SUMO DRIVER By Havali Adam (CHAPTER 40)

SUMO DRIVER 

By

Havali Adam

Chapter 40

Ni lêngin inah ka che a, ka hlim a ni. Ka pasalin min be leh tawh ringawt te chu hlimna tham a tling a, chutah naktuk aṭang service a tum thu a la sawi zui, a hun ve tawh reng bawk a ni. Kan ina lo kalin a ṭhen phei chuan service turin thu rawn an pe ṭhin hial a, mahse khang hun lai kha chuan ṭawngkam khat paw'n a chhang duh ngai lo a nih kha! Lo kala te pawh kha beidawng titihin an haw leh ringawt ṭhin a, tunah chuan service a tum tawh bawk a, an lawm hlawm viau ang ka ring.

A sawi ang ngeiin pu Kawla chuan min awmpui a, ka insuk laiin tui a lo chawi thung a, hna thawh hreh a nei lo ve khawp mai. A chang hi chuan awm mai mai tur te'n ka ti ṭhin a, mahse awmzia a awm der chuang lo. A taima phian bawk si a, hre chiang lo tan phei chuan kan chhawr hrep te pawh a ang lek lêk zawk a ni. A che reng reng hi Mazara ang mai hian a zâng vah a, a che muang thiam lo emaw tih tur ang chi a ni a, a awm mai mai thei lo a ni ber. Ka insuk zawh chuan ka pho leh thlap a, pu Kawla paw'n thing a tan leh daih tawh.

Chawhnu lamah Duatpuia a rawn harh a, ka sawi leh pek ṭhin ang, a pa chhun ngawih ngawih thlawt a ni. Vun lamah erawh keimah min chhun thung a, a ngo reuh khawp mai. A mitmeng ni se a pa mitmeng ang maiin a mawi a, han lawm lah hian a la nui duh em em ṭhin zui. Nautê mai la ni mah se naupang tak tak angin ka be mial mial zel a, ka ṭawng dan aṭangte hian ka chhaih leh chhaih loh a hrethiam vek reuh a, kum tam la ngai dawn mah se a tlangval hun ka hmu châk tawh hle. 

Tlai dar 3 leh a chanve velah Mazara a lo haw a, rin ai tak chuan a lo haw hma phian. Ka chawhmeh duh em em mai hruizik a rawn hawn ṭeuh ta ngei a, a inbual chhungin ei rawng bawlna tur tui lum ka chhuang a, inbual zovin thawmhnaw a inbel nghal a, ei rawng ka bawl lai chuan bawl chhunzawm a phal leh ta tlat lo mai. Ṭhutthlengah min ṭhut tir a, Duatpuia min pawm tir bawk a, kei chuan a che vel chu ka lo en tawp ringawt. Ei rawng chu ama'n a bawl vek a, pu Kawla erawh in kawtah a awm rih thung.

"Ka ngaihdam dilnaah che ngai mai rawh" min hnung chhawn zawng hian a ding a, ka en reng tih leh ka rilru ah zawhna tam tak a awm tih a hria a ni mahna, a thusawi avang chuan ka hním deuh ruih nghal a, ka mit chu ka khap ta zawk zawk bawk. 

"Hruizik chhung nò lai hi ka'n buhchiar ang e, maian leh maitê ka bai pawlh bawk ang a, tui i ti viau ang" amah bawk chuan a rawn ti leh a, Duatpuia chu ṭhutthlenga mutin a ṭhutna lamah ka kal a, a hnungah ka bei thlawp zui nghal. 

"Ka ngaihdamna i mamawh reng reng lo, ngaihdam min dil a ngai lo bawk" mit chhing vang vang chuan ka ti thawp raih a, ṭah hun ni lovin hlim hun zawk a ni tih ka hria, mahse ka mittui te chuan lo chhuah an châk zek zek si a ni.

"Ka pa leh zelin min kalsan ta mai kha ka tuar nâ êm a, nungchang mawi lo taka ka awm avang khan min ngaidam mawlh mawlh dawn nia" ka lam hawi zawnga a rawn inher hnu chuan a ti dam dap dap a, ka ṭah nuih hak ta nge nge. 

