SUMO DRIVER By Havali Adam (CHAPTER 2)

SUMO DRIVER 

By

Havali Adam

Chapter 2

Ka thil khai lai chu a rit ka ti ru tawh lutuk a, a ṭawnna phelhin Mawitei chu ka inkhaipui tir ta ringawt a, mahse kha Sumo Driver hmel rorum leh hawihhawm lo zet pa hmuh phakah kan awm tawh lo thung. A hmel a rorum satliah pawh a ni lo, ka mitah chuan a sual hmel ngawih ngawih a ni. A upat hmel bawk si, khawthlang mite angin lukhum hma thlawk ka khum e te chu a ti ve khanlang a, inhmeh pawh a inhmeh lo, Sumo Driver ni ve si ṭawng duh lo lutuk mai. 

Ka hmingte kha a lam vel a, a aw te kha a mawi hlawl lo, a thum em em ringawt a, ngaihno beina leh aw dam thluam a nei lo hrim hrim. Ka mood zawng zawng a tichhe vek, Sumo Driver pa mai mai chu ka va han haw tak! An rawn thlen tirha ka lo ân khum hrep lo te kha ka inchhir hnuhawh, mahse a hun lai kha chuan ka lo khawngaih vel a, a buai hmel em avangin ka lo be buai duh lo vel a, chawp leh chilhin ṭawng châkna ka nei lo a nih kha! 

"I mak! Eng em em nge i lo ngaihtuah a? Ka be mawlh mawlh che tih pawh i hre miah na nge?" Mawitein a rawn tih chuan ka harh chhuak zawk a, ka ngaihtuahna ka lo kawm tui lutuk bawk nen ka ṭhiannu min biakna chu pakhat mah ka hre lo a ni.

"Awi eng maw i lo sawi?" ka tih chuan lungawi loh hmel zet hian min en a, kei erawh chu tlawn titih deuhin ka lo nui var var a, min nam dak deuh âwrh pah hian 

"Ka zawhna kha chhang hmasa phawt rawh, ka biakna che hre lo tur khawpin eng thil nge i lo ngaihtuah reng reng? Kan inṭhut hnaih tehreng nen, em em lutuk mai" Mawitei chu a la lungawi hlawl lo, Taxi Driver pawh chu a lo nui sun sun mai. 

"Eng lo, kha pa kha ka lo ngaihtuah zawm char char maw le. Kha Sumo Driver pa kha maw le, ngaihtuah zui loh theih pawh a ni lo" ka ti ta nge nge a, a hma ai zawnga mak tih hmel hian min en a, ka lo nuih leh ringawt.

"Engti zawngin maw?" a lo ti deuh hû a, ka sawi dan teh tawp chu hriatthiam a har deuh pawh a ni maithei.

"A hawihhawm loh êm kha, ka lu ah tak thil a la rawn titla zui, na lutuk ni lo mah se ṭha taka min biak ka lo ring a nia, mahse ṭawng thei lo ang maiin a awm deuh hmuk a nih kha!" ka tih chuan nasa fê hian

"Dik chiah, awi mawl ka va'n ti ngawih ngawih tak! Aizawl khawpui hi a vawi khat lo kalna a ni ang, a chezia reng reng kha a ṭhing em mai" a rawn ti hmawk hmawk a, kei ai aiin a thinrim leh tawhin ka hria. 

"A vawi khat lo kalna chu a nih ka ring chiah lo, Sumo Driver a nih ve ngei khâ, a rawn kal ngun viau zawk ang. A nungchang erawh hawihhawm lo chi a nih duh hmel, khati ang mipa kha chu ka hnaih peih chi an ni lo" ka lo ti ve leh luam a, Mawitei pawh a ngawi thei bik lo. 

"Chu Sumo Driver pa chu a hmel hmuh chhin a châkawm zawk alawm le, in chuan chhung zawngin in sawi char char a nia" kan in kawt kawngpuia kan din rualin Taxi driver chuan nui vur vur hian a rawn ti a, kan lo sawi tam hret a nih mahna.

