SUMO DRIVER By Havali Adam (CHAPTER 6)

SUMO DRIVER 

By 

Havali Adam

Chapter 6

Ka chhungte an rawn haw chuan chawhmeh an siam belh nghal zung zung a, ka nu chuan ka pitei leh ka putea hriat lai kherin maian hih dan chu min zirtir a, nuam lo duh tak a ni. Maian hih dan te chu a sawi angin ka ti ve zel a, rin ai tak chuan a lo harsa lutuk lo. Ka ute erawh an inbual mêk a, kei erawh ina awm zawk si ka la inbual lo thung. Chawhmeh kan siam zawh hnuah ka inbual ve ta chauh a, choka lamah pawh ka phei leh tawh chuang lo. 

In kawtah chuan ka tei vel mai mai a, Field tê ah chuan naupangho an lo infiam leh nual tawh a, nuam an tiin an hlim thei khawp mai. Ni thum vel zen zawn chu kan awm ve tawh a, tlai tin naupang infiam ka hmu ziah bawk a, an zinga va tel ve châkna chu ka nei leh thut zel. A hmeia pain an inawm pawlh vek a, a ṭhen chu a sir lamah an lo in Marble bawt bawk a, kan naupan lai ka hre chhuak rum rum a, kan naupan lai kha chuan chuti ang infiamna vel chu kan ti ve ngai lo hrim hrim, tihna hmun tur pawh kan nei ngai lo. 

Chutia mahni nuam tih zawng ṭheuha naupang tualchai vel ka thlir lai chuan Tlantea inkhel zo pawh a rawn haw a, vawiin chu an thawk hah vak lo a ni ang an rawn haw hnuah a inkhel leh peih tlat. Min kal pelh dawn chuan ka lu ah a rawn nam kher a, rum zet hian ka melh a, inbual fai tawh lo ila chuan ka um ngei ang. Tlantea nen hian kan inrual chiah a, min ngam em em ang chiahin kei paw'n ka ngam em em a, innel hma tak kan ni. 

Unau ang tak takin kan inen a ni ber a, ni thum vel âwrh chauh mah ni se thla tam tak inkawm tawh ang mai kan ni. Sava veh tura chhuah leh a tum a, mahse putea chuan a phal lo va, ani pawh a kal lui lo ve mai bawk. Zan riah kan ei laiin putea chuan naktuk lama buh phur a ṭul thu a sawi a, kan vaia kal a rawt zui nghal bawk a, kei paw'n buh phur mai mai chu ka hreh em em bik lo. 

Chaw kan ei kham rualin ka tifel nghal zung zung a, ina awm chhun ka nih avangin mi dang chu ka awl vek a, ka pitei chuan ka fel ve tawh thute a lo sawi lûam a, ka chhungte pawh an lo nui ringawt. Mawitei leh Hlimpuii chu rei lo tê ve ve ka bia a, naktuka kan tih tur te chu ka hrilh mial mial a, anni chuan an awm awl mai mai ṭhin thu min hrilh thung. 

"Tlante, Mazara te inah zu kal lawk ta che, naktuk kha min rawn tel pui hman dawn em tih zu zawt lawk mai teh. A Service dawn a nih paw'n sawi inthlahrung lo se, a hman tâk hlauh chuan ka ti mai mai" veranda-a kan ṭhut laiin pitei chuan a rawn ti a, Tlantea chuan ding chung hian

"Lo kal rawh, zu kal lawk ang" tih leh min kaih thawh chu a rual nghal a, zep lovah chuan Mazara chu ka hmu hreh ve deuh, nizan te khan ka ngaihtuah thu leh ka khawngaih thute kha ka lo sawi khum laklawh tawh bawk si a, min hmuh dan a dang vek ang ka ring. 

"Eng lo, ka lo kal ve lo mai ang. Zanin chu nangmahin zu kal mai rawh, ka tei chhuak peih rih lo" tiin ka lo hnial ve a, ani erawh chuan min pawt kal dâwr dâwr pah hian

"Lo kal mai mai teh, niminah pawh i rawn kal ve tho kha" a ti deuh tlat a, ka tih ngaihna hre lo chuan ka zui ta nge nge a, Mazara te in lam kan pan chhung zawngin a duh dûh a sawi a, a thu sawi pawh ka ngaihtuah lo, Mazara min ngaih dan tur ringawt chu ka ngaihtuah a ni. 

