SUMO DRIVER By Havali Adam (CHAPTER 30)

SUMO DRIVER 

By 

Havali Adam

Chapter 30

Fur thla kan chuangkai titih tawh bawk a, zan boruak chu a ni deuh ruih a, arsi pawh pakhat mah a lang lo. Kawl te lah chu a phe leh zawk zawk ṭhin a, Mazara bulah awm lo ngat ila chuan ka hlau khawp ang. Ruah a sur ang tih chu ka hlau ta ber, a sur vaih chuan kawng a nâl ngei ang a, Mazara tan pawh khalh a hrehawm dawn lutuk. Kawl phe zawkin khawpui a rawn ri chhunzawm nghal a, Mazara chu kawr chhanah ka hmer vak a, ka hlau tih a hriatthiam ngei ka ring. Kawng sirah chuan a ding ta thuai a, min ngaihtuah hmel khawp mai.

"Ha rawh le" ti supin a Leather Jacket hak lai chu min pe a, lak mai nachang pawh hre lovin ka lo en reng a, amah zawk chu che chhuak hmasa lehin min haktir a, chutah pawh chuan ka lo la en reng a, amah pawh inngaihtuah lova kei min ngaihtuahna chuan min hmangaih tih min hriattir a ni. 

"Vawt i ti viau ang e" ka ti chuan a lo nui mai a, bike-ah chuan ṭhu ṭha nghalin min hnung chhawn a, T Shirt lawng chauh pawh ha mah se a taksa chu a lum nuam em em tho va, chung sik rengte chu nuam ka ti ṭhin.

"Ruah sur hma thui tak tlan hman ka duh avangin ka tlan chak dawn a, min vuan nghet la, hlau lo bawk ang che" bike a tih rum vut vut lai chuan a rawn ti a, a hnung bawh zawngin ka tawlh thla a, a kawngah nghet takin ka kuah nghal bawk. 

Kan tlan chhuak chiah chu ka rin phak bakin kan tlan chak a, chak viau mah se a dam raih tho. Insawh tih vel pawh ka nei mang lo va, tlak palh hlauvin ka kuah nghet em em ringawt. Kan tlan zel a, tluang taka kan duhna hmun kan tlan thlen theih nân ka ṭawngṭai ru mawlh mawlh a, tawh sual kan tâwk palh ve thei tlat a ni. Khawpui chu a rawn ri leh dur dur ṭhin a, motor dang tlan an awm lo bawk nen Mazara chuan chhe tê paw'n a khalh muan phah eih lo, khawpui ri leh kawlphe vel chuan a tibuai pha vak lo a nih hmel. 

Kan tlan chhung zawng chuan ka inngaihtuah rauh rauh a, ka thisen zawmpuite ngei aiin ka mipa hmangaih bula nun hmang turin duh ka thlang fel ta chu a ni a, ka ngaihtuah fê hnuah pawh Mazara kianga awm chu ka tisualin ka ring thei lo. A chhan chu ka tan a rinawm a, a rin tlak a, ka bawrhsawm lai pawha min thlahthlam mai mai lo tur mipa a ni tih ka hre chiang tawh em em a tin ni! Ka chhungte ngaih dan erawh a ni lo nasa dawn tih ka hre lawk sa vek a, Mazara ka zui tur thu hre phei se chu min phuar bet duh hial zawk ang maw le.

Ka duhthlanna chu a dik leh dik loh ka ngaihtuah reng bawk a, mahse dik lohna pakhat mah ka hre chuang lo. Hmangaihnaah chuan engkim a thiang an ti a ni lo'm ni? Hmangaihna avangin retheih pawh huamin ka pan lui a, a bula cheng turin ka zui lui a, engkim chu hmangaihna vang vek a ni. Hmangaihna chakzia te ka hriat thar phah a, thisen ai ngawt chuan hmangaihna chu a lo chak deuh a ni e. Ka chhungte pawh ka kalsan ngam ṭhak a nia, ka hmangaihin a zir vang nge pawh ka hre bik lo, keima tawkah ka kal thui ngam ve hle.

Vanneih thlak takin ruah chu a sur lawk lo va, kan tlan thui ve tawh viau chuan ka hria. Harsatna kan la tâwk miah lo te chu ka lawm viau a, him dam takin thleng hram ila ka ti khawp. Khaw luh hma tuikhur bul kan thlen laiin ruah chu a rawn sur ta, a inṭhamna a rei ve tawh bawk nen a sur hnem ang reng. Ruah sur hnuaiah chuan chawl lovin kan tlan lui zel tho va, thlen thuai thuai ka duh ang bawkin thlen vat chu a duh ve tho a nih ka ring. Khaw chhung kan luh hnu chuan ka hah a dam huai a, Mazara paw'n a khalh chak em em tawh bik lo. 

Ka mipa hmangaih nena kan chen dunna ni tawh mai tur in chu kan thleng har lo hle a, in kawta kan din rualin Mazara chuan min pawm thla a, ka bag nen chuan veranda-ah min nghat a, ani erawh ka bula lo kal mai lovin bike chu a hung ṭha phawt thung. A hun fel hnu chuan ka bulah a rawn ding a, kawngka chu a hawng a, in chhung light a on zui nghal bawk. Pindan lamah lutin towel pawl hi a rawn la chhuak a, pain a fanu inbual a hru ang mai hian min hru hul mawlh mawlh a, chhungril hlim zetin ka lo nui tawp ringawt. 

