SUMO DRIVER By Havali Adam (CHAPTER 24)

SUMO DRIVER 

By

Havali Adam

Chapter 24

In chhunga ka luh chuan ka pa'n thingpui lum turin min lo ti nghal a, ka lum ve mai bawk. Mazara chu choka lamah a rawn hawi leh zauh zauh ṭhin a, T shirt pawl duk lampang a ha a, a inhmeh khawp mai. Pawna a rawn chhuah lai khan ka lo chík em em hran lo va, in chhung êng hnuaiah erawh ka hmu chiang ta thung a ni. Sawi leh sawi hnu, mipa dangte angin a ṭawng ve zuah zuah ngai lo va, ngawi reng hian a awm mai a, mi pawi sawi a nei khât ngawt ang ka ring. A duh zawng ni se ngawi rengin a ti leh mai a, min duh ve zia pawh hi chetzia bakin a lantir ngai lo. 

Pawi tihna pakhat mah ka nei lo va, ṭawngkâa duh thu inhrilh chamchí ai chuan ka laka a awm dan chu ka ngaina fê zawk. Sir Francis-a chu ka ngaihtuah chhuak thut a, ka tum em em pawh a ni lo. Mazara khan khawih nâ duh ngat se chu damdawi in hial luhpui a ngaih ka ring, a khân lo vet vet êm mai. Mipa dang laka him tawhah ka inngai hmiah a, Mazara nen chuan kan inṭhen mai mai ka ring tawh lo bawk. Ka zahpui lohzia te, ka duh em em zia te leh khawpui tlangvalte aiin ka thlang zawk tih a hrethiam vek tih ka hre thei a, chu chuan a tihlim ve ngeiin ka ring bawk. 

Thingpui ka sem lai chuan min lo en reng a, no chu la ta mai lovin min signal zeuh a, ka pek kher a'n duh vel a nih chu! A rilru hrethiam ru karin no chu ka pe a, a lâk rualin ka kut a rawn zut tel zeuh a, kan awmna hmunin zir se chuan ka nui nasa ngawt ang. Puitlingho thingpui in tur hi chu siam a har hran lo, a hâng vek an duh tlangpui a, keini ṭhalaiho in tur hi siam a buaithlak zawkin ka hria. Kei phei chuan bawnghnute nena pawlh ngat ka in duh ṭhin kher a, mi dangin inah erawh insiam rem dan ka zawng ve zung zung zel tho. 

Dar 10 leh a chanve velah putea te chuan mut zai an rel a, ka nu nen chuan an mutna tur kan siamsak leh a, Mazara chu a awm mai leh ta lo tawp mai. An mutna tur kan phah chu a rawn pawt mâr vek a, ka nu nena kan siam ai paw'n a siam mar daih zawk. Lukham dahna lamah ka nu a bur ngar ngar a, kei a laiah ka awm a, a mawngah lamah Mazara a awm bawk a, ka nu hmuh loh laia ka kut rawn vawn vel chu a thiam reuh hle. Ka pa leh u Duhawmi te ni se an room lamah an lut ve ve tawh a, putea a zung mêk bawk a, a ngampa ve deuh niin a lang. 

"Tui deuhin in mu dawn a nia, zing thawh tlai kha hreh reng reng loh tur aw Mazar, in duh chen chen in mu thei tih kha in hre tawp rawh u" ka nu chuan an room-a luh hmain a be ve teh mial a, a be khât ve ang reng a, Mazara lah chuan chhan a tum loh hmel khawp. 

"Nang pawh Numam mu tawh rawh, kan mikhualte ai hian i tho hma lo palh reu reu ang e" ti leh hramin ka nu chu an room-ah a lut zui nghal a, Mazara bawk chu ka en leh ta daih a, a lo mu fel diam tawh a, zan reia inbiak tum deuh tho mah ila a chauh viau ka ring.

Khumah chuan ka mu meng ta kar a, ka ngaihtuahna chu a vak kual nasa hle a, Mazara bulah eng nge ka sawi hmasak ber ang tih lam ka ngaihtuah a ni ber. Rei lovah inchhirna ka nei zui nghal a, a laka ka lo lungawi lo ve ringawt te chu ka inthiam lo thar ta hle. Ka lungawi loh lêtin ani chu a rilru a buai dawn tih lam reng ka lo hre lo va, nu Biaki dinhmun a ṭhat loh thu tal te chu hria ila chuan ka inthiam lo chuang lo vang. Sumo Counter-ah te khan ka kal duh lo vel a, thil ngaihtuah tawi tak mi ka nihna chu ka hre chhuak leh ta nge nge. 

Dar zat chu ka en deuh chhen a, dar 12 te chu ri har ka ti khawp mai. Khuma mu tawh lovin ka ṭhu ta zawk a, Mazara lo lan hun ka nghaknghel a ni ber e. Ka tih tur hre lo chuan a lehkhathawn ka dawn tawh zawng zawng chu ka chhiar nawn leh vek a, a changin ka fawp bawk a, lehkhapuan rim te chu a thingtlang rim ngawih ngawih a, ka ngainain rimtui ka ti em em thung. A taka a thil ziak lai hmuh chhin ka châk tlat pek a, a hawrawp chu ka kut ziak ai paw'n a ṭha a, chhiar a nuam daih zawk bawk. 

