SUMO DRIVER By Havali Adam (CHAPTER 28)

SUMO DRIVER

By

Havali Adam

Chapter 28

Mawitei te in lam panin ka tlan char char a, ka rilru chu a buai phili vek a, Tlantea thusawi khan min ṭhawng êm bawk a ni. Ka chhungte'n min rawn hmuh hman ka hlauh avangin hah tawh tak chung paw'n ka tlan muang lo hle a, ka ṭhiannu chuan min lo pui thei hram se ka ti bawk. Ka chhungte ni se ka mamawh sawi ngamna an ni tawh lo va, an fanu chunga an chet duh dan chu tenawm ka ti tak zet a, ka rilru a tinâ ngawih ngawih a ni. Ka hmakhua ngai angin an insawi a, mahse kei chuan an ngai tak tak paw'n ka hre lo, anmahni hmakhua an ngai zawkin ka hria.

Ka hmanhmawh luatah ka ke chheh a dik lo va, ka tlu bawk thlawp a, ka khup chu lei chârah chuan ka tauh chawrh a, a va'n nâ vawng vawng tak em. Ka tlan chak ang reng bawk si a, ka tlu nâ thawkhat khawp mai. Mawitei te in thlen nân kawng kawi a la awm nual a, ka chhungte'n min rawn nang hman ang tih ka hlau hle. Lei aṭang chuan thovin tlan leh nghal mai ka tum a, ka thei ta hauh lo. Ke bai ngai khawpin ka ke chu a nâ a, ka hmanhmawh bawk si nen ka rilru a buai lutuk chu ka ṭap tawp ringawt. 

"I ṭha em? I ke i tinâ em ni? I tlu a ni maw?" aw lo chhuahna lam chu ka hawi thuai a, ka pa ṭhianpa fapa a lo ni reng a, ka pa rawn tirh a nih ringin min hnaih a tum chuan bân ka lo phar a, ka mittui te chu ka biangah a la luang nûai bawk.

"Puih i ngai em? I ke kha a nât hmel viauin ka hria, damdawi inah i kal ang hmiang" ka hmaa ding chatin a rawn ti leh a, kan vawi khat inhmuhna a ni a, a hawihawm pawh chu a awm viau mai, min rawn hnaih luih a tum lo niin a lang. 

"Khawiah nge kal i tum reng reng a? Ka puih theihna che a awm mial em?" a tih chuan min hruai haw tura ka pa tirh a ni lo tih ka man thiam nghal a, zah pawh dawn lovin amah hnaih zawng chuan ka kal a, min lo en chiang khawp mai.

"Khawngaihin min pui hram teh, ka tana mi pawimawh em emin Accident a tâwk a, tunah hian damdawi inah a awm mêk a, ka hmuh ngei ngei a ngai. Khawngaih takin min pui rawh, min pui thei ang em?" mittui tling pamin ka en a, ka ṭah chu chhuak tak a ni. 

"A ni maw, khawi damdawi inah nge a awm? Kal nghal ila a ni mai alawm, i ke kha entir hmasak phawt a va ṭul si ve" lu ka lo thing vat a, ka ke nâ mah se muangchan hun a ni tawh lo, tunah chuan keimah ai pawha ngaih pawimawh ka nei tawh tlat. 

"Kan hmanhmawh a ngai zawk, a awmna chu Aizawl khaw chhung a ni lo. A theih hram chuan ka chhungte'n min rawn nanchin hma min kalpui thuai la ka va'n duh êm, kan kalna tur hi a hnai miah lo" ka ti ta thlawt a, a ngenin ka ngen a ni ber. 

"A nih chuan kal nghal ang hmiang, ka lakah i chhungte an lungawi loh phah êm lo vang chu!" tiin a motor lamah chuan a kal a, ka dinna bulah chuan a rawn tlan phei a, kawngka a hawn chuan ka lut vat a, awlsam taka min pui duh mai chu a mak ang reng. 

Melriat kan tlan thlen lai te chuan Mazara ngawr ngawr ka rilruah a awm a, chet sualna a tawh dan mawlh chu mak ka ti a ni. Mi fimkhur tak a ni a, mi dang fimkhur lo pawh ni se a fimkhur miau avangin tawh sual a tâwk ngai lo reng bawk. Tlantea khan khaw dâi lawkah Truck bang sâng nen an insut thu a rawn sawi a, ka ngaihtuah chian hnu paw'n ka la awih thei chuang lo. Mazara chu a fimkhur dawn tih ka chiang, ka chiang lutuk tlat, mahse tawh sual a tâwk tho si.

