SUMO DRIVER By Havali Adam (CHAPTER 36)

SUMO DRIVER 

By 

Havali Adam

Chapter 36

Vawi leh khatah ka ṭap tawp hmak a, ka ṭhut sawp nuaihna aṭang chuan thovin pawn lamah chhuah ka tum zui nghal a, ṭap khawmuang hman ka ni lo tih ka hre chhuak thut a ni ber. In kawt ka thlen chuan ruah a lo la sur reng a, tam lutuk erawh a ni tawh lo thung a, mahse rin ai tak chuan a la tla tam phian tho mai. Ding chawtin ka leh hawi a, pu Kawla chuan min lo zui zel chu niin, an kalnaa min hruai turin ka ti nghal phawlh phawlh a, ka rilru lam a mumal lo bawk nen ka ṭawngkam chhuak reng reng chu a dik hlei thei tawh lo.

Thui pawh kan kal hmain Mazara pa a rawn lang hlawl a, in lama haw turin min ti tak ná a, lêt ka tum der lo. Kal luih phet ka tum chu min lo dang a, ka duh lo chung in lamah min hruai haw a, pu Kawla erawh Mazara zawng turin a hrilh a, pu Kawla pawh chu in aṭangin a chhuak muangchang lo hle. In chhung chu huh hluamin kan lut a, luhlul chhuahin in chhuahsan chu ka tum leh a, a ngai tê bawkin Mazara pa chuan min lo dang a, tun ṭum chu min dang satliah mai ni lovin min rawn kuah ta, chu chuan ka ṭah a tichhuak zual tak zet. 

"Rai lai i nih hi maw le Numam, eng pawh ti dawn la i pum chhunga naute hi ngaihtuah tel reng rawh. Kal lui ta la kawng a nal si, i tlu palh vel ang a, naute i chhiat mai tur asin" Mazara pa âwm chu ka nam vak a, min lo thlah ve mai bawk. 

"Kal lo ta ila engtin nge Mazara a awm ang? Thi thei reng dinhmunah a awm a, inah hian ka lo awm mai mai ang maw!? A teuh lo mai, ka kal dawn, min lo dang tawh suh ka pa" ka ti hmawk hmawk a, ka mittui ka hru hul sawk sawk a, kawngkapui lam ka pan lai chuan min lo dang leh ta tlat.

"I kal hian awmzia a nei chuang hleinem Numam, inah hian awm la i tan leh in naute tan a ṭha zawk. Kei pawh lui lamah chhuk nghal ka tum a, mahse awmpui i neih dawn loh chuan kalsan ngam i ni hauh lo mai" a hma ai chuan a ṭawng ri pawh a khauh ve ta, kei lah ka buai vek tawh bawk si. 

"Ka rilru a hahin ka hlauthawng a nih hî, min hrethiam ve ta che! Min thihsan ka hlau alawm, min thihsan ka hlau a ni. A tel lova awm ka duh reng reng lo, khawngaihin Mazara lo hruai haw rawh, khawngaih takin" ka ṭawng tawp lam chu a chuai ta raih a, ka ṭap chhuak hak zui nghe nghe bawk.

"A thi lo vang, ka fapa hi a thi thei lo hrim hrim. A nupui leh a fa lo piang mai tur hi a thihsan duh dawn lo tih ka chiang, thihsan ai chuan dam chhuah dan kawng a dap hram hram zawk ang. Kei a pa ngei pawh hi min la ngaidam hleinem, min ngaihdam hma chu a thi thei lo hulhual" a rawn tih chuan nghet zetin ka kuah lêt a, ṭah erawh ka insum nasa hle.

"I putea te paw'n Mazara chanchin hi an hre ve tawh ngei ang a, an lo thleng thla ṭep tawh maithei a ni. Awmpui tur i neih hma chu ka kal lo vang, ka awmpui rih mai ang che" amah bawk chuan a ti leh a, ka hmui chu pet nasa tak ka ni. 

