SUMO DRIVER By Havali Adam (CHAPTER 22)

SUMO DRIVER

By

Havali Adam

Chapter 22

Zirna lam kan ṭan leh tawh bawk a, College-ah pawh kan kal nitin ta, lung erawh a lêng duh khawp mai. Awihawm loh khawpin ka mizia chu a danglam a, ka nun dan thleng chuan a inthlak vek a ni. A hmaa ang maiin ka ṭawngkam pawh a naupangchhia tawh lo va, Mawitei leh Hlimpuii phei chuan mak an ti hle. Zirna lamah erawh ka taima sâwt viau thung a, English Honour chu ka tum ruh bur a ni mai. Min fuihtu a ṭha bawk a, a thu ka awih lo thei lo, ka awih loh ngam lo a ni mah zawk.

Ka zirna lama ṭhahnem ngai tura min titu chu ka putea te an ni lo va, ka nu leh pa te an ni lo bawk a, tu dang ni lovin Mazara ngei a ni. Amah ngaia mut tlai chang ka ngah a, phone tal nei se chu ka lungleng lutuk tur pawh a ziaawm deuh ang maw le. Phone nei turin ka la nawr chhin ngai lo va, nawr chiam emaw amah ngai lutuk anga lan chu ka duh leh lo tlat a, mahse ka thei rei kher ang emaw, mipa a nih angin kan inkar ṭhatna tur chu engkim a ngaihtuah vek ka ring tawp a ni. 

Aizawla ka chhuk thlak ni aṭang khan kar khatah vawi thum kan inhmu ṭhin ta ziah a, a chang chuan vawi li te pawh a ni ṭhin. Ni inkar thlaka service a nih avangin duh ang paw'n kan inhmu tam thei lo va, kan awmna hmun a inang bawk si lo nen a zun chuan ni leng zan tinin min phuar ṭhin hi a ni ber. Ka vawi khat ngaihzawng neihna a ni a, a hmasa ber a nih angin a hnuhnung ber ni se ka duh a ni. Thisen zawmpui ni si lova ka mipa hriat tawhah chuan ka la ring ngam ber a, ka thisen zawmpui tak tak te ai pawha ngaih chang ka ngah mai. 

"Naktukah i putea a rawn chhuk dawn a nih chu aw, Sumo Counter-ah i va hmuak dawn nia" inhru hul mawlh mawlh pahin ka pa chuan min rawn bia a, Sumo Counter-a kal ka peih loh thu ka sawi tawh ngai lo va, ka phur ru em em ṭhin zawk. 

Buk khum nghauh nghauhin tui chu ka in a, ka nu ei rawng bawl ka pui zawm nghal zat bawk a, ka nula ve tak tak tawh te pawh a ni ang ei rawng bawl leh in chhung chet vel chu huphurhna emaw hrehna ka nei tawh ngai lo a ni. U Duhawmi ni se exam a hnaih tulh tulh a, phut ka tum lo hrim hrim. Zan lamah a meng rei ṭhin a ni ngei ang a hmel a tla dâwk a, ka pa phei chuan a zilh nghe nghe. Taksa nghawng lutuka lehkha zir lo turin a hrilh ṭhin a, mahse u Duhawmi chu a ngai rengin ka hria. 

Ei rawng kan bawl zo va, zanriah ei hun a la ni chiah lo bawk nen room-ah ka lut a, khum hnuaia ka box dah ṭhat chu ka la chhuak a, chu box ringawt pawh chuan min tinui thei. A chhan chu Mazara hnen aṭanga lehkhathawn ka dawn tawh zawng zawng dahna a ni a, a lehkha min pek hmasa ber aṭangin a la awm kim vek a ni. Mi dangin an lo hmuh palh ka hlauh avangin ka thukru zel a, hmuh mai mai theiha dah chu a chi loh hrim hrim a ni. 

Box chu ka hawng a, lehkha tlâng rawng sen leh pawla ṭial inthuah chhâwng ṭhap chu ka hmu nghal a, nui sen senin ka zen lut a, a kawmah eng thu mah inziak lo mah se a chhunga thu inziak chuan ka thinlung a tituiral hneh thei hle. Vawi eng zat chiah nge ka chhiar nawn ṭhin ka hre lo, mahse ni khatah vawi hnih aia tam hi chu ka chhiar nawn ngei ngei ṭhin thung. Thui tak a ziak ngai lo va, a ziah chin erawh ka tan chuan luangliam zawih zawihna tham a ni tlat ṭhin. 

