EPHRAIM MALSAWMZELA (LUKAWLHA) By Havali Adam (PART I)

EPHRAIM MALSAWMZELA (LUKAWLHA)

By

Havali Adam

Part I

"Awi!! A va'n mak em em, a mak ê" ka ti vawng vawng a, ka ṭhiannu chuan min lo en hâw a, ka thil hmuh leh hriat chu a mak ve êm bawk a ni.

"Chanchinbu kha dah la, i haw teh ang" School khata ka thawhpui; ka ṭhiannu ni bawk chuan a rawn ti a, a bag chu akin ka thil en lai chu a la daih a, la hmak lo se chu haw a hun tawh tih ka theihnghilh hial maithei a ni.

"Class 11 leh 12 khan kan kal ho tawh chiang alawm, lehkha a thiam thei si a, hna sâng tak a thawh ka ring daih tawh zawk asin le" bag ah ṭhat mawlh mawlh pah chuan ka la ti niah niah a, dawhkan danga ka ṭhiannu chanchibu dah chu ka en leh hram bawk.

"Chuti ang ka hre ve hleinem, ka tan hriat a ṭulna a awm lo va, chu vangin sawi tawh suh. A chanchin ka sawi zeuh a, nangin i sawi zawm char char ta thung a, tun hnaiah a lar ve êm a, ka sawi lang mai mai a nih kha!" 

"Mak ka tih em em chhan chu maw a lu a kawlh titih vek tawh a, School kan kal ho lai chuan a lu a kawlh miah lo. Insual a hrat thei tawp, School ṭan ni ah kan Senior te nen an insual nghal vel" 

"Engati nge maw i sawi char char mai le, lo chuang rawh, thawhpuite ring reng ringawt lo hian Scooty te hi neih tum ve rawh, i thawk chhuak reng awm tho si" he nu tak hi chu mi a fiam nâ thei mai sia maw, hre chiang lo tan chuan a nelawm loh khawp ang. 

"I Scooty-a chuan leh i khalha chuan hi a nuam êm a, ka lei lawk lo vang ka ring" tih leh a hnunga chuan chu ka rual nghal zat a, ani pawh khawmuang lo takin a tlan chhuak zui nghal a, ka la tla ṭep zui. 

Kan thawhna School piah kawng kawi kan tlan lai tak chuan dawr tê sirah hian mipa pakhat hi a lo ding a, eng drinks emaw ni hi a in a, ka mit a la tlat pek a nih chu! Kan tlan zel dawn emaw ka tih laiin kan hmaa motor chu a ding a, traffic a jam tih ka hrethiam nghal mai a, a jam rei erawh ka ring lo, tun ang hunah a jam rei ngai lo tlat. Kan piaha mi bawk chu ka en leh a, chu pa chuan min lo en reng a nih chu! 

Mit ṭhat loh vang pawh ni lo leh tun lai mite'n fashion pakhat anga kan ngaih tawh a tarmit dum vuah chu a la thla a, a hmel ka hmu chiang chiah chu ka rilruah 'Ephraim' tih a rawn lang nghal a, a hmel chu a lo va danglam nasa tawh tehreng em. Chanchinbua ka hmuh ang chiahin a lu a lo kawlh vek a, kawlh vek tih lémah a tukhum leh bek lamah tlém chu a ṭo ve thovin ka hria. Min hre tawh ang maiin min en reng a, kei chuan min en chian ang em emin ka en rei duh ta lo. 

Min hmuh theih lohna china kan tlan hnu chuan ka ngaihtuah lêt rauh rauh a, min hre tawh ang maiin min en te ka ti vel a, min hre ve bawk ang chu le. Class 11 leh 12 kan zir chhung zawng khan section khatah kan awm ho ṭhin a, zep lovah chuan a thiam thei thlawt a ni. Art stream lamah topper a ni ziah a, mahse hrem ngai te hian a awm ziah zel tho. Office kawtah te a ṭhingṭhit chang lah a tam na rawh e, kan class hmeichhe ṭhenkhat phei chuan an khawngaih a, an din hliah ṭhin nghe nghe. 

Section khata awm ho reng si kha a mimal nun leh an chhungkaw dinhmun lam erawh ka hre lutuk lo va, ka ngaihtuah peih lo ve hrim hrim bawk a, mahse an hausa tih chu an sawi thawm ka hre leh zauh zauh ṭhin. A mak ve ngawt mai, kum hnih ngawt room khatah awm ho ṭhin mah ila biak khat paw'n kan inbe ngai lo, khang hun lai kha chuan ka harhvang lovin ka ṭawng tam lo ve ṭhin si a, ani pawh kha ṭawng tam zawk zawk a ni bik lovin ka hria.

"Chhuk ta che maw le, vawi engzah nge ka sawi ngai dawn a? I beng a ngawng zawk em ni?" Chal ṭawng hlawki leh dawhthei lovi chu ka va han ngei mai mai tak, kawnga kal mi ṭhenkhat chuan min lo en phah zui. 

"Chalthansawm, ṭha takin a inhrilh theih reng, min hrilh ṭha ve mai rawh. I mizia vang a nih dawn hi bialpa takngial tur pawh i la hmuh zawh ve loh, naktukah min lam turin lo kal ang che" ti lêt zawt zawtin ka chhuk a, a ruka nui tet tetin in chhungah ka luhsan ta daih. 

"Zak rawh, kein lo kal ang che. Rawn lam che maw!? A teuh hian a hnai lo, naktuk chu a biak pawh min be hlek suh" tih chu ka ṭhiannu hnen aṭanga ka message dawn a ni a, in ka lut fel chiah tihah a rawn thawn nghal a nih hmel. 

