SUMO DRIVER By Havali Adam (CHAPTER 38)

SUMO DRIVER 

By 

Havali Adam

Chapter 38

Pu Kawla chuan min lo kai tho ta ngei a, mahse a hma ang bawkin pindan chhungah a rawn lut leh ta chuang lo. Khum aṭanga kan thawh meuh chuan khua a lo thim fel vek tawh a, zanriah pawh kan ei nghal chu a ni mai. Duh aiin kan lo mu rei hret nghe nghe a, mahse ka mut a la chhuak ru em em tho. Zanah putea te nupa an rawn lêng thla a, ar hem te an sawi ri hial a, pitei chuan ṭul lo a ti hle thung. A chhan chu rai lai ka ni a, ei ina ka fimkhur a ngaihzia a sawi kai duah a, hmeichhia zawk na ná ná chuan an lo hre zawk a nih hmel.

Thingpui ka chhuan laiin Mazara chu pindanah ka ko lut a, ka rilrua awm reng chu zep nei lovin ka hrilh ta. Ka duh ang ka sawi zawh hnu chuan a ngawi reng a, ṭawngkam khat paw'n min chhang lo va, ka ngenna anga thil tih a tum loh hmel viau bawk. Ka sawi tur ang ka sawi zo tawh bawk a, thu dang engmah sawi tawh lovin pindang aṭang chuan ka chhuak a, dik tak chuan kan nupa boruak ṭha lai a tichhe lek lêkin ka hre hial a, mahse sawi lovin ka awm thei si lo a ni. Ka rilruah a riak reng a, khawngaihna vang ni pah fawmin ka sawi tur tak niin ka hre tlat bawk.

Putea leh pu Kawla chu an inbe ve reng a, pu Kawla chuan nuam a ti viauin ka hria. Putea ni se sawi tur a lo hre phian a, zawhna chi hrang hrang a zawt a, fiamthu thutak deuh si hian a be reng a, pitei nen chuan kan lo nuihpui leh hak hak ṭhin. Ka nui ri ṭhin tak ná a, ka nui chu a lem tih ka chiang hle. Ka nuih a za tak tak lo, a chhan chu ka hma lawka ka pasal ṭhu ngawi run a awm reng a, a inngaihtuah nasatzia thlengin ka hmu tlang thei vek a, pasal te rilru buai laiin ka hlim tak tak thei lo a ni ber e.

Thingpui kan in zo va, no senga ka silfai laiin Mazara chu ngawi reng bawkin a che hrut a, muangchang lem lo tak hian a chhuak zui nghal bawk. Ka no silna bula ṭhutthlengah chuan ka ding kâng nghal thuai a, kawngpui lam pana ka pasal kal vut vut chu Ventilation tukverh aṭangin ka thlir reng a, a tawpa tawpah chuan thinlung takin ka nui ve ta nge nge e. Kum hlui thlah zan te a ni sia tiin a pa lêng thla tura sawm turin ka ngen kha a ni a, vawi tam a ngaihtuah hnua kal chhuak a nih hmel bawk a, a pa tak pawh a lo lawm viau ka ring.

Ni e, a pa a ni miau a, pafa an ni miau alawm, haw viau angin lang ṭhin mah se a haw rei tak tak thei dawn chuang lo tih ka chiang a ni. Zep lovah chuan kei ngei pawh hian ka pa; rilru chhia leh sual zet kha ka ngai ṭhin, eng ang paw'n thlak danglam tum mah ila a thisen ka ni tlat a, min tuithlar hial tawh mah se ka theihnghilh thei chuang lo. Mazara bulah erawh ka sawi chhuak duh ngai lo va, nupa nih tawh avanga zep neih loh leh lutuk pawh hi a fuh chiahin ka hre lo ṭhin. Mazara mizia ka hre chiang thawkhat tawh viau a, ka sawi chhuak a nih chuan amah bawk a indem dawn tih ka chiang a ni.

Ka pa mai ni nâng âw, ka nu leh ka ute pahnih pawh ka ngai em em a, anni lah chu khuangcher bo ang maiin an reh hmak bawk si. Tin, ka ṭhiante pawh sawi hmaih theih loh an ni. An laka han vui chângte chu ka nei ṭhin ngei alawm, mahse ka vui rei thei chuang lo. A tir phat aṭang Mazara min duhpui lutuk lo tih ka hrethiam vek a, hrethiam vek chungin pasalah ka um lui ta kha a ni a, engtin pawh ka lakah awm se ka dem thei ringawt lo a ni. Khawpui tlangval hausa tak tak te chu nei ngat ila zawng kan inkawm tlâng thei ang a, kan inhmu tawh ngai lo miah lo bawk ang.

