SUMO DRIVER By Havali Adam (CHAPTER 25)

SUMO DRIVER

By

Havali Adam

Chapter 25

Beisei loh takin thil a thleng thut a, mak tihna leh tawrhpuina chuan ka rilru a luah khat nghal vek a, tawrhpui satliah mai ni lovin ka nâ ve vawng vawng a ni. Mazara tan chuan nu Biaki thihna chu engti ang chiaha tawrh hrehawm nge a nih dawn ka hre lo va, a rilru a nâ thawkhat dawn tih erawh ka chiang hle thung. A nâ dawna ka hriat avangin kei ngei pawh ka lo ral khat nât ve hial a, a chhan chu ka engkimah Mazara a tel ve zel tawh vang a ni. A nât chuan ka nâ a, a hlim chuan ka hlim bawk a, harsatna ka tawh laia min thlamuan ṭhin tluk zeta thlamuan ka va'n châk tehreng êm. 

Khumah chuan ka mu meng kar a, ngaihtuahna a kal thui duh khawp mai. Chuti teh vakin innel hman lo mah ila Nu Biaki kha nu fel leh hawihhawm tak a ni tih ka hre hman tho va, a ṭawng ngaihthlak a nuamin kei pawh min be chhe ngai lo a nih kha! Thihna hi chu kan dan theih a ni si lo va, a pawi ngawt mai. Chu bakah a dinhmun a ṭhat chhoh tial tial thu Mazara hnen aṭang ka hre ṭhin kha a ni si a, a boral ta mai chu a mak ka la ti reng, thi tur êm chuan ka la ring lo a ni ber, mahse a thi tawh miau a, ka ngaihtuah kual nasa bawk nen Mazara chu ka khawngaih thar hle. 

Ka nu leh pa tak ngial pawh hrilh peih lovin khumah chuan ka mu zawi hnuang a, ka bula phone chu ka en tlawk tlawk a, ka phone call a la thei miah lo te chu awm ka ti lutuk tlat. Ṭah erawh ka ṭap miah lo va, ka hamhaih em em thung. Ka phone chu ka ban a, Tlantea kaltlang tala Mazara biak chu ka duh deuh thut a, kei talin ka ṭawng thlamuan lo a nih chuan dikin ka hre lo a ni. Chutah Tlantea pawh chuan phone a la thei ta reng reng lo mai a, vawi hnih lai chu biak ka tum a, a lâk theih chuan loh avangin biak ka tum lo ta ringawt, an buai te pawh a ni mathei.

Ka mit ka men chuan khua a lo vâr vek tawh a, nizan khan ka mu ṭha lo bawk nen ka mut a la chhuak ru khawp mai. Tukṭhuan ei laiin ka pa chuan Mazara nu chanchin leh chhiat an tawh thu a rawn sawi chhuak a, putea emaw Tlantea hnen aṭang a hria a nih ka ring. Ka nu leh u Duhawmi chuan an khawngaih hmel viau a, kei phei chuan khawngaih tak ka ni. Ka pa'n Mazara te khaw lama chhoh ve zawk a ṭhat thu a sawi chuan kal ka tum rilru nghal bur a, College kal lova zin chu ka pawi sa teuh lo, tunah rih chuan zirna aia ngaihpawimawh zawk ka nei tlat. 

"A ni ngawt mai, kan inah hial a lo chuangkâi ve tawh a, inhmel hriat loh pawh kan ni hleinem, han chho tak rawh. Kei hi chu min hrethiam leh mai teh, kan Branch lam hi kan buai kar tin reng mai zawng a nih hi!" ka nu chuan a ti siam siam a, ka ngawi reng thei ta bik lo.

"Engtik thleng nge i châm dawn ka pa?" ka tih chuan an vaiin min lo en a, enga mah hmaa min lo en nghal ṭhap chuan min tizam dawn lek lek a, u Duhawmi ngat phei chuan min en rei deuh bik kher a, thil eng emaw hriat nei a ang riau mai.

"Aizawl nen a inhlat ve ang reng si a, lâng tur êm chuan ka chhoh peih ka ring lo. Naktuk zing lamah ka lo chhuk leh ka ring, engati nge?" tiin zawhna min zawt lêt kauh a, ka thusawi tur chu mak ti viau lo se ka ti hle.

"Ka lo chho ve duh a, i remtih chuan ka lo zui ang che. Vawiin leh naktuk kan chawl dawn tho va, chu bakah Tlantea hmuh ka duh hrim hrim pah bawk" ka pa chuan min lo en tawh lem lo va, mahse min chhang lawk lo.

"A buaithlak mai mai, i pa chu zui chho lo mai rawh, in han awm rei tak tak dawn chuang lo. I duh leh kum lai hawl chawlhah i zin chho zawk dawn nia, tun ṭum chu a hun rih lo em mai" ka nu chuan a lo ti hmasa zawk a, a phal chiah lo tih ka hrethiam nghal bawk. 

"Ka zui chho ve duh tak tak che a nia pa, i chhuk rualin ka chhuk leh nghal ang, ka tiam a che" ka ti leh hram a, ka nu lam chu ka hawi duh lo tawp, lungawi lohna mitmeng bakin min en dawn lo tih ka chiang a ni. 