Khum hnuaia Box ka dah ṭhat hnu lawkah tukverh a rawn inkhawng ri zeuh a, ka hawi rang teh e! Tukverh ka lo hawng sa dim diam thlap a, thawm pawh kan chhuah tam lo dun hle. Zan hmasaa a tih dan ang bawkin ka room aṭang chuan min pawm chhuak a, leiah min nghat thla mai dawn emaw ka tih laiin a hnungah min awmtir nawlh a, ka lo inring hman bik si lo nen a beng leh a sam chu ka pawt thut nghe nghe. Min puak a duh te chuan sawi ve mai tur hi a nia, thawm ka chhuah ṭhelh hial alawm le.

Kawngpui sira thir ṭhutthlengah chuan kan ṭhu dun ran a, kei chu a mal chungah ka ṭhu zawk maw le, mi duat leh ka ngainat zawnga awm hi chu a thiam ve thlawt a ni. A hriat lawk erawh ka ring miah lo, ka laka a awm dan eng pawh chu ka tan ngainatawm vek a ni ti ila a sual tam lo ang. Kan ngawi dun vang vang a, ka nghawng zawngah a hmai a phum a, min hnim vang vang a, chuti anga ngawi renga awm chu nuam ka ti rih tlat a, ka la ṭawng chhuak duh lo mai mai a ni.

"Eng thil nge min sawipui duh chu ni a?" awkî dam zet hian a ti sup a, inla tâtu deuhin ka kut vei lam chuan a nghawngah ka kuah a, a mitmeng mawi tak chu zanah pawh a mawizia a bo chuang lo. 

"A hmasa ber atan chuan ka tihpalh tih ka sawi duh, i laka ka lungawi loh avang khan ka tihpalh Mazar. Kan inhmu loh chhung khan i lakah ka hel a, nang lah chu i nu dinhmun ṭhat loh avangin i buai em em thung a, nuam ka ti lo teh mai a nia" ka tih chuan a ngawi ta reng a, a ngaihtuah mûk hmel khawp mai. 

"A chang hi chuan min hrilh ve mai la ka ti ṭhin, lehkhathawn pawh ka dawng tawh ngai bawk si lo. Kan inhmuh loh chhung khan i lehkhathawn te kha ka chhiar nawn leh vek a, ka ṭap bawk" ka tih leh chuan min en zawk a, hmun dang a hawi leh nghal daih. 

"Eng vanga ṭap nge i nih?" a aw aṭang chuan min ngaihtuahzia ka hre thei a, thil ngaihtuah ngut ngut ang mai hian a ngawi reng a, a khabe phir lai tak chulin thawk ka la hawk a, a hre reng nge a hre lo lui der pawh ka hre lo.

"Ka ngai che alawm" ka tih chuan min chhoh melh ran a, min kuai kunin kan hmui chu a inbawh thuah zui nghal a, min ngaih thu a sawinaah ka ngai ve hmiah ringawt, a dik ngei pawh ka ring. 

"Thil pakhat sawi duh ka la nei Mazar, tun ṭum chu min hnial suh. Ka nu leh pa inbiakna ka hre thawi a, pawisa pek che an tum a, i nu vang tal paw'n lo pawm hram rawh aw" mak tih hmel deuh tak hian min en nghal a, a ṭang deuh nghal ûtin ka hre bawk. 

"Lakhuih man hian a daih dawn alawm" a tih chuan ka awih chiah lo va, dawt han sawi tur êmah erawh ka ngai ngam bawk si lo, lakhuih manin nu Biaki enkawlna a daih thei tur chu awih a harsa lam hret a ni. 

"Ka rin tâwk chiah, kan puihna i dawn duh ka ring lo reng a ni. A nih chuan i pu puihna dil mai rawh, nu Biaki pa te lam ka tihna a nih chu!" ka ti leh chiah chu rum tak hian min melh a, a mal chung aṭang chuan min hlang thla a, a hmel chu hmuh a nuam lo kher mai. 

"Engtin nge i hriat? Engtin nge khang thu kha i sawi theih?" nêm fahran lo hian a rawn ti hrawk a, tunah chuan a thinrim tak zet a ni tih ka hre ta, min melh dan te chu en rei ngam a ni hlawl lo, keimah ni lo ila chuan engtin emaw tak min ti duh maithei.

"Putea'n min hrilh alawm, in khaw ṭhenawma i patea te lah an harsat lai tak a ni tih thlengin ka hria. Engati nge i pu puihna chu i dil duh mai loh? An awm thei a ni lo'm ni?" ka darah a rawn ṭham nghal a, min melh chiang lutuk chu ka zam vek thei hial. 

"I kâ aṭanga ka nu pa kaihhnawih lam ka hre leh a nih chuan ka lungawi lo khawp ang, a chiang em?" a aw chu ṭum dang ang a ni ta hauh lo mai, hlauhawmna hlirin a khat a, ka dar a hmerna a thlah chiah chu a nâ zui nghal vawng vawng. 

