𝐒𝐔𝐌𝐎 𝐃𝐑𝐈𝐕𝐄𝐑 𝐁𝐲 𝐇𝐚𝐯𝐚𝐥𝐢 𝐀𝐝𝐚𝐦 (𝐂𝐇𝐀𝐏𝐓𝐄𝐑 𝟏)

SUMO DRIVER

By

Havali Adam

Chapter 1

Boruak chu a thiang kâk a, ka nitei te an chhûngin an lo leng phei ve teh mial a, Pathianni ni lo se chu an lo leng kher lo maithei a ni. Chu bakah naute an nei hlim deuh chauh a, an naute thar chu kan hmu châk ve a, an lo leng chu a pawi kan ti lo hlawm khawp mai. Ka nite naute lah chu a la hmelṭha em em zui, duhawm tak a ni. A nu leh pa a chhun paw'n ka hre lo, a ngo bawk si, han lawm vel lah chu a hre reuh hle leh nghal a, ka awm ni leng peih hrim hrim. 

Ka nitei hi ka pa nau chiah a ni a, kum upat tawh lama pasal nei a ni a, a pasal chuan zu a inṭhin kher bawk nen ka ngaina vak lo. Keimah bik hi ka ni hrim hrim, ka unau dangte hi chuan an be ṭha em em a, kei ai ngawt chuan ka nite pasal paw'n a ngaina a, thil lei leh hawn pawh a uar zawk ṭhin. 

Dik tak chuan zu ni mi hi chu ka ngaina lo ve tawp, ka pa'n zu a in ngai loh vangte pawh a ni maithei a ni. Min biak te hian zu rim a nam deuh huam ṭhin bawk si a, rei kan inbe thei lo a ni ber. Ka ngainat loh ang chiahin min ngainat tum mah se min ngaina bik lo tih ka hre chiang em em a, sual tak erawh a ni paw'n ka hre chuang lo, kan inhnim hnai lo ve hrim hrim a ni. 

"Awi a hmelṭha reuh ê nite, in fapa duhawmzia hi, a chhun lo ve ve che u, hawn tawh lo mai rawh u" naute chhaih paha ka tih chuan ka u chiah Vli'n min rawn nghawk zawk a, a mitmeng aṭang chuan ka ṭawng sual tih ka hre chhuak nghal. 

"Numami ṭhin hi a! En chiang ta che, nitei a chhunzia kha a hriat vek alawm, pa Zothana pawh a ang tho, an fapa berin a nu leh pa a chhun loh te'n tu nge chhun se i tih reng reng a?" kan upa ber u Duhawmi chuan a rawn tih zawm nghal vat a, u Vli chu a nuih a lo zat hmel khawp. 

"Khaw maw ka tupa tê chu ka lo pawm ang e, hmeichhia ringawtin in pawm bik zel mai" ka pa'n a rawn tih chuan a lamah ka pawm phei a, ka pawmtir rualin ka nu nen an chhaih zui nghal a, u Vli chuan choka lamah min hruai phei ta daih bawk. 

"Ka nitei hriat lai hi chuan ṭawng fimkhur ṭhin rawh Numam, a rilru a tê si, i thu sawi pawh kha a hmel aṭang a haw leh tawh tih ka hrethiam vek. U Duhawmin a lo sawi mawi sak hlauh zawk a, chuti ni lo se chuan an haw tau leh tawh ngei ang" tiin u Vli chuan min zilh mawlh mawlh a, a sawi dik vek bawk si a, chhan let dan tur pawh ka hre lo. 

"Naute i lawm dawn chuan lawm tawp la, engmah an huat tur thil sawi chhuak tawh suh" tih leh choka aṭanga chhuah a rual nghal a, ka chhuak ve dawn chiah tihah kan upa ber u Duhawmi chuan min nam lut leh a, min zilh tur baka a lo kal ka ring lo. 

"U Vli'n min hrilh zo chiah" min zilhna thu a chhah chhuah hma chuan ka lo tih khalh a, ka chala nam deuh sawkin min nuih ver ver a, ka ring dik a ni chêk ang min zilhna thu pawh chu a chhak chhuak ta lem lo. 

