SUMO DRIVER By Havali Adam (CHAPTER 17)

SUMO DRIVER 

By

Havali Adam

Chapter 17

In chhunga ka luh te chuan ka la dik lo hû a, dik hlei thei lova min siamtu erawh ka hmuh phakah a awm leh tawh der si lo. A hnathawh kawr rim te, a mi fawhna dawnsawn nuam tak te, amah thlahlel ngawih ngawiha min siamna te chu keimahah a chambang zui ta reng a, rilru fim ka pu lawk thei lo chu a awihawm loh letling zawk a ni. Ka ngaihtuah zui reng a, lui lamah a che tlâ dawn chu a ni si a, vanduaina an tâwk palh mai ang tih ka hlau ru hle. 

Pindanah ka lut a, Tlantea ka hmu miah lo va, mi dang erawh sitting room lamah an ṭawng malh malh a, an titina ah chuan ka va tel ve peih chiah lo a ni. Khuma mu chungin ka ṭhiante ka bia a, eng eng emaw ni kan sawi lûam a, sawi tur an ngah thei thei bawk si a, kan inbe rei leh ta viau mai. A bikin Mawitei zawk hian sawi tur a ngah a, ka be hnuhnung zawk ziah zel. Ka inbe zo chiah chu ka mu zangthal a, tih tur a awm vak bawk si lo va, Mazara ka ngaihtuah chhuak leh a, ka ngai ru veng veng. 

Chutia ka mut lai chuan pitei a rawn lut hlawl a, inlêng ka neih thu a sawi chuan ka mek phawk hle a, mahse ka hrethiam ve leh vat tho. Chhun lamah khan thlan lai hovin lo lên an tum thu an sawi tak alawm, Mazara paw'n tumah be ṭha lo turin min tih phah hial a, mipa dang a thikna awkâ hi chu ka hai thei tawh bik lo. Kei paw'n hmeichhe dang ka thik ve tho va, a bik takin kha nu kha, kan len dawna lo be siam siamtu kha ka thik tak zet a ni. 

Pindan aṭang chuan ka chhuak a, ka besei ai daihin tlangval lo lêng chu an tam a, a zahthlak duh ang reng. Thingpui lum turin choka lamah ka phei nghal daih a, min en zui vawng vawng pawh an awm a, mahse engtin mah ka awm lo. Mazara min en zuina te chu ni se ka thin a phu rang emaw te kha a ni leh ang a, mipa dang nen hi chuan an inang lo ve thlawt a ni. Ka pa lah chuan min nuih vur vur leh ta nghal a, min tilai lek lek dawn alawm le.

"Ti khan lo inkawm nêl r'u aw, kan va leng chhuak ang e" kawngka lama kal pahin putea chuan a ti lang lâng a, pitei paw'n an zui chhuak ve nghal mai a, ka pa erawh room lamah a awm thung a, pawi ka ti lo khawp, mahni chauhva tlangval rual awmpui chu ka duh lo a ni. 

Inlêngte chu eng eng emaw ni sawiin an nui leh dar dar ṭhin a, an titi a rual khai bawk a, ṭhian inkawm ngeih tak an nih hlawm ka ring. Thingpui chu ka siam zo va, sem turin ka phei nghal a, a mawi te chuan ka'n nui ve tak na a, ka nuih a za lo hle. Choka lama pheisan leh daih chu a tihchi chiah loh avangin ka ṭhu ve ta reng a, zawhna pawh min zawt zeuh zeuh a, anmahni chu an inbe tam mah zawk. 

Thingpui an in zo va, an inna no chu ka seng fel nghal a, an bula ṭhut phei leh chu phur lo tak ka ni. An sual pawh a ni hran lo, ka be châk lo ve tawp a ni ber. Sitting room lamah chuan ka ṭhu phei ta tho va, nula ka ni miau a, tlangval min rimtu an awm chuan ka lo biaka ka lo kawm tlângnel a ngai tlat a ni. Anni pawh an hawihhawm hlawm khawp a, pindan lama ka pa awm vangte pawh a ni maithei. 

Mazara thusawi hre karin ka ṭawng tam lutuk lo va, mahse a tua te mah ka be chhe chuang lo. An fel ve hrim hrim hlawm bawk a, zawhna min zawh dan tur tâwk an hre hle a, ka zirlai thlengin ka sawi phah a, min zawt lo se chu ka sawi miah lo ang. An zinga pahnih chuan fiamthu titih hian ka bula ṭhut an inchuh a, a chak zawk zawk ka bula ṭhut tiin an inban elh nghe nghe a, kan boruak chu a hlimawm ta phian mai. 

