SUMO DRIVER By Havali Adam (CHAPTER 31)

SUMO DRIVER 

By 

Havali Adam

Chapter 31

"Numam" tih leh Mazara chuan ka biang dawm a rawn rual nghal a, hlauhthawn rukna nei ṭun chungin ka chhoh melh ral a, ka pa rilru kal dik loh lai a ni bawk si a, engkim chu a buai leh nuaih ang tih mawlh ka hlau a ni.

"In inru tawh alawm Numam, ngaihṭha tak khan awm phawt teh. I pa pawh a rilru a danglam deuh tawh ang chû maw le, Mazara sawi ang khan an hruai haw che a nih paw'n palai tirh kha a remchang zawk maithei, kei paw'n titipui dan ka lo zawng dawn nia" tiin putea chu a rawn ṭawng chhuak a, zep lovah chuan ka la hlauthawng ru em em tho. 

"Engtin nge u Vli hian ka phone number a neih daih theih reng reng le" Tlantea chu kan en ta ṭhap a, ani chuan a phone a khawih mual mual a, ka hrethiam bik chiah lo, ka phone lah inah ka hnutchhiah daih bawk si. 

"A hmain in lo be tawh ṭhin emaw ka ti mai asin, mahse kan boruak a hetih hnu hi chuan in inbiak ka ring tawh lem lo khawp a, eng pawh ni se engkim a ṭha turah ngai phawt ang u" pitei'n a rawn tih chuan Tlantea bawkin

"U Vli phone number ka nei lo hrim hrim alawm nu, ka biak ṭhin te chu Numami zawk hi a nia, mahse kan inbiak lohna a rei tawh mai" a rawn tih zawm ve leh nghal a, kan thingpui in boruak pawh a nuam lo chho ta hle. 

"In in lama chhuk tawh kher lovin hetah hian lo nghak law law mai rawh u, khu lam ai ngawt chuan kan in pawh a fâl deuh zawk a, inhnialna vel a awm palh a nih paw'n ṭhenkhawm khawveng venthawn a ngai lutuk lo zawk ang" putea sawi chu a dik ve reng. 

"Ni lo ve, keima'n bul ka ṭan tawh a, inphenna ka zawng hleinem, zawng ang maia awm ka duh lo bawk. Kan inah ngei Numami chhungte hi kan lo hmuak zawk ang a, in duh chuan lo chhuk ve zawk rawh u" Mazara chuan a tinghet charh mai. 

"Kei zawng innei thei hram ula ka ti ngawt mai, Numami pa pawh hi a ti mah mah ve deuh chu a ni. A fanu berin a hmangaih miau te chuan phal ve mai se a dik vek ni mai tur, mahse rilru hi a lo inang lo ve êm a ni" pitei'n a tih lai chuan Mazara chu a ṭhutna aṭang a tho a, ka kut chelhin min kai tho zui nghal bawk.

"Kan zu chhuk ang e" ti supin Mazara chuan pawn lamah min chhuak a, pawn boruak chu ruah sur tur ang maiin a lo inṭham leh tawh a, khawpui ri lo mah se kawl erawh a phe leh zawk zawk tawh thung. 

In kan thlen thlak hnu chuan tih vak tur a awm lo kher mai, ṭhutthlengah ka ṭhu deuh tawp a, Mazara ve thung chuan ngawi rengin zozial a pak khu laih laih a, ka chhungte chu hma chhawn hrehna a nei em em paw'n ka hre lo. Ka tih tur hre lo lutuk chu pindanah ka lut ta tawp a, khumah ṭhuin ka hawi kual vel a, ka rilru erawh hmun dang daihah a awm. Ka chhungte lo thlen huna awm dan tur te chu ka ngaihtuah kual vak vak a, Mazara chuan ring tawp turin min ti ngei a, mahse rilru a khingbai lo thei lo. 

Chutia rilru leh ngaihtuahna senga ka ṭhut ngawih reng lai chuan thawm dang a rawn awm a, pindan aṭang ka chhuak nghal vat a, putea te chhungkua lêk chu lo niin, ka pate emaw ka ti hman dawn alawm le. Putea te an rawn chhuk ta bawk a, boruak pawh a hma ang em emin a reh tawh lo. Pitei te chu thingpui ka siam a, an in lamah thingpui in vek tawh mah ila ka siam ta tho. Mei erawh ka chhem kher ngai lovin Mazaran a chhem thung a, in kan thlen thlak tirh aṭang min la be lo hrim hrim. 

