SUMO DRIVER By Havali Adam (CHAPTER 23)

SUMO DRIVER 

By

Havali Adam

Chapter 23

Zing khua a lo var a, zan lamah boruak nuam tak ka hip hnuhnawh kher bawk nen ka mood chu a fuh cher cher hle. Ka thawh tirh aṭang Mazara hmel erawh ka hmu miah lo va, putea hmel pawh ka hmu chuang lo. Kan tho kim vek tawh a, mahse inah chuan kei leh u Duhawmi chiah kan awm rih thung. Ka pa motor pahnih chu in kawtah a la inhung thlap ve ve bawk si a, an lêng chhuak lawk a nih ka ring ta ber. An lo haw ve leh mai ringin ei rawng ka bawl ta daih a, thingpui pawh ka lum pah nghal bawk.

U Duhawmi nen zing thingpui kan in laiin ka pa te chu an lo haw a, mahse Mazara hmel ber hmuh tur a awm miah lo. Putea leh ka pa chuan nui hak hakin thil an sawi a, lakhuih leh nimbu hralh chungchang vel an sawiin ka hria. Thingpui ka siam a, ka nu pawh ka siam kep nghal a, dar zat ka en chuan a lo tlai chak ang reng hle. A bikin ka nu hi Bank lama thawk a nih avangin kal hma a ngai ṭhin a, ka pa erawh a thu pawl a ni tawh a, a kal hma lutuk ngai lo.

Chaw ei ka siam lai thlengin Mazara hmel awm reng ka la hmu lo tluang zel a, putea chu zawh tawp mai ka duh a, mahse hun a awm thlawt lo a ni. Tukṭhuan ei lai te chuan ka pa'n a titipui char char a, Mazara chungchang lam an sawi ri zeuh zeuh bawk. Mazara hming a rik tawh hi chuan ka beng ka lo chhi ru kar zel a, engtik lai paw'n ka ngaihtuah em em ṭhin. Zan zanah an lo thleng thla a, chaw ei lova a awm ringawt tur te chu ngaihtuah tak ka ni. 

Chaw eina vel ka seng fel hnu chuan College kal turin ka insiam a, ka phur lo ru kher mai. Chawl ringawt dawn ila chawlh chhan ṭha tak sawi tur ka hre bawk si lo va, ka chawlh vaih chuan an hrethiam nghal a ni mai. Kan in chu ka kal pel vek tawh a, mahse ka rilru a nuam thei ngâng lo va, ngawi rengin ka lêt leh ta hna hnâ ringawt. In chhung ka luh rualin putea ka zawng nghal a, hna kal tura ka pa insiam lai tak a nih avangin an awm dun lo hlauh e.

"Pute, ka be lawk duh che" ka tih chuan a lo bu zeuh a, pawn lamah ka kal chhuak a, ani paw'n min lo zui ve zel chuan ka hria, kan in hnung lamah ka dinpui a, ualau taka thil sawi dun chu a fuh ber lo a ni.

"Engati nge Mazara hi a rawn haw ve loh? A buai viau em ni? Khawiah tak nge lakhuih chu a pek dawn?" tiin zawhna chu ka zawt nghal mawlh mawlh a, ngaihtuah loh theih pawh a ni lo, ka ni hman dan tur thlenga nghawng nei thei a ni tlat. 

"Buai ve ang reng e, puih ka tum paw'n a duh miah lo leh nghal. A chang hi chuan a buaithlak lek lek zel, a nu dinhmun te kha i lo hre ve tawh em?" a rawn tih chuan lu ka lo thing a, ngaihruat dan tur pawh ka thiam lo. 

"A hrilh lo che tih ka hrethiam nghal mai, Aizawla kan lo chhuk chhan ber hi a nu dinhmun vang alawm a nih, tunah hian Mazara nu hi damdawi ina enkawl mek a ni" a ti chiah chu ka meng phawk hle a, hamhaih tak ka ni. 

"Eng...engtin nge a nih theih? Engati nge nu Biaki chu a dam loh thut?" mawlmang zet chuan ka ti hluai a, chu bak sawi tur ka hre tawh rih lo, ka rilru chu mak tihna hlirin a khat a, inthiam loh rukna ka nei zui nghal bawk. 

"TB a lo vei reng a, Doctor te paw'n an hriat chhuahna a la rei lo. Sumo pawh Mazaran a khalh lo vang vang alawm, in inhmuh khât phah viau zawk ang chû, engmah a hrilh lo tak tak che em ni?" a zawhna chu ka chhang thei lo, tunah chuan Mazara khawngaihna hlirin ka khat tawh a ni. 