"Ṭawng fimkhur tawh rawh Numam, ka nitei mizia chu i hriat kha" tih thu erawh choka aṭanga ka chhuah dawnah a rawn sawi hram a, ni e, ka ṭawng fimkhur chu a ngai ngei mai, ka nitei rilru tê lutuk hi chu a ninawm ve mah mah ṭhin. 

Ka ute pahnih min zilhna vang pawh a ni mahna naute ka pawm leh pawh chuan lawm pangngaiin ka lawm mai a, ṭawngkâin ka chhaih vak vak tawh kher lo va, ka ṭawng sual leh ang tih ka hlau a ni. Huatah an lo la hma bawk si, ka nite nupa lakah ka lungawi lo ru laklawh bawk nen ka pa'n chaw eia a sawm laite chuan ṭul lo ka lo ti khawp a, an bulah pawh ka awm rei peih ta lo. Tlai dar 3 vel a nih tawh tho avangin ka ute pahnih chuan ei rawng an bawl zui malh malh a, kei erawh naupang ber tih takah engmah tih pawh ka tum lo va, ei rawng bawl rual thiam rual chu ka ni ve tawh reng maw le. 

Lum ka tih deuh thut avangin kan in kawt lamah ka tei chhuak a, kan in leh a chheh vel hi a mawi ve ang reng a, Gate lian lutuk lo a awm bawk a, kan in bula thingte pawh ka pa'n Mizoram paw'n aṭanga a rawn ve ngat kha an ni hlawm a, Mizorama thingte nen chuan inang lo tak a ni. 

TV-a kan hmuh ṭhin ang mai hian thing hnah te chu a sin sei thlarh a, a kung a sang hlawm viau mah se in tihnawk zawngin zar a nei lo va, a hnah ro tla pawh a tam em em ngai lo. Chutia van lam hawi zawnga ka dah voh vôh lai chuan ka piah maiah thawm a rawn awm a, phu nasa tak ka ni. 

"Eng nge i tih a?" ka ṭawngkam hawihhawm leh hawm loh pawh ngaihtuah miah lovin ka ti leh ta phawng a, chu lai hmun daih daiha ka nitei pasal a lo awm hlawl chu mak ka ti ve êm a, ka insum hman lo a ni ber. 

Ka zawhna chhang miah lo hian min kal pel a, min kal pelh lai chuan zu rim ka hre nghal a, a rukin a lo in a ni ngei ang. In chhungah a hmel ka hmu tawh lo ka ri ru reng a, zu chu a in a ni hrim hrim. A in duh a nih te chuan duh leh in chhungah te in se, a theih reng ang chu. Ni lo, ka pa'n a phal teuh lo mai. 

Ni dawn tak e, chumi hre ran chuan a rukin a lo in a ni ngei ang. Ka nitei pawh hi a, heti ang pasal zu in mi neih duh reng reng. PHE Department-ah hna te chu nei mah se sum chauh hi hlimna a ni kher paw'n ka hre lo, ka ngaih dan chuan zu in mi pasala neih chu ṭha ka ti lo ve hmiah a ni. 

Zan inkhawm kan duh hlawm avangin dar 5 leh a chanve velah chaw kan ei a, ka va han ei tui kher êm. Ka ute pahnih hi chu ka nu ai paw'n chawhmeh siam thiam ka ti zawk, pasal min neihsan daih ang tih te a nia ka hlauh ni! 

Zanriah kan ei kham aṭanga minute 20 velah u Duhawmi chuan sawmtu mipa a rawn nei nghal a, chu pawh u Rinawma bawk. An inngaizawng ti dawn ila u Duhawmi hian a len chhuahpui ngai bawk si lo, mahse u Rinawma hi chuan a rawn rim ṭhinin ka hria, nge a rawn leng mai mai ṭhin zawk, an awm dan tak hi ka hrethiam chiah bik lo.

