SUMO DRIVER By Havali Adam (CHAPTER 33)

SUMO DRIVER

By

Havali Adam

Chapter 33

Thingpui in ta lo chuan veng chhak lamah min phur chho va, putea te inah min dah a, ani erawh khaw ṭhenawmah a kal tlang nghal thung. Min hrilh kher lo mah se a tih tur awm ang ka hre vek a, min hruai lo chu pawi ka ti miah lo, ka la pangngai lo êm mai. Putea te chhungin min hmu chiah chu an hamhaih hmel hlawm hle a, Mazara lah chuan engmah sawi lovin min dah deuh tawp bawk si. Keimah zawkin a tlan liam hnuah kan inruk nawn leh thu leh ka pa min tuithlar thu ka sawi ta nge nge a, an pathum chuan min khawngaih hmel hle.

Ka inhrethiam bik lo, pitei kuah meuhin ka ṭap leh ringawt a, putea'n min lo ṭawng thlamuan char char thung a, Tlantea erawh a ngawi reng a, mahse min lainat tih chu ka hmu thiam vek tho. Ka thisen zawmpui te tak tak angin ka ngai a, ka ngaina a, an bula ka awm chiah chu ka ṭah a chhuak thar leh a ni ber. Rei tak ka ṭap hran lo va, Mazara nghah pahin thil chi hrang hrang kan sawi a, kan inneih hun tur thlengin min zawt a, ka hriat rih loh thu sawi mah ila kan inneih har ka ring lo. Kan inneih thuai tur thu min hrilh tawh tlat a, kan innei har tawp lo vang. 

Pitei chuan tlai lama chaw ei nghal turin min sawm a, lo hnial ka tum viau tak ná a, ka hnial leh ta lo. Engtin mah ka chhang lo tawp a, Mazaran ei a tih chuan ei a ni mai. Ka rin aiin a lo lêt har daih leh nghal a, phone tal chu nei ila chuan a zia deuh ang maw le. Phone tak ngial pawh ka keng chho lo va, ka pa'n min rawn biak chhên a tum ka hlauh vang a ni pakhat. Mazara lahin a nei bik der si lo, mahse pawi han tihna em em ka nei hran lo va, a rem hunah kan lei ve leh mai turah ka ngai. 

Darkar 2 dâwn a thâng hnu chuan Mazara pawh a lo thleng ve ta hram a, pitei ni lovin putea zawkin chaw ei nghal turin a lo sawm a, a chhang mai dawn emaw ka tih laiin min rawn en hmasa leh lawi a, ka rilru a hria a ni chêk ang kan ei tur thu a sawi a, zep lovah chuan ei ka châk reng. Mazara nen chauha chaw ei dun a nuam lo ka tihna ni lovin putea te chhungkaw bula zanriah ei ka châk ve hranpa hrim hrim a, chawhmeh lam pawh pakhat mah ka ngaihtuah lo, ka ei châk ve tawp a ni ber.

Pitei nen ei rawng kan bawl a, mipaho erawh eng nge an tih ka hre lo. Pawn lamah an inzui chhuak a, khawiah tak kal ang maw! Pitei nen chuan chawhmeh siam pahin kan titi melh melh a, a ṭawng duh ang reng bawk nen ka ṭawng pawh a kal ve ta hle. Rilru nâtna te, lungngaih rukna te leh hrehawm tih rukna te chu keimahah a la châm reng a, chu erawh ka pa min tuithlar vang a ni. Amaherawhchu engtin emaw ni tak hian ka rilru chu a awm tlat a, engkim chu a ṭha vek dawna hriatna ka nei tlat a ni. 

"Tunkarah u Mazara nen in inneih ka ring, mo ṭhian atan tu nge hman i tum?" Tlantea chu ka en zawk a, Field têa naupang infiam lam ka en zawm leh nghal a, ngawi renga ka ngaihtuah hnu chuan ṭhian tur ka nei lo tih ka hre chiah.

"Ka ṭhiannu pakhat i hmang duh mai ang em? Amah chu i hriat ka ring, hmanah pawh in inkawibah ho tawh alawm" a rawn tih leh chuan naupang infiam lam ngaihsak tawh lovin Tlantea thusawi chuan ka rilru a rawn luah ta ber a, a mi sawi chu ka hre miah lo leh nghal. 