"Awi hmu ve duh suh ka pu, inang lo tak in ni!" Mawitei chuan a lo ti leh hmuk a, chu veleh Taxi Driver chu ri meuh hian a rawn nui chhuak hawk hawk a, inan thu ah chuan Sumo driver leh kan chuanna Taxi driver chu inang lo tak an ni. 

"Kan lawm e; ning miah lova keini ṭhian dun ṭawng i lo ngaihthlak char char peih avangin" pawisa pek paha ka tih chuan Mawitei chu a nuih a lo za khawp a, ka ṭawng dan chu Taxi driver paw'n a lo hlimpui kher mai. 

Kan in kawt kawngpui aṭanga Taxi a tlan liam hnu chuan Mawitei chu haw tlang nghal mai a tum a, kei chuan ka lo phal teuh lo. Ban tha kham tawh nen mahni chauha khai luh chu ka tum hauh lo va, ani lah chuan min hnial ṭang ṭang a, tih tur a neih thute a sawi hnuhnawh leh vel a, ka awihsak duh der bawk si lo. Ka tih luih tlat avangin in chhung lamah min khai luh pui ta nge nge a, mahse a awm rei lo khawp. Kawngpui thleng ka thlah leh thlap a, kan inthlah lai te chuan a hlim leh hle tawh zawk. 

In chhunga lut mai lovin kawngpui chu ka kân a, kea kal theihna kawng tê reuh têah chuan ka ding a, ka dinna bula pangpar hnah khawih neuh neuh pahin thlang lama kawngpui chu ka hawi thla a, Motor an lo intlar ṭhap danah Traffic a jam leh tawh tih ka hrethiam mai. Boruak chu a nuam phian a, thawm erawh a bengchheng ang reng hle thung. Kan in lam pan ka tum tawh chu ka hawi let leh zawk a, HAUHNAR TRAVELS Sumo ngei chu ka zu hmu a, ka hmu sual lo e. Chu Sumo ka hmuh rual chuan thil ka hre chhuak a, eng vanga Sumo Driver pa hmel chu hmu châk tlat nge ka nih pawh ka hre lo. 

Chik zeta Driver seat lam ka en lai chuan a rawn hawi chho riai riai a, kan in awm hlat tehreng nen hnai taka inhmu ang maiin a hmel rorum leh mitmeng hriam hraih chu ka hmu chiang em em a, rei pawh ka lam hawi lovin hma lam a hawi leh daih a, kei erawh ka awm ngaiin ka lo la awm reng thung. 

Aikaih ang maiin ka ding ngawi reng a, an tlan liam hmaa a rawn hawi chho leh zeuh pawh chuan ka lo la en reng a, ka awm dan teh thut chu keimah ber chuan ka hrethiam lo a ni. Sumo tlan liam hnu chuan harh chhuakin ka chal chu ka beng thek thek a, in chhunga ka luh hnuah erawh ka pangngai ve thei ta hram. 

"Numam, kan room-a ka tarmit dah min va lak lawk ta che, hei lehkhathawn an rawn zep tel tlat mai" tui ka in khawlh khawlh laiin ka pa chuan a rawn ti a, tarmit laksak ai chuan ka mit a ṭha tho bawk nen chhiarsak chu a ṭhat ka ring zawk.

"Khawi ka lo chhiarsak ang che, ka pitei te khuaah hian Phone nei an awm miah lo em ni ka pa? Lehkhathawn ai chuan a awlsam zawk fê awm si a, pakhat tal chuan an neih ka va'n ring ê" ti nang nângin ka pa bulah chuan ka ṭhu a, lehkha chu ka laksak zui nghal bawk. 