Chutia ngaihtuahna inang lo zet pu chunga kan kal lai chuan current a rawn awm lo va, in chhung lam aṭang naupangho chu an rawn ṭe dual a, rei lovah in aṭang chuan an rawn chhuak sap sap zui nghal bawk a, an infiam leh dawn emaw a ni ngei ang. Current a awm lo chiah chu thla enzia a hriat theih nghal a, current awm lai kha chuan a hriat vak lo. 

A thu hrimah tun lai chu thla a eng ngun hrim hrim ve bawk a, kan thlen tirh zan aṭang khan thla en loh lai pawh ka hre lo. Current awm lo chuan boruak lum lutuk tur pawh a tidai sawng sawng ni mai hian ka hria a, current awm lai aiin a awm lo chu nuam ka tiru viau zawk bawk. Mazara te ina kan luh chuan zam tak tê hian ka zam vel a, ka awm dan chu an hrethiam ang tih ka hlau khawp. 

Mazara tak phei chu a lo mu daih tawh a, a nu chuan a va kai tho chawp a, mu hma ka ti ang reng. Leh lam kawng zawng tak chuan a mu hma pawh chu awm ka ti tho mai, nilênga motor khalh te chu a chauh thlak ve ang, Aizawla zu leh lâng tur ngat phei chuan a chauh thlak dawn lutuk. Tlantea chuan pitei chah ang chuan a sawi nghal mawlh mawlh a, Mazara nu zawk chu a lo ṭawng chhuak hmasa a, Mazara erawh a ngawi ngul a, a tho tir mood chu a pe chhe ve ren run khawp mai. 

Mazara nu'n a hmuh hnu ka an thu a rawn sawi chuan ka lo ṭawng chhuak ve thuai a, nelawm zeta nui sâng chungin kan inhmuh tawh thu leh kan inhmuh dan chu ka sawi a, ka mit sirin Mazaran min lo en reng tih ka hmu ru kar a, ka zam ru hle leh nghal. Engtin pawh min bia se, engtin pawh nizana ka thu sawi kha min zawt mah se chhan chu ka tum lo bur a, min zawt nawn miah lo se ka duh ngawih ngawih zawk, a nu hriatah chuan min zawt ang tih te a nia ka hlauh ni! 

Tlantea leh Mazara nu nu Biaki an ṭawng mawlh mawlh lai chuan a rawn ṭawng chhuak ve hlawl a, naktuk lama a awm dan tur a la hriat chian loh thu chu a sawi a, ṭawng peih lo hmel zet hian a aw ri chu a hniam thum chhal a, ring lo mah se hriat awlsam takin a fiah ṭha hle thung. An in aṭanga kan chhuah dawn lai tak chuan a lam ka hawi zeuh a, min lo en chiang lutuk chu ka hawi sawn vat a, Tlantea chu ka nam deuh rawk rawk ringawt. 

Kan in lam kan han thlen chhoh chuan kawtah puitlingho chu an lo ṭhu chhuak ṭhap a, FM Radio - a signal ṭhat leh ṭhat loh hriat nâna pawh san ngai chi chu veranda chhuatah an lo hung ran bawk. Zodi Band hla te, Lallianmawia hla te, C. Vansanga hla te chu an zai râl ral a, kan hriat phak zu ni ve tawh lo mah se an hla chu a nalh hlawm phian ka ti. 

Sap hla ka ngaihthak nasat ṭhin tehreng nen zanin chu chung Mizo hlate chuan ka lung a tileng deuh tlat a, ka phone phawrhin Mawitei chu biak hmasak zawk ka tum a, a la tlang thei lo zui. Hlimpuii chu biak ka tum leh a, mahse ani pawh Mawitei ang thovin a tlang thei chuang lo. A ngaihna hre lo zetin ka phone chu ka en a, signal a lo awm lo hrim hrim zawk hi a ni a, ka pa bulah chuan ka ṭhu ngawi reng ta ringawt. 