"Nang hi zawng ṭhian fel tak chu i va ni chiang êm, naktuka min lo lam dawn avangin ka lawm lâwk  e" tiin ka reply a, a hmuh nghal loh avangin a tlan mêk a nih ka ring a, a hmuh hunah chuan a sa leh mai mai khawp ang. 

Zanah chuan Ngaihsaka a rawn lêng a, ani nen hian thla eng emaw zat chu kan inzui ve tawh a, buaina erawh kan nei ngun ang reng hle. Hmeichhe dang han thik chang ngah ṭhin viau mah ila engtin tin emaw ni hian kan inthlem lungawi ve leh mai zel bawk a, ka ngaihzawng neih tawh te zinga ka kawp rei ve ber a nih vang pawh a ni maithei, ka duh ve hle chuan ka hria. Mipa ngo lam pang tia sawi tur chi a ni lo va, a hang lam lek lêk zawk a, mahse hang chhe lutuk ang chi kha a ni lem lo. 

Ka vanneih vang te pawh a ni mahna ngaihzawng hi pathum lai chu ka lo nei ve tawh a, a hmasa ber chu College kan kal lai a ni a, a dawt pawh College kan kal lai tho a ni a, Ngaihsaka nen erawh hna ka neih hnua inzui chauh kan ni. Ngaihzawngah ka tluang hlei thei lo a ni ber a, mahse Ngaihsaka nen hi chuan nghet lo ang deuha lang si hian kan nghet ru zêk a, kum khat dâwn chu kan inzui ve ta hial mai. Veng khatah kan awm lo va, chu chu a buaithlak chang a tam ṭhin.

"Naktukah ka zin dawn a, eng nge ka lo hawn ang che?" ka kut chu a khal niap niap a, zanin chu zû rim a nam leh ta, in tawh loh turin vawi tam ka hrilh tawh a, mahse chhuanlam eng eng emaw ni hi a nei thei zel tho.

"Engmah ka duh lo" ka ti deuh hmuk a, ka aw chu thunun ka tum buai vel peih lo law law, duh leh thinrim ang paw'n min ngai rawh se, ka lung a awi lo reng alawm, vawi eng zah fakau nge zu in tawh lo tura ka hrilh ngai dawn?

"Tlêm tê chiah alawm a nih, ka in tam lo, ka in tam lo tak tak. Eng maw ka lo hawn ang che? Han sawi teh le, ka lo luh tirh aṭang tawh hmel hlim min la hmuh lo reng reng" ka rilru chu a rawn hre tlang chiang khawp mai.

"Zû in tawh suh ka ti a ni lo'm ni? A tam emaw a tlêm emaw in tawh suh, ka pa paw'n min hrilh tawh leh nghal" ka ti deuh hmawk hmawk a, sitting room-ah daih kan ṭhu a, ka pate room nen a inhnaih lutuk lo va, chu vanga ṭawng deuh pawp pawp pawh chu ka ni!

"Engtin nge i pa chuan min lo sawi a? I pa hian min lo ngaisang ru viau te hi a ni lo maw?" min kuah zui nghal a, a kuahna aṭanga tal chhuah ka tum bik chuang lo va, zawi zâwiin ka lung chu a awi ve leh mai bawk. 

"Zú in mi ka kawp reng a phal lo, a awmzia chu nang nena kan inkawp hi a ngaithei lo ṭan tawhin ka hria" ka aw chu a pangngai tawh hle a, ani erawh a ngawi vung vung a, a inngaihtuah a ni maithei, inngaihtuah chhuak mawlh teh se.

A haw dawn chuan ṭha takin kan inthlah thlap a, zû in sim a tum thute min hrilh lûam bawk a, amah hi fiamthu duh ve tak mai a ni a, fiamthu deuh reuhin a sawi nghe nghe. A fiamthu tak ná a, a rilruah a awm reng dawn tih ka chiang a ni. A tukah chuan a zin ta ngei a, thlawhnaa an chuan hmain min rawn bia a, School ka awm lai a ni a, zan lamah kâr khat deuh thaw a châm dawn thu min hrilh vek tawh bawk a, kan inbe rei lem lo. Pangngai takin kan inbiakna kan titawp a, a hna avanga zin hi a nei zauh zauh tawh a, tluang tak hian a rawn haw ve leh mai zel ṭhin.

Chhunah chuan Chalthansawmi avangin ka mood a off hle a, a ṭawngthei si a, hnial hneh loh tak ka ni. Kan thawhpui dangte chuan min en liam tawp a, zirtirtu te zingah hmeichhe awm chhun kan ni a, kan ṭawng duh barh barh thei khawp mai. Principal office erawh hmun dangah a awm a, a dang zawng chu office khatah awm khawmin kan ri laih laih reng a, mipa mah ni se an felin an ṭawng duh hlawm em em a, kum 3 lai chu kan thawk ho ve tawh nghe nghe. 

Ka thawhna School hi Private School a ni a, kum 3 liam taa an hawn chauh a la ni a, mahse a changtlungin mi hriat a hlawh viau a, Student pawh kan ngah phian mai. School an din tirh khan vanglaini aṭang hnaruak a awm thu ka ṭhiannu Chali nen kan hmu a, kan Subject a inang lo tho bawk nen kan dil ve a, vanneih thlak takin kan hmu ve ve ta a ni. Kan thawpuite pawh keimahni ang tho, School din tirha thawkte vek an ni a, chu vang pawh chu a ni ang kan inpawh hlawm em em ni! 

