SUMO DRIVER By Havali Adam (CHAPTER 32)

SUMO DRIVER

By

Havali Adam

Chapter 32

Ka helhhawlh lutuk chu awm dan tur pawh ka hre tawh lo, langsar ni si lovin ka chhungril lam chu a phi deuh chêng ni mai te'n ka hria a, ka fimkhur a ngai viau dawn tih erawh ka hre reng tho. Ka ute sawi ang tak takin ka nu leh pa hriatthiam theih ang zawnga awm ka tum lo bur a, tun ṭum chu eng ang paw'n min hruai lêt tum leh mah se lêt ka tum tawh lo chiang khawp. Ka chhungte an ni a, thisena inzawm kan ni bawk a, thlakhlelhna erawh pakhat mah ka nei tawh lo a tih theih, a chhan chu anmahni'n an zir lo miau a; a bik takin ka nu leh pa te chuan an zir hlawl lo a ni.

Dar zat chu zan dang ang bawkin liam mah se kal muang ka ti thar viau a, mahni chauhin awm mah ila ka nûi ka nui mai. Ka hmaite ka phih vel a, a chang leh ka thawmhnaw inkhung sa ho chu ka endik thul, Mazara nena tlan bo vang vang ka châk tawh lutuk chu ka pangai loh phah a ni ber. Tukverh bulah ka ding a, van lam hawiin Mazara chu ka ngaihtuah rauh rauh a, tluang leh him dam taka a rawn thlen theih nân ka ṭawngṭai ru mawlh mawlh bawk a, Pathian hnenah chuan kawng engkima min kaihruai turin ka dil tel nghe nghe. 

Room aṭanga ka chhuah chuan tuma'n min rawn ngaihven lem lo va, ka pa leh ka nu ngat phei chuan min en lo hrim hrim. U Vli leh u Duhawmi erawh min rawn en zauh zauh a, mahse min en rei lem lo. Ṭanpuitu leh Mazara ka hmangaihzia hrethiama min pui duhtu ka nei ta chu ka lawm ngawih ngawih. A hmate kha chuan tûma'n min puih pawh an tum lo kha a ni a, an lakah ka vui hman hle a nih kha! Nimbu chu ka vel a, keimahin ka ei mial mial a, ka rin ai ka la ei tui phian zui. 

"Zanin chu Numami ka'n riahpui ang e, ka va mu nghal teh ang" u Duhawmin a tih chuan an ṭhutna lam ka hawi nghal vut a, ka nu leh pa chuan an thlawp hmel viau a, ka room lam a pan laiin u Vli pawh chuan

"Kei pawh ka riak ve dawn, kan muho khât tawh alawm le" a lo ti ve leh a, ka ute pahnih awm dan leh ṭawng dan chu ka pate chuan sawiselna pakhat mah an nei lo va, ringhlel  hmel pawh an pu chuang lo, a hmasa zawk ang chiahin ka tlan bo dawn tih leh ka tlan bona turah ka ute'n min pui dawn tih an hre lo a nih mahna. 

Nimbu ka ei zawh chuan ka velna kawr hnawk leh ka eina Plate vel chu ka silfai zui nghal a, ka pa chu ka en zauh a, min lo en chiang khawp mai. Zanin chu zan dang ang lo takin zu a in lo ve teh mial a, ka nu nen thil an la sawi dun char char a, sual viau mah se zu in tawh lo se ka ti ngawt mai. Zu in duh ngai reng reng lo ṭhin khan a in ta chu a ni si a, a in reng a nih chuan engtik ni ah emaw a la chhiatpui ngei ang. Ka pa ni a, a thisen ka ni a, hmangaihna leh khawngaihna te chu ka la nei ve tho, mahse ka thusawi a awih dawn chuang lo va, zilh ka tum lo law law. 

"An hriat vaih chuan a pawi thui a ni mai, u Mazara a rawn chhuk mék bawk si. Lo riah ve phet tum lo mai tur che a nia, min ringhlel ang tih ka hlau" tiin room chhunga ka luh lai chuan u Duhawmin u Vli a lo hrilh hlak hlak a, a mi biak ber erawh chuan a ngaihsak loh hmel khawp.

"A ho em mai, an hre bik kher nâng, ka pa lah saw zanin takah zu a in lo leh nghal a, kan fimkhur a ngai viau dawn niin a lang" u Vli chuan a lo ti mai a, a thil sawi chu a dik chiah, kan fimkhur a ngai viau ang.

"Lo kal teh Numam, thil zawh tur che ka ngah mai" min hmuh rualin min rawn biak zawm zat a, kawngka chu kharin ka kalh ṭha nghal a, ka ute ṭhutna khum lam chu ka pan phei ve nghal mai bawk.

"U Mazara hi i u miah lo tak tak em ni? U Duhawmin a lo sawi a, ngaihtuah chiang rawh. In awm dun hnuah u ngei ngei ang che, u Duhawmi ai paw'n a upa daih zawk a nia, amah tak paw'n u a lo duh maithei asin" rawn titu chu u Vli bawk a ni.

"Ka thiam ringawt hleinem, vawi khat chu ka u ve zuai tawh a, mahse keimah zawk ka buai vek. Ka awm thiam lo, u kher lova a hming koh hi nuam ka ti daih zawk" ka tih chuan an lo chek dun tlak tlak a, ka nui tawp ringawt. 

