SUMO DRIVER By Havali Adam (CHAPTER 15)

SUMO DRIVER 

By 

Havali Adam

Chapter 15

Tlai lamah ruai kan ṭheh tawh avangin zanriah chu kan ei tawh lo va, inkhawm turin kan insiam sap sap a, tun ṭum zet chu ka chhungte tel lo paw'n ka va'n tlei si êm. Inkhawm tura kan kal laiin Tlantea chuan putea te nupa hriat tham si loh hian min rawn fiam zauh zauh a, ka beng bulah min hrilh ru su sû a, Mazara nen kan inkar a hre titih tawh bawk si a, ka lai thei tawp. A chang leh ka nam sawn dâwr ṭhin a, ka putea te chuan ngaih khatah min ngai mai a, kan thil sawi an hre ve lo tlat a tin ni! 

Venglai kan thleng thla a, chei mawi tih hriat taka biak in de sep sep chu ka en vawng vawng a, thingtlang khua angah chuan biak in mawi tak a ni. Aizawl lam nen chuan tehkhin chi ah pawh ka ngai lo, hmanrua a inawm ṭhat hleih bakah a inthlau em mai. Inkhawm tura kal chu kan tam ang reng a, naupang pawh an kat nûk a, nausen thlengin kan tam phian a, kal tlai hret ila chuan biak in chhungah kan ṭhu miah lo vang. Biak in chhungah ṭhutna kan chang chiah chiah a, a kawta ṭhu chu an tam khawp mai. 

Inkhawmna ah chuan Pastor-in thu a sawi a, a hmel chu ka en ṭha ngam leh tawh tlat lo. Khati ang khawpa chiang khan ka theihai vawm tlâk tum lai min hmu chiang a, engtin nge a hmel chu ka en ṭhat ngam reng reng ang ni! Thu erawh a sawi ṭha viau thung a, kum thar a nih tawh anga nun thar duhawm tak nei ṭheuh turin kohhran mipuite min chah a, a ṭawng rin dan te chu hriat a nuam tawk chiah a, a felfai hle bawk. 

Inkhawm ban hla kan sak lai chuan Mazara ka zu hmu hlawl a, kan hla sak lai pawh ka rilruah a awm thei tak tak leh ta lo. Tshirt nghawng nei rawng sen duk raih hi a ha a, a inhmeh leh pek hle. Mi dang mitah erawh engtin nge a lan ang ka hre lo, ka mitah chuan a ṭha vel vek a, eng thawmhnaw pawh inbel se a inhmeh ka ti ngawih ngawih zel. Kawr a hak loh paw'n a taksa mawzia ka hre leh tho va, Mazara ang em em ka thinlung luahtu mipa hi an la awm lo. 

Inkhawm kan bang a, mipui kan bit em avangin Mazara chu ka zawng buai duh lo ta law law a, mahse ka rilruah a châm reng thung. Kan veng lama kan haw chhoh lai chuan Tlantea chu a nghal leh hle a, min chhaih deuh reng a, chhan let dan tur ka hre der bawk si lo. 

A fâla biak chu a la ngai ngei ang, ka putea te leh ka chhungte lam a lo hrilh hman thawt thawt palh ang tih ka hlau a ni. Hre ta se engtin nge min ngaih ang le, ka chhungte ngat phei chuan min duhpui ka ring lo ve tawp. Ka inthlak dawn lai takin Tlantea chuan zai khawmnaa kal a rawn rawt a, ka phur teh chiam lo hle. 

Ka thawmhnaw chu ka thlak ta tho va, inkhawm thawmhnaw nen em ema kal chu ṭul ka ti lo a ni. In aṭanga kan chhuah hnu chuan Mazara nena kan inkar min zawt a, min zawh a châk hmel zawk zawk bawk a, min zawh loh chu ka ring lo hrim hrim. Chhanna mumal ka pe duh lo lui tlat a, mahse inngaizawng ang chiahin kan awm ṭan tih a hrethiam tho ang, mi â ni lo tlat. 