Zan dar 10 vel thleng chu an lêng a, an haw dawn lamah chuan an ṭawng tui zual a, mahse an zinga upat hmel ber chuan khawhar ina lawi luh a hun tawh thu a sawi a, tûma'n an hnial lo. Kan in kawt thleng ka thlah thlap a, zep lovah chuan ka beisei ai daihin min rawn rimtu te chu kawm an nuam a ni. Tin, an chezia a hawihhawm mai bakah aia upa an zahzia ka hre thar bawk a, ka pa paw'n an ṭawngkam aṭang a hriatthiam ve vek ka ring. 

"Zanin chu tlangvalin an rawn rim a, in naui hi he thingtlang khuaah hian a tla nâ viau dawn a ni ang" room chhunga ka luh rualin nui hak haka ka pa ṭawng  thawm chu ka hre nghal a, tu ber nge a biak erawh ka hre lo. 

"A ni mahna le, khati lam boruak eng nge a an? Nangmah i ṭha hrim hrim maw?" a ṭawng dan aṭang chuan u Vli a bia a nih ka ring thiam ta mai, signal chhe viau lo se chuan ka be hmasa ve ṭhin ang maw le, tun lai chu ka ngai riau, titi pui tur ka duh a ni. 

"Awm e, hei ka bula hi a ṭhu reng tawh alawm, kha inbe rawh u" tih leh phone chu min pek a rual a, kei paw'n ka lo la ve mai bawk a, enga mah hmain u Vli chu a rawn nui vak vak ringawt a, kei lah chu ka lo lai nghal em em ringawt. 

"Pitei te khuaah khan châm hlen daih mai rawh, nuam i tih hmel viauin ka hria" rei fê hnuah u Vli chuan a rawn ti ve thei ta hram a, mahse a aw aṭang chuan a nuih a la za tih leh min ṭawng el tih ka hrethiam vek thung. 

"Ka châm hlen tak tak mai tur a nia" fiamthu thutak deuh reuh hian ka lo ti ve mai a, ka pa chuan khumah min kuai mu a, u Vli erawh a rawn ṭawng chhunzawm nghal mawlh mawlh a, ka pa a awm ve kur avangin sawi ngam loh ka ngah mai. 

U Vli nen chuan rei tâwk tak kan inbia a, tun hnaiah kan inbe khât bawk a, sawi tur chu kan ngah dun hle. Ka pa chu awm lo se chuan Mazara nen kan chanchin hrilh ka tum deuh reuh a, mahse a la hun lo a ni ang sawi theih pawh a ni rih lo. Kan inbiak zawh hnu chuan thawh ka tum a, ka pa chuan a âwmah min kuah bet tlat thung a, kei paw'n ka kuah lêt ve nghal a, tun lai chu min ngai tak tak a nih ka ring. 

"Engtikah nge kan chhuk ang? I nu te i ngaih tawh chuan kan chhuk thei reng a nia, anni paw'n an ngai ru viau tawh maithei che a ni" dam deuh hian ka pa chuan a ti sup sup a, Aizawl lama chhuk chu ka lo la ngaihtuah lo hrim hrim.

"Chhuk ka la duh rih lo, zirna kan ṭan hma chu pitei te khuaah hian awm rih ka duh a ni. An khua hi nuam ka tih zawng tak a nia, thingtlang nun ho lam ang taka lang hi belhchian a dawl viauin ka hria" ka ti ta duah a, ka pa chu a lo nui ri hak a, min kuah nghet sauh bawk. 

"Chutia thingtlang khaw lama zin peih lo ber ṭhin khan i duh tlat te chuan kan la châm rih a ni mai a ni ang chu, mahse keimah zawk hi ka chhuk hmasak a ngai leh thut maithei a nia" a tih chuan ka lo bu nghauh nghauh a, chhuk leh daih mah se pawi tihna pawh ka nei chuang lo. 

Dar 1 vel bawr a ni tawh a, ka la muhil thei der lo va, ka rilruah Mazara a awm tlat a, an chet sual chu hlau tak ka ni. Ka piah lawkah Tlantea chu a muhil bawrh bawrh tawh a, a thinlung luahtu hmeichhia ngaihtuahin rilru sêng ve se chuan a muhil thei bik miah lo vang maw le. Ni dawn tak, ani hian ngaihzawng a nei ve em le, engmah min hrilh ngai loh avangin a neih loh ka ring ve ringawt a, ka zawh ngei chu a ngai ang. 