"U Mazara nen in inhmuh leh dawn meuh chuan i nuiin i ṭawng pawh a pangngai ta alawm, i luhlulzia ka pa'n a hriat hunah chuan a beidawn ve mai ka ring. Hmanni ah kei pawh min zilh hrep alawm, tun lai chu ka pa rilru hi a dik lo tak zet, zu in a ching tawh bawk si" u Vli nen u Duhawmi chu kan en kar a, ka pa zilh dan chu kan hre châk dun hle a nih ka ring.

"Rinawma nena inru lo tur te'n min hrilh luam a, kan inruk chuan kan inneih a phal loh tur thu thleng a sawi leh ta nghal a, khawtlanga hmingchhiat a duh loh thute a sawi kai zel a, zu a in vang a ni maithei, a thusawi pakhat mah ka uksak ta lem lo" u Duhawmi chuan a rawn tih zawm zat a, ka pa rilru tur chu ka hrethiam ta mai.

Ka ute pahnih chuan a laiah min muttir a, zawhna chi hrang hrang min zawt sep sep a, kan ṭawng ring lo hlawm khawp. Mazara nena kan inngaihzawn chhoh ṭan dan te min zawt ta zel a, ka ute mah ni se chuti anga han sawi tawp chu a zahthlak ve reng. Mazara chanchin leh ka duh chhan min zawt leh a, chutah erawh ka insum buai lo chiang hle. Mipa azawnga mipa famkim ber ang maia ka hmuh thu ka sawi chiah chu min nam deuh sawk a, an awih lo dun lutuk chu a nuihzat thlak zawk.

"Westlife thlalak hawn i duh tawh miah loh chhan kha u Mazara nen in inngaihzawn vang a ni chiang lutuk, in inupat hleih mai sia maw, mahse u Mazar hi kei chu hmeichhe tana innghahna tlâk tak a nih duh hmel ka ti; ka hre chiang hman lutuk lo ná a!" u Vli chuan a rawn ti ta nge nge a, a thusawi tawp ber chuan min tihlim ang reng. 

"Thu ringawt hian ka tana a ṭhatzia leh a hlutzia a sawifiah seng lo zawk, chu vangin ka sawi tawh lo ang. Kei tak phei chuan ka pa min rawn zawn hmuh theih lohna tura tlan bo daih ka duh hial a, mahse Mazara thu tlukna ang ânga awm ka tum thung" tiin thawk ka la halh a, a tua mah chu kan ṭawng chhunzawm tawh lem lo. 

Kan pathum chuan kan mu meng kar a, hun pawh a kal hnem ta hle. Thawm chu a reh dak a, ka nu leh pa ṭawng thawm hriat tur a awm tawh meuh lo bawk. U Vli chu khum aṭanga thovin room kawngka chu a va hawng a, a tih tur awm ang chu ka hrethiam nghal mai. Minute 1 hnu velah a lo lut leh a, khuma a rawn lawn kai rualin ka pate an mut tawh thu a sawi nghal sep a, thawm kan dim tlang hlawm hle bawk a, dim tur kan ni hrim hrim zawk maw le.

Ka pate room hi ka room nen a inhnaih lutuk lo va, leh lam kawng zawng tak chuan a ṭha letling phian. A hmaa Mazara nen kan inhmuh chang leh kan inruk dawn pawh khan ka pate hriat ai chuan ka ute pahnih hriat ka hlau ber ṭhin, a chhan chu kan room a inhnaih hlawm em em a, a chang chuan ṭawng thlengin kan inhre pawh vek thei ṭhin a, mahse tun ṭuma Mazara zui leh ka tumna kawngah erawh min pui ve ve dawn a, ka rilru pawh a nuam huai thei.

Dar 12 a pel vel chiah tihah ka room tukverh chu pawn lam aṭang a rawn ri a, ka hawi hmasa ber a, thla hnih hnuah a tak ngeiin Mazara hmel ka hmu leh thei chu ka lawm tak zet. Ka hlim lutuk chu ka ṭah a chhuak hial a, mahse ka insum hram hram thung. Ṭah hun a ni lo va, ṭawng vak hun pawh a ni chuang lo. Tukverh chu thawm dim tak, hmanhmawh ru pah tho siin ka va hawng a, rang zet hian a rawn lut a, min kuah nghal chawt bawk. 

Ka ute pahnih a hmu thut chu a meng buai deuh nâk a, mahse ka ṭawng ngai lovin u Vli leh u Duhawmi chuan inruk kan tum lehna kawnga min puih tur thu an lo hrilh nghal zung zung a, Mazara pawh a thaw a veng deuh huaiin ka hria. A hmasa zawka kan inruk ang bawkin Mazara chuan min paw leh a, u Vli leh u Duhawmi erawh an rawn chhuak ve tawh lo va, room tukverh aṭang min lo en reng thung. Kan in kawt gate zawn kan thlen chuan ka pate room a êng ta pup mai, ka va han hlauthawng tak em. 

"Nangni pahnih kha! Ding nghal rawh u!" rawn ti vin ṭhawttu ka pa lam chu Mazara nen kan hawi thuai a, gate chu kan la hawng hman lo vel chiah chiah a, Mazara hnung aṭang chuan ka tawlh thla thuai bawk. 

