SUMO DRIVER By Havali Adam (CHAPTER 14)

SUMO DRIVER

By

Havali Adam

Chapter 

Awm dan tur ber pawh hre lovin ka tei sêk a, kal lo kalpui kher kher chu ka va inchhir tak em. Kalpui lo ila chuan tuikhurah ka tla lo ang a, a âwm ka khawih kher lo bawk ang a, ka zak miah lo ni mai tur. Ka rilru chu a insual nawk nawk a, hnim keuin Mazar chet tlatna lam chu ka hawi phei dêk dek a, a taksa mawi zet vangin zahna tawk mah ila leh lam kawng zawng tak chuan nihlawh intihna ka nei deuh tho. 

Tuikhurah khan tla lo ila chuan min vin kher lo ang a, a âwm rinchhanin ka ṭap lo tawp ang a, min thlamuan miah lo bawk ang. Chu bakah kan infawp miah lo ang a, vawi hnih lai kan infawp chu a nih kha! Zep lovah chuan khati ang em ema thil dangdai leh nuam kha ka la tawng ngai lo, infawh nawmzia leh thluak chhung zawng zawng a fan kual hnehzia chu ka hre chiang ta hle a ni.

Ka taksa engkim thunun vek thei khawpin min fawp a, ka mumal loh phah vek a, ka thiam ang tâwka ka lo chhang ve tawn tawn te chu zahthlak ka va tihnuhnawh tak em. Engtin nge min ngaih tak ang? Ka veiin ka duh ru ngawih ngawih a ni tih a hrethiam tawh ngei ang a, mahse amah zawk a ni lo'm min fawp hnasatu? 

A awmzia chu ani pawh hian min lo duh ru ve reng tihna a ni mai lo maw? A dik ang, ani hian min duh ve chiang lutuk, a sawi ngai lo mai mai zawk a ni. Nui sen senin a kawr lian zet chu ka hnim vang vang a, tunah chuan Mazaran min duh ru ve reng tih ka hre tawh bawk a, ka zahna te chu a kiam tial tial zui nghal. 

Zahna ka nei tawh lo chu a ni miah lo va, mahse ka rilru chhungril chu hlimna chuan a chenchilh tam zawk tawh a ni. Vawiin zet zawng a chang leh ka zak a, a chang leh ka lai a, a chang leh ka ṭap hawm hawm ang lawi a, a tawpah ka hlim leh hle a, a mak nuai nuai khawp mai. 

Thawk la hmasa tê têin Mazara motor silna lamah chuan ka kal phei a, min hnung chhawn zawng hian a ding a, a hnung lam aṭang ringawt pawh a taksa lian leh mawi zet chu ka hai thei tawh lo vang, a chhan chu Mazara taksa kha a ni miau a, ani tluk mipa zun nghah ka la tawn loh bakah vei ka la nei ngai lo tlat a ni. 

Sir Francis-a nen khan inngaizawng ang deuh reuhin kan lo la awm reng ang tih te chu ka hlau kual leh vel a, lo la awm ila chuan engkim a buai a ni mai. Ka rilruah erawh zawhna pakhat a awm ngut ngut a, chu chu hma hun hre reng chunga min ngaihven zui zel thu a sawi kha a ni. Hma hun a tih kha eng a sawina nge ni ang le? 

Ani hian hma hun a hre lawk tak tak thei dawn em ni? Ni lo, dawithiam te a nih ngawt loh chuan hma a hre lawk thei tawp lo vang. Mihring ve tho a ni a, dawithiam a ni lo bawk a, a thusawi awmzia erawh ka zawh chhuah ngei a ṭul a ni. A thusawi khan thui tak a hríl tlata hriatna ka nei a, ka rilru a luah reng mai. 

"Tuikhur hnaih lamah khan han chho tawh suh, ka bulah hian rawn awm rawh" kalna ber tur pawh hre lova ka kal lai chuan a lo ti ram hmuk a, thinrim awkâa min biakna chhan chu ka hre lo chiang hle. 

