SUMO DRIVER By Havali Adam (CHAPTER 34)

SUMO DRIVER

By 

Havali Adam

Chapter 34

"I lo kal ve tak tak dawn em ni?" a kawr hma kilh ṭhat mawlh mawlh pah chuan a rawn ti leh sup a, tukṭhuan ei lai aṭang tawh ka zui tur thu ka hrilh vek si a, phal loh hmel viau mah se kal luih ka tum tho, a chhan chu mahni chauha hna thawh tir ka duh lo a ni. 

"Kal ve dawn e, takin a! Chaw ka fun theihnghilh daih, ka'n fun leh lawk" tiin chaw bel lam chu ka pan nghal a, hnah ro deuh rap tawh pahnih chu lain a kawkalh zawnga inbawh thuah chuan ka pharh a, chaw chu ka khawrh chhuak a, ka fun fel hnuah erawh hnânga ṭawn a ngai ta tlat. 

"Min lo ṭawnsak lawk mai, hnânga ṭawn dan hi min la zirtir ve la a ṭha ang" ka tih chuan ngawi reng hian a rawn phei a, a ṭawn ve mai bawk a, lungtât leh eng ilo a mamawh tur awm ang chu iptê puiah a khung zawm leh zat a, hnathawh kawr a ha fel vek tawh bawk.

Ram lama hna thawkin turin kan inzui chhuak a, kan chaw fun leh kan tui pai chu tawlailirah kan dah a, ama'n hrui hmangin a pawt kal a, nawr pawh ka nawr mang lo. A chang chuan a kal chak lek lek zel a, mahse a inhre chhuak thut ṭhin a ni ang a kal muang leh nge nge ṭhin. Veng chhak kan thlen chhoh lai chuan min en duh tâwk an lo awm leh pheuh pheuh tawh a, min sawi dan dik tak hre chiang lo mah ila min sawi zui tih erawh ka hre vek tho. An awm dan leh an hawiher aṭang ringawt pawh a hriat theih a, Mazara ve thung chuan a ngaihsak hmel teh chiam lo. 

Kan inneih ni aṭang kar khat a liam tawh a, kar hnihna kan hmang ṭan mêk a, kar khat chhung tawp chu Mazara paw'n hna a thawk bik lo. Inah kan awm deuh tawp zel a, inlêng kan nei deuh reng bawk a, zan tih lovah chuan kan pahnih chauha awm dun kan nei khât khawp mai. Chhun lamah ṭhenawm khawveng an lo lêng lut a, zan mut hma zawng Mazara chhungte lam leh putea te nupa an rawn lêng thla awl lo bawk a, kar khat chhung ngawt chu kan inah pawh chaw kan ei mang lo, chaw ei tura min sawm tâwk an awm reng tihna a nih ber chu!

Mazara nu pa, a pu hnen aṭanga sawmna erawh kan tihlawhtling ta lo va, Mazara berin ṭul a ti lo tlat a, hnial enah pawh ka en lo. Ka pasal a ni tawh a, hmeichhe lu chu mipa a nih ang chiahin Mazara thusawi awih lo zawng awm emaw zah lo zawnga khawsak ka tum lo bur. Ka tum ber chu atana nupui ṭha leh engtik lai pawha amah hmangaih em emtu nih a ni a, chu baka nih chak chu ka nei lo hial zawk maw le. A nu unaunu te erawh an fel phian a, kei pawh min nel nghal viau a, ka biak hmasak ngai lovin min be hmasa zel ṭhin.

"Ka hmaah i kal duh nge ka hnungah i kal duh?" Mazara chuan a rawn ti a, kan hnathawhna tur bul kawngpui kan thleng chu a ni der a, kut ruaka min kal tir a tum leh ringawt a ni ang iptê pui leh tui pawh ama'n a khai leh dim diam tawh.

"I hnungah ka lo kal ang, iptê tal kha chu ka lo ak ve ang chû" ka ṭawng hre lo ang maiin a inher nghal daih a, chak lutuk lovin a kal a, ngaihṭha takin kei pawh chuan ka zui ve leh mai a, a hnungah kal mah ila min rawn ngaihven ru reng tho. 

