DUMO DRIVER By Havali Adam (CHAPTER 37)

SUMO DRIVER 

By

Havali Adam

Chapter 37

"Nizan khan thil dang tih tur ka neih avangin ka rawn lut kawi zui duh ta lo va, i ṭha zel maw kha?" Mazara betu chu ka vawi khat hmuhna a ni a, kawngka bulah a la ding reng a, hawihhawm hmel takin a nui sâng bawk.

"Ka ṭha ve zel e, lo lut teh khai" Mazara chuan a lo ti ve mai a, an inbiak dan aṭang chuan inhmel hriat sa leh ṭhian inkawm ngeih tak ang mai an ni a, mahse Mazara te chuan ṭhian a kawm vak lovin ka hre bawk si, an inbiak dan leh an awm dan hrim hrim chu mak ka tiru khawp mai.

"Hei hi i nupui em ni?" min en pah hian chu pa bawk chuan a rawn ti leh a, Mazara paw'n a nupui ka nih thu a lo sawi ve mai a, in chhungah lo lutin ṭhutthlengah an ṭhu a, pu Kawla chaw ei siam tum pawh a ṭhul leh rih phah ringawt.

"A va thingtlang hmel lovin nuipui i nei hmelṭha hle mai, ka sawi awmzia chu a hmel ang hi he khuaah hian ka hmu ngai lo êm a, in huat thu ka sawi lo turah ngai ang" Mazara hma chhawn zawnga ṭhu pa chu ka en zeuh a, nui chung hian min lo en ve reng a, ka hawi sawn rang hle.

"Khawpui nula ni ṭhin a ni a, chu vangte pawh chu a ni mahna i hmuh ngai loh" Mazara chu kan awmna lamah a rawn thle pah deuh kher a, tawi tê hian a nui suk a, mi dang bula min sawi dan chu ka rin loh lam daih, khawpui nula ka nih ṭhin thu a sawi lan duh ka ring lo a ni ber.

"A nih chu maw le, he khuaah hi chuan ka rawn thleng phei khât fahran lo va, a hmel hi a dang bik khawp mai. Ka lo kal chhan tak chu thil dang daih a nia, eng pawh ni se i ke avang hian engtia rei nge hna thawk lovin i awm ang?" pu Kawla nen chuan Mazarate pahnih ṭawng chu kan hre pha vek a, an hmuh phak reng tap chhakah kan ṭhu nghe nghe.

"Ka hre lo le, nimin avang khan lawmthu ka sawi nawn leh ni se, i ṭhiante'n min rawn chhan mah se nangmah ber khan min chhan chhuakah ka ngai ta zawk" Mazara chuan a ti thum dam dap a, lawmthu sawi lai em em te hi chuan nuih ve ṭhin tur a nia, ka hmuha a nui tih loh kha chu a nui leh tawh rih lo hrim hrim.

"Tui ka thiamna hi Pathian malsawmna a nih ka ring, mi dang tui tla pawh hi ka chhan hnem ve tawh fû asin. A thu hrimah chhan i har hleinem, i ke kha nâ lo se chu i rawn hleuh phei theih dawn khawp kha le" chu pa chu a nui ri hak a, an inkawm ngeih hmel tak zet. 

"Tukṭhuan i ei tawh em? Kan ei dâwn hnai a, kan rualin lo bar ve nghal mai ta che?" zawhna a zawh rualin Mazara chuan min lo en leh zeuh a, kei paw'n chaw ei siam turin min ti tih ka lo hrethiam ve nghal mai bawk. 

"Ngawi teh, tun tut tutah chuan ka kilpui rih lo phawt mai ang che u. Ka lo kal chhan ber pawh ka sawi thei lo dawn alawm le, in kawta thingkhawn saw in ta a nih ka'n ring ringawt a, kan School lamin Farewell kan hmang dawn a, thing kan mamawh hnem ang reng si a, ka mi zawh apiangin nangmah hi min rawn kawhhmuh ta a ni" 

"Kan thingkhawn chu a ni ngei a, thing lei i duh tihna em ni? Min hrethiam la, i hming kha ka theihnghilh palh tlat mai" chaw ei siam pahin Mazara te titi chu ka la ngaithla pah reng a, thing lei lam an sawi ri chiah phei chu ka bengkhawn sâwt khawp. 

"Ka chhang rual pawh pha lo tur i ni bawk a, pa Chhar emaw pu Chhar tiin min lo mai rawh. In phal hlauh chuan in thingte hi lei ka va'n duh êm, Farewell mai bakah nakum lamah kan la mamawh ṭeuh dawn tho tho. Khawpuiah hi chuan a buaithlak ṭhin deuh a, School-a chaw chhumtu te han tuah mai tur thing kan haihchham châng a tam a, chumi atan pawh chuan kan mamawh reng a ni ber" 

"Nang meuhin i duh a nih phawt chuan phal loh tur a awm hleinem, pa Chhara hi thingpui rawn siam teh Numam, ani hi nimina min chhan chhuaktu ber a nih hi!" Mazara sawi ang chuan ka che chhuak nghal a, ka chhungril lam chu a hlim ru veng veng a, a chhan pawh thing hmanga sum hmuhna kan neih dawn vang a ni. 