Putea chu hriat nuam takin a ṭawng dap dap a, pitei'n a lo tuihnih zeuh zeuh bawk a, min ṭawng thlamuan han tum viau mah se ka thla a muang hlei thei tlat lo. Mazara lah chu a ngawi run a, ani talin min thlamuan tum se chu ka thla pawh a muang thei deuh maithei a ni. Ngawi reng hian a ṭhu tawp a, meizial a zu tawh lo va, tukverh thlang lam a hawi reng ringawt. A rilru a hahin a buai ve hle a ni tih chu hai rual a ni lo, a awm dan zawng zawng aṭang chuan a hriat theih vek zawk.

Ka hlauthawng ru sa bawk nen ka rilru chu a kal dik lo thut a, rilru paukhauhna lam aiin rilru nona chuan min luah khat ta vek a, thlamuanna dawn ka mamawh tak zet a ni. Ka mamawh neitu Mazara ni se a ngawi reng a, min ngaihsak lo viauin ka hre ta. Ka ṭhutna aṭanga thovin pawnah ka chhuak daih a, ka ṭah a chhuak ru em em bawk. Lo ṭah kual vel a hun miah lo tih ka hria, tu pawh kan rilru a buai tih thlengin ka hre vek, mahse keimahah chuan dik lo a awm a ni. Mamawh ka nei a, ka mamawh hnen aṭanga engmah ka dawng leh si lo chu a chhan ni berin ka hria.

Van lam thlirin ka dak voh vôh a, arsi emaw thla emaw pawh hmuh a tur a awm miah lo va, ka chhungril chu a khawhar ngawih ngawih a ni. A tawpa tawpah chuan ka ṭap ta nge nge a, mahse ka ṭap ri chuang lo. Derken kung bul lungah chuan ka ṭhu a, ka indawm kun ngul a, ka awm dan puitling lo hle mah se ka mood chuan a zir tlat bawk si a ni. Ka han ṭah tâkah chuan tlémin ka rilru hah lâwk lutuk pawh a zia deuhin ka hria, ka intipaukhauh lui hram hram a, mahse ka chhungril tak a la dik thei lo tih ka hre chiang hle. 

In chhunga ka luh chuan pangngai taka awm leh rilru hahna nei miah lo ang maia kawm ka tum tehreng nen ka ṭah a rawn chhuak ṭha leh a, ngaihtuah hmel zeta Mazara min en rengna chuan ka rilru a tino leh vek a ni. An vai hmuh atan chuan ka nui lui sak a, pindan chhungah ka lut nghal daih bawk. Khuma ka ṭhut thlak rualin Mazara hmel ka hmu nghal zat a, in chhung ka luh tirh anga nuih luih chu ka tum leh a, mahse ka thei tawh teuh lo, thei lo nasa tak ka ni. 

"I ṭha em?" ti supin ka kut chu a rawn hum a, ka bula ṭhut rual nghalin chiang zet hian min en a, ṭah chhuak ru zet chuan lu ka thin khum a, min en chik zual sauh thung a, keimahah dik lo a awm tih chu a hre chiang dawn lutuk tlat.

"I ṭha miah lo, i ṭah a chhuah em em chhan hi min hrilh rawh" a tih leh nghut chuan ka insum zo tawh lo a ni ber, a âwma bei thlawpin ka insut feih feih a, ka hmel en tum ni awm taka min nam hlat a tum chuan ka kuah nghet sawt thung.

"Min ru hi i inchhir ni ta berin ka hria Mazar, ka hrethiam lo lek lek che a ni. I ngawi reng zel bawk si a, thlamuantu ka mamawh tehreng nen min ṭawng thlamuan pawh i tum miah lo va, i inchhir tak tak em em ni?" ka ti ta thlawt a, ka la ṭap feih feih bawk.

"Ni lo Numam, chuti ang rilru ka pu reng reng lo. Inchhir maw!? A teuh lo lutuk, nupui atna nang ka ru che hi engtikah mah ka inchhir ngai lo vang" ti nghet charhin a âwm aṭang chuan min nam sawn ta nge nge a, ka mittui te chu a baw duh zawih zawih khawp mai.

"Ngaithla teh, kan awm hrang rih a nih paw'n nang nena kan inzawmna hi eng thil mahin a chhu chat thei tawh lo a ni" a rawn tidam leh dap a, ka bianga mittui te chu a kut lum vung vung chuan a hru hul mawlh mawlh a, tunah chuan ka thla a muang ve leh thei ta. 

"Ka chhungte ruala ka haw thlak hi i ring em ni? I phal em Mazar? Kan inkar buai lutuk hi siam ṭhat dan ngaihtuah vat teh aw, hrehawm ka ti em mai" nghet zeta kuah chung chuan ka ti sêp sep a, ani paw'n min kuah nghet ve hle.

"Hruai haw ta che pawh ni se thil nih dan tur zawk tak chu a ni alawm, ka tan palai rawn tirh kha a remchang phah zawk thei a ni" a tih chuan ka en chho a, min lo melh thla ve nghal chiah a, ka thla a muang leh thei ta tlat lo.