Sumo Counter-a kan inhmuh changin min pe mai zel a, mahse inah ka chhiar chauh zel a, phone kaltlanga inbiak aiin chuti anga lehkha inthawn chu a romantic zawka hriatna ka nei tawh nghe nghe. A tirah kha chuan a chet dan chu hman lai ka ti ru viau a, phone awm reng laia lehkhathawn lo hman chu a hranghlui zia ka ti a, tunah erawh ka rin phak bakin nuam ka ti tawh thung a, a chet dan engkim chuan min tihlim a ni. 

Zanriah ei laiin u Vli chu ka pa te'n an bia a, rawn haw a châk tawh thu ringawt a sawi a, mahse kum chanve hnuah chuah a rawn haw dawn thung. A thil zir lai a zo ve ṭep tawh a, zir zo ta se chuan hna a hmuh nghal mai ka ring. Chuti ang bawkin ka u pawh MCS nih tumin a bei ṭauh ṭauh a, hna dang hi chu a hmu tawh reng maw le. MCS nih a duh tlat a, a tumah a chiang bawk a, engtik ni ah emaw chuan a la ni ngei ngei ang. Kei erawh ka ute pahnih ang lo takin tum mumal pawh ka nei chuang lo va, mahse keima tawkah ka hlim ve em em tho. 

A tukah chuan College ka kal leh a, ka pa sawi láwk tawh ang ngeiin Sumo Counter lamah chuan kal ka tum hle bawk. Chawhnu kan thleng a, class a awm tawh dawn lo emaw ka tih laiin kan zirtirtu pakhatin class neih leh a tum thu a rawn sawi a, kei erawh Chanmari lama kal turin ka chhuak hmak. Ka ṭhiante pawh ka rawn chuang lo va, an tel lova chhuak vâk hreh em em ṭhin kha tunah chuan mahni chauh paw'n ka chhûak ka chhuak ve thei ta, ka danglam tawh tak zet.

Sumo Counter ka thlen phei chuan Counter nghaktu pu Chhara chiah a lo ṭhu a, putea te pawh an lo thleng ṭep tawh ang ka ring. A hma kha chuan pu Chhara hming chu ka hre bik hauh lo, mahse Mazara nen kan inhmuhna ber Counter ṭhut chilhtu a ni miau a, a hming ka hre har lo khawp. Chu bakah pa ṭawng duh tak a ni hrim hrim a, kan innel bawk a, Mazara nghaka kan awm dun te hian eng eng emaw ni hi chu kan sawi ve luam zel. A lo berah ka pa ai chuan a upat ka ring a, a fapa te pawh an tlangval vek tawhin ka hria.

Darkar a liam a, HAUHNAR TRAVEL Sumo Counter lama lo tlan ka hmuh rual chuan ka khi ver ver a, a khalhtu hmelṭha leh pâ zet ka hmuh chuan hlimnain ka khat zui nghal bawk. Counter hmaah Sumo chu a ding a, Passenger pawh an full vek a, bungruate chu Sumo chungah a inrem chho ût hlawm a, ka rin aiin chuang an tam daih. Mazara chuan min lo en zeuh a, mahse rei erawh a ni lo. Kei paw'n a tih tur ka hre chiang a, lo biak buai vel ka tum lo hrim hrim, a hman hunah chuan ka bulah a rawn kal leh mai dawn tih ka chiang a ni.

"Heti ang hian i lo chang ziah tak ang a, nangni pahnih hi in lo induh tawn ve hle tawh chu a nih dawn hi!" putea chuan ka beng bul chêtah a rawn ti a, a ṭawngkam chhah chhuah dan leh min nuih dan vel chu Tlantea chiah chiah a ni mai. 

"I sawi ho êm mai pute, eng nge i lo tih dawn reng reng a?" tiin zawhna dang ka zawh zawm ta daih a, kan thil sawi lai chu thlak ka tum a ni ber, kan sawi chhunzawm zel a nih chuan mi dangin an lo hre palh ang tih a hlauhawm. 

"Bazarpuia thil zuar ho hian thei lampang an ṭhutpui duh ang em tih vel lo ngaihven ka tum maw le" a lo ti ve mai bawk a, zawhna dang zawt tawh lovin ka ngawi ta reng a, Mazara erawh bungrua thiar thlain a la buai hle.

