SUMO DRIVER By Havali Adam (CHAPTER 20)

SUMO DRIVER 

By

Havali Adam

Chapter 20

Tukṭhuan ei laiin putea chu chengkawl khawrhnaa kal ve ka dil nawn leh ngat a, ka pa hrilh hmasak phawt a ṭhat a thu sawi a, kei chuan hriattir ṭul ka ti teuh lo. Ka chhungte hriat lova kal ka tum zawk a, lo zu hriattir vel chu a tih chi lo lutuk, eng ang paw'n dil ila an phal dawn chuang lo tih ka chiang, ka chhungte an ni tlat. Chaw ei chhung zawngin putea chu ka dil char char a, a phal ṭha duh lo ngei mai. Pitei leh Tlantea erawh an ngawi reng a, inrawlh an tum lo hrim hrim niin a lang. 

"Lui lam phei chu fimkhur a ngai asin, chet sual a awl bawk si" min en vawng vawng pah hian putea chuan a rawn ti a, kei ang bawkin chaw pawh a bar tawh bik lo va, kei phei chu chaw ka ei lohna a rei tawh.

"Ka fimkhur ang, ka ti tak tak pute. Ka kal ve chu phal hram teh, kar leh nilaini khian ka chhuk tawh dawn a nia, ka awm rei tawh dawn lo" ngen ngâwl deuha ka tih chuan a thaw hak a, mi dang pahnih chuan kan inbiak dan chu an lo ngaithla reng ringawt.

"I awm dan vel hian ka ngaih a tiṭha lo alawm, i âi tlata hriatna ka nei" a thusawi awmzia chu pakhat mah ka hrethiam hauh lo, pitei lah chuan min lo en rang em em leh nghal.

"Eng nge âi?" ka ti mawl tawp a, ka hma zawna ṭhu Tlantea chu khamin a tho va, putea lah chu a rawn ṭawng lawk duh lo va, muangchangin antui chu a hawp a, min chhan dan tur chu hriat ka châk ru tawh hle.

"Mihringte hi kan thih dawn hian eng emaw riau hi a awm ṭhin a, tui lama thi tur chuan namên lovin lui kal an chak a, rama lama thi tur pawh an bang chuang lo. Nang pawh hi i che sual ang tih mawlh ka hlau, lui lamah kan che tlâ dawn leh nghal" dam dapa a tih chuan ka ngawi ta kar. 

Thihna lampang chuan ka rilru a tikhingbai zo vek a, kal châkna chu ka la nei tho a, mahse putea sawi vang nge pawh ka hre lo, ka hlau ru tlat a ni. Lungngai zetin ka tho a, thleng silna lam ka pan lai te chuan ka ngawi reng a, Mazara nena chengkawl khawrh dun ka châk tehreng nen ka kal thei dawn ta lo chu ka ui ngawih ngawih. Thleng sil nghal lovin pindanah ka lut a, ka luh dawn chuan pitei leh putea ṭawng thawm ka hre miah lo, min en reng te pawh a ni mahna. 

Khuma ṭhu ngui buaiin pawn lam chu ka thlir a, vân pawl thiang mawi tak chuan khaw ṭhatzia a tarlang a, ni pawh a sa ṭha ver vawr khawp mai. Ka putea te nupa chungah chuan han lungawi lo ringawt dawn ila ka ṭhatna tur bak an duh lo tih ka hre chiang si, mahse ka lung a dam hlawl lo a ni. Lukham hnuaia lehkha them chu ka la chhuak a, ka chhiar nawn leh a, Mazaran min venhim tur thu a ziah chu ka chhiar nawn tluk tluk a, chawp leh chilhin ka harh chhuak nghal. 

Pindan aṭang chuan a tlanin ka tlan chhuak titih a, chengkawl khawrhna ah chuan ka kal ngei ngei a ngai a ni. Ni e, engmah ka hlau tur a ni lo. Mazaran lo kal ve turin min duh a, min venhim tur thu min hnutchhiah bawk a, ka putea thusawi aiin Mazara thusawi chu a lêt sang tam takin ka ring zawk a ni. Lo che sual dawn pawh ni ila ka bulah Mazara a awm tlat dawn alawm, min chhan hman vek dawn tih ka chiang a ni.

"Pute, ka kal ve duh, khawngaihin ka kal phal hram teh. Ka theih tawpin ka fimkhur ang, ka tiam a che" a ṭhutna bul ka thlen rualin ka ti nghal mawlh mawlh a, Mazara thu min hnutchhiah chu sawi châk tak ka ni, sawi a chi der bawk si lo. 

"Phal mai teh Paa, a kal châk dan hi a pui em mai. A che sual kher bik nâng, keini kan awm a, kan bul hnaiah kan awmtir reng mai dawn alawm, ani paw'n tlat fal a duh teuh lo vang" pitei chu a rawn ṭawng chhuak ve ta, pitei talin ka kal a phal chu ka lawm tak zet. 