Thlâm kan thleng a, tui ka in nghal khawlh khawlh a, thlâm panna kawng chu rin ai takin a hahthlak ka ti, thui erawh a ni miah lo, ka kal ngai loh vang a ni maithei. Lakhuih huanah te kha chuan ka kal tawh ngei a, mahse tun ṭuma kan kalna hi chu ka vawi khat kalna a ni. Eng nge kan tih ber dawn ka hre lo va, ka pasal pá em em lah chuan ngawi reng hian chemkawm a tat hriam mial mial a, tui pawh a la in ve miah lo, kei angin a hah lutuk lo a nih ka ring. Thlâm chhunga kan awm lai chuan thli fim a rawn thaw lut a, dawnsawn a nuam ngei mai. 

"Mazar, eng nge kan tih dawn?" ka ti ta nge nge a, min chhang lawk lo hian chemkawm chu a tat zo va, a iptê ah lai a dah fel hnu chuan thlai díp zawnga hnim ṭo te thlawh fai a ngaih thu min hrilh ve ta chauh a, thlâm aṭang chhuah a tum rualin chhuah ve nghal ka tum chu a lo phal lo nasa. 

"Hmanrua ka ken kep reng reng lo che, thlâm chhungah hian lo awm tawp rawh" a ti tlat a, iptê pui chu keuin ka va en ṭha vel ngat a, hmanraw dang engmah a lo awm lo tak tak a, ka ngaihtuahna ka lo sêng leh hret lo chu mawl ka inti hnuhnawh hle.

"Thosi a tam ang reng a, mei lo chhem la, kan ei tur chawhmeh tui tak lo siam zawk rawh, chu chu min puih dan ṭha ber a ni" a tih leh tâkah chuan ka bu ta ringawt a, a sawi anga awm tawp loh chu tih tur ka nei lo tlat a tin ni!

Thlâm hlat zawnga a pen pâwk pawk lai chu thlâm kawt aṭang ka thlir reng a, amah chauha hna a thawk tur chu ka khawngaih ru hle. Thlâm chhungah lutin mei ka chhem nghal zung zung a, tunah rih chuan dar zat enna tur tak ngial pawh ka nei rih lo. Kan inah kha chuan sana a awm ngei a, han ken ngawt chi lah a ni bawk si lo. Retheih huama ka neih luih kha a ni a, ka hmangaih vang a ni bawk a, retheihna tih vel mai mai chu engah mah ngaih ka tum lo, kan inhmangaih tawnna a pawimawh ber ka ti zawk a ni. 

Thlâm bulah chuan anthur te, lêngser te, berul leh bawkbawn kungte an lo awm fur a, chung thil hmuh ringawt pawh chu nuam ka ti em em a, an bulah chuan maian a lo inzâm phar deuh duai bawk. Tin, kawng bul tê ah behlawi a rah fur a, mahse an la rah tê hlawm ang reng. Chawhmeh tur maian ka sih lai te chuan insum thei lovin beihlawi rah la sên ve tak tak chu ka ei zeuh zeuh a, ka ei zel chuan rah puitling tur a awm dawn lo tih hre kar mah ila ka ei leh nge nge ṭhin.

Maian ka sik zo va, bai pawlh tur berul leh anthur chu ka mal a, thlâm ka thlen chhoh leh meuh chuan a lo tlai ve deuh duai tawhin ka hria. Ka mei chhem pawh a lo alh tawh lo va, thing tuah erawh a líng vâm hán hlawm a, rei lo têah ka chhem alh leh thuai dawn tih ka hre nghal. Thingte chu tuah ṭha sawk sawkin ka chhem alh leh ta hluah hluah a, bel chhunga ka tui chhuan pawh sô sa a ni bawk a, a sô ṭha leh rang hle. Maian chu hîk hmasa tê téin ka ṭhuai bung a, bel chhungah chuan ka thlak a, a rim aṭang ringawt pawh a thianghlim tih a hriat ngawih ngawih.