Ka nite haw hnu lawkah u Vli ṭhiante hmel kan hmu leh nghal a, ka ṭhiante pawh an rawn lang vat a, inkhawm zanah hi chuan min rawn sawm ngei ngei zel. Zep lovah chuan kan hausa ve a, veng khat mi hausa tih tham khawpa hausa kan ni ve a, tlawntu leh in lengte hi kan nei awl lo ṭhin. 

Ṭhian lamah ni se min kawm duhtu an tam em em a, mahse a ṭhen hi chu kan hausak vanga min hnaih an ni tih ka hre tlang vek zel. Mipa lam aṭang pawh min rawn hnim hnai deuhtu hi chu ka dawng awl lo va, mahse ka rilru erawh chuti ang lam hawi zawng chuan a la awm ngai lo, chu bakah min lo be ṭhintute ho chu ka nu leh pa'n an duh dawn chuang lo tih ka hre chiang ve êm mai. 

Inkhawm kan ban hnu chuan ka ṭhiante an lo leng kawi leh a, ei tur te kan siam a, kan hlim tlang khawp mai. Kar tawpah hi chuan kan inkawm duham ve hlawm ṭhin a, ni tin College kalin lehkha kan zir ngawt ngawt a, zing lam aṭanga mood a fuh loh phei chuan ninawm ve thei tak a ni. English Subject-ah Honour ka tum ruh ve bawk si a, ka ṭhiante erawh Education leh History tih velah an tum thungin ka hria. 

Kan ṭhianho hi pathum kan ni a, hmeichhia vek ni mah ila a chang chuan mipa han kawm ve zeuh zeuh pawh kan nei tho, mahse kan kawm tam lo khawp. Ka ṭhiante pawh keini ang thovin chhungkaw rethei tak an ni lo va, tam vak lo mah ila kan pathum chauh pawh chuan kan hlim tâwk ve em em ṭhin. 

Kei hi Hmingthanpuii ka ni a, tunah hian 1st Year zirlai niin College ka kal ve mek a, kan unau zinga naupang ber ka ni bawk. Kan unau hi hmeichhe hlang kan ni a, ka nu leh pa paw'n fa dang neih an tum tawh lovin ka hria. Ka pa hi Department of Food, Civil Supplies & Consumer affairs lamah hna a nei ve a, amah hi MCS a ni hrim hrim bawk a, a hna chelh vangte pawh a ni ang zing kar hma tak taka lo leng lut pawh kan nei nual ṭhin. Chung mite chu hna dil an ni tlangpui zel a, ka pa chu hna dil kawnga pui turin an rawn ngen hi a ni deuh ber mai. Ka nu pawh a awm awl mai mai lo va, Bank lamah a thawk a, keini an fate chuan an zar zovin nun nuam tak kan hmang a ni. 

Kan upa ber u Duhawmi hian ka pa hnung zuiin MCS nih a tum a, ka pa paw'n a thlawp ṭha thei khawp. Ka u chiah u Vli erawh Designing lamah a tui teh daih a, ka nu leh pa paw'n a tuina lam chu sawiselna an nei lo va, tunah hian Delhi lamah kum 3 a zir tawh a, kum 1 a la hmabak a, chawlh hmangin Mizoramah a rawn awm rih bawk. Kei ve thung chuan tum mumal tak pawh ka la nei lo va, naupang ber ka ni bawk nen ka duh dûh danin ka tal tawp a ni mai. 

Amaherawhchu hausak avanga ruih theih thil emaw sual lam kawng zawh chu ka duh lo bûr a, chuvang pawh chu a ni ang ṭhian kawm tur pawh ka thlang fimkhur thei hle. Ka ṭhian kawm tak tak te chu mi pangngai chin leh ruih theih thil lama fihlim an ni hlawm a, heti ang lam kawngah hi chuan ka nu leh pa paw'n min ngaihtuah lo ve khawp mai. 