"I towel a ni chiang mai, i rim a nam tlat" ka tih chuan nui tih hriat tak hian a hmui a tiche zeuh a, tapchhak lama a kal lai te chuan towel chu ka lo la hnim vang vang a, a rimtui ve thlawt alawm, rimtui tak a ni. 

"Tui chhuan chhung hian ka lo inbual lawk ang a, nang chu tui lumin i inbual dawn nia" a bul hnaia ka ṭhut chhoh rual chuan a lo ti a, khawnvartui hmang miah lovin mei chu a chhem alh hluah hluah leh ta nghal a, a mak dangdai tak zet. 

Thuk bulah chuan rubber chappal zai phel a lo awm thleh thluah a, chungho chu mei chhem nân a hmang thânin ka hria. Pakhat chu lain meiah chuan ka hliau chhin a, ka rin aiin a alh duh daih mai. Chaicheh chuan ka chep kâng a, rubber alh chu a far thla zut zut bawk a, ka thil lawm a va ho tehreng em. Pakhat chu ka far zawhtir ta ṭhak a, hmuh leh ka châk avangin a dang ka hliau alh leh a, thuk bul vuta far thlaktir vel chu nuam ka ti tlat a nih chu! 

"Nangmah kha i infar palh ang e" Mazara lam chu nui ver verin ka hawi chho a, mahse nui tawp chiang tak ka ni, inbual turin a lo inphelh vek tawh a, ka thil ken reng ka ngaihsak thei tawh lo, a taksa chhah lian tak leh tihrawl mawi zet chuan min zem a ni ber.

"Ka rei lo vang, lo fimkhur la" ti leh supin min hnung chhawn zawng chuan a kal sawn a, ka chil chu ka lem ri deuh dawk a, a awm bawr, a dul eh a ban vel chauh a lo nalh teuh lo, a kawng hnuai lam thlengin a invuah rem mawi tawk em em a, ka rin phak bak a ni. 

Bathroom-a a luh dawn thleng chuan ka thlir zui zel a, ama'n min hmu lo hrim hrim zawk a, hmuhnawm ti takin ka en reng tih hria se chuan mak a ti ve ngawt ang ka ring, chuti ang em ema taksa mawi leh mi hipna ngah chu ka la hmu ngai lo. A mizia ni se mipa tak mai hi a ni a, mipa dang angin a ṭawng tam hran lo va, a ṭawng chin erawh a pawimawhin lairil fan vawng vawng thei a ni ṭhin thung. Ani ang mipa ṭha lutuk ka tawng hi ka lawm a, ka la lawm zel ang. A pian lah sawiselbo ni bawk, ka mitah hi chuan a va'n ṭha hliah hliah tak tak em.

Kan inah khan vawi khat chu ka hmu tawh ngei a, mahse khatah kha chuan thil dang vangin ka en ngam ṭha ṭhum ta lo va, ka hmu thuak ringawt ang chauh a ni. Rei lo tê chhung pawh khan a taksa hipna ngahzia leh lenzia te, mawizia leh hmuhnawmzia te ka hmu hman vek tho. A âwm bawr ka hmuh hmasak ber phei kha chuan zah pawh dawn lovin ka khawih tawp a nih kha le, a mak ve ngawt mai. Engtin pawh awm se min hip em em zel chu a ni si a, ani hi zawng ka tana khuanu ruat ngei a ni ang. 

Mei chu ka tuah ṭha a, a alh duh reuh khawp mai. Ruah chu namen lova tam a sur ta buan buan a, tui chhuan so leh so loh pawh a hriat theih loh. Putea te inah kha chuan Ketli ri ser ser aṭang a so tih ka hre mai zel a, mahse Mazara te inah erawh a tui hu lo chhuak aṭangin tui so leh so loh ka ngaichang deuh tawp. Savun ṭhutthlengah ṭhuin ka khup chu ka bawh a, ruah sur laia mei lum ai chu nuam ka ti tak zet. Thawm rawn awmna lam ka hawi phei chuan Mazara ka hmu nghal a, a inbual zo chiah a nih hmel. 

"A so har tawh lo vang" ka bula a rawn ṭhut rual chuan a ti sup a, a kut lawngin ketli chhin sat hmel zet chu a hawng a, ka lo en deuh hâw ringawt, ka hawn tur chu ni se chaicheh hmangin ka hawng ngei ang, nge ani hian sa a ti ve miah lo zawk?

"I kut ka lo en" ka ṭawng dan naupangchhia zet avang chuan min en rang hle a, a kut hlai leh hrawl zet chu ka en dik vel a, a kutzungpuite chu lian tak a ni, ka khawih mial mial laiin ani erawh chuan min lo en reng thung. 

"Tui so hunah hian i inbual ve nghal dawn nia" a âwm ruak kanga min kuah bei thlawp pah hian a rawn ti a, ruah a sur ṭhahnem ang reng bawk nen a ṭawng ring ve khawp mai, chutah kan awmna chu rangva in a ni leh zel a, ṭawng zawih a chi vak loh. 

"In ha tawh la Mazar" ka taksa awm dan mumal lo zet avang chuan ka ti chhuak ta tawp a, ka taksa mai ni lovin ka rilru thleng chu a danglam ṭan a, zep lovah chuan min hriatthiam vek ka ring, a tan chuan ka awm dan a pangngai tawh lo tih hriat a awl dawn em mai. 