"Kan inṭhen leh ngei dawn a ni maw?" tiin ka mit ka chhing vang vang a, ka ṭah erawh a chhuak tawh em em hran lo va, ṭah reng ringawt pawh chu a hun lo tak zet, inṭhen hran bak kan hmabak a ni lo tih ka hre chiang ta viau e.

"Ka tiam a che Numam, ka nupui i ni ngei ang" ti thum chhalin ka chal chu a rawn fawp zeuh a, min kuah nghet sauh pah chuan duat tak hian ka hnung a chul hliau hliau a, sawi tur pawh ka hre tawh lo, thil chu a thlen dan tur ang ângin thleng tawp se ka ti ta ringawt.

Rei lutuk lo pindan chhungah kan awm dun a, putea te chu kan pawh leh thuai a, kei pawh ka rilru a pangngai leh tawh khawp. Ka awm dan ka ngaihtuah chian hnu phei chuan ka inthiam lo thar em em a, a puitlin loh thlak ve êm bawk a ni. Putea leh pitei min biakna te pawh chu ṭha takin ka chhang leh thei tawh a, min tihhlim an tum ni berin ka hria. Ka lungawi loh thu ka sawi vang nge ni Mazara chuan min ṭhutpui deuh chawt ta reng a, ka kut ni se a hum tlat a, min ngaihtuah ta lutuk chuan ka thla a timuang hliah hliah.

Ni e, Mazara hian a sawi dik chiah a ni. Ka chhungte'n min hruai haw ngei se a ṭha zawk tak ang. An thin erawh a rim tlang dawn hle tih ka hre lâwk vek a, engtin pawh min ṭawngkhumin min hau bawrh bawrh mah se chhan let ka tum lo. Min hau tur reng an niin ka hria, a chhan pawh ka inruktir ringawt chu a dik lohna chen a awm ve tho, mahse kawng dang eng nge awm chuang? Mazara paw'n min ruk a tum bik kher loh kha maw le, kawng dang awm se chu min ru miah lo ang a, kohhran dan thianghlima kan inneih theihna turin ṭan a la zawk ngei ang. 

Ka ngaihtuah ṭhin a, a chan chu ka chanah ka dah chhin vel a, kei ni ta ila ka va han hmachhawn ngam dawn lo chiang em. Mipa pawh ni ila ka nupui rukte chhung chu hmachhawn ka hreh khawp ang, mahse Mazara erawh a dinna ngaiah a ding reng a, kan awm dun theih nân theih tawp a chhuah dawn tih ka chiang a, amah ngeiin a nupui ka nih tur thu min tiam bawk. Mipa azawng mipa bera ka hriat a ni miau a, a thutiamah a ding nghet dawn tih chu ka beng ka hriat chian tluk zetin ka hre chiang a ni. 

Zan dar 9 a pel tawh a, in kawtah chuan motorr ding thawm a rawn awm ta. An hmel la hmu lo mah ila ka chhungte ngei an ni dawn tih ka hre nghal a, thawm an dim loh hmel hlawm hle. Pangngai taka lo hmachhawn tum si kha ka zam leh ta em em a, ka tha a khur hial a, motor kawngka inkhar ri pawp pawp te chuan min tiphu zawk zawk thei. Ka awm dan hrethiam zetin Mazara chuan ka kut chu a hum nghet sauh a, in chhunga ka chhungte lo lut ka hmu chiah chu Mazara phena ka awm titih nghal tawp.

"HMINGTHANPUI, heti ang em ema i kal thui ngam hi ka ring ngai lo asin, ka thinrimna cho chhuak zawnga i che kher kher hi i la inchhir dawn chauh" ka pa aw chu a vin fiah kâk a, a bulah chuan ka ute pahnih leh ka nu an ding ran bawk.

"Ka pu, i fanu hi nupui atan ka duh a ni" Mazara chu tu paw'n kan en nghal ṭhap a, za lo zet hian ka pa chu a nui chhuak hawk hawk a, a awm dan vel aṭang chuan Mazara a hmuh hniamzia a hriat ngawih ngawih. 

"I phu tâwk hre deuh rawh Mazar, ka fanu tan hi chuan i hniam mah mah a ni. Ka fanu hi chuan ka fanu a nih angin khawpui mi chauh a nei ang, amah chawm zo tur ngei mipa pasalah a la nei dawn, chu chu ka thu tawp a ni" ka pa chuan a ti khauh leh ta fak mai. 

"Mazara lo mipa dang pasalah neih ka tum reng reng lo, engtikah mah ka nei ngai lo bawk ang. Engati nge i fanu mipa hmangaih hi i huat em em ka pa? Hmuhsit takin ṭawngkhum tawh suh, ka rilru i tinâ" insum thei lovin ka ti ve ta tawn tawn a, ka pa chu a thinrim hmel zual sauh thung.

