SUMO DRIVER By Havali Adam (CHAPTER 16)

SUMO DRIVER 

By

Havali Adam

Chapter 16

"Ka ṭawng i hre thei em Numam?" ka pa awah chuan ka harh chhuak leh zawk a, engtia chhan tur nge pawh ka hre lo, a thu hrimah engati nge min hrilh lawk miah lova a lo kal le, Mazara nen kan lêng dun tih a hriat vaih chuan a chi loh khawp ang.

"Aw, kan lo haw mêk e" zawhna dang min zawh leh hmain phone chu ka hmet tawp daih a, Mazara chuan ka che vel reng reng chu min lo en kar a,  a mitmengah chuan zawhna ka hmu thei bawk.

"Ka pa a nia, tunah pitei te inah a awm tawh, a rawn zin thut hi ka ring bik lo. Kan haw nghal a ngai, hmanhmawh ang" ka ti leh ta ringawt a, ani pawh che hrutin bike-ah chuan a ṭhu ṭha a, ka hmanhmawh thawkhat bawk a, ka chuang rang hle.

Kan tlan chhuah rualin a hnung lam aṭang ka kuah a, nghet zetin a kawng zawnah kut ka suih zawm zat bawk a, ka hlauthawng ru ve reng. Mazara nen kan inngaizawng tih ka pa'n hre ta se engtin chiah nge min tih ang? A lungawi lo viau ang em le? Ka hriat chinah chuan fel a ti a, a nêl phian bawk a, pawm thei hram se ka ti a ni. Ni lo, kei hian engati nge chuti ang thil te chu ka lo ngaihtuah vak vak? Mawl lutuk, ka sawi a nih ngawt loh chuan an hre bik kher nâng. 

Ni e, ka sawi tur a ni rih lo. Tlantea tih loh mi dang hria an awm lutuk lo va, ka pitei leh putea te tak ngial paw'n an la hre lo va, chuti maiin ka pa chuan a hrethiam tawp lo vang. Kan lêng dun ve a ni mai a, chhuanlam atan sawi tur dang a tam lutuk. Hlauthawng tur ka ni lo, pangngai takin ka awm zawk tur a ni. A chhan chu Mazara nen kan inkar engmah an hre nghal ngawt dawn lo va, an hriat a la hun rih lo bawk.

Mazara chu nghet lehzualin ka kuah a, a taksa hi chu a hahdam thlak ve thlawt a ni. Lum nuam si, a lian ṭha leh zel a, pathlawi laka min kai sawn daih te kha a pa chiang alawm, pathlawiin min biak mai mai te kha a lo thik ve vel a, mahse ka thik chu a ti duh bik miah lo. He pa hian min luah khat hneh zo tawh a ni ber e, a ṭawngmawhna te hi ka ngaina tlat tawh a, mahse hmeichhe dang nen innel taka an inbia kha chu ka thik ve thlawt a ni. 

Ka thil ngaihtuah avang chuan ka rilru pawh a pangngai chho tial tial a, ka pa chu pawng hlauh ringawt a fuh ber lo a ni. Kan veng lam pana kan tlan chhoh laiin kan hmaa tlante chu an insu palh a, tlangval tih takah an pawr hlawm hle a, kawng an dal tlat avangin keini pawh kan din phah nghe nghe. Tlangvalho chu an ṭawng ring telh telh a, an pawr telh telh a, kut inthlak an tum ta mai. Mazara chuan han ṭhelh a tum a, mahse ka lo vuan bet chat thung.

"Hlauthawng suh" ti supin ka kut chu a nawr tawlh riai riai a, a kal lui dawn thova ka hriat hnu chuan ka dang duh ta bik lo va, intibuai chu an tam ang reng si a, tum loh deuhin Mazara chu a intulut ve mai ang tih ka hlau ru hle.

Ka hlauhthawn ang ngeiin tlangvalho chu an inhnek ta buan buan a, ṭawngkam mawi lo tak tak phuh chhuakin an rak chel chul a, an thinrim hmel hlawm khawp mai. Mazara chuan pakhat chu a man bet tlat a, a man behpa khawih tumte apiang chu a lo vau zel a, mahse mak tak maiin chungho chuan a thusawi chu an awih tlat. Kei ngei paw'n mak ka ti, insualnaah chuan a tel ve nghal mai ka ring kha a nia, a khap dai ta daih zawk. 