"I duh chuan i lo kal ve dawn nia, mahni chauha zin ka peih lutuk bik hleinem, vuina hunserh kan nang hman tawh dawn chuang lo va, hmanhmawh vak pawh a ṭul hran lo turah ngai ang" ka pa chuan a rawn ti hlawl mai.

"A va mak ṭhin tak! Nang pawh hi mahnia chhoh ve mai tur che alawm, i peih loh chuan kal lo mai la, pawisa leh phone kaltlang paw'n a ral theih tho" ka nu aw chu a nêm fahran lo va, vin lutuk erawh a ni chuang lo.

"Chuti ang ringawtin an ti ngai hleinem, hmaichhanah ngei râlna neih kha a finthlak zawk e. A thu hrimah Numami pawh chawlh a ni dawn tho alawm, ka ruala a chhoh ka phal ni rawh se" ka pa thusawi avang chuan ka khi ver ver a, ka nu ṭawng leh hmain ka kham nghal daih. 

Room-ah ka lut a, kan châm rei loh hmel bawk a, insiam vak a ngaiin ka hre lo. Mawitei leh Hlimpuii chu a hran ve vein College ka kal dawn loh thu ka hrilh a, a chhan min zawh chuan ka pa nen kan zin dawn thu leh kan haw huna kimchang zawka hrilh ka tum thu ka sawi a, zawhna dang min zawt zui ta bik lo. A hma aṭang daih tawh ka lo ngaihtuah ve rauh rauh tawh a, ka ṭhiante pahnih tâl chuan ngaihzawng nghet ka neih thu chu hre ve tawh mah se pawi tihna ka nei lo a ni. 

Thleng ka sil laiin ka pa a lo insiam malh malh a, ka nu'n thleng chho tlai lo turin min ti tlat lawi a, ka pa paw'n a hnial hran chuang lo. Ka ngaihtuah chiang a, Mazara hmuha ṭawng thlamuan vat chu a fuhin ka hre leh ta zawk. Thleng sil zo thuai thuaiin kawr hak lai ka thlak a, thawmhnaw dum lampang inbelin hak thlak tur pawh ken ka tum lem lo va, naktuk zing maia kan chhuk leh tho dawn avangin a ṭul hran lo bawk. Mazara nen tak chuan inhmuhna hun kan nei thei dawm em tih ka la chiang bik lo va, a fâla hmuh erawh ka tum ruh hle. 

Chawhma lamah kan chhuak a, Kilometre eng emaw zah kan la tlan chauh dawn chu a ni si a, kan kal chhan turin zir viau lo se chuan kal a châkawm teh chiam loh a ni. Zan lamah ka mu ṭha lo bawk nen ka mut chu a rawn chhuak ṭan a, ka pa thusawi te chu ka hre mumal thei lo. Ka mit ka chhing diar diar a, ka lo muhil tlang ngei a ni ang ka men leh meuh chuan ni ên dan a lo chawhnu ruih tawh a, Aizawl chu kan hlat viau tawh ka ring. Ṭhu ṭhain ka pa chu ka en zeuh a, a motor khalh lai chiah ngaihtuah ni awm mai hian a ngawi reng a, ka be ta lo law law.

Ka phone chu hmet êngin dar zat ka en a, chawhnu dar 1 a lo pel vel chiah a, ka pa nen chuang dun lo ila chuan Mazara ka be ngei ang. Tlantea hming ka hmet chhuak a, ka call chiah tihah Signal a rawn bo nghal daih a, ka ngei tak tak a ni. Ka hma zawna Cassette dahna bâwm chu ka hawng a, khawih ri rukin Motor chhunga Tape-ah chuan ka play zawm nghal zat a, tun ṭum chu Sap hla play châkna ka nei miah lo. Mizo hla ngei chu ka play a, ngaihthlak nuam tâwk chiahin volume chu ka herh ring bawk. Thlen lam kan hnaih tawhin ka hria, kan tlan rei ve tawh êm mai. 

Harsatna awm miah lovin Mazara te khua chu kan thleng a, khaw lian tak tia sawi tur a ni lo bawk a, a lo reh deuh ṭhuap a, mi veivâk hmuh tur pawh an tlêm hle. Tlantea chu ka call nghal a, khaw chhung em emah chuan signal a awm ve tawh e. Khaw chhungah tak ngial pawh signal awm loh zeuh zeuh chang a awm fo va, chu erawh zan lamah a ni tlangpui ṭhin thung. Tlantea chuan thlanmual lama an awm thu a rawn sawi a, thlanmual kawng a sawina lamah chuan kan tlan nghal bawk. Kawngpui bulah Tlantea chu hmuh theihin a lo ding a, rin ai takin mi an lo tam ang reng hle bawk.

