SUMO DRIVER By Havali Adam (CHAPTER 39)

SUMO DRIVER

By 

Havali Adam

Chapter 39

Kan fapa chu in chhung lamah pawm lutin ka tei kual sêk a, eng êm thleng lo tura ngaih ngawt theih pawh a ni lo. Thil pawi thleng thei zawnga ngaihtuahna sen ka tum lo hrim hrim a, mahse Mazara pa chu ka ngaihtuah em em tho si a ni. Tlantea khan nâ a tih thu a sawi tel ngei a, a tlâkna a lo sâng viau ang tih ka hlau hnuhnawh hle bawk. Pu Kawla pawh ka awm dan chuan a tihamhaih deuh a ni maithei, chawhmeh vil pahin min lo en leh zauh ṭhin a, ka hlauthawng ru ve êm a tin ni!

Kan fapa chu tih mut tumin ka awi hliau hliau a, a la mu duh der lo zui. Puak puan lain ka paw ta ringawt a, a mawnga beng thêk thekin ka awi leh a, chutah erawh a kut a rawn tiche ta lo va, thawm a chhuak tawh lo bawk a, a muhil ṭan niin ka hria. Puan lum hlai deuh hlek chu lain ka khuh a, pawnah ka chhuahpui a, thlasik boruak ni pha chiah tawh lo mah se hritlang a kai palh ang tih ka la hlau deuh reuh tlat tho. Kan in kawt aṭang chuan ka pasal hmel hmuh tumin ka mit ka lèn a, veng chhak lama han kal chu ka duh ve ta rum rum.

Kan Sumo lei thar nia buaina dang kan han tâwk ringawt chu a lungawi thlak loh ka ti rilru hle a, hlim viau tum pawh ni ila a thei bik loh a ni. Ka pasal pa, ka pa ni bawkin chet sualna a tawk a, chutah a chinchâng kimchang takin ka la hre thei lo zui. Mazara erawhin a hriat tawh ngei a rinawm a, a kalna tur nu Hluni te in awmna chu ka hre ve tawh ngei alawm, pitei nen an inkawm ṭhin nghe nghe. In an sa mêk a, hlawhfa pawh an chhawr nual a, chung zingah chuan Mazara pa pawh a tel ve ngei a, mahse vanduaina a tawk palh ta si. 

Kan in kawta Sumo inhunna bulah chuan ka ding reng a, chutia rilru hahdam lo ru zeta ka awm lai chuan Mazara ka hmu ta, mahse amah maiin a ni hauh lo. A pa chu a rawn pua a, a tlanin a rawn tlan a, a pa erawh nikhaw hre lo ang maiin a fapa hnungah chuan a bei kun ngul a, putea hmel pawh ka hmu zui nghal. Ka dinna an rawn tlan hnaih tial tial a, dip hlau zetin ka lo tawlh sawn thuai a, Mazara awm dan chuan ka ngaih a tiṭha ta hauh bik lo mai. Nauté chu in chhungah luhpuiin khumah ka mut tawp a, ka pasal chu zawhna tak ngial pawh ka zawt hman rih lo a ni ber. 

Pawn lama ka chhuah leh chuan an lo inhlang lut fel titih tawh a, muangchang lo takin Mazara chu a che zung zung a, Sumo chu tinungin a inher sawk sâwk a, putea paw'n a en tawp ringawt. Awm mai mai thei ka ni lo tih inhre chhuak thutin Sumo lamah chuan ka kal a, a thu pawh la hmasa lovin Sumo kawngka chu ka va hawng tawp a, ka ṭhu lut zui nghal a, ka pasal chu zawhna zawh hun a ni rih lo tih ka hre chiang hle bawk. Tlan chhuak nghal ta lawk lo chuan min lo en zawk a, kei erawh putea lam ka hawi nghal daih thung. 

"Pute, pitei lo ko thla mai rawh. Khumah Duatpuia ka mut tawp a nia, Mazara hi ka kalpui loh chuan a ṭha lo vang, a dik lo êm mai" ka ti mawlh mawlh a, ka sawi zo hman ṭâwk ang tihah kan tlan chhuak nghal vut a, kan hnung lama mu kawm ngût chuan rilru a va tihah duh si em.

Khawpui lam panin kan tlan zel a, kan tlan muang lo hle a, kan che sual mai ang tih a hlauhawm lek lêk zawk. Tlan chak leh lutuk lo turin ka hrilh nghe nghe a, mahse engah mah a ngai chhe tê them lo. A tlan chak ngaiin a tlan par par a, khalh thiam viau lo se chu kan che sual tawh hrim hrim ang. Kawng kawia kan tlan lai te chuan motor kawngkaah ka invuat bet tlat a, kan hnung lama mi erawhin thawm engmah a rawn la chhuah miah lo. Mazaran hruiin a phuar titih a, a khalh chak dawn vang pawh a ni maithei.