"Pathian zarah eng êm a thleng lo turah ngai phawt ila, keini lah chuan sumfaia puih dan kan hre bik bawk si lo va, a nu pa te lam puihna dil tura ka tih lahin a duh der bawk si lo" a thusawi zawng zawng chu ka bengah a lut vek a, mahse thil dang ka ngaihtuah tlat a, ka hre rei lo hlawm khawp mai.

"A nu pa te lam puihna dil tur chuan nangmah hian ráwn chhin mai te che Numam, i sawi leh keini sawi chu a danglam daih maithei a ni. Kan khaw ṭhenawma a patea paw'n an pui tawh a, mahse an lo harsat lai tak a ni bawk si a, heti hian lakhuih hmangin sum hmuh dan a dap tawp a nih hi!"

"Ka...ka hre lo...Ni lo, ka lo kal ang. Mazara bulah ka lo kal ve dawn pute, lo hrilh rawh aw, rei lo tê chu College-ah ka awm ang a, ka rawn kal dawn tih lo hrilh ngei ngei rawh" ka ti phawlh phawlh a, ka ṭawngkam chhuak chu a tluangtlam lo hle.

"Zirna tibuai khawp chuan lo kal lo la ka duh zawk, zan lamah pawh i hrilh thei reng alawm, a hmanhmawh thlak lutuk hran hleimem Numam. Chu bakah i chhungte hian in inkar an la hriat hmel bawk si lo va, lo kal lo zawk mai rawh"

"Ka rilru ka siam fel tawh pute, ka lo kal dawn ka ti tawh a, ka lo kal ngei bawk ang. Mazaran a phal dawn lo tih ka hria, mahse ka lo kal dawn tho tho" luhlul zet chuan ka ti a, gate lamah ka kal ta vang vang a, Test nei dawn lo ila chuan College ka kal miah lo vang.

College chu ka thleng a, ka ṭhutpui te an ṭawng mawlh mawlh laiin ka ngawi kar thung a, ka kut chu ka hum ruh hle bawk. Ṭhenkhat chuan test tur an chhiar ri nuai nuai a, rilrua thil dang awm tlat tan chuan test tur ennawn loh law law chu a fuh zawk a ni. Rei lo tê hnuah zirtirtu a rawn lut a, paper a rawn sem chuan ka lo la vat a, question paper ka en chiah chu ka thiam sa vek ni mah se chhan kim loh ka tum ran thung. Ka rilruah Mazara leh a nu hlir an awm a, ka thil ziak reng reng chu hmanhmawh ru tak ka ni. 

"I zirna lama hma i sawn chuan ka lawm dawn tih hre reng la, ka lawm loh zawnga i awm duh ka ring lo, ṭhahnem ngai tak zelin le" tih thu chu ka bengah a rawn ri nawn tluk tluk a, chu thu chu Mazara hnen aṭanga lehkhathawn ka dawnah a inziak a, phur loh chang pawha min tiṭangtu ber a ni ṭhin.

"Nangmah vang chiahin ka chhang kim ang" tiin ka rilru chu ka siam fel hnuhnawh leh ta zawk a, dik tak chuan dah thuai thuaia kal daih ka tum hman tawh tak tak a, ka rilruah thil dang lo lut leh lo se chu ka chhuak vang vang tawh ngei ang. 

Question zawng zawng chu hmanhmawh rilru zetin ka chhang a, ziah kim loh erawh ka nei miah lo thung. Ka hmanhmawh mah mah te pawh a ni ang a zo hmasa berah ka ṭang a, kan zirtirtu phei chuan ka chhuak nghal a phal lawk lo va, ka Answer paper chu a en thuak thuak a, ka chhan kim leh kim loh a en ni berin ka hria. Min en chunga a buk zeuh rual chuan a tlanin ka tlan chhuak nghal a, mak an tih viau pawh ka ring.

Kan College thlang lawka Taxi lo ding chu hmangin Bazarpui lamah kan tlan phei nghal a, Taxi Driver nen kan inbe miah lo te chu ka lawm letling zawk, min bia pawh ni se mumal takin chhanna ka pe thei dawn lo tih ka chiang em em a ni. Kan tlan chhung chu rei ka ti hle a, kei ka lo hmanhmawh bawk si nen tlan chak tura hrilh chu ka duh hial a, mahse a tawpa tawpah chuan Bazar chu kan thleng phei ve ta hram. 

Taxi chuan man ka pek hnu chuan thlai zawrhna lamah ka kal thla nghal a, ka mi tawh ṭhenkhat te phei chu han nek sawk sawk ka nei a, hmanhmawh lutuk chu a ṭha lovin ka hre ve leh ta deuh. Muangchang fahran lovin ka kal a, zawl ka thlen chuan Mazara emaw putea hmel ka la hmu mai lo zui. Thlai zawrhna chhungah lutin Mazara zawng chuan ka kal kual a, hawi sawn chhen pahin ka kal zel a, Mazara ni lovin putea bawk chu ka hmu hmasa zawk leh ta. 