Mazara te khaw lam pan chuan kan tlan zel a, an khua taka tlan luh pawh a ngai hran lo. An khaw piah lawkah damdawi in ṭha zawk a awm reng a, chutah chuan an inphur phei dawn tih hriat sa vek. Chanchin erawh Tlantea zawh leh tho chu ka tum a, mahse phone ka nei ta lo a ni. A ruka ka phone kawl lah ka nu'n min laksak daih a, an fanu laka an sual ta lutuk chuan ka rilru a tinâ a ni. Ṭha taka sawipui theih ka nih reng laiin Mazara ṭhen turin min ti nghal ringawt a, a eizawnna ber an hmusit bawk a, ka laka an chet dan chu an fanu ka ni ta lo emaw a tih theih dawn alawm le. 

Ka pa ṭhianpa fapa chuan kan kalna tur min zawt a, ṭha takin ka hrilh ve mai bawk a, chu bak chu zawhna dang min zawt leh tawh chuang lo. Ka khup chu a la nâ viau a, a nâ lai tak bul vel chu ka hmet leh ṭhin a, a dam nghal mai ka rin tehreng nen a nât dan chu a rei chi a ni dawn tlatin ka hria. Ka bula ṭhu pa chuan min rawn en leh zauh ṭhin a, eng pawh ni se a lakah chuan lawm thu sawi ka bâ nasa hle a ni. Kan vawi khat inhmuhnaa min puih a hreh miah loh danah rilru chhe tak a ni dawn lo tih a chiang, ka rin ang ngawt chu a ni lo e. 

Inbe mang lovin motor-ah chuan kan chuang dun deuh tawp a, kan rilru kan kawm ve ve a ni mahna. Ka ṭawngṭai ru mawlh mawlh a, Mazara chu a thi mai ang tih ka hlau hle. A thih vaih chuan ka tuar thiam lo khawp ang, a chhan chu ani tluka ka mipa vei leh duh an la awm lo va, engtik lai paw'n min chen chilh a ni ber. Buaina leh harsatna ka tawh apiangin min pui hreh lo va, min thlamuan a, eng hunah pawh ni se ka tan a awm ṭhin.

Chuti ang khawpa ka tana mi hlu leh mipa rilru ṭha em em chu a thih ka phal ang maw!? A teuh lo mai, a teuh lo lutuk, a thih ka hlau em em zawk a ni. Engtin nge ka chhungte hian ka tan an duh lo theih zawk le, hre chiang ngat se chu mi hausa tak tak aiin an thlang ngei ang. Ni lo, ka chhungte hi mi lem tak zawng a ni. Ka hrethiam ve vek, ka kawppui atan mi rethei an duh loh avangin Mazara pawh an pawm thei lo chu a ni ngei a, mahse Mazara hi mi rethei a ni ngawt bik lo.

Ni e, kan chhungkaw dinhmun nen khaikhin chuan mi rethei pawh a ni mahna, kan sum neih dan pawh a inthlau viau tak ang, mahse kei ka ngaih dan chuan rethei leh hausa tehna hi sum neih tam leh neih tam loh lamah chiah a innghat bik lo a ni. Sum tam tak nei a ni miah lo va, keini angin in ṭha tak a nei lo va, motor pawh a nei lo va, thingtlang tlangval niin ram lamah hna a thawk ṭhin a, Sumo khalha sum hai lut ve mai chauh a ni. 

A dinhmunah chuan vuina nei lo ang maiin a awm a, chuti ang mizia chu mi hausa an ni zawkin ka hria. Ka nu leh pa chu ka dem a, an rilru kha ru zet chu ka hrethiam ve vek tawh. Sum an duh vang chauh tih hriat reng reng, chuti ang ni lo se chuan Mazara hi an pawm khawp ang. Khati ang khawp khan mipa rinchhan ngam leh innghahna tlâk a nihzia an hre vek tawh a, amah avang chauha chengkawl kan khawrhnaa thi lo ka nih thute chu hre ve se zawng engtin tak ngai ang maw! 

Ni lo, an pawm phah chuang lo vang, a chhan chu rilru hausa aiin langsar taka hausa emaw chhungkaw dinhmun ṭha tak an ngaisang tlat a, tunah chuan kan inngaihzawn tirh lai vela Mazaran kawng zawh sual hlau chunga min bawhzui thu a sawi kha ka hrethiam ve chiah. Ani khan hman aṭang tawh kan hma hun tur a lo hmu lâwk vek a, ka nu leh pa rilru thlengin a lo hre lâwk vek a, ka tan an duh dawn lo tih a hre vek zawk a nih hmel. 

