SUMO DRIVER By Havali Adam (CHAPTER 4)

SUMO DRIVER 

By

Havali Adam

Chapter 4

"I hmai chu eng nge a an?" pangngai deuh hian a rawn ti ve teh mial a, min biak dan avang chuan ka ṭawng lawk lo va, ka awm dan chu a dik lo kual vel vek a, ka hmai chu ka khawih ringawt bawk.

"Min chhang la" thum hniam ruih hian a rawn ti leh a, harh chhuak thutin ka aw chu ka thian kharh kharh a, ka kut chu ka dah thla thuai bawk a, a hmel chu ka en rei ngam thlawt lo, engtin emaw ni ka awm tlat a ni.

"Engmah a ang lo, ka sawi awmzia chu a na lo ka tihna" ka ti bah deuh nawk nawk a, ka lam hnaihah a rawn pen a, kei lo tawlh hnung hret thung a, chal tichuar nang hian min en a, eng vanga tawlh hnung ringawt nge ka nih pawh ka inhre bik lo. 

"I chhungte an awm em?" a tih chuan ṭawngkama chhang tawh lovin ka lo buk khum nghat nghat a, min kal pelin in chhung lamah chuan a lut zui nghal a, inhnaih takin kan awm tawh lo chiah chu ka thaw huai thei maw le.

Ding reng lovin in chhungah chuan ka lut zui ve leh nghal mai bawk a, eng thil chiah nge ka pitei te khaw Sumo Driver Mazara chuan rawn tih a tum ka hre hauh lo. Ka nu leh pate nena an lo ṭhut khawmna lamah chuan ka phei a, ka nu leh pa ni lovin pitei chu a lo ṭawng siam siam a, inthiam lo tur te'n a lo ti a, Mazara chu a lo inthiam lo ve ngei a ni ang. Ka pitei a ṭawng zawh hnuah ka pa chu a rawn ṭawng chhuak ve leh nghal a, ka nu pawh a ngawi reng bik lo. Mazara chuan min rawn en zeuh a, min en apianga ka thin a phu rang em em zel chu a mak a ni.

"Awm a nuam lo khawp mai, keimah avangin mipa kut a tuar a ni si a" a rawn ti ve ta sup a, min en reng tawh lo va, kei chuan ka lo la en reng thung a, a awm dan leh a ṭawng dan vel chu engtin emaw ni tak hmuhnawm tih dan riau ka nei tlat a nih chu! 

Ka hmuh hmasak ber angin lukhum hma thlawk a la khum reng a, khawiah pawh kal se a khum zel a nih ka ring ta mai. T-shirt dum hi a ha a, a tawt mah mah emaw tih theih turin a ban bul lam chu a mar deuh ṭang a, a taksa a lian hrim hrim bawk nen kawr chu a lang tê chuang miah lo. Pitei te in aṭanga a chhuah hnu pawh chuan ka chhungte hmuh loh laiin tukverh aṭangin ka en zui vawng vawng a, a awm dan vel hrim hrim chuan ka mit a la tlat a ni. 

Tui ka in lai thlêng thleng paw'n ka mitthlaah a hmel a awm tlat a, paih chhuah tumna pawh ka nei chuang lo. Ka pitei te khuaa kan thlen tuk chauh a la nih avangin putea chuan hnathawk lova awm hahdam ṭhap chu a ti tlat a, chuvanga awm kim vek pawh chu kan ni. Tlai lamah erawh Tlantea chu sairawkherh nen sava veh turin a chhuak hram a, putea paw'n a khap ta em bik lo. 

Zanriah ei dawn hnaih lamah a rawn haw chauh a, rin loh lutukin sava chu a lo hawn nual a, tulthirin meiah a hem nghal a, a hem hmin thar pakhat min han eitir chiah chu hâng tui tak a ni. Zep lovah chuan sava sa ka la ei ngai lo va, ei enah pawh ka en lo, ka rap deuh lek lek zawk a, mahse tunah chuan tui ka ti em em tawh thung. 