Zai khawmna inah chuan kan ṭhu lut a, ka rin aiin zai khawm an lo tam leh tawh. Lamna tur atana an zuah hmun zim tê ah chuan lam an awm nual a, ka hla hriat sa vek an sak avangin ka zai tui ve reuh hle a, Aizawlah chuan awm ila chuti angin ka zai hauh lo vang maw le. Dar 11 velah ka rualpui awm vel hmeichhiate'n thingpui an rawn sem díat diat a, zai erawh a la chawl chuang lo va, kum thar ruai nawn a nih dawn avangin an hlim hmel hlawm hle bawk. 

Dar 1 leh a chanve velah kan haw a, tlaivara zai khawm tur mah ni se ka tlin tawh thlâwt lo a ni. Ka meng hlei thei tawh lo va, kan haw lam chuan khaw vawtin min hmer a, a hma aiin ka harh deuh hlek a, in kan thleng chiah chu pindanah lutin ka mu zui nghal thlawp. Inthlak lova ka mut avangin ka muhil tak tak thei lo va, khuma aṭanga tho ṭuah ṭuahin ka inthlak leh ta nge nge a, Tlantea erawh a lo mutui tawh hle thung. 

Thawm ri neuh neuhah chuan ka harh a, khua a lo var vek tawh a, Tlantea pawh a lo tho diam tawh. Room aṭang chuan ka chhuak a, ka hmel a hmuh rualin pitei chuan ka thawh nawm leh nawm loh thu min lo zawt a, thingpui min siam zui nghal bawk. Chokaah chuan kan titi dun melh melh a, thingtlang mi niin lehkha zir sâng lo mah se ka sawi duh zawng mila mi titipui dan a thiam khawp mai. 

A la hma ang reng viau a, ka thiam ang ângin ei rawng chu ka bawlpui a, ka putea hmel erawh ka la hmu lo reng reng. In kawtah chuan thawm a rawn awm a, ka hawi phei rualin Tlantea tawlailir hmanga tui a rawn chawi haw chu ka hmu nghal a, ka inthlahrung deuh thut bawk. Tui chu chawi pui ka tum a, Tlantea chuan a lo phal tlât lo va, pitei paw'n a phal chuang lo. 

Anmahni zawkin an phal loh miau avangin pitei chu ei rawng ka bawlpui leh ta zawk a, pitei chuan tui kan neih loh thut thu chu a sawi zawm malh malh a, a sawi dan chuan Tlantea tui chawina chu a hla vak lo. Aizawl lam ka ngaihtuahnaah a rawn awm a, ka be khât viauin ka hria. A mak ka ti, an fanu hi puitling ang maiin ka tal hrang ve tawh chu a nia, kumin chu ka tan kum ṭha ni hram teh se. 

Ei rawng kan bawl peih fel hnu lawkah putea a rawn haw a, Tlantea hmel pawh rei lovah kan hmu zui leh zat a, tui chawi chu a ngai tawh rih lo bawk. Tui a vâng hran lo va, tui dah khawlna barel a phai deuh tawh avanga chawi mai chauh a ni. Ka putea chuan Tlantea chu biak in lamah sa lei turin a tir a, sa chek tih vel a ni nghe nghein ka hria. In aṭanga a chhuah dawn chuan min hui zeuh a, ka zui chhuak ve leh mai bawk.

"Lo kal ve la, u Mazara pawh a fatu asin" a tih chuan ka kal châk nghal ringawt a, Mazara che vel chu ka hmu châk deuh thut a ni ber a, mahse sa leina vela hmeichhia han kal ve ringawt chu a fuh chiah ang em ka hre lo. 

"Eng lo...hmeichhia an awm dawn em?" ka ti ta tawp a, hmeichhia awm ve tal se, kal pawh a inthlahrunawm loh deuh mahna, chu bakah sa chek tih vel chu ka la lei ngai lo hrim hrim a, a tui pawh ka ti lo.

"Hmeichhia chu an awm kher lo vang, u Mazara i hmuh duh ka ring mai mai maw le, ani paw'n a lo hmu châk ru reng maithei che a ni" nui zeuh paha a tih chuan ka lai ru ngei mai, ka lai lo der tawp ringawt. 