"Ngawi hmak rawh HMINGTHANPUI, i pa thusawi awih turin ka hrilh vek tawh che a ni lo'm ni? Eng vangin nge i lo inruktir thawt thawt a, hmeichhe hur herh lutuk ang maia pasal i um hi ka en liam mai mai thei tawh lo che" ka nu zawk chuan a rawn tivin ve ta phiar phiar mai. 

"Nang tal chuan min hriatthiam ka ring asin ka nu, hmeichhia i nihna ang leh ka nu i nihna angin min hrethiam la, ka pa hi hrilhfiah zawk ta che. Khawngaihin Mazara nena kan inneih hi phal hram teh u, nun dan inthlak hlawk huama ka zui mipa hi ka hmangaih êm a ni" tih leh ṭah chu ka rual nghal a, ka thusawi chuan awmzia nei hram se ka ti tak zet.

"A teuh hian a hnaisai lo mai HMINGTHANPUI, lo lut thuai teh u" ka pa hawina lam chu ka chhungte tih loh chuan kan en nghal ṭhap a, eng thil nge ka hmuh tak hi! In chhungah chuan police pathum an lo lut a, ka pa hian eng nge a hriat tâk ni!

"Ka fanu bula mipa saw man nghal rawh u, ruk hmang chuan a thil tih sual man a hmu ngei tur a ni" ka pa bawk chuan a rawn ti vin leh hrawk a, Mazara ang tiat mipa pathum te chu kan dinna lamah an lo phei a, an zinga pakhat chu Mazara chuan a lo hnek tlu ta pawp mai. 

Police pahnih chuan an khawih rawn zui nghal a, kei phei chu ka petek dâwr nghe nghe a, ṭhutthleng banah ka lu ka tauh ri chawrh a, thawm chu a ri nghal nuai nuai bawk. Tlantea chuan Mazara puih a tum a, mahse putea zawkin a lo phal tlat lo thung. Mazara khawihtu te chu police an ni miau a, inhnamhnawih tir a duh lo pawh chu demna ka nei hran lo. Pathum mah ni se Mazara chu an hneh lo ang reng hle a, mahse a inrin loh lai takin a tukhumah pakhat chuan khawng ri chawrh a, a ding pangngai thei lo ta sâwt hle. 

"Heti ang em em te chu a chi dawn em ni Sanga? I ti mah mah tawh a ni e, Mizo i nih chuan mipain nupui a ruk chhan a hriat ngei ka ring. Police lai i rawn hruai leh ta nghal a, i chet duh dan hi a mipa lo khawp mai" putea chu nem fahran lovin a ṭawng chhuak ve ta nge nge. 

"I lo inrawlhna tur pakhat mah a awm lo Rintluang, zanin la lâ hian kan inṭhian ṭhatna leh kan lo inhriat tawhna te ka chhu chat nghal ni rawh se. Tuna kan buaina hi i fanu a ni lo va, i hrethiam lo mai mai a nih kha!" ka pa chuan kutzungchal hmuh meuhin a chhang let a, putea pawh a ngawi reng thei bik ta lo a nih hmel. 

"Engti ang fakau rilru chhia nge maw i nih le, i fanu hma hun i tichhe vek dawn a nih ber hi! Kan inzawmna chhu chattu chu nangmah i ni a, mipa i nih angin hre reng ang che. Hmangaihnaah hian sumin hmun a chang ngai lo, Mazara te ang mipa i fanu tana i iai tlat hi i inchhir kumkhua ngei ang" putea chuan a ti ve ta duah a, ṭawng duhtawk mai lovin

"Mazara hi ka thisen ang mai ka en leh ka mihring ngainat a ni a, a chungah eng pawh a thleng a nih chuan ka en liam mai mai thei tawh lo vang. I duh dûh chu ti la, i duh leh i fanu hi hruai haw la, Mazara chungah thil pawi i ti a nih erawh chuan mipa ka nihzia ka lantir ang" a rawn tih zawm leh zat a, a meng rumin a kut a hum ruh khawp.

"Teh chai che chuan, min cho ve tihna em ni Rintluang? Sawi lo mah la ka fanu hi ka hruai haw dawn hrim hrim tih lo hre rawh, Mazara pawh hian a thil tih sual man chu a hmu khawp ang" ka pa lamah chuan kal hnaiin a âwmah ka nam vak a, a ṭawng duh dan chu a rapthlak em em tawh lutuk a tin ni!

"Eng ang pa chiah nge i nih ka pa? Engati nge heti ang em ema i sual a? I thu thuin ka awm dawn bik lo, i ngaih dan zawng zawng hi a dik vek bik lo bawk" ka ṭawng zawh rualin ka hmai a ri thlawrh a, ka mittui chu a luang zui nghal.