"Nei chu an awm ve tawh ngei khâ, mahse an la tam lo khawp ang. An khuaa hausa ve ber te khan Landline Telephone te pawh an nei ve tawh nghe nghe asin, phone lam ai chuan lehkhaah khan eng nge in ziak min han hrilh teh" 

"Hman hun remchan vela zin turin thu a rawn ziak a nih hi ka pa, kei chu thingtlangah ka zin peih lo nghal aw" tih leh thawh ka rual a, ka pa chuan min pawt ṭhu leh nghal a, lehkha chu min lasak pahin

"Sawi chiang ve deuh ta che maw le, eng vangin nge zin tur chuan min lo chah reng reng? Chhan awm lovin min lo chah tawp nâng, Numami ṭhin hi âw, nula ve ûai tawh si" a tih chuan 

"Buh seng hun lai a ni a, thlai thar hun lai vel a ni bawk a, chuti ang chuan a ziak deuhin ka hria, ka hre chiang tawh bik lo" tiin ka kal sawn lui ta tho a, ka pa chuan u Duhawmi ei rawng bawl lai chu a ko phei a, kei erawh ka room-ah ka lut ta daih.

Zanriah kan ei laiin ka pa chuan thingtlang lama zin lam chu a rawn sawi a, kei tih loh mi dangho chu an phur hlawm hlawm em em leh nghal a, kum dangah pawh kan zin ngai tawp si lo, kumin ber khera zin an duh hlawm tlat chu ṭul lo ka ti kher mai. Ka pa chuan chawlh ka neih leh neih loh min zawt a, ka neih loh thuin ka lo chhang zaih a, dik tak chuan thingtlanga zin aiin ka ṭhiante nena bazar ka châk daih zawk a ni. 

Chawlh chu kan nei dawn ngei a, mahse kar hnih emaw kar khat vel chiah a ni thung. Exam kan zo deuh chiah bawk a, ka ṭhiante nena bazar ka lo tum rilru asin le. Ka nu leh pa chuan an sawi phur zual em em leh nghal a, an ṭawngkam aṭang chuan kan zin chho ngei dawn tih ka chiang khawp. Ka pitei te khua hi ka kal awm pawh ka la hre lo va, chhim lam hi chu ka zin ngai lo tluk a ni. 

Ka nu leh pa erawh hna thil avangin Lungleiah te, Serchhipah te, Hnahthialah te an zin ngun ang reng hle a, ka pitei khuaah pawh an peng kawi fô ṭhin bawk. Ka pitei te hi kan chhungte dik tak an ni lo va, ka pa chetsual laia lo puitu te an nih avangin kan inchhung khat en deuh tawp a, thisen zawm ang chiah hi kan ni mai. Aizawla an lo zin te hian kan inah an innghat ngei ngei zel a, innghah loh pawh tum se ka pa'n a phal ngai lo. 

Zanah chuan Westlife hla Tape-a zai tirin khumah ka bawk mu a, kan naupan lai thlalak te chu ka en kual vel mai mai a, thlalak kan lo ngah khawp mai. Kan naupan lai tak taka kan thla la ṭhintu ber pu Chuau lah kha Accident avangin a boral daih tawh leh nghal a, Album tam zawka mi chu ama lak vek a ni. Ka pate paw'n an ui ve khawp mai, a thih dan tak kha Accident ni mah se ka pa chuan rinhlelhawm a awm a ti a, Police lam a chhuitir nghe nghe a, mahse eng thil thar mah an hmu chhuak ta chuang lo. 

Thlalak ṭhenkhat chu Sunday School kan kal dawna kan lak a ni hlawm a, ka nu thu kan awih lai te chu ka hre chhuak rum rum bawk. Hmeichhe hlang kan ni a, kan unau thlalakah chuan kan chal sam a rual hmarh hlawm a, kan beng hnuai deuh chiahah kan sam a tawi deuh vek bawk a, chung zawng zawng chu tu dang ni lovin ka nu tih vek a ni. A chang hi chuan a ri hlawk hlawk ṭhin tak naa engkim chu kan ṭhatna tur vek zawka a tih a ni a, mahse kan unau khan kan ning thei tawp. Kan ṭhiante angin sam sei kan châk ve a, ka nu chuan kan naupan laiin sam sei a phal ṭhak lo. 

