SUMO DRIVER By Havali Adam (CHAPTER 21)

SUMO DRIVER 

By

Havali Adam

Chapter 21

Ka taksa nghawr dawt dawtah chuan ka harh vuai vuai a, muangchangin ka meng riai riai a, Jail tâng ang maiin ka kut pahnih chu min paw mêktu nghawng zawnah a lo insuih a, hmanhmawh taka min tlanpui dawr dawttu chu Mazara ngei a ni tih ka hre chawpchilh nghal bawk. Ka taksa nghawr zawng chuan ka lu chu a rawn nâ leh ṭhin a, a tur dan chu a kher zawk zawkin ka hria. Mazara chuan ka harh tih pakhat mah a hre lo va, kei tak pawh chu ka ṭawng vel peih lo a ni. 

Zan a nih avangin kawng chu a thim chho vek a, kawngpuiah kan kal tawh a, mahse kan kalna tur la thuizia chu ka hre chiang khawp mai. Kal lamah pawh motor-in kan tlan fê kha a nia, ke ngat phei chuan a va'n hla dawn tehreng em. Hah ve thei lo ang maiin Mazara chu a tlan char char a, ka lu ah hliam tuar mah ila min thlamuan ru tlat lawi a, amah chiah chu ka innghahna awm chhun a ni tawh. Ka nât a phal dawn lo tih ka chiang a, ka thih phei chu a phal bik teuh lo vang. 

"Numam!" a nghawng zawna ka kut ka tih chet rual chuan hlauhthawn aw tak hian a rawn ti nghal a, a tlan lai chu a tawp chat bawk a, min paw lo se chu kan in hmu thei ngei ang, engtin mah chhang lêt lovin ka bei hle hle ta ringawt.

"Tuar hram hram rawh, kan thleng ṭep" a awah chuan manganna leh buai philina nasa tak ka hre thei a, chuti ang taka min ngaihtuahtu leh min venhim duhtu ka nei chu ka lawm tak zet, hliam nei chung paw'n ka hlim ru em em tho. 

Ka mit ka chhing vang vang a, muthilh erawh ka lu nâ avangin a theih loh tluk a ni. A kawr nghawng chu ka pawt ṭai a, ka lu a rawn nât zual chang phei chuan ka hmer tawn tawn a, a chang leh a âwm zawnah ka ṭham leh vak ṭhin bawk. A thin phu dawt dawt chu kawr chhanah pawh ka hre thei a, ka kut te chu a rawng nghawr thei hial a, chu chuan min ngaihtuahzia leh a hlauhthawnzia min hriattir chiang hle. 

Kawi eng emaw zah min tlan pelh pui hnu chuan khaw chhung kan lut a, zan rei lam tawh tih hriat takin thawm te chu a reh ṭhuap a, tûmah meng an awm pawh ka ring tawh lo. Mazara chuan min tlanpui zel a, kan veng lamah ni lovin venglai lamah min hruai a, khawiah tak nge min kalpui dawn tih erawh ka hre chiah lo. Damdawi inah min hruai ka ring deuh tawp a, mahse damdawi in awmna pawh ka hre chuang lo va, rilru fim lutuk lovin kan kalna tur vel chu ka lo ngaihtuah ve neuh neuh a ni ber. 

Step-ah min tlan chhohpui a, zawl kan thlen rualin in lian ve ang reng tak pakhat ka hmu zui nghal a, a hmun vel chu a zawl zau khawp mai. Gate lo awm chu hawn tumin a khawih ri rawk rawk a, a la hawng lawk thei lo zui. A ning ta deuh a ni ang, rum nghutin vawi thum vel a tlawh ri pawp pawp a, Gate chu a sawi chhe vek thei maw le. Hliam avangin chiang nial lo hle mah ila a chet dan chuan min ṭhawng hle a, min tiharhfim thei hial zawk titih a, gate han tlawh chhe thei tur êm chuan ka ring ngai miah lo. 

Concrete building lamah chuan min kal phei pui pawk pawk a, chu building-ah chuan lian deuh tak hian HEALTH SUB CENTRE tih a lo inziak a, min hruaina hmun chu ka hre ve ta chiah. Kawngka chu a chum ri dawt dawt a, a che reng reng chu a hmanhmawh em em a, kei erawh ka harhfim tawlh tawlh thung. Ka lu nâ paw'n kiam lam a pan thei chuang lo, a nât ngaiin a la nâ reng a, a tur ngaiin a la tur ut ût reng a, Mazara taksa nghengin awm lo phei ila chuan nâ ka tih zual hle ka ring. 