"A nih chuan kal ang, ei rawng kan bawl zo tawh tho, kan rei lo vang ti raw?" tiin a zâwnah chuan ka va ding a, rei kan awm a rin loh thu a lo sawi ve nghal mai bawk a, pitei te paw'n min hrethiam mai a ni ang chu! 

Biak in hnung chu kan zu thleng a, sa khawiha che vel chu an phu suau suau a, a ṭhenin ar an lo talh a, a ṭhein vawk an lo buaipui a, a tam zawk chuan lawi an lo buaipui bawrh bawrh bawk. Ka mi hmuh duh ber chu zawngin mit ka len a, mahse ka hmu mai lo. Pa pakhat hian min lo be teh hlawl a, a zawhna ang ang chu ka lo chhang ve zel a, Tlantea erawh sa sat ho bulah a phei daih tawh thung. 

Mazara hmuh tumin mit chu ka en kual leh den den a, a tawpa tawpah chuan ka hmu ve ta e. A bengah chuan zozial ngei mai hi a chep bet a, sa khawih tih hriat zetin a kutah thisen a kai deuh nuai bawk a, amah ngawr ngawrah chuan ka mit a fuh leh ta reng mai. A bula awm ve te pahnih chuan a che vel chu ṭawng pahin an thlir reng a, Mazara erawh ngawi rengin a che mial mial a, a chet chetin a che tawp a ni ber. 

A hmaa zawhna min zawt kual duahtu pa pakhat bawk chuan min rawn be leh a, ka hnaih chêtah a rawn ding leh ta nghal a, zep lovah chuan sa thâng rim a nam si, a ha a sen bawk si, min hnaih miah lo mah se pawi ka ti miah lo. A ṭawng mawlh mawlh a, a zawhna min zawh reng reng chu a hma angin ka chhang ṭha duh vak tawh lo, min zuam ringawt ang tih ka hlau a ni. A chet dan vel chu hawihhawm lo ka ti thar hle a, ka tawlh hla hret hret bawk.

"I hmelṭha hle mai, kan tlangval lai chu ni se vawi khat tal ka lenpui ang che maw le" zak miah lo hian a rawn ti a, a ṭawng zawi vak bawk si lo va, mi dang chu an lo nuih sup sup phah a, ka zak ru ngei mai. 

"Tunah pawh lenpui chu i la châk hmel chu a ni khâ, ṭan han la deuh la, a theih mai lo'ng maw" lawi ke vel sat ri pawp pawp tu chuan a rawn ti lawng lâwng a, Mazara awmna lam chu ka hawi phei thuai a, min lo en chiang teh e!

A sa sah lai chawl meuhin ka lam chu a rawn hawi a, muangchang hian a ding ûaih zawm zat bawk a, haw daih mai chu ka duh ta rum rum. A ṭhiante lam chu hawiin eng emaw ni hi a sawi zeuh a, ka awmna lama a lo phei lai chuan ka lo en reng a, a thinrim hmel deuhin ka hria. Ka bul a rawn thlen rualin ka ban rekah a chelh chat a, min kal sawn pui laiin pa pakhat hian

"Kha chu le! A va tha nât thlak ve pa Rosang, i biahthu di hlanna tur an kai hrang hmak a nia" a lo ti a, Mazara chuan ngawi rengin min kal sawn pui zel a, an thusawi chu engah mah a ngai ve miah lo a ni ang.

"Eng vangin nge i lo kal ve ringawt?" kan pahnih chauhin biak in bang phenah kan ding tawh a, a aw chu a nêm fahran lo hle a, a thinrim tak takah ka ngai hmiah tawh a, mahse eng nge thiam lohna ka neih?

"Tlantea sa ka rawn leipui alawm, a theih loh em ni?" pangngai deuha ṭawng chhuah ka tum ve a, ka aw erawh a pangngai chiah lo thung, a hmel hmuh ka châk avang kal ka nih thu chu sawi ka tum rih lo bur. 

"Lo kal tawh miah suh" ti supin ka kut a hmerna chu a thlah a, kan bul lawk barel têa mi tui chu a suak chhuak a, ka ban rék min chelhna avanga thisen kai chu a leih a, a kawr hak lai chuan a hru fai nghal bawk. 

