SUMO DRIVER By Havali Adam (CHAPTER 41)

SUMO DRIVER

By

Havali Adam

Chapter 41

Khua chu duhthusamin a ṭha a, van te chu a pawl thiang kâk a, thli ni se dawn nuam tawk chiahin a thaw heuh heuh bawk nen chuti ang boruak hip chu a hahdam thlak hliah hliah a ni. Mazara chuan kan in kawtah Sumo a sil mawlh mawlh a, vawiin chu a service nî a ni lo va, kar khatah ni inkar thlakin a service ṭhin hrim hrim a, a tâwk ka ti hle. Kan khuaa mite mai bakah khaw ṭhenawma mite pawh passenger a nei nual ṭhin a, amah hretu pawh an tam ve tawh hle. Ka lawmna em em pakhat chu tûmah hian an sawisel ngai lo va, a motor khalha chuan a nawm thu hlir an sawi zawk ṭhin.

"Anu, ka kawrkilh a tla daih" Awmawma chuan a rawn ti a, a School uniform hma chu ka en a, a lo tla tak tak chu niin, bawmtê aṭang khawlà leh kawrkilh ka la nghal a, kutin ka ṭhuisak zui nghal bawk a, kawrkilh hi chu a u Duatpuia hun lai aṭang tawh ka lei khawl ṭeuh a, an tih bo chang paw'n kan buai rei loh phah fô.

"Nu, chaw ei ka siam dawn asin, kan tlai palh ang" Duatpuia zawkin a rawn ti ve thung a, a nau kawrkilh vuah ṭhat mawlh mawlh pahin ka buk khum zeuh a, kawngka lamah thawm a rawn awm a, kan tê ber Hlutea leh pu Kawla an rawn inchhaih lut a, kan fapa tê chu a la nui uar reuh em em zui. 

"Le! Au Duatpuia saw chaw ei siampui ang aw" tiin pu Kawla chuan Hlutêa chu choka lamah a kai phei a, kei pawh ka thil tih lai ka ti zo thuai a, dar zat ka en chuan Duatpuia hlauh ang ngeiin School an tlai dawn chiang tih ka hre nghal. 

"Ei thuai thuai rawh u Duatpui, a tlai tawh phian a nia, Hlutea kha siam a la ngai bawk" chawi ei dawhkan awmna lama Awmawma nawr kal pahin ka ti lawng lawng a, pawn lamah ka chhuak zui nghal bawk a, Mazara chuan a lo sil zo chiah a nih hmel. 

"Lo lut tawh rawh nang pawh, i fate'n chaw an ei mêk a nia, Hlutea hruai i ngaih dawn kha!" derken kung bula a motor silna hmanrua vel a pho lai chuan ka ti leh lang lang a, ngawi reng hian a chet ngaiin a che reng a, a rawn luh thuai ka ring bawk.

"Anu, ka puar tawh" in chhunga ka luh rualin Hlutea chuan a rawn ti nghal a, ka va han awih lo ber chiang êm, a chaw eina pawh a la rei der si lo va, chaw a la ei bang ṭeuh zui a, School kal chu a helhhawlh a ni chiang mai. 

"I la ei tlêm lutuk, ka lo ei pui ang che" tukin chu ka tho nuam vak lo bawk nen ka ṭawng a nêm thei lo tluang zel a, ka fate pawh chuan hlauh ruk hmel deuha min en zawk chang an nei a, ni dangah ka ṭawng hlawk hlawk ngai lo ve bawk êm a ni.

Mazara a rawn la lut rih lo bawk a, pu Kawla chuan chaw bel a chang a, ka hma zawna thlengah chaw a rawn khawrh nghal a, ka ei pui hnu chuan Hlutea paw'n a ei hnem leh lawi si viau. Mazara a lo lut chiah a, pu Kawlan a ṭhutna a sawn nghal a, hei pawh hi vawi eng zah nge ka sawi ngai dawn ni! Kum tam a liam tawh hnuah pawh kan ina a awm tirh lai ang maiin min la zah em em a, a bikin Mazara tak phei chu zah tak a ni. A zah ngawih ngawih hi a ni tawp, kei erawh hmeichhia ka nih vang nge Mazara ang em emin min zah lo va, mahse ka mit tikham zawng hian vawi khat pawh a la awm ngai lo.

"Eng nge!? Eng nge!? Khawiah nge kal i tum leh tâk?" Hlutea chu chelh ka tum chuang hlei lo va, a thleng chawiin a pa bulah a va ṭhu daih a, chung ringawt te chu ka thik kual leh hnuhnawh vel a, tun lai chu ka dik lo tak zet. 

"Duatpui, Awmawm, ka sawi kha hriatreng tur aw? Nangtê pawh anu thin tirim zawnga awm miah loh tur, chaw ei rawh le" a ute pahnihin an pa thusawi zawm tum taka an ngawih kar laiin Hlutea bawk chu a bu nghauh nghauh leh reuh bik tawh a, an pafa awm dan thik ru viau e ti lo chuan ka nui leh ta ringawt.