Tlangvalho chu insual tawh lovin an inchhang pang pâng hlawm a, Mazara chuan a kuah behpa chu a bike tlukna lamah a hruai a, bike chu a tundin sak bawk a, eng emaw sawi chu a nei ngei a, mahse ka hre pha chiah lo. Kawngpui bul hnaia awm te chu an lo chhuah belh zel a, intibuaiho chu an thlir ṭhap a, pa ṭhenkhat chuan an lo ṭhelh ve bawk a, mahse ṭawngkam erawh an la duh tui lo tluang zel.

 

"Kan kal thei e" ti supin bike-ah chuan a ṭhu a, kei pawh rang zetin ka lawn chho ve leh nghal mai bawk a, kan tlan pelh hnu thengin an la intih buai leh buai loh chu ka en zui vawng vawng a, an thinrim hlawm tehreng nen awlsam deuha Mazaran a ṭhelh thei chu mak ka ti a ni. 

Pitei te in kawta kan din rual chuan hawi let tawh lovin in lam ka pan nghal chawt a, in chhung ka lut chiah chu ka pa'n min lo pan a, nui vur vur hian min kuah a, eng nge a rawn tih dawn ka la hre lo cheu. Thil dang a sawi ṭeuh hmain a rawn kal chhan chu ka zawt ta nge nge a, min ngaihtuah avanga lo kal a nih thu a sawi chuan ka ngaih pawh a ṭha ta deuh a, sitting room lama kan phei dawn lai chuan Mazara a rawn lut hlawl a, mak ka ti teh e! 

A haw daih tawh emaw ka ti zawk a, a hmel ka hmu chu a lakah ka inthlahrung thar hle. Leng lut tur te khan lo sawm mawi ve tal ila ṭha tur a nia, kei lah chuan sawm nachang pawh ka hre der si lo. Ka pa chuan kan inkar engmah hrethiam lo zet hian a lo chibai a, sitting room lamah an phei dun a, kei chu ka kal sawn ta daih. Ka pa te ho ṭawng dan aṭang chuan Mazaran min rawn thlah tih an hre lo a nih hmel a, ka lawm tak tak a ni. 

"Numam, thingpui kha han lum ta che? I pa hi ei rawng bawlsak lawk bawk rawh aw, chaw a la ei lo a nia" putea chuan a rawn ti lang lang a, ka lo buk khum zeuh a, choka aṭang an ṭhutna lam chu ka hmu thei vek a, Mazara nen chuan kan mit a intawng zeuh zeuh bawk. 

"Khotê ah khan arsa a awm a, kha kha siam mai rawh. He lamah ruai ṭheh in nawn tih ka hre si lo va, zanriaha hmeh atan ka lo keng chho tawp a, a rim chhe hman êm lo vang chu!" ka pa chuan a rawn ti ve leh a, arsa hi chu Aizawlah lamah kan hmeh ṭhang a, ka siam thiam ve hle.

Rawt thlêngah sawhthing leh purunvar chu ka rawt chip a, alu ka zawng chu ka hmu mai lo va, mahse putea te ka va zawt buai duh ta lo. Ngawi rengin in aṭang chuan ka chhuak a, ka chhuah dawn lai takin Mazaran min lo en run a, ka nuih sak ringawt. 

Ka kal zel a, dawr awmna chu ka va thleng phei a, dawr chhunga ka luh rualin alu chu ka thlang diat diat a, an lo nei tlêm tawh ang reng a, duh ang paw'n a thlan ṭhat theih loh. In ka thlen chuan keima chet chetin ka che ve leh mial mial a, ka ei rawng bawl lai Mazaran min rawn en zeuh zeuh bawk si a, a ruk tak chuan a hmuh laia chet vel chu ka intithei ve deuh. 

Maian ka bai thiam loh avang khan chawhmeh dang ka siam thiam lo emaw a ti palh ang tih ka hlau a, ka arsa siam mêk chu ei chhin nghe nghe se ka ti hle mai. Tui tih lutuk avangin a lei a lem tel lo chauh ang maw le, arsa bikah hi chuan ka chhungte ngei paw'n min fak ve ṭhin, mahse chawhmeh dang ka siam ngai lo thung. 

Alu nen arsa chu ka kâng a, a phuan ri cher cher a, a rimtui lutuk chu ka ril a ṭam ve leh vek. Mi dang hmuh loh laiin chaw ka inchhum kep hial a, zanah tal chaw chu ka ei khawp ang. Minute 15 vel ka chhuan chuan ka tem chhin a, tlêmin arsa zawk chu a la hmin lo va, alu erawh a hmin dan a tawk viau mai. Anṭam chu antui hawp tur a awm loh lutuk loh nân ka siam leh a, kan zin hmasak zawka kan haw thlak leh hnu kha ka nu'n min zirtir thlap tawh a, a awm ve tho. 