"Mi lak tlâk loh ho, lo hawng vat rawh u" chuti ang em ema Mazara awkâ vin chu ka la hre lo, kawngka a chhir pawp pawp lai te chuan ka lo phu zawk a, a thinrim lutuk chuan min tihlauthawng zual vek a ni. 

Nâ zeta kawngka a chhir leh hnu chuan in chhung lamah thawm a rawn awm a, thawm dang a awm lo bawk nen kawngka kalhna pawt thla ri te chu kan hre chiang ta khawp mai. Nu valai hmel deuh hian kawngka chu a lo hawng a, inthiam loh hmel zetin a ṭawng zui nghal mawl mawlh a, Mazara erawh ṭawng tum tawh lo ang maiin a ngawi hmuk thung. Kawngka lo hawngtu chuan light a on zung zung a, Mazara hnenah chuan ṭhutthlenga min mut turin a hrilh zui nghal thuai thuai bawk. 

"A va'n pawi tak! Aizawla ka pasal zin lai tak a ni asin, kei lah chu ka thiamna a beitham si, engtin nge ni ang âw" ka hliam endik mawlh mawlh pahin chu nu chuan a ti vawng vawng a, ka lo beidawng nghal em em ringawt. 

"I thiam dan chuan ti rawh, a lu nâ hi a chhawk theihna tur a nih phawt chuan eng pawh ti rawh, ti ngei ngei rawh" nêm fahran lo hian Mazara chuan a ti nghet charh charh a, min buaiputu tan pawh chuan han hnial ngaihna a awm lo a ni ber e. 

"Eng pawh ni se a chhipvir bul hi a kak a, ṭhui a ngai ngei dawn a, mahse kei chuan ka ṭhui ngam lo a ni. A thi chhuak reh tur leh a tur nasa lutuk tur ven nân damdawi ei tur chu ka hria a, chu chauh chu ka tih theih awm chhun a ni Mazar" chu nu thusawi chuan min va tibeidawng lehzual tak em. 

"Damdawi chu eitir rawh, dressing tal i thiam lo em ni?" Mazara aw chu a la nêm thei chuang lo, hriat nuam loh zetin a khauh hmuk a, chu nu pawh chuan a hlau deuhin ka hria, Mazara hming lâi a hria a, an inhre sa a ni maithei.

"Thi suk ka nei tlat pek alawm le, thiam chu ka thiam tho. Engkimah ka pasal ka ring tawp ṭhin a, min mamawh huna ka pui thei lo che u hi a pawi ka ti ngei mai" chu nu chuan a lo ti leh a, ka dem ta em em bik lo, thi suk neih chuan hliam buaipui a harsat ve khawp ang le.

"A tih dan tal a hria em? Min hrilh la, keima'n ka ti thei ang" phawk lutukin Mazara chu ka en thuai a, ka bula ṭhunu pawh chuan mak tih hmel deuhin a melh chho hâ a, ṭawng chhuah ka tum lai takin amah bawk chuan

"Damdawi leh hmanrua chu va la rawh, muangchan hun a ni lo" a rawn ti vin leh deuh hrawk a, ka bula mi chu rang takin a tho nghal zat a, room pakhatah a tlan lut zui nghal thuai thuai bawk. 

"Min en teh le, i dam leh thuai ang, ka tiam a che" ka hma zawna lo ṭhu hniamin ka biang chu a dawm ran a, mittui tling pamin ka lo en a, a aw dam leh hriat nuam em em te chuan ka rilru a tino zual vekin ka hria. 

Mazara leh hmeichhe pakhat chuan ka hliam chu an buaipui ta mawlh mawlh a, Mazaran ka lu kak lai taka Dettol Anticeptic a hnawih chiah chu nâ ti tak ka ni. Ṭhutthleng ban ka hmer ṭawng ṭawng a, ka thlan a chhuak hial thei. Mazara hlir chu a che zawkah a ṭang a, hmeichhe pakhat chuan bandage leh a mamawh tur thil chi hrang hrang a pe thung a, ṭawn dan tur leh tuam dan tur a hrilh mawlh mawlh bawk. Min buaipui fel hnu chuan ka lu nâ lutuk pawh a zia ta deuh a, mahse chhungrilah a la nâ ru reng.