"A thi thei lo, a thi lo tawp ang, a thi tur a ni lo" aw khur dar dar chuan ka ti chhuak thei hram a, min kuahna phelh thawlin ṭhutthleng sei lamah min hruai phei a, min ṭhutpui nghal bawk a, a tua mah chu kan ṭawng leh tawh lo hrim hrim. 

Rei lovah pitei chu kan inah a rawn lut a, min ngaihtuah hmel deuha min en chung hian putea leh Tlantea te pawh lui lama an kal nghal thu min hrilh a, pitei'n min awmpui tâkah chuan Mazara pa a awm reng thei ta bik lo. A chhuah dawn chuan inngaihtuah hah lutuk lo turin leh naute bawk ngaihtuah tel zel turin min hrilh leh hram a, engtin mah ka chhang lem chuang lo. Mazara pa thusawi chu ka ngaihtuah chiang a, a sawi dik chiah a ni. Mazara a thi tihna a ni nghal ngawt lo va, tui tla zawng zawng an thi vek kher chuang hleinem, a lo la dam reng thei tlat.

Mazara pa a kal liam deuh chiah tihah ruah chu a hma ang bawkin a rawn sur leh ṭeuh a, chungte chuan hlauhthawnna nasa tak min pe lo thei lo va, Mazara mawlh chu ka ngaihtuah a ni. Tui a lianin a khauh dawn si a, a pa sawi ang tak tak khan dam chhuah dan kawng dap hram se ka ti ngawih ngawih. Pitei chuan min ṭawng thlamuan char char a, ka thla erawh a muan phah lem lo khawp mai. A hma ai aiin ka rilru a hahdam thei lo zawk tawh a, ruah sur tam laiin an pasal te tui tlak thu hre ve se tu hmeichhia mah an thla a muang thei bik hauh lo ang. 

Pitei nen chuan ruah sur ri chu kan ngaithla tlawk tlawk a, a tua mah ṭawng chhuak lovin kan ngawi dun reng tawh a, sawi tur a vâng ve tawh êm bawk a ni. Ka kut leh kut insual tirin thil chi hrang hrang ka ngaihtuah kual a, luia an lo kal kher kher chu pawi ka ti hnuhnawh tak zet. A thu hrimah engtin nge amah chiah tuiah a tlak theih bik reng reng, pu Kawla nen an kal dun reng awm si a, ka ngaihtuahna chu a buai vek tawh a ni. Thil ṭha lo lam thlengin kan ngaihtuah a, pu Kawla tak pawh chu ka dem ta rum rum. 

Ruah a hân deuh hlek a, a hnu lawkah a sur leh buan buan a, tlâk awl lai reng a nei tawh lo hrim hrim. Tui a lian dawn tih ka hre chiang ropui si a, Mazara zawnga chhuak te tan pawh fimkhur a ngai khawp ang. Pitei chu a ṭhutna aṭanga thovin tapchhak lamah a kal a, mei chhem alhin Ketli a chhuang zui nghal bawk. Banga Sana intar chu ka en a, ei rawng bawl hun a lo pel vâr var tawh a, tunah tak chuan ei rawng bawl tak ngial paw'n ka che chhuak peih rih lo a ni e.

Pindanah lutin khumah ka mu tawm kâk a, choka lama pitei che thawm chu ngaithla pah rengin ka meng kar a, ka rilru lam mumal lo lutuk tawh avang chuan ṭahna chang pawh ka hre lo hial bawk. Ka mittui te chu a tling ngei a, ka mit aṭang a dir zut zut a, mahse thawm pakhat mah ka chhuah lo thung. Ruah lah chu a sur hân thei bawk si lo, rilru mangan buai lai taka a sur hnem hnem em em chu ka haw ngawih ngawih. 