"Ka phal ni mai rawh se, mahse ka bulah bak i awm tur a ni lo" a chaw ei lai leh lai lo ka ngaihtuah hman tawh lo, lawm lutuk avangin putea chu ka va kuah chawng chawng a, pitei pawh a lo nui tawp.

"I va'n fel tak em, ka putea ni awm reng i lo ni. Ngaihsânawm si, nupui leh fate tan pa ṭha ni bawk, i fel ngawih ngawih" kuah reng paha ka tih chuan a nui chhuak hawk hawk a, chaw ei lai a nih avangin ka kuah rei hran lo.

Pindanah chuan ka tlan lut a, nui ver verin ka thawmhnaw bawm chu ka hai zui nghal mawlh mawlh a, eng ber nge hak tur ka hre chuang lo. Hak tura ka dah chhuah sa te chu ka ha duh leh lo vel a, a lang lo rûamah ka phi chêng mai. Hna thawh thawmhnaw deuh hlek tur ka zawng a, mahse engmah ka nei lo, ka hmu lo bawk. Kan chhoh tirh khan hna thawh ka inring lêm lo va, chu vanga hnathawh thawmhnaw nei lo pawh chu ka ni. 

"Eng nge i tih dawn?" Tlantea chuan a rawn ti a, a lo luh tirh khan mak tih hmel zetin min en kha a nia, putea'n chengkawl khawrhnaa ka kal ve a phal tih a la hre lo a ni ngei ang, a awah pawh chuan mak tihna a la awmin ka hria.

"Chengkawl khawrhnaah ka kal ve dawn maw le, chaw ei lai te khan min lo dilpui ta che, ka ngei hmanzia che kha! Putea'n kal a phal ta hlauh zawk a, ni lo se chuan nangmah vanga kal lovah ka inngai ang" ka tih tawn tawn lai chuan

"Ringawt a che! Inthlak leh vek rawh, tuma'n chhun chhunah chengkawl an khawrh ngai lo. Tlai dar 4 leh a chanve bawr velah daih kan kal ang, zak ang chu!" a lo ti hmak a, ka chalah a rawn nam deuh sawk bawk.

"A va ho tak, pawi lo, ka kal dawn tho. A nih chuan khaw'nge kal i tum? Engati nge iptê te i ah leh tâk?" tiin ka zawt ve leh mai a, kal hun tur ka hre lo chu pawi tihna em em ka nei hran lo, ka lo insiam lâwk tihna a ni mai.

"Sava ka veh daih dawn, u Mazara ka zu sawm nghe nghe te'ng, ani pawh vawiin chu a awm mai mai ka ring" mitkô sân zeuh zeuh paha a tih chuan ka lo ner khum a, pindan aṭanga chhuah a tum chu ka pawt ding chiang hle. 

"Sava veh hi sim rawh, khawngaihna i nei ve miah lo em ni? Nungchate humhalh a ṭul tehreng nen, hetia i lo thah zel te chuan sava hmuh tur an awm tawh nâng" thutak deuha ka tih chuan a nui tawi tak a, ka thusawi chu ngaihnep hmel tak a ni. 

"I sawi ho êm mai, u Mazara nen sava kan veh dawn a, kan bula lo kal ve tum miah suh. Nang chu inah hian lo awm hle hle la, i aiawh atan hmeichhe dang u Mazaran a hruai maithei bawk" tih leh chhuah a rual nghal a, Mazara leh hmeichhe dang awm dun tur chu ka phal teuh lo. 

Hmanhmawh zet hian ka tlan chhuak a, pitei min lo biakna pawh ka chhang si se hman tawh lo. In kawt ka thlen chuan Tlantea hmel awm reng ka hmu tawh lo va, kawngpuiah chuan ka tlan thla char char a, ka hmuh meuh chuan ka hah hle. Ngawi reng hian min lo en vel reuh a, ka ngei lutuk chu ka chum pawp pawp a, amah avangin ka hah hrep phah a, chum tih vel mai mai chu a tawrh ve a ngai. Ka kal phal lo ang deuh te chuan a awm vel a, kut kan inthlak hrep lo chauh a ni.

Mazara te in kawt kan thleng a, tlangnêl taka Tlantea a luh theih laiin kei chu ka lut ngam lawk lo va, Mazara nu ka hmu zak a ni ber. A rukin kan inngaizawng bawk si a, a hriat hunah chuan mak a ti ve ngawt ang. Thingzai inchherchhuan bula derhken par chu ka sik neuh neuh a, pawna lo nghah chu a fuh ber ka ring a ni. Ka tum loh lutukin derhken par chu ka sik chhum hmawk a, ka khawih zawm tawh lo chiang teh e!

