SUMO DRIVER By Havali Adam (CHAPTER 3)

SUMO DRIVER

By

Havali Adam

Chapter 3

Ngaihsam zet hian ka ute pahnih chuan Sumo-a chuan luh chu an tum nghal mai a, kei erawh che sawn lovin ka la ding reng thung. Passenger nei lo pawh ni se ka pa chu a timak ka ti, kan kalna tur khaw Sumo a ni tih chu kan hre tawh ngei a, mahse hmeichhia kan ni a, Sumo Driver han rin nghal ngawt chu a fuh lo a ni. U Duhawm reng reng pawh chu hlauh nei miah lo hian a chuang lut vei thân a, thil dangah eng pawh ti dawn se a ngaihtuah chian nasat theih tehreng nen, tuna taka a ngaihsam viau chu a mak letling zawk a ni. U Vli lah chuti bawk, u Duhawmi ang maiin Sumo chhungah chuan a ṭhu lut fel der tawh a, ka nu leh pa ber chu an ngaih a la ṭha em em zui. 

"Hlauhthawnna in nei miah lo em ni?" ka nu leh pa chu ka en ran a, Sumo hnung lamah ka hruai phei avangin ka ute tak ngial paw'n min hmu thei lo va, kan ṭawng phei chuan an rawn hre pha lo nasa ang. 

"Hlauhthawn tur a awm hleinem Numam, i pitei te khaw Sumo a lo ni hlauh zawk a, remchanga lak loh theih pawh a ni lo. I pitei te lah phone-in an biak theih awm bawk si lo, lungmuang takin chuang phawt mai r'u" ka pa chuan a lo ti mai a, chutah ka nu pawh chuan

"Ni e Numam, Motor ke hi kan siam ṭhat hman loh phei chuan kan thim mai dawn asin, nangni talin i pitei te in chu lo va thleng hmasa rawh u, Driver pawh chuti angin a sual hmel loh hî, eng êm a thleng bik nâng" a lo ti ve leh nghal a, an va'n ring awlsam dun tak.

Sumo-a ka chuang lut tur chu a hnung seat-ah u Vli leh u Duhawmi an lo ṭhu khat tawk chiah a, Driver seat bul chiah chu a lo ruak heu mai. A seat hnung ber lênah chuan Parcel bawm a lo inhung khat hnûr a, a seat lâi lên sir lamah pawh Percel bawm li vel a inhung bawk a, passenger nei lo mah se mi pathum tan chuan a seat lâi lêna ṭhut chu a tawt dawn tih a hriat reng. Driver seat bul chiah kawngka chu ka hawng a, u Duhawmi chuan min ngaihtuah hmel deuh hian 

"In ṭhut thleng i duh em Numam?" a rawn ti a, ka hmelah ka ṭhu peih lutuk lo tih a hmu thiam a ni ngei ang, mahse an ṭhutna ai thlawt chuan Driver seat bul chu a thawl zawk a, ṭhut pawh a nuam zawk dawn tih a hriat vek. 

"Duh hran lo ve" ka lo ti ve mai a, ani paw'n min ngaihsak zui ta lem lo, dik tak chuan pathum mah ni ila hmeichhe hlang kan ni a, Sumo Driver pa lakah chuan kan him pumhlum lo deuh tlata hriatna ka nei a, ka la hlauthawng ru hle a ni.

Ka pa chuan Sumo driver pa chu kan chuan man tur a zawt a, ani erawh chuan a lo sawi duh lo va, mahse ka pa chuan cheng 500 a pe lui ta tho. Sumo driver pa lah chuan ka pa pawisa pek chu a ak ṭha duh miah lo va, Steering hmaah chuan a inthlepin a dah deuh tawp a, hawihhawm lo hi ka va han ti chiang êm. Mi'n chuan man tiin pawisa an pe ve em em a, lo lak duh loh tlat chu a ṭhing ka ti, tlawmngaihna nun peng pakhat chu ni tho mah se ka ngaih dan chuan a hun leh a hmun a hre lo deuh hret a ni. 