"Zak thei lo leh lutuk mai, tunah kan haw thla nghal ang. Mazara teh hrep pawh kha Jail tang turin hruai nghal ang che u, ka thu tlukna sut ka tum teuh lo" tiin min pawt sawk a, Mazara lam chu ka hawi vat a, kut kawl an lo buntir vek tawh a, ka khawngaih lutuk chu ka ṭap tawp ringawt. 

Motor chhunga min nawr luh a tum lai chuan ka tal vak a, mahse ka pa kut bawk ka tuar leh ta. Ka hmai chu ka dawm vawng vawng a, ka unaunu te pahnih chuan min ṭhutpui nghal a, ṭawng erawh an ṭawng ve miah lo. In chhunga an awm lai pawh khan ṭawngkam khat lêk pawh an chhak chhuak lo va, ka nu kha vawi khat a ṭawng ve hman chauh zawk kha a ni a, tunah chuan ka nu tak ngial pawh a ṭawng tawh lo hrim hrim. Ka pa chuan motor a tirum a, ka ṭap khur beuh beuh a, chuti ang em ema Mazara nen kan awm dun an phal lo a nih chuan thih daih te ka duh ta rum rum.

Kan tlan chhuah dawn lai tak chuan silai puak ri a rawn awm ta mai, ṭap tawp hmakin in lam chu ka hawi a, pitei ṭe ri ka hre zui nghal bawk. Ka pa erawh a tlan chhuak lui ta tho va, tal chhuah emaw motor aṭanga chhuah chu ka tum ta lo law law a ni. Khua kan chhuahsan dawn tak tak chuan ka ṭah a rawn chhuak leh thut a, ri meuhin ka ṭap ta hawm hawm a, ka bula mite chuan engtin mah min hnem pawh an tum lo. Ka ṭah ang âng chuan min ṭah tir tawp a, an hmuha ṭah tum tawh miah lo kha ka ṭap uar leh ta hle.

Mazara te khua hlat zawngin kan tlan zel a, ka khua a har tulh tulh a, thui tak kan tlan tawh nghe nghe. Motor chhungah chuan tumah ṭawng kan awm lo va, ka ṭah pawh a chhuak thei tawh lo. Mahni intihhlum châkna hlirin ka khat a, ka thluak chu a mâng vek a ni ber. Ka bula ṭhu ka unaunu te pahnih chuan min en leh zauh zauh ṭhin a, mahse min khawngaih tak tak ka ring teuh lo, min khawngaih ni se chu thu tlêm tê tal min ṭan zawngin an sawi ve ngei ang.

Darkar eng emaw zah kan tlan hnu chuan Aizawl khawpui chhung kan thleng a, khawiah mah peng kawi lovin kan in lam kan pan a, a tua te mah chu kan la inbe lo tluang zel bawk. In kan thlen chuan room-ah ka lut tlang nghal a, u Vli leh u Duhawmin min rawn zui lut nghal bawk a, min biak chuan chhan tumna pakhat mah ka nei lo. A hun laia ṭawng duh der si lo kha a hun lovah an ṭawng leh lawi a, an awm dan chuan min run khawp mai. An beidawng ta deuh a ni ang, a tawpa tawpah chuan ngawi rengin an chhuak ve ve a, kei erawh ka lawm viau thung. 

Mahni chauha ka awm chiah chu Mazara ngaiin ka ṭap feih feih a, khumah chuan ṭhuin ka indawm kun ngul a, ka mut thei lo chiang hle. Tukverh hawngin van chu ka thlir a, maimitchhingin ka ṭawngṭai tawp a, Mazara chungah thil ṭha lo tak a thleng ang tih mawlh ka hlau a ni. Police khan an man ngei a, ka pa'n Jail lama khung turin thu a pe bawk a, ka nep lutuk chu hrehawm ka ti ta ber. Ka mipa hmangaih em em bulah pawh ka awm thei lo va, awm theih dan tur ka dap thiam mang lo te chu keimah leh keimah ka inhuat chhan a ni. 

A tuk aṭang chuan a hma ang bawkin College ka kal nghal a, engkim chu ka pa duh dan vek a ni. Keimah tak chuan kal ka peih hauh lo, mahse Mazara hmangin min vau zel a, a thu ka awih loh chuan Jail chhunga sawisak tir a tum thute a sawi hial a, a nât ka phal ngang lo a ni e. Ka ṭhian kawm ngeih ber ber te paw'n min be hlim thei tawh lo va, hlim pawh ka tum tawh lem lo. Ka hlimna ber Jail-ah awmin harsatna a tawk mêk a, chutih laia lo hlim bik chu ka thei lo hul hual.

