SUMO DRIVER By Havali Adam (CHAPTER 5)

SUMO DRIVER

By

Havali Adam

Chapter 5

Keimah chauhin chawhmeh chu ka vil ta tlawng a, kawmchara ka va chhuah leh paw'n Mazara chu ka hmu tawh lo hrim hrim. Eng nge a tih dawn ka hre lo va, min rawn pui ve mai chu a lawmawm ka ti phian bawk. Ka zak viau dawn a, ka zak leh ta lo. Ani chu kan chhung khat laina hnai pawh a ni lo va, ka pitei te hmel hriat leh an khaw Sumo Driver mai a ni a, chawhmeh min siamsak thu vel chu a sawi chhuah ka ring chiah lo. 

Ni lo, a sawi chhuak lûl lo vang, ani ang mi ṭawngmawh khan a sawi chhuak dawn lo tih ka chiang a ni. Mei chhemna bulah chuan fian bal ve deuh tak hi a lo awm a, tuiin ka sil fai a, chawhmeh chhuan lai ka hawp chhin chiah chu mak ka ti zawk, chuti ang em ema maian bai tui chu ka la hre lo. Mai erawh a la hmin chiah lo va, fian paw'n ka hawlh sawm thei lo. 

Maian mawlh chu a ni! Ka hâwp ka hawp chuan ka chhungte'n ei tur an nei lo vang tih ka hlau tho bawk si, tem chhin lah chu a nuam phian leh nghal. Mazara chu ka ngaihtuah roh rôh a, ka hmuh tirha ka ngaih ang ngawt kha chu a ni bik lo, ka laka a awm dan chu ngaihtuah zui vawng vawng a awl tlat, amah lah chu a nelawm loh ropui bawk si.

Mobile phone ka ken loh avangin dar zat ka hre thei mai lo va, ni a sa ṭha ang reng bawk si a, ka ute pahnih chu engtin tak awm ang maw!? Hrehawm an tih ve deuh tho chu ka ring, chuti angin thingtlang hna an thawk ngai bik lo va, nuam lo tihna chen chu a awm dawn hrim hrim. 

Mei lum bula awm reng chu ka ning thuai a, khua a lum bawk nen thlam chhaka pangbal kung awmna lamah chuan ka ṭhu a, dai hlim hnuaiah ṭhuin thil ka ngaihtuah roh rôh a, Mawite chuan hria se Mazara nena kan awm tlâng vel chu mak a ti ve ngawt ang. 

A mak ve reng alawm, engtin emaw ni tak hian kan inhmu fuh thei em em a, ka pitei te khuaa kan awm chhung chu a la rei miah lo, mahse ka bul hnaia a awm apianga ka danglam ru tlat zel chu mak ka ti a ni. Chuti angin a ṭawng duh pawh a ni si lo, ka taksa a tawh hrim hrim khan ka dik lo zel a ni ber. 

Ka biang tawk zeuhin nimina ka biang a khawih dan vel chu ka ngaihtuah chhuak zui nghal a, min ngaihtuah hmel hle chu a nih kha maw le. Zu rui pa lah kha a Sumo khalh neitute fapa a nih hmel a, Mazara chuan ka rilru a luah tlat a, ka tum ni hauh si lo hian ka ngaihtuah tlat vel a nih chu! 

Thlam piah lawk aṭanga thawm rawn awmna lam chu ka hawi phei a, Tlantea hmel ka hmu hmasa ber a, a hnungah ka putea te leh ka pate an rawn lang zui nghal bawk. Che chhuakin thlamah chuan ka lut a, an tui a hal dawn tih hriain tui te chu ka lo pe ve zung zung a, an zingah chuan ka mi zawn ruk ber Mazara chu a awm ve miah lo. Chawhmeh min siamsak thu chu a sawi ang tih mawlh ka hlau a, a sawi loh lah ka ring tho bawk si, a hmel hmuh tur awm ta miah lo te chuan ka ngaih a tiṭha lo letling tlat a ni. 