Khawpui chhung kan tlan luh rualin Horn chu a pe tuar tuar a, kan hmaa tlan te paw'n mak tak maiin kan tlanna tur min lo kian zel a, thil hmanhmawh thlak a ni tih an hrethiam a ni ang. Kan tlan chak vûk vuk bawk nen damdawi in chu kan thleng ta thuai a, Mazara chuan a pa a paw leh tawp a, keiin an hnungah ka um dat dat a, ka um pha lo nasa hle. Mazara bul ka va thlen ve meuh chuan a pa a lo paw tawh lo va, hnathawk te'n buaipui chhunzawmin an en dik mêk a nih ka ring. 

Mazara chu bang ngheng hian a ding ngawi reng a, a en ngai a en tlawk tlawk bawk a, a kut pawh a hum ruh hle. A kut chu ka tawk dê de a, a hmel ka en chho leh a, zawhna zawh chi ziazâng a ni lo tih a hriat khawp. A pa ka ngaihtuah tho rualin amah tak pawh chu ka ngaihtuah hle a, a hlim lai takin a pa chet sual thu a hria a, chu chuan chawp leh chilhin a tibuai nghal vek bawk. A bulah dingin kan ngawi dun ta reng a, kan dinna bul lawk room kawngka aṭang chuan hmeichhe pakhat a rawn tlan chhuak a, a hmanhmawh hmel hle.

Darkar khat chuang chu kan nghak ta, mahse chanchin thar engmah kan la dawng thei bawk si lo, rilru a va thlamuang lo duh tak êm. Chutah room aṭang chuan Nurse ni awm tak tâk an tlan chhuakin an tlan lut deuh reng leh ta nghal a, ka rilru mumal lohna te chu a nep viau zawk ang, Mazara mawlh chu a ni rilru hah dawn chu! A hma ang ngawt chuan a ding mai mai thei tawh bik lo va, tei sêk ni si lovin a dinna ngaiah a ding reng thei tawh lo a ni. Room aṭangin Doctor form ha a rawn chhuak hlawl a, kan nupa chuan ka va hnaih chilh nghal ta vat. 

"En teh u, ka sawi tawp mai ang. Dam lo hian a Spinal Cord a sawh chhe hneh hle a, tunah hian Ventilator nen kan enkawl nghal a, kan tih tur ang zawng zawng chu kan ti tawh a, mahse a dinhmun hi beisei awm tak a ni thei rih lo" Doctor chuan a ti dap dap a, ka va han hlauthawng zual mai mai tak em.

"Tunah hian a hmuh theih ang em? A hmel ka hmu duh, i sawi awmzia chu thi thei reng dinhmunah a awm i tihna em ni?" Mazara aw chu a phelh nuai a, a rilru a buaiin a mangang ru tak zet tih a hriat ngawih ngawih. 

"Ka zep lo mai ang, chuti ang deuh chu a ni e. Spinal Cord chhiate hi an dinhmun a chhe nghal vek lo va, Ventilator hmang paw'n kum 1 leh a chanve te chu an la dam thei a, mahse tun ṭuma mi hi chu a Spinal Cord bak sawh chhiat a nei tlat si a ni" Doctor ṭawng zawh rualin Mazara chu room-ah a lut nghal vut a, zui luh bak tih tur ka nei ta bik lo.

"Doctor, ka pa hi chhan tum hram teh. I theih tawp chhuah la ka va'n duh êm, a thi thei lo. Ka pasal awm loh lai hian thu dik tak min han hrilh teh, zep nei miah lovin min hrilh rawh, zep ṭhen i nei tlata hriatna ka nei a ni" lut ta mai lo chuan ka ti hnuhnawh leh a, luh tumin ka kal vek tawh a, mahse ka ṭhulh leh rih ta zawk.

"A Spinal Cord a sawh chhe hneh hle a, a taksa dang ruh pawh a sawh chhe hneh viau tho. A tlâkna a sâng a nih loh vek paw'n a pawi lai tak a sawh fuh chat a nih a rinawm, ká pawh chhawn lova hnuk chat thei reng a ni zawk a, nung dama in rawn thlen phei pui thei hi a mak letling hle" a tih chuan ka ngawi kar a, sawi tur ka haihchham tawh lutuk. 