Naktuk lama kan kal dan tur te an sawi melh melh a, an sawi dan chuan kan motor kan keng dawn a nih hmel a, a ṭha phian tak ang, mahse tlang sâng leh tlang hniam kalkawng inṭhenna chin bak kha chu motor a tlan theih ka ring lo. Kan buh phurna tur lam phei kha chu kawng a tê hle a, motor tlan luh lenna chi a ni lo hrim hrim zawk a ni. 

Zan a rei telh telh a, ka mut chu rei lovah a rawn chhuak thuai a, ka pa mal chungah chuan ka lu nghatin ka mit ka chhing vang vang a, ani paw'n ṭawng reng pah hian ka sam chu a zut a, chungte chuan ka mut a tichhuak zual. Ka taksa che det det avangin ka harh deuh zawk a, ka pa chuan min lo pawm reng hi a lo ni a, kan mutnaa min muttir lai te chuan harh deuh ruai ruai mah ila ka meng buai peih tawh lo. 

Zingah chuan ka tho tlai lutuk lo va, ka tho hma lutuk lo bawk. Kan unau pathum leh Tlantea tih loh chu an lo tho kim vek tawh a, an tho hma thei ṭhin hi ka ti, ka ute pawh an la muhil reng si a, an thawh hma ṭhan tawh vang pawh a ni maithei a ni. Ka nu chuan thingpui min lo siam nghal a, ka pa erawh motor check-in pawnah a awm a, ka putea'n a check pui bawk a, pitei chuan ei rawng a bawl mial mial thung. 

Dar 7 leh a chanve bawr velah ka ute pawh an rawn tho ta sap sap a, Tlantea chu a ṭhianpa sawm turin a chhuak nghal daih bawk. Ka pitei te nen chokaa kan awm lai chuan ṭawng ri thum bul bul hi ka hria deuh thut a, ka pa aw a ni lo va, ka putea aw pawh a ni lo va, Tlantea aw phei chu a ni lo lehzual, mahse chu aw neitu chu ka ring ngam chiah bawk si lo a ni. 

Ka nute ṭawng mawlh mawlh lai chuan ka tawlh hla tial tial a, hawi kual hmasa tê tê phawtin ka pate awmna lam chu ka hawi a, ka hre sual miah lo, aw thum bul bul ka hriat chu Mazara aw ngei a lo ni e. Ka pa motor chu a lo en dik vel mek a, ka mit chu ka la sawn thei mai lo leh nghal. Ka pate nena an awm dan chu ka en reng ringawt a, eng vanga lo kal nge a nih ka hre lo va, lo hre ve ringawt tur pawh ka ni chiah lo a ni. Harh chhuak thutin ka awm dan âtthlak zet chu ka siam ṭha vat a, tûma'n min lo hmu lo hlauh e.

"Pa, vawiin chu Zualtea a rawn kal ve dawn a nia, zingah khan ka va sawm a, tih tur dang a nei em em lo a nih hmel a" chaw kan ei laiin Tlantea chuan a rawn ti a, putea paw'n bu nghauh pah hian 

"A pawi loh chu! Tukin khan Mazara pawh a rawn tei chho hlawl a, min rawn telpui hman dawn thu a sawi a, ka rilru a nuam huai mai" a tih zawm ve nghal a, kei chu engtin emaw ni hian ka lo awm a, buh phur chu ka phur thar em em bawk. 

"Tukin khan ka motor engine leh khawl invuah rem ṭha lo te pawh a siam ṭha nghal vek a, engtin tin emaw ni hian thil a thiam phian ka ti Mazara khan, Aizawl lamah te khuan awm thei se ka duh pui ngawt mai" ka pa chuan a lo ti ve leh a, Mazara chu ka ngaihtuah zui leh ta veng veng mai.

"Aizawl lamah chuan a awm theih ka ring chiah lo, keini pawh hian kan awh pui ṭhin alawm, a nu saw ngaihtuah a ngai ve ang reng lutuk a, lung ṭha lo leh thaw hah nei ṭhin a nia" rawn titu chu pitei ve thung a ni. 

"Nakinah la titi pui tur a nih chu a, Aizawl lama thlenna tur leh awmna tur a nei lo te a nih chuan kan awm reng alawm, a duh tâwkin an rawn awm thei ang" ka pa bawk chuan a ti leh a, chu bak chu Mazara te chanchin lam kan sawi chhunzawm ta lo.