Zanriah ei lai leh tukṭhuan ei laiin ka pa chuan College ka zawh vela pasal ka neih nghal tur thu a sawi ziah a, kei erawh ka ngawi tawp zel. Ka va han nei dawn lo chiang tak em, Mazara ngei a nih loh chuan pasal neih ka tum lo bur. A duh dûhin ruahmanna siam se, hlawhtling turin a beisei te pawh a ni mahna, mahse kei chuan ka kalh zel tawh dawn a ni. A kutthlak te mai mai chu ngaiah ka nei fel tawh zawk, ka pa rilru chhiatzia leh sualzia chu mi zawng zawng hriattir ka châk chang a tam ṭhin, mahse ka mualphona a ni ve zel bawk si. 

Veng chhungah chuan Mazara nena kan inruk thu a lar vak lo va, tuma'n an hre lo zawkin ka hria. Zan khat leh ni khat ang vel kan inkawl zuai chauh a ni a, han than chiamna hman kha a ni lo ve hrim hrim bawk. Ka pa hnen aṭang nitin zantin zilhna ka dawng ṭhin a, ka nu erawh min vin zawng emaw min hau zawngin eng thu mah a chhak chhuak tawh ngai lo. Min en vawng vawng chang a ngah a, min biak paw'n ka chhang ngai tawh bawk si lo. Ka rilrua awm lian ber chu Mazara a ni a, ka tan chuan ka thisen zawmpuite ai paw'n a pawimawh tawh zawk a ni.

"Ka tum tawh lo, ka thei tawh bawk lo. I ti mah mahin ka hria ka pa, i ngaihtuah leh hle si. I fanu a ni a, a hlim chuan i hlim ang a, a hlim loh chuan i hlim lo bawk ang, a chhan chu pafa inni tlat" u Vli aw chuan ka muhil lai min tiharh zawk a, ka ngaithlak kar lai chuan

"Kei pawh ka tum tawh lo law law, an inkawp phal mai la chuan hetia ang em em hian Numami hi a danglam lo ang a, nang pawh i buai miah lo vang maw le. I hmangaih tih kan hria alawm, mahse i fanu hlimna tur hi tlêm tal chuan ngaihtuah ve chhin teh ka pa" tia u Duhawmi ṭawng thawm ka hre ve leh ta. 

"Mazara nen an lo inhre kher kher hi a pawi ngawt mai, inhre miah lo tur an ni asin le. Lo innei ta se ka fanu hma hun tur ka hre chiang ropui mai si a, reithei taka a awm ka phal thlawt lo a ni. Thu ka la vung mah mah tih ka hria, mahse a ṭha zawk tho tho" ka pa aw chu zan dang ang lo takin a pangngai hle a, vin awkâ ri a awm miah lo bawk.

"Ṭha deuhin an inngaihzawn phal la chuan an inru bik kher nâng ka pa, nangma'n i phal lo tlat a nih khâ, Numami laka i chet dan hi ka nu lung pawh a ni tawh chiah lovin ka hria" titu chu u Duhawmi bawk a ni a, an bulah ka nu a awm hnai lo a nih hmel. 

"Ngaihtuah chiang rawh ka pa, i inchhir ang tih ka hlauhpui che a ni. I thinrim laiin thu tlukna i siam a, putea te nen kan zawmna zawng zawng i chhu chat bawk a, thla lai a liam leh tawh tho va, putea te chhung tal chu ngaihdam han dil leh la ka duh" u Vlin a tih chuan ṭawng thawm engmah a awm tawh lo; kawngka inkhar thawm tih chauh lo chu! 

Rei lovah ka room kawngka a rawn inhawng a, ka mit ka chhing vat a, lo lut mêk chu ka pa a ni tih ka hre nghal. A rim aṭang ka bul hnai têah a ṭhu tih ka ngaihruat thiam mai a, ka hmai a rawn tawk chiah chu ka chhungril lam a rawn dik lo va, ka sa pup pup a, a awm laiin ka ṭap mai ang tih ka hlau khawp. Ka theih tawpin ka insum a, thawk a la huai ri te chuan ka ṭah a ti chhuak zual leh ta nghal a, chhuak tur ang deuha thawm a neih lai te chuan hmanhmawh se ka ti hle. 

Room aṭang ka pa a chhuah hnu chuan insum karna nei lêk lovin ka ṭap ta hawm hawm a, lukhamah nâ zetin ka hmai ka phum a, ka ṭap thawm chu an hre palh ang tih ka la hlau tho a ni. Kar tam tak hnuah ka pa'n min beng lovin ka hmai a chul a, chu chuan min tiṭap lo thei lo a ni. Amah avangin beidawng lek lêkin ka awm ṭhin a, ka rilru a nu but but ṭhin, Mazara ngaihtuah tel zel lo ila chuan ka intihhlum tawh ka ring. Intihhlum ta ila ka chhungte chu a inchhir leh hle dawn tih ka hre lâwk vek, mahse anni ai chuan Mazara ka ngai pawimawh daih zawk.