Zing khua a lo var a, zana ka mut ṭhat lohzia chu ka hmelah a lang chiang hle. Ka mu ṭha lo pawh a ni lo, ka muhil lo hrim hrim zawk a ni. Kan tui dah khawl sa a tlêm deuh tawh avangin Tlantea nen chuan tui kan chawi a, a nuam ka ti em em leh nghal. Tui chawinaah chuan min lo be sap sap hlawm a, mikhual ka nih vang a ni maithei. Nizana min rawn rimtute zinga mi pakhat a lo la awm zui a, min rawn be nêl viau a, Tlantea nen pawh ṭhian inkawm ngei tak ang maiin an be bawk. 

Kan tui chawi haw kawngah Tlantea chu ngaihzawng a neih leh neih loh ka zawt ta ngei a, min la chhang ṭha duh lawk lo zui. Ngam deuh tak hian ka zawt zui zel a, a tawpah chuan a neih thu a rawn sawi ve ta, mahse putea leh pitei te'n an la hre lo thung. Ngaihzawng a neih thu min hrilh chiah chu ka khi ver ver a, ka chala nam sawkin sawi chhuah a phal loh thu chu min hrilh zui nghal bawk. Fa mal a nih angin a puitling hrim hrim a, ngaihzawng nei mah se a awm ka ti viau tho.

"Khu le! Tu nge rawn kal khu en teh, kei chuan kan in ni lova a luh ka ring hauh lo" in kawta tawilailir kan hun ṭhat laiin Tlantea chuan a rawn ti a, a hawina lam ka hawi chu Mazara hmel ka hmu zui nghal a, ka hahdam sawng sawng thei maw le. 

"Ani khuan kan in hi a hai palh ang a, ṭhenawm te inah sawn a lut nulh mai ang a!" a tih leh chuan a hnungah ka chum ri dawt a, nui vur vurin tui chu in chhung lamah a khai lut a, kei erawh ka lo ding mawl tawp ringawt. 

Mazara chuan ka dinna lamah a lo kal hnai zel a, keiin ka lo en reng a, ani paw'n min en chiang khawp mai. A kutah Bucket tê sen hi a khai a, a khai chhan chu ka hre lo chiang hle. Tlantea chuan min rawn dek zeuh a, ka hawi sawn ve thei ta chauh. Ka khawih lêt hmain Galon chu a khai a, in chhung lamah a tlan lut daih a, a chinawm thiam vel lutuk chu min tilai lek lek dawn alawm le. Mazara lam ka hawi leh chiah chu ka bul lawkah a lo ding reng tawh a, a bucket khai chhunga awm ka hmuh rual chuan

"Ehê.....khungho khu sangha vek em ni? A va han lian hlawm em em ve le, ka hlau zawk e a!" ka ti hluai a, an tlê hlar hlawm bawk si a, ka hlau ru deuh tak tak, khawih pawh ka khawih ngam ka ring lo. 

"I va'n man hnem em em" ka tih lai chuan a kut hrawl zetin ka khabe a rawn chelh a, amah en thei turin min kuai dâk a, ka mit chu a en chiang hle a, a hmel awm dan chu ka sawi thiam chiah lo, a tak run bakah a lungawi loh hmelin ka hria. 

"Eng lo, i ṭha em?" a kut a lak thlak hnu chuan ka ti ta ringawt a, chhanna engmah ka dawng lo va, a bucket khai lai chu min khai tir a, che hrutin tawlailir chunga Galon pahnih la awm chu a khai kâng nawlh a, a kalna lamah chuan ka zui ve nghal mai bawk. 

In chhung ka luh hnu rei lovah Mazara chuan ka bucket khai lai chu a rawn la, a chet chetin a che mual mual a, pitei te biakna pawh a chhang chuang lo. Chawhtawlhah sangha chu a bun chhuak vek a, ka hmuh tirh lêtin a tam daih. Ka hmuh tirh kha chuan tam ka ti tho va, mahse chawhtawlha a bun chhuak chiah chu tam ti zual tak ka ni. Ka khawih vel chhin a, an lo nal puat a, mi rap deuh tlat a, mahse chuti anga sangha lian leh tam chu hmuhnawm ka ti em em tho.

"Min pe leh ringawt dawn tihna em ni Mazar?" putea chuan a ti a, Mazara pawh a lo bu nghat nghat a, putea leh ka pa chuan sangha chu an han keng kâng vel a, ka pa phei chuan khawih nuam a ti ngâng mai. 