Hmeichhia hi chu hmeichhia kan ni tlat a, ei rawng bawl mai bakah in chhunga chet vel chu kan tih tur chiang bal a ni. Mipa erawh an tih tur ber chu chhungkaw uap lum leh chawmna tur thawh chhuah a ni mai a, a chang chuan hmeichhiate hi kan hah zawk em âw te ka ti ṭhin. Ka nu aṭang hian a chiang reng; ka pa a sual ka tihna lam ni lovin. Sawrkar hna a thawk a, a hna lamah a buai em em rualin in chhungah a awm mai mai ngai chuang lo. 

A fate'n ei rawng bawl leh in chhung sekrek khawih vela kan awlna chin pawh hi a la rei lo maw le, hman ni lawk anga ngaih theih a ni. A ṭul chuan ka pa pawh a buai ve mai zel a, a fate hmeichhia vek kan ni erawh a chang chuan hrehawm a tih ruk ṭhin ka ring. A ṭhiante lahin mipa deuh hlir an nei leh nghal a, mipa hi chuan mipa bawk fa atan an awt tlangpui ṭhin a, mahse ka pa chuan ninawm ti hmel leh hrehawm ti hmel a pu ngai chuang lo. 

Ka nu leh pa te hi inhmangaih tawn thiam tak leh indawh tawn thiam tak an ni a, inhauh changte chu an nei ve ṭhin ngei alawm, mahse engtin tin emaw ni hian an lungawi ve leh mai zel. Ka nu hi a ri leh hlawk hlawk ṭhin a, ka pa pawh thu duh ve tak a ni a, inmil lo viau angin lang mah se an inmil leh tlat zel. Nupa nihna hian ken tel tam tak a neiin ka hria, nupa nih tawh chuan insiam rem thiam te a ngai ngei ang a, ka nu leh pa te aṭang hian a hriat theih titih tlat. 

Mazara chu rei lutuk awm lovin a haw a, a haw dawn chuan min rawn en leh zeuh a, min enna ringawt pawh chu ka tan zawng hriat reng tlâk a ni leh ta. Vei zuia ngaihtuah zui vawng vawng theih tur hian awm dan a thiam tlat roh a, chuti anga awm chu a tum em tih erawh ka hre chuang lo. A bihthla zawngin chet ka la leh a, bike a tih rum lai leh a tlan liam thlengin ka thlir zui vawng vawng a, zalen deuhin inngaizawng ila, a haw hma tal kuah leh chu ka châk ngei mai, mahse tun atan chuan a theih rih si lo. 

Ka pa chaw eina bulah chuan ka ṭhu a, a chaw ei dan vel chuan ka chil a tiput tlat pek a, thleng chu lain ka ei ve ta ringawt. Ka putea chuan min lo nuih vur vur a, ruai ṭhehnaah ka inei puar lo a nih ringin min fiam deuh chhen bawk a, mahse chuti ang lam pawh a ni chiah lo. Ruai kan ṭheh lai khan ka puar ngei alawm, hun a kal deuh a, ka ril a rawn ṭam leh nghal zel, ka puar tak tak lo te pawh a ni maithei. Ka pa nen chuan chaw kan ei zo vek hial a, ei tui tak ka ni. 

Inkhawm a awm tawh lo bawk a, zanah chuan inah kan awm kim ṭhap a, ka pate ho sitting room lama an titi laiin kei leh Tlantea chu room-ah kan awm daih thung a, ruah a tla deuh seng seng bawk. January thlaa ruah a sur teh daih chu mak la ka ti hle a, chutah kum thar tirh lam a la ni zui a, ka vawi khat hriat a ni. 

Tlantea chuan Aizawl lama ka haw thlak hun tur min zawt a, ka sawi fak thei ta lo va, kan haw thlak hun tur chu ka hre lo tak tak, ka pa'n haw a tih hunah kan haw mai turah ka ngai. Kan inkawm melh melh lai chuan information mic aṭang thu puan a rawn awm a, khawtlangin chhiat kan tawh thu an rawn puan chuan ka hlau nghal ringawt a, a khawk deuh rum rum bawk si a, ka hlau lo thei lo. 

Mitthi chu khaw piah deuh lawk District Hospital-a a boral thu te, khaw lama hawpui mek a nih thu te chu an rawn puang zawm zel a, a ruang hmuak turin khawtlang mipui te an rawn chah tel bawk. Tlantea chu ṭawng reng chung hian thawmhnaw dang a ha mawlh mawlh a, tlaivar a tum a ni ngei ang. 