"Saw i nitei pasal" ka ṭhiannu Mawitei hawina lam chu ka hawi phei nghal a, ka nitei pasal pa Zothana chu a lo ni tak tak a, eng nge kan College bulah a rawn tih teh daih le, vawiin te chu thawhlehni a ni a, a hnaa kal awm tak! 

"A ho em mai, thil ei ang" tiin kan college thlang lawka dawrah chuan ka kalpui ta daih a, ani paw'n min rawn zui ve mai a, pa Zothana chu ka hmu peih vak rih lo a ni ber, ani paw'n min hmu peih chiah lo vang, min hmu pawh ni se min hmuh loh der daih ka ring. 

Damsam loh avangin kan ṭhiannu Hlimpuii a rawn kal thei lo va, Mawitei nen kan pahnih chauhin kan inzui deuh chawt a, thil kan ei lai chuan haw huna tlawh kawi kan tum thu te kan sawi dun melh melh a, an in a hla lutuk lo va, Taxi hmang lovin ke paw'n kan kal theih mai ka ring. 

Chawhnu lamah chuan College-ah kan ṭhu leh ngawt ngawt a, mawng a kham duh thei khawp mai. First Year chiah kan la nih avangin kan inṭhut pawlh vek a, Section ang zawngin min ṭhen hrang thung. Kan ban hma period khat la awmah sir Francis-a a lo lut a, Mawitei chuan min chhaih leh nghal ngawt pek a, min chhaih hi a la bansan thei lo a ni e. 

Sir Francis-a te hi keini ang thova chhungkaw hausa leh chhungkaw zahawm tak an ni a, kan College-ah zirtirtu hna a thawk a, mipa hmelchhe zawk zawk a ni lo chiang khawp. A hmel a felfai a, a ngo a, zirlai naupang paw'n an star nasa thei khawp mai. Tarmit a vuah a, mahse a mit ṭhat loh vang a ni paw'n ka hre lo. 

Mit ṭha lo êm tur chuan a la tlangval mah mah ka ti, mahse chungte chu zirlai naupang ṭhenkhat chuan inhmeh an ti tlat a nih chu! Kei erawh chuan chuti teh vakin ṭha ka ti lo va, mahse a fel ka ti em em thung. Kan ṭhiante'n min han chhaih fiam ve tak na a, ka rilruah engmah a awm thei lo a ni. 

Ka ṭhiante min chhaih theih tur tawk chiahin Sir Francis-a nen chuan kan lo awm dun ve tawh khanglang a, min la chhaih reng pawh chu a awm viau mai. Anmahni nghaka ka awm laiin ka bulah Sir Francis-a chu a rawn ding ve teh hlawl a, chu chu College kan kal aṭanga kar khatna vel ni tain ka hria. Chumi ni chuan ka ṭhiante pahnih chu an rei fal em em a, eng nge a chhan pawh ka hre lo. Sir Francis-a lah chu ka bulah a ding ngawi reng bawk si, khami ni kha chuan kan zirtirtu a ni tih pakhat mah ka hre lo tak tak. 

Ka kal sawn tur chuan a File ken chu ka su palh alawm le, inthiam lo zetin ka chharpui a, chuti anga kan awm lai vel chu ka ṭhiante pahnih chuan a rawn hmu leh kher bawk a, chumi ni aṭang chuan min chhaih ta char char a ni. Sir Francis-a chuan American Boy Band lar tak Backstreet Boys zinga mi an deuh a nei a, mahse Backstreet Boys-ah hmelṭha tih emaw duh ka nei hauh lo. A awmzia chu a hmel leh amah hrim hrim chu hmeichhe dang angin ka ngaihven lo va, amah paw'n min ngaihven chuang paw'n ka hre lo. 

Westlife zinga mi te chu han ang se hmelṭha ka ti ngei ang, Westlife hi chu ka duh ve chiang em mai. A bik takin an Lead Singer Shane Filan-a ka duh zual a, ka mitah chuan a hmelṭha hi a ni tawp mai a ni. A zai thiam em em bawk a, Backstreet Boys nen chuan tehkhin chi ah pawh ka ngai lo. A zai pawh an inzai thiam hleih ka ti lutuk, ka room-ah pawh Westlife thalak chu ka bel khat tuar a, chuti ang khawp chuan ka duh ve a ni. 