Chak lutuk lovin a khalh a, kan hnung lam aṭang u Duhawmi chuan a rawn be ve ṭhin tak na a, Sumo driver ṭawngmawha chuan a chhang tawi thei khawp mai. Kei tak phei chuan chhang lo tlukah ka ngai, ka nu sawi dan takah Sumo driver te chu an ṭawng duh siam siam vekin ka hre si a, he pa ve hi chu a ngawi ngul ringawt. Motor khalh reng pahin a che ri neuh neuh a, Sumo chhungah chuan Tape a lo awm reng chu niin Cassette chu a rawlh lut riai riai a, a hmeh rik khep rualin Tape aṭang chuan Mizo music ngei a rawn ri chhuak zui nghal bawk. 

A hla play chu Mizo Lengzem niin Vanlalsailova hla ngat hi a rawn ni reuh a, amah nen chuan inhmeh ka ti lo teh e! A play ring hran lo va, kan hnung lamah u Vli'n phone-in mi a be bawk a, kan ngawi lutuk tur ti zia awm tura hla a play chu ṭha ka ti leh ta phian mai. Ka play chu ni se chuan Sap hla ka play ngei ang, Mizo hla hi ka ngaithla tam lo khawp a, khawpuia kan awm vang nge pawh ka hre lo. 

Sap hla ka ngaihthlak nasat avangin Mizo hla ka ngaina lo pawh a ni hran chuang lo, ka ngaithla khât ve deuh tawpin ka hria. Aizawla Vanlalsailova a rawn zai te kha chuan ka kal ve ngei alawm, Mizoramah chuan a lar ve êm a ni. Kha ni kha chu ka la hre ve reng mai, Chapchar kut kan hman ni a ni a, mipui pawh kan tam hle. 

Vanlalsailova chuan kawr sen rawng a ha ngei a, a kawr hak rawng ang ha mipa kha an va'n tam tak. Chu mai a ni lo, a sam tih phir ang chiah chiaha sam tiphir ve te kha an awm nual bawk a, Sailova kha chu Mizo mipa te khan an entawn ve chiang alawm, khawthlang zai thiam lar tak tak te angin a lar ve tlat a ni. Album Hit zet Release tur a neih lai khan a piangthar ta daih mai pawh a, khami hnu kha chuan Lengzem hla a sa tawh ngai lo.

"Khawiah nge in thlen dawn?" min rawn betu lam chu rang zet hian ka hawi a, ka ngaihtuahna ka lo kawm nasa lutuk a ni ang MLTR hla a lo in play leh daih tawh tih te chu ka hre ve chiah a, a zawhna pawh chhang lawk lovin kan hnung lama chuang te chu ka en hmasa tê tê a,, ka ute pahnih chu an lo muhil daih. 

"Eng lo, keimah maw!?" mawl hmel zet hian ka ti a, min rawn en zawkin hma lam chu a hawi leh nghal a, hma lam hawi reng chungin Tape zai chu a herh zawi a, min biak pawh a tum leh tawh chuang lo. 

"Ka pitei te inah" tiin ka ṭawng chhunzawm leh nghal a, ani ve thung chu a ngawi leh reng tawh a, a motor khalha chuan ka hlau ru viau kha a ni a, mahse tunah chuan engtin emaw ni ka awm, hlauhna ka neih awm pawh ka hre tawh lo.

"Tu nge i pitei?" kan ngawih vang vang hnuah a rawn ti ve leh chauh a, a ṭawng hi chu a ṭawngmawh ve chiang alawm, mipa tawhkhirh ve tak chu a ni ngei ang, a mi uap lah chu a na phian leh nghal. 

"Pi Chhingzovi" ka ti sep a, chu bak chu engmah a rawn sawi zawm leh tawh lo va, kei pawh ka ngawi ta reng a, kan pahnihin Tape zai chu kan ngaithla a ni ber a, ka ute kai tho ringawt dawn ila an mut tui hmel bawk si. 