"Kha tui chu a zo titih a va nih hmel ve, Numami nen khan tui zu chawi lawk mai ta che u Tlante" ka putea chuan a rawn ti a, tui chu a lo tlem hle tawh tak a, an kham khawp tui lo nei tur ka ni tih chu hre tho mah ila tui chawina tur ka hre ve der si lo.

"Lo kal rawh, i zu chawi lawk ang" tih leh Tlantea chuan thawh a rual nghal a, kei paw'n ngawi rengin a kalna lamah chuan ka zui a, thlam thlang lamah kan chhuk thla zel a, a mawng telh telha a dai nuam tawlh tawlhin ka hria. 

"Lo zu kal rawh, a hla tawh lo. Khu lai lawk khu a ni tawh, ka'n zung lawk" kawng min kian chung hian Tlantea chuan a rawn ti a, kawng a awm sa vek a, chuti angin mahnia kal chu huhphurhawm a ni hran lo. 

Keimah chuan ka kal thla beuh beuh a, hmun zawl zau dai nuam takah chuan tui tam lutuk lo hi a lo tling a, mau phel indo kangah hian tui a lo dir cher cher bawk. Zai rât ratin ka Galon ken chu ka dawh a, tui chu a fim ṭha hle a, Fridge-a tui dah vawh ang maiin a vawt tawk chiah a, ramngaw kara tui put a nih vang nge ni a thianghlim ngawih ngawih. 

Chutia tui ka dawh lai chuan thil ri ṭhek ṭhek hi ka hria a, Tlantea a nih ringin ka hawi let a, Tlantea hmel reng ka hmu bawk si lo. Ka thil dawhna lama ka hawi let rualin ka hma lawkah mihring lian zet hi a rawn ding thut a, ka phu lutuk chuan

"Awi!" ka ti deuh ṭhawt a, ka bul maia ding ngawi reng chu kan mi ṭawngmawh Mazara lek a lo ni a, thinrim inseh ruh ṭunin ka melh chho râl a, ani chuan en pawh min en lo, tui tlingah chuan a hmai a lo phih sawk sawk daih. 

"Hetah eng nge i tih daih daih? Khitah khan ka hmu lo che ka ti rêng a ni, lo lan thut hi i ching reuh ka ti" ka tih chuan ngawi reng hian a kawng a dawm a, vân lam thlirin a dak voh vôh a, ka biak dan nelawm loh zet avang chuan ka inthlahrung leh ta deuh. 

"Eng lo, chawhmeh i siam thu kha sawi miah suh aw? Ka chhungte'n an ei hunah min zawt ngei dawn a, lo ngawi tlat ang che" ka ti leh ringawt a, a ngaite bawkin chhan letna ka dawng leh ta chuang lo. 

"I va'n rei leh phian si ve?" kan bula Tlantea a rawn thlen rualin ka lo ti nghal a, meizial rim hi a nam thak a, ka kâ chu veng hman lovin

"Meizial i zu a ni maw?" ka ti leh nghal deuh thâwr a, khi ver ver hian min buk khum nghauh nghauh a, a ruka a zuk danah ka putea'n zuk a phal lo a ni ngei ang.

"I man hnem em u Mazar? Chhun a ni bawk si a, i hmuh tam vak pawh ka ring lo" tiin ka sira ding pa ren run chu a biak zawm zat a, kei chuan a thu sawi chu pakhat mah ka lo hre thiam lo. 

"12 vel chauh" Mazara chuan a lo ti ve mai bawk a, ka kut chu rawn en zeuhin a nawr sawn a, ka tui dawh a khat tawh tih ka hre chhuak zui nghal a, mawl ka va han inti tehreng êm, an thu sawi awmzia lo hriat tum ve phet chu thil ṭul lo tak a ni. 

"Ka rin ai i va'n man tam leh si" ti niah niahin Tlantea chuan a ipte pui ah lai chu a keusak mial mial a, hlau lo zet hian chakai hraw tak tak chu a rawn keng lang a, kei erawh ka lo hlau em em thung a, an bulah pawh ka ding rei duh lo. 