Kawng dawmin a ngawi reng a, van lam hawiin min hnung chhawn a, ka sawi lo tawp tur ka sawi tih ka hrethiam tawh, mahse nu Biaki ka ngaihtuah ve tho bawk si a ni. Pangngai taka thil kan sawi dun theih ka rin laiin thil kal dan a inthlak hlawk thung a, nu Biaki pa a huatzia ka hre chawpchilh nghal bawk a, sawi chhunzawm chu a chi tawh lovin ka hria. A hnung lam aṭangin ka kuah a, a dul zawnah ka kut ka suih a, thinrim tawh lo se ka duh a ni. 

"Ka tihpalh Mazar, ka sawi tawh miah lo vang" ti sepin ka kuah nghet sauh a, rum nghut hian a rawn inher a, ka biang a dawm lai chuan ka lo chhoh en kar a, thinrim hmel tak a pu tawh lo va, chu ringawt pawh chuan ka awm a tinuam sawng sawng nghal.

"Engati nge i pu chu i huat em em tih tal min hrilh ve la Mazar? Ka hriat loh thil tam tak i paltlang tawh a nih ka ring, hre vek thei lo mah ila a ṭhen azar tal chu hriat ve ka duh, ka ngaihtuah tak zet che Mazar" ka tih chuan rawn kun hniam min fawp zeuh a, a thaw chhuak leh ta hak.

"A ṭul hunah chuan ka hriattir em em ang che" tih bakin min chhang lo va, lungawi lo viau dawn mah ila ka thei lo, lungawi lohna chhan tur a awm lo tlat a, hmeichhe rilru no leh rilru kawi tak nih ka duh reng reng lo bawk. 

A ngai tê bawkin min pawm a, ṭhutthlenga a ṭhut rualin a mal chungah min ṭhuttir leh a, zan hun nuam lo tak hman ai chuan putea'n sawi tura min tih pawh chu sawi tawh loh a finthlak zawk a ni. Naute ang maiin min pawm a, a sam chu ka khâl niap niap a, ka inhmuh tirh aiin a lo buk ve tawh a, mahse a inhmeh em em tho. Lu kawlh pawh a inhmeh a, kawlh loh pawh a inhmeh a, a lu ûm lah chu a la nalh phian zui. Ani hi chu engkim inhmeh-a ka ti tawp mai, thawmhnaw thleng hian inhmeh loh a nei ngai lo. 

"Naktukah kan chho dawn" kan ngawi vang vang hnu chuan a ti sup a, hriatthiam loh hmel zetin ka en thuai a, ani chuan min ngaih hmel deuh hian min lo en reng thung a, chuti ang teh thuta an chhoh hma chu ka ring lo hrim hrim. 

"Lakhuih hralh turin naktipah kan lo chhuk leh ang, thil pakhat tih tur ka nei tel bawk a, chu erawh tuna hrilh chi che a ni rih lo" a tih leh chuan mak tihna lam ai mahin hriat belh châkna hlirin ka rilru a luah khat zui nghal a, ka awm dan chuan a tihhlim hmel hle thung. 

Ka biang nûl thuakin min rawn fawp a, amah kar cheh zawngin min ṭhut remtir a, a dûh duh danin che vel mah se kan hmui erawh a la inchar bet nghet hle. Ka thiam ang tâwkin ka lo chhang lêt ve tawn tâwn a, inhmuhna hun leh awm dunna hun thawl ṭha kan neih ve ber a ni a, ka thlakhlelhzia chu hre mawlh mawlh mah se pawi tihna ka nei lo. Min fawh dan thuk leh ril zet avang chuan ka vai ruai a, ka kawnga a chelh lai te chuan engmah ka hre mumal thei tawh lo. 

Ka mawngah a rawn ṭham chiah chu ka zauthau nghal vek a, kan thil tih tum chu eng nge a nih ka hre lo va, hre thei paw'n ka awm lo hrim hrim. Ka ir leh ka khabe te chu a fawp dâwk dawk a, ka âwm thlengin a thleng thla a, tun ṭum chu ka zauthau tak zet tawh a ni. Ni danga kan infawh ang mai mai a ni lo, kan kal thui tih tal chu ka la hre ve ṭawk ṭawk a, ka hmuiah a rawn fawp leh chiah chu ka chawmawlh leh ta vek mai. A tukhum samah ka ṭham tawn tawn a, ka ngaihtuahnaah chuan amah tih chauh lo chu thil dang a awm thei rih lo a ni. 

Ka harhfim meuh chuan kan inthlah fel titih der tawh a, thaw chham dawn ang maiin ka la thaw hlawp hlawp a, he thingtlang tlangval zun ngah uchûak-a hi chuan a duh dûhin min tikawi mah se ka hnar theih ka ring lo. Ka mawng nghahchhan chu a rawn che deuh zawk a, phawk zetin Mazara chu ka en nghal thuai a, thil hre chhuak zawm zatin a mal chung aṭang chuan ka chhuk ta vat vat. Zah lutuk avangin ka hmai a sa vek a, ka beng a sa hut hut bawk a, ka ngaihtuahnaa awm chu a hrethiam vek ngei ngei ang. 