Kan veng lamah Mazara chuan hmanhmawh lutuk tawh lovin min paw chho a, damdawi ka ei vangte pawh a ni ang tur ut ût vel a awm tawh miah lo. Min pawtu chu a ngawi reng a, inbe miah lo mah ila a chungah chuan ka lawm em em tho. Min buaipui a, ka nât hlauvin a buai phili a, chu baka inngaihtuahna chu a awm bik kher lo vang. A nghawngah chuan nghet lehzualin ka kut ka suih a, sir lama a hawi zeuh a, min ngaihven ru reng tih chu ka hre thei.

Kan in kawt kan thleng a, pitei te chahbi dahna ṭhin bucket chhe ve tawh tak chu a chhuih sawn a, chahbi chu lain kawngka a hawng zui nghal bawk. Ṭhutthlengah ni lovin khumah min mut a, puan min sintir nghal thlap bawk a, a hmelah chuan inthiam lohna nasa tak ka hmu thei. Ngawi rengin ka bul chhuatah chuan a ṭhu a, ka kut pakhat chu a hum ran a, a hmelah chuan hlim hmel hmuh tur a awm lo chiang hle. 

Chhuat aṭang chuan thovin ka bulah a rawn ṭhingṭhi a, ka kut erawh a la hum lum vung vung a, a fawp zeuh zeuh zui bawk. Biak chu ka duh teh na meuh mai, mahse sawi hmasak ber tur ka hre si lo a ni. Ka bianga sam hnawk nuai chu dim tê hian a hui kiang a, a chet dan vel aṭang chuan min tihnat a hlauh ngawih ngawih tih a hriat hle. Rawn kun hniam riai riaiin ka chalah a rawn fawp a, a hmui lum leh nêm takin ka chal a si chiah chu ka hahdam sawng sawng theiin ka hria. 

"Ka tihpalh, ka venghim si lo che a" a rawn ti hniam ruih a, a awah chuan inchhirna leh pawi tihna hlir a lang a, kan inen hnai thawkhat bawk nen a mitmeng chu chhiar thiam rûal lovin a buai a ni. 

"Mazar" ti thawp raihin a biang chu ka dawm a, a lungai hmel leh a inthiam loh hmel chuan ka lai a chhun a, amah khawngaihna hlirin ka khat a, a nihna dik takah chu tu thiam loh mah a ni lo, ka ṭawi lutuk vang zawk a ni.

In kawt lamah thawm a rawn awm a, an thawm aṭang chuan putea te an ni tih ka hre thei. Mazara chu a awm sawn dawn emaw ka ti a, a awm sawn eih lo. A ṭhut ngaiin a la ṭhu reng a, ka kut a hum ngaiin a la hum reng bawk a, putea te thawm erawh a hriat ve vek tho chu ka ring. Keimah zawk chu ka lo ṭang ṭung a, Mazara lah chuan duat takin ka sam a la chul zui a, engmah zahpah a nei ta miah lo chu ka hrethiam lo hle. 

Pindan chhungah putea te chu an lo lut ta ngei a, putea chuan ka pa te lam hrilh nghal a tum a, mahse ka lo phal lo bur. An hriat rual rualin an lo thleng chho nghal duh dawn tih ka hria, buaina ka tawk reng bawk si a, an lakah chuan kan inthlahrung a ni. Ka thisen zawmpui ka chhungte dik tak an ni a, an laka inthlahrung tur chu ka ni miah lo maw le. Ka pa thu kha awih ila chuan emaw putea thu tal kha lo awih ila chuan engmah ka tawk lo vang, ka dam ṭha var var zawk ngei ang. 

Amaherawhchu Mazara berin kal ve turin min duh a, min venhim tur thu min hnutchhiah bawk a, a bul hnaia awm ka lo châk ve tho bawk nen a sawmna kha ka hnar thei ta lo a ni. Ka pa leh putea thusawi aiin Mazara thusawi ka ngai pawimawh zawk a, mahse chet sualna ka pumpelh ta tho a ni. Mazara demna pakhat mah ka nei lo va, engtikah mah ka dem thei ngai lo bawk ang. Ka kalna kawngte kha chik lehzualin lo en ila zawng engmah a thleng lo vang, ka ṭawp lûat vek a ni e. 

"Naktukah ka lo kal ang" ti thum dam dapin Mazara chuan ka chalah a fawp vang vang a, pindan chhungah putea te an awm ve vek tawh bawk si nen ka zak ru em em a, ka lu nâ te chu ka hre chang lo hial zawk.