"Ka chho" tih leh kal ka rual nghal a, ka thu sawi chu an ngaihsak paw'n ka hre lo, ka tui khai lah chu a rit phian zui leh ta nghal a, an khai tura dah tawp chu mawiin ka hre bik si lo, kawngah chuan ka chawlh chhoh deuh chhen phah nghe nghe. 

Thlam awmna aṭanga kan tui chawina kawng chanve velah chuan ka chawl leh a, ka ban bul chu ka chum deuh sek a, a kham ve tawh reng. Tui chawi tura kal ka ni a, hmeichhe nep tak ang maia thlam thleng khai chhoh theih loh chu ka tum der lo. Galon khai tuma ka kun rualin Galon chu tu emaw ni hian min kal pel pahin a rawn khai nawlh a, min hnung chhawn zawngin pen chho pawk pawk mah se Sumo Driver ṭawngmawh zet Mazara a ni tih ka hre chiang em em tho. 

Rei lovah Tlantea chu ka hmu ve leh nghal a, ngam zet hian ka hau zui nghal mawlh mawlh a, Galon khai chhoh rihzia te chu ka sawi khum a, ani erawh a lo nui mai mai duh lêk chauh. Thlam kan thlen chuan ka pitei chu ṭawng siam siam pahin mei chhemna bulah a lo ṭhu a, Mazara chakai man ngei mai chu bel chhungah chuan a thlak bawk a, a duh tawka a khawih ngam chu huai ka ti kher mai. 

"Chawhmeh hi i siam a ni hauh lo Numam" chaw kan fâk laiin u Vli chuan a rawn ti chhuak phawng a, nui miah lo hian min en reng leh ta nghal a, mahni u te nge nge ka chawhmeh siam a nih lohzia chu a va hre chiang tehreng êm.

"Ka siam a ni bawk, chawhmeh siam tura in hnutchhiah berin ka siam loh te'n tu nge siam se i tih a?" en pawh en rei duh lovin ka lo ti ve zaih a, dik tak chuan chuti ang em ema maian bai tui chu ka piana hnu lamah ka la ei bik lo.

"Dawt sawi vel suh, i chhungte hian kan hre chiang lutuk che, i chawhmeh siam a nih lohzia hriain an ngawi mai mai a nih hi!" a rawn la ti ta deuh deuh a, ka pute chuan nui vur vur chung hian

"Kei chu Numami hian dawi a thiam a nih mai ka ring, chawhmeh siam i thiam lo a nih te chuan sawi mai ta che" a lo tih zawm ve leh nghal a, huat turin sawi miah lo mah se ka haw ru reuh tak tak a ni. 

"Ka siam thiam bawk aw pute, ka siam a nih hi in ei" chhan let loh chu ka tum viau a, ka thei thlawt lo, nula ve ûai tawh si chawhmeh siam thiam lo han nih tawp chu ka zak a, sawi reng lo se ka duh bawk. 

Kan ngawih deuh ṭhap laiin Mazara chu a ṭhutna aṭang a tho va, kawmchar lamah chhuakin tui chu a in khawlh khawlh a, ka pitei chuan a puar leh puar loh a zawt a, a puar thuin a lo chhang mai a, mahse kei chuan ka awih chiah lo. Ka putea bulah a ṭhu kha a ni a, a kham hma lutuk chu a puar tak tak hman ka ring lo a ni. Ngaihtuah zui duh lovin chaw chu ka bar zawm leh mawlh mawlh a, a hna thawk lo ber chuan ka ei hnem berin ka hria. 

Chakai rim te hlei hlei chuan chawhmeh chu a titui a, a chakaia tak erawh ka ei lo thung. Ka ute'n tui tih hmel takin hip ri kâwk kawk mah se kei chuan ka rap ru deuh tlat a, an rawn nung leh thut ang tih ka hlau a ni. Behlawi hnah nen chakai chu ka nu'n a bai pawlh ṭhin ngei a, maian nen ber kher chuan ka la ei ngai lo, tun ṭum zet chu behlawi aiin maian nena bai pawlh chu tui ka ti zawk a ni. 