"In zak miah lo em ni? Inruk nawn leh te in lo tum khanglanga maw!?" ti vin hrawkin ka pa chu in kawtah a rawn chhuak a, ka ute pahnih leh ka nu chuan an lo zui chhuak nghal bawk a, kei leh Mazara erawh kan la ngawi reng thung.

"HMINGTHANPUI, Mazara phenah khan ding hlek suh! Lo kal nghal rawh, nang pa pawh kha! Jail tan leh i la duh cheu em ni? I va huai sârh sârh ve le, i phu tâwk hre rawh ka ti a ni lo'm ni?" ka pa hlir chu a la ṭawng a, a kutah zu bur a hum ran a, a ṭawng zawi lo khawp mai.

"Ka pa" u Duhawmin a rawn ti dek dek a, ka pa chuan kutzungchala kawk nghalin ṭawng lo tur chuan a khap a, thil hre chhuak thutin Mazara hmel chu ka en chho thuai a, ka duh miah loh ka hmu ta; a rilru chapona a chhuak tih hai theih mawlh a ni ta lo. 

"Ka ringhlel unau reng che u a ni; HMINGTHANPUII bula riah ve ve in tum dan aṭang khan. Nangni pawh in zak lo hle mai, zak lo tak in ni" ka pa lam chu ka hawi leh nghal a, rum zet hian ka ute pahnih chu a lo melh a, a ṭawng vin lutuk chu ṭhenawm kan nei hnai ang tih a hlauhawm zawk. 

"Lo phei nghal rawh ka ti a ni lo'm ni HMINGTHANPUI"? ka pa bawk chuan a rawn ti vin leh ṭhawt a, Mazara lam hawi chhoh ka tum chu ka bulah a lo ding tawh reng reng lo, amah zawngin mit ka len nghal ruai a, ka hmuh meuh chuan gate bul kawngpuia a bike hunna lam a lo pan daih tawh. 

"Lo kal mai ta che Numam, a duh tak tak lohzia che chu a hriat reng alawm kha, a fiam vel mai mai che tih hrethiam tawh rawh" ka nu chuan a lo ti ve ta lang lâng a, Mazara chet dan mawlh chuan min tihamhaih a, ka kâ chu a chilh vekin ka hria.

Chutia Mazara lam ka hawi reng lai chuan Bike a tirum vut vut a, min hruai lova a tlan haw daih chu ka hlau ngawih ngawih. Mittui tling pamin ka thlir reng a, kan in lama a rawn tlan chiah chu ka danglam nghal vek thei. Gate chu awlsam tê hian a nam hawng a, kan in Compound-ah a rawn tlan lut a, a chet dan chu tu paw'n mak kan ti vek a nih hmel. Ka chhungte tak ngial paw'n an en ṭhap a, ka pa meuh pawh thinrim takin a ṭawng lawng lawng tawh lo reng reng. Mazara chet dan chu a thlir tawp a, mak a ti hle a ni ang.

"Ka rualin i lo kal dawn em?" Mazara chuan a rawn ti nghet charh a, a hmelah chuan thinrimna leh chapona hlir ka hmu a, min hnaih deuhin bike nen ka bulah a ding reng a, a zawhna chu chhan nghal mai ka duh tehreng nen ka la thei miah lo zui.

"Kal hlek suh HMINGTHANPUI" Mazara lama ka pen rualin ka pa chu a lo ṭawng chhuak leh ta phiar phiar mai, a zu bur ken chu a vawm keh pawp a, ka nu leh ka ute pahnih chu an lo ṭe tuar nghe nghe. 

"I zuia i kal lui a nih chuan nang leh kei hian inzawmna kan nei tawh lo vang, ka tuithlar nghal ang che. I pa ka ni a, ka thusawi hi zawm tawp rawh. Khati ang mihring bulah khan awm turin ka duh lo che a, i zui lui a nih chuan i thû thu a ni tawh e" ka pa bawk chuan a ti leh a, za lo zetin ka nui ta hak. 

"Heti ang em em hi i nih ka ring ngai lo ka pa, zanin la lâ hian nangmah vekin ka pa i nihna i ṭhiat sawm ta a ni. A chhan chu khawvela ka mipa hmangaih ber, a eizawnna avang leh thingtlangmi a nih avanga i hmuhsit em em hi ka zui dawn tlat a, min hmangaih miah lo tute bula chen reng ai chuan a thlakhlelh awm zawk a ni" ka ti ve ta salh salh a, ka nui ve tak ná a, ka ṭah a chhuak ru em em thung.

"HMINGTHANPUI le! I va han zak lo pang pang em. Kha mihring kha i zui lui a nih chuan i hlim rei tak tak dawn chuang lo, ka tuithlar che pawh hlau lovin i zui luih tur thu i sawi vela maw!?" a rawn tih chuan ka insum zo leh ta bik lo.

