SUMO DRIVER By Havali Adam (CHAPTER 27)

SUMO DRIVER

By 

Havali Adam

Chapter 27

"Ṭap tawh lovin inha thuai la a ṭha ang" kan ngawih vang vang hnu chuan a rawn ti thum dam dap a, ka rilru chhungril erawh a la pangngai thei chiah lo va, chet sawn pawh ka tum chuang lo.

"Khawiah nge i thawmhnaw i dah?" ti leh supin a che deuh hrut a, thaw deuh hakin ka inla hrang a, ka thawmhnaw bawm lam ka pan lai chuan ka banah a rawn chelh a, a awm poh leh ruak kâng chu ka hmu chiang hle.

"Keima'n le" tih leh ka thawmhnaw bawm hawn chu a rual nghal a, a che vel chu ka lo thlir reng a, T shirt eng pakhat hi a rawn la chhuak a, min haktir a tum chuan ka lo dang vat a, Bra tak ngial pawh ka la ha lo tlat a ni. 

"Ka inha thei ang" ti sepin ka melh chho ral a, ngawi reng hian min en chhuk run thung a, a mitmeng leh a hmel hrim hrim chu a thutak hle a, ngaihtuah ngai em em ni tawh lo mah ila a mi ngaihsakna leh ngaihtuahna dawn chu a nuam kher mai. 

"I la ṭha chiah lovin ka hria" tiin ka kawr ken chu lo lâk a tum leh hram a, zep lovah chuan inthlakna hun min pe se ka duh tak zet, a âwm ruak kâng chuan min tizam er er a, pa Zothana ang ngawt chuan ka hlau lo chiang khawp.

"Ka inthlak duh Mazar" ka tih chuan a bu nghat a, inherin room aṭang a chhhuak zui nghal bawk a, kei pawh ka muangchang hran lo, Mazara kawr ka hak lai chu ka hlip sawk sawk a, thawmhnaw pangngai inbel vat chu a finthlak ber. 

Ka inthlak fel hnu chuan room aṭang ka chhuak a, Mazara chu Veranda-ah a lo ding ngawi reng a, a kawr ka pek lai te chuan la mah se hak nghal a tum chuang miah lo. A bulah dingin a hmel chu ka en la zauh zauh ṭhin a, a thutak khawp mai. Eng nge a ngaihtuah ka hre lo va, a ngaihtuahnaa ka awm erawh ka ring deuh tho. Ka rilruah hlauhna a awm tawh lo va, thinrimna hlirin a luah khat rih zawk. Mazara kut chu ka vuan a, min rawn en chhuk nghal a, nui tawi tak hian

"In ha tawh la" ka ti leh ta sep a, ka thusawi zawm chuang lovin in chhungah min kai lut a, a âwm ruak kângah chuan min kuah bet thlawp a, a taksa ka si chiah chu ka inhrethiam leh tawh lo, ka danglam tak zet tih erawh ka hre thung. 

Min chân hlau ang mai hian min kuah bet ran a, sawi lo mah se min ngaihtuahzia leh a hlauhthawn hman zia chu ka hre thei. Rei tak inkuah lovin a inla hrang a, thawk a lak rik ham ham hnu chuan a inha ve thei ta chauh. Ka pa emaw ka nu emaw u Duhawmi emaw tal phone ka tum rilru a, mahse tûmah ka be thei lo. Pa Zothanan ka phone a vawm chhe keh darh vek miau a, ka laka a chet dan avang chuan ngawihsan mai mai ka tum teuh lo. A rilru tenawmzia chu sawi chhuah vek ka tum a, nitei paw'n ṭhen vang vang se a ṭha ang. 

"Khawih buai duh suh Mazar, ka pa te paw'n rawn hmu ve reng reng rawh se" ka room kawngka chhia siam ṭhat tum ni awm taka a pan hnaih ruk ruk lai chuan ka lo ti a, engkim chu a ngai ngaiin la awm vek se ka duh zawk.

Ka awmna lamah a rawn phei a, a thil in tur ka siam lai chuan min lo en reng a, ka za mer mer thei. A bulah hi chuan a chang leh ka zam a, a chang leh ka rilru a no hma em em a, a chang leh ka thla a muang a, a chang leh awm dun reng mah ila ka ngai ru ngawih ngawih ṭhin. Tunah pawh pa Zothana lak ata min chhanhim leh a, ka tan hi chuan a ni tluka mipa ṭha hi an awm hlawl lo, khum zo an awm leh tawh pawhin ka ring lo bawk. 

Ka hnung lam aṭang min rawn kuah a, ka kawngah a kut suihin a bân a kham ruah a, ka chhip sam chu fawp vang vangin ka nghawng leh dar inkarah a rawn insawn thla a, ka che tawp ta hmak. A lam hawi zawngin min kuai her riai riai a, kan inhmachhawn rualin min fawp zui nghal a, ami fawhna dawnsawn chu a nuamin ka thil mamawh tak a nihzia ka hre chhuak ve chiah. A inlâk hran hnu chuan ka hmai zawnah a thaw lum ham ham a, ka tiril thlengin a fan thei.

"Vawiin chu ngaihtuah i nâ zual hle mai" fiamthu deuh reuha a sawi ringin a mitah tak chuan ka en a, mahse a lo fiamthu awzawng lo, a thutak ngai bawkin a lo thutak run leh tawh zawk a, amah zawk chu ka ngaihtuah ta viau. 