"Chhan chhuaktu ber ang chuan min sawi bik lo teh, i tizahthlak êm mai. Khawpuimi ni si hi thingtlang lam nuam ka ti tlat lawi a, lènkhang han zar te, nghakuai han khai te hi nuam ka tih zawng tak a ni a, lui lam hi chu ka ngaina ve hrim hrim. Dynamo erawh hman an khap em kha?"

"Dynamo hmanga sangha man tak hi chu YMA lam hian an khap bur a, mahse Dynamo tel lo paw'n a man theih tho alawm, nakin zel atan humhalh chin te hi nei se ṭha ka ti khawp mai" chuti ang em ema Mazara ṭawng duh chu ka la hre lo, mi dang bulah leh nghal, keimah min bia ang mai a niin ka hria.

"I sawi dik chiah, humhalh chin hi neih a hun tawh viau a nia, in khaw YMA President te pawh biak lo tum chhin rawh. Han dam ṭha ver vawr phawt la, kan School mamawh tur ang i neih apiangah chuan rin che ka duh" pa Chhara chuan a tih zawm zat a, Mazara erawh a lo bu nghat ringawt.

"Kha aw pa Chhar, chaw lah chu ei i tum bawk si lo va, ka pasal i lo chhan chhuah avangin i chungah ka lawm hle mai" thingpui pek pah chuan ka ti a, ngaihthlak nuam thei ber turin ka ṭawngkam chu ka uluk a, Mazara chuan lungawi hmel zet hian min lo en reng bawk.

"Lawmthu sawi tawh rih lo teh u, luia kan kal remchan ni tak a ni hrim hrim alawm, School mamawh min leitir dawn bawk si a, in nupa chungah hian ka lawm lâwk zawk teh asin" pa Chhara chu mi rilru zau leh puitling tak a nih ka ring nghal hmiah a, a ṭawngkam leh awm danin a zir ve êm bawk a ni.

Tukṭhuan ei ta lawk lo chuan eng eng emaw ni kan sawi ho va, kan titi chhung zawngin pu Kawla erawh tap chhakah a lo ṭhu thung. Kan han inkawm rei deuh hnu chuan pa Chhara chu pa ṭawng duh tak a lo ni a, khawpuia an awm thu te, nupui fanau a nei tawh thu te leh thil dang a sawi nual a, a ṭawng ngaihthlak a nuam viau bawk. Ka nau pai lam thlengin min zawt ta hial a, thla tawp lama kan inentir ṭhin thute chu ka sawi ve mai a, Mazara aiin a ṭawng hnem zawkah ka ṭang leh ta ringawt a, ka ṭawng a kal tawh laklawh hi chuan insum har ka ti ṭhin. 

Mazara chuan thing phurhna tur motor a awm loh thu te, khawpui lama thing inthawn a awlai lohzia te a sawi a, mahse mak tak maiin pa Chhara chuan engkim a ngaihtuah tur thuin a chhang a, kan tih tur awm chhun chu thing tam tak neih a ni mai. A hma khan khawpui lamah thing kan hralh tawh ṭhin ngei a, khang hunah kha chuan Mazaran a Bike-in a thiar phei tlauh tlauh mai zel a, hun pawh a duh rei thei hle. A chang leh khawpui lam aṭang motor-in a rawn Load ṭhin a, kei chuan khati ang kha a awlsamin a hahdam thlak ka ti ber zel.

Kan inbiak fel hnu rei lovah pa Chhara chu kan in aṭang a chhuak a, in kawt thleng ka thlah thlap a, Mazara erawh a ke nâ avangin a rawn chhuak buai peih ta lo. Tukṭhuan ei laiin thing hralh chungchang chu ka sawi zawm nghal siam siam a, Mazara ai mah chuan ka phur zawk emaw te ka ti hial a, ani paw'n min lo nuih suk ringawt. Pu Kawla pawh a bang chuang lo, kan ṭawng a hrethiam vek a, a hlim ve viau chuan ka hria, Mazara ke a nâ rih bawk nen thing hralh kawngah chuan a ṭangkai leh khawp ang.

"Kan inawm nilên fô a va ngaih hmel ve" ti supin Mazara chu a nui nghawr dat a, khumah mu titihin kan ṭhu awn dûai a, pu Kawla erawh chaw kan ei kham hnu lawkah rama kal turin a chhuak daih tawh a, kal lo mai tura kan tih paw'n a kal lui tlat thung.