Mut hmuna meng kar chungin Mazara tan ka ṭawngṭai a, Pathian hnenah chuan nung dama ka pasal lo hawtir turin ka dil mawlh mawlh a, chu baka duh ka nei lo a ni. Ka mit chu ka chhing vang vang a, ka rilruah Mazara chu a riak reng a, ka mitthla thlengin a châm reng a, a thi ang tih ka hlau tak zet. Pitei chu pindanah a rawn lut a, ka muhil emaw a ti a ni ngei ang ka pang a tawk dên den a, rei pawh awm lovin pindan aṭang chuan a chhuak ve leh mai bawk. A chhuah rual chuan ka meng zui nghal a, ruah sur vang a ni ngei ang khua chu a hniam chak khawp mai.

Khum aṭang chuan thovin choka lamah ka phei leh ringawt a, ka awm mai mai thei thlawt lo. Choka leh sitting room hi a inzawm a ni mai a, khawpui mite in angin design emaw bang daidanna vel a awm ve lem lo va, pindan aṭanga ka chhuak chu pitei chuan min lo hmu rang hle. Mei lum ai pahin a ṭawng ka ngaithla ran a, ka dul puar chuan min kam deuh lek lek ve tawh a, chu vang pawh chu a ni ka duh ang taka ka ṭhut theih loh. Mei lum ka ai tawh hi chuan khup bawh titiha ṭhut ka hrat viau a, rai lai ni lo ila chuan ka ṭhut ngei ka ring.

"Mazara chu âw a thih leh dam pawh kan hre lo chu a ni si a, tui lah a lian dawn ropui bawk si. Information mic-ah khan a puang lang chiah lo va, lui dunga tui thiamte'n an zawng zui nghal a ni awm e" min ngaihven ru tak hian pitei chu a ṭawng a, ka lo ngawi kar thung.

"Eng êm a thleng lo turah ngai phawt mai teh ang, engkim tithei Pathian kan nei alawm le, Mazara te ang mi ṭha lutuk hi chu Pathian paw'n a thih tir duh bik ka ring lo. Hlauthawng reng reng suh Numam, i putea te'n chanchin lawmawm an rawn hawn ngei i beisei tawh zawk teh ang"

"Ka pasal hian min thihsan dawn lo, min thihsan thei lo hrim hrim. A chhan chu tui hleuh a thiam tlat, tihpalh thil thu tak meuhin tui tla pawh ni se amahin a inhleuh dam khaw chhuak thei tih ka hria" ka ti ve ta nge nge a, mei alh chu ka en ngawt ngawt bawk. 

"Ni e, khati ang zawng tal khan rilru han pu rih teh. Tui thiam tak takin an zawn phei chuan an zawng hmu ngei ang, i sawi ang khan Mazara te chuan tui hleuh a thiam lutuk alawm, kei pawh hian awlsam taka a thih ka ring bik lo" ti dap dapin Dekchi chhuan lai chu a suan a, pitei chet rik mial mial lai chuan Information mic aṭangin 

"Khaih khaih khaih! Khawtlang mipui te'n kan thu thar dawn i lo ngaithla ang u. Vanneih thlak takin pu Zarzokima chu hmuh a ni tawh ngei a, mahse amah tak chhan a la ni lo thung. A lo inham tanna hi tui khauh tak awmna bul a nih hmel a, kan tui thiamte paw'n nghah rih deuh an ti tlu ta a ni" an rawn ti leh ta, ka ṭhutna aṭang chuan ka ding nghal thuai a, puang nawn leh mah se ka rilruah thil dang a lut thei tawh rih lo. 

"A la dam, a la thi lo, Mazara a la dam pite. Engati nge an chhan nghal mai loh? Tui hleuh an thiam a ni lo'm ni? An mawl em ni? Mazara chu a chau thut thei asin, engati nge an dawizep em em?" ka ti phawlh phawlh a, thih leh dam inkara awm reng ka pasal chu chhan thuai se ka duh tawh tak zet a ni.