"I ṭha em Mazar?" a biang tawn tawn chu dawmin ka ti thawp raih a, a bula ka awm tawh tlat avangin ka thla muang tawh em em mah se ani erawh a mitmengah min ngaihtuahna a la lang zut zut a, chu chuan min tihamhaih ang reng hle.

"Kha pa kha i nitei pasal chu a ni tak zet em?" pa Zothana a sawina tih ka hrethiam mai a, chuti anga ka chunga a che duh chu mak a ti viau te pawh a ni ang, ngaihtuah chian chuan a mak ve êm bawk a ni.

"Aw ni e" ka tih chuan ngawi reng hian min kuah leh ringawt a, ka tal chhuah mai hlau ni awm tak hian min kuah nghet a, min khawih chhe hman ang tih a hlauh ve zia chu thup sen rual a ni ta bik lo.

"A lakah khan fimkhur viau ang che" ti supin min kuai dak a, ka sam la ro chiang lo ka biang vela hnawk nuai chu a huai kiang a, chuti anga a duatna leh a ngaihtuahna dawn reng mai chu ka va'n châk tak em. 

Ka phone ber a chhiat miau avangin ka pate chu biak pawh ka tum chhunzawm tlat ta lo va, An lo haw huna engkim hrilh chu ka tum ta zawk a ni. Tin, nitei pawh va kal chilh emaw va hrilh ka tum nghal mai lo, ka laka pa Zothana chet dan a hriat hunah chuan a lung a awi bik hauh lo vang. Mazara nen chuan inkai rialin kan awm a, a hlata ka awm a phal lo a ni ber. Pawnah chhuakin kan tei kual vel mai mai a, pawngsual tâwk ṭep zawk ni mah ila pangngai takin ka ṭawng lui hram hram a, Mazara rilru chu a la dik thei tlat lo a tin ni!

Tlai dar 3 a hnai thuak tawh a, Mazara chuan haw mai a duh thu a sawi a, mahse ka phal lo. Engkim hmutu leh hre vektu a ni a, ka pate lo haw huna min awmpui turin ka duh bawk. Mi hnialna em em nei lovin haw chhoh lam chu a sawi ri ta miah lo va, nu Biaki emaw in lama ngaihven tur tumah a chenpui tawh lo bawk nen ka inthlahrung lo lui ve hmiah a ni e. Ka awmna hmun apiangah a rawn awm ve zel a, ei rawng ka bawl lai te chuan ka bulah hlir a tlâ a, a nuam ka ti letling phian. 

Darkar tam pawh a liam hmain u Duhawmi leh u Rinawma an rawn haw ta hlauh mai, mahni thisen zawmpui ngei hmuh zawng a dan a dang teh e! U Duhawmi chu pan vatin ka kuah thlawp a, ka ṭap chhuak feih feih a, a hriatthiam loh hmel kher mai. Ni e, hrethiam lo pawh ni se a awm lutuk, ka chungah eng thil chiah nge thleng a hre ve lo tlat alawm, u Rinawma paw'n ka awm dan chu mak a ti ve khawp mai. U Duhawmi bulah chuan thil thlen dan zawng zawng ka sawi ta, ka sawi zawng ringawt pawh chuan pa Zothana chu ka la ten ngawih ngawih thei. 

U Duhawmi chuan awih loh hmel lutuk hian min en a, hamhaih hmel deuhin Mazara lam a hawi leh tê tê phawt a, Mazara nen kan pahnih chiaha kan awm dun chu mak a ti tih pawh ka hria, mahse kei chuan chu lam reng ka ngaihtuah sî sê hman tawh lo a ni. Ka room kawngka chhia leh ka khum chuar nuai te, chhuata thisen kai deuh ṭhek ṭhek te ka hmuh hnu chuan a awih ve ta. Min kuah thuai a, ka ṭap chhuak leh hawm hawm a, pa Zothana lam erawh engmah a sawi lo thung. 

"Ka pate ka'n phone haw nghal ang e" tiin a phone chu a phawrh a, an inbiak chhung zawng chuan Mazara ka kuah a, Mazara paw'n duat zeta ka hnung chul hauh hauhin min kuah run a, u Duhawmi chuan hre tawh mah se pawi tihna ka nei lo a ni ber.

"Nang ni pahnih hi! Eng nge in awmzia u Mazar? Numam, u Mazara nen hian in inkarah eng nge awm? Ka rilrua lo lut hmasa ber ang hi a ni em?" ka pate nen an inbiak zawh rualin u Duhawmi chuan a lo ti nghal a, ka lo buk khum nghat ringawt. 

"A va mak ngai ve, u Mazar nangmah zawkin sawi teh, Numami nen hian in lo inngaizawng ru reng em ni?" u Duhawmi aw chu a la pangngai lo hle a, Mazara nena kan inkar thu a hriatna chuan a ṭhawng viau te pawh a ni mahna. 

"I thil ngaihtuah mêk kha Numami nena kan inkar dik tak chu a ni e" Mazara aw chu a nghet charh a, awih loh theih loh khawpa fiah a nih tâkah chuan u Duhawmi chu a ngawi reng a, a âng phuau bawk. 