Eng ang paw'n min pawh ṭhen tum mah se kei chuan ṭhen ka tum ngai lo va, harsatna a tawh apianga pui turin ka inpeih vek tawh zawk a ni. Ka pa fanu ka ni a, ka pa a luhlul tluk zetin kei pawh ka luhlul a, unau zinga naupang ber mah ni ila ka duh lohna lamah chuan luhlul tak ka ni. Chhungkuaa an duat rawn ber ni ṭhin kha min han tihrehawm ta chu a ni si a, rilru nâ takin min siam a, an laka ka pangchan ṭhin dante ngaihtuah chhuah phei chuan tuna ka awm dan chu awihawm lo tak a ni. 

"Kan thleng hnai tawhin ka hria" ka bula mi chuan hma lam en reng chung tho si hian a rawn ti a, ka ngaihtuahna a vak kual nasa lutuk a, kan thlen chin pawh ka lo hre hleimem le, zan ni lo se chuan ka hre ve thei maithei.

"Eng lo, i hming ka theihnghilh daih, ka pa ṭhianpa fapa i ni tih bak ka hre tawh lo. Min hrethiam dawn nia, ka rilru hi a buai mah mah a ni" inthlahrung tak chuan ka ti a, huat nei lo hmel zet hian a nui mai a, kei erawh ka nui ṭha ngam vak lo. 

"Jimmy-a ka ni e, ka pa kâ aṭanga ka hriat danin College i kal mek a nih hmel a, kan vawi khat inhmuhna hi hriat reng a awl dawn khawp mai" a tih chuan sawi leh mai tur hre lovin ka ngawi ta reng a, chutah amah bawk chuan pangngai deuh hian

"Mazara i tih pa chu em ni damdawi ina awm mêk chu?" a rawn tih zawm leh nghal zat a, kan ina ka awm lai khan ka pa hnenah Mazara bula min hruai turin ka ngen tak alawm, ani pawh a lo awm ve reng kha le. 

"Aw, ni e. Truck bang sâng nen an insu a, ka tana mi pawimawh takin harsatna a tawh laia ka awm hnai lo hi nuam lo ka ti ngawt mai" ka ṭawng tawp lamah chuan ka hnuk a ulh deuh a, sawi kai duah pawh ka tum hran lo, ka kâ aṭang chuan a rawn chhuak tawp a ni ber. 

Kan ngawih dun vang vang hnu chuan thil ka hre chhuak thut a, Jimmy-a chu a phone hman ka dil leh ta ringawt. A chhan tak ka hre bik lo, engtin emaw ni tak hian a bulah chuan ngampat dan riau ka nei a, a rilru a chhe lo tih ka hriat chian tawh vangte pawh a ni ang. A phone chu min hmantir a, Mazara ni lovin Tlantea zawk chu ka bia a, signal awm ṭhatna laiah awm lo ila chuan ka be tlang thei kher lo vang. 

Ka rin ang ngeiin an khaw bul District Hospital-ah Mazara chu an enkawl mêk a, Tlantea sawi dan chuan amah tak chu hliam nâ a ni hran lo va, mahse dressing tur eng emaw neuh neuh a awm tho. Kan inbiak tirh ang em emin min ṭhawng tawh lo bawk a, Tlantea thusawi zawng zawng chu ngawi rengin ka ngaithla tluan chhuak parh a, ka chhungril chu a nâ vawng vawng thei. Truck nen an insut avangin Sumo chu hmuh tlâk loh khawpin a chhe hneh a, Mazara bawk chu ka ngaihtuah leh ta ber mai. 

Darkar 4 chuang kan tlan hnu chuan Tlantea hnen aṭang Jimmy-a chuan phone call a dawng a, keimah min biaktir a, khaw lama an haw phei thu a sawi chuan mak ka ti ang reng khawp. A tirah kha chuan accident a tâwk tih ka hriat khan ka buai vek a, a bak engmah ka hre mumal thei tawh lo va, a hnuah a dinhmun a ṭhat thu ka hre leh a, tunah lah khaw lama an haw thu ka hre leh bawk a, a mak zung zung lutuk chuan ka ngaih a tiṭha lo lek lek zawk. 

Jimmy-a bula chuan kan tlanna lam tur ka sawi leh a, kei ai a upat vak hmel lo bawk nen ka u ta lo law law. Amaherawhchu a mak ang reng khawp mai, kei aia upa fê Mazara pawh 'u' ka harsat laiin ani chu han 'u' dawn mah ila nuam lo tihna emaw timna ka nei miah lo, khawpui tlangval tih hriat takin a hmel a fai veng reuh a, a lo berah kum 25 a pelh ka la ring lo. Ka sawina lamah zel a tlan a, khaw thlen hmain kawng peng a tam ve deuh a, ka hrilh zel loh chuan a tlan dik lo mai ang tih ka hlau a ni.