"Ka dîp palh ang che" ka tih sep chuan ka lamah a rawn kal vut a, ka kut chu nghet deuhin a chelh a, a kut leh lamin motor bang a leih zeuh zeuh pah bawk a, kei ve thung chu ka lo awm tawp ringawt. 

"Ka sil zo chu a ni mai" aw dam zet hian a rawn ti leh ang lawi a, ka hawi chhoh rualin a khabe phir mawi zet chu ka hmu hmasa ber a, min lo en thut ka hlauh avangin a ṭhi awrhah chuan ka mit a fuh leh a, a bula awm chu hahdam thlak tak a ni. 

"Eng lo, i kawr hi ha leh tawh la" ka tih chuan ka ṭawng hre lo ang maiin a ngawi ngul a, ka be zui duh ta bik lo va, a kut lum vung vung chu ka kut leh lamin ka hum hnan a, ka duhzia chu hre vek mah se pawi tihna ka nei tawh lo a ni ber. 

A sil zawh rualin motor chhungah min ṭhut luh tir nghal a, a che vel reng reng chuan ka mit a tikham mawlh lo. Motor chhunga a lo ṭhut luh hmain a kawr ka hak chu ka phelh thuai thuai a, ka huh lutuk tawh loh avangin ka taksa thla leh ka Bra thla a hmuh theih tawh loh bawk. 

Rei lo tê hnuah a lo ṭhu lut ta ngei a, kawr chu ka lo pe nghal a, ani paw'n a lo ha ve mai a, inbe tam hran lo mah ila kan inkarah chuan inpawh rukna riau leh inhnaih rukna riau a awm tlat tawh a ni. 

Kan tlan chhuah dawn lai chuan tawlailirin naupang an rawn tlan sup sup a, changel hnah emaw ni hi an phur ṭeuh bawk a, chawhma lam khan Tlantean ruaiṭhehna tur hnah naupang hovin an lâk ṭhin thu min hrilh tawh a, hnah la an nih ka ring ta ringawt bawk. 

Muangchangin khaw chhung lamah chuan kan tlan a, pawn lam chu ka hawi char char a, ka hmui chu ka tawk zeuh a, ka nui leh sen sen a, mi â ka ang lek lek zawk awm le. Kan in kawt chu kan thleng a, a buaipui ngai lovin ka chhuk nghal mai a, in lam pana ka kal phei lai chu Tlantea chuan min lo en duh khawp. 

Min en duh pawh ni se ka thiam tho e, ka sam a la hnawng chap a, ka thawmhnaw lah a la ro kim bawk si lo a tin ni! In chhungah ka lut a, bathroom-ah inbual turin ka lut zui nghal a, dar 2 leh a chanve vela ruai ṭheh tur kan nih avangin inbual fai var chu ka duh tawh a ni. 

Ka inbual zo a, hak thlak ka ken luh sa vek bawk a, ka chhuah leh chuan inleng kan lo nei nual hman a, pawnah Mazaran Tlantea lu a mehsak mial mial bawk. 

Ka room-ah lutin Lotion chu ka inchulh a, ka taksa ka khawih lai te chuan Mazara taksa mawi tak ka hre chhuak a, dik tak chuan a âwm khauh ṭung te kha ka khawih leh chhin châk a ni. A insum theihna fiah lo tur te khan min ti a, kha thu pawh kha ka hrethiam lo tak e, eng a sawi tumna nge ni ang le?

Biak in dar a rawn ri bawl bawl a, ruai ṭheh turin ka insiam peih diam tawh a, Venglaia ruai ṭheh tur kan nih avangin ka pitei te nen chuan kan chhuk a, Tlantea pawh a lu meh chu a inhmeh phian. Mazara mehsak a ni a, ani pui roh hi thiam loh a neih awm pawh ka la hre lo reng reng. 

