SUMO DRIVER By Havali Adam (CHAPTER 29)

SUMO DRIVER

By

Havali Adam

Chapter 29

Aizawl lam pana kan tlan thlak chhung zawng chuan lungchhe takin ka awm a, ka pa chuan vawi khat mah min be lo va, min bia pawh ni se ka chhang thei kher lo vang. Tunah chuan khawvela pa sual berah ka ngai hmiah tawh a, hmâna ka pa ni ṭhin mizia ang kha a pu tawh lo tak tak. Kut ni se min thlak a hreh lo nasa mai si a, a huat zawnga ṭawng hlek chuan a kut tawrh a ni mai. Kan tlan pelh zut zut thing dingte chu motor chhung aṭang ka en reng a, Mazara chuan ka rilru leh ngaihtuahna a luah reng bawk a, keimah ka inkhawngaih rualin amah ka khawngaih daih zawk.

A mitmenga inthlahrunna thuk tak lang te kha ka hmuh hmaih hauh lo, min phu lo lutuk ang maia a inngai hmel te khan ka rilru a ti rum vawng vawng a, eng ang paw'n hausa emaw sum ngah mah ila ka phu lo lutuk zawkin ka hria. A nunah sum tam tak awhna lam a lang lo va, a nun a ngilin min ngaihtuah em em a, ka nât hlauvin a awm reng ṭhin. Ka intih nât dawn emaw ka chet sual dawn apiangin ka kiangah a awm ziah a, ka rilru a haha harsatna ka tawh chang paw'n min en liam mai mai thei ngai lo va, chu chu ka hmangaih em em chhan a ni.

Hmangaihna hi a lo mak ngawt mai, engtik lai aṭang khan nge ka hmangaih tâk pawh ka hre bik chuang lo. Amahin a rawn awm tawp ti dawn ila a ni lo tih ka chiang si a, inngainat tawnna leh inthlakhlelh tawnna aṭang hian a lo piang ni berin ka hre ta. Ka nunah a vawi khatna atan hmangaih ka tawng a, chu ka mipa hmangaih chu ka chhungte'n min duhpui lo chiang hle a, mahse beidawn mai ka tum lo. Ka hmangaih miau a, hmangaihna avangin Mazara chu a ruka hmuh ka la tum fân tho.

Hualngohmun kan thlen chuan kan hnungah Jimmy-a a lo tlan ve reng tih ka hre chiah a, kan boruak nei nuai chu mak a ti ve ngawt ang ka ring. A bik takin ka pa mizia chu a ngaih ang ngawt a ni dawn lo tih ka hre chiang, tunah chuan a hmu pangngai thei mai mai bik tawh lo hrim hrim ang. Mazara te in chhunga ka pa'n kut min thlak lai te khan a lo awm ve reng awm si a, ka zak thar tak zet. Chuta karah lawmthu sawi ka la bâ nasa em em zui a, lawmthu sawi pawh ka inthlahrung zo vek, mahse min lo dawnsawn ṭhat viau tho chu ka ring, a sual hran lovin ka hria. 

Aizawl khawpui chhungah kan tlan lut a, kan veng lamah ni lovin Hospital lamah kan tlan tlang nghal a, rilru chhe zet ka pa chuan ka khup a nâ tih a la hre ve duh hram hram a nih mahna. Civil Hospital-a thawk doctor te chuan min lo endik thuai a, ka pa hmel hriat an lo awm nual a, ka hliam neih chu an buaipui awlsam khawp. Jimmy-a pawh kan bulah a lo awm ve zel a, tlangval fel tak chu a ni chiang a ni. A tua mah kan inbe lo va, han inbiak ngawt chhan tur pawh a awm rih lo, eng pawh sawi ila thinrimna hlir a ni mai. 

Ka khup an dressing zawh chuan kan veng lam kan pan nghal a, chung em emah erawh Jimmy-a chuan min lo zui ta lo. In kan thlen hma zawng chu ka ngawi reng a, ka pa emaw mi dang emaw hmuha ṭah rêng ka tum tawh lo. Ka rilru ka tipaukhauh lui a, ka luhlulzia chu ka chhungte'n han hre ve mawlh teh se. Ka theih tawp chhuahin Mazara nena inhmuh theih dan kawng ka dap ang a, a hmeichhia zawk hian tlan dun mai ka duh hial zawk maw le. 

Hmeichhe ngaihtuah atan chuan a va'n mawi lo tak êm, mahse ka hmangaih tlat si a ni. Ka zirna lam pawh chhunzawm duhna aiin bansan duhna rilru ka ngah ta zawk bawk a, chhungte duat rawn leh hlima thawveng ve thei tak kha ka danglam vek tawhin ka hria. Ka khup hliam aiin ka mipa hmangaih em em lak ata ka pa min pawh hranna chu nâ ka ti zawk a, a fanu ka nihna ang tal paw'n Mazara nena kan inngaihzawn chu phal mai se engkim a kal tluang vek ni mai tur, mahse ani ang rilru chhe lutuk chuan a phal hauh si lo.

Kan inah kan lut a, ka nu leh u Duhawmi chuan min lo din chilh titih nghal a, ka khup intuam bûr chu an en thla rang duh hle. Ka pa chuan a tui inna no chu dawhkanah a nghat ri chawrh a, kan hawi phei nghal ṭhap a, ani chu a en ngai en rengin a lo inseh ru hle thung. Ka nu leh u Duhawmi hawi lai tak chu remchangah lain ka room-ah ka lut daih a, chhung lam aṭang kawngka ka kalh zui nghal bawk a, tunah rih chuan tuma'n min rawn tibuai lo se ka duh a ni.