"Nakinah sairawkherh perh kha min zirtir ve rawh aw, sava ka perh thla ve chhin châk. I perh thlak tirhin nuam lo ti ve tho em? I khawngaih ve tho em? Ni lo, min zirtir leh suh, ka khawngaih dawn tlat" Tlantea nen chuan veranda-ah ṭhuin kan awm mai mai a, ka ṭawng chu a inkalh nawk nawk a ni ber.

"Kan sava hmeh ah khan ka perh thlak a tam lutuk lo, pahnih pathum vel bak ka perh thla lo vang. Kawnga ka din laiin u Mazara nen kan inhmu fuh hlauh a, min perh thlak sak ṭeuh alawm" a rawn tih chuan

"Kha Sumo Driver pa kha maw!?" ka lo ti deuh hû a, a hmel ka mitthlaah a rawn leh nghal a, sava perh thla tur chuan ka beisei chiah lo, a thiam leh thiam loh chu ka hre lo naa sairawkherh hmanga sava perh thla tur chuan a  inhmeh lo ka ti. 

"Aw ni e, u Mazara te chu Sava a perh thla thei alawm, silai kah pawh a thiam tho. A huan kal haw lam nen kan inhmu fuh hlauh zawk a, chuti ni lo se chu ka rawn hawn beitham viau ang" a rawn ti leh a, kan Sumo Driver pa sava perh thla lai vel tur chu ka hmu châk leh tlat pek a nih chu! 

"Awi!" kan ṭhutna hma lawka thil rawn ti thut avang chuan ka ti deuh ṭhawt a, ka âwm chu ka dawm vang vang a, in kawtah chuan sanghaṭin bur chhut sawih tawh hi a lo let ran a, naupang pakhat hi a rawn tlan phei nal nal bawk. 

"In inbur chhe vawm duh a nih paw'n heti lamah chuan rawn vawm tawh s'u aw" Tlantea chuan a lo ti nghal a, chu naupang pawh chu a bu nghauh reuh a, chak zet hian Field tê lamah a tlan phei leh nghal mai a, an inbiruk siak ni maiin ka hria. 

"Nuam hi an ti thei a nia, nakin lawkah kan in hnuai kawmkar velah hian an rawn biru leh sap sap mai ang. Hauh pawh ka hau duh vak lo, keini pawh kan naupan lai khan kan ching ve thei lutuk" a rawn ti leh a, hriat belh châknaa ka khah tlat avang chuan

"Inbur chhe vawm chu inbiruk siak tih nen a inang tho em ni?" tiin zawhna ka zawt ta nge nge a, Aizawl lamah kha chuan kan inbiruk siak ve ṭhin ngei a, mahse chuti angin bur chhia vel kan hmang ve ngai lo. 

"Inang chu a ni mai, a changtute'n bur chhia an va lak chhung khan kan duhna takah kan lo biru  fel vek hman tawh ṭhin a, a changtu nih pawh a nuam lutuk lo" a tih chuan ka hrethiam ta kûarh a, kan piah maia naupang inbiruk siak ho chu an hlim hmel hlawm khawp mai. 

A tukah chuan thawh kan hai tawh êm bik lo va, kan tho hma tlang hlawm viau zawk a, chaw kan ei kham a, mi dangho chu feh turin insiam malh malh mah se kei erawh ka la insiam ve hauh lo. Ka peih lo chung chu feh turin min nawr lui lo tak tak a, ka pitei phei chuan ina lo awm hahdama an haw huna thingpui lum turin min duh deuh zawk a, kei paw'n ina lo awm chu ka duh daih zawk hrim hrim. Dar 8 leh a chanve velah chuan feh turin an inpeih fel tawh chu a ni der a, ka beisei lo deuhin Mazara ka hmu hlawl mai.

"U Vl, eng nge ani sawn a rawn tih ve dawn a?" tiin ka zawt deuh tawp a, min rawn chhan hmain hmain pitei zawk chuan 

"Kan bulah a lo kal ve dawn maw le, kan inlâwm dawn alawm, Mazara te lo leh kan lo hi a inrî a, kan inrî loh chang pawh hian kan inlâwm ziah ṭhin tho" a rawn ti a, kan lam pana lo kal mêk ka pa ai pawha pa lian chu ka en reng a, lukhum a khum tawh miah lo.