Thawm awmna lam chu ka hawi phei a, nui sen senin Mazara chu ka lo en a, ani erawh chuan hmel pangngai reng a pu a, mak a ti ve deuh chuan ka hria. A hnunga hmeichhe pakhat lo lang ka hmu chiah chu ka nui tawp nghal riai riai a, chu nu chu thiknain ka khat leh nghal tawh. Tlantea khan a sawi mai mai emaw ka ti a, dawt a lo ni awzâwng lo. Chu nu lah chu Mazara hnaih takin a ding vel a, Mazara reng reng pawh chuan engah mah a la ngai lo zui. 

"I lo kal ve dawn em ni?" ka dinna bul a rawn thlen rualin a ti sup a, lungawi lo ru zet hian ka lo chhoh melh ral a, a chhan pawh ka chhang peih rih lo, mi â a ni lo va, ka mitah chuan hmeichhe dang ka thikzia a hmuh thiam vek ka ring. 

Tlantea lamah chuan ka kal ta daih a, Mazara chuan min en reng tih ka hria, mahse ka lung a tiawi lo laklawh tlat. Kawng chhak lamah ka kal a, a laiah Tlantea leh ka hmeichhe thik em em an kal bawk a, Mazara erawh a thlang berah a kal thung. Tlantea taksa phenah chuan ka kal zel a, Mazara nen inhmu thei rih lo ila ka duh a ni ber. A duh leh a bula mi en se, ngaihven vel bawk se, kei chu min rawn ngaihven miah suh se, chengkawl khawrhnaah pawh ka leh lo tawp dawn emaw ni le.

A hmuh hlau zetin Tlantea phen aṭang chuan ka bih thla dêk dek a, a hmel reng ka hmu tawh miah lo. Ka kal dan chu ka siam rem deuh a, kawng thlang lam chu ka zu hawi thla leh a, ka la hmu chuang lo cheu, khawiah nge a awm hman pawh ka hre lo. Ka kal pangngai leh chiah chu ka kut a rawn lum vung vung a, ka kut chelhtu chu tu nge tih hrilh kher ka ngai lo chiang hle. Ka kut chu lak chhuah ka tum a, harsa tak a ni. A hum nghet sauh zawk a, a hnuah phei chuan ka tum buai duh ta lo law law. 

Hmeichhe pakhat lo kal ve chu kan lam a rawn hawi chho zauh zauh a, lo chhiat khum vak ka châk thei hle. A hma aṭang tawh ka mil lo ve hrim hrim, duh aiin Mazara a nêl mah mah a ni. Ruaiṭhehna ah ni se an bulah a ṭheh vel a, kan len dun dawn lahin lo betu a ni leh a, tunah a lo kal ve leh bawk a, Mazara nen kan inngaizawng tih chu hre mawlh mawlh mai se ka duh. Kan inngaizawng tawh reng nâ a, hmeichhe dang nen an din dun emaw an awm dun hi chuan ka thik ṭhin bawk si, ka duh lutuk tawh a ni ber, Westlife tih vel ai paw'n he thingtlangpa hi ka vei bur a ni. 

Kan kal zel a, hnim tamna deuh kan thleng a, kawng chu a tê tawh hle bawk. A hmasa berah Tlantea a kal a, a dawtah Mazara lo hnaih ve chhentu hmeichhe pakhat chu a kal a, kei chu a hnung ber dawttu ah ka kal a, Mazaran hnung a dawl thung. Thing lian pui pui zarah chuan hrui a zâm nuai a, chung thing zâr kara ni êng lo lut te chu mawi ka ti em em a, kalkawng en ṭha mumal lova thlir vawng vawng chang pawh ka ngah mai. A mawi êm asin, Pathian thil siam mawizia chu thingtlang aṭang bawk ka hre leh ta. 

Vawi khat phei chu ka kal sir lutuk a, kawng thlang lamah ka tawlh thla ṭep a, Mazaran min lo dawm hman lo se chuan ka che sual chiang khawp ang. Fimkhur turin min ti lo va, hauh pawh min hau chuang lo va, ngawi rengin min veng tawp a ni mai. Tlantea leh hmeichhe pakhat chu an titi dun thei phian a, hnung lam an rawn ngaihsak teh chiam lo bawk a, ngaih a ṭha duh khawp mai. Ka hnunga mi ren run lah chuan mi uap hneh ang reng si a, nuam ka ti veng veng thei. 

"Aw haw le! Khiang kunga khi Vahrit ka hmu a nia, i perh dawn nge ka perh dawn u Mazar?" Tlantea hawina lam chu kan hawi ṭhap a, a sava sawi chu a lian ang reng viau a, a rawng zawng zawng nen chuan a rapawm lek lek bawk.

Mazara che chhuak tur chu ka lo dang vat a, nungchate tichereu zawnga a che tur chu ka phal ngâng lo a ni. Min melh chhuk run a, kei chuan ka phal lo tih hriattir tum takin lu ka thin khum a, ka thu a awih chu ka lawm tak tak a ni. Tlantea hnenah chuan perh zawk turin a hrilh a, ka hmeichhe nel loh zeti chuan ei loh hmel deuhin min lo en a, a hmuh lai ngeiin Mazara kut chu ka hum a, a hawi sawn rang khawp. 