"Lo hawng teh Numam, engtin nge i pa nen chuan in han awm? I han timualpho nasa hle lo maw?" pawn lam aṭang ka nu chuan rei lovah a rawn ti nghal lang lâng a, ngawi rengin ka khumah ka ṭhu a, ṭawng chu ka châk zawk zawk lo hle.

"Lo hawng vat teh HMINGTHANPUI, ka be duh che ka tih chû" ka nu bawk chuan a rawn ti deuh hmarh hmarh a, thawk la huaiin ka tho va, kawngka ka va hawnsak hnu chuan khumah bawk tukverh lam hawiin ka ṭhu leh nghal hmak. 

"Min han hrilh chiang teh, engtin nge i pa a rawn chet? Ani lah chu biak ka tum dawn laiin a chhuak daih leh nghal a, chutah a la thinrim em em zui. Engtin chiah nge in awm? Kan chhungkaw tihmingchhe zawngin i han awm em?" min rin dan mawlh chuan ka rilru a tinâ vawng vawng thei. 

"I pasal, rilru chhe zet ka pa ni bawkin mi dang awm laiin min beng" zam na nei lo ang mai chuan ka ti ve ta salh a, mahse ka zam ru em em tho, min hringtunu a ni miau a, han zah lo viau dawn pawh ni ila ka thei lo.

"HMINGTHANPUI, i ṭawng duh dan mai mai chu le! Mazara hian a lo hruai sual vek tawh che a nih dawn hi! Engtin nge i khup te hi i tihnât reng reng? Ṭha taka ka biak che chuan ṭha takin min chhang ang che, ka ngaih dan a pel hlauh ang e" 

"Ka tlu" ka ti chhumbung deuh tawp a, chuti ang bak baka ka chhan chuan ka thusawi dan kalhmang hre hmasa hawt si lovin a lo haw leh emaw te kha a ni vel ang a, buaina hmachhawn belh ai chuan a nihna ang tâwp tawpa chhan mai chu a finthlak zawk. 

"Ngaithla teh Numam, i pa hian i hma hun tur zawng zawng nen a ngaihtuah vek tih hre ta che. I tana ṭha lo chu engmah tih a duh hauh lo vang, a chhan chu a fanu i ni tlat. Mazara a duh loh chhan pawh hi eng emaw tak chu a ni ang, nakinah a thlir dikzia i la hre mai ang" 

"Mazara a duh loh chhan chu mi hausate anga in ṭha leh sum tam tak a neih ve loh vang a ni a, mahse Mazara rilru ṭhatzia leh hausakzia a hre si lo" pangngai taka min biak tlat avangin ka thinrim khum reng thei ringawt bik lo, hmeichhia na nâ nâ chu kan inhrethiam deuh te pawh a ni mahna. 

"I pa hian in innei ringawt ang tih a hlau alawm, lo innei ta ula engtia awm nge i beisei a? Thingtlang boruak chhia leh changkang lo lutukah hna thawkin i awm ang maw!? A teuh lo lutuk, kan dinhmun nen ngaihtuah la, a chawm zo dawn chuang lo che a, in inngaihzawn chhung khan thilpek ṭha tak a pek che pawh ka ring lo" 

"Khati ang lam zawng kha chuan sawi lo hram teh ka nu, ani chuan mipa dang angin hmuh theih thilpek min pe hleinem. A ngaihsakna leh ngaihtuahna ka dawng a, a thlamuanna ka dawng bawk a, a âng chhung nuam zetah min awmtir ṭhin asin, chu tluka thilpek hlu chu ka hre lo" 

"Mawl lutuk teh suh Numam, i pa thu hi a kipa kawiin zawm tawp rawh, i tisual lo zawk ang. Mazara nen hian in inṭhen tawhah ka ngai a, ani paw'n a rawn beisei ngam tawh che ka ring lo" a ṭhutna aṭang tho paha a tih chuan 

"Kan la inṭhen lo, kei ngat phei chuan ka la ṭhen lo hrim hrim, min pawh ṭhen tum mah ula engtikah mah ka ṭhen dawn chuang lo" ka lo tih zawm ve nghal zat a, ka inrin hma hauhin ka biang chu a ri ta sawk. 

"I zak lo hle mai HMINGTHANPUI, heti anga awm tur hian ka zirtir lo che a, ka enkawl ngai bawk hek lo che. Kutthlak reng che hi kan duh bik miah lo, mahse nangmah hian thlak lo thei lovin min siam tlat a ni. Harh chhuak tawh rawh HMINGTHANPUI, engati nge? Engati nge i fin theih miah loh?" ka nu chu a ṭawng vin sâwt ta hle mai. 

"Ka hmangaih alawm nu, Mazara hi ka hmangaih a ni" ka ṭawng zo chiah chu ka hnuk a rawn ulh deuh thut a, ṭah insum takin ka hmui ka pet fan fân a, ka mittui te chu dang hman tawh lo mah ila thawm chhuaha ṭah ka tum lo khawp.