Eng pawh ti se a dik vei thlup roh leh nghal a, a ṭawngmawh tehreng nen hian ngainat a awlsam em em leh lawi a, a zuna uai a awl tel zel bawk tih chu keima'n ka hre chiang hle a ni. Keini chauh lo pawh kan bulah chuan kal an awm nual a, ka pitei te phei chu nu pakhat nen an titi thla bawrh bawrh nghe nghe a, kan ruai ṭheh dan tur chu a tir tê aṭang pawh a phurawm nghal viau dawnin ka hria. 

Venglai kan thlen thlak rualin Mazara ka zawng ru nghal deuh a, mahse mi kan tam ang reng a, ka hmu thei mai lo. Biak in Compound chhunga kan luh hnu rei lovah a hmel chu a ka hmu ta a, a bulah a nu a ding a, hmeichhe pakhat ka la hriat ngai loh a ding tel bawk.

Hmeichhe dang nen an ding dun ka hmu chiah chu engtin emaw ni hian ka awm a, ka taksa chhung lam chu a sa leh hât hat ṭhin a, chu hmeichhia chu ralkhat aṭangin ka thik a ni ber. Tlantea chuan min rawn kheuh zeuh a, pitei leh putea te kalna lamah chuan kan kal phei zui nghal bawk. 

Ṭhu tung ûtin ruai chu ka ṭheh a, ei tui viau dawn mah ila ka ei tui hlei thei tlat lo. Ka mitthlaah Mazara leh hmeichhe pakhat ding dun lai chu a awm reng a, chu thil chuan ka chaw ei a ti tui lo vek a ni. Hla vak lovah Mazara te pathum chu an ṭhu a, ka hmuh ngai loh nu ber chu a ṭawng siam siam a, hmel hlim sâng a pu bawk a, ka va'n thik tehreng em. 

Ka hma maia chaw ei ṭha mumal lo khawpa ka thlir lai tak chuan naupang kum 6 bawr vel hian Mazara chu a va bawh a, chu naupang chuan nel zet hian a be mawlh mawlh a, ka hmeichhe thik em em nu nen chuan an innel hmel hle leh ta nghal a, nupa an nih hial ka ring ta ringawt. Ka rilru chu hlauhthawnnain a khat a, Mazara chuan nupui leh fapa a lo nei reng tawh ni mai te'n ka ngai hman hial a, mahse ka ring phal tak tak bawk si lo.

"Kei chu ka puar tawh e pite, ka han haw chho nghal mai teh ang" tih leh din ka rual a, Tlantea ber chuan chik hmel deuh hian min lo en a, ka en rei duh lo, ka en reng a nih chuan ka hmel aṭang ka rilru a hre nghal a ni mai. 

"I va puar hma em em ve, zanriah a ni nghal dawn a nia Numam, chaw kan chhum ka ring tawh lo" ei mawlh mawlh pahin pitei chuan a lo ti thung a, mahse ei luih pawh tum mah ila ka ei tam thei tawh dawn chuang lo tih ka chiang a ni. 

"Chahbi kha pe mai la ka nu, a puar tawh tak tak a ni ang" Tlantea chuan a lo ti hlauh a, rawn ṭawng lo se chu sawi tur ka hre vak tawh lo, Tlantea sawi vang nge ni pitei chuan chahbi chu min ve nghal mai bawk.

Kan thil eina hmun aṭanga ka kal sawn dawn chuan Mazara te lam ka hawi phei leh hram a, naupang chu a lo barh vel mêk a, inngaihtuah lung puamin ka kal tau nghawng nghawng ta ringawt. In chhung ka luh rualin pindan lam ka pan chawt a, khumah chuan ka mu kawm ngût a, la inngaizawng chiah lo mah ila kei chuan kan inngaizawng tawh emaw ka lo ti hman a, mahse ka thil hmuh te chuan kan la inngaihzawn lohzia min hriattir thung a ni.