"Nang eng nge tukin i àn? I tho nuam vak lo em ni?" Mazara chu ka melh deuh run a, kei min ngaihtuah hmasa ber lova kan fate a ngaihtuah hmasa zawk te, min biak dan hrim hrim te, engkim chuan ka lung an tiawi lo hma em em a, ani paw'n a zawhna ka chhan hma chu min en tawp. 

"Nuam lo, motor sil lovin i fate School kal tur buaipui hmanin awm ta che. Naktukah daih i service dawn tho va, ka taksa a nuam lo bawk si nen ka ning tlat" ti hmawk hmawkin ka kham hmak a, a tua mah lah chuan min rawn ngaihsak hmel vak lo leh nghal.

Pindanah ka lut a, khumah ka ṭhu hnawk a, ka chal dawmin ka kun ngul a, ka pasal leh ka fate bula ka awm dan chu a dik lo tih ka hria, nu sual tak angin min ngai ang tih ka hlau ve tho, mahse ka inthunun hman ṭhin bawk si lo a ni. Ka pum chu ka dawm a, thla 5 mi nautê ka pai leh mêk tawh a, mahse a puar lian hran lo. Ka fate pathum ka pai lai aiin a tê daih a, chet kawngah awlsam phah hle mah ila ka rilru a dik lo nasa ber thung. Duatpuia ka pai lai tih lovah kha chuan rai laia thinchhiat ka nei ngai lo va, mahse tun ṭum chu ka nei leh ta a nih hi!

Tunah chuan Mazara nena kan inneih aṭang kum tam tak a liam ve ta reng mai, Duatpuia pawh kum 10 tling tawhin pawl 5 lai a ni ve tawh a, Awmawma ni se kum 8 niin pawl 3 a zir mêk a, kan fapa té ber Hlutea erawh kuminah School a lut ṭan ve dawn chauh a, kum 6 a tling ve tawh bawk. Kan fa neih dan chu a tâwk ka ti hle a, kei chang ka ni lo, mi dangte pawh hian kan fate kum inchhangbung dan chu táwk an ti thei hle. Tun ṭuma mi ve thung hi a tlai hret a, a u nen pawh kum 5 vel lâwihin an inthlau dawn a nih hmel. Keimah tak phei chuan hmeichhia a nih ka ring nghe nghe a, Mazara erawh chuti ang lam engmah a la sawi lo va, a ngaihtuah tawh vak lo a ni ang. 

"Apa, nizanah ka mumangah ka hmu che asin" Hlutea chuan a ti niah niah a, a pa chuan School uniform a hak tir mial mial bawk a, Duatpui leh Awmawma erawh chaw ei kham khan an kal daih tawh thung.

"Engtin nge min lo hmuh a?" a pa nghawngah chuan a kuah nghal zat a, a pa ṭhingṭhi mai mai pawh a la chen ṭha lo va, a ruk tak chuan a inteh leh tawh ang ka ring, a tê ber hian a pa chen a tum nghal em em ringawt a, nuih hi chu a tiza ṭhin. 

"Power Rangers-a a changtupa ang khan Power i nei a, chuan Robot lian deuh i nei bawk a, kan vaiin kan chuang vel" kan TV-a a en fô ṭhin a sawi chuan Mazara chu a khi suk a, a fapa pawm nawlh pahin a ding a, a School bag chu a pawm lohna lamin a khai nghal bawk. 

"Keimahin ka kal duh, ka lian tawh alawm, School pawh ka kal thei tawh" kan tê bera chuan a rawn ti leh zet zet reuh a, nui nghawr datin Mazara chuan chhuatah a nghat thla a, kei pawh rilru fim tak put tumin ka ding chhuak ve leh ta nge nge.  

"A awm rei theih tak tak pawh ka ring lo, han hruai chhin phawt la, duh leh an School-ah i nghak deuh rih dawn nia, a vawi khatna tur a ni dawn bawk si a, a ngen palh ang che tih a hlauhawm" tiin an chhuak tur chu ka thlah thlap a, ka aw pawh a pangngai leh tawh viau. 

Pu Kawla chu hnathawh kawr kan dahna ah a lut a, ram chhuak turin a siam zui nghal a, tun lai chu lô lamah kan buai ve ang reng a, kei pawh rai lo ila chuan ka feh deuh reng ang ka ring. Kan lô neihna hmun erawh a hnai teh chiam lo va, a hla thawkhat ti ila a dik ber ang. A awmna hmun a hlat vang nge ni a zau mai bakah kan buh leh thlai a ṭha hlawm em em a, buh pawh sêng a hun leh tawh mai dawn. Kan thlai thar te chu in lamah an hawn zel a, mai leh maipawl te chu ngah tak ka ni. Hmarcha chenin kan thar kim hle a, Mazara paw'n kan lô neih tawha a la ṭhat ber thu a sawi nghe nghe. 

Kan lô neih tiam lovin ram hi a nghetin hmun thumah kan nei ve thluah a, Duatpuia nausén laiin Mazaran engkim a buaipui vek a, khawpui lamah khan ram chunchangah a kal phei ngun ṭhin hle. Tin, pa Chharan a lo pui bawk a, Duatpuian kum khat a tlin ní ah kan ram nghet a nih tawh thu min hrilh a, khami nî kha chuan kei pawh ka lawm ve hle. Tun hnaiah hian khawpui lam aṭang ram lei dil tâwk an lo lang pheuh pheuh a, ka pasal erawh chuan a phal lo zel a, kan fate tan a la ṭangkai zawk dawn avanga hralh phal lo a ni tih keimah chiah min la hrilh bawk. 