"Tleirawl ât lai a ni a, Mazara i duhna satliah hi hmangaihna emaw i ti mai mai a nih kha!" bianga mittui baw zawihin ka nu chu ka en ta kar a, ka duhna satliah emaw a la ti tlat chu ka run hle a, ka mittui ka hruk tawk hnu chuan

"Ni lo ka nu, ka thinlung leh tih tak zetin Mazara hi ka hmangaih a ni. Engtik lai paw'n ka rilruah a awm a, tawh sual a tawh palh te ka hlau em em bawk a, ka pa i hmangaih ang chiah hian kei paw'n Mazara ka hmangaih tak zet tawh a ni" ka ti ta duah a, ani erawh chuan ka thusawite chu a rin loh hmel viau thung. 

"I pa ka hmangaihna nen chuan tehkhin duh suh, a inang lo lutuk tlat, tehkhin chi ah pawh ka ngai lo. Engmah i hrilhfiah theih tak tak dawn chuang loh, vawiin aṭang chuan hmangaih i nei lo angah in ngai tawp rawh" ka nu chu ka en tlawk tlawk a, a thusawi duh dan chu a va mak ngai em.

"Zanriah ei lai te khan i pa lung tiawi lo zawngin i awm leh hlauh ang e, engtin pawh ṭawng se ka khap buai ring duh suh. Tun atan chuan muhil rih phawt la, zanriah ei dawnah ka rawn kai tho leh ang che" ti lehin room aṭang chuan a chhuak a, a sawi ang chuan ka mu lo chiang teh e!

Bai auh auhin tukverh lamah ka kal phei a, parda chu nghet zeta hmerin Mazara nena kan lo awm dun ṭhin tawhna lam chu ka thlir a, ka insut zui nghal feih feih bawk. Ṭah tawh loh tum si kha ka ṭap leh ta chu a ni si a, a bik takin ka nu hmaah khan ṭap tur ka ni miah lo. Vawiin aṭang hian khawngaihna pawh nei lo ka chhungte hmaah ka ṭap tawh lo tak tak ang, ka ṭah a chhuak fê a nih leh ka kal sawn ang a, ka ṭap mai tur a ni. Mazara ṭhen turin min ti maw khâ? Ka ṭhen hauh lo vang, Mazara zawkin min ṭhen te a nih ngawt loh chuan kan inkrar a la pangngai vek. 

Ni tak e, kan la inṭhen reng reng lo. A chhan chu Mazara khan a kâ aṭang inṭhenna thu a chhak chhuak lo hrim hrim a, kei paw'n ka sawi miah lo bawk. Ka pa'n min hruai haw mai chauh a ni a, thil a la danglam lo tih ka hre chhuak ta chiah. Chawp leh chilhin ka lungchhiat rukna leh ka rilru hah rukna te chu a bo duak a, ka chhungte chuan an ngaih ngâihin min ngai se, kei chu pangngai taka awm ka tum ta zawk a ni. Ka ṭap tawh lo ang a, ṭahna chhan tur a awm lo hrim hrim, ka chhungte'n min pawh ṭhen an tum laia kan lo la inṭhen miah lo chuan hlimna min pe ta zawk a ni. 

Mu ta lo chuan room aṭang ka chhuak a, ka hmai ka phih a, ei rawng bawl hun a nih tawh avangin ka nu leh u Duhawmi ei rawng bawl chu puih ka tum a, ka nu chuan mak a lo ti hle. Muhil rih turin min ti leh a, ka ngawi reng a, ka chet ngai ngaiin ka che reng a, u Duhawmi pawh chuan min en duh khawp mai. Ka ṭhut ve reng tâkah chuan ka nu pawh min ti fek fek zawngin a ṭawng ta lo va, u Duhawmi Interview hun tur chu a zawt zawm daih a, pawi ka ti lo hle. A thu hrimah a hna kal loh chhan awm ang tur ka hre miah lo, ama duh thuin a chawl tawp a nih ka ring. 

Zanriah ei dawn têah ka pa a rawn haw a, a la thinrim rengin ka hria. Hmeichhiaho chuan chaw ei siam mai lovin a inbual kan nghak ṭhap a, a inthlak chhung velin ka nu'n chaw ei siam turin min hrilh a, u Duhawmi nen chuan kan siam zui ve nghal mai bawk. Kan siam laklawh laiin ka pa chu a rawn chhuak a, zan dang ang lo takin chaw ei hma chuan hun hman an rawt lo va, hmang dawn pawh ni ila kan boruak teh nuai nen chuan a inmil lo a ni. Ka pa phei chu chair-a a ṭhut thlak rual deuh thawin a ei nghal mial mial a, ka nu paw'n mak a tih hmel viau. 

"I zirna i zo ang a, pasal i nei nghal ang. Ka thusawi ka sut mai mai ngai lohzia chu i hriat chian hle ka ring, min hnial miah suh ang che" kan ngawih ṭhap laiin ka pa chu a rawn ṭawng chhuak ta, chhan pawh ka tum lem lo. 

"Vli hian lo haw a tum hnaiin ka hria, a theih anga rangin lo haw se a ṭha ang. Numami tan tak pawh an inkawm hnem ang a, zawi zawiin a rilru nâ te hi chu a reh ve maithei asin" ka nu chuan a rawn tih zawm ve leh nghal a, u Duhawmi erawh a la ngawi reng thung.

"Lo haw rawh se, a ṭha tak ang" ti deuh hmukin ka pa chu a tho va, mi dang chuan kan en ṭhap a, a kham hma lutuk chu a awihawm loh zawk, zan dangah te chuan a ei rei pawl a ni ṭhin si a, a chaw ei a tui lo hle a ni ang.

