SUMO DRIVER By Havali Adam (CHAPTER 26)

SUMO DRIVER

By

Havali Adam

Chapter 26

Zing dar 5 velah Aizawl lam panin kan chhuk a, ka pa'n hna kal a duh avangin kan tlan muang lo hle. Chhuk hma Mazara hmuh leh hram chu ka duh deuh a, mahse ka hmu ta lo. Hun a awm loh mai bakah ka pa'n a hriat ka hlau teh tlat a, a hmain mi dang hriat pawi ti lo ang deuh khan ka awm a, tunah erawh ka chhungte hriattir chu ka ngam leh chiah lo a ni. Mazara paw'n engmah a sawi bik lo va, kan inkar dik tak chu ka chhungte hriat ṭul a la ti lo a ni maithei. 

Ka pa nen chuan kan inbe tam hran lo va, ka muhil sek bawk. A ngai tê bawkin hla ka play thla leh char char a, Sap hla ka play ve ta thung a, ka ngaina tih a hriat sa vek tho avangin ka pa chuan a ning chuang lo va, ka play ang âng chu a ngaithla ve mai. A chang chuan an hun laia Sap hla lar tak tak te ka play tho va, keini tan hla hlui mah ni se mawi ka ti leh thut zel. Kan tlan muang lo bawk nen kan thleng thla zung zung a, tukṭhuan ei hun bawr velah Aizawl khaw chhung kan lut nghe nghe. 

In kan thleng a, u Duhawmi chiah a lo awm tawh a, ka nu chu a hna lamah a kal tawh tih ka hrethiam nghal mai. Chawl ang veka ka insawi lawk tawh avangin College chu ka kal lo tluan ta law law a, ka duh chuan ka kal hman reng maw le. Mawitei leh Hlimpui pawh ka be lem lo va, thingtlang lamah ka la châm an ring ngei ang. Ngaihzawng nghet leh mipa rin ngam em em ka neih thu chu hrilh ka tum tak tak a, ka ṭhian ṭha te an ni a, thil pawi a thleng êm lo turah ka ngai. 

Kan in kawtah chhuakin Mazara chu biak ka tum a, mahse a la thei leh tawh lo. Ngaihtuah ngai a ni a, ka ngaihtuah reng bawk a, ama'n tuar thiamin chhel viau mah se ka khawngaihna a kiam chuang lo. A buai a nih ringin biak phet chu ka tum ta lo va, ka rilruah erawh a awm reng tho. A pa nen lah an inkar a chhe si a, ṭha tal se chuan a tan pawh a thawven thlak deuh ngei ang. Ṭhat a hnêkin a haw em em zawk a, a pa ni lo se chu a khawih hrep duh ka ring, ka ring tak tak, a thinrimna kha a so sâng êm mai.

Ni lêngin u Duhawmi nen inah kan awm tlawng a, ani chuan lehkha a zir char char a, kei erawh engmah ka ti lo. A thil ei tur te ka siamsak a, inchhung ka ti fai a, kan in kawt leh a chheh vel thlengin ka tifai bawk. Kan in hi thingkungin a hual deuh ṭhup avang hian a hnawk awl em em a, kar khatah vawi thum tal hi chu phiah fai a ngai ṭhin. Tihfai harsa erawh a ni lo va, thing hnah leh thing ṭang te a ni deuh ber a, sava ek a awm leh zeuh zeuh ṭhin bawk.

Chawhnu lamah chuan Mazara biak leh ka tum a, ka vawi hnih call-na ah a lo la ve thei hram a, a awmna hmun chu khaw chhung a ang lo hle. A thil tih ka zawh chuan ram lama a chhuah thu a lo sawi mai a, mak ka ti ang reng khawp. Nu Biaki thihna pawh rei a la ni lo va, chu bakah in lêng te a neih ngei a rinawm a, chhan ṭha tak awm lova a ram chhuah ka ring lo. A nih loh paw'n a khawhar lutuk tur inhnem nân a ram chhuak a ni maithei, a rilru ka hriatthiam pui thei der bawk si lo va, ngaihtuah loh hi chu a harsa a ni.

Tlantea aw ri ang deuh ka hria a, eng nge an tih ka zawt zui nghal bawk a, lo hal tura an awmho thu a rawn sawi a, putea thusawi ka hre chhuak ta uar uar. Putea khan Tlantea hnenah Mazara lo halsak turin a chah ngei kha a nia, Mazara ber lah chu a kal ve leh nulh bawk si. Hriattir kher tum lo mah se a hre tho a nih hmel, ni lo se chu an awmho kher nâng. Thawm chu a reh tial tial a, Tlantea te ṭawng thawm pawh ka hre tawh lo.