Kei aiin a upa dawn tih ka hria, a hmel leh a ṭawng dan aṭang a hriat vek. A mizia vel chu ka ngainat chi a ni hlawl lo, a ruka sual deuh chi niin ka hria. Tlantea chuan a perh ṭhelh hlauh a, a uizia thu hlir a sawi chhunzawm nghal a, nungcha humhalh ka sawi dan vel chu a sawi chhuak bawk a, ka hmaa hmeichhe ding chuan min rawn melh a, ka lo melh let hrep a, mipa pahnih chuan kan awm dan chu an hrethiam hlawl lo. Min en chhung chu ka en lui ve ngat ngat a, ka bulah Mazara a awm bawk nen tlawm ka tum teuh lo.

"Khawpui mite hi chuan engmah an hrethiam tak tak hleinem, thingtlangah awm ve se an hrethiam chauh ang. Nungcha humhalh tih mai mai, perh tla ṭeuh rawh Tlante" hawi sawn hmasa zawka a ṭan hnu chuan a ti kher a, a ṭawngkam mei nei zet chuan ka lai a chhun pha tlat. 

"Nungchate hi kan humhalh a ngai hle zawk, Pathianin duh taka a siam ve tho an ni a, kan lo that zel ringawt hi a dik ber lo" ka ti lêt ve ta salh a, kan boruak chu a ṭang ṭha sawt hle a, mipa pahnih chuan an hrethiam tawh ngei ang. 

"Sawi hi chu a awl alawm, khawpuia in khawsak tam avangin i hrethiam ve tak tak chuang lo vang" a thusawi engkim chu ka huat tâwk a tling em em vek a, zah pawh dawn lova chhan hmawk hmawk mai chu ka duh hial a, ka la insum hram hram a ni.

Kan kalna hmun chu a pilril tial tial a, ka bulah Mazara awm tlat lo se chuan hlauh avangin ka haw daih tawh ang. Ka bula a awm chung paw'n ka hlau ru tho va, ka sawi lo mai mai zawk a ni. Tui luang ri her her bulah kan chawl a, tui te chu kan in a, kan inphih dai bawk a, mahse chung lai ram chu ṭih rukna riau ka nei tlat tawh. Thil ri hlek se dawih hmel deuhin ka hawi vat zel a, thinglulûang ṭhenkhat phei chu ka zawh ṭha ngam meuh lo. Chu bakah a nal hmel hlawm bawk si a, ka fimkhur thei hle. 

Vawi leh khatah ka lêng dâwr a, ko pangah ka bet ran a, chuti teh thut chuan Mazara chu a rawn chet ka ring lo. Chiang zet hian min en ran a, min awm hnaih tial tial bawk a, a chet dan chuan min tihamhaih hman hle. Ka biang ding lam chu a kut vei lamin a nul thuak thuak a, Tlantea te lam hawi ka tum rualin amah en tur chuan min kuai her thuai a, min fawh ka rin avangin ka lo maimitchhing ta ringawt. Ka chalah a chal a rawn nghat a, a thaw rimtui zet ka hip luh rualin ka meng chhuak leh ta nge nge.

"Pathianin inmamawh tawn vek turin min siam; nang leh kei tiamin" ti supin ka hmuiah a rawn fawp zeuh a, a inlak hran hnu chuan min en reng a, a rei loh tehreng nen damdawi thlum tak in zo chiah ang maiin ka hmui chu ka liak a, ka tum pawh a ni em em lo. 

"I duh leh em ni?" tih leh min fawh chu a rual nghal zat a, a vawi hnihna erawh kan infawp rei ta deuh a, min fawh dan lungrun zet chuan min tituiral lo chauh a, khawi hmunah pawh awm ila thlahlel ngawih ngawh tura min fawp thiam tlat chu a mak a ni. 

"Nichina i sawi awmzia kha ka hrethiam lo Mazar, eng i sawi tumna nge?" kan awm hran hnu chuan ka ti a, ka thaw hip luh dan chu a la rang hle a, chuti ang bawkin ka thinphu pawh a la pangngai lo khawp.

"Pathian thil siam zawng zawng hi inmamawh tawn vek kan ni; inring tawn tur kan ni bawk. I hriat tur chu Hruaikimi kha chhang tawh suh, a ṭul lo" a thusawi avang chuan mak ti zetin ka en chho hâ a, kiai sukin ka hmui sirah a rawn fawp leh zeuh a, kei chuan engmah tihna châng ka la hre lo tluang zel thung. 