"A nuam ting a ni mai, kei chu ka lawm ê Mazar. Thing kan hralh ṭeuh theih chuan Sumo pawh kan tuak ngah vat thei ngei ang, mahse i ke hi a nât rei hmel bawk si a, pu Kawla a hah viau ang a, kei lah ka la rai zui, kei tal rai tawh lo ila chuan a zia deuh ang maw le" duh aiin ka ṭawng hnem leh ta nge nge e! 

"Fâk eng emaw zah chu leitir ka tum lo, a thlawnin ka pe ang" a thusawi avang chuan ka en chho nghal hau a, min rawn en zeuhin kan pheikhawk dahna chu a en zawm zat a, chutah amah bawk chuan

"Nunna hi a pawimawh a, sum te chu sum mai chauh a ni" a rawn tig zawm leh nghal a, a sawi dik lutuk chu ka lo inthiam lo em em a, dik tak chuan sum hmuhna a nih avangin a thlawna pek ka phal chiah lo va, Sumo kan tuak bawk nen ka rilru lam a kal dik lo a ni mahna. 

"Ka tihpalh" mawlmang zet chuan ka ti deuh tawp a, min lo en rualin a âwmah ka bei hle hle a, a kut hrawl tak mah se lum nuam em em si chu humin ka mit ka chhing vang vang hmasa leh phawt a, ka thusawi chu a hriatthiam mai ka ring lo.

"Dik tak chuan sum nghah nghal ka duh lutuk avangin a thlawna pek ṭul ka ti miah lo va, ka lo duham hman alawm maw le. I sawi ang khan sum chu sum mai chauh a ni a, nunna erawh a hlu hle si" ka ti ta sêp sep a, a kut chuan ka khabeah a rawn dawm a, kan inen chiang ta khawp.

"Khawpui nula, hmelṭha leh hausa tak kha ka kiangah retheih pawh pawîsa lovin i awm ta chu a ni si a, i mamawh ang taka ka chawm thei rih lo che hi a zia lo ngawt mai" a mitmeng leh a ṭawng dan hrim hrim aṭang chuan a thutak tih a hriat hle a, ka thusawi avangin a ngaihtuah chhuak a ni ngei ang.

"Ni lo, tuna kan dinhmun hi hrehawm ka ti reng reng lo. Engmah ka sawi chhan lo a nia Mazar, thil ṭul lo ka sawi lang leh ṭhin hi min hrethiam teh. I bul a nih phawt chuan a nuam ka ti vek a, tun ang bak hi ka phut lo va, min chawm zo lutuk tih hria la ka duh" ka biang chu a kut hlai zet chuan a dawm a, a kutzungpuiin ka hmui a nul thuak thuak zui nghal zat bawk.

"Ka fapa nu i ni tur leh ka nupui i ni kumkhua tur hi ka lawm; lawm lo thei ka ni lo" ti hniam ruihin ka chalah a rawn fawp vawng vawng a, a inlak hran rual chuan nui sak hian ka chho melh ral a, nghet taka kuahin a âwm lum nuam em emah chuan ka bei leh ta hle hlê. 

"Nichin khan hmelṭha min tih thu i sawi thânin ka hria, nupa ni tawh mah ila ka dawngsawng thiam lo ṭep alawm, kan inngaihzawn ve lai khan i sawi ngai pawh ka hre lo" fiamthu deuh reuh chuan ka ti chhuak phawng a, ka ngawi hle hle thei rih lo chu a ni ber e. 

"Hmelṭha hek che maw le" a rawn ti ve leh ta sup a, a ṭawng rik danah a thutak leh hle tawh tih ka hrethiam nghal mai a, kan awm dan leh kan inbiak dan chuan ka nuih a tiza ang reng, nupa ni ve tawh mah ila la inngaizawng mêk ang mai kan niin ka hria.

"Nang pawh i hmelṭha alawm, pá rum rût bawk si, mahse ka hmuh tirh che kha chuan eng lo.....ka sawi leh duh lo e a!" ka ti hnuhnawh leh ta vel a, hre châk tâwk vel lekin ka sawi hmuh a, min sawi chhunzawmtir a tum ngei ang le.

"Min hmuh tirh chuan engtin maw?" a rawn ti ta ngei a, sawi nghal lawk duh lovin ka nui hmasa tê tê phawt a, sawi tumin ka âng zuau tawh tihah ka ṭhulh leh lawi a, ka pasal mah ni se a lungnih loh phah ka hlau deuh tlat a nih chu! 

"Han sawi teh le" aw dam zet hian a rawn ti nawn leh dap a, ka kut kuai kaua min nam sawn a tum chuan ka lo kuah nghet sauh thung a, nghet takin a âwmah ka bek ka nghat tlat bawk a, ka awm dan chuan a ṭhawn thawkhat viau ka ring. 