Dar 10 a ri hnai a, muangchangin chhuak tur chuan ka insiam a, Duatpuian School a kal ṭan kum khan Mazara bawkin thingpui dawr min siamsak a, a awmna hmun hi venglai a ni a, kan in aṭangin a hla lutuk hran lo. Kan in ngei pawh kan sa ṭha vek tawh bawk a, hun kal tawh te chu hmânnî lawk angin ngai dawn ṭhin mah ila kum tam a liam ve tawh tlat si a ni. Ka pasalin ka tan liau liau dawr min siamsak Tea Stall chu rin ai takin a lùn ve reuh a, thingpui in tur rawn lêng lut an tam ve thei khawp mai. Putea te chhung erawh eng anga tam pawh ei in mah se pawisa ka laksak duh ngai lo thung a, a thlawn vekin ka ei tir ṭhin. 

Thawmhnaw hak pahin kan in sak lai vel bawk chu ka ngaihtuah lêt rauh rauh a, kum 10 dâwn chu a ni hial tawh lo maw le. Ni lo, kum sawm êm chu a la ni chiah lo leh si ang, a chhan chu Duatpuia paw'n kuminah a kum 10-na a pum dawn chauh a, in thar kan luah luh aṭang kum 6 vel a liam tawh zawk maithei a ni. A enga pawh chu ni se khang hun kha ka ngai, ka ngai thlawt a ni. Ka pasal lah a awm dan a pangngai reng a, keimah zawk hi ka danglam tulh tulhin ka hria. Kei chauh min buaipui tawh lovin kan fate a buaipui hneh em em zel a, a fate zingah ngaina lo tûmah an awm loh phah reng. 

"Kal i tum tawh em ni? Vawiin chu inah awm hahdam zawk rih ta che?" ka pasal aw dam dap ri ka hriat rualin ka hawi phei nghal a, ka lamah a rawn kal hnai zel a, ka hnung lam aṭanga min kuahin ka dul chu a zut zeuh a, chaw ei lai khan lungni lo deuh hmawk hmawk mah ila tunah chuan ka pangngai leh vek tawh.

"Ka kal loh te chuan pitei chauh a awm dawn asin, ka nau pai hian min dip buai lo bawk a, ka han kal zawk ang e" ka lo ti ve mai a, Tea Stall-ah chuan pitei'n min pui nitin ṭhin a, Mazaran hlawh ang reng deuh pawisa pek a tum ṭhin paw'n a la duh ngai der lo. 

"Ram chhuah ka tum tehreng nen Hlutea khan School bana hmuak turin min ti tlat si a, ka ṭhulh mai a ni ang chu!" ka nghawngah a khabe a nghah zawm zat a, a ban pahnih ka kawng zawna kham runin min sùkpui dalh dalh a, tun lai chu ka pasal hi ka ngai thar hrim hrim, ka rai vang a ni maithei. 

"Lô lam chu ngaihtuah buai duh suh, i tel lo paw'n pu Kawlan a buaipui thei ve tawh alawm, School-a i chhoh hma chu dawrah lo awm ve daih rawh" min kuahna aṭanga awm sawnin ka pawisa dah ṭhinna bag chu ka lá a, ani chuan min lo en reng thung. 

"Nang pui roh hi i thau ve deuh chiang mai, kan fate avangin ka lo chík ngai miah lo che a, pum chhunga nautê pai pawh ni mang si lo" fiamthu deuh reuh chuan ka ti hlawl a, ka nui nghal var var a, a thau dan lah chu a la tâwk tiu teu em em zui. 

"Kei chuan karah fate awm tawh mah se ka chík tho che asin, i ṭha tulh tulh bawkin ka hria, i rai lai hian i ṭha zual" ti supin tukverh bulah a ding a, bang chu a ngheng deuh duai bawk a, sawi tur hre lo zetin ka nui leh ta ringawt. 

"Ka thau viau tak tak em ni? Ka lán mawi loh phah em?" darthlanga in en pah chuan a ti leh a, insum thei lovin ka nui chhuak hak hak a, nui miah lo hian min rawn en thung a, thau chu a hlau vel ve lutuk. 

"Lán mawi loh phah lo ve, nang hi chu engkimah i tâwk chiah vek zel alawm, i thau dan pawh a tâwk chiah a, i lang ṭha zual zawk maw le. Dul kiar i ni hleinem, i thau dan a sakhat a, a tilang lian zual chein ka hria" ti siam siamin pindan aṭang chuan ka chhuak a, ani paw'n min lo zui chhuak ve nghal mai. 