Feh kawngah chuan Tlantea leh a ṭhianpa Zualtea chuan tawlailir an nawr a, ka pa'n hmeichhiaho Motor-ah  min phur bawk a, Mazara leh putea erawh kein an kal pangngai thung. Tlantea te bulah an kal tak nâ a, an nawr pui lem lo va, motor-a chuang kan ni bawk nen metal road loh chin kawng chu kan thleng chho rang bik hle. Ka pa chuan tlang sâng leh tlang hniam kawng inṭhenna bula motor dah kher chu ṭul a ti lo va, metal road loh chin kawng bulah chuan a hung ṭha zung zung a, rei pawh kan nghah hmain putea te chu an rawn thleng ve mai bawk. 

Kawng tluanin ka ute nen kan titi char char a, u Vli chuan zan lama u Duhawmi phone hman chungchang chu a sawi tui em em a, u Duhawmi paw'n a haw hran lo. U Duhawmi chuan bialpa a neih kan ring a, ani erawh chuan a neih loh thu a sawi tlat bawk si. Zan lama a mi biak chu u Rinawma a nih ka ring a, a nih leh nih loh ka zawh chuan a nih thu a sawi mai a, u Rinawma nen chuan rinhlelh loh theih pawh an ni lo. Ka nu ka hrilh chuan

"A ho êm mai, a upat lutuk hmain bialpa nei zung zung zawk teh se!" a lo ti awlsam mai leh nghal a, ka nu sawi chu a dikna chen pawh a awm tho, ka hriatah u Duhawmi hian bialpa a la nei lo hrim hrim, lehkha zir bak a ngaihtuah ngai lo, u Vli erawh chuan a nei ve tawh ngêi.

"U Duhawm, u Rinawma ni lo hian u Vli bialpa hlui ang kha nei ve chhin la, ka pa hian engtin nge a tih ve ang che le? Nang chu a duat bik bawk che si, a der talin nei chhin teh" nui kur kura ka tih chuan u Vli'n min rawn kuk nawlh a, ka nu paw'n min melh hrawk bawk.

"Ka nei chhin tak tak dawn emaw ni le, ka pa chu a thinrim mai mai ang chu!" u Duhawmi chuan nui ver ver chung hian a ti zeuh a, insum thei lovin ka nui char char a, u Vli leh ka nu chuan min en tih ka hre reng a, an lam erawh ka hawi duh lo lui ve tlat.

U Vli bialpa hlui chu Vai a ni a, Delhi a awm tirha a bialpa a ni a, a tirah chuan ka pa'n a hre lawk lo nghe nghe. Fiamthuin ka sawi chhuak palh a, ka sawi sual tih pawh ka inhre hnuhnawh a, ka pa chuan u Vli chu kut hial a thlak a, a bialpa Vai chu a ṭhen chiang khawp mai. Ka pa hi a duh loh pe nâ ve tak chi a ni ve a, u Vli chu a hnuah ngaihdam a dil ve leh tho a, u Vli chuan thla khat chhung vel a titau thung. 

A bialpa ṭhen aiin ka pa'n a beng kher chu a la nâ a, a hun lai kha chuan ka pa paw'n a thlem deuh reng a ni. Chu bak chu bialpa a neih leh awm pawh ka hre tawh lo, kei phei chuan nei lo tak ka ni. Nei tur paw'n ka la inngai chhin eih lo va, min duh dertu te chu an awm ve ngei a, mahse mipa hrim hrim hi ngaihzawng tur ang zawngin ka la en ngai lo. 

Mawite leh Hlimpuii paw'n Sir Francis-a min chhaih der ve ṭhin tak na a, engah mah ka ngai lo a ni ber. Anni te chuan Higher kan kal lai aṭang bialpa an nei daih tawh a, an ṭhen leh nual tawh zawk a, an thei hi ka ti ṭhin. Inṭhen leh tur si inngaihzawn chu a ṭulna pakhat mah ka hre ve lo, ka la neih ngai loh vangte pawh a ni ang. 