Darkar chanve vel kan tlan leh hnu chuan khaw chhung kan thleng ta, putea te veng lama tlan chho lovin Mazara te in lamah kan tlan tlang nghal a, an in kawt kan thlen te chuan chhuk rang tak ka ni. Ka khup nâ pawh ngaihtuah tawh lovin kawngka chu ka hawng sawk sawk a, Mazara hmel chu a tak ngeiin ka hmu leh ta e. Bandage var hian a lu a lo tuam a, a bulah chuan Hruaikimi leh putea te chhungkua an lo ṭhu bawk a, mahse tumah ka zah zo tawh lo.

"Mazar" ti ṭuauin a lamah chuan ka bai phei auh auh a, ka ke nâ lo se chuan a tlanin ka tlan phei ngei ang maw le, a ṭangah bei thlawpin ka kuah a, ani chuan min lo kuah lêt ve miah lo, kan dinhmun tawn mêk chhe dun lutuk chuan ka ṭah a tichhuak zual tak zet. 

"Engtin nge accident i tawh theih Mazar? I fimkhur ṭhin hle a ni lo'm ni? Ka chân lo hlauh che hi a lawmawm tho rualin ka rilru i tibuai lutuk, i chanchin ka hriat tirh phei kha chuan ka mangang hman asin" ka ti mawlh mawlh a, a biang tawn tawn chu ka kut pahnihin ka chelh ran bawk. 

"Min chhang teh Mazar, ka ngaihtuah teh mai che a nia, engati nge ka phone call pawh i lâk duh ngai tawh loh? Ka ngai che asin, ka ngai lutuk che" ti leh lawm lâwmin a mitah chuan ka en ran a, ka ṭah chhuah hawk loh nân ka hmui chu ka pet nasa hle. 

"Mazara" ti sepin ka ṭap chhuak ta nge nge a, nghet taka kuah chung chuan ka ṭap chhuak hawk a, kan bula awmte mitmei chu pakhat mah ka veng zo tawh lo va, a âng chhunga ka awm chiah chu ka rilru a no zual a ni ber.

Min rawn kuah lêt rual chuan a hma aia nghetin ka kuah a, a kawr hnung chu ka ṭham tawn tawn a, dam kawr a ni tih pawh ka ngaihtuah chang tawh lo. A kawr âwm chu ka mittui avangin a huh deuh dup a, ka lung a chhia a, ka rilru a nâ a, hliam nâ tak a neih loh avangin hlimna erawh ka nei deuh tho bawk a, ka rilru chu a inkawkalh nuai mai. Duat tih hriat tak hian ka hnung a chul hauh hauh a, ka ṭahbelh ta lutuk chu a zia lo tak tak a ni. 

"Engati nge i ke?" thutak zeta min en vawng vawng hnu chuan a ti sup a, a ṭhutna aṭanga thovin ṭhutthlengah chuan min ṭhuttir ta zawk a, ka kekawr a keu rual chuan a meng deuh kâwk a, min rawn en chiang hle. 

"Engtin nge i tihnât?" amah bawk chuan a rawn ti ram deuh hmuk a, ka khup ka hmu chiang chiah chu kei ngei paw'n ka râp deuh reuh, ka rin aia thi a chhuah nasat mai bakah a kak thui phian a, nâ awm reng pawh a lo ni e. 

"Ka tlu a" ka tih chuan rum nghut hian a tho va, tap chhak lamah kalin thuka tui lum ni awm tak inchhuang chu Plate thirah a thli chhuak a, ka hmaah rawn ṭhu hniamin puan chu tuiah a chiah a, ka khup kak lai a hru chiah chu a thip zawk mai.

"Fimkhur ta che, tlu mai mai rual pawh i ni tawh lo" ti hmuk hmukin ka khup chu a hru fai mial mial a, a chang leh a chhem leh heuh heuh ṭhin a, lungni lo viau mah se kei chu ka lo nui sen sen a, ka biang vel chu mittui vangin a la chiau deuh pur tho bawk.

"I mi rawn hruaipa nen hian haw ang che u" a tih chuan ka nui tawp chiang hle, thil eng emaw dik lo a awm tih ka hrethiam nghal thuai a, ka khup hruk a tum leh lai tak chuan ka lo dang a, kan mit chu a intawng chiang ta khawp. 

"Eng nge dik lo awm Mazar? Ka pa'n i chungah eng thil chiah nge a tih? Engati nge heti ang hian ka lakah i awm thut? Sawi rawh Mazar, ka chhungte'n eng ang paw'n min pawh ṭhen tum mah se ṭhen che ka tum lo, ka tum ngai lo bawk ang" a tawp lam phei chu a auvin ka au a ni ber. 