"Insum teh insum teh Numam, chuti ang ringawtin thil an ti nghal tut tut ngai hleinem, tui khauh nghah reh chu a finthlak zawk a ni. Suar bul velah a lo inham tang thei a ni maithei, ni lo se chu an chhan nghal em em ang. A la dam tih hriat ringawt pawh a hahdam thlak huai tawh alawm, an lo hruai haw ngei beisei phawt rawh" 

"Ka thei ringawt lo, ka thei lo nasa a ni. Hliam emaw a nei maithei asin, tui thiam tan pawha kaltlang ngam loh khawpin a awmna bul a khauh phei chuan tuiin a len leh daih thei. Hahdam takin ka la awm thei lo, him dam taka ka hmu loh chuan ka awm a nuam thei lo" ka aw chhuak chu a vin lek lêk a, ka insum zo tawh lo a ni ber.

"Ka hrethiam che alawm Numam, i pasal i hmangaihzia leh i ngaihtuahzia hi Pathianin a hriatpui vek che a, nung dama i pasal hmel i hmuh leh ngei ka ring bawk. Ruah sur tawh loh nân tal hian i ṭawngṭai teh ang, Pathian hnena ṭawngṭai tawp loh chu tih theih kan nei tlem êm mai" a rawn tih chuan ka rilru la puitlin lohzia ka hre zui nghal. 

Pitei nen chuan kan ṭawngṭai a, sawi tur dang leh dil tur dang ka hre thlawt lo; ka pasal Mazaran dam taka ama in ngei a rawn thlen theih nâna ngenna chauh lo chu! Pitei erawh a chham ṭeuh a, kan ṭawngṭai chhan ber pakhat ruah sur tawh lo tura dilna chu ka theihnghilh chiang hle a, eng dang a ni lo, ka rilru a chi ai phili lutuk tawh vang vek a ni. Pitei chuan a tawp a khar a, kan 'Amen' hnu aṭanga darkar chanve hnuah ruah sur chu a bâng ta mai, a tak ngeia ka tawn leh hriat tawhah a la mak ber awm e. 

"Pathian hi chu a ṭha a nia, Kristian kan ni te hi thil inchhirawm loh tak zawng a ni chiang e" pitei paw'n a tih phah hial a, nui reng chung hian min en a, a thusawi zawng zawng hriain Pathian thil tih theihzia hre vek mah ila ruah a sur hân ta dûak chu mak ka la ti em em tho.

In chhungah chuan awm hle hlê thei lovin ka tei sêk a, khua lah chu a hniam tial tial tawh mai bawk si, tui thiam te'n hmu tawh mah se Mazara ka ngaihtuahna erawh a la kiam thei chuang lo. Ka ngaih dan takah phei chuan ngaihṭhatna tlâkah ka la ruat lo va, a awmna hmun aṭanga an chhanchhuah phawt loh chuan rilru thlamuangin ka awm thei rih lo a ni. Pitei pawh haw chho mai lovin min awmpui ta reng a, awmpui ka ngai hrim hrim bawk a, ani tal a awm lo a nih chuan ka buai leh vek palh ang tih a hlauhawm zawk. 

Tlai dar 5 a rik meuh chuan khua a thim fel titih chu a ni mai a, ka pasal hmel ka la hmu lo ber chuan ka rilru a timangang zual ta a ni. Tuiin a len tlang daih ang a, an zawng ṭha leh te a nih ka ring rum rum hial a, Pitei pawh a rilru a buai ru ve tawh hle bawk. Khaw chhung information mic aṭang ni se thupuan engmah a awm thei rih bawk si lo, rai lo ngat ila zawng lui lamah ka kal ve ngei ang maw le. Ka rai tlat bawk si a, indim ka ngai tih te pawh ka hre ve vek tho, mahse chi ai loh chu a harsa a ni; a harsa thlawt! 