Ka lo muhil tlang a ni ngei ang ka harh chuan khua a lo eng kûarh tawh a, ka bulah Album a lo let phung hlawm bawk a, Tape pawh off loh tih hriat takin a lo la zai char char. Khum aṭanga thovin ka va off a, ka phone ka en chuan Mawitei hnen aṭang Missed Call a lo awm a, chu erawh zan lama mi daih tawh a ni thung. 

Ka tum aiin ka hmu hma bawk nen zing ka tho reng reng chu ka zâng vâh a, ka ute pahnih chu an la mu a nih ka ring, an thawm hriat tur pakhat mah a awm lo. Kan in kan sak ṭhat hma kha chuan unauin room khatah kan mu ho vek zel a, a hun lai kha chuan nuam ti ṭhin hle mah ila tunah ve thung chuan room hran ṭheuha mut chu nuam kan ti tawh zawk. 

Inpawh loh nân kan hman phah lo va, kan duh hûn hunah kan inriah chilh tawp zel a, insawiselna pawh kan nei ngai lo. Ka bula mut an peih lo ber zel a, a chhan pawh hla ka play reng ṭhin vang a ni. Dik tak chuan sap hla ka play uar lutuk chu an ning ṭhin, a bik takin Westlife ho ka play kher ṭhin bawk si, u Duhawmi phei chuan a hre hne ngawih ngawih tawh zawk. 

"Ve teh mial che chuan, i va tho hma ve Numam, i tho â a ni lo maw?" choka ka luh rualin khi sâng hian ka nu chuan a lo ti a, ka melh no lo teh e, mi mah tho nuam intih ve nak a lai a, ka mood a tichhe vek ṭep alawm le.

"Kha thingpui hi lo in ve nghal rawh, i pa pawh saw va ko tawh la a ṭha tak ang, a tih vak hi chuan amah ber hian a zo lo leh ṭhin" ti leh melh melhin ka nu chuan thingpui min thlit a, kan in kawtah ka pa chuan Exercise a la leh tawh a ni hrim hrim. 

"I la siam zo chuang lo, ka va ko nghal daih ang e" tih leh kawngkapui lam pan ka rual a, kan in kawtah ka pa chu Skipping Rope nen a lo la zuang tlauh tlauh a, min hnung chhawn avangin a lamah ka kal tih pawh a hre lo.

"Ka pa, ka nu'n lo lut tawh rawh a ti" ka tih chuan a rawn inher a, a hmai leh biang velah a thlan a tla hluam a, a kawr âwm pawh a huh deuh dup a, upat lam hnaih tawh mah se ka pa hi chuan hriselna hi a ngai pawimawh ve chiang a ni.

"I lo tho ve teh mial a" nui miah lo hian a rawn ti daih a, a hmelah chuan mak tihna a lang tam hle a, ka tho hma pawh chu eng nge mak an tih vak kher le, ninawm a! 

"Ka tho hma ziah tawh dawn" ti deuh hmukin in lam chu ka pansan ta daih a, a thu hrimah tun lai chu ka nu leh pa hian min duat lo riau mai, min duat theih turin engtin emaw ni tak awm ka ngai a ni. 

Tukṭhuan kan ei lai chuan thingtlang khaw lama zin bawk chu u Vli'n a rawn sawi chhuak leh a, chutah u Duhawmin a rawn la sawi zawm nghal zui. Ka nu leh pa chuan hun remchang hmasa bera zin chhoh chu an tiltu ta nge nge a, ka hun neih dan te min zawt a, kei paw'n ṭha takin kan exam chawlh chhung tur chu ka hrilh ve ta mai bawk. 

Nizan lamah te kha chuan chawlh kan neih loh thu hrilha ṭhiante nen bazar daih ka tum a, mahse ka chhungte tel lo chuan mahni chauhin inah ka awm ngam bik der si lo. Eng pawh ni se ka chhungte berin zin an duh vek si chuan ka zin ve a ngai a ni mai, mahse eng nge ka han tih ve ngawt ang? 