Chhun chawlh hun a rawn thleng a, School Canteen aṭang ei tur an lo chawi lut a, School Canteen tak pawh hi a awmna a la rei lo. Kan Principal hi a thluak a fin bakah an hausa ve hrim hrim bawk a, kumin khan Canteen a siam ta ngei a, ei siamtu te paw'n an siam tui thei hle. School din tirh te kha chuan hnathawk te'n Tiffin kan pai mai a, Principal ber paw'n a pai ṭhin a, kan ei khawm laih laih ṭhin. Pa inchengvawng tak leh nupui fanaute tana pa ṭha tak a ni a, sawi thui vak a ngai lo zawk, a hnathawkte min chhawr dan aṭang ringawt pawh hian a fel ve thlawt a ni.

Tun ṭum kan thil ei chu ṭum dang aiin ka ei tui zual a, mood off em em chung paw'n ka ei tui em em zel tho chu a nih hi! Thil ei pahin hmeichhe pahnih chu kan ṭawng melh melh a, keini pahnih hi zawng kan inhau rei thei tak tak lo a ni e. Chali chu a ei kham hmasa zawkah a ṭang a, tui in tura a kal sawn lai chuan office kawngka bulah mi pakhat hi a rawn ding a, a hmel ka hmu chiang chiah chu mak ka ti teh e! A kutzungṭang chuan min hui zeuh a, keimah min ko lo emaw tiin ka hawi hual vel phawt a, mahse keimah bak min ko der si lo. 

"Khawiah nge Principal Office?" office ka chhuahsan rualin a lo ti nghal deuh tawp a, Principal office awmna lam chu ka kawk ve mai bawk a, ngawi reng hian a kal sawn a, zep lovah chuan hawihhawm lo ka ti ru hle.

Office-ah ka lut leh a, ka thil ei lai ei chhunzawmin ka ei zo ta thuai a, tunah chuan ka puar leh pâng ta. Class ṭan hma darkar chanve lâi mai hun kan la nei a, phone ka khawih mual mual a, Ngaihsaka call ka tum deuh úk a, mahse a buai ka rin avangin ka call leh duh ta lo. Chutia phone kan khawih ṭhap lai chuan Principal a rawn lut thut a, kan lo ṭhu ṭha rang hlawm khawp mai. Ka dawhkan awmna lamah a la rawn kal zui a, eng tak hria ni maw! 

"Naktukah zirlai pakhatin Admission lo tih a tum a, lo buaipui mai te che? Pawisa an pe lâwk tawh a, buaipui a harsa lutuk lo vang, Documents lo endik a ni mai" dawhkan chunga a kutzungchal ti che zeuh zeuh pah hian Principal chuan a rawn ti a, ka ṭhutna aṭang ka tho thuai a, ṭhut reng a mawi tlat lo a ni. 

"Aw le Sir, ka lo buaipui dawn nia" zah tak chungin ka ti a, mi buk khum zeuh hnuah office aṭang chuan a chhuak ve leh mai bawk a, Admission rawn ti tur chu rin dan ka nei nghal a, mahse ka rilrua awm chu ka sawi chhuak kher lo thung.

School kan bâng a, a ngai te bawkin kan ṭhian dun chuan kan inphur haw leh a, min vin leh chiam tawh a, Scooty a khalh lai hian a inla pawngpawrh zualin ka hre ṭhin. Kei lah ka nghal ve ang reng bawk si a, a chang phei chuan kan insual lo chauh zel. Ṭhian inkawm ngeih tak ni lo ngat ila zawng kan va han inmil dawn lo turu buru tak, College aṭanga inkawm chho ṭan kan ni a, ṭhian dang hi kan ngai bik lo reng reng. Ngaihzawng a la nei mumal thei lo erawh a buaithlak ve det, nei lo rual pawh a ni tawh lo. 

Zanah chuan Ngaihsaka nen kan inbe deuh char char a, hna thila zin a ni a, a peih loh thu leh lo haw vat a châk thu a sawi reng a, tun ṭum chu kan inbiak dan a dang deuhin ka hria. Ṭum danga a zin te chuan kan inbiak paw'n pangngai takin kan inbia a, inngaihna thu kan sawi ngai vak ngai lem lo. Kan inbe zo va, rei meng tawh lovin ka mu nghal hmak a, ni dang bawkin zingah chuan thawh ka hai leh ta. Ka nu'n min sawi dawt dawt chung paw'n ka harh hlei thei ṭhin lo va, mut ka duh leh lutuk hi chu keimah tak pawh hian buaithlak tih châng ka ngah mai. 

Chawhma lamah kan zirlai naupang thar tur chuan Admission a rawn ti ta ngei a, naupang hmel fai ving veng, kum 16 bawr vel mi a ni a, ka rin aiin a puitling zêk leh nghal. Admission form ka fill up tir a, father's name tawpah chuan Late (L) tih a lo ziak a, guardian's name leh address-ah chuan ka mihring beisei ruk tak hming chu a lo chuang ta kulh mai. Hawrawppui ngei mai hian chu naupang chuan EPHRAIM MALSAWMZELA tih a lo ziak a, an inlaichin dan chu tum loh deuhin ka zawt ta ringawt. 

Chu naupang, Jacob-a chuan ṭha tak hian a patea a nih thu min hrilh ve mai a, a sawi tâkah chuan inanna lai an nei deuh bawkin ka hria. Chawhma lamah kan inbuaipui fel vek a, an class room tur leh an section awmna tur te ka kawhhmuh nghal a, school kal nghal min dil chuan ka lo phal ve mai bawk. A mak ka ti hman hle a, zirlai naupang ṭhenkhat hi chuan Admission tih nîa School kal nghal an peih lo ṭhin a, ani tê hi chu a danglam reuh tlat a ni. 