A lu a buk lutuk lo va, a kawng lam mah mah zawk a ni. A inthuam danin a zir nge ni a taksa chu a lang lian zual em em a, kekawrah Jean kekawr a ha a, kawrah hnathawh kawr atana hman ṭhan tih hriat tak Kamis hlui tawh lampang a ha bawk a, hriat loh karin kan bul chu a rawn thleng leh der tawh. Ka awm dan chu ka hrethiam bik lo, eng vanga ka bul hnaiha a awm apianga thin phu dawt dawt zel nge ka nih ziah? Min be lo va, kei paw'n ka be bawk lo va, mahse ka zam ru em em lawi bawk si.

"Min rawn tel pui thei tur chu a lawmawm hle mai, i awm hi chuan hna pawh kan thawk sâwt leh ngawt ang" ka putea chuan a lo ti lûam a, Mazara chuan ṭawng chuang lo hian a hmui a tiche zeuh a, a nui ve tihna em ni?

Chik fahran hian ka en ngawt ngawt a, a awm dan chuan ka nuih a tiza letling tawh zawk a ni. Chuti ang em ema mi ṭawngmawh leh nui hreh mipa chu ka la hre ngai lo, a âtthlak tak zet a ni. Ni e, thingtlangmi a ni a, lehkha a zir sâng lo pawh a ni maithei a, nungchang mawi a hre chiah lo a ni mahna le. Mawitei phei chuan a awm dan chu hmuin hre ve ngat se zawng a va han sawi nasa leh dawn êm, zahpah miah lovin a ṭawng chhuah duh hial ka ring. 

"Ti r'u, chet chhuah lam i hnaih teh ang u. Lo lam va thleng phei thuai ila, kan haw hma leh zawk dawn nia, nilaini te a ni dawn bawk si a, zan inkhawm te kan duh hlawm ang" putea bawk chuan a ti leh a, mi dang pawh an che zui ta sap sap a, ka pite chuan min en zeuh pah hian

"Numam, Field tê ah sawn kan buh hawn neih sa tlêma zawng chu ka pho a, saw, Silpaulin pawla mi saw a nia, tam tham ni lo mah se lo veng deuh rawh aw, ar hian rawn ei an tum ve leh ṭhin a" a rawn ti a, ka meng lian teh e!

"Ar maw!?" ka ti deuh hluai a, ar hrim hrim hi chu a nu emaw a pa emaw pawh ni se ka hlau ve ve, mi lim an ching si, ka hlau hi a ni tawp, chutah buh ka la veng zui dawn maw!? Ni lo, ar hnawh darh ai chuan buh sengnaa kal ve daih chu ka duh zawk.

"Ka lo kal ve leh si" mumal lo zet hian ka ti deuh tawp a, a ngaihna hriat hmel loh zetin an vai chuan min en ṭhap a, kal sawn thuaiin in chhungah ka lut a, ka kawr te chu ka thlak sawk sawk a, ina awm chu ka peih leh si lo a ni ber.

"Numam, i awm loh te'n tu nge i pitei te buh pho saw veng ang. I awm dan tê hi a buaithlak riau mai, a hnuhnawha thil tih hi ching viau ṭhin suh" an bul ka va thlen rualin ka nu chuan aw nem vak lo hian a lo ti a, min hau mah se pawi ka ti lo, ina awm chu ka tum lo bur.

"Âwwww a ho lutuk, a rawn kal duh ve leh thut a ni mai a, kan buh pho veng tur chuan ṭhenawmte saw ka va hrilh lawk ang e" nui var var hian pitei chuan a rawn ti ve leh mai a, a kal sawn zui nghal ta bawk.

"I va'n tibuaithlak thei tak, i lo kal dawn a nih chuan i kawr hak lai tal kha thlak teh ang. Khati ang kawr te kha chu Aizawl lamah pawh i ha nasa viau a ni lo'm ni?" ti deuh hmawk hmawkin ka nu chu in chhung lamah a lut a, kei paw'n ṭha takin ka zui ve leh mai.