Berul leh anthur chu ka thlak ve leh nghal a, thlâm chhungah chuan ei rawng bawlna thil vel a lo awm kim deuh thlap a, ka zawng hmu nghal zung zung a, thlak tur zawng zawng ka thlak fel hnua ka maian bai rim chu tui tak a ni. A thar lam si a, vawi eng emaw zah chu ka hawp chhîn ka hawp chhin tawh nghe nghe. Thlam bul lawka mai rah la sên ve tak chu ka hmu hnuhnawh leh a, maian baiah ka thlak zui nghal a, ka thil siam rim chuan ka ril a tiṭam thei hial. 

Rama kal ve si engmah thawk lova han awm tlawng si chu nuam lo ka ti a, thlâm kawtah chhuakin Mazara zawng chuan ka mit ka len a, a lo thlo fai hnem tawh phian leh nghal. Ei theih mai tura chawhmeh ka siam tawh avangin Mazara awmna lamah chuan ka kal a, ka kal hnaih zel a, a thlawh fai chinah chuan maipawl lian tak tak a lo awm fur a, mai te pawh langsar takin a awm thluah a, vaimin chenin a thlai tuh chu an ṭhang ṭha hlawm hle. 

"Mazar, lo chhuk tawh la" ka tih chuan a bulah ka kal tih a hre lo a ni ngei ang a rawn hawi nghal vut a, a beka thlan tui luang chu a hru zeuh a, a bul hnai chêta ka din hnu chuan a rawn nui ta suk.

"Lo zu chhuk rawh le, ka hman ṭep, khi laia thing bul chin khi ka ti leh lawk ang a, ka hman a ni mai" min en reng chung hian a ti dam raih a, thing bul awmna lam chu ka hawi a, hla a ni tawh lo va, thlâma chhuk ai chuan nghah rih ka duh ta zawk. 

"Hetah hian ka lo nghak mai ang che, kan chhuk rual dawn nia" ka tih chuan lungawi hmel fê hian min en ta reng a, ka pasal mah ni se min en lai thei tak ngial dawna hriatna ka nei a, a ban bul lian ṭha takah chuan ka chum phah ringawt. 

"Ka rei lo vang, i hmai erawh tu emaw ni avangin a sen chu a nih kha le" nui ruh ruh pahah a tih chuan a hma ai zawngin ka lai nasa zual a, lei ṭil chuan a hnungah ka vawm a, a rawn nui chhuak ta hawk hawk a, a nui hawk hawk ri chu ka vawi khat hriatna a ni. 

"Suala, eng nge mit khap lêk lova min en reng kher ni?" ka ti leh tawp a, suala tiin han ko ve vel mah ila ka fiamthu a ni tih a hre chiang dawn tih ka hria, ka dinna ka sawh sawn a, ani lah chu la nui reng chung hian ka dinna lamah a rawn phei ve zel leh ta nghal a! 

"Thlâmah lo zu awm thuai teh, ka bul hnaia i awm reng chuan hna hi ka thawh chhunzawm thei lo palh ang" a fiamthu nge a thutak pawh ka hre hrang thei lo, nui suk ṭhin mah se a ṭawngkam erawh a thutak hmel viau lawi si. 

"Ka awm lo angah ngai tawp mai rawh" ka tih rual chuan ka banah a rawn chelh a, min din hnaih zel a, ka bul lawka vaimim kung lo ding chu ka vuan ve ta ringawt a, ka hmai zawna a rawn kun hniam lai chuan

"Mazar, a hun lo êm mai. Eng lo...ih...hna thawk leh tawh la" ka lo ti bah deuh nawk nawk a, ka thusawi chuan awmzia a nei lo chiang mai mai khawp a, kan hmui chu a inbawh thuah tir zawm nghal zat a, a inla hrang chiah chu kham lo lutuk ang maiin ka awm leh lawi a, ka va han zak ru tak.

"Thlâmah lo zu awm rawh le, chuti lo zawng kan awmna hmun hi ka theihnghilh thut mai ang" nui suk chunga a tih chuan a ranga rangin ka kal sawn nghal thuai thuai a, a ṭawngkam aṭang hmangaihna chen dun lam a sawi tih ka hrethiam ve vek. 