Hmeichhe lamah erawh Avril ka ngaisang leh em em a, zai thiam ka ti a, Britney Spears te pawh zai thiam tho mah se Avril ka duh daih zawk. Westlife thlalak ang thovin Avril thlalak pawh ka room chhungah ka bel nual a, a chang chuan a mit line ang te'n ka line ve hial ṭhin. U Vli hi chuan ka duh a hre chiang bawk a, Delhi aṭanga a rawn haw te hian Westlife thlalak hi min lo hawn ṭhin a, an Album CD leh Cassete te min hawn hi chuan eng dang ka ngai tawh lo. 

Mite neih tam tak tâk hmain DVD kan nei a, kan vengah chuan a nei hmasa pawl kan ni maithei a ni. TV nen thlun zawmin DVD-ah CD chu kan rawlh lut a, ni leng paw'n Weslife zai hi chu ka en peih ṭhin. Khaw chhiat lai hi chuan chawlh kan ngah thei hle a, mahse College Principal-in chawlh a puan ṭhin vang a ni. Kan inah kan awm deuh ber zel a, ruah sur laia Film en chu duh lo kan awm ngai lo. A chang leh kan muhil thul, awm nuam ve thei tak chu kan ni. 

Kan ina kan inhmuh khawm hi chuan thlalak keng ṭheuhin kan en khawm ṭhin a, Mawite chuan Robbie Williams a duh tlat a, a ni pawh kei ang tho. Robbie Williams-a hla Angels te, Feel te chu a duh ngawih ngawih a, kan in play khum vak vak zel. Hlimpuii lahin Bon Jovi a duh bawk a, keini ṭhianho chu khawthlang mipa te'n min tibuai ve chiang a ni. Kan hming leh hmel pawh an rawn hre awm tawp si lo, keini lah chuan kan lo vei em em ringawt. 

"Numam, vawiin tlai chu Counter-ah va kal ta che? Vli a damsam bawk si lo, Duhawmi lah lehkha a zir bawk si" chhun thingpui in laiin ka pa chuan a rawn ti a, ka lo buk khum zeuh a, mahse thil ka hre chhuak leh ta thut.

"Khawiah nge Counter a awm pawh ka hre lo, eng Counter ber nge i sawi?" ka tih chuan Chanmari lamah daih a awm thu a sawi a, ka peih leh ta lem lo khawp mai, ka kal a nih chuan Taxi ka hmang ngei ang. 

"Motor khalh thiam la chuan kan motor zinga khawi emaw ni ber saw chu i khalh chhuak ni mai tur, i khalh thiam der si lo" nui var var hian ka pa chuan a rawn ti leh a, remchangah lain Taxi Fare ka dil ta zaih.

"Bus paw'n a kal theih reng alawm, a tlawm zawk fê leh nghal" ka nu chuan a lo ti deuh hmak a, ka nu hi chu Bank-a thawk tih takah pawisa a va han ren chiangkuang ve tak, Bus-a kal chu ka tum teuh lo mai. 

"Bus te chuan Traffic a jam rei thei si, cheng 20-in kan in aṭang Chanmari thleng chu a chuan theih vek" ka ti ve ta deuh hmawk hmawk a, ka pa chu a lo ṭhen ṭhaw a, chutah ka nu bawk chuan

"Bus-in cheng 5" a rawn ti leh hram a, titau bur bur chungin ka tho hmak a, Taxi Fare tur min pe lo mah se Bus chuan ka kal kher lo vang, duh leh ka pawisa lo khawl sa ka hmang mai ang, chu bakah Mawitei emaw Hlimpuii chu kalpuiah sawm ka tum hrim hrim. 