Ka nuna mi pawimawh ber leh ka hmangaih ber, ka mita tûma'n an khum zawh ngai loh tur ka pasal chu chhan ngai leh dinhmun derthawngah a awm a, chutih laia lo hlim emaw thlamuang taka awm tum chu thil theih loh hulhual a ni. A chang leh in chhunga awm reng lovin in kawtah te ka chhuak a, a changin ka lut leh thul bawk a, inkhawm dar rik dawn tak ngialah pawh an lo la haw thleng thei lo chu ka buaina ber a ni tawh. An chhan tawh leh chhan tawh loh tâl hria ila chuan ka awm a nuam thei deuh mahna, chanchin lah hriat tur awm lovin a reh vawng vawng mai bawk si.

"Chhuak tawh rih suh Numam, pawn boruak a vawt ang reng si a, hritlang te i kai palh reu reu ang e. Mazara hian hliam eng emaw a rawn neih haw ngei ka ring a, nang tal chu amah enkawl turin lo dam ṭhat tum zawk rawh, chaw ni se ei i tum lo nasa si a, i pum lam ka ngaihtuah ngawt mai" pitei'n a rawn tih chuan kawngka bulah ka ding ta reng a, chhuah pawh ka tum zui lêm lo. 

Biak in dar a ri vâwl vawl a, Mazara hmel hmuh châkin kawngka bulah ding reng mah ila hmuh tur a la awm thei si lo. Khua chu a thim famkim tawh a, an la chhan chhuak lo a nih ngat chuan zan thim hnuaia inchhan a harsa dawn lutuk tih ka hria, chu vang a nia ka awm hle hle theih tawh loh ni! Pitei chuan chaw ei turin min ti leh a, a ngaite bawkin ka lo chhang a, ka ei duh dawn chuang lo tih a hre chiang tawh te pawh a ni ang min sawm lui ngar ngar duh ta lo. Amahin chaw a ei a, kei ka dinna ngaiah ka ding thung a, kan inbe tawh lo hrim hrim bawk.

Nghakhlel taka ka pasal lo haw hmuaka ka thlir dauh dauhna lamah chuan mihring a rawn lang hlawl a, kan in lamah a lo kal hnai zel a, êngin a chhun tâkah chuan Tlantea a ni tih ka hre thei nghal. Che chhuak thutin ka tlan titih a, Tlantea tal chuan chanchin thar lam a hriat ngei ka ring bawk. Zawhna ka zawh hmain amah zawk a rawn ṭawng chhuak hmasa a, in chhung lamah min luhpui tê tê phawt a, nghak thei tawh lo tak ka ni. In chhung kan lut fel chiah tihah Mazara chanchin ka zawt nghal zung zung a, a ṭhat thu leh tlangvalin a rawn zawn haw mêk thu a sawi chuan ka va han lawm tak êm. 

Mazara ke ulh thute, hliam nâ lutuk a neih loh thu leh tui khauh tak kara a inham tân avanga a taksa a chauh thute a sawi nghal mawlh mawlh a, a sawi kar lakah chuan hlauthawng lo turin min hrilh leh zauh ṭhin a, ka hlauthawng nge ka rilru a hahdam tih pawh ka hre mumal tawh lo. Mazara chu a chau ang reng viau a nih ka ring thiam mai a, zawn ngai khawpa a awm chuan a ke pawh a nâ thawkhat viau bawk ang. Ulh satliah mai ni lovin a ruh a tliah ka ring hial a, a chhe lam hlira ka ngaihtuah vang pawh a ni em em bik lo, a ke chu a nât thawkhat ka rin vang zawk a ni.

Pitei chuan Tlantea chu chaw ei ve nghal turin a hrilh a, mahse Mazara te lo thlen hun chauha chaw ei a tum thu sawiin a lo hnar rih thung. Information mic aṭang Mazara chanchin an rawn puang leh a, engkim chu ka hriat hnu vek a ni a, nuih erawh ka la nui thei tlat lo. A chhan chu nung damin ka pasal hmel ka la hmu lo va, thu ringawt chuan ka rilru a la tithlamuang thei ngâng lo a ni. Ṭhenawm khaw vengte an rawn lêng lut a, inkhawm zan mah ni se an inkhawm bik lo a ni ngei ang. Min biakna chu ka chhang tawi hlawm ang reng hle a, ka ṭawng châk vak lo hrim hrim.