"Engati nge?" ka hawi chho nghal a, mei alh êngin a chhun a khabe phir mawi tak chu ka hmu hmasa ber a, chutia ngawi renga ka en lai chuan ka lam a lo hawi thla a, kan thusawi laiin min tizam sa tawh bawk nen kan inen chiang ta lutuk chu ka sa vekin ka hria.

"Ka sawi zak deuh" ka ti mawl tawp a, en reng duh lovin mei lum lam chu ka hawi ta daih a, kun hniamin ka chal chu a rawn fawp zeuh a, engtin emaw ni hian ka awm tlat a, ni danga min fawh paw'n ka zam ngai der si lo va, ka thinte chu a phu rang dawt dawt vel a nih chu!

"Ka hrethiam e" ti supin a taksa aṭang chuan min nam hla a, inha tura a kal sawn chiah chu ka ruak huai thei maw le, a awihawm loh letling zawk, chuti ang em ema min han tidanglam thei chu hmeichhe awlsam takah ka inngaih phah rum rum. 

Thawmhnaw hain ka bulah bawk chuan a rawn ṭhu leh a, ka la hnawng deuh chuap bik bawk si a, a thawmhnaw ka tihuh vek ang tih ka hlau, min kuah kher lo mah se pawi ka ti miah lo. A ngawi reng a, huh hlau lo ang mai hian min kar cheh a, ka hnung lamah min uap lumtu awm bawk, ka hma lamah mei lum awm bawk, mahse a hma ang em em chuan ka rilru a khingbai tawh lo ve, kawr a ha ve tawh tlat. Ka kut chu a khawih niap niap a, mei a tuah ṭha leh zeuh ṭhin bawk a, kan awm dan chu a nuam vel vek a ni mai. 

"A so tawhin ka hria" aw thum bûl ri ah chuan ka meng zawk a, ka muthilh lai reng ka hre lo, muthilh pawh ka tum lo hrim hrim, mumang te chu ka la nei hman deuh reuh leh ta nghal a, Mazara lakah chuan ka inthlahrung thar hle mai, min ngaihtuah leh dawn si.

"Inbual fai la, kan mu dawn nia, i chau tak ang" tih leh thawh a rual nghal a, ka rin lawk ang chiahin min ngaihtuah leh ta tak tak e, ka lungawi lutuk leh a bula awm nuam ka ti lutuk chu ka nui sen sen tawp ringawt. 

Chawhtawlh thirah tui lum chu min chhun chhuahsak vek a, tui vawt nen a pawlh zawm nghal zat bawk a, a kut chuan tawk zeuh zeuhin tui a leih belh leh ṭhin a, sa ka la tih deuh a ring a ni maithei. Sahbawn awmna te, shampoo awmna te leh inbualna hmanraw chi hrang hrang awmna chu min kawhhmuh a, ka lo hre ve nghal zel bawk a, a tawp tawpah chuan min chhuahsan ve thei ta hram. Ruah a la sur reng a, mahse a hma ang em emin a sur tam tawh lo thung.

Ka inbual zawh chuan ka thawmhnaw hak tur ken luh chu ka inbel nghal a, a vawt ka ti ang reng phian mai. Tui luma ka inbual vangte pawh a ni mahna, tui luma inbual hi chuan inleih zawh te hian a vawt sawng sawng zel. Tui vawt erawh a dan a dang daih a, inleih zawh veleh a lum zawk ṭhin. Bathroom aṭang chuan ka chhuak a, Mazara chuan ngaihtuah tih hriat tak hian min rawn pan thuai a, eng nge a hriat ka hre lo, min ngaihtuah em em hi a ni tawp.

"Inbual a hrehawm em? Shampoo tih loh kha chu hmeichhe thil lam engmah ka kawl lo" a tih chuan ka lakah a inthlahrung tih ka hrethiam ve ta chiah, ka zui haw ringawt te chu inthlahrunna tham a ni zawk asin maw le, lung hi chu a va'n dum ṭhin tak!

"Hrehawm lo ve, mahse a vawt ka ti deuh" ka tih chuan che chhuak nghalin mei lum lamah min kai phei a, a hmaa min ṭhutpui ang bawkin min karcheh a, mei chu a tuah alh hluah hluah zui nghal bawk a, vawt ka ti rei lo hle. 

"Inai lum hmasa phawt la, kan mu dawn nia, i mut a chhuak tawh em?" a rawn ti leh a, tun ṭum zet zawng a ṭawng hmasa zawkah a ṭâng a ṭang ve ta mai, ka lakah chuan a inthlahrung mah mahin ka hria, chutia anga awm tur chuan ka duh lo a ni.

"Chhuak ve tawh tho, zep lovah chuan ka rawl deuh ṭhûm mai. Bike-ah hian thui tak ka la chuang ngai lo va, chu vang pawh chu a ni maithei" tia ka chhan chuan a ngawi ta reng a, inthiam leh chiah lovin a hmel ka en vat a, ka hlauhthawn ang a lo ni lo hlauh e.

"Mu daih zawk ila, ka hnung lam aṭang min kuah leh ang a, rizai sin pawh ka ngai tawp nâng" ka tih leh chuan a rawn nui suk a, mei alh hluah hluah lai chu thuk bula vutah a nawr mit vek a, min pawm kâng lawpin pindan lam min panpui nghal bawk.

