SUMO DRIVER By Havali Adam (CHAPTER 13)

SUMO DRIVER

By

Havali Adam

Chapter 13

"Heti zawk hian" a rawn ti thum hniam ruih a, a ṭawng zawnga a thaw rimtui tak rawn chhuak chu ka hip lut chiang hle a, ka Muffler awrh lai a siam ṭhat neuh neuh lai chuan ka meng leh ta tawp.

"Eng nge tih i tum?" ka aw ri chhuak reng reng chu a mumal thei tawh lo, ka Muffler awrh chelh chung hian min awm hnaih tial tial bawk si, ka zam dan chu pui tak a ni. 

"Ti vat rawh!" min fawp tur ang maia min rawn awm hnaih zel avang chuan ka lo ti ta thlawt a, nghet zetin ka maimitchhing zui nghal bawk. 

"Eng chu maw?" a rawn tih chuan rang zet hian ka meng chhuak a, a hma ai chuan min awm hlat deuh tawh a, mahse ka tha zawng zawng chu a la khur vek tho, mi uap hneh tak a ni. 

"Eng lo...thil...eng lo..min " ka tih bah nuai lai chuan min en run chung hian

"Eng thil?" a lo ti leh chat a, ka ngaihtuahnaa thil awm ang chu a lo ngaihtuah ve miah lo tih hre chhuak thutin a âwmah ka nam vak a, ka va han nam sawn chiang lo kher em. 

"Awm sawn thuai teh, tawlh phei rawh Mazar" a âwma nam ngar ngar chunga ka tih mawlh mawlh chuan mak a tih hmel hle ang lawi a, ka mumal lo lutuk chu a zahthlak zawk, ngaihtuah loh tawp tur ka lo ngaihtuah chu ka inchhir thar ngawih ngawih. 

"Min en reng suh" aw nêm lo zeta ka tih deuh hlar chuan a Dirver seat lamah a tawlh phei riai riai a, a ṭhut ṭhat hnu pawh chuan min lo en zeuh zeuh a, a lam chu ka hawi duh tawh lo hrim hrim, ka zak lutuk chu intih bo vang vang ka châk ngei mai.

"HMINGTHANPUI, mawli mawli, i mawl lutuk, i mawl luatah nangmah leh nangmah i intizak leh ta" 

"Hmingthanpuii chu em ni i hming pum?" Lalpa le! Ani hian ka ṭawng zawng zawng kha a lo hria tihna em ni? Ni lo, ka rilruin ka sawi a ni lo'm ni? Nge ka lo ṭawng chhuak palh zawk? Ni lo, ka ṭawng a ni ngei ngei ang. 

"Hmingthanpuii" hma lam en chung hian a rawn ti sup a, a lam hawi ka tum tawh loh tehreng nen ka hawi leh ta nge nge chu a nia, a lo ṭawng dan chu ka hming a hmusit deuh tlatin ka hria. 

"Ka hming a ni ve mai a, eng nge a pawi vak na!? Sawi nawn kher kha a ngai bawk lo, ngawi mai mai zawk rawh, i ngawih theih em kha!" lung ni lo fê chuan ka ti ta duah a, ka thusawi awih ang hrimin a ngawi zui ve mai bawk a, mahse ka lung chu a la awi lo tho. 

Thinrim ru ṭûnin ka Muffler awrh chu ka phelh sawk sawk a, awrh pawh ka awrh peih tawh lo. Min lo en leh zeuh zeuh ṭhin tih chu ka mit sirin ka hmu ru reng a, ka hawi buai vel peih lo a ni. Pawn lam chu ka hawi ta reng a, ka luhlul laklawh tawh avangin thlasik boruak vawt chu engah mah ka ngai lo lui hmiah hmiah a, Mazara lah chuan min rawn ngaihsak duh miah lo leh nghal. 

Ni e, dik tak chuan a ngaihtuah ka phut a, a ngaihven ka phut bawk a, hriat nuam zeta min biak te chu ka thlahlel ngawih ngawih a ni. A ni ve lêm ṭawng pawh a tum lo va, min fawp dawn emaw ka tih lahin min fawp lo leh daih a, ka zah phah em em a, ui ru em em em chungin a Muffler min pek pawh ka awrh duh tawh rih loh phah hial bawk. 

"Ding lawk teh ang" ti supin kawng sirah chuan motor a tiding a, khua chu a thim ṭan der tawh a, darkar eng emaw zah chu kan tlan tawh ngei a, mahse khawi laiah nge kan awm ka hre miah lo. 