Kan nupa chuan dawr lamah kan inzui chho va, Hlutean school ban huna hmuak turin ti lo se chu lôah a kal chiang ngawt ang. Kal tum tak tak se chuan dan ka tum lém lo, pu Kawla pawh a khawngaih thlak ve tho alawm, mahni chauh chuan eng pawh ti ila a nuam tak tak thei lo. Chhun pachan laiin thingpui in tur an lo lut sap sap a, tun ṭum chu ni dang aiin lo lêng lut an tam phian bawk. Mazara erawh school lamah a kal leh daih tawh a, Hlutea lo ban hun a hnaia ka hriat tawh avangin ka kal tir kha a ni a, lo haw leh vat zawk se ka duh vang a ni pakhat.

"A va han tui Cial ṭhin ém, a siamtu lahin a zir bawk si" Rampana chuan uar zet hian ka thingpui siam leh ka chhang kàn chu a fak a, ani hi kan khaw primary school II-ah zirtirtu a ni a, a thawhna pawh a rei ve viau tawhin ka hria.

"Teh duah ṭhin che hian, mî nu ka nih tawh hi aw" tiin ka fiam lêt nghal a, pitei chu kan ṭawng dan avang chuan a lo nui mai mai thung a, Rampana pawh a nui nghal hawk hawk a, duh chu ni se kan khaw hmeichhiate hian an star hlawm maw le.

"Mî nu tak kha lo hmu tài ta tlat si ila" tih leh ka kawng zawna rawn ben zeuh chu a rual nghal a, chutih lai mêk chuan dawrah Hlutea a lo tlan lut a, a hnungah Mazara a ding reng bawk a, mahse kei ni lovin Rampana chu a en daih thung. 

"Anu, ṭhian thar ka nei ṭeuh asin, A AW B pawh ka thiam chhuak vek, ka ṭhiante chuan an thiam ve miah lo" Hlutea chuan a ti nghal zet zet a, a school kal ṭan ní ah ringawt pawh sawi tur a ngah nghal hle chu a ni si a, hei tê hi chu a va han danglam bik chiang tak!

"Nghal ngawt che chuan Hlute, kei chu i thiam tak tak pawh ka ring lo e a! Dawt i sawi ka ring, A AW B te chu a har asin, a thiam nghal ngawt theih loh" pitei chuan a rawn ti fiamthu a, kei chu chhang kán pahin ka lo nui tawp ringawt.

"Ka thiam tak tak alawm api, ka nuapan laiin apa'n min zirtir vek tawh" Hlutean a pa hming a lam rik rualin Mazara awmna lam ka hawi nghal a, a mitmengah chuan lungawi lohna ka hmu tlatin ka hria, pitei leh Hlutea inbe thawm te chu hre reng mah ila ka rilruah a lut tak tak thei tawh lo.

"Lo kal rawh le, inbual fai hnuah kan chho leh zawk dawn nia" mi pawh en rei duh lovin Mazara chuan a fapa chu a ko va, Hlutea pawh phur zet hian a pa lamah a phei nghal a, engmah sawi lo mah se ka pasal awm dan avang chuan ka ngaih a ṭha chiah lo a ni.

An pafaa an chhuah hnu chuan mi dang an lo lut a, thingpui leh chhang ka chhawp nghal a, hnathawk haw ho hian tun hnai chu min dawr an uar thar a, an intihhmuh a ni mah zawk. Min dawrtu te an chhuah fel hnu lawkah kan khaw Pastor a rawn lêng lut ve thung a, min hmuh apianga min chhaih ṭhin angin a hmuh laia theihai vawm tlâk ka tum thu bawk a sawi leh ta. Kei lah chu a nui nasa ber berah ka ṭang ziah leh ta nghal a, tleirawl ât lai mah ni se hun kal tawh a rawn sawi chhuak chu ka hlim phah hle. 

Kan khaw pastor hi Mazara nen kan inneih hnu lawk aṭang kum eng emaw zah chhung chu khaw dangah Synod lamin an transfer a, mahse kumin khan kan khuah bawk an rawn awm leh ṭan a, a thusawi te hian Pathian thil tih mak a nih thu a sawi fô ṭhin. A ni ve reng a, pastor te hi an awm tawhna hnuah an awm nawn mâng lo va, kan khaw pastor pu Ṭhuama erawh a rawn awm nawn tlat a, mak ve tak chu a ni. Ka vawi khat hriatna a ni nghe nghe a, mahse hman aṭanga kan lo hriat tawh leh kan inneih nîa min inkutsuih tir tu ngei kan khuaa an rawn transfer nawn leh chu ka lawm ru viau.

Tlai dar 2 leh a chanve velah ka haw thla a, dawr chahbi erawh ni dang ang bawkin pitei ka kawl tir tawp a, ani hi chuan a dawr ang tak takin a en a, kei paw'n ka ring tâwk em em bawk. In chhung ka lut chu a lo hnawk nûaih a, pindan aṭang Hlutea a rawn tlan chhuak a, hmai chu râng nasa tak a ni. Rei lovah a pa a rawn chhuak ve leh nghal a, bana sana lem ziah te, hmaia hmaikawr lem ziah te hi chu Duatpuia aṭang tawh a ching em em a, ngaiah a nei hmiah tawh ni maiin ka hria.

"Awi awi awi, in hi in lo va han tihnawk ve le! I hmai kha tireh nghal rawh u, nang pawh engati nge i lo ziah rân sak leh vak tâk? Sim ve em em tawh rawh, chaw in lo chhum tawh em?" ka ti nghal zung zung a, an pafa chuan an ngawi reng a, dawrah an lo chho har ka ti réng a ni! 

