SUMO DRIVER By Havali Adam (CHAPTER 18)

SUMO DRIVER 

By

Havali Adam

Chapter 18

Ka thil nghenchhan lum nuam lutuk avang chuan ka muhil ṭep ṭep a, ka mut chu chhuak tak a ni. Ka mi nghen pa erawh a ngawi reng a, a che miah lo bawk a, thlasik khaw vawh laia mei lum ai ang velah ka inchan ber. A kut hrawl zet chuan ka kut chu ka dul zawnah a hum hnan a, kan kut inlen hleih dan chu a nuihzat thlak letling zawk. A kut lakah chuan ka kut chu nautê kut ang vel lêkin a lang thei a, a hum dan vel chuan ka lung a tiawi hliah hliah a ni. 

Ruah chu a la sur char char a, ni êng hmuh tur pakhat mah a awm tawh lo bawk. Ka rin ai takin a sur rei tawh a, a sur reng chuan haw thei lovin tlai thleng min dang mai ang tih a hlauhawm. Khawpui te lah chu a la ri ang deuh deuh a, kawlphe pawh hmuh tur a awm reng a, zawi zawiin ka mut chhuak chu a reh tial tial bawk. Mazara lah chu a muhil a nih ka ring ta ringawt a, tihharh ka hlau ru hle.

Ka kut chu muangchangin ka pawt tawl zal zal a, ka pawt chhuak ṭep tawh tihah Mazara chuan a lo hum lum leh vung vung a, rum nghut pah hian min kuah ngheh sauh a, a muhil lo tih chu ka hrethiam ta mai. Meng chungin ka ngheng leh ar ar a, kan awm dan chu a va han nuam chiang tak em. Min uap lum bawk si, mahse ka mut erawh a chhuak em em tawh lo. Tlai deuhah kan haw ang tih mawlh chu ka hlau a, kan haw vaih chuan ka chhungte'n min ringhlel nghal a ni mai. 

Ka lo muhil ta nge nge a ni ang ka harh leh meuh chuan chiang zet hian min lo en a, a âwm pawh ka ngheng tawh miah lo. Nautê ang maiin a mal chungah min lo pawm reng tawh zawk a, ka lama rawn kun hnim ka beng hnuai chu a fawp zeuh a, a hnim vang vang lai te chuan ka thawk a lo buai vek a, a mi tawhna avanga ka danglam awlsam ṭhin lutuk chu a awihawm loh zawk a ni. Amah paw'n a hriatthiam vek ka ring, ka awm dan chu hriat a harsa lo thei êm mai. 

"Dar eng zat nge a nih tawh le? Kan haw a hun viau tawh lo maw?" ti sep sepin ka melh chho ral a, a biang leh khabe chu ka zut pah reng bawk a, a hmel chu belhchian a dawl ngawih ngawih, en hnaih pôh leh a hmelṭha ting a ni mai.

"Min zut reng chuan kan haw har viau ka ring" a rawn ti sup a, ka lo nui seih a, ka thil tih lai chu ka tawpu duh chuang lo, a nuam ka ti ru tlat a, amah paw'n ka khawih dan vel chu dawnsawn nuam a ti ve thovin ka hria.

"Engati nge sangha ei châk ang khan min sawi kher a, pitei'n chaw ei laiin min zawt leh a, ei châk angin ka insawi phah ringawt" ka ṭawng zawh rualin thlâm chhuatah chuan min bawh zangthal thut a, ka hamhaih hman hle. 

"Min zut reng chuan kan haw har ang ka ti a ni lo'm ni?" ti thum chhal hian min rawn fawp tawk a, ka tum ni miah lovin ka hmui chu ka lo chet a, a hma ang bawkin a tih tur chu hai lo tak a ni. 

