SUMO DRIVER By Havali Adam (CHAPTER 35)

SUMO DRIVER 

By 

Havali Adam

Chapter 35

Ka rai thu kan hriat hnu chuan Mazara chu a danglam sâwt hle a, a ṭawng duh sâwt ka ti dawn nge ka ṭawng hmasak ngai lovin min be deuh chhen ta mai a, a chang leh ngawi reng hian ka pumah a bek a nghat a, kan naute lo piang tur chu a ngaithla ni mai te'n ka hre ṭhin. A be chuang der bawk si lo va, a awm dan vel aṭang chuan be ngai lo mah se kan naute chu hmuh vat vat a duh tih ka hrethiam ve mai bawk a, chuti ang taka a phur hmel hmuh chu engtik lai paw'n hmuh ka duh a ni.

Putea te lam pawh zan lamah leng chhovin ka rai thu chu kan hrilh nghal a, pitei phei chuan naute kawr tur phiar a rawt nghe nghe a, mahse ka phiar thiam teuh lo. Ka thiam dawn lo tih a hre sa vek bawk a, phiar dan min zirtir a tum thu thlengin a sawi lâwk a, kan hlim tlâng tak zet. Tlantea pawh a nghal leh ngâng mai, Mazara hriat phak lovin kan naute lo piang tur chu a sawisa nghal vak vak a, fiamthu rawngkai veka a sawisak avangin ka nui nasa hle a, Mazara hriat loh tura min hrilh vel kher chuan ka nuih a tiza bawk. 

Mazara mawlh chu a ni hlim chu! Kan ina kan haw thlak hnu te chuan a che reng reng chu a danglam vek a, min ngaihtuah leh lutuk chu a buaithlak letling zawk. Min biak dan ni se a tawi thei ropui bawk si, ṭawngkam hi chu a tlachham ve deuh chuan ka hre ṭhin. A hunah erawh tawi fel ât hian a sawi dik leh thlup zel lawi a, ka pasal a ni lo vang tih ka va'n hlau tak êm. Mut hmunah chuan thil chi hrang hrang ka sawi melh melh a, ani'n ka pum a dawm ran a, a chang leh ka kawr keuin a chul leh zauh ṭhin a, a awm dan vel chuan min tihlim tak zet. 

Ni thum hnuah kan khaw ṭhenawma a patea te chhung a va hrilh ve a, kan khuaa a nu uanaunu te paw'n an hre vek tawh a, a pa tak chuan a hriat awm ka la hre lo. A nutei te unau chu ei tur leh eng eng emaw ni kengin an rawn lêng hial a, keimah nen inbe nel hlawm viau mah ila Mazara chuan ṭawngkam khat paw'n a be lo thung. A nutei te chuan an be ngei a, pakhat mah a chhang duh lo va, a ngawi reng bawk a, kan bulah erawh a ṭhu ve reng tho. A hmel ka en zauh zauh ṭhin a, a ngaihtuah mûk hmel thei khawp. 

Kar khat a ral a, inrinni a nih avangin khawpui lama inentir kan tum a, khua pawh a ṭha thawkhat viau bawk. Mazara nen chuan khawpui lamah kan inphur phei ta ngei a, kan tlan muang ang reng a, khawpui chhung kan thleng har phian a, mahse a hun takah doctor kan hmu thei ta tho. Doctor chuan thla khata upa naute ka pai mêk thu min lo hrilh a, ka chet leh eng ilo ka tihna kawnga fimkhur turin min chah a, bike-a inphur chu zawngchhang chi a nih loh thu a sawi tel bawk. Naute tan a ṭhat loh thu a sawi a, a thlawnin Calcium bur khat min pe nghe nghe.

Mazara chuan Doctor thusawi chu a'n la fuh mai mai khawp a, ka eng tih mah a phal lo nghal ringawt a, ka nui lo thei lo ṭhin. Keimahni ni lo nupa dangte hi an ni ve ang em ka hre lo, mahse ka pasal ang nupuite duat nghal lutuk an nih chuan an nupuite chu an hlimin an nui ve ṭhin tho ang ka ring. Zan lamah putea te nupa an rawn lêng thla ta ziah a, ka dul a la puar len loh tehreng nen naute hring tawh tur ang maia min cheibawl chu ṭul ka ti vak lo va, mahse duh lo eng ang mah ila awmzia a awm chuang lo. 

Pitei chuan zantin deuh thaw kawr phiar dan min zirtir a, naute kawr tur pahnih ngawt chu a phiar zo tawh a, mipa kawr a la ni zel zui. A chhan ka zawh lahin mipa ka neih a rin thu a sawi mai a, Mazara tak paw'n mipa a duh thu a sawi tawh nghe nghe a, ka pasal duh ang tak chu hring chhuak thei ila ka ti ngawt mai. A hma ai zawngin min duat zual a, zanah te hian min mamawh viau mah se a insum nasa thei hle. Naute tan a ṭhat loh a ring ve ṭhin tho bawk si a, kei paw'n nau ka pai tawh bawk si nen a tih chi vakin ka ring lo ṭhin. 