Ka pa nen chuan Tlantea chu kan zui thla ve nghal a, Mazara ka zawng ru nghal ruai a, ka la hmu thei mai lo zui. Kan kal thla zel a, theih ang ângin mi karah chuan ka inrawlh lut a, pastor bula lo ding ngawi reng Mazara chu ka hmu thei ta. Kamis dum bân bul a ha a, lungngaih hmel deuh hian thlan khur lam chu a en ngawt ngawt a, ka khawngaih dan chu pui tak a ni. Mi hmuh lovah ka lo ṭang ru em em a, ka kut ka hum ruh vak bawk a, Mazara tan chuan a nu chu a neih chhun tak meuh a ni tawh dawn a, chutia a boralsan leh ta si chu a rilru a nâ vawng vawng dawn tih ka hre thei a ni. 

Pastor chuan Pathian thu a sawi mawlh mawlh a, a sawi zawh hnu chuan tlangval ṭhenkhatin suahdûrin thlan khur chu an vur zawm nghal a, Mazara mittui tla lai emaw a ṭap hmel ka hmu miah lo chu mak ka ti ru khawp mai. Che hrutin leiah chuan a ṭhingṭhi rawp a, lei chu a ṭham vak a, chung lai hmuna awm zawng zawngte chuan kan khawngaih vek ka ring. Ani ang mipa meuh pawh chuti ang khawp chuan a rilru a nâ a nia, kei te hian a dinhmun ang chu changin a tawn ang chiah chu tawng ve ta ila ka tuar zo kher lo vang. 

A tam zawk chu an haw ta sap sap a, Mazara piah deuh lawkah chuan unau tih hriat tak hmeichhe 4 an la ding reng thung a, kum upa tawh tih hriat reng reng putar pakhat a ding ve bawk. An zinga hmeichhe pakhat chu insum thei tawh lovin a rawn ṭap chhuak hawm hawm a, chu nu ṭah hla aṭang chuan Mazara nu chu a u a ni tih ka hrethiam nghal a, a unau dangte pawh an bang chuang lo. An unaunu bulah chuan an rawn ṭhu hniam a, an ṭap nghal feih feih a, Mazara erawh a awm ngaiin a la awm reng thung. 

Keimah ang rual vel hmeichhe pakhat chu Mazara hnaih takin a ṭhu a, Mazara kuah chung chuan a ṭap hawm hawm a, a mi kuah mêk chu milím ang mai a ni. A ṭawng lo va, thawm a chhuah lo hrim hrim a, a che eih lo bawk. Tun ṭum chu ka inhrethiam bik lo, hmeichhe dangin Mazara an kuah chu thikna ka nei miah lo va, kan boruak tawn mêkin a zir vangte pawh a ni mahna. Nu Biaki thihna vang pawh ni chiah lovin Mazara ka khawngaih lutuk zawk avangin ka mittui te chu a rawn parawl a, ka pa hmuh erawh ka hlau khawp mai.

Muangchangin Mazara chu a tho va, amah kuahtu nu chuan ṭap reng chung hian a chhoh en hâ a, vawiin atan chuan hnaih emaw biak loh chu a fuh zawkin ka hria. A kal sawn lai chuan tûmah a en lo va, a kalna kawng chiah a en a, keiniho pawh min hmu lo hrim hrim. Mazara ber hmuh tur a awm tâk si lovah chuan kan haw ta ringawt a, ka pa paw'n engmah a sawipui hman bik lo chu a ni e. Pitei te in lama kan tlan chhoh chhung zawngin ka rilruah Mazara hlir a awm a, khawiah tak kal ang maw! 

"Tlante, i ṭhiante sawm la, remchang hmasa berah Mazara lo vâh sa halsak ang che u. Amah hrilh kher pawh a ngai lo, vâh sa vek a ni tawh tho va, in tithei mai ang. Naktuk erawh thlan nghah ni a ni dawn a, naktuk tuk leh aṭang in che chhuak dawn nia" putea chuan a ti dap dap a, Tlantea paw'n hnial tumna a nei hran lo. 

"A zia lo ngawt mai, Mazara nu chu a ṭhat viau tawh kan lo ring ve ngawt asin le. Keini lahin puih theih dan kan vân ve si a, tlangvala pumpa mah ni se ka khawngaih reuh khawp mai" ka pa chuan a tih zawm ve nghal a, chutah putea chuan indap ruk ruk pah hian

"A pawisa tur min pek pawh kha ka la kawl tak asin, kan lakhuih hralhna kha hman phawt a duh a, a lo daih hlauh chuan pe lêt leh tur chein min ti bawk. A lo daih ta reng a, mahse an vanduaina a kal tluang ta tho a ni" a ti ve leh nghal a, pawisa chu a rawn phawrh a, ka pa chuan a lo la duh teuh lo. 

"I tizahthlak em mai Rintluang, ka la lêt thei tawh lo vang. Mazara chu pek luih han tum hram zawk teh khai, ralna tur pawisa ka lo keng nghal bawk a, a rualin pe nghe nghe a ṭha ang" tiin ka pa chuan a hnial ta tlat a, putea chuan min rawn en zeuh a, keimah min pektir ngei a tum ka ring. 