Va pawh nghal mai ka tum a, putea bula ka pa lo ding reng ka hmu chiah chu ka kal tawp chiang hle. Ban phenah chuan ka ding ta reng a, ka pa leh putea chu an inbe mawlh mawlh a, ka pa chu kal thuai thuai se ka ti ngei mai. Ka bul lawka pitar ṭhutna bulah chuan ka ṭhu thla ve leh ringawt a, ka dinna lamah ka pa a rawn hawi miau a, min hmuh vaih chuan zawhna a ngah khawp ang. Chhan dan tur ka hre mai dawn si lo va, min hmu lo law law se a ṭha zawk a ni. 

"Numam" min kotu lam chu ka va han hawi phawk tehreng em, chutah ka rin loh deuhin Mazara a lo la ni zui a, putea te lam chu ka thlithlai hmasa leh tê tê a, ka ding ngam ve ta chauh. 

"Khawiah emaw min kalpui teh Mazar, inbiak kan ngai, inbiak ngei ngei kan ngai" tia nawr kal ka tum chu a sak tlat a, kan piah lawkah ka pa te an awm bawk si a, muangchan chi a ni hauh lo, pitar pakhat pawh chuan min en tawn zak zak mai.

"Eng nge hetah i rawn tih ve?" a zawhna chu chhan tumin ka âng zuau a, hmun danga chhan atan khekin ka pawt ṭawng ṭawng a, a rawn kal ve ta hram e, a kal muang vel lutuk chu a ṭul hlawl lo. 

"Hmanhmawh ang Mazar, zawhna in zawh hun a ni rih lo. Hmun fianrial deuhah min hruai lawk teh, sawipui tur che tam tak ka nei" ka ti mawlh mawlh a, a kut thap hrupah chuan ka chelh ran bawk. 

"Hmun fianrial a awm lo" ti deuh hmukin ka kal zel tur chu min pawt ding a, pawh kal tum ve teh mah ila thei lo nasa tak ka ni, ka pa te hmuh theih lohna chinah kan ding tawh hlauh zawk a, kal sawnpui ṭâlh chu ka tum lo ta ringawt. 

"Haw ang che, he tah hian tih tur i nei lo. Zan lamah hun thawl a tam, sawi tur i nei a nih paw'n zanah kan sawi dun zawk dawn nia" a ṭawng tir lam chu nelawm lutuk lo mah se a tawp lam erawh a dam dap thung. 

"Min hnial suh Numam" ṭawng tuma ka ân zuau lai chuan a rawn ti leh nghal a, a aw chu a nghet ṭha charh charh viau a, kei pawh ka ṭawng leh ta lo, inbiakna hmun tur fianrial deuh hlek awm se chuan inbiak a pawi miah lo, mahse kan awmna hmunah chuan mi dang an tam mah mah a ni. 

Mazara kal phei nul nul chu ka thlir reng a, putea chuan eng emaw ni a lo hrilh a, ka pa erawh ka hmu tawh lo, a hna lamah a kal tawh a ni ngei ang. An bula va kal phei chu ka tum deuh a, min thinrim khum hrep ka hlau bawk si a, ka phei leh ta lo. An hmuh theih lohna chin aṭang chuan ka thlir reng a, lakhuih chu an zuar chiah paw'n ka hre lo. Mazara chuan buara bag-in a thiar char char a, putea'n mi dang a lo pe zung zung bawk a, mahse lakhuih chu a la ṭhahnem ang reng a, ka huphurhpui hle. 

Dar 12 velah chuan ka ril a rawn ṭam a, ka awmna chu a ninawm lek lêk tawh a ni. Mazara te pawh an lakhuih chu a kâm ve dûak tawh a, zep lovah chuan ka khawngaih tak zet. Ka pa hnenah sawiin puih an ngaihzia chu hriattir ka tum rilru hial a, amah Mazara bawk ka ngaihtuah avangin ka tum chu ka ṭhulh leh a, keini puihna chu a duh dawn lo tih ka chiang êm a tin ni! 

Ei tur order turin dawrah ka lut a, mahse ka ei tur chiah ka order lo thung. Tui thlengin ka inlei bâwr ṭûn a, min thinrim khum dawn mah se tun ṭum chu ka tih tur ka puitlin ngei a ngai a ni. Putea nena an ṭhut hahchawlh lai chuan an lam panin ka phei a, hah awm tak pawh an ni e. Mazara ngat phei chu a hah ngawt ang, khati khawp khan lakhuih a pu kual nasa a, chhiahhlawh ang maiin hna a thawk a, ka tan chuan khawngaih loh theih a ni lo. 