Mi dang pawh chuan kan ei tui lem lo tih a hriat hle a, chaw kan ei bang hnem ang reng. Chaw eina kan seng fel laiin ka pa chu a chhuak leh nghal daih a, ka nu'n koh din a tum paw'n a ding duh eih lo. Chaw eina kan seng fel a, ka tihtur awm chhun chu room-a tawm deuh tlawng a ni mai. Room-a ka luh hnu rei lo têah u Duhawmi a rawn lut a, ka nu lo luhtir bak a nih ka ring lo. Ka bul chêta ṭhuin min en reng a, a ngawi reng bawk a, kei chu pawn lam ka la hawi char char thung. 

"U Mazara chu ṭhen mai la Numam, a harsa viau em ni? Chu bakah in la inzui rei lutuk hleinem le, i la naupang a, mipa dang ṭha tak i la tawng leh ngei ang. Jimmy-a pawh a ṭhat hmel viau kha, nu leh pate hian fate hma hun hi an hre dik châwk asin" a tih chuan

"U Rinawma ang hian Mazara hi sawrkar hnathawk ni ve ta se chuan ka nu leh pa hian an duh khawp ang, Sir Francis-a te ang rilru chhe tak pawh an duh huam huam thei a nia, an lem tak zet" ka lo ti lêt salh salh a, ṭawng loh ka tum ve tak na a, ka ngawi mai mai thei lo leh tlat.

"Rinawma nen te chuan an inang hleinem, sawrkar hna a thawh vangin ka nu leh pa hian min duhpui tihna a ni lo. Amah a fel hrim hrim a, a nungchang a hawihhawm bawk a, u Mazara te nen chuan han khaikhin chi a ni chiah lo" 

"Mazara mizia i la hre chiang lo a nih kha u Duhawm, u Rinawma nen hian awm dan inanna an nei nual asin, ṭawng tam lo mah se a rilru a ṭha lutuk. Ka hmangaih vang nge pawh ka hre lo, u Rinawma ai paw'n a felin a ṭha daih zawk, ani tluka mipa rilru nghet leh ṭha hi ka la hre lo a ni"

"Hmangaih a!?" u Duhawmi awah chuan mak tihna hlir a ri chhuak a, Mazara chu ka lo hmangaih hman a ring chiah lo a ni ang, mahse ka hmangaih tawh miau si a, chuti maia hmangaih loh ka la tum lo zui, a bula ka awm theihna tur a nih phawt chuan eng pawh hma chhawn ka huam hial a ni. 

"Ka dinhmun hi min hriatthiampui la, i theih chuan ka pa lo titipui zawk teh. Nang tal chuan a rilru i thlak thei mathei asin, kei chu engtin pawh ṭawng ila a haw fai vek tawh" ka ti ta zawk a, ka kawng bumboh tak chu rualrem thuai se ka va'n duh ngawih ngawih tak em.

"Ka ngam teuh lo mai, zanina a thinrimzia te kha i hmu ve lo em ni? Ka pa thusawi hi awih ri phawt mai teh, kei chuan i hlimna tur a nih zawk ka ring tlat. Loh theih lovin in inṭhen a la ngaih tho tho hmel a, i nât zual tak tak hmain i rilru aṭang khan u Mazara paih bo daih zawk rawh"

"U Rinawma hi ṭhen turin ti ve ta che se la i thei bik dawn em ni? I thinlung aṭang u Rinawma paih chhuak dawn ta la engtin nge i awm ang? I huphurh ve tho ang, khati ang chiah khan asin ka awm" ka ti ta thlawt a, amahah inchan se a hrethiam kuar mai ang. 

"Engtia han titipui tur che nge ka hrethiam tawh bik lo, i sawi ṭhenkhat hi chu a dik ve tho bawk si. Eng pawh ni se ka pa thu hi awih tum phawt la, i thei ngâng lo a nih chuan tih dan kawng ka zawnpui dawn che a nia" a thusawi tawp ber avang chuan ka en thuai a, mak ka ti hle bawk.

Ngawi rengin room aṭang chuan a chhuak a, u Duhawmi talin min hrethiam ṭan chu ka lawm a, a ruk tak chuan ka nu pawh hian min hriatthiam ka ring tho. Ka pa chu mipa a ni a, thu a la vung leh lutuk chu leh lam kawng zawng tak chuan a awm viau, mahse a rilru thlaksak ngei ngei erawh ka tih makmawh a ni. Kut hial min thlak tawh mah se a fanu ka la ni reng a, khawngaihna chen min nei dawn hrim hrim. Min ben avangin a inchhir tih ka hrethiam vek bawk a, a thinrimna a la kal tluang rih mai mai a ni e. 

Ni hnih chhung ka khup nâ avangin College ka kal lo va, ni thumna ah erawh ka kal lui ta thung a, ka nu tak chuan a la phal lo khawp mai. Nu nge nge hi chu an hriat ṭhin, hnute tuia min chawmtu an ni bawk a, pate erawh min ngaihtuah ru reng mah se nute ang em emin min ngaihtuah lo a ni mahna. Kar khat hnuah chuan pangngai takin College ka kal thei tawh a, ka chhungte emaw ka ṭhiante hmuhah lungngai hmel ka pu tawh ngai lo va, ka pa phei chuan mak a ti viauin ka hria. 