"Tunah hian nikhaw hre lovin a awm mêk a, a rawn harh leh a nih chuan thil mak tak a ni ang. A nunna erawh a la awm reng tho va, mahse zawi zawiin a tlak hniam a rinawm thung" ti lehin Doctor chu a kal sawn zui nghal a, kei pawh room chhungah chuan ka lut ta nge nge. 

Mazara chuan a pa chu a lo ṭhut chilh ran a, a pa erawh mi thi tawh ang maiin a mit a chhing reng a, ka lung chu a chhe nghal em em bawk. Doctor sawi dan phei kha chuan beisei awm tawh loh tluk a ni a, Pathian hnena ṭawngṭai tawp loh chu tih theih kan nei lo a ni. Mazara ṭhutna epah chuan ka ṭhu a, a pa kut chu a vuan reng a, a awm dan aṭang chuan a thihsan a hlau tih ka hre thei. Khua a rawn hniam telh telh a, Mazara pa lah chu harh a la tum loh hmel bawk si, mahse keini pahnih chu kan ṭhut ngaiin kan la ṭhu reng thung. 

Khua chu a rawn thim ta ngei a, ka rilruah Duatpuia a rawn lang nghal a, mahse ka ngaihtuah rei thei tak tak lo. Mazara leh a pa mawlh chuan ka rilru an luah a, Pathianin thil mak rawn thlen tir se ka ti hle bawk. Ka rilruin ka ṭawngṭai reng a, ka ṭawngṭai awl lo va, chu chu ka tih theih awm chhun a ni tlat. Doctor te pawh a khât mawi tawkin an lo lut zeuh zeuh a, anni tan tak pawh chuan min hnem dan avang ngawt ang ka ring. Engkim an hre vek tawh si a, min hnem an duh avangin dawt han sawi ringawt dawn se a chi bawk si lo.

"I lo harh maw!? I ṭha em?" ka pasal aw ka hriat rual chuan ka indawm kun lai chu ka hawi chhuak nghal thuai a, Mazara pa chu a lo meng reng tawh hi a ni a, chu chu Mazara chuan a lo hmu rang khawp mai. 

"I nu ka hmu asin, i nu ka hmu Mazar. Ka kal dawn, i nu bulah ka kal dawn" dam lo ni si engtin nge chuti ang em ema a rawn ṭawng pangngai theih chu ka hre lo, Mazara erawh a pa thusawi avanng chuan a ding nghal ta vat.

"I thusawi awmzia ka hre lo" Mazara aw chu a nêm fahran lo va, a pa thusawi chu a hrethiam vek zawkin ka hria, mahse a hrethiam lo lui der tlat a ni mahna, ka mittui te chu a tling nghal pam a, ka lung a chhe ru em em bawk.

"Ni lo, ka ngaihtuahnaa awm ang hi thleng tawh lûl suh se, thleng tawh suh se" ti vin deuh hrawkin Mazara chu a pa hnaih zawngin a ṭhu hniam a, chiang zetin an pafa chuan an inen a, a pa zawk chu a rawn la nui thei nia maw le. 

"Thih tum reng reng suh, i thih chuan engtikah mah ka ngaidam ngai lo vang che. Ka ngaihdamna dawng hmasa lova thih i duh em ni?" Mazara chuan a aw a thunun thei bik ngâng lo a ni ang, aw dam tak kha a nei tawh lo emaw a tih theih hial.

"Ka lawm e Mazar; min ngaihdam avangin. Ka hria, ka fapa hian min ngaidam daih tawh a ni" a pa chuan nui chung hian a ti hniam ruih a, a chau tial tial nia ka hriatna te chuan ka ṭah a tichhuak zual sauh.

"I thih ka phal lo, ka....ka pa" tiin Mazara chuan a pa chal chu a chalin a zu nawr a, a pa chu ha lang meuhin a rawn nui a, a mit erawh a meng zau lo tulh tulh a, a chungah thihna chuan ro a rel dawn tih ka hre chiang ta.

"Awm sawn suh aw ka fapa, 'ka pa' tiin min ko leh tawh a nia, heti ang hian.....heti ang hian awm reng ang" Mazara pa aw chu a thawp zawi telh telh a, meng thei tawh lo tih hriat zet hian a mit a chhing nghet tlat tawh bawk a, nuih pawh a nui tawh lo hrim hrim. 

"Engati nge maw âw i chungah khan ka lo sual em em mai ni!? Ka nu hian fapa hrin tlâk loh min lo hring a ni; fapa hrin tlâk loh tak ka ni e" Mazara chuan a pa biang chu a kutin a chul pah zeuh zeuh a, chutah amah bawk chuan

"Ka pa" a ti khur leh dat dat a, ka dan sên lovin ka mittui chu a rawn baw ta zawih zawih a, ka insut ri feih feih bawk a, a hnuah phei chuan ri meuhin ka ṭap chhuak hak a, doctor te koh nachang hre lo khawpin ka lung a chhia a ni ber. 

