SUMO DRIVER By Havali Adam (CHAPTER 19)

SUMO DRIVER

By

Havali Adam

Chapter 19

"Naktuk hian Aizawl lamah ka chhuk ngei ngei a ngai dawn a, ka rualin lo chhuk ve nghal mai ta che. I nu nen pawh kan inbe tawh a, ani phei chuan chhuk turin a duh hle che a ni" ka pa thu rawn sawi chu ka beisei loh lam daih a ni. 

"Engati nge naktukah kher chhuk i ngaih a ka pa? Kan chhuk rual dawn emaw ka tia, hna lam thil bawk em ni i chhuk chhan tur?" a hmel chu ka en kar a, meng dul raih hian a lo bu nghat a, chhuk chu a châk vak bik lovin ka hria.

"Ka rual chuan i lo chhuk turah ka ngai hmiah a nia, zaninah kan insiam lâwk vek ang a, kan zing chhuah a ngai maithei zawk a ni" a tih chuan ka harh chhuak zawk a, Aizawla chhuk ka la duh reng reng lo. 

"Ni lo ka pa, pitei te khuaah hian ka la châm rih duh" ka lo ti thuai a, ani chuan mak tih hmel deuh hian min en thung a, ka duh lo chung min hruai haw ang tih ka hlau ta ber, a thu a duh laklawh chuan a rilru thlak a harsa ropui si. 

"Awm reng pawh hi a dik chuang lo Numam, i ṭangkai lo bawk si nen i hnawksak lek lek zawk tawh ang. Ka rual chuan chhuk turin inring ang che, insiam nghal nghe nghe teh ang" tiin a tho ûai a, a banah chuan ka lo chelh rang khawp mai.

"Kar tam a awm tawh lo ka pa, kar khat leh a chanve vel chiah he khuaah hian ka châm dawn alawm, a hma paw'n zirna kan ṭan hma zawng chu châm i phal vek khâ, ka la chhuk duh rih lo" ka chhuk tak tak ang tih ka hlau ru bawk a, ka aw chu a tluangtlam lo hle. 

"Tun lai hi hriatthiam i har zual riau mai, thingtlang lam hi i ngaina vak lo a ni lo'm ni? Engati nge i chhungte tel lo pawha châm rih i duh tlat mai le âw, chu bakah ngaihtuah i nâ lutuk" a rawn ti ta duah a, kei chu ka ṭawng tawh lo thung. 

"Pindanah lut la, i thawmhnaw vel khung fel sa thlap la, naktuk zingkarah chhuah kan tum dawn nia, min hnial lo ang che" a tih leh chuan ka thin a phu dawt dawt a, ka hlauhthawn ang ngeiin thil a thleng ta.

"Ka duh lo ka tih kha ka pâ, pitei te bulah hian ka la awm rih duh alawm, khawngaihin min hruai haw suh" a kal sawn tur chelh din pah chuan ka ti lawm lawm a, ka ṭawng zawi lo bawk nen pitei te nupa hmel pawh kan hmu har lo. 

"Engati nge Numami chû? Kha, ṭah te a tum mai em ni?" putea chuan a rawn ti a, a aw aṭang chuan a nuihza lek lek tih a hriat a, kei erawh ka lung a chhe em em lawi a, nikhat pawh Mazara hmel hmuh loh hrehawm tih laia lo haw daih chu ka tum lo bur. 

"Rilru a tibuai khawp mai, ka ruala hruai thlak ka tum lahin a duh lo tlat si a, a buaithlak zawng a nih hi! In lakah pawh a inthlahrunawm tawh, engmah hi a hrethiam tak tak bawk si lo" ka pa aw chu hriat nuam lo lam hret a ni a, ka rilru chu buai tak a ni. 

"Inthlahrunna tur a awm reng reng lo, kan bula a lo awm ve te hi hlimawm kan ti zawk asin, ka sawi theih leh ka thu neih phakna chu a ni miah lo va, mahse a duh phawt chuan engtik lai paw'n kan bulah hian a awm thei ang" ka putea thusawi chu ka va thlawp si em.

"Nangni hi zawng in rilru hi a ṭha ve ngawt mai, kan inhriat tirh aṭang tun thleng hian sawiselna tur che u ka la hre lo" ka pa lam ka hawi rualin min lo en ve chiah a, ka châm rih chu phal hram se ka ti ngawih ngawih.

"Min mi hrang en lutuk a nih kha maw le, thisen taka inzawmna nei lo mah ila keini chhungkua hi chu in mi hrang en lo teh ang u. Numami pawh nangin i remti te a nih chuan châm rih mah se a pawi lo, kan lakah inthlahrung suh" putea chuan a ti leh ta duah a, lawm ru tak ka ni.