Mazara chu chhuakin motor hnung kawngka a va hawng a, lungawi lo zeta ka vawm chhoh Muffler ngei mai chu a la a, kei chuan a chet dan ka lo en ngawt ngawt thung. Ka ṭhutna lama lo kal kualin motor kawngka chu a rawn hawng a, min pawh chhuah ang âng chuan ka awm tawp a, Glass a up mial mial lai te chuan hrilhhai deuh chungin ka lo ding mawl tawp a, ani hi chu hriatthiam har-a dik tak a ni. 

Min en chhuk run chungin Muffler chu min awrh tir a tum a, ka lo duh lo ngei a, mahse ka duh lo rei lo chiang hle. Pa in hneh zeta naute a man bet ang maiin ka kut pahnih chu a kut pakhat chauhin a man bet a, ka tal buai vel peih ting tâng ta lo. Ka ban a chelh lohna lam chuan Muffler chu min awrh ṭhat tir mial mial a, tur zetin ka melh chho ral a, min la en duh miah lo zui, ka lung a va han tiawi lo zual tak em.

"Phelh tawh miah suh" motor chhunga min ṭhut luh tir lai chuan a rawn ti thum leh dap a, ka ban a chelhna chu ka lo phih sawk a, kawngka kharin motor chu a kal hual a, a rawn ṭhut luh hnu chuan run luih ka châk leh ta tlat mai. 

"Phelh tawh suh!" Muffler phelh tuma ka chet rualin nêm fahran lo hian a rawn ti deuh hmuk a, ka nghawng lama ka lêk chhoh ûai tawh ka kut chu a man bet chat a, ka laka thu neitu ang maiin min thunun vel a tum a nih chu! 

"Motor hi tinung la, kal thuai teh ang, kan thleng tlai lutuk ang e" pangngai deuha ṭawng chhuah ka tum tehreng nen ka aw chu hriat a nuam lo ngawt ang, mahse a pawi lo, tunah rih hi chuan ṭha taka biak a phu bik lo. 

"Down suh" kan tlan chhuah hnu rei lovah a rawn ti ram leh hmuk a, engtin nge Glass down ka tum tih a lo hmuh hman reng reng, hma lam a en char char tho bawk si, a awm dan vel chuan ka lung tiawi lo tawh tak a ni. 

"Thu min pe kual reng suh, i thupek dawng turin  ka chuang lo a nia" ka ti ta salh salh a, ka thin tihrim phet chu a tum ni berin ka hria, Glass chu down pawh ka tum chhunzawm ta chuang lo va, ka melh rum em em ringawt. 

"A enga chu nge i thinrim chhan ber?" ṭawngkam vin taka ka biak laiin zaidam hmel fê hian min rawn be daih thung a, zaidam awm ang taka lan chu a inhmeh pawh ka ti lo, ni lo, inhmeh chu ka ti ngei alawm, mahse a hre tur a ni lo. 

"A tam mai" ka tih bak hlar chuan a lo thaw ri deuh hawk a, min ning ni mai hian ka hria, ka rilru lah chu a rawn no tial tial leh nghal a, ka duh loh dan deuhin ka awm ang tih ka hlau, a chi loh viau ang. 

"Kan chuan tirh te kha chuan i phur viau khan ka hre sia" a nui miah lo va, chuti anga thu mei nei deuh sawi chu a va han inhmeh ber kher em, a khirh dawn tih ka chiang, insum hman tawh lovin

"Phur e, kan chuang chho dun tur ringawt pawh hi phur tak ka ni, mahse tunah chuan nuam tihna pakhat mah ka nei tawh lo. Ka beisei loh dan vekin thil hi a thleng, ka ning" ka ti hmawk hmawk a, ka zep buai peih tawh lo a ni ber. 

Eng thu mah a sawi zawm lo va, ka sawi zawm lo bawk a, motor chhung chu a reh vawng vawng hle. Hla play chu ka tum deuh ûk a, mahse ka play leh ta lo. Ka phone phawrhin Mawitei chu biak ka tum a, Signal a lo la awm lo zui. Ka lungawi loh a kal tluang zel a, ka ṭhu tum deuh hmuk a, biak khat pawh ka hlawh leh ta miah lo chu nâ ka ti thar leh em em a, Mazara lakah chuan phut ka ngah lutuk pawh a ni maithei. 