A tawpa tawpah chuan Mazara chu kan in chhung ngeiah an rawn kuah lut ta, ka lo buaipui nghal zung zung a, mahse ṭawngkam khat pawh ka chhak chhuak rih lo. Ka ṭawng a nih vaih chuan ka ṭap dawn tih ka chiang, ka chiang lutuk tlat. Pu Kawla nen chuan kan che nghal char char a ni ber a, ka thil tih apiang min pui zel a, a fel khawp mai. Mazara tak pawh chu a la ṭawng mang lo va, amah chhan chhuaktu hnena lawmthu a sawi tih loh chu ṭawng mang a la nei lo a tih theih a, putea leh mi dang rawn lêng lut te chu an ṭawng tam mah zawk. 

Putea chuan Tlantea hnenah ke ruh hmet thiam ko turin a hrilh nghal a, Tlantea pawh khawmuang lo takin a che chhuak a, buaipui vak dan hre lo mah ila Mazara kut chu ka vuan reng thung a, a hmel aṭangin a chau tih a hriat hle bawk. Min rawn en leh zauh ṭhin a, in chhung an rawn luh aṭang khan a mitah vawi khat mah ka la en lo va, mahse ka ṭah a chhuak tih erawh a hriat vek tho ka ring. Amah ang lo takin a kut te chuan lumna reng a nei lo va, ka ke thleng chuan a vawt vek a, a vun rawng te pawh chu a dâng ang reng hle. 

"I ke ruh chu a tliak teuh hle mai a, tuam nghal ila a ṭha ang. A la vûng dawn chauh a, dam tawh emaw i tih hunah pawh i dim hle dawn nia" Mazara ke zut mial mialtu kum upa lam tawh chuan a ti thluk dâp dap a, Mazara erawh a ngawi run thung. 

"Chaw ei tur ka'n siamsak ang che aw Mazar, i ril a ṭam tawh viau ang" tih leh ka ṭhutna aṭanga thawh ka rual nghal a, ka ngaihtuah chhuak har lutuk chu mawl ka inti hle a, in chhunga awm ve mi dangte pawh chuan mawl min tiru viau ang. 

"Ka lo pui ang che ka pi" pu Kawla chuan a rawn ti ve nghal zat a, Mazara chaw ei tur ka siam lai chuan min rawn pui ta reng a, in lêngte chu an la awm kim ṭhap a, kan che vel chu min thlir tawp ni berin ka hria.

"Tui lum a awm sa chuan tuam hmain a ke hi ka lo dep lawk ang chú, tui vawt pawh a theih tho va, mahse tui lum a awm chuan duhthusam a ni" Mazara ke hmettu chu tui lum ka pe nghal thuai thuai a, an bula awm reng ta lo chuan chokaah ka phei leh a, rei lovah Mazara chaw ei tur chu kan siam zo ta thuai bawk.

Fianin Mazara chu ka barh a, a mitah tak ka la en duh lo tluang zel a, ka barh ang ângin a lo ei tawp a, mi dang mitmei zahna reng ka nei tawh lo a ni. A ke pawh tuam vek tawh a ni a, in léng ṭhenkhat chu ngaihṭha takin an haw nghe nghe a, putea te chhung leh Mazara pa erawh an la awm thung. Zan a rei tial tial a, kei pawh ka pangngai chho ve zel a, pasalte nâ neia an lo haw laia lo ṭah khum chiam chu ka tum lo bur. Dar 9 bawr velah putea te chhung leh Mazara pa chuan ṭin zai an rel ve ta nge nge a, pawn thleng lêk pawh ka chhuak duh lo ta law law. 

"Min bual mai ta che, inbual lova mut ngawt zawng a chi lo vang" Mazara chuan a rawn ti sup a, a tho tur chu pu Kawla'n a rawn pui nghal a, tui chhuan so sa chu ṭinah ka lo chhung lut thung a, bathroom chhunga kan awm dun hnu chuan sawi tur ngah viau mah ila ngawih ka chuh rih ta zawk. 