"Mahni chauhin ka chhuk dawn tih hre reng chungin thingtlang khuaa awm i la duh fân a, i pa hi min ngaihtuah ve miah lo em ni? Keiin ka ngaihtuah tehreng che nen, i putea nupa ni lo se chuan ka hruai haw chiang khawp ang che" thinrim miah lovin ka pa chuan a ti a, min en ran bawk. 

"Ka ngaihtuah ve tho che" ti sepin ka din hnaih sauh a, kan bulah pitei nupa an awm reng tih ka hria, mahse ka kuah lui ta tho va, ka pa chu ka ngaihtuah ve tak tak alawm, a chhuk leh daih tur chu ka huphurh ru ve reng. 

"Min tlawn suh Numam, chhe tê paw'n min ngai ve hauh lo. Nang chuan he khuaa awm ringawt hi i duh a, College kal tawh lova awm char char i duh hial lo maw? A thu hrimah engati nge haw i hreh tâk em emna chhan?" min kuah let pah hian a rawn ti a, sawi mai tur ka hre rih lo.

"I pa ka nih hî, min ngai ve em em ta che. I chhuak vâk peih reuh bawk si, Mazara leh Tlantea bulah ni zel lo phei se chuan ka phal tawp lo vang. Kar tawpa chengkawl khawrh an tumna ah te khan kal ve i tum ang e, ka phal dawn teuh lo" a tih leh chuan

"Ka ngai reng che, i hre lo mai mai a nih kha! I chhuk tur hi ṭul ka ti miah lo, chhuk lo thei la chu duhthusam" ka lo ti ve nghal tawn tawn a, chengkawl khawrh an tumnaa kal leh kal loh chungchang erawh ka sawi ri duh ta lo, sawi a hun rih lo em mai.

"Engati nge nichin khan ṭah i tum ringawt? Thinrim paw'n ka ṭawngkhum der si lo che a, nula i nih tawh hi Numam, naupangchhia deuhin awm ṭhin suh. Ka awm loh hunah pawh i putea te hi pui char char la, zawmthaw leh mit tikham zawngin awm lo ang che" 

"Aw le Boss" nui sen sena ka tih chuan ka biangah a rawn piai vak a, hnar leh bianga piai hi chu kan têt tê aṭanga a thil chin ṭhan a ni a, a fate hi chuan ngaiah kan nei vek tawh zawk a ni.

"Thingpui va lum teh, mut hma ka tum tehreng nen mut i tichhuak lo leh ta vek" nui var vara a tih chuan ka lo buk khum nghauh nghauh a, phur leh hlim ru zetin choka lamah ka phei a, ka thaw a veng huai bawk. 

Thingpui ka va pek lai chuan an pathumin an lo titi malh malh a, pitei awm dan ber chu ka mak tih a tling a ni. Ka pa nen kan chungchanga putea ṭawng chhung zawng khan a ngawi tluan ṭhak a, inrawlh a tum lo ni berin ka hria. A mizia ni se ṭawng duh tak a ni thung a, mahse thil pawimawh sawi huna a ngawi thei tlat te, pute hlir a ṭawngtir zawk te kha mak ka la ti fân a, a pasal a tihzahawm mai bakah amah leh amah a intizahawm bawk a ni. 

A hnuah phei chuan an nui ho dar dar a, a chang leh an infak tawn bawk a, thisen zawmpui dik tak ang mai an ni. Eng chungchang pawh sawi se inhnialna an nei ngai lo reng reng, an hlim tlâng em em zawk. Ka pa hnathawh lam thlengin an sawi kâi a, ṭhenkhat laiah chuan hriatthiam loh te an nei nûk a, mahse ka pa chuan a hrilhfiah nghal zel thung. Lo vah leh huan siam lam an sawi bawk a, kumin chu putea te chuan thlai thar hnem an tum hmel khawp mai. 

Mut hun a lo ni a, Tlantea chu hmun dangah mu turin a insawn a, kei leh ka pa erawh khum khatah kan mu dun thung. Ka pa chu a ṭawng thum dap dap a, inkuah chial kan nih avangin a ṭawng ring hran lo. Ka tana ṭha tur thil chi hrang hrang a sawi a, pitei te laka ka awm dan tur chênin min hrilh a, ka awm danin a zir loh avanga an hmingchhiat theih thute a sawi chuan dik ka ti hle. Ka pa hi chu zahawmna ngaisâng mi a ni ve a, sum lam erawh mamawh tho mah ila a uksak lutuk lovin ka hria.