"Engtin nge a nih theih? U Mazara nen in inngaihzawn vang hi em ni putea te khuaa chhoh i châk theih em em Numam? Ka nute'n in inkar engmah an la hre lo chu a ni phawt ang a, engtin tak ngai ang maw!" a rawn ti zuai ta raih a, a ngaihtuah thui hmel hle. 

"Ka va haw phei dawn teh ang, i pate chu ka nghak lo mai ang" u Rinawma chuan a lo ti ve teh hlawl a, rawn ṭawng lo se chu a awm tih pawh ka hre miah lo vang, ngaihtuahnaah thil dang a tam tawh lutuk a, ka ni nuai nuai mai. 

"Kan ina zanriah ei i sawi lawk vek tawh khâ, engati nge haw i tum leh thut si?" u Duhawmi aw chu a nêm hran lo va, u Rinawma paw'n mak tih hmel deuhin a en hû a, chuti anga aw nêm lo chuan a biak ngai a la hre bik lo a ni ang.

"In boruak nen hian zanriah rawn ei a fuh ber ka rin loh vang zawk alawm, lungawi lo ringawt lo la" u Rinawma chuan dam zet hian a ti a, u Duhawmi darah chuan chelhin a en chhuk run a, u Duhawmi awm dan chu kei leh Mazara vang niin ka hria.

"U, Mazara hi min duhpui lo em ni? Ani hi awm lo se chu kei hian ka thianghlimna ka hloh tawh ngei ang, chuti ang khawp chuan ka tan a pawimawh asin" ka ti ta tawp a, Mazara min duhpui loh vang ni lo se chuti anga awmna chhan tur a awm lo hrim hrim.

"Ka hrethiam rih lo Numam, in inkar thu hian min ṭhawng tak zet a, ka buai deuh a ni e. Ka pate lo haw phawt se la, i laka pa Zothana chet dan zawng zawng i lo hrilh dawn nia" tih leh a room lam pan chu a rual nghal a, u Rinawma chuan a zui lut nghal bawk. 

"Min mamawh chuan i bulah ka awm ang; min mamawh phawt chuan" rawn ti thum chhaltu lam chu ka hawi chho va, nui zeuhin ka buk khum nghauh ngauh a, ani pawh hian kan inah zanriah ei ngei se a ṭha tak ang, pa Zothana laka min chhan dan chu ka nunna a chhanhim tluk zetah ka ngai. 

Ka nu leh pa chu an rawn haw ta ngei a, Mazara hmel an hmu thut chu u Duhawmi ang bawkin mak an tih hmel hle, mahse kan inkar engmah ka la hrilh duh rih lo. Zep ṭhen nei miah lovin ka laka pa Zothana chet dan zawng zawng chu ka sawi chhuak vek a, ka nu chuan min lo kuah thuai a, ka ṭap leh ṭhin bawk. Mazaran min chhan dan zawngte chu ka sawi leh a, sawi tel loh theih a ni lo. Mazara nen kan inkar lam erawh eng zawhna mah min zawt lo va, pa Zothana mawlh chuan ka pa thin a tirim ta hle.

Pa Zothana chu biak a tum nghal a, mahse a be tlang thei lo thung. Nitei a call zawm leh nghal zat a, an chhungkuaa lo lêng phei tura a hrilh lai te chuan a aw a vin mah mah a, a kut a hum ruh hle bawk. Nitei chu a fapa nen chauh rei lovah an rawn thleng phei a, ni hnih kal taa pa Zothana a zin daih tawh thu a rawn sawi ta mai, mak ti tak ka ni. Ka pa ber pawh chuan mak a ti a, Mazara hmel erawh a danglam eih lo. Nitei lah chuan engmah a la hre ve bawk si lo, ka pa chuan pa Zothana a biaktir ta ringawt. 

"Aw eng nge ni ta? Kan training mêk a, ka buai viau a nia" nitei phone call a lâk rualin pa Zothana chuan a rawn ti a, awih lo lutukin ka hnaih chilh nghal thuai a, ka pa pawh a bang chuang lo. 

"Zothan, a rang lamin lo haw ang che. Thil sawipui tur che ka nei tlat, muanchang miah suh" nitei phone a laksak rualin ka pa chuan a ti khauh hmuk hmuk a, phone chu a off zui nghal bawk a, chutah zet zawng nitei pawh a meng buai ta nak mai le! 

"Eng thil nge thleng u Sangte? I la thinrim hmel em em zui, ka ngaih i ti ṭha miah lo" nitei chuan a rawn ti ta nge nge a, a hre miah lo pawh chu a awm ka ti ru viau, pa Zothana mize dik tak a la hre ve lo a ni ngei ang. 

"I pasal Zothana hian nichin mai khan Numami pawngsual a lo tum alawm maw le, lo haw teh se, ka khawih nâ khawp ang" ka pa thusawi avang chuan nitei chu a meng zau kâwk a, min rawn en chuan ka pa thusawi a dikzia nemngheh nân ka lo bu zeuh a, min en rei lêm lo khawp.

"Thil awihawm loh tak a ni; a awihawm loh lutuk tak zet. Chuti ang mi a ni lo hrim hrim, tunah hian Aizawl khaw pawnah hna thil avangin a zin daih alawm, eng vangin ka pasal dawta i puh ringawt HMINGTHANPUI?" nitei aw chu vin tak a ni. 