Dar 4 leh a chanve pelh velah ka pitei te khua chu kan thleng a, dar 5 a ri thuak tawh zawk maithei a ni. Khua erawh a la eng ṭha pangngai hle a, Sumo Driver pa chuan ka ute hrilh hranpa ngai miah lovin ka pitei te veng lamah min tlanpui nghal a, ka pitei te veng lam pana kan tlan lai chuan kawngpuia naupangho tawlailir khalh kan tawk chho zut zut a, tawlailir tak hi chu ka pate thlalak aṭang ka lo hre ve tawh a, mak ka ti thei hle a nih kha! 

Khaw chhunga tlan kan nih tawh avangin Sumo Driver pa chuan a khalh chak hran lo va, kan tlan chhuah tirh aṭang tawh a tlan chak lo hrim hrim zawk a, mahse ka rin ai takin kan thleng hma a, a khalh tluang phian bawk. Tape chu a la zaitir reng a, Sap hla ni tawh lovin Mizo hla a zaitir a, C. Vansanga hlate an ni hlawm a, Mizo zai thiam zingah chuan C. Vansanga hi chu zai thiam ka tih pawl tak a ni a, Mizo hla ngaithla tam lo mah ila 'Ka dam chhan' tih hla kha chu ka duh ve ngawih ngawih hle. 

Ka pitei te chhungin keini unau hmel min hmu chiah chu min lo chiau au viau a, an phur em em bawk a, hlim tih hriat zet hian an nui var var a, ka ute pahnih phei chu an tlangnel nghal khawp mai. U Duhawmi chuan kan motor ke a chhiat thu leh ka pate awm dan chu a hrilh zung zung a, khaw lama ka pate an rawn tlan mek thu a sawi lai chuan ka pitei leh ka putea chu an lo bu nghat nghat a, an bulah chuan keimah ang rual vel mipa a ding ve reng a, an fapa a nih ka ring. 

Ka pitei leh ka putea chuan Sumo Driver pa hnenah chuan lawm thu an sawi zawm nghal mawlh mawlh a, kan Sumo Driver ṭawngmawha chuan tawi tê te hian an lo chhang a, nuih pawh a nui eih lo maw le, a mizia chu mak ka ti tawp thei lo. Ka pitei te in kawt aṭanga a tlan chhuah lai chuan ka thlir reng a, mi dangho chu in chhung lamah an lut vek tawh thung. 

Chutia ka en reng lai chuan a ding thut a, a back zawngin a rawn tlan chho a, a din rualin ka lamah a rawn kal nghal a, kan inen chiang khawp mai. Ṭawng miah lo hian ka kutah pawisa a rawn hum hnan a, chu pawisa chu ka pa pek ngei kha a ni. 

"Hei, engati nge min pek ringawt? Kan chuan man alawm a nih, lo ding teh" min hnung chhawn zawnga a kal nal nal lai chuan ka ti a, motor dinna bul ka thlen chuan ani chu a lo ṭhu lut fel diam tawh thung a, min la en duh miah lo zui.

"Pawisa hi la let rawh" ka ti hman âwrh ang tihah ṭawng lehna hun awm lo khawpa hmanhmawh hian a tlan chhuak nghal daih a, pawisa chu ka hum ngawt ngawt a, ka pa chuan a dawng let duh hauh lo vang le! 

In chhung ka luh hnu rei lovah ka inbual a, Sumo Driver pa awm dan chu ka ute pawh ka la hrilh lo va, anni pahnih chuan nuam hi an ti nghal em em ringawt mai a ni. Ka inbual zawh chuan ka pitei fapa Tlantean kan mutna tur pindan min kawhhmuh a, Assam type in a ni a, khum pawh an ngah lutuk lo. Room-ah kan mu dawn tak naa chhuata kan mut a ngaih hmel a, ka hreh em em chuang lo. In kan sak lai khan chhuatah kan mu ṭhin a, ka mu tui thei ṭhin hle a nih kha! 