"Ka hmuh tirh che chuan insual i hrat hmel ka ti hle a, khati ang em ema mipa mitmeng thip kha ka la hmu ngai lo bawk. Ka hmu ngun telh telh a, mawi ka ti ta viau thung. Nangmah ti nangmahtu pakhat niin ka hria, i inhmeh" ka tawp khar dan teh tawp chu ngaihno a va bei lo chiang tak.

"I awm dan teh thut aṭang hian ka huat i hlau a ni chiang mai, dawt lah chu i sawi miah lo leh nghal" che thutin ka innem kâng a, phawk hra hian ka en chho hû a, engtin nge dawt ka sawi miah lo tih a hriat theih zawk reng reng, he pa hian ka rilru a hre thei zawk em ni ang!?

"Mak i va tih hmel ve, Pathian hriatpuina thlapa pumkhat kan nih tawh ang bawkin ka nupui chu ka hre chiang ve bawk ang chu maw le" nui suk hian amah bawk chuan a rawn ti leh a, a âwmah a kutin min bei ṭhat tir a, ka chhip sam a fawp leh hram a, inhau ni mang si lovin kan ngawi dun ta vang vang.

Kan lo muhil tlang ve ve a ni ngei ang tlai lamah daih kan harh a, mahse kan harh hnuah pawh khumah chuan kan la awm dun reng tho. A ke nâ chu pawi a tih loh thu leh a ṭhat letling phian thu a sawi a, a sawi tirh chuan mak ka ti hle bawk. Awm dun chu nuam a tih thu a sawi leh a, kei paw'n a rilru leh a sawi tum ka man ve nghal thuai mai bawk. Ka pum puar lian ve ṭan tawh tak chu a kutin a chul a, a hma zawnga vun ngo leh mâm ve ṭhin tak kha ka rai vang nge ni ka pum a râng tlat a, Mazara ngaih dan hre lo mah ila kei chuan mawi lo ka ti hle. 

Ei rawng bawl hun a rawn inher chhuak a, khum aṭang chuan ka tho ve ta nge nge a, rai puar ni mah ila kawng leh lam zawng tak chuan ka inthazo phianin ka hria. Ka pum lamah harsatna ka nei lo va, ka chet velna ah ni se buaina ka nei lo bawk a, naute hrin chhuah chu ka phurin ka châk ta ber. Ei rawng bawl pahin Mazara thingpui tur ka chhuang lum a, a ke a chet ṭhat thei miau lo va, dam lo khum beta nâ ang reng a ni. Chaw chhum nghah hmin pahin pindanah kan awm dun a, ka ṭawng leh siam siam tawh a, ani'n ka thusawi ngaithla pahin ka thingpui siamsak a in thung. 

Vawi thum lâi chaw a rawn phit rik sur sûr hnu chuan pindan aṭang ka chhuak phei a, lut tawh lovin chawhmeh dang ka siam zawm nghal a, thingtlang mah ni se Mazaran thlai hnah leh thlai rah a rawn hawn ṭha ṭhin bawk a, khawpui lam chawhmeh aiin tui ka ti daih tawh zawk. A thar chhuah leh a lakna te chu a harsa pawh a ni mahna, khawipui lama an thlai zawrh lêtin a thianghlim a, a hrisel bawkin ka hria. Chawlhni vawi khat phei chu sa a rawn lei haw tawh nghe nghe a, Aizawla ka awm laia kan hmeh reng a rin vang a ni pakhat. 

Keimah leh keimah ka inngaihtuah ngut ngut chang a tam a, a mak hi ka ti ṭhin. Thingtlanga awm tur leh pasal nei tur dik tak ka nih te ka ring rum rum a, khawpui mi ṭhenkhatin an awm peih loh laiin kei chuan awm nuam ka ti tlat a, a tirah kha chuan ka hmusitin ka peih lo ru ve ngei alawm, mahse nuam ka ti ta hle chu a nih kha! Chutah hmangaih ka tawng a, ka hmangaih leh ka pasal ni ta chu thingtlang mi a ni leh zel a, engkim chu Pathian remruatna dik tak vek a ni tih ka ring ta ber, a rin loh theih loh tlat.

Anṭam leh buh ka bai pawlh a, hei pawh hi keimah min hre chiangtu leh a hmaa ka lo awm ṭhin dan hretu tan chuan thil mak a tling ngei ang. Ei rawng bawl mang ngai lo, chhungte duat rawn leh ei tawpa nung ve tawp ṭhin khan ei rawng bawl ka thiam ve tawh em em a, ka pasal lah chuan sawisel a hnêkin tui tih hmel tak hian a la ei ve ziah leh nghal. Kan inneih tirh kha chuan ka bawl sual chiang alawm, bai siam ngai reng reng lo khan ka'n siam ve kha a ni a, ka chawhmeh siam kha a tui lo ve thlawt a, mahse ka pasal chuan a sawisel leh duh chuang miah lo. 