"Leh lawk Mazar, ka sam hi a la ro miah lo. Sam huh chunga ka mut chuan lukham ka tihuh vek a ni mai, tiro leh phawt zawk ang" khuma min nghah thlak rual chuan ka ti leh hnuhnawh a, duh aiin ka hre chhuak tlai mah mah.

"A ho lutuk, lukham te chu huh mah se a suk leh theih a, a pho ro leh theih bawk" a lo ti awlsam mai thung a, khuma min kuah mut lai te chuan ka en reng ringawt a, a âwma min kuah beh chuan ka rilru pawh a nuam ve ta deuh.

"Ka nupui ni tura ka ruk chhan che hi i hria em?" kan ngawih dun vang vang hnu chuan a rawn ti hniam ruih a, ka la muhil bik lo tih a hria a ni ngei ang, keia tak pawh chu mut lam sawi hmasa zawk si kha ka muhil thei nghal lawk lo reng reng.

"Ka hria alawm Mazar, i thinlungah ka awm reng a, min theihnghilh thei tawh lo va, i nunah hmun pawimawh tak ka chang tawh tih ka hria a ni. I nupui nia i bula cheng tur hialin min sawm a, keimah ka inhriat chian tluk zetin min ruk chhan hi ka hre chiangin ka hria" ka ti ta duah a, min kuah nghet sauh chuan ka hahdam sawng sawng thei. 

"Ka thil tihsual lian ber pakhat chu ka kaltir che kha a ni a, zanin aṭang chuan engtikah mah ka thlahthlamin ka kaltir tawh lo vang che, min ring thei ang em?" a lam hawi zawng chuan ka inher nghal a, a hmai chul pah chuan ka bu ta nghauh nghauh. 

"Thil tam tak hmachhawn dun tur kan la nei a, chung hunah pawh chuan min ring zel turin ka duh che. Lunngaih hun i la nei ngei ang a, inhmu thei lo pawh ni ila i kiangah erawh ka awm reng ang" a thusawi tawp ber chuan ka ngaih a tiṭha lo lek lek zawk. 

"Kan awm dun theih loh i la ring tho em ni Mazar? Ring tawh lûl lo teh, i ngaihruatna a thleng dik thei bawk si, min tihlauthawng a nia, i tel lova awm ka duh tawh miah lo" ka tih chuan ka biang dawmin a nui suk a, mahse a nuih a za paw'n ka hre lo.

"Keini pahnih hi kan inṭhen thei tawh hleinem, eng thil mahin min ṭhen hrang tawh lo vang, a chhan chu inzawmna thuk tak kan nei tlat tawh a ni" tih leh ka chala fawh vawng vawng chu a rual a, a âwmah bei thlawpin ka kuah nghet zui nghal hle.

"Naktukah kan khaw ṭhenawma ka patea kha kan va hmu ang a, palai lam pawh tirh thlak ka ti har lo vang, i bula ka awm loh hi chuan ka khau a har zual" amah bawk chuan a rawn ti thum dam dap a, a sawi ang chuan a chet ngei ka ring, ka ring nghet bur.

A ngawih reng tâkah chuan amah hnung chhawn zawngin ka inlet a, ka kawng zawnah a rawn kuah ve nghal a, ka chhip sama a fawh zeuh hnu chuan ka mit ka chhing ta vang vang. Ruah tla ser ser ri chuan ka mut a tichhuak zual sauh a, inneihna thuthlung la chham chiah lo mah ila Mazara chu ka pasal angin ka ngai hmiah tawh a, ka hlim em em bawk. Ka kawng zawna a kut chu la kângin ka fawp leh hram a, a awmna a ngai bawkah ka dah thla leh a, tui taka muthilh chu ka duhthusam ber a ni rih tlat. Ka bula Mazara a awm tawh bawk a, eng thil dang mah ka ngâi tawh lo a ni.

Ka harh leh meuh chuan khua a lo êng kuar tawh a, ni pawh a chhuak fel dim diam tawh bawk a, dar eng zat tak nge a nih erawh ka hre thei mai lo. Ka kawng zawnah chuan ka pasal ang maia ka ngaih tawh Mazara ban a lo la inkham ruah a, nui sakin a lam hawi zawng chuan ka inlet a, chiang takin a hmel chu ka en a, hna a thawk nasa tih a hriat khawp mai. Sumo man kha a rul ta em le, ka la zawt miah lo tak e. Nizan khan ka zawt ang ka ti rilru ve kha a nia, muhil daih lo ila chuan ka zawt ngei ang.

A muthilh lai paw'n ka hmaa mipa muhil mêk hmel chu ṭha ka ti em em tho va, ka thlir ning thei ngâng lo a ni ber. A hnar ngul mawi tak te chu dim tê hian ka zut riak riak a, zing thawh vela hmuh atan chuan a ṭha mah mah a ni. Ka mumang a nih mai te ka hlau rum rum hial a, mahse zan lama kan hun hman dan zawng zawng ka ngaihtuah chhuah hnu chuan mumang mai mai a ni lo tih ka hre chiang tulh tulh a, hlim loh chu a harsa zawk a ni. Chutia hmuhnawm ti taka a hmel ka en tlawk tlawk lai chuan amah hnaih zawngin min pawt hnai thut a, ka va'n phu mai mai tak. 

"I harh reng maw!? I muhil emaw ka ti asin, i meng bawk si lo" ka tih chuan maimitchhing reng chung hian ding lamah a hmui a tiche zeuh a, a nui tih hrilh chawp ngai lovin ka hrethiam zui nghal bawk.