"Ṭhu reng lo khan han kal la, i thih phah dawn pawh a ni hleinem, engati nge i hreh em em? I kal duh loh chuan keimah ka kal mai ang, ka kal i duh em ni?" kamkî tak chuan ka ti a, ani erawh a ngai ngaiin a la ṭhu ngawi reng a, chuti anga ka ṭawng chhan pawh ka pasal rilru chu zawi zâwia siam ṭhat ka duh vang a ni pakhat. 

"Ka han kal ang e, i hreh hmel êm mai, ka nawr lui tawh lo vang che" tih leh thawh ka rual nghal a, kawngkapui lam pan chuan ka kal a, mahse ka kal thui hman lo nasa, ṭhutthlengah min pawt ṭhu thuai a, dim erawh min dim viau tho.

"I duh dan a nih vang chiahin ka kal ang, a bak engmah phut tawh suh ang che" ti ram deuh hmukin ka dar a chelhna chu a thlah a, thawk la halhin min lo en chhuk leh a, ka lo nuih sen sen thung a, amah chauha kal a la hreh ṭâlh a nih chuan kalpui pawh pawi tihna ka nei lo hrim hrim. 

"Kalpui i duh em?" ka tih chuan a lu a lo thing vat a, thil chi hrang hrang ngaihtuah tih hriat zet hian a ngawi leh reng tawh a, a en ngai a en tlawk tlawk hnu chuan a inher a, kawngkapui lamah kalin a chhuak zui ta nal nal.

Kar hnih leh a chanve dâwn a liam tawh a, a pa hnenah erawh ka rai thu engmah kan la thlen lo va, chu chu thil dik niin ka hre lo a ni. Hrilh turin a kal ta phawt chu a ni a, hrilh lovin a lo haw leh ringawt ang tih ka hlau khawp mai. A tih loh chinah hi chuan nawr kal luih a harsa em em a, a nupui ni lo ila chuan ka thusawi a awih duh ka ring teuh lo, mahse a tana mi pawimawh kha ka ni ve tlat a, ka hlimna tur a nih phawt chuan engkim tih a huam ṭhin. Tun ṭumah pawh a peih lo chung ka tir chhuak lui a, tun bak chu nawr luih ka duh tawh bik lo, a nuam lo duh êm mai.

Zan dar 11 velah pawh Mazara chu a rawn la haw lo va, ka ngaih a ṭha lo ru khawp. Buaina a siam mai te ka hlau a, mahse buaina siam tur êm chuan ka ring bawk si lo. Rilru ṭha viau si hi a pa lakah chuan a hel tlat si a, chu ber chu a ni ka siam ṭhat duh chu! Pafa inhmangaih tak leh inkawm ngeih tak ni se ka duh a, a chang chuan ka pa ka hre chhuak leh ṭhin. Ani erawh Mazara pa ang a ni ve lo va, a dik lohna pawh hre duh lovin engkimah a fanu min mawhpuh a, pawngsual tâwk ṭep a funu thlavang pawh a hauh ṭha ngam lo va, Mazara pa nen chuan inang lo tak an ni.

Mazara pa te chu a thil tih dik loh avangin a inchhir a, a fapa nen an inkar a ṭhat leh theih nân hma a la a, Mazaran a vin hrep chang paw'n engtin mah a chhang lêt ngai lo. Engtik ni ah emaw chuan a ṭhatna leh dawhtheihna hmangin a fapa rilru chu a hneh theih ngei ka ring, ka ring tak tak a ni. Mi hrang tan pawh a fapa Mazara chu a hmangaih tih hai theih loh tluk a ni a, a nganain kawm a châk ṭhin tih thlengin a hriat theih vek bawk.

Dar 11 leh a chanve velah Mazara chu a rawn haw ve ta, bathroom-ah a lut tlang nghal daih a, mut nghal a duh ka rin avangin kawngkapui chu ka kalh a, ka mei chhem erawh a la nung ṭha vet vet hle. Bathroom aṭanga a lo chhuah lai chuan ka en reng a, tapchhaka savun ṭhutthlengah ṭhuin mei chu a tuah ṭha a, thil eng emaw ni tak chu a thlen ka ring ve deuh tawp. A bulah chuan ka ṭhu a, vaimim chhum hmin sa chu min lo pe nghal ringawt a, thil ei lam aiin a pa nena an inbiak dan ka hre châk rih zawk tlat. 