Class ka lak chhung zawngin zirlai naupang thar Jacob-a chu ka chík deuh bik a, chuti anga awm chu ka tum lâwk miah lo, a awm dan hrim hrim chu ka mit la zawng hlir a ni. Zirlai naupang dangin an ngaihthlak laiin ani ve thung chuan thil a ziak malh malh a, ka thil sawi chu a ziak ni berin ka hria. A tawpah zawhna ka siam a, Jacob-a chu a chhang thei pawlah a rawn ṭang ta nalh mai. A documents aṭang reng reng khan naupang thiam thei lo tak a nih ka ring lem lo va, ka rinna chu a dik dawn ngei e.

School kan bâng a, School Gate bulah chuan Jacob-a chu a lo ding reng a, mak ka ti ang reng khawp. Ka be nghe nghe a, hawna tur a neih leh neih loh te ka zawt a, a patea amah hruai tura a lo kal mék thu a sawi ve mai a, keini pawh kan ding khawmuang reng duh ta bik lo. School campus aṭanga kawng kawi thumna velah bike pakhat kan tâwk thut a, kan la insu teuh em em zui. Bike khalhtu zawk tlan kawi hman lo se chu kan insu hrim hrim ang, kan tlan pelh rualin ka hawi lêt a, chu bike khalhtu chuan min lo en reng a, mahse tu nge a nih ka hre chuang lo. 

"U Puii i ni em âw?" ka hriat ngai loh leh a number pawh ka save loh hnen aṭang message ka dawng hlawl a, ka seen ngei a, mahse chhan enah ka en lem lo, kan ṭhianho group velah ka luhsan leh daih. 

"Ka be duh hle mai che, hmaichhanah kan inbe thei ang em?" number ngai bawk aṭang chuan message a rawn thleng leh a, naupang zirtir tur ka inen lâwk vek tawh avangin ka awl ve rih tho bawk a, number lawng chauh pawh ni se message chhan lêt mai chu a ṭhain ka hre ta.

"Puii chu ka ni alawm, eng thilah nge min biak i duh a? Min lo hrethiam la, i number ka save miah lo va, kan inhria em le?" tiin ka reply a, a lo seen nghal vat a, number hnuaiah chuan a typing tih a lang zui nghal bawk.

"Dik tak chuan maw a serious ang reng a, hmaichhana inbiak ka duh tak zet a ni. I hman thei hram ang em? I la mu lo ti raw? Lo kal ta ila a pawi ang em? In in awmna ka hre tho va, ka lo kal ang aw?" message chu a rawn thleng zawm zawt zawt a, mak ka ti ru hle.

"Hmeichhia nge mipa i nih?" tih chiahin ka reply a, mipa a lo nih ngat phei chuan lo kal lo mah se a pawi miah lo, chutah zan rei lam a ni tawh leh nghal a, dinhmun derthawngah ka awm thei tlat a ni.

"Hmeichhia ka ni alawm, dawt ka sawi lo, min hlau suh. Eng lo a nia maw, u Ngaihsaka lam pang a nia, rei pawh ka be miah lo ang che" Ngaihsaka hming a rawn sawi lang chiah chu ka danglam nghal zawk a, eng thil tak nge a sawi duh chu ni ta ang. 

"Aw le, kan in i hriat thu kha i sawi tawh tho va, in kawtah ka lo nghak ang che" tiin ka reply leh a, ani paw'n a seen nghal a, message dang a rawn thawn belh tawh lo bawk. 

Ka hmel hriat ngai pawh ni lo leh a number pawh ka save loh chu nghakin kan in kawtah ka ding ta reng a, kan in kawt hi a zim lem lo va, ṭhutna tur kan siam nghe nghe a, chaw ei khawm leh thil tih ho vel pawh a rem viau ṭhin. Pawn light chu ka on a, ṭhutthlengah chuan keimahin ka ṭhu ngawi reng a, din reng zawng ke a kham duh em mai. Minute 15 hnu velah chuan hmeichhe pakhat, kei aia naupang tih hriat reng reng hi ka awmna lam panin a rawn kal a, min hre tawh ang mai hian min la nuih sen sen zui.

"Mut hun tawha ka rawn kal luih hram avangin min hrethiam hram dawn nia, mahse naktukah kan khaw lamah ka haw a ngaih hmel si a, zanin bak chu inhmuhna hun a awm lo a ni" a ti zung zung a, ka bulah a rawn ṭhu thla nghal a, kei erawh ka lo ngawi reng ringawt. 

"U Pui, khawngaihin u Ngaihsaka hi ṭhen rawh, i ṭhen lo a nih chuan nakinah i tan thil pawi a la thleng zawk palh ang tih ka hlau a ni" a rawn ti ta tlawng mai le!

"Mak i ti ti raw? A awm lo hran lo ve, mize thup thiam tak a ni. I ṭhen vat lo a nih chuan i la inchhir ngei ang, kei pawh ka inchhir lutuk tawh chu a nih hi!" a thusawi chu ka va han hrethiam lo chiang ber kher em.

"Eng nge i sawi awmzia? Eng vang ngawt chuan nge ka ṭhen ang a? Ani nen eng nge inzawmna in neih?" ka ti ve ta nge nge a, za lo tih hriat zet hian a rawn nui a, a nui tawp leh vat bawk.

"Mipa rilru chhe tak a ni alawm, ka pum chhunga a fa ngei mai chu damdawi hmangin a that asin. Mak i ti viau em? Min duh ve tak tak emaw tiin ka lo duh ve em em a, ka thianghlimna hial ka hlan a, a fa ka pai hnua ka hriat chhuah chu ngaihzawng dang a lo nei reng tih a ni"

"Enga!?" ka ti hâw a, ka mak ti lutuk chu ka meng phawk vak a, sawi tur dang ka hre rih hlawl lo, chu nu chuan dawt a sawi ti dawn ila dawt a sawi hmel loh bawk si. 