"Kan lut tawh mai dawn em ni ang?" a rawn tih chuan buk khum nghatin a lam ka hawi a, a mita ka en ṭhat ngam loh azarah tum loh deuhih ka hmu duh tawh miah lo ka hmu leh ta, zanin chu zak takin ka mu ngei dawn a nih hi! 

Amah pawh ngaihtuah lêk lovin kan in lam pan chuan ka kal hlawk hlawk a, ka rilruin ka inhau phei mawlh mawlh a, ka kut chu ka sik vak vak bawk. Min ngaihnep phah viau ang tih te chu ka hlau leh lawi a, a hun lai khan dang tur ka ni na meuh mai, mahse ka thei hlawl lo chu a nih kha! Ka tan kha chuan lo hnar emaw lo dan kha a harsa ve thlawt, khati ang em em khan ka rilru leh taksain min tawhna te kha a lo dawngsawng ṭha ang tih rin ngaihna ka hre bik lo a ni. 

"Kal chak lutuk suh" ka bana a rawn chelh rual chuan a ti sup a, kan in compound kan thleng tawh bawk a, thawm dim chu a ngai ta viau mai, a lo berah dar 3 emaw 3 leh a chanve emaw a rik tawh ka ring. 

"Keimahin ka lut thei mai ang, in mutna lamah phei tlang nghal mai rawh" ka ti nghal ringawt a, kan in compound lut tawh mah ila tukverh lam leh kawngkapui lam kan la hlat ang reng a, ka thusawi chu a hriatthiam loh hmel hle leh nghal.

Kan kal zel a, ka room tukverh lam ka hnaih tial tial a, Mazara chu kawngkapui lamah a kal tlang nghal dawn emaw tih laiin min lo zui zel zawk a lo ni a, ka ṭawng buai peih ta lo. Tukverha lawn chhoh ka tum lai tak chuan ka malah a rawn dawm a, ka mawng lam hnaih hretah a la dawm zui a, ka rilru chu a kal dik lo vek tawh. Min puih ngai lova lawn luh mai ka tum kha a nia, zo zet hian min pawm lut leh ta tho.

"Muttui, kal thuai rawh" room chhunga ka din rual chuan ṭawng rin hlau takin ka ti nghal a, a la kal sawn duh lawk lo zui, parda chu ka pawt ri deuh sawk a, min en reng a nih chuan ka zam chhe vek a ni mai. 

Zingah chuan thawh ka hai chiang hle a, zan lamah kan men rei tehreng nen dar 4 bawr velah ka mu pangngai thei chauh a, a chhan erawh sawi tam ngai lovin ka hre chiang hle. Room aṭanga ka chhuah meuh chuan Mazara leh putea pawh an lo tho fel vek tawh a, an mutna thleng thleng chuan a lo inthlep fel dim diam tawh zawk a, nula ûai ve tawh si chuti teh vaka han thawh tlai chu a nuam lo kher mai. Chaw ei hmain College kal turin ka insiam sa a, chaw pawh ei tam ka tum lem lo, ei loh aiah eia kal daih chu ka tum a ni. 

Tukṭhuan ei lai chuan ka pa leh putea an ṭawng deuh ber a, ka nu paw'n a lo tuihnih ve zeuh zeuh bawk a, Mazara phei chu a ṭawng lo tluk a tih theih. Ka pa'n zawhna a zawhin a chhang mai a, a zawh loh emaw betu an awm loh chuan a ṭawng lo hrim hrim. Chaw ei laiin min rawn en leh zauh ṭhin a, kan inhmachhawn bawk nen kan inmelh chiang thei khawp mai. Putea chuan chawhnu lama haw an tum thu a sawi mawlh mawlh a, zan lama Mazara sawi ang ngeiin an lo chhuk leh thuai tur thu a sawi zui nghal bawk. 

Ram lam hnaa an ṭulzia te a sawi a, a bikin Mazara chu a ṭul viau a ni awm e. Lo hal hun a ni tawh a, mi tam takin hal hlawm tawh mah se ani chuan a nu dam lohna avangin a la hal hman lo a ni ber. Vah erawh a vât vek tawh thung a, chung zawng zawng chu putea'n a sawi a, han pui thei ila ka ti ngawt mai. An titi zarah lo vâh thla leh hal thla te ka hriat phah a, thingtlang lam nen hi chuan engtin emaw taka inkungkaihna kan neih ka ring, ka ngaina sâwt em mai. Mazara ni se thingtlang tlangval a lo ni kher bawk si, an ruala chhoh ve daih te chu a nia ka châk ni! 

"I lo sawipui chhin em? I pa lah chuan Mazara nu enkawlna tur pawisa min pe ringawt leh nghal a, Mazara ber hian a la duh lo tlat ang tih a hlauhawm khawp mai" putea chuan a rawn ti a, ka thleng silna bulah a ding a, mi dang chuan min rawn hmu lovin ka hria. 