Pindan a chhuahsan chiah chu ka ruak huai a, a awm loh chu a hriat ngawih ngawih a ni. Putea leh Tlantea chu rei lovah an chhuak ve leh nghal mai a, pindan chhung aṭang paw'n an chengkawl sil thawm chu kan hre pha vek a, keimah avanga an buai turzia ka ngaihtuah a, nuam lo ka ti thar ngei mai. Pitei pawh rei 

awm lovin a chhuak ve ta daih a, a awm chhung khan ṭawng tum ang deuhin a awm ṭhin a, mahse a ṭawng lem chuang lo. 

Lukham hnuaia ka phone chu ka hmet eng a, zan dar 1 leh a chanve a lo pel tawh a, ka rin aiin kan haw har daih. Ka pum chu a ri leh ṭhin a, phat rual lovin ka ril a ṭam a ni. Han sawi ngawt lah chu ka zak ve deuh tho bawk si a, hliam neih nen ka hun hman mêk chu a nuam lo ru hle. Minute 10 hnu velah pitei a rawn lut leh a, ei tur a lo keng lut ta hlauh mai. Ka ril a ṭam tih a hre ru reng zawk emaw te ka ti hman hial a, chutah chaw ngat a la ni zui. 

"Barh i ngai em?" min ngaihtuah hmel zeta a tih chuan nasa lutuk lovin lu ka thing a, ka thin nât loh tehreng nen ka lu chu a rawn nâ pha tho va, nâ ngawih ngawih ni tawh lo mah se han tur deuh ut ût dan chu a la nei pha tho.

"Mazara kha awm lo se chu kan chan che ka ring, vanduaina tâwk palh ta la chuan i chhungte lakah kan inthiam lo kumkhua tawh bawk ang" pitei lam chu ka hawi rang hle a, ani erawh tukverh lam a hawi daih thung a, a lungngaih hmel hle bawk. 

"Hlauhthawnnain ka khat a, tuia i tlâk kha ring lo kan awm tawh lo. I lum thuiin i lumna a awih ang reng si a, keini phei chuan tih ngaihna kan hre tawh lo" amah bawk chuan a tih zawm leh nghal zat a, ka chaw ei lai chu ka tawp ta hmak.

"Health Sub Centre in thlenin amah kha an lo buaipui ve nghal em?" a ngawih vang vang hnu chuan min rawn en chung hian a ti leh sep a, a zawhna chu ka hrethiam lo chiang khawp mai, chhan ngaihna pawh ka hre lo.

"Mazara khan a malpuiah hliam a nei alawm, a hmunah phei chuan thi a chhuak nasa hle asin" pitei thusawi chuan ka thin a tiphu dawt dawt a, chaw ei châkna reng ka nei tawh lo, ka rilru leh ngaihtuahnaah Mazara hlir a awm tawh. 

"Hre lo mah la a awm tho e, nikhaw hre lovin i awm tlat a tin ni! I lum khan mau hmunah i lum tlang a, chhan che a tumna lamah mau phel zumin a malah a chhun a, mahse a rawn man bet hman ta tho che a ni" rizai chu ka hmer vak a, Mazara ka khawngaih dan chu pui tak a ni. 

"Engati nge engmah a sawi loh le?" tiin ka phun chhuak sep a, ka thawk dan chu chawp leh chilhin a dik lo nghal vek a, ka ṭah a chhuak et et bawk a, Mazara lakah chuan namên lovin ka inthiam loh zui nghal bawk.

"A sawi duh i ring reng reng emaw ni le Numam? A thu hrimah engati nge in lo induh tawn ru reng tih i sawi vat loh? Kei chuan rinhlelh dan che u ka nei deuh reuh tawh a, i putea erawh mak a ti khawp mai, Mazara buaipui dan che a hmu chiang ropui si" pitei chu ka zah viau dawn a, mahse ka zah buai duh ta lo law law.

"Ka pa te paw'n an la hre lo, Mazara nena kan inkar hi engmah an la hre bik lo a ni. Hrilh rih lo ula ka duh pite, in sawi lo thei ang ti raw?" ka aw ah chuan ngenna a ri chhuak mawlh mawlh a, ka chhungte chu ṭul ka tih hunah keimah ngeiin hrilh ka duh a ni. 

"Chu lam zawng ka hre lo le, i putea phei chuan zawhna a ngah hmel khawp mai. Hmeichhia hi chu kan inhrethiam vat mai a, mipa erawh an dan a dang deuh a ni" tih leh thawh a rual a, engmah sawi zui tawh lovin a chhuak nghal ta daih.