Amaherawh chu kei ka ngaih danah chuan khati ang kha a ni ve tlat si lo va, keimahah chuan hausakna leh chhungkaw dinhmun te aiin hmangaihna a pawimawh ber si a ni. Ka mipa hmangaih em em pasalah ka nei a, ka pa tuithlar hial tâwkin ka zui lui a, ka nei lui a, khawvel thil takin kan dinhmun la hniam rih mah se hlim lo thei ka ni lovin ka hre zawk. Hmangaihte bula awm tluka thil thlakhlelhawm a awm lo va, khawpui tlangval pasalah lo nei ta ila chuan kan hausa ngei ang, mahse Mazara bula ka awm angin hlimna tluan tling tak ka nei dawn si lo tih ka hre chiang em em thung.

Kan titi malh malh laiin Mazara a rawn haw a, rin ai tak chuan a thang rei phian. A hnu lawkah a pa a rawn lut ve nghal a, a pa chuan hnaha tuam zo chhang a lo keng nghe nghe a, mahse chhum hmin sa a la ni chiah lo. Kan thir ber lian berah chhang chu kan chhum a, engkim Mazaran a buaipui a, chet ngai zawng zawngah a che vek a, pu Kawla paw'n a pui ngam chiah lo. A pa tak ngial pawh a awm tawp ringawt a, puih chu a tum tawh ngei a, mahse Mazara ber chuan ngawi reng hian a lo en run a, puih a duh lo tih a hrethiam chawpchilh ve nghal mai bawk.

Putea leh Mazara pa chu eng eng emaw sawiin an nui dun leh hak hak ṭhin a, Mazara pa chuan ka chhungte dik tak angah a ngai ni berin ka hria. Zan dar 11 velah chhang chu kan ei a, Mazara bawk chuan a ât diat diat a, pu Kawla nen thingpui kan lo siam thung a, kan han ei in chiah chu ka chhangban ei tawh zawng zawngah a la tui ber ang. A rimte chu a chhangban ngawih ngawih a, zô em em bawk a, kei ngat phei chuan khawpui mi tam tak te ei phak loh leh hmuh phak lovah ka ngai tawp.

Tlai khawhnuah Tlantea a rawn lut hlawl a, ka lo chhaih zeuh pek a, min melh no lo hle. Ngaihzawng a nei tih a nu leh pa'n an la hre chiah lo va, keimah chu min vengthawng ta ber. Mazara zawngin a sawi dawn tih a hre chiang khawp a ni ang, mipa ve ve an ni bawk nen zep si se a nei ngai lo hrim hrim. Ka lakah erawh tun hnai deuh aṭang khan zep ṭhen a nei ṭan a, a awm ve tho mai. Hmeichhia hi chu kan hmeichhe nihna a lang leh ṭhin a, zep tum em em mah ila sawi chhuah hun kan nei leh kurh zel a, mipate hi an ngawi rei thei ka ti ṭhin.

Dar 12 rik hma hretin kan inlêngte chu an haw a, an haw dawna Mazara pa'n kan naute a be thut chu mak ka va'n ti mai mai tak. Mazara pawh a pa chet dan chuan a ṭhawng hle a, thinrim hmel a pu lo hrim hrim bawk. Putea te chhung aiin a haw tlai hret a, chhuak rual reng mah se a ding khawtlai a, chutah kan naute lah chu a pu biak hria ang hrimin a rawn la che zui leh ta nghal. Mazara pa kut chu lain ka pum ka dawm tir thuai a, ka pum chhunga naute che vel a hre chiah chu hlim tih hriat zet hian a nui nghal ta vur vur.

"Mipa a va nih hmel ve, a thawm a nâ reuh riau mai" Mazara pa chuan a tih phah hial a, ka chenpui leh ka bul hnaia mite'n mipa a nih an ring vek a, chu chuan kei pawh min tiring lo thei ta lo, Doctor tak ngial paw'n a ring a nih kha! 

A haw dawn tak tak chuan ka rin loh dan bawkin a che leh ta, kei chang ka ni lo, Mazar bawk a ni hamhaih em em chu! A pa chuan inthlahrun hmel tak hian a kuah a, a kuah rei zêk leh ta nghal a, Mazara erawh kuah lêt nachang hre lo ang maiin a ding mawl tawp ringawt. A pa chuan kum thar chibaina thu a hrilh a, a chhungkua ṭha taka enkawl turin a hrilh sûp sup bawk a, an pafa awm dan chuan ka hnuk a tiulh teuh khawp mai. Mazar pa hi a tê chhe lo va, pa hmelchhe lem lo tak a ni a, duh ngat se chuan nupui dang a neih leh theih ka ring.

A pa kal liam hnu chuan in chhungah kan inzui lut a, pu Kawla chu chhuatah a lo mu fel thlap tawh a, nupa inhmangaih tak mah ni ila tun ṭum chu sawi tur a vâng kher mai. Khuma kan mut hnu thleng chuan kan la ngawi dun char char a, Mazara chu thu dang lo ni ta se, keimah zawk chuan nuam lo ka ti a ni. Ani te chu a ṭawng tam lo hrim hrim a, keimah ang lo takin a ngawi thei a, ka sawi tur hre lo chu a lam hawi zawngin ka inlet ta ringawt. A thil en ngai a lo en reng a, zan dang ang bawkin duat tak hian min kuah a, mahse a rilru erawh hmun hla takah a awm thung.