"Kan kal dawn em ni ang?" ti lehin ka kut a rawn chelh a, min kai kal titih zui nghal a, a thusawi dik ka tih em em rualin thil dangin ka rilru a luah tlat a, chu chu mak ti zeta ka enna chhan pawh a ni.

"Engtin nge khang thu kha i hriat a? Khawi aṭanga hria nge i nih ka tihna? Ka rin loh lam daih i rawn sawi alawm, ka ti tak tak Mazar" ka ti ta mawlh mawlh a, a rawn sawi dik lutuk chu mak ka la ti reng.

"A dik lo em ni?" min en chuang lo va, a kal ngaiin a kal reng a, a ṭawng hmuk hmuk dan leh a awm dan ngel ngul hi chu a mizia hre chiang lo tan chuan a nelawm loh ve ngawt ang, kei paw'n a tirhah ka nel bik miah lo. 

"A dik lutuk zawk, dik tak a ni. Ṭul miah lova nungcha kan suat erawh a ṭha lo ka ti, ram timawitu an ni tlat. Pawl engzah thleng nge i zir a Mazar? Kan inngaizawng tawh tho va, ka zawt tawp mai che" ka ti zung zung a, ka insum leh thei ta lo, a mak hi ka ti ṭhin.

"Pawl 10" a tih chuan ka mak tihna a zual a, pawl 10 chiah zir thleng si khan kan College Principal te thusawi tur awm tak a rawn sawi daih a, he pa pui roh hi a ngawichawi tak nâ a, mi namai a ni lo, zun a ngah ang bawkin a thluak a ṭha a nih dawn hi! 

"Pawl 10 thleng bak kan khuaah hian zirna a awm lo" amah bawk chuan a lo tih zawm leh nghal a, pangngai taka kan han titi dun thei te chu nuam ka ti ngawih ngawih, ka mood chhe zawng zawng a tiṭha vek theiin ka hria.

"A rei tawh awm si a, in hun lai chu ka hmu chhin châk reuh" nui sen sena ka tih chuan nur nang hian min lo en thung a, chutah aw kî hniam deuh ruih hian

"Rei tawh awm" a rawn ti nawn sup a, ka thusawi dan kalhmang chu ka ngaihtuah lêt a, nui tawp chiang tak ka ni, ka ṭawngkam aṭang chuan upa tawh lutuk turah ka ngai emaw a ti ngei ang. 

"Ka sawi awmzia chu i naupan lai ka hmu chhin châk mai mai maw le, i hmelṭha awm reuh si a, chu lam daih chu alawm ka lo ngaihtuah ni. Awi, ka sawi tum a ni leh lo...eng lo...kal ang" hmelṭha ka tih thu a hre ta chu zak tak ka ni, ka ṭawngtheih man ka hmu leh ta. 

Ka kal chak viau emaw ka ti a, ka hnung lawkah a lo kal leh reng tawh a, mahse a ṭawng chhuak lo hrim hrim thung. Kan kal chak thawkhat bawk a ni ang Tlantea te pahnih chu kan va pawh vat a, Hruaikimi chuan min lo en chik leh ngar ngar hle. Mazara khan a hming sawi lo se chu ka hre tawp lo vang, ka u rual daih mah ni se u kher ka tum lo, a ngeiawm thiam ve em mai. Mazara nen kan inngaizawng tih a hre tawh bawk a, lo nel ve vak lo se ka duh. Ka thik thu a chhe viau chuan ka hria, mahse Mazara pawh a thik thu a chhe ve tho, pathlawi mai mai a thik ve tho a nih kha!

Ka sawi vang nge ni Mazara chuan sava perh a tum ta reng reng lo mai a, remchang a hmuh paw'n Tlantea hlir a kian a, Tlantea lah chuan a la perh tla thei lo em em zui. Thui fê kan kal hnu chuan kan chawl a, Mazaran haw a rawt a, tuma'n kan hnial eih lo, hnial enah pawh kan en lo hrim hrim. Haw lamah chuan telhawng hawn an sawi a, eng nge a nih ka hre leh ta hauh lo mai. Telhawng hmel ka hmu chiah chu hlau tak ka ni, Hruaikimi lah chuan hriat nuam lo zet hian

"Nula ve si telhawng pawh hriat loh, chutah i la hlau zui a nia" a rawn ti fak fak a, min nuihsawh tih hriat deuh hian a nui zui hak hak bawk a, Mazaran chhang tawh lo turin min hrilh lawk lo se chuan ka chhang lêt chiang khawp ang. 

"A ei pawh i ei ngam dawn emaw ni le, hlauh ngah lutuk hi chuan chhuah ve phêt tum pawh hi a fuh ber lo" amah bawk chuan a ti leh a, mi dang erawh kan ngawi ṭhap a, kei phei chu Mazara bulah ka ding daih nghe nghe.

"Mazara kha i dip vel ang e, a bul hnaiah khan awm vak suh. Telhawng kha a cho chhuak thei lo mai ang asin, hetah hian lo chhuk daih rawh" thinrim zetin Hruaikimi chu ka melh a, a ṭawng tam mah mah tawh a ni. 