"Engtin nge a lo chhan che ka pa chuan? A lo hlim ve viau lo maw?" min rawn en nghal run a, ka pasal pa a nih miau avangin 'ka pa' nghal hmiah kha a ni a, amah tak hi chuan ṭul a tih loh bakah ko lo turin min duh fê zawk a, mahse ka tan koh loh ngawt kha a thiang si lo a ni. 

"Ka hre lo" tih ringawtin min chhang a, kan thusawi lai ngaihtuah zui peih loh hmel deuh hian mei chu a tuah alh ṭha mial mial a, ka tumna leh ka beihna la rei tâwk lo mah se a chang hi chuan en liam mai ka tum ṭhin a, an pafa inkar ka siam ṭhat a ngai tih erawh ka hre chiang viau thung. 

"Mu mai ang hmiang? Mut a hun tawh chuan ka hria, zingah i tho hma thei si a, mut i kham lo palh ang" ka tih chuan ngawi reng bawkin mei alh lai chu thuk bula vutah chuan a rawlh lut a, mei chu a that titih a ni der a, a awlsam khawp mai.

Khumah chuan kan mu dun ta ran a, zawhna dang ka zawh belh leh tawh loh avangin a ngawi reng a, kei pawh ka bang bik lo. A lam hawi zawng chuan ka inlet a, a lo meng reng chu niin, min en lo hrim hrim a, a ngaihtuahna a kal ding hmel viau bawk. A pa nen engtin emaw ni tak an inchhang emaw a ṭawngkhum leh hrawk a nih ka ring deuh tawp a, a chhan chu a mitmengah inthiam lohna ka hmuh tlat vang a ni. Ka sawi tawh kha! Mazara hi rilru chhe tak pu mi a ni lo, ṭawngkam mawi lo taka a ṭawngkhum avangin a inthiam lo hnuhnawhah ka ngai ta ber. 

Zing lama zawh chhunzawmah tiin muthilh vang vang chu ka tum ta zawk a, a lamah chuan ka tawlh hnai a, nupa niin in khatah cheng dun tawh mah ila ka pasal hi ka ngai em em ṭhin tho. Kei ngei pawh hian mak tih chang pawh ka ngah mai, heti ang em em hiana a ngaihawmin a zun phuar a nâ ang tih ka ngaihtuah pha ngai lo. Inhnaih taka kan chet tlat dun te hian han thlir vawng vawng ka nei leh ṭhin a, a pian a dikin amah a dam ruih bawk si a, ram lama min fehsan chhungte hian amah ngaiin ngaihtuahna ka lo seng veng veng zel. 

Tukṭhuan ei laiin zan lama ka rai thu a pa hnena a hrilh dan leh an inbiak dan te, a mood a danglam sâwt em em chhan chu ka zawt a, ka beisei loh deuhin ṭha tak hian min chhang a, a ṭawngkam chhuak pawh a pangngai viau. Ka lo rin rilruk ang chiahin a ṭawngkhum dan chu hriat nuam fahran a nih loh hmel a, a inthiam lo tih erawh a sawi lang duh ta chuang lo. Sawi lang lo pawh ni se ka hre vek tawh tho va, sawi ngaiah pawh ka ruat lo zawk maw le. 

A sawi dan chuan a pa; ka pa ni ve ta chuan lo lên a châk ṭhin thu a sawi a ni awm e, Mazara erawhin a lo phal lo bur a, mahse chung thil min hrilh lai ngei pawh chuan nuam a ti bik lo tih ka hre thei. Ni e, ka pasal hian ka nawr kal chawp ngai lovin a pa chu a hmu leh ngei dawn tih ka hre lâwk thei nghal a, kan ina lo lên pawh a phal dawn tih ka chiang. A chhan chu a pa a ni tlat a, thisena inzawm an ni tlat a, a pawimawh ber chu a pa a nihna angin a hmangaih tlat a ni. Ṭawngkâ aia chetziaa lantir ṭhin mi a ni a, kei a nupui tan hi chuan ka pasal awm dan chu hai theih a ni mawlh lo.

Thlasik thla tak tak kan kai chho ṭan tawh a, ka pum chhunga naute paw'n thla 3 hmel a hmu ve ta. Ka pum erawh a la puar lian em em lo va, thla tawpah kan inentir ziah a, khawpui lamah hlir kan phei ṭhin thung. Kan khua Health Sub Centre-ah chuan kan inentir ngai mang lo va, a thawka te thiamin hre tho mah se khawl thil an nei ṭha tawk lo tlat a tin ni! Khawpuia kan phei dawn hi chuan kan khaw tlan pel zawnga Sumo tlan kan lo chang mai zel a, Doctor berin bike-a inphur kha a remti lo miau a, ka pasal chuan naute tana ṭha lo engmah tih a duh lo bur a nih hmel.