"A va'n reh sâwt em em, khaw'nge i awm a?" ka tih chuan

"Thingkungah" a lo ti ve mai a, ka nui seih a, a thingkung lawn lai vel chu ka hmu châk reuh tawp, a inthazo leh zawt zawt khawp ang.

"I tla ang e aw?" ka ti leh ringawt a, ka ngaihzia chu sawi ka tum deuh ûk a, mahse duh huam huam anga lan ka hlau deuh bawk si, ka ṭawngkamah leh ka cheziaah ka ti huam huam a nih chuan min hne vat ka hlau a ni ber. 

"Tla ta ila i lo chho ang em?" a rawn ti vel reuh a, fiamthu hi chu a thawh thiam hlawl lo, amah nen a inhmeh lo lutuk hi a nuih zat thlak letling zawk, min tihhlim tumin a ṭawng luam ngai mang lo va, ka hlimna erawh amahah hian a awm vek lawi si.

"Chho lo maithei, zirna ka ngai pawimawh deuh tlat" ka nuih chhuah mai loh nân ka kâ ka hup a, engtin emaw tala tih hlim ka duh vanga chuti anga ṭawng pawh chu ka ni a, a hriatthiam ngei ka ring, engtin tak min lo chhang ang maw!

"Zirna aia kei min ngai pawimawhtu hmeichhe pakhat a awmin ka hria" a rawn ti ve leh ta kauh a, insum thei tawh lovin ka nui chhuak ta nge nge a, inhnial pawh a lo thiam fû dawn a nih hmel, ani hi zawng hriat chian zel ka duh mipa awm chhun a la ni. 

"Vawiin hi i ṭawng duh reuh ê Mazar, mahse maw a nuam tawp, heti anga inbiak reng hi ka  châk thei lutuk, ka sawi ngam ngai lo mai mai alawm" hahdam deuhin ka thaw huai a, inhnaih takin awm ila chuan a âwmah ka bei leh hnâp tawh ngei ang maw le.

"Ka bulah chuan eng pawh i sawi thei" chhumbung deuh hian a lo ti a, a ṭawngkam chhah chhuah dan pangngai a ni a, amah hre chiang lo emaw a bul hnaia awm tam lo tan chuan thinrim awki emaw a tih theih tho maithei.

"Kha kha eng thawm nge?" thil ri deuh dup ka hriat rual chuan ka ti nghal a, thingkung aṭanga tla thawm ang deuh a ni a, chu chuan min tihlauthawng ru hle. 

"Ka ṭum thla lawk a nih kha!" a tih chuan ka thaw deuh hak a, lo hâl tur an la ni bawk si nen ngaihtuah a nâ duh khawp mai, chu bakah mei lam hi chu a hlauhawm ka ti hrim hrim, hnaih tam vak loh hi a fuhin ka hria.

"Fimkhur rawh aw Mazar, i inhliam palh hlauh ang e" ka ti ta nge nge a, a ngaihzawng mai chauh ni mah ila ngaihtuah tak tê hian ka ngaihtuah fo va, ani pawh hian kawng tam takah min ngaihtuah ve viau tho. 

"Ka rilruah i awm reng mai" ka thil sawi lai mil lo zetin a rawn ti daih a, ṭawngkam hi chu a duh sei lo ve ṭhin maw le, a thusawi ka ngaihtuah chian hnu chuan ka khi ver ver a, a ṭâng belha awm mai mai chu châk tak ka ni.

"Min ngai tihna a ni khâ, kei paw'n ka ngai che alawm Mazar. Kum lai hawl chawlhah lo zin chhoh leh ka tum a nia, ka nu paw'n a phal vek tawh" ka ti nghal siam siam a, ka ngaih thu zep tum kha ka ni a, ka thei leh ta chuang lo. 

Kan inbiak zawh hnu chuan inah ka lut a, ka hlim ru em em leh nghal. U Duhawmi nen kan inbiak te chuan ka khi deuh sâng reng a, mahse a hmuh laiin ka awm lang duh bik teuh lo. Ngaizawng nei tawh a ni a, ani tan chuan ka awm dan vur vur chu hriatthiam a awl dawn lutuk tlat. U Rinawma chunchang te ka sawipui lûam a, ani paw'n ka lakah engmah a zep chuang lo. Kei erawh ngaihzawng nei lo ang hmakin ka awm a, ka nei tih hria se chuan mak a ti ve ngawt ang. 