"A thlawn chuan kan la thei tawh lo vang, a em em lutuk tawh êm mai. Tlante, lukham hnuaia ka pawisa dah kha va la teh, kan leisak ngei tawh tur a ni" pitei chuan a rawn ti charh charh a, mi dang erawh chuan sangha bak an buaipui thei rih lo. 

"Lei a ngai lo, ka hralh nual tawh. Ei châk in awm bawk si a, ka lo hawn mai che u a ni" Mazara chu a rawn ṭawng chhuak ve ta, mahse ka pite hmelah chuan mak tihna hlir a lang thung.

"Ei châk a!? Tu nge i hnenah sangha kan ei châk thu sawi reng reng a?" pitei zawhna avangin Mazara chuan min rawn en a, ka tih ngaihna hre lo chu ka lo hawi â vek a, pitei lah chuan min en chiang em em zui.

"Nangmah em ni Numam? Nang hian Mazara hnenah sangha i châk thu i sawi em ni?" chhan mai dan tur hre lo zetin ka thaw ri hawk a, pitei chuan min en ran a, a zawhna chu chhang turin min duh hmel hle bawk. 

"Eng lo, ka ei châk thu ka sawi pawh a ni chiah lo" ka tih laklawh laiin Tlantea chuan 

"A ho êm mai ka nu, kan leisak dawn tho alawm, kei paw'n sangha te chu ka ei châk reng, kan ei khât ropui si" a lo ti ta hlauh a, rawn ṭawng zawm lo se chuan sawi tur pakhat mah ka hre tawh lo. 

"Ti teh Nui, han chhum nghal teh, tukṭhuana hmeh atan a tui dawn lutuk. Tlante nangin kan kawmthlanga anthur khu zu lo la, thlak pawlh ila a tui leh zual ngei ang" putea chuan hlim hmel zet hian a lo ti a, ka pa erawh chuan sangha char char a la buaipui thung.

"Tlante, vawiin chu huanah min va kalpui ta che" Mazara lam chu ka hawi vat a, ani chuan Tlantea chiah a lo en a, tunah chuan a mi enna ringawt pawh ka thlahlel tawh chu a nia, a awihawm loh letling zawk alawm le.

"Tehreng mai, tih tur em em ka nei hleinem, kan kal dawn nia, chaw lo ei ve nghal la u Mazar?" Tlantea chuan a lo ti ve zung zung a, Mazara erawh lu thing zeuhin a kal chhuak ta nul nul. 

"Kha kha alawm ka hlauh, pawisa a la duh ngai bawk si lo. Vawiina in kalnaah sangha man hi pe ngei ngei ang che, a la duh lo a nih paw'n pei lui tho ang che" pitei chu a thinrim emaw ka ti dawn a, mahse a ni lo nasa mai, Mazara laka a inthlahrun vang zawk a ni. 

Sangha an buaipui lai chu remchangah lain pawnah ka tlan chhuak thuai thuai a, Mazara chu ka zawng nghal a, ka la hmu mai lo zui. Ka chhuah hun a lo chân ve te ka ring a, ka beisei angin thil a va thleng lo chang tak. Tukṭhuan kan ei laiin pitei chuan zawhna min zawt leh a, ka ei châk thu chu ka sawi tak tak a la ring lo a ni ber. Ka tan lah phat theih a ni tawh si lo va, sawi angin ka insawi ta tawp.

Nizan kha chuan ka ei châk thu leh ka duh thu ka sawi chiah lo va, mahse sangha min lo hawn a tum thu a sawi khan ka hnial lo mai chauh a ni. Min rawn hawn hrim hrim erawh ka ngaihlu a, biak khat paw'n min be lo mah se ka hlimna a tling tâwk em em tho. A lawmawm ve êm asin, ka thinlung luahtu leh ka ngaihtuahna zawng zawng luah khattu tih theih khawpa ka mipa vei hnen aṭang sangha tam tham zet ka dawng a, min lo hawnsaktu in a zir bawk a ni ang ka ei tui hle.

Chaw kan ei kham a, eina ka seng fel zui nghal sawk sawk a, ram chhuah hun a hnaih thuak tawh avangin Mazara hmel ka hmuh leh ṭep tawh ka ring. Tlantea pawh hnathawh kawr a ha nghal a, a che muangchang lo hle. Putea leh ka pa chu an titi a, ram lama chhuah an tum lo a ni ang. Pitei tak ngial pawh chhuak turin a la insiam lo va, hnathawk an tum lo tak tak a ni ang, chhuak dawn ni se chuan insiam a hun daih tawh. 