A chang hi chuan Aizawl lama ka chhungte ka ngaihtuah chhuak leh thut ṭhin a, anni erawh an reh tlawk tlawk mai bawk si. Vawi khat phei chu hun kal tawh ka ngaihtuah kir a, vanduai intihna hlir ka pu a, puitling lo zia deuhin ka ṭap ringawt a, mahse Mazara bawk chuan a ni min thlamuana ka hlimna rawn thlentu chu! Chumi ni chuan ram lamah a feh daih a, ka bul hnaiah awm lo mah se min duatna leh min hmangaihna te chuan min tilungawi a, rei lovah ka rilru pawh a inthlak nghal vek a, vanduai intihna ka nei thei tawh lo hrim hrim. 

Kan vanneihna a kal tluang hlauh mai a, khawpui lam aṭang thing eh sa tam tak an rawn duh a, Mazara chuan kan thingkhawna mi tam tak chu a hralh ta ṭeuh a, thing mai ni lo thlai rah leh thlai hnah chi hrang hrang a hralh ṭeuh bawk a, kan pawisa hmuh chhuah zat chu tam tak tia sawi tur ni lo mah se kan hlim tawk em em thung. Ka pasal hi ka ngaisang a, a nunchang leh nun dan hi entawn tlâk ka ti a, mi pawisawi lova a awm thei te hi ka fak thlawt a ni. Kan inneih hnu hian thinrim awkâ vina min biak ka la hre lo va, a thinrim hmel erawh a pa avangin ka hmu zeuh zeuh ṭhin.

"Kan sum lak luh dan a thianghlim phawt chuan ka lawm, pawisa tam tak mamawh mah ila ka chawm theihna tur che u ka thawh chhuah chuan a tâwk; duh ngat ila zawng zû hmangin sum tam tak ka la lut thei, mahse engtikah mah ka ti ngai lo vang" tiin ka pasal chuan mut hmunah min hrilh tawh ngei a, chu bak vawi khat mah a sawi nawn leh tawh ngai lo thung. 

A thusawi mal tin te hi ka ngaihtuah zui vawng vawng ṭhin a, dik lo leh awihawm loh hi a awm lo reng reng. Huan sam ngai se amahin a sam vek a, a chang hi chuan ka awih lo lek lêk zel. Ka rin ai hian a sam zo hma ṭhin a, kan huan leh ram lah a hmun a zau phian bawk si, ni khat chhung lêk pawh hian a thawk hlawk thei khawp mai. Ṭhenkhat hi chuan inhlawh tur te'n a lo sawm leh zauh ṭhin a, a chang chuan a inhlawh ve mai a, mahse kan huan leh ram lama kal ṭul a tih zawk ṭhin avangin inhlawh loh a ngah mai. 

Nimbu huan a enkawl a, lakhuih huan a enkawl leh bawk a, chutah thlai lam a enkawl tel leh zel a, puih ka tum lah hian a phal ngai bawk si lo. Mi ṭhenkhat ṭawng hi chu ka hre thawi fua fua ṭan tawh a, ka pasal chu thaibawih tih ang reng te'n an sawi a, hriat a nuam viau lem lo. Kan ṭhenawmnu min hrilh dan phei chuan kan hausak avanga min nei ang te'n an lo sawi a ni awm a, thu dik hre ngat se zawng mak an ti hlawm khawp ang. A thu hrimah kan hausak vanga min nei ni se chu ka pa hnenah a inphah hniam ang a, duh tâwkin ka pa sum a chen ral ang chu maw le.

Mazara erawh chuti ang mi a ni lo nasa mai, a nun ngil leh rilru ṭha lutuk hi mi tam tak neih ve theih a nih pawh ka ring lo hial zawk. Eng ang paw'n mi dangte chu IAS emaw MCS emaw sawrkar hna zahawm tak pawh thawk rawh se, ka pasal aia ngaihsan tlâk leh ngaihsan phu hi ka hre chuang lo. Thil dik chauh tih a duh a, a kalhmang a hre bawk a, a thawhrim vanga kan pawisa hmuh chhuah zawng zawngte hi hlu tak a ni. A pa lakah erawh hma sawnpui tawh viau mah ila an la inbe nêl hlei thei tlat lo va, chu tak chu ka buaina a nih mai bakah siam ṭhat ngai chu a ni. 

"I lo haw tawh maw? Kha, mikhual kan nei dawn em ni?" ka buh ṭhap lai dahin ka pasal feh haw chu ka lo chhawn thuai a, a hnungah chuan kum upat hmel deuh hlek tawh hi a lo lut ve a, khaw chhung mi chu a ni chiah lovin ka hria. 

"Thingpui min lo siam nghal mai ta che, ka tui pai ka lo in zo hman tawh si a, kan mikhual tur hi a tui a hal tawh viau ang" dawhkana iptê dah thlak pahin Mazara chuan a rawn ti a, a lo hawpui pa chu a a chauh hmelin a tui a hal hmel tawh tak tak hle.