Thil nghawr dawt avang chuan ka harh hlawl a, ka la harh chiang em em zui. Ka meng buai nak hman a, ka bul lawkah Mazara a awm tih hmu lo phei ila chuan ka hlauthawng hman ngawt ang ka ring. Ka meng reng tawh a, ka ṭhut dan erawh ka la tidanglam lo thung. Ka harh tih a hriat hlau zetin ka awm dan chu ka siam ṭha a, thil tiru te pawh ka ang zawk e a! 

Motor khalh reng pah chuan Steering hnuai chu a zen phei a, ka putea te ta ang chiah Radio a rawn la chhuak nawlh a, signal zawnna chu a pawt sâng a, eng eng emaw ni a herh zui mial mial bawk. Thil ri mur mur chu a reh thut a, music a rawn ri a, Bryan Adams hla 'I do it for you' ngei mai chu a rawn zai a, a mood-ah ka cheng veng veng mai. A thluk a mawi si, a satupa aw a nalh bawk si, Bryan Adams hi chu a zai thiam ve chiang a ni. 

Ka têt tê aṭang tawh hla ka ngaithla ṭhang ve a, hla hlui lampang pawh ka ngaithla nual ṭhin a, mahse Country Music lam hi chu ka ngaithla tui tak tak thei lo. A dang hi chu ka ngaithla thei deuh vek a, nalh tih tak tak pawh ka ngah mai. Kan zu hre pha ve tak tak tawh lo va, mahse a hun laia awm ve ang maiin ka inngai ṭhin, music hi chu ka tan chuan thil pawimawh tak pakhat a ni. 

"Mazar, ka zun a chhuak" ka ti sep a, a hre dawn lo emaw ka ti a, mahse a hria a ni ang a rawn hawi vut a, Radio Volume chu a herh hniam zawm zat bawk. 

"Tuikhur peng kan thleng ṭep, kan chawl dawn nia" a aw chu a hma ang ngawt chuan hriat nuam loh a ni tawh bik lo ve, a hma te kha chuan eng pawh sawi se ka huat tâwk a tling em em vek a nih kha! 

Inbe miah lovin kan awm leh ta char char a, kawng kawi kan tlan pel leh chiah chu kawng chhak lamah Truck bang sang an lo ding ṭhup a, tuikhur lian lutuk lo bulah chuan Vaiho an lo inbual nuai nuai bawk a, chu chu tuikhur peng a nih ngei ka ring. Tlêm kan tlan leh hret a, Truck hmaah chuan kan ding a, Vaiho ṭawng ri nuai nuai chu hriat loh theih pawh a ni lo. An nui nge an inhau tih pawh a hriat hran theih loh, ṭawng nasa tak an ni. 

Motor aṭang chuan kan chhuak a, la inbual ve lo ho Vai chu Mazaran a be zeuh a, engtin nge Vai ṭawng a thiam pawh ka hre lo, mak ka ti ngei mai. Vai ṭhenkhat chuan min en duh hle a, nuam lo ka ti ru viau bawk. ka rilru hria ni awm tak hian Mazara chuan min din hliah a, ka kutah chelhin hmun thim lam chu min pan phei pui a, zan a ni kher bawk nen ka hlau ru tlat. Ka kut a thlah rual chuan ka en chho vat a, ani chuan hmun dang a lo hawi daih thung. 

"Saw laiah sawn va zung rawh, hetah hian ka lo awm ang" a rawn ti ta mai, mi mah hlauh nak a lai a, mahni chauha zun chu ka tum der lo.

"Ka duh teuh lo mai, ka hlau a nia Mazar, a thim si" a kut chu ka chelh nghet zual sauh a, thim viau lo se chu a hmel ka hmu thei ngei ang, mahse min en tih erawh a hmai ruangam leh a chet dan aṭang ka hre thei.

"A hlauhawm loh, thlamuang deuhin va zung rawh" a kut ka vawnna pawh phelh pah hian a lo ti mai a, a kut chu rang zetin ka vuan leh nghal vat a, a pawh phelh theih mai maiin ka vuan tawh lo chiang khawp mai. 

"I mak em mai Mazar, hmeichhia ka nih hî, ka hlau tak tak alawm" ka tih leh chuan ngawi rengin min kal phei pui a, zung tura ka ṭhut hniam rualin ka hawi kual zawk zawk a, thawm ri neuh neuh a la awm zui. 

Ka zun chhung zawng chuan ka hnungah a lo ding ngawi reng a, tun dinhmunah chuan zak thei ka ni rih lo a ni. Ka zahna aiin ka hlauhna chuan min tuam nasa zawk miau a, engtin pawh min ngai dawn se zah lo chu ka tih ngei ngei a ngai tlat a ni. 