"A ngaihzawng chu ka chhui a, ka chhui chhuak ta che a, mahse ka chhui chhuah ni chuan min ṭhen a, ka duh lo chung min ṭhen a nih chu! Ka hmangaih em ka hre lo, mahse kan fa hial a that duh kha chu maw nâ ka ti tak zet" a mittui chu a hru zeuh a, engtin nge chuti ang thil chu a thlen theih zawk. 

"Vawi engzah nge a bum tawh ang che tih ngaihtuah la, a lan ang ngawt hi a ni lo. Khawngaihin ṭhen vang vang rawh, kei ni lo hmeichhe dang rilru a hliam ve leh ang tih ka hlau a ni. A fa paitu pawh min thlahthlam hreh lo a nia, sex in hmang tawh em?" a zawhna avang chuan ka mek phawk ngei mai. 

"Min en danah in la hmang lo a nih ka ring, ka lawmpui zawk ngawt mai che. Nang chuan i rilru a nât tak tak hma thu dik hrilhtu che i nei tal a, kei kha chuan tûmah ka nei lo. Ka dai sual ta reng a, siam ṭhat tum mah ila awmzia a awm tawh si lo. Ka sawi tur ang ka sawi zo a, a bak chu i kutah a innghat e. Min biak i duh hun a awm ngei ka la ring, ka phone number-ah khan i lo call tawp mai dawn nia" ti leh thawh a rual a, kan in kawt aṭang chuan a kal liam ta vang vang.

Mut tumin khumah ka lawn a, ka va muhil thei lo chiang em. Ka phone chu ka hmet êng a, Ngaihsaka phone number hmet chhuakin call nghal ka tum ut ut a, mahse ka ṭhulh leh ta zawk. Dar 1 lâi a ri dawn tawh a, ka thin a rim ru bawk nen ka ṭawng pawng pawng ang tih ka hlau a ni. Zingah chuan ka harh hma hle a, mu ṭha lo miau hek le. Zingkar aṭang Ngaihsaka chu ka call tluk tluk a, vawi khat mah a la pick up thei lo zui. Chhun lamah biak ka tum leh a, ka phone tlang thei tawh lo leh ta nghal a!

Class ka lâk laiin min rawn call ve ta thung a, mahse ka la lo chiang khawp. Vawi eng zat chiah nge ka call hman ang, vawi khat mah a la duh lo a nih kha! Ka rilru ber a buai ru bawk nen ka teaching te chu a dik lo nual a, a dik lo tihah keimah chu ni dang ka ang thlawt lo. Zirlai naupangte erawh chuan an hre ve kher lo maithei. Class ka la zo va, phone ka dawng leh nghal zat a, ka pick up ve ta e. A rawn haw hma theih hlauh dawn thu a sawi a, chu chu ka duhthusam ber a ni rih bawk.

Chali a dam loh avangin Bus-a haw mai ka tum a, ka thawhpuite'n min thlah tum viau mah se ka hnar fithla ta vek. Ka bul hnaiah tûmah awm rih lo se ka duh a, a chhan chu ka rilru a nâ tih an hre palh ang tih ka hlau. Bus Stand ka thleng a, Bus lah chu a vân hmel em em mai leh nghal. Kawngpui chu ka en ngawt ngawt a, ka ngaihtuahna erawh hmun hla takah a awm thung. Chutia ka din ngawih reng lai chuan ka bul lawkah motor var lian zet mai hi a lo ding a, chutah ka zirlai naupang ni ngei tur hian

"Miss" a rawn ti a, min kotu awmna lam chu ka hawi phei nghal a, zirlai naupang lo lut thar Jacob-a lêk chu niin, mahse a hma lama ṭhu zawk chuan ka mit a la rang hle. 

"Miss, lo chuang ve rawh, patea'n ko rawh a tia" Jacob-a bawk chuan a rawn ti leh lauh lauh a, nui lui sakin lu ka lo thin khum a, a khalhtupa lah chuan tlan chhuah mai a tum hmel loh em em mai leh nghal.

"I lo chuang dawn em?" min en ngur chung hian a patea zawk chu a lo ṭawng chhuak ve ta alawm, mahse a aw chu a thumin a puitling tawh tawp, a awm ve tho mai, class 11 leh 12 kan nih ho lai kha chu a rei ve tawh êm a ni.

"Chuang lo mai ang" ka tih chuan hma lam hawiin a tlan chhuak nghal a, Jacob-a chuan min lo thlek zui vawng vawng a, ka nuih lui leh sak ringawt. 

Rei lovah Bus a rawn thleng a, ka chuang lut nghal a, mite hmuhah chuan ṭhat hmel viau angin lang mah ila rilru leh ngaihtuahna erawh a va'n buai ru si êm. Zanah chuan Ngaihsaka nen kan inbe leh a, engmah ka la sawi duh rih lo va, hmaichhan ngeia sawi chu a fuh zawk dawn tlatin ka hria a ni. Zan dang ang lo takin ka rilruah tlaia ka thil tawn chu a châm reng a, Ephraim-a hmel khan ka mitthla a luah a tlat a, a mak ve ngawt mai. Ni dangah ka ngaihtuah chhuak ngai pawh a ni der si lo, Jacob-a Guardian ang deuha ka hriat tâk vang nge ni a patling ruih tawhin ka hria.