Ka kawng zawna a kut chu la kângin ka fawp vawng vawng a, chutah erawh a rawn hawi thla rang khawp mai. Ka biang a dawm zawm nghal zat a, ka lo nuih seih a, nui hmel tak chu a la pu thei rih lo a nih hmel. A saisir zawngin min mut ṭhat tir a, amah zawk chu ka khan theih turin a rawn tawlh hnai nghal a, ka pum puar lian ve tawh tak chu a zut pah reng bawk. Tlêma tawlh thla deuhin ka nghawng zawnah a thaw lum ham ham a, chuti anga a tawlh hniam loh chuan a tan zawng ka nghawng zawna thaw lum turin kun chu a harsa lam hret a ni.

"Ka lawm e, sawi tur dang ka hre viau lo" a rawn tih chuan ka meng kual ralh ralh a, lawmthu min hrilh ringawt chhan chu ka hrethiam lo viau ve thung a, min hnaih zawngin a insiam rem a, ka nghawng leh a chhehvel chu a hnim ni berin ka hria.

"Nang hi nupuiah nei lo che ila chuan engtin tak awm ang maw!? Ka sual ngawt ang ka ring, zanin avang khan ka lawm e" a rawn ti nawn leh sup a, tun ṭum chu a sawi tum tak ka man thiam nghal a, ka duh ang taka a rilru a inthlak ṭan chu kei tak pawh ka lawm hle.

"I pa a ni tlat si alawm Mazar, huat duh viau mah la pa hmangaihna chuan a hneh zel zawk che a ni" ka ti ve ta sêp sep a, ngawi reng hian min kuah nghet sauh a, a chawn puar inkarah chuan ka ke ka rawlh lut zui nghal bawk. 

"Ka'n tum ve leh chhin dawn chu a ni phawt a, a bul ber erawh nangmah i ni; nangmah chiah. Nang tê hian ka lo sualzia min hriat chhuahtir a, i tan tak pawh ka zahpuiawm" chu thu ka hre chiah chu ka nui lo thei ta lo, ka hlim lutuk chu awm ngaihna ka hre lo titih nghal hial zawk maw le.

"Engtikah mah ka zahpui ngai lo vang che, a chhan chu ka hmangaih che alawm, tu nge hmangaih te zahpui ngai? Ka zahpui che a nih chuan ka hmangaih tak tak lo che tihna a ni mai, mahse chu erawh ka dam chhungin a thleng ngai lo vang" ka ṭawng zawh rualin a rawn che thut a, min tihamhaih hman khawp.

"Thla engzah nge kan insum tawh i hria em? Zanin chu i remtih ngei ka beisei, kum thar bulṭan nân chuan a ṭha thawkhatin ka hria" tih leh min fawh chu a rual nghal zat a, ka chungah min karcheh zawngin a ṭhing kâk run tawh a, a thil hman thiam em em ka dul hnuai lam rawn nâwktu chuan min mamawh tawhzia min hriattir chiang teh e. 

Nupa nun chu kan hmang dun ta ngei a, min dim tum viau mah se a ngaihtuah thleng hman lo leh thut ṭhin ni berin ka hria. Rai lai ka ni tih ka hria, dan tum rilru deuh kha ka ni a, ka pasal hmel leh chet dan chuan min tidanglam ta vek a ni. Mamawh tih hriat takin ka pasal min sawngbawl dan vel chu ka lo dawngsawng a, Doctor khan a phal lo bur lo bawk a, nupa nun hman chu a pawi lo turah ka ngai ve hmiah. Hun kan hman zawh meuh chuan thlasik mah ni se kan thlan dâp a, a taksa ruak káng leh chhah ṭha takah chua ka bei ta hle hle.

Zingah chuan thawh ka'n hai chiang khawp a, Mazara erawh a lo tho daih tawh thung a, ruak titih veka ka la mut avangin thawmhnaw ka inbel thuai thuai a, choka lama ka va chhuah phei chuan min lo nui suk a, lái ru zetin ka nui ve sak ringawt. Kum thar a ni ta bawk a, ka ngaihbel nge pawh ka hre lo, inthazo lo sâwt tak kha ka inthazo ṭha leh ni mai te'n ka hria a, ka kal zawng te chuan harsatna em em ka nei tawh lo hrim hrim. Ka duhthusam takin kum thar chu kan hmang a, kei paw'n ruai ka ṭheh ve tawh nghe nghe a, ka ṭheh lo a nih chuan Mazaran ṭheh a tum bik bawk si lo, ṭheh lo thei ka ni lo a ni.