"Pa Rintluang, in in lamah hruai chho ula, a khup hi inenkawl zui dawn nia, hmeichhe tawrh atan chuan a nâ thawkhat viau ang" tih leh thawh a rual a, ka ṭawng engah mah ngai lo ang maia a awm tlat chu ka hrethiam lo va, ka insum theihna a puak keh zui nghal. 

"Min pehhel phêt tum suh Mazar, ke nâ chûng chung paw'n ka rawn kal asin, ka pa'n nang nena inngaihzawn phal lo mah se ka ṭhen ngai lo vang che. Ka rilru i tibuai a nia Mazar, i awm dan hian ka ngaih a tiṭha lo" a tir lamah ṭawng tawn tawn mah ila a tawpah erawh ka aw chhuak chu a zuai deuh raih a, ka lung a chhe thlawt a ni.

"Engati nge maw heti anga i awm tlat reuh le?" ti khauh hmukin min en chhuk run a, mi dang chuan min en tawn deuh zak zak a, pute te tak ngial pawh ka zah zo tawh lo ber chu a nia, mahse a chhan a awm ṭha ve êm bawk a tin ni! 

"A chhan chu ka hmangaih che alawm Mazar, ka thinlung leh tih tak zetin ka hmangaih tawh che a ni" men deuh pur chuan ka ti chhuak ṭuau a, min en dan chu a ngai reng a, sawi tur hre lo ang maiin a ngawi reng ringawt. 

"Min ringhlel em ni? I laka ka rilru puthmang hi a tak tak vek asin a nih, ka mipa hmangaih hmasa ber i ni a, min ringhlel a nih chuan ka sawi zel mai ang" ka ṭap chhuak feih a, hmeichhia zawkin ka hmangaih thu han hrilh hmasak chu thil mawi lovah pawh ka ngai thei tawh lo, kan dinhmun a buarchuar tawh em mai. 

"Ka hmangaih che Mazar" kun ngul chunga ka tih leh ṭuau chuan kut lum vung vung hian ka khabe a rawn chawi a, ka hmui chu khawvela ka mipa hmangaih ber hmui nen a inbawh thuah zui nghal bawk a, ka ṭah nuih ta hawk.

A kut hlai zet chuan ka bekah a chelh ve ve a, min fawp ngawng ngawng a, kan bula awm mi dangte chu a zah zo tawh bik lo a ni ang. A kawr pawt ṭai chung chuan ka thiam ang tâwkin ka lo chhang lêt ve tawn tawn a, kan pahnih chauh paw'n khawvelah awm mah ila ka hlim tho ang. Chuti ang khawp chuan ka thlahlel a, a bula awm nuam ka ti a, ka hmangaih em em bawk. Harsatna kan tâwk a nih paw'n ani nen chuan hma chhawn ka inhuam a, ka inhuam zel bawk ang. 

"Zanin chu i putea te inah riak phawt ula, naktuk lamah in haw thla dawn nia, ka thusawi hi awih ang che" ka hmai zawna thaw lum ham ham hian a ti hniam ruih a, ka inla hrang ta vat a, ka hmangaih thu ka hrilh hnu pawha a rilru a la tipaukhauh lui tlat chu ka hrethiam thei lo a ni. 

"Pa Rintluang, han hruai chho mai ta che u, kei chu ngaihtuahawm ka ni tawh lo ve, nang pawh haw tawh rawh Hruaikim" amah bawk chuan a rawn ti leh nghal a, ka hriat ṭhin Mazara kha a ni ta lo mai emaw ka ti rum rum.

"Ka kalsan dawn hauh lo che, ka lo chhoh chhan chu nangmah i ni a, i bulah ka awm bawk ang" luhlul zet chuan ka ti pawng pawng a, Mazara chuan thip zet hian min en a, kan inkar chu siam ṭhat tum se ka ti ngawih ngawih. 

"Khaih khaih khaih Numam, chuti ang tur a ni ngai lo. Kan in lamah haw chho rih phawt ila, hmeichhe riahpui zawng a dik nâng maw le, khawtlângah in hmingchhe lutuk palh ang e" putea chuan a rawn ti a, a thusawi chu dik tho mah se engah mah ka ngai duh lo lui ve hmak.

"Hetah hian ka riak dawn pute, min chhohsan mai rawh u" Mazara melh chho kar chung chuan ka ti deuh hmarh a, Hruaikim chu ka mitsirin a chhuak tih ka hmu thei a, chhuak daih mah se pawi tihna ka nei teuh lo.