"HAUHNAR TRAVEL Sumo a rawn thlen tawh hi chuan kan nula hmelṭhai pawh a nui reng zel mai, a khalhtupa ngawichawi zet nen an inkarah eng thil tak awm ang maw!?" rang zetin pu Chhara lam chu ka hawi nghal a, Mazara nen kan inkar a hre thawi ve tawh a, mahse chiang takin a la hre lo.

"Mak i va tih hmel ve, ka fapa te tan ka it tehreng che nen nang lah chuan ka thusawi engmah i uksak duh bawk si lo. Khi pa ngel ngul khi chu a mak ve teh mai a nia, a duh hun tê ah bak a ṭawng lo reng reng" amah bawk chuan a lo ti leh a, kei lah pek chuan

"Ka hria alawm" ti sepin Mazara che mawlh mawlh chu ka thlir reng a, bungraw ṭawnna zawng zawng phelhin a hlang thla vek a, amah a chak hrim hrim a, a thiar thla zo rang khawp mai.

"Chu kei aiin kan nula hmelṭhai chuan i lo hre chiang tawh tihna em ni?" a zawhna avang chuan ka nui hak a, pu Chhara hi chu fiamthu a duh ve hrim hrim a, Mazara nena kan inkar dik tak hria pawh ni se a pawi lem lo vang.

"Kei chu a hriat chian zawk ka ring" nui vur vur chung hian putea chu a lo ṭawng chhuak ve leh a, rum taka melh kha khâin a dula chum ka tum a, a lo ding sawn hman zeuh a, Tlantea kha lo nghal awm reng pawh a ni tih ka hrethiam ve chiah. 

"Bawiha lo kal teh, hei hi alawm ka sâwi ka sawi ṭhin kha! A hmelte hi a ṭha a nia, han birh deuh ngat ngat la chu ka duh khawp mai" tiin pu Chhara chuan a fapa upa zawk chu a ko ta mai, meng buai nasa tak ka ni.

"Ka pa ṭhin hi a, i ti ho thei em mai. Ani ang nula hmelṭha te chuan ngaihzawng an nei ve bawk ang chû, keini rim chi pawh va ni suh. Ka chhuak lawk dawn a, ka lo haw har lo vang" tih leh a fapa chuan kal sawn a rual nghal a, ka thaw a veng ta huai. 

Sumo lam ka hawi leh chiah chu Mazaran min lo en run a, ka bula mite pahnih erawh kum tak tak inkawm tawh ang maiin an titi zui bawrh bawrh a, kei zawng ka awm a nuam ta hauh lo mai. Bungraw ṭawnna rubber Sumo chhunga a dah luh lai te chuan a meng rum em em a, a chhan ka hre chiah lo, pu Chhara min fiam dan leh a fapa ṭawng dan vel kha a lo hre pha a ni maithei. Sumo kawngka chu nâ zet hian a khar ri bur a, putea leh pu Chhara pawh an hawi phei zawk nghe nghe. 

Vung zeta min kal pelin kan awm dunna ṭhin lamah chuan a phei a, ṭi dêkin a hnungah ka zui ve nghal a, putea te pahnih chuan min rawn ngaihven vak lovin ka hria. Thlang lam hawiin Mazara chu a ding ngawi run a, a thinrim chiang a ni. Ka thawm te chu a hriat vek ka ring, mahse a bula ka din hnu thleng paw'n min en lo hrim hrim, biak chu huphurhawm tak a ni. Ka thaw hawk a, kan boruak chu a rit khawp mai. Chuti ang chuan min la awm khum ngai bawk si lo va, awm dan tur ka thiam lo a ni e. 

"Mazar" ti thawp raihin a ban rekah chuan ka va tawk zeuh a, che thutin ka kutah a rawn chelh a, min kai sawn nghal dawr dawr bawk a, mahse melh khat paw'n min la melh duh miah lo, tun ṭum kan inhmuh dan chu nuam tihna reng ka nei lo. 

"Min thlah teh! Mi dang an lo kal thut ang asin, a chi loh" tiin ka lo ṭang nasa ve viau a, bathroom chhungah chuan min hruai lut lui ta tho va, amah a palianin tha kan inneih tam hleih bawk si a, ka ṭang rei thei lo chiang hle. 