"Hruaikim, i duh chuan i haw thei, tuma'n kan dal lo che" Mazara chuan a thil chawh lai tawp meuhin a ti ram hmuk a, a aw chu palzam mai mai ngam loh khawpin a khauh nghet charh bawk a, mi dang laka min chhanna awkâ ka hre chiah chu ka hlim ru nghal veng veng. 

"A lo nih vel tak chu! Lo kal loh tawp tur hi a nia, min sawm lo la chuan ka lo kal tawp lo vang" ti hmawk hmawkin a kal tau nghawng nghawng a, haw daih mah se pawi tihna chhe tê mah ka nei lo, a thawven thlâk huai zawk ang chu le.

"U Hruaikimi chu hniak phawi lovin dawt a sawi thei tih ka hre ve chiah, a fel viau emaw ka lo ti asin le. U Mazar, i sawm lo a ni lo'm ni? Tukin khan amah zawkin lo kal ve a duh thu a sawi zawkin ka hria" Tlantea chuan a lo ti a, Mazara erawh ngawi rengin telhawng chu a cho mual mual a, hmeichhe dang a sawm ka ring lo bur.

Telhawng chu kan hawn ta ngei a, a hmel chu rapawm ka ti tlat a, mahse Mazara berin a tui thu a sawi miau a, a tui ka ring ve leh tawp. Kawnga kan kal chhung zawngin Hruaikimi a haw tir dan chu ka ngaihtuah let a, a va han pâ ngawih ngawih tak. A chang leh ka khi ver ver a, mi dang laka min chhan vel lutuk chu a nuam chiang a ni. Hruaikimi reng reng pawh kha a ṭawng tam ve em alawm, a ṭawngkamah huat tur hlir a awm bawk si, Mazara min chhan danah mawlh khan ka luangliam hnuhnawh ta a ni. 

Khaw chhung kan lut a, Tlantea nen chuan kan inchhaih leh zauh zauh ṭhin a, mi ṭhenkhat chuan min en duh hlawm thei khawp. Min hre lo an tam zawk dawn tih a chiang reng a, kei paw'n tute nge an nih ka hre bik chuang lo. Tlantea bialnu kan hmu hlawl a, ka'n chhaih tak tak mai a nih kha! A bialnu zawk chu zah avangin a sen vek a, a la naupan hmel bawk si a, a lawmawm reuh tawp. Tlantea erawh a lo inla pâ ve nasa mai, ka chhaih lai thei der lo. 

Venglai kan thleng a, Mazara te inah kan peng kawi zawk a, a nu chuan min lo be ṭha siam siam hle. Nu nelawm tak a ni a, a ṭawngkam hriat a nuamin ka nel nghal thuai bawk, mahse zah rukna chu ka la nei deuh tho. Mazara te in kawta kan chhuah laiin kawm chhak aṭang Hruakimi'n min lo en reng a, a awmna chu an in a nih ka ring. Mazara te in leh an in a inhnaih bik lutuk chu ka thik ṭep a, mahse ka thik duh leh ta lo, en liam mai mai a fuh zawkin ka hria. 

Kan veng kan thlen chhoh chuan khua a lo hniam leh ruih tawh a, dar 3 bawr vel chu a ni tawh maithei a ni. In chhung kan luh hnu chuan Tlantean telhawng a phawrh a, putea chu a lo insiam malh malh tawh a, pitei'n kan thil hawn chu a lo buaipui thung. Chawhmeh atan tiin pitei chuan a chhum nghal a, telhawng an siam dan vel chu ka vawi khat hmuhna a ni a, ka mit a titlai hle. Hnathawh kawr ka hak sa avangin insiam leh chuan vak a ngai hran tawh lo va, tapchhakah chuan ka ṭhu ta reng ringawt. 

Telhawng chu thir bel ûng ve lampang tawhah hian pitei chuan a chhuang so bawrh bawrh a, ei chi a ni tih ka hriat tirh kha chuan chhum a ngai kher tih pawh ka hre lo. Ka en duh ngawih ngawih bawk a, pitei chuan chhum hmin thlap a ngaih thu te, chhum hmin lova ei chu hrawk a thak duh thu te min hrilh liam liam a, a hmin tawh leh tawh loh hriat tumin ka hawng deuh chhen bawk. Ka rin ai takin kan hawn tam ang reng a, sava tih vel ai chuan a hlawk daih zawkin ka hria, chawhmeh a ni nghal bawk si. 