Thawm rikna lam chu muangchangin ka hawi phei a, ka pasal hmel ka hmu ta hlawl mai. Pindan kawngka vuanin a lo ding a, a bulah chuan ka kal phei nghal vat bawk. Ka dar ring tura ka tih lahin a duh der bawk si lo, pu Kawla a lo haw hlauh a, zing lama a chah ang ngeiin thinga siam tiang a rawn hawn a, Mazara chuan a hmang ṭangkai nghal khawp mai. Min rinchhan duh lo chu ka la nâ lek lêk a, rai puar lai ka ni bawk nen rit ka tih lutuk a hlauh thute chuan min thlem titih deuh a, lungawi lo rei thei lovin ka rilru a pangngai ve leh mai bawk. 

Pu Kawla chuan Aidu a rawn hawn ṭeuh a, thlam piah lawka mi ho kha a nih ngei ka ring. Aidu hi tui a tiin a duh em em a, a chawhmeh duh pawl tak a ni. Mazara lah hian mut tuina a nih thu a lo sawi ve ziah a, a dik tak tak a ni ang pu Kawla chu a mu tui thei hle. Chawhmeh pahnih khat lêk neih ai chuan tiin tlai khawhnu ah bâl ka bai leh a, lêngmuser chu a kuang nen kan thlak bawk a, chawhmeh kan vil laiin ruah a rawn tla ser ser bawk. Ka bulah Mazara chu a ṭhu ve reng a, mi ṭawng tam zawk zawk hi chu a ni lo ve chiang alawm, sawi tur hre lo ang maiin a ngawi leh reng tawh nghe nghe.

"Engati nge khati ang khan min lo en reng a?" nui sak chuan ka ti leh ringawt a, ka ṭhutna lamah ngawi reng bawk hian a rawn tawlh hnai a, a ke nâ lam chu buhfai bel sirah a thluang dûai thung a, min chhang mai lovin a la nuih suk zui.

"I che vel hian ka mit a titlai" min chhan dan teh deuh tawp avang chuan ka nui sen sen nghal a, ka kuta fianpui chu lain bâl bai tui so bawrh bawrh chu a suak chhuak a, chhem dai hmasa tê tê phawtin a hawp ri hrawih a, keiin a ṭawng leh tur ka lo ngaichang reng thung. 

"A rim a tuiin a i bai tui e, a al dan pawh a tâwk chiah" a tih chuan a fianpui ken lai ka chhuhsak zawm zat a, ka bâl bai ka'n hawp ve chhin chiah chu ka rin aiin a lo tui daih, thla eng emaw zah chu nupa niin a tan ei rawng bawl ve tawh mah ila baiah kher kher hi chuan ka la inring tâwk lo ṭhin. 

"A tui thawkhat viau a, i bai erawh a tluk lo deuh hret a nih hi!" nui sak chuan ka ti a, ani pawh a rawn nui nghawr dat a, thil bai hi chu ama hnen aṭanga ka zir chhuah ve ngat khat a nia, ka pasal hian thiam loh a nei pawh ka hre lo, a hriat ngai loh leh tih ngai loh pawh ni se rei lovah a thiamin a hre nghal zung zung zel tho.

"Thing man aṭang hian pu Kawla hlawh tur chu kan neih theih mai ka ring" thu dangah a pakai ta daih a, sitting room-a ṭhu pu Kawla chu ka en nghal a, lehkhapuan bihin a kut nen lam a lo kawk deuh chat chat a, Mazara ziah sak Mizo ṭawng a zir leh tawh a ni ngei ang, a zir hi chuan a bei urhsun thei khawp mai.

"Thei mai ang, kei chu Sumo man tur tuak ngah thuai thuai ila ka ti ta ber. Ram hna thawk reng lo hian i hahdam phah ang a, chutah pawisa i la thawk chhuak reng dawn zui" ka ti leh hluai a, ka duh duh hi ka sawi tawp tawp zel a, a chang hi chuan naupangchhia min ti thei ngawt ang. 

"Kei chuan fapa min hrinsak tawh la ka ti ber" tih leh ka pum rawn dawm chu a rual nghal a, fanu ni lovin fapa char char a la sawi a, fapa hrinsak chu ka duhthusam a ni a, mahse duh duh hring turin kan tih theih a tlem hle si.

"MST Bus khalh tur chu ka hmu tawh ngei a, mahse zan khaw tai rêk thlêng thlenga ka nupui leh ka fate awm bosan ka duh si lo a ni" amah bawk chuan a rawn ti leh nghal a, ka nui tawp ta hmak a, khawpui mite'n driver atan an duh a  nih ngei a rinawm.