"Chhuak vat teh ang Mazar, zung duh te pawh an awm thei, kan awmna hi a dik miah lo. Pute te khan an lo hre palh reu reu ang tih ka hlau a nia, bathroom chhunga kan awm dun ringawt pawh hi a dik lo sa tawh hrim hrim" a hmela thinrimna chu ka hmuh hmaih bik lo, mahse kan awm dan ber kher chu a mawi lo êm a ni.

"I mak em mai Mazar, ka chhuak duh, chhuak vat teh ang" ka ṭawng tawp lam chu a vin deuh lek lek a, rangva bang ngheng ri dawta min nam beh chuan ka chhing sawk a, a chet dan chu ka ngaina hlawl lo. 

Ka rilru no rawn chhuakin ka ṭah chu a chhuak zawm nghal a, ṭah chhuak lutuk avanga thawm ka chhuah mai loh nân ka hmui ka pet fan fân a, ka mit chu meng ngam tawh lovin ka chhing tlat bawk. Ka meng a nih chuan ka mittui a baw nghal zawih zawih dawn tih ka hre chiang a, ka taksa chhung lam chu a sa pup pup a, ka thinphu te chu rang tak a ni. Ka chala a chal rawn nghatin ka hmai zawnah a thaw lum ham ham a, ka khabe chu a chawi zeuh a, ka meng ta nge nge. 

"Ka haw duh Mazar, min vawnna hi thlah hram rawh" ka ṭawng zo chiah chu ka rin lawk ang chiahin ka mittui a baw zawih a, ṭah insum zetin ka melh chho ran a, ka hmui chu a khur der der bawk. 

"I ṭha miah lo" ti supin ka biang chu a dawm a, a hmelah chuan thinrimna aiin mak tihna a lang hnem tawh zawk a, min chelh tawh loh avangin ka nam hla deuh a, chuti ang em ema ṭah insum chu ka la nei ngai lo. 

"I hmel hmu châkin ka lo kal vang vang a, ni khat lek inhmu lova awm te hi hrehawm ka ti asin, chuti ang khawp chuan ka ngai che Mazar, mahse i chet dan hian min tilungawi lo tak zet, ka va haw phawt mai ang e" ka ṭawng tawp lamah chuan ka ṭap chhuak titih a, min thinrim khum ringawt chu ka la nâ ber a ni. 

"Numam" min kohna ri chu hre reng mah ila ka hawi lêt lo va, hawi lêt pawh ka tum lo hrim hrim a, bathroom aṭanga ka chhuah rualin ka inhru hul nghal sawk sawk a, hlim miah lova hlim tum chu a harsa ngei mai.

Putea leh pu Chhara chu an lo titi malh malh a, min hmuh rualin putea chuan min nuih zeuh a, ka nuih lêt ve sak a, mahse nuih a va za si lo êm. Bungrua a neih tam leh tam loh ka zawh chuan a neih loh thu a lo sawi mai a, Taxi-a haw chu ka rawt zui nghal a, tlêm chuan mak a ti deuhin ka hria. Mazara hmel a la rawn lang rih lo va, a lo lan hmaa haw vat vat chu ka duh ru hle zawk, putea lah chu a la che hmanhmawh lo em em zui. 

Taxi hmangin putea nen chuan kan in lam kan pan ta ngei a, mahse kan chuan chhung zawng chuan rilru nuamin ka awm thei lo. Puitling tih takah putea leh Taxi driver chu an titi dun thei leh hle a, kei erawh ka ngawi kar a, a hnungah keimahin ka ṭhu a, a lakah lungawi lo em em mah ila Mazara chu ka ngai ru em em tho. Kuah vawng vawng ka châk a, a âng chhung lum nuam taka awm der der chu ka thlahlel ngawih ngawih a ni. 

In kan thleng a, ka chhungte chuan putea chu an lo be nghal bawrh bawrh a, putea pawh a bang bik chuang lo. Hlim takin thil an sawi a, thingpui ka siamsak lai te chuan ka rilruah thingpui siam a awm thei thlawt lo. Putea chuan min en leh zauh zauh ṭhin a, ka awm dan chu a hrethiam deuh reuhin ka hria. Sumo Counter aṭang tawh min chik ru tih kha ka hre reng a, a hriatthiam tura awm ka tum lo hle thung a, Mazara thlah pawh duh lova Taxi lâk ka rawt tlat te kha mak a ti viau maithei. 