Khuma mu reng chung chuan ka ṭhiante nen kan inbia a, min ngaih thu an chhak chhuak deuh chhen a, kei erawh ka ṭawng tam lo hle. Dik tak chuan ka ngai ve miah lo, a chhan pawh Mazara vang a ni tih ka chiang. Kum thar ruai an ṭheh zawh tawh thu leh an len kual mêk thu chu an rawn sawi a, Aizawlah awm ila chuan ka leng ve ngei awm si a, ka awmna lamah erawh len chhuah pui tur ka nei dawn rih lo a ang. 

Rei lutuk inbe lovin kan inbiakna chu kan titawp a, ka mood fuh ni ber tura ka ngaihah chuan ka mood a fuh leh ta miah lo mai. Ka chhungte lo haw lai chuan ka mu meng kar a, an thawm hre vek mah ila ka chhuak peih ting tâng lo va, anni paw'n min rawn ngaihsak em em bik chuang lo. Thil chi hrang hrang ngaihtuah kualin rilru ka sêng a, ka mut chu a chhuak ru viau bawk. 

Ka nu hnen aṭang phone call ka dawng leh a, mut chhuah ruk nen peih deuhin ka chhang a, min ngaihtuahna ṭawngkam bak hriat tur a awm lo. Thawm awmah chuan ka harh hlawl a, ka bulah ka phone a lo let ran a, ka nu nena kan inbiak laiin ka muhil daih tih ka hre chhuak a, kan inbiak leh hunah engtin emaw tak min zilh ngei ka ring. 

Mit nuai nawk nawkin khum aṭang chuan ka chhuk a, khaw awm dan aṭang chuan a la tlai chhiat lutuk loh hmel. Bag ka hawn lai takin Tlantea a rawn lut a, ka phu ṭep nghe nghe. 

"Numam, u Mazaran pawnah a nghak che a nia" a tih chuan ka thil hai lai chu ka tawp hmak a, rei erawh a ni lo, ka chet zawm leh mial mial a, tlai lam a ni tawh avangin boruak a vawt chho ṭan a, kawr lum chu hak a hun viauin ka hria.

"U Mazara nen hian in inkarah eng emaw tak chu a awm chiang a ni" a rawn ti leh a, a hmel en miah lovin kawr lum chu ka inthawlh a, ṭawng thei lo ang maiin ka ngawi tlat a, Mazara chu ka hmu peih vel rih lo a ni ber. 

"Nang nu hi eng nge i hriat a? I dam lo em ni?" Tlantea awah chuan mak tihna leh min ngaihtuahna ri ka hre ṭan a, ka chhang duh chuang lo, room aṭang chuan ka chhuak a, tui chu ka in zui nghal khawlh khawlh bawk. 

"Ka ṭhiante nen kan leng lawk dawn a, ka pate pawh an leng daih a nia, inkhawm dawnah bak an rawn haw ka ring lo, u Mazara nen leng ve daih rawh u" tiin in aṭang chuan a chhuak a, tunah tak hi chuan Mazara nena awm dun pawh ka peih chiah em ka hre lo.

Kawngka chu a lo inhawng ri ṭhek a, ka hawi phei chiah chu Mazara nen kan inmelh chiang hle. Min en reng chung hian a rawn pen lut a, ka lam panin a rawn kal zel a, ka bul maia bathroom-ah chuan ka lut ta daih ringawt. Bathroom chhungah chuan ka ṭhu ngawi reng a, tih tur a va'n vâng duh tak. 

Inthiar ringawt dawn ila ka ek a chhuak der si lo va, inbual han tum ringawt ila ka inbual vek tawh bawk si. Thawk la halhin ka ding a, eng pawh ni se chhuak leh phawt mai ang. Kawngka ka hawn rualin Mazara chu ka zawng ru nghal a, min hnung chhawn zawng hian sitting room lamah a lo ding ngawi reng a, ka chhuak lai min hmu lo chu lawm tak ka ni. 