"Dawt ka sawi hauh lo nite, pa Zothana hian min khawih chhiat a tum ngei alawm, dawt ka sawi lo tak tak, pa Zothana mize dik tak hi i la hre chiang lo niin ka hria" ka tih mawlh mawlh lai chuan

"Ngawi hmak rawh HMINGTHANPUI, naupang tê tê si, Zothana nena in inhnim hnaih ngai lohzia chu tu paw'n kan hre vek, dawt sawi lovin thu dik tak sawi rawh" a rawn ti leh phiar phiar a, sawi dan tur kawng ka va'n vân tawh si êm.

"I pasal hmel chu min hmuh thei ang em?" Mazara chu a rawn ṭawng chhuak hlawl a, ka zavai chuan kan en ṭhap a, ṭawng chhuah hun taka a rawn ṭawng chu ka lawm kher mai, engkim kha a hmu ve tlat. 

"A tu chu nge maw i niha khati anga ka pasal hmel hmuh min dil ringawt chu le, awmpui thar te pawh i ang alawm, ka hriat sual paw'n ka hriat sualna a tlêm ngawt ang" nitei ṭawngkam chu a khâk hian a khâ ngawih ngawih. 

"Duh tawk teh Lianzam, i ṭawngkam hman kha hriat a nuam lo êm mai. Ka fanu hian ka lakah dawt a sawi ka ring hauh lo, Zothana zawk hi a dik lo zawkah a ṭan ngei ka ring" ka pa'n a tih laklawh laiin ka nu chuan

"A dik chiah, zu in mi hi chu mize ṭha tak nei an awm ngai lo. Numami nen hian an inngaina miah lo va, chungte hlei hlei chuan tuna thil thlengah hian Zothana a inrawlh min ti ring zual" a ti ve ta duah a, nitei chuan zahpah reng a nei tawh lo. 

"In lo mak chhungkua hle mai, ka thusawi aia i fanu thusawi i ring nghal bur hi i tisual a ni u Sangte. Ka pasal hian a khawih duh dawn lo tih ka chiang, HMINGTHANPUI zawk hian a thlem a ni hrim hrim ang" a ṭawng dan avang chuan ka pa chu a insum zo ta lo a ni mahna.

"Ngawi hmak rawh LALLIANZAM!" ti vin hrawkin nitei ben tum chuan a kut a lék uai a, ka nu chuan rang zet hian a lo kuai thla a, zep lovah chuan nitei reng reng pawh a ṭawng tam hman ve êm a nih kha!

"Ka nau ni mah la ka beng hreh hauh lo che a nia LALLIANZAM, i pasal ZOTHANMAWIA pawh chu lo haw vat rawh se. Ka beng hriatah khati ang ṭawngkam bawlhhlawh kha i chhak chhuak leh a nih chuan ka insum hman tawh lo vang, chutah ka fanu chanchin i la sawi zui" ka pa tih loh chu tumah kan ṭawng ngam rih lo a ni maithei, a reh ṭhuap mai.

"Album kha va la teh, Mazara kha hmuh la, vawiina mi chu Zothana ngei a ni em tih LALLIANZAMI hriat lai hian sawi rawh se" ka pa chuan min en chung hian a ti khauh leh hmuk a, room lamah tlan lutin pa Zothana hmel lanna thlalak chu ka la a, ka muangchang lo hle. 

Room aṭanga ka chhuah hnu chuan thlalak chu Mazara ka entir nghal a, ka pa bulah chuan min khawih chhiat tumtu a nih thu a sawi a, mi dang zawng zawngin kan awih laiin nitei ber chuan a awih ve thei leh ta tlat lo. A ṭawng vin bawk nen a fapa chu uar tak hian a rawn ṭap a, ka pa chuan haw rih mai turin a hrilh ta tawp. Kan buai nuai nuai chhung zawng chuan u Duhawmi leh u Rinawma chu an ngawi tluan zak a, an thei ka ti ru viau, a bikin u Duhawmi chuan a thei ka ti zual.

Nitei te an haw hnu chuan ka pa'n sitting room lamah inbiak a rawt a, kan vaiin kan ṭhu phei nghal a, ei rawng pawh bawl chhunzawm theih a ni lo. Ka pa chuan Mazara hnenah lawmthu a sawi mawlh mawlh a, ka nu paw'n a sawi ve tho va, ka nu leh pa berin ka thusawi an ring chu ka lawm hle. Nitei thusawi erawh a dik lo nasa hle a, pa Zothanan a bum ngun viau tawh ang ka ring, ka laka a chet dan zawng zawng kan sawi hnu paw'n a awih thei lo chu a nih ber kha le. 

"Engtin nge Numami hi i va chhan theih?" ka pa chuan Mazara a en reng a, Mazara paw'n min rawn en hmasa zeuhin ka pa chu a en ve leh nghal a, a chhan dan tur mawlh chuan min tizam lawk thei. 

"Phone kaltlangin min rawh hrilh a, in in lam pan hian ka kal zui nghal" ka pa mitmengah chuan zawhna dang ka hmu zawm zat a, ka nu phei chuan Mazara chu a en chîk hle a, ka pa aiin a en chîk daih zawk.