"Lukham ka ni lo a nia Mazar, mihring ka nih ve hi aw" ka tih thluk duai duai chuan lukham ang maiin a âwmah min pawm bet nghet sauh a, tha a ngahin a chak ang reng si a, min tinâ lek lek dawnin ka hria. 

"I rimtui" ṭial deuh ruai hian a rawn ti thum bul a, hmangaih berte hnen aṭanga chuti ang thu han dawn chu dangdai ka ti hle a, lawma hlim em em tur ka nih laiin ka lai leh tlat pek a, nuih pawh ka nui ṭha ngam lo hrim hrim.

"Thil zawh duh che ka nei a nia Mazar, i harh chiang tawh em? Min chhang peih dawn em?" ka ti hmasa tê tê a, a ṭawngmawh ren run ve ṭhin si a, zawh hmasak loh chuan biakin awmzia a nei vak dawn lo a tin ni!

"Ka ngaithla e" ti supin ka chal chu a fawp zeuh a, a khabe chu ka chhipah a nghat zui nghal bawk a, amah tak phei chu a la meng lo reng reng, a mut a la chhuak hle a ni ang ti dawn ila a chhuah tawh hmel chiah si lo va, biak leh loh chu ka tum deuh ringawt.

"Sawi la" amah bawk chuan a rawn ti dam leh dap a, ka hnung chu duat tak hian a chul leh zauh zauh ṭhin a, chuti anga awm chu nuam a ti tih ka hrethiam ve ta, sawi nghal mai lo chuan ka'n nui leh rih a, ka naupangchhia leh thut ṭhin. 

"Sumo man tur chu i nei daih tawh em? I rul tawh em ka tihna? Thil pakhat leh, engati nge khang thla tam tak chhung khan ka biak tlang theih ngai loh che?" a awm ngaiin a awm reng a, kei chuan a chhanna ka lo nghak deuh tawp. 

"Tlantea hnen aṭangin ka chanchin i hria tih ka hre mai, ka rul fel tawh e. Chu lam chu ngaihtuah tawh lo la, engkim ka kutah dah tawp rawh" ti nghet deuh charh mah se a aw chu hriat a nuam em em tho va, Tlantea khan a ṭawngmawh zual thu a sawi si a, ka bula pangngai taka a awm thei chuan min tihlim khawp.

"A nih leh engati nge ka biak pawh theih ngai loh che?" ka ti nawn leh ngat a, a hun lai kha chuan biak ka tum ve nasa ṭhin em bawk a, ka zawt lo thei lo, chhan ṭha tak chu a awm ngei ka ring. 

"Ka phone kha ka hralh daih alawm, Sim Card erawh ka la kawl reng thung, i phone number ka la nei tihna a nih chu!" a nui ri zeuh a, ri meuha a nuih tawh hi chuan ka awm a nuam veng veng zel, mahse tun ṭum erawh a phone hman lai hralh ngai khawpa pawisa a neih lo thu chuan ka thinlung a dek ta zar.

"Accident i tâwk kher kher kha a pawi ngawt mai, tâwk lo la chuan i rilru hah lutuk tur pawh a zia deuh ang maw le. Chutah kei lah chu i bula awm a hnêkin ka rawn hmu thei bawk si lo che a, ka tel lovin harsatna tam tak i paltlang tih ka hriat hian khrehawm ka ti tak zet"

"Hrehawm tihna chhan tur i nei hleinem Numam, keimah avangin hrehawm ti reng reng suh, ka duh lo. Ka bulah i awm tawh a, ka hlim em em zawk a ni" a awm dan a siam ṭhat hnu chuan min en ran chung hian a ti thum chhal a, ka biang tawn tawn chu a dawm ran bawk. 

"Ka pate hian min pawh hran phêt an tum leh ang tih ka hlau em mai Mazar, ka lêt duh tawh miah lo a nia, retheih huamin ka pan tawh che a, ka rilru hrethiam miah lo te bula awm reng ai chuan nang nena chen dun kumkhua ka thlang tawh a ni" ka tih chuan a ngawi ta vang vang mai. 

"I rethei ka tihna lam a ni lo a nia Mazar, a ni lo tak tak. Ka sawi tum tak zawk chu ka hmangaih che, thinrim suh aw? Ka thusawi kha a ni lo zawngin ngai lo hram rawh, sawi chhuah dan ka thiam lo a ni" ka tih zawm nghal mawlh mawlh a, min la en chiang sauh zui. 

"He ka thinlung sak tak tizawp theitu awm chhun ni awm reng i lo ni e Numam" tih leh min rawn fawh chu a rual nghal a, a tirah hmanhmawh lo mah se a duhthaw ta telh telh a, a chet buan buan ang hûin min fawhna chu a dam ru raih tho. 

Ka hmuia fawh mai duh tawk lovin ka biang leh ka nghawngte chu a fawh zawm zel a, ka khabe leh a chheh vel a fawh lai te chuan ka mur chhuak vekin ka hria. Ka chungah rawn bawkin ka hmuiah a fawp leh tawn tawn a, kei paw'n ka thiam ang tâwkin a tukhum sama ṭham chung chuan ka lo chhang lêt ve zel a, ka rilru leh taksa chu ka thunun theih piah lam thil a ni tawh ber. Ka mumal lo va, ka danglam a, ka zauthau em em bawk. Chuti anga min siam thei awm chhun chu Mazara a ni; amah Mazara chauh loh chu!