Room-ah lutin a vawi khatna atan Mazara hnen aṭang lehkhathawn ka dawng lo va, chu ringawt pawh chuan ka rilru a tina thei a ni. Khum hnuaia box chu ka phawrh a, tukverha vawm chhuah daih chu ka tum thut a, mahse ka thei ngâng lo. Ka âwma pawm betin khumah chuan ka bawk thlawp ta zawk a, lukhama ka hmai phumin ka ṭap khur char char a, a laka ka lungnih loh vawi khatna a ni a, ka la nâ ngawih ngawih a ni. A thinrim a nih paw'n sawi ve mai se chuan ka nâ em em miah lo vang, mahse a ngawi tlat a nih kha! 

Thla 3 lai chu kan inngaizawng ve tawh a, vawi khat pawh ka lung tiawi lo zawngin a che ngai lo va, engkimah ka lung a dum vek zawk ṭhin. Tun ṭum erawh a dan a dang ta deuh a ni ang e, ka piana hnu lama ka rilru nât ber ṭum a ni hial ang. Khua chu a rawn dur khup a, thli tleh hun lai a nih avangin khumah ka mu ta reng a, khaw awm dan chuan ka mut a tichhuak tlat a ni. Ka box pawm beh chu khum hnuaiah bawk ka dah ṭha leh a, ka mut hmaa ka dah ṭha hmasa a nih loh chuan rilru a nuam thei tlat lo a ni. 

Zanriah ei dawnah ka nu'n min rawn kai tho va, ruah a lo la tla seng seng a, ka mut dawn khan a sur titih tawh a, rin ai takin a sur rei phian mai. Chaw kan ei lai chuan putea'n min fiam leh zauh zauh ṭhin a, pangngai taka awm luih hram hram tumin ka ṭawng ṭhin a, mahse zan dang ka ang thei lo chu a ni e. Ka chaw ei thlengin a tui thei lo va, ka kham hma khawp mai. Sitting room-ah ṭhuin TV ka en ringawt a, ka riluah erawh ka thil en lai chu a awm lo chiang hle. 

Putea chu Aizawlah ni hnih châmin an khaw lamah a haw leh a, class kal ka chhuanlam avangin ka thlah ta lo va, ka pa'n a thlah tawh thung. Dik tak chuan class kal ka duh vang pawh a ni chiah lo, Mazara hmel ka hmu duh rih lo zawk a ni. Ka ngai tak zet, a hmel pawh ka hmu châk tak zet, mahse a chang hi chuan ka thlakhlelh angin min thlahlel ve tak tak ngai lo ni maiin ka hre ṭhin. Kar khat chhung zet chu ka inhmu tawh lo va, a hnen aṭang lehkhathawn ka dawng tawh ngai lo bawk a, ka neih sa ho erawh ka chhiar nawn ziah tho.

Ṭau thla tir kan chuangkai leh tawh a, zirna lamah ṭhahnem ka la ngai reng a, hun a kal chak bawk a, B. A chu ka zawh zung zung theih ka ring. Ka ṭhiante nena kan awm khawm paw'n ka zia a dangin ka ngawichawi sâwt em em a, a chhan lah thil dang sawi vak a ngai hranpa lo. Mazara nen chuan kan inṭhen ti dawn ila kan la inṭhen chiah bawk si lo va, kan inkar chu a chiang lo tak zet a ni. Inṭhen tur êm chuan ka ngai ngam chiah lo va, ka phal lo a ni mah zawk, mahse Mazara zawk a reh tlat bawk si a ni. 

Nilaini zan a ni a, thla a êng phian a, kan in kawt gate bula ṭhutthleng tê ah ka ṭhu mai mai a, ka lung a lêng a ni ber. Thingtlangah te kha chuan thla ên zanah Radio nen pawnah kan ṭhu ṭhin a, zai kan ngaithla a, Sap hla awm ve ṭhin mah se a tam zawk chu Mizo hla a ni ṭhin. Thingtlang nun awlsam tak chu ka ngai a, putea te khaw lama zin chhoh leh mai chu ka duh rum rum a, a theih der si lo. Kum chanve hnu daihah chawlh kan nei ang a, chumi hunah chauh chuan ka zin leh theih ka ring. 