Pen sawm vela an ṭhutna bul ka la thlen phei loh lai chuan min rawn hmu ta, putea chu nuih zeuhin Mazara ngawr ngawr ka en a, lungnih lohna emaw thinrimna nei hmel a pu lo va, a hmel chu a dam raih zawk a ni. Putea chuan ka thil ken chu min lo lâk ṭhen sak a, Mazara chuan min la en reng tih ka hria, ka en lêt duh ta lo thung. An ei tur chu ka hawnsak a, a in-pack vek avangin ei a har deuh maithei a ni. 

"I haw lo a" a kuta ei tur ka ngah rual chuan a lo ti sup a, a aw chhuak chu a pangngai hle a, nui sen senin a eina tur fian chu a kut leh lamah ka rawlh lut leh a, putea erawh buaipui ngai lovin a lo ei mial mial tawh thung. 

"Ei ang u, kei pawh ka ril a ṭam tawh lutuk, mahse nangni ang em em chuan ka hah ve chuang lo, ka ril a ṭam ve tawp" nui var vara ka tih chuan putea zawk a lo nui hawk hawk a, fiamthua sawi ka ni lo va, ka rilru dik tak zawk a ni. 

"Ei rawh Mazar, tho te khan an bawm vel ang e" ka tih leh chuan min en reng chung hian a bu zeuh a, chau hmel a pu lo hrim hrim a, hah hmel pawh a pu chuang lo, a hahdam hmel viauin ka hre ta zawk. 

 

"Vala chu i tha a ṭha hle mai a, i kal kual nasat azarah pawisa pawh i hmu ṭeuh tawh dawn a nih kha le" kan hma lawka bawkbawn zuar nu pakhat chuan a rawn ti hlawl a, a thusawi chu a dik chiah, kal kual ngun lo se chu an la hralh tlêm ngawt ang. 

"Ni ngawt mai hei, min awl hneh leh lutuk a, ka tan pawh a nuam hleinem le" putea chuan a lo tih zawm ve leh nghal a, Mazara nen chuan kan ngawi reng a, ani ang mipa lian tan chuan a thil ei chu a tlêm mah mah maithei a ni.

"Ei tur ka han lâk belh ang aw, i kham lo palh ang" tiin ka tho zui nghal a, ka kal sawn hmain ka banah a rawn chelh chat a, a lam ka hawi chuan lu a lo thing a, a tlawmngai tih ka hrethiam mai. 

"Kei hi vala ka'n ti ngawt pek che a, i nupui em ni? Nupa in lo ni reng zawk lo maw? Thil ngaihtuah chian hma hian ka rilrua awm sawi chhuah ka ching lutuk a, sim vat a ngai" bawkbawn zuar nu bawk chuan a lo ti leh a, ka va han lai mai mai tak! 

"Teuh lo mai, nupa kan ni hleinem ka pi" ka ti nghal zung zung a, ka thil ei lai chu ngaihsak pawh ka ngaihsak tawh lo, nupa kan nih an lo ring ringawt chu a mak ve êm alawm, min tihamhaih vek a ni ber. 

"An la ni maithei a ni" putea bawk chu a rawn ṭawng chhuak leh a, nur nângin ka en nghal vat a, min lo nuih sun sun a, min chhaih laih dan a thiam si, Tlantea nen an inang ngawih ngawih, pafa ni awm reng pawh an lo ni e. 

Ka ṭhutna ngaiah chuan ka ṭhu thla leh ringawt a, chhan dan tur ka hre tawh lo tlat a ni. Mazara chuan ka ban rêkah a la chelh reng a, a thil ei lai chu ka en a, a puar ka ring hlawl lo. Lak belh ka tum lahin a phal bawk si lo va, a chang hi chuan tlawmngaih leh lutuk pawh hi a ṭha ber chuang lovin ka hria. Thil sawipui tur ka ngah a, sawina hun erawh a awm lo tluk a ni. Kan thil eina chu bawlhhlawh bawmah ka paih leh vek a, Mazara chuan haw turin min duh leh tawh hmel hle a, mahse haw ka tum lo bur. 

Ka tih tur hre lo chuan lakhuih chu ka chhiar diat diat a, pum 30 vel chiah a lo ni tawh a, ka chhiar kim lo maithei bawk. Mazara chu a phal lo chung ka pui ta ngei a, mahse ka pui nêp khawp mai. Buara bag-ah lakhuih ka khung luhpui a, mi chuan min en hrek hrek ṭhin a, ka zak duh teuh lo. Kan inchei dan a inthlau a, kan lan dan pawh a inthlau hle a, hnathawk leh College kal chu kan inang thei lo hrim hirm. Min en zui vawng vawngtu te lakah chuan zahpuina ka nei lo va, duh ber te bula chet tlât nawmzia chu an la hrethiam ve lo a ni ngei ang. 