"Ka va'n hre mai lo, kei chu heti hian inkawl tawp mai ila emaw cheng dun tawp ila ka ti zawk, innei ang kan ni dawn tho va, pawi tihna ka nei lutuk lo" ka ti chhuak ve ta sep a, Mazara ngaih dan erawh ka la hre miah lo, inneih lam kha chu a sawi tawh ngei a! 

"Nichina kan chhuah ho lai khan dan ang taka inneih a sawi a, kan tel lovin kohhran upaho pawh a be nghalin ka hria, ka hriat sual loh chuan tunkar ngeiah hian in innei dawn a nih hmel" ṭawng leh ka tum deuh ûk a, mahse Tlantea thusawi chu a dik ka ring a, Mazaran thutlukna a siam tawh chuan dodal ka tum lo hrim hrim. 

"In ruala a rawn la haw ve loh chhan a nih dawn chu, a lo haw ṭep tawh ang em?" ka ti ta daih zawk a, chhun lamah ni sain khua uap deuh churh mah se tlai lamah erawh boruak a thiang nuam em em a, khawpui boruak nen chuan a inang lo khawp mai. 

"Ka hre lo le, haw ṭep tawh maithei a ni" ti leh in chhung lama min luhsan chu a rual nghal a, lut ve ta mai lo chuan pawnah ka la ding reng a, naupangho bawk chu ka thlir a, Mazara lo haw nghah paha pawn boruak nuam tak hip chu ka duh rih zawk.

Mawitei leh Hlimpuii ka rilruah an rawn lang a, mo ṭhiana sawm chu ka ngam chiah lo a ni. A chhan chu thingtlangah kan inneih dawn mai bakah khaw kar a hla ve em em a, pawisa neih rêng ka nei rih bawk si lo nen an peih ka ring lo a ni ber. Sawm lui ngar ngar ila chuan an duh theih mai ka ring a, mahse ṭhiana hman ka tum lo ta law law. Chu bakah kan inngaihzawn lai aṭang tawh Mazara min duhpui vak chuang lo va, sawi kher lo mah se kan inneihnaa mo ṭhian nih an phur dawn lo tih ka chiang a, ka inthlahrung hrim hrim bawk.

"I va ngaihtuah mûk awm ve?" aw lo chhuahna lam hawi ka tum rualin hnung lam aṭang min rawn kuah a ni nghal mai a, min kuahtu chu a hmel hmu lo mah ila a aw aṭang ringawt pawh ka hre thei tawh a, min kuahna chuan min tihahdam sawng sawngin ka hria.

"Ngaihtuah mûk ve e, engtin nge ni ta? Kohhran upate nen chuan in inbe thei maw?" a kalna leh a thil tih ka hriat vek tawh avangin ka zawt tlang nghal hmiah a, min chhang lawk lo hian a ngawi reng a, mak a ti deuh te pawh a ni maithei. 

"Zaninah kan sawi dun dawn nia, i lut phawt ang hmiang" a tih chuan a lam hawi zawngin ka inher a, kan mit a intawn rual chuan ka nui seih a, ngaihṭhat hmel deuha min enin ka sam chu ka bengah a zep a, thla hi chu a va han timuang ngawih ngawih ṭhin tak!

In chhunga kan luh hnu chuan ṭhutthlengah kan ṭhu ṭhap a, ei rawng ka bawl peih vek tawh bawk a, chaw ei nân a la hma ang reng si a, titina hun atan kan hmang ta ringawt. Putea chuan inneihna buatsaih dan tur vel a sawi dap dap a, mahse thil pakhat hriat chhuah ka nei. Mazaran pa a la nei tih ka hre chuak har lutuk chu mawl ka inti hle a, a pa a awm reng a, kan inneihna turah chuan inrawlhna a neih ve a thiang a ni. 

Zanriah ei lai chuan Mazara pa ngawr ngawrin ka ngaihtuahna a luah tlat mai a, ngaihtuah ka tum pawh a ni bik lo. Mazaran a pa a huatzia ka hria, mahse kan inneihna turah chuan engtin emaw ni tak a tel ve ka duh bawk si. Mazara han rawn dawn ringawt ila a ngaih dan a nih loh ka hlau ru hle a, mahse sawipui ngei chu ka tum ruh viau thung. Leh lam kawng zawng tak chuan Mazara pawh ka dem bik lo, mahni pate uire lai hmuh chu a hrilhhai thlakin a thinrim thlak dawn êm asin.