Thil eng eng emaw sawiin kan meng rei dun ta phian a, khua a vawt deuh sûk bawk a, kan mut dan chu a nuam ang reng. Pangti lum hi a ngah a, kan nuapan zual lai kha chuan a bula mut kan inchuh nasa ṭhin. U Vli phei chu tihtauh chang a ngah phah a, ka pa chuan min duat bik emaw te a ti ṭhin a, mahse min duat bik der si lo. A fate hmeichhia vek kan ni a, huat bik emaw hmangaih bik a nei lo va, a fate kan nih angin min hmangaih dan chu ang khat vek a ni zawk.

Kan mut tak tak dawn chuan lukham hnuaiah pawisa a dah a, a zat erawh ka hre chiah lo. Putea te nupa hnena pe turin min chah zui bawk a, mak ka ti hran lo. Chawmhlawm turin ka awm tawp a ni ber a, mahse putea te nupa chuan engmah sawisel lovin hei leh chen hi min chawm tawh a, pawisa ang zawnga ṭhat chhuah chu a fuh phian ang ka ring. Chawhmeh tak ngial pawh ka lei ngai lo chu a nia, ka inthlahrung thar hle. 

Zingah chuan ka pa tho thawmah ka harh a, khuma ṭhu awn dûaiin a insiam lai chu ka thlir reng a, ani paw'n ka harh tih a hre har lo. Dar 6 bawr vel a ni a, choka lama thawm awm danah pitei emaw putea tho tawh an awm a nih ka ring thiam mai bawk. Kawr chu a hak thuah a, kawr lum a ha leh a, a inthuam dan vel chuan Mazara min hriat chhuahtir ta daih mai. Ka pa kawr lum hak angte chu ha ve se zawng ka pa ai mahin a inhmeh ngei ang, ka chiang a ni. 

Pindan aṭanga kan chhuah chuan pitei'n thingpui a lo siam peih diam tawh a, kan in laiin putea a rawn tho chhuak ve bawk a, an fel nupa hi ka ti ngawih ngawih. Thingpui kan in zawh chuan pawn lamah kan inzui chhuak a, in kawta ka pa motor Maruti 800 ngei mai inhung ka hmuh chuan ka pa ka ngai thar zual a, zui haw ringawt dawn ila Mazara ka ngai dawn ropui si, rilru chu a pangngai thei meuh lo.

"Pawisa kha aw" tiin ka pa chuan min hrilh ru zeuh a, min kuah vawng vawng lai chuan ka lo kuah lêt nghet ve hle a, ka chala a fawh zeuh hnu chuan a tlan liam ta vang vang a, pitei nupa an luh hnuah pawh kei chuan ka la thlir zui vawng vawng thung.

Ka pa hi pa tê lo ve tak a ni a, khawpui mi a nihzia lanna pakhat a ni. Khawpui mite leh thingtlang mite kan inan lohna pakhat chu pumrua hi a ni a, tunah chuan kan inlen hleih tih ka hre tawh a ni. A tlangpuiin khawpuiah chuan sorkar hna an thawk ṭhin a, thingtlang mite aiin an hahdam a, an ei a tui mai bakah an taksa pawh a lian zawk ṭhin, chu bakah hna hahthlak thawh lova rit lâk lutuk loh phei chuan an lian lo thei lo. 

Thingtlang lamah erawh a danglam hlawk thung a, khawpui nen chuan inang lo vet vet tak a ni. Mi reng rengin hna an thawk nasa a, ni sa do hnem tih hriat takin an vun chuan thim lam rawng a kai deuh vek a, vun ngo zawngah khawpui mite an tluk lo nasa hle. Tin, an palian lutuk lo hlawm a, a chhan pawh an rit lak nasat vang a ni pakhat. A ṭhen chu thlahtute aṭanga tê chi hrim hrim an awm a, ṭhenkhat erawh an tê chhe zawk zawk chuang lo. 

Chu tak chu a ni Mazara danglam bik em emna chu! Thingtlang tlangval ni si mi dangte ang lo takin a palian hle thung a, ka pa ai paw'n a pumrua a lian hial a, a sâng zawk bawk. Vun lamah ni se a hang chhe hran lo leh zel a, hna erawh a thawh nasat viau ka ring tho. A nu nen chauha khawsa an ni a, Sumo Driver mai ni lovin huan leh lo a nei thluak bawk a, hna a thawk nasa dawn tih hriat reng reng. Khawpuiah te chuan awm se ka chang miah lo vang, thingtlang mi a ni chu ka vanneihna ah ka ngai hmiah ringawt. 