Thlâm ka thlen thlak hnu rei lovah khaw awm dan a rawn inthlak a, ni êng chu chhum chhah takin a hliah a, khua a dur deuh ruih nghal bawk. Mei chu ka tuah alh ṭha sauh sauh a, bel erawh ka chhuang tawh lo thung. Vawi leh khatah khawpui a rawn ri dur dur a, ka phu dâwrh nghe nghe a, ruah chu a tla chhunzawm nghal titih a ni mai. Mazara awmna lam chu ruah dovin ka hawi chho zawm zat bawk a, thing bul awmna lai velah a lo la bur ngar ngar a, ruah a sur bawk si nen ka ngaihtuah ta khawp. 

A hriat phak tâwk awm vela ring chuan ka ko lauh lauh a, min rawn hmuh chuan a bu zeuh a, a kutin thlâm chhunga lut turin min ti zui nghal bawk. A rawn chhuk thla mêk tih ka hmuh rualin thlâmah ka lut ve ta chauh a, mei chu ka chhem alh leh hluah hluah a, thing ka tuah belh nghe nghe a, Mazaran a ai duh ka rin vang a ni pakhat. Kei tak paw'n ai ka duh deuh tho va, tlêm tê ruah ka do chu vawt ka tih phah a ni. Ruah chu a sur hnem ta phian a, Mazara lah chu a rawn la thleng lawk lo zui. 

Chhuah tuma ka thawh lai takin Mazara chu a rawn lut ve thei ta hram a, ruah a sur nasa tawh bawk nen a huh hman deuh vek a, a iptê ah chu ka lo lak thlak sak zung zung a, iptê chhungah chuan thlai rah ṭhenkhat leh vaimim tam lutuk lo a lo awm nual mai. Chaw fak huna kan hmeh tur a nih ka ring ve deuh tawp a, a ni lo a nih paw'n in lama hawn tur tal a nih ka ring. A nupui ka nih angin a hah leh hah loh te ka zawt zui nghal mawlh mawlh a, ka hnathawh kawr lum hak lai chu hlipin a sam huh far zawih zawih chu ka hru hul a, ani pawh ka tih ang angin a awm tawp. 

A sam ka hruk mawlh mawlh kai chuan a kawr hak lai a phelh a, mei ah chuan a hem a, hem ro a tum a nih ngei ka ring. Mei lum chu kan ai dun ta reng a, a âwm bawr poh lian tak leh a dul chhah ṭhat hmel em em chu ka en leh zauh zauh ṭhin a, zep lovah chuan ka pasal ni tawh mah se a mawi thlawt a ni. Hmeichhe dang hmuh ve ka phal lo bur a, u Duhawmi hmuh tak ngial pawh ka phal lo chu a nih kha le. Chuti ang taka taksa mawi nei mipa chu ka pasal a ni a, a hmel chang ni lovin a rilru a la ṭha leh zel a, ka va'n vannei ngawih ngawih tak êm. 

Ruah sur buan buan laiin chhun chaw chu kan fâk dun a, kan chhuan lum leh avangin maian chu a sâ ṭha ver vawr hle a, chu chuan a titui zualin ka hria. Mai rah no ṭha zet chu ka lamah a rawn hnawl phei a, a ṭawng lo hrim hrim a, a chetzia hmanga min hmangaihzia leh min duatzia ka hriat hian ka lawm ṭhin. Kan inneihna a la rei miah lo, mahse Mazara hi chuan thu a tiam tawh angin ka hrisel lai leh bawrhsawm lai paw'n min thlahthlam dawn lo tih ka hria, chuti ang mipa chu a ni tlat. 

Chaw kan fâk zawh hnuah pawh ruah sur chu a la bâng thei meuh lo va, kan piah lawka kawrah chuan tuihawk a luang ri nasa hle bawk. Kan piah lawk ka'n ti tak ná a, a va la piah ve deuh hret a, lung kara kawr awm a nih avangin a hlauhthawnawm em em hran lo. Mei lum aia ka ṭhut lai chuan ka hnung lam aṭang min rawn kuah a, min kar cheh zawm nghal zat a, a âwm ruak kâng chu min nghentir a, mei lum reng ka mamawh tawh lovin ka hria. Ka nghawng zawnah a rawn thaw lum ham ham leh zauh ṭhin a, ka awm a tinuam tak zet. 