"Engati nge ka lo kal chu i phal loh ringawt? Ka lo kal chhan dik tak pawh i hria em ni?" ka kut chu ka phih thla sawk a, a bulah hi chuan ka rilru a no hma em em a, ka thik thu pawh ka pe chhe thei hle a nih kha!

"Khati ang pathlawi mai maiin an biak che kha ka phal reng reng lo, ruai ṭheh zawhah lo leng chhuak miah lo bawk ang che" a tih chuan a thusawi hmasa zawk chauh lo chuan ka rilru a luah leh ta lo, mipa dang a thikna awkâ chu hriat a va'n nuam tak em.

"Eng nge kan tih dawn?" lai zeta nui sen sen chung chuan ka melh chhoh ral a, a hnar aṭang chuan a rawn thaw chhuak ham ham a, hawi kual zeuhin biak in bangah min nawr bet a, min tih balh a hlau a ni ngei ang a ban rêkin min nawr bet tlat thung. 

"A hunah i hre mai ang" ti hniam ruihin ka hmuiah a rawn fawp zeuh a, a rei loh tehreng nen min siam chawmawlh vek hman tho va, a hma ang bawkin kham lo zeta tui in ang chiah ka ni leh ta, zûn hi chu a va'n ngah chiang tak! 

"Ka lo kal chhan tak chu ka hmu châk che a, i che vel ka hmuh duh vang maw le" en chho kar pah chuan ka ti sep a, a kutzungpui bawkin ka hmui chu a tawk neuh neuh a, thawm dang a rawn awm tâkah chuan kan insiam ṭha rang dun hle. 

"Hetah in lo awm daih a ni maw? Ka hman e, in laklawh loh chuan kan haw dawn em ni ang?" Tlantea chuan a rawn ti lang lâng a, a ṭawng dan ber kher chuan min ti lai leh ta vek, kan thil tih a rawn hmu hman lo chu lawmawm tak a ni.

"Lo hruai tawh lo vang che" Mazara chuan melh run chung hian a ti deuh hmuk a, Tlantea ve thung chu haw lo zetin a lo khi var var a, Mazaran a kal pelh hnu thleng paw'n a ṭhen ṭhaw a, awm dan tur pawh min tithiam lo zo vek. 

"Nangni pahnih hi in thutak dun dawn riauin ka hria, u Mazara awm dan vel khan nuih a tiza ang reng, kei ber kher chu ṭawngkam vina min biak khât tehreng nen min hau ringawt leh nghal" a la nui sun sun a, za vak lovin ka nui ve ta ringawt. 

"Kal ang" tiin ka che chhuak hmasa zawk a, ani paw'n min lo zui ve mai a, ka hmui chu ka tawk leh zeuh ṭhin a, Mazara nena kan infawhna chu nilenga ka mood ṭhatna tham a tling chiang khawp mai, sawiselbo khawpin a mi fawhna kha dawnsawn a nuam tlat a tin ni! 

In kan thlen chuan kan sa hawn chu pitei'n a siam chawp leh a, putea'n a ei châk miau si a, nupa inlungrual tak hi chu an ni ve chiang a ni. Chaw chu kan ei har lutuk lo va, ka ei tui em em mai leh nghal. Pitei maian bai chu ka ei tui hle a, tu dang ni lovin ka thinlung luah rengtu Mazara ren run bawk ka hre chhuak leh ta. 

Chaw ei lai chuan ka nuih a rawn za deuh thut a, maian ka bai thiam loh lai ka ngaihtuah chhuah vang a ni pakhat. Chaw kan ei kham a, kan ei inna chu ka tifel zui nghal a, pitei leh putea erawh inkhawm an tum a, an insiam malh malh a, keini ṭhalai pahnih chuan inkhawm kan tum ta lo. 

Chhunah chuan eng vak mah ka ti lo va, in leh a chheh vel chu ka tifai a, ka nute nen rei lo tê kan inbe bawk. Kum thar boruak an hman nawm leh nawm loh thute ka zawt ve lûam a, kan inbiak lai hi chuan ka ngai ve tak tak ṭhin. Ka têt tê aṭang ka chhungte tel lovin ka zin ngai lo va, mahse tun ṭum chu a hiptu a nâ em a, chuti ni lo se chuan lunglen vangin ka ṭap ru kerh kerh tawh ngei ang. 