"Min lo ngai hman awm si a, ka duat i phu chuan ka hria" nui suk hian a ti leh a, ka khabe chawi kângin min fawp vawng vawng zui nghal a, ṭhutthleng lama thawm awm avangin kan inṭhen hrang ve thei hram a, Duatpuia chuan a ke a lo leng vak vak reuh a nih chu! 

"Thik thu chhe reuh lutuk" ti supin Mazara chuan a pawm nawlh a, a âwm leh a khabe hnuai bawr vel chu a hmuiin a nawr nawk nawk a, Duatpuia chu a rawn nui uar hle a, thla 5 hmel ka hnaih ve tawh bawk a, a nui duh sâwt khawp mai.

Mazara chu pindanah va lut zawkin puakpuan a rawn la chhuak a, Duatpuia puak pahin ei rawng a bawl zawm leh nghal a, ka chet a phal miah lo chu a lawmawm rualin a nuam viau lo. A hmel aṭang a inthiam lo tih ka hre tlang vek bawk si a, chutah awih pawh a awih hmain Duatpuia chu a la muhil daih zui. A puak dan siam remin a hma thlak a, lungchim zet hian a fapa chu a en leh vawng vawng ṭhin a, kei tak pawh anmahni thlir chuan ka lo hlim ve veng veng thei.

Tlai lutuk lovah zanriah kan ei a, ka chaw ei tui zia chu pui tak a ni. Chawhmeh a siam tam em em pawh a ni lo, ka ei tui ngâng a ni ang vawi thum lai chaw min khawrh nawn hial a, pu Kawla pawh zan dang ai a ei hnem zualin ka hria. Chaw kan ei kham a, eina vel ka seng fel hnu chuan inbual turin bathroom-ah ka lut a, kawngka ka kalh hmain Mazara chu a rawn lut ve ta hlawl mai. Nam chhuah ka tum a, a la chhuak duh miah lo zui. Chhuak tura ka tih apiang lahin

"A zahthlak loh" a ti tlat mai bawk si a, zah loh pawh tum ila ka zak tho tho, chu bakah a mawi lo hrim hrim, sitting room-ah pu Kawla thil zirin a awm ve reng a, kan thawm chu a hre ru reng tawh zawk maithei a ni. 

"A hun lo êm mai Mazar, duh leh zanah ti zawk mai ang" min fawh a rawn tum rual chuan ka lo ti vat a, min hnaih zel loh nân a âwmah ka nam ṭawng ṭawng a, a mitmeng aṭang a rilrua thil awm chu ka hre vek ngei alawm, mahse a hun lo tak zet a ni. 

"Zan chu ka hmang mêk" tih leh min fawh a rual nghal a, theih tawp chhuah tak meuhin ka nam sawn thuai a, chuti anga ka chet chu a ring lo a ni mahna rangva a nek ri leh ta nghal a, pu Kawla tan chuan hriatthiam loh chi a ni tawh lo hrim hrim.

"Ka sawi awmzia i hre vek, chhuak phawt teh Mazar" tiin ka nam leh a, rawn che thutin min fawp ngawng ngawng a, zep lovah chuan ka zauthau chiang alawm, ka chhang lêt hman nghe nghe a, mahse ka har chhuak rang hle thung.

"Ka mamawh che" a chala ka chal nawr pah chuan a ti hniam ruih a, a hmel ka en chho nghal a, a lo maimitchhing daih a, muangchanga rawn mengin kan inmelh ta reng a, ka âwm bawr chu a kut lian tak chuan a la ṭham reng bawk.

"I thusawi kha ka hre rei khawp ang" ti lehin bathroom aṭang chuan a chhuak ve ta hram a, ka thlahlelin ka mamawh lo bik pawh a ni lo, a chhuak chiah chu inthiam lohna ka nei nghal a, min mamawh tih chiang takin ka hria, mahse nupa nun hmang ringawt ta ila pu Kawla tan hriat nuam loh a awm dawn si a ni. 