"Engtia thi nge? Eng nge a natna leh a thih chhan ni reng reng a?" khuma ṭhu awn duai pah chuan ka ti a, rizaiin ka intuam hlûn a, vawt ka tih vang pawh a ni em em lo, chu ai chuan mitthi chu ka hlau zawk a ni.

"Thisen Cancer a nia, a rei ve tawh alawm, vawiin tlai khan a zual an tia, kei chuan a daih rei ka ring tawh lo hrim hrim" a lo ti ve mai a, a insiam zo thuai a, hmeichhiate aia mipa awlsamzia ka hmu leh ta.

"A nih chû, a va'n khawngaihthlak ve le, nupui fanau te a nei tawh mial em?" hlau ru viau e ti lo chuan mitthi chanchin chu ka zawt zel a, Tlantea lakah chuan ka hlau tih thup ka tum a, ka intihlau lo lui der a ni ber.

"Nei tawh e, fa pawh pahnih lâi an nei tawh alawm, amah hi a hma chuan tlangaupa a ni ṭhin. I hrethiam em ka sawi awmzia? I hrethiam chiah lo vang a?" a tih chuan ka lo bu nghat a, tlangaupa a tih chhan chu ka hre miah lo. 

"A hma chuan kan khuaah hian information mic a awm ngai lo va, tlangaupa atan tuna boral ta hi a ni ṭhin. A kal kual a, a au lauh lauh zel. Zanah te khan khawtlang mipuite hriat tur a awm chuan kal kual a ngai awm ṭhin si a, a nuam lo duh thei ngawt ang" 

"A va'n mak reuh; ka vawi khat hriatna. Nupui leh fa pahnih lâi a nei tawh bawk si a, a nupui fanau te chu ka va'n khawngaih ê. Pasal leh pa tel lova awm chu a hrehawm ngawt ang, an pa lah chuan a boralsan tawh chu a ni si a" 

"Thihna hi chu kan dan theih a ni hleinem, kan la thi vek dawn tho tho alawm" a tih chuan sawi dik ka ti kher mai, damna hi chu thuhran ni se, thihna tak hi chu a ngainatawm loh ngawih ngawih, mahse tu paw'n kan la tawng vek dawn a ni. 

Zan dar 10 a pel tawh a, khawhar ina kal chu a hun titih der a, Tlantea chuan kalpuiah min sawm ve nghe nghe a, mahse ka hnial ta mai. Chu bakah puan bih tur pawh ka keng chho lo va, khawhar in kal ve tâk rau rauva puan bih loh chu a mawi chiah lo a ni. Ruah sur chu a han deuh a, zan a rei telh telh a, khawhar ina zai thawm pawh kan veng aṭang a hriat theih a, ka la hlau ru reng tho. 

Tlantea a tlaivar dawn tho avangin ka pa chu ka bula mu turin ka sawm a, ani paw'n a lo remti ve mai bawk. Ka muthilh theih mai loh avangin ka pa nen chuan mut hmunah kan titi melh melh a, ka hlau tih pawh a hre vek tawh a, mahni pa te bul êma zep chu ka duh lo a ni. 

Ka nu leh ka u Duhawmi chanchin ka zawt luam a, zawhna min zawh hmain thil dang ka sawi pui zel a, tlaia ka lenna leh ka lenpui chu tu nge a nih min zawt thut ang tih ka hlau a ni ber. Pa te bula mut zawng a dan a dang ṭhin e, ka hnung lam aṭang min rawn kuah a, min ngai ve deuh te pawh a ni ang. Mazara kuahna nen chuan a inang chiah lo, a nawm dan leh a thlamuan thlak dan a inang lo a ni. 

Zing hma tawk takah ka harh hlawl a, ka pa erawh a lo la mutui khawp a, kai tho duh ta lo law law. Aizawl aṭang min ngaihtuah avangin a rawn zin chho ve vang a, a chau ve ngawt ang ka ring. Motor chuan hrim hrim hi chauhna tham a ni ve a, kan zinna emaw kan chhuah vahna a hlat phei chuan a dam loh theih hialin ka hria. 

Vawi khat pawh kan chhungkuaa kan zin ṭumin u Vli a rui vak tawh a, buaipui fê ngai khawpin a awm nghe nghe a, khata ṭang kha chuan motor chuan fuh loh lo hrehawmzia tur ka hrethiam ve ta chiah. Tukṭhuan ei laiin ka pa chuan zirna kan ṭan hun tur min zawt a, thla lai hawl aṭanga kan kal leh tawh dawn thu ka hrilh ve mai a, thil ding min zawt zui ta lo.