"Ka zui dawn tih ka sawi nawn leh ang ka pa, in bula awm thlang lova Mazara ka zui hi engtikah mah ka inchhir ngai lo vang, Mazara hi ka ring tâwk em em bawk. I duh chuan min tuithlar thei e, mahse i inchhir leh si ang tih mawlh ka hlau" ka ṭawng zo chiah tihah ka pa chuan

"Chuti fakâuva i zui châk a nih te chuan kal nghal r'u, ka hmuh phak lovah kal vang vang r'u, zak thei lo leh lutuk mai. Hre rawh HMINGTHANPUI, ka lak aṭang engmah i dawng ngai tawh lo ang a, i chang bawk hek lo ang. Ka fanu pawh i ni hrep tawh lo ve, thlawk bo nghal rawh u" a rawn ti leh hrawk a, thinrim lutukin Mazara hnungah chuan ka lawn ta vat. 

Nghet zeta a kawng ka kuah hnu chuan bike a tirum a, a tlan chhuak zui nghal bawk. Kan in kan hlat tial tial a, ka pa thusawi zawng zawng chu ka bengah a ri nawn tluk tluk a, ka thu hriat tawh zawng zawngah a la rapthlak ber ang. Pain a fanu min tuithlar chu a nia, engtik ni ah emaw chuan a la inchhir dawn khawp. Mazara chu kawngpui sirah a ding a, ka bag chu bike hnungah bawk a ṭawng leh a, a rawn chuan ṭhat leh lai hnuah pawh kan inbe lo hrim hrim, min bia pawh ni se ka chhang kher lo maithei a ni.

Kan tlan chhuak leh chiah chu ka rilru a rawn no thut a, ka pa ngeiin min tuithlar ta chu a nâ ve thlawt a ni. Mazara chu kuah vakin ka ṭap chhuak ta nge nge a, a kawr chu ka hmer tawn tawn a, ri meuhin ka ṭap chhuak hawm hawm a, Mazara erawh a tlan ngaiin a la tlan reng a, min hnem pawh a tum hran lo. A nihna takah chuan min hnem tum lo law law se ka duh daih zawk a, in thlen hmaa ka ṭah chhuak zawng zawng paih bo chu ka duh bawk. Thui fê kan tlan hnu chuan ka pangngai chho ta tial tial a, Mazara lakah chuan ka inthlahrung thar ta hle. 

Pasal um ngam ve ûai tawh si ka'n ṭahkhum chiam chu a ni si a, engtin nge ngaihtuahna a lo sen hman ang le tih te ka rilruah a lo lang a, nuam a tih bik ka ring lo. Keimah leh keimah chu ka inngaihtuah rauh rauh a, huaisen ka inti ve thlawt a ni. Ka chhungte bula chen ai Mazara bula chen ka la thlang hram a, hmangaihna chakzia leh ropuizia chuan min hneh ta ber zawk a, zep lovah chuan ka pa'n min tuithlar mah se zalen intihna chen ka nei deuh tlat. Hmangaihna lam chu thu hran ni se ka luhlul a kal tluang laklawh a, Mazara ka zui lui chu inchhirna pakhat mah neih ka tum lo bur.

Khaw chhung kan tlan luh chuan khua a var ṭan titih tawh a, ka rilruah hlimna bak a awm tawh lo reng reng. A mak lutuk, hmangaih ber te bula ka chen kumkhua tawh dawn vangte pawh a ni maithei. Khaw awm dan aṭang chuan zing lam dar 4 bawr vel a nih ka ring a, tun ṭum chu kan tlan chak lo bawk a, kan inruk hmasak ai kan thleng tlai hretin ka hria. Ruah a sur tawh lo bawk nen in chhunga kan luh rualin pindan lam kan pan nghal a, Mazara chu min mut ṭhat tir hmasa tê têin ka bulah a rawn inthawlh zui ve nghal bawk. 

"Ka tihpalh" hniam ruih hian a ti sup a, a lam hawi zawngin ka inlet thuai a, inthiam loh hmel hi a lo pu tak tak a, ka awm a nuam bik ta miah lo, inthiam lohna chhan tur a nei lo va, ka pa ṭawngkhum dan zawng zawng avangin ka inthiam lo hle zawk a ni. 

"Insum hman lovin ka chapona kha ka khap dai zo lo va, i hrilhhai hmel khan ka chet dan dik lohzia min hriat chhuahtir nghal a ni. Ka ruala lo kal kha duh lo ta la chu ka inchhir kumkhua ngei ang, mahse min zui duh hi ka lawm" amah bawk chuan a rawn ti leh nghal a, ṭum dang ang lo takin a ṭawng sei ve phian mai.

Ka khabe chawi kangin min fawp vawng vawng a, kan inthlah leh thei ta mai lo. Ka kawng zawnah a kut a rawn rawlh a, ka mutna aṭanga min chawi kâng zui nghalin a chung lamah min bawh tir zawm zat a, kan hmui chu a la inbawh thuah mawlh mawlh thung. Kei paw'n ka thiam ang tawkin ka chhang lêt ve buan buan a, ka biang tawn tawna a dawm ang chiahin a biang ka dawm ve bawk. Ka mur chhuak vek a, ka danglam nasa lutuk chu a awihawm loh zawk, dik tak chuan Mazara nena hmangaihna chen dun chu ka châk tawh tak zet. 