"Kal ta che u, bathroom-ah va intifai rawh u" ka tih leh chuan an che chhuak ve ta chauh a, bathroom an lut chiah chu hauh ngaiin pakhat têa zawk a awm leh hâr har tawh a, tui a suasam leh tawh a ni ngei ang. 

"Khap ve ṭhin mai rawh Mazar, tui kha chawi a harsa si, kumin chu tui a ván hmel viau leh nghal" ei rawng bawl pahin ka ti lawng lawng a, chutih lai mék chuan Duatpuia leh Awmawma an rawn haw a, pindanah lutin an inthlak nghal a, ani hi chu buaipui vak an ngai tawh lo, anmahni tâwkah an fel em em zawk.

"Nu, khawiah nge apa?" Awmawma chuan a rawn ti a, ka chhan hmain Mazara chuan bathroom-a an awm thu a lo sawi a, chutah Awmawma chuan a kawr hak lai a hlip ta sawk sawk mai, Duatpuia meuh pawh a bang chuang lo.

"Tui kha in ti tenawm ang nge aw? Ka ning, ka sawi peih tawh lo, in chawi leh vek tur zawk alawm a nih, kei chu ka rai miau a, ka chawi hauh lo vang" thil kán chawh sawk sawk pah chuan ka ti a, bathroom aṭangin Awmawma ber chuan

"I lo inbual ve châk a nih kha a ti apa'n" a rawn ti a, zat hmel zeta nuiin naupangho chu an khek nghal tuar a, kei erawh ka nuih a za ve thei der lo, va kal chilha hauh hrep mai ka duh, an ngaihtuah tawi hlawm bawk si. 

"Belpui chhungah te khan in awm emaw a ni leh ang a, tui thianghlim sa zawng zawngte kha in titenawm vek tawh ngei awm si a, râk rak lo khan inbual ṭha hle hle rawh u, in thawm ka hre hne" ka ṭawng zo chiah tihah Hlutea zik zek tê chuan

"Râk!" a rawn ti vak kher a, min runluih tih hriat lutuk hian an nui vak vak a, ka thinin a tuar ta bik lo, bathroom kawngka chu ka chum ri dawt dawt a, min hlau awm ang ziazângin an ngawi ang ṭhap leh ta nghal a, min hlau lo tih ka hre chiang hle thung. 

"Apa'n min tih tir alawm nu" ṭawngthei têa chuan a rawn ti leh reuh a, Mazara nui thum dut ri chu ka hre zawm zat a, a insum a nih ka ring a reh leh hmak a, ka uang lo tih an hre ta bawk a ni ang an vai chuan an reh zui ta ṭhap. 

"Rawn insawi thiam vel kha a ngai lo, in inbual dawn chuan inbual ṭha hle hle rawh u" ka ṭawng ri chu a la pangngai thei meuh lo, mahse a hma ang em emin ka vin tawh lo thung a, inbual an duh a nih chuan bengchheng lo leh tui titenawm lovin inbual mai se ka duh a ni ber. 

An inbual zawh meuh chuan dar 3 a pel vâr var tawh a, vawi eng zah nge kan inhauh leh hman pawh ka hre lo. Chhun tur an nei ṭha bawk a, nghal hlawm tak an ni. Thawmhnaw an hâk fel hnu chuan min tlawn titih hian min bia a, ka ei rawng bawl lai te chu min pui a, Hlutea thleng chuan an che sap sap reuh a, nu tan chuan lungawi loh reng a theih thlawt loh. Ka nui hmel an hmu chiah chu naupangho an rawn nui nghal var var a, Mazara pawh a khi ve suk nghe nghe a, han vin chiam mah ila an bulah hian ka hlim ber tho tho zel. 

Zanriah kan ei lai te chuan a tê ber a ṭawng leh zet zet a, mi dangin kan lo nuih pui a, Hlutea hi chu a ṭawngthei mah mah lam a ni. A u chiah Awmawma a ngawichawi em em a, Duatpuia ni se a fingin thil a hrethiam chak em em bawk a, ze inang lo ṭhah ni mah se an inhmangaih em em hlawm tho. An têt tê aṭangin unau inhmangaih dan ka zirtir a, an ṭhan len chhoh pui zel a, an unau pathuma an inkawm lai thlir te hi ka kham lo ṭhin. Ruah a sur apiangin dawhkan chungah puan an phah a, a hnuaiah an pathumin an awm a, dawhkan hnuai chu bûk anga ngaiin an inkhualtêlem ṭhin. 

Tunah chuan Duatpuia paw'n pawl 5 lai a zir ve tawh a, ani hi chu a naute inkhualtelemna ah a tel vak tawh ngai lo. Awmawma leh Hlutea zawk hian an la hrat a, Duatpuia sawm chang an nei ṭhin tho bawk. A naute'n an sawm ngawng ngawng hi chuan a thil tih laklawh lai pawh ni se a tel ve leh mai zel a, engkimah û a nih angin a naute a dawm thiam em em a, a awm dan leh a chet dan hian a pa lung pawh a tiawi ṭhin hle. Kan fa hmasa ber kha a ni miau a, a rawn ṭhang lian chho telh telh a, Mazara a ang tulh tulh a, kan fate zingah ani ang baka a pa chhun hi chu an la awm lo a ni. 