Thleng ka sil zo pindan lama phei ka tum laiin Mazara hmel chu ka hmu ta hlawl a, kan mit chu a intawng chiang hle bawk. A hnathawh kawr chu a pawt zeuh a, hrethiam lo zetin ka ding ngawi reng a, kawngka bula a din avangin mi dang chuan an la hmu ve lo. A hnathawh kawr chu a pawt leh ṭhin a, ka va han hrethiam lo tak em, a bulah va kal ringawt dawn ila mi dangin min lo hmuh ka hlau bawk si.

Tlantea chuan thawm a rawn nei a, veranda lamah a chhuak phei nghal a, ka pa te paw'n Mazara chu an rawn hmu ve ta. Kawngka bul aṭang Tlantea leh Mazara inzui chhuak chu ka thlir vawng vawng a, an kal liam nghal mai dawn emaw ka tih laiin Mazara chu a rawn lehhawi a, a kawr bawk chu a pawt leh ta. Ka kawr chu a bal emaw tiin ka en kual vel a, engmah thil bal ka hmu bawk si lo.

Ka hawi phei leh chuan in lam panin Tlantea a rawn kal mêk a, Mazara lam zawk chu ka en ta daih a, a hnathawh kawr hak lai chu inhmeh ka ti leh tlat tawh. A iptêpui te chu ka tan chuan a lian khawp ang le, pawnfen ah ka hmang thei hial ang ka ring. Mazara tan erawh a lang lian hran lo va, a táwk vel chiah zawk a ni. Ka lu chu a rawn ri kawlh a, a nâ ang reng. Tûai neuh neuhin Tlantea chu ka en a, a lo chek ri tlak tlak a, min kuk chhan chu ka hre leh ta hauh lo mai.

"Che ṭhing nu, kan bula lo kal turin insiam thuai rawh. U Mazara signal-na che pawh i hrethiam lo a nia, mawl hî hê reuh lutuk" ti leh in chhunga min nawr luh a rual a, mi dang bulah chuan min rawn hmasa miah lo hian

"Numami hi kan bulah a lo kal ve duh tlat a, kan hruai ve mai dawn a nia" a ti leh zung zung a, ka pa te chuan min lo en ṭhap a, en rei lovin room-ah ka lut daih a, thawmhnaw dang hain Mazara te bula kal tur chuan ka insiam ve ta ringawt. 

"I kal ve duh tak tak em ni Numam? I va tum hnuhnawh deuh thut ve, i che sual palh vel ang e aw" ka pa chuan min ngaihtuah tih ka hria, mahse Mazara te bula kal chu ka châk leh em em tawh zawk a, min signal dan ka lo hrethiam har lutuk chu mawl ka inti thar hle.

"Ka che sual êm bik lo vang, Tlantea a awm tho va, kan lo haw har ka ring lo ve tawp" nui chunga ka tih chuan min buk khum zeuh a, keini pawh kan chhuak zui nghal a, pâwn kan thlen chiah chu Mazara chuan min lo en chiang leh tawh khawp mai. 

Tawlailir chu kan pathumin kan nawr a, kei chuan ka nawr lo tluk a ni. Mazaran hruiin a pawt kawi zat zat a, tawlailir han pawh kawih vel chu a hnehsawh leh ta viau. Tlantea chu a ṭawng malh malh a, kei pawh ka ṭawng tui hle a, a laia tawlailir hrui pawttu erawh a ngawi reng thung. A ṭawng tam lohna te chu pa ka ti tawlh tawlh a, inhmeh ka ti tawlh tawlh a, vuina ka nei tawh lo a ni ber. 

Khaw pâwn kan thleng a, hnim kara tui luanga mi chu tui kan thun a, a vawt tui khawp mai. Tlantea chuan chawlh a rawt a, kan chawl ve mai bawk a, Mazaran ka kut a rawn hum chiah chu ka thla a muang nghal ngawih ngawih thei. Thil hlauhawm kan tawk lo va, rilru pangngai tak ka put lai mêk paw'n ani hi chuan thlamanna min pe thei tlat ṭhin. Ka tan chuan mipa dang ang mai mai a ni ve lo, a danglam bik tak zet a ni. 

"Numami a lo kal ve bawk si a, in bula lo kal tak tak ka tum lo a nia u Mazar. Hmun dangah ka kal zawk dawn, mahse in bula kal turin min la duh ṭâlh chuan ka lo kal tho ang" Tlantea chu ka en hû a, ani chuan Mazara a lo en daih thung.