Thlam kan thlen aṭanga rei vak lovah buh chu iptê puiah leh buara bag-ah kan khung nghal a, ka rin aiin a tam ang reng daih mai. Hmeichheho chuan iptê in kan phur a, mipa hovin buara bag-in an phur thung a, kan thiar rei phian ka ring. 

Mazara bawk chu a ni ka mit la leh ta, a va han chak bik thei tak. Ka pate, putea te lehTlantea te ṭhian dunin buara bag khat pawh an put theih loh laiin a ni ve thung chuan bag khat lawih chu a pu nawlh a, a tua mah min ngaichang lo hian a kal vang vang a, keini paw'n kan zui ve nghal mai bawk. 

Buh kan phur chhung zawng chuan nuam pawh ka ti lo, ka chhip a na bawk si, chu bakah ka vawi khat phurna a ni a, hrehawm ka tiru khawp mai. Kan vawi hnih thiarna a nih laiin Mazara ve thung chu a lo vawi thum hman der a, min leh pel pawk pawk a, a tha chu khân lo vet vet tak kan ni. Ka putea leh ka pa pawh an nui tawp ringawt a, an mi nuih pa ber lah chuan an nuih tih a hre der si lo. Hre hman paw'n a khawsa lo, a kal vut vut a, min tai tlu palh ang tih te chu a hlauhawm zawk a ni. 

Thlama chaw kan fâk lai te chuan a lian ber si leh a thiar hnem ber si chu a kham hma ber leh tawh a, ka pitei'n ei leh tura a tih luih ngial paw'n a ei duh tawh hauh lo. Eina tihfel a ngai ve tawh lo va, kan chaw fâkna changel hnah chu thlam thlang lamah kan paih mai a, thlam chhaka ka kal chuan Mazara chu zozial zu hian a lo ṭhu ngawi reng a, engtik laiin nge a bulah chuan ka thlen chhoh hman pawh ka hre lo, a hipin min hip kal ni berin ka hria. 

Mi dangho chu thlam chhungah eng eng emaw ni sawiin an nui dar dar a, thiar tur a tam lutuk tawh lo bawk nen kan hahchawlh rei deuh dawn a nih ka ring. Ka bula mi ṭhu ngawi renga chuan a meizial zuk lai chu a si hlarh hlarh a, a zuk dan vel chu a nawm hmel ka ti leh tlat tawh. A hma zawnga a rim pawh ngaithei lo ni ṭhin kha Mazara bulah erawh engah mah ngai lo ang maiin ka awm a, ka awm dan chu hriatthiam a har a ni. 

Ka ngaina han ti ringawt dawn ila ka ngainat lohzia chu ka hre chiang ropui bawk si, mahse a chang chuan a bula awm chu nuam tih ruk riau dan ka nei leh thut ṭhin a, chu erawh ka ngainat vang ni chiah paw'n ka hre lo. A lam ka hawi chhoh chuan min lo en reng a, chawp leh chilhin ka thin chu a rawn phu dawt dawt a, rei ṭhu tawh lovin thlam lamah chuan ka chhuk ta daih ringawt. 

Buh chu kan thiar leh tlauh tlauh a, a ngai tê bawkin Mazara che vel chu a chak phet phut leh tawh hle. A chanve aia tam daih kan thiar tawh a, tlai dar 3 hma chuan kan thiar zawh var var ka ring ta. Tlantea te ṭhian dun lah chuan kalkawngah fiamthu an thawh char char a, hah deuh chungin kan nui dir char char a, a hrehawm duh khawp mai. Nuih loh pawh tum ila a nuih loh theih loh, an fiamthu sawi chu a nuihzat thlak hlawm tak zet a ni. Keini chauh kan ni lo, ka putea leh ka pate pawh an nui ve tho.

"Awi!" ka kalna kawng chhak aṭanga thawm rawn ri thut avang chuan ka ti deuh ṭhawt a, ka tawlh hnung thui viau pawh a ni ang mihring taksa hi ka va ngheng chawrh a, va ngheng lo ila chuan ka tlu hrim hrim ang. 