A hmaa ka lo mutna ṭhin pindanah chuan ka lut a, rei lovah Tlantea a rawn lut ve nghal a, sawi mai tur pawh ka hre lo. Ka ngaihtuah a tawi tup a, ka rilru leh ngaihtuahnaah Mazara tih loh chu a leng rih lo a ni ber. A lungngaih lutuk lûatah mahni intihlum duhna rilru a pu mai ang tih te chu ka hlau thar hle a, ka rilruin ka ṭawngṭai mawlh mawlh a, hmuh châk viau mah ila a kalna ka hre tlat si lo a ni. Chu bakah kan zin chho tih pawh a hre tawp nâng, min la hmu lo hrim hrim a nih khâ! 

Khaw thim dawnah zanriah kan ei a, chaw ei a tui duh lo khawp mai. Khawhar ina lên thlak kan tum vek a, Mazara chu hmuha biak ngei ngei ka duh tawh a ni. Tlantea pawh ka hrilh lawk vek tawh a, Mazara nen kan inhmuh theih nâna min pui turin ka ngen bawk. Ani paw'n lungngai lo tur leh kan hmuh theih ngei a rin thu min hrilh a, ka mi hmuh tum ber chu a lo la haw miah lo vang tih ka hlau ru hle thung. Pathian hnenah Mazara tan ka ṭawngṭai leh tawp ṭhin a, ni khata ka ṭawngṭai tam ber a la ni hial ang. 

Zan lamah chuan kan chhuk thla ta ngei a, mi an lo tam ang reng khawp a, nula leh tlangvalin thingpui an lo lum a, lumen zan ni tawh lo mah se khawhar chhungte an la ṭawiawm tha hle. Putea te nupa leh ka pa chu in chhung lamah an lut tlang nghal a, kei leh Tlantea erawh lut duh mai lovin pawnah kan ding a, Mazara hmel awm ang hmuh tumin ka hawi kual nasa tawh hle. Tlantea chu in chhung lamah lut zuaiin Mazara a va zawng ru deuh a, mahse a hmu bik chuang lo.

"U Thansiam, khaw'nge u Mazara hi a awm le? Tlaia a chhuak kha a lo la haw miah lo zawk em ni?" tiin Tlantea chuan mi pakhat Mazara kum rualpui awm vel hi a bia a, a hmel chu ka la hmu ngai lo hrim hrim.

"A lo haw tawh ngei khâ, mahse khawiah tak nge tunah a awm ka hre lo, a lo lang ve leh mai ang" tia Tlantea zawhna a rawn chhan hnu chuan thingpui lumna lamah a phei zui nghal a, a chhan dan ringawt pawh chuan min tihlim a ni.

"Ka ṭhiante saw ka va be lawk, ka rei lo vang. I duh chuan lo phei ve la, i duh leh duh loh a ni mai" Tlantea chu lu ka thin khum a, mahnia awm chu ka hreh em em chuang lo, chhungrilah ka hahdam a, Mazara nen kan inhmuh ngei ka ring bawk.

Tlangval ṭhenkhat chuan mei alh hluah hluah chu an ṭhut hual a, thingpui bel lian zet hi an chhuang a, an ṭhahnem bawk nen chet vel kawngah an indaih hle. Ko pang chhak lama pal inhungna bula tawlailirah chuan ka ṭhu a, Mazara te in veranda electric bulb êng eng deuh phut chuan min rawn chhun pha tho va, hlauh ka nei hran lo. Chu bakah kawngkam deuh reuhah ka ṭhu a, ka piah lawkah tlangval rual an ṭhu reng a, eng emaw tâwk pawh ni ila min rawn pui thuai turah ka ngai. 

Ngawi renga ka ṭhut lai chuan tawlailir chu a rawn che deuh lawih a, ka la phu em em zui. Ka bula lo ṭhu chu ka hmuh tawh hnu a ang riau leh nghal a, min en lo va, a ṭawng bawk hek lo va, hma lam chu a en deuh tawp a ni mai. A awm dan aṭang chuan harsatna min siam duh hmel a pu lo va, ngaih ṭhat lohna pawh ka nei em em lo. A lam chu ka hawi leh ṭhin, a sir zawng chuan tu emaw ni tak chu an a nei chiang alawm, mahse tu ber nge a an erawh ka hre chhuak thei mai lo. Ka en reng duh ta lo va, a rukin ka en leh zauh zauh ṭhin tih a hre tho maithei.

"Mazara nena inbiak ka duh a, lo hrilh mai ta che" rawn titu lam chu ka hawi phawk hle a, a ṭawng ka ring lo hrim hrim kha a nia, min be thut chu mak ti tak ka ni, ka mi hriat chian a ni lo miau a, chuti anga min rawn be thut chu a mak zawk.

"Eng lo.....min hria em ni ka pu?" ka tih chuan muangchang hian min rawn en a, chiang lehzuala a hmel ka hmu chiah chu hriat chhuah ka nei nghal a, ka bula ṭhu mêk chu buhdengkhawl neitupa kha a ni chiang lutuk, a ni chiang a ni.

"Hria e, Mazara bul hnaiha tlâ tam reng reng hriat loh ka nei lo" a ṭawngkam chhah chhuah dan engkim chuan min ṭhawng vel vek a, a sawi dan kalhmang aṭang lah chuan min hriat chian hmel ropui bawk si, sawi tur a vâng duh ta hle.