Aizawl lama kan chhuk thlak hun tur tak erawh a sawi lo va, kar khat leh a chanve tal chu kan la awm ka ring. Mitthi vui ni a, tumah kan ram chhuak lo va, nizan zan tir lam te kha chuan chhuah an rel deuhin ka hria. Chaw kan ei kham a, ka seng fel zui nghal a, vawiin chu engmah ka ti dawn lo a ang. Tlantea chuan min lo hui zeuh a, thleng ka sil zo chiah a, room-ah ka zui lut ve nghal mai bawk. 

"Nizan khan u Mazaran khawhar ina i kal loh chhan min zawt a, i peih loh thu ka sawi ringawt" a tih chuan mak ka ti deuh a, a chhan pawh Mazara chu khawhar ina a kal ka ring lo hrim hrim, rin nachang ka hre lo zawk a ni. 

"Vawiin chu i lo kal ve tawh ang chû, u Mazara te nen thlan kan laih ho ka ring. Kan bula i lo kal duh chuan thingpui lum zingah tel la, thingpui lum ṭhenkhat hi thlan laihna lamah an rawn kal ṭhin a, u Mazara i hmu thei a ni mai" a tih leh chuan ka ngaihtuah chiang a, a ṭha phian dawnin ka hria.

"Lo kal chu ka duh a, mahse pawn dum bih tur pawh ka nei lo. Ka keng chho lo hrim hrim zawk a, engtin nge ni ang?" ka rilruah Mazara hmuh chiah a awm leh tawh a, zan khat lêk hmuh loh paw'n ka hmu châk em em zel chu a nih hi! 

"A ho lutuk, ka nu'n pawn dum te chu a ngah ang. Kan dil dawn a nia, anni pawh mitthi vuinaa kal vek an tum tho khâ" a tih chuan ka lo bu nghat nghat a, a hmelah chuan a mut a chhuah hmel hle a, mahse thlan lai turin a insiam ta tho. 

Mizo nih hi chu a dangdai a, a nuam bawk a, chhiat leh ṭhat nia kan inṭawiawm ṭhin te hi a danglamna pakhat chu a ni. Hnam dang te chuan kan hnam angin tlawmngaihna nun te an hre ve kil kel lo maithei, mahse keini chuan chu tlawmngaihna nun chu ka pianpui tlat a, a awmzia kan hre bawk a, min thlahtute aṭanga kan lo nunpui ṭhan tawh a nih avangin paih bo mai chu a theih loh tluk a ni. 

A duh phawt chuan Tlantea chu a mu thei reng ang, amah ni lo thlan lai tur pawh an tam ang, mahse Mizo tlangval a ni tlat a, chuti ang rilru tlawmngai lo lutuk chu a pu duh lo a ni tih a hriat hle. Tlawmngaihna tih te, aia upa zahna te, hawihhawmna te hi Mizoah chuan a tla nâ hle a, zu rui tak te pawh hi an hmel hriatte nen an inhmuh chuan an hawihhawm em em thei zel tho, leh lam kawng zawng tak chuan a mak ve a ni.

Ka pitei pawn dum chu ka bih ta ngei a, mitthi vuina tur in kan zu thlen chuan thingpui lumna lamah ka kal phei nghal a, Tlantea a nawrin min nawr phei dawt dawt zawk maw le. Thlan lai tur ni si kha keimaha kal ka zah a hlauh avangin min hruai thlap a, unaupa fel ve tak chu a ni. 

Thingpui lum chu kan tam ang reng a, khawtlang mipui pawh kan tam thawkhat hle. Ṭhian nei lovin ka ṭhu tlâwng a, Mazara ka hmuh châk vang chu ni lo se chuan thingpui lumnaah ka awm hauh lo vang. Kan thingpui sem vawi khatnaah chuan ka che sual ṭep nghe nghe a, chu ringawt pawh chuan min tizak thei. 

Pastor ṭhutna lamah ka la sem zui leh ta nghal a, Pastor ber chuan chiang deuh hian min lo en a, min va han hre chiang dawn tak. Ka zak nawn âwn awn a, tûmah lah chuan ka zak ru em em tih an hre ve der si lo. Thingpui kan lum zawh hnu rei lovah no kan seng fel leh thlap a, Pastor ṭhutna lên lamah chuan ka kal tawh lo chiang teh e! 