Ka ngaihtuah chian chuan keimaha Mazaran hmun a chan thuk tawhzia ka hre chhuak a, ka chhungte tel lova hun hman duh hial khawpin min siam thei a, ka tan hi chuan mi eng emaw tak a va'n ni chiang em, a pawimawh hle tawh bawk. Ka putea te nupa chu chhun lai hawl velah an lo haw a, inlêng an rawn hruai lut nual a, ka tih tur ka hai lo hle. 

Thingpui siamin kan inlêngte chu ka va pe dîat diat a, inkhawm thawmhnaw vek an la inbel a, an titi tui siam siam hlawm khawp. Tlantea erawh a awm reng emaw tih laiin a lo bo daih a, khawiah nge a kal ka hre lo. Ruai ṭheh hma hun a la tam thawkhat bawk a, tih tur a awm lutuk lo bawk nen leng bo rih mah se a pawi chuang lo. 

Kan inlêngte an haw hnu chuan bathroom-ah lutin ka inbual a, tuiah chuan ka inchiah rei khawp mai. A dai nuam ve êm bawk a, mahse awm reng erawh ka tum lo. Ka inbual zawh chuan ruai ṭhehnaa ka kawr hak tur ka ha zui nghal a, kekawrah Jeans dum ka ha a, pheikhawk var ka bun bawk a, Tshirt pawl ka ha leh tawp a, chung aia thawmhnaw mawi leh ṭha chu ka nei teh meuh mai a, mahse thingtlang a nih avangin mi nawlpui incheina mila inchei chu a finthlak zawk a ni. 

Dar 1 velah Tlantea chu a rawn haw a, a thlan a tla hluam leh nghal a, a inkhel a nih ka ring ringawt. Eng nge a tih zawh buai vel ka tum lo va, putea te paw'n an zawt bik chuang lo. Room-a ka awm laiin ka pa hnen aṭang phone call ka dawng a, ka hun hman dan vel sawiin kan inbe rei ang reng khawp. 

Min ngaihtuah thu chu sawi fak lo mah se a ṭawng danah min ngaihtuah tih ka hre thei thung a, mipa hi chuan chetzia hian an rilru puthmang an lantir ṭhin ni berin ka hria. Biak in dar a rik hnu rei lovah in aṭang chuan kan chhuak a, kum thar ni ang bawkin ruai ṭheh tur chu kan tam hle a, an nungchang leh an incheina vel chu khawpui angin changkang lo mah se an bula awm nuam ka ti tlat thung. 

Aizawl lama kan nun dan nen chuan a inthlau hle tih ka hria, mahse thingtlang nun chuan keimahah engtin emaw ni tak hian hna a thawk a, khawpui nun chu ngaia ka neih lutuk tawh vangte pawh a ni maithei, a chhan tak ka hre bik lo a ni. Ruai chu kan ṭheh ta ngei a, mahse Mazara chu a fatu daih a, a ruai ṭheh lai pawh ka hmu ve ta lo. 

Chaw leh sa chu amah ngeiin min rawn pe thlap vel a, ngawi ngul hian a sa ṭha lâi lai te chu changel hnahah a rawn bun ṭawk a, Tlantea chuan a lo hrethiam leh vek tawh. Kan inhmuh tirh phei chuan Mazara chu hawi sawn miah lo hian a awm reng a, ka mitah a en pawh a ni chuang lo, min en kual chhuak hmasa tê tê zawk maw le.

Ruai kan ṭheh zo va, min hrilh lawk tawh avangin ka thawmhnaw chu ka thlak lo va, khawiah emaw min lenpui a tum leh a nih ka ring ve hmiah. Ka putea te nupa chu leng chhuak thuai thuai se ka tih tehreng nen len chhuah an tum loh hmel nasa si, an awm laia Mazaran min hruai chhuak a nih chuan ngaih dan dang an pu nghal ngei ang. 