"Zan laiah a ṭap leh vel ang e aw, hetah mutpui mai ang" Hlutea ngaihtuah zet chuan ka ti a, ka pasal erawh a ṭawng lem lo va, ngawi reng hian ka hnung lam aṭang min kuah tawp a, a ûte bula kan fapa naupang ber a riak tur chu ngaihtuah a nâ duh hle. 

"Tho teh Mazar, i fapa ṭawngthei em em saw va pawm phei rawh. Zan laiah a harh ang a, keini min zawng ngei ang a, a ṭap dawn sa, ka hre lâwk vek thei. I thawh duh loh chuan keimah ka va kal mai ang, khaw maw min thlah teh" 

"Zing thawh hma ka ngai, muhil thuai zawk ang" ka hnung lam aṭanga min kuah bet runtu chuan a ti duh lêk chauh a, tal chhuah harsa khawpin a âwmah min kuah bet tlat a, thawh phêt ka tum lo ta mai. 

"Vawiinah school a kal ṭan dêk dek a, a inla puitling nghal em em chu a ni si a, ani tê reuh hi an tlangval hunah pawh a ûte pahnih ai nuipui a nei hmasa reuh lo maw, chuti ang mi chu a ni dawn tlatin ka hria" tiin ka ṭhen zui sak a, ka mut a chhuak teh chiam lo bawk.

"A chhun dawn che a ni mai alawm" ka nghawnga a hmai phum pah chuan a ti thum dut a, min sawi dan ber kher chu ka chhan lêt châk zawng tak a ni leh tlat pek a, chu bakah a sawi tum ka hrethiam nghal vek hrim hrim. 

"Pasal nei hma min ti tih ka hre tlang vek, mahse a bul chu nangmah a ni. Rawn lang vel lo la chuan maw Bachelor degree pawh ka nei var var ang, min ruk daih vang a nih kha degree ka neih hman tâk loh" ka ti ta duah a, ani ve thung chuan awlsam tê hian

"Min hmangaih tlat si alawm" a rawn ti a, chhan lêt vak tumin ka âng zuau a, mahse sawi tur pakhat mah ka hre lo, ka hmangaih miau bawk si a, sawi dik loh pakhat mah a neih loh bakah chhan dan tur ka hriat lawk loh avangin ka ngawi ta ringawt.

"Zanin chu ka mamawh hle mai che" amah bawk chuan a rawn tih zawm leh nghal a, a ṭawng zawi lutuk der bawk si lo va, naupangho mutna lam chu ka en phei vat a, an lo hriat palh vaih chuan a chi loh viau ang. 

"Ka mamawh ve lo che, sawi tlawng zel suh, naupangin kan ṭawng an lo hre thei tih te ngaihtuah thleng ve ta che. Nang hian Hlutea saw a ûte bulah mu turin i hrilh a ni maw, i hrilh a ni chiang mai, mak ka ti ru reng a ni" 

"Thil tih ka duh alawm" a sawi zawh rualin ka dul zawna a ban chu dah thlak sak ka tum a, ka dah thla hman tawh nghe nghe a, mahse a ngaite bawkin a rawn dah chho leh ngat a, a kut lak sawn ka tum leh chu a lo sak tlat tawh.

"A hun lo thei ê Mazar, engati nge ka rai lai hian nupa nun hman i tih ve ziah? I tibuaithlak, naupangin kan thawm an lo hriat palh phei chuan a chi dawn loh lutuk" ka tih chuan ka chungah a rawn awm titih nghal a, ka thusawi engah mah ngai lo ang maiin a la khi suk zui.

"I duhthusam bakin ka che ngai lo tih i hriat kha!" tih leh min fawh a rual nghal zat a, a mi tawhna avanga ka zauthau hma lutuk te, ka danglam hma lutuk te hi tun thleng hian mak ka la ti, ngaiah ka nei thei lo reng reng, hmangaihna vangte pawh a ni mahna le.

A sawi dik leh ta chiah e, Mazara ang em ema mihring zei hi an piang leh tawh kher lo vang. Nupa nunah chauh pawh a ni lo, engkimah a famkim emaw tih theih turin a awm ṭhin. A fate ngaihsan ber chu amah a ni a, a nupui mihring ngaihsan ber pawh amah tho a ni a, ani ang chhungkawpa atana kan nei hi kan vannei hliah hliah a ni. Pathian malsawmna dawng tlâkin a nung a, a chhungkua a enkawl zovin in chhung a luah lum hneh em em a, kan inneih tirh lama thaibawih titu ṭhenkhat te phei chuan an ngaisang ru leh viau tawh zawk. 