Vawi khat phei chu intihhlum ka tum tak tak a, College building chhawng chung ber aṭang zuan thlak ka tum a, mahse ka mitthlaa thil lo lang avangin ka thei thlawt lo a ni. Mazara hlim hmel ka hmu a, min hmangaih tih hriat taka min ngaihtuahna te, a ngawi ngul hmel te, a fiamthu thawh hmel te leh a nui hmel te ka hmu zut zut a, kan intihhlum chuan a lungngai dawn tih thlengin ka mitthlaah a rawn lang zut zut a, mahni intihhlum lam chu ka ṭhulh leh ta nge nge a ni. 

Khami ni aṭang kha chuan intihhlum tumna ka nei tawh lo hrim hrim a, kan intawn leh beiseiin hringnun ka hmang tawp tawh a ni ber. Engtik ni ah emaw tak chuan a hmel ka hmuh leh ngei ka ring a, chu chiah chu ka nun khai dingtu leh ka beiseina awm chhun a ni tawh bawk. Hun erawh chawl lovin a kal liam zel a, ka pa'n a thu tlukna a la sut duh lo tluang zel a, ka nu ve thung chu a inchhir ṭanin ka hre tawh. Min biak hlim a tum ṭhin a, ka hlim thei chuang der si lo. Ka nâ ve êm a, ka thinlung nâ lutuk chu tawrh thiam dan ka hre lo a ni ber. 

Thla 2 lai kan hman ral hnu chuan min ṭhawng em emtu thil pakhat ka hre chhuak a, ka pa chuan ka laka pa Zothana thil tih sual zawng zawng hre vek tawh chungin engtin mah chet lâk a tum lo a nih chu! Mittui tling pamin ka pa chu ka en ngawt ngawt a, a tana ka hlut lohzia ka hre chiah chu nâ ti tak ka ni. Ṭawngkama a hauh thute chu a sawi tho va, ka awih chhetê them tawh lo, ka pa a ni chu ka zak tak zet. Ka thianghlimna ka hloh ṭep phah a, Jail a tantir duh ve miah lo te chu a huatthlala ngawih ngawih.

Tin, zuin a ching chho ṭan a, a hma zawnga zu inngai der si lo kha zan tin a in chho ṭan ta. Ka nu paw'n a khap hlei thei tawh lo va, inhauh chang an ngah ta viau bawk. Kan chhungkaw boruak chu a nuam lo chho tial tial a, kei erawh nuam lo ti sa kha ka ni hrim hrim a, awm dan ka thiam thei mai. Ka ute pahnih ber chuan hrehawm an ti zual a, u Duhawmi interview-ah a tling lo kher bawk nen kan ni nuai nuai tawh a, u Duhawmi tling lo chu ka pa'n a la nâ leh zel a, an zavai chuan ka en liam mai mai thei thung. 

Nâtnain a chher hriam tawh kha ka ni ve miau a, chuti ang te lek lek chu ka tawrh lakah chuan nep tê a ni mai. Hmangaihte nena pawh ṭhen nâtzia leh hrehawmzia te han tawng ve ngat phei se chu engtin nge an awm ang tih te ka ngaihtuah phah hial a, ka unaunute pahnih chuan nuapang ber mah ila tawrhchhel zawngah min tluk lo tih ka hre zui ta bawk. Chung buaina zawng zawng karah pawh chuan Mazara ka la ngai bang thei lo va, ka mitthlaa a nui suk hmel ka hmuh ringawt paw'n ka nui thei ṭhin. 

Zan khat chu ka room-ah u Vli a rawn lut a, rawn inbun ruah a duh a ni ber. Ka pa awm dan ṭha lo a tih thu te, kan chhungkaw boruak nuam lo ta lutuk te chu a sawi mawlh mawlh a, keiin ka lo ngaithla tawp a, zawhna min zawh paw'n ka chhang lo hrim hrim. A phone phawrhin mi tu emaw ni hi a bia a, a ṭawng dan aṭang chuan a biak ṭhan tak a nih hmel. A dah hnu rei lo têah phone call a dawng leh a, chuta a chet dan chuan min va tihamhaih tak em. Phone chu min rawn pe ringawt a, min be duhtu an awm thu la sawi zui. 

"Numam" a reh tlawk hnu chuan Mazara aw ngeiin a rawn ti ta, chu aw ka hre chiah chu ka harh nghal kâwk a, ka ṭah a chhuak nghal ngawih ngawih bawk a, thla hnih hnua a aw ka hre leh thei ringawt pawh chu lawm tak ka ni.