Ka rilru leh taksa chu ka thunun theih piah lam thil vek a ni tawh a, awihawm loh khawpa nasain ka zauthau a, ka rilruin fim lai reng a nei tawh lo va, ka mamawh leh ka duh ber chu Mazara a ni tih ka hre chiang hle. Chhia leh ṭha hriatna te chu nei ve teh mah ila hman ngaihna reng ka hre lo, eng nge chhiaa eng nge ṭha tih ngaihtuah thei lêk lova min siam mêktu Mazara chu ka hmangaih a, a taah min siam se ka ti ngawih ngawih tawh a ni ber. Vawi leh khatah min leh thal thut a, min fawp bawrh bawrh a, duhthaw dun tak kan ni.

Ka âwm lamah a hmui thiam taka a chettir chiah chu ka ang hlawi hlawi a, ka er tawn tawn a, chuti ang em ema thil nuam leh dangdai chu ka vawi khat tawnna a ni a, ka awm dan leh ka lo dawnsawn dan zahpuiawm viau mah se ka inthunun hman thlawt lo. Insum theihna tlachham tih hriat zet hian Mazara chuan min sawngbawl vel a, engti ang fakauva nuam nge a nih chu ka sawifiah thiam phak bak a ni. Ka hmuia a fawh ngawng ngawng hnu chuan ka sirah a let thla a, kan thaw lak dan chu a la dik lo nasa dun khawp.

"Min hrethiam teh, kei hi insum hram hram a ngai" a lam chu ka hawi nghal a, min lo en reng a, ka âwm lam a en rual chuan kawr ka ha lo tih ka hre chhuak a, rang zetin ka inkhuh ṭha thuai a, ka che vel hrim hrim chu min en duh tlawk tlawk hle. 

"Hmangaihna ka chenpui dawn che a nih chuan ka nupui i nih hnuah chauh a ni ang, thil sual tih belh ka duh tawh lo" a rawn ti thum leh chhal a, a ṭawng zawng ringawt pawh chuan a insum nasatzia leh a inseh ruhzia ka hmu thei.

"Engati nge i nihna dik tak hi ka chhungte hian an hmuh thiam loh le? Hre chiang se la chu nang nena kan inkawp leh kan inneih an phal ngei awm si a, mahse tunah chuan ka chhungte ti thei ringawt pawh ka ni tawh lo" ka ti chhuak ve ta sep a, Mazara rilru ṭhatzia hre ngat se chuan an pawm dawn tih ka chiang. 

"I kawr ha la, ka lo kuah teh ang che" a tih chuan a sawi nawn ngai lovin ka inha ṭha thuai thuai a, ka inhak lai chuan min lo thlir reng a, min tizam lek lêk hial a, ka inha ṭha fel chiah chu a lama ka tawlh phei pawh a ngai lo, min kuah rang khawp mai. 

"I taksa mawi leh no zet hian min ti â thei tak ngial dawn, ka nupui i nih hma chu hmuh leh ka duh tawh lo, insum theihna ka tlachham ang tih ka hlau a ni" nghet zeta min kuah pah chuan a ti leh sup a, a kâ ngei aṭanga ka taksa mawi a tih thu hriat chu nuam ka ti lutuk tak zet. 

"Kan innei ang a, ka nupui i ni ang a, chumi hunah chuan nupa kan nih ang takin ka che tawh ang" a lam chu ka hawi chho a, tlema tawlh chho deuhin a khabe phirah chuan ka han fawp zeuh a, a rawn hawi thla reng hle.

"Ka insum theihna hi fiah tum suh Numam, ka insum thei lo tak tak ang tih ka hlau teh a nia" a nui miah lo va, ka dul zawna thil che awm chuan chawp leh chilhin min tizam nghal a, ka chil ka lem ri dawk ringawt. 

"Palai ka tir ang a, i pa paw'n a lo phal tawh em ang chu!" a rawn tih leh chuan ka ṭang nghal ṭun a, palai tirh leh a la tum ṭalh chu ka hrethiam lo, khati khawp khan ka pa'n ṭawngkam mawi lo a hman khum a, engtin nge palai tirh a la tum theih zawk!?

"Ni lo Mazar, innei tawp tawh mai ang. Ka pa hian kan inneih a phal ngai dawn chuang lo, thil hriat hmaih i nei a ni. Palai tirh a ngai reng reng lo, a chhan chu ka pa'n min tuithlar tawh tlat, min tuithlar tih i hriat ve vek khâ" ka tih zawm nghal mawlh mawlh a, palai tirh a tum lui phet ang tih ka hlau. 

"Mizo dan taka neih che ka duh alawm Numam, i chhungte remtih leh tih loh chu thu hran ni se, palai tirh tho ka tum" a aw chu a dam dap rualin a nghet ru charh thung a, a sawi anga thil tih a tum dawn thova ka hriat avangin ka hnial buai duh ta lo law law. 

"Ka rinna zawng zawng neitu chu nangmah chiah i ni Mazar, ka hmangaih em em bawk che, mahse buaina dang kan tawk leh ang tih ka hlau êm a tin ni!" ka tih chuan rawn kun hniamin min fawp vang vang a, rei erawh min fawp lo va, kan chal chu a insiktir zawm zat bawk. 