Mazara chanchin lam hre châk thei hle mah ila hriat dan kawng a awm ngâng lo va, phone te chu nei ve leh tawh mah ila ka be tlang thei ngai chuang lo. Chu bakah ka pa'n ka phone a check leh ziah a, Tlantea emaw putea emaw tak ngial pawh biak a phal tawh lo hrim hrim a ni. A duh ang angin ka chungah awm se, a sual duh leh ka chungah sual se, pawi tihna pakhatmah ka nei lo. Ka laka a awm dan tam tak chuan ka rilru a tinghet sauh zawk a, Mazara ka hmangaih tulh tulh te'n ka hre hial ṭhin. 

Ka ṭawng tam lo sawt hle a, zawhna min zawt a nih loh chuan ka ṭawng vak ngai lo. Zawhna min zawh chang paw'n ṭha takin ka chhang mai zel a, mahse ka pasal tur lam thleng thlenga ka nu nen an sawi kai ṭhin hi chuan ka insum thei lo ṭep zel. Pasal ka nei dawn a nih chuan Mazara bak duh ka nei lo, amah chauh lo chu pasalah mipa dang ka nei hauh lo bawk ang. Mazara hming vawi khat mah an sawi ri ngai lo va, kei paw'n ka sawi ri ngai chuang lo. 

Zan khat chu Jimmy-a a rawn lang hlawl a, ka chhungte chuan an lo be ṭha sawt sawt hle a, ka nu leh pa ngat phei chuan be ṭha tak an ni. Kei tak paw'n ka be chhan hran lo, a chhan chu Mazara ka hmuh theih nân khan min pui nasa êm a ni. Thinngpui ka pek te chuan huatna nei lo hmel pu takin ka awm a, mi dang chuan ka ngaina emaw an lo tih ngei ka ring. Ka ngaina ngei a, mahse ka ngainat dan chu nula leh tlangval inngainat tawnna ang a ni lo thung. Ṭhian ṭha tak angin ka ngai a, ka laka a rilru puthmang erawh ka tan chuan hriat a har rih khawp mai.

"I khup chu a ṭha zel em? Tuam a ngai tawh lo a ni maw?" Jimmy-a nen chuan pawnah kan ding dun reng tawh a, haw a rawt avangin ka nu leh pa'n thlah turin min ti a, hnial lo nasa tak ka ni, thil sawipui tur ka ngah alawm le.

"A dam ve tawh lutuk, han tauh palh vel hian nâ a awm leh zeuh ṭhin a, chu chu a ni mai" nelawm deuh chuan ka lo ti ve nghal a, min rawn en pahin a nui suk a, kei pawh ka lo nui tawi tak a, Mazara ang em emin lian lo mah se chhoh en a ngai fû tho.

"Kar leh leh pekah khian Delhi lamah ka chhuk leh tawh dawn a, ka pate pawh ka lo hrilh chiang ang. Haw lo la maw Numam, ka hmeichhe duh chi i ni lo. I sualin i hmelchhia ka tihna lam a ni lo a nia, ka duh chi i ni lo ve tawp. Chuta karah hmangaih nei lai i ni leh nghal a, rawn lên ziah pawh hi a inthlahrunawm ka ti" a rawn tih chuan ka kuah tawp ringawt.

"Ka lawm e Jimmy, engkim avangin ka lawm e. Kan vawi khat inhmuhna ah ni se hla pawh sawi lovin Mazara bulah min hruai nghal thei a, mi rilru ṭha tak chu i ni. Kha zan khan awm lo la chu ka tal buai ngawt ang, ka lawm tak zet" ka ti mawlh mawlh a, min kuah lêtin ka hnung chu a beng thek thek a, buaina pakhat chu a kiang ta phawt.

"I chhungte leh ka chhungte an lo inbe lawk diam tawh bawk si a, ka chhuk hma chu ka rawn lên ziah tho a ngaih hmel. Lem kan chang dawn a va ang ta ve, i ti ve tho em?" nui chunga a tih chuan ka nui chhuak ve ta hak hak a, a ban bulah chuan ka chum taih a, a nui nasa ve khawp mai, a nuih a za ve tak tak a nih ka ring.

In chhunga ka luh dawn te chuan ka la nui ver ver a, nui tawh lo turin ka insum nasa hle. In chhung ka lut chiah chu ka nui tawp ve hmak a, hlim lo hmel han put luih mai chu thil harsa tak a ni; rilru nâ hlim luih tum ang velin ka ngai. Ka nu leh pa chuan min rawn en zauh a, eng eng emaw ni an sawi dun leh nghal mai a, u Duhawmi erawh min lo en reng thung. Jimmy-a nena kan awm dan a lo hmuh ruk vek ka ring hnuhnawh hle a, min lo enthla a nih chuan ka duh emaw a ti ngei ang. 

A tuk zan aṭang chuan zan awl awm miah lovin Jimmy-a chu a rawn lêng ta ziah a, ka pate chuan min duhpui zual khawp mai. Chaw eina thleng thlengin a chanchin an sawi a, inngaizawng ang te'n min ngai ta tak tak a, a thusawi ka awih emaw a tih avangin ka pa nui hmel pawh kan hmu ve leh thei ta. Kei erawh a hma ang chiahin ka awm a, ka awm dan ka thlak ngai lo va, an duh dûh sawi mah se ka awm dan a pangngai reng ṭhin. Min tinui thei awmchhun chu Jimmy-a a ni mai, ka tan chuan ṭhian ṭha tak a ni.