Chaw kan ei kham hnu chuan hmun leh thleng ka seng fel nghal zung zung a, pitei chet ve tum pawh ka phal lo va, keima'n ka tifel fai vek a, Tlantean min lo chhaih leh phah nghe nghe. In la mo thar hlim ang zawngte'n min chhaih a, putea te nupa an nuih huah huah laiin Mazara erawh a nui eih lo va, min en reng ringawt. Rei lovah haw thlak a rawt a, tih tur kan neih thute a sawi a, kan tih tur chu pakhat mah ka hre lo. In kan thleng thla a, chhuak turin a insiam a, kei pawh ka insiam ve mai.

"Khawiah nge kan kal dawn reng reng a Mazar? Thil eng emaw ni sawipui che ka duh a, mahse mut hmunah ka sawipui leh si zawk mai ang che" ka insiam laiin min lo en reng a, min en reng hi chuan tal tam dun ve hle tawh mah ila min la tizam ru thei tho zel.

"Pastor kan hmu dawn" a lam chu ka hawi nghal thuai a, a ṭhutna aṭanga thovin ka lamah a rawn kal phei a, en reng duh lovin ka lo inha ṭha sawk sawk a, Pastor hmel ber kher chu ka hmu hreh tak zet.

"Engati nge?" ka ti leh hram a, chhuak turin ka inha fel vek tawh a, ka kutah kaiin pindan aṭang chuan min chhuahpui a, ngawi reng hian in chu a kalh a, chahbi min pe ringawt a, ka kuta la kai reng chungin bike-ah chuan min hlang kai lâwp a, a zawh hi chu min zo teh e!

"Kohhran upa ṭhenkhat an lo nuamsam lo va, a ṭhen an zin laklawh bawk si a, kut suihtu atan Pastor ngen tawp ka tum" tih leh tlan chhuah a rual nghal a, min chhang har ka ti viau a, mahse thinrimna emaw lungawi lohna ka neih phah lo hrim hrim.

Pastor Quarter lam panin kan tlan zel a, Quarter kan tlan luh lai te chuan ka zam ru em em a, theihai vawm tlak ka tum lai kha min hmu chiang mai si a, min lo la hre reng ang tih mawlh chu ka hlau. Ka kuta kai chungin in chhungah Mazara chuan min luhpui a, Pastor nupui hawihhawmzia leh felzia chu pui tak a ni. Fa pahnih an nei a, Pastor ber chu ka en ngam ṭhak lo. Mazara chuan a sawi tur ang ang chu a sawi nghal mawlh mawlh a, ka rin loh deuhin Pastor chuan a lo nêl phian. 

"Keimah ber kher hi chuan ka kut suih theih che u ka va ring lo êm, inneih in duh hun hi a fuh chiah lo a ni. Kohhranin an thunun lai che a ni bawk si a, kohhran dang upa ka lo be mai dawn em ni ang?" Pastor aw chu a dam dap a, Mazara hmel erawh a nelawm teh chiam lo.

"A ngai lo ni mai rawh se, kan kal phawt ang e" Mazara chuan min dinpui nghal a, mahse Pastor chu a lo ṭawng chhuak leh vat a, ṭhu phawt turin min ti a, Pastor tan tak pawh chuan a harsa ve ngawt ang.

"Paa, kan awmna hmasa zawk thingtlang khuaah pawh dan khatna ni lova inneih ngai i inkut suih tir ṭhin tho kha maw le, kan dinhmun a lai bawk si a, kohhran dang upa hnena chanvo hlan chhawn ai chuan Mazara te hi i mawhphurnaah ngai tawp mai teh, Pathian remruat a ni maithei asin" tiin Pastor nupui chu a lo ṭawng chhuak hmasa a, a inthlahrunawm duh ang reng.

"Dan khatna lo hi chu kohhran upa te'n an inkut suih tir ṭhin tih in hriat ve ve ka ring a, mahse kan kohhran upate an hetih tlat si chuan kawng dang a awm bik nâng. Thingtlang a nihna chen hi a la awm a, thingtlang a nih piah lamah Pathian remruat a ni tak ang; kei tih loh remchang an awm lo êm mai" tiin Pastor chu a ṭawng chhunzawm ve leh nghal a, Mazara hmel erawh a la danglam lo hrim hrimin ka hria. 