Ka inbual zo va, Mazara chuan Duatpuia a lo pawm muhil leh daih tawh a, a rilru ka hre reng mai si a, ka nuih a za thar ta viau. Mut a rawt nghal a, keiin putea te veng lama len chhoh ka rawt thung a, a lungawi loh hmel teh e! A tawpah erawh ka rawtna ang zawk chuan kan lêng chho va, putea te nupa pawh an lo lawm khawp mai. Nau ka pai chhung zawng khan min ngaihtuah reng rengin hun an hmang a, zan tin deuh thaw an lo lêng thla ziah a, lên chhoh chu kan bâ mawlh mawlhin ka hria. 

Mazara pawh a hma ang em emin la pangngai chiah lo mah se a zia tawh viau a, pute zawhna te chu a rul tâwk chiah chiah hian a chhang a, kei leh pitei erawh Duatpuia pawm pahin thil dang daih kan sawi thung. Pu Kawla chu putea bawkin fiamthu titih hian a be leh a, zawhna maksak deuh deuh a zawt a, a chhan thiam loh chinah chuan pu Kawla pawh a nui tawp zel. A ngainep vang leh a hmusit vang a ni lo va, putea hi chu fiamthu a ngaina ve hrim hrim a, ngaiah kan nei vek tawh zawk. 

Dar 10 pelh hretah kan haw thla a, in kan thlen rualin Mazara chuan kan fapa awih mut a tum nghal a, ka lo nui tawp ringawt. Ani pawh a nui suk ve tho va, a rilru ka hre chiang lutuk chu a nuihzat thlak lai ber a ni. Pu Kawla erawh a muhil leh daih tawh a, ani hi chu a mut hnu rei lovah a muhil nghal mai zel a, mut tak hi chu a harsat lo ve ṭhin khawp mai. Chutah kan fapa tê lah chu a la harh ṭha em em leh ta nghal a, Mazara ni se ka bula mut a châk tawh hmel bawk si nen an pafa awm dan chuan min tihlim hle.

"Duatpuia kha timu phawt rawh" ka tih tlat avangin puakpuanin a pua a, an pafa inawih mut tum vel chu hmuh nin a har ngei mai, pakhat tê lah a la harh ṭha nasa mai si a, dar khat dâwn velah a intimu thei ve ta chauh.

"Ngeiawm tak chu i ni" khum sira a fapa mut pah chuan a ti sup a, a khabe phir tê reuh tê ah a fawp zeuh bawk a, kiai suk hian ka mutna lamah a rawn tawlh phei zui nghal a, min fawh a tum nghal ringawt bawk.

"Ka peih leh chiah lo ê" ti sepin ka nui duh lo lui ve tlat a, chhungril lamah erawh ka nui nasa hle a, ka insum rei thei dawn lo tih thlengin ka hre nghal vek a, min en dan te hlei hlei chuan ka nuih a tiza zual. 

"A lo nih tak chu!" tih leh min fawh a rual a, ka hmuiah pawh fawp rei lovin ka ir leh âwm bawr velah a tawlh thla thuai a, a kut ni se a awmtir mai mai bawk si lo nen kan tan chuan insum sen rual a ni ta lo.

Ka thawk dan a pangngai thei lo ṭan a, hah lutuk ang maiin ka thaw deuh kâwk kawk a, mahse chu erawh nawmna leh zauthau vang a ni tih chiang takin ka hre thung. A duh ang taka min han sawngbawl chiah chu ka awm mai mai thei lo va, rilru fim pu thei lovin ka vài ruai a, ka kut te chuan awm hle hlêna tur an hre lo a ni ber. Ani lah a che duhthaw nasa mai si a, mi dangin kan thawm an lo hre palh thei tih ngaihtuah pha tawh lo lék lovin ka pasal chuan nupa nun min hmanpui a, hmangaih ngawih ngawih loh hi chu a va'n harsa ṭhin êm.

"Ka rai leh nghal ringawt mai ang tih ka hlau" a âwma bei hle hle pah chuan ka ti sep a, kan inngaihzawn lai aṭang tawha a inhmeh em em a ṭhi awrh chu ka khâl niap niap a, ka chala rawn fawp zeuhin ka ban bul chu a tuai a, a rilru ah eng tak awm ve ang maw!