Hmanhmawh ru zetin room lamah chuan ka kal phei a, thawm pawh ka dim khawp mai. Kawngka hawnga ka lut tur chiah chu min rawn chelh hman ta, a va han pawi tak. A lam hawi zawnga min kawih her hnu chuan ka dar tawn tawnah a chelh a, min en chiang khawp mai. 

"Min pehhel tlata hriatna ka nei" ti supin min pawt hnai hret a, zep lovah chuan he pa hi chu a hmelṭha chiang alawm, nupui leh fapa a nei tawh erawh a pawi ka ti, ka tan chuan hnaih loh law law hi a fuh ber tawh a ni. 

"Mut ka duh a nia" tiin ka'n tal deuh dawn a, a hma aia nghetin ka dar chu a chelh a, kan indin hnaih ang reng bawk si a, ka chhungril chu a zam leh er er tawh, mipa ka hriat tawhah a huhâng a la nâ ber awm e. 

"I dam lo em ni?" hmel danglam a pu lo va, a aw pawh a danglam chuang lo va, a kut hrawl zet chuan ka biang leh ka chal chu a rawn tawk dên den a, a kut lum nawmzia chu ka hre thar leh ta. 

"I dam loh hmel si loh" ti leh supin ka beng vei lam chu a hmet ne nê a, nuam tih lutuk avangin ka mit ka chhing diar diar a, engtin em em hian nge a tih bik ṭhin ka hre lo, ka rilru leh taksa danglam theihna tur thil a hre lutuk chu a mak zawk.

"Ka bulah lo kal ta che?" a vawi hnihna atan a bula kal turin min sawm leh ta, engtin nge ka chhan tâk ang? Ka duh loh thu ka sawi tawp mai dawn em ni? Ni lo, a bula awm tluka châk ka nei lo, mahse eng emaw takin min dal tlata hriatna ka nei thung.

"Ka duh lo, i duh chuan i fapa leh i nupui i hruai thei reng alawm" ka tih chuan chal tichuar nâng hian min chhuk melh run a, ka thusawi awmzia chu a hriat chian awm tehreng nen hrethiam lo ang te'n a la meng leh ta nghal a!

"Eng thu maw i sawi kha!?" a tih chuan a kut chu ka dar aṭang nam thlak ka tum a, ka thei leh ta hauh lo mai, thu dik lo ka sawi pawh a ni tawp si lo va, min en dan chu a nelawm hlawl lo.

"Zep tum duh suh, ruai ṭheh lai khan ka hmu vek che u. In hlim tlân em khâ, anni bulah khan hun va hmang zawk daih rawh" ka ti ta duah a, ka ṭawng chhuah dan aṭang chuan ka lungawi lo hle tih a hrethiam ngei ang.

"Nang tê reuh hi!" tiin min kai dawr dâwr a, kawngkapui bula chahbi inkhai chu la zeuhin pawnah min chhuahpui a, kawngka chu amah bawkin a kalh ṭha leh nghal a, engtin nge pitei chahbi dahna leh zel chu a lo hriat reng reng ni!

"Thil ṭul lo ngaihtuah ṭhin suh" tih leh min pawm kân chu a rual titih a, Bike-ah chuan min ṭhut tir hnawk a, ani pawh a rawn ṭhu pangngai zui nghal bawk. 

Bike chu a tirum a, tlan chhuak nghal mai lovin min en miah lo hian ka kut chu a rawn la, a kawng min kuah tir lai chuan mak ka ti ru khawp mai. Kan tlan chhuak chiah chu a kawngah ka lo kuah lo vang tih ka hlau zawk, tlan chak tak a ni. Khaw chhunga kan tlan lai chuan min en duh tâwk an lo tam hle a, kan tlan pelh apiangte chuan min en zui vawng vawng zel a, ka zak ru ve reng. 