"Rei lo tê min han nghak leh deuh la, tun ang reng hi chuan kan rethei tawh bik lo vang" tun hnai hi eng nge a chhan pawh ka hre lo, min chawm zo lo ang maiin a inngai tlat a nih hmel a, putea te nen an titiho ti dawn ila a lên chhoh ngai ka hre bawk si lo.

"Ka ngaih i tiṭha miah lo a nia Mazar, ka nun hma lamah hausa ṭhin mah ila tuna kan dinhmun hi hrehawm tihna ka nei lo hrim hrim. Pawisa i thawk chhuak a, ei tur i rawn hawn nitin ṭhin bawk a, chu bak a dang eng nge ngai?" ka tih chuan a ngawi run a, a mitah tak ka en reng bawk.

"Min phu lo lutuk anga i inngaihna hi paih bo thuai la ka duh ngawt mai, i rilru a ṭhain mipa innghahna tlâk tak i ni a, mahse ka hrethiam lo lek lêk ṭhin che" ti lehin ka ṭhutna aṭang chuan ka tho va, rawt thleng chu lain khám purun leh hmarcha ka rawt pawlh zui nghal a, Mazara erawh chuan mei alh a lo la en tlawk tlawk thung.

"Thinrimin ka sawi lo a nia aw" ka rilru nuam lo chuan ka ti leh ta nge nge a, ka thil rawt lai kalsin a hnung lam aṭang ka va kuah a, a biang chu ka biangin ka nawr deuh salh a, amah chu ka phu lo daih zawk tih hria se ka duh a ni. 

"Ka khawngaih thut che maw le" a rawn tih sup chuan dawt a sawi rinna pakhat mah ka nei lo va, min khawngaih tih a awm dan aṭang te, a mitmeng leh a ṭawng dan aṭangte a hriat vek a, hmangaihna hian thil ken tel a ngah hle a lo nih dawn hi! 

"Thil ka rawt zo ang a, zanriah kan ei tawh mai dawn em ni ang? Khua a thim titih tawh tho va, zanah inlêng kan neih thut tâkin ei hma a ṭhat ka ring deuh" ka tih chuan a lo bu nghat a, a bianga fawp zeuhin ka kal sawn a, kan pangngai leh ve ve tawhin ka hria.

Ka thil rawt lai te, ka chaw ei siam lai te leh ka chet vel lai hrim hrim chuan tap chhaka ṭhuin min en ta reng a, pu Kawlan min rawn pui thuai bawk a, Mazara chu ka nuih leh tawp zel. Zan dang ang bawkin chaw bel a chang a, kei a vei lamah ka ṭhu a, kan hma zawnah pu Kawla a ṭhu bawk. A vei bar avang hian ṭhut sawn ka tum ṭhin a, kei ka ding bar bawk si nen a chaw barna ka dip ang tih ka hlau ṭhin, mahse ani chuan a phal tlat lo. Tun thleng hian a ding khawr nge a vei khawr ka la hre thei lo reng reng, ding lam a hman thiam ang bawkin vei lam a hmang thiam a, ani hi chu a SPECIAL ve chiang a ni. 

Zanah chuan Mazara pa a rawn lêng lut hlawl a, a fapa berin rawn lên a phal tawh miau a, kan inah pawh a lo chuangkai hnem ve ta viau mai. Mazara chuan a pa zawhna chu a chhang bulin a chhang tawi thei hle a, keima'n ka lo sawi belh zel zawk a, chuti ni lo se chu Mazara pa tan tak pawh a nuam fahran dawn lo tih hriat sa reng reng. Pu Kawla rawn hawn Aidu chu ka pe ve a, mahnia khawsa a nih avangin ka pe tam lem lo va, amah paw'n a duh tam vak lo a nih hmel, a haw dawn chuan veranda thleng ka thlah thlap bawk.

Ni hnih hnuah pa Chhara chu motor nen a rawn lang leh a, hlawhfa chhawrin kan thing zawng zawng chu motor-ah a load tir vek a, in kawta thing eh sa zawng zawng chu an lei zo ta. Eh loh erawh a la awm ve nual a, rap chungah thing hâk sa kan la nei nual bawk a, thing hi chu kan tlachhamin ka ring lo. Min hrilh lâwk tawh ang ngeiin Mazara chuan a thlawna thing pek a nei ṭeuh a, a man tur dik tak aia hniamin thing chu kan hralh a, mahse kan pawisa hmuh zat erawh sang chuang fê a ni tho. Kan hralh hnem thawkhat a, a thlawna pek nei ṭeuh lo phei ila chuan sing chuang pawisa kan hmuh ka ring hial.