"Chhangchhe lo tâwk velin fa pawh nei ila a ṭha ang, chuti lo chu buai a nâ duh dawn êm mai, fa neih hnem i duh hmel si" ka ti leh chuan a rawn nui nghawr dat a, ruak vekin kan la mu ve ve a, thlan nen kan la ni deuh chûap bawk si a, intih fai a hun tawh viauin ka hria.

"Vawiin chu ka rilruah i awm reng a, hun kal tawh ka ngaihtuah chhuak a; i chhungte thlengin" a ṭawngkam tawp ber chuan ka ngaihtuahna a va han pawt hrang chiang si em, eng vanga ngaihtuah chhuak nge a nih ang le.

"Intifai ila" tia thawhpui ka tum chu a âwmah min kuai mu tlat a, ka thawh a phal lo tih ka hre ve mai bawk a, kei pawh thawh luih ka tum ta bik lo va, sawi tur a vâng ta lutuk chu a ṭhi ka khawih leh ta ringawt. 

"Ka pa thihna khan thil tam tak min ngaihtuah chhuahtir a, keimah avanga i thisen zawmpui i chhungte ngei i hlat a ngai ta hi pawi ka ti a ni" a tih chuan ka ṭang nghal at a, aw dam zetin sawi mah se ka tan erawh hriat nuam a ni hauh lo.

"I nupui atana min ru te, i nupui ka ni ta te hi i inchhir tihna em ni?" a mitah tak ka en kar a, a mitmeng mawlh chuan ka thinlung a rawn chhun thip zawk a, inthiam lohna mai ni lovin inchhirna ka hmu a nih chu! 

"Nu leh pa hi an pawimawh asin" tih chiah chu a sawi a, innem kangin ka tho va, thawmhnaw mumal ka inbel loh avangin ka inha ṭha mial mial a, intihfai tumin towel chu ka la nghal bawk a, ani chuan ka chel vel min lo en reng thung. 

"Ka nu leh pa an ni ngei e, duh lo eng ang mah ila an ni kumkhûa ang. Ka hre lo le Mazar, ka nu leh pate ai chuan ka pasal ka hmangaihna a sâng zawk a ni mahna" tih leh pindan aṭanga chhuah ka rual a, kan boruak ṭha lai thawk leh khatah a chhe vek a ni ber. 

Pindana ka luh leh chuan a awm ngaiin a lo la awm reng a, intifai turin ka hrilh a, harh chhuak zawk ang mai hian a tho ve nghal mai a, kan inbe tawh lêm lo. Dik tak chuan ka ṭah a chhuak a, ka mipa hmangaih em em mitmenga inchhirna khan min tinâ a ni. Pindana a rawn luh lai chuan ka maimitchhing tlat a, Duatpuia mutna lam hnaiah ka mu daih bawk a, ka mut erawh a chhuak lo chiang hle. Khumah a rawn mu a, ka hnung lam aṭanga min rawn kuahin ka dulah a kut a nghat a, ṭah a va chhuak ru si êm.

"Ka tihpalh, ka sawi chhuak leh tawh ngai lo vang" dam zeta a tih sup chuan ka kut ka hum ruh vak a, Duatpuia lama tawlh phei ka tum chu min kuah nghet sauh a, che sawn thei lo khawpin min kuah nghet ta. 

"Kei min nei hi i inchhir chiang alawm, i mitmengah khan ka hmu vek. Min thlah rih teh, ka rilru a pangngai lo êm mai" ka aw chu thunun tum viau mah ila awmzia a awm lo, a khur dat dat a, ka ṭah a chhuak tih a hriatthiam vek ka ring. 

"Nang ka nei che hi engtikah mah ka inchhir ngai lo vang, ka pa ka chán avangin ka rilru a kal dik lo laklawh mai mai a ni. Min hrethiam dawn nia, ka tiam a che, i sawi te a nih loh chuan i chhungte chanchin ka sawi chhuak leh tawh ngai lo vang" 

"Ka rilru i tinâ a ni Mazar, i inchhir hmel khan min tinâ em em asin" ka insut ri feih a, ka hma lawka muhil bam Duatpuia tih harh ka hlauh avangin thawh ka tum a, mahse zo zet hian Duatpuia mut lohna lamah min leh phei pui a, kan inhma chhawn ta ran bawk. 