Tukṭhuan kan ei laiin ka pa pawisa min pek chu ka phawrh a, putea chu ṭawng mawlh mawlh pahin ka pe a, a kawr hma iptê ah ka dah a ni mah zawk. Ani chuan rang takin a lo phawrh chhuak leh nghal a, min pek lêt a tum rualin ka kham ta daih. Ka hriat sual loh chuan cheng 1500 a ni thânin ka hria, putea nupa chuan tam an ti em em a, a awm ve tho, thingtlangah chuan a tam tham ve alawm, mahse khawpuiah erawh a tam lutuk hran lo, a vantlang vel viau zawk a ni. 

Chaw eina ka seng fel laiin putea chuan phone-in mi a be mawlh mawlh a, a ṭawng dan aṭang chuan ka pa nen an inbiak ka ring. Pawisa chungchang bawk chu a sawi leh ṭhin a, a tlawmngai thiam lutuk chuan min tihrilhhai lek lek zawk a, amah ka zah thar phah em em bawk. Thintlangah chuan nun dan ho tak tak anga lang, mahse hmuh nuam em em si a tam a, chuti anga nun chu ka châk ve a, thingtlang ka ngainat tâk em em chhan pakhat a ni bawk. 

Hna thawk lovin in lamah kan awm ṭhap a, mahse kan awm mawl tawp chuang lo. Pitei chuan in piah lawka Field tê ah Silpaulin a phah a, a chul mar thlap bawk a, puih dan tur ka hre vak bawk si lo va, a bula din tawp loh chu tih tur ka nei lo a ni. Tlantea leh putea ve thung chuan in hnuai buhzêma mi buh an thiar chhuak a, tawlailirin Field tê lamah an lo thiar phei zel a, buh pho dan vel chu ka vawi khat hriatna bawk ni leh ta. 

Silpaulin sir tin chu thingfâkin kan delh bet thluah a, thli a lo thawt palh pawha Silpaulin lêng tur venna atana delh bet kan ni ber. Tlantea chuan ṭinin buh chu kan thil phah chungah a rawn bun a, a ṭin hman lai chu têl dahna ṭhin a ni tlatin ka hria. Chik lehzualin ka en chiang deuh a, rawng eng leh hring awm dan vel aṭang chuan têl dahna ṭhin ṭin ngei a ni tih ka hre zui nghal. A rawng erawh a khawk nual tawh a, an hmang nasa tawh viau a ni ang. 

"U Mazara lah chu a service daih mai si a, i ngai awm" ka beng bul chêta rawn titu chu ka melh vak a, a sawi hun lo ve êm alawm, kan bul lawkah pitei a che reng a, a lo hre pha palh ang tih te a nia ka hlauh ni! 

"Khati ang zawnga min chhaih leh a nih chuan putea bulah i ngaihzawng neih thu leh mei i zuk ruk ṭhin thu ka sawi ang" ṭawng ring lo mah ila ka thusawi chu a hre chiang hle a, nui vur vurin buh chu a bun chhuak ve leh mai bawk. 

Ka awm dan teh tlawng chu ka ning ta deuh a, pitei bulah chuan ka ṭhu hniam a, buh pho a chul mam dan ang chuan ka ti ve tawp a, ani paw'n min lo nuih ringawt. Buh tamna lai chu kan chul darh zel a, a inrualkhai tâwka kan chul darh hnu chuan tih tur a awm ta lo. Ka buh khawih vang a ni ngei ang ka thak ta sep sep a, mahse tumah ka hrilh duh lo, nêp min ti ang tih ka hlau ve tho bawk nen hrehawm ti ru deuhin ka tuar reh tawp. 

Pitei chuan buh pho chu ven a tum a, ka phal lo tlat a, awm mai mai turin ka hrilh a, a duh chuan a ṭhiante ina lêng turin ka hrilh bawk. Putea pawh a ṭhian pakhatin a rawn len chilh a, Tlantea erawh sava veh turin a chhuak leh daih tawh. Buh pho ven ngai lo se chuan ka zui ve ang maw le, hmeichhia mah ni ila sava veh chu ka châk ve tlat a, a nawm hmel ka ti a ni. Hun a awm chuan vawi khat tal chu ka veh ve chiang khawp ang, ka ṭhiante bula insawi theih nân ka duh hrim hrim. 

Savun ṭhutthlenga ṭhuin buh pho chu ka veng a, tiang sei ang reng tak ka keng bawk a, ka ṭhutna lai chu a daihlim nuam hle. Buh chuk tuma arpui leh arpa lo kal apiang chu thawm chhuahin ka lo hnawt darh zel a, min hlau ve lutuk chu ka nuih a za em em bawk. Kei paw'n ka hlau tho va, tiang keng lo phei ila chuan ka hnawt darh ngam teuh bik lo, mahse min lo lîm dawn pawha invenna tur tiang ka keng miau a, ka inla huai chawp ve em em ringawt. 