"Ka pa" ti ṭial thum hniam ruihtu chu mittui nen ka en hram hram a, chuta ka thil hmuh chu a va mak ngai êm, ka pasal, a nu thih lai leh an phum lai pawha ṭap lo khawpa mipa tuarchhel leh rilru pakhauh ve tak kha a pa awm dan avang chuan bianga mittui luangin a lo awm a nih chu! 

Ni e, ka pa chu kan chân tawh a ni. A hnuk a chat tih chiang takin kan hre ve ve a, ka pasal rilru nâ hmel chuan min chhun zawk zawk a, a hnuah phei chuan room aṭangin ka tlan chhuak tawp. Room pawnah chuan hmai hupin ka ṭap chhuak hawk a, ka chhuah dawn khan Doctor leh Nurse ka tawk ngei a, khangte khan min tina zual a ni. Ka pa tak tak ni lo mah se Mazara pa chu ka pasal pa a ni a, ka pa a ni ve miau a, ngainat pawh ka ngaina hman hle. A thihna chuan min tinâ a, Mazara ka khawngaih lutuk bawk si nen ṭah insum a harsa tak zet.

Ka ṭah chhuak zualpui a reh fel hnu chuan room chhungah ka lut leh a, mahse ka thil hmuh avang chuan ka mittui a lo chhuak leh nghal. Mazara chuan a pa chu a lo kuah ngawih ngawih a, ngawi reng hian a âwmah a pawm bet a, a changin a chhip samah a fawp leh zauh ṭhin bawk a, Nurse pakhat phei chu a inhup tawp ringawt. A fapa awih mut tuma pawm ang maiin Mazara chuan a pa chu a suk pui delh delh a, a thih a la phal ngâng lo a ni. Doctor te pawh chet an tum lem lo va, Mazara leh a pa awm dan chu an khawngaih thlak ngawih ngawih. 

Mazara chu a en ngai en rengin a meng kur a, a mittui erawh hmuh tur a awm tawh lo va, darkar dâwn chuang Doctor te'n an nghah hnuah a pa ruang chu buaipui chhunzawm turin an la ta a, ka pasal chu mi ang lo hi a ni ringawt. A hmel chu ka en ṭhin, a inthiam lo nasa lutuk chu thil ṭha lo a ti ang tih mawlh ka hlau ta. Mi dang chuan an hmu tlang vek thei lo maithei, mahse kei chu a nupui ka ni miau a, chuti ang em em chuan a pa a hmangaih ka ring pha ngai lo bawk. A tuar nâ em em a, a chhungril nâtna a sawi chhuak lo mai chauh zawk a ni. 

Doctor te'n ruang an buaipui laiin Tlantea leh putea an lo thleng phei a, Mazara bike-a an lo phei tawp thu te an sawi hmasa tê tê a, putea'n Mazara a pa chanchin a zawt chiah chu inchhang lo chiang tak an ni. Ka ṭap leh ringawt a, putea pawh chuan a hrethiam ve nghal mai bawk a, a zawt zui ta bik lo. Putea chuan phone-in khawtlang mipui te lam a va hrilh nghal zung zung a, putea te pafa chu an lo kal lo vang tih ka hlau hnuhnawh hle. Damdawi in motor-a ruang phur phei an tum chuan buaina a awm ta, Mazaran a lo phal awzawng lo mai. 

Hnathawk pakhat chu kut a thlak nghe nghe a, a rilru buai lai a ni kher bawk nen keima'n dang lo phei ila chuan a khawih nâ viau ang. Sumo-ah ruang chu kan dah a, chu chu Mazara duh dan a ni. A tirhah chuan a duh dan a ni tih pawh kan hre lo, ama'n ngawi rengin a buaipui vek a, a thin tirim zawnga ṭawng an lo awm palh ang tih mawlh ka hlau, tûma'n kan dang zo dawn der si lo. Vanneih thlak takin buaina dang a awm tawh lo hlauh a, hawihhawm takin Doctor chuan kan tlan liam tur min thlah thlap bawk. 