"Vaimim ka rawh ang che chu" ti hniam ruihin ka beng nêm lai tak chu a hmuiin a pet ne nê a, ṭawng pawh ṭawng ṭha hlei thei lovin ka bu nghauh nghauh ringawt a, a thusawi leh a chet dan inmil lo viau mah se a thil tih mêk avang chuan awihawm loh lutukin ka danglam tlat si a ni.

"Vaimin rawh sak che aia duh leh mamawh i nei em?" a chet dan a la thlak danglam eih lo va, ka beng mai ni lovin ka nghawngte chu a dût ni ber hian ka hria a, a kut chu awm hle hle thei lovin ka awm zawnah a tiche reng bawk. 

"Mazar! Eng lo....ka..." min kuai dâk deuh thutin min fawp ngawng ngawng a, min fawhna aṭanga a inlak hran rual chuan thaw chham ṭepin ka thaw hlawi hlawi a, a awm dan leh a mitmengah chuan a insumna ve hle tih ka hre nghal a, kan awmna hmunin zir ngat se chu hmangaihna min chenpui ngei ang.

"Ruah chu rin ai takin a sur rei phian mai, vaimim hi ei hmasa phawt ila, kan haw dawn nia" kan ngawih dun vang vang hnu chuan a rawn ti thum ṭial ruih a, engtin mah chet lâk a tum tawh lo tih hriat zetin vaimin chu mei ling karah a rawlh lut a, mahse min la karcheh reng tho. 

Vaimim chu pahnih a kheh a, a sir ve ve ah a rawlh lut a, rei lovah an rawn puak ri pep pep a, kei chuan lo en reng ringawt. Ngawi rengin mei lum kan ai dun a, a kut vei lam zawk chu ka dul zawnah ka hum hnan a, a kut ding lam erawh vaimim leh kual vel nan a hman avangin a che deuh reng a, kan awm dan chu nuam ka ti khawp. Ani paw'n a ti ve thovin ka hria, ngawi reng ṭhin mah se a bula awm a nuam thlawt a, a hmangaihna ang chhunga awm chu ka duhthusam a ni ṭhin a, ka duthusam anga ka awm thei ta chu Pathian hnena lawmthu sawi mawlh mawlhna tham niin ka hria.

Rama vaimim rawh hmin thar ngat ei zawng a va han tui chiang tehreng em, a hân dan a tâwk si, tui ti tak ka ni. Kan ei zawh hnuah pawh ruah chu a la tla reng a, chhum a zing nasa bawk si nen khua chuan tlai duai hmel a pu a, mahse a tlai vak ka la ring lo. A lo berah dar 4 a la ri miah lo vang, ruah a sur hi chuan khua a thim hma tlangpui a, tlai tawh deuh ang hian a lang ṭhin a, hun kal dan erawh a ngai reng ṭhin thung. Ka lo chhing sek a ni ngei ka harh leh chuan thlâmah kan lo mu dun reng tawh a, khua pawh a thim titih ṭep tawh leh nghal.

Mazara chu ka kai tho vat a, kai tho tih lemah a meng reng a, ka ṭawng lai chuan min en reng bawk a, ka muthilh chhung zawng khan a lo mu meng kar a nih ka ring. Ruah sur hnuaia haw ka rawt tâkah chuan thawh zai a rawn rel ve ta nge nge a, kan hawn tur ang âng chu iptê puiah a khung a, kut ruaka min kaltir a tum leh dawn tho tih ka hriat sa vek avangin engtin mah ka ṭawng chhuak lo va, ka che chhuak lo bawk. Thlâm kawt kan chhuah chuan ruahin min rawn far nghal a, a sur tam lutuk tawh lovin ka hria, mahse tlem tak erawh a ni chuang lo.