"Lo ṭhu rawh u, ka'n siam nghal ang e. Thingpui in hmain tui in phawt se a ṭha ang, tui hal dang ro chu a hrehawm duh asin" ti zung zungin no chuan tui ka suak chhuak a, Mazara bula ṭhu pa chu ka pe zui nghal a, ani paw'n lo ban vatin a in ri nghal khawlh khawlh bawk.

"Pu Kawla a nih hi; Burma ram aṭang lo kal a nih hmel. Mizo ṭawng a hrethiam hret hret a, ṭawng pawh a thiam lutuk lo, tlêm tlem a thiam" Mazara chuan a rawn ti leh a, pu Kawla chu a lo bu nghat a, a lo berah Mazara pa aiin a upa tawh hrim hrim ang.

"A nih chu maw le, engtia intawng nge in nih a?"  ka lo tih zawm ve leh nghal a, chini bawm chu hawngin ka suak chhuak a, thingpui chu pu Kawla tan bik a thlumin ka siam a, Mazara tan erawh thlum a ngai ve lo, a thlum ai a hâng a ngaina zawk tlat.

"Nizan khan kan thlamah a lo riak a ni awm e, eng emaw chen chu kan awmpui a ngai maithei a ni. Pawisa thawh chhuah ṭeuh a duh thu a sawi thei hram a, rawn hmasa lo chein ka lo hruai haw ve tawp a nih hi!" Mazara aw chu a dam thum raih a, pu Kawla kan awmpui tur chu pawi tihna ka nei em em lo. 

"Engah nge kei min rawn a ngaih ang ni!? Eng pawh ti ila, eng pawh sawi la, i thusawi leh i thutlukna te chu ka pawm vek a, ka thlawp vek bawk alawm, min ngaihtuah lo la, keimahah buaina a awm lo" ka tih chuan 

"Ka nupui alawm i nih le, engah nge ka rawn loh ngawt ang che ni!?" a rawn ti ve nghal zat a, nui sakin a hmel chu ka en a, a thingpui tur ka pe zui nghal bawk a, ka nui ve tak nà a, ani erawh a nui miah lo, a thutak hmel hle zawk. 

"Aw le, ka sawi tawh kha! Eng thutlukna pawh siam la, ka thlawp vek che a nia Mazar. Pu Kawla chu inbual i duh ang a, tui lum chhuan hi so se, i inbual nghal mai dawn nia, rawngte chu bawl tlai deuh mah ila a pawi hleinem" tiin pu Kawla chu ka biak zawm ta zawk a, ka thusawi a hrethiam tih hriat takin a lo bu ve nghat bawk. 

"Kha le! Eng nge ka lo hawn che hi han en teh" Mazara lam chu ka hawi nghal thuai a, maitê rah hi a lo keng reng chu niin, nui ver verin ka la nghal vat a, lawmthu ka sawi zui mawlh mawlh bawk a, ka duh leh ngainat hi chu a va han hre tak.

"Maian baiah ka thlak dawn chiang lutuk, a thar lam bawk si. Awi kei chu a hel hian ei theih mai se ka ti, ka ei châk tawh" lawm avangin ka ṭawng te chu a rang lek lêk a, ka pasal hnen aṭanga ka thil dawn chu mi dang tan ho hle mah se ka va hlimpui si em.

Rei lovah tui chhuan chu a rawn so ri ser ser a, thuk aṭanga Ketli khai sawn ka tum lai takin Mazara chuan min lo khai khalh a, ka chet hah hi a phal lo ṭhin a, buh ka lo ṭhap ve ringawt pawh chu zan lamah kan khel dun leh viau maithei a ni. Chawhtawlhah ni lovin ṭin thirah tui lum chu a chhung chhuak a, tui vawt a pawlh zui nghal bawk a, pu Kawla nen chuan a che vel chu kan lo thlir reng tawp a ni ber. Bathroom aṭangin a rawn chhuak a, pu Kawla chu a inbual theih tawh thu a hrilh a, pu Kawla pawh inbual tur chuan a che chhuak zui ve nghal.

"Eng nge?" ka ti deuh tawp a, pu Kawla bathroom-ah a lut fel chiah tihah pindan lamah min hruai lut ringawt a, min hruai luh chhan lah ka hre der bawk si lo, amah tak pawh chu a la inthlak lo va, mahse rimchhia ka ti chuang hlei lo va, a mi uap erawh a nâ ngang mai. 

"Eng nge min hruai luh chhan? Sawi duh dang i nei em ni?" pindan kawngka a kalh lai chuan ka ti leh a, nui suk hian a rawn leh hawi a, ṭawng lovin min fawp ta ngawng ngawng a, a tirah hamhaih deuh mah ila ka dawh mawl tawp rei thei lo chiang hle.