"I nât ka phal lo va, i rilru a hah ka phal bawk lo va, keini pahnih inṭhen hran theihna tur thil ka tih ring duh suh, engtikah mah kan inṭhen tawh dawn lo" ril lutuka a tih chuan ka lairil thlengin a fan chhuak vek ni mai hian ka hria a, a thusawi chu ka awih lo phal lo tawp a ni ber.

A âwmah nghet zetin min kuah bet ran a, ka chhip sam chu a fawp leh zauh zauh ṭhin a, mahse ka dul zawna mi chuan ka awm a la tinuam thei chiah lo. Ka nek deuh dawn lahin min do run bawk si a, a insum ve nasa hle chuan ka hria. A tua mah chu kan ṭawng tawh lo va, ngawi dun reng mah ila kan rilru erawh a va inpawh si êm. Min hmangaih thu a kâ aṭang a la chhuak ve miah lo va, min hmangaih tih erawh ka hre chiang em em thung a, a duh hunah chuan a sawi ve mai turah ka ngai. 

Zingah chuan dar 8 bawr velah kan harh a, zan lama kan mut ang ângin kan lo la mu a, thawh mai ka tum chu min kuah bet ta tlat. Thawh ka tum chhan pawh mi an lo luh thut ka hlauh vang a ni pakhat a, thingtlang lamah hi chuan ṭhenawm khawveng an la inpawh ṭha em em a, ṭhenawmte ina len mai hi an awlsam ṭhin. Chu bakah ka mut a chhuak tawh lo hrim hrim a, mahse thawh ka tum lui ngial paw'n ka thawh a phal chuang lo. 

A hmel chu chiang takin ka en reng a, kan inngaihzawn tirh vel lai ai khan a cher ta deuhin ka hria. Tin, a chal sirah chuan hliam neihna hnu ni awm tak a awm bawk a, chu erawh Jail a tan lai vela mi a nih ka ring nghal hmiah. Keimah avangin Jail hial a tang a, ka laka beidawng duh mai lovin mipa a nihzia chu a thutiam ang ngeiin a rawn hlen a, min ru nawn leh ta reng bawk. Vawi tam tak inruk ngai dawn mah se pawi tihna ka nei lo, zui ka tum zel tho. Tunah erawh ka pa'n min tuithlar tawh a, a thisen ka nihna aṭang min min paih chhuak a, chu thil chu engtikah mah ka thluak chhung aṭang ka nawt reh thei ngai tawh lo ang.

Ka pa ṭawng dan zawng zawng chu ka ngaihtuah nawn leh ṭhin a, ka mipa hmangaih bula cheng kumkhua tura ka zalen phah rualin mak ka la ti reng. Film-ah te chuan ka hmuh fô va, mahse a tak ngeiin ka la tawng ngai lo. Chutah ka pa ngeiin min tuithlar a, a hnen aṭang engmah ka beisei a thian tawh loh thu a sawi leh ta zel a, Mazara bul ni lo se chuan ka rilru a nâ ngawt ang. Amaherawhchu engkima ka rinchhan leh ka dah pawimawh em em, ka tana engkim huamtu leh ka hmangaih ngawih ngawih mihring Mazara ka nei tawh tlat a, ka hlim ngei dawn tih ka chiang.

Rei tawk fâng khuma kan awm hnu chuan kan tho chhuak ve thei ta hram a, ei rawng kan bawl dun zui nghal a, a nuam ang reng phian. Chaw a chhum laiin chawhmeh tur ka lo siam thung a, Aizawl lama kan in angin Gas a awm lo va, mahse chu chu harsatna ah ka ngai hran lo. Chawhmeh ka siam lai chuan kawm thlangah a chhuk a, eng nge a tih dawn ka en zui nghal zat a, Phuihnam lawh a tum lek chu niin, ka beisei loh deuha a che chu ka nuih ringawt phah. Ka en tih hre miah lovin a rawn chho leh a, a tawnzau dum hak chu a inhmeh hle bawk.

Darkar khat hnu velah tukṭhuan kan ei a, a thil rawt mawlh chu a tui ta a ni. Bahkhawr te, purun var te, sawhthing te, purun sen leh hmarcha tam lutuk lo a rawt pawlh nuaih a, a thak dan a tawk chiah bawk si nen tui ti tak ka ni. Chawhmeh ni se chaw chhum hmin thar nen a inhmeh em em a, chawhmeh ṭhing te hlei hlei chu tui ka ti leh ta nghal a, amah pawh a nui tawp ringawt. A nui mai mai ngai lo va, a nui khât hle ti ila ka sawi sual lo zawk ang. A nuih hi chuan a hlim thawkhat tih a hriat ṭhin viau bawk a, kan chaw ei lai chuan a nui suk suk a, a rilru a hahdamin a hlim ve hle a nih ka ring. 

Chhunah chuan engmah kan ti dawn lo emaw ka ti a, khaw ṭhenawma a putea te inah kan va lêng phei leh a, kan thusawi erawh a hmaa kan sawi ang bawk a ni. Ka ngawi reng duh tawh bik lo va, nelawm takin ka ṭawng ve zeuh zeuh a, an fanu nen chuan kan inkawm thei viau mai. Kei ai kum hnihin a naupang a, min u lo tura ka tih paw'n min u lui ta tlat a, pawi ka ti lo ta law law. Thil hriat chhuah ka neih phah nghe nghe a, Mazara chu u ka'n tum ṭhin a, ka awm dan a dik hlei thei thlawt lo. Keimah zawk ka lai ṭût a, ka u rual daih chu a ni asin maw le.