"Thlanmual lamah pahnih pathum kha zu kal ta che u, an chhawl a hal tawh ang ka ring" pa thau lampang hian a rawn ti a, thlanmual lama kal a sawi chiah chu zah pawh dawn lovin ka lo ding thuai a, ka bula ṭhute chuan min en deuh hâw nghe nghe.

Ka chuhhelh azarah thlanmual lama thingpui pe tur zingah chuan ka tel ta ngei a, ka kalpuite pahnih chu an inbe melh melh a, min be lo mah se hrehawm tihna ka nei tawh rih lo. A chhan chu Mazara ka hmu dawn miau a, ka rilruah chu bak chu a awm lo a ni. Kan rin ai takin thlanmual chu kan thleng thla har lo va, tlangval an lo tam khawp mai. 

Naupang kum 12 bawr velin lung an lo pu sap sap bawk a, an tihtur ṭheuh  chu an hai lo chiang hlawm hle. Tlangvalho chuan thingpui kan keng tih an rawn hmu a, thingpui in chawlh an rawt zui nghal bawk. Mazara chu ka hmu tawh a, mahse ani chuan min la hmu ve lo thung. A ṭhianpa pakhat nen hian an lo ṭhu dun a, a ṭhianpa zawk chu a ṭawng char char a, ani chuan a lo ngaithla tawp a ni ber. 

Zozial chu a pak khu zeuh zeuh a, a awm dan ka en tui lutukna lamah ka thingpui sem lai pawh ka theihnghilh ṭep phah a, ka en rei duh ta rih lo. Mazara te ṭhutna lama thingpui an sem hmain ka kal khalh vat a, ka awm dan vel chu a mawi lo ka ti ve reng, mahse ka duh dan a ni miau bawk si a ni. 

"Nang hi pi Chhingzovi te mikhual kha i ni maw? A semtu a hmelṭha bawk a, khaw nge thingpui chu i han in chiah ila, a tui lo thei lo hrim hrim" thingpui lak pahin tlangval pakhat chuan a lo ti a, sawi tur ka vân hle. 

"Khawpui nula nge nge hi chu an lo hmelṭha zawk a ni" a bula mi chuan a lo ti ve leh a, Mazara te ṭhutna lam chu ka hawi phei zeuh a, mit khap miah lo hian min lo en reng a, a lakah chuan ka inthiam lo deuh nghal ringawt. 

"Ṭhiante u, zanin chu khawhar ina riah hmain pi Chhingzovi te mikhual hi i han rim hlawm teh ang u. Tlantea khan i phal êm ang chu maw, kan rawn kal tam viau maithei a nia" fiamthu rawngkai hian a rawn ti leh a, chu lai hmuna mi te chu an lo nui zui hak hak bawk.

Thingpui chu ka sem phei zel a, a tawp berah chuan Mazara leh a ṭhianpa ṭhutna bul chu ka thleng ve ta. A ṭhianpa zawk chuan ram chhuah lam sawiin  a lo la be malh malh reng a, min en chuang lo hian thingpui chu a lo la mai a, Mazara ve thung chuan min en ran mai. 

Thingpui a lak lai te chuan min en reng a, ka lai lek lek zawk a ni. Min biak ka ring ve kha a nia, min be duh ṭhak lo. Kal sawn paha thingpui semna no ka la kâng chiah chu mi ka khawng ri bawl a, ka mi khawn pa hmel ka hmu chiah chu ka nuih a za ru bawk si, ka inthiam lo tho bawk si, awm dan tur hriat har tak a ni. 

"A nâ em? Ka tum pawh a ni lo, a va zia lo tak" tiin a chal chu ka endik zui nghal a, chuti ang huna han kalsan daih chu a mawi chiah lo ka ti a, mi dangte chuan kan inbuaipui lai vel chu min lo ṭhap a, a nuam lo duh khawp mai.

"Khati ang te chuan inkhawn tir ve mai te pawh a va châkawm ve" Mazara te ang rual chuan a lo ti a, nuihzat thlak pakhatmah ka hriat loh laiin an lo nui dar dar thung a, keimah leh Mazara chu nui lo awm chhun kan ni ang. 

"A nâ lo" ka kut vawn paha a rawn tih sup chuan ka che tawp chat a, buk khum zeuhin ka kal sawn a, min en zui a ni ngei ang ka za mer mer a, ka thingpui sem pui hmeichhe pahnih chuan ei loh hmel zet hian min lo en bawk a, engah mah ka ngai duh lo ve hmiah. 