"Tunah hian khawiah nge a awm? Ka be duh tak zet, biak ngei ngei ka ngai" a rawn tih leh chuan ka en rengna ata ka mit chu ka la sawn thuai a, ka rilru chu a la pangngai thei chiah lo, inhre ṭhang tawh ang maia min be thei chu mak ka ti ang reng viau.

"Ka hre bik lo" ti sepin ka tho va, mi sual a nih ring lo mah ila a bul hnaia awm chu ka ngampa lutuk hran tawh lo, Tlantea bula phei daih chu ka duh ta zawk a, kal phei ka tum lai tak chuan ka kutah a rawn vuan ta tlat mai le. 

"Min thlah teh ka pu" thin thlak mai ka tum paw'n a vuan nghet sauh a, ka kutah mai ni lo ka bân rêkah a chelh zawm zat a, tunah chuan hlauhnain ka rilru a rawn luah ta, chutah kaih sawn min la tum zui. 

Puihna dila au chhuah ka tum lai takin vawi leh khatah ka lêng lawp a, ka tlu tur chu ka bânah kut lum vung vung hian a rawn vuan a, Mazara a nih rinna ka nei nghal. Ka din ngil rualin ka bân vuantu chu ka en a, Mazara ngei a lo ni e. Ani chuan kei ni lovin kan hmaa ding pa upa lam tawh chu thinrim zet hian a melh chhuk run a, a khawih hrep duh hial ka ring. Chu pa lah chuan a rawn la pan hnai ang ta deuh deuh a, chu veleh Mazara chuan a kawr âwmah a lo ṭham chat a, ka kut erawh a la thlah chuang miah lo.

"Lo kal ngam tur i ni lo, ka thinrim tak tak hma hian haw nghal rawh" hriat nuam loh zet hian Mazara chuan a ti vin hrawk a, a ṭawng zawi lo bawk nen thingpui lum leh pawna awm ṭhenkhat chu kan awmna lam an rawn hawi nghal ṭhap a, ka tan chuan awm dan tur vâng tak a ni. 

"Inbe hram teh ang, inbiak kan ngai Mazar" chu pa chuan a ti dam dap a, zep lovah chuan an inbiak dan chu ka bo tulh tulh, pakhat thinrim viau mah se pakhat erawh a thinrim ve miah lo va, a ngaihna ka hre lo kher mai. 

"Ka hmingin min ko hlek suh, i kâ aṭang khan ka hming a ri chhuak tur a ni reng reng lo" Mazara aw khauh lutuk chu a hlauhawm lek lek zawk a, ka ban a vawnna thlah tawhin a mi biakpa dar tawn tawn chu a hmer a, a hmer nâ ngawt ang ka ring.

"Mazar, duh tawk teh khai, a zahthlak a nia" ka bul lawka lo ding pa chuan a rawn ti thuai a, chu pa chu Mazara patea kha a niin ka hria, Mazara erawh thinrimnaa khat mitmeng hian a rawn hawi lêt a, mi pangngai tan chuan va pawh ngam chi a ni lo hrim hrim.

"Lo inrawlh miah suh, hei chu kan pahnih inkar a ni" ti khauh hmukin hma lam a hawi zawm zat a, pal ngheng dawtin a nam chho rawk a, a chet dan chu ka beisei loh lam hlir a ni a, rilru buai a ang mah zawk. 

"I pa hi min ngaidam thei lo tih ka hria alawm Mazar, mahse i nu thihna hi ka tuar ve tho asin, titipui che ka duh a ni" chu pa thusawi avang chuan ka meng kâwk a, Mazaran pa a lo la nei reng tih ka hre ve chiah, a va mak ngai em ve le!

"Ka hming leh ka nu hming lam tawh suh ka ti che a ni lo'm ni?" ti vin tuarin Mazara chuan a nam sawn zeuh a, a nghen chhan pal chu a hnek sawi bâwi bawi a, duh tawk mai lovin thing tûai te chu a hnek tliak ri pawp pawp a, hlauhawm tak a ni. 

Ka ṭe chhuah mai loh nân ka kâ ka hup thuai a, kei chauh ni lo mi dang zawng zawng pawh chuan a thinrim hrithla lai chu an en ṭhup a, in chhung lama zai thleng chuan a reh ta duak mai. Tlantean Mazara awmna zawh pa Thansiama chuan va kawih sawn a tum a, ani lah rilru buai tawh bawk nen a lo theh lêng lawp a, a insawh nâ hial maithei a ni. Mazara patea chuan ka dinna bul aṭang duh tawk turin a au reng a, pakhat mah a sâwt chuang lo. 

Thi tawh emaw ka lo tih Mazara pa chuan a fapa che vel chu mittui tling pam hian a en reng a, Mazara nam sawn ang ângin a la ṭhu sawp nuai a, Mazara chu engtin mah khap daih a tum lo a nih hmel. Mazara ber lah chu sakawlh ang maiin a che buan buan a, thingkhawn zawng zawng chu a tichhe vek a, ka hlau lutuk chu ka pa phenah ka ding tawp. In chhunga zai zawng zawng an rawn chhuak vek tawh a, tlangval ṭhenkhat phei chuan an hnaih ngam lo. A pa lianin a chak bawk si a, kan en ṭhap hlawm ringawt. 