"Nangmah ngeiin min inkut suih tir theih chuan a lawmawm ngawt ang pu Ṭhuam, kohhran upa ka biak kual vek hnua lo kal chauh ka ni" Mazara chuan a ti ve sup a, Pastor pawh a bu nghat nghat a, min rawn en ta.

"I nupui tur hi khawi lam mi nge ni reng reng? Ka hmuh hnu a ang riaua ka hriat ni, nge ka hre sual zawk?" nui pah hian a rawn ti a, min hre ru reng chungin fiamthu a thawh tih ka hrethiam nghal vek a, ka va han zak mai mai tak!

"Theihai vawm tlak tum rual lêk a la nih hmel ka ti Mazar, kum lamah chuan in inthlau ve dawn hle a ni maw?" amah bawk chu a rawn ṭawng leh nghal a, a la fiamthu tluang zel a, a nupui phei chu a lo ṭhen ṭhaw nghe nghe.

"Min hrethiam dawn nia pu Ṭhuam, loh theih loh thil a nih bakah nupui neih thuai ka ngai bawk si a ni" Mazara aw chu hriat a nuam chho ta viau a, a hmel pawh rum ul tawh lovin a inthlak danglam nasa tawh hle.

"Inthlahrung lutuk duh suh u, a thu hrimah nupui i ruk hi ka ring miah lo asin Mazar, he khuaa tlangvalah chuan a fel ber pawlah ka ngai che a, mahse i sual ta e ka tihna lam a ni lo a nia, hetia i chet chhan erawh a awm ngei ka ring" Pastor-in a tih leh chuan lo inzahpui ruk riauna ka nei a, inruk ni lovin kawng dang chu awm se a mualpho miah lo ang maw le.

Pastor te inah chuan darkar khat vel kan lêng a, min fiam peih lutuk a, an awm laiin Mazara chu engkim ka hrilh tawp ringawt. Ka hrilh chiah chu Mazara tak ngial pawh a nui ve suk a, Pastor e ti lo chuan fiamthu a ngaina khawp mai. Kan haw dawn te chuan innel tawh lutuk ang maiin min thlah thlap a, an ṭawngkam hriat a nuamin an nelawm si a, Pastor nupui chu ka ngaisang em em bawk. A awm danah chuan hmeichhe dangte neih loh nei ang maiin thil thar zir tur tam tak ka hmu ṭeuh a, a pasal tihzahawm dan a thiam a, amah tak pawh a intizahawm a ni. 

In kan thleng a, zan dar 9 a lo pel ve dûai tawh a, thingpui a duh leh duh loh ka zawt a, ani chuan mei chhem a buaithlak thuin min chhang daih thung. Mu turin pindanah kan lut a, khuma kan mut rualin a âwmah min kuah bet run a, keiin nuam ti zetin ka lo khan chial a, a kut hrawl zet chu ka khâl niap niap bawk. Tlantean kan inneih huna ka ṭhian tur min lo zawnsak thu ka sawi chuan ṭha a lo ti ang reng a, kei tak paw'n ṭha ka ti hnuhnawh tawh. Ka duh ber chu a nupui nih thuai thuai a ni a, ka ni ṭep tawh bawk.

Ka ṭawng a kal tluang lutuk a, ka ṭawng tawp thei mai lo va, thupui fun tak pawh ka sawi chuang lo, ka ṭawng tui ve tawp. Kei ka ṭawng char char a, ani'n min lo ngaithla thung a, a changin ka biang chu a hmuiin a rawn nul leh thuak thuak ṭhin. Vawi khat phei chu ka ṭawng mawlh mawlh laiin a che thut a, min rawn fawp ngawng ngawng a, a awm ṭha ve leh mai a, ka hamhaih leh sawi tur hre lawk lo chu ka nui tawp ringawt. Ka ṭawng chhunzawm leh dawn lai takin kawngka chu pawn lam aṭang an lo kik a, thawh ka tum rualin Mazara chuan

"Keima'n ka va hawng ang e, lo mu mai mai rawh" ti supin min thawhsan a, kawngka a hawn rualin Mazara aw chu a ram deuh hmuk a, ka ngaihṭha lo chu ka tho ta thuai a, ka va chhuah phei chuan Mazara chu a pa nen an lo inhmachhawn ran mai.