Chu bakah thingtlang khua chu a lum an ti zel a ni lo'm ni? U Vli lah chuan kan naupan lai a rawn sawi chhuak a, ka pa nen chauha ka pitei te khua an zin thu leh buh an phur thute chu tui takin a sawi mial mial a, a sawi dan kalhmangah chuan buh min phurh tir an tum chiang mai. Hmeichhia ka ni a, kan chhungkuaah ka naupang ber a, ka zin a nih paw'n buh chu ka phur kher lo vang. 

College ka thlen rualin Hlimpuii leh Mawitei chuan min lo kai hrang nghal a, Hlimpuii chu ni dang ang lo takin a za cheng mai, a chhan ka zawh chuan Bon Jovi-a piancham a nih thu a rawn sawi a nih chu! Mawitei paw'n a lu ah a nam sawk a, Hlimpuii lah chu a lo la nui ver ver zui. Kan section-a kan ṭhut hnuah pawh Hlimpuii chuan a mi ngaihsanpa chanchin chu a la sawi tawp thei lo va, a rukin a thlalak te a rawn keng nghe nghe a, keini pawh kan bang chuang lo, kan Note book kâwm chhung lamah chuan thlalak a khat ve nuai tho. 

Chhun chawlh hmain sir Francis-a a rawn lut a, rei pawh a awm lo. Kar leh chhung zawng exam chawlh kan neih dawn thu a rawn sawi zuai a, a chhuak leh daih. A awm chhung rei lo mah se a chhuah dawn chuan chiang takin min rawn en a, kei paw'n ka lo en chiang khawp mai. Ka bula mite pahnih lah chuan kan inen dan chu an lo hmu leh vek bik tawh a, dawra kan chawlhnaah te chuan phur takin an sawi chhunzawm a, sir Francis-a nen chuan inngaihzawntir min tum tlat vel a nih chu! Kei leh sir Francis-a chu kan inngaizawng awm lo chiang ê, duh pawh min duh lo vang, kei phei chuan duh enah ka en lo hrim hrim hi a ni tawp. 

Ni thum a ral chuan kar thar kan chuangkai a, ka pitei te khaw lama kan zin hun a ni der mai. Ka nu'n kar khat chhung chawlh a la a, ka pa paw'n a la bawk a, chuta kara lo kal duh loh ngawt chu a inthlahrunawm ve deuh a ni. U Vli leh u Duhawmi chu phur em em hian an insiam malh malh a, hnathawh kawr tur ang reng deuh an kawr hlui tawh lampang chu an khung mawlh mawlh bawk a, kei chuan ken tel ka tum der lo. Hnathawh ka tum lo ve tawp a, ka nu leh pa'n ka duh lo chung chu min thawh luih tir ka ring lo bawk.

"In mamawh tur awm ang kha in inkeng kim hlawm maw? Theihnghilh neih kha a buaithlak a nia, kan kalna tur a hla ve ang reng si" ka pa chuan a ti lawm lawm a, zin turin insiam ve teh mah ila ka va'n phur si lo êm.

"I sawi tâkah chuan thil ka hre chhuak zawk mai Paa, in thawmhnaw hak duh tawh loh ho kha rawn la chhuak vek teh u, thingtlang lamah chuan kawr hak tlak tak tak a la ni hlawm ang chû" ka nu chuan a ti a, ka ute pahnih chu an che chhuak nghal a, kei erawh ka nu'n min enpui thung. 

"Hei te hi a rei tawh, i ha duh paw'n ka hre tawh lo. Chu bakah i tawt tawh hrim hrim ka ring, i pitei te khuaa mite'n an la ha duh nasa khawp ang, ken chhohsak ang aw?" a tih chuan ka lo 'aw' mai a, ka nu kawr rawn lak chhuak ho chu ka hak tawh ngai loh vek an ni. 