Putea chuan chengkawl khawrh tura kal hma inei puar lawk ṭha a ti a, ngawi rengin chaw ei ka siam ve mai a, chaw eina ah chuan telhawng kan hmeh ta ngei alawm, ka rin phak bakin a tui, ka kâah chuan a tui thlawt a ni. Mazara sawi a nih avangin ka ei ve mai mai duh lek chauh kha a ni a, mahse a duh ber berah ka ṭang ta hial zawk. Chaw sa khu rum rum bar paha han hmawm zauh zauh te chuan a tui em em a, a âl lo deuha ka hriat chuan chi ka liak leh mai a, khawpui chawhmeh tam tak aiin ka duh daih zawk a ni.

Kan inei puar fel a, Mazara hmel pawh kan hmu har lo. Tun ṭum a hnathawh kawr rawn hak chu ni dang zawng aiin inhmeh ka ti zual a, a tawt lam lek lek emaw tih theih turin a kawr hak chu a tawn mar a, mahse a taksa inphut mawi tâwkzia leh a taksa lenzia a lang chiang sawt thungin ka hria. Keini ang lo takin kekawr bul a ha daih a, a chawn hmul thleng chuan en chik tak ka ni. Pheikhawk pum a bun leh tawp a, ani hi zawng engtin pawh inchei se a inhmeh thei zel a ni e. 

Lui lam panna kawngah chuan kan kal a, putea leh Mazaran mezial an zu a, ni chu a tla titih tawh bawk. Motor lo tlan apiang chu putea'n a lo phar zel a, mahse tûmah an ding duh chuang lo. Metal road-a kal kan nih avangin kan kal rei chuan ke a kham thuai dawn tih ka hre ran a, motor chu phar ding thuai thuai se ka ti ru hle. Kilometer 2 vel kan kal hnu chuan an phar ding ta, pick-up motor hi a lo ni a, a khalhtu tih loh chuang dang an awm lo va, a tih chi tak tak a ni.

A hma lamah putea te nupa leh driver an chuang a, a hnung chung nei lovah kei leh Mazara leh Tlantea kan chuang thung a, kan tlan chak bawk a, thli a thaw nasa ang reng hle. Ka sam thaw lêng vel chu Mazaran a hui kiang zauh zauh a, a kap kara ṭhu turin min ti miau a, ka ṭhu lo thei lo a ni. Kan insawh leh pawp pawp ṭhin a, a hnuah phei chuan a mal chungah min ṭhuttir ta daih a, Tlantea chu a lo nui vur vur a, Mazara ve thung chuan engah mah a ngai eih lo. 

Motor a din hnu chuan kan chhuk sap sap a, kei chu keimah paw'n ka chhuk ve lo. Mazaran min pawm thla deuh kher a, a nawm viau rualin putea te nupa hmai ka zah ru khawp. Tlantea chu Tlantea a ni a, kan inkar engkim a hre vek tawh a, a zia zia alawm, mahse pitei te chuan engmah an la hre ve lo va, kan inpawm thla lai vel an rawn hmu lo hlauh a, mak an la ti lo mai mai niin ka hria. Driver leh putea chu an inbe tui hle a, minute 1 vel lai chu kawngpui sirah kan din phah a, a tawpa tawpah chuan an invai liam ve thei ta hram. 

Putean hma a hruai a, Mazaran hnung a dawl thung a, kawng chu rin ai takin a awih phian bawk. A nal lo hlauh zawk a, nal phei se chuan ka tlu ngun tawh ngawt ang. Kan kal thla zel a, tui luang ri hum hum kan hre pha ta. Kawrtê pakhat hi kan dai kai a, a bak zawng chu kawng pangngai vek a ni tawh a, mahse kawng a zim hle thung. Ka hnunga kal Tlantea chu inkal thleng ka dil zeuh a, a lo remti ve mai bawk a, Mazara hmaa kal chu nawm dan bik riau a awm tlat a ni.

Tui luan tlemna lai kan thleng a, putea chu a va kal vel chhin a, a thuk lutuk hran lo. A khup chen vel a ni a, meichher a keng alh hluah hluah bawk a, Tlantea leh pitei chuan Torch Light an keng thung. Mazara lam ka hawi chuan a chalah Light a lo hreng êng vâ a, Light ken ve tur ka nei ta hauh lo mai. Putea chu a rawn au lang lâng a, Tlantea leh pitei chuan tui an dai nghal mai a, kei erawh ka thei ve ta tlat lo. Khua a thim vek tawh bawk si a, ka hlau a ni ber.

"Kal rawh le, ka lo veng ang che" Mazara chuan a rawn ti thum dam dap a, ka kut dinglamah a chelh zui nghal bawk a, tui min dai pui chiah chu vawt ka ti vawng vawng a, mahse ka sawi duh lem lo. 

Chengkawl chu kan khawrh ṭan ta a, an tih dan zelin ka ti ve a, entawna thil tih chu a sâwt lo hle. Putea leh Mazaran min kar cheh a, hlauhna pawh ka nei leh ta vak lo. Pitei leh Tlantea erawh an tlâ hrang deuh a, an kal chak bik khawp mai. Mazara chuan lung pang chu a zu zut a, chengkawl a rawn hum chhuak ta ṭeuh mai. Mak ti zetin ka en hâw a, ka hma zawna lung chu zut turin min buk khum zeuh a, ka ti ve mai bawk a, amah ang em emin hum chhuak hnem lo mah ila ka man ve nual chuan ka hria. 