Dar 6 bawr velah ka pate chu an rawn thleng ve thei ta hram a, motor pawh a ṭha vek tawh a, tunah chuan rilru pawh a nuam deuh tawh e. Zanriah kan ei lai te chuan min be siam siam a, ka nu leh pa ngat phei chu an nui deuh reng a, kan hlim tlang hlawm khawp mai. Zanah chuan Current a rawn awm lo va, Current a awm lo e ti lo chuan ka pitei te in piah chiaha Field tê ah naupang an rawn chhuak sap sap a, Pawnto hla chi hrang hrang an rawn sa thliah thliah a, an chet dan vel chuan ka mit a tlai khawp mai. 

"Pang aw inzial inzial, pangpui pang aw pang par aw, pang aw inzial inzial" tih hlate chu an rawn sa chhuak a, kuta invuanin an inzial vel a, veranda aṭang ka lo thlir reng a, chung Pawnto hlate chu zirin hre mah ila kan naupan lai kha chuan kan ti ve ngai lo. 

"Siksi hling bawm bawm, a hnuaiah sanghar a awm, a chungah mupui a awm, kei ka hlau, ka tlan chhia, phir!" tih hla te chu an rawn sa chhuak leh dual dual a, an Pawnto hla chu Primary School kan kal laia kan zir hnu vek a ni hlawm a, an zingah va tel ve lo mah ila nuam ti tak ka ni. 

"Awi, kei chu ka va'n tel ve châk tak! Kan naupan laia kan zin khan saw ti ang sawn kan infiam ṭhin alawm, a nuam thei lutuk, mahse kan zin khât ta deuh a, tunah chuan hmâna ka infiampuiho te khan min hre tawh paw'n ka ring lo" u Vli chuan a rawn ti a, nui chung hian

"Kei chu an tih dan saw ka vawi khat hmuhna leh hriatna a nia, mahse a nawm hmel dam dam reuh ka ti" ka lo ti ve sep a, rei lovah u Duhawmi pawh kan bulah a rawn ṭhu chhuak a, thla lah chu a êng phian leh nghal. 

Zan kan mutna ah chuan kan unauin eng eng emaw ni kan sawi a, hmeichhe awm khawm tih takah kan ṭawng duh bawrh bawrh hlawm hle a, u Duhawmi pawh ni danga kulmuk thei em em ṭhin kha a zia a dang ta khawp. Sumo kan chuan laia a mut thu leh Sumo Driver pa khalha chuan a nawmzia te chu a rawn sawi chhuak a, ka ngaituahnaah chuan mi pakhat a rawn lut nghal chat. 

Kha Sumo Driver; a hming pawh ka hriat loh pa ngei kha ka mitthlaah a hmel a rawn lang nghal bawk a, pawisa min pek let chhan te kha ka hrethiam hlawl lo. Ka kut a rawn sik rual te khan ka danglam chiang alawm, ka mur zawk ni maiin ka hria. Kan kut a insik chhung kha chu a rei miah lo, mahse keimahah khan thil thleng a awm tlat a ni. 

Ka mak tih vang leh ka danglam avangin min hnung chhawn zawnga a kal te kha ka hre chhuak har a, hre chhuak har lo ila chuan Sumo chhunga a luh hma khan ka nang hman hrim hrim, ka awm dan kha a mak thlawt a ni. Khati ang khan ka la awm ngai lo, sir Francis-a nen pawh kan kut te chu a insi ve tawh ngei a, Sumo Driver pa nena kut ka insik dan nen erawh inang lo tak a ni. 