"I va che ṭhing reuh tak" thlan laihna hmun aṭanga kan kal sawn dawn lai takin Tlantea chuan a rawn ti hram a, rum zetin ka melh a, ani erawh a lo khi var var a, Mazara ka khawn dan zawng zawng a hmu vek bawk si a, min chhaih loh ka ring lo hrim hrim. 

Thingpui lumna hmun kan thlen leh meuh chuan Pastor-in vuina hunserh a lo hmang zo diam tawh a, chhung leh khat te'n thla an lo la vel mek a, thingpui lum a ngaih tawh loh avangin ka haw ta daih. Thlasik boruakin min la chenchilh avangin khua chu a lum lutuk lo va, mahse ka inbual ta tho. Ka thawmhnaw hak lai leh insuk tur awm ang âng chu ka su a, tlangbanah ka zâr zui nghal bawk. 

Dar 4 vel daihah ei rawng ka bawl ṭan chauh a, a chhan pawh ka lo muthilh vang a ni. Tlantea tih loh chu an lo la haw lo va, ei rawng ka bawl laiin Tlantea chu a inbual mêk a, a hawna a la rei bik lo a nih ka ring. Bathroom aṭanga a rawn chhuah chuan min nuih leh ringawt a, a nuih chhan lah ka hre chiang ropui mai si a, thinrim ringawt theih pawh a ni lo. 

Dik tak chuan ka che ṭhing ve êm alawm, chutah chhaih tiphur tawk chiahin Mazara kher a ni leh bawk si a, min chhaih vak vak mah se en liam tawp a ni mai. Ka pa hnen aṭang phone call ka dawng a, putea nupa nen vengthlang lama an len rih thu min rawn hrilh a, rei inbe lovin kan titawp ve leh mai. Tlantea chu choka lamah a rawn phei a, dawhkan bul ṭhutthlenga a ṭhut rual hian

"Zanin dar 6 bawr velah kan in kawtah sawn i lo va din vâng a ngai a nia" a rawn ti deuh tawl a, a thusawi awmzia chu ka hre der lo, ka alu zai tawp chatin ka en reng ringawt. 

"U Mazaran a hmu duh che alawm, hrethiam lo der vel suh, i che ṭhing reuh si" nui sun sun chunga a tih leh chuan alu ka zai chhunzawm ta daih a, ka hmui chu ka pet leh tawp bawk a, a chang hi chuan ka lai leh tlat zel.

Khua chu a thim hma bawk a, tlai dar 5 leh a chanve velah chaw kan ei der a, chaw ei laiin Tlantea chuan chhun lama ka chet chhiatna chu a sawi chhuak ta ngei a, kan hlimpui hlawm khawp mai. A nihna takah chuan mitthi vuinaa ka vawi khat thingpui lumna leh semna a ni a, che chhe viau mah ila ka chet chhiatna tak chu Mazara a ni tlat a, ka lungawi lo duh teuh lo mai. 

Dar 5 leh minute 45 a ni tawh a, room tukverh aṭangin in kawt lam chu ka thlir deuh chhen a, va chhuah mai chu ka duh rum rum. Tuna ka lo va chhuah chuan ka chhungte'n an hriatthiam ka hlau ru tho bawk si, ka za cheng mai. Ka phone-ah dar zat ka en leh zeuh zeuh ṭhin a, dar 6 chu a ri ṭep tawh a, field tê ah chuan naupang infiam tur an rawn chhuak sap sap a, chu chu remchangah ka la hmak. 

Naupang infiam en tur ang deuhin in kawtah chuan ka ding a, in chhunga mite chuan min rawn ngaihsak vak lovin ka hria. Dar 6 vel chiah tak takah bike thawm ka hria a, ka hawi phei chuan Mazara ngei a lo ni e. A ṭhianpa pakhat nen hian an ni a, a ṭhianpa hnenah chuan kalsan turin a hrilh zeuh a, a rei loh tur thu a sawi tel bawk. Hmun thim deuh laiah chuan min kai lut a, thingkung bula kan din avangin hmuh mai chu ka harsa ang.

"Eng nge in tih dawn a? Zan zanah leh nghal, in che sual ang e aw?" ka ṭawng dan vel chu a nupui te pawh ka ang alawm le, mahse amah chu ka ngaihtuah tak tak, chet sualna a thleng a awlsam bawk si a, vanduaina an tawk palh ang tih ka hlau a ni.

"Lui lam sa i ei châk em?" ka thusawi mil lo zet hian a rawn ti daih a, min din hnaih pahin thingkung hlim lamah min nam bet titih bawk a, a hmel pa tak erawh êngin a chhun avangin ka hmu chiang hle. 