Ka nute an lo haw a, an lo haw hi chuan a tlai ve tawh tihna a ni mai. Ka pa aiin ka nu hi a lo haw tlai zawk fo va, Bank lama thawh ka peih loh chhan a ni bawk. A tui pawh ka tui lo hrim hrim, exam eng eng emaw pek a ngai hmasa phawt te kha a ni ang a, tunah rih chuan fanu duat nih a nuam ber. B.A zawh hnuah erawh hna ka zawn ve ngei chu a ngai dawn a, hna ṭha tak thawk thei turin result duhthusam ka neih a ngai tih ka hria, chu vang chuan ṭha taka B.A Honour ka tum ruh hle bawk. 

Zanah chuan Tlantea nen kan inbia a, an lo hal chanchin vel min hrilh melh melh a, a ngaihnawm ang reng phian. Mei an chhuah teuh zia te, Mazara awm lo se chu an chhuah ngei a rin thu te a sawi a, an innghahna awm chhun chu Mazara bawk a ni leh ta. Mazara ṭuan ṭhatzia chu a sawi tawp thei meuh lo va, a sawi uar mah mah ti dawn ila kei ngei paw'n a ṭuan ṭhatzia ka hmu tawh a, Tlantea chuan dawt a sawi ka ring hauh lo.

Changela mei an vuak mih thu te, mei khu hnuaia men a harzia te chu a sawi char char a, a sawi dan chuan a kan ṭhat hmel viau bawk. An lo hal dan chanchin min hrilh zawh chuan lên a duh thu a rawn sawi zawm nghal a, a bialnu te inah lên a tum a ni ngei ang. Hrethiam takin ka mangṭha a, kan inbiakna chu ka hmet tawp a, thingtlang lama awm ka châk ru kher mai. Thingtlangah chuan zanah pawh chhuak ila hmeichhe tan hlauhawm lutuk a la ni lo va, Aizawl nen chuan inang lo tak a ni. 

Khawipuiah erawh hmeichhe tan zan lama chhuah a fuh teh chiam lo, damdawi ti leh zu rui an awm fur a, chutah hmeichhe inzuar an la awm cheu zui. Mipaho lah hian hmeichhe awm fâl deuh an hmuh tawh chuan inzuar emaw an ti zel a, an ngaih dan pawh hi a dik ber lo. Zan hi chu hna thawk lova ruih theih thil ti te lan chhuah hun emaw tih theih turin tlangval harhfim lo hmuh tur an tam em em a, thingtlang tlangvalho erawh chu chhun lamah hna an thawk a, zan lamah nula an rim mai a, an hun hman dan chu a Mizo hliah hliah.

"Enga!? Nang nu hi! Ka awih der lo, i thusawi hi ka awih tawp lo mai!" Mawitei chuan a ti mawlh mawlh a, ka lo nui ringawt a, a mak tih zia chu thup zawh sen rual a ni lo, chuti ang bawkin Hlimpuii paw'n ka thusawi chu a awih nghal lo chiang hle.

"A ni tak tak alawm, nang phei chuan a hmel i hmu tawh leh nghal" tiin Mazara nen kan inngaihzawn thu chu ka sawi zawm leh a, Mawitei chuan ngawi reng hian min en tlawk tlawk a, a la awih theih loh hmel khawp mai.

"A hming eng nge ni reng reng? Kei chuan ka la hmu ve miah lo tihna a ni ngei ang a, engtin nge thingtlang tlangval i duh theih zawk Numam? Sir Francis-a nen in inngaizawng ru reng emaw ka ti leh tawh zawk asin, thil hi a kal kual nuaiin ka hria" Hlimpui chuan a rawn ti ve leh a, nui zeuhin

"A hming chu Mazara a nia, a thingtlang hming rem rem ti raw? Kei pawh a tir chuan hnaih tumna ka nei lo, thingtlang tlangval zunah ka uai ang tih ngat phei chu beisei lo nasa tak ka ni, mahse ka uai der der chu a nih tâk ber hi!" ka ti ta duah a, mak an ti dun lutuk chu an nuihzat thlak zawk. 