Mazara pa chu zawimuang hian a tho ṭuah ṭuah a, hlauhna nei miah lo hian a fapa lam chu a pan a, patling ṭhenkhat chuan hnaih lo law law turin an lo hrilh thuai a, ani erawh a kal lui zel tho. A hnung lam aṭang Mazara chu a va kuah a, chu veleh Mazara chuan leh hawiin a darah lo ṭham chat a, leiah a nam chilh zawm nghal zat a, ka ṭe chhuak ta nge nge, ka insum hman tawh lo a ni e. Hmeichhe dang pawh an lo ṭe chhuak ve tho va, Mazara putea chuan va hnaih chilh ngam chiah si lo hian

"Duh tawk rawh ZARZOKIM, mi â pawh i ni lo, i pa a nih khâ hre ta che" a ti vin ve ta tuar a, Mazara pawh chu a che tawp hmak a, a pa chu a melh chhuk run a, awm sawn a tum chuang lovin ka hria.

"I pa hi min sawisa hlum mai teh Mazar, ka inthiam lo êm mai" a pa chuan hnukulh deuh ṭûn hian a rawn ti chhuak ṭuau a, a kut pahnihin Mazara biang chu a dawm a, a sam tam lo tak chu a chulsak zeuh pah bawk.

"Ka pa i ni lo" ti vin hrawkin a lu bul lawkah Mazara chuan a hnek ri chawrh a, tho zui nghalin kan dinna lamah a rawn kal phei pawk pawk a, keini chu min en lo hrim hrim a, in chhunga a luh lai te chuan kan thlir reng ringawt.

"Nang pawh lo inlan rih lo mai ta che u Thankhum, a huatzia che hre vek chungin i rawn kal lui a, a leh pekah chuan inrawlh ka tum tawh lo tak tak ang" ti mawlh mawlhin a patea chuan Mazara pa chu a kai tho va, thil hmuh nuam tak chu a ni lo a ni. 

Ka pa chuan haw mai a rawt a, hnialna kan nei lo tlâng hle. Ṭhenawm khawveng pawh chu an haw deuh sup sup a, tlem tê bak in chhung lamah an lut tawh lo. Kan veng lama kan chhoh laiin Mazara awm dan chu an sawi zui a, mahse a pa nena an inkar engmah an sawi lang lo hrim hrim. Ka pa paw'n a zawt chuang lo va, mak erawh a tih ve ngawt ang. A nu nen chauh an awm avang khan pa nei tawh lo emaw ka ti a, chu bakah putea te paw'n an sawi lo va, sawi duh loh chhhan ṭha tak a awm ngei ka ring.

In kan thleng a, mu turin pindanah ka lut zui nghal a, Mazara nen mumal taka inbiakna hun kan nei lo chu pawi ka ti hle. Naktuk zingkara chhuk tur kan nih avangin hmuh loh tlang law law chu ka tum ta mai a, a remchang rih lo a ni ber. Mu tura ka insiam laiin Tlantea a rawn lut a, a hma ang bawkin chhuatah chuan a mu a, kei khumah ka mu thung a, Mazara chanchin min sawipui ka rin tehreng nen engmah a sawi duh lo reng reng.

"I muhil tawh em Tlante?" a muthilh tawh leh tawh loh bih dêk dek pah chuan ka ti a, ka muthilh theih loh mai bakah Mazara leh a pa chanchin chu zawh chian ka duh a, a hre kher ang em tih erawh ka hre chuang lo.

"Eng nge ni ta?" tiin a rawn inlet a, a la harh tih ka hriat rual chuan kei pawh ka ṭhu ngil nghal a, khum tlâng lamah ka insawn phei nghe nghe. 

"Mazara pa kha a thi tawh emaw ka ti char char a, mahse a lo la thi miah lo. Engati nge a pate nen khan an chenho miah loh? Min hrilh hreh em?" ka tih chuan a saisir leh daih a, min en zeuh hian

"Hrilh hreh e, amah i zawt zawk dawn nia" a lo ti a, rizai chuan a inkhuh ṭha nghal daih bawk a, mahse zawh chhuah ka tum lui ta tho. 

"Min hrilh hreh lo la, i hriat chuan min lo hrilh teh. Ka hre châk teh mai a nia, keini te chu unau kan ni tho alawm, min hrilh loh chuan putea hnenah bialnu i neih thu leh meizial i zuk ruk ṭhin thu ka sawi ang" ka tih chuan

"I pa bulah u Mazara nena in chanchin ka sawi ve a ni mai" a rawn ti lêt kauh a, a inkhuh ngaiin a la inkhuh reng a, min chhan dan avang chuan ka ngawi chiang hle. 

"Ka uang miah lo a nia Tlante, min hrilh ve mai mai teh. In vau vel pawh hi a ngai kher chuang lo, i fel em khâ" ka tlawn hnunhawh ta vel a, ani lah chu a che duh miah tawh lo leh nghal.