"Lo luh tum lo la a fuhin ka ring" Mazara aw chu a hriam ngaiin a la hriam reng a, a pa erawh a ngawi reng thung a, a fapa chu a en ngawt ngawt a, ka hmu sual nge pawh ka hre lo, a mitmengah chuan inthiam lohna ka hmuin ka hria.

"Lo lut rawh, kawng lo kian ta che Mazar" hlauthawng ru em em chungin ka va ti sawk sawk a, kawngka pakhat chu ka hawng a, Mazara pa chu mawl biak deuh tawpin lut tur chuan ka sawm leh a, a lo lut ve mai bawk a, Mazara hmel erawh ka en ngam loh mai bakah ka en buai duh lo law law.

"I sawi duh sawi la, in aṭang hian chhuak leh nghal ang che" Mazara aw chu a la chang ṭha hle a, ṭhutthlenga kan ṭhu hnuah pawh ani chu a la ṭhu duh ṭhak lo va, ka va hmuh tirh ang chiahin a la ding a, a dinna tak ngial pawh a la sawn mang lo. 

"En teh Mazar, i pa ka nih hi maw le, min thinrim khum reng bik lo la" a pa aw chu a dam hniam raih a, ṭhen deuh suk mah se a chhungril lam erawh a nâ tih ka hmu thei a, ka hrethiam a, a pa laka Mazara awm dan chu ṭha ka ti miah lo, a ṭha lo tak zet. 

"Thinrim khum maw!? I beisei sâng mah mah, ka tan engmah i ni hleinem, thinrim khum chhan tur che ka nei lo" Mazara chu khap daih tumin ka en lo thei ta lo, a mitmeng hlauhawmzia chu pui tak a ni, a rapthlak letling zawk.

"Eng lo, thingpui ka'n lum ang e, in induh ang" tiin ka tho thuai a, tap chhak lamah mei chhem turin ka phei zui nghal a, dik tak chuan thu dang daiha pakai pui ka tum ber zawk a, mahse a harsat hmel khawp.

"Thingpui lum a ngai lo, in lovin a haw ang" Mazara bawk chuan a rawn ti leh a, kei pawh ka che zawm duh ta em lo va, ka pasal ni mai tur thu chu ka inneih hma aṭang hawt zawm loh nghal ringawt chu dikin ka hre lo a tin ni! 

"Ka haw leh thuai dawn alawm Mazar, ka sawi duh tak erawh engati nge nupui i ruk chungchang em em hi chu min hrilh ve loh? Ka nau, khaw hrana awm aṭang ka hre daih a, ka tan mai ni lo i tan pawh a zahthlak asin, sawi neuh neuh a tam tawh viau leh nghal" ding hluai chungin Mazara pa chuan a ti a, ka tan chuan sawi tur a vâng duh kher mai.

"Hriattir ṭulah che ngai ila chuan ka hrilh ang che, mahse hriattir kher che ka tum lo. Haw tawh la ka ti khawp mai, mut hma kan duh" Mazaran a tih chuan ka lo ip deuh chawih a, a ṭawng dan chu a em em ve hret lam a ni e, a haw lutuk tak zet a ni ngei ang. 

"Engtin nge maw kan inkar hi ka siam ṭhat ang le, keimah ang chiahin i rilru lah chu a nghet laklawh tawh mai bawk si a, in inneihnaah tal chuan ka lo telpui che u i remtih ka ring. Ka'n haw ang e, malsawmna hlan che u tuma lo kal ka ni pah hrim hrim a, mahse kan boruakin a zir rih lo êm mai" tih leh a pa chuan chhuah a rual nghal a, a kal liam chu kan en tawp ringawt. 

Mazara pawh a ding ngawi deuh reng a, pawn lam a la hawi reng bawk a, a hmel tak hmu chiang thei lo mah ila a thinrim em em tawh paw'n ka hre lo. Zep lovah chuan a pa kha ka khawngaih, khati ang khawp khan a tlawm a, tunah chuan tih tur pawimawh tak ka neiin ka hre ta bawk. Ni e, nakin lawka ka pasal ni mai tur leh ka pa ni mai tur te inkar hi ka siam ṭha ngei tur a ni. Buaipui ngai hmasa zawk chu Mazara a ni a, mahse a rilru chhiat vang leh sual vang a ni lo tih ka hria, huatna in a la hneh rih mai mai a ni. 