Ka room-ah hial ka hruai lut ngam a, Mazara hnen aṭanga lehkhathawn ka dawn zawng zawngte chu ka hmuh a, ka chhiar tir bawk a, Mazara nena kan inkar siamṭhat a duh thu a sâwi a sawi ve mai. Ka chhungte chuan engtin mah min rawn ngaihven ngai lo va, lo inngaizawng ta ila, lo mudun vel ta pawh ni ila pawi an tih ka ring lo. Eng thil mah thleng lova Mazara nen kan mudun ringawt pawh an lak nât tehreng nen mak hi chu ka ti ṭhin. Jimmy-a a ni hlauh zawk a, ni lo se chuan buaina ka tawk nasa viau tawh maithei.

Thla te chu kan hmang ral zung zung a, u Vli pawh a lo haw tawh a, Mazara nen kan inkar chu u Duhawmi hnen aṭang a hre vek tawh bawk. Tin, Jimmy-a pawh Delhi lamah a chhuk thla tawh a, a chhuk thlak hma zawng chuan kan inah a lo lêng zantin a, u Vli tak ngial paw'n kan inngaizawng tak tak emaw a ti hial. A chhuk hma chiah zan chuan an ina lêng turin min sawm ve ta thung a, an lo rethei lo khawp mai. Min rawn miah lovin kan inkar dik tak chu a pa hrilh tlang hmiah a tum a, ka dang vat lo vang tih a hlauhawm hle.

Keimah berin Delhi a chhuk hnua hrilh mai turin ka ti ta zawk a, a ngawi vung vung a, a hnuah chuan rem a ti ve leh mai bawk. A room-ah min hruai lut a, a room chu ka room lêtin a nuam daih zawk. Keini ai chuan an hausa phawt a, chu chu ka nu leh pate'n an duh em emna chhan a ni ngei ang. Buaithlak ta ber chu Mazara ka be tlang thei ngai reng reng lo va, Tlantea lah ni se ka pa'n biak a phal lo bur bawk si. Chutah ka phone a la check chhunzawm zel leh ta nghal a, a duh tawk ve tawh ka rin nen min la ringhlel hle a ni mahna.

Kum chanve kan chuangkai a, boruak awm dan chuan rama kan feh lai vel min hriat chhuahtir a, Mazara ka ngai tak zet. Ka nu leh pa'n kan inngaihzawn phal se chu buaina awm miah lovin an khuaah kan zin chho leh tawh ngei ang a, ramah kan feh ho leh bawk ang a, hun nuam leh hlimawm tak kan hmang ngei ang maw le. Chung zawng zawng chu tun atan chuan duhthusam mai chauh a ni tawh a, mit lawnga hmuh theih loh, khawih theih loh leh a taka tawn theih loh thil a ni a, rilru leh ngaituahna ah chauh a awm a ni. 

Vawi khat phei chu zirlai lam ngaihsak lêk lovin ka awm a, ni ên dan zawng zawng chuan hun kal tawh min suangtuah lêt tir a, College-ah pawh awm rei duh lovin Chanmari lamah ka phei tawp ringawt. Sumo Counter ka thleng a, ngawi rengin ka ṭhu a, Mazara hmuh beisei takin awm mah ila ka hmu dawn lo tih ka chiang ropui si. Truck bang sâng nen an insut avangin Sumo khalh tur pawh a nei tawh lo va, engtin nge ei a zawn ang le, ka va'n khawngaih tak em. Kei tal a kiangah awm ila chuan nuam a ti ve deuh awm si a, a mamawh laia ka pui thei lo ṭhin chu ka inhaw ngawih ngawih. 

Thawhṭanni a ni a, Hlimhlimi leh Mawitei te nen chuan thil kan ei a, anni pahnih pawh hi ka hlimna pakhat chu an ni. Keimah vangin Sir Francis-a an haw bur a, a hma ang ngawt chuan min duhpui tawh hauh lo, fiamthu paw'n min chhaih tawh ngai lo bawk. Mazara chanchin erawh ka sawipui khât viau a, anmahni zawkin an rawn sawi chhuak leh zauh zauh ṭhin. Ka hmangaih thu thlengin an hre vek tawh a, min duhpui lutuk lo mah se an pawm thiam ve mai a, a awm ve reng, an kawppui tur a ni lo tlat, inrawlh chiam kha a ṭul hran lo. 

"En teh u saw pa saw, ka hmuh hnu a ang lutuk" Hlimhlimi hawina lam chu kan hawi phei a, beisei loh lutukin Tlantea ka hmu hlawl a, Taxi-ah a chuang a, Traffic a Jam deuh avangin an lo ding chu niin, mak ka ti teh e! 

"Saw pa te chu thingtlang khuaa mi in chhungte kha a ni lo'm ni Numam?" Mawitei zawhna chu chhang lovin Tlantea lamah chuan ka tlan phei nghal a, Aizawla lo kal chhan ṭha tak a nei dawn tih ka chiang, ṭul tawpkhawk lovah chuan a rawn zin hauh lo ang. 

"Tlante!" ka tih chuan mak tih hmel deuh hian min rawn en nghal thuai a, amah ai chuan mak ka ti daih zawk, kan inbe tawh ngai bawk si lo nen kan inhmu thut chu mak kan ti dun hle a ni.

"Hetah hian ka lo chhuk mai ang ka pu, engzah nge chuan man ka pek ang che?" ti zung zungin Tlantea chu Taxi aṭang chuan a rawn chhuak nghal a, pawisa an inpek fel hnu chuan ka kal sawn a, Tlantea paw'n min lo zui ve mai bawk. 