"Tlante, ka muhil thei dawn chuang lo, i sawi hma chu ka ṭhu tlaivar a ni mai" ka ti leh ta nge nge a, a inkhuhna rizai chu hlimin in chung chu a en reng a, kei erawh ka lo nui sen sen thung a, min hrilh ngei ngei dawn tih ka chiang a ni.

"Pa Thankhuma, u Mazara pa kha a uire alawm, u Mazara ber kherin a uire lai a phâwk bawk si a, chu chu an pafa inkar chhiatna bulpui ber a ni" a tih chuan ka nui tawp riai riai a, ka rin loh lam bawk a ni leh ta.

"Kum 10 chuang chu an awm hrang tawh, u Mazara bulah engmah sawi suh ang che. Zanina a thinrimzia kha i hmuh ve vek ka ring, a pa chhungte emaw a nu chhungte paw'n a beng hriatah a pa chungchang an sawi ngai lo, a huatin a haw bur a ni ber" a rawn ti leh a, sawi mai tur pawh ka hre lo. 

"A pa chhungte erawh a haw chuang lo va, a pa a haw em em tawp a ni mai. A patea nen chuan an inkar a ṭha leh viau tho, nu Biakin a thihsan kher bawk nen zanin kha chu a buai zual a nih ka ring, khati anga a awm ka la hre ngai lo hrim hrim" a ṭawng tawp lamah chuan mak tihna a ri telin ka hria. 

Ka ngawi reng a, pindan aṭang chuan ka chhuak a, a lo reh ṭhuap tawh a, an muhil vek tawh a nih hmel. In kawtah chuan ka ding a, thla êng chu ka thlir vang vang a, ka kekawr iptêa envelop chu ka khawih ri neuh neuh a, putea khan pe ngei ngei turin min ti kha a nia, pek dan tur erawh ka hre der si lo. Ka phone chu ka hmet êng a, zan lai dar 12 a lo ri thuak a, Mazara hming ka hmet chhuak a, ka rilru a insual nawk nawk hnuah pawh ka call lui ta tho, tlai tawh viau mah se hmuh ngei ka duh si a ni. 

"Hello! Awi! Mazar! I ṭha em? Inhmu ang aw!?" ka ti thuai thuai a, ka beisei loh lutukin ka vawi khat call naah a lo la teh hlawl a, ka ṭawng chu hre reng mah se min chhang lêt lo va, in kawt aṭanga chuan venglai lam panin ka kal thla nghal bawk.

"Ka lo chhuk mek a nia aw Mazar, inhmuh ngei ngei kan ngai" ka ti leh mawlh mawlh a, kan inbiakna tih tawp ka tum lai takin

"Ka lo chho" a rawn ti hniam ruih a, ka ding deuh dawt a, amah zawk chuan kan inbiakna chu a hmet tawp zui nghal hmak a, khawmuang lovin venglai lamah chuan ka tlan thla char char nghal. 

Zan rei lam tawh a nih avangin kawng chu a thim ang reng hle a, mahse ka hlau hran lo. Ka tlan thla zel a, thim zinga mipa ruangam lian zet lo pen chho mek ka hmuh chuan ka nui tawi tak a, Mazara a ni tih ka chiang a ni. A bul ka thlen rualin ka melh chhoh ral a, a hmela lungngaihna chu ka hmuh hmaih lo nasa khawp mai. A taksa lum nuam takah chuan ka bei thlawp a, nghet zetin ka kuah a, kan awmna chu kawngpui mah ni se motor tlan a awm loh avangin a hlauhawm hran lo. 

Min kuah lêt chiah chu a nuam vawng vawng a, ka kuahna avang chuan dam sawng sawng se ka ti ve tak zet. Ka mangan lai leh harsatna ka tawh laia min thlamuan ṭhin ang chiahin thlamuan ve ka duh a, ka theih erawh ka ring lo nasa a ni. Ka kutah kaiin an in lamah min chhukpui a, ṭan pawh ka ṭang der eih lo. Min kalpuina lamah chuan ngawi rengin ka zui mawl tawp a, khuma mut ai chuan a bula hun hman chu ka châk daih zawk miau a tin ni! 

A taksa nghenga ka ṭhut hle hle hnu chuan ka kekawr iptêa envelop chu ka phawrh a, a kutah ka dah tih pawh hre lo ang maiin thla chu a en dauh dauh a, ka tih ngaihna hre lo chuan a kut ka fawhsak leh ringawt zel. A ṭawng leh tawh lo hrim hrim a, a sârhu lai a la ni bawk nen a ṭawng duh lo zual kher mai. A kut aṭang envelop chu lain a kawr hma lam iptê ah chuan ka thlep lut a, chutah erawh min rawn en ve ta.

"Râlna sum alawm a nih Mazar, lâk duh loh ringawt kha a chi tawh miah lo, a mawi lo bawk" a mitmenga zawhna chu ka chhiar thiam vek a, theih tawpa a lungngaihna thawi dam chu ka duh ber a ni a, mahse a kawng ka hre bawk si lo.