A tukhum sam buk lutuk lo chu ka ṭham ve tawn tawn a, tun ṭum a chet dan chu a dan dang deuh ta. Ka hmuiah mai ni lovin ka âwm bawr velah chuan a hmui a vah kual tir a, ka lo thawh halh halh a, ka vai ruai bawk a, mumalin ka awm thei tawh reng reng lo. Kan thil tih mek chu a dik lo tih ka hria, ka hre chiang khawp mai, mahse ka rilru leh taksa chu ka thunun phak bakin a danglam tawh tlat a, tum pawh ni ila keia lo thunun theih a ni tawh lo. 

Ka âwm aṭanga rawn insawn chhovin ka hmuiah bawk chuan a fawp leh ngawng ngawng a, khawvel chu a reh tlawk tlawk emaw ka ti hman hial a, inla hrang hmasa zawk lo se chuan ka harh chhuak miah lo vang. Ka sirah chuan a zangthal zawngin a rawn mu thla a, chung lam chu a melh reng a, kei erawh ka tho vat vat thung. Ka thawmhnaw chu ka chul mar hnuhnawh vel a, hmeichhe awlsam tak anga ka awm avang chuan ka zak thar tak zet. 

Ruah chuan han lam a hnaih deuh a, mahse a la sur reng tho. Ni êng a lang tawh bawk si lo va, a tlai thawkhat viau tawh ka ring. Mahni inzahpui avangin thlâm kawngka bulah chuan ka ding tlat a, Mazara chu ka hnung chhawn ngar ngar a, ka taksa a zat mer mer danah min en tih ka hre thei. Thlâm chhuat aṭanga a tho thawm chu ka hre reng a, mahse a lam hawi ka tum lo, a hmel chu ka hmu ngam rih thlawt lo a ni. 

Engtin nge min ngaih ang le? Khawpui nula niin thingtlâng mite ai chuan changkâng zawk mah ila tunah erawh min hmu hniam vek tawh ngei ang, duh chu ni se thil ṭha lo thlengin min tihpui thei zawk a nih ber kha! Kei lah khan inthunun tum ngial mah ila ka thei bawk si lo, min hmuh dan a va'n dang tawh dawn tak em. 

A duh dûha thunun theih leh a hruai kawih theih mai mai hmeichhia angin min hmuh ngei ka ring, mamawh ngawih ngawih ang te khan ka la awm zui a, hmeichhe hmuh hniam tlâk tak zawng ka ni e. A hun lai khan lo dang ila, lo fawp lêt lo ila, inthununtir vel lo ila chuan ka zak miah lo vang, ka inhmusit miah lo bawk ang. Tunah chuan a tlai tawh si, inngaizawng ni mah ila min hmuh dan a dang sawt dawn tih ka chiang a ni. 

"Kan haw dawn em ni ang?" a ṭawng ri chu ka hre reng a, chhan pawh ka tum chuang lo, thawm aṭang chuan ka hnungah a ding tawh tih ka hre thei, mahse kei chuan a hmel en emaw a mi biakna emaw chhan ka la tum chuang lo. 

"I ṭha em?" tih leh a lam hawi zawnga min kawih her a rual a, pangngai hmel deuhin ka en tak na a, ka va pangngai si lo em, ka la zak ru vawng vawng a, ka nuih seih te chuan ka nui lui hram hram tih a hriat loh hram ka beisei tawp.

"Ka ṭha e, ruah pawh a han titih tawh a, haw thuai thuai ang, a tlai tawh hmel si" ka aw chu theih tawpin ka thunun a, ka ṭawng lai chuan min melh chhuk run a, kei chuan ka en rei ngam rih lo a ni. 

"Kal ang" a tih chuan a ranga rangin thlâm aṭang ka kal chhuak a, kawng chu a lo nal ang reng hle leh ta nghal a, ka duh ang tak paw'n ka kal chak thei lo, tluk sual lah chu a la hlauhawm em em zui. 