Motor a khalh lai te chuan Mazara chu a ngawi reng a, a biangah mittui a luang leh bawk. A vawi hnihna atan a mittui ka hmuh lai ngeiin a tla leh a, kei pawh ka bang chuang lo. Ka insut ri hlawp hlawp a, ṭah loh chu a harsa thlawt a ni. Ka pa thihna ka tuar nât rualin Mazara mittui tla leh ta chuan min tiṭap lo thei lo, ani ang mipa meuh pawh a ṭap a nia, a nu ai mahin a pa chu a hmangaih ka ring ta zawk hial bawk. Kan hnunga ruang awm mêk chu ka en leh ṭhin a, ka pa chu ka ui ve tak zet.

Thihna ang zawng ni lovin pa ka chan tawh a, ka thisen zawmpui te ka chan tawh bawk a, mahse tuna mi leh chung chu a inang lo, a inang thei lo hrim hrim. Ka chhungte, ka thisen zawmpuite chu an la dam tal alawm, Mazara nu leh pa erawh thihna chuan a hruai bo ve ve ta si. Ka pa kha ka ngaina ve asin, ka ngaina ve lutuk, a fanu tak tak ang maiin ani paw'n min en ṭhin. Ka mitthlaah a nui hmel te, Mazara tui a tlâk thu ka hriat nía ka kal tur min dang lai te, inthlahrung taka Mazara a kuah lai te leh kan fapa a pawm lai thlengin ka mitthlaah an rawn lang zut zut a, khaw chhung kan luh dawn thleng chuan ka mittui ka la hru reng mai.

Kawngpuiah mipui an lo pungkhawm a, tlangval hovin ruang an zawn chhuak tur chu Mazaran a phal leh ta tlat lo. Kawngah an lo din ṭhup avangin tlan tlang zel theih a ni lo va, chu vanga ding pawh chu kan ni. Mazara chuan Horn a hmet ri pawp pawp a, an awm sawn ve thei ta hram. Kan in kawta kan din rualin tlangval ṭhenkhat chuan ruang dahna tur kuang an lo zawn lut vel mek a, an sawi dan chuan kan inah ruang nghah a ni dawn tih an lo hre lo a nih hmel. 

Motor chhung aṭang Mazaran ruang chu a pawm chhuak a, tûma puih duh lovin amah vékin kuang chhungah a mut a, Mazara patea te pawh an lo thleng phei kim vek tawh nghe nghe. Mazara patea nupui chu a ṭap nghal hawm hawm a, a patea tak pawh a insum hlei thei lo. Lung chhiatna thu chham chhuakin a mittui a hru zeuh zeuh a, nautê ṭap ri a rawn awm ta. Chu nautê chu kan fapa ngei a ni a, pitei pawm lai chu ka la vat a, mi dang ṭap thawm vang nge ni a ṭap uar ve em em mai leh nghal.

Mazara chu kan thlen tirh aṭang a pa ruang bulah a ṭhu chawt a, kei erawh tlêm chuan ka zia deuh tawh, ka intipachang lui zawk maw le. Hmeichhe chak lo tak anga ka ṭap reng a nih chuan kan fapa tak ngial pawh ka buaipui thei lo mai ang tih ka hlau a, chhel taka awm ka tum lui hram hram a ni. Mazara chu tûma'n an be lo va, bia pawh ni se a chhang kher lo vang. Nautê vang chauhin a bulah ka ṭhu phei duh rih lo va, kan ṭhu phei a nih chuan Duatpuian a ngen ngei ang a, mahse a pa lak aṭanga a duh chu a hmu dawn lo tih ka chiang lutuk tlat.

Thingpui sem nula an lo lut a, banga intar sana ka en chuan dar 1 a lo hnai thuak tawh bawk. Thingpui in chawlh neiin khuangpute paw'n khuang vaw tawh lovin zài an tawpsan rih lo va, Mazara bawk chu a ni khawngaih hlawh chu! Kei chang ka ni lo, mi dangte pawh chuan an khawngaih thu an sawi reng a, thingpui pawh a bulah chhawp reng tawh mah se a la in lo va, a hmel hmu thei lova awm rih mai chu ka duh ta zawk. A chhan chu ka ṭap dawn zel a, kan fapa hmuh lai leh hriat laiin ka ṭap duh bawk si lo a ni. 

Thla chu a êng ṭha hle a, Duatpuia pawh ka awih hliau hliau hnu chuan a muhil vat a, a nu leh pate rilru nâtzia erawh a la hrethiam pha ve der si lo. In chhunga lut ta mai lo chuan pawnah nau puain ka awm reng a, mitthi lumena zai a awm leh tawh bawk a, tun ṭum kan tlaivar dan tur chu duhthu a va sam lo êm. Zing dar 3 velah ka va lut a, ka pasal ṭhutna lam ka en hmasa ber a, a ṭhut ngaiin a lo la ṭhu reng a, a awm dan pawh a la ngai vek. Puitling aiin nula leh tlangval ṭhu an tam zawk a, kan in chhungah chuan an ṭhu khat vek titih a, puitling ho erawh khawvar lam hnaihah an rawn lut ve leh ta chauh. 