Chaw kan fâk zawh hnu chuan meizial zuk pahin ka putea leh ka pa chu an titi a, hna thawh an tum nghal lo a nih ka ring. Ka ute pahnih ve thung chu an mu zangthal a, an chau ve khawp ang le, ṭawng pawh an ṭawng peih lo. Thlam aṭang chuan ka chhuak a, Mazara chu ka zawng ru deuh reuh a, mahse zawng anga lan chu ka duh lo nasa a ni. A hmaa ka ṭhutna pangbal kung bulah chuan meizial pak khu laih laih hian a lo ṭhu a, a bulah chuan ka kal chho ve nghal a, eng pawh ni se a hnenah chuan lawm thu sawi ka ba a ni. 

"I va'n kham hma, i len len nen" a hma zawnah ka ding chu a ni leh reng tawh a, ani ve thung chuan min en lo hrim hrim a, ṭawng duh lo viau mah se lawm thu tal chu ka hrilh tho vang, a vei lam sira ṭhut pahin

"Ka lawm e, i ngawih theih kha ka ring sa hrim hrim a" ka ti leh ta tawp a, lawmthu ka sawi chiah chu ka rilru a nuam veng veng thei maw le, a ngawi thei ve êm bawk a, amah vangin ka mualpho lo mai chauh a ni. 

"Naktukah chuan kal ve tawh lo ang che" a meizial zuk lai rap hrual nawk nawk hian a rawn ti thum dup a, a ṭhutna aṭanga dingin thlam lamah chuan a chhuk nal nal a, mipa ka hriat tawh zawng zawngah a mizia chu a la mak ber ang. 

Chawhnu lam a ni tawh a, thlamah ei tur siam ngai tawh lo bawk nen ka nute chu ka zui ve a, an phal lo chung ka zui lui ti ila a dik zawk mah ang. Tui ti taka kan ei ṭhin buh an sawngbawl dan ka hmu chiah chu mak ka ti leh ta hle a, an che sap sap hlawm bawk si a, an indaih ka ti ang reng khawp. Mazara chuan puan hian a hmai a tuam a, buh chu a rap nawk nawk a, a chang leh pawm kangin a vaw deuh chawrh chawrh a, a bula che ve te lêtin a ṭuan chu a ṭha a ni. 

Ni paw'n tlak lam a hnaih tial tial tih hriat takin khua chu a hniam telh telh a, ni en dan pawh a danglam a, tlang chunga chhum ṭhenkhat phei chu a sen deuh phût mai. Kan haw dawn chuan fanghma no zet kan ei a, a tui dan chu pui tak a ni. Engkim ka ei tui em em zel chhan chu ka hre bik lo, in chu ni se ka ei rei peih miah lo zawk ang. Tawlailira kan chuan haw lai te chuan Mazara chu ka va en leh ṭhin a, Sumo a khalh a thiam bawk a, tawlailir mai mai khalh chu a hnehsawh khawp mai. 

"Mazar" rawn titu lam chu rang zet hian ka hawi a, in kawt kan thleng deuh chiah a, tawlailir vel kan dah fel lai a ni nghe nghe a, rawn kotu lah chu nutling deuh tawh hi a ni a, Mazara hming a lam rik rual chuan ka lo hawi rang ve em em ringawt. 

"In lo haw chiah a ni maw? Zanin chu Aizawl lamah zu zan tlan mai ta che, kan dawra mi tur bungrua a rawn thleng a nih hmel a, a theih chuan hmanhmawh la ka ti khawp mai, in lamah ka lo nghak ang che" tiin rawn kotu chu a kal let leh nghal a, ka rilru tak chuan thu a rawn pe ka ti khawp mai.

"Ka va haw ang e" ka pute en zeuhin Mazara chuan a rawn ti ta reng a, a lan dan chuan thu pe deuha rawn betu chu a Sumo khalhna te a nih ngei a rinawm a, ka putea pawh chuan chelh khawmuang tawh lovin ṭha tak hian a lo chhang let ve mai bawk. 