Damdawi in min chhawk a ni chêk ang chu ka mu meng kar a, ka lu pawh khawih loh chuan a nâ lutuk tawh lo. Fimkhur erawh a ngai hle a, lukham ka kham dawn te chuan ka indim viau a, ka intauh palh ang tih ka hlau ber. Dim tê in ka chhip chu ka khawih a, puana tuam a nih avang chuan a chhah deuh lûkin ka hria. Ka puan sin lai sin ṭha set sawtin ka mu saisir a, zangthal zawnga mut chu a chi teuh lo, nâ tawrh a ni mai.

Mazara bawkin ka ngaihtuahna a luah leh ta, muhil thei lo miau hek! Pitei khan a malpuiah hliam a neih thu a sawi ngei a, mahse engtin nge Sub Centre kan thlen hma zawng kha min tlanpui theih si? Ni lo, ani khan nâ tuar reng chungin min pua a, min tlanpui a ni thei mai ang em? Ni lûl lo, a nâ dawn lutuk, a mal chu a nâ dawn tih ka hre chiang a ni. Ka va'n khawngaih hnuhnawh tak em, Health Sub Centre kan thlen te khan sawi ve mai se chuan ka inthiam lo em em miah lo vang. 

Êngin ka hmai a chhun tih hriat takin ka hmai chu a rawn lum a, ka men rualin tukverh aṭanga ni êng zung lo lut ka hmu hmasa ber a, tukverh parda pawh tawl ka tum chiah chu ka harh chiang teh e! Ka lu vun leh a chhung chu a nâ vawng vawng a, hliam ka nei tih inhre lêk lova ka che chhuak ringawt chu mawl ka inti hle. Zawimuanga che ṭuah ṭuahin parda chu ka pawt tawl a, ni êng a hliah hnu chuan ka mu ṭha leh mai a, mahse ka muhil tawh lo chiang hle. 

Rei tak chu khumah ka mu meng kar a, khaw en dan aṭang chuan a tlai duai tawh tih ka hrethiam nghal mai bawk. Pitei chu a rawn lut a, ka ṭhat leh ṭhat loh a endik a ni ber. Ka chhip chu dim tê hian a en a, rei erawh a en lo. Chu bakah bandage-in a intuam vek a, hmuh chian theih a nih ka ring lo. Min ngaihtuah deuhin a ṭawng mawlh mawlh a, nâ chhawkna damdawi mum vâr lian zet chu min eitir a tum a, huphurh tak ka ni. 

Huphurh em em mah ila ka tan a ṭha miau si a, a tawpa tawpah chuan ka ei ta nge nge. Vawi tam chu ka hnial nghe nghe a, ka ei huphurh ve êm a ni. Choka lamah ni lovin pindan chhungah tukṭhuan eitir min tum a, mahse ka duh bik der lo. Pitei chuan ka taksa chak loh avangin an bula ei chu a remti chiah lo va, ka ei lui ta tho. An vai chuan min ngaihtuah em em vek a, Tlantea paw'n min be lutuk lo mah se chawhmeh te chu min suah awl lo va, putea thleng chuan ka chet hah an hlau vekin ka hria. 

Tukṭhuan ei lai chuan biak in dar a rawn ri a, Pathianni tuk a ni tih ka hre chhuak chiah. Pitei chuan inkhawm lova min awmpui a tum a, putea leh Tlantea paw'n pawi an ti lo hle a, ka tana an inpe zo hlawm lutuk chu a lawmawm rualin a inthlahrunawm duh hle. Tlantea leh putea chu inkhawm turin an insiam mawlh mawlh a, kei leh pitei erawh bathroom-ah kan inbuaipui a, intleuh zuai ka duh vang a ni pakhat. 

Kan inbuaipui fel hnu lawkah Mazara hmel a rawn lang hlawl a, a inkhawm ka rin tehreng nen inkhawm thawmhnaw a inbel lo hrim hrim a, pitei paw'n mak a ti ru viau chuan ka hria. Mazara chuan pitei hnenah min awmpui a tum thu a hrilh tlang nghal hmiah a, kan inkar an hriat vek tawh tho avangin zep si se a nei buai duh tawh lo a nih ka ring. Pitei erawh a rilru a buai hmel khawp mai, min ngaihtuah tho bawk si a ni.

"Sande Sikul ka la kai kim ve tlat alawm le, kai kim lo ila chuan ka inkhawm lo tluan law law ang. Awmpui i tum tlat bawk si a, ka va inkhawm mai ang e" tiin pite chu a ṭawng malh malh a, kei ni lovin Mazara zawk a bia tih ka hria, mahse a mi biak pa erawh ṭawng a tum tawh lo niin a lang. 