"Min hrethiam teh, insum theihna ka tlachham tak ngial dawn" vawi leh khata a awm sawn thut hnu chuan a ti khur dar dar a, a aw chu a phelh deuh phang a, kal thui zel ngat ila chuan ka thianghlimna ka hlan tawh ngei ang, ka hlan loh tâwk vela a chet tawp daih chhan erawh a awm ngei ka ring.

Khum aṭanga chhukin pindan chhung chu a chhuahsan ta daih a, a laka hmeichhe awlsam tak anga ka awm ziah chu ka indem hnuhnawh leh vel a, mahse a hun lai kha chuan ka dang thei meuh lo chu a nih kha le. Ka Bra te chu a lo tawlh thla deuh vek hman a, engtik laiin nge chung em em chu a lo khawih hman ka hre miah lo, ka hre miah lo tak tak a ni. Ka insiam ṭha zung zung a, a hun laia zah nachang hre der si lo kha ka zak thar ta hle. Pindan aṭanga ka chhuah chuan mei a lo chhem alh mek a, banga Sana intar ka en chuan dar 9 a lo ri daih tawh.

Ṭhutthlengah ṭhuin Mazara che vel chu ka thlir ta reng a, a che reng reng chu a dik thlup a, a felfai thlap bawk a, har chhuak thutin puih ka tum a, a lo phal lo nasa ngâng mai. A phal miau loh avangin tapchhak bul chhuat thing chinah ka ṭhu ta ringawt a, ei rawng bawla a che vel chu khabe dawm meuhin ka en tlawk tlawk a, ka mitah chuan a hmuhnawm thlawt a ni. Min rawn en leh zauh zauh ṭhin a, kei chuan ka lo nuih ringawt zel. Ani erawh a nui lo va, ei rawng a bawl mial mial a, a thil siam rim lah chu a la tui em em zui.

"Chaw ei khamah kan chhuak nghal dawn nia, i chhungte paw'n i awm lo tih an hre tawh ngei ang" dal chhuma purunvar leh sawhthing leh bahkhawr rawt pawlh thlak pah chuan a rawn ti a, ka chhungte chu loh theih lovin ka hre chhuak zawm zat a, Mazara chuan a sawi dik ngei ka ring.

Sawi chhunzawm lovin ka chhungte chu ka ngaihtuah zui ta rauh rauh zawk a, ka awm lo thut chu mak an ti ve khawp ang. Engmah lah chu an hre lâwk bik der si lo va, ka chungah an lungawi lo hle dawn tih ka hre chiang em em bawk. Ka pa ngat phei chu ka ngaihtuah thui duh lo zawk, Mazara nena kan inṭhen theihna turin hma la tawh lo hram se ka ti hle. A fanu ka ni a, a thisen ka ni a, retheih pawh huamin ka mipa hmangaih bula chen ka duh tih hrethiam tawh se ka ti bawk a, chu chu ka duhthusam pakhat a ni. 

Chaw kan ei kham a, ei rawng zawng zawng a bawl vek tawh avangin seng fel lamah ka awl ta vek thung a, min puih a tum chuan ka lo phal lo ve tlat. A ei rawng bawl lai ka en reng ang bawkin ka hmun phiat leh ka thleng sil lai chu min lo en reng a, a hmel tak hmu lo mah ila ka tukhum zat mer mer danah ka hre nghal vek thei. Thleng ka sil zawh chuan pindanah lutin kan insiam a, kan awm dan chu nupa tak tak kan ang tawh reuh tawp. 

Veng tawp lamah Bike-in kan inphur chho a, putea te inah pawh ka lut kawi duh rih ta lo. Kan thil tih tur chu zo fel vat ila, zalen takin nung tawh ila ka ti ber. Hmabak erawh a la ko viau chuan ka hria, chinfel ngai tam tak a la awm a, hma hun kan hre lâwk thei bawk si lo nen ka huphurh ru ang reng khawp, kan inṭhen hrang leh ang tih mawlh chu ka hlau a ni. Feh tura chhuak ṭhenkhat chuan  min en zui vang vang hlawm a, khaw pawna kan tlan chuan tawlailir nawra kal an lo tam khawp mai. 

Kan kalna tur hla lutuk a ni lo bawk a, minute rei lo tê hnuah khua kan lut a, khaw chhung chu a lo reh deuh dûk a, mitthi an lo nei lek chu niin, vuina hunserh an hmanna in kan tlan pelh lai te chuan Mazara hnung ka bawh daih ringawt. A nuam teh chiam lo va, motor dang vei vak pawh a tam lo hle a, lansarh a awl viau bawk. Mazara patea te in kawt kan thlen chuan kan chhuk nghal a, mahse kawngka a lo inkalh ta tlat mai. Veranda-ah kan ṭhu deuh tawp a, a patea te chhung chu kan lo nghak a ni ber. 

Rin ai takin kan nghak rei a, mitthi vuinaah an kal tih chu chiang sa a ni a, thlanmual lamah an liam zui nghal a ni maithei. Mazara chuan ka rilṭam leh ṭam loh min zawt a, a ṭam loh thuin ka lo chhang thung. Tukṭhuan kan ei tlai hrim hrim a, rilṭam a la hun chiah lo a ni. Min ngaihtuah tih erawh ka hre tho va, a bulah chuan ka chhungte bul ang lo takin ka zalen hle. Naupang pakhat tirin ei tur a leitir ta tho va, ei turin min tilui tlat lo se chuan ka ei miah lo vang, amah lah chuan a ei ve duh der lo zui. 