Zingah chuan hma takah ka tho va, tun ṭum ka nau pai chu tum loh dêuh deuhin min awm tir reng mai. Kar khat vel a ni tawh ang zing kar hma tak takah ka tho ṭhin a, Mazara paw'n engtin mah min ti ngai lo, a hrethiam ve maiin ka hria. Tui lum ka chhuang a, hmân ang reng kha ni tawh bik lovin Gas kan hmang ve tawh bawk a, kawng ṭhenkhatah hi chuan a awlsam phian. Hmanhmawh chang te hian Gas kan hmang mai zel a, thuk ai ngawt chuan a lo chak deuh si a, chawhmeh kan tih hmin zung zung theih phah ṭhin.

Pindana ka va luh leh chuan kan nupa khumah nuapang pathum nen an lo mu tlar dual a, Mazara chuan a fapate chu a kuah khawm vek a, amah a lian ṭha bawk a, a kuah pha vek maw le. Dar 7 pelh hret velah ka va kai tho leh a, an zi mar ṭiah ṭiah hlawm a, an va han inang pafa hlawm niah niah tak. Nizan khan tlai lam thil sawipui ka tum kha a ni a, mahse amah zawkin engmah a sawi ta si lo va, chu bakah lungawi lo hmel a pu tawh lo hrim hrim kha a nia, sawi chhuah loh law law chu a ṭha zawkin ka hria.

Tukṭhuan ei dawnah in hnuai aṭang pu Kawla a rawn chho va, kum 4 kal ta khan Mazaran a awmna tur bik in hnuaiah a siamsak a, tun thlengin a la awm a, amaha riahna hran a nei chu nuam a tih hmel viau bawk. Chaw ei laiin Mazaran kar leh lama lôa kal a sawi a, zan khat a riah tur thu a sawi nghe nghe a, kei chuan ka lo peih lo ru nghal viau mai. A fate erawh an phur tawh hle a, school chawla riah ve an dil a, Hlute thlengin an dil chamchî a, Mazara lah chuan awlsam tê hian a lo la phal mai zui.

"Ka ngaihtuah lai tak che, lo kal teh. Nizan chu thil ngaihtuah chhuah ka nei a, thil hrilh tur che ka nei a nia" kan dawra ka luh rualin pitei chuan a lo ti nghal a, a bulah ka ṭhu ve mai bawk a, mahse ka pum avangin stool-ah ka ṭhu thung. 

"Kum hei leh chen hi Mazara nen in innei ve tawh a, nupui pasal zawn kawngah hian kan chhungkaw milpui kher an ngai lo a ni tih in finfiah chiang khawp mai. A hma kha chuan nu leh pa ṭha tih chauh neih te, kan chhungkaw milpui deuh chauh neih te kha a ṭha emaw ka lo ṭhin a, mahse a lo ni bik kher lo nasa mai Numam" pitei chuan a ti siam siam a, sawi chhan eng emaw tak chu a neih ka ring.

"Mazara nen in hlim dun em em te, in inhmangaih tawn em em te, in fate inenkawl thiam em em te hi hmuh in nuam chhungkua ṭhin. Hmangaihna hi a lo pawimawh ta ber a nih hmel, mi hausa fanu ni ṭhin kha i inthlak danglam chiang êm mai" amah bawk chuan ti lehin a nui zui hak a, a ngaihtuah thui hmel hle bawk.

"Ni e, hmangaihna hi nupa hlimna bulpui ber chu a ni asin pite. Eng nge i ngaihtuah thlen ka hre chiah lo va, mahse ka chhungte tel lo pawha ka hlim em em thei hi kei chu ka lawm a ni. Sawi chhan i nei ti raw? Eng nge i sawi tum ber pite?" ka ti ve ta nge nge.

"I chhungte lam chu ni lo ve, Tlantea zawk hian ka ngaihtuahna a tibuai a ni. Vengthlanga mi nu Piani fanu khu a ngaizawng tlat mai bawk si a, zu zuar an ni kher nen a hma hun tur ka ngaihtuah lo thei lo a ni" a tih chuan sawi tur ka haihchham hle.

"A pa chuan vawi khat chu ṭhen turin a ti tawh ngei a, mahse chu bak a sawi leh tawh lo thung. Dik tak chuan Mazara nena in inkawp fuh ang hian han inkawp thei se chu pawi ka ti miah lo maw le, mahse kan fapa hian a dai sual palh ang tih ka hlau êm a ni" rawn ti lehin chhang chu a nawr zawm nghal a, engmah sawipui lovin ka che ve ta ringawt. 

Tlantea biak erawh ka tum ru rán a, a nu leh pate hlauhthawn ang chu thil ni thei tak a ni. Ka tawn hnu vek a ni a, chu vang chu a ni ang pite paw'n ka bulah kher a sawi chhuah. Ka pa phal lo chung kan chhungkua aia rethei daih zawk leh thingtlang tlangval ngat pasalah ka nei a, ka hma hun an dáwn lutuk avangin kut te min thlak hial kha a ni a, mahse Mazara rilru ṭhatzia leh pasal innghahna tlâk a nihzia kha an hrethiam pha tlat lo va, ka ngaihdanah tak phei chuan an hmu lo lui der a ni mah zawk.