Ka zun zawh chuan ka insiam ṭha zung zung a, Mazara lam ka hawi chuan min lo hnung chhawn daih a, ani hi zawng engtin pawh awm se a bula ka awm phawt chuan thlamuan dan riau ka nei ṭhin. A kawr tlânga ka vawn rualin a rawn inher a, amah zawkin ka kut chu a rawn chelh zui nghal a, a kut lum nawmzia chu ka sawifiah thiam lo zawk. 

Thlasik lai ngat phei chuan muttui phahna tham a ni hial ang ka ring, chuti ang khawpa kut lum nuam chu a nei tih a inhriat loh hmel ropui bawk si. Sumo dinna lamah chuan min kai phei a, Vai Truck bang sang light chuan kawng ṭhenkhat chu a en êng rûl a, chiang lutuk lovin hmel pawh a inhmuh theih tawh nghe nghe. 

"Ka'n zung ve lawk ang e" tih leh ka kut chu thlah a rual a, kawng thlang lamah chuan a kal thla hret a, mipa hi chu an awlsam bik hliah hliah, êng awm tawh mah se an zung thei mai a, hmeichhe tan erawh a mawi ve der si lo.  

"I va'n zung ring em em" ngaihtuah chiang mang hlei lova ka tih chuan zung reng chung hian a rawn hawi let a, a lu tih chauh lo chu chet pawh a che sawn eih lo, ka thusawi âtthlakzia chu chawp leh chilhin ka hre chhuak leh nghal thuai bawk. 

"Eng lo, ka sawi tum pawh a ni chiah lo" ti nawk nawkin hmun dang chu ka hawi vat a, min en nge en lo ka hre tawh lo hrim hrim, ka kâ ka ven hman loh avangin ka zak leh ta, zak ngawih ngawih tlâk ka ni e. 

Ka kuta a rawn chelh rual chuan ka phu zawk a, Sumo dinna lamah min kal phei pui a, engtin mah min ṭawngkhum lo chu ka va'n lawm tehreng em. Sumo-a kan chuan luh hnu thlengin kan inbe lo va, tunah tak chuan pawi ka ti miah lo. Eng ang paw'n zung ri tur tur mah se engati nge ka lo ngaihven vak kher? Mipa a ni a, hmeichhia angin a ṭhut hniam a ngai ve lo bawk a, zung ri tur pawh a ni. 

Ka rilrua keimah leh keimah ka inhauh mawlh mawlh lai chuan a che hrut a, a ngaite bawkin Radio chu a zai tir leh a, chu tal chu thawm awm teh se, a reh vawng vawng em mai. Inbe miah lo chuan kan chuang dun zel a, muangchang hian Glass chu ka Down a, vawt viau mah se boruak hip chu nuam ka ti tho. 

Mazara chuan Motor chu a tiding leh ta thut a, tihdin chhan lah ka hre der lo. Ka lamah a rawn awn phei leh ta, min en lovin Glass chu a Up zui nghal sawk sawk a, eng vanga Glass chu up duh nge a nih reng reng? A chuanna lam pawh a ni tawp si lo. A biang, a hnar leh a hmui vel chu ka lo en reng a, a mitmeng mawlh chu a mawi a ni. Mizo mah ni se a mitmu chu a danglam bik tlat alawm, a pawl deuh tlatin ka hria.

"Down tawh suh ang che, hritlang i kai mai ang" a ṭhutna pangngaia a ṭhut phei rualin a rawn ti ram deuh hmuk a, min ngaihtuahna awkâ ka hre chiah chu ka hlim ru nghal vawng vawng a, ṭha taka sawi ve mai awm, ṭawngmawh leh lutuk mai.

Khaw chhunga kan tlan luh thlengin ka rilru chhungril chu a hlim a, lungawi lohna tih vel chu nei tawh lo tak ka ni. Pitei te chuan an in kawtah min lo hmuak deuh reuh a, min hmuh rualin Tlantea chu a lo nui var var a, min en dan chu a dik chiah paw'n ka hre lo. 

Mazara nen chuan min en tawn sek a, ani hian a lo hre ru reng ang tih chu a hlauhawm khawp. A hriat vaih chuan ka pitei te nupain an hria ang a, ka chhungte thlengin an hre nghal a ni mai. Mazara chu lo lut kawi zawkin thingpui a in ve teh mial a, engtin pawh awm se emaw engtin pawh ṭawng se ka mitah chuan a ṭha hliah hliah tawh a ni. 