"Ka inchhir reng reng lo, inchhir angin min ngai mai mai zawk a ni. Nang pawh hi i dik lo, i rilru a kal sual laklawh a nih dawn hi!" ka biang dawm pah chuan a ti hniam ruih a, a âwma hmai nawr vakin ka mit chu ka chhing a, ka mittui a baw leh ta zawih.

"Nang ka nei che hi ka inchhir ang maw!? A teuh lo lutuk Numam, ka lo sawi chhuak kher kher kha ka inchhir ta zawk a ni. Naktuk chu ka service leh lo mai ang, i pangngai dawn lo tlat" ka hnung chul pah chuan a rawn ti leh a, ka ṭap reng duh ta bik lo, ka lo hmu sual ve thei tho.

"A ṭul kher lo, service i tum vek tawh kha!" ka bianga mittui la châmbangho hru hul pah chuan ka ti a, a rawn nui nghawr dat a, a nui thawm chuan min tinui chawpchilh ve nghal mai bawk a, a thusawi lai khan a thutak em mai, ka hmu sual a ni ngei ang.

"Mu tawh ang le, zingah thawh kan hai palh ang" ti supin ka khabe chu a kuai dâk a, lungchim zet hian min fawp vawng vawng a, chuti ang renga min fawhna dawnsawn nuam chu khang thla kal ta chhung khan ka dawng lo va, tun ṭum kan infawp chu ka kham lo lêk lêk zawk a ni. 

"Ka duatnu" min kuah hle hle chung hian a tithum leh chhal a, a awah chuan nuihza aw a awm lo hrim hrim a, a taksa lum nuam zet chu khaw lum lai emaw khaw vawh lai pawh ni se ka khán kham thei thlawt lo.

Zingah chuan Duatpuia ṭap thawmah kan harh a, ka pawm vat a, hnutê ka pe zui nghal a, kan fapa pawh a tlei ve leh thuai mai bawk. Mazara chu a mu tlang a, kei erawh ka tho ta zawk a, pindan kawngka bul aṭang a hmel chu ka thlir reng a, zan lama ka awm dan avangin a lakah chuan ka inthlahrung thar hle bawk. Ka pasal a nih angin ka thinlung zawng zawngin ka hmangaih a, ka zah em em bawk a, nizan maia a thusawi te kha dik lo pakhat mah a awm lo, ka chhungte a rawn sawi ri chiah kha ka lo thinrim nghal em em ringawt a nih kha! 

A mak ve êm asin, eng ang paw'n ka pa'n min tuithlar mah se ka unaute talin min rawn biak ṭhin emaw min ngaihven ka ring kha a ni a, mahse kum khat dâwn tawhah pawh thawm an rawn la nei eih lo. Thil ṭul lo ngaihtuah buai reng duh lovin pindan aṭang chuan ka chhuak a, mei chu ka chhem nghal lawk duh lo va, a harsa hran lo bawk nen Duatpuia puak mut chu ka duh zawk a ni. Zai rât rat paha ka awih hnu chuan a muhil ve leh thuai a, pindanah lut lehin a pa bulah chuan ka mut a, an muhil hmel chu ka en ve ve a, pafa inang tak chu an va ni chiang em.

Zing dar 7 velah ka pasal leh kan fapa chu an rawn inpawm chhuak a, Duatpuia zawk chu a thawhphan hmel hle a, tukin chu mak tak maiin pu Kawla a mu rei phian a, ka rilru a hrethiam a ni ang Mazara paw'n kaih thawh a tum lem lo. Kan chhungkua tê chuan tapchhakah kan ṭhu a, ei rawng ka bawl malh malh a, ka bula mite pahnih chuan hmuhnawm ti lutuk ang mai hian ka che vel an en reng a, Duatpuia phei chu ka chet sawn hlekin a hawi sawn ve zel a, Mazara in tur thingpui ka siam lai te chuan ka nui ver ver ringawt. 

"Pu Kawla saw a dik lovin ka hria" ka pasal hawina lam chu ka hawi ve nghal a, pu Kawla tak pawh chu a lo inkhuh tlat a, ka thawh tirha a mut ang khan a mu tawh miah lo, tunah chuan harh a ang mah tawh zawk.