"A pawi lo, keimah paw'n ka tithei turah ngai ang" Mazara aw chu a thum bul a, ka kut a vawnna chu a la thlah miah lo bawk a, Tlantea chuan min nuih var var a, ka lo lai leh tlat tawh, a buaithlak ṭhin.

"Nangmah ngeiin pe ang che, keima'n pek ka tum chuan a la duh dawn der si lo" tiin Tlantea chuan ka kutah pawisa a rawn hum hnan a, Mazara lam chu ka hawi chho thuai a, a hmel ren run aṭang chuan pek a har hmel khawp. 

Tlantea chu a kal ta nal nal a, Mazara chu pawisa pek nghal ngawt ka tum bik chuang lo. Ka kut a thlah chiah chu ka ruak huai a, ngawi rengin tawlailir kan nawr dun zui nghal bawk. Tawlailir kan nawr dun lai chuan ka en leh zeuh zeuh ṭhin a, kan insan hleih mah mah chu a ni. 

Pheikhawk sâng pawh bun ila a koki ka pel vel âwrh chauh ang ka ring, chuti ang khawp chuan a palian a ni. Hmeichhe tê chhe zawk zawk ka ni lo va, sân zawngah hi chuan ka pangngai viau, mahse Mazara lakah chuan ka lang te râwih thei maw le. A sâng satliah mai a ni lo va, a taksa a lian tel leh zel a, min venhim hneh viau ka ring ve tawp. 

Tawlailir dahna kan thleng a, a hung ṭha nghal mual mual a, ramhnuai lam kan pan lai te chuan ka hawkdâk ang reng khawp. Thil ri hlek awm se ka hawi zel a, sava hram ri chuah chuah te chu mawi ka ti tlat a, boruak chu a dai nuam em em bawk. Kan kalna tur lampang peng chu kan thleng a, chu lam chu ka vawi khat kalna a ni nghe nghe. Hma a hruai a, keiin a hnungah ka zui zel a, inbe miah lo mah ila nuam ka ti ru em em tho. A duh hunah chuan a rawn ṭawng mai turah ka ngai a, min biak kher ka phut tawh lo a ni.

Huan pakhatah hian kan lut a, zawhna zawtin ka ṭawng chhuak hmasa ta nge nge a, kan kalna hmun chu a lakhuih huan a nih thu a sawi ve mai a, ni a sâ lutuk lo bawk nen thli thaw te chu dawnsawn a nuam thlawt a ni. Changel pakhat bulah hian a ding a, a iptê pui chu a dah thla zui nghal bawk a, kei chuan a che vel chu ka lo en reng thung. Hnim vel chu a sam tlu hmawk hmawk a, a sam fai chin chu a teh thlap bawk.

Ka awmna lamah lo kalin changel bula awm reng tur chuan min ti a, ka lo bu nghauh nghauh a, ani pawh a sam fai sa lamah chuan a chhuk ve leh mai. Hnim kar aṭang hian thir tlawn sei ang reng tak a la chhuak nawlh a, lei chu a cho khuar nghal sawk sawk bawk. A che reng reng chu a muangchang lo hle a, a hmanhmawh ti dawn ila hmanhmawh hmel a pu bawk si lo. Lei chu a cho khuar zung zung a, thingtlang mi ni awm reng pawh a ni.

Lei chu hmun hrang hrangah a cho khuar a, ngawi rengin a che mual mual a, hah ve thei lo ang mai a ni. Ka rin loh dêuh deuh aṭang mau te, thing tûai te, dâp te chu a rawn la chhuak a, sawi lo mah se thlâm a sa dawn a nih ka ring. Puih tumin ka tho va, mahse engmah tih tur ka hre chuang lo. Ka ṭhu leh tawp a, ka ṭhutna chu daihlim a ni a, a chetna erawh ni sa hnuai a ni thung a, a hah loh bik tawp chu ka ring lo. 

"Awi!" tiin ka ṭe ṭhawt a, ka bul lawkah chuan laiking awr sen rapawm zet mai hi a lo bawk run a, ka hlau lutuk chu ka au a ni ber, ka thawm hriain Mazar chu ka bul a rawn thleng chho rang teh e! 

"I bulah ka lo awm ve mai teh ang Mazar, ka dip miah lo vang che" ka tih chuan a lo bu nghat a, min kaih a tum deuh ûk a, mahse a kut chu en zawkin min kai leh ta lo, a kut balh vanga min kai duh lo a nih ka ring thiam mai.