A aw thum tak te chu mi dang aia a danglamna a ni a, a mitmeng thuk leh hriam raih te chuan zun a nei tlat alawm, chu zunah chuan ka uai mek chu a ni si a, a awihawm loh hial zawk a ni. Tlai lutuk lovah a haw a, a haw dawn te chuan tukverh aṭang ka bih thla leh hram a, tun lai chu ka dik lo, mi bik thlak ka hrat tlat.

Kum hlui thlah zan a nih avangin thawm chu a la tam ang reng hle a, naupang ṭhenkhat chu hal zit kengin an inum kawi a, a ṭhenin kan piah lawkah hal dawrawn an hal phuh cher cher bawk a, thingtlang nun nawm reuh zia chu ka sawifiah thiam lo. 

Mazara hun hman dan tur chu ka ngaituah neuh neuh a, kum hlui thlah zan te a ni a, dik tak chuan amah nena hun hman dun ka châk a ni. Hun chu kan hmang dun ṭeuh tawh ngei a, mahse kan hman dun dan a nuam famkim lo thung. Ka putea te nen chuan ar hem hmin kan ei a, Aizawla ka ei lêtin a tui. Ka ei ṭeuh nghe nghe a, ka puar ul mai. 

Thil kan ei zo chiah tihah Bomb a rawn puak dum a, mipui thawm an chhuah zui nghal bawk a, dar zat ka en chuan kum thar kan lo chuangkai der tawh. Kan vaiin pawnah kan chhuak a, kan ṭhenawmte pawh an lo chhuak sap sap a, kan za vai chuan kut kan beng ri dar dar bawk. Bomb chu a rawn puk leh dum a, a aia nasa in mipui chu an au a, kei pawh ka au ve nghe nghe.

"Kum thar ni takah heti ang hian kan khuaah chuan kan ti ziah ṭhin a, a nuam thei lutuk" tiin Tlantea chuan min rawn hrilh a, bu nghauh nghauhin a hma aia ring chuan ka au leh vak a, a va nuam chiang em, Aizawlah te chuan ka ti ve ngai hauh lo. 

Khawpui nula mah ni ila chhuata mut te chu nuam ka ti hle tawh zawk a, Tlantean a mutna khum min ken a tum paw'n ka hnial ve char char a, ani lah a mu duh bik bawk si lo, chhuatah kan pahnihin kan mu dun ta ringawt. Tlantea nen chuan eng eng emaw ni kan sawi ṭeuh a, sawi tur leh mi zawh tur a hre reuh bawk si a, titi pui nuam ka tih zawk tak.

Thil a chik peih hmel hle a, zir sâng lo mah se mi â tak a nih ka ring lo. Mazara nena kan inkar lam erawh min zawt miah lo va, ka lawm ru viau mai. Zingah chuan chiang lutuk tak maiin thawh kan hai ve ve a, inkhawm dawn ṭepah kan tho chauh a, zan lamah thil kan sawi rei thawkhat ve bawk a ni. 

Ka thawmhnaw mawi tih ber te zinga mi pakhat chu ka ha a, biak ina kan inkhawm chuan mipui pawh an tam ve hle, mahse Aizawl ang em em chuan an tam lo thung. Inkhawm ban thingpui hmehah zo chhang ban ngei chu kan ei fân duai duai a, ka ei ṭhang lutuk bawk si lo nen ka kutah a kai deuh nuai a, mahse chhang ban rim chu a tui ka ti tlat a, ka ei tui vang em em pawh a ni lo. 

Inah kan haw a, ka thawmhnaw chu ka thlak nghal a, awm hmun kawr nen ka awm deuh tawp a, fanghma tai chu pitei'n thak deuhin a siam a, ka va'n ei tui leh mai mai tak em. Thingpui kan in zo chiah e ti lo chuan ka ril a ṭam reng a, ka thil ei te lah chu a tui thei em em bawk si, chu thingtlang khaw lian lo ve tak chu Aizawl ai paw'n nuam ka ti tawh zawk hialin ka hria. 

Fanghma kan ei zawh chuan tui ka in nghal khawlh khawlh a, a thak lam hret chu a ni. Thli chu a thaw heuh heuh a, veranda-ah Tlantea nen kan ṭhu a, kan titi mai mai a, a ṭhianpa pakhat hi a awm ve bawk a, mahse chu pa chu Zualtea a ni lo. 

Zualtea sawi tâkah chuan inkhawm lai pawh khan ka hmu lo reng reng, a hmel hmuh leh ka duh vang a ni lo va, mak ka ti deuh mai chauh a ni. Hmawlh têin thil ka thai kual vel mai mai a, chutih lai tak chuan motor thawm ka hria a, a rik dan atang chuan Mazara a nih ka ring nghal bur. 