"Engtin nge phone-in in inbiak theih?" ka pa bawk chuan zawhna dang a zawt leh ta, kei chu ka lo kun ngul a, ka nu leh pa chuan Mazara nen kan inngaizawng tih an hriat a hun ve tawh te pawh a ni ang, engtin pawh chhang se ka vui lo vang. 

"Kei leh i fanu hi kan inngaizawng mêk pu Sangte" ka nu leh pa chuan min lo en dawn tih ka chiang lutuk, an hmel hmu lo zawngin kun ngul lo ila chuan kan inen chiang khawp ang, an mak ti lutuk tur hmel chu ka hmu ngam rih lo a ni.

"Mazara sawi hi thudik a ni em Numam?" ka pa chuan a rawn ti ta ngei a, zam ru taka ka hawi chhuah chuan chiang deuha ka nu leh pa min enna chu ka hmuh hmaih lo nasa kher mai, chutah ka hma zawnah tak an la ṭhu zui.

"Aw ka pa" ka tih chuan eng thu mah a chhak chhuak leh tawh lo va, Mazara nen chuan min en tawn deuh chhen bawk a, ka nu zawk chuan

"Engtia rei nge in lo inzui tawh? A rukin nang ni pahnih hi in lo inngaizawng reng tihna maw!?" a rawn ti ve leh a, ka nu aw ah chuan mak tihna ai mahin lungawi lohna a lang tam mah mah zawk.

"Thla 3 ai chuan a tam tawh ang ka ring" kan inkawp rei zawng chu ka hre lo miau a, chuti anga ka chhan mai loh chuan chhan dan tur dang ka hre der lo, a tam berah thla 5 kan la inzui tling lo maithei. 

"A ruka rala thil tih hi a ṭha ngai lo, ka ngaina miah lo bawk" ka nu chu a lungawi lo tih mi â tan loh chuan hriatthiam theih vek a ni a, ka pa lah chu a la ngawi reng zui, min duhpui lo mai ang tih ka hlau ru hle.

Ka pa chu a ṭhutna aṭanga thovin an room lamah a lut ta daih a, ka nu chuan a zui lut nghal bawk a, sawi tur a va vâng si êm. U Duhawmi chuan ka banah kaiin a room-ah min luhpui thung a, rei erawh awm ka tum lo nasa a ni. Kei tal ka awm loh leh zel chuan Mazara tan a hrilhhai thlak dawn lutuk tih ka hria, chu vanga awm rei tum lo pawh chu ka ni. Room chhunga kan luh rualin u Duhawmi chuan kawngka a kalh nghal ringawt a, chuti anga a chet chhan chu ka hre hauh lo. 

"Ka hrilh lâwk ang che Numam, ka pate hian u Mazara hi an duh lo tih ka hrethiam nghal. An thutlukna hnial miah suh, i tana ṭha tur bak an duh lo tih hria ang che" u Duhawmi chu ka en reng a, ka rilru a buai ru ta khawp mai.

"A nih leh nangin engtin nge i ngaih? Mazara hi ka tan ṭha tâwkah i ngai miah lo em ni? A dinhmun lam ni lovin amah tawp hi en rawh, vawi engzah chiah nge min chhanhim tawh pawh i hre lo vang, ka pate'n duh lo mah se ka thlah theih ka ring tawh lo" 

"Luhlul chhuah tum kha a fuk vak ka ring lo Numam, ka pa'n Vli a tih dan kha hre reng rawh. Dik tak chuan maw u Mazar ber kher nen in lo inngaizawng hi mak ka ti, i hma hun tur i ngaihtuah chiang lo deuh chu a ni" thinrim paw'n a sawi lo va, mahse min duhpui lo tih chu a hriat viau tho. 

"I u miah lo leh nghal a, kei ai paw'n a upa daih zawk a nia, ka pa'n a phal dawn chuang lo bawk nen a tlai tak tak hma hian inṭhen thuai rawh u" ka kuta chelhin a rawn tih zawm leh nghal a, ngawih reng chu a harsa lam hret a ni.

"Ka ṭhen thei ringawt lo, i hre chiang lo a nih kha u Duhawm, hre chiang la chuan ka tan hian i iai miah lo vang" tiin ka tho va, ka kal sawn tur chu min vuan bet a, room chhunga awm reng chu thil dik ber a ni lo tlat. 

"Pa Zothana laka a chhan che avangin lawmthu hrilh la, engkim sawi fel pui nghal rawh Numam. Mazara tak pawh hian a duh tak tak che ka ring lo, a ngaizawng der vel mai mai che a ni mathei asin" a thusawi tawp ber chuan ka lai a chhun ta zak. 

"Mazara tluka mipa rilru nghet hi ka la hre lo u Duhawm, ka lakah rilru chhe tak a put ka ring lo bawk. Ka ngaina em em a, ani paw'n min ngaina a, ṭhen ka tum lo hrim hrim" inring tawk tak chuan ka ti a, ka chhuak tur chu min dang ta bik lo. 