"Nangmah maw!? Engtik laiin nge i rawn let hman a? I kal daih tawh emaw ka tia, i va'n kal chak em em" ka mi nghen pa hmel ka hmuh rual chuan ka ti ringawt a, ani ve thung chuan ngawi reng hian min din ṭhat tir a, kal ta mai lo chuan

"I lo hre ve em? Nichina thawm rawn ri thut kha i hre ve em? Savawm te hi a ni mai ang em? Ka hlau teh mai a nia, ka ute khan an hre ve ang em le" ka ti leh nghal niah niah a, min chhan ka rin loh tehreng nen

"Sava a nih kha, a hlauhawm loh" a rawn ti thum sup a, kei erawh ka lo hawi hâ a, ṭha taka min be ve teh mial chu mak ka ti a ni ber a, ngawi reng se chu hma lam panin ka kal tawh zawk ngei ang.

"Kal ta che" a rawn tih leh chuan ka meng deuh kâwk a, inher thutin thlam awmna lamah chuan ka kal ta vang vang a, ka hnunga thawm dang a lo awm zel danah kan inhnaih viau tih ka hre thei, mahse biak emaw hawi let emaw chu ka tum tawh lo bur.

"Awi!" hlauthawng aw tak chuan ka ti leh hluai a, lung nawi ka rap kher bawk nen ka tlu tawh dawn emaw ka ti a, ka hnunga mi'n min lo man nghet viau lo se chu kan thlang lawka âwiah chuan ka tawlh thla chiang khawp ang. 

"Thil dang ngaihtuah lovin i kalna chiah ngaihtuah rawh" ram deuh hmuka a rawn tih chuan thinrim zet hian ka hawi let a, min vawnna phih thlaksak hmak chung hian

"Lung nawi a awm tih reng ka hre bik lo, kalkawng te chu ka en ve reng, ka rap sual mai chauh a ni" ka ti tawn tâwn a, thlam kan thleng teuh tawh nen nen chuti anga ka'n che sual leh kher chu ṭul lo ka va ti tehreng em. 

Thlam kan thlen chuan tui ka in nghal khawlh khawlh a, mi dangin ka buh phur tur an lo siam vel mêk bawk a, ka thinrim ruk chhan chu ka ngaihtuah chiang a, awmzia awm lo ka ti hnuhnawh khawp. Tlai dar 2 leh a chanve velah buh chu kan thiar zo ta vek a, ka lawm rukzia chu pui tak a ni. Zep lovah chuan ka ning tawh lutuk, ka chhip a nâ ût ut tawh bawk si, haw vang vang ka châk tawh a ni. 

Motor leh tawlailiri hmangin kan buh phur tam tham ve zet chu khaw chhung lamah kan haw pui a, ka pa motor chu Mazaran a khalh a, ka pa'n a khalhtir phal mai chu mak ka ti deuh reuh, a phal ka ring chiah lo asin le. In kan thlen hnuah pawh mipaho chuan vawi 4 vel an han thiar leh a, keini'n an in tur thingpui kan lo siam thung a, in kan thlen tawh vang a ni ang ka chauh rukna te chu a reh vek. 

Ka putea te chuan an buhzem siam sa ah kan buh hawn zawng zawng deuh thaw chu an chhung lut vek a, Mazara chu ṭin eng emaw zah a hawntir bawk a, Mazara erawh a tlawmngai rei ngar ngar khawp. Ka putea chuan ṭha takin a hrilh fiah a, a tel lova hna kan thawh sawt lohzia te, min phurh pui avanga a lawmzia te chu a sawi lûam a, chuti anga a sawi duah hnuah chuan Mazara paw'n a hawn ve duh ta chauh a ni. 

"Lo kal rawh, inhawngbi ang" Tlantea chuan a rawn ti hlawl a, inbual pawh ka la inbual fai lo va, chuti teh ngawta a bula kal chu ka tum lo nasa.

"Ringawt che chuan, ka la inbual lo. Ka inbual phawt ang a, duh leh i thil sawi chu kan ti dawn nia"

"I va han hrethiam lo tak, inhawngbi te chu inbual hmaa tih chi zawk alawm a nih. Saw, an indaih loh lai tak sawn i va kal vat teh ang" tih leh min pawh kal a rual nghal a, kan thil tih tur chu engmah ka hrethiam lo. 

"Changtute lam kan nih avangin inkhawih fuh tir loh tur a nia, i inkhawih fuh tir chuan i thi tihna a ni mai" ka beng bulah a rawn ti sep a, kan infiampui tur te lah chuan ka tel an lo phal ve mai bawk a, an tih dan chuan ka ti ve ta tawp tawp ringawt.