Motor thawm awmna lam chu ka hawi a, kan in bul gate zawnah tak chuan a ding a, tu nge a nih ka hre thei mai lo. Rei en duh lovin thla êng bawk chu ka thlir leh a, thawm aṭang chuan mi tu emaw min hnaih zawngin a lo kal tih ka hria, ka en zawk a, ka mi hmuh avang chuan mak tihnain ka khat zui nghal. Ka bulah chuan a lo ding a, a nui sun sun a, a rawn léng teh thut chu a mak a ni. Khati ang khawpa chiang khan ka hrilh a, mi pangngai tan lo lên leh ngamna chi a ni tawh lo, nge a ni hi a pangngai chiah lo zawk!?

"Engati nge nangmah chauhin pawnah te i ṭhut a? In chhung lamah lut ang hmiang, ka lo lên chhan ber heta i ṭhut daih te chuan a dik nâng" a ṭawngkam chu a hawihhawm khawp mai, mahse kei chuan ka hmu lem vek tawh a ni. 

"Lut ang le Numam, bansan mai mai che ka tum lo ka tih tawh khâ, i hre tawh lo em ni?" tiin ka banah chuan a rawn chelh a, ka lo thing thla sawk a, ka ding zui nghal bawk a, a ngampa vel ta lutuk chu ṭawng khum hrep mai a nia ka duh ni!

"Keini pahnih hi pangngai deuhin inkawp ang, B.A i zawh veleh nupuiah ka nei nghal bawk ang che. I tisual lo vang Numam, kei chuan ka duh tak zet che a, i rilru nât pawh ka phal ring duh suh" a rawn tih leh chuan

"Khawngaihin min beisei tawh suh Sir, i nupui nih ngat phei chu ka tum lo nasa a ni. A chhan chu ka duh ve tlat lo che a, ka ngaina ve tlat lo che a, ka tan chuan College-a kan zirtirtu pakhat ve mai chauh i ni" ka ti ve ta duah a, ngawih rengin awmzia a nei lo tlat. 

"Keiin ka duh si che alawm, i chhungte paw'n min duh hle chu a nih kha! Nupuia neih ngei che ka tum a, hlawhchham ka tum lo bur" a tih chuan ka melh vak a, a bulah chuan awm pawh ka awm rei peih lo, in chhungah ka lut ta daih. 

In chhung ka luh hnu rei lovah Sir Francis-a chu a rawn lut ve nghal a, ka nu leh pa an inkhawm avangin u Duhawmi nen chauh kan awm a, zep lovah chuan Sir Francis-a chu hlauh rukna riau ka nei, a duhna ah chuan mawi leh mawi lo pawh dâwn lova che chhuak chi a ni tlatin ka hria. Vanneih thlak lutuk tak maiin u Rinawma a lo lut hlawl a, lawm tak ka ni. Sir Francis-a ni lovin u Rinawma char char chu ka bia a, ka chet dan chu a mawi miah lo tih ka hria, mahse ka nu te inkhawm ban hmaa hawtir daih chu ka duh si a ni. 

U Duhawmi pawh u Rinawma a rawn lan tâk si ah chuan lehkha zir lovin sitting room lamah a lo chhuak a, an inngaizawng tih ka hre vek tawh tho va, an inṭhut hnaih set sawt khawp mai. Sir Francis-a erawh a ṭawng duh berah aṭang a, ka ngaih ang a ni lo tawlh tawlh. U Duhawmi phei chuan hmui phun hian a ruih leh ruih loh min zawt hial a, u Rinawma nen chuan inthlau vet vet tak an ni. Ka hlauhthawn ang ngeiin inkhawm chu an rawn bang ta, ka nu'n Sir Francis-a hmel a hmu chiah chu a be nghal siam siam a, ka rilru dik tak ka hrilh chian tawh tehreng nen Sir Francis-a laka a awm dan chu a la ngai rengin ka hria.

"I va rawn lêng khât ta ve Francis? Hna lamah i buai deuh em ni?" inthlak pawh inthlak lovin ka nu chu sitting room lamah a rawn ṭhu ve nghal a, u Rinawma chuan haw a tum nghal mai a, u Duhawmi paw'n a ui der chuang lo. 

"La lêng rih ta che Rina, lo lêng fô teh khai, kan fanu hi a chût mah mah dawn tlat" tiin ka pa chuan u Rinawma chu a be ve teh mial a, a beisei bik lo a ni ang u Rinawma pawh a hawi phawk hman hle, kei phei chuan mak ti tak ka ni. 

"Ni dangah ka lo la lêng leh dawn nia, zanin chu ka va haw phawt ang e" hawihhawm tak hian u Rinawma pawh chuan a lo ti ve mai a, engmah sawi tawh lovin u Duhawmi nen chuan an inzui chhuak nghal bawk. 