Sitting room-ah chuan Mazara hmel awm reng ka hmu tawh lo va, in chhung aṭang zawng turin ka tlan chhuak nghal a, mahse ka hmu chuang lo. Kan in leh a chheh vel chu ka en chhuak vek tawh a, ka zawng zel a, ka hmuh tâk loh avang chuan a haw daih a nih ka ring nghet bur ringawt. Kawngpui lamah ka tlan leh nghal a, a kal thui tak tak hman ka rin loh vang a ni pakhat. Thui fê ka tlan hnu thlengin amah emaw a Sumo emaw pawh ka la hmu lo cheu a, a lakah chuan ka inthiam lo hle.

Rilru nuam lo zetin ka haw a, u Duhawmi chuan ei rawng a lo bawl malh malh a, a tua te mah chuan min biak an tum lo va, biak châkna ka nei bik teuh lo. U Duhawmin sawm lui viau mah se u Rinawma erawh a haw lui ta tho va, pawi ka ti miah lo, kan chhungkaw boruak a ṭha lo êm mai. Ka pa chuan min en leh run ṭhin a, ka nu ve thung chuan melh khat pawh min melh duh lo nghal ringawt. Chuti teh thuta an awm dan an thlak danglam chu mak ka ti a, ni khata thil thleng atan chuan a awihawm loh hial zawk.

Zanriah ei laiin ka pa chuan Mazara chungchang engmah a sawi lo va, pa Zothana lam ngawr ngawr a sawi a, a thin a la rim hmel khawp. Chaw ei lai pawh sawi lovin phone a hmang thul, vawi khat phei chu dawhkan a chum ri bur a, kan phu hlawm hle. Chaw kan ei kham a, zan dang angin kan ṭawng tam lo khawp mai. Ka nu leh pa chu room-ah an awm leh tawp a, u Duhawmi ni se a room-ah a awm daih bawk a, Mazara bawk chu ka ngaihtuah chhuak leh ta. Ani tal chu awm se ka rilru a hahdam ang a, ka thla a muang a, ka lungngai em em miah lo vang. 

Ka laka pa Zothana chet dan vel ai mahin Mazara nen kan inngaizawng tih an hriatna chuan an rilru a luah hneh zawkin ka hria, awm ka tih rualin ka ti lutuk lo. A chhan chu pawngsual tawk ṭep ka ni a, Mazara vang liau liauin ka him hram a, chu aia ngaihtuah ngai chu a awmin ka hre lo a ni. Ni khat kan hmang ral a, ka chhungte chuan min be duh lo sâwt em em a, eng nge a chhan chu ka ngaihruat thiam mai. Pa Zothana lam erawh zin anga a la insawi miau avangin kan nghak deuh tawp a, ka pa chuan ngaihthah mai a tum lo chiang khawp. 

Kar khat hnuah pa Zothana chu zamna nei miah lo hian kan inah a rawn kal a, thil tisual lo ang maia a awm thei te chu a mak letling zawk. Ka pa chuan kut humruh deuh hian zawhna chi hrang hrang a zawt a, pa Zothana lo dawttheihzia chu ka hre ve chiah. Kan ina a rawn kal khât thute a la sawi ta deuh deuh a, ka pa lahin a awih duh mai bawk si lo. Ni e, a tan chuan awih a har khawp ang. A fanu ka ni miau a, a fanu thusawi aia mi dang thusawi a rinna chhan tur ka hre lo. 

Ka pa chuan pa Zothana awm lai ngeiin thil thlen dan min zawt nawn leh ngat a, thinrim ṭunin ka sawi leh vek a, mahse ka pa chu a hma ang a ni ta hauh lo mai, eng nge a awmzia pawh ka hre lo. Rinhlelhna nei miah lovin ka thusawi a awih hmin ṭhak ang chu tih nak a laiin zawhna min zawh belh zel a, pa Zothanan kawngka a tihchhiat thu thlengin ka sawi nawn mawlh mawlh a, awih ang paw'n a awm tawh lo va, awih lo ang paw'n a awm chuang lo, ka rilru a tinâ tak zet. 

"Mazara ko mai ang, Mazara khan bangah a rek bet a, a hnek bawk. Ka mit ngei hian ka hmu alawm, thil thlen dan dik tak i hre duh a nih chuan Mazara zawt rawh, engkim a hria a, a hmu vek" tia ka hrilh paw'n ka pa ber ber chuan

"Kha pa hming kha lam tawh reng reng suh, a ruka in lo inngaizawng pawh tih tawh nak a lai a!" min tihkhum duh lek chauh a, ka nu lah chuan a lo tuhnih ve zel leh nghal a, u Duhawmi erawh a ngawi reng thung. 

"A ngaihzawngpa nen an awm dun duh avangin kei hi min puh tih ka hrethiam mai e, kei chuan he thilah hian engmah inhnamhnawihna ka nei lo" fel ber awm ang ziazâng hian pa Zothana chuan a lo la ti zui, ka ipik lutuk chu ṭah hawm hawm ka châk ngawih ngawih.

"I hmai chu engtin maw i tihnât a!? Thu dik tak sawi ang che Zothan, dawt i sawi tih ka hriat leh si chuan ka en liam mai mai dawn lo che a nia" ka pa aw chu a la nem lo tluang zel a, pa Zothana erawh a insawi fihlim vek a, a dawttheihzia chu pui tak a ni.