"I ṭhianpa pawh hi ngaihtuah ve ta che maw le Numam, nang ber i awm lovin khaw'nge awm se i tih? Zanin chu kan in lamah chho phawt ila, naktuk lamah in sawi ṭha dawn nia" putea bawk chuan a rawn ti leh a, pitei leh Tlantea chuan min lo en reng a, Jimmy-a ka lo ngaihtuah tawh miah lo chu ka inthiam lo hnuhnawh viau.

In aṭanga kan chhuah dawn chuan ka hawi let leh hram a, Mazara chuan min lo en reng a, kalsan harsa ka ti hle mai. Naktukah in be leh dawn pawh ni ila ka ngai a, zankhuaa ani nen hun hman dun chu ka duh a ni. Lehlam kawng zawng tak chuan ka thawl deuh hawk a, zak miah lovin ka hmangaih thu ka hrilh tawh a, ka hmangaihna avang chuan a rilru thlak se, inṭhen lam sawi lang miah lo se tih chu ka duhthusam a ni. Tun dinhmunah chuan inṭhen pawi a tih lohzia ka hmu a, mahse kei chuan ṭhen ka tum der lo, ka thei lo bawk ang.

Putea te in kan lut a, hma zawk zawk a ni tawh lo bawk nen mutna min siamsak zui nghal mai an tum a, Jimmy-a chu biak ka duh viau a, mahse sawi tur ka hre hlawl lo. Pitei leh putea zawk chu hawihhawmah an ṭang leh a, an be tlângnel thiam khawp mai. Pitei chuan ka khup chu a endik vel a, Tlantea chu an Health Sub Centre-a thawk ko turin a hrilh nghal a, ka hliam chu a vûng deuhin ka hria. Rei lovah Tlantea leh pa pakhat hi an rawn lut a, chu pa chu damdawi lam thiam a ni tih ka hre nghal mai. 

Ka khup kakah chuan pem thar damdawi hnawihin puan var chuan dim tê hian a tuam nghal a, nâ chhawkna damdawi ei tur min pe bawk a, in aṭang chuan a chhuak har hran lo. Tlantea leh Jimmy-a chhuata an mut laiin kei chu khumah ka mu a, chhuata mut ka hreh loh tehreng nen Tlantea berin khuma mu turin min ti tlat a, ka hliam neih vangte pawh a ni maithei. Ka rin lawk ang chiahin ka mu thei lo ta ngei a, ka hliam neih vang pawh a ni lo, Mazara ka ngaihtuah vang zawk a ni.

  

Zingah chuan ka harh hmasa ber a, mu lo ta na nâ nâ chu a harh hmasak ber loh theih loh. Ka khup chu a ni deuh ṭung a, han mar dawnin a nâ a, tawm dawnin a nâ leh bawk a, dim a ngaih hmel khawp. Room aṭang chuan ka chhuak a, choka lamah ka kal tlang a, ka kal muang ang reng hle. Thingpui siam ka tum deuh ûk a, mahse tûmah an rawn la thawh loh avangin ka siam leh ta lo. Keimah tak pawh chuan ka in peih chuang lem lo va, dawhkan bawhin ka ṭhu kun ngul tawp ringawt. 

"Numam, chaw ei kan peih tawh a nia" min sawi dat dat pah hian pitei chuan a lo ti a, ka lo muhil tlang palh a ni ngei ang tukṭhuan ei hun lai ang maiin ni chu a sa a, ka harh chian meuh chuan Jimmy-a te tak ngial pawh a lo tho daih tawh. 

Ka awm dan chu siam remin chaw ei siampui nghal ka tum a, pitei chuan a lo phal lo nasa mai. Ka ke chu ka la bai auh auh a, ka hliam tirh ai chuan a nâ lo deuh hretin ka hria. Chaw ei laiin putea chuan ka pa nen zinga an inbiak thu leh min hruai tura an lo chhoh mêk thu a rawn sawi ta mai, ka chaw ei a tawp hmak a, ka chaw ei tuina chu a bo duak a, ka lungngai lâwk em em bawk. Min hruai thla ngei dawn tih chu chiang sa a ni a, chaw pawh ei zawm peih tawh lovin ka kham ta daih. 

Pawnah ka chhuak a, muangchangin venglai lam panin ka chhuk a, Mazara chu a lo ram chhuak hman ang tih ka hlau ta ber. Ni lo, a ram chhuak bik kher nâng, a lu ah hliam a nei ve tho alawm, mahse a duh chuan a ram chhuak thei reng ang, a chhan chu hliam nâ tak a nei lo tlat. Mazara te in lam ka pan lai chuan min lo en duh tâwk an kat nuk a, ka ke bai vel kher lo ila chuan min en duh viau lo vang. A ṭhen chuan ka hmel an hre deuh reuhin ka hria, a awm ve tho, tun hnaiah ka tlâ chho ngun ve êm bawk a ni.