"Peih loh hmel deuh khan awm suh Numam, i têt lai bak kha chu i pitei te khuaah i zin tawh hleinem, khang hun lai kha a hriat pawh i hre tawh kher dawn em ni?" ka thawmhnaw bawm hai paha a rawn tih chuan

"Ka hre tawh lo hrim hrim, ka la naupang hle a ni ang" ka lo ti ṭha ve mai a, engmah chu ka hre tawh lo tak tak, ka la zin miah lo emaw ka lo ti zawk a, ka naupan laiin ka lo zin ve ngei tawh a nih dawn hi! 

Ka nu chuan ka thawmhnaw bawm aṭang ka hak ngai tawh loh kawr leh kekawr 20 vel chu a thlang chhuak a, mi dang pek chu pawi ka ti hran lo. Kei ai aiin ka ute pahnih chuan an rawn la chhuak hnem a, eng eng emaw kan tih kawi leh hnu chuan dar 10 velah Aizawl khawpui chu kan chhuahsan ve thei ta chauh a ni. Ka pa chuan motor khalh pahin Serchhip lama kan kal dawn thu te a sawi a, kan khaw tlan pel te chu a sawi zel a, Thingsulthliah te, Darlawng te, Tlungvel tih vel chu ka vawi khat hmuhna leh hriatna vek an ni. 

Darkar 3 dâwn kan tlan hnu chuan Khumtung khuaah kan chawl a, ka pa chuan khaw awm dan leh khaw hming put chhan te, an eizawnna tlangpui te chu min hrilh a, ka pa thu sawi chu ni lo se chuan ka ning ngawt ang. Kan kalna tur tak pawh kan la thleng lo va, khua chu a lum nghal em em a, Khumtung khua mite thei lo zawrh chu ka lei ṭeuh nghe nghe. U Duhawmi chu ka pa nihna ang nih tum tih takah a hawi kûal a hawi kual a, Note book tê reuh têah thil a ziak neuh neuh bawk a, u Vli ve thung chu daihlimah a lo ṭhu daih a, kei pawh a awmna bulah ka va awm hahdam ve ta ringawt. 

Minute 30 vel Khumtunga kan chawlh hnu chuan Serchhip lam panin kan tlan chhuak leh a, Hlimpuii hnen aṭangin phone call ka dawng a, kan ina lo kal a tum thu leh a lo inkalh ṭhap thu a sawi chuan engmah ka hrilh lo tih ka hre chhuak ve chiah. Ka phur loh lutuk avangin phone pawh ka khawih ṭha peih lo kha a ni a, Mawitei tak ngial pawh thingtlang khaw pakhata kan zin tur thu chu ka hrilh lo a ni. 

Kan zin mek thu ka sawi chuan a lo hrethiam mai a, rei pawh kan inbe ta lo. Mawitei chu call-in kan zin daih thu chu ka hrilh hnuhnawh leh a, ani paw'n mak a lo tih hmel khawp. Dar 3 velah Serchhip chu kan thleng a, ka rin aiin a lo pui lo daih, mahse Aizawl khawpui nen ka tehkhin vang a ni pakhat. Dawrah chawl lehin kan inei puar zawk a, Khumtung ai thlawt chuan ka ei tui deuh bawk. 

Khumtunga kan chawlh lai kha chuan thil ei châkna ka nei lo hrim hrim a, ka ei tlêmin ka ei tui lo hle a nih kha! Serchhip kan chhuahsan lai chuan ka pa hla play sak puiin ka zai rât rat a, ka duh tih hriain ka pa chuan Sap hla hlui a play ve ngei a, ka bula ṭhute pahnih chuan an ning ru leh tawh ngawt ang ka ring. Serchhip aṭanga hla pawh a nih hmain kan motor ke chu a chhe ta hlauh mai, ka pa lah chuan motor ke Spare a lo la keng lo zui. 