Ni hnih a ral a, Ngaihsak chu a rawn haw ta ngei e. Engkim chu ka sawi nghal pawp pawp a, kan awmna lai hmun fianrial a ni tho bawk nen ka ṭawng nêm lo hle a, ka thin a rim ve êm a ni. Chhanna mumal tak min pe thei miah lo te chuan ka rilru a tinâ zual a, ka vin hrawk hrawk a ni ber. A fa paitu hnen aṭanga ka thu hriat zawng zawng ka sawi chhuak chiah chu phat ngaihna a hre lo reng reng, a ngawih vung vung hnuah ngaihdam min dil a nih chu! Ka tan chuan a nâ asin, phatsan ka lo ni reng a, nunna pawh ngai hlu lo mihring nen kan lo inkawp char char tih ka hre chhuak chiah chu maw ka nâ ngawih ngawih. 

Chumi ni là lâ chuan inṭhen ka rawt nghal a, dik tak chuan pha mawlh mawlh se, dawta puh a nih thute sawi se ka ti a, mahse chuti ang thu a kâ aṭang engmah a chhuak si lo. Inṭhen erawh a duh lo nasa mai a, mahse ngaihzawng nei reng chunga hmeichhe dang kawp thei mipa bulah chuan lêt leh ka tum tawh lo chiang khawp. Thla eng emaw zah kan lo inzui ve tawh a, ka duh ve tih chu ka pha lo, mahse inphatsanna ber kher chuan min rùn lutuk tlat. Chutah damdawi hmangin a fa a that leh ta zel a, engtin nge a bul hnaiah ka lo awm reng ngam zawk ni!

Kar khat chhung chu ka mumal lo hle a, ka hna lam thlengin a nghawng a, Ngaihsaka lah chuan ngaihdam min dil bâng bawk si lo. Hriattir ka duh loh tehlûl nen ka chhungte paw'n kan inṭhen tih an hre ta nge nge a, Ngaihsaka vang vek a ni. Sawi zah a nei bawk si lo, kan in kawtah zan rei tak tak thleng a awm a, ka ngaihdamna dilin a au lauh lauh a, a chet dan avang chuan ka chhungte lakah ka inthlahrun phah hle. Ka u chiah hi Pastor a ni a, thingtlang khaw lamah a nupui fanau te nen an awm a, ani paw'n kan chanchin a lo hria a ni ang, ngaidam turin min ti nghe nghe.

Thla a ral a, Ngaihsaka chu zu rui chungin kan inkawtah a rawn chuangkâi a rawn chuangkai ta mai a, ka pa mit pawh a tikham ta. Ka pa chuan ṭha takin in chhungah a hruai lut a, sitting room-ah kan ṭhu ṭhap a, zawhna chi hrang hrang a zawh hnuah ka lam a rawn hawi a, Ngaihsaka ngaidam tur chuan min ti a, awlsam takin ka lo ngaidam mai bawk. Chuti maia ka ngaidam nghal thei mai chu mak ka ti ve tho, Ngaihsaka tak pawh a hlim hle a, mahse a va hlim rei si lo êm.

"Ka ngaidam che a, kan inkawp leh dawn tihna erawh a ni lo. Kan inṭhen hlen vang vang tawh dawn tihna a ni zawk, khawngaihin ngaihzawng angin min en tawh lo la, hmel hriat erawh kan la ni thei mahna" tih chu kan in a rawn chuankai tawp ber zana ka lo hnarna thu a ni a, chumi zan aṭang chuan vawi khat mah a lo kal leh tawh ngai lo.

Ngaihsaka nen kan inṭhen aṭang chuan ngaihzawng neih leh lam pakhat mah ka ngaihtuah tawh lo va, Chali phei chu min phatsan dan zawng zawng a hriat tirh khan sa tak a ni. Ân khum hrep a duh hial a, keima'n ka phal lo mai mai zawk. Phal ngat ila chuan a ṭawng nâ khawp ang, ka hre chiang ve tâwk. Thil mak deuh erawh chu kan han inṭhen ta chéng a, rilru nâ vût ang kha ka ni thei miah lo. Ka thawl hawk emaw tih theih turin ka awm tlat a, mahse mi dang bulah ka sawi chhuak duh kher lo. Ka rilruah ka pai tawp a, chung thleng thleng mi dangte hriat ṭul ka ti lo a ni.

Ka hun hman dan a pangngai chak viau a, ka hna lamah pawh ka insawrbing leh thei ta. A hma ai mahin ka insawrbing zual a, Matric exam erawh la hla deuh mah se naupangho chu ka zirtir thui tawh hle thung. Private School a nih angin zirtirtute'n Class 10 leh 12 inkar kan kawp tawp a, sawrkar school-a thawkte ai chuan kan buai zawk ngei e. Hlawh lam erawh a ṭha letling viau thung a, hah deuh pawh ni ila a zia phian tho. Ka thawhna School hi Class 10 leh 12 inkar a ni mai a, kum tinin zirlai naupang kan la punbelh ziah bawk.

"Kan kawm thlang deuha in khu an lo luah lút reng tawh a ni maw? Kei pawh vawiin khan ka hre chiah, a lianin a hmun hma a zau ṭha si a, a nawm hmel khawp mai" chaw ei laiin ka nu chuan a ti siam siam a, awm an awm tawh tih ka lo hre lo hrim hrim. 

"In khu a lianin a zau ṭha si a, an ṭhenawmte sawi danin mi pahnih chiah an awm dawn a nih hmel" ka nu bawk chuan a ti leh a, ka pa'n a sawi chhunzawm nghal a, kei chu ka inei puar tawh tho bawk nen ka kham ta daih. 