"Lo kal r'u, hmanhmawh ang u" mipa naupang ṭawng thawm awmna lam chu ka hawi phei thuai a, panga niin thingfâk leh buhfai polythene-a fun an keng ṭhap bawk a, eng nge an tih dawn ka hre der lo.

"I u khan min lo hmu ang tih ka hlau ber, a thinchhe si, min um leh hrep mai ang" an zinga pakhat chuan a ti a, kum 10 bawr vel an ni hlawm a, hlauh nei tih hriat takin an kal muang lo hle bawk. 

"Chhuat nawt turin min ti a, ka peih si lo va, a thin a rim a nih kha!" tiin pakhat chuan a lo chhang ve nghal mai a, ka ṭhutna zawn an rawn kal thleng titih a, min kal ṭep tawh tihah

"Naupangte u, eng nge in tih dawn a?" zawhna ka lo zawt ta nge nge a, an thil tih tur lo buaipui tur chu ka ni miah lo, mahse hriat châknain ka khat tlat bawk si a, zawhna ka zawt lo thei lo a ni e.

"Kan inbai lem chhuan dawn" hmel fai ving veng tê chuan a lo ti a, chu pawh min en hrek hrek hnuah chauh a ni a, a ṭhiante chuan an hau zui nghal sap sap a, an thil tih tum chu mi dang hriattir an duh lo hle te pawh a ni ang. 

"Mi dang bulah ka sawi dawn hleinem, hlauthawng duh suh u" ka tih chuan an lo hawi rual ṭhap a, mak tih hmel deuha min en lai chuan ka lo nuih lêt sak a, mi in hnuai kawm kara chhukin an kal bo zui ta vang vang.

"Inbai lem chhuan" keima hriat tâwk lêk chuan ka ti sep a, kan naupan laia kan zirlai chu ka hre chhuak ûar uar a, school-ah zir ringawt mah ila a takin vawi khat mah ka la ti ngai lo thung a, naupangho ka hmu kher bawk nen ka châk ru ve tak zet. 

"Awi! Kal r'u!" tih leh ka tiang kena ar hnawh darh chu ka rual nghal a, ar ṭhenkhat chu a lo dawk daw lâk chuah chuah bawk a, vuak hlum ka tum emaw an ti a ni ngei a, kei lah chuan vuak hlum lam ka ngaihtuah lo nasa mai si.

Veranda aṭang putea chuan min rawn ko lang lâng a, kei pawh ka phei ve mai a, ei tur a lo siam nual a, chhun thil ei hun a ni reng tawh tih ka hre ve chiah. Pitei chu ka zawng ru deuh a, mahse ka hmu lo, a lêng ta ngei a ni ang. Putea chu thil a ei ve dawn emaw ka ti a, engmah ei lovin hreipui nen pawn lamah a chhuak daih a, a lo inei puar vek tawh te pawh a ni maithei. Dar zat ka en a, dar 1 a lo ri thuak tawh a, thil ei chu a hun viau tawh zawk a ni. 

Ka inei puar ta maw tihah buh veng tur bawk chuan ka chhuak leh hna hna a, vawiin atan chuan ka tih tur ber a ni a, a ninawm pawh ka ti em em hran lo. Ka putea chuan thing a ek ri chawrh chawrh a, buh venna aṭang a che vel chu ka thlir reng a, Mazara bawk chu ka ngaihtuahna luahtu a rawn ni chhunzawm leh nghal ta. A thing eh lai te ka ngaihtuah chhuak hial a, ka putea kutthlak leh Mazara kutthlak chu innat hleih tak a ni; hmun khatah awm dun lo mahse ka hre thei tlat. 

"Min ngaihtuah ve ang em le" ti sepin ka hnunga sunhlu kung chu ka ngheng ar ar a, Mazara Sumo khalh vel tur chu ka suangtuah pah reng bawk a, motor ri hrim hrim te chu a Sumo khalh thawm emaw ka la ti zel zui. 

Tlai dar 3 velah buh pho chu kan seng a, Tlantea pawh a lo haw tawh a, mahse sava a perh tla hnem lutuk lo. A sava lo hawn pakhat phei chu a khawngaih thlak tak tak, a awrah hliam a nei a, a la thi chiang lo leh ta nghal a, thi law law se ka ti khawp mai. A perh tlatu lah chuan engah teh vak mah a ngai lo va, tunah chuan sava vehnaa kal châkna reng ka nei leh tawh lo, pawisawi lo thaha a sa lo ei ringawt chu thil dik niin ka hre thei lo a ni. 