"Han sawi chiang deuh teh Numam, thu ngai bawk i sawi leh a nih chuan ka awih tawh ang, mahse awih hi maw a harsa tak zet. Engtin nge thingtlang tlangval daih daih i ngaihzawn theih? Chu pa chu ka hmu tawh maw!?" Mawitei chuan a lo ti leh a, zawhna ka dawng mawlh mawlh a ni ber. 

"Mazara chu i hmu tawh chiang alawm, Sumo Counter-a kan Sumo Driver hmuh kha amah chu a nia, ka lua bungrua a rawn tih tlâk palh te kha i la hria em? Haw kawngah ka mood a chhiat vek phah nghe nghe a, ti khan i hre chhuak ruai ruai tawh em?" 

"Awi awi awi, kha pa kha maw tuna i ngaihzawng ni mêk chu!? Engtin nge i duh theih zawk Numam? A hmel te lah kha insual a hrat hmel ropui si, a mitmeng reng reng kha hmeichhe duh chi a ni lo hrim hrim, a rumin a hlauhawm mah mah alawm le" 

"Khang hun lai kha chuan insual hrat hmel ka ti ve tho, a hmel hmuh te kha ka châk zawk zawk miah lo. Tunah lêm a hmel hmu lova awm ka harsat tlat tawh a, a aw hre lova ni khat hman ral ringawt pawh hrehawm tih chang ka ngah mai. Ka duh ngawih ngawih a, ka vei ngawih ngawih a, khawpui tlangvalte neih loh tam tak a nei a ni" 

"I sawi dan kalhmangah chuan i ngaihzawngpa chu hmelṭha i ti vak bik lo a ni maw? A mizia aṭanga duh chawp i ang ka ti, ani aia hmelṭha i hmuh dawn vei nen thintlang tlangval i duh teh tlat hi a mak a ni e Numam" Mawitei aw chu a dul ta raih mai. 

"Mazara hmel in la hmu chiang ve lo a nih kha! A mitmeng a nalh si, chutah a khabe a la phir zui. Amah ka tawn hmaa ka ralkhat bialpa ni ṭhin Shane Filan-a ai paw'n hmelṭha ka ti daih zawk, Robbie Williams leh Bon Jovi tih vel te mai mai chu a lakah chuan nep tê" ka thusawi tawp ber chu an haw dun teh e!

"Kei chu i ngaihzawngpa hming hi ṭhing ka ti ê, hming danga koh dan a awm lo em ni? Vawi khat pian ve mana Mazara han nih tawp mai chu a ṭhing ve ê, Mizo hmingah chuti ang hming a awm pawh ka la hre lo e a!" Hlimpuii ṭawng dan chuan ka thin a khei zak a, mahse ka insum hram hram thung.

"Chu tak chu a Special na alawm, Special vet vet tak a ni. Hre chiang ula chuan min duhpui ang a, a hmel hmu chiang ula chuan khang in suangtuahnaa mipa ho kha i theihnghilh hmin ṭhak thei ngei bawk ang" ka tih chuan an ngawi kar a, min en duh dun hle.

"Sir Francis-a nen pawh an insual tawh nghe nghe asin, mahse Mazara te ang mipa hneh tur êm chuan a nep mah mah a ni. Chu bakah Sir Francis-a khan ka duh lo chung min kai lui a, Mazara thinin a tuar ta lo a ni e" keimah bawk chuan ka tih zawm leh nghal mial mial a, anni erawh nuih pawh an nui peih der lo.

"I chhungte'n an hre tawh em?" Hlimpuii zawk chuan a rawn ti a, lu ka lo thin khum thuai a, hun remchang hmasa berah ka chhungte chu pangngai taka hrilh ka tum zawk a, ka la hrilh ngei bawk ang. 

"Keini chu keini kan ni a, mahse i chhungte ngaih dan erawh a dan viau ka ring Numam. Zep lovah chuan kei pawh hian ka duhpui vak lo che, dinhmun a inthlauh lutuk chuan harsatna in tawh ṭeuh ka ring" a tih zawm zat a, Mawitei pawh a ngawi reng thei lo a ni ang, min en ran chung hian

"I chhungte'n an duhpui che ka va'n ring lo êm, thingtlang lama i zin chhoh chhen chhan pawh kha i ngaihzawng neih vang a ni tih ka hrethiam mai. I duh hmel viau tawh leh nghal a, a tawpah i nâ mai mai ang tih ka hlauhthawn pui che" a rawn ti ve ta sêp sep a, an thil sawi chu a dik viau tho. 