Khaw pâwn aṭang erawh a khalh muang ta deuh a, a khalh dam raih a, insawh leh hrehawm tihna pawh ka nei leh ta miah lo. Zawimuangin ka kut dinglam chu ka pawt tawl riai riai a, bike khalh reng pah chuan a rawn chelh chat a, a ngai te bawkin a kawng chu min kuah tir leh a, chumi hnu chuan lak sawn ka tum chhunzawm duh ta bik lo. 

Kan inbe lo leh ta char char a, a chang hi chuan ka hrethiam lo leh lek lek ṭhin. Amah ni lo se chu a bula awm ka peih miah lo vang, mahse amah a ni miau a, a bulah hi chuan ka lungawi lo rei thei tak tak lo a ni e. Kan awm dan chu ka ngaihtuah let a, ka ṭawngkam thlengin ka chhui kir a, ka lo rin dik loh nasatzia chu ka hre ve ta chiah.

A hma paw'n pitei khan chiang deuhin ka pa hnenah tlangval a nih thu a sawi tawh reng alawm, engati nge ka ngaihtuah tawi em em mai le, a bul ber chu a hnaiha hmeichhe awm kha ka thik êm a ni. Thik lo ila chuan nupui a neih tawh ka ring lo ang a, mipa naupang pawh kha a fapa a nih ka ring miah lo ang. 

Nui sen senin a hnungah chuan ka bei thlawp a, a kawng chu ka kuah nghet sawt bawk a, kawr chhanah pawh a taksa lumna chuan min la ur ham ham thei hialin ka hria. Minute tam kan tlan hnu chuan khaw pakhat kan tlan thleng nawlh a, chu chu eng khua a nih pawh ka hre lo. 

In pakhat zawnah hian kan ding a, Assam type in a nih rualin a ban leh a bang ṭhenkhat chu Cement a ni thung a, a bula in dingte nen chuan a inṭhat hleih hle. Chung khuaa mite chuan chuti teh vakin min ngaihsak lo a nih hmel a, min en zui vawng vawng pawh an awm ve lo. 

Bike aṭang chuan ka chhuk a, ka ke ka hlang thla tur chu a lo inbat tlat a, leiah a lu zawngin ka insawh chawrh dawn emaw ka tih laiin Mazara chuan min lo pawm chat a, a bula ka che thei lutuk leh ka ṭawng sual nasa thei lutuk hi chu insiam ṭhat vat ka ngai a ni. 

"Ehê....u Mazara a lo kal a nia ka nu, khaw'nge ka pa pawh kha a awm?" in chhung kan luh rualin hmeichhe pakhat hian a lo ti lâng lâng a, a chhuat nawh lai kalsanin kan lam chu a rawn pan a, kan inrual vel maithei a ni. 

"Lo ṭhu r'u, thingpui ka'n siam nghal ang che u. I ṭhiannu chu ka va hmu ngai lo ve u Mazar, khawi lam mi nge a nih reng reng a?" thingpui tur chhuan pah chuan a ti siam siam a, a bula awm a nawm hmel tawp.

"Aizawl lam" ka bula mi chuan a lo ti ve mai bawk a, kan hmaa hmeichhe ding chuan nui var var hian Mazara chu a melh a, a mit hmul a kân zeuh zeuh bawk a, a chhaih ni berin ka hria. 

"Khaw'nge an awm hlawm a?" Mazara chuan thu dang a sawi ta daih a, pindan aṭang ka nu ang rual vel nu pakhat hi a rawn chhuak a, Mazara hmel a hmu chiah chu ngainatawm zet hian a nui a, a ṭawng nghal siam siam bawk.