Line inrinah min khawih fuh tumtu te chu an ding fur hlawm a, keini a changtute erawh deh fuh hlau takin kan inluh chhawk dên den thung a, ka vawi khat tihna chauh mah ni se a nuam phian mai. Min ban phak dawn lo emaw tiin Line inrin chu tlan tlang ka tum a, min lo khawih fuh chiang khawp. 

Min khawih fuh tawh miau avangin ka chhuak a, Tlantea erawh a la dam a, a mawng chu a thleng chhuak der tawh zawk. Zei tak hian an deh fuh loh tur tawk chiahin a tlan chho zet zet a, a tira kan luhna a tlan pelh rualin

"Hawng!" a ti deuh vak kher a, line chhunga kan pawl te chu an rawn chhuak sap sap a, a bul aṭanga kan tih leh chuan inhawngbi awmzia chu ka hrethiam ve tawh a, ka luh leh te chuan fimkhur tawh tak ka ni.

Tlai dar 4 leh a chanve velah thlan tla hluamin kan haw a, Tlantea bulah chuan infiam leh ka sawi deuh chhen mai. Keimah ang rual infiam an tam phian bawk si a, ka hriat ngai loh leh ka la tih ngai loh hmanga han infiam vel chu nuam ka ti thar tlat a ni. 

Zanriah kan ei laiin tlaia kan infiam dan vel chu ka sawi a, ka nu leh pa chuan eng he hu ah an lo ngai lo va, ka pitei leh putea erawh chuan min sawi sei pui viau thung.  Chaw ei kham aṭanga rei lovah current chu a awm lo leh nghal ringawt a, thingtlang lamah chuan current a awm ṭha lutuk lo tih ka hrethiam ve mai bawk.

"Lo kal teh Numam, tu emaw ni'n a hmu duh che" Tlantea chuan a rawn ti deuh tawp a, ngawi rengin a kalna lamah chuan ka zui a, min hmu duhtu chu ka ngaihruat thiam mai rih lo. 

"Nangmah hmu duhtu che chu saw tah sawn a awm, a lo nghak reng tawh che. Hetah hian ka lo awm ang, hlauhawm a awm loh a nia" a tih chuan ka en hâw a, mahni chauha min kaltir a tumna hmun chu ka kal ngam teuh lo mai. 

"Ka duh ringawt lo, a thim si, min hmu duh a nih chuan hetah hian lo kal mai rawh se" ka tih chuan a kal phei ve mai bawk a, a mi rawn hruai chu Zualtea lek hi a lo ni a, mahse min hmuh duh chhan chu ka la hrethiam lo hle. 

"Ti khan lo inkawm rawh u, saw tah ka va kal lawk ang e" tih leh Tlantea chuan kal sawn a rual a, Zualtea nen tlawng chuan kan awm dun ta, sawi tur chu vâng tak a ni.

"Numam, ka sawi tlang nghal tawp mai ang. Vawiina ka hmuh che khan hmelṭha ka ti lutuk che a, thingtlangmi ni mah ila ka duh che tih hi lo hre ve mai mai rawh aw" Zualtea chuan a rawn ti hlawl mai, chutah ka kut chu a rawn la vuan zui.

"Zualte!" ti deuh hluaiin ka kut chu lak sawn ka tum a, ani chuan a lo chelh nghet sauh a, min din hnaih telh telh bawk si a, ka rilru chu a dik lo nasa tawh hle.

"Eng lo, min thlah teh Zualte, i awm dan hi a mawi lo êm mai" ka ti ta tawp a, ka kut chu lak chhuak tumin ka bei ngar ngar a, mipa tha na nâ na chu ka hneh lo deuh a ni. 

"Thingtlangmi ka nih avangin min duh ve lo em ni? Vawi khat tal chu ka fawp ang che aw, maimitchhing rawh le" tiin min rawn hnaih tial tial a, ka kut a man beh loh lam zawk chuan a hmaiah ka beng ri ta sawk mai. 