Chawhnu lam herah Mazara patea leh a nupui hmel kan hmu ta a, an fanu erawh ka hmu rih lo. In chhungah kan inzui lut a, thingpuite min siam nghal zung zung a, kan kal chhan tak an la hriat loh vang nge ni mak ti hmel pawh an pu lo. Chu bakah Mazaran min hruai tawh tlat a, khang hun lai aṭang daih tawh khan kan inngaizawng tih an hria a, mak ti lo pawh ni se a awm tho. Sitting room-ah chuan kan ṭhu ṭhap a, kan thu hrilh tur ber kan sawi hmain chaw ei tur te'n min sawm hmasa leh phawt a, Mazara erawh a hmanhmawh hmel viau thung. 

"Nizan khan nupui ka ru a" Mazara chuan a ti ta nge nge a, a patea te nupa chu an ngawi zui hmak a, kan pahnih chuan min en deuh hû bawk a, a ṭhawng viau a ni ang sawi mai tur hre lo ang mai hian an awm a, zah loh ka tum tehreng nen ka zak ru leh tlat tawh. 

"A va mak teh thut ve Mazar, dawt lah chu i sawi loh hmel bawk si. U Thankhuma tal i hriattir lo em ni? Nge kei hi min rawn pan hmasa ber?" a patea chuan a rawn ti a, kei chu sawi ve tur hre lovin ka lo ṭhu ngawi reng ringawt. 

"Pa ni tlâk lo mihring hnenah ka awm dan ka hrilh duh i ring em ni? Ka nupui ruk i hre hmasa ber a, palai pawh tirh thuai ka duh" ti nghet charhin Mazara chuan ka kut a rawn hum a, ka zam ru lutuk leh ka zah rukna pawh a zia ta deuh. 

"Chuti ang ringawtin thil a tih theih hleihnem le Mazar, in awm dan hian ka ngaih a tiṭha lo. I nupui ruk chhungte hian an duh lo che a ni maw? Ṭum dang i ang tlat lo, nangmah ang lo takin i hlauhthawn hmel deuhin ka hria" a patea'n a tih chuan 

"Hlauthawng e, ka nupui a ni lo vang tih ka hlau" tiin a lo chhang ram deuh hmuk a, Mazara hlauthawng ka vawi khat hriatna a ni a, mahse a hlauhthawn chhan chuan min tihlim ru em em tho. 

"Han inkawl deuh ula, i nupui ruk chhungte paw'n an fanu hi rawn ngaihven se, pangngai takin a sawi theih ang chû, tun tut tuta palai tirh nghal mai chu a mawi lo deuh a ni. I hming eng nge ni kha Bawihi?" min en chung hian a patea chuan a rawn ti leh a, ka hming chu ka lo sawi ve mai. 

"Mazara pawh naupangchhe zawk zawk i ni tawh lo va, engkim ngaihtuah hmasa vek phawt tur zawk i ni asin maw le" a patea thusawi avang chuan ka kun ngul a, ka zak hnuhnawh tak zet. 

"Min duhpui lo em ni? A pawi lo, i nupui tur a ni lo tak e. Kan hma hun zawng zawng ngaihtuah hmasa vek phawta nupui hi ru ka ni, kan va haw ang e" Mazara aw chu a nelawm loh ta hle a, a patea ṭawng danah chuan min duh lo tih a hriat ve ém bawk a ni. 

"Huat tur paw'n ka sawi loh kha maw le Mazar, thil hi ti rum rum zel suh. I pa tal hrilh hmasa ve phawt teh, chuti lo zawng thil a kal dik lo vang tih ka hlau. Numami pawh a chhungte'n an rawn ngaihven ngei a rinawm a, in inruk tawh miau avangin kawng a kaw deuh turah ngai ang" min kal sawnpui ta mai lo chuan a patea chu a en reng a, a thin a rim hmel hle bawk.

"Nang aiin Numami chhungte mizia hi ka hre chiang, kawng dang awm dawn se chuan ruk kher ka tum lo" ti deuh hmukin Mazara chuan min kai chhuak a, Bike-a a lawn rualin a hnungah ka lawn ve nghal a, bike a tih rum vut vut laiin a patea chuan 

"Palaiah chuan ka lo ṭang dawn nia, mahse a la hma mah mah chu a ni Mazar. Nizanah i ru chiah a, zawlkhawpui lama palai liam thlak nghal ringawt kha a dik lo a ni. Ni te han ral deuh se, i duh ang tak chuan kan che zawk dawn nia" a rawn ti leh hram a, Mazara pawh a ṭawng chhuak ve leh ta nge nge. 

"Ka lungawi lo emaw ti lo la, tun thawt thawta palai tirh lam ka sawina pawh a ni lo. Rei erawh rial ka tum lo va, chanchin ka rawn hrilh mai che u a ni. Kan va haw phawt ang e, kan rawn kal leh ang" tih leh tlan chhuah a rual nghal a, kei chu ka la ngawi ta char char. 

Khaw lam pana kan tlan chhung zawng chuan kan inbe lo tluan zak a, khaw chhung kan luh hnuah pawh kan inbe ta chuang lo. In kan thleng a, sawi tur leh tih tur a vâng kher mai. Zan lama kan mutna chu ka siam ṭha a, ka pawt mar vek a, mipa awmna mah ni se pindan chhung chu a fai ang reng phian. Mazara erawh ṭhutthlengah a ṭhu ngawi reng a, a rilru a hah hle a ni ang. A awmna bul vel ka tihfai lai te chuan chet sawn a tum miah lo va, ka khawngaih tak zet.