Krismas thla kan chuangkai chiah chu ka pum lam a rawn chê a rawn che ta mai, pitei chuan a thawm nât danah mipa ngei a nih a ring nghal a, chungte hlei hlei chuan Mazara a tiphur zual a, a phurzia chu mi dangte hriatthiam theih loh turin a tilang a, kei chuan ka lo hre vek ṭhin tho. A ke paw'n hma a sawn chak viau a, tiang tel lova kal a neih chang a tam leh tawh zawk a, mahse a kal chak duh chuan tiang a la hmang ṭangkai hle. Khawpuiaah inentir turin min kalpui ṭhin a, ke nâ chung chunga min kalpui ziah chu ka inthlahrung thei khawp.

Krismas thawmhnaw lei a rawt a, keiin ṭul ka ti vak lo thung a, mahse khawpuiah min bzarapui ta tho. Rai puar ka nih mai bakah tei chhuah sek hi ka ning ṭan a, ka pum ni se a rit chho ṭan tawh bawk a, a hma ang ngawt chuan ka inthazo reng thei ta bik lo. Doctor sawi danin kum thar February thlaah naute kan nei dawn a nih hmel a, kan naute a hrisel ṭha hle chu ka lawmna ber pakhat a ni. Doctor tak ngial paw'n mipa a nih a ring a, chu vang pawh chu a ni ang Mazara chu a nui deuh reng mai. A hlim hmel hmuh hi chuan ka hlim ve nghal thei mai zel a, ka rilru a kal dik lo lai paw'n a hlim hmel hian min tihlim thei ṭhin.

Krismas thawmhnaw thar atan Mazara chu kamis var leh a dum ṭial ṭhet ṭhet ka lei sak a, ka thlan sak a ni mah zawk. Kan leina pawisa chu ama thawh chhuah vek a ni a, pu Kawla kawr tur pawh kan lei nual a, ka thawmhnaw tur ber chu lei ṭul ka ti lo ta a ni. Beisei loh deuhin a ke a dam chak a, a hma ang takin la dam chiang lo mah se tiang pawh a hmang tawh ngai lo va, ka thawmhnaw lei tuma khawpuia va zin phei chang a ngah thei hle. Ka kawr tur lei a duh si, a lei thiam bawk si lo, min hruai a tum lahin ka lo peih lo tlat zel a, ka inhrethiam bik chiah lo, a kipa kawia a thu zawm ṭhin kha ka luhlul thar em em ringawt. 

Inruk hnua innei kan nih miau avangin kohhran lamin min la thunun tlat a, Mazara paw'n chanvo engmah a nei lo va, Krismas ruai fatu atan tak ngial pawh an ruat tawh rih lo, mahse pawi ka ti lo nasa mai. Ka Krismas thawmhnaw pawh pitei hruaiin an va lei ta nge nge a, keimah chu ka dik lo tak zet tawh bawk. Pitei sawi ang tak takin rai chu ka la nâ a nih ka ring, thil ho tê têah ka rilru a kal dik lo zel a, ruai ṭheh ni te chuan ka chhuak peih der lo. Chu bakah changel hnaha ei a ngai a kher bawk si a, Mazara chuan keimah avangin Krismas ruai a ṭheh loh phah leh nghal. 

Chutah mi thusawi ka la hre thawi zui a, ka pasal ka chhuan ve em em chu thaibawih lutuk ang te'n an sawi a, pa ṭhenkhat chuan ruai ka ṭheh loh avanga ruai a ṭheh ve lo chu an sawi zui luai luai a nih hmel a, ka rilru a lo nâ ve em em tawp a ni. Kum hlui thlah ni a ni a, pitei naute kawr phiar sa ho la turin Mazara a chhuak rih a, pu Kawla ni se kawtah naupang a infiampui bawk a, mal ka inti hma em em te chu thil awm ang lo tak a ni tih ka hre vek tho, mahse ka inthunun hman lo lek lêk ṭhin chu a ni e. 

Mazara a rawn haw a, rum mangkheng hian ka lo melh a, ani hi chuan pitei thusawi a hre vek tawh a, thil ho tê têa ka lungni lo ṭhin hi chu min hrethiam viau mai. Ka pum lah ama tâwkah a puar lian ve tawh em em bawk si, a hmaa inthazo tak ang kha ka ni tawh lo chiang hle. Putea ngat phei chuan phir a nih hial a ring a, mahse chung em em chu ka ring lo, a chhan chu Doctor paw'n a sawi ri lo tlat. Ei rawng bawla che vel Mazara chu a hnung lam aṭang ka en reng a, pa ṭhenkhat thusawi ka hre chhuak leh kher kher bawk nen ka inthunun hman leh ta ngâng lo. 