Kan nupa ruai ṭheh dan erawh a dan a dang ta deuh hlek a, mi dang zawngin changel hnaha an ei laiin keini nupa chu thlengah kan ei ta bik a, fatu te leh min duhsaktu te lakah chuan a inthlahrunawm duh khawp mai. Ruai ka ṭheh ve tak ná a, sa chu ka ei mang lo a tih theih. Lawi sa kan hmeh a, vawk sa leh arsa te awm tho mah se Krismas leh kum thar ruai ṭheh ti ruai ṭheh em emtua ka ngaih chu lawi sa a ni tlat si a ni. Mazara lah mi mitmei veng hauh lovin ei tur ṭha lai lâi chu ka thlengah a rawn dah a, mi ṭhenkhat tan chuan min duat vel lutuk chu mit a tikham thei ngawt ang.

Zan lamah erawh kan inkhawm ta lo va, keimah chauh inkhawm loh tum kha ka ni a, Mazara chu a inkhawm duh leh ta bik ṭhak lo. Pu Kawla ve thung chu a inkhawm mai a, ani hi zawng keini aiin upa daih mah se kan thu a awih khawp mai. Tih tur em em kan nei lo bawk a, khumah kan awm dun leh tawp a, a taksa nghengin ka ṭhu awn dûai a, ani'n min karcheh runin ka dul puar ve tawh takah chuan a kut a nghat a, a changin a chul leh zauh ṭhin bawk. Ka thla a muang hliah hliah a, ka rilru a hahdam em em a, inkhawm lova min awmpui chu ka lawm hnuhnawh leh ta viau zawk. 

January thla kan hmang ral a, ka nautê neih hun a hnai tial tial a, ka phur rualin ka huphurh pah ru reng tho. Ka hlimna em em pakhat chu Mazara a inthlak danglam chak hle a, a pa lakah ber chuan a pangngai sâwt em em tih hriat theih khawpin a awm dan leh a ṭawng dan a danglam vek tawh a, mahse a chang hi chuan harsa a la tih ruk hmel thei khawp mai. Mazaran pangngai taka a biak tirh phei chuan a pa chu a mittui a parawl hial a, kei tak pawh ka hnuk a lo ulh hman lek lek a, a pa chuan chhang lawk thei lovin a kuah tawp ringawt.

"Ka lawm e Numam, i pasal danglamna phenah hian nupui ṭha tak i nihzia ka hmu tlang vek a ni. Ka lawm tak zet, keimah zawk hi ka inthlahrung thar lek lêk chu a ni" tiin Mazara pa chuan ka hnenah a sawi hial a, ram lama Mazara chhuah lai tak a ni nghe nghe. 

A ke a dam fel titih tawh bawk a, a awm awl mai mai lo chiang khawp mai. Pa Chharan thlai rah lampang an mamawh thu a rawn sawi leh a, chu chuan a ti awm mai mai thei lo a ni ber. Kan sum khawl zat ka hre ve vek a, Sumo leina tur chu kan nei daih tawh ngei a, mahse nautê ka neihna vela hman a ngaih leh dawn avangin khawpui lamah a la chhuk thla rih duh lo a ni. Kan dinhmun a hniam lai pawha min awmpui rengtu Pathian malsawmna kan la dawng leh ta zel a, Sumo lei thei reng kan ni tawh te, hrisel taka nautê ka pai thei te chu ka lawm ngawih ngawih a ni. 

Thawhṭan zan a ni a, putea te nupa an rawn lêng thla a, nautê an hmuh châk tawh thu an sawi deuh reng a, kan hlim dar dar hle. Tlantea erawh KṬP inkhawm zan a nih avangin a inkhawm rih a, in chhungah chuan fiamthu taka pitei leh putea inhnial der kan ngaithla a ni deuh ber. Putea'n nautê kan neih huna pawm hmasa zawk nih a chuh a, pitei lah a dang duh bik bawk si lo. An awm dan vel chuan min tinui deuh reng mai a, Mazara erawh pindana a lut lawk kha a lo la chhuak rih lo va, eng nge a va tih pawh ka hre chuang lo.

"Tun lai Mazara hmel hi in lo chík ve em? A tla ka ti dawn nge a chauh hmel thei tawp, a thu deuh raihin ka hria. Hna thawk tawh rih suh ka tih lahin awmzia a awm lo nasa si, a tih tawh lamah hi chuan luhlul ve tak a ni" ka tih chuan pitei zawkin

"Ka lo chík ru ve reng ṭhin alawm, a nu hah a nih dawn hi! I pute pawh hi Tlantea ka pai lai khan a nu hah chiang alawm, mahse nu hah nih kha a zak tlat a, a hun lai kha chuan a ṭang nasa mai" a rawn ti nghal a, a nui zui hak hak bawk. 

"Nu hah kha ka hrethiam hleinem le, chu bakah a hming kha a pà lo êm alawm, ka ṭhiante'n min chhaih phah leh nghal" putea chu a rawn ṭawng chhuak ve nghal a, pitei en reng chungin a nui sun sun a, an inhmangaih tih hi a hriat ngawih ngawih ṭhin. 