"Ka sawipui ngei alawm, mahse a duh lo nasa lutuk pute. A mitmenga thinrimna leh huatna kha ka hmu duh tawh lo, ka hlau hman hial zawk a ni. Engati nge a pu chu a huat em em a? Ka hre châk a, ani lah chuan ka zawhin min hrilh duh rih bawk si lo" 

"Nang meuh pawh a hrilh duh loh che chuan i hriat ṭul a la ti lo a ni mai, keia lo sawi theih ringawt a ni lo e. Chu bakah kei aiin a pu nena an inkar chu ama'n a hre chiang daih zawk alawm, i pa'n pe tura min tih pawisa tal hi chu la duh se ka ti ngawt mai" 

"A lâk duh ka ring lo pute, ka nu leh pa inbiakna ka hre fuh a, pawisa pek an tum tih pawh ka hria. Nizan khan ka hrilh lâwk ngei a, a hmelah erawh lâk lam a lang lo khawp" ka tih chuan a thaw hak a, dik tak chuan kei paw'n lâ duh mai se ka ti a ni.

"Eng pawh ni se pek te chu ka'n tum phawt ang a, a lâk duh loh leh ka pe kir leh mai ang che u. Lakhuih kan rawn phurh thlak leh tur hi kan hralh zo a nih chuan a nu enkawlna tur a daih tawh dawn a, tunah pawh hian Sumo leina tura a pawisa khawl sa a hmang ringawt a nih hi!"

"Sumo maw!? Eng nge i sawi awmzia pute?" a thusawi chu mak ka ti hle a, ka thil sil lai chu ka chawlh phah nghe nghe a, putea erawh min chhang lawk lovin sitting room lam a en reng a, a ngaihtuahna a kal thui hmel hle.

"Tuna a Sumo khalh mêk hi lei a tum alawm, nang nena in inhriat hma daihin lei a tum tawh. A neitute lah hian an tito phian a, keini ang khaw tê ah chuan tlawm tê paw'n inpe mah se a awm lutuk asin le" a tih chuan Mazara ka ngaihtuah zui nghal vawng vawng. 

"A nu dinhmun hi ṭha lo thut lo se chuan a lei thei ṭep tawh ang ka ring, a tamain a thawkrim tlâuh tlauh êm mai. A Sumo khalh neitute fapa lah hian a er nasa mai si a, mahse ngaihtuah lutuk duh suh Numam, amah hi ngaihtuahawm a ni ngai lo" tih zawm leh nghalin a kal sawn a, ka thil sil lai sil zawh thuai thuai chu ka tum ta ber. 

Ka rilru a hmanhmawh bawk a, thleng chu ka sil zo ta thuai a, u Vli room lamah chuan ka kal nghal a, mi dang pawh ka mitmei vak ta lo. Room chhungah chuan ka lut a, Mazara chu a lo ṭhu ngawi reng a, bag-ah thawmhnaw a inkhung fel vek tawh bawk. Ka thawm hriain a rawn hawi a, hnaih chilh rawk rawkin ka kuah nghal thlawp a, ka khawngaih thar tak zet a ni. A tuarchhel lutuk te, a harsatna tawh a sawi lo thei lutuk te chu mak tihna lam ai mahin ka khawngaih zawk a, pawisa hawntir ngei ngei chu ka tum ta a ni. 

"Nizana ka thusawi kha i la hria em? Tunah hian putea'n i nu enkawlna tur pawisa a kawl mêk a, chu chu ka pa pek a ni bawk. Khawngaihin pawm hram rawh aw Mazar, i pawm loh chuan i chungah ka lungawi lo vang, ka lungawi lo tak tak ang" ka ti ta mawlh mawlh a, ani ve thung chuan

"I chhungte an lo lut thut ang e" a rawn ti daih a, ka thusawi hre miah lo ang maia a awm tlat chuan ka lung a tiawi lo nghal a, lungawi loh tum sa tawh nen a awm dan chuan min run kher mai, a thu thua awm ka tum tawh bik lo.

"Duh leh an vai paw'n min rawn hmu mah se pawi tihna ka nei hleinem, ka thusawi kha ngaihtuah chiang rawh Mazar. Pawisa i lâk duh loh tlat avang hian i nu i chân daih thei asin, keimah vang tal paw'n lâ hram rawh" melh chho râl paha ka tih chuan ka kawngah a rawn dawm a, ka lungawi lohzia chu a hriatthiam vek ka ring. 

"Ka pawm ni rawh se; a hming chauhin. A ṭul hun tê lovah chuan ka hmang dawn lo va, chung em emah chuan min nawr luih ka ring lo" ti supin a rawn kun hniam a, ka biangah chuan a fawp zeuh a, kawngka a lo inhawng thut a, tal chhuah ka tum rualin min kuah nghet ta suah mai.

"Min thlah thuai teh" tiin a ban lian zet mai ka kawng zawna inkham rûah chu nawr thlak ka tum a, mi dangte hmuh leh hriat pawi tihna nei lo ang maiin lo ṭawng zo chiah mah ila ka zak leh hnuhnawh a ni deuh ber. 