Tlantea nen chuan buh deng khawlah buh dengin kan kal a, keini chauh lo buh deng pawh an lo awm nual a, kan intlar hial zawk a ni. Tlantea min hrilh tawh dan aṭang kha chuan buh deng khawl pakhat chauh a la awm a nih hmel a, buh deng kan tam pawh chu a awm lo hran lo e. Information Mic aṭanga khawnvartui a lak theih thu an rawn puan rualin Tlantea chu a tlan haw nghal a, a tel lova awm chu pawi tihna ka nei chuang lo, mi zinga awm bawrh bawrh ngam chu ka duh zawk a ni. 

Rei pawh a thang lo, buh denna ah chuan a lo kal leh thuai a, khawnvartui chu a la zo hma ka ti khawp mai. Kan buh den hun a lo thleng a, buh denna khawl khawih veltu chuan min en duh hle a, ka hrethiam lo lek lek zawk a ni. Hmuh tawhna nei ang deuh hian min en leh zauh zauh ṭhin a, ngaih a ṭha duh lo hle. Min bia emaw tal te chu ni se hriatthiam awm tak a ni a, min be bawk si lo. A hawiher leh min biak loh dan vel chu hmuh tawhna leh hriat tawhna nei tlatin ka inhre thung a, mahse khawiah tak nge ka hre chhuak thei tawh lo. 

Buh kan deng zo va, kan haw lam chuan ka rualpui awm vel hi an lo inkawi bah a, ka tel châk ve leh ta tlat mai. Tlantea bulah chuan ka sawi tawp a, buh thiar luh zawng zawng min awl hnu chuan inkawi bahna lamah min phei pui a, a hmel hriat te vek an lo la ni zui a, ka tel awlsam phian. An zinga ṭhenkhat chu an phur lem lo, mahse keimah ber chu ka phur ta zawk. Naupangho tih tura ka ngaih chu ka'n ti ve ta lâwp lawp a, nuam ka ti leh hle si. 

Khua chu a hniam tial tial a, khua a thim hnai tawlh tawlh bawk a, kei lah chuan nuam ka ti tulh tulh thung. Ka inkawi bah puite pawh chuan min nel vat hlawm a, a tirah min tihpui peih loh hmel mah se kan haw dawn meuh chuan ṭhian ang maiin kan titi thei tawh a ni. Ṭhian ka neih pawh ka ring lo kha a nia, chutia ṭhian tia sawi tur ka'n nei ringawt chu a mak letling zawk, a chhan chu tuma'n min kawm peih ka ring lo a ni. 

Zanriah ei dawn hnaihah kan haw ve ta chauh a, in chhung ka luh rualin bathroom lam ka pan nghal chat a, hmai tal phih ka duh a ni. Pindana lut lehin ka inthlakna tur leh towel chu ka la a, ka inbual zui nghal a, ka nuam sawng sawng mai. Thlasik boruak la ni pha mah se inkawi bahnaa ka tel ve avangin ka thaw a sa tlat a, tui lum pawh ka chhuang lo. Tui vawt ngatin ka inbual a, chu chuan ka taksa a tidai a, inbual zawhah erawh kawr lum ka ha ta tho.

Zanah chuan Mazara a rawn leng a, tun ṭum chu min lo rim ve tak tak tawh se ka ti ngei mai. Thingpui ka sem lai chuan min lo en reng a, duh ber te hmaah pawh ka la zak ru tlat a, ka lai chhe mai ang tih chu a hlauhawm hle. Min en duh chhan chu ka hre deuh reuhin ka hria, a hnen aṭanga ka muffler dawn ngei mai ka awrh lang tlat a, min en duh viau pawh ni se a awm lutuk, mahse ka nghawnga thil awm ai chuan ka mit a en ngun daih zawk.

Putea te nen chuan lui lama kal an sawi a, chengkawl khawrh chu titi thupui berah an hmang a, putea te nupa ṭhutthleng khata an ṭhut laiin Mazara nen chuan ṭhutthleng hran ve ve ah kan ṭhu thung a, kan tihtheih awm chhun chu inmelh zeuh zeuh a ni mai. A chang leh ka lo nuih leh sen sen zel a, mahse pitei hmuh ka hlau thei khawp. Min hmuh chuan a hrethiam nghal titih dawn a, tu hriat mah ka la duh si lo a ni. 

A haw dawn chuan thlah ka tum tehreng nen hun a awm ngâng lo, pitei chuan thil sawi hmaih a nei a, in kawtah eng eng emaw ni a sawipui hnuhnawh leh a, pitei te mah ni se ka ngei ru tak tak a ni. In chhung tukverh aṭang Mazara kal liam lai chu ka thlir tlawk tlawk a, kawng kawi a thlen dawn chuan a rawn hawi let a, kan mit a intawn rual chuan ka nui zeuh a, mahse ani erawh a kal liam ta tho, a kal liam a ngai reng a ni.