Iptê pui aṭang chuan puan pan tê hi a rawn la chhuak a, a hlai lutuk hran lo. A lukhum khum lai chu phelhin puan nen chuan min khumtir a, min ngaihtuahzia a tihlan dan vel chuan min tihlim tak zet. Lukhum chu ka thawl deuh avangin a hnung lam aṭang a pawt zim a, puan pawh chu a siam ṭha zui malh malh a, ka mit taka a rawn en chuan ka lo nuih sen sen a, a hmui chu ding lama tiche zeuhin a mit pawh rei lo tê a chhing zawk a, ka nui hmel chuan a tihlim ve chiang a ni.

"Ni sen sa hnuaiah i awm duh tlat bawk si a, i pa'n min hau lo turah ngai ang" ka bianga piai zeuhin a rawn ti sup a, min hnung chhawn zawnga a chet hnu thlengin ka khi ver ver a, kan awm dan chu a va'n nuam chiang tak! 

Hnawksak nih ka hlauh avangin amah hlat deuh takah ka ding a, a ṭuan a ṭha bawk a, che sâwt tak a ni. Ka rin ang ngeiin thlâm chu a sa ta ngei a, mahse putea te loa thlam ang em emin a lian lo thung. A thlan tla ka hmuh te chuan khawngaih ruk riauna ka nei tlat a, ka awm mai mai thei ta bik lo. Hlau chung chungin changel lamah ka kal a, kan tui pai dahna a ni miau a, Mazara in tur ka pek theih nân ka kal ngei a ngai a ni. 

Changel bula kan tui pai hnim kara kan dah chu ka hmuh phakah a awm reng tawh a, mahse ka kal phei nghal mai ngam rih lo. Laiking awm leh awm loh ka en thlithlai hmasa té tê a, ka hmuh tawh miah loh avang chuan ka ngaih a ṭha ta em em bawk. Tui chu lain Mazara awmna lamah ka chhuk a, a ban puam hrawl zet chuan a thlan tui a lo hru zeuh zeuh a, chawl ve tawh mah se a pawi miah lo, a hah tawh lutuk palh ang.

"Mazar, chawl ve tawh la? I tui in tur ka lo keng bawk a nia, lo in lawk rawh" ka tih chuan a ngawi reng a, ka lam pawh a rawn hawi chuang lo, a thil tih lai chu a laklawh viau a nih ka ring.

A ban phun chung lamah chuan a lawn chho zawt zawt a, dâp chu a phah hmasa a, a hnuah Silpaulin rawng pawl a phah leh a, a che reng reng chu hmuhnawm a tling a ni. A lawnna aṭang chuan lei lamah a rawn chhuk leh a, dâp bawk chu thlâm chhuat atan a phah leh zung zung a, mi dang puihna a mamawh hlawl lo, amah chiah paw'n a thawk thei em em zawk a ni.

"Hnâng kha min lo pe lawk teh" a tih chuan ka che chhuak nghal a, mahse eng nge hnâng ka hre hauh lo, ka hawi kual vel ṭhin a, ka hmu thei bawk si lo, a chhan chu hnâng ka hre lo tlat.

"I bul lawkah khan a awm" a rawn tih leh chuan ka bul vel chu ka en a, mau bak hmuh ka nei lo, hre lo nih ka zak ve tho bawk si a, mau chu a awmna lamah ka keng thla ta ringawt. 

"Kha le" ka thil pek tum a hmu chiah chu a dâp phah lai a tawp chat a, ka mau ken chu en zeuhin nur nâng hian min rawn en zawm nghal a, a hrethiam lo hmel chuan min tihamhaih zo vek.

"Keima'n ka la thei reng tak e, lo awm mai mai rawh" ti supin a ṭhutna aṭang chuan a che chhuak a, a hmaa ka dinna lamah chuan a han kal a, a thil ken ka hmuh rualin hnâng chu ka hre ve ta chiah.

"Hnâng ka hre reng reng hleinem, min hrilh ve mai ta che" lungawi lo ru zet chuan ka ti niah niah a, zep lovah chuan ka zak ve reng, ka thinrim em em pawh a ni lo, ka puihna a mamawh laia ka pui thei lo chu hrehawm ka ti ru hle bawk.

"Ka'n che hmanhmawh deuh ang e, khua hi a hniam ṭan riau" tiin thil dang daih chu a rawn sawi zawm a, a sawi ang tak takin a che hmanhmawh a, kei chuan khua chu a danglam paw'n ka hre lo, a ngai rengin ka hria.