Har chhuak hmasa zawkah ṭangin kawngka lam chu ka pan a, pha leh pha lovin ka kalh a, ka chet mial mial lai pawha lo la ding ngawi reng Mazara chu pindanah ka kai lut a, ka tih ang âng chuan a awm tawp a, khuma kan mut dun hnu chuan a hmel ka hmu chiang thei ta. Thinrim hmel a la pu na meuh mai, mahse a hmelah chuan inthiam loh rukna ka hmu hnem zawk tlat. Ka hre chiang alawm, Mazara hian a pa hi a haw tak tak lo. Huat chu a duh ngei a, a pa a nih miau avangin a haw tak tak thei dawn chuang lo tih amah ngei paw'n a inhre vek ang.

"Mazar, i pa laka i awm dan kha a zia lo êm mai, khati ang khan awm tawh suh aw? I pa a nih khâ, ka pa ang paw'n a sual ve hleinem, a thil tih sual avangin i lakah a inthiam lo tih thlengin ka hmu tlang vek asin" a biang dawm pah chuan ka ti sêp sep a, ani erawh a che lo hrim hrim. 

"Kei te chu ka pa'n min tuithlar a nia, nang chu rawn pawh che a tum zawk a, a thil lo tih sual tawh chu theihnghilhsak mai la a ṭhat ka ring. Heti anga awm hi i inhmeh miah lo a nia Mazar, nang chu ka pasal tur; rilru ṭha leh nghet, hmangaihna ngah em em i ni alawm" ka tih leh chuan min rawn en ta chat a, nui chungin a hmuiah ka fawp zeuh a, chhan lêt ka phut lo va, min chhang lêt lo reng bawk. 

"Ka nu nen kan laka a chet duh dan engmah i hre lo, a thil tih sual pawh i hre lo" a rawn ti ram ta hmuk mai, min en chiang nasa mai si a, hre chiang hle lo ila chuan hlauh avangin ka ṭah theih mai ka ring. 

"Nang chuan a tak ngeiin i tawng miau a, i hriat chian ang em emin ka hre chiang lo vang, mahse a uire tih erawh ka hria a ni. Nichina mi kha nangmah i ni lo Mazar, nangmah dik tak chu ngawichawi leh ṭawngmawh; rilru ṭha em em thung si, a tawp khawk chauha thinrim ṭhin alawm i nih" ka ti leh nghal mawlh mawlh a, amaha huatna awm zawng zawng chu kan inneih hma ngeia paih bo sak ka duh a ni.

"Nichin kha chuan maw ṭha taka a biak che paw'n i thinrim khum nghal char char a, a tana a nawm loh dan tur te kha i ngaihtuah ve miah lo em ni? Naktukah nangmah ngeiin hmu leh la, kan inneihnaa lo kal turin sawm ve rawh aw?" ka ngawi mai mai thei tlat lo a ni e. 

"Muhil rawh" ti deuh hmukin a âwmah chuan min pawm bet a, nghet taka kuahin ka mit ka chhing vang vang a, ka thusawi pakhat tal chuan sâwtna nei se ka ti ngawih ngawih, engtik ni ah emaw chuan an pafa inkar a la ṭhat ngei ka ring a, chumi thleng tur chuan a pawimawh ber te zinga mi ka niin ka hria. 

Zing kar hma takah ka harh a, ka ruak deuh huai avangin ka bulah Mazara a mu tawh lo tih ka hre nghal a, amah zawnga mit ka lên chuan pindan tukverh bulah a lo ṭhu ngawi reng a, zan khuain a mu lo a nih ka ring. Ngaihtuah mûk hmel deuh hian a khabe chu a dawm a, pawn lam thlirin mit pawh a khap eih lo va, a ngaihtuah mûk hle tak tak a ni ang. Thawm dim lutuk lovin khum aṭang chuan ka chhuk a, ka thawm hre lo ang maiin a awm a, a hnung lam aṭanga ka va kuah chuan a rawn che ve ta chauh. 

"A la hma, va mu leh rawh" a rawn ti hniam thum sup a, zan lam ai ngawt chuan a aw pawh hriat a nuam tawh khawp alawm, thil tam tak a ngaihtuah dawn tih ka chiang a, thil ṭha tak a ngaihtuah chhuak ngei bawk ang. 

"I mu miah na nge?" hre sa reng mah ila ka zawt lui ta tho va, ka hria tih a hre tlang nghal te pawh a ni mahna min chhang lo hrim hrim a, a nghawnga kut suihin a biang chu ka biangin ka nawr a, a biang ringawt pawh a lo lum nuam leh tawh bik a nih chu! 