Mut ka tum lai takin ka nu hnen aṭang phone call ka dawng a, kan inbiak chhung zawng chuan min zilh tluan ṭhak a, a awah chuan min ngaihtuah tih a lang reng a, a aw hriat nuam lutuk lo mah se huat enah ka en lem lo. Duh tâwka min zilh hnu chuan ka pa nen kan inbe zawm leh nghal a, ani nena kan inbiak dan erawh a pangngai hle thung. A thlen tluan thu a sawi bakah putea te laka awm dan tur bawk chu min hrilh leh lûam a, kei paw'n nungchang ṭha taka awm chu ka tum ve hle.

A tukah chuan kan vaiin ram lamah kan kal a, sawhthing hmun kan thlo fai a, zep lovah chuan ka ning ngei mai. Ka vawi khat thlawhna a ni a, a hmun a awih bawk si a, haw leh daih chu ka châk rum rum. Thlâmah chaw kan fak a, kan chawhmeh a hoh lam tehreng nen ei tui tak ka ni. Hmarcha sen tai hlar han seh siah siah te chu chaw ei titui tu ber a ni zawk a, samṭawk hel kan hmeh bawk a, antui awm chhun chu behlawi rep bai a ni mai. 

"I hah awm si a, ei ṭeuh rawh Nunam. Chawhnu lam chu lo thawk ve tawh lo mah la a pawi lo vang, i chau lutuk palh ang e" pitei'n a tih chuan ka zak ru ve reng, hna ka thawh thiam lohzia leh ka thawh sâwt lohzia chu an hre chiang khawp ang. 

"Engati nge ka chaw ei hi a tui em em le? Chaw lah chu ka la ei ṭeuh zui, ka thawk nêp bawk si" ka ti chhuak ta nge nge a, samṭawk hel zai phel chu chaw nen ka ṭhial pawlh a, behlawi rep te chu a tui ngawih ngawih. 

"Ramah hi chuan chaw ei te hi a tui duh reng asin, chawhmeh ken vak pawh hi a ngai hran lo. Lui lamah pawh a ni tho, thil ei hi a tui duh khawp" putea chuan a lo ti dam dap a, lui lam a sawi tâkah chuan thil hriat chhuah ka nei zawk.

"Pute, chengkawl khawrhnaah khan ka kal ve duh a nia aw" ka chaw ei lai tawp meuhin ka ti nghal a, ka pa ang maiin a phal lo bur ang tih ka hlau, Mazara nen kan inhmuhna hun ṭha tak a ni dawn a, ka kal loh chuan ka ui ngawt ang. 

"Ka hre lo le, kan kal hun tur han dam thleng phawt ila, kan la sawi ṭha dawn nia" tiin min rawn chhang a, a phal loh thu a sawi lo hrim hrim pawh chu ka lawm tawk em em a, kal ve a phal ka ring nghal ringawt bawk. 

"Chawhnu lam chu lo thawk leh rawh, awl duh bik miah suh. Chu bakah thingtlangah i mo lo vang tih pawh a sawi theih hleinem; inzirna zel" Tlantean a rawn tih chuan rum zetin ka melh a, a ṭawng meinei vel lutuk chu ngei tak ka ni.

"Tlantea ṭhin hi a! Thlâmah hian lo awm mai mai tawh rawh Numam, rei thawh a awm tawh lo" pitei chuan khap zeuh pahin min lo biak zawm leh nghal a, a hnuah erawh Tlantea nen chuan kan inchhaih a, kan nui dun leh hak hak tho. 

Awm awl tawp aiah tiin hnathawhna hmunah chuan ka chhuk ve leh a, a ngai te bawkin ka thawk sawt lo leh hle. Putea zilh ngai khawpin Tlantea nen chuan kan inchhaih a, leia vawm chang lah ka ngah, kan mangan thlak dun teh e! Ka pa thu min chah zawng zawngte chu ka ngaihtuah chhuak hman lo, duh aiin putea te nupa chu ka nel mah mah a ni. Tlêma ka insum deuh a ngai, chuti lo zawng min hmuh dan leh ngaih dan a dang vek palh ang. 