Kawng zawl kan thlen hnu chuan ka kal chak thei ta deuh a, ka kalpui pa ngaihtuah lêk lovin ka kal hlawk hlawk a, kawng khuar laia ruah tui lo tling te chu ka dai per chhawk chhawk a, in thlen vat tih loh chu thlakhlelh ka nei rih lo. Ruah chu a la hmî sep sep a, chu chuan kalkawng a tinal zual hle bawk. Kawng chho kan kal lai te chuan fimkhur a ngai em em a, a thlang lawk chu awih vek a ni a, tawlh thluk vaih chuan lum thlak vang vang a ni mai. 

Kan kal zel a, kawng zawl kan thlen leh rualin tawlailir dahna hmun chu ka va hmu pha tawh a, a ruk tak chuan ka hlim ru hle. Kan thleng hnai tawh thova ka hriat avangin ka kal chak em em hran tawh lo va, mahse ka kal muang lo khawp. Kawng laia tui tling chu ka dai per leh chhawk a, ka beisei loh lutukin a lo nal thut a, ka tlu chiang hle bawk. Tha chak zet hian min lo chawi kâng nghal lâwp a, min buaipuitu chu Mazara a ni tih hai theih a ni lo.

"Nang hi i ṭha tawp lo mai, thlâm aṭang khan i dik tawh lo" min ngaihtuahna awkâ ka hre chiah chu ka rilru a rawn no ringawt a, ka insawh nâ phian bawk nen ka mittui chu a hnai nghal kuar a, ani chuan min en chiang hle. 

"Eng nge dik lo?" a tih leh chuan lu thing nâng nangin kal sawn ka tum a, ka dara a chelhna pawh thlak ka tum rualin a lamah min pawt hnai a, ka tan chuan tal chhuah ngaihna a awm lo, min chelh nghet tak zet a ni. 

"Engmah a awm lo" ka ti chiah chu lungawi loh hmel zet hian min en chhuk run a, a mitmengah chuan a zawhna chhang tura min duhna ka hmu a, dawt ka sawi tih a hriat chian hle ka ring bawk.

"Dik tak chuan ka zak a ni" rei deuh tak kan ngawih dun tlawk tlawk hnuah ka ti ta nge nge a, ka sawi chhuah loh chuan keimah ngei paw'n nuam ka ti bik lo tlat alawm, a laka thil zep neih chu a nuam miah lo. 

"Sawi chiang rawh" a rawn ti bul leh hmuk a, kawngah tak kan ding dun bawk si a, ram kal ṭhenkhat an lo haw thut ang a, min hmu ang tih ka hlau ru hle, min hmuh vaih chuan a chi loh khawp ang.

"Sawi chian vak a ngai tawh chuang em ni? Thlâma ka awm dan zahpuiawm zet khan min tizak alawm, duh chu ni ila engkim i tithei ngei ang. Hmeichhe awlsam tak angin min hmu tawh ngei ang chû, ka nihna a ni hauh si lo" ka ti tawn tawn a, ka thaw lâk chu a ring khawp mai.

"Chu zawng chu em ni?" a hma ang ngawt chuan a lungawi loh hmel tawh êm bik lo va, mahse hahdam hmel pawh a pu chuang lo, a hmel lan dan leh ṭawngkam chhahchhuah dan chu a ngai rengin ka hria. 

"Enteh Mazar, thlâma ka awm dan kha ka duh dan a ni bik lo. Min hrethiam hram ang che, engkim kha ka thunun theih piah lam thil a ni. Keimah leh keimah ka inhmuh hniam phah vek, a hrehawm ka ti" ka ti leh mawlh mawlh a, ka awah chuan thlaphanna aw a ri tel hial ang ka ring. 

"A bul chu keimah ka ni, inhmuh hniam lam ngaihtuah duh suh" mak tak maiin a thusawi tawi tê chuan min thlamuan leh tlat tawh a, ka rilru hrehawmna te chu a kiam tial tialin ka hria, he pa hi chu ka tan chuan mi danglam tak a va ni chiang em.