"Nang pui hian min ngai chiang mai, a dik em?" inti hre deuh chuan ka ti a, ka biang tawn tawn chu dawmin min chhuk melh ran a, ka thusawi avang chuan a nui ri hak bawk a, a nui ri ringawt te pawh hi hriat nuam ka ti ṭhin.

"Ngai chiang e maw le" ti thum dam dapin min rawn fawp leh a, bathroom kawngka inhawng thawm chuan min ṭhen hrang thei ta hram a, thawm dang rawn awm lo se chu eng nge thleng zel dawn ka hre chiang lutuk tlat. 

Pindan aṭang chuan ka chhuak a, pindanah bawk lêt lehin Mazara kawr hak ngai mang loh ho chu ka phawr chhuak a, pu Kawlan Mazara kawr a ha chiah chu nuih a za duh khawp mai. A kawng chin vela fual tur kha pu Kawla tan erawh a malpui a thleng thla daih mai a, Mazara pawh a khi ve suk a, pu Kawla ber chuan engah mah a ngai lo va, lungawi hmel taka a ha chu kan nuih reng duh ta bik lo. Mazara pawh inbual turin a lut zui a, ani pawh hi pu Kawla awm lo se inbual dun a tih leh tlat ka ring. 

Doctor-in hmangaihna chen dun a pawi loh thu a sawi aṭang khan min mamawhna a nasa zual em em a, amah paw'n ka lakah a zep ngai lo. Kei tak pawh hian ka mamawh reng a, engtik lai pawha mamawh ang maia ka awm hi ka sawi chhuak ngam lo ṭhin zawk. Mipa hi chu mipa an ni a, hmeichhiate erawh a dan a dang tlat a tin ni! Mazara bulah tak chuan ka zak em em lo, sawi chhuah chang pawh ka nei fô, mahse mi dangin an lo hre palh ang tih ka hlau a ni. Hmeichhe tan chuan sawi zui hlawh a awl a, ni lo lôvin kan than phah ṭhin. 

Zanriah kan ei kham a, Mazara chuan putea te ina len chhoh a rawt a, pu Kawla chu kan hruai ve nghe nghe a, putea te nupa chuan min lo lawm thiam leh khawp mai. Tlantea erawh a lêng a nih hmel, ka hmu lo hrim hrim. Putea chuan Mazara chu zawhna a zawt ta nge nge a, kan luh tirh aṭang khan zawhna nei hmel a pu reng a ni. Mazara chuan pu Kawla Burma ram aṭanga lo thleng thla a nih thu leh kan awmpui thar tur a nih thu chu tawi fel takin a sawi a, putea te nupa chuan pu Kawla chu Pawi a ni tih an hrethiam ve nghal mai bawk. 

Kan haw thlak aṭanga rei lovah mut zai kan rel nghal a, pu Kawla chu sitting room chhuatah a mu a, puanthuah lum ṭha ṭhâ chu kan sin tir a, puan phah pawh a lum lampang chi hlir kan phah sak nghe nghe. A mutna vel kan phah felsak hnu chuan keini pawh pindan lamah kan lut a, thosi len zar ka tum chu Mazaran a phal leh ta tlat lo. Amah vekin a zar a, ka la rai len loh tehreng nen min duat leh lutuk chu ka ṭhat loh phah ang tih a hlauhawm zawk. Thosi len a zar zo va, ka pum chu a rawn dawm nghal chat a, a kut lum nuam takin ka pum a sik loh chuan ka muhil thei tawh lo chu a ni ber e.

"Pu Kawla hi a la ṭangkai viau dawnin ka hria, ram lam hna thawh a thiam riau mai. Kan thlama a lo riak ka hmuh khan a inthlahrung lutuk a, ka bulah hna hial a rawn thawh phah asin" Mazara aw chu a thum hniam ruih a, titi dun a duh a ni ngei ang. 

"Mi inthlahrung mi tak a nih ka ring, a awm dan reng reng hi a zahzum hmel êm mai. Pawisa thawh chhuah ṭeuh a duh thu kha i sawi a, engtin nge ni ang? Keini lah chu heti ve mai hi kan ni si a, ka rilru a buai ru khawp mai" rawn ṭawng chhuak lawk lovin ka lamah a rawn tawlh hnai a, min kuah nghet deuh sawt a, kei paw'n lum nuam ti zetin ka lo khan chial nghal.

"Engmah ngaihtuah hah duh suh, ka awm alawm, hlawh neia chhawr ka duh a ni. Khawpui lamah thlai leh thing fâk hralhna ka va zawng a, hralhna ka hmuh theih hlauh chuan kan dinhmun pawh a zia ve deuh tawh ang" ti supin ka bek a fawp zeuh a, a awm ṭha ve leh nghal mai.