Pitei chu a insiam zawh rualin a kal chhuak nghal a, venglaiah daih biak in a awm bawk si nen a kal rei ve viau ang ka ring. Inkhawm tura kal chu a hun ve tawh hrim hrim a, ṭan hmain minute tam a awm tawh lo zawk a ni. Lu tuam burin tukverh bulah ka ding a, Mazara chuan ngawi rengin min en a, ka lam a rawn pan chiah chu thil hriat chhuah ka nei a, ka lung a chhe nghal em em ringawt bawk a, ka dik lo tih a hrethiam a ni ang min ngaihtuah hmel ta hle.

"I lu a nâ em ni?" ti supin ka chhip chu a en a, ka mit a rawn en leh chuan mittui tling pamin ka lo melh chhoh ral a, ṭawng tum ni awm tak hian a hmui a tiche a, mahse ṭawng lovin thawk a la ri ta hawk zawk. 

"I ṭha em?" ka biang tawn tawn a kut hrawl taka khuap lum vung vung hian a rawn ti thum dam dap a, mi â ber tan pawha min ngaihvenzia hai theih loh khawpin min en chhuk ran a, ka mittui chu ka dang seng ta ngâng lo.

"Engati nge? Eng.....engati nge i sawi loh? Engati nge engmah min hrilh loh? Ka ngaihtuahzia che hi i hre miah lo em ni?" ka ti ṭuau a, ṭap chunga ṭawng ka nih avang chuan min ngaihtuah hmel tak zet. 

"Ṭap lo teh Numam" a aw chu a phel deuh phang a, dim zet hian min pawm a, pindan lama min pawm phei lai te chuan a âwma bei hle hlein ka inhnit feih feih a, ka rilruah chuan amah khawngaihna bak a awm thei rih lo a ni. 

"Hetah hian mu hahdam zawk la a ṭha ang" khuma min mut thlaktir pah chuan a ti dam leh dap a, hmun danga ṭhu lovin ka bul chêtah a ṭhu zui nghal a, min duatna awkâ leh a chet dan chuan ṭap mah ila min tihahdam sawng sawng thei tho.

"Mazar, engati nge engmah min hrilh loh?" ka ṭah chhuak lutuk pawh a reh ta deuh a, mu tawh lovin ka ṭhu chhuak zui nghal bawk a, ani ve thung chuan mak tih hmel zet hian min en a, ka zawhna chu a hrethiam lo tak tak a nih ka ring. 

"Hliam i neih thu engati nge i sawi loh? Kei tal chu min hrilh ve ta che, i lakah hian nasa takin ka inthiam loh phah asin, nizana min buaipui dan zawng zawng ka ngaihtuah let phei hi chuan ka awm a nuam thei thlawt lo" ka ti leh ta nge nge, ka biang chu a rawn dawm ta vat. 

"A nâ lo, ka hliam neih hi a nâ lo" a tih rualin a kut chu ka lo vai thlak sak a, ka hmui chu a khur der der a, ka ṭah mai loh nân ka pet fan fan zui nghal bawk a, ṭah chu ka tum em em bik lo, ka ṭah a rawn chhuak leh tlat si a ni. 

"Dawt sawi suh, nizan la lâ khan pitei hnen aṭang i hliam neih dan ka hre vek tawh, mau zûmin i malpui a chhun tih thlengin ka hria, zep tum lo hram teh" ka ṭawng zawh rualin ka inhnit feih a, a âwmah chuan min kuah bet rang hle. 

"Ka venhim theih loh che avang khan ka tihpalh, ka ngaihven tâwk loh che lûatah nâ i tawrh phah bawk a, a pawi ka ti tak zet" ka ban bul chul hauh hauh pah chuan a ti thum chhal a, sawi dik loh erawh a nei tih ka hria. 

"Ni lo, min rawn vuan ding hman lo la chuan tuiah khan ka tla ngei ang. Keima ṭuaiṭawt vang liau liau zawk alawm, ka ngaihtuah êm mai che Mazar. I hliam chu ka hmu duh, a nâ viau em?" tiin zawhna ka zawh zawm nghal a, a hlata awm phal lo ang maiin ka che tur chu min kuah bet run thung. 

"A nâ lo ve, min ngaihtuah suh, nangmah zawk hi alawm ngaihtuah ngai chu!" lungrun zet hian min en a, ka thlakhlelh em em chu hria ni awm takin min fawp zeuh a, tawi têa a nui hmel te chu thlir reng theih se ka ti hial a ni.