Motor lam chu ka hawi phei a, Mazara a lo ni tak tak a, inkhawm thawmhnaw ha tawh lovin kawr pangngai hi a ha a, inhmeh ka ti leh em em tho. Tlantea chuan a lo be lawng lawng a, Mazara erawh ngawi rengin kan awmna lamah a rawn phei a, ka bulah tak chuan a ṭhu a, nuam ka tih ruk rualin ka zak ve deuh, Tlantea te ṭhian dun awm lo se chu ka zak kher lo maithei a ni.

"Motor ka sil dawn a" tu nge a biak tih ngaihtuahin ka hawi kual a, Tlantea te a va bia ti dawn ila a ṭhianpa nen an titi tui bawk si, kei min bia ni se ka hming a lam ri leh chuang bawk si lo. 

"Ka bulah i lo kal duh em?" amah bawk chuan a rawn ti leh a, chiang deuha min en tâkah chuan keimah ngei min bia tih ka hrethiam ve ta chiah a, a zawhna chu chhan mai nachang pawh ka hre lo nghe nghe. 

"Ka hre lo" chhan dan tur hre lo zet hian ka ti sep a, chuti anga hnai chuan kan la ṭhu dun ngai lo va, a ruk tak chuan ka zam a ni.

"I duh leh duh loh a ni mai" tih leh thawh a rual a, bula kal chu ka châk reng alawm, mahse mi dang hmai ka zah deuh tlat a, kan awm dan vel chu hriatthiam a awlsam ropui bawk si, a bula kal chu a tih chi ber ang em ka hre lo. 

"I lo kal dawn em?" kal ta mai lo chuan a rawn ti leh sup a, ngampa lutuk lovin ka en chho zeuh a, ani chuan min lo en chhuk run thung a, Tlantea te ṭhian dun pawh an ngawi ta hmak mai, Mazara leh kei chu chu min en a ni ngei ang. 

"Ka hre lo tak tak alawm, chu bakah pitei leh putea pawh dil hmasak phawt a ngai ang" ka ti ta ringawt a, sawi tur chu ka va tlachham si êm, a bula kal loh mai ka tum thu ka sawi dawn lai takin Tlantea chuan

"Va kal rawh Numam, ka nu leh pa chu ka lo hrilh mai ang. U Mazar, i hman chuan ruaiṭheh hma ka lu min lo mehsak teh a, ka pa paw'n bakcheh a tat hriam vek tawh" a rawn ti zung zung a, ka bula mi chu a bu nghut a, a kut chu ka vawn turin a phar vel kher a nih chu! 

Zak ru deuh chungin ka ban a, a lo chelh chat a, ani chu zak ang paw'n a awm ve miah lo. Sumo dinna lama kan kal lai chuan in lam ka hawi phei leh a, Tlantea chuan min lo nuih var var a, ka va'n lai chhe tak êm. Mazara chet dan chu ka hrethiam bik lo, kawngka min hawn thlap vel a, a awm dan hrim hrim chuan ka mit a la a, a ṭawng leh tawh miah lo thung. 

A ṭawng tlêm lutuk hi chu ngaia ka neih a ngai a ni; a biak te hi phût phut lo ila a fin thlak zawk tak ang. Motor silna hmun kan thlen hma zawng chu kan inbe leh ta miah lo va, hla pawh kan play chuang lo va, kan ngawi dun reng ringawt. 

Minute 10 vel kan tlan hnu chuan tuikhur pakhat bulah Motor chu a tiding a, mi dang tumah an lo awm lo va, chawhnu lam a nih tawh avangin ruai ṭheh turin miho chu an insiam vel mek a nih ka ring. Motor a sil laiin tuikhur tlângah chuan ka lo ṭhu thung a, tui chu ka khawih zeuh zeuh a, a hmun a dai nuam ang reng bawk si a, a nuam ka tih chi tak a ni. 

"Fimkhur rawh, tuikhurah khan i tla palh ang e" Bucket tê hmanga tui thal chhuah pah hian a rawn ti hniam ruih a, in awm hnaihin a aw hre ṭhang hle lo ila chuan a thusawi chu ka hre lo maithei, a ṭawng ring hran lo tlat. 

"Silpui i mamawh lo turah ka ngai ve hmiah asin" ka tih chuan min chhang leh tawh lo va, Sumo lamah pheiin tui chuan a theh ṭhawt ṭhawt a, kan thlenna a la rei lo tehreng nen a sil fai chak ka ti ru ngei mai. 