"I mittui tlin chhan kha le?" tiin zawhna min zawh zawm leh nghal a, a ṭawngkam hi a tawi thei viau mah se engtin emaw ni tak hian ka thinlung chhung a fan thei tlat thung, a rilrua awm tur awm angte hi ka ngaihruat thiam ve ṭan tawhin ka hria.

"Ka tlu nâ reuh êm alawm, ka hnung leh ka mawng hi a nâ ru veng veng mai, chu bakah ka rilru a rawn no thut a nih kha!" zep si se nei hauh lo chuan ka ti a, ngawi reng hian ka hmaah a va ṭhu hniam a, a chet dan vel chuan min tinui ver ver nghal.

"Lo kal la" a sawi zawh rualin a hnungah chuan ka bawk zui nghal a, zo zet hian min dinpui a, min paw lo ang maiin a kal dan chu a pangngai reng a, keiin a nghawngah ka lo kuah nghet em em thung. 

Tawlailir hunna bul kan thlen hma zawng chu ka ṭawng char char a, ka duh duh ka sawi a, hnâng ka hriat ngai loh thu leh ka vawi khat hriatna a nih thu te, feh dun nuam ka tih thute chu ka sawi zet zet a, ani erawh a ngawi reng thung. Ni lo, rawn ṭawng chang chu a nei ve tho va, mahse zawhna ka zawh chauhin a ṭawng ṭhin. A mak ve ngawt mai, heti ang mipa ṭawngmawh lutuk hi ka duh ang tih rin ngaihna pawh ka hre lo zawk. 

Kan haw dawn chuan sangha man pek ka tum a, a lo la duh lo nasa ngâng mai. A chang leh a iptêpui chhungah te ka dah a, a chang leh a hnathawh kawr iptê ah te ka dah thul, chuti chung pawh chuan a la duh lo hrim hrim. Nei daih turin min ti mai a, mahse kei chuan neih ka tum lo bur. A lâk duh loh tlat avangin ka titau der vel a, a them paw'n min thlem a tum lo, titau rei lo tak ka ni. 

Tawlailira kan chuan dun hnu chuan a hnung si chêtin ka ṭhu a, ani'n hnehsawh takin a khalh thung a, ka mood chu a ṭha leh hle tawh bawk. A hmeichhia zawk na nâ nâ chu ka ṭawng leh ta char char a, min chhang miah lo mah se a ngaithla peih hrim hrim te chuan min tilungawi em em tho va, engtin pawh awm ila ka nât a phal dawn lo tih ka hre chiang tawh lutuk chu ka hlim a ni ber. 

In chhung ka luh rualin pitei hnen aṭang zawhna ka dawng nghal a, a zawhna ber kher chu ka chhang thei lo chiang hle. Tlantea awmna min zawt a, kan haw rual loh chhan min zawt bawk a, ka tan chuan chhan theih chi ziazâng a ni tlat lo. Tlantea chu ruah sur tam tak tak hmaa a haw daih tawh ka ring zawk a, ama'n engkim sawi fel zawk teh se, pitei zawhna zawng chhan loh law law a fuh zawk a ni.

Tapchhak bula savun ṭhutthlengah chuan ṭhuin meilum ka âi a, ka inbualna tur tui ka chhuan mêk chu a la so har hmel khawp mai. Pitei nen chauh kan awm a, choka lamah kan awm a, putea chu a lêng chhuakin ka hria, ka pa erawh room lamah a muhil thung. Ka khupa khabe nghatin ka meng diar diar a, ka meilum âi mêk chuan Mazara bak min hriat chhuahtir leh ta lo. 

Thuk bula mei vâp vut awm karah chuan meihawl tê reuh tê tê hi a inphum nual a, la chhuakin mei chhemna hma cement-ah chuan thil ka thai kawi vel a, ka pitei mei chhem tur lo che thut chuan min tiphu zawk a, ka thil ziah lai chu rap reh rang tak ka ni. Mazara hming ziak vel lo ila chuan chuti ang em emin ka phu kher lo vang, pitei chuan a hmuh hman loh hram ka beisei. 