Minute eng emaw zah hnuah Mazara pawh a rawn chhuak ve ta nge nge a, ka bulah a ṭhu chat a, a ngawi leh run tawh. Zawhna an zawh lo hi chuan sawi tur a hre vak ṭhin lo nge ni ti dawn ila a hun takah a ṭawng leh chat zel tho bawk si, ka tehkhin dan berah chuan amah hi mipa dik tak a niin ka hria. A ṭawng tam lovin a insum thei em em a, rai avanga ka ṭawng hlawk hlawk chang paw'n ngawih a chuh tlat zel a, a dawhtheihna leh min duatna chuan a tawpah min hneh leh nge nge ṭhin zawk. 

Thla kal ta chhung khan kar khatah vawi hnih thum tal chu ka vin ngei ngei ang ka ring, ka thinrimna kha a va han ho thei hlawm tak. A thil rawt thak ka tih avangte khan ṭah ka tum vel a, amahah ka inchan chhin a, keimah leh keimah pawh ka indawhtheih ka ring lo. Mazara erawh chuti ang mi a ni ve lo, a zaidamin min duat em em a, han vin hlawk hlawk ṭhin mah ila ngawi reng hian a tih tur a ti a, a nupui ka nih angin min thunun em em tho. Ka hrethiam bik lo, ka ṭawng thawm lo hretu te tan chuan thu hnuaia dah angin min ngai ngei ang, mahse Mazara chu hlau ni si lovin ka zah ru tlat zawk thung. 

"Pitei sawi dan chuan i nu hah a ni ang, tun hnaia ka hmu thu nghûlh che pawh hi awm lo ka ti hran ta lo ve, inah min awm ni lêng leh tawh zawk mai rawh" pangchang aw tak chuan ka ti sêp sep a, meng nur náng hian 

"Ka nu hah bawk lo e a!" a rawn ti deuh hmuk a, insum hman lovin ka nui chhuak ta tawp a, nui miah lo hian min en chhuk run thung a, min en dan te hlei hlei chuan ka nuih a tiza zual a, tum loh deuhin zan rei lam tawhah ka nui ta vak vak mai. 

"Nu hah nih a zahthlak reng reng loh, pá lohna pawh a ni lo. Thil thleng thei a ni a, ka pasal lakah hian a thleng mêk bawk a, ka pasal hmel pá tak hi ka va lawm reuh tak" tih leh a biang piai chu ka rual zawm zat a, ka nuih a zat tehreng nen ani erawh nuih eih pawh a tum lo a nih hmel. 

"Ka zak hauh lo" a ti bul leh hmuk a, ka nuih a za laklawh tawh bawk si nen a awm dan engkim, a ṭawng leh a hmel hrim hrim chu ka lawmah a tla vek tawh a, a biangah piai deuh salh salh chungin nui mah ila hrehawm ti lo ang maiin min dawh hle hle tho.

"Mitmeng mawipa, ngawi thei si, zaidam bawk si, si hlir si hlir" ka tih chuan ei loh hmel zet hian a hmui a tisawi a, ka ke chet meuhin ka nui hak hak a, a biangah ka han piai pah leh zauh ṭhin a, a tawp tawpah chuan peih loh hmel deuhin a nui ve ta suk.

Kar thum a ral leh chuan ka pum chhunga nautê paw'n thla 9 hmel a hmu ve ta. Doctor sawi dan chuan thla tir lamah ka nei dawn a nih hmel a, nau vei thut thei dinhmuna ding reng ka nih tawh avangin khawpui damdawi inah kan awm chilh tawp a, pawi ka ti miah lo. Pu Kawlan kan in lam a lo enkawl mai a, pitei chuan hna a thawh ṭhin thu a sawi a, anni chhung pawh khawpui lamah an rawn zin phei ngun thei bik lo. Mazara pa chuan damdawi inah min rawn kal chilh ta ber a, Mazara phei chuan

"Nautê kan neih hunah i hmu dawn tho alawm, lo zin phei chhen suh, pawisa i hmang ral hnem tawh" tiin a hrilh tawh nghe nghe a, thinrimin a sawi lo tih a hre chiang bawk a ni ang a pa erawh a nui mai zel a, damdawi ina lo kal a ṭhulh phah ngai chuang der lo. 

Ka pasal berin damdawi ina lo va awm lâwk a tih tlat avangin kar khat chu damdawi inah kan awm tawh a, pasal fimkhur tak ka nei tih ka hre chawpchilh nghal bawk. Kawng leh lam zawng taka ngaihtuah chuan mi dam lo awmna tur kan lo dip mai mai tih ka hlau a, amah paw'n a hlau ve tho chuan ka hria, mahse dam lo awm tlêm lai tak a ni leh ta zel a, damdawi ina lo va insawn phei lâwk chu a ṭha a nih ka ring, harsatna kan tâwk lo ém mai. Doctor-in nitin min check ta ziah a, damdawi ina awm chilh kan nih avangin a tan tak pawh a awlsam phah khawp. 