Ruak vekin Mazara chu ka hmaah a ṭhu a, a taksa dâng lutuk chu ka pasal taksa mawi tak ni ṭhin kha a ang lo tak zet. Dim takin a ke tuamna bul vel chu ka silfai sak a, a ke nâ lai tak erawh tuia tih huh a ṭhat ka rin loh avangin ṭhutthleng pakhatah ka hlang kâng daih a, amah paw'n hlan chhoh harsa a ti em em hran lovin ka hria. Ka bual zo khuma a mut hnu rei lovah a khua a rawn sik zui nghal a, damdawi te ei tirin a reh ve leh mai ka ring a, mahse a khawsik chu a kiam thei ta reng reng lo mai. 

Pu Kawla chu Health Sub Centre-ah damdawi ṭha zawk leh chak zawk ka lei tir thuai thuai a, damdawi dang a ei hnuah erawh Mazara pawh tlêmin a zia te deuh a, zan lai tak tak a ni tawh avangin mi dang pun buai ṭul ka ti lo a ni. Zing lam dar 3 velah khawsik avangin a rawn harh leh a, damdawi chu ka ei tir leh vat a, a muhil ve leh mai bawk a, chhin khat pawh chhing lovin ka tlaivar ta ṭhak a, mahse hrehawm tihna ka nei lo hrim hrim. Zan tam tak tlaivar ngai dawn pawh ni se Mazara tan chuan ka inhuam vek a, ka duhthusam ber chu a dam ṭhat a ni. 

"I mu miah na nge?" zinga a harh rual chuan a rawn ti nghal a, ka rilru a pangngai vek tawh avangin nui sen sen hian ka lo buk khum zeuh a, thaw chhuak hawkin in chung lam a hawi zawm nghal a, min ngaihtuah hle tih ka hre thei. 

"I mut a chhuak em? Ka bulah hian rawn mu ve ta che, ka'n dam lo zui leh ta nghal a, a zia lo ngawt mai" min ngaihtuah tih hriat zetin min en reng a, a kut chuan ka kut a rawn hum a, tunah chuan a kut pawh a lum nuam leh em em tawh e. 

"Ka mut a chhuak hleinem, chu bakah ka rawn mut ve te'n a chi nâng, i ke a nâ tih i theihnghilh ta em ni?" hmel hlim sâng chuan ka be zel a, a mitmengah min ngaihtuahzia ka hmu vek a, ka tan tak phei chuan hai theih a ni mawlh lo.

"Ka laka dawt sawi tur khawpin engtin chiah nge ka lo awm nizan khan? Ka dam lo tih chu ka hre ngei a, mahse thil dang erawh ka hre mumal lo khawp" a ṭawng ri chu a ram mah mah a, amah a inthiam lo tur chu ka duh hauh lo mai.

"Hrep tak hian! I thu kha awih ila zawng eng harsatna mah i tawk lo vang, nang chang ni lovin kan naute paw'n a tuar ve dawn tih ka lo ngaihtuah pha lo a ni" ṭawng tumin ka âng zuau tawh a, a ṭawng dan bul hmuk leh lutuk chuan min ti ngawi ta hmak.

"Ka chanchin i hriat tirha i lo hlauthawn dan tur kha ka ngaihtuah thleng vek asin; i ṭah ngei ka ring bawk" a rawn tih leh chuan ka ṭah insumna zawng zawngte kha a siruk lâ ang maiin an rawn inlar nghal a, ka mittui te chu khap ral tum mah ila awmzia a awm lo chiang hle.

"Nangmah inthiam lo suh Mazar" ka ṭawng zawh rual chuan ka hmui ka hup zui nghal a, ri lova ṭap nghawr datin ka mittui chu a baw ta zâwih a, tum loh deuhin ka insût ri ta nge nge.