A tukah chuan kan chhungkua bikin thawh kan hai deuh vek a, kan thawh chuan chaw ei kan hnaih ṭep tawh zawk a, kei tak phei chu ka rawl deuh ṭhûm mai. Kawng a ṭha vak bawk si lo va, insawh deuh lâwp lawp ngaih chang te kha a awm a, chung chu ka rawl chhan niin ka hria. Ka pa hnenah chuan pawisa chu ka pe let a, Sumo Driver pa'n a lak duh loh thu ka sawi chuan mak a tih hmel hle a, tukṭhuan ei laiin a rawn sawi chhuak nghe nghe bawk. Ka pitei chuan nui var var chung hian

"Mazara te chu a fel teh asin, thil kan thawn te hian thawn man min laksak duh ngai hleinem, mahse tun hnai hian a Sumo khalh neitu te'n thil thawn man la tawh tura an tih thawm te a awm deuh a, lak zeuh zeuh a ching a, lak erawh a la ṭha duh lo khawp mai" a ti a, ka putea chuan a lo tui hnih zeuh bawk. 

"Mazara in tih chu hmuh ngei ka duh e, tlangval fel tak a nih hmel chu a, nge a tlangval chiah tawh lo" ka pa chuan a rawn ti ve a, dik tak chuan a hming chu a ṭhing ka ti, thingtlang ka hmuhsit vang pawh ni lovin a thingtlang hming ka ti hle a ni.

"Mazara chu tlangval a la ni e, a pian te khu a ṭha ang reng asin, Aizawl tlangval tam tak khuan an tiat ka ring miah lo. A nu nen chauh an khawsa a, a Sumo khalh hi an inchawmna a ni deuh ber mai" ka putea zawk chuan a rawn ti a, a taksa len thu chu kei ngei paw'n ka hre chiang, ka chhip pawh awlsam têin a hmuh theih kha maw le. 

"Khawi vengah nge an awm reng reng a? Numami pawh a tlan chhuah hmain i pe hman awm reng si a, ba neih ka duh reng reng hleinem" ka pa chuan min rawn mawhpuh ta ringawt, kan awm dan ang khan ka ute awm ve se chu an pek hman bik ka ring lo. 

"A ngawi reng bawk si a, ka biak paw'n min chhang eih lo va, ka pek let hmain a tlan chhuak daih a nih khâ" ka ti nang nang a, Tlantea chu a lo khi deuh suk a, ka pitei leh ka putea pawh an lo ṭhen deuh ṭhaw mai. 

"Amah kha a ṭawngmawh chi a ni maithei, kan chuan ho lai pawh khan ka be ve ṭhin tak na a, min chhang sei lo thei lutuk, a motor khalha chuan kha a la nuam phian zui, ka muhil daih alawm" u Duhawmin a rawn ti a, pitei paw'n

"Aw ni tak e, Mazara khu chu a ṭawng tlem chi hi a nia, mahse a mizia erawh a ṭha hle thung. Lo te, huan te, nul te a nei thluah a, Sumo khalh pahin a enkawl zo vek asin, tlangval fel tak chu a ni" a rawn tih zawm ve leh nghal a, chutah ka pa chuan

"Khawiah chuan maw an awm a?" a lo ti a, chaw chu a bar zawm zat a, pitei chuan Venglaia an awm thu a sawi a, ka chaw ei tuina a tawp deuh thut avangin ka kham ta daih a, Tlante pawh a rawn kham ve thuai bawk.

"U Mazara te chu a ṭawngmaw lutuk, mahse a thinrim a hlauhawm" kut kan hruk laiin Tlantea chuan nui vur vur hian a rawn ti a, za lo zet hian ka lo nui ringawt a, a ṭawngmawh a ni chêk ang an sawi ṭawng duh lo hlawm êm mai. 

Chaw kan ei kham kim hnu rei lovah ka pa chuan Venglai lama kal puiah min sawm deuh tlat a, khua a lum ang reng bawk si a, chhun chhuna chhuah vah chu ka peih vak lo a ni. Peih lo mah ila min sawmtu chu ka pa a ni miau a, ka kal pui ta tho. Tlantea chu a rawn kal ve bawk a, a ṭawng duh ang reng phian a, ni khat pawh la ral lo mah se ka nel ru em em tawh a ni. Unaupa ang maia en deuh tlatna ka nei a, chuti anga en tur chu ka ni hrim hrim tak e! 