Putea chu nimbu pein hmun dangah a kal ve thung a, kei leh Mazaran lakhuih lam kan buaipui mial mial a, kan awmna ualau viau mah se nuam ka ti ru hle. Lakhuih pua Mazara a kal liam hnu lawkah Sir Francis-a ka hmu hlawl a, hmeichhe pakhat hi a kai bawk a, chu nu chu ka hmuh tawh hnu kha a ni thânin ka hria. A hmuh theih lova kal sawn ka tum lai takin min rawn hmu fuh hlauh mai, tih ngaihna a awm tawh miau loh avangin kal sawn chu ka tum chhunzawm ta lem lo. 

"Eng nge he tah daih daih i tih Numam? College i kal lo em ni? Kal tur i ni asin, eng nge i tih reng reng?" a zawhna chu ka chhang peih lo kher mai, a bula mi chu eng emaw a hrilh ru zeuh a, chu nu pawh chu a kal sawn ve nghal mai bawk.

"Eng lêm mah" tih chauhin ka chhang a, ka ṭawng tam peih lo pawh a ni lo, mi dang chu ni se ka chhang ṭha em em ang, mahse min betu chu Sir Francis-a a ni miau a, a zak lo ta lutuk te chu ka ngei tawlh tawlh. 

"Thil pawimawh tih tur i neih hmel si lo va, ka va thlah ang che chu, lo kal rawh" tiin ka banah chuan a rawn hmer ringawt a, ka phih thla nghal sawk a, en pawh en rei duh lovin ka hawi sawn ta hmak. 

"Lo kal rawh le" ka ban rêkah bawk chuan a rawn chelh leh a, lem zeta min nuih vur vurin min kai kal dawr dâwr a, mipa a ni bawk si a, ka hneh lo nasa hle, mi veivâk leh Bazar te chuan min en duh khawp mai. 

Bus Stand lamah chuan min kai chho zel a, a chelh lohna lamin a ban chu ka chum a, a chang leh ka sik thul, awmzia pakhat mah a awm chuang lo. Mazara ka ngaihtuah chhuak a, min rawn hmu hlauh se ka ti ngawih ngawih. Ani chuan min chhan ngei dawn a, ka duh lo chunga min kalpui dawr dâwrtu chu a en liam mai mai ka ring lo bawk. Kawngpui pangngai kan hnaih chho zel a, ka rilruin Mazara ka ko mawlh mawlh a, ka kut dinglam rawn chelhtu an awm rual chuan ka hawi lêt rang hle.

"Mazar!" ti tham ṭiakin a mitah tak chuan ka en reng a, min kal pel deuh vutin Sir Francis-a ban chu a va vuan a, Sir Francis-a pawh mak tih hmel zetin a rawn hawi lêt a, Mazara chuan ka kut a chelhna chu a pawt phelh ta sawk.

"A tu chu nge maw i niha mi inkai ṭha mai mai lai i rawn tihbuai ngam le" tiin Sir Francis-a chuan rum zet hian a melh a, Mazara erawh ngawi rengin ka lam a lo hawi daih thung a, a hnunga thinrim taka ding chu a ngaihsak duh der tawh lo. 

"I ṭha em?" ti supin Mazara chuan ka dar tawn tawnah a chelh a, nui lui zeuhin ka lo bu nghauh nghauh a, min kalpui a tum lai takin Sir Francis-a chuan a rawn kuai her a, kan boruak chu a ṭha dawn lovin ka hria. 

"Eng vangin nge ka bialnu kaih lai i lo kaih sawn ve ringawt? A zah pawh i zak lo emaw ni le, ve khanglang che chuan!" Sir Francis-a chuan ka kut pakhat zawk chu lo vawn a tum a, Mazaran min din hliah rang ang reng khawp. 

"Nang teh hrep hi! Ka hmuh hnu i ni chiang mai, mi inkai ṭha lai mai mai lo buaipui ve chiam tur i ni lo, dikna pawh i nei lo" ti leh lawng lawngin Sir Francis-a chuan a kut a hum ruh hle a, ka lo zak ru vawng vawng. 

"He pa nen hian eng nge inzawmna in neih? A thusawi hi a dik em?" Mazara chuan min melh chhuk run a, thinrim hmel a pu chuang miah lo chuan min ti hamhaih letling a, lungawi lo hmel a put ka ring a ni ber. 

"Dik lo, ka bialpa a ni lo va, ka ngaihzawng pawh a ni lo. Ka ngaihzawng neih chhun leh awm chhun chu nangmah chiah, nangmah chiah Mazar" insawi thiam tum ang mai chuan ka ti mawlh mawlh a, a rilru a kal dik lo palh ang tih ka hlau a ni. 