"Pang tilum i ngah ê Mazar, i eng pawh hi a lum vekin ka hria" ka ti leh chuan thaw deuh halh hian a rawn inher a, a hmel ka hmu chiang chiah chu mu lo tih a hriat hle a, nui sen senin a hmui chu ka kutin ka nawr tawm chho zeuh a, a ha var tak ka hmuh rualin a rawn nui ve ta suk. 

"Nang tê hian min bawl i tum tihna em ni?" tih leh min pawm kân a rual nghal a, min zo lâwp lawp bawk a, tal pawh ka tum chhe tê eih lo, khuma min nghah lai te chuan hlim avangin ka nui ver ver a, nupa ni teuh tawh viau mah ila nupa nih chu châk tawh tak ka ni. 

"Vawiin chu kan zin lawk dawn nia" a rawn tih chuan phawk deuh hian ka en nghal thuai a, a lo maimitchhing daih thung a, khawiah tak min zinpui tum ang maw, inneih dawn ṭep tawhah leh nghal!

Zing dar 7 pelh hret velah kan tho va, ei rawng ka bawl laiin Mazara chu a chhuak lawk thung a, a chhuah tur thu leh a rei loh tur thu min hrilh sa hrim hrim a, eng nge a tih dawn ka zawt chuang lo, a lo haw ve leh thuai ka ring tawp. Ka thiam ang angin ei rawng ka bawl a, ka mei tuah a fuh lo laklawh a, a khu chuan min ur hrep a, ka mittui pawh a tla phung mai. A chang leh ka hmai ka phih thul, ka che buai ang reng khawp. Ka chawhmeh siam te chu ka têm chhin a, mei khu rim a nam vekin ka hria. 

Dar 8 dâwnah Mazara chu a lo haw a, rin ai tak chuan a lo haw har. Chaw kan ei nghal a, keiin ka ei hleih theih loh laiin ani ve thung chuan a ei mial mial a, mei khu rim a nâm tih a hriat ve vek tho chu ka ring. Chaw kan ei kham a, chhuak turin kan insiam nghal a, min kalpui a tumna ka la zawt duh ta bik chuang lo. A ngai tê bawkin bike-ah chuan kan inphur leh a, mahse kan tlanna lam chu a dang ta daih mai. A patea te khaw lamah kan kal dawn emaw ka ti rilru kha a ni a, khua aṭanga hla lutuk lo khawpui lamah min phur phei daih a, kan tih tur chu ka zawt ta nge nge. 

Ka zawhna lah chu hre lo ang maiin min chhang lawk duh lo leh ta nghal a, khawpui chhunga kan tlan hnu chuan thil kan lei tur thu a sawi duh lêk chauh. Kan tlan zel a, dawr pakhatah hian min luhpui a, puan leh kawr ṭhuina dawr tih ka hre nghal a, chu lai hmuna min hruai chhan chu ka bo tulh tulh thung. A tawpah erawh mo kawr min lei a tum tih ka hre ve ta nge nge a, ka va han inthlahrung mai mai tak. Kan dawr luhna chu Aizawl te angin mo kawr zawrhna dawr a ni lo va, puan ṭhuina dawr nen a inzawm nghal a, Mazara lakah chuan ka inthlahrung khawp mai.

Tlêm tal pawisa nei ila chuan ka pe ngei ang maw le, anni tan pawisa thawh chhuah hnem a harsa si a, ka hnial paw'n a tilui tlat mai bawk si nen ka hak tur mo kawr min leisak chu ka pawm ta tawp. Ka ngaihtuah chiang a, pawm lo ta ila hak tur ka nei miah lo tih ka hre chhuak zawm zat bawk. Hlim lutuk lovin khawpui aṭang chuan kan inphur haw a, Mazara laka ka la inthlahrung vang a ni ber. In kan thlen te chuan ka ngawi reng a, neih thinlung khawnga min leisak a ni ngei awm si a, thleng leh mai te chu ka duh rum rum hial. 