"Thinrim lo teh nu, mahni chauha ina lo awm kha ka peih lo leh thut alawm, min khawngaih viau zawk rawh" kawr dang phawrh tuma ka thawmhnaw dahna bag a hai mawlh mawlh lai chuan ka lo ti nang nâng a, min melh no lo chiang khawp. 

"Kha, hei te hi ha zawk rawh, ramah buaina siam miah suh ang che. I beisei angin a nuam dawn lo tih hria la, kan buai tlang hlawm viau bawk ang" ti deuh hmukin kawr leh kekawr chu min pe a, kei erawh ka lo nui ver ver ringawt.

"I ute pahnih angin i la kal ngai ve der bawk si lo, ngaihtuah i nâ reuh hle mai Numam" an awmna bul kan va thlen rualin ka pa chuan a lo ti a, Tlantea chuan min lo nuih vur vur pah hian

"Lungngai suh pa Sangte, ka awm alawm, keima'n ka kai hruai zel dawn nia" a rawn ti zawm zat a, tute nge kan bulah awm tih pawh ngaihtuah hman tawh hek lo, ka insiam chhiat khum vak a, mi ṭawngmawh Mazaran min lo en reng tih ka hmuh chuan tawp chiang tak ka ni. 

Dar 9 pelh hret velah lo lama buh seng tur chuan kan chhuak a, Tlantea chuan tawlailir a nawr a, keiin ka nawr pui bawk a, tawlailir chu pahnih kan nghe nghe. Ka putea chuan ṭhenawmte tawlailir a hawh a, chu erawh Mazara leh ka ute pahnihin an nawr thung a, an inbe miah lo hlawm a, an insi miah lo bawk. Ka ute chuan hrehawm an ti ru dawn tih ka chiang, chuti ang mipa bulah chuan u Vli ngat phei chu a awm duh ngai lo. 

A tlangpuiin a ṭhiante pawh mipa harhvang leh zezawi lo an ni tlangpui a, chuta kara mi ṭawngmawh lutuk Mazara bula tawlailir nawr chu a nuam a ti hauh lo ang le. Anni pathum ang lo takin kei leh Tlantea erawh chu kan ṭawng char char a, kal kawngah chuan ka thil hriat ngai loh leh ka la hmuh ngai miah loh te chu min hrilh melh melh reuh a, thil hriat thar ka ngah phah khawp mai. 

Metal road lo chin kan thlen chuan chawlhna hahdamna ni deuh reuh in tê hi a lo awm a, a bulah tawlailir ṭhahnem zet a lo inhung fur hlawm bawk a, keini tawlailir nawr pawh chu Tlantea chuan a hung ṭha sawt sawt a, Mazara paw'n a hung ṭha ve mial mial tho. Rei lo tê ṭhu hahchawlin tui te kan in a, kein ram lam chu kan pan chhunzawm zui nghal bawk a, ka nu leh pate'n min ngaihtuah viau mah se kei chuan nuam ka tiru ta phian. 

"He lam hi tlang sâng lam a ni a, saw lam saw tlang hniam lam a ni a, keini chu tlang sang lamah hian kan kal dawn" kawng peng ṭhuam zau ve tâwk tak pahnih awmna kan thlen rualin Tlantea chuan a lo ti a, kei chuan a kalna apiangah ka zui deuh tawp a, kawng chu ka la hre ve lo miau a ni. 

A nuapang ber pahnih kan ni e ti lo chuan hma kan hruai char char thung a, thingin a bawh khat tlang vel chu hmuh nuam ka ti hle bawk. Aizawla kan tlang hmuh ve ṭhin nen a inang lo êm a, chu chu hmuh nuam ka tih chhan pawh a ni ang. Chu bakah kalkawng hrim hrim chu a nuam ka ti, kawng sirah thing lian tak tak a ding tlar phei dul a, thing hnah kar aṭang ni êng a lo lut sep sep a, a reh dai nuam ngawih ngawih. 