"Mazara ṭhin hi chu âw, engtin nge a khalh reng peih zawk le ka ti leh thut zel. Siamkungi kha kan awm ṭhup bawk si a, dawt a sawi mai mai a ni. A fapa thil tur bak Mazara khan a zu la lo ang e, a chauh ve awm teh lûl nen" in chhung kan lut chiah tihah pitei chuan a rawn ti a, putea chuan a khap deuh tak na a, a ngawi thei chuang lo. 

"Siamkungi saw zawng kohhran hmeichhiaah hruaitute a ni ve a, thawhlehni zanah pawh a inkhawm ngai mang lo" pitei chuan a ti leh deuh hmawk hmawk a, keini chhungkua bik erawh kan lo ngawi ṭhap thung. 

"Duh tawk teh, duh tawk teh, mi chanchin an sawi vak vak ngai lo. Engmah kan ni chuang bik lo a nia, a hna a ni a, a Sumo khalhna te an ni a, an inkar thu engmah sawi theih kan nei lo" tiin pute chuan a rawn khap leh a, mahse pitei ve thung chuan

"Ka khawngaih tlat alawm, vawiin te khan min rawn tel pui lo se chu kan chil zo hman miah nâng. Tlante ka Bag-a mi pawisa kha va la la, dawrah Rasgulla han lei la, Mazara chu a kal hmain va pe ang che" a lo ti leh a, Tlantea pawh chu a che chhuak ve nghal mai bawk. 

"A pawi lo chu! Rasgulla chu va pe tak rawh se, keini chu i lo inbual fai daih ang u. Sangte, nangni pawh zan inkhawm in duh ang chû, ka lut zuai ang a, in inbual ve nghal mai dawn nia" tiin ka putea chuan ka pa chu a biak zawm zat a, ka rilruah chuan thil pakhat chiah a awm leh ngut ngut tawh. 

Room-ah lut thuaiin ka Bag chu ka zen rawk rawk a, room aṭanga ka chhuah rualin Tlantea chu in aṭang a lo chhuak chiah a, mi dang ngaih dan tur pawh dâwn lovin ka zui chhuak ve nghal hmiah. Tlantea tak pawh chuan min hmu chu mak a lo tih hmel hle a, zawhna erawh min zawt hran lo. A kalna lamah ka zui tawp a, a luhna dawrah chuan ka lut ve zel bawk a, mahse han lei mai tur chu a vâng khawp mai. 

Waiwai leh chhang tih vel chu a awm nual a, ka pek tum ber lah chuan chuti ang thil a ei ngai ka ring chiah bawk si lo. Tlantea chuan Rasgulla bur hnih chu a lei a, hun kan neih tam tawh loh avangin Fanta bur khat chu ka lei ve ta tawp a, a in duh loh leh a in duh lo a ni tawh mai. Ka leisak a ni tih pawh hre kher lo se ka duh, mahse a chhan tak ka hriat si loh hian a hmel hmuh chu ka duh ru deuh tlat thung a, ka awm dan chu hmâna keimah kha ka ni tawh chiah lo a ni. 

Mazara te in lama kan kal laiin Tlantea chuan zawhna min zawt ta nge nge a, chhanna pek dan tur erawh ka hre lo va, ngawi rengin ka kal a, hriatthiam loh hmel deuh hian min en leh zeuh zeuh ṭhin bawk. Dik tak chuan Mazara chu ka khawngaih tlat alawm, chhun ni sen sa hnuaiah hna a thawk hah ve em em a, ka pitei sawi kha a dik chiah, a awm awl mai mai ngai bawk si lo nen a chau ve khawp ang.

An in kawt kan va thlen chuan a lo la chhuak bik chiah lo va, inbual zo hlim tih hriat tak hian a sam tam lo lutuk lo chu a la hnawng deuh chap a, kan thil leisak chu Tlantea chuan a pe nghal a, a lo la duh lawk lo leh nghal. Fanta bur chu ka lei a nih thu Tlantean a sawi lai chuan chiang deuh hian min rawn en a, lai zet hian ka lo ding ngawi reng a, a hnuah phei chuan ka nui zeuh ringawt a, ka awm dan chu a dik hlawl lo. 