"Tun ai hian pawisa han nei ngah deuh ta ila, Sumo lei nge in sak hi i duh ang? Chu chu ka buaina pakhat a ni a, min tihkian sak ta che" ṭawng tuma ka ân zuau lai chuan a rawn tih zawm zat a, a zawhna chu mak ka ti ang reng.

"Chuti ang em emin pawisa kan khawl ngah tawh em ni? Sumo lei tur chuan sing chuang fê neih a ngai asin, chuti ang bawkin in sa tur chuan pawisa tam tak neih a ngai tho" ka ti ve charh charh a, ka ngaihtuahna a kal thui ta viau.

"Ka zawhna kha han chhang phawt teh le, insak nge Sumo lei chu i duh hmasak? I duh thlang la, ka rilru pawh ka siam fel thei chauh ang" a rawn ti leh ngat a, thawk ka la hmasa tê tê a, ka rilrua awm ang chu a ngaih dan a ni leh si lo vang tih ka hlau ru khawp.

"Zep lovah chuan Sumo lei hmasak ka duh zawk, a chhan chu i khalh thiam tho va, pawisa i thawh chhuah dan pawh a hahdam phah deuh ang, mahse insak hmasak i tih chuan pawi ka ti chuang lo" ka ti ta nge nge a, ka duh zawk miau si a ni.

"Nupa tur dik tak kan ni tih ka hre nawn leh ṭhin asin, kan rilru thleng hian a inang ṭhin bawk" tih leh ka chunga rawn bawh chu a rual nghal a, chuti teh thuta a chet ka ring lo bawk nen ka meng phawk hman hle a, ani erawh a khi suk thung. 

"Sumo chu kan lei hmasa ang" a ṭawng zawh rual chuan min fawp nghal ngawng ngawng a, muangchang hian ka dar leh a hnuai lam chu a zut a, rei lovah ka zauthau nghal vek a, eng thil dang mah ka ngaihtuah leh thei tawh lo, ka pasal zei uchûak leh zun ngah em em Mazara tih chauh lo chu! 

Hun chu a kal bek bek emaw tih laiin kan naute paw'n thla 5 hmel a hmu ve leh ta reng mai, Pathian kaihhruaina leh awmpuina azarah naute pawh a hrisel ṭha viau bawk. Kei phei chu ka thau tûng tung ni mai hian ka hria a, nau pai laia ei chi ka ei ṭha si a, Mazaran min duat leh lutuk chu putea te nupa pawh an nui tawp zel. Thingpui siam mai mai te a phal lo vel a, nuih loh theih loh hi a ni ṭhin. Khaw ṭhenawma a patea chhung lam pawh an rawn lêng phei zeuh zeuh a, Mazara pa tak pawh vawi 5 aia tam chu kan inah a rawn lêng ve tawh nghe nghe.

A nu chhungte lam pawh an bang bik chuang lo, an hausa a, khawtlangah mi zah an kai a, mahse kan pawh hmasak ngai lovin anmahni zawkin min rawn pawh hmasa tlat zel. A nu pa, a pu erawh vawi khat mah kan inah a lo la chuangkai lo va, Mazara a hmu hreh a nih ka ring. An inhmu peih lo ve ve a nih ka ring zawk, remchang hmasa berah an inngainat loh em em chhan zawh ka tum a, mahse Mazara nu unaunu te zinga naupang ber, keimah ang rual vel chuan min hrilh ta vek. Ka hriat tirh chuan mak ka ti a, Mazara ka khawngaih em em bawk.

A pu huana Mazaran balhla a lo chu a pu chuan ru angah a lo puh a ni awm e, zep lovah chuan a pu chu mi ṭha tak a nih ka ring lo ve nghal tawp. A tú te'n an ei châk a ni ve mai a, rukru ang maia lo puh daih kha Mazara tan pawh a tha nât thlak khawp ang. Chu thu ka hriat ni aṭang chuan Mazara pu chu ka hmu pangngai thei ta tlat lo va, ka pasal chu a pu nen an inkar ka hre vek tawh tih ka hrilh chuang lem lo bawk. Ka ngaihtuah chian chang phei chuan Mazara thil tawn chu a em em ka ti hle a, mi pakhat chunga thil thleng atan chuan a nasa mah mah a ni.

Thla hnih chhungin pu Kawla paw'n ṭawng a thiam belh hnem hman hle a, a upat tawh tehreng nen a hriatna a la ṭha khawp mai. A ṭawng thiam thuak titih tawh a, mahse a la pai nasa ang reng. Awm chilha chen chilh tan lo chuan a thusawi hriatthiam theih nghal mai a ni lo va, a chang chuan keimahni tak paw'n kan hrethiam lo leh ṭhin. Hma erawh a sawn chak viau a, Mazara sawi ang chiahin ram lam hna chu a thawk thiam hle bawk. Mazara nen chauh pawh kar khat chhungin hna an thawk fel duak thei a, nimbu leh lakhuih huan thlengin Mazara chu awl chang a ngah ta mai.