"Kal ang le" aw dam zet hian a ti thum chhal a, ka kutah kaiin thlai zawrhna lên lam panin min min kal thlak pui a, min venghim dawn tih ka chiang tawh bawk a, hlauh leh zah ka nei duh ta bik lo. 

"Nang kha! Lo ding teh, i va han ngampa miah miah ve le" ti leh Sir Francis-a chuan Mazara rawn nam a rual nghal a, mahse Mazara erawh a che sawn eih lo maw le, chuti ang em ema a ding nghet thei chu mak ka ti zawk. 

"Min kiansan thuai la a fuh ka ring" tih ṭawngkam khat chauh chu Mazara chuan a chhak chhuak a, dawhthei ang deuhin lang mah se a thinrim ṭan tawh tih ka hre thei, ka hre chiang ve lutuk tawh tlat. 

"Ve mai mai che chuan!" tiin Sir Francis-a chuan a rawn hnek ta mai, a hmai bawr velah chuan a hnek fuh ngei a, a lêt leh erawh a dawl zo lo mah mah chu a ni e, a pai khawt khawt a, Mazara chuan a hnaih chilh nghal thuai bawk. 

Sir Francis-a leh Mazara chu an insual a ni ta der a, Foot path aṭang chuan ka thlir reng a, ka rilru a kal sual laklawh bawk nen Mazara chuan sawisa hrep se ka ti a, a sim rak khawpin sawisa mah se pawi tihna ka nei maih lo, a zak lo êm mai. Mazara chuan vawi khat chiah kut a tuar a, a bak zawng chu amah hlirin kut a tawrhtir thung a, mahse hnek loh chang a ngah mai. Hnek tumin a kut a lêk uai uai a, kawngpuiah chuan a theh thal chawrh chawrh ṭhin ta zawk a, hnek erawh a hnek tho. 

"Min en teh le" tiin hmai thi hnuang tawh Sir Francis-a hmai chu a beng thek a, kei chauh ni lo mi dang chuan an en ve ṭhap a, tûma'n an inkhawih vel lai chuan ṭhelh kan tum chuang lo, ṭhelh dawn pawh ni se an ṭhelh thei kher lo maithei. 

"Ka hmeichhia hnaihah ka hmu leh che emaw tibuai zawnga i awm leh a nih chuan ka insum zo tawh lo vang" nghet charh hian Mazara chuan a ti a, kei erawh ka lo phu deuh uih a, min sawi dan ber kher chu ka beisei loh lam tak a ni. 

Ngawi rengin ka dinna lamah a lo kal a, a kut a rawn lek kân rualin ka lo chelh thuai a, ka awm dan chu a la dik famkim thei rih lo a ni. Kan chhuk thlak lai chuan ka hawi lêt a, kawngpuia ṭhu thluang duai chung hian Sir Francis-a chuan min lo en reng a, a hnar leh hmai chu a tuai deuh sek bawk. A laka Mazara chet dan chu pawi tihna ka nei lo tluang zel a, tunah chuan kan ina a lo chuankâi ngam tawh loh ngei ka beisei. 

Lakhuih awmna bul kan thleng a, chet ka tum rualin min ṭhuttir nghal thung a, min duat vel lutuk chu a nuam veng veng. Nui sen senin ka chhoh melh ral a, ani paw'n kiai suk hian ka hnar a rawn tawk zeuh a, a kut thap hrupa min tawhna te chu ka taksain a hre chiang tawh hle. Khawpui hmeichhe ṭhenkhat hi chuan chuti anga kut thap leh hrawl em em tawhna chu an ngaina miah lo vang, kei erawh chuan ka ngaina em em thung a, ka thalhlel hial tawh zawk a ni. 

Lakhuih la awm zawng zawng chu bag pakhatah a khung khawm vek a, a put lai takin putea a lo thleng a, bag ruak nen a nih avangin nimbu chu a hralh zo a nih hmel. Ka rin ang ngeiin Mazara bulah chuan a hralh zawh vek thu a sawi nghal mawlh mawlh a, a pawisa hmuh zat a sawi lai te chuan ka lo khawngaih letling em em zawk. Thingtlang mite tan chuan a tam a ni mathei, khawpui mite tan erawh a tam hran lo, nu Biaki enkawlna tur a daih leh si lo vang tih ka hlauh pui khawp mai. 

Mazara pawh a hralh zo titih chu a ni mai a, a lo let hnu lawkah kan haw a, kan haw har lutuk lo, dar 3 bawr vel niin ka hria. Zirna lam reng ka rilruah a awm thei rih lo; ka bula mi ren run chauh lo chu! Taxi-in kan haw a, a hma lamah driver leh putea an ṭhu a, keini pahnih a hnung lamah kan ṭhu thung a, sawi tur ka va'n ngah tak em. Kan awmna hmunin zir ngat phei se chu ka ṭawng mawlh mawlh tawh ang, in thlen thuai thuai chu ka châk tawh hle bawk. 