In aṭanga ka chhuah dawn chuan Taxi Fare tur chu ka pa'n min pe leh lawi a, kei pawh ka titau rei thei leh ta chuang bik lo. Rilru hlim leh pangngai zetin in aṭang chuan ka chhuak a, ka ṭhiante kalpuiah ka sawm ta ngei a, mahse Hlimpuii chu a lo hman lo thung. Mawitei nen Chanmari lamah chuan kan kal a, theihnghilh ka nei leh ta. Ka pa chu ka call a, khawi lai vel takah nge Counter a awm ka hre lo a ni. 

Thingtlang lama kan chhungte hnen aṭanga thil thawn ka chang dawn a ni a, vawi khat mah Counter-ah ka la kal ngai bawk si lo, hriat loh pawh chu a awm ve tho mai. Ka pa chuan a awmna lai tak chu ṭha deuhin min hrilh a, kei paw'n ka ngaihruat thiam nghal mai bawk. 

Counter awmna lai vel awm ang chu minute 15 hnu velah kan thleng phei a, thil inziak chu kan chhiar phei zel a, a tawpah chuan Sumo Counter chu kan thleng ve thei ta hram e. Putar hmel deuh hian a lo nghak a, kan tih tur leh kan kal chhan te min lo zawt siam siam a, a upat hmel viau tawh naa a ṭawng duh barh barh khawp. A hawihhawm a, biak a nuam a, kan thil sawi duh tur a chhak chhuak thiam hle a, Counter lo nghak tur tak pawh a nih hmel, a ṭawng duh êm mai. 

Dar 1 vela thleng phei kan ni a, dar 2-ah pawh Sumo chu a rawn la thleng lo va, ṭhut ngawt ngawt chu ninawm ka ti ru tawh hle a ni. Dar 2 leh a chanve velah chuan HAUHNAR TRAVEL Sumo chu kan ṭhutna Counter zawnah tak chuan a rawn ding a, chu Sumo chu kan chan Sumo a nih tawh ngei ka ring bawk. 

Motor chhung aṭang chuan Driver lukhum hma thlawk khum hi a lo chhuak a, a chhuah hnu lawkah mi dang pawh an lo chhuak sap sap a, a ṭhen chu la naupang deuh deuh an ni nghe nghe. Driver chuan passenger bungruate chu a thiar thla malh malh a, keini ṭhian dun chuan kan lo en kar a, a la buai hmel bawk si a, lo biak buai chu ka duh leh ta rih lo zawk a ni. 

An rawn thlen tirh kha chuan ka ning ru tawh bawk nen lo ṭawngkhum deuh hlak kha ka duh a, a rawn thleng ta cheng a, chawp leh chilhin ka rilru a danglam nghal vek a tih theih. Passenger zinga naupang pakhat chuan thil lei a ngen a, a pa lah chu a retheih hmel ropui bawk si, ka khawngaih kher mai. 

"Kha le, hei hian thil chu i lei dawn nia aw, eng nge lei i duh a?" tiin ka pawisa ken lai chu ka va pe ta nge nge a, ka hmu reng thei lo tlat alawm, an pafa awmdan chuan ka rilru chhungril a dek pha tlat a ni. 

"A ngai lo Mami, a ngai miah lo a nia, a thil duh leina tur te chu ka nei ve alawm" a pa chuan lo ti ve teh mah se ka pek tawh miau avangin pawisa chu lak let ka tum teuh lo, an hmel aṭang paw'n mi hausa tak an ni lo tih a hriat ngawih ngawih. 

"Kan lawm e Mami, i fel hle mai" min pek luih a tum ngial pawha ka lak duh loh avang chuan a rawn ti ta tawp a, ka chhungril chu a hlim veng veng a, ka mi ṭanpui hmasa ber a ni hial lo maw le, hausa ve hle mah ila mi dang hi pawisa ka la pe mai mai ngai lo. 

"Awm sawn rawh Numam!" Mawitei aw lo chhuahna lam ka hawi rualin ka lua thil eng emaw ni a lo tlak avang chuan ka pai chhawn chhawn a, ka tlu lek lek tawh zawk a, mahse tha chak zet hian ka tluk hmain min rawn chelh ding ta chat. 