Kawngpui kan thlen thlak rual chuan muangchang lovin tawlailirah kan chuang nghal a, Mazara paw'n a khalh muang lo hle a, a hnung chiahah ṭhuin a kawr tlâng chu ka lo pawt ṭai ringawt. Khaw chhung kan tlan luh hmain ruah chu a rawn baw leh ta hawk a, kan huh zawr vek tawh a tih theih a, kan in kawt kan thlen te chuan che hmanhmawh tak kan ni. In chhungah kan lut thuai a, Mazara chuan mei a chhem alh nghal sawk sawk a, current a rawn la awm lo zui. A thawmhnaw hak lai chu a phelh nghal vek a, ka thawmhnaw phelh tura min tih chuan ka zak ru ang reng hle.

"Puih i ngai em?" a rawn tih chuan lu ka lo thin khum vat a, ka che muang ve bawk si nen min puih a tum pawh chu a awm viau tho, ka hnathawh thawmhnaw ka hlip chiah chu a vawt deuh sûk a, mei lum hnaihah ka ṭhu vat a, Mazara chuan min ngaihtuah hmel viau bawk. 

"Tui hi sô se i inbual nghal dawn nia" tih leh towel min pek a rual a, lo la vatin ka âwmah chuan ka bih zawm zat a, taksa khuhtu awm mang lova awm reng chu ka thiam lo lek lek a, towel chu ka hmang ṭangkai ta phian.

Current a rawn awm a, tlem chuan a zia ta deuh e. Khua chhe bawk, ruah sur bawk, current tal a thim reng chuan awm a tinuam lo em mai. Ka inbual zo chu thawmhnaw ka inbel nghal sawk sawk a, kawr lum ka ha nghal thuai bawk. Mazara erawh inbual turin a lut ve chiah thung a, current a awm tawh tho bawk a, ei rawng ka bawl zui nghal chu a ni mai. Chawhmeh kan hawn ṭhenkhat ka siam laiin Mazara inbual zo a rawn chhuak a, ani pawh kei ang bawkin muangchang lo fê hian pindan lamah a lut nghal a, thawmhnaw lum lampang a hak ve tho ka ring.

Zanriah ei lai chuan ka ṭawng melh melh a, ka hmaa ṭhu erawh a ngai tê bawkin a ṭawng tam lutuk lo leh a, zawhna ka zawt a nih loh chuan mi hi a chhang ngai vak ṭhin lo. A zia ve rengah ka pawm thiam tawh a, tawi tê têa a ṭawng thum bul bul ṭhin te chu pawi tihna ka nei lo va, ngaiah ka nei hmiah tawh a ni ber. A ṭawng chhuah ve chhunah erawh a tak run zel a, fiamthu a thawh ve zauh zauh te hian fiamthu a ang lo thei lutuk a, ka nui ringawt zel. Chu bakah a inhmeh hlawl lo, mahse ka hlimna tur a nih chuan han thawh zauh te hi a hrat ve ang reng a, puitling pui si hi a lawmawm thei tawp. 

Ruah a la sur reng a, kan nupa chuan khumah kan mu dun leh daih tawh a, zanriah kan ei aṭang darkar tam pawh a la ral lo. Current a thim leh avangin mut mai chu a fuh zawk kan ti a, khua chhe lo se chu putea te ina lên chhoh ka châk thu ka sawi a, thil dang chi hrang hrang pawh ka sawi mial mial a, Mazara erawh chuan a âwmah min kuah bet ran ringawt a, a changin ka chhip sam a fawp leh zeuh ṭhin bawk. Ka ngawih reng tâkah chuan ka khabe a rawn chawi a, zun nei lutuk hian min fawp a, chhan lêt loh hi harsa ka ti ṭhin. 

"I dik miah lo" a inlâk hran hnu chuan a ti deuh tawl a, ka chungah a bawk titih leh reng tawh zawk a, ka dik lo tih chu kei ngei paw'n ka hre chiang a, mahse Mazara zawk chuan a rawn hre hma mah mah ka ti, ka awm danah a langsar viau a ni maithei. 

"Ka chau deuh a, zanin chu min hrethiam mai teh Mazar" ka ti thawp raih a, min fawh lai pawha ka kut ka chet miah loh dan aṭang khan ka dik lo a ni tih a hriat ka ring ta ber a, ka awm dan chu ka hrethiam bik chiah lo, ka zawi em em ringawt. 