"A sô ṭep ang, mei hi hnaih lutuk suh. Khawmhmâ thing kan tuah bawk si a, a puak duh phian ang" pitei chuan a ti siam siam a, ka haw tirh tih lovah kha chuan zawhna engmah min zawt leh tawh lo va, Tlantea nena kan haw rual loh chhan chu a ngaihtuah zui loh ka ring ringawt bawk. 

Meiling vât vât chu ka en ngawt ngawt a, ka mut chhuah dan chu pui tak a ni. Inbual fai tawh ngat ila chuan ka mu chiang khawp ang, mahse inbual ka la hmabak tlat. Ruah lah chu a tla awl lo va, pitei ṭawng melh melh ri tak ngial pawh ka hre ṭha thei lo hial. Rangva in a ni bawk a, ruah sur thawm chu a ring ṭha em em a, Tlantea chu ka ngaihtuah ru ve reng tho. Ruah surin a dan ngei ka ring a, mahse ruah dova a rawn haw duh erawh ka ring chiah lo. 

Savun ṭhutthlenga ṭhu tawh lovin chhuat leh tapchhak inzawmna laiah chuan ka mu thluang duai a, savun ṭhutthleng chu lukham ang maiin ka pawm bet a, ka mit ka chhing vang vang a, muthilh bak ka rilruah a awm thei tawh rih lo a ni e. Mei lum nuam em em te, ruah tla ti cher cher te, engkim chuan ka lung a tilêng vawng vawng a, a vawi khatna atan ka nute chu ka ngai kher mai. 

"Tho teh Numam, i tiawm ang lo ṭhin êm mai. Nula ve ûai tawh si, engati nge tapchhakah te i mut mai mai ni?" min sawi dat dat paha titu chu ka pa a ni tih ka hria, mahse ka la tho peih mai lo, ka muttui laklawh tawh tlat. 

"Ani hi pasal neih a lo duh ru reng te hi a ni lo maw? Tlangval tapchhaka mu chu nupui neih ngen tihna a ni a, nula tapchhaka mu pawh pasal neih ngen tihna a ni mai" pitei awah chuan fiamthuna ri tel mah se ka harh chiang ta hle. 

"A lo ni tak tak ang e, i sawi tâkah chuan tlangval rawn rimtute zingah khan hmel duh a nei a ni chiang mai" ka pa'n a tih lai chuan ka tho tharh a, ruah pawh a sur tawh lo va, khua chu a thim vek tawh bawk.

"Ka inbual dawn" ka ti ṭial ruai a, Ketlí-a tui inchhuang so sa diam chu bathroom-ah ka khai lut a, tui vawt nen ka pawlh a, ka inbual thei chu a ni nghal der, chutia ka che vel chu Tlantea lah chuan min lo nuih vur vur a, eng tak hria ni maw!

Zanriah kan ei lai chuan ka pangngai leh vek tawh a, pitei chuan Mazara pawisa kan pek leh pek loh min zawt thut a, ka buai rei lo hlauh. A lâk duh thlawt loh thu chu uar takin ka sawi a, Tlantean a lo sawi zawm ve bawk a, ka nuih a za ang reng. Ani nen hi chuan kan inman ru riau a, ngaihzawng kan nei tih mi dang hriattir kan duh lo ve ve bawk a, a ṭul hunah chuan kan inpui tawn zel a ni ta ber. 

Chaw ei kham hnu lawkah Mazara a rawn lang hlawl a, lên pangngai tak hian a lo lêng khat a, tih tur leh sawi tur a neih chauhin a lêng chho tlangpui ṭhin. Ka pitei chuan a lo zilh nghal mawlh mawlh a, mahse thinrimin a zilh lo thung. Ka pa leh putea chu an lo nui suk suk a, pitei lah a âng laklawh tawh bawk si, a ṭawng thui khawp mai. Mazara erawh pitei ṭawng chhung zawngin a ngawi reng a, pitei chu inthlahrun avanga âng a ni tih a hriatthiam ngei ka ring. 