Ka ṭhiante bulah chuan kan inbiak lawk dawn thu ka sawi a, Tlantea chu College building lam ka panpui nghal sawk sawk a, sawi tur leh zawh tur ka va'n ngah tak em. Mazara chanchin mai bakah anmahni chanchin pawh zawh tur ka nei nual a, ka pa lakah erawh an lungawi loh ka ring tho. Khati ang khawpa mawi lo khan ka pa a awm a, hawihhawm lo takin putea a be bawk a, lungawina chi a ni lo hrim hrim. College building phen deuh, mi hmuh theih vak lohna ah chuan ka dinpui a, mi dangin min lo hmu ta pawh ni se zahna tur hre lo, ka zak kher lo vang.

"Eng nge i rawn tih dawn? In dam ṭha em? Mazara eng nge a an? A ṭha em? Ka hmu châk lutuk Tlante, ka ngai tak zet bawk" ka ti mawlh mawlh a, vawi khatah zawhna ka zawt hnem mah mah a ni tih ka hria, mahse ka insum theihna a bo zo tawh tlat a tin ni! 

"Ka pa phone tur ka rawn lei a, kan dam ṭha e. Ka pa'n i number leh i chhungte number zawng zawng min paih botir vek a, chu vang chuan ka rawn be ta ngai lo che a ni" a tih chuan ka pa laka an lungawi loh dan tur chu ka hrethiam nghal.

"A nih leh Mazara chu a ṭha em?" a ngawi vang vang a, bang nghengin min en reng a, sawi nghal mai lo chuan ngaihtuah mûk hmel deuh hi a pu a, a awm dan leh a hmel lan dan chuan ka ngaih a tiṭha lo lek lek.

"Ka khawngaih" a ngawih deuh ren rawn hnu chuan a ti deuh tawp a, hriatthiam lohna mitmengin ka melh chho thuai a, zawhna dang zawh leh ka tum lai tak chuan

"Sumo a chhiat vek avangin a rulh a ngai a, a pawisa khawl sain a daih bawk si lo. Lakhuih leh nimbu hmangin a tuak a, a chang leh thing a hralh bawk a, hna a thawk nasa khawp mai. Keini tak ngial paw'n kan be ṭawng zo tawh mang lo, keini em em chu min nel ve asin le" a rawn ti ta, ka mittui chu koh chhuah chawp a ngai lo reng reng. 

"Aizawlah ka chhuk dawn tih ka hrilh a, lehkha min pe a, i ta tur bak a nih ka ring lo" ti lehin lehkha inthlep min rawn pe a, ka lak rual chuan ka ṭhu tawm hnawk a, ka ṭap chhuak lo thei tawh lo, ka tel lovin Mazara chuan harsatna a lo va hma chhawn hnem dawn tak em.

"Ṭap ringawt lo teh Numam, lehkha pe tur chea lo kal ka tum hrim hrim alawm, tunah hian inhmu lo ila chuan a ruka rala ka chet a ngai ngei ang. Lehkhaah khan eng thu pawh ziak se zawm tawp ang che, inṭhen a rawt a nih paw'n inṭhen mai rawh u, a khawngaih thlak êm mai" chu thu a sawi zawh hnu chuan a reh tlawk tlawk a, a hmel hmuh tur a awm lo zui nghal bawk.

"Mazar" ti ṭuauin ka ṭap ṭha leh a, a lehkhathawn chu ka âwmah ka nawr bet a, ka khawngaih lutuk chu ka â thei mai dawnin ka hria, mahni chauha awm a khawhar thlak dawn tehreng nen pawisa a thawh chhuah a la ngai cheu a, pui thei ila ka ti ngawih ngawih. 

Ka ṭah duh tawk hnu chuan inah ka haw tlang ta daih a, lehkha zir lam ka rilruah a lang thei tawh thlawt lo a ni. In ka thleng a, room-a ka luh chuan darthlalangah ka inen a, langsar lutuk lovin ka mit a bui deuh a, College-ah khan ka ṭap nasa ve êm bawk a ni. Chhung lam aṭang kawngka ka kalh a, khuma bawk chungin lehkhathawn inthlep chu ka keu pharh a, lehkhapuan pangngai a hmang a, lehkha min thawn a tum deuh thut a ni maithei.

"Nilaini zan dar 2-ah, i duhthlannaah a innghat e" tih tê hi a lo inziak a, inṭhenna lam thu a ziah ka lo ring lutuk a, a thu ziak chuan min ṭhawng tak zet, ka hrethiam lo lek lek dawn a, mahse min hmuh a duh tih ka hrethiam mai. 

Zanriah kan ei lai te chuan ka zâng hûih a, ka awm dan chu ka hrethiam lo kher mai. Keimaha tawt ru em em ṭhin kha a bo duak a, ka hlim phah chuang der si lo va, chu tak chu a ni ka hriatthiam loh. Chaw te chu ka ei hnemin ka ei tui phian leh ta nghal a, a mak vel vek a ni. Ka veng hawk leh lutuk chu inbuk hial ka duh rum rum, ka hlim bawk si lo, ka lung a chhe bawk si lo, chuti ang em ema mak chuan ka la awm ngai lo, mahse min hmu turin Mazara a lo kal dawn tih ka hre chiang em em thung.