Kar thar kan chuangkai a, a nih dan tur takin nau chu ka vei ta. Khawvelah kum hei leh chen hi ka lo awm ve tawh a, mahse chuti ang renga nâ tawrh chu ka la nei lo. Ka rin phak bakin nautê hrin chhuah a harsa a, ka taksa zawng zawng chu a nâ chhuak vekin ka hria. Ka theih tawpin ka sang a, ka bei a, a tawpa tawpah chuan ka beng ngeiin nautê ṭap thawm hre ta. Doctor te chuan an tih tur an ti zui nghal mawlh mawlh a, mittui tla purin ka nauté chu ka pawm a, mipa a ni leh zel te chuan ka ṭah a tichhuak zual ngawih ngawih.

Room aṭanga hmeichhe pakhat a chhuah hnu rei lovah Mazara leh a pa an rawn lut nghal a, ka pasal hmel ka hmu chiah chu ka lo ṭah nuih hawk a, ṭah loh ka tum tehreng nen ṭah loh chu thil harsa tak a ni. Kan fapa chu a pawm kâng a, nautê piang hlim ka hmuh tawh zawng zawngah a la lian ber awm e. Doctor te pawh chuan a len thu an sawi deuh nak nâk a, an han buk chhin chiah chu hrin chhuah har awm reng pawh a lo ni. A rih bakah a lian ṭha si, a hlim khawp a ni ang Mazara pawh ha lang meuhin a nui ve leh ta e.

Doctor chuan kan khaw lama inenkawlna tur a ṭhat tâwk loh avangin damdawi ina zan khat riak lawk turin min ti a, damdawi ina kan awm man te kan pe fel nghal vek a, mahse nauté kan neih hnua kan awm man erawh a la duh ta lo. Beisei loh takin pa Chhara a rawn lang ve hlawl a, a nupui nen an ni nghe nghe a, School kal ṭhulh ṭhaka an lo kal chu inthlahrun a ná duh hle. Pa Chhara nupui chuan nautê kawr min lo ken sak a, lawmthu ka sawi mawlh mawlh a, kan tana mi ṭha an lo awm chuan min va tihlim zual si em. 

Mazara pa chuan kan fapa pawm a châk tawh tih ka hre reng a, Doctor-in hnute pe rih turin min ti nghal bawk si a, pawm a duh thu a la sawi ngam chiah lo a ni ber. Pa Chhara leh a nupui chuan a len thu ringawt an sawi a, tun ṭum chu Mazara hmel hlim ka hmu reng mai. Hmuh nuam ka ti a, a awm dan chuan hrin chhuah lam harsain nâ ngawih ngawih mah se fa neih zel min tiphur hle thung. A tlêm berah pathum vel neih kha a duh a, ka tlin dawn phawt chuan fa tam tak pek ka duh ta zawk, a hlim hmel hmuh a nuam êm a tin ni! 

Zanah chuan Mazara leh a pa'n min awmpui a, Mazara pa paw'n a pawm ve ta nge nge. A pawm tirh chuan a nui nghek nghe nghe a, rit ṭha nelh nawlh a ti ngâng a ni ang a sawi reng mai. A pa chuan Mazara chu nautê awih mut dan leh pawm dan te a hrilh vel a, khumah ṭhu chungin an thil inzirtir lai chu ka lo thlir reng a, thlir nin an har ngawih ngawih hi a ni tawp. Mazara ni se a pa sawi ang leh tih ang chuan a ti ve zel mai bawk a, kan fapa awih mut a'n tum vel chhin chiah chu ka insum theihna a puak darh a, ka nui chhuak ta nge nge. 

"Mazar, thiam loh i nei tih ka hre ve chiah" fiamthu deuh si mahse tlêma ṭawng elna rawng kai chuan ka ti chhuak ta phawng a, chutah zet zawng a pa pawh insum zo ta bik lovin a nui chhuak hawk hawk a, Mazara erawh a nui lo chiang teh e.

"Ka thiam thuai ang, ka fapa hian ka pawm bak a duh dawn lo bawk" inring tâwk zet hian a ti nghet charh a, a lungawi lo ve deuh tak tak emaw ni, mahse lungawi lohna tham a ni chiah bawk si lo, a sawi ang tak tak chuan nautê pawm leh awih mut a thiam thuai thei tho bawk. 

"Khati hmuk hmukin an ṭawng ngai lo, nautê hriat lai leh nghal. Nautê te hian thil an hrethiam chak fû a nia, nang pawh i nausen lai khan thil i man chak alawm, a mangan thlak zawk ṭhin. I nu nena kan thusawi te kha i lo ngaithla kar roh zel a, i nu la dam se chu a hlim ve ngawt ang" Mazara pa chu a nui tawp riai riai a, a hmel aṭang chuan a ngaihtuah thui hmel ta hle.

"Sawi tawh suh, sawi tawh miah suh, ka nu chungchang kha vawi khat mah sawi tawh suh" Mazara chu ka rin loh lam daihin a rawn awm a, thinrim zetin a pa chu a melh run a, ka lamah lo pheiin nautê chu min pawm tir a, room aṭanga a chhuah hnu rei lovah a pa pawh a chhuak zui ve nghal.