Tlantea ve thung chu a ṭhiante nen an leng chhuak leh daih tawh a, ani hi zawng harhvang ve tak chu a ni. Darkar 1 a liam a, ni chu a hniam tial tial a, êng erawh a la chhuah reng tho va, ni tlâk hun a la ni lo hrim hrim zawk a ni. Mazara chu a lo kal ngei ka ring a, pawna lo nghah êm chu mawi ka ti chiah lo va, putea te nupa chuan nghah ka nei tih an hre palh ang tih ka hlau a ni. 

Room-ah lutin tih vak tur chu ka hre lo hle a, ka hman khawp mai, ei rawng ni se bawl a ngai tawh bawk si lo. In kawta Bike rum ri dut dut thawm ka hriat rualin room aṭang chuan ka chhuak thuai a, ka beisei ruk ang chiahin Mazara ngei a lo ni e. 

Pitei zawk chu ka chhuah lawk dawn thu ka hrilh a, zawhna min zawh hmain ka kal vat vat a, pawn ka thlen rualin Mazara hmel ka hmu zui nghal a, ka nuih sen sen a, ani chu nui thei lo ang maiin a lo awm leh hmuk tawh. A bul ka thlen chuan min en chhuk run a, sawi duh nei teh pawh a ang alawm le. 

"Kan kal dawn chuan kal ila, kan awmna hi a langsar si" ka tih chuan a che sawn ve ta chauh a, ngawi reng bawk hian Bike-ah chuan a ṭhu ṭha a, kei pawh hrilh nawn ngai lovin a hnung lamah ka ṭhu chho ve nghal mai bawk. 

Veng tawp lamah ni lovin venglai lamah min phur thla a, khawiah nge min kalpui a tum ka hre miah lo. Venglai kan thlen chuan a tlan muang sawt a, dawra thil lei leh mi veivak te chuan min lo en duh hle a, ka zak ru leh ta viau. Khawpui mi ka nih avangin boruak ngam lutuk angah min ngai ang tih ka hlau a, chuti ang awm ringawt pawh chu ka duh lo a ni. Metal road loh china min tlanpui chuan ka bo zual a, in kan tlan pel zel bawk si a, khaw pawnah min kalpui dawn lo a ni ang. 

"Khawiah nge min hruai dawn?" ka tih chuan mi chhan tum lo tih hriat zet hian a ngawi reng a, ka zawt nawn ta lem hlei lo va, a ngawi thei leh lutuk hi chu engtin emaw tak tih a la ngai a ni. 

Muangchangin kan tlan zel a, an in kawtah tak chuan kan ding ta mai, ka va'n hrethiam lo lehzual tak em. Ka rilruah zawhna a rawn lang zut zut a, keimah leh keimah chu ka inchhang nawk nawk bawk a, ka bula mi lah chu a chet chetin a che mial mial bawk si. A chhuk hnu pawh chuan ka la ṭhu reng a, ka beisei loh deuhin min rawn pawm thla nawlh a, leia min nghah hnu thleng chuan ka la bo hle. 

"Eng nge in inah hian kan tih dawn Mazar?" a vawi hnihna atan zawhna chu ka zawt leh a, min chhan ve ngei tawh beisei zetin ka en chho ral a, min la chhang lo cheu a nih chuan ka lungawi lo ru tawh khawp ang. 

"Lut ang le" tih leh ka dar rawn chelh chu a rual a, min kalpui a tum lai chuan ka lo tawlh sawn deuh hmak a, ka zawhna a chhang ṭha duh miah lo chu ka lungawi lo ve tak tak ta, a em em tawh lutuk a ni. 

"Eng nge kan tih dawn sawi phawt rawh, i sawi hma chu luh ka tum lo. Zawhna ka zawt che a, bengngawng pawh i ni lo, chhan a harsa viau em ni?" tiin ka ṭawng ta ṭeuh a, mak tih hmel deuh hian min en zuah a, mahse a insiam ṭha leh nghal vat tho.

"Kan rei dawn lo, kan lut zuai ringawt dawn" ti supin ka darah chuan a rawn chelh leh a, a kal rualin min nawr kal ve nghal titih a, la lungawi famkim lo mah ila a mi tih ang âng chuan ka awm leh ta nge nge. 