"In rilru awm ang tur chu ka hria alawm, mahse chuti maiin ka thlah thei tawh lo, ka thlah phal tawh lo bawk. A bula awm hahdam thlakzia hre ve ngat ula chuan in duh ngawih ngawih lo bik lo vang, a rukin thla eng emaw zah kan inngaizawng tawh nghe nghe asin" ka tih chuan engtin mah an rawn ṭawng chhuak tawh lo va, ka ngawi zui ve mai bawk. 

College kan bâng a, chawhma lamah Mazara nena kan inngaihzawn thu an hriat avangin rilru dang deuh mah se chawhnu lamah erawh an pangngai leh vek tawh a, kan hlim leh bawrh bawrh tawh khawp. Min la duhpui chiah chuang lo va, ṭha deuhin min titi pui ta zawk a, ṭhen thuai turin min ti deuhin ka hria, mahse kei chuan ṭhen ka tum teuh lo. Ka chhungte hrilh tura min tihna erawh a dik reng, ka zep reng thei dawn chuang lo tih chu chiang sa a ni a, tunah rih chuan hrilh hunah ka la ngai lo a ni e. 

Kar a liam a, thla a liam a, Mazara pawh a Service leh tawh bawk a, a hma ang bawkin kar khatah vawi thum kan inhmu ta ziah. A pa chanchin lam ka sawipui ngai lo va, ka ngam lo hrim hrim zawk a ni. Kan awm dun hi chuan ngawi reng mah ila a nuam tlat a, a nawm dan a dangdai a ni. A duh hunah hian min kuah a, min fawp a, kei chu inpeih sa ang thlap ka ni. Hmeichhia zawkin ka ngaihzia leh ka duhzia lantir fo chu ṭha ka ti lo va, ka insum nasa thei khawp mai. 

Tlai khat chu ka ṭhiante pahnih ka hruai ve a, Mazara lo thlen hun Sumo Counter-ah kan lo nghak ṭhap a, rawn kal ve tum lo se chu hruai pawh ka tum chuang lo. An lo kal chu harsatna a awm hran lo va, Mazara hmelṭhatzia leh mipa rilru nghet tak a nihzia chu hriain hmu mawlh mawlh se ka duh daih zawk. Mazara chu a lo thleng a, ka ṭhiante pahnih chu a en zauh a, rei erawh a en lo. Ka ṭhiante pahnih chuan chik zetin a che vel an thlir a, min duhpui loh miau avangin sawiselna an neih leh tho chu ka ring. 

Zirtawpni a ni a, u Duhawmi Exam result a chhuak hlawl a, Pathian zarah a la tling ve zel zui. In ka thlen hmain ka pa'n min lo phone a, a ngaihtuah bawk a, kei aiin a hre hma daih mai. Ka nu hrilh rih lo turin min ti thung a, surprise a duh a ni maithei. Kan in ka thlen rualin u Duhawmi chu ka zawng nghal a, nui var var hian min lo en a, a lawm ve hle tih ka hre thei. Rei lovah u Rinawma hmel kan hmu ta vat bawk a, ka awm lai rengin u Duhawmi biangah chuan a fawp zeuh a, keimah zawk ka lo zak ringawt.

Kei chauh ka ni lo, u Duhawmi pawh chu a hmai a sen vek a, u Rinawma lah chuan ka mitmei a rawn veng tawh der si lo. An inngaihzawn dan chu ngun takin ka ngaihtuah a, a thianghlim thlawt a ni. Infawh leh inkuah tih te mai mai chu thil thleng ve tur hrim hrimah ka ngai a, a bikin u Rinawma chu a fel tak zet. U Duhawmi chu a lawmpui thiam thiam em em a, ṭawngkamin sawi vul chûk lo mah se a chetzia hmangin a lawmpui tih a hriat theih vek thung. 

"Interview chiah a ngai ta, nupuiah MCS ka nei dawn reng a lo nih hi!" kuah hle hle pah hian u Rinawma chuan a ti sup a, u Duhawmi zak leh lai bawk si chuan a âwmah a chum taih a, khi ver verin choka lamah ka pheisan ta daih.