Pitei bawk chuan thil dang a rawn sawi ta daih a, rei lo tê hnuah ka nui dun leh hak hak a, dawra lo lêng lut an awm zeuh zeuh bawk. Chhunah hi chuan School-a mi tur kan siam deuh tlangpui a, kan ei tur siam la turin zirtirtute'n zirlai naupang an rawn tir mai zel a, vawi khatah pawisa lo lut nghal ṭawk lo mah se nitin han hralh hi chuan a hlawk ve thei ṭhin khawp mai. Kan sum hailuh dan a thianghlim a, sawisel leh elrel kan la tawk lo hrim hrim bawk a, thlai zuara naupang kal kual ṭhin ṭhenkhat phei chu a thlawnin thingpui leh chhang ka pe tawp zel. 

Kar thar kan chuangkai a, rai e ti lo chuan ram riah ka'n châk ve tlat pek a, a fate kal phal vek si kha Mazara chuan ka kal ve a phal nghal der lo thung a, ka titauh hrep hnuah a phal ve chauh. Zep lovah chuan a tel lova mut ka peih lo alawm, kan inneih aṭang khan harsatna kan tãwk te a nih ngawt loh chuan vawi khat mah kan la mu hrang ngai lo va, kan fate pathum a hruai dawn bawk si nen tun ṭum chu rai lai ni mah ila ka riak lui mai a ni ang chu! Darkar tam tak thlâm thlen nân hun kan hmang a, kawng chho deuh lai leh chhuk deuh laiah te chuan min paw tawp a, ka inthlahrung hnuhnawh ang reng. 

Thlâm kan thlen ve meuh chuan zing lama chhuak si kha chawhnu lam a lo ni duai tawh a, ei rawng ka bawl laiin a fate pathum tui chawinaah a kalpui a, Hlutea em em a hruai chu ṭul ka ti vak lo. Kawnga an kal te chu an hlim thla hle a, engkim a hria emaw tiin Mazara chu kan fate'n thil chi hrang hrang an zawt thla mawlh mawlh a, Mazara lah chuan a lo chhang thei zel leh nghal. Kan riah dawn tho avangin hnathawh nghal loh a rawt a, tûma'n kan hnial lo va, pu Kawla pawh thlâm chhunga a awm loh leh thlifim dawngin pangbal kung bulah a awm ta hle hle ringawt. 

Hlutea ber chu harh tak tê hian a harh a, a û Awmawma pawh a tiharh zo vek. Pangbal kungah lawnin an infiam a, pu Kawla chu thlithlai reng turin ka hrilh nghe nghe a, Mazara leh Duatpuia erawh sazu thang kam dan an inhrilh malh malh thung. Thlâm bulah chuan vai thang a awm ṭeuh a, chungho chu sazu thang vek an ni a, mahse an inhrilh dan chuan zan lamah an kam dawn a nih hmel. Ei rawng bawl pahin an pafa thil inhrilh chu ka en leh zauh zauh ṭhin a, an inkawm ngeih a, Mazara tak pawh hian a fate avangin ṭhian a kawm vak lo ṭhin, mahse chu chu fate kaihhruaina kawngah a lo ṭangkai em em si.

Khua a rawn thim a, Lalṭin êng hnuaiah chaw kan ei a, ka ei hnem lutuk chu ka dul a len belhin ka hre hial a, rama chaw ei hi chu hmân aṭang tawh engtik lai paw'n a tui hrim hrim a ni. Awmawma leh Hlutea chuan vai thang kamnaa a pate zui an tum leh ta tlat a, ka phal loh nasat tehreng nen Mazara bawk chuan a phal leh ta hlawl mai. Hlutea chu a pa'n iptêpui lian zetah a ák a, an kal hma hawt aṭangin a nuam ti ber berah a ṭang nghal a, kei paw'n ka ngaihtuah leh ta vak lo zawk. Eng thil pawi mah a thleng bik kher lo vang, an bulah Mazara a awm dawn tlat alawm, a venghim hneh lutuk tlat. 

Thla chu a êng ṭha hle a, mipaho zawng chu vai thang kam turin buh hmun lamah an liam thla ta vek a, ka bula Radio chu ka on nghal zat bawk. Radio pawh hi a rei ve leh tawh khawp mai, kan inngaihzawn tak tak hmaa a neih daih tawh kha a ni a, tun thlengin a la ṭha a, a la hman tlâk bawk a, mahse tlêm chuan zai play hian a lài a awm ve ṭan deuh tawh. In lamah erawh Cassette thun ngai chi Tape kan kawl a, Cassette pawh percel bawm khat chuang daih kan nei a, a ṭhen chu Rambo polythene-ah kan dah nghe nghe. Chanchin thar ngaithla hmasain zai ka ngaihthlak chhunzawm a, thawm reh vawng vawng chuan lung a tilêng duh ang reng. 

"Nang tal hi chu hmeichhia i nih ngei ngei a ngai, mipa rual bula awm zawng i nu hi ka mal lutuk. Hei tunah pawh min chhuahsan leh vek tâk hi, khap dawn lah hian khap sen loh khawpin an inkawm ngeih hlawm bawk si, hmeichhia rawn ni ngei ngei ang che, i pa hriat loh laiin ka hrilh che a nih chu aw" ka dul zut pah chuan ka ti a, ka nui zui sak bawk.

(End of Chapter 41)