In chhungah chuan kan pen lut a, a nu chu ṭhutthlengah a lo mu zâl a, keini pahnih min hmuh chuan a rawn ṭhu chhuak rang hle. Mazara nu hmel chu ka en chiang a, ka khawngaih ru tlat. A chhungte'n an ngaihven loh thu Mazara patea hnen aṭang ka lo hre tawh kher bawk si a, ka khawngaih thar thut a ni ber. A inchei dan vel te chu a khawngaih thlak hrim hrim, chu aia kawr hmuh nuam chu nei lo ang mai a ni. 

"Nangni pahnih teh hlawl chu, in lo inkawm ṭhin reng a ni maw? I hming kha eng nge ni khâ? Ka hmu tawh ngei che a, ka hre tawh ngei bawk che a, mahse i hming ka hre leh tawh miah lo" Mazara nu chuan a lo ti zung zung a, kei paw'n hawihhawm tak leh hriat nuam tak hian

"Numam tiin min ko mai rawh, ka hming dik tak erawh Hmingthanpuii a ni thung" ka lo ti ve mai a, ruai ka ṭheh leh ṭheh loh te min zawt zui lûam a, a zawhna chu ṭha takin ka chhang zel a, Mazara nu chu ka rin aiin a ṭawng duh daih. 

Mazaran a lo sawi lawk tawh ang tak takin rei kan awm lo va, kan inphur chhuah laiin an ṭhenawmte chuan min lo en duh khawp a, hmu lo der ṭhin mah ila nuam ka ti viau lo a ni. Kan veng lamah ni lovin vengthlang lamah kan tlan thla zel a, a khalh chak vak lo bawk a, Primary School te chu ka en thla diat diat a, a hmun hma vel chu a ṭha hlawm phian. Dawr zawn kan thlen chuan hmeichhe pakhat hian Mazara chu a rawn ko vak a, kan din phah nghe nghe. 

"Khawiah nge in kal dawn Mazar?" nui var var hian chu nu chuan a lo ti a, kan bulah a ding reng bawk a, a nui hmel phenah chuan thil dang awm tlata hriatna ka nei a, ka hmu sual ti dawn ila a awm dan chu ka hrethiam deuh reuh tho bawk si. 

"Kan han leng khawthawng lawk ang e" tiin pangngai zet hian Mazara chuan a chhang a, keimahah chuan thikna a rawn so bûlh bulh a, ka zawhna pawh chhang ṭha duh hlei lo khan chu nu chu a chhang ṭha hle si a, ka mood zawng zawng a chhe leh ta vek mai.

"A nih chû, engtikah nge i lakhuih huanah chuan min hruai dawn? Kan pahnih chauhin kal kan tum kha aw, i ṭhianpa Thansiama kha chu rawn kaltir ve miah suh" chu nu bawk chuan a rawn ti leh pang pang a, ka thik lutuk chu Mazara hnung ka sik vak ringawt. 

"Kan la kal turah ngai ang" ti supin Mazara chuan a chhang leh a, Bike chu herh rum ri khut khutin a tlan chhuak riai riai a, min ngaihsak lo lutuk chuan ka lâi a chhun tlat a, a bula awm rih loh chu a ṭha mai ang em tih te ka ngaihtuah ta rum rum. 

Hmeichhe dang biak chhang ṭha hle si kha kan pahniha kan awm hnu chuan a ngawi leh run ang lawi a, tun ṭum min len chhuahpui dan chu lung a dam hlawl lo a ni. In awm tawh lohna hmun kan thlen chuan kan ding a, rang zetin ka chhuk tharh a, ka rilruah lungawi lohna tih chauh lo chu a awm thei rih lo. Kha nu kha an ruai ṭheh puinu kha a ni chiang lutuk, eng thil chiah nge Mazara nen an inkarah awm ang? 

"Min khawih rih lo teh, ka lung a awi lo teh mai a nia" ka hnung lam aṭanga min rawn khawih rual chuan ka lo ti hlawk hlawk a, a ban phak lovah ka kal sawn zui nghal daih bawk a, lungawi lohna tham chu a ni ve chiang a ni.