"Nui, inthlak hmasa ve phawt la maw le" sitting room lam hawi reng chungin ka pa chuan a ti deuh hmuk a, an room-ah a lut zui nghal daih a, ka nu pawh chu Sir Francis-a be hmasa leh tê têin an room-ah chuan a lut ve mai a, Sir Francis-a nen chuan kan inmelh no lo thei hle. 

Ka pa hi chuan min hrethiam ṭan tawhin ka hria, ka duh lo miau a, min nawr luih a tum vak lo niin a lang. Sir Francis-a pawh a be ṭha huam huam tawh lo va, chu bakah Sir Francis-a mizia hi a ngainat chi a ni vak lo hrim hrim. Puitlin loh dan riau leh fel tâwk loh dan riau a nei tlat a, kei ngat phei chuan ngaina lo tak ka ni. Ka nu ber hi a ni buaithlak ta chu! Be ṭha miah lo se chu ka ti chuang lo, a be ṭha huam huam leh lutuk a, ka pa mit pawh a tihkham vat ka ring. 

Zan dar 11 rik dawn velah Sir Francis-a chu a haw ve ta hram a, len chin tâwk pawh a hre miah lo te chu a zahthlak ka ti, kei ni ta ila ka zak ngawt ang. Ka rin lawk ang ngeiin ka pa chuan ka nu chu a zilh ta chiah a, ka nu erawh a ngawi kar thung. Ka pa zilhna chu a dik miau a, chhang lêta thinrim thei ringawt a ni bik lo tlat. Mu turin room-ah ka lut a, tun lai chu ka ni hman a nuam thei hlawl lo, Mazara nen ni se kan inkar a zau ru tlat bawk si, chu chu a chhan bulpui ber ni turah ka ngai ve hmiah. 

Thawm avangin ka muhil lai chu ka harh hlawl a, thil inhung thawm vel ni berin ka hria. Mit nuai nawk nawkin ka tho va, ka pa ṭawng ri lawng lâwng ka hre zui nghal bawk. Room aṭanga ka chhuah chuan putea hmel ka hmu nghal a, lakhuih a lo thiar lut mêk a, a hnunga lo lut pa hmel ka hmu leh chiah chu ka kâ hau mai. Ka hmu sual a nih ringin ka mit chu ka nuai ṭha leh a, ka insik vel a, mahse ka thil hmuh chu a ngai reng thung. 

Dar zat ka en chuan zan lai dar 12 a lo pel daih tawh a, chuti ang huna putea leh Mazara hmel ka hmu thut chu mak ka ti hle. Ka pa chuan min hmuh rualin putea te pui tur chuan min tir a, ngawi rengin pawn lamah ka chhuak ve mai bawk. Mazara chuan buara bag-in lakhuih a thiar lut malh malh a, putea chuan a kutin a pawm lut thung a, lakhuih lâk ka tum lai chuan vawi leh khatah ka petek dâwr a, ka ṭe ṭhawt hmaa ka hmui huptu chu ka hai lo chiang hle.

"I room bula tukverh kha kalh suh ang che" ti hmukin ka hmui a hupna chu a la sawn a, min vawnna pawh a thlah zui nghal a, min thlah thut chu ka tluk ṭhelh phah hial a, Sumo bang nem tur awm lo se chuan ka tlu hrim hrim ang.

Lakhuih kan thiar luh chhung zawngin Mazara nen chuan kan inbe leh tawh lo va, en chang nei ṭhin mah la ani chuan min en ngai lo thung. Putea sawi dan chuan chung lakhuih ho chu Bazarpuia zawrh tur a nih hmel a, a vai chuan Mazara thar a ni nghe nghe a, tam ka ti ang reng. Lakhuih mai ni lo nimbu bag khat kan thiar lut tel bawk a, zan zana an lo chhuk chhan atan chuan ho lam ka ti deuh a ni. 

Ka nu nen chuan an mutna tur kan siam a, u Vli room awl reng mah se chhuata mut an duh zawk tlat a, tlawmngaih an chhuahin ka hria. Chhuata mut ai te chuan khuma mut a nuam daih zawk ang, mahse anni pahnih erawh chuan chhuata mut an tum tlat thung. An mutna tur kan siam zo va, ka room-ah ka lut nghal daih a, ka khum piah lawh tukverh chu ka kalh lo tak tak bawk. A thu hrimah engtin nge tukverh awmna te chu a hriat theih reng reng le, a mak hi ka ti ṭhin. 