Ka hawi chho chiah chu min rawn fawp nghal a, zahna leh chhungte hriat hlauhna chu ka rilruah a la awm ve teh na meuh mai, mahse min fawhna ril lutuk chuan a va hliah khuh rang si êm. Min thlakhlelhzia min hrilh nawn âwn awn duh ang mai hian a che a, dam raih chungin a duhthaw ru em em tho bawk si, engtin nge a tihtheih ṭhin bik hi ka hre lo, ka hre lo tak zet. Min luah khat a, min pum neih a, a taksa chhunga luh te chu ka châk hial ṭhin, a chhan chu a thlamuanna âng chhunga awm hle hle ka duh a ni. 

"Tu...tu nge? Eng lo....tu nge lo lut khá?" kan taksa a awm hran hnu chuan ka ti phelh deuh phang a, ka ṭawng chhuak hrim hrim chu a inbât kawkalh vek a, ngainatawm zeta min nuih chuan ka lai ang reng hle.

"I pa" a rawn ti chiah chu ka phu zawk a, che chhuak thutin min ka kawng a kuahna aṭang chuan ka tal chhuak nghal a, mahse amah zawk chuan min pawt hnai leh dâwr a, ka awm hlat rei lo khawp. 

"I putea Rintluanga ka tihna" tawi têa nui zeuh hian a ti leh a, a fiamthu tih ka hrethiam ve chiah, ka hlauhthawn hmanzia kha! Ka pa ni tak tak se chuan kan hma hun tur ka sawi lawk thei lo, mak erawh a tih viau ka ring. 

"Vawiin chu College ka kal peih lo ê, in haw chho daih dawn bawk si a, kal ang deuhin ka chhuak ang a, ka lo haw leh daih dawn" inla pangchang ru deuh chuan ka ti a, a nuih ka rin tehreng nen a nui leh duh tawh der lo.

"Zirna ka ngaipawimawh tih i la hriat reng ka ring" a hmel chu a thutak nghal run a, fiamthu rilru deuhin ka sawi ve tak na a, min en dan ren run chuan ka nuihzatna te a tireh vek a, ka ner khum ta ringawt. 

"Ka hre bawk e aw, nimin kan test-na ah pawh ka thiam vek, ka chhang dik vek ngei ngei ang. Vawiin chu College ka kal peih lo tak tak a nia Mazar, ka lo thlah ang che u" ka ti leh nang nâng a, a bulah hi chuan naupangchhia zeta ṭawng leh awm nuam ka ti tlat ṭhin.

A ngawi ta reng a, College kal loh chu a phal ni turah ka ngai hmiah. Room aṭang chuan ka chhuak a, ka chhungte hmuh lai chuan College kal tur ang deuhin ka chhuak a, ka kal thui hman viau nghe nghe. Kawng chanve vel ka kal thlen chuan ka biru deuh reuh a, hawi kual zek zekin kan in lam ka pan a, tûma'n min hmu lo hlauh. In ka thleng a, exam tura u Duhawmi a chhuah daih tho avangin kan zalen ta phian a, putea paw'n min hrethiam dun khawp mai.

Chawhnu lam dar 1 leh a chanve velah an haw a, zep lovah chuan an ruala chhoh ve nghal daih chu ka duh tak tak, mahse a chi ngawt bawk si lo a ni. Ei rawng ka bawl laiin ka chhungte an lo haw a, engtin vak mah min be lo va, kei paw'n ka be lem chuang lo. College kal ang thlapin min ngai ngei awm si a, ka awm dan dik tak leh Mazara nena kan inkar chu hre ta se engtin nge an ngaih ang le, min duhpui lo viau ang tih chu ka hlau ngawih ngawih, Mazara chu an iai ang tih mawlh ka hlau a ni.

Khuma ka mut der der laiin Mawitei nen kan inbia, kan ṭhianho zinga ka hran tâk thu leh an zinga ka awm tam loh thu te a sawi luam a, a sawi dik vekin ka hria. Mazara nen kan inngaihzawn hnu aṭang hian ka hrang sâwt em em a, a hma zawnga lo nghak ziah ṭhin leh an bula awm loh hlau reng reng phili ṭhin khan ṭangdang ka belhsan a, ka ṭang va belh lah chuan min lo hip bet tlat a, min thlah hnu paw'n a zunin min phuar zawm zel si a, ṭhiante ai ngawt chuan ka ngaina zawk a ni mahna. 

Zanriah kan ei laiin Mazara chanchin chu ka pa'n a rawn sawi chhuak hlawl a, ka nu'n a sawi zawm nghal bawk a, kei erawh ka ngawi kar thung. Ṭawng ve chi ka ni lo hrim hrim, ka ṭawng sual palh ang tih a hlauhawm tlat. U Duhawmi tak ngial paw'n a sawi ve a, mak ka ti hlawm kher mai. Mazara an khawngaih thu hlir leh tlangval fel tak a nih thute chu an sawi liam liam a, ka rilru chu a lo hlim ru veng veng thei. A chhan chu ka nu paw'n a fak tlat a, a sawi tui ber berah a ṭang a, an iai rinna aiin an iai loh rinna chu ka rilruah a tam ta zawk bawk. 