Zing khua a lo var a, Mazara bawk chu a buaithlak leh ta. A pa ruang bulah a la ṭhu ngawi reng a, chaw ei tir ka tum lahin a kâ a âng duh bawk si lo, pu Kawla phei chuan a hnaih ngam rih lo tawp. Putea leh a patea chuan an ṭawng thlamuan ve tak ná a, awmzia a awm lo chiang teh e! Ruang zawnna ah thleng chuan a tel ve zel a, tlangvalte chuan han phal lo ringawt dawn se amah berin a zawn lui tlat si a, buaina a chhuah loh nân an ngawihsan mai mai a ni ber. Thlan khura an dah luh lai chuan a pa ruang awmna kuang chu a en reng a, a kut a hum ruh hle bawk. 

Pastor-in thuchah tawi tê a sawi a, Mazara hming lam meuhin a ṭawngṭai leh a, ṭawngṭai zawh chuan ka hmu ta reng reng lo mai. Ka buai phili ru hman viau a, mahse thil ṭha lo a ti dawn lo tih ka chiang. A chhan chu a nupui ka awm a, fapa a nei bawk a, thihna avangin a rilru nâ hle mah se min hre chhuak dawn tho tho. Ngaihngam zân lo chuan ka zawng lo lui ta ringawt a, a awm âwmin ka awm tir rih tawp. Tun atan chuan a ṭha ber tlat a, thlamuan tuma ka be chhen emaw ka ngaihven chhen emaw a nih chuan min ning mai mai zawk ang. 

Tlaiah chuan putea te'n ei rawng min bawl sak vek a, kan chhungte leh ṭhenawm hnai vai zual deuh te paw'n zanriah an kil nghal nghe nghe a, mahse ka pasal Mazara chu a hmel hmuh tur a la awm lo hrim hrim thung. Khua a rawn thim a, pitei bulah chuan ka ngaihtuah thu ka sawi ta chhen a, Tlantea leh pu Kawla phei chu zawng turin an chhuak tawh zawk a, rawn hruai haw hram se ka ti hle bawk. Pitei chuan a lo haw ve mai a rin thu a sawi a, tlém chuan ka awm a nawm phah deuh a, ngaihngam taka awm erawh ka la thei lo nasa. 

"Apa fapa Duatpuia hian hnutê kha i lo duh tawh em ni? Anu hian ka pe ang che aw, i va'n meng fiah reuh tak" ti siam siamin kan fapa chu hnute ka hnek tir zawm nghal a, a pa awm dan mumal loh lutuk avangin buaipui pawh ka buaipui ṭha hman lo va, a tui a hal leh tawh viau ka ring.

"Duatpuia chu i mut a chhuak tawh na nge? Hnutê tui kha han pe zo la, ka lo pawm teh ang, ka pawm châk em mai" pitei chuan a lo ti ve nghal a, kan fapa chuan hnek dâwk dawk pahin a pi chu a en kar reuh a, fing tak hi a ni ringawt. 

"Kha in va hmu ta chuang lo em ni?" putea ṭawng ri ka hriat rualin a hawina lam chu ka hawi zawm zat a, Tlantea leh pu Kawla te pahnih chu an rawn lut mek a, ka rin lâwk ang chiahin Mazara an zawng hmu lo ta ngei e. 

"A lo haw ve mai turah i ngai phawt mai ang u! Zawn a ngai tawh lo, thingpui te in zawk rawh u" ka lo ti thuai thuai a, Mazara kalna àwm chu ka hre deuh reuh a, mahse nautê nen ka nih tlat tawh avangin zan chhuah a rem chiah si lo a ni. 

Nautê chu hnutê ka pe zo va, pitei chuan min lo pawmsak nghal a, thingpui ka siam zung zung a, inlêng kan la nei reng a, engtik lai pawha thingpui in tur lo neih reng chu a fuh viau mai. Zan dar 12 rik dawn velah Mazara ngei mai chu in chhungah a rawn lut hlawl a, kan lo en ṭhap hlawm a, a rawn lut teh thut bawk si a, kan hamhaih tlâng a ni mahna le. Harh chhuak thuaiin ka be nghal mawlh mawlh a, tun ṭum chu ngaihtuah tak tê hian ka ngaituah a, a lo haw har mah mah chu a ni. Ka biakna leh ka zawhna chu a chhang lo hrim hrim a, ka be zui reng duh ta lo. 