Thehlei ka hmu thut chu phur zet hian ka ṭe chhuak hluai a, mi dang chu an lo phu hlawm viau nghe nghe. TV aṭang te paw'n Thehlei te chu kan hmu nasa ve alawm, ka pa'n Chanchin thar en zawh apiangin a hmet chhuak ṭhin a, Discovery channel ngaina lutuk pa ka neih vang a ni ang theihlei pawh ka hriat bel ve êm em ni! Chu thehlei lah chu a'n harh khawp a, a tlan kai zawt zawtna thing chu eng thing nge a nih pawh ka hre lo va, rama kal tur kan nih miau avangin rei erawh ka en reng ta bik lo. 

Buh senga kan chet tlatna hmun tur kan thleng chiah chu ni a rawn sa ṭha vet vawt hle a, kalkawng pawh a zim tawlh tawlh a, ka nu'n ka beisei ang ngawta a nawm dawn loh thu min lo hrilh lawkna te chu ka hre chhuak rum rum mai. Thing hnah nei lo lian deuh bulah chuan ka ding vang vang a, kawng chhak lamah pangbal kung a intlar ṭhup bawk a, ka dinna thlang lawkah thlam awm tawh mah se ka che sawn peih rih thlawt lo. Thli lah chu a thaw heuh heuh zui a, pangbal kung bula awm char char chu buh seng ai ngawt chuan a nuam zawk ang ka ring. 

"Awi ka duh thei lo" ti deuh ṭhawtin ka dar chu ka beng vak vak a, ka dara pangang dum hmul ṭhur lah chu ka beng tla nge tla lo tih pawh ka hre tawh lo, ka buai vek a, ka tal chiam chiam lai chuan tha chak zet hian ka ban bulah a rawn man a, ka tal tawp chiang kher mai. 

"Ka hnungah hian pangang a awm a nia, a lian lutuk. Min thlah thuai rawh, ni lo, ka darah zawk hian a awm, la thla vat rawh" hlau lutuka ka ti mawlh mawlh lai chuan min thing deuh ṭhawt pah hian

"Ka hria!" a rawn ti bul hmuk a, ka hlauh tawh tehreng nen a hmanhmawh ve miah lo te chu ka huat a tling em em a, chutah min biak dan chu hriat nuam tak a la ni lo zui, ka thin chu a rim tet tet tawh a, ka tal dawn lahin min chelh nghet phian bawk si. 

"La thuai ta che!" ka insum thei lo chuan ka ti vin ta tûarh a, rum nghut hian ka hnung lam aṭang pangang chu a rawn keng chhuak a, a hmel ka hmuh zawng ringawt paw'n ka la ṭim thei, pangang chu ka rap hi a ni tawp.

"Lo kal ve miah lo tur i ni" min melh chhuk run pah hian a rawn ti deuh hmuk a, zak thei lo ka van ti tak, ka kal leh kal loh chu ka thu thu a ni a, sawi theih pakhat mah a nei lo, ka pate hmel pawh ka hmu vat a, ka ṭe ri kha an hria a ni ngei ang. 

"Mawla, hawihhawmna pawh nei lo pa, min thlah tawh teh" ti hmawk hmawkin a kut chu ka tuai thlak sak a, a kut ka sik apiang lah chuan ka lo danglam ve hman chhen leh nghal, kei aiin a upa fê dawn tih chu ka hria, mahse ṭawngkam mawi hre chang tawh lo khawpin ka insum thei tawh bik lo a ni. 

"Engati nge Numam?" thlam lam pana ka chhuk laiin ka pa chuan a lo ti a, chhan pawh ka chhang peih lo, boruak a lum tawh bawk si nen ka ning ru ngawih ngawih, engtin nge hawihhawmna pawh hre lova kha a rawn lan thut theih reng reng ni! 

"A ná!" ka sam ka chul chiah chu ka ti leh nghal a, ka kut chu ka dawm vawng vawg a, eng vanga chuti ang em ema nâ nge a nih pawh chu ka hre lo, hliam emaw kak emaw a awm bawk si lo, ka kut chu a na hle ringawt. 