Zanah putea te in lamah kan lêng chho va, pitei chuan mo kawr hak tur ka neih leh neih loh min zawt hlawl a, ka chhan hmain amah zawk chuan hawh tur a hriat thu a rawn sawi leh nghal a, Mazara nen chuan kan inen chiang khawp. Kan haw thlak hnu chuan ka sawi chhuak ta nge nge a, mo kawr min leisak chu thleng leh ka rawt a, a la phal ṭhak lo zui. Ka ngen ngial paw'n a phal duh miah lo va, ka dil beidawng ta ringawt. Kan mut hnu thleng chuan ka awm a nuam lo va, ka muhil thei lawk lo nghe nghe a, ani pawh ka muthilh hma chu a muhil duh bik chuang lo. 

Ni te chu a ral a, kan lo ruahman lâwk ang ngeiin a tawpa tawpah chuan kan inneih ni a lo thleng ta. Zing karah kan innei a, kohhran Hall-ah a ni a, mi pawh kan tam lem lo. Pastor-in min inkut suihtir a, thu kan chham lai te chuan ka zam ang reng. Mi ṭhenkhat chuan ka hlim loh an ring ngei ang, khawpui nula leh mi hausa fanu kha ka ni ve ṭhin miau a, mahse ka hlim lutuk, ka hlim lutuk tak zet. Kan inneih dan hovin awlsam viau mah se inneihna a ni tho tho a, a hlutna a bo chuangin ka hre lo. Chu bakah khawvela ka mipa hmangaih ber nen inneih thutiam kan inchham chhawk hrim hrim te chu hlimna tawk a tling ka ti a, ka hlim lo thei lo a ni. 

Tin, kan inneih ni ah chuan Mazara pa ka hmu bawk a, min rawn be nghe nghe a, Mazaran phal lo se chu a hmel a rawn inlan miah lo vang. Sawi leh sawi hnu, khawpui mite inneih dan nen chuan inperhsan tak a ni. Mazara ṭhian ṭhenkhatte phei chuan fiamthu titak deuh reuh hian vawi hnih kan inruk thute chu an sawi chhuak a, an nui ho dar dar a, huat enah pawh kan en chuang lo. Tlantea mawlh chu a nghal leh a, min chhaih reng a, Mazara a nel bawk nen a awm lai reng paw'n min chhaih hreh lo hrim hrim. Min chhaih dan erawh hrâm tlahawlh rawngkai lam engmah a awm lo va, a thianghlim ti ila a dik ber ang. 

Inneih ruai kil mipui chu rin ai takin kan ṭhahnem phian a, ṭawngkama lawmpuitu kan ngah ang reng a, zing karah innei kher lo ila chuan inkhawm kan tam deuh maithei a ni. Mazara hretu an tam a, khaw chhung mi zawng zawngin an hria emaw a tih theih a, khaw lian vak lo a ni bawk a, a awm tihna lai chen ka nei tho mai. Inneih ruai leh thil dang engkim chu Mazara patea te chhungkua leh putea te chhungkuain an buaipui vek a, an fakawm ka ti thlawt a ni. Putea te ngat phei chu min mi hrang en lohzia a chiang hle a, thisenin inzawm lo mah ila kan inpawh ṭhatzia a lang chiang hle bawkin ka hria.

Kan inneih zan mawlh chu a ni ka dam chhunga ka theihnghilh theih tawh loh tur chu! A ṭhian ṭhenkhat fiamthu duh deuh hlek te chuan lawi-ar an zawng a, min rawn tihbuai tum ang deuh te'n fiamthu an thawh a, Mazaran a khap ngha nghe. Kei erawh ka lo nui khi vun vun reng zel a, ka nui lai a hmu zing lutuk chu mak a ti ta deuh a ni ang

"Khiang rah tla ang mai" min ti phah hial a, ka nuih tawp phah chuang lo hrim hrim a, kan hun tawn mêk chu a hlimawm ve bawk êm a tin ni!

Ka pasal hnena ka thianghlimna ka hlan lai te chuan inchhirna pakhat mah ka nei lo va, hmangaih nawn mawlh mawlh ka duh zawk a, ka rin phak bakin Mazara chu a lo zei daih leh nghal. Kei lah chu eng ka hria nge ni, keimah ang lo takin ka awm a, a nihna takah ama'n min thunen vek zawk maw le. Inneih zana kan hun hman dan ngaihtuah chuan ka sil viau ka rin tehreng nen zing lamah erawh ka pangngai hle thung a, ka rawl hran lo va, chu vang a nia Mazara chu a zei ka tih; hepa hi chuan a tâwk chiah hi a hre vel vek a nih hi! 

(End of Chapter 33)