Seat hnung lama ṭhu kan nih avangin putea te pahnih chuan min lo ngaihven teh chiam lo va, kan zalen ang reng khawp. Mazara chuan amah ka ngheng tur chu min nam tlat a, ka kut hum chu a duh tâwk em em ringawt. Nghen tumin ka che leh a, min lo nam leh a, kan infai hleih a ti leh tawh niin ka hria. Ka kut chu pawh chhuah tumin ka bei a, a ngai tê bawkin ka thei leh ta lo. A inrin loh laiin ka ngheng thut a, a ṭhut ang âng chuan nghet takin ka kuah zui nghal a, a thlan rim leh thawmhnaw bal tih te mai mai chu engmah ka ngai lo.

Chutia ka kuah tâk si ah chuan mim nam sawn a tum lui ta bik lo va, ka ban bul chu a chul riak riak a, keiin a kut ka khâl niap niap thung a, a kut chu a lian tak zet. Ka kut a vawn lohna lam nen chuan ka'n teh vel chhin a, pafa an ni ringawt alawm le. Ka kut chu la kângin a fawp vang vang a, nuih ver ver bak tih theih ka nei lo. Taxi-ah kan chuang miau a, inngaizawngin induh tawn em em mah ila kan awmna hmun chuan a zir lo tlat a ni. 

In kan thleng a, tûmah an lo awm lo hlauh a, awm se chuan zawhna ka dawng ngei ang. Ni danga ka haw hun aiin ka haw hma zawk a, College lama ka lêt leh ta miah lo te chu zirtirtu leh zirlai te paw'n mak an lo ti viau maithei a ni. Thingpui ka siamsak a, chhang nen ka chhawp a, chhang erawh an ei lo tluk a ni. Putea chu a inbual hmasa zawkah a ṭang a, bathroom-a a awm lai chu Mazara chuan remchangah a la ve hmak, a thluak a ṭha vel reuh lutuk! 

Min fawp tawn tawn a, ka hmuiah mai ni lo ka nghawng leh irah te a fawp mawlh mawlh a, kei phei chu ka zauthau vek thei. Ka room lamah min pawm lut daih a, dik tak chuan kan luh lai ka hre ṭha mumal miah lo, khuma min nghah hnuah ka hre ve chiah zawk a ni. Inthlahlel tawn ta reng reng chu kan inthlah hlei thei lo a ni ber a, min fawh lai te chuan mipa dang laka min chhanzia te ka hre chhuak ûar uar a, a hmeichhia ka nihzia a sawi lai te chu ka bengah a rawn ri nawn a, ka hlim tak zet, ani ang mipa hi chu ka tawng leh tawh kher lo ang.

Thawm a rawn awm a, zawimuang hian kan inla hrang ve ve a, choka lama thawm chu putea lo chhuak thawm niin ka hria. Room aṭang chuan kan chhuak a, bathroom bul kan thlen phei laiin u Duhawmi a rawn haw a, ka phu deuh uih nghe nghe. Chutah Mazara chu a inphelh ta mai, u Duhawmi chu kan dinna lam a rawn hawi phah hial a, ka u mah ni se Mazara taksa inphut mawi tâwk em em leh lian ṭha tak a hmu ve chu ka lo ui ru vawng vawng. 

Rei en lovin a room lamah a lut ta daih a, lawm tak ka ni. A luh hnu chuan hmanhmawh taka che chhuakin Mazara chu bathroom-ah ka nawr lut nghal sawk sawk a, mak tih hmel deuh hian min en chhuk run a, kal sawn ka tum chuan ka banah a rawn chelh ta tlat mai. U Duhawmi a rawn chhuah thut ka hlau bawk si, kal sawn tuma ka ṭan lahin Mazaran min vuan tlat a, rilru a hlauthawng duh kher mai. Ka khabe a rawn chawi a, chiang zetin kan inen a, nuih insum hmel a pu thânin ka hria.

Ka pangngai thei tawh meuh lo va, ka hmaah ruakin a ding lo chauh a, ka thin te chu phu rang tak a ni. A âwm bawr lian leh pawng âlh te chuan a ur hian min ur a, min aikaih a ni ber e. Ka tum loh lutukin a dul hnuai lam chu ka en thla zel a, a taksa chuan en thla zel turin min thunun tlat tawh alawm, mahse ka en rei thei lo, ka mit ka chhing chiang khawp mai. Ka kut a thlah rualin ka kal sawn nghal nal nal a, ka la intauh ri chawrh zui, maimitchhing chungin kal sawn miau hek. 