U Duhawmi leh u Rinawma inkawm laiin ei rawng ka bawl a, u Rinawma thingpui tur ka siam bawk a, ka nu leh pate lo haw hma chu inkawm reng mah se pawi ka ti lo. U Duhawmi leh u Rinawma te awm dan ka thlir reng lai chuan Mazara ka hre chhuak a, u Rinawma ang chuan ka chhungte'n an pawm lo vang tih ka hlau ta ber. Ei rawng ka bawl chhung zawngin chu'ng vel chu ka ngaituah kual a, kan dinhmun chu a khirh thar riauvin ka hre bawk.

U Rinawma haw hnu lawkah ka nute an lo haw a, vawiin tlai chu ka pa haw tlai zawkah a ṭang a, pa berin sawi rih lo tura min tih miau avangin u Duhawmi nen chuan engmah kan sawi chhuak duh lo va, nuih a za duh ang reng khawp. Zanriah ei laiin ka pa chuan a sawi chhuak ta a, ka nu lawmzia chu pui tak a ni. A chang leh a fate pahnih min hrawk hrep a, a chang leh ka pa a hau thul, a tawpah erawh hlim tlâng takin kan nuiho leh ta tho.

Chaw eina vel kan seng fel hnu lawkah u Vli nen kan inbia a, u Duhawmi chanchin ka hrilh nghal zung zung a, a lawmpui ve khawp mai. A lo haw ṭep tawh thu leh ka thil duh min zawt a, eng thil mah hawn ka ngaih loh thu ka sawi chuan mak a ti viau a, Westlife tih vel lam engmah ka sawi lo te chu mak a ti lehzualin ka hria. Mazara ka nei tawh tlat a, Westlife thlalak emaw an Album cassette tih vel ka ngai tawh lo a ni. Min zawh nawn leh pawh chuan a ngai tê bawkin ka chhang leh a, a ngawi deuh vang vang ringawt. 

"Kan lo haw har deuh maithei, i pate i lo hrilh mai dawn nia, vawiin chu i u hi kan lên chhuahpui lawk ang e" u Rinawma chu nui sen senin ka buk khum nghauh nghauh a, awm khawmuang tawh lovin an chhuak zui nghal a, sawrkar chawlh a nih avangin an awm dun duh te pawh a ni mahna. 

A nihna takah chuan khaw hmun inanga awm si hi an awm dun khât viau zawk a, zanah u Rinawma a lo leng ṭhin a, chu chu an inhmuh dan leh an awm dun dan a ni mai. Chutah ka nu leh pa an awm ve tlat zel bawk si a, u Rinawma lah lêng rei lo chi leh hna lama buai em em a lo ni leh zel a, hun thawl an nei bik vak lo a ni. Ka nu leh pate chu kan chhungte dam lo tlawhin Kelsihah an kal daih a, an lo haw har phian maithei. Kei ve thung chuan nghakhlel taka mi chan ka nei ran a, ka ṭhian te'n lêng tura min sawmna pawh ka hnar fithla hmak. 

Chu bakah ka mi nghahpa chu a rawn thlen thlak hma theih hlauh chuan hun thawl kan nei dun ve thei dawn tihna a ni mai a, Sumo Counter-ah ni lovin kan ina nghak turin min hrilh vek tawh a, a hmel ka hmu châk leh tawh viau. A bula awm hrim hrim te hi a nuam a, min si miah lo mah se a mi uapna hnuaia awm hi chu mi dang bula awm nen a inang thei lo a ni. Haw lamah phur chhoh tur a neih a ring lo va, chu vanga chhoh lampang muangchan ve deuh tum pawh chu a niin ka hria.

Tape-a Sap hla play pahin inah ka che a, tihfel ngai zawng zawng chu ka tifel vek a, insuk tur thlengin ka insu vek a, ni sâ ah ka pho zung zung bawk. Ni sat vang lai hun tak thla a ni a, khua pawh a lum chho ṭan leh tawh a, insuk a ro hma thei khawp mai. Celine Dion hla 'Its All Coming Back' tih chu ring takin ka play a, ka zaipui bawk a, ka mood chu a fuh cher cher hle. Chet paha zai te hi ka nuam tih zawng tak a ni a, mahse ka zai thiam lêm lo, nuam ka ti ve hrim hrim a ni.

Chawhnu her a ni thuak tawh a, ka che zo titih chu a ni der a, inbual fai chiah ka hmabak ta. Fai ser sawra Mazara lo hmuah ka duh bawk a, ka inulukin ka inbual rei khawp mai. Ṭum dang ai ka inbual rei nghe nghe a, ka fai viau chuan ka hria. Bathroom aṭanga ka chhuak chiah chu ka nitei pasal pa Zothana a lo ding reng a, ka hmu teh thut bawk nen ka phu dâwr a, min la en reng zui. Ka âwm khuhtu towel chu ka ṭham nghet sauh a, ka room lama kal phei ka tum rualin ka hma zawnah a lo ding ta tlat mai. 