"U Mazar" kan khua ni tawh mai tur lam pana kan tlan lai chuan ka ti ta nge nge a, a kawngah ka hmer vak a, ka sa chhuak vekin ka hre hial a, chuti ang em ema ka awm chu ka ring bik lo, ani lah chuan kawng sirah min la dinpui zui.

"Engati nge min u?" ka mit taka en reng chung hian a rawn ti a, thinrim hmel a pu lo va, hlim hmel pawh a pu chuang lo va, a hmel chu a pangngai deuh tawp a, a zawhna erawh ka chhang ta lo, chhan mai dan tur ka hre rih lo tlat. 

"A hma zawngin min u ngai si lo" a tih leh chuan ka thaw halh a, a hmel pawh en reng duh tawh lovin a âwm chu ka en daih a, a nghawnga ṭhi chu ka en zawm nghal zat bawk a, a zawhna chu ka chhan ngei a ngai tih ka hria.

"U Vli leh u Duhawmi khan u tur chein min ti alawm, an sawi dik reng, mahse maw ka u thiam lo che Mazar. U kher i duh em? I duh chuan ka thiam chawp ve thei mai ang a, mahse ka thiam har ka ring" ka tih chuan min en chhuk run a, a hma aiin a meng rum deuh sawt leh nghal.

"I unaunu te'n min u avanga min u tur i ni ringawt lo" ti nghutin bike-ah chuan a lawn a, u chu a duh chiah lovin ka hria, nge ka hre sual zawk, ni lo, a awm dan aṭang chuan u a duh lo chiang a ni.

"Ka u dawn lo che aw?" tih leh a hnunga lawn ka rual nghal a, ding kâng deuhin a hmai bulah chuan ka va thlek hâ a, ka lam a rawn hawi chiah chu kan hmui a insi deuh thaw a ni nghal der.

"I va'n fel tak! U i duh loh tih ka hrethiam tawh, ka thaw a veng hawk mai" ka ti leh nghal zawt zawt a, a mitmeng aṭang chuan ka hmu thiam vek tak tak alawm, ka ṭhut ṭhat hnu chuan a rawn nui ri vel a nih chu!

"Inneih thuai teh ang" a thusawi chu a tawi tík têk khawp mai, mahse min tihlim leh em em tawh a, kei ang bawka inneih a châk ve tawh chu ka lawm a, ka hlimna zawng zawng awmna chu amah va'n ni chiang tak êm. 

In kan thlen te chuan mi mawl ang maiin ka nui reng a, Mazara erawh a nui tawh lem lo va, ka nui tih pawh a hre kher lo vang. Tih tur a awm em em lo bawk nen pindanah chuan ka lut a, Mazara chuan a kawr a lo hlip mêk a, a tawnzau hak chu a va han inhmeh chiang kuang tak em. A taksa a lianin a hrawl ṭha si a, a ban bul te chu a chhah lian em em vek a, a sek dan te chu a tawk chiah vel vek bawk. Ka en duh lutuk a ni mahna a nui suk a, kei chuan nuih nachang pawh ka hre lo. A ban bul vei lama ser thar lam tak awm chuan ka mit a la tlat a, ka nuih a za lo zual hle.

"Engati nge Mazar?" tiin a ban bula ser nât hmel zet chu ka khawih a, ka rin dan chuan thla tam a la ral miah lo vang, a chhan chu hliam dam hlim ang maiin a langsar a, ka zawhna lah chu chhan a tum lo emaw ni!

"Engmah a ni lo" tia kal sawn a tum chuan ka pawt ding thuai a, thutak zeta ka en ang bawkin thutak deuh hian min rawn en ve nghal a, eng pawh ni se a chhan tal ka hre duh, mahse a sawi hreh hmel tlata hriatna ka nei thung.

"Police pakhat khan min kap palh alawm maw le, min ngaihtuah phah suh, Jail-a ka awm chhung khan a dam leh vek hman" zep nei miah lova a rawn ti chiah chu ka tawp pup pup a, khawngaih avangin ka ṭah a chhuak a ni ber.

"I banah silaiin an kap a, Jail i tan phah bawk a, a chhan chu keimah vang vek a ni. Ngaihtuah lo tur chein min ti a maw!?" ka aw chu thunun ka tum tehreng nen ka thunun hman lo va, hriat a nuam lo lam lek lek maithei.

"Ngaithla teh Numam, thil ho têa ṭah hi bansan turin ka duh che. Ka bana hliam ser awm te, Jail tan te pawh a ni ang, nang ka neih theihna tur che a nih phawt a ho tham lutuk, nangmah hi i pawimawh ber" ka dara a rawn chelh rual chuan ka kuah nghal a, ani paw'n min lo kuah let ve mai bawk.

"Ka ngaihtuah che alawm" ka ti sep a, min hrilh zawh chiah vang nge pawh ka hre lo, ka ṭah chhuak chu a tawp hmak a, mahse ka la ngaihtuah em em thung a, hmeichhe ṭah belh deuh ang maia ṭah chhen chu kei paw'n ka tum bik lo, ka ning ve tho. 