A motor sil lai chu mit la lêk lovin ka en ngawih ngawih a, ama'n hre kher lo mah se ka lung hi chu a dum ve chiang alawm, a hmel pa hrâk te chu en reng mai ka duh. A taksa ni se a lian ṭha si, sipaiah te interview ve se chu a tling nghal ang ka ring. A ban bul leh a ban puam vel chu ka en leh a, a lenzia chu pui tak a ni. Sir Francis-a'n a kutthlak vawi khat pawh a dawl lo kha ka dem ta lo ve, a kutthlak a nâ thawkhat dawn tih ka chiang a ni. 

Chutia rilru chhungril hlim zeta Mazara che vel ka en ngawt ngawt lai chuan ka mawng chu a tawlh sawn thut a, a thal zawngin tuikhur chhung lamah chuan ka tla thla riai riai a, ka hlau lutuk chu ka au tuarh bawk. Tui chhungah chuan ka pil bâwrh a, tui râpna leh hlauhna chuan min tuam zui nghal a, tui ka hip luh sual lai takin tha chak zet hian tui aṭang chuan min lo pawt chhuak lâwp a, ka khuh nghal bawrh bawrh bawk. 

Hlauhthawn hmel fê hian Mazara chuan min en ran a, kei erawh a hmel pawh ka en ṭha thei lo. Ka khuh bawrh bawrh a, ka huh hnûang bawk a, hrehawm ti tak ka ni. Ka khuh chu a reh thei mai lo leh nghal a, nâ vak lo hian ka hnung chu a rawn chum det det a, ka thawk erawh a la pangngai thei chiah lo. Engtin nge khati teh thut khan ka tlak theih ka hre lo, a mak khawp mai. Vawi leh khatah ka mawng kha a tawlh thut a, ka invuan hman tawh lo a ni ber. 

"Ka sawi lâwk vek a ni lo'm ni? Fimkhur ta che, i thih ṭep kha i hria em?" ka khuh chhuak zualpui a reh hnu chuan a rawn ti vin hrawk a, aw vin taka a vawi khat min biakna a nih vang nge ni ka phu nasa hle. 

"Ṭha taka ka sawi hian awih mai ṭhin rawh, i tana ṭha tur bak ka sawi ngai lo" nem fahran lova a tih khauh leh hmuk rual chuan ka rilru no a rawn chhuak a, ka tawt pup pup a, ka mittui chu rei lovah a rawn tling khat nghal vek bawk. 

"Min en teh!" ka khabe chawi a tumna kut chu ka beng sawn sawk a, rilru nâ zetin ka kal pawk pawk a, mahse ka kal thui hman lo, ka bana rawn mani motor bangah chuan min nam chilh a, ka dara a chelh ngheh êm avangin ka tal chhuak leh thei ta lo. 

"Min thlah nghal rawh, i bulah hian ka kal tawh dawn lo, ka awm peih tawh lo bawk" ti hlawk hlawkin tal chhuah ka tum ngar ngar a, ka ṭah ṭawng zuah zuah a ni mah zawk.

"Lungawi lo ringawt lo la, ṭap ringawt bawk suh" a tih chuan ka thin a rim zual a, ka kut leh ka dar chelh tlat lo se chu ka beng chiang khawp ang. 

Ka tal leh rualin nghet zet hian min kuah thlawp a, a âwma ka bei chiah chu maw ka inhrethiam bik lo. Ka ṭap chhuak hawk hawk a, min vin vak kher lo se chu chuti em ema ka rilru a nât ka ring lo. Tuikhura tlak kha ka tum pawh a ni bik reng reng hleinem, tui ka hlauhzia a hre lo zawk a ni. Ka hnung a chul lai te chuan ka ṭap uar sauh a, tun ṭum chu ka rilru a nâ ve tak zet a ni. 

Ka ṭah chhuak zualpui chu a reh ta deuh a, ka la inhnit feih feih lai chuan amah en thei turin min din ṭhat tir a, ka bianga mittui la chambangte chu a tuai hul zui nghal bawk. Min en dan chu ka sawifiah thiam lo, rilru nâ hmel a pu ni maiin ka hria. Ka sam huh hnuang chu hnung lamah a hui kiang a, ka ṭah a chhuak em em tawh lo va, mahse ka chhungril erawh a pangngai lo nasa hle.