"I va han nalh ngai ve le!" ka âwm bawr leh ka kawng hnuai lam en reng chung hian a rawn ti a, chuti ang thu chu a kâ aṭang a chhuah pawh ka ring lo, ka rin loh lutuk avangin ka âng phuau ringawt. 

"I nitei chuan a tluk lo vet vet khawp mai che" tiin ka lamah a rawn pen hnai tial tial a, ka rilruah chuan hlauhna hlir a awm ta, a ṭawng duh dan te reng reng chu rui a ang ka ti, mahse zu rim pakhat mah ka hre bawk si lo. 

"I pa Zothana hi min hlau duh suh Numam, ka chunga ṭhat chhuah te lakah chuan ka fel teh mai a nia, keini pahnih hi i inngaina tawn tawh teh ang" a nui hmel te chu ka ten hluah hluah a, min it hmel taka a awm te chu a zahpuiawm ngawih ngawih. 

"Min rawn hnaih tawh suh pa Zothan, i awm dan zawng zawng hi nitei leh ka pa ka hrilh vek dawn, an lung a awi bik hauh lo vang" hlauthawng ru zet chuan ka ti mawlh mawlh a, ani lah chuan min rawn la pan hnai zel zui.

"I duh chuan i hrilh dawn nia, mahse chumi hma chu thil eng emaw min tihpui ta che, nuam kan ti dun ngawt ang ka ring" ti leh ka bana rawn man chu a tum a, ka tawlh hnung dâwr a, ka lu tuamna towel chu la thlain inven nân ka hmang zui nghal bawk.

"I zak thei lo hle mai, ka lam hnaihin lo kal tawh suh, lo kal tawh miah suh, i lo kal lui a nih chuan towel hian ka vua che a ni mai" ka ti tawn tawn a, towel chu ka keng ran a, min rawn hnaih chilh a tum leh vaih chuan ka vaw chiang khawp ang.

"Min lo vaw ta la, keiin ka lo man chat ang a, tichuan chhuat laiah hian ka bawhbet che ang a, a dawta thil thleng tur chu i hriat mai ka ring. Heti hian ti teh ang, vawi khat chiah min mutpui la, a bak engmah ka duh lo" a ti chiah chu

"Mi tenawmpa, ka ngainat theih miah loh chhan che hi rilru tenawm tak i put vang a ni ngei ang, kan in aṭang hian chhuak nghal rawh!" ka aw chu a khur vek a, ka hlauh rukzia a hria ang tih ka hlau bawk si a ni. 

"Vawi khat chiah alawm ka ngen che Numam, nuam takin ka siam ngei ngei ang che, min ngainat phah sawt maithei asin" tiin a rawn pen hnai a, ka towel ken chuan ka lo vaw pawp pawp a, ka thin phu te chu a rang zawt zawt hle.

"Duh tâwk rawh!" ti vin tuarin towel chu a man bet chat a, min si chêt hian a lo ding zui nghal a, ka theih tawpa ringin ka ṭe vak a, mahse ka kâ a hup tlat avangin ka ṭe rei hman meuh lo.

"Tun lai chu i nitei nen pawh nupa nun kan hmang khât viau asin, i nitei ve lah hi zu a duh si" vawi leh khatah a aw chu a dam vek a, hur hmel zeta min enna te chuan ka ṭah a tichhuak ngawih ngawih tawh. 

"I taksa mawi tak hmaah hian tu mipa mah an insum theih ka ring lo, i pa meuh pawh" tih leh min fawh chu a rual a, ka kut pahnih chu a kut khing khatin a chelh bet a, ka nghawng vel a fawh lai chuan ka ṭap chhuak ta hawk.

"Ṭap mah ta che Numam, nuam takin ka siam dawn che alawm, nuam i ti viau ang" a ṭawng lai tak chuan ka kut ding lam ka tal pit thei hlauh a, Gas Lighter chuan a chalah ka chhu sawk a, a nâ thawkhat bawk a ni ang min thlah chiang hle. 