"Kan awm dun tawh hi maw le, engtikah mah kan awm hrang tawh dawn hleinem, lo kal rawh, thing eh dan ka zirtir ang che" tiin pindan aṭang chuan min hruai chhuak a, ka rilru chu a pangngai ve leh thuai a, a bulah hi chuan ka lungngaiin ka thinrim rei tak tak thei lo ṭhin a ni e.

Thing chu kan ek dun ta ngei a, eh min zirtir dawn emaw tih laiin tawlailirah min ṭhuttir leh daih lawi a, a thing eh nawi sa ho chu chawhtawlhah ka dah zel a, chu chauh chu ka tih a phal zawk maw le. A che vel hrim hrim chu hmuhnawm ti takin ka thlir reng a, thingte chu a ek phel hneh riap riap khawp mai. Minute rei lo tê ah fâk tam tak a ek hman a, thing ek ka hmuh tawhah chuan a la hmuhnawm ber ang. A thlan a rawn chhuak ṭan a, in chhunga luh ka rawt thuai a, a thingpui in tur tal erawh ka lum a phal ve tawh em em ka ring.

In chhunga kan luh chuan mei ka chhem alh nghal a, mei a lo la mit chiah lo va, ka chhem alh har lo khawp. Tui lum ka chhuan lai chuan min kuai her a, min rawn fawp ringawt a nih chu! Chuti anga a chet ka beisei lo va, mahse ka awm mai mai thei bik chuang lo. A thlan pawh a tla tawh lo va, a thaw pawh a sa tawh lo va, a lo inleih dai hman a ni maithei. Kan awm hran hnu chuan ka bulah a ṭhu ngawi reng a, ngawi ngul ṭhin mah se ka thla a muang em em tho. In kawta motor ding thawm kan hriat hnu rei vak lovah ka pa hmel kan hmu ta hlawl mai, eng nge lo tih a tum ka hre hauh lo.

"Lo haw leh zawk rawh Numam, hrehawm i tawrha hun harsa i tawh ka phal ngâng lo a ni" ka pa aw chu zan lam ang lo takin a pangngai hle a, ka hming pum ni lova min ko ringawt pawh chu a mak zawk, mahse lêt leh ka tum tawh lo nasa.

"Ni lo, ka lo lêt tawh dawn lo, duh ka thlang fel tawh a ni. Mazaran palai lo tirh a tum a, khawngaihin lo dawngsawng ṭha ang che" ka ti ta zawk a, hlauhthawnna nei miah lova ka ṭawng chhuak thei chu ka lawm hle.

"HMINGTHANPUI, tun chiah hi ka sawi leh ang. Min zui haw rawh, min zui haw lova thingtlangmi pasala neih i la duh ṭâlh a nih chuan kan inzawmna ka chhu chat tak tak, i hria em?" ti vin hrawkin a bula savun ṭhutthleng chu a chhuih pawp a, Mazara pawh a kut a hum ruh danah a thinrim tih ka hrethiam nghal. 

"Keimah bawk hian ka hruai haw luih che a ngai leh dawn a nih hmel" tih leh kan lama rawn pen phei pâwk pawk chu a rual a, kan inhlat lutuk tawh loh avangin zu rim a nam tih ka hre thei a, ka ban rawn vawn a tum chiah chu a thal ta tawp mai. 

"Ka duh loh danin min chettir tawh suh pu Sang, ka nupui ni mai tur venhim ka duh luata kut ka thlak che erawh min hrethiam dawn nia" Mazara aw chu dam ang deuhin lang mah se a khauh hmuk a, ka pa pawh a tho ṭuah ṭuah a, nâ a tih hmel khawp. 

"A ṭha e, nangni pahnih phiangsen vang hian ka buai tawh lo vang, in duh dûh danin awm mawlh teh u. Hre rawh HMINGTHANPUI, ka fanu i ni tawh lo ve, inzawmna pakhat mah kan nei tawh lo, palai pawh rawn tirh tum reng reng suh u" ti vin phiar phiarin ka pa chu a chhuak a, motor-a a tlan chhuak thawm pawh ka hre reng, ngaihsak nachang erawh ka hre tawh lo hrim hrim.

"Palai tirh buai a ṭul ta lovin ka hria, i pa kha hnek ka tum em em lo, a zia lo ngawt mai" Mazara aw ka hriat rual chuan ka harh chhuak nghal a, a hmelah inthiam loh hmel a lang tak tak a, ka kuah tawp ringawt.

"Mazar, i nupui nih vat ka duh, a hrehawm em mai" ka ti ta thlawt a, a tawpa tawpah chuan ka ṭap chhuak leh ta nge nge a, ka pa fanu ka nih tawh lohzia ka hre chiang tulh tulh a, rilru tih nât loh ka tum tehreng nen ka nâ tak zet. 

"I ni ang, i ni ngei ang, kan innei vat bawk ang" tiin Mazara chuan ka hnung a rawn chul hauh hauh a, a hma ang bawkin ka ṭah lai chuan min hnem lo va, min thlem lo va, a ngawi tawp a, ka hnung a la chul reng thung a, ka mittui te chuan ka lungchhiatna zawng zawng luan chhuahpui vek se ka ti ngawih ngawih.

(End of Chapter 32)