"Engati nge nâ i sawi reng a Numam? I lo kal lui tlat vel a, buaipui i ngai reng dawn a nih hi!" tih leh ka nu chuan ka kut chu en dik a rual nghal a, ka pa leh mi ṭawngmawh Mazara pawh thlam chhungah a rawn lut a, Mazara ren run chuan min lo en leh kur tawh.

"I tih nat dan lah chu ka hre ve bawk si lo, engtin nge a nat dan? Pem chu a awm miah lo hî, Paa kha han ensak teh" ka nu chuan a ti leh a, sawi fiah dan pawh ka thiam loh laiin Mazara chu kan bulah a rawn ṭhu hniam a, ka kut en reng chung hian

"Pangang hling a lut nih kha!" a rawn ti bul deuh hmuk a, ka kut chu la kangin a ipte pui aṭang chuan chempui a rawn phawrh ta mai, phawk hrâ hian a che vel chu ka lo en tlawk tlawk a, ka kut chu tan bun a tum ni maiin ka hria. 

"Hei! Ka duh hauh lo, ka kut hi ka la ui tih hre ta che" tiin ka kut chu ka phih sawk a, ka phih zawngte chuan a nâ vawng vawng a, pem hmuh tur a awm bawk si lo, pangang hling chu a lut tak a nih ka ring.

"Hei!" ka kut a rawn lak rual chuan ka lo ti leh nghal thuai a, pawh chhuah tumin ka bei ve tak na a, awmzia pakhat mah a awm lo, mi dangho lah chuan ngawi rengin min thlir ṭhap ringawt a, min puih pawh an tum miah lo leh nghal. 

"Che suh!" ka tal rualin a rawn ti deuh hmuk a, tal leh pawh tum ila ka thei lo hrim hrim, nghet zeta ka kut hmer chung hian chempui chu a rawn lek chhuak leh a, ka kutah chuan a chuk tuah a, a zai mai a nih chu!

"A nâ dawn lo" a ṭawng thum tak chu ka hre vek a, mahse a thil tih lai chu ka hmu ngam lo, ka mit ka chhing tlat a, ka kut chu a zai ngeiin ka hre bawk si a, nâ engmah ka hre lo chu mak ka tiru tawh hle bawk. 

"Meng rawh" ti supin ka kut chu a tuai nawk nawk a, ka men chuan chempui pawh a lo keng tawh êm bik lo va, a kut hrawl leh hlai ṭha zetin ka kut khawih sawk sawk vel mah se nâ ka hre tawh miah lo.

"A va'n mak" mawl hmel deuha en chung chuan ka ti ta ringawt a, dik tak chuan a nat viau kha ka lo ring a, ka kut kha a zai bung dawn emaw te ka ti a, mahse a lan dan ang ngawt chu a ni lo, ka sam chu chûl chul mah ila nâ ka hre tawh lo hrim hrim. 

"I che tawh teh ang u khai, kan haw tlai lutuk ang e" nui vur vur pahin ka putea chuan a rawn ti a, kei tih loh mi dang chu an che ta sap sap a, keimah avanga an che chhuak har chu nuam lo ka ti ve reng, inthlahrunawm duh tak a ni. 

An bula kal ve ka tum ngial paw'n ka putea leh pitei chuan an phal lo tlat a, ei rawng bawl turin min ti ta zawk a, ei rawng bawl thiam turah min ngai ve tawp a nih ka ring. Ka chhungte reng reng pawh chu an ngawi tlat a, ei rawng ka bawl ngai loh thute sawi ve awm, nge min tihmualpho an duh hrim hrim zawk!? 

Rilru buai nuai chungin chawhmeh an dah chhuah sa chu ka khawih niap niap a, siam dan tur ka hre hlawl lo a ni. Chaw chu ka chhum thiam ngei a, mahse chaw chhum ngai lovin in lam aṭang chaw ṭhing kan keng vek bawk si. Chaw tal chhum ngai ni se chuan chet pawh ka che ve deuh mahna, mei erawh a alh hluah hluah a, thir bel chhunga tui chu rei lo tê ah a rawn so thuai ang a, eng nge ka tih zel tâk ang? 