In pakhat; a chung rangva, Silpaulin rawng pawla khuh leh a bang thing awmna zawnah chuan kan ding a, thingzai ni awm tak hi inbulah chuan a lo awm bawk a, chu in chu Sumo Driver ṭawngmawh Mazara tia ka pitei te'n an sawi pa awmna a nih ngei ka ring thiam ve nghal mai bawk. In chhung kan luh chuan tlangnel takin Tlantea chu a ṭawng a, nu pakhat hian hawihhawm zet hian min lo bia a, a hmel aṭang chuan ka nu aiin a upat ka ring. Ka pa chuan thu pehhel lovin a sawi tlang nghal tawp a, pawisa chu a pe bawk a, mak a tih hmel hle leh nghal. 

"Amah lah chuan engmah a sawi bawk si lo va, lak tur nge lak loh tur pawh ka hrethiam lo" chu nu chuan a lo ti ringawt a, a kutah pawisa chu a awm tawh ngei a, mahse a rilru a la khingbai hmel ang reng hle. 

"Khawiah nge u Mazara chu a awm reng reng a nu Biak? Pu Sangtea hian ba neih a duh lo bawk si a, a thu hrimah u Mazarah pawh chuan man a ni a, lo lak ve mai tur a nia" Tlantea chuan a ti a, tukverh bulah a ding a, thlang lam chu a hawi thla zawm zat bawk. 

"Khawiah tak nge a kal pawh ka hre lo, a chhuah lawk tur thu kha chu a sawi ngei a, vawiin chu Service lo turin ka nawr lui a, a lo haw ṭep ka ring. E..saw, a lo haw alawm" nu Biaki hawina lam chu kan hawi phei a, Sumo Driver nen chuan kan inen chiang leh tawh khawp. 

"Mazar, chuan man i lo la duh lo em ni? Hei Tlantea hmel hriatte hi an rawn leng lut nawlh a, a enga mah lah chu ka hrethiam ve der si lo" nu Biaki chuan a lo ti nghal zung zung a, kan hmaa mipa lian ve tawk tak chuan ka pa zawk chu a en a, ṭawng erawh a ṭawng chuang lo. 

"Ka fanu hian a lo sawi a, lak duh loh chi pawh a ni hleinem le. I nu hnenah hian ka pe tawh a, Tlantea te lamin i chanchin tlem tlem chu min hrilh tawh bawk a, an sawi ang chu i nih hmel khawp hi!" ka pa chuan a ti a, kan hmaa mi chu a rawn ṭawng chhuak ve ta.

"Puih in ngai a, ka pui mai chauh che u a ni" a rawn ti sup a, a dinna aṭanga pen sawnin hreipui hi a va la chhuak a, ngawi rengin pawnah a chhuak zui nghal bawk a, a chet dan vel chu hawihhawm lo ka ti viau dawn a, tun ṭum chu ka ti miah lo.

In chhung aṭanga kan chhuah chuan thing a lo ek phel phawk phawk a, a kut thlak natzia chu pui tak a ni. A thawm te chu a ring hle a, ka pa pawh lungawi lo hmel a pu lo hrim hrim. Motor-a lut ta mai lo chuan Sumo Driver pa thing ek lai chu kan thlir deuh ṭhap a, ani chu min hmu ang paw'n a awm lo. A chet chetin a che tawp a, Tlantea chu a bulah a va ding a, mi ṭawngmawh tak chu a ni ve chiang alawm, ka pa lah chuan a che vel chu hmuhnawm a la tih hmel em em zui.

"I hnehsawh kher mai a, Mazara maw i hming ni khâ, ka fate him taka i hruai thlen avangin i chungah ka lawm nawn ni rawh se" ka pa chuan a ti ta nge nge a, Sumo Driver pa lam chu kan hnaih tial tial bawk. 

"Hnahkhar a nia, a phel duh hrim hrim alawm" che reng pah hian a rawn ti ve mai bawk a, chutia a thing ek lai kan thlir ṭhap lai chuan mi pakhat hi a rawn kal a, a rim aṭang chuan zu a in tih ka hre thei. 