A haw dawn chuan Tlantea chu kar tawpa chengkawl khawrh puiah a sawm a, min lo rim ve emaw te ka ti a, ka lo hlim ru ve em em a, sawi duh a neih vang chauhin a lo leng leh ta. Mazara sawmna chu pitei te zawk chuan an lo chhhan khalh a, chengkawl khawrh chu an phur tlân hmel hlawm hle. Chengkawl khawrhnaa kal chu ka tum rilru nghal ve leh ringawt a, mahse engmah ka la sawi chhuak duh lo. 

"Tui a nut loh chuan tih chauh a la ni a, kal ka ti bur hran lo" kawngka bula dingin a ti thum bul bul a, ka hmuh tirha aw ṭhing ka tih tehreng nen tunah chuan a aw thum tak te chu hriat nuam ka ti leh vek tawh zawk a ni. 

Pawn lamah kan inzui chhuak a, tun ṭum chu min signal dan ka hrethiam ve tawh e. Tlantea tih loh mi dang chuan thlah pangngai tur emaw min ti vek ngei ang, mahse keini erawh inngaizawng kan ni tawh miau a, ho lam takin ka inthlah hlei thei tawh lo. Chhum a zing nasa ang reng viau a, boruak chu a vawt sûk bawk a, kawrlum ha mah ila a vawt ka la ti deuh tho. 

"Lut tawh rawh, i hritlâng palh ang" dam deuh hian a ti a, lut turin min ti mah se ka kut chu a la vuan tlat ang lawi a, ka thlakhlelh ruk ang chiahin min thlahlel ru ve tih hriat tluka nuam chu a awm kher lo vang. 

"Naktuk chu ka service ang ka ring" a rawn ti leh sup a, zanin chu ka ngawi lui ve deuh tlat a, amah zawk ṭawng hmasa zel tura ka duh vang a ni pakhat a, ka duh ang ngeiin a awm bawk. 

"I va ngaihawm dawn ve" fiamthu deuh taka ka tih chuan a hmui dinglam ti che zeuhin a nui a, a nuih dan chu hmuh a nuamin a táwk vel chiah chiah hle a, tawi têa nuih a inhmeh lutuk chu ka luangliam lo chauh zawk a ni. 

Ka lama lo kun hniamin min fawp vawng vawng a, min fawh dan chu a ril ngawih ngawih leh ta. Ka chhungril zawng zawng a fan chhuak vek ni mai hian ka hria a, chawmawlh vek thei khawpa mi fawh dan a hre roh tlat a, a duh hun tê ah a hmang ziah leh nghal. Ni e, a nazawngin hmang suh se, a hmang fô a nih chuan engtikah emaw kan la che sual ngei ang, pasal neih hmaa chet sual ka duh hauh si lo. 

"Muttui le" ti hniam ruihin ka hmui leh biang inkar chu a rawn pet zeuh a, ho viau angin lang mah se ka rilru leh taksa chuan a lo dawngsawng ṭha em em zel mai bawk si, a kal liam lai ka en zui vawng vawng hnu chuan ka lut ve ta chauh. 

In chhung ka lut chiah chu ka pa'n min lo en reng a, min en dan chu ka hrethiam chiah lo. Tlantea lah chu pindanah a lut daih leh nghal a, chuti ang bawkin pitei leh putea pawh an pindanah an lut daih a, an awm dan vel chuan ka awm a tinuam lo ru viau mai. Ka pa chu ka awmna lamah a lo phei a, a hmel aṭang chuan sawi tur a ngah hmel tak zet. 

"Inbe teh ang" tih leh sitting room lama min kaih phei chu a rual nghal a, kei chuan sawi tur ka hre hauh lo, kei ang lo takin ka pa ve thung chu a thutak hmel em em thung a, eng thilah nge kan inbiak dawn tih chu hre lo tak ka ni. 

(End of Chapter 18)