"Lo hnai teh Numam, ka bulah hian lo mu mawlh teh, i pasal hian i taksa ka sik châk tawh zia hi i hrethiam pha kher lo vang" ti ram leh hmukin ka ban rekah chuan min pawt deuh salh a, tun ṭum zet zawng ka ṭah a chhuak bawk nen ka hnar thei ta ngâng lo.

"Ṭah loh ka tum ve char char asin Mazar, ka ṭah chuan min ngaihtuah dawn tih ka hre vek, mahse maw ka hlauthawngin ka chân ang che tih ka hlau em alawm, nizan pawh khan" ka tih ṭuau lai chuan ka hmui a rawn hup a, a âwmah min kuah bei a, ka sam leh ka hnung chu a chul tawn sek bawk.

"Ka hria, nizan khan ka mitah vawi khat pawh i en ngam lo tih ka hria, i ṭah chhuak insum hmel thleng khan ka hre vek" chu thu a sawi zawh rual chuan ka chhip samah a fawp vawng vawng a, kei ka lo ṭap thung a, hmangaihte ṭâng bela ṭah zet zawng a hahdam thlakin a thlamuan thlak ngawih ngawih.

"A dam zawk lah chuan ka'n ṭah khum leh ta chiam si che a, min hrethiam teh" tiin a âwm aṭang chuan ka awm sawn a, nui sakin a hmel chu ka en vang vang a, tunah chuan hlim avangin ka nui ve leh thei ta. 

"Pu Kawla a awm tih ka lo hre tawh lo reng reng" choka lama thawm a rawn awm rual chuan ka ti hnuhnawh leh a, kan ṭawng zawng zawng a lo hriat vek ka ring; naupangchhia taka ka ṭah lai khan a lo hre vek ngei ngei ang.

"Hei hi ka ngai tawh" a kutzungpuia ka hmui tawh pah chuan a ti sup a, nuih lêt sakin keimah zawk chu ka che chhuak hmasa a, ka pasal hmui chu ka thiam ang tâwkin ka fawp a, inlak hran ka tum chu a phal lo chiang teh e!

"I ke a nât kha aw, indim i ngai, kan thil tih hi a ṭul ber lo. Ka ngaih êm che bakah min lo ngai ve em em bawk a, ka insum lo lawk a nih kha!" ka ti ta mawlh mawlh a, nui ri hakin a âwmah min kuah bet leh ta hle hle a, kei pawh ka hmel tak rawn hmu tawh lo mah se ka nui ve ver ver tho.

"Ka pi, ka pu, chaw ei ka peih tawh e" pu Kawla chuan pindan kawngka bul aṭang a rawn ti pai deuh rût a, kawngka pawh hawng duh lovin a ding reng a, a rawn lut ngâm lo a nih ka ring.

"Kan lo tho dawn e" Mazara zawk chuan a lo ti vat a, a aw chhuak a zângkhaiin a pangngai hmel leh viau tawh lawi a, kal a tum lai chuan ka dar ring turin ka ti a, a duh leh ta ṭhak lo, pu Kawla chu a ko lut a, a chhan ka zawh lahin

"I rinchhan tur zawkin ka rin daih che chuan a chi nâng maw le, ka rit ang reng si a, ka fapa lo piang tur leh ka nupuiin hrehawm an ti lutuk palh ang" a rawn ti awlsam êt leh ta nghal a! 

"Mipa ngei hrinsak che ka châk" pindan aṭanga an inkuah chhuah lai chuan ka ti sep a, ka hriat tawk leka phun sep ka nih avangin a hre pha tawh lo va, mipa a duh bawk a, ka thu a nih leh nih loh hre lo mah ila mipa san chhuah ka tum ve bur ringawt. 

"Nang maw!?" Mazara aw chu a hamhaih hle a, pindana ka la awm avangin kan ina lo lut mêk chu tu nge ka va hre ve thei chiah lo va, tu nge lo lut hriat tumin ka pen sawn rang hle bawk.

(End of Chapter)