rik hmain Mazara a lo haw a, a fate men laiin Duatpuia te school-a kal a ngaih thu ka sawi a, Duatpuia paw'n a rawn sawi zawm a, pu Kawla leh mi dangte erawh chuan TV an en ṭhap thung. A chaw ei pahin Mazara chuan kan fanu chu a làwm zeuh zeuh a, mahse a ṭawng chuang hlei lo va, a chaw bar lohna lamin a tawk zeuh zeuh a ni mai a, Duhsaki tê chuan a pa chhaih dan ho lam tak chu a lo hlimpui hle. Kan mut te hian a laiah kan mut tir ṭhin a, kan fanu chu en pahin ka ṭawng melh melh zel a, fanu kan nei chu Mazara pawh a lungawi hliah hliah tih a hriat ngawih ngawih. Amah tak hi chuan a sawi ngai chuang lo, mahse a awm dan aṭangin ka hre vek thei a ni.

A tukah chuan Duatpuia te school-ah a han kal ta ngei a, amah ai Duatpuia a rawn haw hmasa zawk a, an result puan nî a ni bawk a, kan dawrah a rawn tlang nghal a, a pa erawh an zirtirtute nen an inbiak avangin a lo haw lo thung. Dawra kal ka ti thut avanga dawra awm leh si ka ni a, mahse ka che nsas lêm lo. Duatpuia progress report card chu ka en a, a va han tiṭha ṭhin em. Mark 100-ah mark 90 a hmu kai vek a, an class-ah pakhatna a ni reng bawk a, zan lamah a pa'n a lawmsak leh ngei ka ring. Thingpui siamin min pui nghal a, ineipuar tura ka tih chuan a la duh ṭhak lo reuh zui. A pitei bulah a ṭhu a, inngaina tawn tak hian an ṭawng mawlh mawlh a, a felin a result a ṭha bawk si a, ka hlim tak zet.

"Duatpui, saw saw tu nge?" ka chhang khawih lai tawp chatin vantlang Notice board bula Mazara leh hmeichhe pakhat hmelchhe lem lo tak ding dun chu ka en reng a, ka kaw chhung lam chu engtin emaw ni hian a rawn awm nghal bawk.

"Kan miss a nih saw nu, miss Zonuni a nia, a fel lutuk, apa chanchin pawh min zawt ve ziah" a thusawi tawp ber chuan min tihamhaih zual a, Mazara leh Duatpuia te miss Zonuni lah chu inhaw lo tih hriat tak hian an ding dun a, ka thik tih chu phât zawh rual a ni lo.

"Engati nge Numam?" pitei'n a rawn tih chuan ka harh chhuak zawk a, sawi tur hre lo zetin ka nautê puakpuan chu ka suih ṭha vel a, fanu kan neih hnua dawr ka kal leh hmasak ber nî a ni a, chhang pawh khawih zawm ta lem lo chuan kan fanu chu ka awi a, mahse ka rilru erawh a mumal lo hle.

(End of Chapter 42)