Mazara chuan thla tin hlawh a pe ziah a, pu Kawla hlawh tur chu thlai hralhna aṭang te, thing hralhna aṭang te a ni a, a lawm thiam thei em em a, tlêm tê pawh pe ila a lawm viau ka ring tho. 'Ka pi' 'Ka pu' min ti mai zel a, a tirah chuan kan duh lo nghe nghe a, mahse min koh zel tâkah chuan ngaiah kan nei ve ta mai bawk. Keini aiin a upa daih a, a tha erawh a la chak ṭha khawp mai. Tlangval tam tak tih theih loh tur te hi a ti leh nawlh ṭhin a, thingte hi Mazara put ṭhin tiat dâwn dawn a pu ṭhin a, pu tawh lo tura vawi tam ka hrilh paw'n awmzia a nei lo thei hle. Putea phei chuan fiamthu titak deuh si hian

"Pawi te chu chaw an heh a, chak pawh an chak alawm" a ti ṭhin a, a dikna chen a awm ka ti tho mai, a chhan chu pu Kawla hian chaw a heh ve ang reng a, Mazara aia paw'n a ei hnem daih zel, kan huphurh tihna lam a ni lo va, a mak ka ti ru ṭhin viau zawk. 

Inrinni a ni a, Mazara leh pu Kawla chu ram lama feh lovin lui lamah an kal a, khua ṭha lutuk lo mah se Mazara chuan kal a châk thu a sawi reng a, chakai erawh hawn a tum lo thung. Pitei'n rai laia ei chi a nih lo thu a hrilh tawh a, kan ei lui a nih chuan nautein chil an ngah duh a ti a, kei lahin naute chil ngah ka duh bik der si lo. An kal chhan pakhat chu sangha a ei châk teh deuh thut alawm le, kei paw'n ka châk lo bik chuang lo, an che sual palh ang tih erawh ka hlau khawp mai. Fimkhur turin ka chah mawlh mawlh a, Mazara berin fimkhur a tum thu a sawi hnu chuan ka hlauhthawn rukna pawh a zia ve ta deuh.

Chawhnu lamah chuan ruah namén lovin a rawn sur ta mai, ka rilruah Mazara te pahnih tih loh chu an awm thei tawh lo hrim hrim. Ka kut leh kut insual tir nawk nawkin rilru ka seng a, in chhungah chuan ka tei kual chhen a, naute kawr tur tak ngial pawh ka phiar chhunzawm thei tawh lo a ni. Darkar 2 dawn ruah a sur hnu chuan hán lam a hnaih ta deuh a, mahse ka rilru chu a la pangngai thei chuang lo. Eng emaw ni hian min mawlh tlat a, ka chhungril lam a dik lo va, ka hlauthawng ru nasa em em bawk.

Vawi leh khatah kawngka chu a rawn inhawng thut a, ka phu dâwrh nghe nghe a, kawngka lo hawngtu chu tu dang ni lovin pu Kawla ngei mai a ni a, a chhip aṭanga a ke ler thlengin a huh hluam a, a hah hle a ni ang ṭawng pawh a ṭawng ṭha thei lo. A bulah chuan ka kal phei vat a, a lo thaw hlawi hlawi a, ka mang a tiang zual tak zet. 

"Ka pi....ka....pu....ka pu..." sawi chhunzawm thei lovin thawk a la leh phawt a, ka buai vek tawh a, Mazara chungah eng thil emaw tak a thleng tih ka man thiam nghal a, pu Kawla darah chuan ka chelh a, a sawi tur chu sawi thuai se tih baka duh ka nei rih lo.

"Ka pi....ka pu tuiah a tla" pai ang reng tak hian a rawn ti ta, ka khawng titih nghal vek a, ka hlauhthawn ang ngeiin thil a thleng ta si chu a ni a, ka mittui te chu koh chhuah chawp a ngai lo chiang hle, chutah khaw chhung information Mic aṭang chuan

"Pu Zarzokima chu tui tla nia hriat a ni a, amah tak hi hmuh a la ni lo va, khaw chhung tlangvalte a thei apiang zawng turin kan inngen a ni e" an rawn tih zawm leh nghal a, ka pum lam pawh ngaihtuah tawh lovin ka ṭhu hnawk a, ka ṭap chhuak ta nge nge.

"Mazar" keima hriat tawk lek chuan ka ti ṭuau a, insum thei lovin ka ṭah zawm leh nghal a, ka rilru a chiaiin a buai tak zet a, a thi ang tih mawlh ka hlau a ni.

(End of Chapter 35)