Min kal pelh hnu thleng pawh chuan ka la inngaihtuah a, ka rilru chu ka hriatthiam phak bak a ni tlat. Zan kan mutnaah te chuan Mazara bawk chu ka ngaihtuah leh a, ka ute pahnih chu chau tih hriat takin muhil bawrh bawrh tawh mah se kei erawh ka la harh ṭha hle thung. Ka mit ka chhin rualin Mazara hmel hlir chu ka mitthlaah a rawn lang a, tih ngaihna ka hre bik thlawt lo a ni. 

Muhil thei lo ta na nâ na chu ka tho ṭhem ṭhem a, thawm dim takin kawngka chu ka hawng a, veranda-ah chuan ka ṭhu ta ringawt. Zan dar 12 lâi a ri tawh a, rannung hram te chuan engtin emaw ni tak hian chhun lama kan awm dan chu min ngaihtuah chhuahtir a, ngaihtuah chhuah ka tum pawh a ni lo. Chutah thla lah chu a êng em em leh ta nghal a, thla bial zan te pawh a ang lek lek zawk a ni.

Min rawn sawi det dettu an awm avang chuan ka meng riai riai a, boruak lah chu a la vawt deuh sûk zui. Min rawn sawitu lam pawh hawi lovin ka hawi kual a, ka awmna chu veranda a lo la ni a, ka bawk muhil palh a ni ngei ang. Thla êng ṭha zet lam chu hawi chhovin ka ṭhutna aṭang chuan ka tho va, Tlantea emaw ka tih lam ka hawi chiah chu ka va han phu nasa tehreng em. Ka hmaa mipa ding chu tu dang ni lovin Mazar ngei mai hi a lo ni a, a pa lian ang reng si a, zana han hmuh thut atan chuan a hlauhawm dâwn dawn alawm le.

"Enga ti nge pawnah hian i mut?" a rawn ti sup a, chhan mai dan tur pawh ka hre lo, a lo haw tawh chu a ni ngei ang a, a awmzia chu a tlai tawh viau ngei ang le, engtin nge kei hi awlsam takin pawnah ka muthilh theih zawk!?

"Ka hre lo, dar eng zat nge?" tiin zawhna chu ka zawh zawm zat a, min chhan a tum hmel loh em em leh ta nghal a, tunah tak chuan ṭawng duh loh hun pawh a ni chiah lo.

"Pawna i muthilh chhan chu a awm ngei ang, zan a rei viau tawh leh nghal" min chhan dan vel chu ngei tak ka ni, a ṭawngkam aṭang chuan a khirh dawn tih hriat sa reng reng, ka lo ngaihtuah ve chiam chu mawl ka inti thar ngawih ngawih. 

"Dar zat chu i sawi hreh awm ka ti, i sawi ka phut em em pawh ni hlei lo. Khawngaih man leh ngaihtuah man i awm lo ve hle mai, ka lut dawn, mut tui le" ti deuh hmawh hmawkin ka kal pel a, mahse ka banah a rawn chelh a nih chu! 

"Eng thu maw i sawi kha!?" min chhuk melh run chung hian a rawn ti a, chutah zet zawng sawi loh tur ka sawi palh tih ka hre chhuak nghal a, ka kut chu ka phih thla sawk a, a vuan reng a nih chuan taksa mur avangin ka buai chhe lai let der a ni mai.

"Dawt ka sawi, engmah ka sawi lo, va haw tawh rawh, zan a rei tawh" ka ti bah deuh nawk nawk a, thawm dimna pawh nei tawh lovin kawngka chu ka hawng sawk a, ka va han zak tehreng em, eng vangin nge ka rilrua awm kha ka sawi chhuah reng reng ni!