Zinga ka harh chuan Mazara chu kan bulah a lo ṭhu meng kar a, a mu miah lo tih ka hre thei nghal. Kan inkarah chuan kan fapa a muhil bam a, a pa kut zungtê chu a hum ran reuh a, Mazara erawh chuan a ngaihsak vak lem lo. A awm tawp a, a ṭhu tawp a, a ngawi reng bawk a, biak tumin ka âng zuau tawh a, mahse ka ṭhulh leh ta zawk. A hma vak tawh lo tho bawk nen ka tho tlang law law a, pindan aṭanga chhuakin thingpui tur ka lum a, thingpui nen pindana ka luh leh chuan Duatpuia a lo harh tawh a, a ke a lo leng vel a, a bula mi erawh lung tum chiah chiah a ni mai. 

"Heti ang hian awm lo la Mazar, nimin aṭang khan thil ei i la nei miah lo a nia, i taksa tan pawh a ṭha lo" thingpui pek pah chuan ka ti a, min chhan lêt ka beisei lo hrim hrim a, min chhang lêt lo reng bawk.

"Vawiin aṭang chuan thil ei loh ringawt ka phal tawh dawn lo a nia, thingpui hi in rawh le" a no hum chu a kut vawn hnanin a hmui zawnah ka nawr chho sak a, ka rin loh lutukin a in ve mai a, ka pasal chuan ka ngaihsakna leh ka enkawlna a mamawh tak zet tih ka hria, ka theih tawp ka chhuah ngei bawk ang. 

Pindan aṭanga ka chhuah hnu chuan ei rawng ka bawl zui nghal a, rei lovah pu Kawla pawh a rawn tho va, a mutna chu a thlep fel nghal zung zung a, chu chu a zing tin tih ṭhin dan a ni. Kan Sumo neih thar avangin kan hlim ang chu tih laiin chhiat kan tâwk leh si a, hma hun hi zawng hriat a va'n har tak êm. Tunah pawh kan tum loh dan deuhin kan awm chho mêk chu a ni a, Pathian hnena ṭawgṭai tawp mai loh chu tih theih kan nei tam lo hle. Tukṭhuan kan kil ho va, Duatpuia erawh khumah ama tal talin a tal a, ngaihtuah vak ngai loh hian amah chauh pawha tlei chang a ngah ṭhin.

Kâr kan hmang ral a, ka pasal chu a pangngai ve tawh mai ka rin tehreng nen a pangngai lo nasa mai. A hma ai zawngin hna a thawk rim a, ram lamah pu Kawla nen an inzui chhuak nitin a, chawlhni zan tak ngialah pawh lui lam aṭanga lo haw a nei chhoh ta tlat mai. A mangan thlak ka tih rualin dem lohna chen ka nei tho bawk si, ka biak lahin min chhang ngai chuang si lo. Vawi khat phei chu ka vin deuh hrawk nghe nghe a, a inthiam lo zawkah ka ṭang leh a, ani lah chu a danglam phah chuang der lo leh nghal.

Sumo pawh Service ta lawk lovin ram lamah leh lui lamah hlir a ṭuan a, khawpui lam aṭang pa Chhara te School-in thing an lo duh leh zel bawk nen a rilruah Sumo khalh lam reng a la lang thei rih lo chu a ni e. Ram aṭanga an lo haw lah hian pu Kawla aiin a rawn haw tlai zawk ziah leh nghal a, a taksa leh a pianphung, a hnathawh dan leh chawhmeh a rawn hawn ṭhin dan chu a hma ang chiah vek ni mah se a rilru erawh a la pangnga thei lo a ni. A ṭul hunah kan fapa a pawm tawp a, a paw tawp a, chaw a ei leh tawp a, a mu leh tawp bawk a, pu Kawla phei chuan

"Ka pu bula awm hi a hrehawm sâwt ê ka pi, hna kan thawh dun paw'n a chawl duh ngai si lo va, ka tan chawlh ringawt a mawi si lo. Tlai tin haw a hun tawh thu ka hrilh ziah alawm, a inti nâ mai ang tih ka hlau" tiin ka hnenah a sawi hial a, mahse Mazara bula sawi lo turin min ngen thung.