"Eng vangin nge i chawlh ringawt a? Ka nu leh pate ka hrilh dawn, i chan a chhe khawp ang?" kan bula a din rualin a rawn ti pawr vak a, kan hma maia thing ek mial mial pa chu a melh ran a, a rui lutuk chu a tlu lo chauh zawk a ni. 

"Han haw rawh" kan Sumo Driver ṭawngmawha chuan a lam pawh hawi lo hian a lo ti daih a, zu rui pa chuan a thing eh laklawh laiin a va nam vak a, mahse amah zawk chu a tlu a, a thin a la rawn rim zual phah zui. 

"Kut min thlak vela maw!?" ti tuarin khawih leh a tum a, ani chuan lo khawih let pawh tum chuang lo hian a lo bum zeuh a, mahse chu zu rui pa chuan keimah zawk min rawn hnek fuh ta hlauh mai. 

"LALRUATPUI!" ti vin hrawkin Sumo Driver Mazara chuan zu rui pa chu a hnung lam aṭang a rawn man bet a,  a theh thal dâwrh zui nghal bawk a, ṭhu hniamin ka hmai chu a rawn en a, a kutin ka hmai a sik rual chuan ka mur leh nghal vek tawh. 

"I ṭha em?" min ngaihtuah hmel zet hian a rawn ti hniam ruih a, zu rui hnek a nih vang nge ni nâ ka ti lutuk hran lo va, mahse ka hlauhthawn hrim hrim avangin ka tha chu a khur vek a, ka pa pawh lo ṭhu hniam thuaiin min ngaihtuah hmel khawp.

"Ka ṭha" ti tê chu ka sawi a, rum nghutin Mazara chu a tho vut a, leia let tual zu rui pa chu pawt thovin a pu lâwp a, ka pa min ngaihtuahna awkâ hre ṭha ṭhum lo khawpin zu rui pa kal sawn pui hmawk hmawk tu lam chu ka hawi a, ka biang chu a nat leh nat loh pawh ka hre tawh lo. 

"Numam" ka pa lam chu ka hawi chho vat a, za lo zetin ka nui lui sak a, ka ṭhat tawh thu sawiin lei aṭang chuan ka tho a, ani paw'n min lo pui vat a, Sumo Driver Mazara leh zu rui pa chu ka hmu tawh lo hrim hrim. 

Awm khawmuang tawh lovin ka pa chuan min haw pui ta vat a, Health Sub Centre lamah min kalpui nghal bawk a, mahse eng êm a thleng lo. Min rawn hnek kha chuan na ka hre ngei a, a na rei lo thung. Thil dang zawng aiin ka biang khawihtu Mazara chu ka mitthlaah a cham ta tlat mai a, ka biang a khawih laia ka mur nasatzia te ka ngaihtuah let phei chuan mak ka ti ngawih ngawih, kuta khawihna avangin chuti ang chuan ka la awm ngai lo, tu mipa paw'n min khawih se chuti ang chuan ka la mur ngai lo tlat a ni. 

Ka nu chuan min lo ngaihtuah hle a, chhuak tawh rih lo tur te'n min hrilh nghal ringawt a, hlauthawng tawh lo tura ka tih paw'n awmzia a awm lo. Ka pitei chuan min hnektu chu Sumo Driver Mazara Sumo khalh netute fapa a nih thu a sawi a, a rawn ngam par par kha ka ti reng a ni. 

Darkar tam pawh a liam hmain Mazara hmel chu ka hmu hlawl a, Veranda-a ka awm lai tak a ni a, ka mit taka en chung hian ka awmna lam chu a rawn pan phei zel a, a inthuamna pawh a ngai thlap. Kei lah chu zam namên loh hian ka zam a, ka tha a khur vel a, eng vanga zam tlat zel nge ka nih chu ka hre lo, a thu hrimah eng nge a rawn tih dawn reng reng le? 

(End of Chapter 3)