Putea ve thung chuan tui chhunga chengkawl awm sa a chhar mawlh mawlh a, a mit a la ṭhat hmel khawp mai. Vawi khat lung pang ka zut leh chu a lo nâl puat a, ka ṭe vak a, Mazara chuan beng hupin min en run a, ka ṭe ring viau a ni ang. Chu bakah ka thil khawih a rapawm hrim hrim a, ka ṭe lo thei lo a ni. Mazara chuan ka hma zawna lung chu a rawn zut ve leh a, patêk a lo hum chhuak nual a, chung chu ka zu khawih fuh ngei a nih ka ring. 

Muangchangin kan kal chho ve bek bek a, awmna hmun inang reng si kan inman hnem hleih tawh hle a, an iptê pui chu a khat ṭep hlawm tawh zawk a, man tlem bik nih chu a nuam chiah lo. Lung pang vel zu tawh lovin tui chhunga mi chu ka chhar mawlh mawlh ta zawk a, thil eng emaw ka khawih fuh leh palh ang tih ka hlau a ni. Mazara chuan ka iptê ah a rawn khung zeuh zeuh ṭhin a, putea hmuh laiin a ti duh miah lo thung.

Darkar eng emaw zah chu chengkawl khawrhin kan bur ta ngar ngar a, ka iptê pui a khah meuh chuan chhar tam ka inti hle. Mi dang chuan iptê pui chiah an lo ak reng reng lo va, iptê dang an lo keng fur a, an chhar hnem thei lutuk chu mak ka ti zawk. Putea chuan duh tâwk lam a rawt a, tui aṭang kan chhuak ta sap sap a, a vawi khatna atan chuan khawrh hnem ka inti viau tho. Bag pakhatah chengkawl chu kan bun khawm vek a, tam tak a ni. 

"En rawh Numam, kawl tungte hi a nu an ni a, kawl bial apiangte hi a pa an ni thung. Khawpui mi chuan in hre vak hlawm lo maithei, hriat ve hrim hrim hi a ṭha" putea chuan a ti a, ka en dik vel a, mak ka ti ngei mai. 

"Kawl tungho hi chu kher a ngai ve lo va, a hipa hip chhuah chi zawk a nia, kei phei chuan ka duh mah zawk. Kher a ngai ve lo va, chaw ei a dip lutuk lo bawk" a rawn ti leh a, kei chuan ka thil khawih lai chu ka lo la en reng thung. 

Rei vak lo hnuah haw turin ka inbuatsaih a, mipa pathum chuan chengkawl chu an inah sem a, hmeichhe pahnih erawh kan hahdam hle. Putea leh Mazara bawk chuan mei an zu leh a, tho si tam lutuk tur pawh a vengin ka hria. Kal lam ang bawkin putea'n hma a hruai a, Mazaran hnung a dawl leh a, kei pawh a hnung ber dawttu ah ka kal leh ran tawh. Tlantea ka dil pawh a ni lo, amah zawkin pitei te hmuh loh laiin min kaltir a ni.

Kawng chho ka kal tur chiah chu ka thil rah lai a lo nal thut a, ka vei lamah chuan ka tawlh thla ta mai. Hlauh lutuk avangin ka au chûl a, inham tan tumin hnim vel chu ka pawt a, mahse a chhum zel a, tih ngaihna a awm thlawt lo. Thil chang takah hian ka tukhum ka sawh chawrh a, ka meng vai ruai a, ka thlang lawk chu tui dum kûk a ni tih ka hmu thei hram a, chu lai hmunah chuan ka tlâk loh reng ka ring tawh lo. 

Tha chak lutuk tak mai hian ka banah a rawn hmer a, min pawt kâng dâwr a, kei erawh ka pangngai thei tawh meuh lo. Ka lu chu a nâ em em a, a tur ut ût bawk a, chu chuan min tichau ngawih ngawih a ni. Chiangnial lo zetin ka meng a, min pawmtu hmel chu hmu thei lo mah ila Mazara ngei a nih ka ring. Ka biang chu a chul hauh hauh a, min endik ni berin ka hria. Thawm chu a reh tial tial a, ka thil hriat hnuhnun ber erawh mipa awm thum deuhin

"Numam!" tia min kohna chu a ni a, meng hleithei tawh lovin ka mit ka chhing a, ka rilru la harh ṭawk ṭawk chuan Mazara aw a ni tih a hai thei chuang lo, mahse ka taksa lam a chau tawngkhawng tawh lutuk a, hriat reng ka nei zui ta lo a ni. 

(End of Chapter 20)