"A pawi ngawt mai" ti sepin a kut pahnih chu ka la a, min kuah turin ka kawng zawnah ka kham a, ka rilrua thil awm ngut ngut chu sawi mai duhna ka nei a, mahse awmzia a awm ka ring si lo, chu bakah a lo awih kher ang em tih hriat a ni lo bawk.

"Engati nge i rawn chhoh?" a tih sup chuan ka a taksa ngheng der der chungin ka dâk chho a, pangngai taka a rawn ṭawng chhuak ve duh te chu ka lawm tâwk a tling em em a ni. 

"Dik tak chuan ka pa bulah dawt ka sawi tawp; ka ngaihtuah bawk si che a, ni hnih chawl tur angin ka insawi hmiah maw le" nui var vara ka tih chuan min chawi a, amah hmachhawn zawngin min ṭhuttir a, kan inen chiang ta hle.

"Zirna ngaihpawimawh tur ka tih khâ" ti thum chhalin ka biang chu a nul thuak thuak a, zirna lam sawi mah se min mamawhzia leh min thlakhlelhzia chu ka hre thei thung a, a hmel lan dan leh a awm dan aṭang chuan hai theih a ni mawlh lo.

"Ka zirna aia pawimawh nangmah i awm tlat si alawm" ka ṭawng zawh rualin min kuai kun a, min fawp nghal vawng vawng a, tun ṭum chu duhthaw takin a che lo va, min fawh dan chuan zun a neiin a thuk em em thung.

"Naktuk zingah kan chhuk leh nghal dawn a, kar khatah vawi thum vel bak kan inhmu ngai si lo va, phone tala inbiak tam ka duh" a kut khal niap niap pah chuan ka ti a, rawn kun hniamin ka dar chu a fawp leh zeuh a, min ngaih ve zia chu a thup thei bik lo niin a lang. 

Inngai tawn takin darkar eng emaw zah chu kan awm dun a, hmeichhia zawk tih takah ka ṭawng char char a, a rilru tihhlim chu ka tum ve hrim hrim pah bawk. A hnuah phei chuan a nui ri te ka hre ve ta hial a, min ngaih hmel deuha min kuah te chuan ka rilru chhungril a hlim a, tlaivar ṭhaka awm dun ngai dawn mah se a bulah a nih phawt chuan ka hnial miah lo ang. Ka ngai a, ka ngai tak zet a, a hmel hmu lova awm reng harsa ka ti ṭhin. Chumi piah lamah chuan ka khawngaih a, a pa nena an inkar ka hre tawh bawk nen ka khawngaih zual tak zet.

Kan veng lamah min thlah chho thlap a, a kut kaia ka kal theih reng laiin min paw deuh tlat a, mahse a nuam ti zawk zawkah ka ṭang leh ta tho. Kan chhoh chhung zawng chuan zawhna ho lam leh hlimawm tak tak ka zawt reng a, nui miah lo hian min chhang zel a, a nuihna tura ka rinah pawh a nui duh leh tawh miah lo. In kan thlen dawn ṭepah chuan che thutin a biangah ka fawp vang vang a, zak ru ve deuh tho mah ila ka zak lo ve hmiah. 

A ding deuh chawt a, min en chuang lo hian sir lam chu a hawi zeuh a, min ngaichang tih ka hre reng. A nghawngah chuan ka kuah nghet sauh a, ka kein a dul zawn velah ka kherh nghet sauh bawk a, a hmui che zeuh ka hmuh chuan a nui tih ka hre nghal. In kawt kan thleng a, leiah min nghat a, lut nghal mai lovin ka kuah leh tê tê a, ani paw'n nghet deuhin min kuah ve bawk a, kan inthlahlel tawn tih hi chu sawi kher a ngai lo chiang teh e!

Kan inthlah rualin ka biangah a rawn fawp zeuh a, lut hmasa zawk turin min ti a, ka duh bik tlat lo. In kawt maia ding ka nih tawh avangin kal liam hmasa zawk turin ka ti ve kha khâ a, a kawr hma iptêa envelop chu phawrhin min pek lêt leh a tum ta mai, in lam panin ka kal rang khawp mai. Kawngkapui hmaa ka din hnu chuan ka hawi lêt a, a kawr hma iptêa envelop ak ṭha pahin min lo nuih suk a, a fiamthu tih ka hre chhuak har lutuk chu mawl ka inti ngawih ngawih. 

Khi ver verin in chhungah ka lut a, ka chhuah lai ang bawkin thawm a la reh ṭhuap a, kal dim tak ka ni. Khuma ka mut thlak rualin kan hun hman dan chu ka ngaihtuah lêt a, ka thu awiha pawisa a la ve duh ta mai chu hmasawnna pakhat a ni. A hmang ang em tih erawh hriat a ni lo va, a hma pawh khan a lo hmang reng reng lo kha a nia, mahse tun ṭum chu hmang lo pawh ni se a pawisa a ni tawh a, inpek lêt chi a ni tawh lo. Tuma'n râlna an inpek lêt ngai ka hre lo hrim hrim, chu vangin ani paw'n Mizo dan lo deuha chet a duh bik hauh lo vang.

(End of Chapter 25)