Ka kal tumna ber chu ka thleng a, kawngka ka hawng nghal a, min hnung chhawn zawnga Mazara lo ding ngawi reng ka hmuh chuan ka khawngaih tak zet. Ka lut thawm chu a hriat ka ring tho va, mahse a lo hawi miah lo. Engkim chu a ngai ngaiin a la awm vek a, a hnawk ngaiin a la hnawk vek bawk a, a mu bik lo a ni ngei ang. Hnung lam aṭang a kawngah chuan ka kuah a, a rim chu chu ka hip lut vang vang a, chuti ang mai mai pawh chuan min tihahdam sawng sawng thei.

"Mazar" maimitchhing chung chuan ka ti sep a, zawimuang hian a rawn inher a, a lam chu hawi chho thuaiin ka nui lui sak a, ka nuih erawh a za miah lo, inṭhen lam a rawn sawi ang tih chu ka hlau ta ber.

"Thil hi a harsa zawngin kaltir lo vang, Aizawlah chhuk leh la, i chhungte duhthusam ngei ngaihzawng nei zawk rawh" dam dap hian a rawn ti a, a awah chuan rilru nâtna mai bakah inthlahrunna ka hre thei, chuti anga ṭawng lo tur chuan ka duh hle thung si.

"Ni lo Mazar, nang lo chu mipa dang ka duh lo. Nangmah chiah, nangmah chiah ka duh che. Ka duh satliah mai che ni lovin ka hmangaih tawh che, chu chu i hria ti raw?" kan inṭhen tak tak ka hlauh luatah ka hmangaih thu chu ka sawi leh ta nge nge.

"Ngaithla teh Numam, keini hi chu kan inkhân lo mah mah a ni" a tih chuan ka mittui a rawn tling nghal a, inṭhen lam ringawt a ngaihtuah tlat bik chu ka rilru a tihah zual, ka pate lah an lo thleng ṭep tawh leh nghal. 

"Inkhân lohna pakhat mah a awm lo, khawngaih takin inṭhen lo vang Mazar; khawngaih takin. Min khawngaih zawk hial lo em ni? Zah pawh dâwn lovin ka hmangaih che thu ka hrilh mawlh mawlh che a, ka tana i hlutzia ka hmuh bawk che a, chuti chung chuan min ṭhen i la tum tho maw!?" ka aw chu a zuai ta raih mai. 

Thawk la hawkin min rawn kuah a, ka ke tihnât hlau zet hian min pawm kâng a, pindan lama min pheipui lai chuan ka rilru a no leh tawh tak zet. Ngawi rengin khumah kan mu dun a, kan inhma chhawn a, a mitmeng mawi tak chu thipin tak run mah se a mawina a bo chuang lo va, ka tan chuan khawvela hmuh nuam ber a ni hial ang. A khabe phir lai tak te chu a hmaa ka lo tih fô ṭhin ang bawkin ka zut leh neuh neuh a, ani ve thung chuan min en reng ringawt a, ṭawng a tum lo va, chet pawh a tum chuang lovin ka hria.

"HMINGTHANPUI! Khawiah nge i awm?" mipa aw vin tak thawmah chuan ka harh zawk a, Mazara pawh a meng sen rum a, kan lo muhil ve ve a nih hmel, pindan kawngka rawn hawngtu chu tu dang ni lovin ka pa ngei a ni. 

"HMINGTHANPUI le! He thingtlangpa hi i lo mutpui vel a maw!? I va han zak lo mai mai êm, heti ang mipa mai mai nena awm dun tur hian ka chawm lo che" ti vin hrawkin khum aṭang chuan min pawt thla sawk a, ka ke nâ chu pakhat mah a ngaihsak lo. 

"En rawh Rintluang, engmah a thleng lo vang te kha i ti vel a, he tlangval kut hnathawka ei zawng mai mai hian ka fanu hi a lo mutpui ngam a nih chu! I chungah pawh ka lawm lo khawp mai, kan rawn zin chhoh khât viau tawh ang ka ring" ka pa aw chu a nêm fahran lo hle.

"I ngaih ang ngawt kha a ni lo" Mazara chuan a rawn ti nghet ve charh a, ka pa chu hawi phei nghalin Mazara chu a pan hnai nghal ruak a, kei chuan sawi dik loh a neih pawh ka hre lo, ka pa rilrua awm ang engmah a thleng lo tlat. 