Zirtawp zanah chuan Mazara a rawn leng leh a, duhthusamin chhun lamah khua a ṭha ṭhin bawk a, tui a nut loh thu thlengin Mazara chuan a sawi a, a duh chin bak hi sawi a tum ngai lo reng reng. Ṭawng tam lamah erawh hma kan sawn viau chuan ka hria, mahse zan thum ngawt a lo leng tawh lo va, ka lungawi lo der ve tlat. Min en paw'n ka hawi sawn zel a, motor khalhin a chauh chu ka ring tho va, lo leng turin ka phut ru em em tho bawk si a ni. 

A haw tur ka thlah dawn chuan hmun thim laiah min kai phei dawr dawr a, kan awmna hmun chu a ngai bawk, thingkung phenah bawk a ni. Min fawp nghal tawn tawn a, ṭawng hman a ni lo hrim hrim. Amah ka ngaiin a mi tawhna ka lo thlahlel tawh bawk a, ka thiam ang tawk chuan ka lo chhang lêt ve a, min fawh dan chu ṭum dang zawng aiin a duhthaw zualin ka hre hial a, ka thaw a chham dawn lek lek zawk.

"Min pehhel tawh suh" ti supin ka hmai zawnah a rawn thaw lum ham ham a, ka biang chu a kut vei lamin a nul thuak thuak bawk a, ka titau der rei ve tawh ang chu tih laiin ka hlim leh ta vek mai.

"Dik tak chuan inhmuhna hun kan nei tlêm dun bawk si a, ka ngaihna che a bo thei bawk si lo. Nang lah i lo len ve chhunah i duh chauh i sawi a, i haw leh daih zel a, min ngaihtuah" a hmuia ka hmui a rawn khar hnan tâk si ah chuan ṭawng tawp chiang tak ka ni. 

"Nang tê reuh hian min lo ngai ve em em tihna em ni?" a awm hran hnu chuan a ti hniam ruih a, tê tih duh lo viau mah ila a lakah chuan ka tê tlat a, sawi dik loh a nei leh chuang miah lo, thinrim ka tum vei nen.

"Min ngai ve miah lo em ni?" a chhanna hre châk deuhin ka chhoh melh ral a, kiai suk hian min rawn fawp a, ka ṭang rei thei leh ta lo, a chet dan chuan a ngaihtuahna chhunga ka awm reng thu min hrilh ni maiin ka hria, ka tan chuan lo hnar a harsa thlawt a ni. 

"Naktukah lo kal ve i tum em?" kan inkuah hle hle hnu chuan a rawn ti thum chhal a, ka kawr lum iptê chhungah ka kut a hum lum vung vung a, ani paw'n kawr lum a ha tho va, chu chuan a tilang lian zual hle bawk.

"Ka hre lo, putea ka dil ṭha leh ang. A phal loh ka ring lo ve ringawt a, lo kal chu ka châk khawp mai" ka ti ta duah a, ka chhip sam fawp zeuhin ka beng zawnah a insawn thla a, ka beng vun nêm lai chu a rawn pet a nih chu!

"Mazar" ka aw chu a mumal tawh lo hrim hrim, ka awm dan chu ka sawifiah thiam lo, ka rin phak bakin ka danglam rang a ni.

"Ma....Mazar, ka.....ka lut dawn..eng lo..ti tawh lo teh" ti bah nawk nawkin min kuahna aṭang chuan ka tal chhuak a, ka dawh reng a nih chuan ka harhfim dawn lo tih ka chiang a ni.

"Ka lut mai aw, muttui le" ti thuai thuaiin in lam chu ka pan hmawk hmawk a, keimah leh keimah chu ka inzahpui thar leh tlat tawh, in chhung ka luh hnu thlengin ka la mumal lo tluang zel leh nghal.

Khumah chuan ka mu meng kar a, ka beng chu ka khawih neuh neuh a, engtin em em hian nge a tih bik ṭhin ka hre lo, ka rilru leh taksa a thlak danglam hneh thei lutuk chu awihawm loh khawpin a mak a ni. Ka kawr lum iptê ka zen leh chiah chu eng emaw ni ka khawih fuh a, ka lak chhuah chuan lehkha them hi a lo ni a, Mazara dah a nih ngei ka ring, mahse a dah lai ka hre hauh lo.

"Lo kal ve la ka duh, ka venghim tlat ang che" tih thu hi lian vak lovin a lo inziak a, pentui sen ngeiin a ni leh nghal a, ka tan chuan chu ai thu thlum leh romantic a awm bik lo vang, min sawmna chu ka remti chiang hle. 

"Ṭawngmawhpa, engati nge i danglam bik em em? Zanina i kawr lum hak inhmeh zia te kha i hre miah lo em ni?" nui ver ver chuan ka ti a, bathroom-ah Tlantea a awm rih bawk a, ka ṭawng zawi lutuk hran lo, ka hlim êm a ni.

(End of Chapter 19)