"Mi sawi dan che hi i hre ve miah lo em ni? Thaibawih an tih che hi i hria em? Engati nge ruai ṭheh ni khan ka tel lovin i ṭheh mai loh? Ka thu hnuaia dah lutuk angah che mi zawng zawngin min ngaih vek phah asin, chuti ang mi ka ni lo nasa ropui si" a rawn leh hawi nghal thuai a, ka ṭawng chu a va han ngainatawm loh chiang tak.

"Ngawi reng zel lo teh, ka rilru a hahzia hi hria la chuan min khawngaih zawk ngawt ang. Ṭhenawmte hmel pawh ka hmu ngam tawh nâng, engati nge thaibawih tia an sawi theih turin i awm reng reng?" ka ti leh hmawk hmawk a, engah mah min ngai lo ang mai hian a chawhmeh siam chu a tem zawm daih a, chu ringawt pawh chuan min run viau tho. 

"Mazar!" thinrim titih chuan ka ti deuh vak a, a thil chhuan lai suanin ka lamah a rawn kal a, hmel pangngai tak pu chung hian min en reng a, kei erawh ka ṭah a chhuak tet tet leh ringawt tawh a, ka mittui te chu an rawn tling leh hman hial tawh maw le.

"Mu hahdam mai mai zawk ta che" ti dam dapin pindana min hruai luh chu a tum a, ka lo ṭang tlat thung a, a chhan ber pawh awm lovin ri lo chuan ka ṭap ta nge nge a, ka ṭap tih a rawn hmu rang hle bawk. 

"Âwww....i lo ṭap leh hman tawh a!?" a ṭawng dan te chu huatah ka la vek a ni ber a, min vawnna kut chu ka phih thla sawk a, kal sawn ka tum rualin min lo chelh nghal thuai a, mi pawm kang lâwpin khumah min mutpui ta hle hle.

"Rai ka peih tawh lo, a hrehawm êm mai. Ka duh loh dan déuh deuhin ka awm ṭhin bawk si, ka mizia tak tak emaw i ti ang tih ka hlau" ka ti deuh tawn tawn a, tal chhuah pawh tum ila a âwmah min kuah bei run a, kei ang hmeichhe tha ngah lo ve tak tan chuan tal chhuah ngaihna a awm lo tluk a ni.

"Nang berin rai i peih tawh loh te'n a chi nâng maw le Numam, a tlêm berah pathum tal chu fa neih ka duh a nia, fa siam ni se thil hrehawm zawk zawk a ni hleinem" a samah chuan ka kek nghal a, ani erawh a lo nui nghawr dat duh lêk chauh thung.

"Keimah ang hian hmeichhe dang an awm ve vek ang em le? Nuam ka ti teuh lo a nia, ka inthunun hman ngai bawk si lo" kan ngawih dun vang vang hnu chuan ka ti deuh phawng a, ka awm dan chu rai lak nât lam pawh a ni chiah tawh lovin ka hria.

"Ka'n fiamthu lawk a nih kha! Eng nge a bul min han hrilh teh le, ka duatnu?" min koh dan vel kher chu ei lo zetin ka chek ri tlak tlak a, a nihna tak chuan min duat em em a, tun hnai phei chu min duat hlum lo chauh a tih theih hial ang.

"Thaibawih ni reng reng suh, ka duh lo. I inhmeh lo bawk, pa ṭhenkhatin an sawi a, ka rilru a kal dik lo ta vek a ni" ka ti ve ta nge nge a, chal tichuar nángin min en a, mahse min en dan chu a thlak leh thuai tho.

"Chuti ang te zawng a ho em mai, chaw ei hmain mu lawk ila, pu Kawlan min rawn ka tho turah ngai ang" tih leh a hnung lama rizai chu lâk a rual nghal a, min khuh hlûn a, nâ a nei tawh lo bawk nen a ke chuan min khan lum zawm zat nghal bawk.

"Tun lai chu eng ka hria nge ni, ka hmu tai tlat che" ka bengbul chetah a rawn ti lum su su a, ka beng tlâng chu kelin hnim a pet ang mai hian a pet titih a, zep lovah chuan min tizauthau nghal em em a, mahse a hun rih thawt lo.

"Mut i rawt kha, awm ṭha hle hle rawh. Min kuah lum la, muthilh lawk ka duh" ka tih chuan innem kângin ka hmuiah a rawn fawp tâwk a, a awmna ngaiah a inlet thla ve leh mai bawk a, min mamawhna a nasa zual tak tak a nih ka ring.

"Mu ang le" ti leh supin a âwm ngheng tur chuan min pawt hnai salh a, min zo mah mah ṭhin lutuk hi chu a mangan thlak letling zawk, a thinrim lai kan inneih hma khan vawi khat ka hmu tawh ngei a, khang hun lai kha chuan sakawlh angin ka tehkhin hial a nih kha le. 

(End of Chapter 37)