"Ka hrilh chiang tawh viau che a ni lo'm ni? Ka fanu hi a them paw'n rawn hnaih ngai tawh suh ang che, i hnaih tih ka hriat leh vaih chuan ka duh loh dana chet hun pawh a la awm maithei" Mazara kawr âwma ṭham salh pahin ka pa chuan a ti a, ka pa rilru chhiatzia chu ka hre ve chiah. 

"Nang pawh HMINGTHANPUI, he pa hi vawi khat mah i hmu tawh tur a ni lo. Kan haw ang a, ka thu lo chuan ngaihzawng emaw pasal emaw pawh i nei hlek lo vang" ka ban rêka chelhin ka pa chuan a ti leh buan buan a, putea a rawn ṭawng chhuak ve ta.

"I thu lak dan hi a fuh ber lo a nia Sangte, an inhmangaih phawt chuan chhungkaw dinhmun tih vel hi a pawimawh ber hleinem, i fanu rilru tur hi hriatthiamsak la ka ti ngawt mai" a rawn ti dap dap a, ka pa ngaih dan a va ni lo chiang tak em. 

"I inrawlh lohna turah i inrawlh a ni Rintluang, lo ngawi la a ṭhat zawk ka ring" ka rilru a nâta a buai rualin ka pa awm dan leh ṭawng dan vel chuan min tizak letling a, chuti ang mizia chu a neih ka ring ngai lo, a mawng a thai hlim mai mai a ni.

In chhung aṭanga min hruai chhuah a tum chuan ka lo ṭang tlat a, Mazara ban chu ka vuan bet tlat a, min hruai chhuak thei mai bik lo. Kei paw'n ka ke nâ lam reng ka ngaihtuah tawh lo va, ka theih tawpin ka ṭang a, mahse ka pa chet dan chuan min tihamhaih tak zet. Mazara bân ka vawnna chu a rawn chum a, ka thlah phah ta nge nge a, min hruai chhuak ta mai lo chuan mi dang hmuh laiin min beng a nih chu! 

"Engtin nge heti ang mai mai mipa hi belh i la tum theih zawk!? Hre rawh HMINGTHANPUI, in lo mudun khanglang tawh leh nghal a, a fa i pai a nih vaih chuan i titla nghal ang" min thin nawk nawk hnu chuan a tivin phiar a, ka hlau lutuk chu ka ṭap chhuak tawp. 

"I fanu khan a khupah hliam a nei mêk, dim ve deuh rawh" khauh taka lo titu Mazara chu mittui nen ka en thuai a, ka pa chu rawn khawih hrep se ka ti rum rum a, mahse chu erawh beisei loh law law chi, a chhan chu chuti ang mi a ni lo tlat alawm, ani te chu ka mihring hriat tawh zinga rilru ṭha ber a ni. 

"Nanga min hrilh leh i lo buaipui ve a ngai ther tê lo ve, a pa ka ni a, a engkim hi nang lêtin ka hre chiang zawk" thinrim tak hian ka pa chuan a ti vin leh hrawk a, ka ke nâ lam reng ngaihsak lovin pawn lamah min kai chhuak dawr dâwr a, tunah chuan kan inṭhen dawn ta tak tak e. 

Motor-a min nem luh dawn lai te chuan ṭhenawm khawveng leh tui chawi ṭhenkhatin min lo thlir ṭhup a, kawm chhak aṭang Hruaikimin min lo en reng bawk. Motor-ah chuan ka ṭhu lut a, ka pa chu rawn ṭhu lut ve nghalin ka ṭhutna lama glass chu a Up sawk sawk a, mipa ni ngat ila chuan kan insual chiang tawh khawp ang. Veranda-a lo ding chhuak Mazara chu Motor chhung aṭang ka en reng a, a kut chu a hum ruh em em a, a bula cheng hlen daih turin min rawn hruai chhuak hnuhnawh leh se ka ti ngawih ngawih. 

Motor chu a rum vut vut a, muangchang lo fê hian ka pa chuan a khalh chhuak nghal a, ka awm dan siam ṭha vatin Motor hnung lam chu ka hawi thuai a, hmui hup chungin Mazara chu ka la en hram hram a, kan inhlat tial tial a, ka ṭap chhuak leh ta nge nge. Hmuh theih loh china kan tlan liam dawn chuan in kawtah a chhuk thut a, min ngaihtuah hmel zet hian min en a, min rawn hruai dawn se chuan motor aṭanga zuan thlak mai pawh pawi ka ti lo, mahse engtin mah a che dawn lo tih ka chiang em em si.

(End of Chapter 28)