Ka en leh zauh zauh ṭhin a, a mit a chhing tlat a, a rilru hah dan tur chu ka hriatthiampui tawlh tawlh a, a nupui atana min ru chu a inchhir mai ang tih ka hlau. Kei min ngaihtuahin min chawm theih dan tur a ngaihtuah dawn tih ka hria, mahse kei chuan a hnen aṭang sum tam tak leh nawmsakna ka phut reng reng lo, ka phut ngai lo bawk ang. A pachhiat lai leh a bawrhsawm lai pawha kalsan mai lo turin ka zui tawh a, ka hmangaih a, ka hmangaih reng bawk ang. 

Ei rawng ka bawl lai chuan hnung lam aṭang min rawn kuah a, ṭawng a châk rih lo a nih ringin vawi khat mah ka la be lo va, a lakah chuan lungawi lohna ka nei hran lo. Ka dul zawnah kuahin thawmhnawin a hliahkhuh loh chin ka nghawng chu a fawp zeuh bawk a, chuti ang mai mai te chu ka hlimna a tling tâwk em em a, ngui chang leh lungawi loh chang lo nei ve tawh ṭhin mah ila tunah erawh hlim zel ka tum tawh, a chhan chu nupa kan ni tawh dawn tlat a, chu chu khawvela ka duhthusam ber a ni.

"Zanin chu pa Rintluanga te ina len chhoh kan tum dawn nia, hrilh loh reng zawng a dik chuang lo, an la hre dawn tho tho" zanriah ei lai chuan a rawn ti a, a tawpa tawpah chuan a ṭawng ve ta e, chân chhuah ka tum ngar ngar a, ka duh ang taka a rawn ṭawng hmasa chu ka hlim hle.

"I tih dan dan a ni mai, putea te chuan kan inru hi mak an ti ve ngawt ang. Tu pawh kan ṭhawngin ka hria, mahse keimahni pahnih kan hlim dun phawt chuan chu aia hlu a awm lo" ka insum rei tawh bawk a, ka ṭawng leh ta duah mai.

"Chuan maw Mazar, bawkbawn rawh hi ka vawi khat eina a nia, mahse a tui dan hi a dangdai reuh tawp, mei rim a nam chêk te hi rimtui ka tih zawng tak a ni" ka tih zawm zat chuan a lo nui suk a, bawkbawn rawh hmin sa chu min khehsak a, min rawn barh vel a nih chu! 

"A tui zual sawt em?" ka tana a pawimawhzia a inhre chiang vel tawh lutuk leh a thil siam tui ka tihzia a hre chiang lutuk chu ka nuih a za zawk, fiamthu ang reng deuh reuh lah hi thawh a ching thar emaw ni, mahse a inhmeh ve leh thei tho zel; a hmaa inhmeh lo ka tih theih tehreng nen. 

"Min barh kher a, a tui lo deuh sawtin ka hria" ka ṭawngkam avang chuan ei loh hmel zet hian min en a, a hmui chu a tisawi a, a khabe phir pawh a lang chiang leh tawh khawp, kei erawh ka nui khur char char thung.

Chaw kan ei kham a, ei inna ka sengfel hnu chuan veng chhak lamah bike-in kan inphur chho a, putea te chhungin min hmu dun chiah chu mak an va ti tehreng em. Pitei ngat phei chu ṭawng mai nachang a hre lo hial a, Tlantea a rawn ṭawng hmasa ber nghe nghe. Mazara chuan kan inruk thu chu tlang takin a sawi chhuak nghal tawp a, mahse putea te chu ka rin loh lam daihin an awm. An vai chuan min lawmpui a, kan inneih hun tur te an sawi nghal vel a, kei phei chu ka nui leh ta chiam.

Rilru zau tak kha an ni hrim hrim a, Mazara nena hlim taka kan awm dun an duh tih ka hria chu ka hlim veng veng mai. Thisen inzawmna tak nei lo mah ila ka chhungte ang tak takin ka ngai a, ka be bawrh bawrh ngam a, an bulah chuan ka titau ngam ṭhin hial bawk. Pitei chuan thingpui a lum a, sem turin min han ti ngei a! Mo ka nih huna ka chet sual loh nân te a ti vel a, lai tak ka ni. Tlantea lah a nghal ngaiin a lo la nghal reng a, min fiam deuh reng mai. Thingpui ina kan nuih ho dar dar lai chuan Tlantean phone call a dawng a, a biak dan chuan min tihamhaih ang reng. 

"Numam, i chhungte an lo kal mêk, u Vlin tunah khan min rawn hrilh. A sawi dan chuan hruai haw che an tum a nih hmel a, anmahni chiah an lo chho lo bawk" an inbiak zawh hnua a rawn tih chuan ka ding nghal thuai a, Mazara chu ka en vat bawk a, ani pawh a rawn ding rang hle. 

"Hlau lo la, i bulah ka awm reng ang. An hruai thla che a nih chuan palai tirhna remchangah ka ngai hmiah ang a, ka rawn tir nghal bawk ang" Mazara chuan min ṭawng thlamuan a tum tih ka hria, mahse ka hlauthawng ru em em thung si a ni.

(End of Chapter 30)