Thlâm chungah chuan lawnin dap leh Silpaulin chu hnâng hmangin a ṭawn mawlh mawlh a, a harsat lo khawp mai. Chung lama a chet zawh hnu chuan hnuai lamah a che leh nghal zung zung a, a tawpa tawpah chuan a siam pûm zo ta. Ka bulah lo kalin ka hnungah a ding a, ka dara chelhin thlâm chhungah chuan min nawr lut a, ani erawh a lo lut ve nghal mai lo. Changel bula kan thil dah vel chu a han la a, thlâm chhunga a rawn lut chu a huhâng nâ zetin min uap leh nghal ringawt tawh.

Rei lovah khua chu a rawn dur a, khawipui ri pawh kan hre thuai a, Mazara sawi lawk chu a dik tih ka hre ve leh te chiah. Thukah mei a chhem a, engtik laiin nge thuk chu a lo siam hman pawh ka hre lo. Mei a chhem lai chuan ruah a rawn sur ṭan a, a sur tam tial tial a, a hnuah phei chuan sur tam tak a ni. Mei a chhem alh hnu chuan ka bulah a rawn ṭhu a, ṭhu reng chung hian min chawi kâng a, a kap kara min ṭhut tir chiah chu nuam ti tak ka ni. 

A taksa lum nuam zet chu ka ngheng ar ar a, lukhum leh puan ka khum tawh lo bawk a, ka chhip chu a thawk khum ham ham a, engkim chu a dangdai vel vek a ni. Chuti anga zalen chuan awm reng thei ila ka ti, mahse a la theih ngawt si loh. A kut hrawl leh hlai zet chuan ka sam a zut a, thingtlangpa kut tih hriat taka thap hrup ni mah se a sikna leh tawhna te chu kei chuan hrehawm tihna reng ka nei tawh lo a ni ber. 

"I mu ṭha lo em ni?" hniam ruih hian a rawn ti a, ka nghawng zawnah a thaw lum ham ham a, kei ve thung chu ka lo mur chuai chuai a, kan boruak awm danin a zir lutuk vangte pawh a nih ka ring.

"Aw" ka ti sep a, ka khabeah chawiin min kuai dâk a, kan mit chu a intawng chiang khawp mai.

"Engati nge?" ti supin ka mit leh ka hmui chu a en tawk zâk zak a, tun ṭum chu ka zam ru leh er er tawh, ka zam tawh ngai lo emaw ka tih vei nen, a bulah hi chuan ngai rengin a awm theih loh a nih dawn hi! 

"Ka ngaihtuah che alawm, in che sual palh ang tih ka hlau" a hmui lum nuam takin ka hmui a rawn bawh thuah chiah chu ka sawi zawm thei tawh lo, duhthaw ru deuh si hian min fawh dan chu a thuk em em a, ka tiril zawng zawng a fan chhuak vek ni maiin ka hria.

"Sawi nawn leh rawh" ka hmui zawnah chuan a ti thum chhal a, a thaw rimtui tak ka hip luh avang ringawt pawh chuan ka danglam thei maw le, mak tak a ni.

"Ka ngaihtuah che Mazar, nizan kha chuan ka ngaihtuah tak zet che a ni. Ka muhil thei lo va, ka tlaivar phah hial asin" ka tih chuan min fawp leh nghal ngawng ngawng a, a mi fawhna leh tawhna te aia nuam chu ka la tawng ngai lo.

"Kei tak hian asin mut harsat; nang ka ngaihtuah reng che avangin" ril ruih hian a rawn ti a, kei ve thung chu ka la thaw deuh hlawp hlawp a, min fawhna chuan keimahah nghawng nâ tak a nei a ni. 

"Nizana i inlêngte lakah ṭhat i chhuah mah mah em? Ka thusawi kha i hriat reng ka beisei" ka sam chul pah hian a ti leh a, ka lo nui sen sen a, a mitmeng mawizia chu ka sawifiah thiam lo, a dum lo va, a uk miah lo bawk.

"Thik thu chhepa" ka tih chuan a kiai suk a, min fawp leh zeuhin hma lam hawi zawng chuan min ṭhut ṭhat tir a, duat tak hian min kuah a, kan awm dan chu ruah sur zawng zawng nen chuan a inrem vek a ni.

*MAZARAN PHONE NEIH A DUH RIH LO, BUAITHLAK! 😂 *

(End of Chapter 17)