Ka nute chaw ei kham nghah pahin sitting room-ah ka awm a, ka phone chu ka kheuh mual mual a, vawiin lam chanchin Chali hnen aṭang message ka dawng nual a, vawiin khan kan thawhpuipa'n mipa a kalpui lai a lo hmu fuh a ni awm e. School-ah a chhaih chiam a, Chali lah a pha nasa mai bawk si, chung vel bawk chu a ni a rawn sawi leh; a rilruah a awm ve ngâng a ni ang. Ka nute'n chaw an ei kham a, tih tur ṭul ang âng chu ka ti nghal zung zung a, ka hman hnu chuan pawnah chhuakin Chali ka call zui nghal bawk.

Kan in kawta ṭhutthleng siam chawpah chuan ka ṭhu a, van lam enin ka ṭawng melh melh a, vawiin lam chungchang erawh kan sawi leh tawh miah lo. Kan School naupangte chanchin zawk kan sawi a, a subject an thiam lutuk loh thute a sawi a, kei chu ka subject an thiam loh em em pawh ka hre lo. A bikin class 11 leh 12-ah ngat phei chuan ka class nuam an ti ber a, engmah ni lêm lo mah ila nuam ve duh tak a ni. Chutia kan inbiak lai chuan kan in gate bulah Jacob-a ka hmu hlawl mai, ani paw'n min hmu chu mak a ti hmel hle.

"Eng nge kan vengah te i tih? Zan zanah leh nghal, lawk aw Chal, ka dah lawk dawn" tiin phone chu ka hmet tawp a, Jacob-a chuan nui chung hian min en reng a, a kutah eng emaw ni a keng a, ka zawhna pawh chu a chhang ta chuang lo.

"Miss, hei hi in veng maw!? Hei hi in in em ni?" kei min en lova kan in thlek dêk dek pah chuan a rawn ti daih a, ka kal hnaih zel a, amah chauha zan zana a chhuah chhan chu ka hre châk ru viau.

"Aw, kan in a nih hi! Tun ang hunah eng nge i tih?" ka ti leh deuh tawp a, zawhna dang han zawh mai tur a vâng ve êm bawk a ni.

"Patea'n aieng lei turin min tir a, dawr awmna min hrilh a, ka hre leh tawh bawk si lo va, ka kual hrep alawm, he hi in in a nih chuan veng khatah kan awm ho dawn tihna a ni maw?" a rawn ti reuh a, a thusawi awmzia ka la man mâp lo zui. 

"Khawiah nge in awm? In rawn awm thar dawn em ni?" ka ti ta nge nge a, a lo bu nghauh nghauh a, School a nih tawh loh vang nge ni min nêl hmel phian leh nghal.

"Miss i hman em? Kan in tharah khuan lo kal ve chhin la, vawiinah kan awm chiah a, mahse i hman loh chuan a pawi chuang lo" a ṭawng pah chuan a nui sen sen a, kan inhriatna a la rei lo tehreng nen ka ngaina nghal ringawtin ka hria.

"Hman loh pawh a awm lo" ka ti thawp sep a, ka hman miau reng a, naktuk inrinni a ni tho bawk a, weekend-ah hi chuan indah free ka tum thei khawp mai. 

"I duh chuan kan inah lo kal ve chhin la" tih leh kal a rual a, puilting pûi tawh si zawk chuan ka zirlai naupang mai mai thusawi chu awihin ka zui vel a nih chu! 

A chhan pawh ka hre bik lo, a kalna apiangah chuan ka zui thla zel a, an in kawt kan thlen chuan bike pakhat leh motor pakhat a lo inhung a, rilru fim ka put hnu chuan nikum aṭanga kan kawm thlanga in sa te kha an ni tih ka hre chhuak chiah. Tin, chaw ei laia ka nu sawi kha a ni tih ka hre bawk a, in pangngai tur a nih pawh ka ring ngai lo. Eng emaw zawrhna tur emaw ka ti zawk a, mahse awmna tur in a lo ni reng si. Jacob-a chu in chhungah ka zui lut a, ka thil hmuh chuan min va barakhaih chiang mai mai tak! 

"Ka rin ai i rei" in chhung a zau si a, a aw chu a thum ṭha hem hem ngei mai.

"Min hrilh dan kha ka hre leh tawh si lo va, ka zawn hrep hnuah dawr ka hmu ve chauh" tiin Jacob-a chuan a patea chu a thil lei a pe a, a patea paw'n lo lâk pahin ka lam rawn a hawi zawk a, hawi lêt leh nghal mah se a rawn hawi nawn rang teh e!

"Eng lo...ka lo kal ve ringawt" chuti ang em ema ka zam chu ka la hre ngai lo, a ei rawng bawl lai chawl meuhin Jacob-a patea chuan min en a, Jacob-a chuan min melh tawn zak zak a, a va nuam lém lo êm.

"Pate, kan Miss saw i la hria em? Kan veng a lo inang reng a, kan kawm chhakah khian an in pawh a awm, a chhung a changkang hmel tawp" Jacob-a biakna chuan a tihawi sawn thei ta hram a, chuti ang em ema min en chiangtu chu ka la tawng ngai lo.

"Miss, chaw kan la ei lo va, i ei tawh em?" Jacob-a bawk chuan a rawn ti leh a, ka zirlai mah ni se min nel ka ti dawn nge, min be peih reuh lutuk chu ka mak tih a tling khawp mai. 

"Ka ei tawh e" tih chauhin ka chhang a, ka ṭhu dawn nge ka ding reng zawk dawn tih tak ngial pawh ka hre rih lo, ka hma maia che mawlh mawlh te pahnih chuan ka mit an la thlawt a ni. 