"I ṭha em?" min ngaihtuah tih hriat taka a rawn tih leh chuan insum hman lovin ka ṭap chhuak feih a, mi dangin ka thawm an lo hriat ka hlauh avangin ka hmui chu ka hup vat a, u Vli pawh ka bulah ṭhu reng mah se ka zah zo tawh lo a ni e.

"Mazar" ṭah chhuak aw zet chuan ka ti ṭuau a, ani erawh a ngawi reng a, ka ṭap leh ta nge nge a, ka ṭap chu min nghak ni berin ka hria, thawm nei lo mah se a la awm tih ka hriatna chuan min tihahdam huai thei tho.

"Kei ang u i nei hi chu lawm vawng vawng tur i ni, u Mazar nen ka inbiaktir che u a nia, u Mazara nena in inhmangaih dan hi a mak ve ngawt mai" ka ṭah chhuak a reh fel hnu chuan u Vlin nui ver ver hian a rawn ti a, tun ṭum chu thinlung takin ka nui ve thei ta. 

Ka hmuh tirh leh ka hriat tirh chuan mipa hmelṭha hmuhin ka hmu lo hrim hrim kha a ni a, ngaihven enah pawh ka en lo, ka veiin ka ngaihtuah ngut ngut ang tih phei chu beisei lo nasa tak ka ni. A bul hnaia awm te kha a hrehawm hmel ka ti hle zawk a, mahse a ṭawngmawhna leh mi dangte hriatthiam ve phâk hauh si lova min ngaihtuahna chuan ka thinlung sak tak pawh a tizawp thei tlat a ni. 

Ni e, ka hria a ni. Min ngaihven a, min ngaihtuah a, a huhâng chuan khawiah pawh awm ila min chenchilh reng a, ka thluak chhung aṭang a hmel pá hrâk leh ṭha zet chu ka paih chhuak theih meuh lo zawng a ni e. Tukverh lamah pheiin pawn boruak thiang zet chu ka hip lut vang vang a, hmangaihte nena inbiak zawng khawvela thil nuam ber a ni. Ka ṭah a chhuak tawh lo va, ka hlim em em tawh zawk a ni.

"Awm dan tur pawh ka hre tawh lo" van thiang taka arsi de sep sep thlir dauh dauh pah chuan ka ti thawp raih a, ka mi biak mêk pa min chhan dan tur ngaichang ranin ka bengah phone chu ka chuktuah reng bawk.

"Mazar" thawm pawh rawn chhuah lova a reh tlawk tlawk lai chuan ka ti leh ta sep a, amah ka hmangaih angin ani chuan ka lakah rilru a lo pu ve tak tak lo ni mai te'n ngaihtuahna ka seng hman hial a, mangṭha tuma ka ṭawng chhuah leh dawn chiah chuan

"Ka lo hruai ang che" a rawn ti thum chhal a, eng thu mah sawi leh tawh lovin phone chu a hmet tawp zui hmak a, hmeichhe dang chu ni se phone min off khum avang ringawt pawh chuan an lungawi lo ngei ang, mahse kei erawh ka khi ver ver a, a chet dan engkim chu amah ti 'Mazara' tu a ni a, min hruai turin a lo kal ngei dawn tih ka hre chiang em em bawk.

U Vli chuan rilru hahdam deuha awm turin min hrilh a, Mazara nen kan awm dun theih nân min puih a tum thu a sawi hial a, a chungah chuan ka lawm tak zet. Zan a nih tawh avangin a lo berah Mazara chu zan laiah emaw zan lai pelhah a rawn thlen thlak ngei ka ring a, nghah lam erawh ka phur tawh hle. U Vli chu kan inbiak dan zawng zawng ka hrilh a, a vawi hnihna atana inruk kan tum thu ka sawi chuan pawi a lo ti lo khawp mai. Amah zawk zawkin ka thawmhnaw ken tur te chu a khung vek a, Mazara nena kan inru leh tur chu a phur zawk ni mai te'n ka hria. 

Kan thawm a hria a ni chêk ang chu u Duhawmi a rawn lut ve hlawl a, zep nei lovin u Vli zawkin Mazara lo kal tur thu a lo hrilh tlang nghal pawp a, ka beisei loh thil bawk ka hmu leh ta. U Duhawmi chuan min kuah ringawt a, Mazara nena tlan bo vang vang turin min hrilh a, ka ute pahnih awm dan chu a mak vel vek a ni. Chhan ngaihna pawh ka hre lo va, tun ṭum zet chu u neih hlutzia ka hre chiang hle. Room aṭanga an chhuah dawn chuan ka nu leh pa hriatthiam theih tur ang zawnga awm lo turin min hrilh a, ka lo bu nghauh ngauh ringawt.

(End of Chapter 31)