Zan mutnaah chuan amah ka ngaihtuah rauh rauh a, ka ngai viau dawn a, ngai ru em em chungin ngaih loh chu ka tum lui tlat thung. Naktuk maiah an lo chhuk leh dawn a, amah ngeiin min hrilh a, dawt a nih ka ring hauh lo. Phone tal te chu nei se kan inbe thei awm si a, mahse phone nei tura nawr luih ka tum lo, ṭul a tih hunah chuan nei mai turah ka ngai. Ka mut dawna ka ṭawngṭainaah chuan nu Biaki tan te ka dil a, amah Mazara tan tak pawh ka dil tel a, him dam taka Aizawl an rawn thlen theih nân ka dil nasa hle a, accident an tâwk ang tih ka hlau ru khawp. 

A tukah chuan College ka kal a, phur tak tê hian ka phur a, kan zirlai pawh ka ngaihtuah thei meuh lo. Kei khawpui nula, chhungkaw awm thei tak aṭanga seilian leh duh duha awm thei hian hmeichhe dang ang lo takin thingtlang tlangval ka ngaizawng tlat chu a ni si a, chutah kan la inupat hleih viau zui. A zunin min phuar a, phuar satliah mai ni lovin min vêt nawk nawk ni berin ka hria. Mazara kum zat tak hi ka la hre miah lo va, mahse kei chuan a upa fê dawn tih ka hre thei, a chhan chu u Duhawmi ai paw'n a upa tlat a tin ni! 

College kan bâng a, ka ṭhiante nghak khawmuang lovin ka haw tlang nghal a, Hlimpuii emaw Mawitein min rawn biak leh ngei ka ring. In ka thlen rualin Mazara ka zawng ru nghal a, ka hmu leh ta mai lo. Putea chu ka hmu tawh ngei a, kan in kawt vel chu a thlithlai vel a, u Duhawmi pawh a awm bawk. Mazara chu a lo chhuk ve lo ang tih ka hlau thar em em a, room-a ka luh te chuan ka ni nghulh mai. A awmna putea zawt turin pawn lamah ka kal a, ani lah chuan nui miah lo hian

"Lakhuih kha kan hralh zo hma phian a, a haw chho ta a nih kha!" a lo ti awlsam mai leh nghal a, chu thu ka hre zet chu ka hnual vek thei, ka dinna ngaiah ka ding ngawi reng a, ka thil en ngai ka en tlawk tlawk bawk. 

"Numami ṭhin tak hi chu âw.....khatia lungngai nghal mai lo khan in bathroom te va en ve ta che maw le, Mazara hian a dawhtheih viau turah che ngai phawt ila" amah bawk chuan a rawn ti leh a, a hmel ka en chuan a lo nui sun sun a, in chhung lamah ka tlan lut rang hle. 

Bathroom kawngka chu nam hawn ka tum a, chhung lamah a lo inkalh tlat a, tu dang an awm ka ring ta lo; Mazara tih chauh lo chu! Bathroom piah deuh ṭhutthlengah chuan ka ṭhu ren rawn a, ṭhutna pangngaiah pawh ṭhu lovin a bânah ka ṭhu a, min tibuai hneh ṭhin lutuk hi chu a mak ve ngawt mai. Ka nunphung thlengin a chawk buai a, ka ni hman kawngah ni se thu ber ang ziazângin ka mood ṭhat leh ṭhat loh chu amahah a innghat tlat tawh a, mipa dang nen chuan tehkhin rual loh a ni e. 

Bathroom kawngka a rawn inhawng chiah chu ka hawi phei nghal thuai a, Mazara hmel ka hmuh rualin ka nui a, ani erawh a nui lem lo, mahse min hmu chu nuam a tih ve tho ka ring. A enga mah hmain ka va kuah nghal ringawt a, A âwm ruak kâng leh poh ârh chuan min ur a, kawr chhan aiin a lum nuam daih zawk. Ka awm hran hnu chuan ka awm dan vel chu ngaihtuah lêtin rilru ka sêng a, mawi lo tihna nei ru reng mah ila keimah leh keimah chu ka inthiam chawp ta tho va, ka rilru ang chu pu se hmeichhe dang pawh an insum thei bik miah lo vang.

Room-a ka awm laiin Mawitei chuan min lo be ta ngei a, a hnu lawkah Hlimpui hnen aṭang zilhna leh zawhna chi hrang hrang chhan nghal theih mai loh ka dawng ṭeuh a, ka ṭhiante pahnih lakah chuan ka inthiam lo ve reng. Mazara nen kan intawn hmain khati khawp khan kan inkawm nasa a, khawiah pawh kal ila kan inzui ngei ngei zel, mahni chauhin kan kal ngai lo. Tunah erawh keimah ka danglam ta ber a, ka danglam chhan chu hrilh mai châk chang ka nei thut zel a, mahse a hunin ka la hre si lo a ni.

"Hello" pangngai tak chuan ka ti a, number lawng tawp aṭang phone call ka dawng ringawt chu mak ka ti a, lâk loh phah nân erawh ka hmang chuang lo va, thil pawimawh a nih ka ring ve tawp.  