"Nu Biak, ni lo, ka nu, Mazarate pafa inkar hi siam ṭha hram rawh aw? Van lam aṭang tal khan Mazara rilru hi tidanglam la, inhmuh chhuahtir tawh hram teh, ka pa tan pawh hian a hrehawm ve dawn êm asin" tiin ka phun sép sep a, ka hnute hne mektu ka fapa chuan min lo en kar a, Mazara mitmeng chiah chiah a ni.

Zan tlai lutuk lovah ka pasal leh a pa chu an rawn inzui lut ve leh mai bawk a, Mazara chuan inthiam loh hmel a pu deuhin ka hria. Ka bul chêtah a rawn ṭhu a, ka lo nuih seih a, ani erawh a nuih a zat vak hmel loh. Kan fapa sam chu a chul a, pianghlim deuh chauh a la nih avangin khawih vel paw'n dim a ngai hle a, Mazara pa chu rei vak lo hnuah a chhuak leh ta daih mai. Zinga ka harh hnu thlengin a hmel ka hmu tawh lo hrim hrim a, Mazara chu ka zawt ta nge nge. Zing kara a haw thu min hrilh a, ngaihṭhat lohna nei lo turin min hrilh zawm zat bawk a, ka buk khum zeuh ringawt.

Kan fapa hming pawh la phuah lovin kan khaw lamah kan haw phei a, putea te chhung an rawn thleng thla nghal thuai a, Mazara nu chhungte lam an rawn thleng thla bawk. Tin, Mazara patea te pawh khaw ṭhenawm mah ni se an lo thleng phei rang hle a, kan fapa hmu tute thusawi hmasa ber chu a len thu bawk a ni. Ka mitah tak phei chuan a pa ang maiin a hmelṭha em em a, engkimah a pa a chhun fai nghal vekin ka hria. A mitah, a hmui leh hnarah, a khabe thlengin inchhun pafa tak an ni. Kan fapa lah a lianin a chum si, Aizawl lama ka nitei fapa min tihre chhuak rum rum hial.

Kan fapa hming chu Mazaran phuah a tum deuh ûk a, mahse a pa zawk a mitmei a, a pa erawh chuan lu a lo thin khum vat thung. A patea te, a nutei te ho chuan an pafa inbiak dan vel an hre chiah chu mak an tih hmel hlawm khawp a, a patea ber chuan mak a tiin ka hria. A awm ve tho mai, khati ang khawpa haw bur ṭhin kha a ni a, a inthlak danglam ta lutuk chu dawnsawn dan an la thiam rih lo a ni mahna. A pa'n phuah a tum loh tâk tlat si ah chuan Mazara chu a bu ta nghat a, kan fapa hming chu NGURSAILOVA tiin a phuah ta nge nge e.

Ṭhenawm khawveng aṭang te, khawtlang mipui min duhsaka min lo hre ve em emtu te hnen aṭang nautê thawmhnaw chi hrang hrang kan dawng a, kar hnih chhung zet chu kan dawng awl lo hial zawk maw le. Mazara chuan a sawi dik leh ta, damdawi in kan awm laia a lo sawi lâwk tawh ang chiahin nautê pawm leh awih mut a thiam nâl tawh hle a, kan fapa lah chuan a pa a ni tih a la hre hrang em em zui. Zantin deuh thaw hi chu inlêng kan nei ve ziah a, mite hi an lo ṭha ngawt mai. Lawmpuina thu mai bakah thilpek min pe reng bawk si a, phu loh malsawmna kan dawng chiang tak zet.

Hun a'n liam leh deuh chuan kan fapa paw'n thla khatna a rawn tling chho ve ta, ka hlim ang bawkin ka pasal pawh a hlim a, hnute ka pek loh lai emaw ka buai lai a nih chuan an inawm chawt zel a, Mazara chu ram lamah a feh khât phah deuh bawk a, chhungkawpa berin min uap ṭhin chu nuam ka ti thei hle. Pu Kawla pawh ram lamah a chhuak reng a, thil ho tê tê kan fapa a rawn hawn ṭhin a, mahse kan fapa chuan a ngaina thei ta lawk lo. An han inchhaih ve vel te hian a ṭap dawn zel a, a ṭah hi chuan pu Kawla chu a inthlahrung zawkah a ṭang ziah leh ta nghal.

Thla hnih hnuah erawh a dan a dang ta deuh a, Mazara paw'n a fapa chu a awm nitin thei ta lo. Lo vah a hun chho em em tawh a, March thlaa lo hal tum daih tawh zawk kha a fapa a awm nitin ṭhin avangin a tlai ta duai a, pu Kawla pawh ṭangkai viau mah se chuti ang lam tak chu a lo la thawk ngai bik si lo va, kan tlai phah a ni ber. Mi lo vah zawh tawh hnuah an vat a, an hal bawk a, ka ngaihtuah dun khawp mai. Kum dang ang bawkin Tlantea ṭhiante chuan an hal pui a, kan inah thingpui te an inkhawm dam dam a, tlangval chho ṭan an ni hlawm bawk nen an thil sawi duh zawng pawh nula lam a ni deuh hlir a ni.