"Awi, a va'n na reuh em em" ti niah niahin min lo chelh dingtu lam chu ka hawi a, ka dar tawn tawn nghet zeta chelhtu chu tu dang ni lovin Sumo Driver kha a lo a ni a, kan inen chiang ang reng bawk nen a hmel chu a hlauhawm lek lek ka ti. 

A mitmeng chu a thuk hriam raih a, insual a hrat hmelin a hmel chu a rorum tawp, thinrim reng hmel a pu ni berin ka hria. A lo berah kei ai chuan a upa dawn tih ka chiang, ka mitah tak chuan a en run a, chungte chuan chhungril lam aṭang zamna a siam chho ṭan a, ka thin phute chu a rang sâwt em em bawk a, ka dar a chelhna chu a na tawlh tawlh leh nghalin ka hria. 

Ka tal deuh hlek rualin ka dar a chelhna chu a thlah thuai a, ka mita en tawh lovin ka lu chu a en chik zui nghal hle a, kei ai dâiha a sân avangin ka chhip chu a en awlsam hle. Thingtlang mi a nih ngei ka ring a, thingtlangah chuan a pa lian pawl tak pawh a ni ngei bawk ang. 

"Numam" Mawitei chuan a rawn ti leh a, harh chhuakin ka ṭhiannu lam chu ka hawi a, ka bul a rawn thlen rualin min ngaihtuah hmel fê hian ka lu chu a en dik a, Sumo Driver hawihhawm lo zet erawh motor chungah a lawn leh daih tawh.

"Fimkhur ve ta che, mi an awm tih i hmu miah lo em ni?" motor chunga che mial mial pa dinna lam hawi chho chungin Mawitei chuan a ti hlawk hlawk a, ṭawng lo tura lo khap pawh ka tum bik chuang lo, a hawihhawm lo ve êm a ni.

"Thingtlangmi tih hriat lutuk" ring vak lo hian Mawitei chuan a tih zawm leh nghal a, Sumo Driver pa chu a rawn hawi thla rang khawp mai, ka ṭhiannu thu sawi chu a hre pha a ni hrim hrim, tlêm chuan nuam lo ka ti ve ta deuh.

"Duh tawk rawh Mawite, a tawk tawh, ka ṭha vek tawh e" tiin a beng bulah chuan ka hrilh ru sep a, ani erawh a thin a la rim hmel hle thung a, dik tak chuan ka lung a awi chiah bik lo, ka ṭhat leh ṭhat loh te sawi ve tal tur a nia, ani erawh ṭawng thei lo ang maiin a ngawi tlat a nih kha! 

"Aw kha kha, khami kha keimahni" meng nur nanga thil intuam a en run lai chuan ka lo ti a, ani pawh kan lam rawn hawiin motor chung aṭang chuan a lo chhuk a, thil intuam hmaa thu inziak chu chhiar nawn lehin

"Numami" a ti thum ṭial ruih a, rang zeta a hmel ka en chuan a thil ken lai bawk chu a lo la en run a, eng vanga ka hming kher kher lo inziak nge an nih reng reng le, ni dangah te chuan ka pa hming emaw ka nu hming emaw an ziak ṭhin si a, che chhuak thutin

"Khawi le" tih leh a thil ken chu a kut aṭang pawh thlak ka rual a, kut khing khat chuan ka va han keng zo lo chiang tehreng em, leiah ka thlauh ṭep nghe nghe a, min rawn pui hman lo se chu ka thlauh chiang khawp ang. 

"Ka keng thei" tih khum leh hmakin ka khai a, ka bag aṭang thawn man tur pawisa la chhuakin a kutah chuan ka hmehbel zui nghal bawk a, engkim chuan ka mood zawng zawng a tichhe zual vek a ni. 

"Kal ang" tiin Mawitei chu ka kalpui hmawk hmawk a, ka thil khai lah chu a la rit phian zui, mahse Sumo Driver hmuh lai chuan rit ti hmel put ka tum lo bur, hawihhawm lo ropui bawk si. 

End of Chapter 1