"Ka hre lo" tia ka phun sep chuan a kutin ka hmai a zut thla riak riak a, kei chu ka lo meng diar diar thung a, a thil tih lai mek chu hrehawm tihna pakhat mah ka nei lo va, nuam ka ti ru em em zawk.

"Sangha ka lo hawn ang che chu, i ei duh ang em?" thum chhala a tih leh chuan ka lo bu nghauh nghauh a, min din hnaih leh hretin ka biang tawn tawn chu a kutin a khuap a, a thil tih tur chu hrilh thar ka ngai lo khawp.

A hmui lum thar thar leh ka hmui an insi chiah chu nuam ti lutuk avangin ka sa chhuak vek a, min fawh dan ril leh thuk zet chu kei ang hmeichhia, a zûna ui hneh lutuk tawh tan chuan chhan let loh chi zia zâng a ni lo. A kut pakhat zawk chu ka biang a dawmna aṭang la thlain ka kawngah a rawn kuah a, a taksa si chêta min pawh rualin ka dak deuh âwr a, kan hmui erawh a la inchuktuah reng a, tunah tak chuan inchar tlat mah se pawi tihna ka nei lo. 

"In lo haw har ang em?" kan awm hran hnu chuan ka ti tham ṭiak a, ka aw chu a la dik hleithei lo va, thunun tum viau mah ila chuti maia a dik theih ka ring rih lo, kan thil tih zawh chiah chuan keimahah nghawng nasa tak a nei tlat a tin ni! 

"Zing lamah chauh kan lo haw ang, zanina i inlêng tur te tûmah be ṭha suh ang che" a ṭawngkamah chuan thikna ri ka hre leh ta, hlim avangin ka nui sak a, che thutin min fawp leh vawng vawng a, a awm sawn dawn chuan ka hmui chu a pet zeuh a, kham lo deuha mi siam a va thiam tak! 

Ka kut chu zawimuangin a hmai lamah ka phar chho a, a biang leh a khabe vel chu ka chul ve ringawt a, chuti anga chet chu ka tum a ni miah lo, mahse ka che tlat si a ni. Ka inrin hmain ka kut chu a lo chelh thut a, thingkungah ngheng zawng chuan min nam bet leh a, min melh chhuk run pah hian a hnar aṭang a rawn thaw chhuak ham ham a, ka lama lo kun hniamin ka nghawng leh ka beng hnuai zawn velah chuan a thaw lum ham ham a, min hnim ni berin ka hria. 

"Kal....eng lo....kal tawh mai rawh" chiang nial lo zet hian ka ti bah deuh nuai a, a kawr hnung lam chu ka ṭham tawn tawn a, ka taksa zawng zawng chu a mur chhuak vek a, a thil tih lai dawnsawn nuam zetin min thunun hneh lutuk chu a awihawm loh zawk.

"Ka kal chu i duh tak tak maw?" hniam ruih hian ka beng bul chêtah a rawn ti thum bul a, a kawr hnung lam chu ka hmer nghet zual a, tunah tak chuan vanrama awm ang vel ka ni.

"Aih...aw...eng lo...ka hre lo....Mazar...eng lo" ka ti bah nawk nawk a, ka thawk dan dik lohzia leh ka thinphu ranzia chu a hre chiang khawp ang, amah zawk inla hrang hmasa lo se chu awm ngaihna ka hriat ka ring lo.

"Ka kal ang e" ti supin a kutzungpui chuan ka hmui chu a tawk leh zeuh a, bike a hunna lamah a kal phei tih ka hre reng a, mahse thlahna thu sawi nachang pawh ka hre lo, thingkung ngheng chuan ka ding ngawi reng ringawt. 

A tlan chhuak thawm a reh zui vawng vawng hnu chuan ka ding ngil a, ka biang tawn tawn chu ka khawih a, ka thinphu chu a la rang em em bawk a, min hmutu tan chuan mi â ka ang ngawt ang. Minute eng emaw zah chhung chu ka ding ngawi reng a, ngaihtuah zui vawng vawng loh theih lovin min siam leh ta. 

He pa hi eng chiah nge a nih le? Engati nge engkim hi a thiam vek mai le? Sumo Driver chauh emaw ka ti a, maian bai leh ram lam hna thawh thlengin a thiam leh em em bawk a, tun lawk khan lui lam sa min hawn a tum thu a sawi leh a, thiam loh hi a nei lo em ni? Nge ka putea sawi ang tak tak khan engkimah a tluang zawk em ni ang? 

(End of Chapater 16)