Ka pa zawhna dang pawh chhang duh tawh lovin room-ah ka lut a, ka ṭap feih feih a, ka insum thei tawh lo a ni ber. Thawm a rawn awm a, a aw a then rik kharh danah ka pa a ni tih ka hria, mahse chet sawn emaw a lam hawi ka tum lo hrim hrim. A fanu thusawi pawh awih duh lotu pa ka lo nei reng tih ka hrethiam tawh a, ka thin a rimin ka lung a chhe thar hle bawk. Khumah chuan a rawn ṭhu a, ka dar chu a rawn tawk zeuh a, kei erawh a ngai ngaiin ka la bawkkhup reng a, a hmel hmuh emaw a aw hriat chu ka duh rih lo tawp. 

"Mazara nen khan in mudun tawh em?" a zawhna avang chuan ka hawi chhuak lo thei ta lo, chuti ang em ema a fanu min han ring lo mai chu ka nâ vawng vawng a, pa Zothana fuihpawrh bak a nih ka ring ta lo e!

"Mazara hi ṭhen ka tum hauh lo, min tilui mah la ka ṭhen chuang lo vang" ka aw chu thunun zawh loh tih hriat zetin a ri chhuak deuh hrâk a, ani pawh a meng rum sâwt hle a, a zawhna chu ka chhang lo lui ve hmiah bawk.

"Ṭhen ang che" ram hmaka a tih chuan 

"Eng vangin? Eng nge a ṭhat loh bikna? Eng nge ka tan a ṭhat lohna sawi rawh?" ka lo ti nghal mawlh mawlh a, ka ṭah chu a chhuak ru em em a, chutah ka pa chuan min rawn beng a nih chu!

"Zah lo takin i pa hi min be miah suh HMINGTHANPUI! I pain ṭhen rawh ka tih chuan i ṭhen mai tur a ni, i hria em?" a ti vin hrawk a, ka ṭap chhuak ta hawk a, ka pa'n a vawi khatna atan kut min thlak a; chu pawh Mazara vangin.

"Ka ṭhen duh lo ka pa, khawngaihin min ṭhen luihtir tum suh. Ka laka i thinrimna hrithla lo hian pa Zothana lakah thinrim zawk ta che, mahni fanu thusawi awih duh lo i ni hi ka hua che, ka haw lutuk che" ka ti tawn tawn a, ka biang a ri leh ta sawk.

"I zak lo hle mai HMINGTHANPUI! Ka chawm seilen i ni tih hre reng rawh, i u Vli chunga ka chet ang khan min chettir tawh reng reng suh, ka duh bik chai lo a nia" ka ṭap chhuak leh hak a, Mazara a duh loh chhan chu sawi mai se ka ti a ni.

"U Vli nen kan inang hleinem, ani te chuan Vai alawm a ngaihzawn; Mizo ni lovin. Keini chu Mizo ve ve kan ni a, engati nge Mazara hi i duh loh thut? A hma paw'n i ngaina a ni lo'm ni?" ka ti leh tawn tawn a, min beng tawh êm lo e!

"Ka duh loh chhan chu i hma hun ka ngaihtuah vang a ni tih hrethiam lo rual i ni tawh lo HMINGTHANPUI, Mazara hi mi rilru nghet tak a ni a, nupuia neih che a tum ringawt ang tih ka hlau a ni. Min hnial tawh suh, retheihna i pumpelh tihna a ni mai" a tih chuan Mazara nena kan inkawp a phal loh chhan ka hrethiam ve ta chiah.

"A rethei i tih vangin maw ka kawp i phal loh ka pa? A duh vanga rethei a ni bik tawp nâng, chu bakah a rethei miah lo, i hre sual a ni ka pa. Sumo a khalh a, heti anga a eizawnna i hmuhsit hi ka ring ngai lo asin" ka ti leh pang pang a, kan boruak chu a nuam lo tak zet. 

"Mazara hi hmu tawh lo la, ṭhen fel hmak la, i kawppui tur chu a hun kan tihah i nu leh pa'n kan thlang ang. Nanga lo zawn buai a ngai lo ve, chu chu ka thu tawp a ni" ti khauh hmukin room aṭang chuan a chhuak a, ka ṭe vak a, ka ṭap chhuak leh hawk hawk bawk. 

Chumi zan aṭang chuan kan chhungkaw boruak chu hremhmun ang maiin a hrehawm a, an biakna ka chhan duh loh lahin min hau hrep a, a nuam thlawt lo a ni. Ka nu ni se ka kawppui tur zawn kawngah a kipa kawiin ka pa a thlawp tlat a, min dang chep lutuk chu awm dan tur ka thiam lo zawk. Pasal nei châk lutuk ang te'n min ring thul, College ka zawh vela pasal neihtir min tum thu ka pa'n a sawi chiah chu ka insum thei tawh ngâng lo.

Ka ṭe vak a, zanriah kan ei lai a ni bawk nen dawhkan chu ka nam che dâwrh a, ka pa ni lovin ka nu zawkin min rawn beng ve ta. Chaw pawh ei puar lovin room-ah ka awm leh tawp a, phone ka neih an phal lo leh zel a, nei ngat ila chuan Mazara ka be chiang khawp ang. College te chu ka kal mawl tawp a, kal châkna pakhat mah ka nei tawh lo. Ka ṭhiante phone hmang hlirin Mazara chu ka be ṭhin a, mahse ani pawh a hma ang a ni tawh miah lo, a danglam sâwt hle.