"Mazar, i mal chu ka en chhin duh" ti tham ṭiakin a kekawr chu ka pawt tawl riai riai a, kekawr bul a hak avangin thui hlim ngai lo turah ka ngai a, a malpui ka hmu chiah chu a nât hmel ngawih ngawih.

"Engtin nge a nâ lo i tih theih zawk!?" ti hluain a malpui tuamna puan chu ka tawk dê de a, puanah chuan thisen thla ṭhenkhat a la chambang a, a ro vek tawh tho avangin ka khawih ten lo ta law law. 

Rei pawh ka khawih hmain ka kut chu a la sawn daih a, a kekawr chu a siam ṭha a, a chet dan vel chu ka lo en hâw ringawt. Ka biang tawk zeuhin dim tê hian min nam mu a, ka beisei loh lutukin ka sirah a rawn mu thla ve nghal bawk a, ka hamhaih êm avang chuan mi â ang min ti ngawt ang. A saisir zawngin kan mu ve ve a, ka hnung lam aṭang min rawn kuah a, min uap lum nuam ngei mai.

Ka kawng zawnah a ban chu a kham ruah a, keiin a kut phah hlai leh hrawl zet chu ka lo hum ve a, a kut chu ka hmu lian lehzualin ka hria. Ka mit ka chhing vang vang a, kan awm dan thlamuan thlak lutuk chuan ka mut a tichhuak a, zan lama ka mut ṭhat loh vang a ni pakhat bawk. Ka nghawng bul chetah a rawn thaw lum ham ham a, ka lu nâ zawng zawng chu a reh vek thei hialin ka hria, Mazara bula awm zet zawng hliam neih lai paw'n thla a muang hliah hliah a ni. 

Hmui nem zetin ka biang a rawn sik rual chuan ka harh deuh zawk a, ka bula che ri hrut hrut chu Mazara a ni tih meng lo mah ila ka hre nghal thei. Ka men leh meuh chuan thawm ri neuh neuh a tam tawh hle a, ka bulah Mazara a awm tawh lo tih ka hre zui nghal bawk. Khum aṭang chuan ka tho a, tlai lam daih a lo ni tawh a, ka rin aiin ka muttui phian mai. Pindan aṭanga ka chhuah chuan pitei'n min lo be nghal a, ka nawmsam leh nawmsam loh thute min zawt a, ka ṭha tawh viau chuan ka hria. 

Pathianni mah ni se Field tê ah chuan naupangho an infiam luai luai a, ṭhenkhat an inbawl vawm laiin ṭhenkhat erawh an lo in-marble a, hmeichhe naupang tel pawh an tam mai. Field tê bula kawng pêng pakhatah chuan hmeichhe ṭhenkhat an in-rubber zuan zak zak bawk a, damsam lo e ti lo chuan thlir nuam ka ti leh ta hle. Veranda aṭang naupang tualchai chu ka thlir ngawt ngawt a, a changin ka nui leh ringawt ṭhin bawk. 

"A nuam awm bik ê, u Mazaran a awm bik che a nia, ka nu leh pa lah chuan engah mah an ngaih hmel bawk si lo" Tlantea chuan fiamthu deuh tak hian a ti a, ka pangngai tawh tih a hrethiam te pawh a ni ang min fiam leh ṭan tâk, a sarhu lai kha chuan min be mumal lo hrim hrim a nih kha! 

"Nuam tak a ni" nui ver ver chungin ka lo ti ve mai bawk a, min fiam zui ta lem lo va, min fiam pawh ni se ka ngaihsak tawh pawh ka ring lo, Field têa naupang infiam hlim thawm leh che vel ringawt chuan ka mit a la tawh tlat a ni.

Zanriah ei laiin putea chuan kan chanchin chu ka chhungte lam hrilh ṭha a tih thu a sawi a, ka lo hnial vat thung a, keimah berin ka duh lo miau a, an sawi ka ring lo ve tawp. Inkhawm lovin Mazara bawk chuan min awmpui leh a, ka nuamsan ta deuh bawk nen pindana awm ngawt ngawt tawh lovin thingpui te ka lum a, a biak hi chu kan inbe tam ṭhin lo. A ngawih rengna phenah hian min ngaihtuahzia chiang takin ka hmu thei tawh a, chu chu min tihlimtu a ni reng. 