"Min beng a maw!? Hmeichhia zawkin kut min thlak a maw!? Hmelṭha hle mah la nungchang mawi i hre hlawl lo, ka ben ve che i duh em ni?" min nam thluk rawp pah hian a rawn ti vin phiar a, Zualtea mizia chu ka rin ang a ni lo nasa a ni. 

Min rawn sik leh a tum rualin a banah leh a kutah ka lo tlawh pawp pawp a, hlau lutuk chuan ka tlanchhia a, kan in panna lama a awm tlat avangin kan in lamah pawh ka tlan ngam lo. Kawng chhuk lamah chuan kan tlan thla char char a, chu kawng chuan khawi lai nge a pawh dawn ka hre hauh lo. Thim viau mah se ka tlan zel loh chuan Zualtea khan min man dawn bawk si, ka thin te chu a phu dawt dawt a, hlauthawng tak ka ni. 

Kawng peng pahnih awmna lai ka thlen chuan ka ding chawt a, khawi zawka tlan tur nge tih ngaihtuahin ka rilru ka seng a, mahse hun ka va nei tam si lo êm. Ka kekawr chu ka hmer ṭawng ṭawng a, ka rilruin ka ṭawngṭai mawlh mawlh bawk. Ka din ngawih reng lai chuan thawm a rawn awm a, mahse ka thlang lam aṭangin a ni thung. Thim zing aṭanga mihring lo chhuak hmel ka hmuh rual chuan ka pan hnai vat a, ani chuan chhun lama a hnathawh kawr hak ngai chiah chiah kha a lo la ha bawk. 

"Eng nge hetah i tih?" thum chhal hian a rawn ti a, a hmel aṭang chuan chu lai hmuna min hmu teh daih chu mak a ti tih pawh ka hria, mahse kei chu nasa takin ka thla a muang tawh thung.

"Eng lo, Tlantea ṭhianpa Zualtea khan min fawh a tum ringawt a, ka lo duh lo va, a hmaiah ka beng a, min um bawk si a, kalna tur pawh ka hre tawh lo. Min pui teh Mazar, ka hlau a nia" tiin a vawi khatna atan a kut chu ka va khawih hmasa a, ka thla muang viau tawh mah se hlauhna chu ka la nei tho.

Kan chhak lam aṭang chuan thawm a rawn ri thla sut sut a, chu chu Zualtea bak a nih ka ring lo. Mazara chu ka din hnaih lehzual a, a kut hrawl zeta vuanin a phenah chuan ka ding titih a, a iptê pui ah chu a puar ṭha hle leh nghal. Thawm chu a rawn hnai tial tial a, Zualtea ngei a lo ni e. Mazara phena ka ding chu min hmu tawh ngei a, mahse min rawn man pawh a tum tawh lovin ka hria, hamhaih hmel zet hian

"U Mazar!" a rawn ti chhuak hluai a, che sawn miah lovin a dinna ngaiah chuan a ding ta reng a, ka bula mi chuan khauh zet hian

"Haw nghal rawh" a lo ti nghet charh a, Zualtea pawh chu rei ding lovin a kal nghal nal nal a, min chhantu awkâ ka hriat rual chuan engtin emaw tak hian ka rilru chu a rawn no thar em em a, ka ṭah chu a chhuak zui nghal et et bawk.

"Lo kal rawh le, keima'n ka hruai haw ang che" aw thum dam lutuk tak maia a rawn tih chuan mittui tling pamin ka melh chho râl a, a inthuamna lam pawh ka ngaihtuah buai hman tawh lo.

"Ka lawm e" ti ṭuauin ka kuah thlawp a, a kawr hnung lam chu ka pawt ṭai a, ka mittui chu a rawn baw ta zawih a, mahse ka ṭap ri lo thung. 

"Haw ang le" thinrim awkâ ni miah lova a rawn tih leh pawh chuan ka awm sawn thei mai lo, hnathawh kawr mai mai ha mah se ka mi kuah mek taksa chhah ṭha tak chu a thlamuan thlak ngawih ngawih a ni. 

"Ka bal a nia" kan ngawi reng tâkah chuan a rawn ti leh a, kei erawh ka awm ngaiin ka la awm reng thung a, che deuh hruta min rawn kuah let ve chiah chu ka mur chhuak vek ni mai hian ka hria.

(End of Chapter 6)