"Eng thilah nge i lungawi loh?" a tih chuan ka melh hrawk a, min biak ve chhunah lah hian tawi tê tê in min be ziah a, mi dang a be sei thei tho bawk si. 

"I hre vek!" ti hmukin ka hawi sawn hmak a, kal sawn leh ka tum chuan ka banah a rawn chelh chat a, nâ zeta ka phih thlak rualin a aia nghetin a rawn vuan zui leh nghal bawk.

"Sawi la, i lungawi lohna ka hre lo" tur zet hian ka melh chho ral a, rei pawh en lovin thawk chu ka la ri hawk a, ka rilru chu a tawt em em leh ta zel a, sawi ṭan mai dan tur ka hre lawk lo nghe nghe. 

"Ka biak ve che chuan min chhang ṭha duh ngai lo va, hmeichhe dang lakah erawh ngainatawm takin i ṭawng leh lawi a, ka hrethiam lo che Mazar. Keini hi kan inngaizawng nge kan inkawm mai mai zawk?" ka ti ta thlawt a, ka ṭang lutuk chu ka sa pup pup thei hial.

"Min chhan duh loh ka ring sa reng a ni" a ngawih run avang chuan ka ti chhuak leh nghal a, kal sawn ka tum rualin a lamah min pawt hnai dâwr a, ka biang tawn tawn chu a kutin a khuap hneh hle. 

"Kan inngaihzawn leh zawn loh i hre duh maw?" ti thum chhal hian ka hmuiah a rawn fawp tawk a, tal sawn ka tum viau a, ani ang tha chak lutuk chelhna aṭang chuan tal chhuak thei lo chiang tak ka ni. 

"Ti khan a chiang viau lo em ni?" ti supin min fawh chu a rual leh nghal a, ka tum ni miah lovin ka hmui ka lo ti che zeuh a, chu veleh tih tur hai lo zet hian a rawn che chhuak nghal a, ka rilru leh taksa zawng zawng chu a thu hnuaia awm ang mai a nih leh ta. 

"Thikna awkâ erawh hriat a nuam" ka chal leh a chal insik tir pahin a rawn ti hniam ruih a, engati nge he pa bulah hian ka thinrim theih ngai loh ṭhin le, min fawh dan khan a ta ka nihzia min hrilh mawlh mawlh a nih ber kha! 

"Nang paw'n pathlawi i thik ve tho chu a nih khâ, min tiel vel thei i ni bik lo, kan inang reng" ka tih chuan a mit a chhing vang vang a, kan chal erawh a la insi reng a, kan inlen hleih bawk si a, a rawn kun hniam nasa ang reng. 

"I khabe phir hi i inhmeh ê" ka ti sep a, a khabe phir lai tak chu ka chul pah neuh neuh bawk a, a mitmeng mawi ka tihzia erawh ka sawi lang duh rih lo, dawt ka sawi emaw a ti palh ang.

"Vawiin chu ni dang ai mit lak sawn ka harsat khawp mai" a rawn ti ve teh mial a, a mitmeng mawi zet leh tak run chuan min en leh tawh a, ka hlim ru bawk si a, ka lai deuh tho bawk si a, a nuam reuh tawp.

A âwmah chuan min kuah bei hle hle a, vawiin tlai chu tlai dang aiin ka ngai deuh tlatin ka hria. Kan awm dun reng chung paw'n ngaih ruk dan riau ka nei a, chu erawh hrilh vek kher ka tum lo. Ka beng vun nêm lai chu nâ lo tê tê hian a nuai ne nê a, a chang leh ka biang chu a hmui lum thar thar chuan a rawn si leh zeuh ṭhin a, ka sawi chiam vang nge pawh ka hre lo a inthlahrung ve deuhin ka hria. Ka phone a rawn ri thut a, min lo call tu chu ka pa a ni a, ka la nghal mai bawk. 

"Khawiah nge i awm daih a Numam? Hei ka lo kal a nia, tu nen nge in chhuah dun?" ka pa aw ka hriat rualin Mazara taksa aṭang chuan ka tal chhuak nghal vat a, ka hlauthawng nghal em em a, Mazara chuan min lo en chik hle thung.

(End of Chapter 15)