"Vawiin vêkah ka rawn lêt leh ang, rei dawn lo mah ila ka ngai dawn hle mai che u" kan fapa min pawm tir pah chuan a ti sup a, Sumo lei turin Aizawl lamah a chhuk dawn a, Tlantean a zui dawn bawk a, kei paw'n ka ngaih hman viau ka ring tho.

"Tluang taka inthlen thlaka in rawn haw thlen leh theih nân ka lo ṭawngṭai ang, in lo haw lamah te khan hmanhmawh lutuk suh ang che u, in che sual palh ang tih a hlauhawm" ka tih chuan a nui suk a, a kal sawn hmain min fawp leh hram a, kawngpuiah Motor-in a nghah reng tawh avangin muangchan a hun lo hle.

Nautê pawm ka nih avangin a kal liam chu ka thlir tawp a, kawngpui thleng erawh ka thlah ta lem lo. Zan lama kan ngaihtuah fê hnuah Sumo lei kan titlu ta kha a ni a, eng dang vang a ni lo, Mazara thawhrim rah vek a ni. Pu Kawla chu ni dang ang lo takin inah a awm a, a chhan pawh Mazara berin min awmpui turin a ti a, a hnial ngam lo te pawh a ni ang. Kan fapa chu ka awi hliau hliau a, rei lo tê ah a muhil nghal mai a, muhil daih rih mah se a pawi miah lo. A harh ṭhat hi chuan a pa zawn a ching chho ṭan a, rama a kal dawn te hian ngen anga awm a thiam ṭan bawk a, ka duh ai chuan a fing ta mah mah a ni. 

Mazara lah ni se a duat nasa mai si a, ngen a tum ṭhin te, a pa a hre hrang em em te hi a awm lo hran vak lo. Rilru engthawl leh thlamuang takin in chhungah ka che a, pu Kawlan in kawta thing a tan mial mial bawk a, ani pawh hi a pu ang mai a awm mai mai thei lo ṭhin. Thing eh lam erawh a mi sa vak bik lo va, thing ehah na ná ná hi chuan Mazara tluk an awm lo ve êm bawk a ni. Thing chan hmel leh lian deuh deuh pawh ni se vawi hnih vawi thum a cheh tawh hi chuan a phel zung zung zel a, thing eh lam hi chu a harsat lo ve khawp mai. 

Tlai dar 4 velah chuan kan in kawtah Sumo rum vut vut ri a rawn awm ta, chu chuan kan fapa muhil lai a tiharh nghe nghe a, pawn ka chhuak chiah chu ka pasal hlim hmel leh Sumo thar lam tak ka hmu zui nghal. Sumo chungah chuan naupang an lo chuang fùr hi a ni a, an bengchheng nak nak hlawm hle. Khuma kan fapa chu pawm chhuakin Mazara chuan ka kutah min kai bawk a, a khalhtu ṭhutna bulah min ṭhut tir hnu chuan a tlan chhuak a, nautê erawh motor khalh a dip ang tih ka hlauh avangin ka pawm ta thung. 

Khaw chhung chu kan Sumo thar chuan min fan kualpui a, min en duh tawk an lo tam hle a, tun ṭum chu min en zui an tam tak zet. Mimal ang taka motor nei hmasa pawl kan lo ni reng a, kan veng lama kan tlan lai te chuan betu kan ngah em em a, dawr kai ho paw'n min lo en ṭhap nghe nghe. Kan in kawt kan thleng a, motor aṭangin kan chhuk fel chiah tihah hmanhmawh tak hian Tlantea chuan kan bul a rawn tlan thleng a, chuti ang em ema hmanhmawha a rawn tlan chhan chu kan hre der lo. 

"U Mazar, pa Thankhuma in sakna aṭang a tla. In an sakna aṭang i pa a tla palh ka tihna, tunah a inhlawhpui te'n an buaipui mêk a, nâ a tih hmel lutuk" Tlantea thusawi zet chuan min va tihamhaih chiang em, Mazara pawh a meng buai ta nák.

"Khawiah nge tunah a awm? Khawiah nge a inhlawh?" nêm fahran lo hian a ti nghal thuai thuai a, Tlantea chu a din hnaih nghal rûak bawk a, a pa hlauthawng hmel chu kan fapa chuan a lo en kar a, kei tak pawh ka hlauthawng nghal hle.

"Veng chhakah, nu Hluni te in saknaah" Tlantea sawi zawh rualin Mazara chu vung zet hian a tlan nghal a, Mazara pa hmel ka mitthlaah a rawn lang a, nâ a tih viau phei chuan a dinhmun a ṭha lo vang tih ka hlau tak zet.

(End of Chapter 38)