"A pawi lo, remchang dang a awm mai ang" tiin ṭha tak chuan ka sirah a rawn mu thla ve leh mai a, a lakah chuan ka inthlahrung ta khawp mai, nupa nun hman a duh laia kan hmang thei lo tur chu hrehawm ka ti ve tho va, ka taksa lah chu dam lo tur inṭham ang maiin a awm tlat bawk si.

Rei lovah ka khua a rawn sik ta ngei a, Mazara chu a che buai phili khawp mai. Khawsik avangin ka muhil lai ka harh nghe nghe a, damdawi min ei tir lai te chuan ka khur beuh beuh a, Mazara hnenah chuan min kuah lum turin ka ti ta tawp. Ka ngen ang ngei chuan khumah a rawn lawn a, min kuah lum tum tak hian a ban leh a ké chu min khan zawngin a a dah a, ka ke pawh a ke lum vung vung chuan a rawn delh lum nghal zat bawk. Darkar eng emaw zah hnu chuan damdawi eiin min chhawk ta deuh a, lum tih avangin ka thlan a rawn chhuak a, Mazara chu a muhil miah lo a nih hmel. 

Ka harh apiangin min buaipui tur hian a lo che nghal vat zel a, pasal ṭha tak chu a va ni chiang em. Ka zâng ta deuh vâh a, ka dam tawh viau chuan ka hria, mahse Mazara chuan min la ngaihtuah hle thung. Zing dar 5 bawr vel a ni tawh a, ka bula mi chu mutmu tuah ṭha lo tih hriat takin a lo chhing diar diar a, ka khawngaih khawp mai. Hna thawkin a hah ve hle awm si a, kei lah chuan mu thei lêk lovin ka la siam zui. A dara ka va bei rualin a rawn harh zawk a, min en a tum chuan ka kuah nghet sauh a, muhil turin ka hrilh ta tawp a, a ngawih vang vang hnuah a mu ṭha ve ta chauh.

Khum aṭanga kan thawh chhuah leh meuh chuan ka pangngai ta viau a, Mazara chuan ka chet a phal leh ta tlat lo. Ei rawng a bawl vek a, puih ka tum ngial paw'n a phal chuang lo. Tukṭhuan ei laiin ka ṭhat leh ṭhat loh min zawt a, ka ṭhat tawh thuin ka chhang ve mai a, fehsan ngam ka nih leh nih loh min zawt leh a, a zawhna tak chhang lovin awm hahdam turin ka hrilh ta zawk a, ani chuan min chhang leh tawh chuang lo. Ka beisei loh lutukin chaw kan ei kham hnuah pawh feh turin a insiam miah lo va, dik tak chuan inah awm dun ila ka ti a ni. 

A feh lo ta ngei a, mahse a awm awl mai mai lo chiang khawp. Kangvar thing tih hriat taka hang dum thluah te chu Ara hmangin a tan mawlh mawlh a, keiin thingpui leh kurtaiin ka lo hlui thung a, kan awm dan chu a nuam reuh tawp. Chawhma chhungin a tan bung ṭeuh hman a, chawhnu lamah erawh inbual faia awm mai mai tawh turin ka ti a, ka thu a awih ve zel te chuan min tihlim ngei mai. Ei rawng min bawlpui a tum a, ka lo phal ve tlat thung. Tlantea leh a ṭhianpa an rawn lut hlawl a, in chhung boruak chu an tireh lo khawp.

Zanah chuan ka tum rilruk ang ngeiin chet ka la hmasa a, pasal te tih lawm tuma chet chu ka zak ṭep nghe nghe a, mahse min hmuhsit phah dawn lo tih ka hriat chian em avangin ka zak duh leh ta lo. Hun kan hman rei hnuah phei chuan zahna tlachham ang maiin ka awm a, chuti anga awm tur chuan min siam thiam tlat a ni. Thawm ka chhuah hial a, ruah sur lo hlauh phei se chu ṭhenawmte tan hriat nuam a ni miah lo ang. Vawi khat mai ni lo nupa nun kan hmang dun a, hmangaih ber te nen chuan engtin pawh awm ila a nuam vel vek a ni ber e.