Inkhawm ban thlengin a lêng tlang a, putea te nen chuan thil an sawi a, lo lam hna bawk an sawi leh a, ka ngaithla tui em em zui. Chuti anga ram lam chanchin an sawi lai lo ngaihthlak chu a nuam ka ti phian a, ngaihnawm pawh ka ti hle. Thingpui ka lum leh a, pitei te ho min en dan chuan min tilai ṭep ṭep ṭhin. Mazara nen kan inngaizawng tih an hre vek tawh a, thawvenna chen chu nei mah ila ka lai ru ṭut zel. Kei ang lo takin Mazara erawh a awm pangngaiin a awm mai a, lai hmel pawh a pu ve eih lo.

Chumi zan aṭang chuan Mazara chu a lo lêng chho zantin ta ziah a, putea te paw'n inhmeh min tiin min duhpui ve viau chuan ka hria. Nilainia haw tur ka nih vangte pawh a ni maithei, chhun lamah pawh a service vak ngai lo. Zan khat phei chu ka thingpui siam a thlum lutuk a, nuih a za duh khawp mai. A hang hlira in ṭhin kha a thlum ka pe ringawt a, ka tilui pawh a ni lo, a thlum a in ṭhin emaw ka ti thut a ni ber. 

Nilaini kan thleng a, ka lu pawh tuam ngai tawh lovin a dam chak hle a, dim erawh a la ngai hle thung. Mazara chuan Aizawl lamah min phur thla a, a motor ngeia min chhukpui chu ka lawm ru hle. Passenger dang chuang an awm ve tho a, an ṭawng duh bawrh bawrh hlawm phian bawk nen ka chuang nuam ang reng. Mazara bulah ka ṭhu a, mi dang chu a seat hnung lamah an ṭhu thung a, min rawn ngaihsak vak lovin ka hria. 

Aizawl khaw chhung kan lut a, pitei te khua ka ngai nghal vawng vawng mai. Thintlang khaw lam ngaih ai mah chuan Mazara nen kan inhmu khât tawh tur chu ka huphurh lawk a, ani paw'n a ruk tak chuan a huphurh ve tho ka ring. Passenger dang zawng chu kan thlah kual hmasa vek a, Sumo Counter thleng chu min phur phei bik a, kan veng lamah kan tlan phei leh a, inṭhen hran chu ka phur lo hle a, mahse a ngai miau si a ni. 

Kan in thlen hma kawng kawiah chuan kan ding a, a lam ka hawi rualin min lo kuah nghal a, min kuah deuh thut mah se min dim thiam viau tho. Ka sam chu ka bengah zepin min fawp ta vawng vawng a, min fawhna chuan ka taksa chhungril zawng zawng a fan chhuak vek a, ṭum dang ang bawkin ka chawmawlh leh ta vek mai. Kan infawh zawh chuan thawk dan mumal lo zetin ka en a, ani erawh a lo maimitchhing daih thung. 

Kan chal chu a insi rial a, sawi lo mah se min ngai ve dawn tih chu ka chiang a ni. A biang chu ka khawih a, a khabe phir lai tak chu ka zut leh a, ka zak buai duh tawh bik lo. A rawn men rualin a vawi khatna atan a fawp hmasa zawkah ka ṭang a, mak ti deuh mah se rei erawh a ni lo chiang hle. Duhthaw deuh hian min fawp tawn tawn a, ṭawngka ni lovin chetzia zawkin kan inngaihtawn dawnzia kan inhrilh mawlh mawlh a, chuti ang awm reng mai chu ka duh hial a ni. 

Kan in lam pana kan tlan leh lai te chuan ka kut a hum ran a, a changin a fawp leh zauh zauh ṭhin bawk. Motor thawmah ka chhungte chu an lo chhuak sap sap a, Mazaran ka bungrua zawng zawng chu in chhungah a khai lut vek a, rei lo tê ṭhu khawmuangin thingpui a in a, ka nu leh pa chuan an be ṭha hle. Chik deuhin an inbe lai chu ka lo en kar a, ka nu leh pa chuan an nel viauin ka hria. Nel em em se ka ti zawk, a chhan chu nakin lawkah Mazara nena kan inkar dik tak chu an la hre dawn tho tho. 

Kan chhungkuain Mazara chu in kawt thleng kan thlah a, kan vai liam lai chuan motor darthlalang aṭangin min en reng bawk. In chhung kan lut a, room-ah lut tlang nghalin khumah ka bawk thlawp a, Mazara chu ka ngai nghal ngawih ngawih. Ka châm chhung kha rei tih tham a ni lo va, mahse thil tam tak a thleng hman tlat a ni. Tin, hriat belh ka neih phah ṭeuh bawk a, ka tan chuan thingtlanga hun hman chu hlawkna a ni ringawt. 

(End of Chapter 21)