Maian chu hîh ka tum ve ngei alawm, ka hîk dik lo kual vel vek ang tih ka hlau tlat a, chuvanga khawih niap niap ringawt pawh chu ka ni. Thlam kawmcharah chuan dingin thawk ka la vang vang a, chawhmeh siam thiam lo hmeichhia nih chu ka duh bik bawk si lo, ka rilru a buai tak zet a, ka chhungte pawh ka ngei hle a ni. 

"Awi!" ka mi hmuh avang chuan ka ti deuh thut a, min en miah lo hian ani chu thlang lamah a kal thla zui nghal mawp mawp a, zah pawh dawn lovin

"Hei!" ka ti ta tawp a, ka kohna chu a hre lo nge ni rawn hawi let miah lo hian a kal ngaiin a la kal reng a, a hminga koh chu ka tum deuh ûk a, mahse ka lai tlat pek a nih chu! 

"Hei! Ṭawngmawhpa" ka tih pawh chuan a kal hla tial tial mai bawk si, a tawpa tawpah chuan nuam ti lutuk lo chung hian

"Mazar" ka ti ve ta tawp a, kan mi ṭawngmawha chu a la ding duh chuang der lo, kan awmna a inhlat ve ang reng tawh si a, a hre pha tawh lo a ni maithei. 

"Mazar" a lam pana tlan thlak deuh hlawk hlawk pah chuan ka ti leh ta nge nge a, a rawn hawi let ve teh mial a, a lakah chuan ka inthlahrung lo lui tawp tawh, ka putea leh ka pitei te hmuh laia mualpho ai chuan Mazara puihna dil chu ka duh fê zawk a ni. 

"Ka koh che kha i hre miah na nge? Eng nge i tih dawn? Min lo pui hmasa teh a, chawhmeh khi ka siam thiam lo" zep buai duh lova ka tih chuan chal tichuar nâng hian min en a, chutah keimah bawk chuan

"Khati anga min en lo khan min lo pui vat mai teh, ka piteite nupa in chawhmeh ka siam thiam lo tih an hriat vaih chuan a zahthlak dawn lutuk" ti leh mawlh mawlhin ka hnung chhawn a, mahse thawm a rawn nei miah lo.

"Ka ti tak tak a nia, nakin lawkah an lo kal ang a, ka mualpho dawn asin" a lam hawia ka tih chuan a rawn che hrut a, min rawn zui dawn tih ka hre mai a, thlam lam chu ka pan chho muangchang lo hle bawk. 

Thlam chhunga kan luh chuan ngawi reng hian maian chu a hîk zui nghal mial mial a, hnehsawh tak a ni. Thingtlangmi a nih avangin chawhmeh siam chu a thiam ka ring sa hrim hrim a, keiin a che vel chu ka lo thlir ngawt ngawt a, a tih dan vel chu a mika mak pakhat mah ka hre lo. Maian a buaipui zawh rualin kawmchar bulah lawkah a va kal a, mai rah hi a rawn keng chhuak nawlh a, a sah phel lai te chuan ka lo ṭhu ngawi reng ringawt. 

"Eng lo, sawi miah suh aw, chawhmeh siam ka thiam lo tak tak alawm, ka ute'n min awl zel a, chaw erawh ka chhum thiam thung" bel chhunga maian leh mai a thlak lai chuan ka ti leh ringawt a, zep lovah chuan ka zak ve reng, a hmeichhia zawkin chawhmeh ka siam thiam lo chu zahthlak tak a ni. 

Ngawi reng hian a che zung zung a, kei lah chuan sawi tur ka hre tawh bik si lo. Chawhmeh chu a siam zo thuai a, a lakah chuan inthlahrun ruk dan riau ka nei a, mi pangai tan chuan inthlahrun loh chi pawh a ni lo. Tho thutin thlam aṭang chuan a chhuak ta daih a, lawmthu pawh ka hrilh hman lo. Kawmchar aṭang thlang lama a chhuk thla chu ka en zui vawng vawng a, ka nui zeuh a, ka mamawh laia min pui tura a awm chu lawm tak ka ni. 

(End of Chapter 4)