"Zawngi le! I châk lo khawp ang" ti vin hrawkin ka tlan chhiatna lamah chuan min lo um zui nghal a, ka room chhung ka luh rualin kawngka ka kalh zawm zat a, pawn lam aṭang hawn tumin chet a rawn la nghal bawk. 

Ka phone ka hmet eng thuai a, hming lo lang hmasa ber Mazara chu ka call nghal vat a, a la tlang thei lawk lo zui. Ṭap purin ka pa chu call ka tum leh nghal a, mahse Mazara hnen aṭang call ka dawng ta hlauh mai. Ka lâk rual chuan pangngai deuh hian

"Counter-ah ka inhlang thla fel chiah e" tiin a rawn ṭawng hmasa zawk a, kei chuan chuti ang lam ka rilruah ka dah thei tawh lo. 

"Lo kal vat rawh Mazar, ka nitei pasalin min pawngsual a tum, hmanhmawh rawh, khawngaih takin hmanhawh rawh Mazar" ka ṭawng zo chiah chu ka insut nghal feih a, Mazara chuan engmah a rawn sawi leh tawh lo va, ka pa call ka tum lai takin kawngka a rawn chhe ta rup mai. 

"Tu pawh be mah la ka chhuah dawn chuang lo che zawngi, ka duh chu ka ti dawn khawp alawm" ti hrawkin min hnaih tial tial a, ka samah kêkin ka phone ken lai chu a vawm keh darh vek a, ka rilruin Mazara hming ka lam mawlh mawlh a, chu bak tih theih dang ka nei tawh lo a ni. 

Khumah chuan min theh thal tawp a, thawh ka tum rualin min rawn bawh bet nghal a, min bawh bet reng chungin a kekawr a phelh zui mawlh mawlh a, lo dan tum eng ang mah ila ka thei ngâng lo. Ka âwm khuhtu towel chu a pawt phelh sawk a, ka ban pahnih a nem bet ve ve bawk a, ka hmuia fawh a tum te chuan ka lo thle sawn zel a, mahse a tawpah erawh ka beidawng ta. 

"Ṭap duh mah ta che, hun nuam tak kan hmang dun dawn alawm" tenawm zeta nui hek hek pah hian ka mal leh mal inkarah chuan a rawn tla zep a, ka mittui chu a dir zawih zawih a, ka che thei tawh lo a ni ber. 

Vawi leh khatah ka veng hawk a, ka chungah pa Zothana hmel reng hmuh tur a awm tawh lo. Mazaran banga a reh beh lai chuan ṭap chhuak hakin ka taksa ka lo khuh ṭha nghal mawlh mawlh a, muangchanna chi a ni tawh lo a ni. Mazara chuan ngawi reng hian a hnek zui nghal sawk sawk a, a hnek ri chawrh chawrh a, mittui nen ka nih pur avangin hmu phe deuh ruai mah ila a mitmeng sen ram chu ka hmuh hmaih chuang hauh lo va, a thinrim hle tih ka hre thei bawk. 

Pa Zothana erawh che hle thei tawh lo tih hriat zetin a zawi hnûang a, min pawngsual a tum kher bawk nen Mazara chuan khawih hrep se pawi tihna ka nei teuh lo. A keah chelhin room pawn lamah a hnuk chhuak a, aw rawl chhuah meuhin ka ṭap ta. Ka ṭap hawm hawm a, kawr pangngai hak tumna reng ka nei tawh lo. A chhan chu ka him tawh tlat, min venghimtu tur Mazara ka bulah a awm a, engmah hlauh ka nei tawh lo, mahse ka lung a chhe em em thung.

"Numam" aw thum dam dap ri ka hriat chuan ka hawi chhuak a, men purin Mazara chu ka en a, awm lo se chuan ka thianghlimna ka hloh tawh ngei ang.

"Mazar" ti ṭuauin ka ṭap chhuak leh hawm hawm a, min rawn kuah ta vat a, a kawr hak lai chu phelhin min haktir zui nghal bawk a, ka thla a muangin ka hahdam nghal sawng sawng thei. 

"Ka tlai teuh hle mai" ti supin min kuai dak a, ka mittui baw zawih zawih chu a kut chuan a tuai hul a, a mitmeng thip ramah chuan min ngaihtuahna bak ka hmu lo. 

"Hlau lo la, i bulah ka awm tawh alawm" dam zet hian a ti leh sup a, ka chalah a fawp vang vang a, ka hmui ka pet fan fân a, a âwmah min kuah bei ta hle hle. 

(End of Chapter 26)