Mazara chuan a va buaipui a, a khua a lo sik chu niin, mak ka ti ang reng hle bawk. Kan damdawi kawl lai chu ka ei tir zung zung a, a duh lo chung Mazaran kan nupa khumah a mut tir a, rizai lum a sin tir thlap bawk a, rilru a nuam lo duh ngei mai. Mazara chuan Health worker pakhat a han ko nghe nghe a, an sawi dan chuan khawsik sang lutuk a ni lo va, a taksa lam chak tâwk loh vang a lo ni awm e. Rei lo tê hnuah pu Kawla chu a rawn pangngai ta viau a, rizai pawh sin duh tawh lovin khum aṭang a chhuk a, kan nupa khuma mut chu a duh tawh lo ni berin ka hria.

Ṭhutthleng seiah a mu daih a, Mazara paw'n a mut luih tir duh ta bik lo. Ka pasal chuan ngaihtuah tak tê hian a ngaihtuah a, ka beisei loh lam daih a ni. Kan Pawi awmpui lai a ni a, zep thu a cheng lo, khawtlang mipui paw'n an hre vek, mahse Mazara chuan chuti ang em ema a ngaihven chu ka ring kher lo a ni. Kei chu kei ka ni a, hmeichhia ka ni a, hmeichhiate chuan ngaihven kan pe nâ hma hrim hrim a, kan ṭahbelhin hmangaihna pawh kan ngah zawk ni mai te hian ka hre ṭhin.

Tukṭhuan ei laiin Mazara chuan service loh a tum thu a sawi a, pu Kawla awmpui a tum a nih ka ring. Pu Kawla lah chuan amah vanga service ṭhulhah angah ngaiin a ngaihtuahawm loh thu a sawi char char a, a Mizo ṭawng thiam ang âng chu a chhak chhuak a, Mazara erawh ngawi rengin chaw a bar mial mial thung. Engtin mah a zawhna leh a ngenna chu a chhang lo va, pu Kawla inthlahrung lutuk chu a khawngaih thlak letling hial zawk a ni.

Mazara chu a service lo ta ngei a, thu tlukna a siam tawh miau a, a sawh sawn mai mai kha ka ring lo bur hrim hrim. Sumo service lovin ram lama chhuah a tum ta zawk a, pu Kawla chu engmah ti lo tur leh ina awm tawp turin a hrilh a, pu Kawla erawh nuam lo a tih hmel kher mai. A chhuah dawn chuan thang rei lutuk lo turin ka hrilh a, a bu nghat a, a ngawi ngul te, ṭawngkâ aia chetzia lam zawnga ka thusawi a ngai pawimawh a ni tih a lantir ṭhin chu ngaiah ka nei ṭan tawh a, ka pasal mizia chu a va'n pá hliah hliah tak êm.

Tlai dar 2 rik hma hretin a rawn haw tak tak a, mautuai a rawn hawn ṭeuh a, a khehna a harsat awm tehreng nen hawn hnem ka ti khawp mai. Tumbu pawh tlêm azawng a lo hawn tel bawk a, tumbu bik chu ama'n a siam a, a va han tui leh mai mai tak. A siam dan ka zawt nghe nghe a, min hrilh ṭha ve mai bawk a, pu Kawla paw'n tui a ti ve hle. Mautuai chu zanah kan pahnihin kan buaipui a, Duatpuia erawh pu Kawla nen an awm dun ve khanglang a, tun hnai hian Duatpuia zawkin duh loh a nei ngai lo vak lo va, pu Kawla hmel a hmu ngun ve tawh tho bawk nen a nel ve tawh dawn te pawh a ni mahna. 

"Ka lo haw leh thuai ang" ka hmai zawna thaw lum ham ham hian Mazara chuan a ti thum chhal a, kei erawh min fawhna thuk leh ril zet chuan min la fan chem chêm a, a biakna chhang lêt thei lo khawpin ka la chiangnial lo vel a nih chu!