Pu Kawla meuh paw'n chuti ang chuan ka hnenah a sawi ngam a nia, ani ang mi inthlahrung lutuk paw'n a sawi chhuak a nih chuan a véi tâwk hle a ni mai. Buaithlak ka tih ber pakhat chu a ngawi tlat zel a, ka biakna tak ngial pawh a chhang ngai lo va, a chang chuan a em em ka ti leh thut ṭhin. Ṭawng duh miah lovin a tih tur ang zawng chu a ti leh thlap lawi si a, ka thusawi te hi a hre vek a, min ngaihtuah dan a ngai reng a, a fapa a ngaihtuah dan a ngai reng bawk a, mahse a nuiin a ṭawng ngai lo ta a ni.

Aizawla an zin thlak ni khan phone an lo lei nghal chu niin, chu pawh Tlantea kâ aṭang bak ka hre leh ta chuang lo. Ka sawi hnuah hre chhuak thut ang mai hian min pe ve chauh a, Mazara lakah chuan ka thinrim lek lek ṭep a ni. Phone chu pahnih a ni a, a inang chiah chiah a, ni lo, pathum zawk maw le. A pathum chuan a inang chiah chiah vek a, pakhat erawh a rap sawi chhe vek thung. Ka rin dan chuan a pa tan a leisak a ni ngei ang, ni lo se chu thinrim hmel takin a rap chhe vek kher nâng.

Phone kan nei thar chiah tak ná a, khaw chhunga tower awm chhun chu a tlu a, chumi siamna ah chuan Mazara pawh a tel ve nghe nghe. A thawhpui dangho zawng zawngin hlawh an neih laiin ani chuan a nei ve lo leh tlat a, a la duh lo a nih ka ring. Mi dang bulah awm vak rih lo se ka ti hle zawk a, an lo intibuai palh ang a, mi pawi a sawi ang tih ka hlau a ni ber. Vanneih thlak takin tû pawi mah a sawi awm ka la hre lo tluang zel a, nupa kan ni tawh tlat a, a hmingchhiat chuan ka hmingchhe ve nghal zel a ni mai. 

Kan fapa paw'n hma a sawn ve zel a, ṭawng a hre tawh khawp mai. Ka ṭawng ngat phei chu a hre leh zual a, hnutê ka pek lai te hian biak mawlh mawlh ka uar a, ṭawng thei thuai thuai se ka duh a ni. Thla tam erawh a la ni lo va, kan ṭawng hre ṭan mah se a ṭawng theih hun a la hla rih viau ang. Zan lamah putea te nupa an rawn leng thla awl lo va, tun lai chu phone neih kan intihhmuh hlawm a, in nei ṭha lo ve tak tak te paw'n phone kan nei fùr hlawm ta mai. Khawtlang mipui an taima hrim hrim a, phone man te mai mai chu an thawk chhuak chiang hlawm khawp.

"Naktuk aṭangin ka service ṭan ang" Mazara lam chu rang mangkhengin ka hawi phei nghal a, a mak ka ti êm asin, thla khat chuang min be tawh lo va, a fapa pawh a chhaih ngai tawh lo kha a ni a, ama duh thu ngeia a rawn ṭawng chhuak chu chawp leh chilhin ka hlim phah nghal bawk.

"Aw le" tih bakin ka chhang thei rih lo, a dinna lama kalin ka va kuah thlawp a, ka ṭah a chhuak lo va, ka hlim em em zawk a, hmâna ka pasal kha a rawn lêt leh ṭan mêk tih ka hria, lo lêt leh mawlh rawh se. 

"Vawiin erawh ka ram chhuak ang a, tlai chawhmeh tur hruizîk lo hawn ka tum ang" ka dara chelh ran chungin a ti leh sup a, hlim avanga mittui tling pamin ka nui a, ka chawhmeh duh em em lo hawn a tum thu pawh a sawi leh thei ta. 

"Ka hmangaih che" ka rilrua lo lang hmasa ber chu ka sawi chhuak tawp a, a kal sawn phal lawk lovin ka kuah leh rih a, min rawn kuah lêt ve nghal mai a, a tawpa tawpah chuan ka pasal âng chhung dik takah ka awm leh ta chu a ni a, ka tan chuan hlim loh a har teh asin. 

"Duatpuia lo awmpui la, pu Kawlan awmpui bawk che u rawh se" a ṭawng hrim hrim chu a dam dap a, panggai takin ṭawng leh thei tawh mah se a nui hmel erawh hmuh tur a la awm rih lo va, mahse ka vui lem lo khawp.

"I chet velna hrim hrimah fimkhur em em la, lo haw har miah suh, i nupui leh i fapa hian kan ngai che a nia" ka tih chuan a bu nghat a, hnathawh kawr bawm awmna lamah a phei zui nghal a, kei chuan a hnung lam aṭang a che vel ka lo thlir tawp ringawt.

(End of Chapter 39)