"Lo chhuak la" rawn ti thum dam daptu aw ka hre chiah chu ka buai vek a, phone chu ka en nawn phah nghe nghe a, number lawng mah ni se tu nge a nih ka hre chiang lutuk tlat, amah Mazara ngei a ni. 

Room kawngka aṭanga chhuak lovin khum bul tukverh aṭang chuan a zuanin ka zuang chhuak a, ka tla sual teuh hle leh nghal. A bul ka va thlen chuan a kutah phone a lo hum ran a, ka lawmzia chu ka sawifiah thiam lo. Kuah nghal chawng chawng ka duh rum rum a, mahse kan dinna a ualau ang reng a, in hnung lamah kalpui hmasa tê têin ka kuah ta chauh. Zawhna ka zawh mawlh mawlh laiin min rawn fawp a, ka ngawi chiang hle.

Tlantea hnen aṭanga ka phone number a lâk thu te, vawiin lama phone a lei thute leh haw chhoh leh vat a ngaih thute chu a sawi a, zawhna ka zawt hnem ve êm bawk a ni. Ka lawm viau rualin a nu dinhmunin chhiat lam a pan thu erawh chuan min tihnual ru ve tho va, mahse hlimna chuan ka rilru a luah khat hneh zawk tho. A chhan chu haw chho mah se phone kaltlangin kan inbe zel thei tawh dawn tlat a, kan inbiak theihna a nih dawn phawt chuan Balance pawh vawi tam thunsak ka huam a, a duh dawn chuang lo tih erawh ka hre chiang hle thung.

A phone lei chu ka en chhin vel a, ka rin lawk ang chiahin keini phone anga ṭha a ni hauh lo. Mi dang nena inbiak theihna leh SMS thawn theihna a ni mai a, Games te chu awm ve teh mah se Snake Games vel bak a awm lo. Ka hmuhsit phah lo va, ka en hniam phah lo va, kan inbiak theih tawh dawn miau avangin ka lawm ngawih ngawih zawk a, keini pahnih tan chuan phone call leh SMS kaltlanga inbiak theih bak baka ṭha a awm chuang lo. 

Zan lamah erawh a ngaite bawkin kan awm dun leh ta tho va, a tuk maia chho leh tur a ni a, inthlahlel tawn takin chet la dun mah ila zan hmasa ai ngawt chuan a che FET lo deuh. A thu hrimah thil reng reng hi a tâwk chiah a hre reuh ṭhin ka ti, min fawp se a ngawl vei ang maiin min siam thei a, a kut hrawl takin ka taksa zut se mamawh ngawih ngawih ang mai hian ka lo dawngsawng ṭha leh bawk a, a tâwk chiah a hre leh lutuk hi chu kei ang hmeichhia; a zunin a phuar beh tlat tawh tan hi chuan danglam loh theih loh a ni ṭhin. 

Zan kan hmang ral a, chawhma lamah an khaw lam panin an chhuak ta thung a, phone chu kan hmang ṭangkai chho ṭan khawp mai. Vawi 5 chu kan inbe tling tawh ngei a, keimah zawk hlirin ka call hmasa a, ama'n min rawn call lo mah se kan inbiak tho avangin pawi tihna ka nei lem lo. An thlen tluan leh tluan loh te ka zawt a, ani paw'n ṭha takin min chhang ve mai zel. Kan inbiak apiangin nu Biaki dinhmun chu ka zawt ṭhin a, a sawi dan chuan a ṭha chho telh telh a nih hmel a, enkawl erawh a la ngaih hmel viau tho.

Zan khat chu ka call a la thei reng reng lo mai a, chhun lama ka hun hman dan hlimawm zet hrilh tum ka ni a, mahse a la thei tlat lo va, mak ka ti khawp mai. Ka call reng reng hian lâk loh a nei ngai lo va, rei inbe ngai lo mah ila kan inbiak hrim hrim hi chuan ka chaw ei thlengin a tui sawt zel. Tun ṭum erawh vawi thum ka call paw'n a la thei lo va, lungawi lohna em em ka nei hran lo. A buai emaw hmun dangah phone a dah rih a nih ka ring mai a, chutia ka ngaihtuah kual lai vel chuan Tlantea hnen aṭang zawk phone call ka dawng a, ka la rang teh e!

Ka lâk rual chuan kan inbiak khât thu leh zin chhoh ka châk leh tawh thu ka sawi nghal melh melh a, ṭawngna hun ka pe lo a ni ber. A hnuah chuan a rawn ṭawng ve ta a, thu tam a sawi miah lo, mahse a thusawi chuan min ṭhawngin min va deng chiang si êm. Ka ngawih vang vang avangin kan inbiakna chu amah zawkin a  hmet tawp a, khumah ka ṭhu thla hnawk a, ka tawn ni miah lo mah se ka thinlung chhung chu a nâ vawng vawng thung.

"Mazar" tiin ka phun sep a, a hmel te chu ka mitthlaah a rawn lang zut zut a, zep lovah chuan ka nâ a ni.

(End of Chapter 24)