Mut hmunah lehkhathawn chu ka chhiar nawn chhen a, thuziak lah chu a danglam der lo leh nghal. A tawi ang reng si a, ka duhthlannaa a inghah thute a ziak tel a, eng ber nge ka duhthlannaa innghat ka hre lo a ni. Sawi tum chu a nei chiang a, thui takin ziak se chuan ka hrethiam awl zawk ang maw le. Hmân ata tawh a hnen aṭanga lehkhathawn ka dawn reng rengin thui tak a ziak ngai lo hrim hrim a, a tirah hrethiam rih lo mah ila a sawi tum tak chu ka hriatthiam ve leh mai ka ring deuh tawp. 

Ṭhawhṭanni kan hmang ral a, thawhlehni kan hmang ral leh tawh bawk a, tunah chuan nilaini kan thleng ta. Ni lengin lehkha zir mah ila zan lama thil thleng tur ngawt chuan ka rilru a luah a, Mazara hmel ka hmuh châk tlukin ka hlauthawng a ni. A dinhmun chhiat lai tak a nih hmel bawk si a, inṭhen a rawt vaih chuan ka nâ dawn lutuk tlat, ka tuar zo lo mai ang. College kan bang a, thil dang ka ngaihtuah luâtah motor-in min su ṭep nghe nghe a, motor khalhtu lakah chuan ka inthlahrung khawp.

Zanah chuan ka awm hle hle thei tawh lo, chutah u Vli chuan ka room-a rawn riah a la tum zui, hun lo tak a ni. Riah phet a tum paw'n ka phal lo char char a, a tawpa tawpah chuan a thin a rim ta nge nge. A room-a riah ka tum hunah pawh a phal dawn loh thute a sawi hmawk hmawk a, ka nui tawp ringawt. Zan a rei a, ka chhungte an muthilh vek tawh hnu chuan ka la meng fiah hle a, ka mut a chhuak lo hrim hrim, ka room tukverh rawn ri zeuhah chuan ka phu hman hle.

"Mazar" ti sepin khawvela ka mipa hmangaih ber leh a kianga awm ka thlakhlelh em em dinna lam chu ka pan a, thawm dim takin  tukverh chu ka hawng a, ka hawng chiah chu a rawn lâwn lut nghal a, kan hmui chu a inbawhthuah zawm zat bawk.

"Engmah ka neih loh lai pawh hian min la hmangaih tho em?" inthlahlel tawn taka kan infawh hnu chuan a rawn ti lum ham ham a, kan chal chu a insik tir ran a, a thaw rimtui zet chu ka hip lut chiang hle bawk a, a zawhna erawh ka besei loh lam daih a ni leh ta. 

"Engtin pawh awm la ka hmangaihna che hi a kiam chuang lo vang" rilru leh tih tak zetin ka ti ve ta sep a, ṭawng rin a chi rih lo va, mi dangin kan thawm an hriat palh vaih chuan engkim a buai nghal vek a ni mai. 

"Min nei ta che, ka bulah i rawn cheng duh ang em?" thum hniam ruiha a rawn tih leh chuan ka hmui ka hup tawp a, ka hlim lutuk chu ka ṭap mai dawnin ka hria, thawm chhuah ngamna ni se chuan ka insum zo lo chiang khawp ang.

"Nang nena chen dun bak baka duh ka nei lo" ka tih chuan hriat reng tlâk khawpa mawiin a kiai suk a, ka khabe chawi kângin min fawp leh ngawng ngawng a, kan inthlah meuh chuan thaw a chham dawn lek lek alawm le. 

"Insiam rawh le, mahse thawm dim a ngai" a sawi ang chuan ka che chhuak nghal a, rucksack bag-ah ka thawmhnaw ṭhenkhat ka khung nghal mawlh mawlh a, ka khung tam lem lo, khum hnuaia ka box dah ṭhat chu ka lak theihnghilh ṭep leh nghal. 

Mazara chu chhuak hmasa zawkah a ṭang a, ka bag chu lain leiah a dah a, tukverh aṭanga ka chhuak tur chu min lo hnung chhawn a, a hnungah chuan ka pakai zui nghal bawk. Bag khaiin kei chu min paw thung a, kan kal sâwt zawk a ring a ni maithei. Amah a pa lian bawk nen a pen pawk pawk a, kawngpui kan thlen hnu paw'n motor ka hmu mai lo va, mak ka ti ang reng khawp. Minute 10 vel kan kal hnu chuan kawngpui sira Bike lo inhung ka hmu ta, Sumo a nei tawh lo tih ka hre chhuak hnuhnawh leh a, ka ngaihtuah tawi lutuk chu ka insik vak ringawt.

Bike hnungah chuan bag chu a ṭawn bet a, a bike hunna chu a thlang thiam ka ti viau. Kan in hnaih takah hung ta se chuan kan tlan chhuak thawm ka chhungte'n an hre ngei ang a, Mazara bula ka kal an phal lo ngei bawk ang. Bag a ṭawn fel hnu chuan min pawm kâng lâwp a, bike-ah min ṭhuttir a, ani pawh rawn ṭhu ṭha ve nghal bawk. Bike a tirum vut vut a, ka kut chu lain a kawng min kuahtir a, inher miah lovin ka hnung a rawn khawih a, amah si chêt turin min nam a, ngawi reng mah se a chet dan vel chuan min va tilungawi hliah hliah tak, a pà thlawt a ni. Bike chu tirum leh vut vutin a tlan chhuak ta, inneih hnuah pawh kan inruk dan chu ngaihtuah chhuah a nuam dawn riauin ka hria. 

(End of Chapter 29)