Ei rawng ka bawl chhung zawng chuan rilru khingbai zetin ka awm a, ka chhungril a sa pup pup ti ila a dik ber ang. U Duhawmi chuan ei rawng min bawlpui ve teh mial a, phut lo mah ila ute'n min uap hi chuan a nuam bik a ni. Ei rawng kan bawl zo va, ka nu leh pa an lo haw tawh bawk a, chaw ei erawh kan la tum lo niin a lang. Mazara chu ka hmu ngam rih lo leh ta tlat a, hmuh tur paw'n a awm lo hrim hrim, pawnah a chhuak daihin ka hria. A dul hnuai lam kha lo en thla zel lo ila chuan ka zak lo ang a, ka hmu hreh miah lo bawk ang.

Khaw thim ṭan det dêtah zanriah kan ei a, Mazara chu a vei bar ngei a, vei lam a hmang thiam zawk tih ka vawi khat hriatna a ni nghal bawk. Min lo en zeuh chang chuan ka hawi sawn rang thei hle a, kan ei tui tlâng hlawm viau mai. Chaw ei lai chuan zawhna chi hrang hrang ka pa'n a zawt a, putea pawh a ṭawng duhin a tlângnel hle a, tlângnel tur pawh a ni reng. Tawi tak taka Mazara chhanna chu a lo sawi belh zel a, nu Biaki chanchin thleng chuan a sawi chhuak nghe nghe a, a sawi dan aṭang chuan haw chhoh har an tum loh hmel hle leh nghal.

Chaw kan ei kham a, ei leh inna ka seng fel a, u Duhawmin min chetpui bawk a, kan tifel zo zung zung mai. Zanriah kan ei hma ang reng a, khua chu a la thim famkim chiah lo va, Mazara leh ka pa te an titi urhsun hmel bawk nen pawnah ka chhuak ta daih. Ṭhutthlengah chuan ka ṭhu a, thla a lang tawh a, ka rin aiin a chhuak hma, ni dangah chuan tun ang hunah thla êng kan hmu ngai mang lo. Khua chu a thim ve tial tial a, thla pawh a éng tulh tulh a, chhun lama kan hun hman dan ka ngaihtuah neuh neuh a, ka la hlim veng veng thei.

"Zanin chu arkaiden zan a ni maw" aw lo chhuahna lam chu ka hawi vat a, hawi lo pawh ni ila chuti ang thu rawn sawitu chu tu nge a nih ka hre nghal a, a rim aṭang leh a aw aṭang ka hre hrang thei tawh tlat a ni.

"In inbe zo tawh em ni?" ti sepin kan in lam chu ka va thlek dâw daw a, Mazara nen kan awm dun lai an rawn hmuh vaih chuan a chi loh khawp ang, Mazara erawh chu lam chu a thêngthawngah a thawk vak lo a nih hmel.

"I chhungte biak ai chuan nang nena inbiak ka duh zawk" ti supin ka bul chêtah a rawn din hnai a, lai zeta ka en chuan van lam a lo thlir leh daih tawh thung a, a kekawr ipte a zen ran bawk a, a awm dan engkim chu a inhmeh vel vek a ni.

"Arkaiden zan awmzia i hria em?" amah bawk chuan a rawn ti hniam leh ruih a, kan in lam chu ka va thlêk hmasa leh tê tê phawt a, ka chhungte'n min hmuh ka la hlau reng a, Mazara ka zahpui tihna lam erawh a ni lo.

"Hre nâng, i hria em ni?" ka tih chuan a nui suk a, a nuih dan hi tawiin beitham ṭhin hle mah se a tâwk chiah thung a, ngaihno a bei ka ti mai, a nuih rik dan thleng hian ka ngaina ngawih ngawih tawh a ni ber e. 

"Ar an lawi laia thla a lo chhuah hman tawh hian arkaiden zan tih a ni ṭhin, naupang an pawnto ngei ngei bawk a, kan khuaah awm la chuan i thlir leh dauh dauh tawh ngei ang" a tih chuan mak ti zetin ka en chho hâ a, engtin nge pawnto lai hmuh nuam ka ti tih a hriat reng reng!?

"Min lo hmu vek ṭhin a ni maw?" tiin ṭhutthlengah chuan ka ding a, chuti chung pawh chuan ka la chen chuang lo, ka la chhoh en hram zawk a, a san zâwng hi chu thu hran ni se a taksa lian tak hian a tilang zual a ni. 

"Hmu ṭhinah ngai mai rawh, zanin chu kan men rei deuh a ṭul maithei, thil min sawipui tur i nei nualin ka hria" ti hniam leh ruihin ka lam chu a rawn hawi a, ka hnar a rawn tawk zeuh a, nui sukin in lamah chuan a phei nghal nul nul a, a hnung lam aṭang paw'n a pâ thlawt a ni.

(End of Chapter 23)