Sumo Counter lamah a service ni apiangin ka chang tawp zel a, ka chhungte'n hria se chu an phal lo leh emaw te kha a ni ang a, ka ṭhiante hnenah pawh min zep pui turin ka hrilh tawp ringawt. Ka pa ber hian ka chanchin ka ṭhiante lo zawh a ching a, a zawh dan zawng zawng ka ṭhiante'n min hrilh leh vek zel tho. Mazara ka hmuh theih nân min pui hreh lo va, ka chhungte ai thlawt chuan an bulah awm nuam ka ti tawh zawk a ni. 

Hlimpuii chuan a phone hlui min hman tir a phal hlauh mai a, ka lawm tak tak a ni. A ruk hlirin Mazara chu ka be ta ziah a, a danglam ta lutuk chu a mak a ni. A chang phei chuan ka be ṭawng thei ngai meuh lo va, hmaichhana kan inhmuh paw'n min kuah tawp a, min fawp tawh ngai lo bawk. A mitmengah chuan inthlahrunna nasa tak ka hmu thei a, min thlamuan tho rualin a ṭawngmawh zual ta lutuk chuan ka ngaih a tiṭha lo.

Ka phone hman laiah chuan phone number ka dah tam lo hle a, Tlantea number leh Mazara number a ni mai. Phone ka hman duh chuan pawn lamah ka chhuak a, ka chhungte hlau reng renga ka awm ta chu tu thiam loh mah a ni lo, ka chhungte thiam loh vek a ni. U Duhawmi tak ngial paw'n min be tawh ngai mang lo va, ka nu leh pa'n an hrilh a nih ka ring. Ama thu chuan min biak loh ka ring lo, chuti ang mi a ni lo tlat.

"Zaninah mi an rawn lêng dawn a, ka ṭhianpa fapa a ni a, Delhi aṭang a rawn haw deuh chiah a nih hmel a, ṭha takin lo awm ang che" ṭawng reng chunga min en zeuh tu ka pa chu ka en tlawk tlawk a, duh ai chuan a kal thui tawh mah mahin ka hria.

"I lungawi lo hmel kha min hmuh reng reng suh, ngaihzawng neih i châk te chuan kan zawnsak thei reng che alawm, thingtlangmi ngaihzawn ai chuan nuam pawh i tih zawk ngei ka ring" a tih zawm leh nghal a, inei puar mang hlei lovin ka kham ta daih. 

Zanah chuan ka pa sawi ang ngeiin in léng kan nei a, a hmel a la naupang ve khawp mai. Kei ai a upa ṭawk ang tih vel tur a ni a, ka pa sawi vang pawh ni lovin hawihhawm te chu ka chhuah ve tak na a, ka ṭah a chhuak leh thut zel. Tun hnai tak phei chu Mazara nen kan inbe khât si, kar khat chuang kan inbe tawh lovin ka hria, biak ka tum paw'n phone call a la duh tawh ngai lo. 

Dawhkana thingpui ka nghah lai takin ka room aṭang phone a rawn ri a, phone ka nei ru reng tih an la hre lo bawk nen ka chhungte chuan mak an ti hlawm teh e! Ka room-ah ka kal nghal thuai thuai a, min lo call tu chu tu dang ni lovin Tlantea a ni a, mak ka ti viau, tun lai chu ani nen pawh hian kan inbe khât ang reng khawp mai. 

"Hello" ka ti zawi sep a, Tlantea thu rawn sawi chuan min tikhawng nghal awt a, ka mittui chu chawp leh chilhin a rawn tling nghal bawk a, a thusawi dang pawh ngaihtuah tawh lovin room aṭang chuan ka tlan chhuak a, zah reng ka hre tawh lo a ni ber.

"Ka pa khawngaih takin Mazara bulah min hruai rawh, khawngaih takin ka pa, ka hmuh ngei ngei a ngai" ka pa khup vuan chuan ka ti lawm lawm a, ka nu zawk chuan ka phone ken rawn la sawkin

"Phone i lo kawl ru reng a ni maw HMINGTHANPUI?" a lo ti hmarh a, ka nu thusawi lam chuan ka rilruah hmun an chang thei tawh rih lo, ka pa khup chu ka hmer ṭawng ṭawng a, Mazara hmuh ka ngai tak zet a ni.

"Kha pa hming kha lam tawh suh ka ti a ni lo'm ni? In lêng neih laiin heti ang hian awm suh, ṭhu ṭha vat rawh" a mitmeng aṭang a insum nasatzia ka hmu thei, in lêng nei lo ngat ila chuan a ṭawng vin khawp ang.

Tho thutin kan in aṭang chuan ka tlan chhuak a, ka pa min kohna te chu engah mah ka ngai tawh lo. Zan mah ni se hlauh reng ka nei tawh lo va, Mazara ka hmu vat a nih loh chuan engtikah mah ka inthiam thei tawh ngai lo vang. Zu rui ṭhenkhat chu ka tlan pel hmawk hmawk a, Hlimpuii te in ai Mawitei te in kan hnaih zawk avangin ka pan tawp a, Mawitei tal chuan min pui thei hram se ka ti. Ka thisen zawmpui ka chhungte ngei hlauvin ka tlanchhia chu a ni si a, rilru a va han hrehawm vawng vawng duh tak êm.

(End of Chapter 27)