Ṭhutthlengah kan ṭhu a, rei lovah an fanu chuan thingpui a rawn chawi phei a, a nu bula ṭhu pahin Mazara te titina ah chuan a tel zui nghal a, kei erawh ka ngawi reng thung, sawi tur hre ve hek lo le. Kum thar lama lo neih dan tur vel leh huan siam dan tur vel an sawi a, nu pakhat chuan eng nge chin atana ṭha leh ṭha lo te a zawt a, a zawhna a chhang tih lovah chuan Mazara chu a ṭawng tlêm leh hle. 

An zawhna chiah chhangin a ṭawng zel a, zawhna zawt lo se chu a ṭawng kher lo maithei a ni. Chutia zawhna leh chhanna an inpek lai chuan pa pakhat hi a rawn lut a, Mazara hmel a hmuh rualin a nui huah huah a, hlim zet hian a ṭawng lûam bawk a, Mazara nen chuan an inchibai nghe nghe. 

Mazara chuan ka beng bulah a patea a nih thu min hrilh zeuh a, chu bak min be leh tawh lo hrim hrim. Lakhuih lam chanchin te an sawi kai a, thingtlang mite lo neih dan leh huan enkawl dan vel ka hre mumal bawk si lo va, ka tan chuan lo ngawih tawp chu a fuh ber a ni.

"I nula rawn hruai hi khawi lam mi nge? A va hmelṭha reuh ve, nang hian nupui neih lam i âwn ve ta deuh tihna em ni?" a patea chuan Mazara ni lovin keimah zawk min rawn en daih a, a la nui vur vur zui.

"Chuti ang lam pawh a ni chiah lo, Aizawl lam ni a nih hi" Mazara chuan a lo ti ve mai a, kan thingpui inna no chu an fanu chuan a rawn la, a che fel thlip thlep khawp mai, a chhuat nawh te chu fai tak a ni. 

"Nang pui hi nupui lam i thlan thiam dawn roh hi a, ngawi reng hian kan hriat lovin thil i lo thlentir nual ang e aw" a patea chu a nui leh ruh ruh a, nupui lam an sawi ri chhen bawk si a, ka lo lai ru ve em em ringawt. 

"U Biaki a dam ṭha maw? Ani saw a hriselna a pan ve ang reng si a, hna te kha a lo thawk leh vak vak ang e. Sipaia ṭan te hi han duh ve mai la, i nu saw chu a hahdam phah ang maw le" a patea nupui chuan a lo ti a, chutah a patea zawk chuan

"Khati ang zawng kha chuan sawi tawh lo la, sipaia a ṭang lo hi a ṭha daih zawk alawm, keini lahin kan ṭangkaipui si. Chu bakah u Biaki pawh a hah lutuk hleinem, fapa a nei ṭha vet vet em mai" a rawn tih zawm zat a, a nupui chu a lo chek tlâk tlak thung. 

"Ka hre tho alawm, mahse ka khawngaih leh thut ṭhin, a chhungte ve lah saw an sual chhungkua em em ringawt. Mahni fanute ngei ngei pawh rethei taka an awm laiin an chhawmdawl duh lo a nia, mi mak ve tak chu an ni" a nupui bawk chuan a lo ti leh a, Mazara chuan min dinpui pah hian

"Kan va haw ang e" ti supin a patea zawk chu a en a, a patea nupui thusawi avang chuan a thinrimah ngai dawn ila thinrim awmin a lang bawk si lo va, a chet dan teh thut chuan min tihamhaih lek lek chu a ni.

"Ni e, va haw rawh u. Khua hi a thim har a rinawm tawh loh em mai, mi rawn tlawh nachang i hre ṭhin a, nang zawng i fel ṭhin e" tiin a pate pawh chu a ding hluai a, in kawt thleng min lo thlah a, min biak tâkah chuan kei pawh ka ṭawng ve ta nge nge. 

Khua chu a hniam tial tial a, a hnungah chuan ka bei leh ta reng a, a kawngah ka kut pahnih a awm leh reng tawh bawk. Thil hriat chhuah thut neiin ka ṭhu ngil a, ka thawmhaw inbel chu ka en a, ṭhing ka va'n inti tak em. Kan chhuah dawn khan awm hmun kawr leh kawr lum ka ha mai a, Jeans erawh ka la ha thung. 