"Khati ang khan min fawp ziah suh, vei zui vawng vawng i awl si, ka ning tlat" ka zak ru ve tho bawk si a, ka ṭawngkam chu ka ti pawr lui der tawp, chuti lo zawng a Sumo service nî turah chuan keimah vangin a ṭhulh leh mai ang tih ka hlau. 

"Min ngaihtuaha min vei zui vawng vawng kha alawm ka duh" tiin min fawp leh nghal zat a, a thil hman thiam tak chu hmang lehin min fawp ngawng ngawng a, tun ṭuma mi phei chu kan inngaihzawn lai ang tak tak khan ka awm chiang mai. 

"A tâwk i hre si" ka sawi tum em em pawh ni lo chu ka sawi chhuak leh ta ringawt a, ka sawi zawh hnuah ka inchhir ziah leh nghal a, chu bakah ka zak deuh tlat alawm, ka pasal mah ni se mipa dang lêtin a zun phuar a nâ a, vei vawng vawng a awl thlawt. 

Kan ina a awm reng a nih chuan a service thei lo tak ngial dawnin ka hria a, in aṭang ka nawr chhuak tawp a, pu Kawl meuh pawh kan nupa awm dan avang chuan a lo nui tawp ringawt. Kal ta mai lo chuan a phone a khawih mual mual a, nizan khan a passenger tur te number a save nual a, save sak ka tum zawk maw le. Zep lovah chuan a khawih thiam lutuk ka ring chiah lo va, mahse he mihring thiam loh nei lova hian ka tihsak ngai lovin a lo thiam leh vek tawh a, mak hi ka ti leh thut ṭhin. 

"Kan in hi Sumo Counter angin ka rawn ngai daih dawn" a kal liam dawn tak tak chuan a ti leh hram a, thutak hmel deuhin a sawi kher bawk si a, a hmel zawng zawng nen chuan a inhmeh lo lutuk a, kal thuai thuai tura tih ka tum pawh chu ṭhulhin ka nui leh ta chiam. 

A tawpa tawpah erawh kan inthlah liam thei ta hram a, Duatpuia chu khumah ka awm tir daih thung. A chhan chu a ngen dawn tih ka hre chiang a, inngen khawmuan hun a ni bawk si lo a ni. A mutna khum aṭanga ka pawm sawn hnu chuan a pa hmel zawng ang deuh reuh hian a awm a, pu Kawlan a rawn lawm zui nghal a, pawm a tum chuan a lo duh ve mai bawk. Pu Kawla chuan inah min awmpui a, a chhan pawh Mazara thusawi vang bawk a ni. He pa hi chu chhungkawpa nih a tlin ngawih ngawih, ka pasal a ni teh meuh mai, mahse ka mihring hriat tawha ka la zah ber, ka hmangaih ber leh ka ngaihsan ber a ni thung. 

Chhun ní sat veh vawh laiin Duatpuia ka bual a, tui hi a ngaina phian a, bual fai pahin ka chhaih leh zauh zauh ṭhin a, nuam a ti thei khawp mai. Pu Kawla chu a buaithlak ta viau a, che suh ka tih paw'n nui vur vur hian a che lui zel tho va, thing tan a tum chu ka phal lo bur a, Mazara phal loh vang pawh a ni lo. Dam kawr tak tak ang kha a la ni a, a chet duh paw'n in chhungah che mai rawh se. Ka phal lo nasa bawk a, thing lam chu a khawih ta lo va, kan kawm thlang huan erawh a tifai hram a, ka khap duh ta lêm lo a ni.

Khua a rawn hniam ṭan a, kan veng pheiah chuan ni êng a lut tawh lo va, boruak erawh a thiang nuam viau mai. Kan thingkhawn bulah chuan naupang an in rubber bâwt a, Duatpuia pawm pahin veranda aṭang ka thlir reng a, ka phone rawn ri chu ka la hre lawk lo zui. Mazara hnen aṭang a ni a, zan riak lova lo haw leh a tum sa hrim hrim a, khaw thim hnua a lo thlen theih chauh a rin thu a sawi a, ngaihngam takin ka awm a, a sawi dan chuan Sumo Counter velah an la awm mêk a nih hmel. 