Haw ka tum lai takin ruah a rawn sur leh ta nghal a, a sur hun chu a dangdai tak zet. Nipui kan chuangkai ṭan tawh a, khaw lum lutuk tur tih ziaawmna te pawh a ni mahna, mahse engati nge ka haw dawn velah a sur kher ni! Kawngka lian leh hlai zet bulah chuan ka ding ngawi reng a, ruah chu a sur tam phian a, a buak hian a baw hawk hawk a ni ber. Ka bul chu a rawn thaw vûk a, Jacob-a patea ngei mai chuan chak zet hian min rawn kal pel a, pawnah a chhuak zui nghal bawk. 

In chhung aṭang a che vel chu ka lo thlir reng a, car bula bike inhung chu a khuhna ni awm tak hian a khuh sawk sawk a, ruah do pawh pawisa miah lova a khuh mawlh mawlh mai chu mak ka ti ang reng. Kawngka bul a rawn thlen chuan min en zeuh a, hawi sawn chiang tak ka ni. Inhru hul lem chuang lovin ei rawng a bawl chhunzawm leh nghal a, tih tur leh sawi tur a va vâng duh mai mai tak. Ka inngaihtuah a, ka zirlai naupang thû thua ka awm vel chu nep ka inti hle a, Jacob-a lah sawi tur hre tawh lo ang maiin a ngawi tlat mai bawk si.

Rei lovah ei rawng bawl zovin chaw an ei dawn ta mai, veranda-ah tal awm daih chu ṭha ka ti a, mahse veranda pawh ruahin a theh huh nasa tawh mai si a, ka dinna ngaiah ka ding reng ringawt. An awmna lam ka hawi phei zeuh a, Jacob-a patea chuan min lo en leh reng tawh chu niin, a kutah thleng a keng bawk a, chaw ei tura min sawm ni awm tak hian thleng chu a lek zeuh a, ka lu ka lo thing thuai a, bu nghatin chaw a khawrh zawm nghal ve mai bawk.

Tum loh deuhin mi chaw eina bulah ka ding ngawi reng chu a ni ta mai si a, ruah pawh a hma ang em emin a sur hnem tawh lo va, haw mai ka duh rum rum nghe nghe a, mahse kawl phe zawk zawk avangin ka la haw ngam rih teuh lo. Chaw an ei kham a, lo awm ve reng chu a va nuam lo duh mai mai tak. Jacob-a chuan a tifel zung zung reuh a, thleng thlêngin a sil nghal vek a, a patea erawh ka dinna lamah bawk a rawn phei leh ta. Ka bul chétah a ding a, a mi uap lah chu a ná reuh zêk leh nghal.

"Ruah hi han sur hán leh deuh se ka thlah dawn che a nia, i duh chuan tunah pawh ka thlah thei tho che" a tih chuan ka lo ngawi reng a, min bia pawh a ang chiah lo, min bia ni se chu min en ve bawk ang chu le.

"Kum a liam hnem tawh hle mai" amah bawk chu a rawn ṭawng leh a, kawngka ka nghen ang chiah chuan a ngheng ve a, a kekawr iptê zenin pawn lam a hawi a, ka ṭawng dawn nge dawn lo tiin ka rilru chu a insual nasa leh ta khawp mai. 

"Eng nge Jacob-a hi a àn hmel?" ṭawng lo thei ka ni tawh lo ve, zawhna min zawt miau a, chhan loh zawng thil mawi a ni nâng, min zawh tum ber pawh ka man nghal vat.

"A la ṭha rih viau e, a thiam thei ang ka ring" tiin ka chhang ve mai a, an chaw eina dawhkan lam ka hawi a, Jacob-a hmuh tur a lo awm tawh reng reng lo, thawm a reh ka ti ru reng a ni!

"Ti rawh ka thlah ang che" ti leh din ngil a rual a, ruah chu a hán duak tawh a, kawl erawh a la phe nasa em em a, ka phone chu a them paw'n ka khawih ngam lo hrim hrim. 

Veranda bul step-a ka chhuk lai chuan ka tlu thlawrh a, nâ tihna lam ai mah chuan ka zak ngawih ngawih zawk. Ani erawh kawng zawl a lo kal thleng daih tawh a, mahse min rawn pui vat tho. Ka zak hnuaiah chawiin min tung ding a, chutah ka kal leh chiah chu ka'n tlu leh hram a nih chu! Nui suk hian min kai tho leh a, ka nuih a za lo chiang khawp mai. Mawng bal vekin motor-ah ka chuang a, ka inthlahrung ve reng. Ruah do meuha a bike a khuh ṭhat duh danah thil a uluk hmel bawk si a, mawng bala ka chuang chu a lawm viau ka ring lo. 

"Khawi laiah nge?" motor khalh pah chuan a ti sup a, kan awmna lai ka sawi a, inbe chhunzawm lovin kan ngawi dun leh vang vang a, kum hnih zên záwn lo inhre ve tawh mah ila kan inhmuh lohna a rei lutuk tawh a, sawi tur kan vân ve ve ni berin ka hria.

Kan in kawt kan thlen chuan ka chhuk nghal thuai thuai a, a mawiah lawmthu te chu ka sawi ve tak ná a, ka lawm em em pawh ka hre lo. Tawn ngai loh tawng ang maiin ka inring tâwk lo em em ringawt a, ka thin phu te lah chu a rang leh ta nghal a, ka awm dan chu a mak ve thlawt a ni. Kan in kawngka ka hawn dawn ṭepah ka hawi lêt a, a lo tlan liam chiah thung a, kan awm dun lo chiah chu ka rilruah zawhna a lo lang nghal zut zût leh lawi si a nih chu! 

(End of Part I)