"Ka ngaihtuah hmanzia che lah i hre bawk si lo" ti hniam ruih hian a kut chu ka biangah a vah kual tir a, kei chu ka lo za mer mer a, tunah chuan ṭah chhuahna pakhatmah ka nei tawh lo. 

"Hma hun hre reng chungin ka ngaihven zui zel tho che chu a nih hi!" a aw chu a dam raih a, hriat nuam tawk chiahin a ring a, ka thinlung chhungril ber thleng tur khawpin a thusawi chu a fiah ṭha a ni.

"Numam" ti supin a rawn kun hniam a, ka hmui chu a hmui lumnaa khat leh nem zet chuan a rawn si ta, ka mur chhuah vek avangin ka phu uih a, ka kawr tlâng chu ka hmer nâ hle bawk. 

"Kha kha a ni lo'm ni ti tura min duh chu!?" a inlak hran rual chuan a ti thum chhal a, second khat pawh a hmang ral lo vang tih theih turin min rawn fawp leh nghal a, duhthaw deuhin min fawp mah se a dawnsawn a nuam em em tho. 

A kawr hnung lam hmer ṭawng ṭawng chungin ka lo fawp let ve a, chu erawh ka tum a ni lo. Ka taksa chu ka taksa a la ni ngei mai, mahse ka thunun theih piah lamin a danglam a ni. Ka fawh let ve tawn tawn vang nge ni a hma ai zawngin a duhthaw zual a, ka phurna te chu a nasa tial tial a, mipa ka fawhna hmasa ber mah ni se a va han nuam tak em, a dangdai bawk si. 

Kan inṭhen hrang chiah chu thawchham ang maiin ka thaw hlawi hlawi a, zep lovah chuan kham lo taka tui in ang vel ka ni. Ka awm dan chu a zahpuiawm ka ti a, mahse engkim chu ka thunun theih piah lam thil a ni tlat. Ka mitmeng reng reng chu a dik thei nghal lo lawk lo va, hmui tiche zeuha nui suk hian ka hmui chu a kutzungpuiin a rawn tawk a, chu thil ringawt pawh chuan min timur er er thei maw le. 

Ka mitah ni lovin ka âwm lamah chuan a mit a bur ta ngar ngar a, ka âwm chu ka en thuai a, ka taksa leh ka Bra hren mek thla chu a lo lang tlang vek thei titih a, ka inhup nghal chawih chawih a, awmzia erawh a awm thui lo hle. Ani lah chuan ngawi reng hian a en tlawk tlawk a, kal sawn ka tum chuan a la phal lo zui, he pa hian eng nge a hriat ni!

Rum mangkhenga ka en lai chuan a kawr hak lai chu a phelh ta mial mial a, ka mit chu eng thil dangah mah a fuh leh thei tawh lo. A âwm leh a taksa hrim hrim chu ka rin phak bakin a mawi a, chuti ang em ema taksa mawi leh tihrawl chhah ṭha chu ka la hmu ngai lo. A kawr lian zet mai min hak tir lai te chuan a taksa ngawr ngawr chu ka lo en a, mawina leh mi hip theihnaa khat a taksa chuan min ur ni mai te'n ka hre hial a ni. 

A nghawng lamah sakei ngho ang deuh mai ṭhi a awrh bawk a, chu thil ringawt pawh chu ka mak tih a tling leh khawp. Zah pawh dawn lovin ka kut chu ka lek kâng riai riai a, tim dai hian a âwm poh mawi em em leh tihrawla khat chhah ṭha zet chu ka tawk a, ka khawih ṭha ngam lo zawk. A taksa chuan min zem ni berin ka hria, zahna tlachham ang maiin a taksa chu ka khawih vel a, ka inthunun thei ngang lo a ni. 

"Ka insum theihna hi fiah tum miah suh" rawn ti thum bul tu chu ka chho en vat a, hawi thla lehin ka kut chu ka en a, ka awm dan leh ka thil lo tih mek chu ka hre chhuak zui nghal bawk. 

"Awi! Eng lo...ka" sawi tur pawh ka hre lo, ka ṭawngkam chu maimawm ril ang maiin a inzam kual vel vek a, ka dinna aṭang chuan ka va han kal sawn chiang tak em, a tlanin ka tlan a ni mah zawk. 

"Awi ka zak lutuk, Lalpa min pui hram teh" ti mawlh mawlhin ka sam chu ka ṭham vak vak a, a chang leh ka ṭhu a, a chang leh ka ding thul, awm dan tur chu ka hre tawh lo tak zet, tlan haw daih ka duh rum rum a, a theih ngawt si loh!

(End of Chapter 13)