Ni a ral a, kar a ral a, kan inneih aṭang thla hial a ral ve ta reng mai. Kan inneih tirh lai ang em emin Mazara chuan hna ka thawh a phal lo bur tawh lo va, mahse ka thawh hah a hlau thei hle thung. Nitin a fehna apiangah ka zui ta ziah a, hlo ka thlawhpui ṭhin bawk a, kan inthawh tam hleih thei hle. Mak ka tih em em pakhat chu nuam lo tihna emaw hrehawm tihna ka nei ngai miah lo va, Mazara paw'n min zawt leh nawlh ṭhin a, dawt ka sawi ring ang maiin min en ṭhin nghe nghe. Kei lah chuan hrehawm ka ti der si lo va, khawpui nula ni ṭhin mah ila hrehawm ka ti miah lo chu a mak ve ngawt mai. 

Tlai khat chu ka taksa chhung lam awm dan a rawn danglam thut a, ka ei rawng bawl lai chawl meuhin ka ṭhu ngawi reng a, ka inhrethiam lo hle. Mazara ni se ram lamah a feh daih bawk si a, ani tal awm hnai se chuan min ngaihtuah leh tawh khawp ang. Ka chawhmeh siam rim chu ka ngaithei lo lek lek ṭhin a, luhai emaw taksa nâ engmah ka nei lo te chu mak ka ti em em a, ka luak erawh a chhuak leh thut ṭhin a, pitei te inah han kal ringawt dawn ila kan inhlat ve ang reng bawk si. 

Khumah chuan ka mu meng kar a, thil chi hrang hrang ka ngaihtuah kual fê hnuah hriat chhuah ka nei ta zawk mai. Ka pum chu ka dawm nghal a, tho vatin pindan aṭang chuan ka chhuak nghal vat bawk. Health Sub-Centre-a kal ka tum ta ber a, Health Woker ten ka awm dan chu an hriatthiam ngei ka ring a ni. Ka rilru chuan ka ṭawngṭai mawlh mawlh a, Sub-Centre ka thlen rualin ka awm dan chu ka sawi nghal zung zung a, ka sawi hmanhmawh lutuk chu ka ṭawng bah nawk nawk phah nghe nghe.

Ka zun min lo Test sak a, result ka hre chiah chu hlim tak ka ni. Nau ka lo pai reng chu niin, ka va han lawm tehreng em. Health Worker nupa chuan min lawmpui thiam em em a, a la nâ chi ka nih an rin thu an sawi a, mahse kei chuan an thusawi ka hre mumal thei tawh lo. Mazara lo haw hun mawlh chu ka nghakhlel tawh a, ka chhungril lam chu a za et etin ka hria. Phur takin ka haw a, ei rawng pawh ka bawl zawm thei tawh lo. In ka thlen thlak aṭanga rei lovah Mazara lo haw thawm ka hre nghal a, in chhunga a lo luh lai chuan ka lo nuih nghal ringawt.

"Mazar, ka rai" iptê pui chhung bih dûk duka thlai rah la chhuak tawh lovin a rawn hawi nghal vut a, a dinna aṭanga pen sawnin ka bulah a rawn kal phei a, chik zeta min en lai chuan ka lo nuih sen sen thung.

"Ka rai tak tak, kan pahniha kan fa tur ka pai mêk Mazar" ka tih leh a, a hmelah chuan awih lohna emaw hamhaihna tih vel aiin hlimna hlir ka hmu ta zawk a, ngawi reng hian min kuah a, ka beng bula thaw lum ham hamin 

"Ṭha takin ka enkawl ang che u" a rawn ti sup a, ka bianga fawp zeuhin ka hmel hmu thei zawng chuan a ding ngil zawm zat a, kal sawn ta mai lo chuan ka hmuiah a rawn fawp leh vawng vawng a, Mazara fa ngei ka pai chu ka lawm a, a sawi ang ngeiin a awm dawn tih ka chiang em em bawk.

(End of Chapter 34)