Thawm ka dim lo viau e ti lo chuan tûmah an rawn harh lo hlauh a, an mu tui hlawm khawp a ni ang. Muthilh theih loh sa nak a laiin ka muhil thei lo zual a, ka mu meng kar a, ka awm dan chu a âtthlak tak zet a ni. Kei hi ka dik miah lo, engati nge ani ang mipa khirh lutuk leh hmel rorum bawk si kha ka lo ngaihtuah ve vak!? Ṭawngmawh si, insual a hrat hmel ropui bawk si, a chak pawh a chak ang, a kut thlak a nâ êm mai. A kut hrawl taka min khawih lah khan ka buai ve ziah leh nghal a, ninawm lutuk mai. 

Zing chu ka tho hma hle a, zan aṭang tawh mood dik lo sa ka ni a, ka mood chu chhe zual tak a ni. Ka mood ṭhat loh chhan ber chu mi ṭawngmawh lutuk leh khirh hmel lutuk Mazara vang kha a ni a, mahse han thinrim viau dawn pawh ni ila ngaihtuah chian chuan thinrim khum tur ka ni leh chuang miah lo. 

Eng thil mah ka huat tur ang zawngin a sawi lo va, keima'n ka lo ngai haw mai zawk a ni. A bul ber chu keimah ka ni e, a dik chiah, eng nge ka ngaihtuah thute kha la lo sawi thawt thawt ni! Ka ngaihtuah chhan pawh ka hre chuang lo, chawhmeh min siamsak avanga khawngaih leh ngaihtuah angah ka inngai ta tawp. 

Tukṭhuan ei laiin ka putea chuan lo lama kal turin min sawm a, ka pa chuan a lo phal lo deuh tlat a, kal luih ka tum ta bik lo. Dar 9 velah pawh Mazara hmel reng reng chu hmuh tur a awm lo va, a rawn kal tawh dawn lo pawh a ni mahna. Chuti ngaihtuahna ka sen lai tak chuan Aizawl lama a kal thu chu ka pitei'n a rawn sawi a, engtin emaw tak hian ka thaw a veng deuh huai a, eng vanga veng ringawt nge a nih ka hre leh chuang hauh lo. 

Tukṭhuan ei lai kha chuan ka pitei te lo lama a kal ve leh ngei kha ka ring a, kal châkna chu ka la nei deuh tho a nih kha! Tunah erawh a kal dawn lo tih ka hriat chian tawh vang nge ni rama kal châkna chu pakhat mah ka nei tawh lo va, tun ṭum ka rilru leh awm dan danglam nasa lutuk chu a mak ve thlawt a ni. 

Buh pho ven tur a awm tawh êm lo bawk a, awm se chu ka feh leh daih duh tak tak ang. Hmânah arin vawi khat min lim tawh a, khata ṭang kha chuan ar tê tih loh ar zawng zawng ka hlau ta vek a ni. U Duhawmi leh u Vli te chu an chau viau khan ka hre si a, feh tura an chhuah lai te chuan an phur leh tawh em em zawk a, kei chu ni ila ka kal duh tawh miah lo vang maw le. 

Nilêng chuan engmah ti lem lovin ka awm deuh tlawng a, in chhungte chu tifai ve mah ila chetna tur a tam lutuk hran lo. Mawitei leh Hlimpuii chu ka be ve ve ta ringawt a, a nawm leh nawm loh te min rawn zawt a, nuam ka tih thu ka sawi chuan an awih lo hmel hle. Zep lovah chuan nuam ka ti chiang alawm, thingtlanga zin peih lo ber si kha a ruk tak chuan nuam ka ti a, ka chhungte bulah ka sawi duh lo mai mai a ni. 

Tlai lam a rawn nih chuan ka thiam ang ângin ei rawng chu ka bawl ve a, anhnah lam erawh ka khawih buai duh lo law law a ni. Dawra mi dal ka lei a, dal kan leh alu kan te chu ka thiam ve zawng tak alawm, mahse anhnah a ni emaw ni lo emaw thiam kim ngei chu ka ngai a ni. Rei lovah ei rawng chu ka bawl zo der a, ka tem chhin chiah chu tui tihna pakhat mah ka nei lo. Ka dal kan hmin vek tawh chu ka leih bua a, ka kang ṭha leh ngat a, khawnvar tui pawh ka heh viau mai. 

End of Chapter 5