Dar 2 leh a chanve a pel tawh a, ka la mu meng kar a, a laka lungawi lo viau si kha tunah chuan a thu ka awih leh der tawh. Thawm chu a reh ṭhap a, an muhil vek tawh tih a hriat hle. Tukverh chu a rawn ri zeuh a, ka hawi nghal vat a, Mazara chuan min lo en reng a, pawna a chhuak thawm chu ka hre leh ta miah lo. A kut chuan min hui a, thawm dim takin ka phei ve mai bawk a, ka lamah a ban rawn pharin min pawm chhuah a tum mai a nih chu!

Lu thing niah niahin a ban chu ka nawr sawn a, ani'n ka kawngah a rawn chelh zui nghal thung a, ṭawng rin ngam a ni si lo va, inbiak dan tur a vâng duh khawp mai. Tukverh chu hawng zau deuhin vawi leh khatah min chawi chhuak lâwp a, ka inring hman reng reng lo. Leia min nghah rualin min kai sawn dawr dawr zui nghal a, kan in kan hlat tial tial a, min dinpuina chu Muffler min pekna hmun kha a ni a, eng nge kan tih dawn ka hre miah lo bawk.

Ka inrin loh lai bawkin min pawm kâng thut a, tlak hlau zetin a kawngah ka ke pahnihin ka lo kher nghal vat a, ka hnung a dawm lohna lam chuan ka lu a kuai kun a, min pawm reng chungin min fawp tawn tawn a, tun ṭum chu kan infawh dan a dangdai tak zet. Chung lamah ka ṭang a, ani hnuai lamah a ṭang thung a, sawiselbo khawpin min fawh dan chu dawnsawn a nuam a, mumalin ka awm thei leh tawh lo. Ka thlahlel em em a, ka thlakhlelh ang chiahin a che a, ka thiam ang tâwkin ka lo fawp let ve tawn tawn a ni ber. 

"I lung a la awi lo em?" ti supin min chhoh melh ran a, min la pawm kâng reng a, chhuk tumna ka nei bik chuang lo, a nghawnga kut suihin ka bu zeuh a, min kuai kunin min fawp leh nghal a, min ngai ve hle a nih ka ring. 

"Min hrethiam teh, khati anga che tur kha ka ni miah lo" a tih chuan ka kuah thuai a, ani'n naute ang maiin min la pawm kâng reng thung a, a taksaah chuan ka leng halh halh khawp mai.

"Ka ngai lutuk che Mazar, mahse i chet dan khan min tilungawi lo êm a ni" ti sepin ka kuah nghet sauh a, ka hnung chul hliau hliauin ka dar chu a fawp zeuh a, min duatzia a lantirna chuan ka rilru a tino leh vek tawh.

"Ka kawng zawh mêk hi a dik lo vang tih hlau chung chungin ka zawh lui asin, a chhan erawh nangmah i ni" ti hniam ruihin ka dar chu a fawp leh a, kei erawh sawi tur hre lovin ka lo ngawi kar thung. 

"Ka thinrim chhan kha chu thikna vang a ni e, duh aiin ka rawn lang har deuh a, min hrethiam turah ka ngai" ti leh supin leiah min nghat a, ka hawi chhoh rualin min fawp leh vang vang a, kei paw'n ka lo chhang lêt rang hle. 

"I ṭha tawh em?" ka biang tawn tawn khuapa a tih chuan ka lo bu nghat nghat a, kiai sukin ka chalah a fawp zeuh a, ka kut chu la kângin a fawp leh hram bawk a, zanin chu a awm mai mai thei bik lo a ni e. 

Ka room tukverha min chawi luh lai te chuan hlim avangin ka khi ver ver a, dim tê hian pawn lam aṭang tukverh chu a nam khar a, keiin a kal sawn hnu thlengin ka thlir thung a, zanin chu tum loh deuhin ka muttui dawn tih ka chiang a ni. Khuma ka mut hnu chuan ṭawngṭaiin lawmthu te ka sawi hial a, mipa dang chu ni se ka lungawi nghal theih mai ka ring lo, mahse Mazara a ni tlat a, ani chuan awlsam takin min thlak danglam thei a ni.

(End of Chapter 22)