"Engtin nge ni ang âw? Ka hmel hriat te kaltlangin min rawn pui thei tur zawng mai teh ang, kan thleng ve ṭep tawh asin le" tiin ka pa chuan phone hmangin a hmel hriatte chu a be zui nghal a, hmeichhe pali chuan tih tur kan lo hre lo khawp. 

"Enteh u Vl, saw ta motor lo tlan saw Sumo a ni êm?" ka kawhna lam chu u Vli chuan a hawi phei nghal a, ka hriat sual loh chuan Sumo ni ngeiin ka hria, a awmna a la hla ang reng a, ka hmu sual thei tho bawk. 

"A va nih duh hmel ve, lo phar tawp ila, motor ke spare pawh an lo nei maithei asin" a tih chuan tlêmin lung pawh a muang ta deuh a, puitu tur hmu zo lovin kan tang reng mai ang tih ka hlau a ni. 

Motor chu kan awmna lamah a rawn tlan hnai tial tial a, Sumo ngei a lo ni a, bungrua a phur nasa hle a, mihring chuang hmel pawh ka hmu lo. Sumo hmaah chuan HAUHNAR TRAVEL tih hi a lo inziak kuau a, hmuh tawhna nei thânin ka inhria a, mahse khawiah nge ka hmuh tih erawh ka hre thei rih mai lo. Kan bul hnai a rawn tan thlen rualin ka pa chuan a lo phar ding a, ka hmu sual lo ve, Sumo chhungah chuan Driver tih loh tûmah an lo chuang lo tak tak, a chungah bungrua a phur hnem hle thung. 

Ka pa chuan motor ke chhiat dan chu a hrilh zui nghal mawlh mawlh a, a phone biak lai pawh chu a ngaihsak tawh lo. A mi biak pa lah chu a ngawi reng a, lukhum hma thlawk hi a khum deuh kher leh nghal a, a awm dan leh a inthuam dan vel chu khawiah emaw ni tak chuan hmuh tawhna ka nei chiang alawm, ka hre chhuak lawk thei bawk si lo. 

Kan motor ke en dika a kun lai chuan ka pa bulah ka va ding a, Sumo Driver che vel chu ka lo en reng a, a che reng reng chuan ka mit a la tlat a nih chu! Hmanrua hmangin kan motor ke chu a herh ri nawk nawk a, ka pa erawh hmun dangah kalin phone a hmang leh daih tawh a, chutah ka hma maia kun ngawng ngâwng chunga che mial mial pa chuan

"A va buaithlak ve" ti hniam deuh supa ka dinna lam rawn hawi chhoh a rual a, a hmel ka hmu chiang chiah chu ka lo meng phawk hle a, ani pawh motor ke lam hawi tawh si kha a rawn hawi chho nawn leh ngat a, kei ang bawkin min hmuh a inbeisei bik vak lo a nih hmel. 

"Engmah ka hrethiam ve lo" min en reng lai chuan ka lo ti mawl tawp a, motor ke lam a bih leh ngur ngur hnu pawh chuan ka awm a dik thei ta tlat lo, Sumo Driver hawihhawm lo zet kha a nih tih hre chiang em em mah ila tunah tak chuan a puihna kan mamawh ber rih ang. 

"Ngawi teh tlangval, he Sumo chu kan kal tumna khaw lam a nih hi a" ka pa chuan a rawn ti chhuak hlawl a, ka nu paw'n kan kal tumna lam chu a rawn sawi zawm nghal a, Sumo Driver pa erawh a ngawi leh reng tawh. 

"Passenger i nei chuang bawk si lo va, ka fate pathum hi min lo phursak mai ta che tlangval, chuan man chu i duh dûh zat ka pe ang che. Tunah hian Serchhip lam ṭang motor ke siam tur an lo kal mek a, an siam ṭha dawn em tih pawh a hriat si loh" ka pa'n a tih leh chuan

"Lo chuang r'u" tih thu chiah hi a rawn chhak chhuak a, a hmelah lah chuan min phurh châkna pakhatmah a lang bawk si lo. 

(End of Chapter 2)