Khaw danga han lenpui em atan chuan ka inchei dan chu ho lam ka ti ru khawp mai, a ral vek tawh bawk si, Mazara bulah hi chuan ngaihtuahna fim put a har a ni. A hnunga ka bei leh hnu deuh lawkah kan ding a, eng nge kan tih dawn ka hre leh ta hauh lo mai. 

Bike aṭang chuan a chhuk hmasa zawkah a ṭang a, min en chuang lo hian min pawm thla leh a, kan awm dan chuan nawm rukna riau a nei. Bike nghengin a ding ngil chiah lo va, kan hma zawna ni tla mêk thlir thei turin ka hnung lam aṭang chuan min kuah run a, ka nghenchhan taksaah chuan ka leng halh halh hle a ni. 

A kut hlai leh hrawl ṭha zet chu ka dul zawnah a awm a, a chang leh a tuai neuh neuh ṭhin a, kawr lum ha lo ila chuan ka danglam leh vek tawh ang ka ring. Ni chu a tla hniam tial tial a, a mawi khawp mai. Chu kum thar ni chu dam chhunga hriat reng tlâk khawpin ka tan chuan a dangdai a, a nuam a, chuti anga awm dun reng chu ka châk ngawih ngawih bawk a ni. 

Rawn kun hniamin kawr khuh loh chin ka nghawng chu a rawn fawp zeuh a, ka nghawng chu ka lo chip rang khawp mai. A lam hawi zawngin min kuai her a, tak run hian min en a, rawn kun hniam lehin ka nghawngah bawk a rawn fawp leh a, a hmaa ka awm ang chiahin ka lo awm leh zawk a, min en dan chu ṭawng turin min ti ni berin ka hria.

"Eng lo...ka mur vek" ka ti ta tawp a, chu bak sawi tur ka hre lo, ka awm dan chu ka sawi lo a nih chuan a tan hriatthiam ngawt theih pawh a ni bik lo.

"A za viau em ni?" mit kô san âka a rawn tih chuan chiangnial lo zet hian

"Aih, teuh lo mai, a za lo. Eng lo...ka mur chhuak vek alawm, ka inhrethiam bik lo, ti tawh lo mai rawh" ka lo ti phelh deuh phawlh phawlh a, ngawi rengin ka hmuiah tak a rawn fawp leh ta chat mai, a nawm dan chu vanram fang ang vel ka ni.

Ka chawmawlh vek a, a hmui chu a thlum ni mai te'n ka hre hial maw le. Duhthaw lutuk tak mai hian min fawp ngawng ngawng a, ka engkim chu a thu neihna hnuaia awm vek ang mai a ni a, ka nghawngah ṭuanin a fawp leh a, tun ṭum erawh mur tho mah ila nuam tih avangin ka thle sawn thei tawh lo thung.

Ka nghawng chu ka chip tawh lo hrim hrim zawk a, nasa takin ka danglam a ni. Ka hmuiah insawn chho lehin min fawp leh vawng vawng a, a kâ chhungah chuan ka thaw lut ham ham hial a, min fawh zawnga a lei che vel te chu tenna pakhat mah ka nei lo, khawiah nge ka awm tih pawh hre mumal lo khawpin ka danglam tlat a tin ni!

Khaw thim chian dawn tak takah kan haw chauh a, kan inbe ngai mang lo a tih theih a, mahse nuam ka ti em em tho. Kan in kawtah ka chhuk a, ka chet sual leh palh ring zet hian min veng deuh a, mahse ka chesual tawh êm bik lo. In chhunga ka luh hnu lawkah a tlan chhuak thawm ka hria a, pindan lam panin ka tlan a, hlim lutuk avangin khumah chuan ka tal vak vak ringawt bawk.

(End of Chapter 14)