Rei lovah khua a thim a, khaw awm dan chuan ka lung a tilêng tak zet. Kan inngaihzawn laia Mazaran Arkaiden zan min hrilhfiah tlai ang chiah khan ar làwi hun bawr velah thla a rawn lang a, kan inngaihzawn lai ka hre chhuak lo thei lo a ni. Zanriah kan ei kham a, Mazara tel lova chaw ei zawng chaw ei a tui lem lo khawp mai. Chaw kan ei kham ta bawk a, tih tur em em nei ta lêm lo chu kan inneih thlalak ka en mai mai a, kan inneih hnuah chuti ang em ema Mazara ka ngaih awm pawh ka hre lo. Ka phone lahin a la thei tawh bawk si lo, a chungah thil ṭha lo a thleng ang tih ka hlau tak zet.

Tukverh bulah dingin thlang lam chu ka hawi a, ka ngawi reng a, thereng hram rî te chuan ka ngaihtuahna a tikal thui khawp mai. Eng dang a ni lo, ka lung a léng thlawt a ni. Aizawla ka chhungte ka ngai ni paw'n ka hre chiah lo va, chu ai chuan rama kan feh hun lai vel leh thlâma ei rawng kan bawl lai velin ka rilru a luah ber zawk a, lakhuih huana Mazara ka zui nî te thlengin ka ngaihtuah chhuak a, lunglên avangin ka nui leh sak sak ṭhin. Kan in kawtah motor ding thawm a rawn awm a, chu motor ri chu ka hre chiang khawp mai. 

Kawngka lam pan pahin dar zat ka en nghal a, dar 7 leh a chanve a lo ri vel chiah a, veranda ka thlen rualin Mazara chu motor aṭang a lo chhuak mêk a, him dam taka ka pasalin kan in a rawn thleng hrim hrim chu thil lawmawm tak a ni. Ka dinna bul a rawn thlen chuan thlahlel ru zet hian ka lo nuih sen sen a, ani paw'n nui sukin in chhung lamah min kuah lut a, thingpui ka siamsak nghal zung zung a, ka pasal tan hi chuan khawvela nupui ṭha ber nih ka tum nghet bur. Ani chu ka tan khawvela pasal ṭha ber a ni a, ka rilru ang chiah chu pu ve se ka duh a ni.

A inbual laiin a chaw ei tur ka lo siamsak a, maipawl chhum chu ka chhuang lum bawk a, a chawhmeh duh deuh alu erawh a tharin ka kànsak ta zawk thung. Zai sà vek a ni a, kân chu a harsa lem lo. A inbual zawh hnu rei lovah chaw a ei nghal a, a bulah ngawi rengin ka ṭhu tawp a, mahse ka ṭhu rei thei lo. Ka pasal chaw ei dan vel chuan ka ril a tiṭam tlat a, thleng la rawk rawkin a bulah ka ṭhu a, vei kiai sukin chaw a rawn khawrh nghal a, a bulah chuan zalen takin ka ṭawng siam siam a, chhun lama kan hun hman dan te ka sawi a, ani chuan ngawi rengin ka ṭawng a lo ngaithla thung.

"Vawiin chu tum loh deuhin mi ka hmu hawl a" khuma kan mut hnu chuan a ti thum dap a, zan danga kan mut ṭhin ang bawkin ka hnung lam aṭang min kuah a, keiin ka hma lawka muhil Duatpuia ka kuah titih bawk a, chhungkawpa ber uapna hnuaia awm chu a nuam bik hle.

"A nih chû, tu nge a?" ka ṭawng lai chuan ka lamah a rawn tawlh hnai a, min kuah reng chungin Duatpuia hmai a va zut dên den a, a khabeah chuan a tawp chat a, a chet dan vel aṭang chuan an khabe phirna a inang tih a hre ve chiah a nih ka ring.

"Hmel hriat hlui maw le" tiin min chhang ve leh mai a, ka ngaihtuahnaah ka chhungte leh ka ṭhiante an lo nghal a, mahse ka ngaihtuah thui duh lo law law, a hmel hriat hlui te chu ka ngaihtuahnaa rawn langte ho an ni kher bik nâng, amah tak pawh hian a hmu duh tawp lo vang.

(End of Chapter 40)